Julio

Iin ña̱ kivi sandi̱ʼi̱-iniyó kúú ña̱ tá kéʼéna á káʼa̱nna ña̱ va̱ása va̱ʼa xíʼinyó, kachikaví tá iin na̱ migoyó á na̱ veʼeyó kúúna. Íyo ku̱a̱ʼání ña̱ kivi sakuaʼayó xíʼin ña̱ ndo̱ʼo ñá Ana, saáchi ni̱xi̱yo inka ñá síʼi yiíñá ta ñáyóʼo xi̱kusi̱kindaañá ñá Ana (1 Sam. 1:12). Nda̱a̱ táki̱ʼva ke̱ʼé ñá Ana, saátu miíyó kivi ku̱a̱ʼá tiempo ka̱ʼa̱nyó xíʼin Jehová, xa̱ʼa̱ ña̱ sándi̱ʼi̱-iniyó, ña̱ sáyi̱ʼví miíyó xíʼin xa̱ʼa̱ ña̱ va̱ása va̱ʼa ña̱ ke̱ʼéyó. Tá káʼa̱nyó xíʼin Jehová va̱ása xíniñúʼuví kuniñúʼuyó tu̱ʼun ña̱ yo̱ʼvi̱ní. Chi sava yichi̱, nda̱a̱ kivi kuakuyó tá káʼa̱nyó xíʼinra xa̱ʼa̱ ña̱ sándi̱ʼi̱-iniyó. Soo Jehová va̱ása kunaara ña̱ kuniso̱ʼora ña̱ káʼa̱nyó. Ta su̱ví nda̱saa xa̱ʼa̱ ña̱ sáxo̱ʼvi̱ miíyó ka̱ʼa̱nyó xa̱ʼa̱ xíʼinra, chi saátu xíniñúʼu ndakaʼányó xa̱ʼa̱ consejo ña̱ káʼa̱n Filipenses 4:6, 7. Nu̱ú ña̱ texto yóʼo káxiní ni̱ka̱ʼa̱n ta̱ apóstol Pablo, ña̱ xíniñúʼu taxiyó tíxa̱ʼvi nda̱ʼa Ndióxi̱ tá káʼa̱nyó xíʼinra. Ta ku̱a̱ʼání xa̱ʼa̱ kivi taxiyó tíxa̱ʼvi ndaʼa̱ra, xa̱ʼa̱ ña̱ táxira ña̱ tákuyó, xa̱ʼa̱ ndiʼi ña̱ʼa ña̱ i̱xava̱ʼara, xa̱ʼa̱ ña̱ nda̱kúní íyo ña̱ kúʼvi̱-inira xínira miíyó, ta saátu xa̱ʼa̱ ña̱ ndátuyó ndakiʼinyó chí nu̱únínu. w20.02 20 párr. 3; 21 párr. 6

Ña̱ káʼa̱nyó, iin regalo ña̱ ta̱xi Jehová ndaʼa̱yó kúúña (Éx. 4:10, 11; Apoc. 4:11). Nu̱ú tu̱ʼunra, káʼa̱nra xíʼinyó ndáa ki̱ʼva kuniñúʼuyóña. Ndiʼi tiempo xíniñúʼu koo tu̱ʼvayó ña̱ ka̱ʼa̱nyó xa̱ʼa̱ Jehová xíʼin xa̱ʼa̱ Reinora (Mat. 24:14; Rom. 10:14). Tá kéʼéyó ña̱yóʼo, ndíku̱nyó yichi̱ ta̱ Jesús. Iin xa̱ʼa̱ ña̱ ki̱xira nu̱ú ñuʼú yóʼo, kúú ña̱ na̱túʼunra xíʼin na̱ yiví xa̱ʼa̱ yivára (Juan 18:37). Soo saátu xíniñúʼu ndakaʼányó ña̱ ki̱ʼva ña̱ káʼa̱nyó ndáyáʼviníña. Ña̱kán tá káʼa̱nyó xíʼin inka na̱ yiví xa̱ʼa̱ Jehová, xíniñúʼu vií ta to̱ʼó ka̱ʼa̱nyó xíʼinna, ta saátu ná na̱ʼa̱yó ña̱ ndíʼi̱-iniyó xa̱ʼa̱ ña̱ ndóʼona xíʼin xa̱ʼa̱ ña̱ kándíxana (1 Ped. 3:15). Tasaá va̱ása ka̱ʼa̱n kuitíyó xíʼinna, chi kivi sanáʼa̱yóna ta ña̱yóʼo nda̱a̱ níma̱na kivi xa̱a̱ña. Tá xíto na̱ anciano ña̱ iin na̱ hermano xíniñúʼuna consejo, xíniñúʼu ka̱ʼa̱nna xíʼinna. Soo xíniñúʼu kotona ama kúú ña̱ kivi ka̱ʼa̱nna xíʼinna, tá kúú tá íyona iin lugar nu̱ú kǒo na̱ yiví, ña̱ va̱ʼa ná va̱ása kukaʼan nu̱ú na̱ ndákiʼin consejo. w20.03 18, 19 párr. 2-4

¿Ndáaña kivi ndukúyó nu̱ú Jehová tá káʼa̱nyó xíʼinra? Kivi ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ ndakú ná koo ña̱ kándíxayóra (Luc. 17:5; Juan 14:1). Ta xíniñúʼuyó ña̱yóʼo, saáchi ta̱ Ndi̱va̱ʼa kotondosóra ndiʼi na̱ ndíku̱n ta̱ Jesús (Luc. 22:31). Ña̱ ndinuʼu-iniyó kándíxayó Ndióxi̱ chindeétáʼanña xíʼinyó. Saáchi, tá xa̱a̱ ke̱ʼéyó ndiʼi ña̱ xíni̱yó ta va̱ása kúndeéka-iniyó, saá kúú ña̱ ndakooyó ña̱yóʼo ndaʼa̱ Jehová. Ña̱ kándíxayó ña̱ miíra kuchiñu xíʼinña, chindeétáʼanña xíʼinyó ña̱ táxin koo níma̱yó ta saátu ña̱ ndákanixi̱níyó (1 Ped. 5:6, 7). Tá ná ka̱ʼa̱nyó xíʼin Ndióxi̱ ná chindeétáʼanra xíʼinyó, saá kúú ña̱ táxi̱n koo iniyó, ni nda̱a̱ ndáaka ña̱ ná ndoʼoyó. Ná kotoyó ndáaña ndo̱ʼo ta̱ Robert, iin ta̱ anciano ta̱ nda̱kú íyo ini xíʼin Ndióxi̱, ta̱ xa̱a̱ kúúmií yáʼaka 80 ku̱i̱ya̱. Káʼa̱nra ndáaña kéʼéra ña̱ táxin íyo inira: “Ña̱ chíndeétáʼanní xíʼi̱n kúú consejo ña̱ va̱xi nu̱ú Filipenses 4:6, 7 ña̱ va̱ʼa kuchiñui̱ xíʼin ndiʼi tu̱ndóʼo ña̱ ndóʼi̱. Sava xi̱kuma̱ní xu̱ʼún nu̱úi̱, ta ni̱xi̱yo iin tiempo ña̱ va̱ása níxikuukai̱ anciano”. Ta káʼa̱nkara: “Káʼi̱n xíʼin Ndióxi̱ tá kíxáʼa ndíʼi̱-inii̱. Ki̱vi̱ káʼi̱n xíʼinra, saá kúú ña̱ táxinníka íyo inii̱”. w19.04 9, 10 párr. 5-7

Tá kéʼéna ña̱ kini xíʼin na̱ va̱lí iin ku̱a̱chi ndeéní kúúña nu̱ú Jehová. Tá iin na̱ yiví ke̱ʼéna ña̱ kini xíʼin inkana, sáxo̱ʼvi̱tuna Jehová. Ná ka̱ʼa̱nyó xa̱ʼa̱ iin ña̱ xi̱ka̱ʼa̱n ley ña̱ ta̱xi Jehová ndaʼa̱ na̱ ñuu Israel. Ña̱yóʼo xi̱ka̱ʼa̱nña tá iinna i̱xakuíʼnána ña̱ʼa inkana, náʼa̱na ña̱ va̱ása nda̱kú íyo inina xíʼin Jehová (Lev. 6:2-4). Ña̱ ndixa kúúña, tá iin na̱ congregación kéʼéna ña̱ kini xíʼin na̱ va̱lí ta sáxo̱ʼvi̱nana, náʼa̱na ña̱ va̱ása nda̱kú íyo inina xíʼin Jehová ta íxayaku̱a̱na ki̱vi̱ra. Ña̱kán xítoyó ña̱yóʼo nda̱a̱ táki̱ʼva íyo iin ña̱ yaku̱a̱ní, chi Jehová kúndasí nu̱úra xíniraña. Nu̱ú tutu La Atalaya xíʼin ña̱ ¡Despertad! káʼa̱nña xa̱ʼa̱ ndáaña chindeétáʼan xíʼin na̱ ke̱ʼéna ña̱ kini xíʼin ña̱ va̱ʼa ndi̱ko-inina, ta nda̱saa kivi chindeétáʼanyó xíʼinna ta chika̱a̱yó ndee̱ xíʼinna, ta saátu nda̱saa kivi kundaa na̱ íyo se̱ʼe na̱ va̱lí se̱ʼena. Saátu káxiní káʼa̱n na̱ ñuu Ndióxi̱ xíʼin na̱ anciano ndáaña keʼéna tá iinna ke̱ʼéna ña̱ kini xíʼin na̱ va̱lí. Na̱ ñuu Ndióxi̱ ndíʼi̱-inina xa̱ʼa̱yó, ña̱kán ndiʼi tiempo xítona ndáaña kéʼé na̱ congregación tá íyo ku̱a̱chi yóʼo. w19.05 9 párr. 8, 9

Tu̱ʼun Ndióxi̱ íyoña táki̱ʼva íyo iin espada ña̱ sándiʼi-xa̱ʼa̱ ña̱ vatá ña̱ káʼa̱n ta̱ Ndi̱va̱ʼa (Efes. 6:17). Chi káʼa̱n káxiña xíʼinyó ña̱ va̱ása tákuka na̱ ni̱xi̱ʼi̱ ta va̱ása kivi ka̱ʼa̱nyó xíʼinna (Salmo 146:4). Saátu káʼa̱nña xíʼinyó ña̱ iinlá Jehová kivi ka̱ʼa̱n xa̱ʼa̱ ña̱ koo chí nu̱únínu (Is. 45:21; 46:10). Tá ná kaʼviyóña ndiʼi ki̱vi̱ ta ndakanixi̱níyó xa̱ʼa̱ ña̱ káʼa̱nña, saá kúú ña̱ kundasí nu̱úyó kuniyó ndiʼi ña̱ vatá ña̱ xíniñúʼu na̱ ta̱chí ndi̱va̱ʼa. Ta saá va̱ása keʼéyó ni iin ña̱ʼa ña̱ kúú kuenta ta̱ Ndi̱va̱ʼa. Miíyó na̱ ndásakáʼnu Jehová va̱ása xáʼa̱nyó nu̱ú na̱ tu̱ʼva ni nu̱ú na̱ tási, ta ni va̱ása káʼa̱nyó xíʼin níma̱ na̱ ni̱xi̱ʼi̱. Va̱ása ndíku̱nyó costumbre ña̱ kéʼé inkana tá xíʼi̱ iin na̱ yiví. Ta ni va̱ása káʼa̱nyó xíʼin na̱ ndáku ña̱ ná ka̱ʼa̱nna xíʼinyó xa̱ʼa̱ ña̱ koo chí nu̱únínu. Va̱ása kúni̱yó keʼéyó ni iin ña̱yóʼo. Chi xíni̱yó iin ña̱ i̱yo kúúña, chi kivi sakuyatinña miíyó nu̱ú ta̱ Ndi̱va̱ʼa xíʼin na̱ ta̱chí ndi̱va̱ʼa. w19.04 22 párr. 8, 9

Na̱ ndíku̱n ña̱ ndíchi ña̱ íyo ñuyǐví yóʼo xáku̱ndaana ña̱ káʼa̱n Biblia xa̱ʼa̱ ña̱ kísi̱ xíʼin táʼan na̱ yiví, ta káchina ña̱ va̱ása va̱ʼaña chi va̱ása kítáʼanña xíʼin ña̱ kúni̱ miína. Sana ndáka̱tu̱ʼun xíʼin miína nda̱chun i̱xava̱ʼa Ndióxi̱ na̱ yiví ña̱ kuni̱na ku̱su̱nna xíʼin iin ta̱a á iin ñaʼá, ta tándíʼi káʼa̱ntura xíʼinna ña̱ ná kiʼinna kuenta xíʼin ña̱yóʼo. Saá káʼa̱nna chi ndákanixi̱nína ña̱ xíniñúʼu keʼéna ndiʼi ña̱ kúni̱ miína. Soo síínva káʼa̱n Biblia. Jehová náʼa̱ra ña̱ íxato̱ʼóra miíyó chi ta̱xira ña̱ kiviva ka̱ʼnu̱-iniyó ta kiʼinyó kuenta xíʼin ña̱ kúni̱yó keʼéyó (Col. 3:5). Saátu Jehová chi̱ndúʼú xa̱ʼa̱ ña̱ ti̱ndaʼa̱ ta̱a xíʼin ñaʼá ta kivi ku̱su̱nna xíʼin táʼanna soo xíʼin ña̱ to̱ʼó keʼéna ña̱yóʼo (1 Cor. 7:8, 9). Síínva íyo ña̱ káʼa̱n Biblia xa̱ʼa̱ ña̱ ku̱su̱n xíʼin táʼan na̱ yiví, chi va̱ása inkáchi íyoña xíʼin ña̱ ndíchi ña̱ íyo ñuyǐví yóʼo. Káʼa̱nva Biblia ña̱ va̱ʼava ku̱su̱n xíʼin táʼan na̱ xa̱a̱ ti̱ndaʼa̱ (Prov. 5:18, 19). Soo táxituña consejo yóʼo: “Iin iin ndóʼó xíniñúʼu vií keʼéndó xíʼin ku̱ñundó ña̱ va̱ʼa yéʼé ná kooña ta ixato̱ʼóndóña, ta va̱ása kuni̱níndó ku̱su̱nndó xíʼin inkana” (1 Tes. 4:4, 5). w19.05 22, 23 párr. 7-9

Ndióxi̱ va̱ása taxira ña̱ ndiʼi-xa̱ʼa̱ na̱ ndásakáʼnu-ñaʼá ixaa na̱ chíñu, saáchi na̱yóʼo xíʼin ña̱ si̱í-ini káʼa̱nna xa̱ʼa̱ ki̱vi̱ra ta xíniso̱ʼona ña̱ káʼa̱nra ña̱ ná keena ti̱xin Babilonia ña̱ káʼnu (Hech. 15:16, 17; Rev. 18:4). Ta saátu chíka̱a̱na ndee̱ ña̱ chindeétáʼanna xíʼin inka na̱ yiví ña̱ keena ti̱xin Babilonia ña̱ káʼnu. Ña̱kán va̱ása ndakiʼinna táʼan tu̱ndóʼo ña̱ kixi nu̱ú ña̱ Babilonia. Soo ni saá ya̱ʼavana nu̱ú sava tu̱ndóʼo (Ezeq. 38:2, 8). Tá xa̱a̱ ndi̱ʼi-xa̱ʼa̱ ndiʼi ña̱ veʼe-ñu̱ʼu vatá, na̱ ñuu Ndióxi̱ koona nda̱a̱ táki̱ʼva íyo iin yitu̱n tú ni̱ndo̱o tá ko̱on ndeéní sa̱vi̱. Soo ta̱ Ndi̱va̱ʼa sa̱a̱níra xa̱ʼa̱ ña̱yóʼo. Ña̱kán kuniñúʼura na̱ ta̱chí ndi̱va̱ʼa ña̱ ka̱ʼa̱nna ña̱ vatá, ta ndakayana ndiʼi na̱ chíñu xíʼin na̱ kítáʼan xíʼinna ña̱ ixandi̱va̱ʼana xíʼin na̱ ndásakáʼnu Jehová (Rev. 16:13, 14). Ta ndiʼi na̱ ndakaya yóʼo kunanína “Gog ña̱ ke̱e nu̱ú ñuʼú ña̱ Magog”. Tá ná kixáʼa na̱ yiví yóʼo ixandi̱va̱ʼana xíʼin na̱ ñuu Ndióxi̱, saá kúú ña̱ xa̱a̱na lugar ña̱ naní Armagedón (Rev. 16:16). w19.09 11 párr. 12, 13

Ta̱ Ndi̱va̱ʼa xíniñúʼura ña̱ ndíka̱a̱ níma̱yó. Tá tiempo ña̱ ni̱xi̱yo na̱ ñuu Israel, ta̱ Ndi̱va̱ʼa xi̱niñúʼura ña̱ veʼe-ñu̱ʼu vatá ña̱ sa̱ndáʼvirana ña̱ ku̱su̱nna xíʼin ku̱a̱ʼá ta̱a á ñaʼá. Ta saátu kéʼéra tiempo vitin. Nu̱ú na̱ veʼe-ñu̱ʼu vatá iin ña̱ va̱ʼa kúú ña̱ ku̱su̱nna xíʼin ku̱a̱ʼá ta̱a á ñaʼá. Xa̱ʼa̱ ña̱yóʼo ku̱a̱ʼání na̱ káʼa̱n ña̱ ndásakáʼnuna Ndióxi̱ sa̱ndákoona keʼéna ña̱ káʼa̱nra. Ta, ¿ndáaña nda̱kiʼinna xa̱ʼa̱ ña̱yóʼo? Ta̱ apóstol Pablo ni̱ka̱ʼa̱nra xa̱ʼa̱ña nu̱ú carta ña̱ ka̱ʼyíra ku̱a̱ʼa̱n ndaʼa̱ na̱ ñuu Roma (Rom.1:28-31). Ku̱a̱ʼání kúú ña̱ kini yóʼo, tá kúú ña̱ kísi̱ iin ta̱a xíʼin inka ta̱a á ñaʼá xíʼin inka ñaʼá (Rom. 1:24-27, 32; Rev. 2:20). Xa̱ʼa̱ ña̱yóʼo ndáyáʼviní ña̱ ná kuniso̱ʼoyó ta keʼéyó ndiʼi ña̱ káʼa̱n Biblia. Ña̱ ndíchi ña̱ ndákanixi̱ní na̱ yiví va̱ása kítáʼanña xíʼin ña̱ kúni̱ Ndióxi̱ ná keʼéyó. Va̱ása chíndeétáʼanña xíʼinyó ña̱ kuumiíyó ña̱ va̱ʼa ña̱ kúúmií espíritu Ndióxi̱, chi ña̱ kúni̱ ku̱ñuyó chíndaʼáña miíyó keʼéyó (Gál. 5:19-23). Ña̱ ndíchi ñuyǐví yóʼo, chíndaʼáña na̱ yiví ña̱ ni̱nuní kunina ta kuʼvi̱ka-inina kunina miína (2 Tim. 3:2-4). Ña̱yóʼo va̱ása kítáʼanña xíʼin ña̱ vitá-ini ña̱ kúúmií Ndióxi̱ ña̱ kúni̱ra ná kuumiíyó (2 Sam. 22:28). w19.06 5, 6 párr. 12-14

Ta̱ profeta Elías, ka̱chíñura nu̱ú Jehová tá tiempo ña̱ yo̱ʼvi̱ní ni̱xi̱yo, ta ni̱ya̱ʼara nu̱ú sava tu̱ndóʼo. Jehová ni̱ka̱ʼa̱nra xíʼin ta̱ Elías ña̱ ná taxira chindeétáʼan ta̱ Eliseo xíʼinra ña̱ keʼéra chiñura. Saátu ta̱xira ta̱yóʼo ña̱ koora migora ta chindeétáʼanra xíʼinra tá ndákavaní-inira. Saátu miíyó tá kúúmiíyó iin migoyó na̱ va̱ʼa kítáʼanyó xíʼin, na̱yóʼo kivi chindeétáʼanna xíʼinyó tá ndíʼi̱ní-iniyó (2 Rey. 2:2). Tá túviyó ña̱ kǒo iin na̱ migoyó na̱ natúʼunyó xíʼin, ná ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ ndani̱ʼíyó iin na̱ hermano na̱ kivi taxi ndee̱ ndaʼa̱yó. Jehová chi̱ndeétáʼan xíʼin ta̱ Elías ña̱ ku̱chiñura xíʼin ña̱ ndo̱ʼora ta va̱ʼaní ka̱chíñura nu̱úra ku̱a̱ʼání ku̱i̱ya̱. Ña̱ ndo̱ʼo ta̱ profeta yóʼo chíndeétáʼanña xíʼinyó ña̱ kándíxayó ña̱ chindeétáʼan Jehová xíʼinyó. Sana ya̱ʼayó nu̱ú ña̱ ndi̱ʼi̱ní-iniyó xíʼin ta ndakavaní-iniyó. Soo tá kándíxayó Jehová, miíra taxi ndee̱ ndaʼa̱yó ña̱ ndakundeéyó kachíñuyó nu̱úra (Is. 40:28, 29). w19.06 15 párr. 4; 16 párr. 9, 10

Xíniñúʼu ku̱ʼu̱nyó natúʼunyó xa̱ʼa̱ Ndióxi̱ ña̱ va̱ʼa ndakúka koo iniyó. ¿Nda̱chun? Saáchi saá kandíxakayó Jehová ta va̱ása yi̱ʼvíyó nu̱ú na̱ yiví. Nda̱a̱ táki̱ʼva kéʼé na̱ kúni̱ ndakú koo kéʼéna ejercicio, saátu miíyó ndakúka koo iniyó tá ná kita ni̱ʼiyó natúʼunyó xa̱ʼa̱ Ndióxi̱ veʼe tá veʼe, nu̱ú íyo ku̱a̱ʼá na̱ yiví, nu̱ú íxi̱kóna ña̱ʼa, á nda̱a̱ ndáaka nu̱ú xíkayó. Tá saá kéʼéyó vitin, koo tu̱ʼvayó ta ndakundeékayó keʼéyó ña̱yóʼo ni tá ná va̱ása taxikana ña̱ kakayó natúʼunyó xa̱ʼa̱ Ndióxi̱ (1 Tes. 2:1, 2). Ku̱a̱ʼání ña̱ va̱ʼa sákuaʼayó xíʼin ña̱ ndo̱ʼo ná hermana ná nda̱kúní ni̱xi̱yo ini xíʼin Jehová. Iin ñáyóʼo kúú ñá Nancy Yuen. Ni yatin iin metro sava kúú ña̱ súkunñá ndakúní ni̱xi̱yo iniñá. Xa̱ʼa̱ ña̱ va̱ása níxiinñá sandákooñá ña̱ nátúʼunñá xa̱ʼa̱ Ndióxi̱ chi̱ka̱a̱nañá veʼeka̱a ki̱ʼva 20 ku̱i̱ya̱ chí ñuu China. Na̱ chíñu ni̱ka̱ʼa̱nna ña̱ kúúñá iin “ñaʼá ñá ndeéní-ini” nu̱ú ndiʼi na̱ país kán. w19.07 5 párr. 13, 14

Sava na̱ yiví kúni̱na xa̱a̱na kunda̱a̱-inina xa̱ʼa̱ ña̱ sánáʼa̱ Biblia. Soo inkana va̱ása kútóonaña, ta xíniñúʼu chindeétáʼanyó xíʼinna ña̱ kuni̱na kaʼvina. Ña̱ kuchiñuyó natúʼunyó xíʼin na̱ yiví xíniñúʼu kunda̱a̱-iniyó ndáaña ka̱ʼa̱nyó xíʼinna. Ná ndaka̱xin viíyó ña̱ natúʼunyó xíʼinna, ta ná ndakanixi̱níyó nda̱saa ka̱ʼa̱nyóña xíʼinna. Tá kúú kivi ka̱ʼa̱nyó xíʼinna: “Kúni̱i̱ kunda̱a̱-inii̱ ndáaña ndákanixi̱níún xa̱ʼa̱ ña̱yóʼo. Tiempo vitin iníísaá ñuyǐví íyo tu̱ndóʼo. ¿Á íyo iin na̱ chíñu na̱ kuchiñu sandiʼi-xa̱ʼa̱ tu̱ndóʼo yóʼo?”. Tándi̱ʼi kivi kaʼviyó Daniel 2:44 ta natúʼunyó xíʼinna xa̱ʼa̱ña. Á kivitu ka̱ʼa̱nyó xíʼinna: “Kúni̱i̱ nda̱ka̱tu̱ʼíi̱n ña̱yóʼo miíún. ¿Ndáaña kivi chindeétáʼan xíʼin na̱ íyo se̱ʼe ña̱ va̱ʼa sakuaʼnuna se̱ʼena?”. Tasaá kivi natúʼunyó xíʼinna xa̱ʼa̱ Deuteronomio 6:6, 7. Kúsi̱íní-iniyó tá chíndeétáʼanyó xíʼin iinna ña̱ kundiku̱nna ta̱ Cristo. w19.07 15 párr. 4, 6, 7

Iin ta̱ hermano ta̱ íyo chí Lejano Oriente, ta̱ xa̱a̱ ku̱a̱ʼá ku̱i̱ya̱ nátúʼun xíʼin na̱ yiví na̱ va̱ása ndíku̱n ni iin veʼe-ñu̱ʼu ta saátu na̱ va̱ása kándíxa Ndióxi̱, káchira: “Ña̱ ñuu yóʼo, tá káʼa̱n iinna ña̱ va̱ása kándíxana Ndióxi̱, ña̱ kúni̱ kachina kúú ña̱ va̱ása kándíxana ña̱ xíniñúʼu ndasakáʼnuna ndióxi̱ ña̱ íyo ñuuna. Sava yichi̱ káʼi̱n xíʼinna ña̱ saátu ndákanixi̱ní yi̱ʼi̱, saáchi ndióxi̱ ña̱ i̱xava̱ʼa na̱ yiví kúúña ta su̱ví ña̱ ndixa kúúna. Saá káʼvii̱ nu̱úna Jeremías 16:20, tá ndíʼi, ndáka̱tu̱ʼíi̱nna nda̱saa kivi kunda̱a̱-iniyó yukú Ndióxi̱ ta̱ nda̱a̱ nu̱ú na̱ ndióxi̱ vatá na̱ íxava̱ʼa na̱ yiví. Xíniso̱ʼo va̱ʼi̱ ña̱ ndákuiinna ta káʼvii̱ nu̱úna Isaías 41:23: ‘Ka̱ʼa̱nndó xa̱ʼa̱ ña̱ koo chí nu̱únínu, ña̱ va̱ʼa ná kunda̱a̱-inindi̱ ña̱ kúúndó ndióxi̱ʼ. Tasaá káʼi̱n xíʼinna xa̱ʼa̱ sava ña̱ káʼa̱n Jehová koo chí nu̱únínu”. Inka ta̱ hermano káchira: “Náʼi̱ nu̱úna sava consejo ña̱ va̱xi nu̱ú Biblia, profecía ña̱ xa̱a̱ ni̱xi̱nu xíʼin sava ña̱ kítáʼan xíʼin ña̱ ciencia. Tándíʼi chíndeétáʼi̱n xíʼinna ña̱ kunda̱a̱-inina nda̱saa náʼa̱ ña̱yóʼo nu̱úyó ña̱ ndixa íyo iin ta̱ ndíchi ta̱ i̱xava̱ʼa ndiʼi ña̱ʼa. Ki̱vi̱ káʼa̱nna ña̱ sana íyova Ndióxi̱, saá kíxáʼíi̱ náʼi̱ nu̱úna ña̱ káʼa̱n Biblia xa̱ʼa̱ Jehová”. w19.07 23, 24 párr. 14, 15

Ña̱ʼa ña̱ ndáyáʼvika kúú ña̱ nduyi̱i̱ ki̱vi̱ Jehová, ña̱ xi̱nu ndiʼi ña̱ ni̱ka̱ʼa̱nra chí nu̱únínu ña̱ táxi̱n koo iniyó xíʼin ña̱ inkáchi kutáʼan ndiʼi na̱ congregación (Mat. 6:9, 10; Juan 13:35). Ki̱vi̱ ndákanikaxi̱níyó xa̱ʼa̱ ña̱yóʼo, náʼa̱yó ña̱ kúʼvi̱-iniyó xíniyó Jehová. Saátu ni̱ka̱ʼa̱n ta̱ apóstol Pablo ña̱ ná kǒo kuumiíyó ni iin ña̱ va̱ása va̱ʼa. Jehová kotora miíyó nda̱a̱ táki̱ʼva íyo na̱ kǒo ña̱ va̱ása va̱ʼa kúúmií tá chíka̱a̱yó ndee̱ ña̱ kuʼvi̱-iniyó kuni táʼanyó ta ndi̱ʼi̱ka-iniyó xa̱ʼa̱ ña̱ʼa ña̱ ndáyáʼvika. Iin ki̱ʼva ña̱ kivi na̱ʼa̱yó ña̱ kúʼvi̱-iniyó xíni táʼanyó kúú ña̱ chika̱a̱yó ndee̱ ña̱ va̱ása sandákavayó-ini inkana. Tá kúú ña̱ xítonde̱ʼéyó ña̱ sísikíyó, ti̱ko̱to̱yó á nda̱a̱ chiñu ña̱ káchíñuyó kivi sandákavaña-ini inkana. Sana va̱ása kéʼéyó ña̱ʼa ña̱ va̱ása va̱ʼa, soo ña̱ ndáka̱xinyó keʼéyó kivi sandákavaña-ini inkana á va̱ása va̱ʼa ndakanixi̱nína xa̱ʼa̱ña. (Mat. 18:6). w19.08 10 párr. 9-11

Nda̱a̱ tá ku̱i̱ya̱ 1935, miíyó na̱ ndásakáʼnu Jehová kúnda̱a̱ káxi iniyó ndáana kúú na̱ yiví na̱ xi̱ni ta̱ Juan nu̱ú visión, na̱yóʼo kúú na̱ cristiano na̱ nda̱kú íyo ini ndásakáʼnu Ndióxi̱, ta ndátuna kutakuna ndiʼi tiempo nu̱ú ñuʼú yóʼo (Rev. 7:9, 10). Ña̱ va̱ʼa ka̱kuna ti̱xin ña̱ gran tribulación xíʼin nu̱ú ndiʼi ña̱ʼa ña̱ kuu, na̱ cristiano yóʼo xíniñúʼu kunda̱a̱-inina xa̱ʼa̱ ña̱ kúni̱ Jehová, ta na̱ʼa̱na ña̱ ndinuʼu-inina kándíxanara tá kúma̱níka kixáʼa ña̱ mil ku̱i̱ya̱ ña̱ kaʼndachíñu ta̱ Jesús (Luc. 21:34-36). Ña̱ ndátu na̱ gran muchedumbre ndakiʼinna sákusi̱íníña-inina. Kúnda̱a̱-inina ña̱ mií Jehová kúú ta̱ ndaka̱xin, á chí ndiví á nu̱ú ñuʼú yóʼo kúú nu̱ú kundoo na̱ ndásakáʼnu-ñaʼá. Na̱ ku̱ʼu̱n chí ndiví xíʼin na̱ gran muchedumbre kúnda̱a̱-inina ña̱ kivi ndakiʼinna ña̱ va̱ʼa xa̱ʼa̱ ña̱ ni̱kuʼvi̱-ini Ndióxi̱ xi̱nirana, ta ta̱xira ta̱ Jesús ni̱xi̱ʼi̱ra xa̱ʼa̱na (Rom. 3:24). w19.09 28 párr. 10, 12; 29 párr. 13

¿Á nda̱kiʼinyó inka chiñu ña̱ xa̱á? Viíní ná keʼéyóña. Ná va̱ása ndakanixi̱níyó ña̱ na̱sama chiñuyó xa̱ʼa̱ ña̱ va̱ása va̱ʼa níkeʼéyó ta va̱ása ndáyáʼvikayó vitin. Ná kotoyó nda̱saa chíndeétáʼan Jehová xíʼinyó ta ná chika̱a̱yó ndee̱ ña̱ natúʼunyó xa̱ʼa̱ra. Ná kundiku̱nyó yichi̱ na̱ cristiano na̱ ni̱xi̱yo tá siglo nu̱ú, chi nda̱a̱ ndáaka nu̱ú ni̱xi̱kana chi̱ka̱a̱na ndee̱ ña̱ na̱túʼunna xa̱ʼa̱ tu̱ʼun Ndióxi̱ (Hech. 8:1, 4). Tá chíka̱a̱yó ndee̱ ña̱ nátúʼunyó ndakiʼinyó ku̱a̱ʼání ña̱ va̱ʼa. Tá kúú, sava na̱ precursor ta̱vánana iin país, soo na̱yóʼo nda̱kiʼinna ku̱a̱ʼa̱nna iin ñuu nu̱ú xíniñúʼuníka na̱ natúʼun xa̱ʼa̱ Ndióxi̱ tu̱ʼun miína. Tá ni̱ya̱ʼa loʼo yo̱o̱, ni̱xa̱a̱na ku̱una iin grupo ta kamaní ku̱a̱ʼa̱n xáʼnuna. Ná kusi̱í-iniyó xa̱ʼa̱ ña̱ kítáʼanyó xíʼin Jehová. Xa̱ʼa̱ ña̱yóʼo ná chika̱a̱yó ndee̱ ña̱ keʼéyó ña̱ kúni̱ Ndióxi̱ ta ná kandíxayó ña̱ miíra taxi yichi̱ nu̱úyó xíʼin ña̱ ndíchi. Ná ndakaʼányó chi ña̱ chi̱ndaʼá miíyó ña̱ ni̱xa̱a̱yó ku̱tóoyó chiñu ña̱ xi̱kuumiíyó kúú ña̱ chi̱ka̱a̱-iniyó chindeétáʼanyó xíʼin na̱ yiví. Ta mií Jehová chindeétáʼan tuku xíʼinyó ña̱ xa̱a̱yó kutóoyó chiñu ña̱ xa̱á ña̱ nda̱kiʼinyó tá ná chika̱a̱yóña níma̱yó (Ecl. 7:10). w19.08 24, 25 párr. 15, 16

Xíniñúʼu kundiku̱nyó ndiʼi ña̱ káʼa̱n Jehová, chi miíra kúú ta̱ i̱xava̱ʼa miíyó, xa̱ʼa̱ ña̱kán kúúmiíra yichi̱ ña̱ ka̱ʼa̱nra xíʼinyó ndáaña keʼéyó (Rev. 4:11). Soo íyo inka xa̱ʼa̱ kúú ña̱ xíniñúʼu kuniso̱ʼoyóra: ta̱kán va̱ʼaní xáʼndachíñura. Xa̱a̱ ku̱a̱ʼání ku̱i̱ya̱, na̱ yiví xáʼndachíñuna nu̱ú inkana. Soo Jehová kúú ta̱ ndíchika ta va̱ʼaníka xáʼndachíñura, ta kúʼvi̱ní-inira xínira miíyó, ta kundáʼvi-inira xínira ndiʼiyó (Éx. 34:6; Rom. 16:27; 1 Juan 4:8). Ndíku̱nyó Jehová ki̱vi̱ chíka̱a̱yó ndee̱ ña̱ kuniso̱ʼoyó ndiʼi ña̱ káʼa̱nra xíʼinyó, ta va̱ása kéʼéyó ña̱ kúni̱ miíyó (Prov. 3:5). Ki̱vi̱ kúnda̱a̱-iniyó xa̱ʼa̱ ndiʼi ña̱ va̱ʼa ña̱ kúúmií Jehová, va̱ása íxayo̱ʼvi̱kaña xíʼinyó ña̱ kundiku̱nyóra, chi ña̱ va̱ʼa ña̱ kúúmiíra náʼa̱raña xíʼin ña̱ kéʼéra (Sal. 145:9). Ki̱vi̱ xíni̱kayó Jehová, kúʼvi̱ka-iniyó xíniyóra. Ta tá kúʼvi̱-iniyó xíniyóra, va̱ása xíniñúʼuyó iin lista ña̱ káʼa̱n xa̱ʼa̱ ndáaña xíniñúʼu keʼéyó ta ndáaña va̱ása xíniñúʼu keʼéyó. w19.09 14 párr. 1, 3

Ta̱ Ndi̱va̱ʼa sáxo̱ʼvi̱ra na̱ yiví xíʼin ña̱ vatá ña̱ káʼa̱nra. Tá kúú, kúni̱ra ná kandíxayó ña̱ va̱ása kúkáʼnu-ini Ndióxi̱ xáa̱ ku̱a̱chiyó, ta saátu káʼa̱nra ña̱ va̱ása xíniñúʼu kuʼvi̱-inina kunina miíyó. Ña̱yóʼo kúúña iin ña̱ vatá káʼnuní ta sándakavaña-ini na̱ yiví (Juan 8:44). Tá kúyatinyó nu̱ú ta̱ Jesús, saa kúú ña̱ kúkáʼnu-inira xa̱ʼa̱ ku̱a̱chiyó (Mat. 11:28). Ta Jehová kúʼvi̱ní-inira xínira miíyó (Rom. 8:32, 38, 39). Chiñu ña̱ káʼa̱n ta̱ Jesús xíʼinyó keʼéyó xa̱a̱ síín íyoña nu̱ú inkaka chiñu. Tá kúú, tándíʼi hora ña̱ káchíñuyó ku̱a̱ʼáníyó su̱ví kuití kúnaayó chi saátu va̱ása kúsi̱í-iniyó. Soo chiñu ña̱ kéʼéyó nu̱ú Jehová xíʼin ta̱ Jesús sákusi̱íníña-iniyó. Sana kúnaaníyó ta ni saá chíka̱a̱yó ndee̱ ña̱ ku̱ʼu̱nyó reunión. Soo, ¿á su̱ví ña̱ nda̱a̱ kúú ña̱ kúsi̱íní-iniyó tá ndándikóyó veʼeyó ta nda̱a̱ va̱ʼa kúniyó? Ta saátu ndóʼoyó ki̱vi̱ chíka̱a̱yó ndee̱ ña̱ ku̱ʼu̱nyó natúʼunyó xíʼin na̱ yiví á ña̱ kaʼvi iinlá miíyó Biblia, tasaá va̱ʼaní kúniyó ta kúsi̱í-iniyó. w19.09 20 párr. 1; 23, 24 párr. 15, 16

Xa̱ʼa̱ ña̱ si̱lóʼo tiempo kíndo̱o ña̱ kixaa̱ “ki̱vi̱ Jehová”, kúni̱ra ña̱ ná ndakundeéyó natúʼunyó xa̱ʼa̱ra. Ta xíniñúʼu chika̱a̱yó ndee̱ ña̱ keʼéyó chiñu yóʼo (1 Cor. 15:58). Tá ni̱ka̱ʼa̱n ta̱ Jesús xa̱ʼa̱ ndiʼi ña̱ kuu ki̱vi̱ nu̱ú ndíʼi, ni̱ka̱ʼa̱nra xa̱ʼa̱ ndáaña keʼé miíyó na̱ ndásakáʼnu Ndióxi̱. Ni̱ka̱ʼa̱nra: “Siʼna xíniñúʼu sakuaʼa ndiʼi na̱ yiví xa̱ʼa̱ Ndióxi̱” (Mar. 13:4, 8, 10; Mat. 24:14). Ná ndakanixi̱níyó xa̱ʼa̱ ña̱yóʼo: ndiʼi yichi̱ ña̱ ku̱a̱ʼa̱nyó nátúʼunyó, chíka̱a̱yó ndee̱ ña̱ va̱ʼa xi̱nu ña̱ profecía yóʼo. Ku̱i̱ya̱ tá ku̱i̱ya̱, ku̱a̱ʼáka na̱ yiví xíniso̱ʼo tu̱ʼun va̱ʼa xa̱ʼa̱ Reino Ndióxi̱. Ná kotoyó xa̱a̱ nda̱saa kúú na̱ nátúʼun xa̱ʼa̱ Reino Ndióxi̱, íyo iníísaá ñuyǐví tiempo vitin. Tá ku̱i̱ya̱ 1914, ni̱xi̱yo 5,155 na̱ publicador nu̱ú 43 país. Ta tiempo vitin, xa̱a̱ 8,500,000 kúúyó nu̱ú 240 país xíʼin ñuu válí. Soo ta̱ʼánví ndiʼi ña̱ nátúʼunyó xa̱ʼa̱ Ndióxi̱. Xíniñúʼu ndakundeéyó natúʼunyó xíʼin na̱ yiví, ña̱ iinlá Reino Ndióxi̱ kivi sandiʼi-xa̱ʼa̱ tu̱ndóʼo ña̱ íyo ñuyǐví yóʼo (Sal. 145:11-13). w19.10 8 párr. 3; 9, 10 párr. 7, 8

Jehová xi̱niñúʼura ta̱ Barzilái ña̱ chindeétáʼanra xíʼin ta̱ rey David. Tá xínu ta̱ David xíʼin inkaka na̱ kítáʼan xíʼinra nu̱ú se̱ʼera ta̱ Absalón, ku̱naanína ta kúni̱na koʼona ti̱kui̱í ta saátu kuxuna. Ni xa̱a̱ chéení ta̱ Barzilái, miíra xíʼin inkakana ndakúní ni̱xi̱yo inina tá ni̱xa̱ʼa̱nna nda̱kana ña̱ xíniñúʼuna. Ta̱ Barzilái va̱ása níndakanixi̱níra ña̱ xa̱ʼa̱ ña̱ xa̱a̱ chéera va̱ása kuniñúʼuka Jehová miíra. Chi xíʼin ña̱ si̱í-ini ta̱xira ña̱ kúúmiíra ña̱ va̱ʼa chindeétáʼanra xíʼin na̱ ndásakáʼnu Ndióxi̱ na̱ kúma̱ní ña̱ʼa nu̱ú (2 Sam. 17:27-29). ¿Ndáaña sákuaʼayó xíʼin ña̱yóʼo? Ña̱ ni xa̱a̱ chéeyó Jehová kivi kuniñúʼura miíyó ña̱ chindeétáʼanyó xíʼin na̱ hermanoyó, na̱ íyo iníísaá ñuyǐví na̱ kúma̱ní ña̱ʼa nu̱ú (Prov. 3:27, 28; 19:17). Soo tá va̱ása kívi kuniyóna, kivi taxiyó donación ña̱ va̱ʼa chindeétáʼanyó xíʼin na̱ hermanoyó na̱ íyo iníísaá ñuyǐví na̱ xíniñúʼu sava ña̱ʼa (2 Cor. 8:14, 15). w19.10 21 párr. 6

Tá íyo iin na̱ ke̱ʼé ña̱ va̱ása va̱ʼa xíʼinyó tá ya̱chi̱, sana kivi ixayo̱ʼvi̱ña xíʼinyó ña̱ ka̱ʼa̱nyó xíʼin inkana (Prov. 18:19). Saátu kivi ndakanixi̱níyó ña̱ kǒo tiempoyó, ni ndee̱yó ña̱ ndukúyó na̱ kutáʼan vií xíʼinyó. Soo ná va̱ása ndakava-iniyó. Tá kúni̱yó ña̱ ná chindeétáʼan na̱ hermanoyó xíʼinyó tá ná ya̱ʼayó nu̱ú tu̱ndóʼo, vitin kúú ña̱ xíniñúʼu sakuaʼayó natúʼunyó xíʼinna xa̱ʼa̱ ña̱ ndákanixi̱níyó xíʼin ña̱ ndóʼoyó. Chi ña̱yóʼo chindeétáʼan xíʼinyó ña̱ koo migoyó na̱ ndixa (1 Ped. 1:22). Ta̱ Jesús ni̱na̱ʼa̱ra ña̱ xi̱kandíxara na̱ migora chi va̱ʼaní xi̱natúʼunra xíʼinna (Juan 15:15). Kivi kundiku̱nyó yichi̱ra tá nátúʼunyó xíʼin inkana xa̱ʼa̱ ña̱ sákusi̱í-iniyó, ña̱ sándi̱ʼi̱-iniyó xíʼin ña̱ sándakava-iniyó. Ta saátu, xíniñúʼu kuniso̱ʼoyó tá nátúʼun iinna xíʼinyó, chi saá kúú ña̱ kivi kuniyó ña̱ inkáchi íyo ña̱ ndákanixi̱níyó xíʼinna, ña̱ ndóʼoyó á nda̱a̱ sana ña̱ kúni̱yó keʼéyó. Tá siʼnaka miíyó ná kixáʼa natúʼun xíʼinna va̱ʼaníka xa̱a̱yó kitáʼanyó xíʼinna (Prov. 27:9). w19.11 4 párr. 8, 9

Sana nasa̱ma ki̱ʼva ña̱ nátúʼunyó xa̱ʼa̱ Ndióxi̱, tá ná kixaa̱ ña̱ gran tribulación. Tiempo vitin nátúʼunyó xíʼin na̱ yiví xa̱ʼa̱ Reino Ndióxi̱, ta chíka̱a̱yó ndee̱ xíʼinna ña̱ kundiku̱nna ta̱ Jesús. Soo tá ná kixaa̱ ña̱ gran tribulación, sana káxiní natúʼunyó xíʼin na̱ yiví xa̱ʼa̱ ña̱ kundoʼona, ta ña̱ Biblia chítáʼanña ña̱yóʼo xíʼin ñíí ña̱ ndeéní (Apoc. 16:21). Sana ka̱ʼa̱nyó xíʼinna ña̱ xa̱a̱ ku̱nu̱mí ndiʼi-xa̱ʼa̱ ñuyǐví ta̱ Ndi̱va̱ʼa. Tá ná ya̱ʼa loʼo tiempo, saá kúú ña̱ kunda̱a̱ káxi iniyó ndáaña ka̱ʼa̱nyó xíʼinna ta ndáa ki̱ʼva ka̱ʼa̱nyóña. ¿Á kuniñúʼukayó ndiʼi ña̱ xa̱a̱ yáʼaka 100 ku̱i̱ya̱ xíniñúʼuyó ña̱ natúʼunyó, á nasamavayóña? Xíniñúʼu kundatuyó saá kunda̱a̱-iniyó xa̱ʼa̱ña. Ta nda̱a̱ ndáaka ña̱ ná kuu, xíniñúʼu ndakúní koo iniyó ña̱ ku̱ʼu̱nyó natúʼunyó xa̱ʼa̱ ña̱ káʼa̱n Jehová keʼéra (Ezeq. 2:3-5). Sana na̱ chíñu sa̱a̱nína xa̱ʼa̱ ña̱ ka̱ʼa̱nyó tá ná kixáʼayó natúʼunyó, ta kuni̱na sandiʼi-xa̱ʼa̱na miíyó. Soo, nda̱a̱ táki̱ʼva kándíxayó ña̱ chíndeétáʼan Jehová xíʼinyó tá ku̱a̱ʼa̱nyó nátúʼunyó vitin, saátu ná kandíxayóra tá ná kixaa̱ tiempo kán. Ta ná kandíxayó ña̱ mií Ndióxi̱yó taxi ndee̱ ndaʼa̱yó ña̱ keʼéyó ña̱ kúni̱ra (Miq. 3:8). w19.10 16 párr. 8, 9

Ña̱yóʼo kúni̱ kachiña ña̱ kivi kixáʼayó kundi̱ʼi̱ka-iniyó xa̱ʼa̱ ña̱ koo ku̱a̱ʼání ña̱ʼayó, ña̱ va̱ása xíniñúʼuyó. Ta níma̱yó kivi kixáʼaña kuni̱ña ña̱ va̱ása va̱ʼa. Ña̱kán, ná va̱ása taxiyó ki̱ʼvi ña̱yóʼo níma̱yó (1 Tim. 6:9). Ná ndákaʼányó chi ta̱ Ndi̱va̱ʼa xíniñúʼura ña̱yóʼo ña̱ va̱ʼa sandiʼi-xa̱ʼa̱ra ña̱ kándíxayó Ndióxi̱. Ná kachiyó ña̱ kúúmiíyó ku̱a̱ʼání xu̱ʼún ña̱ satáyó ku̱a̱ʼání ña̱ʼa. ¿Á iin ña̱ va̱ása va̱ʼa kúú ña̱ kuni̱yó kuumiíyó ku̱a̱ʼání ña̱ʼa ña̱ va̱ása xíniñúʼuyó? Sana va̱ása. Soo, ná ndakanixi̱níyó xa̱ʼa̱ pregunta yóʼo: Ni kúúmiívayó xu̱ʼún ña̱ satáyó ña̱yóʼo, soo ¿á íyo ku̱a̱ʼá tiempoyó xíʼin ndee̱yó ña̱ kuniñúʼuyó ña̱yóʼo ta kundaayóña? Ta saátu, ¿á kivi xa̱a̱yó kuʼvi̱-iniyó kuniyó ña̱ʼa ña̱ kúúmiíyó? Ta, ¿á kivi chindaʼá ña̱yóʼo miíyó ña̱ xa̱a̱yó keʼéyó nda̱a̱ táki̱ʼva ke̱ʼé ta̱a ta̱ ni̱ka̱ʼa̱n ta̱ Jesús xíʼin, ña̱ keʼéra ku̱a̱ʼáka chiñu nu̱ú Ndióxi̱? (Mar. 10:17-22). Va̱ʼaníka kúú ña̱ ná kuumiíyó loʼo ña̱ʼa, ta ndakundeékayó kuniñúʼuyó tiempoyó xíʼin ndee̱yó ña̱ kachíñuyó nu̱ú Jehová. w19.11 17, 18 párr. 15, 16

Jehová kivi taxira ndee̱ ndaʼa̱yó ña̱ va̱ʼa kuni̱yó keʼéyó ña̱ nda̱ka̱xinyó (Filip. 2:13). Xa̱ʼa̱ ña̱yóʼo, ná ndukúyó espíritu santo nu̱úra ña̱ va̱ʼa koo ndee̱yó keʼéyóña. Ná ndakundeéyó ka̱ʼa̱nyó xíʼinra ni túviyó ña̱ va̱ása kama ndákuiinra yuʼúyó. Ta̱ Jesús ni̱ka̱ʼa̱nra: “Ka̱ʼa̱nkandó, ta taxira [espíritu santo] ndaʼa̱ndó” (Luc. 11:9, 13). Ña̱ va̱ʼa keʼéyó iin chiñu, xíniñúʼu kotoyó nda̱saa keʼéyóña. Ta saátu, tá ndáka̱xinyó keʼéyó iin ña̱ʼa, ná keʼéyó iin lista ña̱ chindeétáʼan xíʼinyó ña̱ va̱ʼa saxínuyóña. Tá ná ndataʼvíyó iin chiñu ña̱ yo̱ʼvi̱, va̱ása ixayo̱ʼvi̱kaña xíʼinyó ña̱ kotoyó á xa̱a̱ ku̱chiñuyó ke̱ʼéyóña. Ta̱ apóstol Pablo ni̱ka̱ʼa̱nra xíʼin na̱ ñuu Corinto ña̱ xíniñúʼu ndaka̱xinna iin ki̱vi̱ nu̱ú semana ña̱ va̱ʼa ndakayana xu̱ʼún, nu̱úka ña̱ kundatuna nda̱a̱ ná kixaa̱ra ta saáví ndakayanaña (1 Cor. 16:2). Inka ña̱ va̱ʼa ndakiʼinyó tá ná ndataʼvíyó chiñu ña̱ yo̱ʼvi̱ kúú, ña̱ va̱ása ndakanixi̱níyó ña̱ kǒo kuchiñuyó keʼéyóña. w19.11 29 párr. 13, 14

Sana ndákanixi̱níyó ña̱ xíni̱yó Jehová, saáchi kúnda̱a̱-iniyó xa̱ʼa̱ ki̱vi̱ra xíʼin sava ña̱ xa̱a̱ ke̱ʼéra á ni̱ka̱ʼa̱nra. Soo, va̱ása kúni̱ kachiña ña̱ xa̱a̱ xíni̱ va̱ʼayó xa̱ʼa̱ra. Chi xíniñúʼu taváyó tiempo, ña̱ sakuaʼayó xa̱ʼa̱ra xíʼin ndiʼi ña̱ va̱ʼa ña̱ kúúmiíra. Tasaá, kixáʼayó kunda̱a̱-iniyó nda̱chun káʼa̱nra sava ña̱ʼa á kéʼéraña. Tasaá kúú ña̱ kunda̱a̱-iniyó á kútóora ña̱ ndákanixi̱níyó xíʼin ña̱ kéʼéyó. Tá xa̱a̱ ku̱ndaa̱-iniyó xa̱ʼa̱ ña̱ kúni̱ Jehová keʼéyó, xíniñúʼu keʼéyóña. Sava na̱ yiví, sana kixáʼana kusikindaana miíyó saáchi kúni̱yó ndasakáʼnuyó Jehová, ta ndeéka kixáʼana kasina nu̱úyó tá ná kixáʼayó ku̱ʼu̱nyó reunión. Soo, tá kándíxayó Ndióxi̱, va̱ása sándakoora miíyó. Saá kúú ña̱ kixáʼayó kitáʼanyó xíʼinra, ta ña̱yóʼo ndiʼi tiempo kooña. ¿Á ndixa kivi xa̱a̱yó kuxini̱ va̱ʼayó Jehová? Kiviva. w19.12 16, 17 párr. 3, 4

Sava, na̱ íyo se̱ʼe sana túvina ña̱ yo̱ʼvi̱ní kúú ña̱ sakuaʼnuna se̱ʼena, soo na̱ va̱lí yóʼo iin regalo Jehová kúúna. Ta íyo tu̱ʼvara ña̱ chindeétáʼanra xíʼin na̱ íyo se̱ʼe. Xíniso̱ʼora ña̱ káʼa̱nna xíʼinra ta ndákuiinra yuʼúna xíʼin Biblia, tutu ña̱ tává na̱ ñuura, ta saátu xíʼin yichi̱ ña̱ chínúu inka na̱ hermano na̱ xa̱a̱ íyo se̱ʼe nu̱úna. Sava na̱ yiví káchina, ña̱ ki̱ʼva 20 ku̱i̱ya̱ kúú ña̱ sákuaʼnuna se̱ʼena, soo ña̱ nda̱a̱ na̱ íyo se̱ʼe va̱ása sándakoona ña̱ keʼéna ña̱yóʼo. Ta ña̱ va̱ʼaní ña̱ kivi taxina ndaʼa̱ se̱ʼena, kúú ña̱ kuʼvi̱-inina kuninana, tavána tiempo ña̱ koona xíʼinna ta saátu ña̱ sanáʼa̱nana xa̱ʼa̱ Ndióxi̱. Na̱ va̱lí na̱ sánáʼa̱na xa̱a̱ síín síín kéʼé na̱yóʼo. Soo, ku̱a̱ʼání na̱ va̱lí na̱ xa̱ʼnu i̱xaa yivána na̱ kúʼvi̱ní-ini xíni Jehová, ndóʼona táki̱ʼva ndóʼo ñá Joanna Mae, iin ñá hermana ñá íyo chí Asia, káchiñá: “Táxiníi̱ tíxa̱ʼvi xa̱ʼa̱ ña̱ xi̱taxi na̱ yivái̱ consejo ndaʼíi̱ ta sa̱náʼa̱na yi̱ʼi̱ ña̱ kuʼvi̱-inii̱ kunii̱ Jehová. Su̱ví nítaxi kuitína ña̱ tákui̱, chi viíní sa̱náʼa̱na yi̱ʼi̱” (Prov. 23:24, 25). Ku̱a̱ʼání na̱ ndásakáʼnu Jehová kivi ka̱ʼa̱nna táʼan ña̱yóʼo. w19.12 27 párr. 21, 22

Va̱ása xíniñúʼuví ndaka̱xinyó ndáana kúú na̱ hermano na̱ xíniñúʼu ña̱ sandíkoyó-inina. Xíniñúʼu ndukúyó ndáa ki̱ʼva sandíkoyó-ini na̱ xóʼvi̱ ni íxayo̱ʼvi̱ña xíʼinyó. Tá kúú, sava yíʼviyó xa̱ʼa̱ ña̱ va̱ása xíni̱yó ndáaña ka̱ʼa̱nyó á keʼéyó xíʼin iin na̱ xóʼvi̱. Soo kiviva sandíkoyó-inina tá náʼa̱yó ña̱ ndáyáʼvina nu̱úyó. Tá kúyatinka ki̱vi̱ ña̱ ndiʼi-xa̱ʼa̱ ñuyǐví yóʼo, kininíka koo ta yo̱ʼvi̱níka koo ña̱ kutakuyó (2 Tim. 3:13). Ta saátu, xa̱ʼa̱ ña̱ kúúyó na̱ yiví ku̱a̱chi sava yichi̱ keʼéyó ña̱ va̱ása va̱ʼa. Ta xa̱ʼa̱ ña̱yóʼo xíniñúʼu sandíkona-iniyó. Ta̱ apóstol Pablo nda̱kú ni̱xi̱yo inira ta ku̱ndeé-inira nda̱a̱ tá ni̱xi̱ʼi̱ra, tíxa̱ʼvi ña̱ chi̱ka̱a̱ na̱ hermano ndee̱ xíʼinra. Tá ná kundiku̱nyó yi̱chi̱na, saátu miíyó kivi chindeétáʼanyó xíʼin na̱ hermanoyó ña̱ nda̱kú koo inina xíʼin Jehová (1 Tes. 3:2, 3). w20.01 12, 13 párr. 17-19

Ni kúnda̱a̱-ini na̱ nda̱kaxin Ndióxi̱ ña̱ iin ña̱ ndáyáʼviní kúú ña̱ ka̱narana ña̱ ku̱ʼu̱nna chí ndiví, va̱ása ndátuna ña̱ viíní ná keʼé inkana xíʼinna (Filip. 2:2, 3). Ta kúnda̱a̱-inina ña̱ tá nda̱kaxin Ndióxi̱ miína, va̱ása níkunda̱a̱-ini ndiʼi na̱ yiví xa̱ʼa̱ ña̱yóʼo. Ña̱kán va̱ása ndákanda̱-inina tá íxayo̱ʼvi̱ña xíʼin inkana ña̱ kandíxana ña̱ nda̱kaxin Ndióxi̱ miína ña̱ ku̱ʼu̱nna chí ndiví. Ña̱ Biblia sánáʼa̱ña miíyó ña̱ va̱ása ndi̱ku̱n kandíxayó iin na̱ káʼa̱n ña̱ ta̱xi Ndióxi̱ iin chiñu ña̱ ndáyáʼviní ndaʼa̱na. Na̱ nda̱kaxin Ndióxi̱ ku̱ʼu̱n chí ndiví va̱ása kúni̱na ka̱ʼa̱n va̱ʼaní inkana xa̱ʼa̱na, ña̱kán tá ña̱ yichi̱ nu̱ú kúú ña̱ xínina iin na̱ yiví va̱ása káʼa̱nna xíʼinna ña̱ kúúna na̱ nda̱kaxin Ndióxi̱. Ta ni va̱ása ni̱nuní kúnina xa̱ʼa̱ ña̱ nda̱kaxin Ndióxi̱ miína (1 Cor. 4:7, 8). Ta va̱ása nándukúna inka na̱ nda̱kaxin Ndióxi̱ ña̱ ndakutáʼanna ka̱ʼa̱nna xa̱ʼa̱ ña̱ ka̱na Ndióxi̱ miína ña̱ ku̱ʼu̱nna chí ndiví, á ña̱ ndakutáʼanna ña̱ kaʼvina Biblia (Gál. 1:15-17). Tá saá ná keʼéna, va̱ása chindeétáʼanna xíʼin na̱ congregación ña̱ kutáʼan viína. Chi íyona contra xíʼin ña̱ espíritu santo, saáchi ña̱yóʼo kúú ña̱ chíndeétáʼan xíʼin na̱ ñuu Ndióxi̱ ña̱ vií kutáʼanna (Rom. 16:17, 18). w20.01 28 párr. 6, 7

Kixaa̱ iin tiempo, ña̱ na̱ yiví na̱ xi̱ni ña̱ ndi̱ʼi-xa̱ʼa̱ ndiʼi veʼe-ñu̱ʼuna, sa̱a̱nína xa̱ʼa̱ ña̱ ndákundeéka miíyó ndásakáʼnuyó Jehová. Ta sana ndiʼina ka̱ʼa̱n xa̱ʼa̱ ña̱yóʼo, ta nda̱a̱ nu̱ú Internet kana ña̱yóʼo. Na̱ chíñu xíʼin ta̱ Ndi̱va̱ʼa ta̱ níʼi yichi̱ nu̱úna, sa̱a̱-inina kunina miíyó chi ndáa iinlá religión miíyó kúú ña̱ ni̱ndo̱o. Ta va̱ása níkuchiñuna sandiʼi-xa̱ʼa̱na religión ña̱ ndíku̱nyó. Ña̱kán ndiʼina ka̱ʼa̱n xa̱ʼa̱ miíyó. Saá kúú ña̱ ndakunaní na̱ chíñu Gog ña̱ Magog. Na̱yóʼo ndakutáʼanna ña̱ ixandi̱va̱ʼana xíʼin na̱ ñuu Jehová (Ezeq. 38:2, 14-16). Ta xa̱ʼa̱ ña̱ va̱ása kúnda̱a̱ káxi iniyó xa̱ʼa̱ña, sana kivi kundi̱ʼi̱ní-iniyó xa̱ʼa̱ ña̱ kuu. Soo íyo iin ña̱ kúnda̱a̱-iniyó: va̱ása xíniñúʼu yi̱ʼvíyó ña̱ gran tribulación, chi mií Jehová ka̱ʼa̱n xíʼinyó ndáaña keʼéyó ña̱ va̱ʼa ka̱kuyó (Sal. 34:19). w19.10 16 párr. 10, 11

Va̱ása kúni̱ kuitíyó taxiyó tíxa̱ʼvi ndaʼa̱ Jehová, chi náʼa̱yóña xíʼin ña̱ káʼa̱nyó ta saátu xíʼin ña̱ kéʼéyó. Xa̱ʼa̱ ña̱yóʼo síín íyoyó nu̱ú ndiʼi na̱ yiví. Ndóoyó nu̱ú ñuyǐví, nu̱ú íyoní na̱ yiví na̱ va̱ása táxi tíxa̱ʼvi ndaʼa̱ Ndióxi̱ xa̱ʼa̱ ña̱ kéʼéra xa̱ʼa̱na. Ña̱yóʼo náʼa̱ña ña̱ ndóoyó ki̱vi̱ so̱ndíʼi chi na̱ yiví va̱ása táxikana tíxa̱ʼvi (2 Tim. 3:1, 2). Ta va̱ása kúni̱yó kooyó táki̱ʼva íyo na̱yóʼo. Jehová kúni̱ra ña̱ na̱ va̱lí se̱ʼera viíní ná kutáʼana. Ta ña̱ kúʼvi̱-iniyó xínitáʼanyó náʼa̱ña ña̱ kúúyó cristiano na̱ nda̱a̱ (Juan 13:35). Iin ta̱ xi̱ndasakáʼnu Ndióxi̱ ka̱ʼyíra ña̱yóʼo: “Kotondó. Iin ña̱ va̱ʼaní kúúña ña̱ inkáchi kítáʼan na̱ ndásakáʼnu Ndióxi̱” (Sal. 133:1). ¿Á su̱ví ña̱ nda̱a̱ kúú ña̱ ndóʼoyó nda̱a̱ táki̱ʼva ndo̱ʼo ta̱ salmista yóʼo? Ki̱vi̱ kúʼvi̱-iniyó xíniyó na̱ hermanoyó, saátu náʼa̱yó ña̱ kúʼvi̱-iniyó xíniyó Jehová (1 Juan 4:20). Xa̱ʼa̱ ña̱ kítáʼanyó xíʼin na̱ hermano na̱ va̱ʼaní-ini xíʼin inkana, na̱ viíní kítáʼan ta kúndáʼvi-inina xíni táʼanna sákusi̱íníña-iniyó (Efes. 4:32). w20.02 9 párr. 6, 7

Ña̱ xi̱sandíʼi̱-ini ñá Ana va̱ása níndiʼi kamaña. Saáchi inkáchika veʼe ni̱xi̱yoñá xíʼin ñá Peniná. Ña̱ Biblia va̱ása káʼa̱nña ña̱ na̱sama ñá Peniná ki̱ʼva ña̱ ni̱xi̱yoñá. Ta ñá Ana xi̱niñúʼu kundeéka-iniñá xa̱ʼa̱ ña̱ va̱ása va̱ʼa ña̱ xi̱ka̱ʼa̱n ñáyóʼo xíʼinñá. Soo ku̱táxinva-ini ñá Ana. Tá na̱túʼunñá xa̱ʼa̱ ndiʼi ña̱ xi̱ndoʼoñá xíʼin Jehová, va̱ása níndi̱ʼi̱ka-iniñá, ta̱xiñá ña̱ ná sandíkora-iniñá. Ta tá ni̱ya̱ʼa tiempo Jehová nda̱kuiinra ña̱ ni̱ka̱ʼa̱nñá xíʼinra, ta ka̱ku se̱ʼeñá (1 Sam. 1:2, 6, 7, 17-20). Kiviva ndi̱ko-iniyó ni tá va̱ása ndíʼi-xa̱ʼa̱ ña̱ sándi̱ʼi̱-iniyó. Sava yichi̱, tu̱ndóʼo ña̱ ndóʼoyó va̱ása kama ndíʼiña, ni káʼa̱nníyó xíʼin Ndióxi̱ ta xáʼa̱nyó ndiʼi reunión. Soo ña̱ ndo̱ʼo ñá Ana, sánáʼa̱ña miíyó ña̱ nda̱a̱ ni iin ña̱ʼa va̱ása kivi kasi nu̱ú Jehová ña̱ sandíkora-iniyó. Ta̱kán va̱ása nandósóra xa̱ʼa̱yó, ta taxivara ña̱ va̱ʼa ndaʼa̱yó xa̱ʼa̱ ña̱ nda̱kú íyo iniyó xíʼinra (Heb. 11:6). w20.02 22 párr. 9, 10

Na̱ anciano káʼa̱nna xíʼin na̱ hermano xa̱ʼa̱ ña̱ káʼa̱n Biblia ña̱ kivi chindeétáʼan xíʼinna ña̱ vií keʼéna. ¿Nda̱chun ndáyáʼviní ka̱ʼa̱nna xíʼinna? Ná ka̱ʼa̱nyó xa̱ʼa̱ ta̱ Elí: Ta̱yóʼo ni̱xi̱yo u̱vi̱ se̱ʼera na̱ xi̱kuʼvi̱ní-inira xi̱xinira. Soo na̱yóʼo va̱ása ní ixato̱ʼóna Jehová. Ta xi̱kuumiína iin chiñu káʼnu ti̱xin tabernáculo, chi xi̱kuuna su̱tu̱. Ta xa̱ʼa̱ ña̱ xi̱kuumiína ña̱ chiñu yóʼo, xi̱keʼéna ña̱ kúni̱ miína xíʼin na̱ yiví, ta va̱ása ní ixato̱ʼóna ofrenda Jehová ta xi̱keʼéna ku̱a̱ʼání ña̱ kini (1 Sam. 2:12-17, 22). Ta na̱yóʼo xi̱niñúʼu kuvina nda̱a̱ táki̱ʼva káchi ley ta̱ Moisés, soo ta̱ Elí xi̱taxira ña̱ keʼéna ña̱yóʼo, ta va̱ása kue̱ʼe̱ níxi̱yora xíʼinna, ta ta̱xira ña̱ ná kachíñukana ti̱xin ña̱ tabernáculo (Deut. 21:18-21). ¿Ndáaña nda̱kanixi̱ní Jehová xa̱ʼa̱ ña̱ ke̱ʼéra? Ni̱ka̱ʼa̱nra xíʼin ta̱ Elí: “¿Nda̱chun íxato̱ʼókaún se̱ʼún nu̱ú yi̱ʼi̱?”. Tasaá sa̱ndiʼi-xa̱ʼa̱ Jehová u̱vi̱ saá na̱ ta̱a yóʼo (1 Sam. 2:29, 34). w20.03 19 párr. 4, 5