Ezequiel
31 Tá ki̱vi̱ nu̱ú ña̱ yo̱o̱ u̱ni̱ ña̱ ku̱i̱ya̱ 11, tuku ni̱ka̱ʼa̱n Jehová xíʼi̱n ta ka̱chira: 2 “Yóʼó ta̱ kúú se̱ʼe ta̱a,* ka̱ʼa̱n xíʼin ta̱ faraón ta̱ rey ñuu Egipto ta saátu xíʼin ndiʼi na̱ kítáʼan xíʼinra:
‘¿Ndáana kivi chitáʼanna xíʼún xa̱ʼa̱ ña̱ káʼnuníún?
3 Yóʼó íyoún nda̱a̱ táki̱ʼva íyo iin ta̱ ñuu Asiria,
íyoún nda̱a̱ táki̱ʼva íyo iin yitu̱n tú cedro tú íyo chí Líbano tú liviní ndaʼa̱,
íyoún nda̱a̱ táki̱ʼva íyo iin yitu̱n tú táxi ku̱nda̱ti̱,* tú súkunní;
ta nda̱a̱ nu̱ú íyo vi̱kó, ni̱xa̱a̱ nu̱ún.
4 Ti̱kui̱í kúú tá sa̱kúaʼnuní yóʼó, ti̱kui̱í tá kúnúní ñúʼu kúú tá chi̱ndeétáʼan xíʼún ña̱ súkunní xa̱ʼnún.
Ni̱xi̱yo yu̱ta válí nu̱ú ni̱ndu̱ta̱ún;
ti̱kui̱í yóʼo kúú tá xi̱koso̱ ndiʼi yitu̱n tú ni̱xi̱yo chí yuku̱.
5 Ña̱kán kúú ña̱ súkunníka xa̱ʼnún nu̱ú inkaka yitu̱n tú íyo chí yuku̱.
Ku̱a̱ʼání ndu̱u ndaʼún ta nda̱kaa̱ ña̱yóʼo
xa̱ʼa̱ ña̱ ku̱a̱ʼání ti̱kui̱í xi̱ñuʼu xa̱ʼún.
6 Ndiʼi saa tí ndáchí chí ndiví, ke̱ʼérí chi̱ʼyo̱rí ndaʼún,
ndiʼi kití yukú tí íyo chí yuku̱, ka̱ku se̱ʼerí ti̱xin ndaʼún,
ku̱a̱ʼání na̱ ñuu xi̱ndoona ku̱nda̱ti̱ xa̱ʼún.
7 Liviní xi̱naʼún xa̱ʼa̱ ña̱ káʼnuníún ta saátu xa̱ʼa̱ ña̱ náni̱ní ni̱xi̱yo ndaʼún,
saáchi ti̱oʼún* nu̱uña nda̱a̱ nu̱ú xínu ti̱kui̱í tá ndeéní ku̱a̱ʼa̱n.
8 Nda̱a̱ ni iin yitu̱n tú cedro tú íyo jardín Ndióxi̱, va̱ása níxa̱a̱nú kitáʼannú xíʼún.
Nda̱a̱ ni iin yitu̱n tú enebro, va̱ása níxi̱yo ndaʼa̱nú nda̱a̱ táki̱ʼva ni̱xi̱yo ndaʼún.
Nda̱a̱ ni iin tu̱chíta̱,* va̱ása níkitáʼan ndaʼa̱nú xíʼin ndaʼún.
Nda̱a̱ ni iin yitu̱n tú íyo jardín Ndióxi̱, va̱ása níkitáʼannú xíʼún xa̱ʼa̱ ña̱ liviníún.
9 Liviní ke̱ʼíi̱ yóʼó ta ni̱xi̱yo ku̱a̱ʼání ndaʼún,
ta ndiʼika yitu̱n tú ni̱xi̱yo chí Edén, jardín Ndióxi̱ ta̱ nda̱a̱, xi̱kuni̱nú koonú nda̱a̱ táki̱ʼva íyoún’.
10 ”Xa̱ʼa̱ ña̱kán, ña̱yóʼo kúú ña̱ káʼa̱n táta káʼnu Jehová: ‘Xa̱ʼa̱ ña̱ súkunní ni̱xa̱a̱nú ku̱unú, ta nu̱únú ni̱xa̱a̱ña nda̱a̱ nu̱ú íyo vi̱kó, ta ni̱nuní xi̱kuninú xa̱ʼa̱ ña̱ súkunní ni̱xi̱yonú, 11 ndataxii̱nú ndaʼa̱ ta̱ ndakúní, ta̱ xáʼndachíñu nu̱ú na̱ ñuu. Taxira castigo ndaʼa̱nú ta yi̱ʼi̱ kundasíi̱ kunii̱nú xa̱ʼa̱ ña̱ va̱ása va̱ʼa ke̱ʼénú. 12 Ta na̱ inka ñuu, na̱ ndi̱va̱ʼaníka-ini nu̱ú inkaka na̱ ñuu, kaʼndananú ta sandákoonanú chí yuku̱; ndiʼi saá yoso̱ ko̱yo ndaʼa̱nú, ta ndaʼa̱nú ña̱ ni̱ta̱ʼnu̱ ko̱yoña iníí nu̱ú xínu ti̱kui̱í ñuu kán. Ndiʼi ñuu ña̱ íyo nu̱ú ñuʼú, kuxíkáña nu̱ú ku̱nda̱ti̱ ndaʼa̱nú ta sandákooñanú. 13 Ndiʼi saa tí ndáchí chí ndiví, kundósorí ndaʼa̱nú ta ndiʼi kití yukú tí íyo chí yuku̱ kundoorí ndaʼa̱nú. 14 Ña̱yóʼo kuuña ña̱ va̱ʼa nda̱a̱ ni iin yitu̱n tú íyo yatin nu̱ú ñúʼu ti̱kui̱í ná va̱ása kuaʼnu súkunnínú á ná va̱ása xa̱a̱ nu̱únú nda̱a̱ nu̱ú íyo vi̱kó, ta saátu nda̱a̱ ni iin yitu̱n tú va̱ʼaní kóso̱na ná va̱ása xa̱a̱nú súkunní koonú. Saáchi nda̱a̱ táki̱ʼva koo tú kuvi saá koo ndiʼi yitu̱n ta ndu̱xu̱nnú nda̱a̱ táki̱ʼva ndúxu̱n na̱ yiví’.
15 ”Ña̱yóʼo kúú ña̱ káʼa̱n táta káʼnu Jehová: ‘Ki̱vi̱ tá ná ndu̱xu̱n túyóʼo,* taxii̱ ná kuakuna xa̱ʼa̱nú. Xa̱ʼa̱ ña̱kán, ndakasii̱ ti̱kui̱í tá kúnúní ñúʼu ta ndakasii̱ nu̱ú ndeéní xínu ti̱kui̱í. Taxii̱ ná kunaa chí yuku̱ Líbano xa̱ʼa̱ túyóʼo ta yi̱chi̱ ndiʼi yitu̱n tú íyo chí yuku̱. 16 Taxii̱ ná kisi na̱ ñuu tá ná kuniso̱ʼona ña̱ nduva túyóʼo tá ná sandúxu̱i̱nnú xíʼin ndiʼi na̱ ni̱xi̱ʼi̱. Ta ndiʼi yitu̱n tú íyo chí Edén mií tú va̱ʼaka ta saátu yitu̱n tú va̱ʼaka tú íyo chí Líbano, ndiʼi tú va̱ʼaní ni̱ko̱so̱na, ti̱xin ñuʼú sandíkona-ininú. 17 Nda̱a̱ táki̱ʼva koo tú kuvi saá kootu túyóʼo ta ndu̱xu̱nnú xíʼinnú nu̱ú ñúʼu na̱ xa̱ʼnína xíʼin espada, saátu ndiʼi-xa̱ʼa̱ na̱ xi̱chindeétáʼan xíʼinnú na̱ xi̱ndoo xíʼin na̱ inka ñuu’.
18 ”‘¿Ndáa yitu̱n tú íyo chí Edén kivi chitáʼanna xíʼún xa̱ʼa̱ ña̱ liviníún ta káʼnuníún? Soo kuvitu yóʼóva xíʼin yitu̱n tú íyo chí Edén. Kandúʼún ma̱ʼñú na̱ va̱ása níta̱ʼnda̱ nu̱ú yi̱i̱,* na̱ xa̱ʼnína xíʼin espada. Ña̱yóʼo kúú ña̱ kundoʼo ta̱ faraón xíʼin ndiʼi na̱ kítáʼan xíʼinra’, káchi táta káʼnu Jehová”.