Jeremías
8 “Tiempo kán, káchi Jehová, tavána leke na̱ rey na̱ ni̱xi̱yo chí Judá nu̱ú ni̱ndu̱xu̱nna, leke na̱ xi̱niʼi yichi̱ nu̱ú na̱ ñuu, leke na̱ su̱tu̱, leke na̱ profeta ta saátu leke ndiʼi na̱ ñuu Jerusalén. 2 Ta chindoona ña̱yóʼo nu̱ú ñu̱ʼu,* nu̱ú yo̱o̱ ta saátu nu̱ú ndiʼi ña̱ʼa ña̱ íyo chí ndiví saáchi ña̱yóʼo kúú ña̱ xi̱kuʼvi̱ka-inina xi̱xinina, xi̱kachíñuna nu̱úña, xi̱ndiku̱nnaña, xi̱nandukúnaña ta saátu xi̱kuxítína nu̱úña. Kǒo ndakayana leke yóʼo ta ni kǒo sandúxu̱nnaña. Saáchi xa̱a̱ña kooña nda̱a̱ táki̱ʼva íyo si̱ʼví ña̱ ndóo nu̱ú ñuʼú”.
3 “Ta ndiʼi na̱ yiví na̱ ñuu yóʼo na̱ ndi̱va̱ʼa-ini, na̱ ná ka̱ku xa̱ʼa̱ ña̱ chindaʼíi̱na ku̱ʼu̱nna inka ñuu, nda̱a̱ kuni̱na kuvina nu̱úka ña̱ kutakuna”, káchi Jehová ta̱ xáʼndachíñu nu̱ú na̱ ángel.
4 “Ta xíniñúʼu ka̱ʼún xíʼinna: ‘Ña̱yóʼo kúú ña̱ káʼa̱n Jehová:
“Tá iinna ná ndakavana, ¿á va̱ása ndako̱o tukuna?
Tá iinna ná ndikóna chí sa̱tá, ¿á va̱ása ndikó inkana?
5 ¿Nda̱chun kǒo xíín na̱ ñuu Jerusalén nda̱kú koo inina xíʼi̱n?
Ndákundeéna sándaʼvina;
ta kǒo xíínna ndikóna nu̱úi̱.
6 Ki̱xáʼíi̱ xíniso̱ʼi̱ ña̱ káʼa̱nna, soo va̱ása va̱ʼa íyo ña̱ xi̱kaʼa̱nna.
Nda̱a̱ ni iinna kǒo níxi̱ndikó-ini xa̱ʼa̱ ña̱ xi̱keʼéna ta ni kǒo níxi̱kaʼa̱nna ‘¿Nda̱chun ke̱ʼíi̱ ña̱yóʼo?’.
Iin tá iinna kúni̱na ndikóna ku̱ʼu̱nna chí nu̱ú ku̱a̱ʼa̱n ku̱a̱ʼánína, nda̱a̱ táki̱ʼva kéʼé kuáyi̱ tí xínu ku̱a̱ʼa̱n nu̱ú ku̱a̱chi.
7 Nda̱a̱ tí cigüeña xíni̱rí ndáa tiempo kúú ña̱ ku̱ʼu̱nrí inka ñuu;
tí paloma káʼnu, tí vencejo xíʼin tí tordo* xíni̱rí ndáa tiempo kúú ña̱ xíniñúʼu ndikórí.
Soo na̱ ñui̱ kǒo xíni̱na ama kúú ña̱ ndatiin Jehová ku̱a̱chi xíʼinna”’.
8 ‘¿Nda̱chun káchindó “Ndíchivayó chi kúúmiíyó ley Jehová”?
Mií ña̱ nda̱a̱, lápiz tú xíniñúʼu na̱ secretario* nina ña̱ vatáva* káʼyina xíʼinnú.
9 Na̱ ndíchi ku̱kaʼan nu̱úna.
Ni̱yi̱ʼvínína ta tiinvanana.
Na̱yóʼo kǒo níxiinna kuniso̱ʼona tu̱ʼun Jehová,
¿ña̱kán ndáaña ndíchi kúúmiína?
10 Xa̱ʼa̱ ña̱kán taxii̱ ná síʼina ndaʼa̱ inka ta̱a
ta inkana ndakiʼin ñuʼúna;
saáchi nda̱a̱ na̱ va̱lí iinsaá nda̱a̱ na̱ chée,
máñanína ña̱ va̱ʼa ndakiʼinna ku̱a̱ʼá ña̱ʼa;
nda̱a̱ na̱ su̱tu̱ xíʼin na̱ profeta sándaʼvina inkana.
11 Ta loʼo kuití kúni̱na sandáʼana nu̱ú tu̱kue̱ʼe̱ na̱ ñui̱ tá káʼa̱nna ña̱yóʼo
“Kǒoví ku̱a̱chi íyo, va̱ʼaníva ndóoyó”,
soo ni va̱ása va̱ʼaví ndóona.
12 ¿Á kúkaʼan nu̱úna xa̱ʼa̱ ndiʼi ña̱ʼa ña̱ kini ña̱ ke̱ʼéna?
Ni loʼo kǒo kúkaʼan nu̱úna.
Ni kǒo kúnda̱a̱-inina ndáaña kúú ña̱ kukaʼan nu̱úna.
Xa̱ʼa̱ ña̱kán, kuvina nda̱a̱ táki̱ʼva ndo̱ʼo na̱ xa̱a̱ ni̱xi̱ʼi̱.
Tá ná taxii̱ castigo ndaʼa̱na, ko̱yovana’, káchi Jehová.
13 ‘Tá ná ndakayai̱na saá kúú ña̱ sandíʼi-xa̱ʼíi̱na’, káchi Jehová.
‘Kǒo kindo̱oka uva ndaʼa̱ tú uva ni higo ndaʼa̱ tú higo, ta yu̱ku̱ ndaʼa̱nú yi̱chi̱ña.
Ta kǒo kuumiíkana ña̱ʼa ña̱ ta̱xii̱ ndaʼa̱na’”.
14 “¿Nda̱chun ndóoyó yóʼo?
Va̱ʼaka ná ndakutáʼanyó ta ná ki̱ʼviyó ñuu ña̱ kútu̱ní ndási ta kán kuviyó.
Saáchi Jehová Ndióxi̱yó sandíʼi-xa̱ʼa̱ra miíyó,
táxira ti̱kui̱í tá kúúmií veneno xíʼiyó
chi ni̱ki̱ʼviyó ku̱a̱chi nu̱ú Jehová.
15 Xi̱ndatuyó va̱ʼaní kundooyó, soo kǒo ña̱ va̱ʼa níkuu;
xi̱ndatuyó ña̱ chindeétáʼanna xíʼinyó, soo nu̱úka ña̱yóʼo na̱ yíʼviva kúúyó.
16 Nda̱a̱ chí Dan táku̱ ña̱ tívi si̱ti̱n kuáyi̱ sa̱na̱na.
Nda̱a̱ kánda̱ iníísaá ñuʼú tá ndáʼyi̱ kuáyi̱ che̱e sa̱na̱na.
Na̱yóʼo kíʼvina ta sándiʼi-xa̱ʼa̱na ñuu xíʼin ndiʼi ña̱ íyo nu̱úña,
ñuu ta saátu na̱ yiví”.
17 “Kotondó, chindaʼíi̱ ko̱o̱ nu̱úndó,
ko̱o̱ tí kue̱ʼe̱ tí kǒo kívi kumáso,
ta tíyóʼo kaxívarí* ndóʼó”, káchi Jehová.
18 Ña̱ kúsuchí-inii̱ kǒo ta̱tánña;
níma̱i̱ ndeéndóʼoña.
19 Nda̱a̱ iin ñuu ña̱ xíkání kíndo̱o táku̱ ña̱ kána ñá loʼo se̱ʼe ñui̱
ña̱ ná chindeétáʼanna xíʼinñá:
“¿Á kǒova Jehová íyo chí Sion?
¿Á kǒova ta̱ rey íyo ñuu kán?”.
“¿Nda̱chun sa̱sáa̱ndó yi̱ʼi̱ xíʼin ndióxi̱ ña̱ i̱xava̱ʼandó,
ndióxi̱ na̱ inka ñuu ña̱ ni loʼo va̱ása ndáyáʼvi?”.
20 “Xa̱a̱ ndi̱ʼi sa̱kéena* ta xa̱a̱ ndi̱ʼi tiempo niʼní,
soo kǒo na̱ nísakǎku miíyó”.
21 Kúsuchíní-inii̱ xa̱ʼa̱ ña̱ tu̱kue̱ʼe̱ ñá loʼo se̱ʼe ñui̱;
kúsuchíní-inii̱.
Ta vitin yíʼviníi̱.
22 ¿Á kǒova bálsamo* íyo chí Galaad?
¿Á kǒova doctor kán?
¿Nda̱chun ta̱ʼán ndaʼa ñá loʼo se̱ʼe ñui̱?