Jeremías
6 Ndóʼó na̱ se̱ʼe ta̱ Benjamín, xíkáva̱ʼa nu̱ú ñuu Jerusalén ndukúndó nu̱ú koose̱ʼéndó.*
Tivindó ndiki̱ chí Tecoa.
Ndakaʼmindó ñuʼu̱ chí Bet-Hakerem ña̱ va̱ʼa kooña señal nu̱úndó.
Saáchi nda̱a̱ chí norte va̱xi iin tu̱ndóʼo nu̱úndó, ta ku̱a̱ʼání ña̱ʼa sandíʼi-xa̱ʼa̱ña.
2 Ñá loʼo se̱ʼe ñuu Sion íyoñá nda̱a̱ táki̱ʼva íyo iin ñaʼá ñá liviní ta yi̱i̱níñá.
3 Na̱ ndáa kití kixina xíʼin kití sa̱na̱na.
Ixava̱ʼana veʼe válína iníí sa̱táñá,
ta iin tá iinna kundaana kití sa̱na̱na.
4 “Xa̱a̱ koo tu̱ʼvandó ña̱ ku̱ʼu̱nyó kanitáʼanyó xíʼinñá.
Kamandó, ná ku̱ʼu̱nyó kanitáʼanyó xíʼinñá tá káʼñu”.*
“Ndáʼviníyó, saáchi xa̱a̱ ku̱a̱ʼa̱n ndíʼi ki̱vi̱,
saáchi xa̱a̱ ku̱a̱ʼa̱n kúnaaní”.
5 “Kamandó, ná ku̱ʼu̱nyó kanitáʼanyó xíʼinñá tá ñuú
ta ná sandíʼi-xa̱ʼa̱yó veʼe súkun ña̱ kútu̱ní ndási ña̱ kúúmiíñá”.
6 Saáchi ña̱yóʼo kúú ña̱ káʼa̱n Jehová, ta̱ xáʼndachíñu nu̱ú na̱ ángel:
“Kaʼndandó yitu̱n ta katandaandónú* kándíka nama̱ ña̱ va̱ʼa ki̱ʼvindó kanitáʼanndó xíʼin ñuu Jerusalén.
Ñuu yóʼo xíniñúʼu chaʼviña xa̱ʼa̱ ña̱ kéʼéña;
saáchi xóʼvi̱ní* na̱ ndóo ñuu yóʼo.
7 Nda̱a̱ táki̱ʼva va̱ʼaní vi̱xin ti̱kui̱í tá kée ini iin pozo,
saá íyo ña̱ va̱ása va̱ʼa ña̱ kée ñuu yóʼo.
Kán xíniso̱ʼi̱ ña̱ kánitáʼan na̱ yiví ta sándiʼi-xa̱ʼa̱na ña̱ʼa;
ndiʼi tiempo xítoi̱ ña̱ íyoní kue̱ʼe̱ xíʼin inkaka tu̱ndóʼo.
8 Jerusalén, kandíxa ña̱ káʼi̱n xíʼún kundoʼún
chi tá ná kǒo keʼún ña̱yóʼo, kukini-inii̱ kunii̱ yóʼó ta kuxíkai̱ nu̱ún;
taxii̱ ña̱ ná kindo̱o miíún, ta nda̱a̱ ni iinka na̱ yiví va̱ása kundoo nu̱ún”.
9 Ña̱yóʼo kúú ña̱ káʼa̱n Jehová, ta̱ xáʼndachíñu nu̱ú na̱ ángel:
“Ndakiʼinna ndiʼika na̱ ñuu Israel na̱ ná kindo̱o, nda̱a̱ táki̱ʼva kéʼéna tá nándukúna uva tí ki̱ndoo.
Sayáʼa ndaʼún tañu tú uva, nda̱a̱ táki̱ʼva kéʼé na̱ ndákaya uva”.
10 “¿Ndáana ka̱ʼi̱n xíʼin? ¿Ndáana ka̱ʼi̱n xíʼin xa̱ʼa̱ ña̱ kundoʼona?
¿Ndáana kuniso̱ʼo?
Koto, so̱ʼona ndásivaña ña̱kán kǒo kívi kuniso̱ʼona.
Koto, kúndasínu̱úna xínina tu̱ʼun Jehová,
ta kǒo kíndo̱o-inina xíʼinña.
11 Sáa̱níi̱, nda̱a̱ táki̱ʼva sáa̱ Jehová,
ta nda̱a̱ ku̱nai̱ ña̱ kǒo káʼi̱n xa̱ʼa̱ ña̱yóʼo”.
“Kúáʼan ta ka̱ʼún xa̱ʼa̱ ña̱yóʼo xíʼin na̱ va̱lí chí calle,
ta saátu nu̱ú nda̱taka na̱ va̱lí kúa̱an.
Tiinna ndiʼi na̱yóʼo, tiinna na̱ ta̱a ta saátu ná síʼina,
na̱ xa̱a̱ chée ta saátu na̱ xi̱kuaʼa̱níka.
12 Ndataxina veʼena ndaʼa̱ inkana
ta saátu ñuʼúna xíʼin ná síʼina.
Saáchi sakáai̱ ndaʼíi̱ ña̱ taxii̱ castigo ndaʼa̱ na̱ ñuu yóʼo”, káchi Jehová.
13 “Saáchi nda̱a̱ na̱ va̱lí iinsaá nda̱a̱ na̱ chée, máñanína ña̱ va̱ʼa ndakiʼinna ku̱a̱ʼá ña̱ʼa;
nda̱a̱ na̱ su̱tu̱ xíʼin na̱ profeta sándaʼvina inkana.
14 Ta loʼo kuití kúni̱na sandáʼana nu̱ú tu̱kue̱ʼe̱ na̱ ñui̱ tá káʼa̱nna ña̱yóʼo
‘Kǒoví ku̱a̱chi íyo, va̱ʼaníva ndóoyó’,
soo ni va̱ása va̱ʼaví ndóona.
15 ¿Á kúkaʼan nu̱úna xa̱ʼa̱ ndiʼi ña̱ʼa ña̱ kini ña̱ ke̱ʼéna?
Ni loʼo kǒo kúkaʼan nu̱úna.
Ni kǒo kúnda̱a̱-inina ndáaña kúú ña̱ kukaʼan nu̱úna.
Xa̱ʼa̱ ña̱kán, kuvina nda̱a̱ táki̱ʼva ndo̱ʼo na̱ xa̱a̱ ni̱xi̱ʼi̱.
Tá ná taxii̱ castigo ndaʼa̱na, ko̱yovana”, káchi Jehová.
16 Ña̱yóʼo kúú ña̱ káʼa̱n Jehová:
“Kunditandó chí nu̱ú ndátaʼví yichi̱ ta kotondó.
Nda̱ka̱tu̱ʼunndó ndáaña kúú yichi̱ yatá,
nda̱ka̱tu̱ʼunndó ndáaña kúú yichi̱ va̱ʼa ta ña̱kán ku̱ʼu̱nndó,
tasaá kúú ña̱ ndani̱ʼíndó nu̱ú ndakindee̱ndó”.
Soo na̱kán ka̱china: “Va̱ása ku̱ʼu̱nndi̱ yichi̱ yóʼo”.
17 “Nda̱kaxii̱n na̱ natúʼun xíʼinna, ta na̱kán ni̱ka̱ʼa̱nna xíʼinna:
‘Kuniso̱ʼondó ña̱ tívina ndiki̱’”.
Soo na̱kán nda̱kuiinna: “Va̱ása kuniso̱ʼondi̱”.
18 “Ña̱kán, kuniso̱ʼo ndiʼi ndóʼó na̱ ñuu.
Kuniso̱ʼo ndiʼi ndóʼó na̱ nda̱kutáʼan ndáaña kúú ña̱ kundoʼo na̱kán.
19 Ná kuniso̱ʼo ñuʼú.
Saáchi chindaʼíi̱ iin tu̱ndóʼo nu̱ú na̱ ñuu yóʼo
xa̱ʼa̱ ña̱ va̱ása va̱ʼa íyo ña̱ nda̱kaxinna keʼéna,
saáchi kǒo níkandíxana tu̱ʼi̱n
ta kǒo níxiinna kandíxana ley ña̱ ta̱xii̱ ndaʼa̱na”.*
20 “Ni nda̱a̱ ñuu Saba* ku̱a̱ʼa̱nndó xa̱ʼa̱ olíbano
ta ni ku̱a̱ʼa̱nndó iin ñuu ña̱ xíkání kíndo̱o xa̱ʼa̱ ndo̱o̱ tú xáʼa̱n táminí,
kǒo ndáyáʼviví ña̱yóʼo nu̱úi̱.
Kití tí xáʼmindó* ta sóko̱ndórí nu̱úi̱ kǒo ndákiʼii̱nrí
ta ndiʼika ña̱ sóko̱ndó nu̱úi̱ kǒo kíndo̱o-inii̱ xíʼinña”.
21 Xa̱ʼa̱ ña̱kán, Jehová káʼa̱nra ña̱yóʼo:
“Chindoi̱ ña̱ʼa ña̱ kasi nu̱ú na̱ ñuu yóʼo,
ta xa̱ʼa̱ ña̱kán nduvana ixaaña,
nduva na̱ íyo se̱ʼe ta saátu na̱ se̱ʼena,
na̱ ndóo yatin xíʼinna ta saátu na̱ kítáʼan xíʼinna,
ta ndiʼina kuvina”.
22 Ña̱yóʼo kúú ña̱ káʼa̱n Jehová:
“Koto, va̱xi iin ñuu chí nu̱ú ñuʼú ña̱ íyo chí norte,
ta nda̱a̱ táʼví ña̱ xíkání íyo nu̱ú ñuʼú yóʼo kana iin ñuu ña̱ káʼnuní.
23 Kuniʼina kuxu̱n* xíʼin jabalina.
Ndi̱va̱ʼaní-inina ta kǒo kundáʼvi-inina kunina inkana.
Ndeéní ni̱ʼi kixina nda̱a̱ táki̱ʼva ndeéní níʼi tá mar,
ta kosona* kuáyi̱ kixina.
Xa̱a̱ ndákundita tu̱ʼvana ña̱ kanitáʼanna xíʼún, yóʼó ñá loʼo se̱ʼe ñuu Sion,
kéʼéna nda̱a̱ táki̱ʼva kéʼé iin ta̱a ta̱ xíni̱ní kanitáʼan”.
24 Xi̱niso̱ʼondi̱ xa̱ʼa̱ ña̱yóʼo.
Vitin kǒoka ndee̱ndi̱;
xóʼvi̱níndi̱ nda̱a̱ táki̱ʼva xóʼvi̱ iin ñaʼá ñá káku se̱ʼe.
25 Kǒo ku̱ʼún chí yuku̱
ta kǒo kakaún chí yichi̱,
saáchi na̱ sáa̱-ini xíni yóʼó níʼina iin espada;
ndiʼi táʼví íyo ña̱ kini.
Kusuchí-iniún ta iin kuaku kóʼún, nda̱a̱ táki̱ʼva ndóʼo na̱ ni̱xi̱ʼi̱ se̱ʼe mitúʼun,
saáchi iin kama kixaa̱ ta̱ sandíʼi-xa̱ʼa̱ miíyó.
27 “Yi̱ʼi̱ nda̱sai̱ yóʼó* iin ta̱ xíni̱va̱ʼa ndakuni ka̱a nu̱ú na̱ ñui̱,
ta̱ xíni̱ ndakuni ndiʼi ña̱ʼa ña̱ kúúmiíña;
koto va̱ʼún ndáa ki̱ʼva íyona ta nandukú va̱ʼún xa̱ʼa̱ña.
28 Ndiʼi na̱ ta̱a yóʼo kǒo xíínna kandíxana
ta xíkana káʼa̱nna tu̱ʼun síkí xa̱ʼa̱ inkana.
Íyona nda̱a̱ táki̱ʼva íyo ña̱ cobre xíʼin ña̱ hierro;
ndiʼina kéʼéna ña̱ va̱ása va̱ʼa.
29 Ña̱ tívina ñuʼu̱, xa̱a̱ ni̱xi̱xi̱ña.
Ña̱ kána kuití nu̱ú ñuʼu̱ kúú plomo.
Ta̱ ndásavií ka̱a chíkaa̱níra ndee̱ ña̱ kachíñura, soo kǒo ña̱ va̱ʼa ndákiʼinra,
íyokava na̱ kéʼé ña̱ va̱ása va̱ʼa.
30 Na̱ yiví ka̱ʼa̱nna xa̱ʼa̱ na̱yóʼo ña̱ íyona nda̱a̱ táki̱ʼva íyo plata ña̱ kǒo níkindo̱o-inina xíʼin,
saáchi Jehová kǒo níkindo̱o-inira kunirana”.