Junio

Ñá Ana siʼí ta̱ profeta samuel xi̱niñúʼu kundeé-iniñá nu̱ú tu̱ndóʼo, chi ku̱a̱ʼání ku̱i̱ya̱ va̱ása níkivi koo se̱ʼeñá (1 Sam. 1:2). Na̱ ñuu Israel xi̱ndakanixi̱nína ña̱ tá va̱ása kivi koo se̱ʼe iin ñaʼá, xi̱ka̱ʼa̱nna ña̱ va̱ása táxi Ndióxi̱ bendición ndaʼa̱ñá. Xa̱ʼa̱ ña̱yóʼo xi̱kukaʼanní nu̱ú ñá Ana (Gén. 30:1, 2). Soo yiíñá ni̱xi̱yo inka ñá síʼíra ñá xi̱naní Peniná, ta ñáyóʼo va̱ʼa ni̱xi̱yo se̱ʼeñá. Ñá Peniná xi̱xaku̱ndaañá ñá Ana. Xa̱ʼa̱ ña̱ xi̱kusuchíní-iniñá nda̱a̱ xi̱xakuñá ta va̱ása níxixixiñá, ta ndeéní ni̱ndi̱ʼi̱-iniñá (1 Sam. 1:7, 10). ¿Ndáa ki̱ʼva ni̱ndi̱ko-ini ñá Ana? Ñá Ana xíʼin ndiʼi níma̱ñá ni̱ka̱ʼa̱nñá xíʼin Jehová. Tándi̱ʼi ni̱ka̱ʼa̱nñá xíʼinra, na̱túʼunñá xíʼin ta̱ su̱tu̱ Elí xa̱ʼa̱ ña̱ xi̱ndoʼoñá. Ta̱yóʼo ni̱ka̱ʼa̱nra xíʼinñá: “Ná ku̱ʼu̱n va̱ʼún, ta ná taxi Ndióxi̱ na̱ ñuu Israel ña̱ ndu̱kún nu̱úra”. Ta, ¿ndáaña ku̱u? Ñá Ana “nda̱kiʼinñá ku̱a̱ʼa̱nñá ta xi̱xiñá ta va̱ása níkusuchíka-iniñá” (1 Sam. 1:17, 18). Ña̱ oración chi̱ndeétáʼan xíʼinñá ña̱ va̱ása níndi̱ʼi̱ka-iniñá. w20.02 21 párr. 4, 5

Si̱lóʼo tiempo kúma̱ní ta sandíʼi-xa̱ʼa̱ Jehová ñuyǐví ta̱ Ndi̱va̱ʼa. Ta nda̱saa na̱ kúni̱ kutaku ndiʼi tiempo, kúú na̱ ka̱ku (Hech. 13:48). Ña̱kán kúni̱yó natúʼunyó xíʼin na̱ veʼeyó ña̱ ná ndasakáʼnuna Jehová. Yiváyó, ta̱ kúʼvi̱ní-ini xíni miíyó va̱ása kúni̱ra ña̱ ná ndiʼi-xa̱ʼa̱ ni iin na̱ yiví chi ña̱ kúni̱ra kúú ña̱ ná ndandikó-inina xa̱ʼa̱ ku̱a̱china (2 Ped. 3:9). Xíniñúʼu ndakaʼányó ña̱ u̱vi̱ nu̱ú kúú ña̱ kivi keʼéyó ña̱ natúʼunyó xa̱ʼa̱ Ndióxi̱. Sana viíva káʼa̱nyó xa̱ʼa̱ Ndióxi̱ xíʼin iin na̱ yiví na̱ va̱ása xíni̱yó, soo na̱ veʼeyó ndeé ta káxi káʼa̱nyó xíʼinna. Tá ndákaʼányó xa̱ʼa̱ yichi̱ nu̱ú ña̱ ni̱ka̱ʼa̱nyó xa̱ʼa̱ Ndióxi̱ xíʼin na̱ veʼeyó, sana ndándikó-iniyó xa̱ʼa̱ ña̱ va̱ása vií níka̱ʼa̱nyó xíʼinna ta ndákanixi̱níyó ña̱ xi̱niñúʼu viíka ka̱ʼa̱nyó xíʼinna. Tá káʼa̱nyó xíʼin na̱ táʼanyó xa̱ʼa̱ Ndióxi̱ ná ndakaʼányó xa̱ʼa̱ ña̱ ni̱ka̱ʼa̱n ta̱ apóstol Pablo, ña̱ va̱xi nu̱ú texto ña̱ kaʼviyó ki̱vi̱ vitin. Saáchi nu̱úka ña̱ chindeétáʼanyó xíʼinna ña̱ kunda̱a̱-inina xa̱ʼa̱ Ndióxi̱ kivi sakuxíkayóna nu̱ú ña̱ nda̱a̱, tá va̱ása kíʼinyó kuenta xíʼin ña̱ káʼa̱nyó. w19.08 14, 15 párr. 3-5

¿Ndáaña ndo̱ʼún tá sa̱kuaʼún ña̱yóʼo xa̱ʼa̱ se̱ʼe Ndióxi̱? Ta̱ Jesús kúú inka ta̱ ndáyáʼvika iníísaá ñuyǐví. Ta ta̱yóʼo xíʼin ña̱ si̱í-ini ni̱xi̱ʼi̱ra xa̱ʼa̱yó ña̱ va̱ʼa sakǎkura miíyó. Tá náʼa̱yó xíʼin ña̱ kéʼéyó ña̱ kándíxayó ña̱ ni̱xi̱ʼi̱ra xa̱ʼa̱yó, kivi ixakáʼnu-ini Ndióxi̱ xa̱ʼa̱ ku̱a̱chiyó tasaá xa̱a̱yó kutáʼan viíyó xíʼinra, ta ni̱ʼíyó ña̱ kutakuyó ndiʼi tiempo (Juan 3:16). Ta̱ Jesús kúútura iin su̱tu̱ káʼnu, chi kúni̱ra chindeétáʼanra xíʼinyó ña̱ ndakiʼinyó ña̱ va̱ʼa xa̱ʼa̱ ña̱ ni̱xi̱ʼi̱ra xa̱ʼa̱yó, ta kutáʼan viíyó xíʼin Jehová (Heb. 4:15; 7:24, 25). Xa̱ʼa̱ ña̱ kúúra rey ti̱xin Reino Ndióxi̱, Jehová kuniñúʼurara ña̱ ndasayi̱i̱ra ki̱vi̱ra, ña̱ sandiʼi-xa̱ʼa̱ra ndiʼi ña̱ va̱ása va̱ʼa, ta taxira ku̱a̱ʼání bendición ndaʼa̱yó tá ná kooyó nu̱ú ñuyǐví xa̱á (Mat. 6:9, 10; Apoc. 11:15). Ta saátu va̱ʼaní yichi̱ sa̱ndákoo ta̱ Jesús nu̱úyó. Chi̱ka̱a̱níra ndee̱ ña̱ ke̱ʼéra ña̱ kúni̱ Ndióxi̱, ta xíniñúʼu kundiku̱nyó ña̱ ke̱ʼéra (Juan 4:34). Tá ná kandíxaún ña̱ sánáʼa̱ Biblia xa̱ʼa̱ ta̱ Jesús, xa̱ún kuʼvi̱-iniún kuniúnra. Ta ña̱yóʼo chindaʼáña yóʼó, ña̱ kuniñúʼún ña̱ tákún ña̱ keʼún ña̱ kúni̱ Ndióxi̱ nda̱a̱ táki̱ʼva ke̱ʼé ta̱ Jesús. w20.03 10 párr. 12, 13

Tá kúma̱níka ña̱ kuvi ta̱ Jesús ku̱a̱ʼání yichi̱ ni̱ka̱ʼa̱nra xíʼin yivára. Tá sa̱náʼa̱ra na̱ xi̱ndiku̱nñaʼá ndáa ki̱ʼva keʼéna ña̱ ndakaʼánna xa̱ʼa̱ra tá ná kuvira, siʼna ni̱ka̱ʼa̱nra xíʼin Ndióxi̱ saáví sa̱yáʼara si̱táva̱ʼa ndaʼa̱na, ta tuku ni̱ka̱ʼa̱nra saáví ta̱xira tá vino ndaʼa̱na (1 Cor. 11:23-25). Saátu ni̱ka̱ʼa̱nra xíʼin Ndióxi̱ tá kúma̱ní kitana ini veʼe nu̱ú xi̱xina ña̱ pascua (Juan 17:1-26). Tá ni̱xa̱a̱na nu̱ú yukú ña̱ Olivos, ku̱a̱ʼáníka yichi̱ ni̱ka̱ʼa̱nra xíʼin yivára kán (Mat. 26:36-39, 42, 44). Saátu ni̱ka̱ʼa̱nra xíʼin yivára tá xa̱a̱ ku̱nu̱mí ña̱ kuvira (Luc. 23:46). Táki̱ʼva xa̱a̱ ni̱ka̱ʼa̱nyó, ta̱ Jesús ni̱ka̱ʼa̱nra xíʼin Jehová ku̱a̱ʼání yichi̱ mií ki̱vi̱ ña̱ ndáyáʼviní. Ta̱ Jesús ku̱ndeé-inira saáchi va̱ása nísandákoora ña̱ ka̱ʼa̱nra xíʼin yivára ña̱ ná chindeétáʼanra xíʼinra. Soo na̱ apóstol va̱ása níkeʼéna ña̱yóʼo ñuú saá, ña̱kán tá ki̱xaa̱ tu̱ndóʼo nu̱úna va̱ása ndakú níxi̱yo inina (Mat. 26:40, 41, 43, 45, 56). ¿Ndáaña sákuaʼayó xíʼin ña̱yóʼo? Ña̱ va̱ʼa nda̱kú koo iniyó xíʼin Ndióxi̱ xíniñúʼu ka̱ʼa̱n ni̱ʼiyó xíʼinra, táki̱ʼva ke̱ʼé ta̱ Jesús. w19.04 8, 9 párr. 4, 5

Jehová kúndasí nu̱úra xínira ña̱ tu̱ʼva xíʼin inkaka ña̱ʼa ña̱ kúú kuenta ta̱ Ndi̱va̱ʼa. Ña̱yóʼo ni̱ka̱ʼa̱nra xíʼin na̱ ñuu Israel: “Va̱ása va̱ʼa koo na̱ xáʼmi se̱ʼe xíʼún, ni na̱ kéʼé ña̱ ndáku, ni na̱ kéʼé magia, ni na̱ kándíxa ña̱ ñiʼna, ni na̱ kéʼé ña̱ tási, ni na̱ íxaa tási xíʼin inkana, ni na̱ ku̱a̱ʼa̱n káʼa̱n xíʼin na̱ tu̱ʼva á na̱ tási, á na̱ nándukú na̱ ndáku, ni na̱ nátúʼun xíʼin na̱ ni̱xi̱ʼi̱. Chi ndiʼi na̱ yiví na̱ kéʼé ña̱ kini yóʼo kúndasí nu̱ú Jehová xínirana, xa̱ʼa̱ ña̱ʼa kini kéʼéna yóʼo, Jehová Ndióxi̱ miíún tavárana nu̱ú ñuʼú nu̱ú ndóona” (Deut. 18:10-12). Soo miíyó va̱ása íxanduxa Ndióxi̱ xíʼinyó ña̱ kundiku̱nyó ley ña̱ ta̱xira ndaʼa̱ na̱ ñuu Israel. Soo xíni̱vayó ña̱ nda̱a̱ tiempo vitin va̱ása kútóora ni iin ña̱ʼa ña̱ kúú kuenta ta̱ Ndi̱va̱ʼa. Jehová káʼa̱nra xíʼinyó ña̱ ná kundasí nu̱úyó kuniyó ndiʼi ña̱ʼa ña̱ kúú kuenta ta̱ Ndi̱va̱ʼa chi xíʼin ña̱yóʼo sáxo̱ʼvi̱ra na̱ yiví. Tá kúú xíniñúʼuraña ña̱ káʼa̱nra ña̱ vatá ña̱ tákukava na̱ ni̱xi̱ʼi̱ chí inka xiyo (Ecl. 9:5). Saátu xíniñúʼura ña̱ vatá yóʼo ña̱ sáyíʼvira na̱ yiví, ña̱ kuxíkana nu̱ú Ndióxi̱. Kúni̱ra ña̱ na̱ yiví ná kandíxakana na̱ ta̱chí ndi̱va̱ʼa ta va̱ása kandíxana Jehová. w19.04 21 párr. 5, 6

Ña̱ kéʼéna ña̱ kini xíʼin na̱ va̱lí, iin ku̱a̱chi ndeéní kúú ña̱yóʼo chi sáxo̱ʼvi̱nínana. Na̱ va̱lí yóʼo yíʼvina ta va̱ása va̱ʼa kúnina. Xa̱ʼa̱ ña̱yóʼo xíniñúʼu kundaayóna nu̱ú ña̱ kini yóʼo. Ta saátu xíniñúʼu sandi̱koyó-ini na̱ ke̱ʼéna ña̱ kini yóʼo xíʼin (1 Tes. 5:14). Tá ná keʼé iin na̱ hermano na̱ íyo ti̱xin congregación ña̱ kini xíʼin na̱ va̱lí, íxayaku̱a̱na na̱ congregación (Mat. 5:16; 1 Ped. 2:12). Va̱ása taxiyó ña̱ koo na̱ kéʼé ña̱ kini yóʼo xíʼinyó, tá va̱ása ndándikó-inina xa̱ʼa̱ ña̱ ke̱ʼéna chi íxayaku̱a̱na na̱ congregación. Tá iin na̱ congregación yáʼandosóna ley yóʼo, tá kúú ña̱ kéʼéna ña̱ kini xíʼin na̱ va̱lí, kúni̱ kachiña ña̱ kǒo kándíxana na̱ chíñu (chitáʼanña xíʼin Hechos 25:8). Ña̱ ndixa kúúña, na̱ anciano va̱ása kivi taxina castigo ndaʼa̱ na̱ kéʼé ña̱ kini xíʼin na̱ va̱lí, soo va̱ása sásina nu̱ú na̱ chíñu ña̱ ndatiinna ku̱a̱chi xíʼin na̱yóʼo. w19.05 9 párr. 4-7

Jehová kúú ta̱ va̱ʼaní sánáʼa̱ miíyó. Ta kivi chindeétáʼanra xíʼinyó tá ná ya̱ʼayó nda̱a̱ ndáaka nu̱ú tu̱ndóʼo (Is. 30:20, 21). Tu̱ʼunra va̱ʼaní sánáʼa̱ña miíyó ña̱ kuxini̱ va̱ʼayó ta koo tu̱ʼvayó ña̱ keʼéyó ndiʼi ña̱ʼa (2 Tim. 3:17). Tá ndíku̱nyó ña̱ káʼa̱n Biblia, ndíchika íyoyó nu̱ú na̱ ndíku̱n ña̱ ndíchi ñuyǐví yóʼo (Sal. 119:97-100). Soo ña̱ ndíchi ñuyǐví yóʼo kivi chindaʼáña miíyó ña̱ keʼéyó ña̱ kúni̱ miíyó. Ña̱kán sana kuni̱yó ndakanixi̱níyó ta kundiku̱nyó ña̱ kéʼé na̱ ñuyǐví yóʼo. Xa̱ʼa̱ ña̱yóʼo ña̱ Biblia káʼa̱nña: “Kiʼinníndó kuenta: saáchi sana íyo iin na̱ kúni̱ sandáʼvi ndóʼó xíʼin tu̱ʼun ndíchi ña̱ ndákanixi̱nína” (Col. 2:8). Nda̱a̱ táki̱ʼva ni̱ka̱ʼa̱n Biblia, koo na̱ yiví na̱ keʼé ña̱ kúni̱ miína (2 Tim. 3:4). Ta saátu ndiʼi kue̱ʼe̱ xíkun ña̱ kíʼinna tá kísi̱ xíʼin táʼanna tá kúú ña̱ sida, náʼa̱ña nu̱úyó ña̱ va̱ása va̱ʼa ña̱ ndíchi ña̱ íyo ñuyǐví yóʼo (2 Ped. 2:19). w19.05 21 párr. 1, 2; 22 párr. 4, 5

Na̱ ñuu na̱ ni̱xi̱yo yatin xíʼin na̱ ñuu Israel xi̱kandíxana ña̱ xíniñúʼu taxina sava ña̱ʼa ndaʼa̱ ndióxi̱na ña̱ va̱ʼa taxi na̱yóʼo sa̱vi̱ tá xíniñúʼuna. Ta̱ Ndi̱va̱ʼa sa̱ndáʼvirana ña̱ ná kandíxana ña̱ xíniñúʼu keʼéna táki̱ʼva kéʼé na̱ cananeo ña̱ va̱ʼa koon sa̱vi̱ ta koo ku̱a̱ʼá ña̱ kuxuna. Na̱ va̱ása nda̱kú níxi̱yo ini xíʼin Jehová xi̱kandíxana ña̱ xíniñúʼu ndasakáʼnuna ndióxi̱ kán tasaá va̱ása koo so̱ko̱, ña̱kán ki̱xáʼana ndásakáʼnuna ña̱ Baal. Ta̱ Ndi̱va̱ʼa xi̱niñúʼura ña̱ ndíka̱a̱ níma̱na. Tá xi̱ndasakáʼnu na̱ cananeo ndióxi̱na xi̱kisina xíʼin ku̱a̱ʼá ñaʼá á ta̱a ini templo ndióxi̱na. Nu̱ú na̱ yiví kán ña̱ va̱ʼava xi̱kuu ndiʼi ña̱ kini ña̱ xi̱keʼéna, tá kúú ña̱ ku̱su̱n iin ta̱a xíʼin inka ta̱a á ñaʼá xíʼin inka ñaʼá (Deut. 23:17, 18; 1 Rey. 14:24). Nda̱kanixi̱nína ña̱ saá chindeétáʼan na̱ ndióxi̱na xíʼin ñuʼú nu̱ú chíʼina ña̱ va̱ʼa taxiña ña̱ koo ña̱ kuxuna. Na̱ ñuu Israel ku̱tóona ña̱yóʼo tasaá ki̱xáʼana nda̱sakáʼnuna inka ndióxi̱. w19.06 2 párr. 3; 4 párr. 7, 8

Ku̱a̱ʼání na̱ xi̱ñuʼu Betel xíʼin inkaka na̱ hermano na̱ káchíñu ku̱a̱ʼá tiempo nu̱ú Jehová na̱sama chiñuna. Sana íxayo̱ʼvi̱níña xíʼin na̱ hermano yóʼo ña̱ sandákoona chiñu ña̱ kútóonína. Tá na̱sama chiñu ña̱ xi̱kuumiíún, ¿ndáaña kivi chindeétáʼan xíʼún? Yatinka koún xíʼin Jehová ta kaʼviún Biblia ndiʼi ki̱vi̱ ta ndakanixi̱níún xa̱ʼa̱ña. Ta saátu chika̱a̱ ndee̱ ña̱ ku̱ʼún natúʼún xa̱ʼa̱ Ndióxi̱ xíʼin na̱ congregación nu̱ú ni̱xa̱a̱ún. Jehová va̱ása nándósóra xa̱ʼa̱ na̱ nda̱kú íyo ini xíʼinra, ni tá va̱ása kívika keʼéna táʼan ña̱ xi̱keʼéna tá ya̱chi̱. Loʼo ña̱ʼa ná kuumiíyó. Ná kǒo kundi̱ʼi̱ní-iniyó xa̱ʼa̱ ña̱ʼa ña̱ íyo ñuyǐví ta̱ Ndi̱va̱ʼa chi kivi kasiña nu̱úyó ña̱ ndasakáʼnuyó Jehová (Mat. 13:22). Ná kǒo kandíxayó ña̱ káʼa̱n na̱ migoyó, na̱ táʼanyó á inkaka na̱ yiví xíʼinyó xa̱ʼa̱ ña̱ xíniñúʼu koo ku̱a̱ʼá xu̱ʼúnyó ña̱ va̱ʼa vií kutakuyó ñuyǐví yóʼo (1 Juan 2:15-17). Ná kandíxayó ña̱ mií Jehová taxi ndiʼi ña̱ xíniñúʼuyó ña̱ sakuaʼayó xa̱ʼa̱ra xíʼin ndiʼika ña̱ xíniñúʼuyó ña̱ kutakuyó mií tiempo ña̱ xíni̱ miíra (Heb. 4:16; 13:5, 6). w19.08 20 párr. 4; 21, 22 párr. 7, 8

¿Á íyo iin ña̱ sándi̱ʼi̱ní-iniyó vitin? Tá xítoyó ña̱ kúnda̱a̱-ini Jehová xíʼin ña̱ ndo̱ʼoyó va̱ʼaní kúniyó. Saáchi kúnda̱a̱-inira xíʼin ña̱ ndóʼoyó. Xíni̱ra ndáaña va̱ása kuchiñuyó xíʼin, ta saátu ña̱ ndákanixi̱níyó (Sal. 103:14; 139:3, 4). Tá ná kuyatinyó nu̱ú Jehová, chindeétáʼanra xíʼinyó ña̱ kuchiñuyó ya̱ʼayó nu̱ú ña̱ sándi̱ʼi̱ní-iniyó. Tá ndíʼi̱ní-iniyó kivi kixáʼa ndakanixi̱níyó ña̱ va̱ása kuchiñuyó xíʼin ña̱ ndóʼoyó ta nda̱a̱ kivi ndakavaní-iniyó. Tá saá ná ndoʼoyó ná ndakaʼányó chi Jehová chindeétáʼanra xíʼinyó. ¿Nda̱saa keʼéra ña̱yóʼo? Káʼa̱nra xíʼinyó ña̱ ná ka̱ʼa̱nyó xíʼinra xa̱ʼa̱ ña̱ sándi̱ʼi̱ní-iniyó ta chindeétáʼanra xíʼinyó (Sal. 5:3; 1 Ped. 5:7). Xa̱ʼa̱ ña̱yóʼo ná ka̱ʼa̱n ni̱ʼiyó xíʼinra xa̱ʼa̱ ña̱ ndóʼoyó. Va̱ása kuniso̱ʼoyó ña̱ ka̱ʼa̱nra xíʼinyó, soo kuniñúʼura tu̱ʼunra xíʼin na̱ ñuura ña̱ ka̱ʼa̱nra xíʼinyó. Ña̱ kaʼviyó nu̱ú Biblia sandíkoña-iniyó ta kandíxayó ña̱ káʼa̱n Ndióxi̱ taxira. Saátu na̱ hermano chika̱a̱na ndee̱ xíʼinyó (Rom. 15:4; Heb. 10:24, 25). w19.06 16 párr. 7, 8

Tá íxandi̱va̱ʼana xíʼinyó ná ka̱ʼa̱n ndáʼviyó xíʼin Jehová xa̱ʼa̱ ndiʼi ña̱ sándi̱ʼi̱-iniyó xíʼin xa̱ʼa̱ ña̱ yíʼviyó (Lam. 2:19). Tá káʼa̱n ni̱ʼiyó xíʼin Jehová ndiʼi ki̱vi̱ yatinka kooyó xíʼinra (Rom. 8:38, 39). Xíʼin ndinuʼu-iniyó ná kandíxayó ña̱ tá ná kaʼndachíñu Ndióxi̱, saxínura ña̱ ni̱ka̱ʼa̱nra (Núm. 23:19). Tá va̱ása ndinuʼu-iniyó kándíxayó ña̱yóʼo, ta̱ Ndi̱va̱ʼa xíʼin na̱ kítáʼan xíʼinra kuchiñuna sayiʼvína miíyó (Prov. 24:10; Heb. 2:15). Ná taváyó tiempo ña̱ sakuaʼayó xa̱ʼa̱ iin iin ña̱ káʼa̱n Jehová keʼéra chí nu̱únínu tá ná kaʼndachíñura, ta nda̱chun kúú ña̱ kivi kandíxayó ña̱ saxínuraña. Ña̱ va̱ʼa kunda̱a̱-iniyó ña̱ ndáyáʼviní ña̱yóʼo, ná ka̱ʼa̱nyó xa̱ʼa̱ ña̱ ndo̱ʼo ta̱ Stanley Jones, ta̱ xi̱ndika̱a̱ veʼeka̱a u̱xa̱ ku̱i̱ya̱ xa̱ʼa̱ ña̱ kándíxara Ndióxi̱. Miíra ni̱ka̱ʼa̱n xa̱ʼa̱ ña̱ chi̱ndeétáʼan xíʼinra ña̱ nda̱kú ni̱xi̱yo inira: “Ña̱ kúnda̱a̱-inii̱ xa̱ʼa̱ ña̱ kaʼndachíñu Ndióxi̱, ña̱ ndinuʼu-inii̱ kándíxai̱ ta va̱ása níxi̱ka-inii̱, chi̱ndeétáʼanña xíʼi̱n ta ta̱xiña ndee̱ ndaʼíi̱. Ta va̱ása níkuchiñuna xíʼi̱n”. Tá ndakú íyo ña̱ kándíxayó Ndióxi̱ xa̱ʼa̱ ña̱ saxínura ña̱ ni̱ka̱ʼa̱nra koo chí nu̱únínu, saá kuyatinkayó nu̱úra ta va̱ása yi̱ʼvíyó (Prov. 3:25, 26). w19.07 2 párr. 1; 3 párr. 6, 7

¿Nda̱chun ndáyáʼviní ña̱ ná sanáʼa̱yó na̱ yiví ña̱ kundiku̱nna ta̱ Cristo? Saáchi nda̱saa na̱ ndíku̱n ta̱ Cristo kivi koo migo Ndióxi̱. Ta saátu va̱ʼaní íyona vitin ta saátu ndátuna ña̱ koona ndiʼi tiempo chí nu̱únínu (Juan 14:6; 17:3). Ña̱ nda̱a̱ kúúvaña, ta̱ Jesús ta̱xira iin chiñu ña̱ káʼnuní ndaʼa̱yó, soo va̱ása íyo mitúʼunyó. Ta̱ apóstol Pablo ni̱ka̱ʼa̱nra ña̱ miíra xíʼin inkaka na̱ cristiano, na̱ chi̱ndeétáʼan xíʼin Ndióxi̱ xi̱kuuna (1 Cor. 3:9). Ña̱ ndixa kúúña, Jehová xíʼin ta̱ Cristo, káʼnuní chiñu ta̱xina ndaʼa̱ miíyó na̱ yiví ku̱a̱chi. Soo chiñu yóʼo sákusi̱íníña-iniyó. Ña̱ siʼna xíniñúʼu keʼéyó kúú ña̱ nandukúyó na̱ yiví na̱ kúni̱ kuyatin nu̱ú Jehová. Náʼa̱yó ña̱ ndixa kúúyó testigo Jehová tá nátúʼunyó xíʼin ndiʼi na̱ yiví na̱ ndáni̱ʼíyó. Ta saátu náʼa̱yó ña̱ ndixa ndíku̱nyó ta̱ Jesús tá kándíxayó ña̱ ni̱ka̱ʼa̱nra ña̱ ku̱ʼu̱nyó natúʼunyó xíʼin na̱ yiví. w19.07 15 párr. 3-5

Ña̱ siʼnaka ndákanda̱-ini na̱ yiví xíʼin kúú consejo ña̱ va̱xi nu̱ú Biblia. Chí ñuu Nueva York, iin ñá hermana ñá xáʼa̱n nátúʼun xíʼin na̱ káʼa̱n tu̱ʼun chino mandarín, káchiñá: “Chíka̱i̱ ndee̱ ña̱ kundi̱ʼi̱-inii̱ xa̱ʼa̱ na̱ yiví ta kuniso̱ʼi̱ ña̱ káʼa̱nna. Tá kúnda̱a̱-inii̱ ña̱ sa̱kán ki̱xa̱a̱na ñuu yóʼo, ndáka̱tu̱ʼíi̱nna á íyo va̱ʼana á xa̱a̱ nda̱ni̱ʼína nu̱ú kachíñuna ta nda̱saa kéʼéna xíʼinna”. Sava yichi̱, ña̱yóʼo chíndeétáʼan xíʼinñá ña̱ kixáʼañá ka̱ʼa̱nñá xíʼinna xa̱ʼa̱ Biblia. Tá xítoñá ña̱ kivi ka̱ʼa̱nkañá xíʼinna, ndáka̱tu̱ʼunñána: “¿Ndáaña xíniñúʼu keʼéyó ña̱kán va̱ʼa kutáʼan ndiʼiyó? ¿Á kivi kaʼvii̱ nu̱ún iin consejo ña̱ va̱xi nu̱ú Biblia? Káchiñá: ‘Tá kíxáʼa iinna kúni̱na kanitáʼanna, tá íyo iin na̱ ndákuna yichi̱ ña̱ va̱ʼa ná kunu ti̱kui̱í ku̱ʼu̱nrá saá íyona; ña̱kán tá kúma̱níka ña̱ kanitáʼanna va̱ʼaka kúáʼanʼ. ¿Á kivi chindeétáʼan ña̱ consejo yóʼo xíʼinyó ña̱ va̱ʼa kutáʼanyó?” (Prov. 17:14). Tá ná kuniñúʼuyó táʼan tu̱ʼun yóʼo kivi chindeétáʼanña xíʼinyó ña̱ kunda̱a̱-iniyó yukú na̱ kuni̱ kuniso̱ʼo miíyó inka yichi̱. w19.07 23 párr. 13

Xíniñúʼu kunda̱a̱-iniyó xíʼin ña̱ ndóʼo na̱ na̱sama chiñu ña̱ kúúmiína nu̱ú Ndióxi̱ ta va̱ása kundáʼvi kuití iniyó kuniyóna. Sana miína á iin na̱ veʼena ndeé ndóʼona, á sanatu xóʼvi̱na xa̱ʼa̱ ña̱ ni̱xi̱ʼi̱ iin na̱ veʼena. Ni tá va̱ása káʼa̱nna xa̱ʼa̱ ña̱ ndóʼona, sana kúsuchí-inina xa̱ʼa̱ na̱ migona. Ña̱ va̱ʼa ndi̱ko-inina xa̱ʼa̱ ña̱ ndóʼona xíniñúʼuna ku̱a̱ʼá tiempo. Saátu kivi chindeétáʼanyó xíʼinna xíʼin ña̱ kéʼéyó ña̱ va̱ʼa kusi̱í-inina xíʼin chiñu ña̱ nda̱kiʼinna. Iin ñá hermana ñá ka̱chíñu nu̱ú Jehová ku̱a̱ʼání ku̱i̱ya̱ inka país káchiñá: “Tá ya̱chi̱ xi̱kaʼvii̱ Biblia xíʼin na̱ yiví ndiʼi ki̱vi̱. Soo tá na̱sama chiñui̱ xi̱ ixayo̱ʼvi̱ña xíʼi̱n kaʼvi iin texto ña̱ Biblia nu̱ú na̱ yiví á ña̱ na̱ʼi̱ iin video tá ku̱a̱ʼi̱n veʼe tá veʼe. Soo na̱ hermano ti̱xin congregación ña̱ xa̱á nu̱ú ndíka̱i̱ xi̱ka̱ʼa̱nna xíʼi̱n ña̱ ku̱ʼi̱n xíʼinna nu̱ú na̱ káʼvina xíʼin á na̱ revisitana. Sa̱kuaʼi̱ ndáa ki̱ʼva kixáʼíi̱ ka̱ʼi̱n xíʼin na̱ yiví na̱ íyo nu̱ú ña̱ territorio xa̱á. Tíxa̱ʼvi ndiʼi ña̱yóʼo tuku ki̱xáʼíi̱ kúsi̱í-inii̱”. w19.08 22 párr. 10; 24 párr. 13, 14

Nda̱a̱ táki̱ʼva ndo̱ʼo ñá Evodia xíʼin ñá Síntique, ta ná kotoyó ña̱ va̱ása va̱ʼa ña̱ kéʼé na̱ hermano kivi ixayo̱ʼvi̱ña xíʼinyó ña̱ kuʼvi̱-iniyó kuniyóna. Ndiʼiyó kéʼéyó ña̱ va̱ása va̱ʼa ndiʼi ki̱vi̱, xa̱ʼa̱ ña̱kán tá ná kotoyó ña̱ kéʼé inkana, xa̱a̱yó sandákooyó ña̱ kuʼvi̱-iniyó kuniyóna. Ná ka̱ʼa̱nyó xa̱ʼa̱ iin ejemplo. Tá iin ta̱ hermano na̱ndósóra chindeétáʼanra xíʼinyó ña̱ ndaya̱kúnyó salón, kíxáʼayó sáa̱yó xíʼinra. Soo tá ná ndakaʼánkayó xa̱ʼa̱ ndiʼi ña̱ va̱ása va̱ʼa kéʼéra sáa̱kayó ta ña̱ kúʼvi̱-iniyó xíniyóra ndiʼiña. Tá saá ndóʼoyó, ná ndakaʼányó chi Jehová xítora ndiʼi ña̱ va̱ása va̱ʼa ña̱ kéʼéyó xíʼin ña̱ kéʼé na̱ hermanoyó, ta ni saá kúʼvi̱ní-inira xínira ndiʼiyó. Xa̱ʼa̱ ña̱yóʼo xíniñúʼu keʼéyó nda̱a̱ táki̱ʼva kéʼé Jehová, ta kotoyó ña̱ va̱ʼa ña̱ kéʼé inkana. Ki̱vi̱ chíka̱a̱yó ndee̱ ña̱ kuʼvi̱-iniyó kuniyó na̱ hermanoyó, yatinka íyoyó xíʼinna (Filip. 2:1, 2). w19.08 9, 10 párr. 7, 8

Jehová kúʼvi̱ní-inira xínira na̱ vitá íyo ini. Ta nda̱saa na̱ vitá íyo ini kúú na̱ kivi xa̱a̱ koo migora. Ta na̱ “ni̱nu kúni xíkaní íyora nu̱úna”. Ndiʼiyó kúni̱yó sakusi̱íyó-ini Jehová ta kuni̱yó yatin ná koora xíʼinyó, xa̱ʼa̱ ña̱kán xíniñúʼu sakuaʼayó vitá koo iniyó. Na̱ vitá íyo ini va̱ása ndákanixi̱nína ña̱ ndáyáʼvika miína nu̱ú inkana ta ni va̱ása ni̱nu kúnina. Ña̱ Biblia káchiña ña̱ ná vitá-ini kúnda̱a̱-inina ña̱ káʼnuka Jehová nu̱úna, ta saátu kúnda̱a̱-inina ña̱ íyo na̱ yiví na̱ xíni̱ka nu̱ú miína (Filip. 2:3, 4). Sava na̱ yiví náʼa̱na ña̱ kúúna na̱ vitá íyo ini. Ta sana to̱ʼó íyona á vií kéʼéna xíʼin inkana xa̱ʼa̱ ña̱ saá sa̱náʼa̱ na̱ yivánana, soo chí inina ni̱nu kúnina. Kúee á ya̱chi̱ náʼa̱ miívana ndáa ki̱ʼva íyona (Luc. 6:45). w19.09 2 párr. 1, 3, 4

Ndiʼi tu̱ʼun va̱ʼa ña̱ káʼa̱n xa̱ʼa̱ ta̱ Jesús, kúú ndiʼi ña̱ sa̱náʼa̱ra. Xíniso̱ʼoyóña ki̱vi̱ kéʼéyó ña̱ káʼa̱nña. Ña̱yóʼo kúni̱ kachiña ña̱ siʼnaka chiñu Ndióxi̱ keʼéyó, ta ixato̱ʼóyó ndiʼi ña̱ káʼa̱nra ta ka̱ʼa̱nyó xíʼin inkana xa̱ʼa̱ reinora (Mat. 6:33; 24:14). Ta saátu xíniñúʼu chindeétáʼanyó xíʼin na̱ ku̱ʼu̱n koo chí ndiví xíʼin ta̱ Cristo ña̱ va̱ʼa keʼéna chiñuna (Mat. 25:31-40). Si̱lóʼo kúma̱ní taxina ña̱ va̱ʼa ndaʼa̱ na̱ koo nu̱ú ñuʼú yóʼo xa̱ʼa̱ ña̱ chi̱ndeétáʼanna xíʼinna (Juan 10:16). ¿Ndáa ki̱ʼva keʼénaña? Tá kúma̱níka kixáʼa ña̱ Armagedón, ndiʼi na̱ 144,000 ndakiʼinna ña̱ kutakuna ndiʼi tiempo chí ndiví. Ta na̱yóʼo ndakutáʼanna xíʼin ta̱ Jesús xíʼin inkaka na̱ se̱ʼe Ndióxi̱ ña̱ sandiʼi-xa̱ʼa̱na ña̱ Gog ta kundaana ndiʼi na̱ koo nu̱ú ñuʼú yóʼo, na̱ íyo nda̱a̱ táki̱ʼva íyo ndikachi (Rev. 2:26, 27; 7:9, 10). Ndiʼi na̱ kundoo nu̱ú ñuʼú yóʼo kusi̱íní-inina xa̱ʼa̱ ña̱ chi̱ndeétáʼanna xíʼin na̱ 144,000 tá ni̱xi̱yona nu̱ú ñuʼú yóʼo. w19.09 12, 13 párr. 16-18

¿Nda̱chun nda̱a̱ va̱ʼa kúniyó á ndíko-iniyó ki̱vi̱ kéʼéyó chiñu ña̱ ta̱xi ta̱ Jesús ndaʼa̱yó? Kúúmiíyó na̱ va̱ʼaní kúú superintendente. Ni mií Jehová kúú ta̱ superintendente ta̱ káʼnu, va̱ása kue̱ʼe̱ra ta táxira tíxa̱ʼvi ndaʼa̱yó. Ndáyáʼviní chiñu ña̱ kéʼéyó nu̱úra (Heb. 6:10). Ta miíra táxira ndee̱ ndaʼa̱yó ña̱ va̱ʼa keʼéyó chiñu ña̱ kúúmiíyó (2 Cor. 4:7; Gál. 6:5). Ta̱ Jesús, táxira iin yichi̱ va̱ʼaní nu̱úyó xa̱ʼa̱ ndáa ki̱ʼva keʼéyó xíʼin inkana (Juan 13:15). Ta na̱ anciano na̱ níʼi yichi̱ nu̱úyó chíka̱a̱na ndee̱ ña̱ kundiku̱nna yichi̱ ta Jesús, ta̱ va̱ʼaní níʼi yichi̱ (Heb. 13:20; 1 Ped. 5:2). Chíka̱a̱na ndee̱ ña̱ káʼa̱nna tu̱ʼun va̱ʼa xíʼinyó, vií íyo inina xíʼinyó ta saátu ndakúní íyo inina ña̱ sánáʼa̱na miíyó ta ndáana miíyó. Ta saátu kúúmiíyó na̱ va̱ʼaní kítáʼan xíʼinyó. Nda̱a̱ ni iin na̱ íyo ñuyǐví yóʼo, va̱ása vií kítáʼanna ta ni kǒo kúʼvi̱-inina xíni táʼanna nda̱a̱ táki̱ʼva kéʼé miíyó na̱ ndásakáʼnu Ndióxi̱. Ná ndakanixi̱níyó xa̱ʼa̱ ña̱yóʼo: káchíñuyó xíʼin na̱ yiví na̱ kéʼé ña̱ káʼa̱n Ndióxi̱. Ta xítona inkana ña̱ ndáyáʼvikana nu̱úna. Va̱ása xítona miíyó ña̱ kúú kuitíyó na̱ káchíñu xíʼinna, chi kúúyó migona. Ta xa̱ʼa̱ ña̱ kúʼvi̱ní-inina xínina miíyó nda̱a̱ kivi kuvina xa̱ʼa̱yó. w19.09 20 párr. 1; 23 párr. 12-14

Ta̱ apóstol Pablo ni̱káʼa̱nra xa̱ʼa̱ ña̱ xíniñúʼu keʼéyó ña̱ va̱ʼa koo tu̱ʼvayó tá ná kixaa̱ “ki̱vi̱ Jehová” (1 Tes. 5:1-6). Ña̱ tu̱ʼun yóʼo, káʼa̱nña xa̱ʼa̱ tá ná kixáʼana sandiʼi-xa̱ʼa̱na Babilonia ña̱ káʼnu, ña̱ kúú ndiʼi veʼe-ñu̱ʼu vatá ña̱ íyo iníísaá ñuyǐví, ta ña̱yóʼo ndiʼiña tá ná kixáʼa ña̱ Armagedón (Apoc. 16:14, 16; 17:5). Ta̱ Pablo ni̱ka̱ʼa̱nra ña̱ va̱ása xíniñúʼu ku̱su̱nyó nda̱a̱ táki̱ʼva kéʼé inkana, chi xíniñúʼu kunditoyó ta koo tu̱ʼvayó. Ta saátu ña̱ va̱ása ki̱ʼviyó xíʼin ña̱ política ña̱ íyo ñuyǐví yóʼo, ta ya̱ʼandosóyó ña̱ káʼa̱n Jehová. Chi tá saá ná keʼéyó, kivi xa̱a̱yó kooyó táʼan na̱ ñuyǐví yóʼo (Juan 15:19). Kúnda̱a̱-iniyó ña̱ iinlá Reino Ndióxi̱ kivi taxi ña̱ kundoo va̱ʼayó. Ña̱kán kúni̱yó chindeétáʼanyó xíʼin inkana, ña̱ kunda̱a̱-inina xa̱ʼa̱ ña̱ káʼa̱n Biblia xa̱ʼa̱ ña̱ kundoʼo ña̱ ñuyǐví yóʼo. Chi tá ná kixáʼa ña̱ gran tribulación, na̱ yiví va̱ása kivika nandukúna Jehová. Xa̱ʼa̱ ña̱yóʼo, xíniñúʼu kamaní ku̱ʼu̱nyó natúʼunyó xíʼinna. w19.10 8 párr. 3; 9 párr. 5, 6

Tá ki̱xaa̱ ki̱vi̱ ña̱ ka̱ʼa̱nna xíʼin na̱ yiví xa̱ʼa̱ ña̱ ni̱ka̱ʼyi̱ nu̱ú rollo, ta̱ Jeremías ta̱xira chiñu yóʼo ndaʼa̱ migora ta̱ Baruc (Jer. 36:5, 6). Ta̱ Baruc ndakúní ni̱xi̱yo inira ta sa̱xínura chiñu yóʼo ni i̱yoní ni̱xi̱yoña. Sana ni̱kusi̱íní-ini ta̱ Jeremías, tá ku̱nda̱a̱-inira ña̱ ni̱xa̱ʼa̱n ta̱ migora patio ña̱ templo, ta ka̱ʼvira rollo nu̱ú na̱ ñuu (Jer. 36:8-10). Tá ku̱nda̱a̱-ini na̱ príncipe ña̱ ñuu Judá xa̱ʼa̱ ña̱ ke̱ʼé ta̱ Baruc, ni̱ka̱ʼa̱nna xíʼinra ña̱ ná kaʼvira rollo nu̱úna (Jer. 36:14, 15). Ta xi̱kuni̱na natúʼunna xíʼin ta̱ rey Jehoiaquim xa̱ʼa̱ ña̱ ni̱ka̱ʼa̱n ta̱ Jeremías. Tá xi̱niso̱ʼo ta̱ rey Jehoiaquim ña̱ ka̱ʼyí ta̱ Jeremías, ni̱sa̱a̱níra ta nda̱a̱ xa̱ʼmira rollo ta ni̱ka̱ʼa̱nra ña̱ ná tiinna ta̱ Jeremías xíʼin ta̱ secretariora. Soo ta̱ Jeremías ki̱ʼinra inka rollo, ta ta̱xiraña ndaʼa̱ ta̱ Baruc ta ni̱ka̱ʼa̱nra xíʼinra ña̱ ná kaʼyí tukura ña̱ ni̱ka̱ʼa̱n Jehová. Tasaá ka̱ʼyí ta̱ Baruc “ndiʼi tu̱ʼun ña̱ va̱xi nu̱ú rollo ña̱ xa̱ʼmi ta̱ Jehoiaquim ta̱ rey ña̱ ñuu Judá” (Jer. 36:26-28, 32). w19.11 3, 4 párr. 4-6

Jehová kivi keʼéra nda̱a̱ ndáaka ña̱ʼa ña̱ va̱ʼa saxínura ña̱ kúni̱ra. Chiñu ña̱ xa̱a̱ kéʼéra kúú ña̱ maestro, kúútura iin yivá ta̱ sándi̱ko-ini ta saátu iin evangelizador (Is. 48:17; 2 Cor. 7:6; Gál. 3:8). Soo ni saá, xíniñúʼura na̱ yiví ña̱ va̱ʼa keʼéna ña̱ kúni̱ra (Mat. 24:14; 28:19, 20; 2 Cor. 1:3, 4). Jehová kivi taxira ndee̱ xíʼin ña̱ ndíchi ndaʼa̱ nda̱a̱ ndáaka miíyó, ña̱ va̱ʼa saxínuyó ña̱ kúni̱ra. Ta ndiʼi ña̱yóʼo kúú ña̱ kúni̱ kachi ki̱vi̱ra, nda̱a̱ táki̱ʼva ndákanixi̱ní sava na̱ xíni̱ va̱ʼa xa̱ʼa̱ ña̱yóʼo. Ndiʼiyó kúni̱yó ná kuniñúʼu Jehová miíyó, soo savayó sana ndákanixi̱níyó ña̱ va̱ása xíniñúʼura miíyó. ¿Nda̱chun? Saáchi túviyó, ña̱ xa̱ʼa̱ ña̱ xa̱a̱ ku̱chéeyó á xa̱ʼa̱ inkaka ña̱ʼa va̱ása kivi keʼéyó ña̱ kúni̱ra. Ta inkatuna, xa̱ʼa̱ ña̱ xa̱a̱ kúsi̱í-inina xíʼin chiñu ña̱ kúúmiína túvina ña̱ va̱ása xíniñúʼu keʼéna ku̱a̱ʼáka chiñu. w19.10 20 párr. 1, 2

Tá ná kuni̱yó koo ku̱a̱ʼání ña̱ʼayó, kivi kixáʼayó kundi̱ʼi̱ka-iniyó xa̱ʼa̱ ña̱yóʼo, ta nandósóyó xa̱ʼa̱ ña̱ kándíxayó Ndióxi̱. Ta̱ apóstol Pablo ni̱ka̱ʼa̱nra: “Nda̱a̱ ni iin na̱ kúú soldado va̱ása ndíʼi̱-inina xa̱ʼa̱ ña̱ koo iin negociona, chi ña̱ kúni̱na kúú ña̱ sakusi̱ína-ini ta̱ ta̱xi chiñu ndaʼa̱na ña̱ koona soldado” (2 Tim. 2:4). Na̱ soldado romano va̱ása níxitaxina ña̱ kuumiína iin negocio. Nda̱a̱ táki̱ʼva ke̱ʼé na̱ inka soldado, miíyó va̱ása ndíʼi̱ka-iniyó xa̱ʼa̱ inka ña̱ʼa, chi ña̱ kúni̱yó kúú ña̱ sakusi̱íyó-ini Jehová xíʼin ta̱ Jesús na̱ kúú comandanteyó. Ta ndáyáʼvika ña̱yóʼo nu̱úyó nu̱ú inkaka ña̱ʼa ña̱ íyo nu̱ú ñuyǐví ta̱ Ndi̱va̱ʼa. Chíka̱a̱yó ndee̱ ña̱ kuumiíyó tiempo ña̱ ndasakáʼnuyó Jehová, ta vií koo ña̱ kándíxayóra ña̱ íyo táki̱ʼva íyo escudo, ta saátu iníí kotóyó ña̱ ka̱a espiritual. Ta ná kiʼinníyó kuenta. ¿Nda̱chun? Ta̱ apóstol Pablo ni̱ka̱ʼa̱nra “na̱ kúni̱ koo ku̱a̱ʼá xu̱ʼún” kíxáʼana “nándósó-inina xa̱ʼa̱ Ndióxi̱” (1 Tim. 6:9, 10). w19.11 17 párr. 12, 14, 15

Tá kúma̱níka kixáʼa “ki̱vi̱ Jehová” na̱ yiví ka̱ʼa̱nna “va̱ʼaní kundooyó vitin ta va̱ása yi̱ʼvíkayó” (1 Tes. 5:1-6). Nu̱ú ña̱ 1 Tesalonicenses 5:2, tá káʼa̱nña xa̱ʼa̱ “ki̱vi̱ Jehová” káʼa̱nña xa̱ʼa̱ ña̱ “gran tribulación” (Rev. 7:14). ¿Ndáa ki̱ʼva kunda̱a̱-iniyó ña̱ xa̱a̱ ku̱yatin kixáʼa ña̱ gran tribulación? Ña̱ Biblia káchiña ña̱ ná yiví ka̱ʼa̱nna iin ña̱ʼa ña̱ na̱ʼa̱ña nu̱úyó. Ndiʼi na̱ chíñu ña̱ iníísaá ñuyǐví ka̱ʼa̱nna “va̱ʼaní kundooyó vitin ta va̱ása yi̱ʼvíkayó”. ¿Á kitáʼan na̱ níʼi yichi̱ nu̱ú na̱ veʼe-ñu̱ʼu xíʼinna? Sana keʼévanaña. Ta ña̱yóʼo, iin ña̱ vatá ña̱ kuniñúʼu na̱ ta̱chí ndi̱va̱ʼa kúúña. Soo ña̱ vatá yóʼo iin ña̱ i̱yoní kooña, saáchi na̱ yiví ndakanixi̱nína ña̱ va̱ʼaní íyona tá xa̱a̱ ku̱yatin kixáʼa ña̱ gran tribulación. Tasaá, iin kama kixa̱a̱ ña̱ ndiʼi-xa̱ʼa̱na, nda̱a̱ táki̱ʼva xóʼvi̱ iin ñaʼá ñá kúni̱ kaku se̱ʼe. Ta, ¿ndáaña kundoʼo na̱ nda̱kú íyo ini ndásakáʼnu Jehová? Xa̱ʼa̱ ña̱ va̱ása xíni̱na ndáa ki̱vi̱ kúú ña̱ kixáʼa ña̱ gran tribulación, sana ndakanda̱-inina tá ná kuuña, soo xa̱a̱ koo tu̱ʼvavana. w19.09 9 párr. 7, 8

Ná kunda̱a̱ va̱ʼa iniyó ndáaña kúni̱yó keʼéyó. Ña̱yóʼo chindeétáʼan xíʼinyó ña̱ sandíʼiyó keʼéyó ña̱ ki̱xáʼayó xíʼin. Tá kúú, tá chi̱ka̱a̱-iniyó ña̱ kaʼvi ni̱ʼiyó Biblia, soo tá kǒo iin programa kúúmiíyó va̱ása kuchiñuyó keʼéyó ña̱yóʼo. Inka ejemplo, na̱ anciano ti̱xin iin congregación ni̱ka̱ʼa̱nna ku̱ʼu̱nna kotona na̱ hermano, soo xa̱a̱ ni̱ya̱ʼa tiempo ta ni ta̱ʼán keʼénaña. Iin ña̱ kivi chindeétáʼan xíʼinna kúú ña̱ nda̱ka̱tu̱ʼun xíʼin miína ña̱yóʼo: “¿Á nda̱ka̱xin va̱ʼayó ndáa na̱ hermano kúú na̱ ku̱ʼu̱nyó kotoyó? ¿Á vií va̱ʼa nda̱ka̱xinyó iin ki̱vi̱ ña̱ ku̱ʼu̱nyó kotoyóna?”. Ta saátu viíní ná kotoyó ndáaña kivi keʼéyó. Nda̱a̱ ni iinyó kǒo ku̱a̱ʼá tiempo kúúmiíyó, ni xu̱ʼún ni ndee̱ ña̱ keʼéyó ndiʼi ña̱ kúni̱yó. Xa̱ʼa̱ ña̱yóʼo, xíniñúʼu kotoyó ndáaña kivi keʼéyó ta viíní ná ndakanixi̱níyó xa̱ʼa̱ña. Sava yichi̱, xíniñúʼu nasamayó iin ña̱ nda̱ka̱xinyó keʼéyó ña̱ va̱ása kúchiñuyó saxínuyó. w19.11 29 párr. 11, 12

Nu̱ú Isaías 65:21-23 káʼa̱nña xa̱ʼa̱ ndáa ki̱ʼva kutakuyó nu̱ú ñuʼú yóʼo. Ndiʼi na̱ ndásakáʼnu Ndióxi̱ va̱ása kundoo miína. Chi ña̱ Biblia káchiña ña̱ keʼéna ku̱a̱ʼá chiñu ña̱ sákusi̱í-inina. Kivi kandíxayó ña̱ tá ná ndiʼi ña̱yóʼo, saátu ndiʼi na̱ i̱xava̱ʼa Ndióxi̱, sa̱ñána ndaʼa̱ ku̱a̱chi ta koona táki̱ʼva íyo na̱ se̱ʼe Ndióxi̱ (Rom. 8:21). Jehová ni̱ka̱ʼa̱nra ña̱ na̱ ñuu Israel, koo iin tiempo ña̱ ndakindee̱na ta saátu ña̱ kachíñuna, ta saátu keʼéra xíʼin na̱ ndásakáʼnu-ñaʼá ti̱xin ña̱ mil ku̱i̱ya̱ ña̱ kaʼndachíñu ta̱ Cristo. Ndiʼi na̱yóʼo vií kuniñúʼuna tiempona ña̱ keʼéna ña̱ kúni̱ Jehová. Chi nda̱a̱ táki̱ʼva kéʼéyó vitin, saátu ndasakáʼnuyó Ndióxi̱ nu̱ú ñuyǐví xa̱á, ta tá ná keʼéyó ña̱yóʼo kusi̱íní-iniyó. Ndiʼi miíyó na̱ nda̱kú íyo ini ndásakáʼnu Ndióxi̱ keʼéyó chiñu ña̱ sákusi̱í-iniyó, ta saátu kachíñuyó nu̱ú Jehová. w19.12 12 párr. 15; 13 párr. 17, 18

Ña̱ tu̱ʼun sanáʼa̱yó kúni̱ kachiña ña̱ tuku ta tuku, ka̱ʼa̱nyó xíʼinna xa̱ʼa̱ iin ña̱ʼa ña̱ va̱ʼa kindo̱oña xi̱nína. Xa̱ʼa̱ ña̱yóʼo, na̱ íyo se̱ʼe xíniñúʼu tavána tiempo ña̱ koona xíʼin se̱ʼena. Sava yichi̱, nda̱a̱ kivi kunaana xa̱ʼa̱ ña̱ tuku ta tuku káʼa̱nna xa̱ʼa̱ iin ña̱ʼa xíʼin se̱ʼena. Soo, ña̱yóʼo kivi chindeétáʼan xíʼinna ña̱ sanáʼa̱na se̱ʼena xa̱ʼa̱ tu̱ʼun Ndióxi̱ ta kandíxanaña. Ña̱kán, kuxini̱ va̱ʼandó se̱ʼendó. Ña̱ Salmo 127 káchiña ña̱ na̱ va̱lí nda̱a̱ táki̱ʼva íyo flecha saá íyona (Sal. 127:4). Táki̱ʼva síín síín íyo ña̱ kúva̱ʼa flecha ta savaña náʼnu á válíña, ki̱ʼva saá íyo na̱ va̱lí chi xa̱a̱ síín síín íyona nu̱ú inkana. Xa̱ʼa̱ ña̱yóʼo, na̱ íyo se̱ʼe xíniñúʼu kotona ndáa ki̱ʼva sanáʼa̱na iin tá iin se̱ʼena. Iin na̱ matrimonio na̱ íyo chí Israel na̱ ku̱chiñu chi̱ndeétáʼan xíʼin se̱ʼena ña̱ va̱ʼa kachíñuna nu̱ú Jehová, káʼa̱nna ndáaña chi̱ndeétáʼan xíʼinna: “Va̱ása inkáchi níxikaʼvindi̱ Biblia xíʼinna”. Ña̱ nda̱a̱, su̱ví ndiʼi yichi̱ kivi keʼéyó ña̱yóʼo, soo na̱ níʼi yichi̱ nu̱ú na̱ veʼena kúú na̱ ka̱ʼa̱n á xíniñúʼu keʼéna ña̱yóʼo. w19.12 26 párr. 18-20

Tá yáʼayó nu̱ú tu̱ndóʼo, xíʼin ndiʼi níma̱yó táxiyó tíxa̱ʼvi xa̱ʼa̱ ña̱ chíndeétáʼanna xíʼinyó. Ta̱ Ryan ta̱ ni̱xi̱ʼi̱ yivá xíʼin iin accidente, káchira: “Tá xóʼvi̱yó, íyo ku̱a̱ʼání ña̱ʼa ña̱ íxayo̱ʼvi̱ xíʼinyó keʼéyó ni xa̱a̱ xíni̱yó keʼéyóña. Soo ni iin ña̱ʼa loʼo kúú ña̱ kéʼéna xa̱ʼa̱yó, chíndeétáʼannívaña xíʼinyó”. Ni iin ña̱ʼa loʼo kúú ña̱ kéʼéyó, kiviva chindeétáʼanña xíʼin na̱ xóʼvi̱. Ta̱ Marcos, ta̱ ni̱xi̱yo tá siglo nu̱ú ni̱xi̱yoní chiñu nu̱úra, soo ni saá ta̱vára tiempo ña̱ chi̱ndeétáʼanra xíʼin ta̱ apóstol Pablo, ña̱kán ta̱ Pablo xi̱kandíxarara ta xi̱ka̱ʼa̱nra xíʼinra ña̱ ná chindeétáʼanra xíʼinra. Ñá Ángela, ñá ni̱xi̱ʼi̱ iin na̱ veʼe, táxiníñá tíxa̱ʼvi xa̱ʼa̱ ña̱ sa̱ndíkona-iniñá. Káchiñá: “Ki̱vi̱ kúni̱ na̱ hermano chindeétáʼanna xíʼinyó, va̱ása íxayo̱ʼvi̱ña xíʼinyó ña̱ ka̱ʼa̱nyó xíʼinna. Ta saátu íyo tu̱ʼvana ña̱ chindeétáʼanna xíʼinyó ta su̱ví xíʼin ña̱ ndúxa kéʼénaña”. Ña̱kán ná nda̱ka̱tu̱ʼun xíʼin miíyó: “¿Á xíto inkana ña̱ íyo tu̱ʼvai̱ ña̱ sandíkoi̱-ini na̱ hermano?”. w20.01 11, 12 párr. 14-16

¿Ndáa ki̱ʼva kivi xa̱a̱ iin na̱ nda̱kaxin Ndióxi̱ kuxuna si̱táva̱ʼa ta koʼona tá vino tá xíyo Conmemoración, soo va̱ása xíniñúʼu keʼénaña? Tá xíxina si̱táva̱ʼa ta xíʼina tá vino, soo ña̱ kéʼéna va̱ása íyoña táki̱ʼva íyo ña̱ kúni Jehová (Heb. 6:4-6; 10:26-29). Na̱ nda̱kaxin Ndióxi̱ kúnda̱a̱-inina ña̱ xíniñúʼu nda̱kú koo inina tá kúnina ndakiʼinna ña̱ ka̱na Ndióxi̱ miína ña̱ ku̱ʼu̱nna chí ndiví, xa̱ʼa̱ ta̱ Cristo Jesús (Filip. 3:13-16). Ña̱ espíritu santo Jehová kúú ña̱ chíndeétáʼan xíʼin na̱ yiví ña̱ vitá koo inina, ta su̱ví ña̱ ni̱nuní kunina (Efes. 4:1-3; Col. 3:10, 12). Xa̱ʼa̱ ña̱yóʼo na̱ nda̱kaxin Ndióxi̱ ku̱ʼu̱n chí ndiví va̱ása túvina ña̱ ndáyáʼviníka miína nu̱ú inkana. Kúnda̱a̱-inina chi Jehová va̱ása táxira ku̱a̱ʼáka espíritu santo ndaʼa̱na, nu̱ú inkaka na̱ ndásakáʼnu-ña̱ʼa. Ta ni va̱ása ndákanixi̱nína ña̱ xíni̱níkana xa̱ʼa̱ ña̱ nda̱a̱ ña̱ sanáʼa̱ tu̱ʼun Ndióxi̱, nu̱ú inkaka na̱ yiví. Ta nda̱a̱ ni iin yichi̱ va̱ása ka̱ʼa̱nna ña̱yóʼo xíʼin inkana: “Ndióxi̱ nda̱kaxinra yóʼó ña̱ ku̱ʼu̱n chí ndiví ña̱kán xíniñúʼu kuxún si̱táva̱ʼa ta koʼún tá vino tá xíyo Conmemoración”. Chi na̱yóʼo vitá íyo inina ta kúnda̱a̱-inina ña̱ iinlá Jehová kúú ta̱ kivi kana iinna ña̱ ku̱ʼu̱nna chí ndiví. w20.01 27, 28 párr. 4, 5

Jehová kúni̱ra ña̱ ná kuyatinyó nu̱úra ta ná ka̱ʼa̱nyó xíʼinra. Káʼa̱nra xíʼinyó ña̱ ná ka̱ʼa̱n ni̱ʼiyó xíʼinra, ta íyo tu̱ʼvara ña̱ kuniso̱ʼora miíyó (Rom. 12:12). Jehová va̱ása sandákoora ña̱ kuniso̱ʼora miíyó ni íyoní chiñu nu̱úra, ta ni va̱ása kúnaara. Ta, ¿ndáa ki̱ʼva xíniso̱ʼo miíyó ña̱ káʼa̱nra? Xíniso̱ʼoyóra tá káʼviyó tu̱ʼunra ña̱ Biblia xíʼin tutu ña̱ chíndeétáʼan xíʼinyó ña̱ kunda̱a̱-iniyó xíʼinña. Ta saátu xíniso̱ʼoyóra tá viíní xíniso̱ʼoyó ña̱ káʼa̱nna ti̱xin reunión. Tá saátu tá káʼa̱n ni̱ʼiyó xíʼinra yatinka íyoyó xíʼinra. Jehová kúni̱ra ña̱ ná ka̱ʼa̱nyó xíʼinra xíʼin ndiʼi níma̱yó (Sal. 62:8). Xa̱ʼa̱ ña̱yóʼo ná nda̱ka̱tu̱ʼun xíʼin miíyó: “¿Á táki̱ʼva íyo ña̱ xa̱a̱ sa̱kuaʼa xíʼin xi̱níi̱ saá íyo ña̱ káʼi̱n xíʼin Ndióxi̱? ¿Á nda̱a̱ táki̱ʼva íyo ña̱ káʼi̱n xíʼin iin na̱ migoi̱ saá íyo ña̱ káʼi̱n xíʼinra?”. Kúʼvi̱ní-iniyó xíniyó Jehová ta kúni̱yó yatin kooyó xíʼinra. Ta ña̱ va̱ʼa keʼéyó ña̱yóʼo xíniñúʼu ka̱ʼa̱n ni̱ʼiyó xíʼinra. Xíʼin ndiʼi níma̱yó ná ka̱ʼa̱nyó xíʼinra xa̱ʼa̱ ña̱ sákusi̱í-iniyó xíʼin ña̱ sándi̱ʼi̱-iniyó. Ná kandíxayó ña̱ kiviva ka̱ʼa̱nyó xíʼinra ña̱ chindeétáʼanra xíʼinyó. w20.02 8, 9 párr. 4, 5

Jehová ta̱xira iin chiñu káʼnuní ndaʼa̱ na̱ anciano ña̱ kuniʼina yichi̱ nu̱ú na̱ ndásakáʼnu-ñaʼá. Ku̱a̱ʼání ña̱ kivi sakuaʼa na̱ anciano xíʼin ña̱ viíní ke̱ʼé ta̱ Nehemías xíʼin na̱ ñuu Jehová. Xa̱ʼa̱ ña̱ xi̱kuura ta̱ xi̱niʼi yichi̱ nu̱ú na̱ Judá kivi keʼéra ku̱a̱ʼání ña̱ʼa (Neh. 1:11; 2:7, 8; 5:14). Ná kotoyó ndáaña ndo̱ʼora. Na̱kunda̱a̱-inira ña̱ na̱ judío i̱xayaku̱a̱na templo ta va̱ása níxitaxikana ña̱ xi̱xiniñúʼu na̱ levita nda̱a̱ táki̱ʼva káchi ley. Ta saátu, va̱ása íxato̱ʼóna ña̱ ki̱vi̱ sábado ta savana ti̱ndaʼa̱na xíʼin ná ñaʼá ná inka ñuu. Ña̱kán íyo iin ña̱ xíniñúʼu keʼé ta̱ Nehemías xa̱ʼa̱ ña̱yóʼo (Neh. 13:4-30). Ta̱ Nehemías va̱ása ní ixandúxara xíʼin na̱ judío ña̱ kuniso̱ʼona ña̱ káʼa̱nra. Chi ña̱ ke̱ʼéra kúú ña̱ ni̱ka̱ʼa̱nra xíʼin Jehová ña̱ ná kuniʼira yichi̱ nu̱úra, ta sa̱náʼa̱ra na̱ ñuu kán ley Ndióxi̱ (Neh. 1:4-10; 13:1-3). Saátu, vitá ni̱xi̱yo inira ta inkáchi ka̱chíñura xíʼin na̱ hermano ña̱ ndasava̱ʼana nama̱ ña̱ ñuu Jerusalén (Neh. 4:15). w19.09 16 párr. 9, 10