Abril

Ta̱ Aristarco ta̱ ke̱e chí Tesalónica ña̱ ndíka̱a̱ chí Macedonia, nda̱kúní ni̱xi̱yo inira xíʼin ta̱ apóstol Pablo ta va̱ʼaní xi̱kitáʼanra xíʼinra. Ña̱ nu̱ú yichi̱ ña̱ káʼa̱n ña̱ Biblia xa̱ʼa̱ ta̱yóʼo, kúú ña̱ tá ni̱xi̱yora xíʼin ta̱ Pablo chí Éfeso, tá yichi̱ u̱ni̱ ña̱ ni̱xa̱ʼa̱nra xi̱tora na̱ congregación xa̱ʼa̱ ña̱ xi̱kuura misionero. Kán, iin tiʼvi na̱ yiví ti̱inna ta̱ Aristarco (Hech. 19:29). Soo, tá sa̱ñánara va̱ása níxiinra sandákoora ta̱ Pablo, ta ni̱ndo̱ora xíʼinra. Tá ni̱ya̱ʼa sava yo̱o̱, tá íyona chí Grecia, tá xi̱kuni̱ na̱ sáa̱-ini xíni tu̱ʼun Ndióxi̱ kaʼnína ta̱ Pablo, ta̱ Aristarco va̱ása nísandákora ta̱ Pablo (Hech. 20:2-4). Tá ku̱i̱ya̱ 58, tá ku̱a̱ʼa̱nna xíʼin ta̱ Pablo veʼeka̱a chí ñuu Roma, ta̱ Aristarco ni̱xa̱ʼa̱nra xíʼinra ta inkáchi ni̱ya̱ʼana nu̱ú tu̱ndóʼo tá ni̱ki̱ʼvi barco tú ku̱a̱ʼa̱nna xíʼin ini ti̱kui̱í (Hech. 27:1, 2, 41). Ta chí ñuu Roma, sana xi̱ndika̱a̱ra loʼo tiempo xíʼin ta̱ Pablo veʼeka̱a (Col. 4:10). Ta̱ Pablo va̱ʼaní ku̱nira, xa̱ʼa̱ ña̱ nda̱kúní ni̱xi̱yo ini ta̱ migora xíʼinra. Kivi keʼéyó nda̱a̱ táki̱ʼva ke̱ʼé ta̱ Aristarco, tá chíndeétáʼanyó xíʼin na̱ hermanoyó tá yáʼana nu̱ú tu̱ndóʼo. w20.01 9 párr. 4, 5

Na̱ cristiano na̱ nda̱kaxin Ndióxi̱ ku̱ʼu̱n chí ndiví, sana ndákanixi̱nína ña̱ va̱ása xíniñúʼu ndakiʼinna ña̱ ndáyáʼviní yóʼo, soo va̱ása xíka-inina ña̱ mií Jehová kúú ta̱ nda̱kaxinñaʼá. Saáchi tá ndákanixi̱nína xa̱ʼa̱ ña̱ ndakiʼinna, kúsi̱íní-inina ta táxina tíxa̱ʼvi xa̱ʼa̱ ña̱yóʼo (1 Ped. 1:3, 4). ¿Á kúni̱ kachi ña̱yóʼo ña̱ na̱ ku̱ʼu̱n chí ndiví xa̱a̱ kúni̱na kuvina? Ta̱ apóstol Pablo kúú ta̱ ndákuiin ña̱ pregunta yóʼo. Tá chi̱táʼanra ku̱ñu na̱ nda̱kaxin Ndióxi̱ ku̱ʼu̱n chí ndiví xíʼin veʼe válí ña̱ manta, ni̱ka̱ʼa̱nra ña̱yóʼo: “Ta miíyó na̱ íyo ini ña̱ veʼe válí ña̱ manta yóʼo ndándikó-iniyó ta ndíʼi̱-iniyó, ta su̱ví xa̱ʼa̱ ña̱ kúni̱yó tavayó ña̱ veʼe yóʼo sa̱táyó kúúña, chi ña̱ kúni̱yó kúú ña̱ ndaku̱ndixiyó ña̱ inka, ña̱ va̱ʼa ná kokó ña̱ táku ña̱ xíʼi̱” (2 Cor. 5:4). Ña̱kán su̱ví xa̱ʼa̱ ña̱ va̱ása kúni̱ka na̱ nda̱kaxin Ndióxi̱ ku̱ʼu̱n chí ndiví kutakuna nu̱ú ñuʼú yóʼo kúúña, ta ni su̱ví xa̱ʼa̱ ña̱ xa̱a̱ kúni̱na kuvina kúúña. Chi kúsi̱íní-inina íyona nu̱ú ñuʼú yóʼo, ta chíka̱a̱na ndee̱ ña̱ ndasakáʼnuna Jehová ndiʼi ki̱vi̱, xíʼin na̱ veʼena ta saátu xíʼin na̱ migona. Soo ni nda̱a̱ ndáaka ña̱ kéʼéna, va̱ása nándósóna xa̱ʼa̱ ña̱ ndátuna ndakiʼinna (1 Cor. 15:53; 2 Ped. 1:4; 1 Juan 3:2, 3). w20.01 23 párr. 12, 13

Ña̱ va̱ʼa sanáʼa̱ Jehová miíyó káʼa̱nra xíʼinyó ña̱ ná nasamayó ña̱ kéʼéyó. Ta ku̱a̱ʼá ki̱ʼva kéʼéraña. Tá kúú, sana ña̱ káʼviyó nu̱ú Biblia á ña̱ xíniso̱ʼoyó ti̱xin reunión kivi chindeétáʼanña xíʼinyó ña̱ nasamayó ña̱ kéʼéyó. Ta saátu na̱ anciano kivi chindeétáʼanna xíʼinyó. Ku̱a̱ʼá ki̱ʼva kúú ña̱ táxi Jehová consejo ndaʼa̱yó, soo kéʼéraña chi kúʼvi̱ní-inira xínira miíyó (Jer. 30:11). Jehová chíndeétáʼanra xíʼinyó ña̱ kundeé-iniyó nu̱ú tu̱ndóʼo. Yiváyó ta̱ íyo chí ndiví ndáara miíyó tá yáʼayó nu̱ú tu̱ndóʼo, nda̱a̱ táki̱ʼva kéʼé iin yivá ta̱ kúʼvi̱ní-ini xíni se̱ʼe. Xíniñúʼura espíritu santora ña̱ chindeétáʼanra xíʼinyó ña̱ va̱ʼa nda̱kú koo iniyó xíʼinra (Luc. 11:13). Saátu chíndeétáʼanra xíʼinyó tá ndákava-iniyó. Tá kúú, ña̱ káʼa̱nra taxira ndaʼa̱yó chí nu̱únínu, chíndeétáʼanña xíʼinyó ña̱ kundeé-iniyó ya̱ʼayó nu̱ú tu̱ndóʼo. Ná ndakanixi̱níyó xa̱ʼa̱ ña̱yóʼo: yiváyó sandiʼi-xa̱ʼa̱ra ndiʼi tu̱ndóʼo ña̱ ndóʼoyó, ni nda̱a̱ ndáaka ña̱ kúúña. Ña̱ xóʼvi̱yó su̱ví ndiʼi tiempo kooña, soo bendición ña̱ taxi Jehová ndaʼa̱yó ndiʼi tiempo koo ña̱yóʼo (2 Cor. 4:16-18). w20.02 5 párr. 14, 15

Kiviva sandíʼi-xa̱ʼa̱yó ña̱ kúini̱-iniyó. Ná ka̱ʼa̱nyó xa̱ʼa̱ na̱ ñani ta̱ José. Tá ni̱ya̱ʼa ku̱i̱ya̱ ña̱ ke̱ʼéna ña̱ va̱ása va̱ʼa xíʼinra, nda̱kutáʼanna xíʼinra chí Egipto. Soo va̱ása ndi̱ku̱n níka̱ʼa̱nra xíʼinna ndáa ta̱a kúúra, chi xi̱kuni̱ra kunda̱a̱-inira á xa̱a̱ na̱samana ki̱ʼva ña̱ íyona. Ke̱ʼéra iin comida ña̱ va̱ʼa kuxu ndiʼi na̱ ñanira, soo ni̱ka̱ʼa̱nra xíʼin na̱ káchíñu nu̱úra ña̱ ku̱a̱ʼáka comida ná taxina kuxu ta̱ Benjamín ñanira ta̱ loʼoka (Gén. 43:33, 34). Soo kǒo nda̱a̱ ni iin ña̱ káʼa̱n ña̱ ku̱kúini̱-inina xi̱nina ta̱ Benjamín, chi ni̱na̱ʼa̱na ña̱ ni̱ndi̱ʼi̱-inina xa̱ʼa̱ra, ta saátu xa̱ʼa̱ yivána ta̱ Jacob (Gén. 44:30-34). Na̱ ñani ta̱ José ku̱chiñuna sa̱ndiʼi-xa̱ʼa̱na ña̱ kúini̱-inina, tasaá nda̱kutáʼan vií tuku na̱ veʼena (Gén. 45:4, 15). Ta tá ná sandiʼi-xa̱ʼa̱yó ña̱ kúini̱-iniyó, vií kutáʼanyó xíʼin na̱ veʼeyó, ta saátu xíʼin na̱ congregación. Jehová kúni̱ra ña̱ ná sandiʼi-xa̱ʼa̱yó ña̱ kúini̱-iniyó, ta vií ná kutáʼanyó. Va̱ása taxiyó ki̱ʼvi ña̱yóʼo níma̱yó, tá vitá íyo iniyó, kúsi̱í-iniyó xíʼin ña̱ʼa ña̱ xa̱a̱ kúúmiíyó ta táxiyó tíxa̱ʼvi. w20.02 19 párr. 17, 18

Tá káʼún xíʼin Jehová, saá kúú ña̱ náʼún ña̱ táxiún tíxa̱ʼvi ndaʼa̱ra xa̱ʼa̱ ña̱ kúʼvi̱-inira xínira yóʼó. Ña̱ kúʼvi̱-iniún xíniún Jehová kuaʼnukaña tá ná ka̱ʼún xíʼinra xa̱ʼa̱ ndiʼi ña̱ sándi̱ʼi̱-iniún, ta taxiún tíxa̱ʼvi ndaʼa̱ra xa̱ʼa̱ ndiʼi ña̱ kéʼéra xa̱ʼún. Ta ndundakúka ña̱ kítaʼún xíʼinra tá ná kiʼún kuenta ña̱ ndákuiinra ña̱ káʼún xíʼinra. Ta saátu kandíxaún ña̱ kúnda̱a̱-ini Ndióxi̱ xíʼin ña̱ ndóʼún. Ta ña̱ va̱ʼa kuyatinkaún nu̱ú Jehová, xíniñúʼu kunda̱a̱-iniún ndáaña kútóora, ta ndáaña kúni̱ra ná keʼún. Ña̱ va̱ʼa kunda̱a̱-iniún xa̱ʼa̱ ña̱yóʼo xíniñúʼu kaʼviún tu̱ʼunra ña̱ Biblia. Ña̱kán xíniñúʼu sákuaʼún kundayáʼvi tu̱ʼun Ndióxi̱ nu̱ún. Nu̱ú Biblia va̱xi ña̱ nda̱a̱ xa̱ʼa̱ Jehová xíʼin ña̱ kúni̱ra keʼéra xa̱ʼún. ¿Ndáa ki̱ʼva kivi na̱ʼún ña̱ ndáyáʼvi ña̱yóʼo nu̱ún? Tá káʼviúnña ndiʼi ki̱vi̱, tá xa̱a̱ káʼvi kúeún xa̱ʼa̱ ña̱ sanáʼa̱na yóʼó, ta kéʼún ña̱ sákuaʼún (Sal. 119:97, 99; Juan 17:17). ¿Á xa̱a̱ ta̱váún tiempo ña̱ kaʼviúnña ndiʼi ki̱vi̱? w20.03 5 párr. 8, 9

Ta, ¿ndáaña kivi keʼéyó tá va̱ása kívi kakaníyó? Kivi kooyó nu̱ú yáʼa ku̱a̱ʼá na̱ yiví ta natúʼunyó xíʼinna xa̱ʼa̱ Ndióxi̱. Ta saátu kivi natúʼunyó xíʼinna xíʼin teléfono á xíʼin carta. Ku̱a̱ʼá na̱ publicador na̱ ndeé ndóʼo kúsi̱í-inina ña̱ kéʼéna ña̱yóʼo ña̱ va̱ʼa nátúʼunna xíʼin na̱ yiví. Ña̱kán kuchiñuvayó saxínuyó ndiʼi chiñu ña̱ ta̱xi Ndióxi̱ ndaʼa̱yó ni ndeé ndóʼoyó. Ta̱ apóstol Pablo ni̱ka̱ʼa̱nra: “Ndiʼi ña̱ʼa va̱ʼa kéʼíi̱ña chi Ndióxi̱ táxi ndee̱ ndaʼíi̱” (Filip. 4:13). Xi̱niñúʼura ndee̱ yóʼo tá ni̱xa̱ʼa̱nra na̱túʼunra xa̱ʼa̱ Ndióxi̱ ta ndeé ndo̱ʼora. Ni̱ka̱ʼa̱nra xíʼin na̱ ñuu Galacia: “Kúnda̱a̱-inindó xa̱ʼa̱ ña̱ ndeé ndo̱ʼíi̱, ta ni saá na̱túʼi̱n xíʼinndó xa̱ʼa̱ Ndióxi̱ ña̱ yichi̱ nu̱ú” (Gál. 4:13). Saátu miíyó tá ndeé ndóʼoyó kivi natúʼunyó xa̱ʼa̱ Ndióxi̱ xíʼin na̱ doctor, ná enfermera á inkaka na̱ káchíñu hospital. Ku̱a̱ʼá na̱ yiví yóʼo va̱ása ndóona veʼena tá ku̱a̱ʼa̱nyó natúʼunyó xíʼinna. w19.04 4, 5 párr. 10, 11

Tá ku̱i̱ya̱ 2018, yáʼa 223,000 kúú na̱ publicador ni̱xi̱yo sava lugar nu̱ú va̱ása nítaxika na̱ chíñu ndasakáʼnuna Jehová. Va̱ása ndákanda̱-iniyó xa̱ʼa̱ ña̱yóʼo, chi xa̱a̱ kúnda̱a̱-iniyó ña̱ saá kundoʼo ndiʼi na̱ ndásakáʼnu Ndióxi̱. Nda̱a̱ ndáaka nu̱ú íyoyó, sana iin kamava kivi ka̱ʼa̱n na̱ chíñu xíʼinyó ña̱ va̱ása kivika ndasakáʼnuyó Jehová. Tá ná kasi na̱ chíñu nu̱úyó ña̱ ndasakáʼnuyó Ndióxi̱, sana ndakanixi̱níyó ña̱ va̱ása va̱ʼaka íyoyó nu̱úra. Soo su̱ví ña̱ nda̱a̱ kúú ña̱yóʼo. Ná kotoyó ña̱ ndo̱ʼo ta̱ apóstol Pablo. Ndixa ni̱xi̱yo Jehová xíʼinra. Ta ta̱xira chiñu ndaʼa̱ra ña̱ kaʼyíra 14 carta ña̱ va̱xi nu̱ú ña̱ Escrituras Griegas Cristianas ta saátu xi̱kuura apóstol nu̱ú na̱ inka ñuu. Ta ni saá, sa̱xóʼvi̱nínara (2 Cor. 11:23-27). Ña̱ ndo̱ʼora náʼa̱ña nu̱úyó ña̱ táxiva Jehová ña̱ ná xo̱ʼvi̱ na̱ ndásakáʼnu-ñaʼá, soo va̱ása sandákoo ndaʼa̱rana. w19.07 8 párr. 1, 3

Jehová náʼa̱ra ña̱ kúʼvi̱ní-inira xínira miíyó chi chíndeétáʼanra xíʼinyó ña̱ va̱ʼa kuchiñuyó xíʼin na̱ sáa̱-ini xíni miíyó. Na̱yóʼo kúú ta̱ Ndi̱va̱ʼa xíʼin na̱ ta̱chí ndi̱va̱ʼa. Jehová káʼa̱nra xíʼinyó ña̱ ná kiʼinníyó kuenta xíʼinna ta táxitura ña̱ xíniñúʼuyó ña̱ kanitáʼanyó xíʼinna (Efes. 6:10-13). Tá ná taxiyó ña̱ chindeétáʼanra xíʼinyó ta ná kuniñúʼuyó ña̱ táxira ndaʼa̱yó, saá kúú ña̱ kuchiñuyó xíʼin ta̱ Ndi̱va̱ʼa. Kivi kandíxa va̱ʼayó Ndióxi̱ táki̱ʼva ke̱ʼé ta̱ apóstol Pablo, tá ni̱ka̱ʼa̱nra ña̱yóʼo: “Tá Ndióxi̱ íyora xíʼinyó, ¿ndáana kivi keʼé ña̱ va̱ása va̱ʼa xíʼinyó?” (Rom. 8:31). Miíyó na̱ kándíxa Jehová, va̱ása nándukúníyó xa̱ʼa̱ ta̱ Ndi̱va̱ʼa xíʼin na̱ ta̱chí ndi̱va̱ʼa. Chi xa̱ʼa̱ Jehová ndíʼi̱ka-iniyó sákuaʼayó ta kachíñuyó nu̱úra (Sal. 25:5). Ni saá íyoña, xíniñúʼu kunda̱a̱-iniyó ndáaña kéʼé ta̱ Ndi̱va̱ʼa ña̱kán va̱ása taxiyó sandáʼvira miíyó (2 Cor. 2:11). w19.04 20 párr. 1, 2

Tá nátúʼunyó xíʼin iin na̱ kúsuchí-ini, ¿á vií xíniso̱ʼo ña̱ nátúʼunna xíʼinyó? ¿Á náʼa̱yó ña̱ kúʼvi̱-iniyó xíniyóna ta kúndáʼvi-iniyó xíniyóna? Sava xíniñúʼu vií ndaka̱xinyó tu̱ʼun ña̱ ka̱ʼa̱nyó xíʼinna. Kivi ka̱ʼa̱nyó ña̱yóʼo xíʼinna: “Kúsuchíní-inii̱ xa̱ʼa̱ ña̱ ndo̱ʼún ña̱yóʼo”. Ta, ña̱ va̱ʼa kunda̱a̱-iniyó xíʼin ña̱ nátúʼunna xíʼinyó kivi ka̱ʼa̱nyó xíʼinna: “Tá ni̱ka̱ʼún ña̱yóʼo xíʼi̱n, ña̱yóʼo na̱kunda̱a̱-inii̱, ¿á saá íyoña?”. Tá ná ka̱ʼa̱nyó ña̱yóʼo, kunda̱a̱-inina ña̱ xíniso̱ʼoyó ña̱ káʼa̱nna ta ndixa kúni̱níyóna ta kúni̱yó kunda̱a̱-iniyó xíʼin ña̱ ndóʼona (1 Cor. 13:4, 7). Xíniñúʼu kiʼinyó kuenta ña̱ kǒo ndakuiin kamayó. Va̱ása kama ndakuiinyó ta taxiyó consejo ndaʼa̱na tá túviyó ña̱ va̱ása va̱ʼa káʼa̱nna. Tá saá kéʼéna, xíniñúʼu kúee koo iniyó ta kundatuyó ña̱ kuniso̱ʼoyó ndiʼi ña̱ kúni̱na ka̱ʼa̱nna xíʼinyó, chi saá kéʼé Jehová. Va̱ása ka̱ʼa̱nyó xíʼinna ndáaña keʼéna, va̱ʼaka ná na̱ʼa̱yó ña̱ kúndáʼvi-iniyó xíniyóna ta kúʼvi̱-iniyó xíniyóna (1 Ped. 3:8). w19.05 17, 18 párr. 15-17

Na̱ ta̱a xíniñúʼu kuʼvi̱-inina kunina ñá síʼína táki̱ʼva ni̱kuʼvi̱-ini ta̱ Cristo xi̱nira na̱ congregación (Efes. 5: 28, 29). Ndíku̱nna yichi̱ ta̱ Cristo tá ndíʼi̱-inina xa̱ʼa̱ ñá síʼína ta su̱víka xa̱ʼa̱ miína. Sava na̱ ta̱a íxayo̱ʼvi̱ña xíʼinna ña̱ keʼéna ña̱yóʼo, saáchi sana na̱ veʼena va̱ása ni̱na̱ʼa̱na ña̱ kúʼvi̱-inina xínitáʼanna á va̱ása níke̱ʼéna ña̱ nda̱kú xíʼin inkana. Ni íxayo̱ʼvi̱ña xíʼinna xíniñúʼu ndakoona costumbre kán ña̱ va̱ʼa kundiku̱nna ley ta̱ Cristo. Tá kúʼvi̱-ini na̱ ta̱a xínina ñá síʼína, náyóʼo ixato̱ʼónána. Ta saátu na̱ íyo se̱ʼe, tá kúʼvi̱-inina xínina se̱ʼena va̱ása ka̱ʼa̱n ndi̱va̱ʼana xíʼinna ta ni va̱ása keʼéna ña̱ va̱ása va̱ʼa xíʼinna (Efes. 4:31). Saáchi káʼa̱nna xíʼinna ña̱ kúni̱nínana tasaá va̱ʼa kúni na̱ va̱lí yóʼo. Saá kúú ña̱ xa̱a̱ na̱yóʼo kuʼvi̱ka-inina kuniñaʼána ta kandíxanana. w19.05 6 párr. 21

¿Ndáaña na̱kunda̱a̱-ini ñá María xíʼin tu̱ʼun yóʼo? ¿Á nda̱kanixi̱níñá ña̱ xa̱a̱ ta̱ Jesús ndakiʼinra chiñu nu̱ú ta̱ Herodes á nu̱ú iin na̱ xi̱ndakiʼin nu̱úra ña̱ ñuu Israel? ¿Á nda̱kanixi̱níñá ña̱ miíñá xa̱a̱ koo reina ta na̱ veʼeñá koona ti̱xin ña̱ palacio? Kǒo nda̱a̱ ni iin ña̱ káʼa̱n nu̱ú Biblia ña̱ ndu̱kúñá ndakiʼinñá iin chíñu ña̱ ndáyáʼvi ti̱xin reino, ña̱yóʼo náʼa̱ña nu̱úyó ña̱ vitání ni̱xi̱yo ini ñá María. Ná ndakaʼányó chi ña̱ kúni̱yó ni̱ʼíyó tá káʼviyó Biblia xíʼin tutu ña̱ tává na̱ ñuu Jehová kúú ña̱ kutáʼan va̱ʼayó xíʼinra. Soo saátu xíniñúʼu kotoyó ndáa na̱ yiví kúúyó ta ndáaña xíniñúʼu keʼéyó ña̱ va̱ʼa sakusi̱íyó-ini Jehová (Sant. 1:22-25; 4:8). Xa̱ʼa̱ ña̱yóʼo ndiʼi yichi̱ tá káʼviyó xíniñúʼu ka̱ʼa̱nyó xíʼin Jehová ña̱ ná taxira espíritu santora ndaʼa̱yó. Saátu xíniñúʼu ka̱ʼa̱nyó xíʼinra ná chindeétáʼanra xíʼinyó ña̱ vií káʼviyó, ta ná kotoyó miíyó nda̱a̱ táki̱ʼva xítora miíyó. w19.05 30, 31 párr. 18, 19

Sava ndíʼi̱ní-iniyó xa̱ʼa̱ ku̱a̱ʼá tu̱ndóʼo ña̱ yáʼayó nu̱ú. Ná ka̱ʼa̱nyó xa̱ʼa̱ ña̱ ndo̱ʼo sava na̱ hermano. Iin ta̱ hermano ta̱ naní John, ta̱ ndóʼo kue̱ʼe̱ ña̱ naní esclerosis múltiple, xa̱a̱ 19 ku̱i̱ya̱ ti̱ndaʼa̱ra ta nda̱kavaní-inira tá sa̱ndákoo ñá síʼírara. Tándi̱ʼi u̱vi̱ saá ná se̱ʼera sa̱ndákooná ña̱ ndasakáʼnuná Jehová. Iin na̱ matrimonio, ta̱ Bob xíʼin ñá Linda ni̱ya̱ʼatuna nu̱ú sava tu̱ndóʼo. U̱vi̱ saána ta̱vánana nu̱ú káchíñuna ta va̱ása níkivika koona ti̱xin veʼena. Soo saátu, iin ta̱ médico ni̱ka̱ʼa̱nra xíʼin ñá Linda ña̱ kúúmiíñá iin kue̱ʼe̱ níma̱ñá ña̱ kivi kaʼní-ñaʼá, ta saátu inka kue̱ʼe̱ ña̱ ndeéní. Kivi kandíxayó ña̱ kúʼvi̱ní-ini yiváyó Jehová xínira miíyó, ta kúnda̱a̱ va̱ʼa inira nda̱saa ndóʼoyó tá yáʼayó nu̱ú tu̱ndóʼo. Ta kúni̱ra chindeétáʼanra xíʼinyó ña̱ kuchiñuyó ya̱ʼayó nu̱ú ndiʼi ña̱yóʼo (Filip. 4:6, 7). Nu̱ú Biblia va̱xi ku̱a̱ʼá ña̱ káʼa̱n xa̱ʼa̱ tu̱ndóʼo ña̱ ndo̱ʼo na̱ nda̱sakáʼnu Ndióxi̱, ta káʼa̱nña xíʼinyó nda̱saa chi̱ndeétáʼanra xíʼinna. w19.06 14 párr. 2, 3

Na̱ kǒoka yií á ñá síʼí, xíniñúʼuna ña̱ chindeétáʼanyó xíʼinna. ¿Nda̱saa kivi na̱ʼa̱yó ña̱ kúúyó migona? Kivi keʼéyó sava ña̱ʼa xa̱ʼa̱na tasaá kunina ña̱ kúni̱yóna. Kivi kanayóna ña̱ ku̱ʼu̱nna kuxuna xíʼinyó á ña̱ kitáʼanyó xíʼinna ña̱ ku̱ʼu̱nyó natúʼunyó xa̱ʼa̱ Ndióxi̱. Savatu kivi kanayóna ña̱ ku̱ʼu̱nna koona xíʼinyó tá káʼviyó xíʼin na̱ veʼeyó. Tá saá kéʼéyó sakusi̱íyó-ini Jehová chi ta̱kán yatin íyora xíʼin na̱ kúsuchí-ini ta chíndeétáʼanra xíʼin ná ni̱xi̱ʼi̱ yií (Sal. 34:18; 68:5). Tá ná kixáʼa kaʼndachíñu Ndióxi̱ nu̱ú ñuʼú yóʼo va̱ása ndakaʼánkayó xa̱ʼa̱ ña̱ sa̱xóʼvi̱-iniyó. Kúsi̱íní-iniyó ña̱ ná kixa̱a̱ tiempo yóʼo, chi va̱ása ndakaʼánkayó xa̱ʼa̱ ni iin ña̱ʼa ña̱ sáxo̱ʼvi̱ miíyó (Is. 65:16, 17). Ta vitin, ná chika̱a̱níyó ndee̱ xíʼin na̱ hermanoyó ta ná na̱ʼa̱yó xíʼin tu̱ʼunyó ta saátu xíʼin ña̱ kéʼéyó ña̱ kúʼvi̱ní-iniyó xíniyóna (1 Ped. 3:8). w19.06 25 párr. 18, 19

Xa̱a̱ ku̱a̱ʼání ku̱i̱ya̱ ña̱ La Atalaya ni̱ka̱ʼa̱nña: “Na̱ xíni̱ va̱ʼa xa̱ʼa̱ Ndióxi̱ kúú na̱ ndeéka kándíxañaʼá tá va̱xi tu̱ndóʼo nu̱úna”. Mií ña̱ nda̱a̱ kúú ña̱yóʼo, ña̱ kuchiñuyó xíʼin na̱ sáxo̱ʼvi̱ miíyó xíniñúʼu kuʼvi̱-iniyó kuniyó Ndióxi̱ ta xíʼin ndinuʼu-iniyó kandíxayóra (Mat. 22:36-38; Sant. 5:11). Ná kaʼviyó Biblia ndiʼi ki̱vi̱ ña̱ va̱ʼa kuyatinkayó nu̱ú Jehová (Sant. 4:8). Tá káʼviyó ná ndakanixi̱níyó xa̱ʼa̱ ña̱ va̱ʼa ña̱ kúúmií Jehová. Ná kotoyó nda̱saa náʼa̱ra ña̱ kúni̱ra xínira miíyó xíʼin ña̱ káʼa̱nra ta saátu xíʼin ña̱ kéʼéra (Éx. 34:6). Savana íxayo̱ʼvi̱ña xíʼinna ña̱ kandíxana ña̱ kúni̱ Jehová miína chi sana tá ya̱chi̱ kǒo na̱ nína̱ʼa̱ ña̱ kúʼvi̱-inina xíninana. Tá saá ndóʼoyó, ná kaʼyíyó ndiʼi ki̱vi̱ iin lista nda̱saa náʼa̱ Jehová ña̱ kúʼvi̱-inira xínira miíyó ta kúndáʼvi-inira xínira miíyó (Sal. 78:38, 39; Rom. 8:32). Tá ndákanixi̱níyó xa̱ʼa̱ ña̱ káʼviyó ta saátu nda̱saa chíndeétáʼan Jehová xíʼinyó, kiviva kaʼyíyó iin lista xíʼin ña̱ kéʼé Jehová xa̱ʼa̱yó. Tá xítoyó ña̱ kéʼé Jehová xa̱a̱yó kutáʼan va̱ʼakayó xíʼinra (Sal. 116:1, 2). w19.07 2, 3 párr. 4, 5

Jehová va̱ása káʼa̱nra xíʼinyó ña̱ miíyó ka̱ʼa̱n xíʼin inkana ndáaña keʼéna. Na̱ kéʼé ña̱yóʼo, va̱ása chíndeétáʼanna xíʼin na̱ hermano, chi na̱ kúni̱ ndukáʼnu nu̱úvana kúúna. Ta̱ Ndi̱va̱ʼa, ndiʼi tiempo taxira tu̱ndóʼo ndaʼa̱ na̱ káchíñu nu̱ú Jehová (1 Ped. 5:8; Rev. 2:10). Miíra xíʼin na̱ kítáʼan xíʼinra kuni̱na sandiʼi-xa̱ʼa̱na chiñu ña̱ kéʼéyó nu̱ú Ndióxi̱. Soo ná va̱ása yi̱ʼvíyó chi kǒo kuchiñuna (Deut. 7:21). Jehová íyora xíʼinyó ta chindeétáʼanvara xíʼinyó ni ná kasina nu̱úyó (2 Crón. 32:7, 8). Ná chika̱a̱yó ndee̱ ña̱ kundiku̱nyó ña̱ ke̱ʼé na̱ hermanoyó na̱ ni̱xi̱yo tá siglo nu̱ú, na̱ ni̱ka̱ʼa̱n ña̱yóʼo xíʼin na̱ chíñu: “Tá nu̱ú Ndióxi̱ va̱ʼaka ña̱ kuniso̱ʼondi̱ ña̱ káʼa̱n ndóʼó nu̱ú ña̱ kuniso̱ʼondi̱ miíra, miíndó kachi. Soo ndi̱ʼi̱, kǒo kívi sandákoondi̱ ka̱ʼa̱nndi̱ xa̱ʼa̱ ña̱ xi̱ninu̱úndi̱ xíʼin ña̱ xíniso̱ʼondi̱” (Hech. 4:19, 20). w19.07 12, 13 párr. 18-20

Tá nátúʼunyó xíʼin na̱ yiví xa̱ʼa̱ Ndióxi̱, ná kunda̱a̱-iniyó xíʼin ña̱ ndóʼona ta ná kuniso̱ʼoyó ña̱ káʼa̱nna. Xíniñúʼu chika̱a̱yó ndee̱ ña̱ kunda̱a̱-iniyó ndáa ki̱ʼva ndákanixi̱ní na̱ yiví ta nda̱chun ndákanixi̱nína saá. Ta̱ apóstol Pablo xi̱kuura judío, xa̱ʼa̱ ña̱kán sana na̱samara ki̱ʼva ña̱ nátúʼunra tá xi̱ka̱ʼa̱nra xíʼin na̱ inka ñuu, na̱ sana kǒo xíni̱ xa̱ʼa̱ Jehová ni xa̱ʼa̱ tu̱ʼunra. Xa̱ʼa̱ ña̱kán, tá kúni̱yó kunda̱a̱-iniyó xíʼin ña̱ ndóʼo na̱ yiví na̱ nátúʼunyó xíʼin, sana xíniñúʼu nandukú va̱ʼayó xa̱ʼa̱ sava ña̱ʼa nu̱ú tutu ña̱ tává na̱ ñuu Ndióxi̱ (1 Cor. 9:20-23). Ña̱ kúni̱yó kúú ña̱ ndani̱ʼíyó na̱ yiví na̱ ndixa kúni̱ kunda̱a̱-ini xa̱ʼa̱ Ndióxi̱ (Mat. 10:11). Ña̱ va̱ʼa keʼéyóña, xíniñúʼu ka̱ʼa̱nyó xíʼinna ná ka̱ʼa̱nna xíʼinyó xa̱ʼa̱ ña̱ ndákanixi̱nína ta kuniso̱ʼoyóna tá káʼa̱nna xíʼinyó. Iin ta̱ hermano ña̱ ñuu Inglaterra ndáka̱tu̱ʼunra na̱ yiví ndáaña xíniñúʼu keʼé na̱ ti̱ndaʼa̱ ña̱ si̱í koona, ña̱ vií sakuaʼnuna se̱ʼena á ña̱ kuchiñuna ya̱ʼana nu̱ú tu̱ndóʼo. Tá xa̱a̱ ndi̱ʼi nda̱kuiinna, ndáka̱tu̱ʼunrana: “¿Ndáaña túviún xíʼin consejo yóʼo ña̱ ni̱ka̱ʼyi̱ yáʼaka u̱vi̱ mil ku̱i̱ya̱?”. Tasaá, va̱ása káʼa̱nra xíʼinna ña̱ na̱ʼa̱ra ña̱ va̱xi nu̱ú Biblia nu̱úna, chi náʼa̱ kuitíra nu̱úna sava texto xíʼin celular. w19.07 21, 22 párr. 7, 8

¿Nda̱saa xíniñúʼu kuʼvi̱-iniyó kuniyó Ndióxi̱? Ta̱ Jesús nda̱kuiinra ña̱ pregunta yóʼo tá ni̱ka̱ʼa̱nra xíʼin iin ta̱ fariseo: “Xíniñúʼu kuʼvi̱-iniún kuniún Jehová xíʼin ndiʼi níma̱ún, xíʼin ndiʼi ña̱ tákún ta xíʼin ndiʼi xi̱níún” (Mat. 22:36, 37). Va̱ása kúni̱yó loʼo kuití kuʼvi̱-iniyó kuniyó Ndióxi̱. Kúni̱yó ná kuaʼnu ña̱ kúʼvi̱-iniyó xíniyóra ndiʼi ki̱vi̱. Ña̱ va̱ʼa kuʼvi̱-iniyó kuniyó Ndióxi̱ xíniñúʼu kuxini̱yóra. Ña̱ Biblia káchiña: “Na̱ kǒo kúʼvi̱-ini xíni inkana ta̱ʼán xa̱a̱na kuxini̱na Ndióxi̱, chi mií Ndióxi̱ kúú ta̱ kúʼvi̱-ini xíni miíyó” (1 Juan 4:8). Ta̱ apóstol Pablo ni̱ka̱ʼa̱nra ña̱ xáʼnuka ña̱ kúʼvi̱-iniyó xíniyó Ndióxi̱ tá kúnda̱a̱ va̱ʼaka iniyó xa̱ʼa̱ra ta nda̱saa ndákanixi̱níra xa̱ʼa̱ sava ña̱ʼa (Filip. 1:9). Tá ki̱xáʼayó káʼviyó Biblia, ku̱nda̱a̱-iniyó sava ña̱ʼa xa̱ʼa̱ Ndióxi̱, ta xíʼin ña̱yóʼo ni̱xa̱a̱yó kúʼvi̱-iniyó xíniyóra. Soo ña̱ kúʼvi̱-iniyó xíniyóra xa̱ʼnukaña tá ni̱xa̱a̱yó sa̱kuaʼakayó xa̱ʼa̱ra xíʼin xa̱ʼa̱ ña̱ va̱ʼa ña̱ kúúmiíra. Xa̱ʼa̱ ña̱kán ndáyáʼviní ña̱ kaʼviyó tu̱ʼunra ndiʼi ki̱vi̱ ta ndakanixi̱níyó xa̱ʼa̱ña (Filip. 2:16). w19.08 9 párr. 4, 5

Tá na̱sama chiñu ña̱ kúúmiíyó nu̱ú Ndióxi̱ xíniñúʼu ndukúyó inka na̱ koo migoyó ta ña̱ va̱ʼa keʼéyóña xíniñúʼu miíyó kixáʼa ka̱ʼa̱n xíʼinna. Ná ka̱ʼa̱nyó xíʼinna xa̱ʼa̱ ña̱ va̱ʼa ña̱ táxi Jehová ndaʼa̱yó ña̱ va̱ʼa kunda̱a̱-inina ña̱ kúsi̱íní-iniyó ndásakáʼnuyóra. Tá sa̱ndákooyó chiñuyó xa̱ʼa̱ ña̱ ndeé ndóʼo na̱ ti̱ndaʼa̱ xíʼinyó ná va̱ása chika̱a̱yó ku̱a̱china. Soo tá miíyó kúú na̱ ndeé ndóʼo ná va̱ása ndakava-iniyó ta ni ná va̱ása ndakanixi̱níyó ña̱ sa̱ndákavayó-ini na̱ ti̱ndaʼa̱ xíʼinyó. Ná ndakaʼányó ña̱ iinlá ku̱ñu kúúyó nu̱ú Jehová ta ni̱ka̱ʼa̱nyó xíʼinra ña̱ kundaa táʼanyó nda̱a̱ ndáaka ña̱ ná kuu (Mat. 19:5, 6). Soo tá kǒo níndakanixi̱níyó ña̱ koo se̱ʼeyó soo ka̱kuna, ná ka̱ʼa̱nyó xíʼinna ña̱ ndáyáʼviníkana nu̱úyó nu̱úka chiñu ña̱ sa̱ndákooyó. Ná ka̱ʼa̱n ni̱ʼiyó xíʼinna ña̱ iin regalo ña̱ ta̱xi Jehová ndaʼa̱yó kúúna (Sal. 127:3-5). Saátu ná ka̱ʼa̱nyó xíʼinna xa̱ʼa̱ ndiʼi chiñu ña̱ ke̱ʼéyó nu̱ú Jehová tá ya̱chi̱, chi ña̱yóʼo kivi chindeétáʼanña xíʼinna ña̱ xa̱a̱na kachíñuna ku̱a̱ʼá tiempo nu̱ú Jehová nda̱a̱ táki̱ʼva ke̱ʼé miíyó. w19.08 22, 23 párr. 10, 11

Babilonia ña̱ káʼnu íxayaku̱a̱nína ki̱vi̱ Jehová. Sánáʼa̱na ña̱ vatá xa̱ʼa̱ra, na̱yóʼo nda̱a̱ táki̱ʼva íyo iin ñaʼá ñá kísi̱ xíʼin ku̱a̱ʼání ta̱a saá íyona, chi chíndeétáʼanna xíʼin na̱ chíñu ña̱ iníísaá ñuyǐví. Xíniñúʼuna ndee̱ ña̱ kúúmiína ña̱ sandáʼvina ndiʼi na̱ ndíku̱nñaʼá. Ta xáʼnína ku̱a̱ʼání na̱ yiví, ta savana kúú na̱ ndásakáʼnu Ndióxi̱ (Rev. 18:24; 19:2). Jehová kuniñúʼura “u̱xu̱ ndiki̱” iin kití yukú tí color kúaʼa ña̱ sandíʼi-xa̱ʼa̱ra ñá ñaʼá ñá kísi̱ xíʼin ku̱a̱ʼání ta̱a. Tá káʼa̱nña xa̱ʼa̱ tí kití yóʼo káʼa̱nña xa̱ʼa̱ na̱ Organización de las Naciones Unidas, ta ña̱ u̱xu̱ ndiki̱rí kúú na̱ chíñu na̱ chíndeétáʼan xíʼinña tiempo vitin. Soo mií Ndióxi̱ kúú ta̱ ka̱ʼa̱n ama kúú ña̱ kixáʼa na̱ chíñu kanitáʼanna xíʼin Babilonia ña̱ káʼnu ña̱ kúútu “ñaʼá ñá kísi̱ xíʼin ku̱a̱ʼá ta̱a”. Ta sandíʼi-xa̱ʼa̱na ndiʼi ña̱ʼa ña̱ kúúmiíñá ta sandákoo chálánañá, ta kindaana ña̱ ku̱i̱ká ña̱ kúúmiíñá, ta ka̱ʼa̱nna xa̱ʼa̱ ndiʼi ña̱ kini ña̱ kéʼéñá (Rev. 17:3, 16). Ña̱ ndiʼi-xa̱ʼa̱ñá iin kama kooña, nda̱a̱ táki̱ʼva yáʼa iin ki̱vi̱, ta iin ndakanda̱-ini na̱ xi̱kitáʼan xíʼinñá, chi ni̱nuní xi̱kuniñá tá xi̱ka̱ʼa̱nñá: “Nda̱a̱ ni iin yichi̱ va̱ása kunii̱ tu̱ndóʼo” (Rev. 18:7, 8). w19.09 10 párr. 10, 11

Ta̱ Jesús káʼa̱nra ña̱yóʼo xíʼin ndiʼi na̱ yiví. Ta̱kán ndakiʼinra ndiʼi na̱ kúni̱ ndasakáʼnu Ndióxi̱ xíʼin ndiʼi níma̱na (Juan 6:37, 38). Ndiʼi na̱ ndíku̱n ta̱ Jesús kivi inkáchi kachíñuna xíʼinra ña̱ keʼéna chiñu ña̱ ta̱xi Jehová ndaʼa̱ra. Kivi kándíxayó ña̱ mií ta̱ Jesús ndiʼi tiempo chindeétáʼanra xíʼinyó ña̱ va̱ʼa keʼéyó chiñu yóʼo (Mat. 28:18-20). Na̱ yiví na̱ vitá-ini va̱ʼaní xi̱kuyatinna nu̱ú ta̱ Jesús (Mat. 19:13, 14; Luc. 7:37, 38). ¿Nda̱chun? Ná ndakanixi̱níyó xa̱ʼa̱ ña̱ síínní ni̱xi̱yora nu̱ú na̱ fariseo. Na̱ xi̱niʼi yichi̱ nu̱ú na̱ veʼe-ñu̱ʼu ni̱nuní xi̱kunina ta va̱ása kúʼvi̱-inina xínina na̱ yiví (Mat. 12:9, 12-14). Soo, ta̱ Jesús xi̱kuʼvi̱-inira xi̱xinira na̱ yiví ta vitá ni̱xi̱yo inira. Na̱ fariseo xi̱kunina kundayáʼvikana nu̱ú inka na̱ yiví ta ni̱nuní xi̱kuni̱na, soo ta̱ Jesús sa̱náʼa̱ra na̱ xi̱ndiku̱nñaʼá ña̱ ná va̱ása kuni̱na kundayáʼvina nu̱ú inkana, ta vitá koo inina ta kachíñuna nu̱ú inkana (Mat. 23:2, 6-11). Na̱ fariseo xi̱ ixandúxana xíʼin na̱ yiví ña̱ keʼéna ña̱ kúni̱na (Juan 9:13, 22). Soo ta̱ Jesús xi̱taxira ndee̱ ndaʼa̱na xíʼin ña̱ viíní xi̱ka̱ʼa̱nra xíʼinna. ¿Ndáaña sákuaʼayó xíʼin ña̱ ke̱ʼé ta̱ Jesús? w19.09 20 párr. 1; 21 párr. 7, 8; 23 párr. 9

Reunión kúú ña̱ chíndeétáʼan xíʼinyó ña̱ kuyatinkayó nu̱ú Jehová. Tá xáʼa̱nyó reunión náʼa̱yó á kundeé-iniyó á va̱ása tá ná saxóʼvi̱na miíyó (Heb. 10:24, 25). Ná kotoyó nda̱chun. Tá vitin sándakooyó ña̱ ku̱ʼu̱nyó reunión xa̱ʼa̱ sava ña̱ʼa, ¿ndáaña keʼéyó tá ná saxóʼvi̱na miíyó ta va̱ása taxikana ña̱ ndakutáʼanyó xíʼin na̱ hermano? Soo tá chíka̱a̱-iniyó ña̱ ku̱ʼu̱nyó ndiʼi reunión, na̱ sáa̱-ini xíni miíyó va̱ása kuchiñuna kasina nu̱úyó. Ña̱kán vitin xíniñúʼu kutóoyó ku̱ʼu̱nyó reunión ta va̱ása sandákooyó nda̱a̱ ni iinña. Tá saá kéʼéyó ni ná kasi na̱ chíñu á na̱ yiví nu̱úyó va̱ása sandákooyó ña̱ kandíxayó Ndióxi̱ nu̱úka na̱yóʼo (Hech. 5:29). Ná sakuaʼa xíʼin xi̱níyó texto ña̱ kútóoyó (Mat. 13:52). Sana va̱ása kívi ndakaʼányó xa̱ʼa̱ ndiʼi ña̱ʼa, soo Jehová kuniñúʼura espíritura ña̱ chindeétáʼanra xíʼinyó ña̱ ndakaʼányó xa̱ʼa̱ña (Juan 14:26). Texto kán chindeétáʼanña xíʼinyó ña̱ yatin kooyó nu̱ú Jehová ta nda̱kú koo iniyó xíʼinra. w19.07 3 párr. 5; 4 párr. 8, 9

Tá miíyó ka̱kuyó tá xa̱a̱ ni̱ya̱ʼa ña̱ ku̱i̱ya̱ 1914, xa̱a̱ ndiʼi tiempo ndóovayó “ki̱vi̱ nu̱ú ndíʼi”. Ndiʼiyó xíniso̱ʼoyó nu̱ú noticia ña̱ xa̱a̱ xínu ña̱ ni̱ka̱ʼa̱n ta̱ Jesús koo tiempo ña̱ ndóoyó vitin: guerra, so̱ko, ña̱ táa̱n, ña̱ íyo kue̱ʼe̱, ña̱ íyo ku̱a̱ʼáníka tu̱ndóʼo xíʼin ña̱ va̱ása táxika na̱ yiví ña̱ natúʼunyó xa̱ʼa̱ Ndióxi̱, xíʼin inkakaña (Mat. 24:3, 7-9, 12; Luc. 21:10-12). Saátu xítoyó ña̱ íyo na̱ yiví na̱ kéʼé nda̱a̱ táki̱ʼva ni̱ka̱ʼa̱n ta̱ apóstol Pablo. Miíyó na̱ ndásakáʼnu Jehová kúnda̱a̱ káxi iniyó ña̱ ndóoyó “ki̱vi̱ nu̱ú ndíʼi” (Miq. 4:1). Nda̱a̱ tá ku̱i̱ya̱ 1914 ta nda̱a̱ vitin xa̱a̱ ku̱a̱ʼání ku̱i̱ya̱ ni̱ya̱ʼa, ña̱kán xa̱a̱ yatin “ki̱vi̱ nu̱ú ndíʼi” kúú ña̱ ndóoyó. Ña̱ ndiʼi-xa̱ʼa̱ ña̱ ñuyǐví yóʼo xa̱a̱ ku̱yatinkaña, xa̱ʼa̱ ña̱kán xíniñúʼu ndakuiinyó u̱vi̱ pregunta ña̱ ndáyáʼviní: ¿Ndáaña kuu tá ná ndiʼi ki̱vi̱ so̱ndíʼi? Ta, ¿ndáaña ndátu Jehová keʼéyó vitin? w19.10 8 párr. 1, 2

Su̱ví kuití tiempo va̱ʼa xíniñúʼu na̱ʼa̱yó ña̱ ndakú íyo iniyó, chi saátu kivi ndasandakúyóña tá kándíxayó Jehová (Rom. 12:12). Ná va̱ása nandósóyó ña̱ ni̱ka̱ʼa̱n ta̱ Jesús: “Na̱ ku̱ndeé-ini nda̱a̱ ki̱vi̱ nu̱ú ndíʼi, na̱kán kúú na̱ ka̱ku”. Ña̱yóʼo kúni̱ kachiña ña̱ xíniñúʼu nda̱kú koo iniyó nu̱ú nda̱a̱ ndáaka tu̱ndóʼo ná kixi nu̱úyó. Ña̱ kundeé-iniyó vitin chindeétáʼanña xíʼinyó ña̱ ndakúka koo iniyó, tá ná kixaa̱ ña̱ gran tribulación. ¿Ndáaña xíniñúʼu keʼéyó ña̱ va̱ʼa kandíxakayó Jehová? Kaʼviyó Biblia ndiʼi ki̱vi̱, ta ndakanixi̱níyó xa̱ʼa̱ ndáa ki̱ʼva sa̱kǎku Ndióxi̱ na̱ nda̱sakáʼnu-ñaʼá tá tiempo xi̱naʼá (Sal. 68:20; 2 Ped. 2:9). Tá ná kixáʼa na̱ chíñu ixandi̱va̱ʼana xíʼinyó ti̱xin ña̱ gran tribulación, saá kúú ña̱ xíniñúʼu na̱ʼa̱níkayó ña̱ va̱ása yíʼviyó ta kándíxaníyó Jehová (Sal. 112:7, 8; Heb. 13:6). Tá kándíxayó miíra vitin, ndakú koo iniyó ta va̱ása yi̱ʼvíyó tá ná ixandi̱va̱ʼa ña̱ Gog xíʼinyó. Chi kándíxaníyó ña̱ chindeétáʼanra xíʼinyó ta kunda̱a̱-iniyó ña̱ ndiʼi tiempo kundaa Jehová miíyó (1 Cor. 13:8). w19.10 17, 18 párr. 15, 16

Ta̱ Ndi̱va̱ʼa kúú ta̱ ndísochíñu xíʼin ña̱ ñuyǐví yóʼo, ta xíniñúʼuraña ña̱ sandáʼvira miíyó ña̱ keʼéyó ña̱ kúni̱ miíyó (Efes. 2:1-3). Kúni̱ra ná xa̱a̱yó kuʼvi̱ka-iniyó kuni̱yó inkaka ña̱ʼa, ta va̱ása ndasakáʼnuyó iinlá mií Jehová. Tá sa̱ndíʼi ta̱ apóstol Pedro ka̱ʼyíra xa̱ʼa̱ ña̱ ndiʼi-xa̱ʼa̱ ñuyǐví ta̱ Ndi̱va̱ʼa xíʼin xa̱ʼa̱ ña̱ kixaa̱ ñuyǐví xa̱á, ni̱ka̱ʼa̱nra ña̱yóʼo: “Ndóʼó xa̱ʼa̱ ña̱ xa̱a̱ ndátundó ndiʼi ña̱yóʼo, chika̱a̱ndó ndee̱ ña̱ kǒo ni iin ña̱ va̱ása va̱ʼa kuumiíndó ta ni kǒo ña̱ ndíʼi̱ní-inindó xa̱ʼa̱ tá ná kixaa̱ra nu̱úndó” (2 Ped. 3:14). Ki̱vi̱ ndíku̱nyó ndiʼi consejo yóʼo, kéʼéyó nda̱a̱ ndáaka ña̱ʼa ña̱ va̱ʼa limpio kooyó ta saátu ña̱ kéʼéyó nu̱ú Jehová, ta náʼa̱yó ña̱ iinlá miíra ndásakáʼnuyó. Ta̱ Ndi̱va̱ʼa xíʼin na̱ ñuyǐvíra ndakundeéna sandákavana miíyó ña̱ kundi̱ʼi̱ka-iniyó xa̱ʼa̱ inkaka ña̱ʼa (Luc. 4:13). Soo, nda̱a̱ ndáaka tu̱ndóʼo ná ya̱ʼayó nu̱ú, ná va̱ása taxiyó ña̱ nda̱a̱ ni iin ña̱ʼa ná kasi nu̱úyó ña̱ keʼéyó ña̱ kúni̱ Jehová. Chi ña̱ kúni̱yó keʼéyó kúú ña̱ iinlá miíra ndasakáʼnuyó. w19.10 27 párr. 4; 31 párr. 18, 19

Iin ña̱ va̱ʼava kúú ña̱ kundi̱ʼi̱-iniyó xa̱ʼa̱ sava ña̱ʼa, tá kúú ña̱ sakusi̱íyó-ini Jehová xíʼin ta̱ Jesús (1 Cor. 7:32). Tá ni̱ki̱ʼviyó iin ku̱a̱chi ña̱ ndeé, sana ndíʼi̱-iniyó xa̱ʼa̱ ña̱ ndikóyó kutáʼan viíyó xíʼin Ndióxi̱. Ta saátu na̱ xa̱a̱ ti̱ndaʼa̱ iin ña̱ va̱ʼa kúú ña̱ kúni̱na sakusi̱ína-ini na̱ ti̱ndaʼa̱ xíʼinna, ta ndiʼiyó ndíʼi̱-iniyó xa̱ʼa̱ ña̱ koo va̱ʼa na̱ veʼeyó xíʼin na̱ hermanoyó (1 Cor. 7:33; 2 Cor. 11:28). Soo ña̱ ndíʼi̱ní-iniyó kivi chindaʼáña miíyó ña̱ kundi̱ʼi̱ní-iniyó xa̱ʼa̱ ña̱ koo ku̱a̱ʼání ti̱ko̱to̱yó á ña̱ kuxuyó (Mat. 6:31, 32). Ta ña̱yóʼo kivi chindaʼáña miíyó ña̱ kundi̱ʼi̱ka-iniyó xa̱ʼa̱ ña̱ koo ku̱a̱ʼání ña̱ʼayó. Tasaá, ña̱ kándíxayó Jehová kivi kuvitáña, ta ña̱ kítáʼanyó xíʼinra va̱ása viíka kooña (Mar. 4:19; 1 Tim. 6:10). Ta saátu kivi kundi̱ʼi̱ní-iniyó xa̱ʼa̱ ña̱ kindoo va̱ʼayó nu̱ú inkana. Ta xa̱ʼa̱ ña̱yóʼo, sana kixáʼayó yi̱ʼvíkayó ña̱ kusi̱kindaana miíyó á ña̱ ixandi̱va̱ʼana xíʼinyó, nu̱úka ña̱ kitáʼan viíyó xíʼin Jehová. ¿Nda̱saa kivi kundaayó miíyó nu̱ú ña̱yóʼo? Ka̱ʼa̱nyó xíʼin Jehová ña̱ ná taxira ña̱ ndakú-ini ndaʼa̱yó ta saátu ña̱ kandíxakayóra (Prov. 29:25; Luc. 17:5). w19.11 15 párr. 6, 7

Íyo sava ña̱ ndáyáʼviní ña̱ nda̱ka̱xinyó keʼéyó va̱ása kivi nasamayó. Tá kúú, va̱ása kúni̱yó sandákooyó ña̱ ndasakáʼnuyó Jehová, ta saátu chi̱ka̱a̱-iniyó ña̱ nda̱kú koo iniyó xíʼin na̱ ti̱ndaʼa̱ xíʼinyó (Mat. 16:24; 19:6). Soo, sana íyo sava ña̱ xíniñúʼu nasamayó, chi xa̱a̱ síín síín íyo ña̱ ndóʼoyó. ¿Ndáaña chindeétáʼan xíʼinyó ña̱ viíní koo ña̱ ndaka̱xinyó? Ná ndukúyó ña̱ ndíchi nu̱ú Jehová. Ndiʼivayó kúma̱ní ña̱ ndíchi nu̱ú ña̱ va̱ʼa ndaka̱xinyó sava ña̱ keʼéyó. Xa̱ʼa̱ ña̱yóʼo, ná kandíxaníyó Jehová tá ndáka̱xinyó iin ña̱ keʼéyó ta saátu tá xítoyó á vií íyoña. Tasaá, mií Jehová chindeétáʼan xíʼinyó ña̱ vií ndaka̱xinyó ña̱ keʼéyó. Ta saátu, ná nandukú va̱ʼayó xa̱ʼa̱ ña̱ kúni̱yó keʼéyó. Ná kotoyó ndáaña káʼa̱n tu̱ʼun Ndióxi̱, ná kaʼviyó ndiʼi tutu ña̱ tává na̱ ñuura, ta ná ka̱ʼa̱nyó xíʼin iin na̱ kítáʼan vií xíʼinyó ña̱ ná chindeétáʼanna xíʼinyó (Prov. 20:18). Ndáyáʼviní keʼéyó ndiʼi ña̱yóʼo, tá ndákanixi̱níyó nasamayó chiñuyó, á ña̱ ku̱ʼu̱nyó kooyó inka lugar, á ndáaña kaʼviyó ña̱ va̱ʼa koo ña̱ xíniñúʼuyó ta ndakundeéyó ndasakáʼnuyó Ndióxi̱. w19.11 27 párr. 6-8

Xíʼin ña̱ si̱í-ini Jehová ndu̱kúra ndáa ki̱ʼva sakǎkura miíyó nu̱ú ku̱a̱chi. Ta ta̱ Jesús kúú ta̱ kivi sakǎku miíyó nu̱ú ña̱yóʼo. Tá siglo u̱na̱ ña̱ tiempo xi̱naʼá, ta̱ profeta Isaías ni̱ka̱ʼa̱nra xa̱ʼa̱ ña̱ sa̱ñáyó chí nu̱únínu, ta ña̱yóʼo va̱ʼaníka kooña nu̱ú ña̱ Jubileo. Ka̱ʼyíra: “Mií espíritu táta Jehová íyoña xíʼi̱n, saáchi mií Jehová nda̱ka̱xin yi̱ʼi̱ ña̱ ka̱ʼi̱n xa̱ʼa̱ tu̱ʼun va̱ʼa xíʼin na̱ yiví na̱ vitá-ini. Chi̱ndaʼára yi̱ʼi̱ ña̱ ku̱ʼi̱n chindeétáʼi̱n xíʼin na̱ kúsuchí-ini, ña̱ ka̱ʼi̱n xa̱ʼa̱ ña̱ tavána na̱ ndási” (Is. 61:1). Ná kotoyó ndáana káʼa̱n ña̱ profecía yóʼo xa̱ʼa̱. Ña̱ profecía ña̱ ndáyáʼviní yóʼo, ki̱xáʼaña xínuña tá ki̱xáʼa ta̱ Jesús na̱túʼunra xa̱ʼa̱ Ndióxi̱. Tá ni̱xa̱ʼa̱nra sinagoga ña̱ ñuu Nazaret nu̱ú xa̱ʼnura, ta ka̱ʼvira profecía ta̱ Isaías nu̱ú na̱ judío na̱ nda̱kutáʼan kán. Ta ni̱ka̱ʼa̱nra xa̱ʼa̱ miíra, tá ni̱ka̱ʼa̱nra ña̱ tu̱ʼun yóʼo (Luc. 4:16-19). w19.12 10 párr. 6-8

Ña̱ kuchiñuyó ya̱ʼayó nu̱ú tu̱ndóʼo xa̱ʼa̱ ña̱ kándíxayó Ndióxi̱, xíniñúʼu ndakú koo iniyó. ¿Ndáaña kivi keʼéyó tá túviyó ña̱ va̱ása ndakú íyo iniyó? Ná ndakaʼányó chi su̱ví xa̱ʼa̱ ña̱ loʼo íyoyó á súkun íyoyó kivi ndakú koo iniyó. Ná kotoyó ña̱ ndo̱ʼo ta̱ David. Tá ni̱xi̱yo loʼora ka̱nitáʼanra xíʼin ta̱ Goliat, iin ta̱a ta̱ káʼnuní. Ta̱ David, loʼoní ni̱xi̱yora ta va̱ása ndakú ni̱xi̱yora nu̱ú ta̱ Goliat. Ta ni va̱ása íyo tu̱ʼvara ña̱ kanitáʼanra ta ni kǒo espada níʼira. Soo ndakúní ni̱xi̱yo inira tá ni̱xa̱ʼa̱nra ka̱nitáʼanra xíʼin ta̱ Goliat. ¿Nda̱chun ndakúní ni̱xi̱yo ini ta̱ David? Saáchi xíʼin ndinuʼu-inira ka̱ndíxara ña̱ íyo Jehová xíʼinra (1 Sam. 17:37, 45-47). Va̱ása níndakanixi̱níra ña̱ loʼoní íyora nu̱ú ta̱ Goliat, chi nda̱kanixi̱níra ña̱ loʼoní íyo ta̱ Goliat nu̱ú Jehová. Íyo iin ña̱ sákuaʼayó xíʼin ña̱yóʼo: ndakú koo iniyó tá kándíxayó ña̱ íyo Jehová xíʼinyó ta ndákanixi̱níyó ña̱ va̱ása ndáyáʼvi na̱ kánitáʼan xíʼinyó nu̱ú Ndióxi̱ ta̱ kúúmií ndiʼi ndee̱ (2 Crón. 20:15; Sal. 16:8). w19.07 4, 5 párr. 11-13

Ta̱ Tíquico va̱ʼaní xi̱kitáʼanra xíʼin ta̱ apóstol Pablo ta xi̱kandíxanírara (Hech. 20:4). Tá ku̱i̱ya̱ 55, ta̱ Pablo ni̱ka̱ʼa̱nra ña̱ ndakayana xu̱ʼún ña̱ chindeétáʼanna xíʼin na̱ hermano na̱ íyo chí Judea, ta sana ni̱ka̱ʼa̱nra xíʼin ta̱ Tíquico ña̱ ná chindeétáʼanra xíʼinra, ña̱ keʼéna chiñu ña̱ ndáyáʼviní yóʼo (2 Cor. 8:18-20). Tá ni̱ya̱ʼa loʼo tiempo, tá chi̱ka̱a̱na ta̱ Pablo ña̱ yichi̱ nu̱ú veʼeka̱a ña̱ ñuu Roma, ta̱ Tíquico ni̱xi̱yora mensajero ta̱ Pablo. Ta̱yóʼo xi̱ndataxira carta ña̱ xi̱ka̱ʼyí ta̱ Pablo ndaʼa̱ na̱ congregación ña̱ Asia (Col. 4:7-9). Ta̱ Tíquico va̱ása nísandákoora ña̱ kutáʼanra xíʼin ta̱ Pablo, ta nda̱kúní ni̱xi̱yo inira xíʼinra (Tito 3:12). Su̱ví ndiʼi na̱ cristiano na̱ xi̱ndoo tá tiempo saá, níxi̱yo nda̱a̱ táki̱ʼva ni̱xi̱yo ta̱ Tíquico. Tá kúú, tá yichi̱ u̱vi̱ ña̱ xi̱ndika̱a̱ ta̱ Pablo veʼeka̱a chí ñuu Roma, tá xa̱a̱ ku̱yatin ña̱ ku̱i̱ya̱ 65 ka̱ʼyíra ña̱ ku̱a̱ʼání na̱ cristiano na̱ íyo chí Asia va̱ása níxikitáʼanna xíʼinra, sana xa̱ʼa̱ ña̱ xi̱yiʼvína ña̱ ixandi̱va̱ʼa na̱ yiví xíʼinna (2 Tim. 1:15). Soo xi̱kandíxaníra ta̱ Tíquico chi ta̱xira inka chiñu ndaʼa̱ra (2 Tim. 4:12). Nu̱ú ta̱ Pablo xi̱ndayáʼviní ña̱ xi̱kitáʼanra xíʼin ta̱ Tíquico. w20.01 10 párr. 7, 8

Sana ndáka̱tu̱ʼun xíʼin miíún á nda̱kaxin Jehová yóʼó xíʼin espíritu santora ña̱ ku̱ʼu̱n chí ndiví. Tá saá íyoña, xíniñúʼu nda̱ka̱tu̱ʼun xíʼin miíún ña̱yóʼo: ¿á ndíʼi̱ní-iniún ña̱ keʼún chiñu Ndióxi̱?, ¿á xíʼin ña̱ si̱í-ini nátúʼún xa̱ʼa̱ Ndióxi̱?, ¿á kútóún kaʼviún Biblia ta sakuaʼakaún xa̱ʼa̱ Ndióxi̱?, ¿á túviún ña̱ táxi Jehová bendición ndaʼún xa̱ʼa̱ ña̱ chíka̱ún ndee̱ ña̱ natúʼún xa̱ʼa̱ra?, ¿á túviún ña̱ xíniñúʼu chindeétáʼún xíʼin inkana ña̱ viíka kutáʼanna xíʼin Ndióxi̱?, ¿á xítoún ña̱ chíndeétáʼan Jehová xíʼún tá íyo ña̱ ndóʼún? Tá vií nda̱kuiún ndiʼi pregunta yóʼo, ¿á kúni̱ kachiña ña̱ ka̱na Ndióxi̱ yóʼó ña̱ ku̱ʼu̱n chí ndiví? Va̱ása, saáchi ndiʼi na̱ ndásakáʼnu Jehová kúúna na̱ ku̱ʼu̱n chí ndiví á va̱ása, kivi ndoʼona nda̱a̱ táki̱ʼva ndóʼún. Soo tá xíka-iniún xa̱ʼa̱ á nda̱kaxin Ndióxi̱ yóʼó xíʼin espíritu santora á va̱ása, ña̱yóʼo kúni̱ kachiña ña̱ va̱ása níndaka̱xinra yóʼó. Na̱ ka̱na Ndióxi̱ ña̱ ku̱ʼu̱nna chí ndiví va̱ása xíka-inina xa̱ʼa̱ ña̱ nda̱kaxinrana; chi kúnda̱a̱ káxi-inina ña̱ ka̱navarana. w20.01 23 párr. 14