Octubre

Íyo ku̱a̱ʼání ña̱ náʼa̱ nu̱úyó vitin ña̱ ndáava Jehová na̱ ñuura. Ná ndakanixi̱níyó xa̱ʼa̱ ña̱yóʼo: miíyó xíkayó nátúʼunyó xa̱ʼa̱ ña̱ nda̱a̱ iníísaá nu̱ú ñuʼú yóʼo (Mat. 28:19, 20). Xíʼin ña̱yóʼo náʼa̱yó nu̱ú na̱ yiví ña̱ va̱ása va̱ʼa ña̱ kéʼé ta̱ Ndi̱va̱ʼa. Tá ndixa kúchiñura, kiviva kasira nu̱úyó ña̱ natúʼunyó xa̱ʼa̱ ña̱ nda̱a̱. Soo va̱ása kúchiñura. Xa̱ʼa̱ ña̱yóʼo va̱ása xíniñúʼu yi̱ʼvíyó kuniyó na̱ ta̱chí ndi̱va̱ʼa. Tá nda̱kú íyo iniyó xíʼinra, na̱ ta̱chí ndi̱va̱ʼa va̱ása kuchiñuna saxóʼvi̱na miíyó xíʼin iin ña̱ʼa ndiʼi tiempo. Tá saá ná keʼéyó, ku̱a̱ʼání ña̱ va̱ʼa taxira ndaʼa̱yó. Tá kúú, ta̱ Ndi̱va̱ʼa va̱ása sandáʼvikara miíyó. Saátu va̱ása sandákooyó ña̱ kachíñuyó nu̱ú Ndióxi̱ xa̱ʼa̱ ña̱ yíʼviyó na̱ ta̱chí ndi̱va̱ʼa. Tasaá xa̱a̱yó kitáʼan va̱ʼakayó xíʼin Jehová. Ta̱ discípulo Santiago ka̱ʼyíra ña̱yóʼo: “Va̱ása keʼéndó ña̱ kúni̱ ta̱ Ndi̱va̱ʼa, ta ta̱yóʼo kuxíkara nu̱úndó. Kuyatinndó nu̱ú Ndióxi̱ tasaá kuyatinra nu̱úndó” (Sant. 4:7, 8). w19.04 24 párr. 15; 25 párr. 18

Na̱ íyo se̱ʼe kúú na̱ íyo chiñu nu̱ú ña̱ kundaana se̱ʼena nu̱ú nda̱a̱ ndáaka ña̱ʼa ña̱ kivi saxóʼvi̱-ñaʼá. Ndóʼó na̱ íyo se̱ʼe, na̱ va̱lí se̱ʼendó iin regalo ña̱ ndáyáʼviní kúúna chi Jehová ta̱xina ndaʼa̱ndó. Chiñu nu̱úndó kúú ña̱ kundaandó na̱yóʼo. ¿Ndáaña kivi keʼéndó ña̱kán va̱ása keʼéna ña̱ kini xíʼin se̱ʼendó? Ña̱ nu̱ú, nandukú va̱ʼandó xa̱ʼa̱ ña̱ káʼa̱n xa̱ʼa̱ na̱ kéʼé ña̱ kini xíʼin na̱ va̱lí. Xíniñúʼu kunda̱a̱-inindó nda̱saa íyo na̱ yiví na̱ kéʼé ña̱ kini yóʼo xíʼin na̱ va̱lí ta nda̱saa sándáʼvinana. Ta kiʼinníndó kuenta xíʼin ña̱ kivi kundoʼona (Prov. 22:3; 24:3). Ndakaʼándó chi na̱ kéʼé ña̱ kini yóʼo kúú iin na̱ xíni̱ va̱ʼa mií na̱ va̱lí yóʼo. Ña̱ u̱vi̱, natúʼun ni̱ʼindó xíʼin na̱ va̱lí se̱ʼendó (Deut. 6:6, 7; Sant. 1:19). Ndakaʼánndó chi sava yichi̱ íxayo̱ʼvi̱ña xíʼin na̱ va̱lí yóʼo ña̱ natúʼunna xa̱ʼa̱ iin ña̱ ku̱u. Sana yíʼvina natúʼunna xa̱ʼa̱ ña̱ va̱ása kandíxandóna. Á sanatu na̱ ke̱ʼé ña̱ kini xíʼinna sa̱yíʼvinana ña̱ va̱ása natúʼunna xa̱ʼa̱na. Tá sana xítondó ña̱ íyo ña̱ kúu, nda̱ka̱tu̱ʼunndóna ta vií kuniso̱ʼondó tá káʼa̱nna xíʼinndó. Ña̱ u̱ni̱, natúʼunndó xíʼin na̱ va̱lí se̱ʼendó xa̱ʼa̱ ña̱ kivi kundoʼona. Sanáʼa̱ndóna ndáaña xíniñúʼu keʼéna ta ndáaña ka̱ʼa̱nna tá iinna kúni̱na tiinna nu̱ú va̱ása xíniñúʼu tiinna. w19.05 13 párr. 19-22

¿Nda̱chun kúndasí nu̱ú Jehová xínira na̱ ni̱nuní kúni? Saáchi kúni̱na kundayáʼvikana, ta saátu sánáʼa̱na inkana ña̱ keʼéna ña̱yóʼo, saá náʼa̱na ña̱ kúúmií ta̱ Ndi̱va̱ʼa. Ta̱yóʼo nda̱kanixi̱níra ña̱ kuchiñura sandáʼvira ta̱ Jesús, ta̱ ka̱chíñu xíʼin Ndióxi̱ ña̱ ku̱va̱ʼa ndiʼi ña̱ʼa, ña̱ kuxítíra nu̱úra ta ndasakáʼnurara (Mat. 4:8, 9; Col. 1:15, 16). Ña̱ ni̱nuní kúni na̱ yiví náʼa̱ña nu̱úyó nda̱chun ni va̱ása va̱ʼa ña̱ ndíchi ña̱ kúúmií na̱ ñuyǐví yóʼo nu̱ú Ndióxi̱ (1 Cor. 3:19). Soo ña̱ Biblia chíndeétáʼanña xíʼinyó ña̱ va̱ása ndakanixi̱níyó ña̱ ndáyáʼviníyó. Káʼa̱nña xíʼinyó ña̱ va̱ʼava kuʼvi̱-iniyó kuniyó miíyó. Tá kúú ta̱ Jesús ni̱ka̱ʼa̱nra: “Xíniñúʼu kuʼvi̱-iniún kuniún inkana nda̱a̱ táki̱ʼva kúʼvi̱-iniún xíniún miíún” (Mat. 19:19). Ña̱yóʼo kúni̱ kachiña ña̱ xíniñúʼu ndi̱ʼi̱-iniyó xa̱ʼa̱yó soo xíʼin ki̱ʼva keʼéyóña. Ña̱ Biblia va̱ása káʼa̱nña ña̱ kundayáʼvikayó nu̱ú inkana. Ña̱ káʼa̱nña xíʼinyó kúú ña̱ viíní ná ndakanixi̱níyó nda̱a̱ táki̱ʼva kúni̱ Ndióxi̱ ta ná kotoyó inkana nda̱a̱ táki̱ʼva íyo na̱ ndáyáʼvika (Filip. 2:3; Rom. 12:3). w19.05 24 párr. 13, 14

Ná ndakaʼányó xa̱ʼa̱ ndiʼi ña̱ʼa ña̱ na̱samayó tá na̱kunda̱a̱-iniyó xa̱ʼa̱ ña̱ nda̱a̱ ña̱ sánáʼa̱ tu̱ʼun Ndióxi̱, tá ki̱xáʼayó káchíñuyó nu̱ú Jehová. Ku̱a̱ʼáníyó sa̱ndákooyó keʼéyó ña̱ʼa ña̱ va̱ása va̱ʼa (1 Cor. 6:9-11). Táxiníyó tíxa̱ʼvi ndaʼa̱ Ndióxi̱ xa̱ʼa̱ ña̱ chi̱ndeétáʼanra xíʼinyó ña̱ sa̱ndákooyó keʼéyó ndiʼi ña̱yóʼo. Soo xíniñúʼu ndakundeékayó nasa̱mayó. Ni xa̱a̱ sa̱ndákooyó ndiʼi ña̱ kini ña̱ xi̱keʼéyó tá kúma̱níka ña̱ ndakuchiyó, xíniñúʼu chika̱a̱yó ndee̱ ña̱ va̱ása ndikó tukuyó keʼéyó ña̱yóʼo. Xa̱ʼa̱ ña̱yóʼo xíniñúʼu keʼéyó u̱vi̱ ña̱ʼa. Ña̱ nu̱ú, xíniñúʼu sandákooyó keʼéyó táʼan ña̱ kéʼé na̱ ñuyǐví. Ña̱ u̱vi̱, xíniñúʼu nasamayó á ndasaxa̱áyó ndiʼi ña̱ ndákanixi̱níyó. Xíniñúʼu nasama ndiʼiyó miíyó ta su̱ví chí sa̱tá kuitíyó nasamayó. Ta saátu xíniñúʼu ndasaxa̱áyó ndiʼi ña̱ ndákanixi̱níyó, ña̱ kéʼéyó xíʼin ndiʼi ña̱ ndíka̱a̱ se̱ʼé níma̱yó. w19.06 9 párr. 4-6

Kiviva ndakiʼinyó ndee̱ tá ná ku̱ʼu̱nyó reunión. Tá xáʼa̱nyó kúni̱ kachiña ña̱ táxiyó ná chindeétáʼan Jehová xíʼinyó ta sandíkora-iniyó. Ti̱xin reunión kúú nu̱ú táxira espíritu santora ndaʼa̱yó ta saátu tu̱ʼunra ña̱ táxi ndee̱ ndaʼa̱yó. Kán kúú nu̱ú kivi chika̱a̱yó ndee̱ xíʼin táʼanyó (Rom. 1:11, 12). Iin ñá hermana ñá naní Sofía káchiñá: “Jehová xíʼin na̱ hermano chi̱ka̱a̱nína ndee̱ xíʼi̱n. Ña̱ xi̱xaʼi̱n reunión kúú ña̱ xi̱ndayáʼvika nu̱úi̱. Kíʼi̱n kuenta ña̱ tá ndeéka chíka̱a̱i̱ ndee̱ ña̱ ku̱ʼi̱n natúʼi̱n xa̱ʼa̱ Ndióxi̱ ta chindeétáʼi̱n xíʼin inkana ti̱xin congregación, saá kúú ña̱ ndakúka íyo inii̱ ña̱ yáʼi̱ nu̱ú tu̱ndóʼo”. Tá ndákava-iniyó ná ndakaʼányó xa̱ʼa̱ ña̱ káʼa̱n Jehová, ña̱ su̱ví kuití chí nu̱únínu sandíʼi-xa̱ʼa̱ra ndiʼi ña̱ sáxo̱ʼvi̱-iniyó chi saátu tiempo vitin chíndeétáʼanra xíʼinyó. Miíra táxi ndee̱ ndaʼa̱yó ña̱ kuchiñuyó xíʼin tu̱ndóʼo ña̱ ndóʼoyó (Filip. 2:13). w19.06 19 párr. 17, 18

Ña̱ nu̱ú ke̱ʼé ta̱ Jesús tá nda̱takura kúú ña̱ nda̱kutáʼanra xíʼin na̱ discípulora, ña̱ va̱ʼa taxira iin chiñu ña̱ ndáyáʼviní ndaʼa̱na. Tá nda̱kutáʼan ta̱ Jesús xíʼin na̱ discípulora, ta̱xira iin chiñu ña̱ ndáyáʼviní ndaʼa̱na ña̱ keʼéna tá siglo nu̱ú, ta ña̱kán kúú ña̱ kéʼé miíyó nda̱a̱ tiempo vitin. Ni̱ka̱ʼa̱nra xíʼinna: “Ña̱kán, kúáʼanndó ta sanáʼa̱ndó na̱ yiví ña̱ iníísaá ñuyǐví, ña̱ ná kundiku̱nna yi̱ʼi̱. [...] Sanáʼa̱ndóna ña̱ ná kuniso̱ʼona ndiʼi ña̱ ni̱ka̱ʼi̱n xíʼinndó” (Mat. 28:19, 20). Ta̱ Jesús kúni̱ra ña̱ ndiʼi na̱ ndíku̱nñaʼá ná ku̱ʼu̱nna natúʼunna xíʼin na̱ yiví. Ta su̱ví nda̱saa ndaʼa̱ na̱ 11 apóstol nítaxira chiñu yóʼo. ¿Nda̱chun káʼa̱nyó ña̱yóʼo? Saáchi, su̱ví nda̱saa na̱ apóstol kúú na̱ ndóo tá ta̱xi ta̱ Jesús chiñu ndaʼa̱na chí yuku̱ ña̱ Galilea, ña̱ ku̱ʼu̱nna sanáʼa̱na na̱ yiví. Ná ndakaʼányó chi ta̱ ángel ni̱ka̱ʼa̱nra xíʼin ná ñaʼá, ña̱ chí Galilea kuniná ta̱ Jesús (Mat. 28:7). Ña̱kán, sana ni̱xa̱ʼa̱ntu ku̱a̱ʼá ná ñaʼá tá nda̱kutáʼanna chí Galilea. w20.01 2, 3 párr. 1-4

Mií ta̱ Jesús ni̱ka̱ʼa̱n ña̱ kundasí na̱ ñuyǐví kunina miíyó, saáchi va̱ása kítáʼanyó xíʼinna. Soo kǒo kúni̱ kachi ña̱yóʼo ña̱ va̱ása va̱ʼaka íyoyó nu̱ú Jehová. Chi ña̱ va̱ʼava kúú ña̱ kéʼéyó nu̱úra. Ni iin na̱ yiví va̱ása kuchiñuna sandiʼi-xa̱ʼa̱na ña̱ ndásakáʼnuyó Jehová ta̱ kúúmií ndiʼi ndee̱. Ku̱a̱ʼání na̱ sáa̱-ini xíni Jehová xi̱kuni̱na keʼéna ña̱yóʼo, soo va̱ása níkuchiñuna. Ná ndakanixi̱níyó xa̱ʼa̱ ña̱ ku̱u tá ni̱xi̱yo ña̱ Segunda Guerra Mundial. Ku̱a̱ʼá na̱ chíñu na̱ xa̱a̱ síín síín país, sa̱xóʼvi̱na na̱ testigo Jehová. Su̱ví kuití na̱ nazi ña̱ ñuu Alemania nísasi nu̱ú na̱ testigo, chi saátu na̱ chíñu ña̱ ñuu Australia xíʼin ña̱ Canadá ta saátu xíʼin inkaka país. Ni saá ke̱ʼéna, íyo iin ña̱ ku̱u, tíxa̱ʼvi Jehová. Tá ku̱i̱ya̱ 1939, tá ki̱xáʼa ku̱a̱chi kán, ni̱xi̱yo 72,475 na̱ nátúʼun xa̱ʼa̱ Ndióxi̱ iníísaá nu̱ú ñuʼú, soo tá ndi̱ʼi ku̱a̱chi tá ku̱i̱ya̱ 1945 ku̱a̱ʼáka ndu̱una ta ni̱xa̱a̱na ku̱una 156,299. Ña̱kán ndu̱ku̱a̱ʼáníva na̱ publicador. w19.07 9 párr. 4, 5

Ni tá vitin kǒo iin na̱ káʼviyó xíʼin, soo kivi keʼéyó inka ña̱ʼa ña̱ va̱ʼa chindeétáʼanyó xíʼin inkana ña̱ xa̱a̱na kundiku̱nna ta̱ Cristo. Tá kúú, tá ku̱a̱ʼa̱n iin na̱ xa̱á reunión, kivi vií ndakiʼinyóna ña̱ va̱ʼa kunina. Saá chindeétáʼanyó xíʼinna ña̱ kunda̱a̱-inina ña̱ kúʼvi̱-ini miíyó na̱ ndásakáʼnu Ndióxi̱ xínitáʼanyó. Saátu, tá táxiyó sava comentario ti̱xin reunión ni loʼoña, kivi chindeétáʼanña xíʼinna ña̱ ka̱ʼa̱nna xa̱ʼa̱ ña̱ kándíxana xíʼin ndiʼi níma̱na. Ta saátu kivi kitayó xíʼin iin na̱ publicador xa̱á, ta chindeétáʼanyó xíʼinna ña̱ kuniñúʼuna Biblia ña̱ natúʼunna xíʼin na̱ yiví xa̱ʼa̱ Ndióxi̱. Tá saá kéʼéyó, sánáʼa̱yóna ña̱ kundiku̱nna yichi̱ ta̱ Cristo (Luc. 10:25-28). Ku̱a̱ʼání na̱ ndásakáʼnu Ndióxi̱ íyo ku̱a̱ʼání chiñu nu̱úna ta xa̱ʼa̱ ña̱yóʼo kǒo tiempona. Soo ni saá chíka̱a̱na ndee̱ ña̱ tavána tiempo ña̱ ku̱ʼu̱nna sanáʼa̱na na̱ káʼvina xíʼin, iin chiñu ña̱ sákusi̱íní-inina. w19.07 17 párr. 11, 13

Ta̱ apóstol Pablo kǒo nítaxira ña̱ kasi ni iin ña̱ʼa ña̱ va̱ása va̱ʼa ña̱ ke̱ʼéra tá ya̱chi̱ nu̱úra á ña̱ʼa ña̱ ku̱chiñura ke̱ʼéra. Saátu ni̱ka̱ʼa̱nra ña̱ va̱ʼa kúú ña̱ na̱ndósóra xa̱ʼa̱ ña̱ʼa ña̱ xa̱a̱ ni̱ndo̱o chí sa̱tá, chi saá kivi chika̱a̱ra ndee̱ ña̱ ndakiʼinra ña̱ kúma̱níka kixaa̱ ta sandíʼira ña̱ xínura. ¿Ndáa ña̱ʼa kúú ña̱ kivi kasi nu̱úra? Ña̱ nu̱ú, ndiʼi ña̱ʼa ña̱ nda̱kiʼinra tá xi̱ndiku̱nra veʼe-ñu̱ʼu na̱ judío. Soo va̱ása níxindáyáʼviña nu̱úra chi nda̱a̱ táki̱ʼva íyo iin koʼndo basura saá íyoña (Filip. 3:3-8). Ña̱ u̱vi̱, ña̱ xi̱keʼéra ña̱ va̱ása va̱ʼa xíʼin na̱ cristiano. Soo va̱ása nítaxira ña̱ sandákava ña̱yóʼo inira. Ta ña̱ u̱ni̱, va̱ása níndakanixi̱níra ña̱ xa̱a̱ ku̱a̱ʼání kúú chiñu ña̱ kéʼéra. Ku̱a̱ʼání ña̱ va̱ʼa nda̱kiʼinra, ni chi̱ka̱a̱nara veʼeka̱a, ka̱ninara xíʼin yu̱u̱, ta barco tú xi̱xa̱ʼa̱nra xi̱kiʼvinú ti̱xin ti̱kui̱í ta kǒo ña̱ kuxura níxi̱yo ta ni ti̱ko̱to̱ra (2 Cor. 11:23-27). Ni ku̱a̱ʼání ña̱ ni̱xo̱ʼvi̱ra xi̱kunda̱a̱-inira ña̱ xíniñúʼu chika̱a̱ra ndee̱. Ta saátu xíniñúʼu keʼé miíyó. w19.08 3 párr. 5

Ku̱a̱ʼání na̱ hermano íyona país nu̱ú va̱ása kívi natúʼunna xa̱ʼa̱ Ndióxi̱ nu̱ú íyo ku̱a̱ʼá na̱ yiví ni veʼe tá veʼe, soo ndúkúna inka ki̱ʼva ña̱ kéʼénaña (Mat. 10:17-20). Ti̱xin sava ña̱ ñuu yóʼo, iin ta̱ superintendente ña̱ circuito ni̱ka̱ʼa̱nra ña̱ iin iin na̱ publicador ná chika̱a̱na ndee̱ ña̱ natúʼunna xíʼin na̱ veʼena, na̱ íyo yatin xíʼinna, na̱ káʼvi xíʼinna escuela á na̱ káchíñu xíʼinna, xíʼin inkaka na̱ xíni̱táʼanna xíʼin. Ti̱xin ña̱ u̱vi̱ ku̱i̱ya̱, ndu̱u ku̱a̱ʼáka congregación ña̱ íyo ti̱xin ña̱ circuito kán. Sana nu̱ú íyo miíyó kǒo ña̱ sási nu̱úyó ña̱ natúʼunyó. Soo ni saá sákuaʼayó iin ña̱ ndáyáʼviní xíʼin ña̱ ke̱ʼé na̱ hermano yóʼo, ná chika̱a̱yó ndee̱ ña̱ ndukúyó ndáa ki̱ʼva natúʼunyó, ta ná kandíxayó ña̱ mií Jehová taxi ndee̱ ndaʼa̱yó ña̱ keʼéyóña ni íyo ña̱ sási nu̱úyó (Filip. 2:13). Tiempo vitin kúú ña̱ xíniñúʼu chika̱a̱yó ndee̱ ña̱ kundi̱ʼi̱ka-iniyó xa̱ʼa̱ ña̱ʼa ña̱ ndáyáʼvika, ná kǒo kuumiíyó ni iin ña̱ va̱ása va̱ʼa, ná va̱ása sandákavayó-ini inkana ta ná chika̱a̱yó ndee̱ ña̱ keʼéyó ña̱ va̱ʼa. Tá saá kéʼéyó, ña̱ kúʼvi̱-iniyó xínitáʼanyó kuaʼnukaña ta ndasakáʼnuyó Jehová ta̱ kúʼvi̱ní-ini xíni miíyó. w19.08 13 párr. 17, 18

Ña̱ nda̱a̱ kúú ña̱ va̱ása kutóoyó kutáʼanyó xíʼin na̱ yiví na̱ kúni̱ keʼé ña̱ kúni̱ miína, ta va̱ása xíniso̱ʼona ña̱ káʼa̱n inkana. Soo ki̱vi̱ kítáʼanyó xíʼin na̱ hermano na̱ vitá íyo ini ta náʼa̱na ña̱ ndíʼi-inina xa̱ʼa̱yó ta kúʼvi̱-inina xínina miíyó va̱ʼaní kúniyó (1 Ped. 3:8). Ña̱kán tá saá ndóʼoyó, saátu va̱ʼa kúni inkana xíʼinyó tá vitá íyo iniyó xíʼinna. Ña̱ vitá íyo iniyó chíndeétáʼanña xíʼinyó ña̱ ya̱ʼayó nu̱ú ña̱ íxayo̱ʼvi̱ xíʼinyó. Sava yichi̱ kivi ndakanixi̱níyó ña̱ va̱ása va̱ʼa íyo ña̱ yáʼayó nu̱ú. Su̱ví ndiʼi tiempo ndáyáʼvi na̱ yiví na̱ xíni̱ní, chi sava yichi̱ na̱ ndáyáʼvika kúú na̱ kǒo xíni̱ va̱ʼa. Soo ta̱ Salomón na̱kunda̱a̱-inira ña̱ va̱ʼaníka kúú ña̱ ná kǒo ndakanixi̱níyó ña̱ kéʼéna ña̱ va̱ása va̱ʼa xíʼinyó (Ecl. 6:9). Tá vitá íyo iniyó kusi̱í-iniyó xíʼin ña̱ xa̱a̱ kúúmiíyó ta kǒo kundi̱ʼi̱ní-iniyó xa̱ʼa̱ ña̱ʼa ña̱ túviyó xíniñúʼu kuumiíyó. w19.09 4 párr. 9, 10

Na̱ anciano xíʼin na̱ íyo se̱ʼe, kivi chindeétáʼanna xíʼin inkana. Jehová ta̱xira chiñu ndaʼa̱ ta̱ íyo se̱ʼe ña̱ kuniʼira yichi̱ nu̱ú na̱ veʼera ta vií sakuaʼnura se̱ʼera, ta ka̱ʼa̱nra xíʼinna ndáaña va̱ása va̱ʼa keʼéna (1 Cor. 11:3). Soo xa̱ʼa̱ ña̱ kúúra ta̱ níʼi yichi̱ va̱ása kúni̱ kachiña ña̱ keʼéra ña̱ kúni̱ miíra. Xíniñúʼu ndataxira kuenta ndaʼa̱ Jehová xa̱ʼa̱ ña̱ kéʼéra xíʼin na̱ veʼera (Efes. 3:14, 15). Ta̱a ta̱ íyo se̱ʼe náʼa̱ra ña̱ ndíku̱nra Ndióxi̱ ta vií níʼira yichi̱ nu̱ú na̱ veʼera táki̱ʼva kúni̱ Jehová. Viíní keʼéndó chiñu ña̱ ta̱xi Jehová ndaʼa̱ndó. Ndakunindó ku̱a̱chindó, ta kuniso̱ʼondó consejo ña̱ va̱xi nu̱ú Biblia ña̱ táxina ndaʼa̱ndó. Tá saá ná keʼéndó, ná síʼíndó xíʼin na̱ va̱lí se̱ʼendó ixato̱ʼóna ndóʼó xa̱ʼa̱ ña̱ vitá íyo inindó. Ta saátu tá inkáchi káʼa̱nndó xíʼin Ndióxi̱, ka̱ʼa̱nndó xíʼinra xíʼin ndiʼi níma̱ndó. Saá kunda̱a̱-ini na̱ veʼendó nda̱saa ndakú íyo ña̱ kándíxandó Ndióxi̱. Chi ña̱ ndáyáʼvika kúú ña̱ ndasakáʼnundó Ndióxi̱ (Deut. 6:6-9). Iin ña̱ va̱ʼaní ña̱ kivi taxindó ndaʼa̱ na̱ veʼendó kúú ña̱ chinúundó iin yichi̱ va̱ʼa nu̱úna. w19.09 15 párr. 8; 17 párr. 14; 18 párr. 16

Xi̱kusi̱íní-ini ta̱ Marcos ña̱ xi̱chindeétáʼanra xíín inkana. Ku̱a̱ʼá yichi̱ ni̱xa̱ʼa̱nra xíʼin ta̱ apóstol Pablo xíʼin ta̱ Pedro tá xi̱xa̱ʼa̱nna xi̱natúʼunna. Ta̱yóʼo kúú ta̱ xi̱satá ña̱ xi̱xixina, ta saátu xi̱ndukúra nu̱ú ku̱su̱nna, ta saátu xi̱keʼéra inkaka ña̱ʼa (Hech. 13:2-5; 1 Ped. 5:13). Ta̱ Pablo ni̱ka̱ʼa̱nra ña̱ ta̱yóʼo va̱ʼaní ka̱chíñura xíʼinra ña̱ na̱túʼunna xa̱ʼa̱ Reino Ndióxi̱, ta va̱ʼaní chi̱ndeétáʼanra xíʼinra ta sa̱ndíkora-inira (Col. 4:11, nota). Ta̱ Marcos xíʼin ta̱ Pablo va̱ʼaní ni̱xa̱a̱na ki̱táʼanna. ¿Nda̱chun káʼa̱nyó ña̱yóʼo? Tá yichi̱ so̱ndíʼi ña̱ xi̱ndika̱a̱ ta̱ Pablo veʼeka̱a chí ñuu Roma, tá ku̱i̱ya̱ 65 ka̱ʼyíra carta u̱vi̱ ña̱ ku̱a̱ʼa̱n ndaʼa̱ ta̱ Timoteo. Nu̱ú ña̱kán, ni̱ka̱ʼa̱nra xíʼin ta̱ Timoteo ña̱ ná ku̱ʼu̱nra ña̱ ñuu Roma, ta ná ku̱ʼu̱n ta̱ Marcos xíʼinra (2 Tim. 4:11). Xi̱ndayáʼviní chiñu ña̱ xi̱keʼé ta̱ Marcos nu̱ú ta̱ Pablo, ña̱kán ni̱ka̱ʼa̱nra xíʼinra ña̱ ná koo yatinra xíʼinra tá xi̱ndika̱a̱ra nu̱ú tu̱ndóʼo. Ta ku̱a̱ʼání ki̱ʼva chi̱ndeétáʼan ta̱ Marcos xíʼinra, tá kúú ña̱ xi̱xa̱ʼa̱nra xi̱taxira ña̱ kuxura xíʼin ña̱ xi̱xiniñúʼura ña̱ kaʼyíra carta. Ña̱ chi̱ndeétáʼan ta̱ Marcos xíʼin ta̱ Pablo ta saátu ña̱ ta̱xira ndee̱ ndaʼa̱ra, chi̱ndeéníñara ña̱ ku̱ndeé-inira tá kúma̱ní si̱lóʼo ki̱vi̱ ña̱ kuvira. w20.01 11 párr. 12, 13

Miíyó kúú na̱ nda̱ka̱xin ña̱ xo̱ʼvi̱yó. Ta mií ta̱ Jesús xa̱a̱ ni̱ka̱ʼa̱nra xíʼinyó ña̱ ixandi̱va̱ʼana xíʼinyó. Soo kiviva kándíxayó ña̱ mií Jehová táxi ndee̱ ndaʼa̱yó, ña̱ va̱ʼa kundeé-iniyó ya̱ʼayó nu̱ú nda̱a̱ ndáaka tu̱ndóʼo. Ta ná kundeé-iniyó saa kúú ña̱ ndakúníka koo iniyó (Sant. 1:2-4). Saátu kivi kandíxayó ña̱ mií Jehová táxi ña̱ xíniñúʼuyó, ta saátu ña̱ kuniʼi ta̱ Jesús yichi̱ nu̱úyó ta na̱ hermanoyó chika̱a̱na-ndee̱ xíʼinyó (Mat. 6:31-33; Juan 10:14; 1 Tes. 5:11). Ñá ñaʼá ñá xíta̱ ni̱i̱ ñá sa̱ndáʼa ta̱ Jesús mií ki̱vi̱ saá va̱ʼaní ku̱niñá (Luc. 8:43-48). Soo tá níndaka̱xinñá ña̱ kundiku̱nñá ta̱ Jesús saá kúú ña̱ va̱ása kiʼinka kue̱ʼe̱ miíñá. ¿Ndáaña ke̱ʼéñá? Tá nda̱ka̱xinñá ña̱ kundiku̱nñá ta̱ Jesús, nda̱kiʼinñá iin ña̱ va̱ʼaní ña̱ kooñá xíʼinra chí ndiví. Nda̱a̱ ndáaka ña̱ ke̱ʼéñá va̱ása kítáʼanña xíʼin ña̱ ndakiʼinñá. Nda̱á ndáaka ña̱ ndátuyó, kúúyó na̱ ku̱ʼu̱n kundoo chí ndiví á nu̱ú ñuʼú yóʼo, kivi kusi̱í-iniyó xa̱ʼa̱ ña̱ ka̱ndíxayó ña̱ ni̱ka̱ʼa̱n ta̱ Jesús xíʼinyó: “Kixindó nu̱úi̱”. w19.09 25 párr. 21, 22

Iin yichi̱, na̱ ta̱a na̱ kítáʼan xíʼin ta̱ David ndu̱kúna loʼo ña̱ kuxuna nu̱ú iin ta̱a ta̱ ku̱i̱ká ta̱ naní Nabal. Ta va̱ása níkukaʼan nu̱úna ña̱ ndukúna ña̱yóʼo nu̱úra, chi xi̱ndaana kití sa̱na̱ra chí nu̱ú ñuʼú yi̱chí. Soo ta̱ Nabal va̱ása níxiinra taxira ña̱ kuxuna. Ta xa̱ʼa̱ ña̱yóʼo ni̱sa̱a̱ní ta̱ David, ta xi̱kuni̱ra kaʼníra ta̱ Nabal xíʼin ndiʼi na̱ kítáʼan xíʼinra (1 Sam. 25:3-13, 22). Tasaá, ñá síʼí ta̱ Nabal ñá Abigaíl va̱ása nítaxiñá keʼéra ña̱yóʼo. Ñáyóʼo ndakúní ni̱xi̱yo iniñá chi ni̱xa̱ʼa̱nñá na̱ndukúñá ta̱ David, ta ku̱xítíñá nu̱úra ta ni̱ka̱ʼa̱nñá xíʼinra ña̱ ná va̱ása kaʼnírana. Ta ni̱ka̱ʼa̱nñá xíʼinra ña̱ ná sandákoora ku̱a̱chi yóʼo ndaʼa̱ mií Jehová. Ta tu̱ʼun ña̱ ni̱ka̱ʼa̱nñá sa̱ndíkoña-inira, saá na̱kunda̱a̱-inira ña̱ mií Jehová kúú ta̱ chi̱ndaʼáñá (1 Sam. 25:23-28, 32-34). Jehová xi̱niñúʼura ñá Abigaíl chi ku̱a̱ʼání ña̱ va̱ʼa-ini xi̱kuumiíñá. Ki̱ʼva saátu kivi kuniñúʼu Jehová sava ná hermana, ña̱ chindeétáʼanná xíʼin na̱ veʼená ta saátu xíʼin na̱ congregación (Tito 2:3-5). w19.10 22 párr. 10

Ndiʼi miíyó na̱ ndásakáʼnu Jehová xíniñúʼu kuxíkayó nu̱ú Babilonia ña̱ káʼnu. Sava na̱ káʼviyó xíʼin, sana xi̱xa̱ʼa̱nna iin veʼe-ñu̱ʼu vatá, tá kúma̱níka sakuaʼana ña̱ nda̱a̱, ta xi̱keʼéna táʼan ña̱ kéʼé na̱kán, á xi̱taxina xu̱ʼún. Tá kúma̱níka ña̱ ka̱ʼa̱nna xíʼinna ña̱ kiviva koona publicador, xíniñúʼu sandákoona ña̱ kutáʼanna xíʼin na̱ veʼe-ñu̱ʼu vatá. Xíniñúʼu keʼéna iin carta ña̱ ka̱ʼa̱n xíʼin na̱ veʼe-ñu̱ʼu nu̱ú xi̱xa̱ʼa̱nna ña̱ va̱ásaka kutáʼanna xíʼinna, á xíʼin inkaka ña̱ kítáʼan xíʼin Babilonia ña̱ káʼnu. Miíyó na̱ ndásakáʼnu Ndióxi̱ xíniñúʼu kiʼinyó kuenta ña̱ chiñu ña̱ kéʼéyó ná va̱ása kitáʼanña xíʼin Babilonia ña̱ káʼnu (2 Cor. 6:14-17). ¿Nda̱chun va̱ása kéʼéyó nda̱a̱ ni iin ña̱yóʼo? Saáchi va̱ása kúni̱yó kítáʼanyó xíʼin na̱ veʼe-ñu̱ʼu vatá á keʼéyó ña̱ kéʼéna chi ña̱ yaku̱a̱ kúú ña̱yóʼo nu̱ú Jehová (Is. 52:11). w19.10 12 párr. 16, 17

Ta̱ Jeremías kúú ta̱ ka̱ʼyí libro ña̱ níʼi ki̱vi̱ra, ta sanatu ka̱ʼyíra ña̱ 1 xíʼin 2 libro ña̱ Reyes. Tíxa̱ʼvi ña̱ chiñu yóʼo, ku̱nda̱a̱-inira ña̱ kúndáʼviní-ini Jehová xínira na̱ yiví. Tá kúú, tá ku̱nda̱a̱-inira ña̱ nda̱ndikó-ini ta̱ rey Acab xa̱ʼa̱ ña̱ va̱ása va̱ʼa ña̱ ke̱ʼéra, Jehová ni̱ka̱ʼa̱nra ña̱ va̱ása koora testigo xa̱ʼa̱ ña̱ kuvi na̱ veʼera (1 Rey. 21:27-29). Ta saátu, ku̱nda̱a̱-inira ña̱ ni ku̱a̱ʼáka ña̱ va̱ása va̱ʼa ke̱ʼé ta̱ Manasés nu̱ú ta Acab, soo Jehová i̱xakáʼnu-inira xa̱ʼa̱ra tá nda̱ndikó-inira xa̱ʼa̱ ña̱ ke̱ʼéra (2 Rey. 21:16, 17; 2 Crón. 33:10-13). Ndiʼi ña̱yóʼo chi̱ndeétáʼanña xíʼin ta̱ Jeremías ña̱ kundiku̱nra yichi̱ Jehová, ta kúee koo inira ta kundáʼvi-inira kunira inkana. Ná ndakanixi̱níyó xa̱ʼa̱ ña̱ ke̱ʼé ta̱ Jeremías, tá xi̱nira ña̱ ta̱ migora Baruc ki̱xáʼara ndíʼi̱ka-inira xa̱ʼa̱ inkaka ña̱ʼa. Ta̱ Jeremías va̱ása nísandákoo ndaʼa̱rara, chi chi̱ndeétáʼanra xíʼinra ta ni̱ka̱ʼa̱n káxira xíʼinra xa̱ʼa̱ ña̱ ni̱ka̱ʼa̱n Jehová (Jer. 45:1-5). w19.11 6 párr. 14, 15

Nu̱ú libro ña̱ Levítico, sákuaʼayó ña̱ na̱ ñuu Israel kivi taxina iin sacrificio xa̱ʼa̱ ña̱ kutáʼan viína xíʼin Ndióxi̱ á ña̱ náʼa̱na ña̱ táxina tíxa̱ʼvi ndaʼa̱ra (Lev. 7:11-13, 16-18). Su̱ví xíʼin ña̱ ndúxa níxitaxina ña̱ ofrenda yóʼo, chi xa̱ʼa̱ ña̱ kúni̱ miína xi̱taxinaña. Sacrificio ña̱ xi̱taxina xa̱ʼa̱ ña̱ kutáʼan viína xíʼin Jehová, xa̱ʼa̱ ña̱ kúni̱ miína xi̱taxinaña, ta xíʼin ña̱yóʼo xi̱na̱ʼa̱na ña̱ kúʼvi̱-inina xíninara. Ña̱ káchíñuyó nu̱ú Jehová nda̱a̱ táki̱ʼva íyo ña̱ sacrificio kán saá íyoña, saáchi saá náʼa̱yó ña̱ kúni̱yó xíniyóra. Ta táxiyó ndiʼi ña̱ va̱ʼa ña̱ kúúmiíyó ndaʼa̱ra, chi kúʼvi̱-iniyó xíniyóra xíʼin ndiʼi níma̱yó. Jehová kúsi̱íní-inira tá xítora ña̱ ku̱a̱ʼání na̱ yiví ndásakáʼnunara, xa̱ʼa̱ ña̱ kúʼvi̱-inina xíninara ta saátu ña̱ káʼa̱nra. Su̱ví nda̱saa ña̱ kéʼéyó ndáyáʼvi nu̱ú Jehová, chi saátu tá xítora nda̱chun kúú ña̱ kéʼéyóña ndáyáʼviníña nu̱úra. Tá kúú, tá xa̱a̱ ku̱chéeyó ta va̱ása kívika keʼéyó ndiʼi ña̱ kúni̱yó, Jehová va̱ása xítora ña̱ va̱ása kúchiñuyó keʼéyó. Sana ndákanixi̱níyó ña̱ loʼo kúú ña̱ kivi taxiyó ndaʼa̱ra, soo ta̱kán xítora ña̱ xa̱ʼa̱ ña̱ kúʼvi̱-iniyó xíniyóra kúú ña̱ kúni̱yó keʼéyó ndiʼi ña̱ kuchiñuyó. Kúsi̱íní-inira ndakiʼinra ndiʼi ña̱ va̱ʼa ña̱ kivi taxiyó ndaʼa̱ra. w19.11 22 párr. 9; 23 párr. 11, 12

Ndáyáʼviní ña̱ vií kotoyó chiñuyó. Ta̱ rey Salomón ka̱ʼyíra, ña̱ íyo tiempo ña̱ keʼéyó iin iin ña̱ʼa, tá kúú ña̱ chiʼiyó, ña̱ ixava̱ʼayó ña̱ʼa, ña̱ ku̱a̱kuyó, ña̱ tixáʼayó xíʼin ña̱ kuakuyó (Ecl. 3:1-8). Ña̱yóʼo náʼa̱ña, ña̱ ndáyáʼviní kachíñuyó xíʼin ña̱ ndakindee̱yó. Ta̱ Jesús viíní xi̱xitora u̱vi̱ saá ña̱yóʼo. Iin yichi̱, tá nda̱ndikó na̱ apóstolra ña̱ ni̱xa̱ʼa̱nna na̱túʼunna xíʼin na̱ yiví, ta nda̱a̱ tiempo ña̱ kuxuna kǒo ni̱xi̱yo. Ta̱ Jesús ni̱ka̱ʼa̱nra xíʼinna ña̱ va̱xi nu̱ú texto ña̱ kaʼviyó ki̱vi̱ vitin (Mar. 6:30-34). Ni mií ta̱ Jesús ni na̱ discípulora, va̱ása níxindakindee̱na nda̱a̱ táki̱ʼva xi̱kuni̱na. Soo, xi̱kunda̱a̱-inira ña̱ xíniñúʼu ndakindee̱ na̱ discípulora. Sava yichi̱, ndáyáʼviní ndakindee̱yó á nasamayó ña̱ kéʼéyó. Ley ña̱ ta̱xi Jehová ndaʼa̱ ta̱ Moisés xi̱ka̱ʼa̱nña xíʼin na̱ ñuu Israel, ña̱ xíniñúʼu ndakindee̱na ña̱ ki̱vi̱ sábado. Miíyó va̱ása ndíku̱nkayó ña̱ ley ta̱ Moisés, soo ku̱a̱ʼáníva ña̱ kivi sákuaʼayó xíʼinña, tá ná kaʼviyó xa̱ʼa̱ ña̱ ki̱vi̱ sábado. w19.12 3 párr. 6, 7

Jehová ni̱ka̱ʼa̱nra ña̱ kundaara na̱ nda̱kú íyo ini ndásakáʼnu-ñaʼá, ña̱kán kúni̱ra saxínura ña̱ ni̱ka̱ʼa̱nra (Sal. 31:1-3). Ta saátu xíni̱ra ña̱ va̱ása va̱ʼa kuniyó, tá va̱ása ndíʼi̱-inira xa̱ʼa̱ na̱ ñuura. Ta káʼa̱nra taxira ndiʼi ña̱ xíniñúʼuyó ña̱ kutakuyó ta saátu ña̱ sakuaʼakayó xa̱ʼa̱ra, ta nda̱a̱ ni iin ña̱ʼa kǒo kasi nu̱úra ña̱ keʼéra ña̱yóʼo (Mat. 6:30-33; 24:45). Ki̱vi̱ ndákaʼányó nda̱chun kúú ña̱ sáxi̱nu Jehová ndiʼi ña̱ káʼa̱nra, va̱ása ndíʼi̱ní-iniyó tá kúma̱ní xu̱ʼún nu̱úyó á inka ña̱ xíniñúʼuyó. Ná ndakanixi̱níyó xa̱ʼa̱ na̱ cristiano na̱ ni̱xi̱yo tá siglo nu̱ú. Tá ki̱xáʼana i̱xandi̱va̱ʼana xíʼin na̱ congregación ña̱ ñuu Jerusalén, ndiʼina taʼví-táʼanna soo na̱ apóstol va̱ása nítaʼví-táʼanna (Hech. 8:1). Ta tá ndo̱ʼona ña̱yóʼo, sana ni̱xo̱ʼvi̱na xa̱ʼa̱ ña̱ xi̱kuma̱ní xu̱ʼún á inkaka ña̱ʼa nu̱úna. Sana ndi̱ʼi-xa̱ʼa̱ veʼena, chiñuna xíʼin negocio ña̱ xi̱kuumiína. Ta ni saá ndo̱ʼona va̱ása níndákava-inina chi Jehová va̱ása nísandákoo ndaʼa̱rana (Hech. 8:4; Heb. 13:5, 6; Sant. 1:2, 3). Jehová kúú ta̱ chi̱ndeétáʼan xíʼin na̱ cristiano kán, ta saátu chindeétáʼanra xíʼin miíyó (Sal. 37:18, 19). w20.01 17 párr. 14, 15

Tá ku̱chiñu ta̱ David sa̱kǎkura ndikachi sa̱na̱ yivára nu̱ú iin oso xíʼin iin tí león, nda̱kunira ña̱ ku̱chiñura xa̱ʼníra tí kití kán chi Ndióxi̱ chi̱ndeétáʼan xíʼinra. Tá ku̱chiñura ka̱nitáʼanra xíʼin ta̱ Goliat, xi̱nira ña̱ mií Jehová xi̱niʼi yichi̱ nu̱úra (1 Sam. 17:37). Ta saátu, na̱kunda̱a̱-inira ña̱ mií Jehová chi̱ndeétáʼan xíʼinra ña̱ xi̱nura nu̱ú ta̱ rey Saúl (Sal. 18, ña̱ va̱xi chí xi̱ní). Iin na̱ yiví na̱ ni̱nu kúni, kivi ka̱ʼa̱nna ña̱ miína ku̱chiñu ke̱ʼé ndiʼi ña̱yóʼo. Soo, ta̱ David vitání ni̱xi̱yo inira, xa̱ʼa̱ ña̱yóʼo xi̱nira ña̱ chi̱ndeétáʼan Jehová xíʼinra ndiʼi tiempo ña̱ xi̱takura. ¿Ndáaña sánáʼa̱ ejemplo ta̱ David miíyó? Ña̱ va̱ása ndukú kuitíyó ña̱ ná chindeétáʼan Jehová xíʼinyó, chi xíniñúʼu kotoyó nda̱saa kéʼéraña ta ama kéʼéraña. Tá vitá íyo iniyó, ta kúnda̱a̱-iniyó ña̱ íyo sava ña̱ʼa ña̱ va̱ása kivi keʼéyó, káxiníka kunda̱a̱-iniyó ña̱ táxi Jehová ña̱ xíniñúʼuyó. Tá ná kuniyó ña̱ chíndeétáʼanra xíʼinyó, ña̱ kítáʼanyó xíʼinra ndundakúkaña. w19.12 20 párr. 18, 19

Miíyó na̱ ndásakáʼnu Jehová, íyo ku̱a̱ʼáka xa̱ʼa̱ kúú ña̱ kivi kandíxayó ña̱ ndáyáʼviníyó nu̱úra. Ka̱nara miíyó ña̱ ná kuyatinyó nu̱úra, ta saátu xi̱nira ndáa ki̱ʼva nda̱kiʼinyó tu̱ʼun va̱ʼa ña̱ káʼa̱n xa̱ʼa̱ra (Juan 6:44). Tá ki̱xáʼayó ku̱yatinyó nu̱úra saátu miíra ku̱yatinra nu̱úyó (Sant. 4:8). Ta saátu xíniñúʼura tiempora xíʼin ndee̱ra ña̱ sánáʼa̱ra miíyó. Xíni̱ va̱ʼara ndáa ki̱ʼva íyoyó vitin, ta saátu xíni̱ra nda̱saa kivi xa̱a̱yó kooyó. Ta náʼa̱ra ña̱ kúʼvi̱-inira xínira miíyó ki̱vi̱ táxira consejo ndaʼa̱yó. ¿Á va̱ása náʼa̱ ndiʼi ña̱yóʼo ña̱ ndáyáʼviníyó nu̱ú Ndióxi̱? Ta̱ rey David xi̱kunda̱a̱-inira ña̱ kúʼvi̱ní-ini Jehová xínirara, ta saátu xi̱chindeétáʼanra xíʼinra. Ña̱ ka̱ndíxara ña̱yóʼo, chi̱ndeétáʼanña xíʼinra ña̱ ku̱ndeé-inira tá xi̱ka̱ʼa̱nna ña̱ va̱ása ndáyáʼvira (2 Sam. 16:5-7). Tá ndákava-iniyó á tá yáʼayó nu̱ú tu̱ndóʼo, Jehová kivi chindeétáʼanra xíʼinyó ña̱ ya̱ʼayó nu̱úña (Sal. 18:27-29). Tá chíndeétáʼan Ndióxi̱ xíʼinyó, nda̱a̱ ni iin ña̱ʼa va̱ása kivi kasi nu̱úyó ña̱ ndasakáʼnuyóra xíʼin ña̱ si̱í-ini (Rom. 8:31). w20.01 15 párr. 7, 8

Tá káʼviyó xíʼin iin na̱ yiví ná keʼéyó oración. Ta, ¿ama kúú ña̱ xíniñúʼu kixáʼayó keʼéyó oración tá káʼviyó xíʼinna ta saátu tá sándiʼiyó? Ndi̱ku̱n tá xa̱a̱ ki̱xáʼayó káʼviyó xíʼinna. Xíniñúʼu chindeétáʼanyó xíʼin na̱ káʼviyó xíʼin ña̱ kunda̱a̱-inina, ña̱ xíʼin espíritu santo Jehová kivi kunda̱a̱-iniyó xíʼin tu̱ʼunra. Savana ña̱ va̱ʼa chindeétáʼanna xíʼin na̱ káʼvina xíʼin ña̱ kunda̱a̱-inina ña̱ ndáyáʼviní keʼéyó oración, káʼvina Santiago 1:5 ña̱ káchi: “Ndáa ndóʼó kúma̱ní ña̱ ndíchi nu̱ú, ndakundeékandó ndukúndóña nu̱ú Ndióxi̱, chi ta̱yóʼo taxivaraña ndaʼa̱ndó”. Tándíʼi ndáka̱tu̱ʼunna na̱ káʼvina xíʼin: “¿Nda̱saa kivi ndukúyó ña̱ ndíchi nu̱ú Ndióxi̱?”. Ta sana na̱yóʼo káʼa̱nna ña̱ xíniñúʼu ka̱ʼa̱nyó xíʼin Ndióxi̱. Ta saátu ná sanáʼa̱yó na̱ káʼviyó xíʼin ña̱ keʼéna oración. Ná ka̱ʼa̱nyó xíʼinna ña̱ kúni̱ Jehová kuniso̱ʼora oración ña̱ ka̱ʼa̱nna. Ta ná ka̱ʼa̱nyó xíʼinna ña̱ kiviva ka̱ʼa̱nyó xíʼin Jehová xa̱ʼa̱ ndiʼi ña̱ ndóʼoyó, ña̱ va̱ása kivi ka̱ʼa̱nyó xa̱ʼa̱ xíʼin inkana. Chi Jehová xa̱a̱ xíni̱ ndiʼivara ndáaña ndóʼoyó (Sal. 139:2-4). w20.01 2 párr. 3; 5 párr. 11, 12

Jehová kúú ta̱ xíni̱ ama kúú ña̱ kanara na̱ nda̱kaxinra ku̱ʼu̱n chí ndiví (Rom. 8:28-30). Jehová ki̱xáʼara ndáka̱xinra na̱ ku̱ʼu̱n chí ndiví tándi̱ʼi nda̱taku ta̱ Jesús. Tá siglo nu̱ú, ndiʼi na̱ cristiano na̱ nda̱a̱ xi̱kuuna na̱ nda̱kaxin Ndióxi̱ ku̱ʼu̱n chí ndiví. Soo tá ni̱ya̱ʼaka tiempo, ndiʼi na̱ xi̱ka̱ʼa̱n ña̱ xi̱kuuna cristiano su̱ví ña̱ nda̱a̱ níxikuuña. Soo ni loʼo xi̱kuu na̱ cristiano na̱ nda̱a̱ tiempo saá, Jehová nda̱kaxinrana ña̱ ku̱ʼu̱nna chí ndiví. Na̱kán ni̱xi̱yona táki̱ʼva íyo trigo ña̱ ni̱ka̱ʼa̱n ta̱ Jesús kuaʼnu ma̱ʼñú ku̱ʼu̱ ña̱ va̱ása va̱ʼa (Mat. 13:24-30). Ña̱ tiempo so̱ndíʼi vitin, Jehová ndákaxinkara ndáa na̱ koo táʼan na̱ 144,000. Ña̱kán tá Ndióxi̱ kánara savakana ña̱ ku̱ʼu̱nna chí ndiví tá si̱lóʼo kúma̱ní kixaa̱ ña̱ ndiʼi-xa̱ʼa̱ ñuyǐví, ¿ndáana kúúyó ña̱ ka̱ʼa̱nyó xa̱ʼa̱ ña̱ kéʼéra? (Rom. 9:11). Va̱ása kúni̱yó keʼéyó táki̱ʼva ke̱ʼé na̱ káchíñu ndáʼvi, na̱ ni̱ka̱ʼa̱n ta̱ Jesús xa̱ʼa̱ nu̱ú iin ilustración, na̱yóʼo ni̱ka̱ʼa̱n kúáchina xíʼin ta̱ kúúmií tú uva xa̱ʼa̱ ña̱ ke̱ʼéra xíʼin na̱ va̱ása níkixáʼa kachíñu ya̱chi̱ (Mat. 20:8-15). w20.01 30 párr. 14

Jehová kúúra yiváyó ta̱ kúni̱ní xíni miíyó, ta kúni̱ra ña̱ si̱í ná koo na̱ veʼera. Ni yáʼayó nu̱ú tu̱ndóʼo, íyo ku̱a̱ʼá xa̱ʼa̱ kúú ña̱ kivi kusi̱í-iniyó vitin. Tá kúú, va̱ása xíka-iniyó ña̱ kúʼvi̱ní-ini yiváyó ta̱ íyo chí ndiví xínira miíyó. Ta kúnda̱a̱ káxi iniyó xa̱ʼa̱ ña̱ káʼa̱n tu̱ʼunra ña̱ Biblia (Jer. 15:16). Kúúyó táʼan na̱ veʼe Jehová na̱ kúʼvi̱ní-ini xíniñaʼá, kúʼvi̱-inina xínina ña̱ káʼa̱nra ta saátu kúʼvi̱-inina xíni táʼanna (Sal. 106:4, 5). Saátu kivi kusi̱í-iniyó chi kúnda̱a̱ káxi iniyó ña̱ chí nu̱únínu va̱ʼaníka kutakuyó. Kúnda̱a̱-iniyó ña̱ si̱lóʼo kúma̱ní ta sandiʼi-xa̱ʼa̱ Jehová na̱ kéʼé ña̱ kini, ta tíxa̱ʼvi ña̱ chíñura ndulivi nu̱ú ñuʼú yóʼo. Saátu ndátuyó ña̱ ná kixaa̱ kivi ña̱ ndataku na̱ ni̱xi̱ʼi̱, ta ndakutáʼanna xíʼin na̱ veʼena (Juan 5:28, 29). ¿Á su̱ví iin ña̱ liviní kúú ña̱yóʼo? Ta ña̱ ndáyáʼviníka kúú ña̱ kúnda̱a̱-iniyó ña̱ si̱lóʼo kúma̱ní, ta ndiʼi na̱ íyo chí ndiví xíʼin nu̱ú ñuʼú yóʼo ndasakáʼnuna iinlá mií yiváyó Jehová. w20.02 13 párr. 15, 16

Tá ná ki̱ʼviyó iin ku̱a̱chi ná va̱ása chise̱ʼéyóña. Ná kuyatinyó nu̱ú Jehová ta ná ka̱ʼa̱nyó xíʼinra xa̱ʼa̱ ndiʼi ña̱ ke̱ʼéyó. Tasaá va̱ʼaní kuniyó, ta va̱ása xoʼvi̱kayó xa̱ʼa̱ ña̱ ke̱ʼéyó. Soo tá kúni̱yó ndikó tukuyó kutáʼanyó xíʼin Jehová, íyo inka ña̱ xíniñúʼu keʼéyó. Xíniñúʼu ndakiʼinyó consejo ña̱ táxina ndaʼa̱yó. Tá chi̱ndaʼá Jehová ta̱ profeta Natán ña̱ ku̱ʼu̱nra ka̱ʼa̱nra xíʼin ta̱ rey David xa̱ʼa̱ ña̱ ke̱ʼéra xíʼin ñá Bat-Seba, ta̱yóʼo kǒo níka̱ʼa̱nra ña̱ va̱ása ndeé ña̱ ke̱ʼéra. Chi ndi̱ku̱n nda̱kunira ña̱ ke̱ʼéra ña̱ va̱ása va̱ʼa xíʼin yií ñá Bat-Seba, ta saátu ni̱ki̱ʼvira ku̱a̱chi nu̱ú Ndióxi̱. Ta̱ David nda̱kiʼinra consejo Jehová tasaá i̱xakáʼnu-inira xa̱ʼa̱ra (2 Sam. 12:10-14). Tá ni̱ki̱ʼviyó iin ku̱a̱chi, ná ka̱ʼa̱nyó xa̱ʼa̱ ña̱ ke̱ʼéyó xíʼin na̱ nda̱kaxin Ndióxi̱ kuniʼi yichi̱ nu̱úyó (Sant. 5:14, 15). Ta xíniñúʼu ndakuniyó ku̱a̱chiyó. Tá kama ná ndakiʼinyó consejo ta nasamayó ña̱ kéʼéyó, va̱ása ndi̱ʼi̱ka-iniyó ta si̱í kuniyó. w20.02 24 párr. 17, 18

Na̱ “u̱xu̱ ta̱a” kúú, na̱ ndákiʼin nu̱ú na̱ ndátu kutaku ndiʼi tiempo nu̱ú ñuʼú yóʼo. Ta na̱yóʼo kúnda̱a̱-inina ña̱ mií Jehová kúú ta̱ nda̱kaxin na̱ ku̱ʼu̱n chí ndiví na̱ kúú ta̱ “judío”, ta iin ña̱ va̱ʼaní kúúña nu̱úna ña̱ inkáchi káchíñuna nu̱ú Ndióxi̱. Ña̱ nda̱a̱ kúú ña̱ tiempo vitin va̱ása xíni̱yó ki̱vi̱ ndiʼi na̱ nda̱kaxin Ndióxi̱ ku̱ʼu̱n chí ndiví na̱ kíndo̱o nu̱ú ñuʼú yóʼo, soo na̱ ndátu koo nu̱ú ñuʼú yóʼo kivi “ku̱ʼu̱nna” xíʼinna. ¿Ndáa ki̱ʼva kéʼéna ña̱yóʼo? Texto ña̱ kaʼviyó ki̱vi̱ vitin kúú ña̱ ndákuiin pregunta yóʼó. Ña̱ versículo yóʼo káʼa̱nña xa̱ʼa̱ iin kuití ta̱ judío. Soo tá káʼa̱n na̱ u̱xu̱ ta̱a yóʼo ña̱ tu̱ʼun “xíʼinndó”, táki̱ʼva íyo na̱ káʼa̱n xíʼin ku̱a̱ʼá na̱ yiví saá íyona. Ña̱yóʼo náʼa̱ña ña̱ ta̱ “judío” su̱ví iin kuití na̱ yiví kúúra, chi ndákiʼinra nu̱ú ndiʼi na̱ nda̱kaxin Ndióxi̱ ku̱ʼu̱n chí ndiví. Na̱ va̱ása níndaka̱xin Ndióxi̱ ña̱ ku̱ʼu̱nna chí ndiví, inkáchi káchíñuna nu̱úra xíʼin na̱ ku̱ʼu̱n chí ndiví. Soo va̱ása xítona na̱ ku̱ʼu̱n chí ndiví nda̱a̱ táki̱ʼva íyo na̱ níʼi yichi̱ nu̱úna, chi kúnda̱a̱-inina ña̱ iinlá ta̱ Jesús kúú ta̱ níʼi yichi̱ nu̱úna (Mat. 23:10). w20.01 26 párr. 1, 2

Ta̱ Jesús ni̱ka̱ʼa̱nra ña̱ na̱ yiví ndakunina ndáana ndixa kúú discípulora, tá ná na̱ʼa̱na ña̱ kúʼvi̱-inina xínitáʼanna nda̱a̱ táki̱ʼva ni̱kuʼvi̱-inira xi̱nirana. Ña̱ ni̱ka̱ʼa̱nra ni̱xi̱nuña tá siglo nu̱ú, ta saátu xínuña tiempo vitin. Xa̱ʼa̱ ña̱kán, ndáyáʼviní na̱ʼa̱yó ña̱ kúʼvi̱-iniyó xínitáʼanyó ni íxayo̱ʼvi̱ña xíʼinyó. Ná nda̱ka̱tu̱ʼunyó miíyó: “¿Ndáaña kivi sakuaʼi̱ xíʼin ña̱ ke̱ʼé na̱ hermano, na̱ ni̱na̱ʼa̱ ña̱ kúʼvi̱-inina xínitáʼanna ni i̱xayo̱ʼvi̱ña xíʼinna?”. Xa̱ʼa̱ ña̱ kúúyó na̱ yiví ku̱a̱chi, sava íxayo̱ʼvi̱ña xíʼinyó ña̱ kuʼvi̱-iniyó kunitáʼanyó. Soo ni saá, xíniñúʼu chika̱a̱yó ndee̱ ña̱ kundiku̱nyó yichi̱ ta̱ Cristo. Ta̱ Jesús sa̱náʼa̱ra miíyó ña̱ ndáyáʼviní ndasaviíyó ku̱a̱chi ña̱ kúúmií iin na̱ hermano xíʼinyó (Mat. 5:23, 24). Ni̱ka̱ʼa̱nra ña̱ xíniñúʼu vií kutáʼanyó xíʼin inkana tá kúni̱yó sakusi̱íyó-ini Ndióxi̱. Jehová kúsi̱í-inira tá xítora ña̱ chíka̱a̱yó ndee̱ ña̱ vií kutáʼanyó xíʼin na̱ hermanoyó. Soo va̱ása kusi̱í-inira xíʼin chiñu ña̱ kéʼéyó, tá va̱ása nándósó-iniyó xa̱ʼa̱ ña̱ ke̱ʼé iinna xíʼinyó, ta va̱ása xíínyó ndasaviíyó ku̱a̱chi xíʼinna (1 Juan 4:20). w20.03 24 párr. 1-4

“Yivá ndiʼi na̱ káʼa̱n tu̱ʼun vatá” kúú ta̱ Ndi̱va̱ʼa chi nda̱a̱ tá xa̱ʼa̱ ki̱xáʼara sándaʼvira na̱ yiví (Juan 8:44). Sava ña̱ vatá ña̱ káʼa̱nra kúú ña̱ tákuka na̱ ni̱xi̱ʼi̱. Xa̱ʼa̱ ña̱yóʼo ku̱a̱ʼání costumbre ña̱ va̱ása va̱ʼa kúúmií na̱ yiví xa̱ʼa̱ na̱ ni̱xi̱ʼi̱ ¿Nda̱chun kúchiñu ta̱ Ndi̱va̱ʼa sándaʼvira ku̱a̱ʼání na̱ yiví? Saáchi xíni̱ra nda̱saa ndóʼoyó tá xíʼi̱ iin na̱ táʼanyó, tasaá kúú ña̱ ndúkúra nda̱saa koo ña̱ sandáʼvira miíyó. Ta xa̱ʼa̱ ña̱ ku̱va̱ʼayó ña̱ kutakuyó ndiʼi tiempo va̱ása kúni̱yó kuviyó (Ecl. 3:11). Ña̱ xíʼi̱yó, nda̱a̱ táki̱ʼva íyo iin ña̱ sáa̱-ini xíni miíyó saá íyoña (1 Cor. 15:26). Ni ku̱a̱ʼá ña̱ʼa kéʼé ta̱ Ndi̱va̱ʼa, va̱ása kúchiñura chise̱ʼéra ña̱ nda̱a̱ xa̱ʼa̱ na̱ ni̱xi̱ʼi̱. Saáchi tiempo vitin, íyo ku̱a̱ʼání na̱ yiví na̱ kúnda̱a̱-ini ña̱ nda̱a̱ xa̱ʼa̱ na̱ ni̱xi̱ʼi̱ ta nátúʼunna xíʼin inkana xa̱ʼa̱ ña̱ sánáʼa̱ Biblia, ta saátu xa̱ʼa̱ ña̱ ndataku na̱yóʼo (Ecl. 9:5, 10; Hech. 24:15). Ña̱ sánáʼa̱ tu̱ʼun Ndióxi̱ xa̱ʼa̱ na̱ ni̱xi̱ʼi̱ sándi̱koña-iniyó ta chíndeétáʼanña xíʼinyó ña̱ sa̱ña̱yó nu̱ú ña̱ vatá ña̱ yi̱ʼvíyó na̱ ni̱xi̱ʼi̱. w19.04 14 párr. 1; 15 párr. 5, 6

Jehová kúʼvi̱ní-inira xínira na̱ káchíñu nu̱úra. Saá ni̱xi̱yo inira tá ya̱chi̱ ta ndiʼi tiempo kéʼéra ña̱yóʼo. Ta kéʼéra nina ña̱ nda̱kú (Sal. 33:5). Xa̱ʼa̱ ña̱yóʼo kúnda̱a̱-iniyó xa̱ʼa̱ u̱vi̱ ña̱ʼa. Ña̱ nu̱ú, ña̱ xóʼvi̱-inira tá xínira ña̱ va̱ása vií tíinna ku̱a̱chi xíʼin na̱ káchíñu nu̱úra. Ta ña̱ u̱vi̱, ña̱ miíra vií ndátiinra ku̱a̱chi xíʼin na̱ yiví. Nu̱ú ley ña̱ ta̱xi Ndióxi̱ ndaʼa̱ na̱ ñuu Israel ni̱na̱ʼa̱ra ña̱ ni̱kuʼvi̱-inira xi̱nirana ta nda̱kú ni̱xi̱yo inira xíʼinna, ta nda̱a̱ na̱ ndáʼvi chi̱ndeétáʼanña xíʼin (Deut. 10:18). Ña̱ ley yóʼo náʼa̱ña ña̱ ndíʼi̱ní-ini Jehová xa̱ʼa̱ na̱ ndásakáʼnu-ñaʼá. Tá ku̱i̱ya̱ 33 ndi̱ʼi-xa̱ʼa̱ ley ta̱ Moisés tá xi̱kundúʼu xa̱ʼa̱ ña̱ congregación. ¿Á kúni̱ kachi ña̱yóʼo ña̱ kǒo ley ndíku̱n na̱ cristiano xíʼin ña̱ na̱ʼa̱ Ndióxi̱ ña̱ kúʼvi̱-inira xínirana ta nda̱kú íyo inira xíʼinna? Va̱ása. Íyova iin ley ndíku̱n na̱ cristiano ña̱ naní ley ta̱ Cristo. Ta̱ Jesús va̱ása níkaʼyíra leyra nu̱ú iin tutu ña̱ va̱ʼa kundiku̱n na̱ discípulora ña̱yóʼo, soo xa̱ʼndavara chiñu nu̱úna ta ni̱ka̱ʼa̱nra xíʼinna ndáa ki̱ʼva keʼéna ña̱yóʼo, saátu ta̱xira tu̱ʼun ña̱ táxi yichi̱ nu̱úna. Ndiʼi ña̱ʼa ña̱ sa̱náʼa̱ ta̱ Jesús kúú “Ley ta̱ Cristo”. w19.05 2, 3 párr. 1-3

Miíyó na̱ yiví, nda̱a̱ tá ka̱kuyó xíniñúʼuyó ña̱ sandi̱kona-iniyó ta saátu ña̱ va̱ʼa sandi̱koyó-ini inkana. Tá iin na̱ va̱lí nda̱kavana ta tu̱kue̱ʼe̱ xa̱ʼa̱na tá xíkana sásikína, xákuna ta xínuna ku̱a̱ʼa̱nna nu̱ú yivána á siʼína. Na̱yóʼo va̱ása kivi sandáʼana xa̱ʼa̱na soo kiviva sandi̱kona-inina. Ndáka̱tu̱ʼunnana ndáaña ndo̱ʼona ta númindaanana ta vií káʼa̱nna xíʼinna ta ndákatana nu̱ú tu̱kue̱ʼe̱na ta saátu súkúndáana iin ti̱ko̱to̱ nu̱úña. Saá na̱ va̱lí yóʼo va̱ása xákukana ta nda̱a̱ sana kivi ku̱ʼu̱n tukuna kusíkína. Tá ni̱ya̱ʼa tiempo ndúva̱ʼa nu̱ú tu̱kue̱ʼe̱na. Soo íyo na̱ va̱lí na̱ ndeéníka xóʼvi̱. Sava na̱ va̱lí yóʼo kéʼéna ña̱ kini xíʼinna, iin yichi̱ á ku̱a̱ʼá ku̱i̱ya̱. Ni loʼo a ku̱a̱ʼá kúúña, ña̱yóʼo sáxo̱ʼvi̱ña miína. Sava na̱ ke̱ʼé ña̱ kini yóʼo, táxina ku̱a̱chi xa̱ʼa̱na ta ndákiʼinna castigo, soo inkana va̱ása kúnda̱a̱-inina xa̱ʼa̱na, ta ndákanixi̱nína ña̱ kǒo ña̱ kundoʼona. Soo, ni kama ná ndakiʼinna castigo, na̱ ke̱ʼéna ña̱ kini xíʼin, xóʼvi̱na ni tá xa̱a̱ chéena. w19.05 14 párr. 1, 2