Jeremías

7 Jehová ni̱ka̱ʼa̱nra ña̱yóʼo xíʼin ta̱ Jeremías: 2 “Kúáʼan kundichiún chí yéʼé veʼe Jehová ta ka̱ʼún ña̱yóʼo: ‘Kuniso̱ʼondó ña̱ káʼa̱n Jehová ndiʼi ndóʼó na̱ ñuu Judá, ndóʼó na̱ kíʼvi chí yéʼé yóʼo ña̱ kuxítíndó nu̱ú Jehová. 3 Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: “Nasamandó ki̱ʼva ña̱ íyondó xíʼin ña̱ kéʼéndó, ta yi̱ʼi̱ taxii̱ ña̱ ku̱a̱ʼání tiempo kundoondó ñuu yóʼo. 4 Va̱ása kandíxandó tu̱ʼun ña̱ káʼa̱n na̱ kúni̱ sandáʼvi ndóʼó ta ni kǒo ka̱ʼa̱nndó: ‘Ña̱yóʼo kúú* templo Jehová, ña̱yóʼo kúú templo Jehová, ña̱yóʼo kúú templo Jehová’. 5 Saáchi tá ná nasamandó ki̱ʼva ña̱ íyondó xíʼin ña̱ kéʼéndó, tá nda̱kú ná ndatiinndó ku̱a̱chi xíʼin na̱ ñuu, 6 tá ná va̱ása ixandi̱va̱ʼandó xíʼin na̱ ke̱e inka ñuu na̱ ki̱xaa̱ ndóo xíʼinndó, ni xíʼin na̱ ni̱xi̱ʼi̱ yivá, ni xíʼin ná ni̱xi̱ʼi̱ yii̱, tá ná va̱ása kaʼníndó iin na̱ yiví na̱ kǒo ku̱a̱chi kúúmií ñuu yóʼo ta ni va̱ása kundiku̱nndó inkaka ndióxi̱ ña̱ sáxo̱ʼvi̱ ndóʼó,* 7 yi̱ʼi̱ taxii̱ ña̱ ku̱a̱ʼání tiempo kundoondó yóʼo, nu̱ú ñuʼú ña̱ ta̱xii̱ ndaʼa̱ na̱ táʼanndó na̱ xi̱ndoo xi̱naʼá ña̱ kundoona nu̱úña ndiʼi tiempo”’”.

8 “Soo ndóʼó kándíxandó ña̱ vatá* ña̱ káʼa̱nna xíʼinndó ña̱ sandáʼvina ndóʼó. Ta ña̱yóʼo kǒo chindeétáʼanvíña xíʼinndó. 9 ¿Á kivi ixakuíʼnándó, kaʼníndó, ku̱su̱nndó xíʼin na̱ kǒo nítindaʼa̱ xíʼinndó, chinaʼándó* xa̱ʼa̱ iin ña̱ʼa ña̱ vatá, so̱kóndó ña̱ʼa nu̱ú* ña̱ Baal ta kundiku̱nndó inkaka ndióxi̱ ña̱ va̱ása níxi̱xini̱ndó, 10 ta tándi̱ʼi kixindó nu̱úi̱, nu̱ú íyo veʼe nu̱ú ndásakáʼnuna ki̱víi̱ ta ka̱ʼa̱nndó ‘Ka̱kuvandi̱’, ni ndákundeéndó kéʼéndó ndiʼi ña̱ʼa ña̱ kini yóʼo? 11 ¿Á iin kavá nu̱ú ñúʼu na̱ kui̱ʼnáva ndu̱u veʼe nu̱ú ndásakáʼnuna ki̱víi̱? Yi̱ʼi̱ xi̱nivai̱ ña̱ kéʼéndó”, káchi Jehová.

12 “‘Kúáʼanndó chí Siló nu̱ú ni̱xi̱yoi̱, nu̱ú ni̱ka̱ʼi̱n ña̱ ndasakáʼnuna ki̱víi̱ tá xa̱ʼa̱, ta kotondó ña̱ ke̱ʼíi̱ xíʼinña xa̱ʼa̱ ña̱ va̱ása va̱ʼa ña̱ ke̱ʼé na̱ ñui̱ Israel. 13 Soo ndóʼó nda̱kundeéndó ke̱ʼéndó ndiʼi ña̱ʼa yóʼo, káchi Jehová, ta ni tuku ta tuku xi̱kaʼi̱n xíʼinndó, va̱ása níxi̱xiniso̱ʼondó. Yi̱ʼi̱ xi̱kanai̱ ndóʼó, soo ndóʼó kǒo níxi̱ndakuiinndó. 14 Nda̱a̱ táki̱ʼva ke̱ʼíi̱ xíʼin Siló saátu keʼíi̱ xíʼin veʼe ña̱ níʼi ki̱víi̱, ña̱ ndáa-inindó, ta saátu xíʼin lugar ña̱ ta̱xii̱ ndaʼa̱ndó xíʼin na̱ táʼanndó na̱ xi̱ndoo xi̱naʼá. 15 Yi̱ʼi̱ kundasínu̱úi̱ kunii̱ ndiʼi ndóʼó, nda̱a̱ táki̱ʼva ke̱ʼíi̱ xíʼin ndiʼi na̱ táʼanndó na̱ se̱ʼe ta̱ Efraín’.

16 ”Ta yóʼó, va̱ása ka̱ʼún xíʼi̱n xa̱ʼa̱ na̱ ñuu yóʼo. Kǒo ka̱ʼa̱n-ndáʼviún xíʼi̱n xa̱ʼa̱na, kǒo keʼún oración ta ni va̱ása kuakundáʼviún xa̱ʼa̱na, saáchi yi̱ʼi̱ kǒo kuniso̱ʼovíi̱ yóʼó. 17 ¿Á va̱ása xítoún ña̱ kéʼéna xíkana ñuu ña̱ íyo chí Judá ta saátu chí calle ñuu Jerusalén? 18 Na̱ va̱lí se̱ʼena ndákayana titu̱n, na̱ yivána ndákaʼmina ñuʼu̱ ta siʼína ndákavañá harina ña̱ ixava̱ʼañá si̱ta̱váʼa ña̱ so̱kóna nu̱ú ñá kúú Reina chí ndiví,* ta sóko̱na vino nu̱ú inkaka ndióxi̱ ña̱ va̱ʼa sasáa̱na yi̱ʼi̱. 19 ‘¿Soo á yi̱ʼi̱ kúú ta̱ íxandi̱va̱ʼandó xíʼi̱n?,* káchi Jehová. ¿Á miívandó íxandi̱va̱ʼandó xíʼin ta sákukaʼanndó nu̱úndó?’. 20 Xa̱ʼa̱ ña̱yóʼo, táta káʼnu Jehová káchira: ‘Kotondó, xa̱ʼa̱ ña̱ ndeéní sa̱íi̱ sandíʼi-xa̱ʼíi̱ lugar yóʼo, saátu na̱ yiví, kití, yitu̱n tú íyo chí yuku̱ xíʼin ndiʼi ña̱ʼa ña̱ kána nu̱ú ñuʼú; ña̱ sái̱ kooña nda̱a̱ táki̱ʼva íyo iin ñuʼu̱ ña̱ xíxi̱ ta va̱ása nda̱ʼva̱ña’.

21 ”Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel, Ndióxi̱ na̱ ñuu Israel: ‘Kúáʼanndó ta ndasakandó kití tí xáʼmindó* ña̱ va̱ʼa so̱kóndórí xíʼin inkaka kití tí sóko̱ndó, ta kuxu miíndó ku̱ñu yóʼo. 22 Saáchi ki̱vi̱ tá ta̱vái̱ na̱ táʼanndó na̱ xi̱ndoo xi̱naʼá chí Egipto, kǒo níxaʼndai̱ chiñu nu̱úna ña̱ kaʼmina kití ta so̱kónarí ni ña̱ so̱kóna inkaka ña̱ʼa. 23 Soo xa̱ʼndavai̱ chiñu yóʼo nu̱úna: “Kuniso̱ʼondó ña̱ káʼi̱n ta yi̱ʼi̱ koi̱ Ndióxi̱ndó ta ndóʼó koondó na̱ ñui̱. Ndiʼi tiempo kundiku̱nndó yichi̱ ña̱ ná ka̱ʼi̱n xíʼinndó, tasaá va̱ʼaní kundoondó”’. 24 Soo na̱kán va̱ása níxiniso̱ʼona ña̱ ni̱ka̱ʼi̱n xíʼinna ta ni kǒo níkandíxana, chi nda̱kundeéna ke̱ʼéna ña̱ kúni̱ miína, ta xa̱ʼa̱ ña̱ so̱ʼonína* ke̱ʼéna ña̱ va̱ása va̱ʼa ña̱ ndíkaa̱ níma̱na. Nu̱úka ña̱ keʼéna ña̱ va̱ʼa kininíka ki̱xáʼana kéʼéna, 25 nda̱a̱ tá ki̱vi̱ ña̱ ke̱e na̱ táʼanndó na̱ xi̱ndoo xi̱naʼá chí Egipto iinsaá nda̱a̱ ki̱vi̱ vitin. Xa̱ʼa̱ ña̱kán kúú ña̱ xi̱ndakundeíi̱ xi̱chindaʼíi̱ na̱ profeta na̱ xi̱kachíñu nu̱úi̱ ña̱ ku̱ʼu̱nna nu̱úndó; ki̱vi̱ tá ki̱vi̱ xi̱chindaʼíi̱na, tuku ta tuku xi̱chindaʼíi̱na. 26 Soo ndóʼó va̱ása níxiniso̱ʼondó ña̱ ni̱ka̱ʼi̱n xíʼinndó ta ni kǒo níkandíxandó, chi so̱ʼoní ni̱xi̱yondó. Nda̱a̱ kinika ke̱ʼéndó nu̱ú na̱ táʼanndó na̱ xi̱ndoo xi̱naʼá.

27 ”Yóʼó ka̱ʼún ndiʼi tu̱ʼun yóʼo xíʼinna, soo na̱kán kǒo kuniso̱ʼona yóʼó; kanaúnna soo va̱ása ndakuiinna. 28 Ta ka̱ʼún xíʼinna: ‘Na̱ ñuu yóʼo kǒo níxiinna kuniso̱ʼona ña̱ ni̱ka̱ʼa̱n Jehová Ndióxi̱na ta ni va̱ása níxiinna ndakiʼinna consejo ña̱ ta̱xira ndaʼa̱na. Ni loʼo va̱ása káʼa̱nkana xa̱ʼa̱ ña̱ nda̱kú koo inina xíʼin Ndióxi̱’.

29 ”Kaʼnda ixí* xi̱níún ña̱ náni̱ní ta kataúnña, kúáʼan chí xi̱ní xi̱kí nu̱ú kǒo nda̱a̱ ni iin ña̱ʼa ta kataún iin yaa ña̱ xítana tá kúsuchí-inina, saáchi Jehová ku̱ndasínu̱úra xi̱nira na̱ yiví na̱ sa̱sáa̱ñaʼá ta sandákoondaʼa̱rana. 30 ‘Saáchi na̱ ñuu Judá ke̱ʼéna ña̱ʼa ña̱ va̱ása va̱ʼa nu̱úi̱, káchi Jehová. Chi̱ndoona ña̱ʼa ña̱ kini ña̱ ndásakáʼnuna ini veʼe nu̱ú ndásakáʼnuna ki̱víi̱ ta i̱xayaku̱a̱naña. 31 I̱xava̱ʼana nu̱ú ndasakáʼnuna ndióxi̱na* chí Tófet ña̱ kíndo̱o chí yoso̱ ña̱ Hinón,* ña̱ va̱ʼa kaʼmina se̱ʼeta̱ana xíʼin se̱ʼe-síʼina, ta yi̱ʼi̱ va̱ása níxaʼndai̱ chiñu nu̱úna ña̱ keʼéna ña̱yóʼo ta ni loʼo kǒo níndakanixi̱níi̱ ña̱ ka̱ʼi̱n xíʼinna ña̱ keʼénaña’.

32 ”‘Xa̱ʼa̱ ña̱kán, xa̱a̱ ku̱yatin ki̱vi̱, káchi Jehová, ña̱ va̱ása kunaníkaña Tófet ni yoso̱ ña̱ Hinón* chi ndakunaníña yoso̱ nu̱ú Xáʼnína. Chí Tófet sandúxu̱nna ndiʼi na̱ ni̱xi̱ʼi̱ nda̱a̱ ná kutútuunña. 33 Tá ná kuvi na̱ yiví ñuu yóʼo, kití tí ndáchí chí ndiví xíʼin kití tí íyo nu̱ú ñuʼú kúú tí kaxí ku̱ñuna ta kǒo na̱ taxínrí. 34 Xa̱ʼa̱ ña̱ keʼíi̱, ndiʼi ñuu ña̱ íyo chí Judá xíʼin calle ña̱ ñuu Jerusalén kǒo kuniso̱ʼokana ña̱ ndáʼyi̱ kóʼó na̱ yiví xa̱ʼa̱ ña̱ kúsi̱í-inina, ta ni kǒo kuniso̱ʼokana ta̱chí ta̱ ti̱ndaʼa̱ ni ñá ti̱ndaʼa̱, saáchi ndiʼi-xa̱ʼa̱ va̱ʼava ñuu yóʼo’”.