Jeremías
50 Tu̱ʼun yóʼo kúú ña̱ ni̱ka̱ʼa̱n Jehová xíʼin ta̱ Jeremías xa̱ʼa̱ ña̱ kundoʼo ñuu Babilonia, ñuʼú nu̱ú ndóo na̱ caldeo:
2 “Ka̱ʼa̱nndó xa̱ʼa̱ ña̱yóʼo xíʼin ndiʼi na̱ ñuu.
Ndaniʼindó iin señal ta ka̱ʼa̱nndó xa̱ʼa̱ña.
Kǒo chise̱ʼé yuʼúndó xa̱ʼa̱ nda̱a̱ ni iin ña̱ʼa.
Ka̱ʼa̱nndó: ‘Xa̱a̱ ku̱chiñuna nda̱kiʼinna ñuu Babilonia.
Sa̱kúkaʼanna nu̱ú ndióxi̱ ña̱ naní Bel.
Ni̱yi̱ʼvíní ndióxi̱ ña̱ naní Merodac.
Ku̱kaʼanní nu̱ú ndiʼi ña̱ʼa ña̱ ndásakáʼnuna.
Ndióxi̱ ña̱ kini* ña̱ ndásakáʼnuna ni̱yi̱ʼvíníña’.
3 Iin ñuu ña̱ ke̱e chí norte ki̱xi ka̱nitáʼan xíʼinña.
Kininí ke̱ʼéna xíʼin ñuʼúña ta ndiʼi na̱ xíniña yíʼvinína;
kǒoka nda̱a̱ ni iinna ndóo nu̱úña.
Na̱ ta̱a xi̱nuna ku̱a̱ʼa̱nna ta saátu kití xi̱nurí ku̱a̱ʼa̱nrí”.
4 “Ki̱vi̱ kán ta saátu tiempo kán, káchi Jehová, na̱ ñuu Israel xíʼin na̱ ñuu Judá inkáchi kixina. Kuakuna kakana ta inkáchi nandukúna Jehová Ndióxi̱na. 5 Nda̱ka̱tu̱ʼunna ndáa yichi̱ kúú ña̱ ku̱a̱ʼa̱n chí Sion ta kotona chí yichi̱ kán, ta kachina: ‘Naʼandó ná ndikó tukuyó kooyó na̱ ñuu Jehová ta saxínuyó trato ña̱ ke̱ʼéra xíʼinyó, ña̱ koo ndiʼi tiempo ta kǒo na̱ nandóso-ini xa̱ʼa̱ña’. 6 Na̱ ñui̱ ni̱xa̱a̱na ndu̱una nda̱a̱ táki̱ʼva íyo iin tiʼvi ndikachi* tí nda̱ñúʼu. Mií na̱ pastor na̱ xi̱ndaarí kúú na̱ sa̱ndáñúʼurí. Ni̱xa̱ʼa̱nna xíʼinrí chí yuku̱ ta saátu chí xi̱kí ta ta̱xina ña̱ ni̱xi̱ka miírí kán. Tasaá na̱ndóso-inirí xa̱ʼa̱ ñuʼú nu̱ú xi̱ndakindee̱rí. 7 Nda̱a̱ ndáaka na̱ xi̱ndani̱ʼírí xi̱xixinarí, ta na̱ sáa̱-ini xíniñaʼá xi̱kachina: ‘Kǒo ku̱a̱chi kúúmiíndi̱, saáchi miína ni̱ki̱ʼvi ku̱a̱chi nu̱ú Jehová, ta̱ kéʼé ña̱ nda̱kú ndiʼi tiempo, Jehová ta̱ xi̱ndaa-ini na̱ táʼanna na̱ xi̱ndoo xi̱naʼá’”.
8 “Keendó ñuu Babilonia,
kunundó ta va̱ása kundookandó nu̱ú ñuʼú na̱ caldeo,
koondó nda̱a̱ táki̱ʼva íyo kití tí siʼna kánuu ku̱a̱ʼa̱n chí nu̱ú ndiʼikarí.
9 Saáchi xa̱a̱ kánai̱ ku̱a̱ʼání ñuu ña̱ náʼnuní ña̱ kee chí norte
ña̱ chindaʼíi̱ ku̱ʼu̱n kanitáʼan xíʼin ñuu Babilonia.
Na̱yóʼo xa̱a̱ íyo tu̱ʼvana ña̱ kanitáʼanna ta kuchiñuna ndakiʼinnaña.
Flechana íyonú nda̱a̱ táki̱ʼva íyo flecha iin ta̱a ta̱ xíni̱ní kanitáʼan,
kǒo kúndáʼvi-inina xínina se̱ʼe inkana ta xáʼnína ndiʼina;
mií nu̱ú xíniñúʼu kanina flecha káninanú.
10 Nda̱kiʼinna ndiʼi ña̱ʼa ña̱ íyo chí Caldea.
Ndiʼi na̱ ná ndakiʼin ña̱yóʼo va̱ʼaní kunina”, káchi Jehová.
11 “Saáchi ndóʼó xi̱kusi̱íní-inindó ta nda̱a̱ xi̱keʼéndó vikó
tá xi̱ndakiʼinndó ña̱ʼa ña̱ xi̱kuu herenciai̱.
Nda̱a̱ xi̱xata xa̱ʼa̱ndó nu̱ú ku̱ʼu̱ nda̱a̱ táki̱ʼva kéʼé iin si̱ndi̱ki̱ loʼo
ta xi̱ndaʼyi̱ndó nda̱a̱ táki̱ʼva kéʼé iin kuáyi̱ che̱e.
12 Sa̱kúkaʼannína nu̱ú siʼíndó.
Ñá sa̱káku ndóʼó nda̱kavaní-iniñá.
Kotondó, ñákán kúú ñá loʼoníka ndáyáʼvi nu̱ú ndiʼika na̱ ñuu,
íyoñá nda̱a̱ táki̱ʼva íyo ñuʼú yi̱chí nu̱ú kǒo ti̱kui̱í, nu̱ú kǒo nda̱a̱ ni iin ña̱ʼa.
13 Xa̱ʼa̱ ña̱ sáa̱ní Jehová, kǒoka na̱ kundoo nu̱úña;
kindo̱o miívaña.
Ndiʼi na̱ ná ya̱ʼa chí ñuu Babilonia yi̱ʼvínína tá ná kuninaña
ta kusi̱kindaanaña tá ná kunina ndiʼi tu̱ndóʼo ña̱ ndo̱ʼoña.
14 Ndiʼi táʼví xa̱a̱ kundita tu̱ʼvandó ña̱ kanitáʼanndó xíʼin ñuu Babilonia,
ndiʼi ndóʼó na̱ xíni̱ kuniñúʼu kuxu̱n.*
Kanindóña ta kǒo ndataánva̱ʼandó* nda̱a̱ ni iin flecha,
saáchi nu̱ú Jehová kúú ña̱ ni̱ki̱ʼviña ku̱a̱chi.
15 Ndiʼi táʼví ndeéní nda̱ʼyi̱ kóʼóndó* ña̱ va̱ʼa na̱ʼa̱ndó ña̱ xa̱a̱ ki̱xáʼandó kánitáʼanndó xíʼinña.
Ñuu yóʼo xa̱a̱ nda̱taxiña miíña.
Nama̱ña* xa̱a̱ ndi̱ʼi-xa̱ʼa̱ ndiʼiña ta ni̱ko̱yo ndiʼiña,
saáchi mií Jehová kúú ta̱ ndátiin ku̱a̱chi xíʼinña xa̱ʼa̱ ña̱ ke̱ʼéña.
Ná chaʼviña xa̱ʼa̱ ña̱ ke̱ʼéña.
Keʼéndó xíʼinña nda̱a̱ táki̱ʼva ke̱ʼé miíña.
16 Kǒo taxikandó koo na̱ chíʼi chí ñuu Babilonia ta saátu na̱ sákee.*
Xa̱ʼa̱ ña̱ kuni̱na kaʼnínana xíʼin espada, iin tá iinna ndikóna ku̱ʼu̱nna chí ñuuna,
iin tá iinna kununa ku̱ʼu̱nna chí nu̱ú ñuʼúna.
17 ”Na̱ ñuu Israel íyona nda̱a̱ táki̱ʼva íyo ndikachi tí ni̱ta̱ni̱.* Ni̱ta̱ni̱na ku̱a̱ʼa̱nna i̱xaa ndikaʼa.* Siʼna ta̱ rey ñuu Asiria kúú ta̱ xa̱xírí ta tándi̱ʼi ta̱ rey Nabucodonosor* ta ñuu Babilonia kúú ta̱ chi̱chi lekerí. 18 Ña̱kán ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Taxii̱ castigo ndaʼa̱ ta̱ rey ñuu Babilonia ta saátu ndaʼa̱ ñuʼú nu̱ú xáʼndachíñura, nda̱a̱ táki̱ʼva ta̱xii̱ castigo ndaʼa̱ ta̱ rey ñuu Asiria. 19 Taxii̱ ña̱ ná ndikó tuku na̱ ñuu Israel chí nu̱ú ni̱xi̱yo yita* ña̱ xi̱xaxína, ta kaxína yita ña̱ íyo chí Carmelo ta saátu chí Basán. Nda̱a̱ xa̱a̱-inina* kaxína yita ña̱ íyo chí yuku̱ ña̱ kúú kuenta na̱ tribu ta̱ Efraín ta saátu chí Galaad’”.
20 “Ki̱vi̱ kán ta saátu tiempo kán, káchi Jehová,
nandukúna ku̱a̱chi ña̱ ni̱ki̱ʼvi na̱ ñuu Israel,
soo kǒoña ndani̱ʼína,
nandukúna ku̱a̱chi ña̱ ni̱ki̱ʼvi na̱ ñuu Judá soo kǒoña ndani̱ʼína
saáchi yi̱ʼi̱ koo káʼnu-inii̱ xa̱ʼa̱ ndiʼi na̱ ná taxii̱ kutaku”.
21 “Kúáʼan kanitáʼún xíʼin na̱ ndóo chí nu̱ú ñuʼú ña̱ íyo chí Merataim ta saátu xíʼin na̱ ndóo chí Pecod.
Kaʼní ndiʼina ta ná ndiʼi-xa̱ʼa̱ va̱ʼana”, káchi Jehová.
“Keʼé ndiʼi ña̱ xa̱ʼndai̱ nu̱ún.
22 Táku̱ ña̱ íyoní ku̱a̱chi chí país,
ña̱ kúu iin tu̱ndóʼo káʼnu.
23 Martillo ña̱ káni ñuu ña̱ íyo nu̱ú ñuʼú yóʼo cha̱chi válíña ta ndi̱ʼi-xa̱ʼa̱ña.
Ndiʼi na̱ ñuu na̱ xíto ña̱ ndo̱ʼo ñuu Babilonia yíʼvinína.
24 Chi̱ndúʼi̱ iin trampa ta yóʼó ñuu Babilonia va̱ása níkiʼún kuenta
ta nda̱kavaún.
Nda̱ni̱ʼína yóʼó ta nda̱kiʼinna yóʼó ku̱a̱ʼa̱n xíʼinna,
saáchi xíʼin Jehová kúú ña̱ xi̱kuumiíún ku̱a̱chi.
25 Jehová xu̱nára nu̱ú táanva̱ʼara ña̱ʼa
ta ta̱vára ña̱ʼa ña̱ kuniñúʼura ña̱ kanitáʼanra xa̱ʼa̱ ña̱ sáa̱níra.
Saáchi táta káʼnu Jehová, ta̱ xáʼndachíñu nu̱ú na̱ ángel íyo iin chiñu ña̱ keʼéra
chí nu̱ú ñuʼú na̱ caldeo.
26 Nda̱a̱ xíkáva̱ʼa kixindó kanitáʼanndó xíʼinña.
Kunándó ndiʼi nu̱ú ndátaánva̱ʼana ña̱ʼa ña̱ chi̱ʼina.
Chindoo koʼndondó ña̱ʼa ña̱ ndakiʼinndó nda̱a̱ táki̱ʼva chíndoo koʼndona trigo.
Sandíʼi-xa̱ʼa̱ va̱ʼandóña.
Ná kǒo kindo̱o nda̱a̱ ni iin na̱ yiví kán.
27 Kaʼníndó ndiʼi si̱ndi̱ki̱ yu̱ta* sa̱na̱na.
Ná ku̱ʼu̱nrí chí nu̱ú kaʼnínarí.
Ndáʼvinína, saáchi xa̱a̱ ki̱xaa̱ ki̱vi̱ ña̱ ndatii̱n ku̱a̱chi xíʼinna,
tiempo ña̱ ndakiʼinna castigo.
28 Táku̱ ña̱ xínuna,
na̱ ke̱e chí Babilonia kúúna
ña̱ va̱ʼa ka̱ʼa̱nna chí Sion ña̱ xa̱a̱ ndátiin Jehová Ndióxi̱yó ku̱a̱chi,
ndátiinra ku̱a̱chi xa̱ʼa̱ templora.
29 Kanandó na̱ ndíso kuxu̱n ná ku̱ʼu̱nna kanitáʼanna xíʼin Babilonia,
kanandó ndiʼi na̱ xíni̱ kuniñúʼu kuxu̱n.
Kundoondó sa̱táña ta kǒo taxindó kunu nda̱a̱ ni iinna.
Ná chaʼviña xa̱ʼa̱ ña̱ ke̱ʼéña.
Keʼéndó xíʼinña nda̱a̱ táki̱ʼva ke̱ʼé miíña.
Saáchi ni̱nuní ku̱niña nu̱ú Jehová Ndióxi̱ ta̱ yi̱i̱, Ndióxi̱ na̱ ñuu Israel.
30 Xa̱ʼa̱ ña̱kán kuvi na̱ va̱lí kúa̱an kundoona chí nu̱ú ndákutáʼan ku̱a̱ʼá na̱ yiví,
ta ki̱vi̱ kán kuvi ndiʼi na̱ soldado”, káchi Jehová.
31 “Yi̱ʼi̱ íyoi̱ contra xíʼin yóʼó ñuu Babilonia ña̱ so̱ʼoní,* káchi táta káʼnu Jehová, ta̱ xáʼndachíñu nu̱ú na̱ ángel,
saáchi kixaa̱va ki̱vi̱ ña̱ ndatii̱n ku̱a̱chi xíʼún, tiempo ña̱ taxii̱ castigo ndaʼún.
32 Yóʼó ñuu ña̱ so̱ʼoní, kachiʼún* ta ndakavaún,
ta kǒo na̱ ndaniʼi yóʼó.
Chikai̱ ñuʼu̱ ndiʼi ñuu ña̱ kúúmiíún
ta kaʼmiña ndiʼi ña̱ʼa ña̱ íyo yatin xíʼún”.
33 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel:
“Na̱ ñuu Israel xíʼin na̱ ñuu Judá xóʼvi̱nína,*
na̱ ñuu na̱ nda̱kiʼin-ñaʼá sásina nu̱úna.
Kǒo xíínna taxina ña̱ ndikóna.
34 Ta̱ nda̱satáñaʼá ndakúnívara;
Jehová ta̱ xáʼndachíñu nu̱ú na̱ ángel kúú ki̱vi̱ra.
Ta̱kán kúú ta̱ viíní ndatiin ku̱a̱chi xíʼin na̱ ñuura,
taxira ña̱ viíní kundoona
ta taxira ña̱ ná kixi tu̱ndóʼo nu̱ú na̱ ñuu Babilonia”.
35 “Iin espada sandíʼi-xa̱ʼa̱ña na̱ caldeo, káchi Jehová,
ndiʼi-xa̱ʼa̱ na̱ ndóo chí ñuu Babilonia, na̱ níʼi yichi̱ nu̱úna ta saátu na̱ ndíchi.
36 Kixi iin espada ta sandíʼi-xa̱ʼa̱ña na̱ profeta vatá* ta keʼéna nda̱a̱ táki̱ʼva kéʼé na̱ kíʼví.
Kixi iin espada ta sandíʼi-xa̱ʼa̱ña na̱ ta̱a na̱ xíni̱ní kanitáʼan ta yi̱ʼvínína.
37 Kixi iin espada ta sandíʼi-xa̱ʼa̱ña kuáyi̱ sa̱na̱na ta saátu carreta tú xáʼa̱n nu̱ú ku̱a̱chi,
saátu sandíʼi-xa̱ʼa̱ña na̱ xa̱a̱ síín síín ñuu ke̱e na̱ ndóo kán,
ta xa̱a̱na koona nda̱a̱ táki̱ʼva íyo ná ñaʼá.
Kixi iin espada ta sandíʼi-xa̱ʼa̱ña ndiʼi ña̱ va̱ʼa ña̱ kúúmiína ta ndakiʼinnaña ku̱ʼu̱n xíʼinna.
38 Ndáʼviní ti̱kui̱í tá íyo ñuuna saáchi yi̱chi̱ ndiʼirá.
Saáchi iin ñuu nu̱ú ndásakáʼnuna ku̱a̱ʼání ndióxi̱ kúúña,
ta xa̱ʼa̱ ña̱ kininí íyo visión ña̱ xítona, kéʼéna nda̱a̱ táki̱ʼva kéʼé na̱ sána.
39 Xa̱ʼa̱ ña̱kán, kán kundoo kití tí íyo chí nu̱ú ñuʼú yi̱chí xíʼin kití tí xáku,
ta kántu kundoo tí avestruz.
Nda̱a̱ ni iin ki̱vi̱ va̱ása ndikó na̱ yiví kundoona ñuu yóʼo,
nda̱a̱ ni iinna va̱ása kundoo nu̱úña”.
40 “Sandíʼi-xa̱ʼíi̱ ñuu Babilonia nda̱a̱ táki̱ʼva sa̱ndíʼi-xa̱ʼíi̱ ñuu Sodoma xíʼin Gomorra ta saátu ndiʼi ñuu ña̱ ni̱xi̱yo yatin kán, káchi Jehová, ta kǒoka na̱ kundoo nu̱úña, nda̱a̱ ni iinka yichi̱ va̱ása ndikóka na̱ yiví kundoona nu̱úña.
41 Kotondó, chí norte kixi iin ñuu;
chí táʼví ña̱ xíkání kíndo̱o nu̱ú ñuʼú yóʼo kee iin ñuu ña̱ káʼnuní kixiña
ta saátu na̱ rey na̱ ndáyáʼviní.
42 Na̱yóʼo níʼina kuxu̱n xíʼin jabalina.*
Ndi̱va̱ʼaní-inina ta ni loʼo va̱ása na̱ʼa̱na ña̱ kúndáʼvi-inina xínina inkana.
Nda̱a̱ táki̱ʼva níʼi nu̱ú mar saá níʼi tá yósóna* kuáyi̱ va̱xina.
Nda̱a̱ táki̱ʼva ndákundichi tu̱ʼva iin ta̱a saá ndákundita tu̱ʼvana ña̱ kanitáʼanna xíʼin ndóʼó na̱ ñuu Babilonia.
43 Ta̱ rey ñuu Babilonia xa̱a̱ ku̱ndaa̱-inira xa̱ʼa̱ na̱yóʼo
ta kǒoka na̱ chindeétáʼan xíʼinra.*
Ndíʼi̱ní-inira ta xóʼvi̱ra
nda̱a̱ táki̱ʼva ndóʼo iin ñaʼá ñá káku se̱ʼe.
44 ”Kotondó, iinna ku̱ʼu̱nna sandíʼi-xa̱ʼa̱na yita nu̱ú kǒo nda̱a̱ ni iin ña̱ʼa kivi kundoʼo ndikachi chí nu̱ú ñuʼú kán,* keʼéna nda̱a̱ táki̱ʼva kéʼé iin tí ndikaʼa tá kítarí chí nu̱ú íyo ku̱ʼu̱ ña̱ íyo chí yuʼú yu̱ta Jordán, soo yi̱ʼi̱ ndi̱ku̱n taxíi̱nna nu̱ú ñuʼú kán. Ta yi̱ʼi̱ taxii̱ ña̱ ná kaʼndachíñu ta̱ nda̱kaxii̱n nu̱úña. Saáchi, ¿ndáana íyo nda̱a̱ táki̱ʼva íyo yi̱ʼi̱ ta ndáana kúú na̱ kivi koo contra xíʼi̱n? ¿Ndáana pastor kúú na̱ kivi kanitáʼan xíʼi̱n? 45 Ña̱kán, kuniso̱ʼondó ña̱ nda̱kaxin Jehová keʼéra xíʼin na̱ ñuu Babilonia ta saátu ña̱ nda̱kanixi̱níra keʼéra xíʼin na̱ ndóo chí nu̱ú ñuʼú na̱ caldeo:
Se̱ʼe kití sa̱na̱na kañuunarí* ku̱ʼu̱n xíʼinna.
Xa̱ʼa̱ ña̱ ke̱ʼéna, taxira ña̱ ná kindo̱o vichí* ñuu nu̱ú xi̱ndoona.
46 Ndeéní ni̱ʼi tá ná kuchiñuna ndakiʼinna ñuu Babilonia, nda̱a̱ ñuʼú kanda̱ña,
ta ndeéní kutaku̱ ña̱ nda̱ʼyi̱ ndiʼi na̱ ñuu”.