Ezequiel

22 Tuku ni̱ka̱ʼa̱n Jehová xíʼi̱n ta ka̱chira: 2 “Yóʼó ta̱ kúú se̱ʼe ta̱a,* ¿á xa̱a̱ íyo tu̱ʼvaún ña̱ ndatiún ku̱a̱chi xíʼin na̱ ñuu na̱ xáʼní, ta ka̱ʼún xíʼinna xa̱ʼa̱ ndiʼi ña̱ʼa ña̱ kini ña̱ kéʼéna? 3 Xíniñúʼu ka̱ʼún ña̱yóʼo: ‘Ña̱yóʼo kúú ña̱ káʼa̱n táta káʼnu Jehová: “Yóʼó kúú iin ñuu ña̱ xáʼní, na̱ ndóo iniún na̱ xa̱a̱ ku̱nu̱mí ndiʼi-xa̱ʼa̱ kúúna, kúún iin ñuu ña̱ íxava̱ʼa ña̱ʼa ña̱ kininí ta ndásakáʼnúnña tasaá kúyaku̱a̱ún, 4 kúúmiíún ku̱a̱chi xa̱ʼa̱ ña̱ xa̱ʼníún, ta ña̱ʼa ña̱ kini ña̱ ndásakáʼnún, i̱xayaku̱a̱ña yóʼó. Ta vitin yi̱ʼi̱ taxii̱ castigo ndaʼún; ta xa̱a̱ ku̱nu̱mí keʼíi̱ ña̱yóʼo. Ña̱kán taxii̱ ná ka̱ʼa̱n-ndi̱va̱ʼa na̱ inka ñuu xíʼún, ta ndiʼi ñuu náʼnu kusi̱kindaana yóʼó. 5 Na̱ ndóo yatin xíʼin na̱ ndóo xíká kusi̱kindaana yóʼó, saáchi kúún iin ñuu ña̱ va̱ása káʼa̱nna ña̱ va̱ʼa xa̱ʼa̱, kúún iin ñuu nu̱ú íyoní tu̱ndóʼo. 6 Ndiʼi na̱ ndóo iniún na̱ xáʼndachíñu nu̱ú na̱ ñuu Israel, xíniñúʼuna nda̱yí* ña̱ kúúmiína ña̱ va̱ʼa kaʼnína. 7 Na̱ ndóo iniún, kǒo íxato̱ʼóna yivána ni siʼína. Sándaʼvina na̱ ke̱e inka ñuu ta íxandi̱va̱ʼana xíʼin na̱ ni̱xi̱ʼi̱ yivá ta saátu íxandi̱va̱ʼana xíʼin ná ni̱xi̱ʼi̱ yii̱”’”.

8 “‘Yóʼó kúndasíún xíniún lugar ña̱ yi̱i̱ ña̱ kúúmiíi̱, ta kǒo íxato̱ʼún ley ña̱ ta̱xii̱ xa̱ʼa̱ ki̱vi̱ sábado. 9 Na̱ ndóo iniún káʼa̱nna tu̱ʼun síkí ta chíkaa̱-inina ña̱ kaʼnína. Xíxina ña̱ʼa ña̱ sóko̱na* chí yuku̱, ta saátu kininí kéʼéna. 10 Kísi̱na xíʼin ñá síʼi yivána, tíin tuúnna* ñaʼá ñá núu ni̱i̱ ta kísi̱na xíʼinñá. 11 Na̱ ndóo iniún, kísi̱na xíʼin ñá síʼi ñanitáʼanna, ña̱ kininí kúú ña̱ kéʼéna. Inkana kísi̱na xíʼin xa̱nuna ta ni kǒo kúkaʼan nu̱úna xíʼin ña̱ kini ña̱ kéʼéna. Inkana tíin tuúnna ku̱ʼva miína se̱ʼe yivána ta kísi̱na xíʼinñá. 12 Na̱ ndóo iniún kíʼinna xu̱ʼún ña̱ va̱ʼa kaʼnína. Táxitóún* xu̱ʼún ña̱ va̱ʼa kiʼún si̱kíña á ña̱ va̱ʼa taváún ku̱a̱ʼáka xu̱ʼún xíʼinña. Xíʼin ña̱ ndúxa̱ kíndaún xu̱ʼún ndaʼa̱ na̱ ñanitáʼún. Na̱ndóso-iniún xa̱ʼíi̱’, káchi táta káʼnu Jehová.

13 ”‘Kánindaʼíi̱ xa̱ʼa̱ ña̱ kúndasíi̱ xínii̱ xu̱ʼún ña̱ kíʼún xa̱ʼa̱ ña̱ sándaʼviún ta saátu xa̱ʼa̱ ña̱ ndóo na̱ xáʼní nu̱ún. 14 ¿Á kundeé-iniún ta á ndakúka koún ki̱vi̱ ña̱ ná taxii̱ castigo ndaʼún? Yi̱ʼi̱ Jehová kúú ta̱ ni̱ka̱ʼa̱nña ta keʼévai̱ña. 15 Taxii̱ ña̱ xa̱a̱ síín síín ñuu ku̱ʼún koún, xa̱a̱ síín síín ñuu náʼnu ku̱ʼún koún; sandíʼi-xa̱ʼíi̱ ña̱ yaku̱a̱ ña̱ kéʼún. 16 Nu̱ú ndiʼi na̱ ñuu sakúkaʼi̱n nu̱ún tasaá kunda̱a̱-iniún ña̱ yi̱ʼi̱ kúú Jehová’”.

17 Tuku ni̱ka̱ʼa̱n Jehová xíʼi̱n ta ka̱chira: 18 “Yóʼó ta̱ kúú se̱ʼe ta̱a, kǒo chiñuka na̱ ñuu Israel nu̱úi̱, nda̱a̱ táki̱ʼva íyo ña̱ʼa ña̱ va̱ása ndáyáʼvi ña̱ kée sa̱tá plata, saá íyona. Ndiʼi na̱yóʼo, íyona nda̱a̱ táki̱ʼva íyo cobre, estaño, hierro xíʼin plomo ña̱ ñúʼu ini iin horno.* Nda̱a̱ táki̱ʼva íyo ña̱ʼa ña̱ va̱ása ndáyáʼvi ña̱ kée sa̱tá plata saá íyona.

19 ”Xa̱ʼa̱ ña̱kán, ña̱yóʼo kúu ña̱ káʼa̱n táta káʼnu Jehová: ‘Xa̱ʼa̱ ña̱ kǒo chiñukandó nu̱úi̱, táki̱ʼva kǒo chiñu ña̱ʼa ña̱ va̱ása ndáyáʼvi ña̱ kée sa̱tá plata, ndakayai̱ ndiʼindó ti̱xin ñuu Jerusalén. 20 Táki̱ʼva chítáʼanna plata, cobre, hierro, plomo xíʼin estaño ta táannaña ini iin horno ña̱ va̱ʼa sandútanaña, ta tívina nu̱ú ñuʼu̱ tasaá kǒo nda̱ʼva̱ña, saá chitáʼi̱n ndóʼó xa̱ʼa̱ ña̱ sáa̱níi̱, tivii̱ sa̱tándó ta nda̱a̱ táki̱ʼva koo na̱ sandútai̱, saá koondó. 21 Sandátakai̱ ndóʼó ta nda̱a̱ táki̱ʼva koo ta̱ tivi ñuʼu̱ sa̱tándó saá koi̱ xa̱ʼa̱ ña̱ sáa̱níi̱, ta ndutandó iniña. 22 Nda̱a̱ táki̱ʼva sándutana plata ini iin horno, saá ndutandó iniña ta kunda̱a̱-inindó ña̱ yi̱ʼi̱ Jehová kúú ta̱ náʼa̱ ña̱ sáa̱níi̱ xíʼinndó’”.

23 Tuku ni̱ka̱ʼa̱n Jehová xíʼi̱n ta ka̱chira: 24 “Yóʼó ta̱ kúú se̱ʼe ta̱a, ka̱ʼa̱n ña̱yóʼo xíʼinña: ‘Yóʼó kúún iin ñuu ña̱ va̱ása ndundii,* va̱ása kuun sa̱vi̱ nu̱ún xa̱ʼa̱ ña̱ sáa̱níi̱ xíʼún. 25 Na̱ profeta na̱ ndóo iniña, ndu̱una contra xíʼinña; nda̱a̱ táki̱ʼva kéʼé iin ndikaʼa* tá xáxirí kití tí ti̱inrí, saá kéʼéna xíʼin na̱ yiví. Ndákiʼinna ña̱ʼa ña̱ va̱ʼa ta saátu ña̱ʼa ña̱ ndáyáʼvi. Xa̱ʼnína ku̱a̱ʼání yii̱ ná ñaʼá ná ndoo iniña. 26 Na̱ su̱tu̱ na̱ ndóo iniña ni̱ya̱ʼandosóna ley ña̱ ta̱xii̱ ta íxayaku̱a̱kana lugar ña̱ yi̱i̱ ña̱ kúúmiíi̱. Va̱ása ndákunina ndáaña kúú lugar ña̱ yi̱i̱ ta ndáaña kúú ña̱ va̱ása yi̱i̱, ni va̱ása sánáʼa̱na inkana ndáaña kúú ña̱ yaku̱a̱ ta ndáaña kúú ña̱ va̱ása yaku̱a̱; kǒo íxato̱ʼóna ley ña̱ ta̱xii̱ xa̱ʼa̱ ki̱vi̱ sábado ta kǒo íxato̱ʼóna yi̱ʼi̱. 27 Na̱ kúúmií chiñu ña̱ ndáyáʼvi na̱ ndóo iniña, táki̱ʼva kéʼé lobo tí sákuachi kití tí tíinrí saá kéʼéna; kánina na̱ yiví ta xáʼnínana ña̱ va̱ʼa kiʼinna xu̱ʼún. 28 Táki̱ʼva kéʼé na̱ ndákasi sa̱tá ña̱ʼa xíʼin kaka saá ke̱ʼé na̱ profeta xíʼin ña̱yóʼo. Xítona visión ña̱ vatá* ta sándaʼvina chi káchina “Ña̱yóʼo kúú ña̱ káʼa̱n táta káʼnu Jehová”, soo kǒoví ña̱ níka̱ʼa̱n yi̱ʼi̱ Jehová. 29 Na̱ yiví na̱ ndóo ñuu yóʼo, sándaʼvina ta íxakuíʼnána; íxandi̱va̱ʼana xíʼin na̱ xóʼvi̱* ta saátu na̱ nda̱ʼví; sándaʼvina na̱ ke̱e inka ñuu na̱ ndóo xíʼinna ta va̱ása nda̱kú ndátiinna ku̱a̱chi xíʼinna’.

30 ”‘Na̱ndukúi̱ iin ta̱a ta̱ sandáʼa nama̱ ña̱ ku̱vaʼa xíʼin yu̱u̱ á iin ta̱ kundichi nu̱ú ni̱nda̱ta̱ nama̱ ña̱ va̱ʼa ka̱ʼa̱nra xa̱ʼa̱ na̱ yiví na̱ ndóo nu̱ú ñuʼú yóʼo tasaá va̱ása ndiʼi-xa̱ʼa̱na. Soo kǒo nda̱a̱ ni iinna níndani̱ʼíi̱. 31 Ña̱kán na̱ʼi̱ ña̱ ndeéní sái̱ xíʼinna ta sandíʼi-xa̱ʼíi̱na saáchi sáa̱níi̱ xíʼinna, ta ña̱yóʼo íyoña nda̱a̱ táki̱ʼva íyo iin ñuʼu̱. Táki̱ʼva íyo ña̱ ke̱ʼéna saá koo ña̱ taxii̱ ndaʼa̱na’, káchi táta káʼnu Jehová”.