Septiembre

¿Á kúni̱ kachi ña̱ ke̱ʼé Jehová xíʼin ta̱ Jesús ña̱ va̱ása xíniñúʼu ndakindee̱yó? Va̱ása. Jehová nda̱a̱ ni iin yichi̱ va̱ása kúnaara, ña̱kán va̱ása xíniñúʼu ndakindee̱ra nda̱a̱ táki̱ʼva íyo miíyó. Soo ña̱ Biblia káchiña ña̱ tándi̱ʼi i̱xava̱ʼara ndiví xíʼin ñuʼú, sa̱ndákoora ña̱ kachíñura ta nda̱kindee̱ra (Éx. 31:17). Ña̱yóʼo kúni̱ kachiña ña̱ sa̱ndákoora ixava̱ʼara ña̱ʼa, ta ta̱vára tiempo ña̱ kotora ña̱ ke̱ʼéra. Ta saátu ke̱ʼé ta̱ Jesús ni ka̱chíñuníra tá ni̱xi̱yora nu̱ú ñuʼú yóʼo, ta̱vára tiempo ña̱ ndakindee̱ra ta kuxura xíʼin na̱ migora (Mat. 14:13; Luc. 7:34). Ña̱ Biblia káʼa̱nña xíʼin miíyó na̱ ndásakáʼnu Ndióxi̱ ña̱ xíniñúʼu kachíñuyó, ta va̱ása xúxán kooyó (Prov. 15:19). Sana káchíñuyó ña̱ va̱ʼa taxiyó ña̱ xíniñúʼu na̱ veʼeyó. Ta ndiʼiyó na̱ ndásakáʼnu Ndióxi̱ xíniñúʼu ku̱ʼu̱nyó natúʼunyó xíʼin na̱ yiví. Soo ni saá, xíniñúʼu ndakindee̱yó. w19.12 2 párr. 2; 3 párr. 4, 5

Ná kǒo natúʼunyó cuento ña̱ káʼa̱n xa̱ʼa̱ na̱ ta̱chí ndi̱va̱ʼa. Xa̱ʼa̱ ña̱yóʼo xíniñúʼu kundiku̱nyó yichi̱ ta̱ Jesús. Tá ni̱xi̱yora chí ndiví, ku̱nda̱a̱-inira ku̱a̱ʼání ña̱ʼa xa̱ʼa̱ ta̱ Ndi̱va̱ʼa xíʼin na̱ ta̱chí ndi̱va̱ʼa. Soo tá ki̱xira nu̱ú ñuʼú yóʼo, va̱ása nínatúʼunra xa̱ʼa̱ na̱yóʼo. Xa̱ʼa̱ Jehová na̱túʼunra ta su̱víka xa̱ʼa̱ ta̱ Ndi̱va̱ʼa. Táki̱ʼva ke̱ʼé ta̱ Jesús, va̱ása nátúʼunyó cuento xa̱ʼa̱ ña̱ kéʼé na̱ ta̱chí ndi̱va̱ʼa. Va̱ʼaka, xíʼin ña̱ si̱í-ini ná natúʼunyó xa̱ʼa̱ ña̱ nda̱a̱ (Sal. 45:1). Ná va̱ása yi̱ʼvíyó na̱ ta̱chí ndi̱va̱ʼa. Nu̱ú ñuyǐví yóʼo, ndiʼivayó kivi kundoʼo iin ña̱ʼa ña̱ va̱ása va̱ʼa. Iin kamava kivi ndoʼoyó ña̱yóʼo, á kiʼin kue̱ʼe̱ miíyó á nda̱a̱ kuviyó. Soo va̱ása xíniñúʼu ndakanixi̱níyó ña̱ na̱ ta̱chí ndi̱va̱ʼa ndíso ndiʼi ku̱a̱chi xa̱ʼa̱ ña̱yóʼo. Tu̱ʼun Ndióxi̱ káʼa̱nña ña̱ kivi iin sana ndoʼoyó iin ña̱ʼa (Ecl. 9:11). Kúnda̱a̱-iniyó ña̱ íyoníka ndee̱ Jehová nu̱úka na̱ ta̱chí ndi̱va̱ʼa. w19.04 24 párr. 13, 14

¿Á ndíku̱n na̱ anciano ley na̱ chíñu ña̱ xíniñúʼu natúʼunna xíʼinna xa̱ʼa̱ na̱ ke̱ʼé ña̱ kini xíʼin na̱ va̱lí? Ndíku̱nvanaña. Ñuu nu̱ú íyo táʼan ley yóʼo na̱ anciano ndíku̱nvanaña. Saáchi ña̱ ley yóʼo va̱ása íyoña contra ley Jehová (Hech. 5:28, 29). Ña̱kán tá kúnda̱a̱-ini na̱ anciano ña̱ íyo iin na̱ ke̱ʼé ña̱ kini xíʼin na̱ va̱lí, kama ndáka̱tu̱ʼunna na̱ ñuu Ndióxi̱ ndáaña keʼéna ña̱ va̱ʼa kundiku̱nna ley na̱ chíñu ña̱ káʼa̱n xa̱ʼa̱ na̱ kéʼé ña̱ kini xíʼin na̱ va̱lí. Na̱ anciano káʼa̱n káxina xíʼin na̱ ke̱ʼéna ña̱ kini xíʼin, na̱ yivána ta saátu xíʼin inkaka na̱ ku̱nda̱a̱-ini xa̱ʼa̱ña ña̱ kiviva natúʼunna xíʼin na̱ chíñu xa̱ʼa̱ña tá kúni̱na. Soo, ¿ndáaña keʼéna tá iin na̱ congregación kúú na̱ ke̱ʼé ña̱ kini yóʼo ta ku̱a̱ʼána ku̱nda̱a̱-ini xa̱ʼa̱ña? ¿Á ndakanixi̱ní na̱ na̱túʼun xíʼin na̱ chíñu ña̱ miína kúúmií ku̱a̱chi xa̱ʼa̱ ña̱ ku̱yaku̱a̱ ki̱vi̱ Jehová? Va̱ása, saáchi mií na̱ ke̱ʼé ña̱ kini xíʼin na̱ va̱lí kúú na̱ i̱xayaku̱a̱ ki̱vi̱ra. w19.05 10 párr. 13, 14

Ña̱ Biblia káʼa̱nña xíʼin na̱ ta̱a xíʼin ná ñaʼá na̱ xa̱a̱ ti̱ndaʼa̱ ña̱ xíniñúʼu ixato̱ʼó-táʼanna ta saxínuna tu̱ʼun ña̱ ni̱ka̱ʼa̱nna xíʼin táʼanna tá ti̱ndaʼa̱na. Tu̱ʼun Ndióxi̱ káʼa̱nña: “Xa̱ʼa̱ ña̱yóʼo ta̱a sandákoora yivára xíʼin siʼíra, ta ndakutáʼanra xíʼin ñá síʼíra, ta u̱vi̱ saána iinlá xa̱a̱na nduuna” (Gén. 2:24). Soo na̱ ndíku̱n ña̱ ndíchi ña̱ íyo ñuyǐví yóʼo ndákanixi̱nína ña̱ xa̱ʼa̱ mií kuitína xíniñúʼu ndi̱ʼi̱-inina. Iin libro ña̱ káʼa̱n xa̱ʼa̱ ña̱ sándákootáʼanna káchiña ña̱ sava na̱ tíndaʼa̱ na̱samana ña̱ tu̱ʼun ña̱ kíndo̱ona xíʼin táʼanna, ña̱ káʼa̱n “nda̱a̱ ná kuviyó saá sandákootáʼanyó”, xíʼin ña̱ tu̱ʼun “nda̱a̱ tá va̱ásaka kúʼvi̱-iniyó xínitáʼanyó kivi sandákootáʼanyó”. Xa̱ʼa̱ ña̱ ndákanixi̱nína saá kúú ña̱ táʼvi táʼanna ta sáxo̱ʼvi̱ xíʼin miína. Ña̱ ndíchi ña̱ káʼa̱n na̱ ñuyǐví xa̱ʼa̱ na̱ tíndaʼa̱ va̱ása va̱ʼaña. w19.05 24 párr. 12

Ta̱ apóstol Pablo ni̱ndi̱ʼi̱ní-inira, chi sava na̱ cristiano ki̱xáʼana ndákanixi̱nína táki̱ʼva ndákanixi̱ní na̱ ñuyǐví ta̱ Ndi̱va̱ʼa (Efes. 4:17-19). Nda̱a̱ miíyó kivi ndoʼoyó táki̱ʼva ndo̱ʼo na̱kán. Ta̱ Ndi̱va̱ʼa, ndióxi̱ ña̱ ñuyǐví yóʼo, chíka̱a̱níra ndee̱ ña̱ xíniñúʼura nda̱a̱ ndáaka ña̱ʼa ña̱ xa̱a̱yó kooyó contra Jehová. Iin ña̱ xíniñúʼura kúú ña̱ ndíka̱a̱ níma̱yó ña̱ kútóoyó kuumiíyó ku̱a̱ʼá ña̱ʼa á ña̱ ni̱ʼíyó iin chiñu ña̱ ndáyáʼvi. Saátu xíniñúʼura costumbre ña̱ sa̱náʼa̱na miíyó á ki̱ʼva ña̱ sa̱kuaʼnuna miíyó ña̱ xa̱a̱yó ndakanixi̱níyó táki̱ʼva kúni̱ miíra. ¿Á kivi sandiʼi-xa̱ʼa̱yó ña̱ va̱ása va̱ʼa ña̱ kútu̱ní ndíka̱a̱ níma̱yó? (2 Cor. 10:4). Ná kotoyó ña̱ ni̱ka̱ʼa̱n ta̱ apóstol Pablo: “Chi sándiʼi-xa̱ʼa̱yó ndiʼi ña̱ káʼa̱n na̱ yiví xíʼin ndiʼi ña̱ kéʼéna, ña̱ va̱ása táxi ña̱ kunda̱a̱-ini inkana ña̱ va̱ʼa xa̱ʼa̱ Ndióxi̱; saá chíndeétáʼanyó xíʼin inkana ña̱ va̱ʼa ná kuniso̱ʼona ña̱ káʼa̱n ta̱ Cristo” (2 Cor. 10:5). Ndixava, Jehová chindeétáʼan xíʼinyó ña̱ vií ndakanixi̱níyó ta va̱ása sandáʼvi ña̱ ndíka̱a̱ níma̱yó miíyó. w19.06 8 párr. 1-3

Ni ni̱ndi̱ʼi̱ní-ini ñá Ana, ta̱ David xíʼin iin ta̱ salmista ku̱yatinna nu̱ú Jehová ña̱ va̱ʼa chindeétáʼanra xíʼinna. Ta̱vána ndiʼi ña̱ sándi̱ʼi̱-inina tá xi̱ka̱ʼa̱nna xíʼinra. Ta káxiní ni̱ka̱ʼa̱nna xíʼinra nda̱chun ndíʼi̱ní-inina. Ta va̱ása nísandákoona ña̱ ku̱ʼu̱nna nu̱ú ndátakana ña̱ ndasakáʼnunara (1 Sam. 1:9, 10; Sal. 55:22; 73:17; 122:1). Ndióxi̱yó, ta̱ kúndáʼvi-ini xíni miíyó, xi̱niso̱ʼora ndiʼi ña̱ ni̱ka̱ʼa̱nna ta chi̱ndeétáʼanra xíʼinna. Ñá Ana ku̱táxin-iniñá (1 Sam. 1:18). Ta̱ David ka̱ʼyíra ña̱yóʼo: “Ku̱a̱ʼání kúú tu̱ndóʼo íyo nu̱ú na̱ nda̱kú íyo ini, soo Jehová sáka̱kurana nu̱ú ndiʼi ña̱yóʼo” (Sal. 34:19). Ta ta̱ salmista xi̱nira nda̱saa ta̱xi Jehová consejo ndaʼa̱ra ta ni̱na̱ʼa̱ra nu̱úra yichi̱ nu̱ú xíniñúʼu ku̱ʼu̱nra. (Sal. 73:23, 24). ¿Ndáaña sákuaʼayó xíʼin ña̱ ndo̱ʼo u̱ni̱ na̱yóʼo? Ña̱ sava yichi̱ ndi̱ʼi̱ní-iniyó xa̱ʼa̱ ña̱ íyo tu̱ndóʼo nu̱úyó. Soo kuchiñuvayó ya̱ʼayó nu̱úña tá ná ndakanixi̱níyó nda̱saa chi̱ndeétáʼan Jehová xíʼin inkana, saátu ná ka̱ʼa̱nyó xíʼinra ta ná keʼéyó ndiʼi ña̱ káʼa̱nra xíʼinyó (Sal. 143:1, 4-8). w19.06 17, 18 párr. 14, 15

Ná va̱ása kukaʼan nu̱úyó xa̱ʼa̱ ña̱ kúúyó testigo Jehová ni xa̱ʼa̱ ña̱ káʼa̱n á kéʼé na̱ yiví xíʼinyó (Miq. 4:5). Ná ndakanixi̱níyó xa̱ʼa̱ ña̱ ke̱ʼé na̱ apóstol chí ñuu Jerusalén tá ni̱ya̱ʼa loʼo ña̱ xa̱ʼnína ta̱ Jesús. Xi̱kunda̱a̱-inina ña̱ xi̱sa̱a̱ní-ini na̱ su̱tu̱ judío xi̱xiniñaʼána (Hech. 5:17, 18, 27, 28). Ni saá ndiʼi ki̱vi̱ xi̱xa̱ʼa̱nna ña̱ templo ta xi̱na̱ʼa̱na miína nu̱ú na̱ yiví ña̱ kúúna discípulo ta̱ Jesús (Hech. 5:42). Va̱ása níndakava-inina xa̱ʼa̱ ña̱ yíʼvina. Saátu miíyó va̱ása yi̱ʼvíyó tá ndiʼi tiempo náʼa̱yó ña̱ kúúyó testigo Jehová, nu̱ú káchíñuyó, escuela á nu̱ú íyoyó (Hech. 4:29; Rom. 1:16). Na̱ apóstol xi̱kusi̱í-inina chi xi̱kunda̱a̱-inina nda̱chun xi̱sa̱a̱-ini na̱ yiví xi̱xininana. Saátu, xi̱kusi̱í-inina xa̱a̱ ña̱ xóʼvi̱na xa̱ʼa̱ ña̱ ndásakáʼnuna Jehová (Luc. 6:23; Hech. 5:41; 1 Ped. 2:19-21). Kúnda̱a̱ káxi iniyó ña̱ na̱ yiví sáa̱-inina xínina miíyó chi kéʼéyó ña̱ va̱ʼa, ña̱ sáa̱-inina xínina miíyó va̱ása kivi kasiña nu̱úyó ña̱ ndasakáʼnuyó Ndióxi̱. w19.07 6, 7 párr. 19, 20

Ta̱ Jesús xíʼin na̱ xi̱ndiku̱nñaʼá na̱ xi̱kuu judio, xi̱ndakindee̱na ña̱ ki̱vi̱ sábado chi xi̱kandíxana ley ta̱ Moisés. Soo xíʼin ña̱ ke̱ʼé ta̱ Jesús ta saátu xíʼin ña̱ ni̱ka̱ʼa̱nra, ni̱na̱ʼa̱ra ña̱ kiviva keʼéna ña̱ va̱ʼa ki̱vi̱ kán (Mat. 12:9-11). Va̱ása níndakanixi̱níra ña̱ xi̱ya̱ʼandosóna ley ña̱ ki̱vi̱ sábado tá xi̱keʼéna iin ña̱ʼa ña̱ va̱ʼa. Xíʼin ña̱ ke̱ʼé ta̱ Jesús, ni̱na̱ʼa̱ra ña̱ xi̱kunda̱a̱-inira nda̱chun ni̱ka̱ʼa̱n Ndióxi̱ xíʼin na̱ ñuura, ña̱ va̱ása kachíñuna ki̱vi̱ kán. Xa̱ʼa̱ ña̱ xi̱ndakindee̱ na̱ ñuu Israel ña̱ ki̱vi̱ kán, xi̱ndi̱ʼi̱ka-inina xa̱ʼa̱ chiñu Ndióxi̱. Na̱ veʼe ta̱ Jesús xi̱xiniñúʼuna ña̱ ki̱vi̱ sábado ña̱ ndasakáʼnuna Ndióxi̱, nda̱a̱ táki̱ʼva káchi ña̱ káʼviyó xa̱ʼa̱ ña̱ ke̱ʼéra chí ñuu Nazaret. Ña̱ Biblia káchiña: “Ta nda̱a̱ táki̱ʼva xa̱a̱ kéʼéra ña̱ kivi sábado, ni̱ki̱ʼvira ini ña̱ sinagoga, ta xi̱kundichira ña̱ kaʼvira” (Luc. 4:15-19). Ta saátu, na̱ discípulo xi̱ ixato̱ʼónína ley ña̱ ki̱vi̱ sábado, ña̱kán xi̱ndatuna nda̱a̱ inka ki̱vi̱ ña̱ va̱ʼa chika̱a̱na ña̱ʼa ña̱ xáʼa̱n támi xíʼin aceite tá xáʼa̱n támi ku̱ñu ta̱ Jesús (Luc. 23:55, 56). w19.12 4 párr. 10

Ndiʼi miíyó na̱ káchíñu nu̱ú Ndióxi̱ chíka̱a̱yó ndee̱ ña̱ ndani̱ʼíyó na̱ yiví na̱ ndixa kúni̱ kunda̱a̱-ini xa̱ʼa̱ra. Chiñu ña̱ kéʼéyó kivi kitáʼanña xíʼin na̱ xíka nándukú iin ta̱ loʼo ta̱ nda̱ñúʼu. ¿Ndáa ki̱ʼva kítáʼanña? Ná kotoyó ña̱ ku̱u. Ña̱ va̱ʼa nandukúna iin ta̱ loʼo ta̱ u̱ni̱ ku̱i̱ya̱ ta̱ nda̱ñúʼu, sa̱ndátakana ki̱ʼva 500 na̱ yiví. Tá xa̱a̱ ni̱ya̱ʼa 20 hora ña̱ nda̱ñúʼura, iin ta̱ ta̱a nda̱ni̱ʼírara chí yuku̱ nu̱ú chíʼina nu̱ni̱. Soo va̱ása ni̱ka̱ʼa̱nra ña̱ miíra kúú ta̱ nda̱ni̱ʼí-ñaʼá, chi ni̱ka̱ʼa̱nra: “Nda̱ni̱ʼíyóra tíxa̱ʼvi ndiʼi na̱ yiví yóʼo ña̱ chi̱ka̱a̱nína ndee̱”. Ku̱a̱ʼání na̱ yiví íyona táki̱ʼva íyo ta̱ loʼo ta̱ nda̱ñúʼu yóʼo. Kǒo ña̱ ndátuna ndakiʼinna chí nu̱únínu, soo kúni̱na ná chindeétáʼanyó xíʼinna. Yáʼaka 8 millón kúú miíyó na̱ testigo Jehová na̱ xíka nándukú na̱ yiví yóʼo. Sana miíyó va̱ása ndáni̱ʼíyó iin na̱ kúni̱ kaʼvi tu̱ʼun Ndióxi̱, soo inka na̱ publicador ndáni̱ʼívanana. Tá iin na̱ hermanoyó ndáni̱ʼína iin na̱ kúni̱ kaʼvi ta kíxáʼana ndíku̱nna ta̱ Cristo, ndiʼiyó kúsi̱í-ini. w19.07 16 párr. 9, 10

Ta̱ apóstol Pablo sa̱ndákaʼánra na̱ hermano ña̱ ñuu Filipos ña̱ ná chika̱a̱kana ndee̱ kununa. Nda̱a̱ tá ki̱xáʼa íyo ña̱ congregación ñuu Filipos sa̱xóʼvi̱nana. Nda̱a̱ tá ku̱i̱ya̱ 50 ta̱ Pablo xíʼin ta̱ Silas ni̱xa̱a̱na ña̱ ñuu kán, chi Jehová ni̱ka̱ʼa̱n xíʼinna ña̱ ná ku̱ʼu̱nna ña̱ ñuu Macedonia (Hech. 16:9). Kán nda̱ni̱ʼína iin ñaʼá ñá naní Lidia, ta xi̱niso̱ʼoñá ña̱ ni̱ka̱ʼa̱nna. Jehová nda̱kuná níma̱ñá ña̱ va̱ʼa xi̱niso̱ʼoñá ña̱ na̱túʼunna xíʼinñá xa̱ʼa̱ra (Hech. 16:14). Tá ni̱ya̱ʼa loʼo tiempo miíñá xíʼin na̱ veʼeñá nda̱kuchina. Soo ta̱ Ndi̱va̱ʼa ni̱sa̱a̱níra xa̱ʼa̱ ña̱yóʼo. Sava na̱ ta̱a ña̱ ñuu kán ti̱inna ta̱ Pablo xíʼin ta̱ Silas ku̱a̱ʼa̱n xíʼinna nu̱ú na̱ chíñu ta chi̱ka̱a̱ ku̱a̱chinana ña̱ ndátaʼvína na̱ yiví. Xa̱ʼa̱ ña̱yóʼo ka̱nina ta̱ Pablo xíʼin ta̱ Silas ta chi̱ka̱a̱nana veʼeka̱a ta ni̱ka̱ʼa̱nna xíʼinna ña̱ ná keena ña̱ ñuu kán (Hech. 16:16-40). ¿Á nda̱kava-inina? Va̱ása. ¿Á nda̱kava-ini na̱ congregación xa̱á kán? Va̱ása chi ndakúní ni̱xi̱yo inina. Ña̱ ndakú ni̱xi̱yo ini ta̱ Pablo xíʼin ta̱ Silas ta̱xiníña ndee̱ ndaʼa̱na. w19.08 2 párr. 1, 2

Va̱ʼaní koo ña̱ kéʼéndó kúni̱ kachiña kuʼvi̱-iniyó kuniyó Jehová xíʼin na̱ ñuura. Ta saátu ña̱ natúʼunyó xíʼin inkana xa̱ʼa̱ ña̱ kándíxayó ta̱ Jesús xíʼin ña̱ ndátuyó koo chí nu̱únínu. Chíka̱a̱yó ndee̱ ña̱ keʼéyó ña̱ va̱ʼa tá ndíʼi̱-iniyó xa̱ʼa̱ chiñu ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱ (Mat. 28:18-20). Nda̱a̱ ndáaka ña̱ ndóʼoyó kivi kooyó nda̱a̱ táki̱ʼva íyo iin luz nu̱ú na̱ yiví. Sava yichi̱ ña̱ʼa ña̱ sási nu̱úyó ña̱ natúʼunyó kivi nduuña iin ña̱ chindeétáʼan xíʼinyó. Ña̱yóʼo kúú ña̱ ndo̱ʼo ta̱ Pablo. Tá ka̱ʼyíra carta ña̱ ku̱a̱ʼa̱n ndaʼa̱ na̱ ñuu Filipos, tá nda̱kasinara ini iin veʼe chí ñuu Roma xi̱kuuña. Soo ña̱yóʼo va̱ása nísasiña nu̱úra ña̱ natúʼunra xa̱ʼa̱ Ndióxi̱ xíʼin na̱ xi̱ndaañaʼá á xíʼin na̱ xi̱xa̱ʼa̱n xi̱xitoñaʼá. Ña̱ ke̱ʼéra ta̱xiníña ndee̱ ndaʼa̱ inkaka na̱ hermano ña̱ chika̱a̱kana ndee̱ ña̱ natúʼunna xíʼin na̱ yiví xa̱ʼa̱ tu̱ʼun Ndióxi̱ (Filip. 1:12-14; 4:22). w19.08 12 párr. 15, 16

Ndáyáʼviní vitá koo iniyó chi saá kúú ña̱ sákusi̱íyó-ini Jehová, nda̱a̱ táki̱ʼva ni̱ka̱ʼa̱n ta̱ apóstol Pedro nu̱ú texto ña̱ kaʼviyó ki̱vi̱ vitin. Nu̱ú libro ña̱ naní “Ven, sé mi seguidor” capítulo 3, párrafo 23 káchiña: “Ña̱ ni̱nu kúni̱yó nda̱a̱ táki̱ʼva íyo iin veneno saá íyoña ta kivi sandíʼi-xa̱ʼa̱ña miíyó. Chi xíʼin ña̱yóʼo nda̱a̱ na̱ yiví na̱ ndíchiní kivi xa̱a̱na va̱ása kundayáʼvikana nu̱ú Jehová. Soo na̱ vitá-ini ni kǒo xíni̱nína kivi xa̱a̱na kundayáʼvina nu̱úra”. Ta saátu káʼa̱nkaña, tá vitá íyo iniyó taxira ku̱a̱ʼání ña̱ va̱ʼa ndaʼa̱yó. Kúnda̱a̱-iniyó ña̱ kǒoka inka ña̱ kivi sakusi̱í-ini Jehová (Prov. 23:15). Sákusi̱íyó-ini Jehová tá vitá íyo iniyó, ta saátu ku̱a̱ʼá ña̱ va̱ʼa ndákiʼinyó. Tá vitá íyo iniyó na̱ yiví kuni̱na koo yatinna xíʼinyó. Ña̱ va̱ʼa kunda̱a̱-iniyó xa̱ʼa̱ ña̱yóʼo, ná ndakanixi̱níyó ndáa na̱ yiví kúú na̱ kutóoyó kutáʼanyó xíʼin (Mat. 7:12). w19.09 4 párr. 8, 9

Na̱ anciano chíka̱a̱nína ndee̱ ña̱ chindeétáʼanna xíʼin na̱ hermano. Ta va̱ása ndákanixi̱nína ña̱ ndáyáʼvikana nu̱ú inkana xa̱ʼa̱ chiñu ña̱ kúúmiína, chi viíva kéʼéna xíʼin na̱ congregación (1 Tes. 2:7, 8). Ña̱ kúʼvi̱-inina xíʼin ña̱ vitá íyo inina náʼa̱naña ki̱vi̱ vií káʼa̱nna xíʼin inkana. Iin ta̱ xa̱a̱ ku̱a̱ʼání ku̱i̱ya̱ kúú anciano ta̱ naní Andrew káchira: “Kíʼii̱n kuenta ña̱ na̱ hermano va̱ʼaní kúnina, tá na̱ anciano náʼa̱na ña̱ vií íyo inina ta kúʼvi̱-inina xíninana. Ña̱yóʼo kúú ña̱ chíndaʼána ña̱ inkáchi kachíñuna xíʼin na̱ anciano”. Saátu ta̱ Tony ta̱ xa̱a̱ ku̱a̱ʼá ku̱i̱ya̱ kúú anciano, káchira: “Chíka̱i̱ ndee̱ ña̱ kundiku̱i̱n consejo ña̱ káʼa̱n Filipenses 2:3 ta saátu ña̱ kunda̱a̱-inii̱ ña̱ ndáyáʼvika inkana nu̱úi̱. Ña̱yóʼo chíndeétáʼanña xíʼi̱n ña̱ va̱ása ixanduxai̱ xíʼin inkana ña̱ kuniso̱ʼona yi̱ʼi̱”. Na̱ anciano xíniñúʼu vitá koo inina nda̱a̱ táki̱ʼva íyo Jehová. Ni kúúra ta̱ káʼnu ña̱ iníísaá ñuyǐví vitá íyo inira chi chíndeétáʼanra xíʼin na̱ vitá-ini (Sal. 18:35; 113:6, 7). Ta kúndasí nu̱úra xínira na̱ ni̱nu kuni. w19.09 16, 17 párr. 11, 12

Ndi̱ko-iniyó ti̱xin yugo ta̱ Jesús tá viíní ná ndakanixi̱níyó xa̱ʼa̱ ña̱ kivi kundoʼoyó. Kéʼéyó chiñu Jehová, ña̱kán xíniñúʼu keʼéyóña nda̱a̱ táki̱ʼva kúni̱ra. Chi kúúyó na̱ káchíñu nu̱ú Jehová ta miíra kúú ta̱ níʼi yichi̱ nu̱úyó (Luc. 17:10). Tá ná keʼéyó chiñura nda̱a̱ táki̱ʼva kúni̱ miíyó, sáxo̱ʼvi̱yó miíyó xíʼin yugo. Soo kivi keʼéyó ku̱a̱ʼání ña̱ʼa ña̱ va̱ʼa, ta kivi ya̱ʼayó nda̱a̱ ndáaka nu̱ú ña̱ sási nu̱úyó tá ná keʼéyó ña̱ káʼa̱n Jehová. Ná ndakaʼányó chi nda̱a̱ ni iinna va̱ása kivi kasi nu̱ú Jehová ña̱ saxínura ña̱ kúni̱ra (Rom. 8:31; 1 Juan 4:4). Ña̱ kúni̱yó kúú ña̱ ndasakáʼnuyó yiváyó Jehová. Tá siglo nu̱ú, ni̱xi̱yo na̱ yiví na̱ ke̱ʼé ku̱a̱ʼání ña̱ʼa xa̱ʼa̱ ña̱ xi̱kuni̱na kundayáʼvina nu̱ú inkana. Soo va̱ása níkusi̱í-inina xíʼin ña̱yóʼo ta sa̱ndákoona ña̱ kundiku̱nna yugo ta̱ Jesús á ña̱ keʼéna ña̱ kúni̱ra (Juan 6:25-27, 51, 60, 66; Filip. 3:18, 19). Ta saátu, ni̱xi̱yo inka na̱ ke̱ʼé ku̱a̱ʼáka ña̱ʼa xa̱ʼa̱ ña̱ kúʼvi̱-inina xínina Ndióxi̱ xíʼin inkakana. Na̱yóʼo ni̱kusi̱íní-inina xa̱ʼa̱ ña̱ vií ke̱ʼéna chiñuna tá ni̱xi̱yona nu̱ú ñuʼú yóʼo, ta nda̱kiʼinna ña̱ kutakuna chí ndiví xíʼin ta̱ Jesús. Saátu kivi kusi̱í-iniyó tá viíní ná keʼéyó ña̱ kúni̱ ta̱ Jesús á ña̱ kundiku̱nyó yugora. w19.09 20 párr. 1; 24, 25 párr. 19, 20

Ná ndakanixi̱níyó xa̱ʼa̱ ña̱ va̱ʼa ña̱ nda̱kiʼinyó, xa̱ʼa̱ ña̱ ni̱sa̱ñáyó nu̱ú ña̱ vatá ña̱ sánáʼa̱ na̱ veʼe-ñu̱ʼu. Kúsi̱íní-iniyó xa̱ʼa̱ ña̱ ni̱sa̱ñáyó. Kivi ndakiʼinyó ku̱a̱ʼáníka ña̱ va̱ʼa xa̱ʼa̱ ña̱ sa̱ñáyó chí nu̱únínu. Si̱lóʼo kúma̱ní, ta ta̱ Jesús sandiʼi-xa̱ʼa̱ra ndiʼi na̱ veʼe-ñu̱ʼu vatá, ta saátu ndiʼi na̱ chíñu na̱ va̱ása vií xáʼndachíñu na̱ íyo nu̱ú ñuʼú yóʼo. Ta Ndióxi̱ kundaara na̱ gran muchedumbre na̱ nda̱kúní íyo ini, ta taxira ku̱a̱ʼání bendición ndaʼa̱na nu̱ú ñuʼú livi (Apoc. 7:9, 14). Ta saátu sandátakura ku̱a̱ʼání na̱ yiví, ta na̱yóʼo va̱ása kuumiíkana ku̱a̱chi ña̱ xi̱kuumií ta̱ Adán (Hech. 24:15). Ti̱xin ña̱ mil ku̱i̱ya̱ ña̱ kaʼndachíñu ta̱ Jesús, miíra xíʼin na̱ kaʼndachíñu xíʼinra chindeétáʼanna xíʼin na̱ yiví, ña̱ vií koona ta va̱ása kiʼinka kue̱ʼe̱na, ta saátu ña̱ va̱ʼaní kutáʼanna xíʼin Jehová. Ta ña̱ sa̱ñáyó yóʼo, kooña nda̱a̱ táki̱ʼva ni̱xi̱yo ña̱ Jubileo ña̱ ñuu Israel. Ta ndiʼi na̱ nda̱kú íyo ini xíʼin Jehová, va̱ása kookana na̱ yiví ku̱a̱chi, saá kúú ña̱ sa̱ñána nu̱ú ku̱a̱chi. w19.12 12 párr. 14-16

Tá siglo nu̱ú, iin ta̱a ta̱ va̱ʼaní-ini ta̱ xi̱naní José (xi̱ka̱ʼa̱ntuna Bernabé xíʼinra) ta̱xira ña̱ ná kuniñúʼu Jehová miíra (Hech. 4:36, 37). Tá ndu̱u ta̱ Saulo cristiano, ku̱a̱ʼání na̱ hermano xi̱yi̱ʼvína kuyatinna nu̱úra, chi xi̱kundaa-inina ña̱ xi̱ ixandi̱va̱ʼara xíʼin na̱ congregación. Soo, ta̱ Bernabé chi̱ndeétáʼanra xíʼinra (Hech. 9:21, 26-28). Tá ni̱ya̱ʼa loʼo, na̱ anciano ña̱ ñuu Jerusalén na̱kunda̱a̱-inina ña̱ na̱ hermano na̱ íyo iin ñuu ña̱ ndíka̱a̱ xíka, ña̱ xi̱naní Antioquía de Siria xíniñúʼuna na̱ chindeétáʼan xíʼinna. Ta, ¿ndáana chi̱ndaʼána ku̱a̱ʼa̱n nu̱úna? Ta̱ Bernabé. Iin ña̱ va̱ʼaní kúú ña̱ chi̱ndaʼána ta̱yóʼo, saáchi ña̱ Biblia káʼa̱nña xa̱ʼa̱ ta̱ Bernabé ña̱ va̱ʼaní chi̱ka̱a̱ra ndee̱ xíʼinna ña̱ va̱ʼa nda̱kú koo inina xíʼin Ndióxi̱ (Hech. 11:22-24). Saátu tiempo vitin, Jehová kivi chindeétáʼanra xíʼinyó ña̱ va̱ʼa sandíkoyó-ini na̱ hermanoyó, tá kúú na̱ ni̱xi̱ʼi̱ iin na̱ táʼan, ta saátu ña̱ ku̱ʼu̱nyó kotoyó á ka̱ʼa̱nyó xíʼin iin na̱ ndeé ndóʼo, á na̱ nda̱kava-ini, ta chika̱a̱yó ndee̱ xíʼinna. ¿Á taxiyó ña̱ kuniñúʼu Jehová miíyó nda̱a̱ táki̱ʼva xi̱niñúʼura ta̱ Bernabé? (1 Tes. 5:14). w19.10 22 párr. 8

Sava yichi̱, tá kéeyó nátúʼunyó xíʼin na̱ hermanoyó su̱ví kuití ña̱ va̱ʼa ña̱ kúúmiína xítoyó, chi saátu ña̱ va̱ása va̱ʼa. ¿Ndáaña kivi chindeétáʼan xíʼinyó ña̱ va̱ʼa ya̱ʼayó nu̱ú ña̱yóʼo? Ña̱ ndixa kúú, ña̱ va̱ása kivi kundatuyó ña̱ na̱ hermanoyó ná keʼéna nina ña̱ va̱ʼa. Xa̱ʼa̱ ña̱yóʼo, ná chika̱a̱yó ndee̱ ña̱ ndakú ná koo ña̱ kutáʼanyó xíʼin inkana. Tá iin na̱ migoyó ke̱ʼéna iin ña̱ va̱ása va̱ʼa, sana xíniñúʼu ka̱ʼa̱n káxiyó xíʼinna xa̱ʼa̱ña, soo xíʼin ña̱ to̱ʼó ná kooña, ta consejo ña̱ taxiyó ndaʼa̱na nu̱ú Biblia ná kanaña (Sal. 141:5). Tá ke̱ʼéna ña̱ va̱ása va̱ʼa xíʼinyó, xíniñúʼu kukáʼnu-iniyó xa̱ʼa̱na. Tá xa̱a̱ i̱xakáʼnu-iniyó xa̱ʼa̱na, va̱ása xíniñúʼu tuku ka̱ʼa̱nyó xa̱ʼa̱ ña̱yóʼo tá ná ya̱ʼa tiempo. Xa̱ʼa̱ ña̱ ndóoyó tiempo ña̱ yo̱ʼvi̱ ndáyáʼviní kotoyó ña̱ va̱ʼa ña̱ kúúmií na̱ hermanoyó, ta su̱ví ña̱ va̱ása va̱ʼa. Tá saá ná keʼéyó, ndasandakúkayó ña̱ kítáʼanyó xíʼinna. Ndáyáʼviní keʼéyó ña̱yóʼo, chi tá ná kixaa̱ ña̱ gran tribulación kuniñúʼuyó ña̱ chindeétáʼan na̱ migoyó xíʼinyó. w19.11 6 párr. 13, 16

Tá káʼviyó xíʼin na̱ yiví, xíniñúʼu chika̱a̱yó ndee̱ ña̱ chindeétáʼanyó xíʼinna ña̱ kundiku̱nna ta̱ Jesús ta sanáʼa̱yóna ña̱ kuniso̱ʼona ndiʼi ña̱ ni̱ka̱ʼa̱nra. Xíniñúʼu chindeétáʼanyó xíʼinna ña̱ kunda̱a̱-inina ña̱ ndáyáʼviní sakuaʼana xa̱ʼa̱ Jehová ta kundiku̱nna ña̱ chíñura. Ña̱yóʼo kúni̱ kachiña, ña̱ chika̱a̱yó ndee̱ xíʼinna ña̱ keʼéna ña̱ sakuaʼana, ta ndataxina miína ndaʼa̱ Jehová ta ndakuchina. Saá kúú ña̱ kivi ka̱kuna tá ná kixaa̱ ki̱vi̱ Jehová (1 Ped. 3:21). Ndáa si̱lóʼo kúma̱ní ña̱ ndiʼi-xa̱ʼa̱ ñuyǐví. Xa̱ʼa̱ ña̱yóʼo, kǒoka tiempo nu̱úyó ña̱ kaʼviyó xíʼin na̱ yiví na̱ va̱ása chíka̱a̱ ndee̱ ña̱ kundiku̱nna ta̱ Jesús (1 Cor. 9:26). Xíniñúʼu kamaní keʼéyó chiñuyó, chi íyo ku̱a̱ʼáníka na̱ yiví na̱ kúma̱níka kunda̱a̱-ini xa̱ʼa̱ Ndióxi̱, tá íyoka tiempo nu̱úna vitin. w19.10 11 párr. 14, 15

Ña̱ ki̱vi̱ ña̱ Expiación iin yichi̱ nu̱ú ku̱i̱ya̱ xi̱keʼénaña, ta xi̱ndakutáʼan na̱ ñuu Israel ta ta̱ su̱tu̱ xi̱xaʼníra kití nu̱ú Ndióxi̱. Ña̱yóʼo xi̱sandákaʼánña na̱ ñuu Israel ña̱ va̱ása xíniñúʼu kuumiína ku̱a̱chi. Ña̱ siʼna xíniñúʼu keʼé ta̱ su̱tu̱ kúú ña̱ chi̱ka̱a̱ra ña̱ incienso nu̱ú ñuʼu̱, ta iníí ini ña̱ veʼe kán nda̱kutú xiko̱ ña̱ xáʼa̱n támi. ¿Ndáaña sákuaʼayó xíʼin ña̱yóʼo? Ña̱ Biblia chítáʼanña ña̱ incienso xíʼin oración ña̱ káʼa̱nyó xíʼin Ndióxi̱ (Sal. 141:2; Apoc. 5:8). Ta̱ su̱tu̱ xi̱niʼira incienso xi̱xa̱ʼa̱nra nu̱ú Jehová xíʼin ña̱ to̱ʼó. Ki̱ʼva saá íyoña, tá káʼa̱nyó xíʼin Ndióxi̱ xíʼin ña̱ to̱ʼó kéʼéyóña. Táxiníyó tíxa̱ʼvi xa̱ʼa̱ ña̱ táxira kuyatinyó nu̱úra, nda̱a̱ táki̱ʼva kéʼé iin na̱ va̱lí xíʼin yivána (Sant. 4:8). Saátu táxira ña̱ ná kooyó migora (Sal. 25:14). Ña̱yóʼo ndáyáʼviníña nu̱úyó ta va̱ása kúni̱yó keʼéyó nda̱a̱ ni iin ña̱ va̱ása kútóora. w19.11 20, 21 párr. 3-5

¿Ndáa ki̱ʼva xíto ku̱a̱ʼání na̱ yiví chiñu? Ku̱a̱ʼání país, na̱ yiví ndeéní chíka̱a̱na ndee̱ ña̱ kachíñuna. Xa̱ʼa̱ ña̱yóʼo, ku̱a̱ʼánína ni kǒo tiempo nu̱úna ña̱ ndakindee̱na, ña̱ koona xíʼin na̱ veʼena á ña̱ kundi̱ʼi̱-inina xa̱ʼa̱ ña̱ sakuaʼana xa̱ʼa̱ Ndióxi̱ (Ecl. 2:23). Ta saátu íyo na̱ yiví na̱ va̱ása kútóo kachíñu, ta ku̱a̱ʼání ña̱ʼa káʼa̱nna xa̱ʼa̱ ña̱ va̱ása kúni̱na kachíñuna (Prov. 26:13, 14). Ku̱a̱ʼání na̱ yiví va̱ása vií xítona chiñu ña̱ kéʼéna. Soo, ¿ndáaña ndákanixi̱ní Jehová xíʼin ta̱ Jesús xa̱ʼa̱ chiñu? Ña̱ nda̱a̱ Jehová kútóoníra kachíñura. Ta̱ Jesús ni̱ka̱ʼa̱n káxira xa̱ʼa̱ ña̱yóʼo, tá ka̱chira: “Yivái̱ nda̱a̱ vitin ndákundeéra káchíñura, ta káchíñutu yi̱ʼi̱va” (Juan 5:17). Ná ndakanixi̱níyó xa̱ʼa̱ ña̱ ku̱a̱ʼání na̱ ángel ke̱ʼéra, ta saátu ña̱ íyo chí ndiví xíʼin nu̱ú ñuʼú yóʼo. w19.12 2 párr. 1, 2

¿Nda̱saa ni̱xa̱a̱ ta̱ David va̱ʼaní ki̱táʼanra xíʼin Jehová? Ta̱ David sa̱kuaʼara xa̱ʼa̱ Jehová chi xi̱xitora ña̱ i̱xava̱ʼara. Tá ni̱xi̱yo loʼora, ku̱a̱ʼání tiempo ni̱xi̱kara yuku̱ chi xi̱ndaara ndikachi sa̱na̱ yivára. Sana, saá kúú ña̱ ki̱xáʼara nda̱kanixi̱níra xa̱ʼa̱ ña̱ʼa ña̱ i̱xava̱ʼa Jehová. Tá kúú, tá xi̱xitora chí ndiví tá ñuú, su̱ví kuití ki̱mi níxixitora, chi xi̱ndakanixi̱níra xa̱ʼa̱ ña̱ va̱ʼa ña̱ kúúmií ta̱ i̱xava̱ʼa ndiʼirí (Sal. 19:1, 2). Ta saátu, xi̱xitora ña̱ ndíchi ña̱ kúúmií Jehová, tá xi̱ndakanixi̱níra xa̱ʼa̱ nda̱saa ku̱va̱ʼa na̱ yiví (Sal. 139:14). Tá ku̱ndaa̱-inira xa̱ʼa̱ ndiʼi ña̱ʼa ña̱ i̱xava̱ʼa Jehová, ki̱ʼinra kuenta ña̱ káʼnuníka Jehová nu̱úra (Sal. 139:6). ¿Ndáaña sákuaʼayó? Tá kéʼéyó chiñuyó, ná ndakanixi̱níyó xa̱ʼa̱ ndiʼi ña̱ʼa ña̱ íyo nu̱ú ñuʼú yóʼo, tá kúu: planta, kití xíʼin na̱ yiví. Tá saá ná keʼéyó ndiʼi ki̱vi̱, ku̱a̱ʼání ña̱ sakuaʼayó xa̱ʼa̱ yiváyó ta̱ kúʼvi̱ní-ini xíni miíyó (Rom. 1:20). Ta ña̱ kúʼvi̱-iniyó xíniyóra kuaʼnukaña. w19.12 19, 20 párr. 15-17

Ta̱ Moisés ke̱ʼéra ña̱ sa̱kuaʼara. Tá xi̱kuumiíra 40 ku̱i̱ya̱, chi̱ka̱a̱-inira ña̱ ndakutáʼanra xíʼin na̱ ñuu Ndióxi̱ na̱ xi̱kuu hebreo, nu̱úka ña̱ koora “se̱ʼe ñá se̱ʼe ta̱ Faraón”. Ta̱ Moisés va̱ása níxiinra kuumiíra iin chiñu káʼnu. Tá nda̱kutáʼanra xíʼin na̱ hebreo, na̱ xi̱kuu esclavo ña̱ ñuu Egipto, ku̱ndaa̱-inira ña̱ sa̱a̱ní ta̱ faraón xíʼinra, iin ta̱ chíñu káʼnu ta̱ ni̱xi̱yo táki̱ʼva íyo iin ndióxi̱ nu̱ú na̱ ñuu Egipto. Soo, ta̱ Moisés ni̱na̱ʼa̱ra ña̱ xi̱kandíxaníra Jehová. Xa̱ʼa̱ ña̱yóʼo, va̱ʼaní xi̱táʼanra xíʼin Jehová ndiʼi tiempo ña̱ xi̱takura (Prov. 3:5). ¿Ndáaña sákuaʼayó? Nda̱a̱ táki̱ʼva i̱xaa ta̱ Moisés, ndiʼiyó xíniñúʼu ndaka̱xin á ndasakáʼnuyó Jehová ta kitáʼanyó xíʼin na̱ ñuura á va̱ása. Tá ná ndasakáʼnuyó Jehová sana xíniñúʼu sandákooyó keʼéyó sava ña̱ʼa, ta nda̱a̱ saxóʼvi̱ na̱ yiví na̱ va̱ása xíni̱ xa̱ʼa̱ra miíyó. Soo tá ná kandíxaníyó yiváyó ta̱ íyo chi ndiví, va̱ása kaka-iniyó ña̱ chindeétáʼanvara xíʼinyó. w19.12 17 párr. 5, 6

Ni xíʼin ñuʼú i̱xava̱ʼa Jehová miíyó, soo ndáyáʼvinívayó nu̱úra. Ná kotoyó ndáa xa̱ʼa̱ kúú ña̱ kúnda̱a̱-iniyó ña̱ ndáyáʼviníyó nu̱ú Ndióxi̱. Tá kúú, i̱xava̱ʼara miíyó ña̱ kivi kuumiíyó ña̱ va̱ʼa ña̱ kúúmiíra (Gén. 1:27). Xa̱ʼa̱ ña̱yóʼo, va̱ʼaníka i̱xava̱ʼara miíyó nu̱ú ndiʼika ña̱ʼa ña̱ i̱xava̱ʼara, ta ta̱xira ña̱ ná kiʼinyó kuenta xíʼin ñuʼú ta saátu xíʼin kití (Sal. 8:4-8). Ni tá ni̱ki̱ʼvi ta̱ Adán ku̱a̱chi, na̱ yiví xi̱ndayáʼvikavana nu̱ú Jehová. Xa̱ʼa̱ ña̱ ndáyáʼviníyó nu̱úra, nda̱a̱ ta̱xira se̱ʼera ta̱ Jesús ña̱ ni̱xi̱ʼi̱ra xa̱ʼa̱ ku̱a̱chiyó (1 Juan 4:9, 10). Tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó, Ndióxi̱ kivi sandátakura na̱ ni̱xi̱ʼi̱ xa̱ʼa̱ ku̱a̱chi ña̱ sa̱ndáya̱ʼa ta̱ Adán ndaʼa̱na, ni ke̱ʼéna ña̱ va̱ʼa á ña̱ va̱ása va̱ʼa (Hech. 24:15). Tu̱ʼunra náʼa̱ña ña̱ ndáyáʼvinívayó nu̱úra, ni ndeé ndóʼoyó á ni kǒo xu̱ʼúnyó, á ni xa̱a̱ ku̱chéeyó (Hech. 10:34, 35). w20.01 15 párr. 5, 6

Ña̱ kána Ndióxi̱ iinna ña̱ ku̱ʼu̱nna chí ndiví su̱ví iin herencia kúúña, chi Ndióxi̱ kúú ta̱ ndáka̱xinna ña̱ ku̱ʼu̱nna (1 Tes. 2:12). Ña̱kán va̱ása nda̱ka̱tu̱ʼunyóna xa̱ʼa̱ iin ña̱ʼa ña̱ sana va̱ása va̱ʼa kuni inkana xíʼin. Tá kúú, nda̱a̱ ni iin yichi̱ va̱ása nda̱ka̱tu̱ʼunyó ñá síʼí iin ta̱ hermano ta̱ nda̱kaxin Ndióxi̱ ku̱ʼu̱n chí ndiví, ndáaña ndákanixi̱níñá xa̱ʼa̱ ña̱ iinlá miíñá koo nu̱ú ñuʼú yóʼo ndiʼi tiempo, ta va̱ása kooka yiíñá xíʼinñá. Chi kúnda̱a̱-iniyó ña̱ nu̱ú ñuyǐví xa̱á Jehová taxira ndiʼi ña̱ sákusi̱í-ini na̱ yiví (Sal. 145:16). Saátu, tá va̱ása xítoyó na̱ nda̱kaxin Ndióxi̱ ku̱ʼu̱n chí ndiví táki̱ʼva íyo na̱ ndáyáʼviní nu̱ú inkana, saá kúú ña̱ ndáayó miíyó. ¿Ndáa ki̱ʼva? Ña̱ Biblia káchiña ña̱ sava na̱ nda̱kaxin Ndióxi̱ ku̱ʼu̱n chí ndiví kivi xa̱a̱na sandákoona ña̱ nda̱kú íyo inina xíʼinra (Mat. 25:10-12; 2 Ped. 2:20, 21). Soo tá va̱ása ndáyáʼviní ña̱ kéʼé iin na̱ yiví nu̱úyó, va̱ása xa̱a̱yó kundiku̱nyó sa̱tá na̱ yiví, ni kúúna na̱ nda̱kaxin Ndióxi̱ ku̱ʼu̱n chí ndiví, á na̱ xíni̱ ku̱a̱ʼání na̱ yiví á na̱ xa̱a̱ ku̱a̱ʼání ku̱i̱ya̱ ndásakáʼnu Jehová (Jud. 16, nota). Ña̱kán tá ná kixaa̱ iin ki̱vi̱ ña̱ sandákoona ña̱ nda̱kú íyo inina xíʼin Ndióxi̱, á tá ná sandákoona congregación, miíyó va̱ása sandákooyó ña̱ kachíñuyó nu̱ú Jehová ni ña̱ kandíxayóra. w20.01 29 párr. 9, 10

Xa̱ʼa̱ ña̱ kúúyó se̱ʼe Jehová na̱ kúʼvi̱ní-inira xínira, chíka̱a̱yó ndee̱ ña̱ kundiku̱nyó yichi̱ra. Náʼa̱yó ña̱ va̱ʼa ña̱ kúúmií Jehová, tá kúni̱yó xíniyó inkana, ta va̱ʼa íyo iniyó, ta íxakáʼnu-iniyó xa̱ʼa̱ inkana. Ki̱vi̱ xíto na̱ yiví na̱ va̱ása xíni̱ xa̱ʼa̱ Ndióxi̱ ña̱ va̱ʼa ña̱ kéʼéyó, sana kuni̱na sakuaʼana xa̱ʼa̱ra (1 Ped. 2:12). Na̱ íyo se̱ʼe xíniñúʼu vií keʼéna xíʼin se̱ʼena, nda̱a̱ táki̱ʼva kéʼé mií Jehová xíʼinyó. Tá saá ná keʼéna, na̱ va̱lí se̱ʼena sana kuni̱na xa̱a̱na koona migo yiváyó Jehová. Saátu kúsi̱í-ini miíyó xa̱ʼa̱ yiváyó ta̱ íyo chí ndiví, ta kúni̱yó ña̱ ná kunda̱a̱-ini inkana xa̱ʼa̱ra. Ndóʼoyó nda̱a̱ táki̱ʼva ndo̱ʼo ta̱ rey David ta̱ ka̱ʼyí ña̱yóʼo: “Xíʼin ña̱ si̱í-ini ka̱ʼi̱n xa̱ʼa̱ Jehová” (Sal. 34:2). Soo savayó kivi yi̱ʼvíyó ka̱ʼa̱nyó xa̱ʼa̱ra xíʼin inkana. ¿Ndáaña kivi chindeétáʼan xíʼinyó? Ña̱ ndakanixi̱níyó xa̱ʼa̱ ña̱ sákusi̱íníyó-ini Jehová, xíʼin xa̱ʼa̱ ña̱ va̱ʼa ña̱ ndákiʼin na̱ kúnda̱a̱-ini xa̱ʼa̱ra. Miíra chindeétáʼan xíʼinyó ña̱ va̱ása yi̱ʼvíyó. Nda̱a̱ táki̱ʼva chi̱ndeétáʼanra xíʼin na̱ hermanoyó na̱ ni̱xi̱yo tá siglo nu̱ú, ki̱ʼva saátu chindeétáʼanra xíʼin miíyó (1 Tes. 2:2). w20.02 11 párr. 12, 13

Ku̱a̱ʼání na̱ káʼviyó Biblia xíʼin, chíka̱a̱na ndee̱ ta xáa̱na ndákuchina. Soo, savana yíʼvina ña̱ xa̱a̱na koona discípulo ta̱ Cristo. Kútóovana kaʼvina, soo va̱ása chíka̱a̱na ndee̱ ña̱ ndakuchina. Ndiʼiyó na̱ káʼvi xíʼin na̱ yiví, kúni̱yó chindeétáʼanyó xíʼinna ña̱ keʼéna ña̱ sákuaʼana, ta xa̱a̱na koona discípulo ta̱ Cristo. Jehová kúni̱ra ña̱ na̱ yiví ná ndasakáʼnunara xa̱ʼa̱ ña̱ kúʼvi̱-inina xíninara. Ña̱kán, kúni̱yó chindeétáʼanyó xíʼin na̱ káʼviyó xíʼin, ña̱ kunda̱a̱-inina ña̱ ndíʼi̱ní-ini Jehová xa̱ʼa̱ iin iinna, ta kúʼvi̱ní-inira xínirana. Kúni̱yó chindeétáʼanyó xíʼinna, ña̱ kotona Jehová nda̱a̱ táki̱ʼva íyo yivá na̱ va̱lí na̱ ndáʼvi, ta̱ ndáa ná ñaʼá ná ni̱xi̱ʼi̱ yií (Sal. 68:5). Tá ná kunda̱a̱-ini na̱ káʼviyó xíʼin ña̱ kúʼvi̱ní-ini Jehová xínirana, saátu miína xa̱a̱na kuʼvi̱ka-inina kuninara. Xa̱ʼa̱ ña̱yóʼo ná chindeétáʼanyó xíʼin na̱ káʼviyó xíʼin, ña̱ kunda̱a̱-inina ña̱ kúni̱ Jehová ña̱ ná ndakiʼinna ña̱ kutakuna ndiʼi tiempo, ta íyo tu̱ʼvara ña̱ chindeétáʼanra xíʼinna. w20.01 3 párr. 7, 8

Ta̱ apóstol Pablo vitá ni̱xi̱yo inira, xa̱ʼa̱ ña̱yóʼo ta̱xira ña̱ ná sandíko na̱ migora inira. Va̱ása níndi̱ʼi̱-inira xa̱ʼa̱ ña̱ kivi ka̱ʼa̱n inka na̱ yiví xa̱ʼa̱ra, tá xi̱ka̱ʼa̱nra xíʼin na̱ hermano ña̱ chindeétáʼanna xíʼinra tá xi̱ndi̱ʼi̱-inira (Col. 4:7-11). Tá xíʼin ña̱ vitá-ini ndákuniyó ña̱ xíniñúʼu taxina ndee̱ ndaʼa̱yó, na̱ hermano xíʼin ña̱ si̱í-ini kivi keʼéna ña̱yóʼo. Ta̱ Pablo xi̱kunda̱a̱-inira ña̱ kivi sandíko tu̱ʼun Ndióxi̱ inira (Rom. 15:4). Ta saátu kivi taxiña ña̱ ndíchi ndaʼa̱ra ña̱ ya̱ʼara nu̱ú nda̱a̱ ndáaka tu̱ndóʼo (2 Tim. 3:15, 16). Ña̱ yichi̱ u̱vi̱ ña̱ xi̱ndika̱a̱ra veʼeka̱a ña̱ ñuu Roma, ku̱ndaa̱-inira ña̱ si̱lóʼo kúma̱ní ta kuvira. Ni̱ka̱ʼa̱nra xíʼin ta̱ Timoteo ña̱ kama ná ku̱ʼu̱nra kotorara, ta ná ku̱ʼu̱n rollo xíʼinra (2 Tim. 4:6, 7, 9, 13). ¿Nda̱chun? Saáchi nu̱ú ña̱ rollo yóʼo, sana va̱xi sava táʼví ña̱ Escrituras Hebreas, ta kivi kuniñúʼuraña ña̱ kaʼvira. Tá ná kaʼvi ni̱ʼiyó Biblia nda̱a̱ táki̱ʼva ke̱ʼé ta̱ Pablo, Jehová kivi kuniñúʼuraña ña̱ sandíkora-iniyó, ni nda̱a̱ ndáaka nu̱ú tu̱ndóʼo ná ya̱ʼayó. w20.02 23 párr. 14, 15

Ta̱ Elifaz, ta̱ Bildad xíʼin ta̱ Zofar va̱ása níxiniñúʼuna tiempo ña̱ xi̱kuumiína, ña̱ ndakanixi̱nína ndáa ki̱ʼva chindeétáʼanna xíʼin ta̱ Job. Chi ña̱ ke̱ʼéna kúú ña̱ nda̱kanixi̱nína ndáa ki̱ʼva na̱ʼa̱na, ña̱ ke̱ʼéra iin ña̱ va̱ása va̱ʼa. Sava ña̱ ni̱ka̱ʼa̱nna ña̱ nda̱a̱va xi̱kuuña, soo ndiʼika ña̱ ni̱ka̱ʼa̱nna xa̱ʼa̱ ta̱ Job xíʼin xa̱ʼa̱ Jehová ña̱ vatáva xi̱kuuña, ta sa̱xóʼvi̱nara. Ta ni̱ka̱ʼa̱nna ña̱ su̱ví iin na̱ yiví va̱ʼa kúú ta̱ Job (Job 32:1-3). ¿Ndáaña ndo̱ʼo Jehová xa̱ʼa̱ ña̱yóʼo? Ni̱sa̱a̱níra xíʼin u̱ni̱ saá na̱ ta̱a yóʼo. Ni̱ka̱ʼa̱nra ña̱ kúúna na̱ kíʼvi, ta ni̱ka̱ʼa̱nra xíʼinna ña̱ ná ka̱ʼa̱nna xíʼin ta̱ Job, ña̱ ná ka̱ʼa̱nra xa̱ʼa̱na xíʼinra (Job 42:7-9). Ku̱a̱ʼá ña̱ sánáʼa̱ ña̱ va̱ása va̱ʼa ña̱ ke̱ʼé ta̱ Elifaz, ta̱ Bildad xíʼin ta̱ Zofar miíyó. Ña̱ nu̱ú, ña̱ va̱ása xíniñúʼu ka̱ʼa̱nyó ña̱ va̱ása va̱ʼa xa̱ʼa̱ na̱ hermanoyó (Mat. 7:2-5). Ta ña̱ xíniñúʼu keʼéyó kúú ña̱ viíní kuniso̱ʼoyó ña̱ káʼa̱nna ta saáví ndakuiinyó yuʼúna. Chi saá kúú ña̱ kivi kunda̱a̱-iniyó xa̱ʼa̱ ña̱ ndóʼona (1 Ped. 3:8). Ña̱ u̱vi̱, tá káʼa̱nyó xíniñúʼu kotoyó á vií íyo tu̱ʼunyó ta á ña̱ nda̱a̱ kúúña (Efes. 4:25). Ta ña̱ u̱ni̱, Jehová ndíʼi̱-inira xa̱ʼa̱ ña̱ káʼa̱nyó xíʼin táʼanyó. w20.03 22, 23 párr. 15, 16

Va̱ʼaníka xáa̱yó sákuaʼayó xa̱ʼa̱ Jehová tá sánáʼa̱yó inkana xa̱ʼa̱ra. Tá kúú, xítoyó ña̱ kúndáʼvi-inira xínira na̱ yiví tá chíndeétáʼanra xíʼinyó, ña̱ ndani̱ʼíyó na̱ yiví na̱ kúni̱ sákuaʼa xa̱ʼa̱ra (Juan 6:44; Hech. 13:48). Saátu, xítoyó ndee̱ ña̱ kúúmií tu̱ʼunra, tá kíxáʼa na̱ káʼviyó xíʼin sándakoona ña̱ va̱ása va̱ʼa ña̱ kéʼéna, ta kíxáʼana nása̱mana (Col. 3:9, 10). Ta xítoyó, ña̱ kúee íyo inira saáchi táxira ña̱ tuku ta tuku ku̱ʼu̱nyó natúʼunyó xíʼin na̱ yiví, ña̱ va̱ʼa sakuaʼana xa̱ʼa̱ra ta ka̱kuna (Rom. 10:13-15). Xíniñúʼu kundayáʼvi ña̱ kítáʼanyó xíʼin Jehová nu̱úyó, ni xa̱a̱ nda̱saaka tiempo kúú ña̱ káchíñuyó nu̱úra. Iin ki̱ʼva ña̱ kivi na̱ʼa̱yó ña̱ ndáyáʼvi ña̱ kítáʼanyó xíʼinra, kúú ña̱ ka̱ʼa̱nyó xíʼinra ti̱xin ña̱ oración. Tá viíní nátúʼun xíʼin táʼan u̱vi̱ na̱ yiví, saá kúú ña̱ va̱ʼaníka xáa̱na kítáʼanna. Xa̱ʼa̱ ña̱yóʼo, ná ka̱ʼa̱n ni̱ʼiyó xíʼin Jehová, ta ná va̱ása yi̱ʼvíyó ña̱ ka̱ʼa̱nyó xíʼinra xa̱ʼa̱ ña̱ ndóʼoyó xíʼin ña̱ ndákanixi̱níyó. w19.12 19 párr. 11, 13, 14

Va̱ʼaní kúniyó tá kúnda̱a̱-iniyó ña̱ kúú ta̱ Jesús rey ta̱ nda̱kaxin Ndióxi̱ kaʼndachíñu ta ndasaviíra ndiʼi ña̱ va̱ása va̱ʼa ña̱ kéʼé ta̱ Ndi̱va̱ʼa xíʼin ñuyǐvíra, saá kúú ña̱ ndátuyó koo ña̱ va̱ʼa chí nu̱únínu (Is. 65:17; 1 Juan 3:8; Rev. 21:3, 4). Saátu ña̱ kúnda̱a̱-iniyó ña̱ íyo ta̱ Jesús xíʼinyó tá nátúʼunyó xa̱ʼa̱ Ndióxi̱, chíndeétáʼanña xíʼinyó ña̱ ndakúka íyo iniyó (Mat. 28:19, 20). Ña̱ ndixa kúúña chi tá íyo ña̱ sándi̱ko-iniyó, ña̱ va̱ʼa ña̱ ndátuyó ta saátu ña̱ ndakú íyo iniyó, saá kúú ña̱ ndixa táxinní koo iniyó. Tá saá, ¿ndáaña keʼéyó ña̱kán táxin koo iniyó ni tá yáʼayó nu̱ú tu̱ndóʼo? Xíniñúʼu kundiku̱nyó yichi̱ ta̱ Jesús. Ña̱ nu̱ú, va̱ása xíniñúʼu sandákooyó ña̱ ka̱ʼa̱n ni̱ʼiyó xíʼin Ndióxi̱. Ña̱ u̱vi̱, ná kandíxayó ña̱ káʼa̱n Jehová ta ná natúʼunyó xíʼin ña̱ si̱í-ini ni tá va̱xi tu̱ndóʼo nu̱úyó. Ta ña̱ u̱ni̱, ná taxiyó chindeétáʼan na̱ migoyó xíʼinyó. Saá kúú ña̱ va̱ʼa koo xi̱níyó xíʼin níma̱yó chi Ndióxi̱ taxi ña̱ táxin kooña (Fili. 4:6, 7). Ta, nda̱a̱ táki̱ʼva ke̱ʼé ta̱ Jesús, kuchiñuyó ya̱ʼayó nu̱ú nda̱a̱ ndáaka tu̱ndóʼo ná kixi nu̱úyó (Juan 16:33). w19.04 13 párr. 16, 17