Ezequiel
19 “Kata iin yaa ña̱ suchí-ini xa̱ʼa̱ na̱ níʼi yichi̱ nu̱ú na̱ ñuu Israel. 2 Kachiún:
‘Siʼún ni̱xi̱yoñá nda̱a̱ táki̱ʼva íyo iin ndikaʼa* síʼi tí xi̱kitáʼan xíʼin inka ndikaʼa che̱e.
Nda̱kandúʼúrí* ma̱ʼñú ndikaʼa yúta̱* tí ndakú ta sa̱kúaʼnurí se̱ʼerí.
3 Sa̱kúaʼnurí iin se̱ʼe loʼorí
tí ndu̱u iin ndikaʼa yúta̱ tí ndakú.
Tíyóʼo sa̱kúaʼarí tiinrí kití,
ta nda̱a̱ ni̱xa̱a̱rí xa̱xírí na̱ yiví.
4 Na̱ inka ñuu xi̱niso̱ʼona xa̱ʼa̱rí, ti̱innarí ta chi̱kaa̱narí ini ya̱vi̱ ña̱ ka̱anna,
ta̱ánna ka̱a* si̱ti̱nrí ta nda̱kiʼinnarí ku̱a̱ʼa̱n xíʼinna chí Egipto.
5 Tíyóʼo xi̱ndaturí, soo ki̱ʼinrí kuenta ña̱ va̱ása ndikó se̱ʼerí.
Ña̱kán ki̱ʼinrí inka se̱ʼe loʼorí, sa̱kúaʼnurí tíyóʼo ta ni̱xa̱a̱rí ndu̱urí iin ndikaʼa tí ndakú.
6 Saátu tíyóʼo xi̱kitáʼanrí xíʼin inkaka ndikaʼa, ta ni̱xa̱a̱rí ndu̱urí iin ndikaʼa tí ndakú.
Tíyóʼo sa̱kúaʼarí tiinrí kití ta nda̱a̱ ni̱xa̱a̱rí xa̱xírí na̱ yiví.
7 Xi̱xikarí sa̱tá veʼe súkun ña̱ kútu̱ní ndási ta xi̱sandíʼi-xa̱ʼa̱rí ñuu,
ta iníí ñuu kán xi̱taku̱ tá xi̱ndaʼyi̱rí saáchi kǒo nda̱a̱ ni iin ña̱ʼa níxi̱yo nu̱úña.
8 Na̱ ñuu na̱ xi̱ndoo yatin kán ki̱xina ta sa̱kánana ñunú* sa̱tárí,
ti̱innarí ta chi̱kaa̱narí ini iin ya̱vi̱ ña̱ ka̱anna.
9 Ta̱ánna ka̱a si̱ti̱nrí ta chi̱kaa̱narí ini iin jaula, ta ni̱xa̱ʼa̱nna xíʼinrí nu̱ú ta̱ rey ñuu Babilonia.
Kán nda̱kasinarí tasaá va̱ása kutaku̱ka nda̱ʼyi̱rí chí yuku̱ ña̱ ñuu Israel.
10 Siʼún ni̱xi̱yoñá nda̱a̱ táki̱ʼva íyo iin tú uva* tú chi̱ʼina yuʼú ti̱kui̱í.
Xa̱ʼa̱ ña̱ ni̱xi̱yo ku̱a̱ʼání ti̱kui̱í xi̱taxinú ku̱i̱ʼi, ta kóʼo̱ní ni̱xi̱yo ndaʼa̱nú.
11 Ka̱na ndaʼa̱nú tú ndakúní, tú kivi nduu yitu̱n tú xíniñúʼu na̱ xáʼndachíñu.
Xa̱ʼnunú ta súkunníka ni̱xi̱yonú nu̱ú inkaka yitu̱n.
Súkunníka ni̱xi̱yonú ta kóʼo̱níka ni̱xi̱yo ndaʼa̱nú nu̱ú inkaka yitu̱n.
12 Soo xa̱ʼa̱ ña̱ ni̱sa̱a̱nína, tu̱ʼunnanú ta sa̱kánananú nu̱ú ñuʼú,
ta iin ta̱chí ña̱ ke̱e chí nu̱ú kíta ñu̱ʼu* sa̱yíchi̱ña ku̱i̱ʼinú.
Tu̱ʼunna ndaʼa̱nú ña̱ ndakúní ta ni̱yi̱chi̱ña,
ta ni̱xi̱xi̱ña xíʼin ñuʼu̱.
13 Ta vitin nda̱chiʼinanú nu̱ú ñuʼú yi̱chí,
nu̱ú iin ñuʼú ña̱ yi̱chíní ña̱ kúni̱ní ti̱kui̱í.
14 Ni̱ka̱a̱ ñuʼu̱ ndaʼa̱nú ta xa̱ʼmiña ndaʼa̱nú ña̱ sa̱kán va̱xi nána xíʼin ku̱i̱ʼinú.
Va̱ása níkindo̱o nda̱a̱ ni iin ndaʼa̱nú ña̱ ndakú, ni nda̱a̱ ni iin yitu̱n tú kivi koo yitu̱n tú xíniñúʼu na̱ xáʼndachíñu.
”’Ña̱yóʼo kúú iin yaa ña̱ suchí-ini ta katanaña tá kúsuchí-inina’”.