Ezequiel
32 Tá ki̱vi̱ nu̱ú ña̱ yo̱o̱ 12, ña̱ ku̱i̱ya̱ 12, tuku ni̱ka̱ʼa̱n Jehová xíʼi̱n ta ka̱chira: 2 “Yóʼó ta̱ kúú se̱ʼe ta̱a,* kata iin yaa ña̱ suchí-ini xa̱ʼa̱ ta̱ faraón, ta̱ rey ñuu Egipto ta ka̱ʼún xíʼinra:
‘Nu̱ú ndiʼi na̱ ñuu ni̱xi̱yoún nda̱a̱ táki̱ʼva íyo iin ndikaʼa* yúta̱* tí ndakú,
soo sa̱ndíʼi-xa̱ʼa̱na yóʼó.
Ni̱xi̱yoún nda̱a̱ táki̱ʼva íyo kití káʼnu tí ndíkaa̱ ti̱xin ti̱kui̱í; ndeéní xi̱kanda̱ún xi̱ndika̱ún ini yu̱ta,
xíʼin xa̱ʼún ña̱ xi̱kuumií nda̱ʼyi̱ xi̱ ixayaku̱a̱ún yu̱ta’.
3 ”Ña̱yóʼo kúú ña̱ káʼa̱n táta káʼnu Jehová:
‘Kuniñúʼi̱ ku̱a̱ʼání na̱ ñuu ña̱ sakánana ñunú* sa̱táún,
ta na̱yóʼo tavána yóʼó ta kañuuna* yóʼó xíʼin ñunúi̱ ña̱ tíin ti̱a̱ká.
4 Sandákoondaʼíi̱ yóʼó nu̱ú ñuʼú yi̱chí;
ta sakánai̱ yóʼó chí yuku̱.
Chindaʼíi̱ ndiʼi saa tí ndáchí chí ndiví ña̱ kundósorí sa̱táún
ta taxii̱ yóʼó kaxí ndiʼi kití yukú tí íyo nu̱ú ñuʼú.
5 Katai̱ ku̱ñún chí yuku̱
ta sakútúi̱ yoso̱ xíʼin ku̱ñún ña̱ ná kindo̱o.
6 Nda̱a̱ yuku̱ ndaxi* xíʼin ni̱ún chi ku̱a̱ʼáníña ku̱i̱ta̱;
kutú yu̱ta xíʼin ni̱ún’.
7 ‘Ta, tá ná ndiʼi-xa̱ʼún, ndakasii̱ ndiví xíʼin vi̱kó ta va̱ása taxikai̱ kutuu̱n tí ki̱mi.
Xíʼin vi̱kó ndakasii̱ ñu̱ʼu,*
ta va̱ása kutuu̱nka yo̱o̱.
8 Xa̱ʼa̱ yóʼó va̱ása taxikai̱ kutuu̱n ña̱ ndáye̱ʼe̱ chí ndiví
ta sakúnai̱ nu̱ú ñuʼún’, káchi táta káʼnu Jehová.
9 ‘Sandíʼi̱-ini ku̱a̱ʼání na̱ ñuu tá ná taxii̱ tiinna na̱ ñuún ta ku̱ʼu̱nna inka ñuu,
tá ná ku̱ʼu̱nna xíʼinna ñuu ña̱ va̱ása xíni̱ún.
10 Taxii̱ ña̱ ndeéní ná yi̱ʼví ku̱a̱ʼání ñuu,
ta, tá ná kuniñúʼi̱ espadai̱ nu̱úna, na̱ xáʼndachíñu nu̱úna yi̱ʼvínína.
Ndeéní kisina saáchi yi̱ʼvína kuvina,
ki̱vi̱ ña̱ ná ndiʼi-xa̱ʼún’.
11 Saáchi ña̱yóʼo kúú ña̱ káʼa̱n táta káʼnu Jehová:
‘Ta̱ rey ñuu Babilonia kixira kanitáʼanra xíʼún.
12 Taxii̱ ña̱ ná kaʼní na̱ ndakúní na̱ xáʼa̱n nu̱ú ku̱a̱chi ku̱a̱ʼání na̱ kítáʼan xíʼún xíʼin espada, ndiʼi na̱yóʼo ndi̱va̱ʼaní-inina nu̱ú inkaka na̱ ñuu.
Sandíʼi-xa̱ʼa̱na ña̱ xi̱kutaa̱ní-ini na̱ ñuu Egipto xíʼin,
ta ndiʼi-xa̱ʼa̱ ndiʼi na̱ kítáʼan xíʼinna.
13 Sandíʼi-xa̱ʼíi̱ ndiʼi kití sa̱na̱na tí ndóo nu̱ú xínu ku̱a̱ʼání ti̱kui̱í;
ta ni xa̱ʼa̱ kití ni xa̱ʼa̱ na̱ yiví va̱ása sakúyaku̱a̱ña ti̱kui̱í’.
14 ‘Tiempo saá, ndasandii̱ ti̱kui̱ína,
ya̱a̱ ya̱a̱ kunu yu̱tana ta kǒo ña̱ kasi nu̱úrá’,* káchi táta káʼnu Jehová.
15 ‘Tá ná ndasai̱ ñuu Egipto iin ñuʼú yi̱chí, iin ñuʼú ña̱ kǒo nda̱a̱ ni iin ña̱ʼa nu̱ú, iin ñuʼú ña̱ ta̱vána ndiʼi ña̱ʼa nu̱ú,
tá ná sandíʼi-xa̱ʼíi̱ ndiʼi na̱ ndóo nu̱úña,
na̱yóʼo kunda̱a̱-inina ña̱ yi̱ʼi̱ kúú Jehová.
16 Iin yaa ña̱ suchí-ini kúú ña̱yóʼo ta ndiʼi na̱ yiví kataña;
ndiʼi ná ñaʼá ná inka ñuu katanáña.
Katanáña xa̱ʼa̱ na̱ ñuu Egipto xíʼin ndiʼi na̱ kítáʼan xíʼinna’,
káchi táta káʼnu Jehová”.
17 Tasaá, tá ki̱vi̱ 15 ña̱ yo̱o̱ 12 ña̱ ku̱i̱ya̱ 12, ni̱ka̱ʼa̱n Jehová xíʼi̱n ta ka̱chira: 18 “Yóʼó ta̱ kúú se̱ʼe ta̱a, kuaku xa̱ʼa̱ ndiʼi na̱ ñuu Egipto ta ka̱ʼún ña̱ inkáchi ndiʼi-xa̱ʼa̱na* xíʼin ndiʼi na̱ ñuu na̱ ndakúní, ndiʼi-xa̱ʼa̱na xíʼin ndiʼi na̱ ñuu na̱ ni̱xi̱ʼi̱.
19 ”‘¿Á livikaún nu̱ú inkana? Kúánuu ta kandúʼún* xíʼin na̱ va̱ása níta̱ʼnda̱ nu̱ú yi̱i̱’.*
20 ”‘Na̱yóʼo kuvina xíʼin na̱ xa̱ʼnína xíʼin espada. Xíʼin espada kanitáʼanna xíʼin na̱yóʼo;* kañuundóna ku̱ʼu̱n xíʼinndó xíʼin ndiʼi na̱ kítáʼan xíʼinna.
21 ”’Nda̱a̱ ti̱xin Ya̱vi̱* ka̱ʼa̱n na̱ ndakúní xíʼinra,* na̱ xíni̱ní kanitáʼan ta saátu ka̱ʼa̱nna xíʼin na̱ chíndeétáʼan xíʼinra. Nuuna ta kuvina nda̱a̱ táki̱ʼva xíʼi̱ na̱ va̱ása níta̱ʼnda̱ nu̱ú yi̱i̱, na̱ xa̱ʼnína xíʼin espada. 22 Kán ndíkaa̱ ñuu Asiria xíʼin ndiʼi na̱ kítáʼan xíʼinña. Ta iníí síi̱n* nu̱ú ni̱ndu̱xu̱n ta̱ rey,* ndu̱xu̱n na̱ ñuu Asiria, ndiʼi na̱ xa̱ʼnína xíʼin espada. 23 Nda̱a̱ nu̱ú kúnú ini ya̱vi̱ ndu̱xu̱nna, ndiʼi na̱ kítáʼan xíʼinna na̱ xa̱ʼnína xíʼin espada ndu̱xu̱nna yatin nu̱ú íyo ya̱vi̱ ña̱ ni̱ndu̱xu̱nna saáchi sa̱yíʼvína na̱ ndóo nu̱ú ñuʼú nu̱ú ndóo na̱ táku.
24 ”’Kán ni̱ndu̱xu̱n ñuu Elam ta iníí síi̱nña ni̱ndu̱xu̱n na̱ kítáʼan xíʼinña, na̱ xa̱ʼnína xíʼin espada. Ku̱kaʼan nu̱ú na̱ sa̱yíʼvína, na̱ ndóo nu̱ú ñuʼú nu̱ú ndóo na̱ táku ta nu̱una nda̱a̱ nu̱ú kúnú. Inkáchi kukaʼan nu̱úna xíʼin na̱ ku̱a̱ʼa̱n ya̱vi̱ ta kundeé-inina xíʼinña. 25 I̱xatu̱ʼvana nu̱ú ndu̱xu̱n ñuu Elam xíʼin na̱ ñuu na̱ xa̱ʼnína ta saátu ndiʼi na̱ kítáʼan xíʼinna, ni̱ndu̱xu̱nna iníí síi̱n na̱yóʼo. Ndiʼi na̱yóʼo, va̱ása níta̱ʼnda̱ nu̱ú yi̱i̱na ta xa̱ʼnínana xíʼin espada saáchi sa̱yíʼvína ndiʼi na̱ ndóo nu̱ú ñuʼú nu̱ú ndóo na̱ táku. Inkáchi kukaʼan nu̱úna xíʼin na̱ ku̱a̱ʼa̱n ya̱vi̱ ta kundeé-inina xíʼinña. Ma̱ʼñú na̱ ni̱xi̱ʼi̱ ni̱ndu̱xu̱nra.
26 ”’Kán ndíkaa̱ ta̱ Mesec xíʼin ta̱ Tubal ta saátu ndiʼi na̱ kítáʼan xíʼinna. Iníí síi̱n nu̱ú ni̱ndu̱xu̱n ta̱yóʼo,* ni̱ndu̱xu̱n na̱kán. Ndiʼi na̱yóʼo, va̱ása níta̱ʼnda̱ nu̱ú yi̱i̱na ta xa̱ʼnínana xíʼin espada saáchi sa̱yíʼvína na̱ ndóo nu̱ú ñuʼú nu̱ú ndóo na̱ táku. 27 ¿Á va̱ása kuvitu na̱yóʼo xíʼin na̱ ndakúní na̱ xíni̱ kanitáʼan na̱ va̱ása níta̱ʼnda̱ nu̱ú yi̱i̱, na̱ ni̱ndu̱xu̱n xíʼin ña̱ʼa ña̱ xi̱xiniñúʼuna tá xi̱kanitáʼanna? Chí ti̱xin xi̱nína chindoona espadana* ta sa̱tá lekena kundóso ku̱a̱china, saáchi na̱ ta̱a yóʼo, sa̱yíʼvína na̱ ndóo nu̱ú ñuʼú nu̱ú ndóo na̱ táku. 28 Soo sandíʼi-xa̱ʼa̱na yóʼó xíʼin na̱ va̱ása níta̱ʼnda̱ nu̱ú yi̱i̱, ta kuviún xíʼin na̱ xa̱ʼnína xíʼin espada.
29 ”’Kán ndíkaa̱ ñuu Edom, xíʼin na̱ xáʼndachíñu nu̱úña ta saátu ndiʼi na̱ níʼi yichi̱ nu̱úña. Ni xi̱kuumiína ndee̱, chi̱ndoonana xíʼin na̱ xa̱ʼnína xíʼin espada; kuvitu na̱yóʼo xíʼin na̱ va̱ása níta̱ʼnda̱ nu̱ú yi̱i̱ ta saátu xíʼin na̱ ku̱a̱ʼa̱n ya̱vi̱.
30 ”’Kán ñúʼutu ndiʼi na̱ xi̱kuumií chiñu ña̱ ndáyáʼvi na̱ ni̱xi̱yo chí norte xíʼin ndiʼi na̱ sidonio na̱ sa̱kúkaʼanna nu̱ú, ta ku̱a̱ʼa̱nna ya̱vi̱ xíʼin na̱ ni̱xi̱ʼi̱ ni ndeéní sa̱yíʼvína inkana xíʼin ndee̱na. Kuvitu na̱yóʼo xíʼin na̱ va̱ása níta̱ʼnda̱ nu̱ú yi̱i̱, na̱ xa̱ʼnína xíʼin espada, ta inkáchi kukaʼan nu̱úna xíʼin na̱ ku̱a̱ʼa̱n ya̱vi̱ ta kundeé-inina xíʼinña.
31 ”’Kuni ta̱ faraón ndiʼi na̱yóʼo ta ndi̱ko-inira xíʼin ña̱ ndo̱ʼo ndiʼi na̱ xi̱kitáʼan xíʼinra; xíʼin espada kaʼnína ta̱ faraón ta saátu ndiʼi na̱ soldadora’, káchi táta káʼnu Jehová.
32 ”‘Xa̱ʼa̱ ña̱ sa̱yíʼvíra na̱ ndóo nu̱ú ñuʼú nu̱ú ndóo na̱ táku, ta̱ faraón ta saátu ndiʼi na̱ kítáʼan xíʼinra, kuvina xíʼin na̱ va̱ása níta̱ʼnda̱ nu̱ú yi̱i̱ xíʼin na̱ xa̱ʼnína xíʼin espada’, káchi táta káʼnu Jehová”.