Noviembre

Ku̱a̱ʼání na̱ yiví na̱ ndíchi na̱ íyo ñuyǐví, xákundaana ña̱ káʼa̱n Biblia xa̱ʼa̱ na̱ ni̱nuní kúni. Káchina chi tá ná ndakanixi̱níyó ña̱ ndáyáʼvika inkana nu̱úyó, keʼéna ña̱ kúni̱ miína xíʼinyó. Soo, ¿ndáaña ndákiʼin na̱ yiví xa̱ʼa̱ ña̱ ni̱nuní kúnina? ¿Á si̱í íyo na̱ ni̱nuní kúni? ¿Á si̱í íyo na̱ veʼena? ¿Á íyo na̱ ndixa kúú migona? ¿Á kítáʼan va̱ʼana xíʼin Ndióxi̱? ¿Ndáaña va̱ʼaka túvi yóʼó: ña̱ ndíchi ña̱ íyo ñuyǐví yóʼo á ña̱ ndíchi ña̱ táxi tu̱ʼun Ndióxi̱? (1Cor. 3:19). Na̱ ndíku̱n ña̱ ndíchi ña̱ íyo ñuyǐví yóʼo íyona táki̱ʼva íyo iin na̱ ke̱e xíka ta nda̱ñúʼuna ta ndáka̱tu̱ʼunna inka na̱ ke̱e xíka na̱ nda̱ñúʼu ta va̱ása xíni̱na. Ta̱ Jesús ni̱ka̱ʼa̱nra xa̱ʼa̱ na̱ ndíchi na̱ ni̱xi̱yo tiempora: “Na̱ kǒo túvi nu̱ú kúúna. Xa̱ʼa̱ ña̱yóʼo tá iin na̱ kǒo túvi nu̱ú chíndeétáʼanna xíʼin inka na̱ kǒo túvi nu̱ú, u̱vi̱ saána ko̱oyo ya̱vi̱” (Mat. 15:14). Ña̱ nda̱a̱ kúúña, ña̱ ndíchi ña̱ íyo ñuyǐví yóʼo, ni va̱ása va̱ʼaña nu̱ú Ndióxi̱. w19.05 24, 25 párr. 14-16

Tiempo vitin ku̱a̱ʼáka kúú na̱ xíxi si̱táva̱ʼa ta xíʼina tá vino tá xíyo Conmemoración. ¿Á xíniñúʼu ndi̱ʼi̱-iniyó xa̱ʼa̱ ña̱yóʼo? Va̱ása, “Jehová xíni̱ra na̱ kúú kuentara” (2 Tim. 2:19). Jehová xíni̱ va̱ʼara ndáana kúú na̱ ndixa nda̱kaxinra ku̱ʼu̱n chí ndiví, soo na̱ hermano na̱ ndákaʼvi na̱ xíxi si̱táva̱ʼa ta xíʼina tá vino va̱ása kúnda̱a̱-inina xa̱ʼa̱ ña̱yóʼo. Ña̱kán tañu na̱yóʼo ñúʼu na̱ túvi ña̱ nda̱kaxin Ndióxi̱ miína ña̱ ku̱ʼu̱nna chí ndiví, soo su̱ví ña̱ nda̱a̱ kúúña. Sava na̱ xi̱xixi si̱táva̱ʼa ta xi̱xiʼina tá vino tá ya̱chi̱ va̱ása kéʼékana ña̱yóʼo. Ta inkatuna túvina ña̱ ku̱ʼu̱nna kaʼndachíñuna xíʼin ta̱ Cristo chí ndiví xa̱ʼa̱ ña̱ kúúmiína iin kue̱ʼe̱ ña̱ sásana xi̱nína. Xa̱ʼa̱ ña̱yóʼo, va̱ása kúnda̱a̱ káxi iniyó nda̱saa kúú na̱ nda̱kaxin Ndióxi̱ ku̱ʼu̱n chí ndiví kíndo̱o nu̱ú ñuʼú yóʼo. Na̱ nda̱kaxin Ndióxi̱ koona iníísaá nu̱ú ñuʼú, tá ná kixi ta̱ Jesús ndakiʼinrana ña̱ ku̱ʼu̱nna xíʼinra chí ndiví. Ña̱ ndixa kúú ña̱ káʼa̱n Biblia, ña̱ ki̱vi̱ so̱ndíʼi koo iin tiʼvi na̱ nda̱kaxin Ndióxi̱ ku̱ʼu̱n chí ndiví nu̱ú ñuʼú yóʼo (Apoc. 12:17). Soo va̱ása káʼa̱nña nda̱saa kúú na̱ kundoo nu̱ú ñuʼú yóʼo tá ná kixáʼa ña̱ gran tribulación. w20.01 29, 30 párr. 11-13

Xíʼin parábola ña̱ ni̱ka̱ʼa̱n ta̱ Jesús xa̱ʼa̱ ta̱ loʼo ta̱ va̱ása níxiin kuniso̱ʼo, ni̱na̱ʼa̱ra ña̱ kúʼvi̱ní-ini Jehová xínira miíyó (Luc. 15:11-32). Yivá ta̱ loʼo ta̱ va̱ása níxiin kuniso̱ʼo xi̱kandíxaníra ña̱ ndikóva se̱ʼera. Ta tá ndi̱kó ta̱ loʼo yóʼo, xíʼin ña̱ si̱í-ini nda̱kiʼin yivárara. Tá ku̱xíkayó nu̱ú Jehová soo nda̱ndikó-iniyó, kivi kandíxayó ña̱ ndakiʼinva yiváyó Jehová miíyó. Yiváyó sandiʼi-xa̱ʼa̱ra ndiʼi tu̱ndóʼo ña̱ ta̱xi ta̱ Adán. Tá i̱xaso̱ʼo ta̱yóʼo, Jehová nda̱kaxinra 144,000 na̱ yiví ña̱ koona rey ta kootuna su̱tu̱ chí ndiví xíʼin se̱ʼera. Nu̱ú ñuyǐví xa̱á, ta̱ Jesús xíʼin na̱ kaʼndachíñu xíʼinra chindeétáʼanna xíʼin na̱ yiví na̱ xíniso̱ʼo ña̱ káʼa̱n Ndióxi̱ ña̱ va̱ása kuumiíkana ku̱a̱chi. Tá ná ya̱ʼana nu̱ú prueba ña̱ so̱ndíʼi, Ndióxi̱ taxira ña̱ kutakuna ndiʼi tiempo. Yiváyó kusi̱íní-inira tá ná kotora ña̱ ku̱a̱ʼání na̱ se̱ʼera na̱ va̱ása kúúmiíka ku̱a̱chi kundoo nu̱ú ñuʼú yóʼo. ¿Á su̱ví iin ña̱ liviní koo ña̱yóʼo? w20.02 6, 7 párr. 17-19

Ndiʼiyó xíniñúʼu nda̱ka̱tu̱ʼun xíʼin miíyó: “¿Ndáaña xa̱a̱ ku̱a̱ʼi̱n násamai̱ ña̱ va̱ʼa koi̱ táki̱ʼva íyo ta̱ Cristo? ¿Á chí sa̱tá kuitíi̱ násamai̱? ¿Á xa̱a̱ xíʼin ndiʼi níma̱i̱ na̱samai̱ ña̱ koi̱ táki̱ʼva íyo ta̱ Cristo?”. Xíniñúʼu síín kooyó vitin nu̱ú ña̱ tá ki̱xáʼayó sákuaʼayó xa̱ʼa̱ Ndióxi̱. Nu̱ú Mateo 12:43-45 ta̱ Jesús ni̱ka̱ʼa̱nra ndáaña xíniñúʼu keʼéyó. Xíniñúʼu kiʼinníyó kuenta xíʼin ña̱ káʼa̱n ña̱yóʼo: va̱ása sandiʼi-xa̱ʼa̱ kuitíyó ña̱ va̱ása va̱ʼa ña̱ ndíka̱a̱ níma̱yó, chi xíniñúʼu sakutúyó níma̱yó xíʼin ña̱ va̱ʼa ña̱ kúni̱ Ndióxi̱. ¿Á kivi nasamayó ña̱ ndíka̱a̱ níma̱yó? Tu̱ʼun Ndióxi̱ káchiña: “Xíniñúʼu nasamandó ña̱ kéʼéndó tasaá keʼéndó ña̱ nda̱kú táki̱ʼva kúni̱ Ndióxi̱” (Efes. 4:24). Táki̱ʼva káʼa̱nyó kiviva nasamayó miíyó, soo ixayo̱ʼvi̱vaña xíʼinyó. Su̱ví ka̱ʼnu̱ kuití iniyó xa̱ʼa̱ ña̱ kini ña̱ kúni̱yó keʼéyó. Chi xíniñúʼu nasamayó ña̱ kútóoyó á ña̱ kúni̱ ku̱ñuyó keʼéña. Ña̱kán xíniñúʼu ki̱vi̱ tá ki̱vi̱ chika̱a̱yó ndee̱ ña̱ nasamayó miíyó. w19.06 9, 10 párr. 6, 7

Jehová ku̱ndáʼviní-inira xi̱nira ta̱ Lot ta chi̱ndaʼára na̱ ángel ña̱ ku̱ʼu̱nna sakǎkunara xíʼin na̱ veʼera. Soo ni va̱ása níkandíxara ña̱ kita kamara. Ña̱kán, na̱ ángel ti̱inna ndaʼa̱ra xíʼin na̱ veʼera ta chi̱ndeétáʼanna xíʼinna ña̱ keena ña̱ ñuu Sodoma (Gén. 19:15, 16). Tasaá ni̱ka̱ʼa̱n na̱ ángel xíʼinna ña̱ ná ku̱ʼu̱nna chí yuku̱. Soo va̱ása níkandíxara chi ni̱ka̱ʼa̱nra xíʼin Ndióxi̱ ña̱ ná taxira ku̱ʼu̱nna iin ñuu ña̱ íyo yatin kán (Gén. 19:17-20). Jehová kúeeva ni̱xi̱yo inira ta xi̱niso̱ʼora ña̱ ni̱ka̱ʼa̱n ta̱ Lot ta ta̱xira ña̱ ná ku̱ʼu̱nna chí nu̱ú kúni̱na. Tá ni̱ya̱ʼa tiempo, ni̱yi̱ʼví ta̱ Lot ña̱ koora ñuu kán ta nda̱kiʼinra ku̱a̱ʼa̱nra chí yuku̱ nu̱ú ni̱ka̱ʼa̱n Jehová xíʼinra ku̱ʼu̱nra tá xa̱ʼa̱ (Gén. 19:30). Ña̱ nda̱a̱ kúúña, Jehová kúee ni̱xi̱yo inira xíʼin ta̱ Lot. Nda̱a̱ táki̱ʼva ke̱ʼé ta̱ Lot, sava na̱ hermano kivi ndaka̱xinna keʼéna iin ña̱ʼa ña̱ va̱ása va̱ʼa ta ya̱ʼana nu̱ú tu̱ndóʼo xa̱ʼa̱ña. Tá saá ná keʼéna, ¿ndáaña keʼéyó? Sana kuni̱yó ka̱ʼa̱nyó xíʼinna ña̱ xa̱ʼa̱ ña̱ kúni̱ miína kúú ña̱ ndóʼona ña̱yóʼo, ta ña̱ nda̱a̱ kúúvaña (Gál. 6:7). Soo kiviva keʼéyó ña̱ va̱ʼa xíʼinna, ná keʼéyó táki̱ʼva ke̱ʼé Jehová xíʼin ta̱ Lot. w19.06 20, 21 párr. 3-5

Tá sási na̱ sáa̱-ini xíni miíyó nu̱úyó, ña̱ kúni̱na kúú ña̱ ná yi̱ʼvíyó ndasakáʼnuyó Jehová. Sana kuniñúʼuna ña̱ vatá ña̱ ka̱ʼa̱nna xíʼinyó, chindaʼána na̱ policía ña̱ kotona veʼeyó, ixandúxana xíʼinyó ña̱ ku̱ʼu̱nyó xíʼinna nu̱ú na̱ chíñu á nda̱a̱ chika̱a̱na savayó veʼeka̱a. Kúni̱na ña̱ ná yi̱ʼvíyó tá ná kuniyó ña̱ chika̱a̱na sava na̱ hermano veʼeka̱a. Tá ná yi̱ʼvíyó xíʼin ña̱yóʼo tá íyo na̱ chíndeétáʼan xíʼinna saá íyoyó chi táxiyó ña̱ kuchiñuna xíʼinyó. Soo va̱ása kúni̱yó kooyó nda̱a̱ táki̱ʼva íyo na̱ yiví na̱ káʼa̱n Levítico 26:36, 37 xa̱ʼa̱. Ná va̱ása sandákooyó ña̱ ndasakáʼnuyó Jehová xa̱ʼa̱ ña̱ yíʼviyó. Ná kandíxaníyóra ta va̱ása taxiyó ndakava-iniyó (Is. 28:16). Ná ka̱ʼa̱nyó xíʼin Jehová ña̱ ná na̱ʼa̱ra nu̱úyó ndáaña xíniñúʼu keʼéyó. Kúnda̱a̱-iniyó ña̱ va̱ása kuchiñu nda̱a̱ ni iin na̱ chíñu na̱ ndakúní kasina nu̱úyó ña̱ ndasakáʼnuyó Jehová, saáchi miíra chindeétáʼan xíʼinyó. Nu̱úka ña̱ yi̱ʼvíyó, ña̱ sáxo̱ʼvi̱na miíyó kivi chindaʼáña miíyó ña̱ kachíñukayó nu̱ú Jehová. w19.07 9, 10 párr. 6, 7

Ni tá va̱ása ndáni̱ʼíyó na̱ yiví na̱ kúni̱ kaʼvi túviyó, ná va̱ása ndakava-iniyó chi ndani̱ʼívayó na̱ kúni̱ kundiku̱n ta̱ Cristo. Ná ndakaʼányó ña̱ miíra chi̱táʼan chiñu yóʼo xíʼin chiñu ña̱ tíinna ti̱a̱ká. Na̱ tíin ti̱a̱ká ku̱a̱ʼá hora káchíñuna ta sava yichi̱ ni iin ti̱a̱ká va̱ása tíinna. Káchíñuna tá ñuú á tá xi̱ta̱an, ta xíkaní xáʼa̱nna nu̱ú ti̱kui̱í (Luc. 5:5). Saá kéʼé na̱ testigo Jehová, savana ku̱a̱ʼá hora nátúʼunna xíʼin na̱ yiví ta xa̱a̱ síín lugar xáʼa̱nna ta xa̱a̱ síín hora kéʼénaña. Saáchi saá kivi ndani̱ʼína ku̱a̱ʼáka na̱ yiví. Na̱ chíka̱a̱ ndee̱ kéʼé ña̱yóʼo, ku̱a̱ʼáka na̱ yiví káʼa̱nna xíʼin ta sava na̱ yiví yóʼo kúni̱na kunda̱a̱-inina xa̱ʼa̱ Ndióxi̱. ¿Á kivi ndaka̱xin viíyó hora xíʼin lugar nu̱ú ku̱ʼu̱nyó natúʼunyó xíʼin na̱ yiví ta saá kivi ndani̱ʼíyóna? ¿Nda̱chun xíniñúʼu kúee koo iniyó tá káʼviyó xíʼin na̱ yiví? Saáchi su̱ví sánáʼa̱ kuitíyóna xa̱ʼa̱ ña̱ káʼa̱n Biblia ta kuʼvi̱-inina kuninaña. Chi saátu xíniñúʼu chindeétáʼanyó xíʼinna ña̱ kunda̱a̱-inina xa̱ʼa̱ Jehová ta̱ ta̱xi Biblia ndaʼa̱yó, ta kuʼvi̱-inina kuninara. w19.07 18 párr. 14, 15

¿Nda̱saa kivi nandósóyó xa̱ʼa̱ ña̱ʼa ña̱ xa̱a̱ ni̱ndo̱o chí sa̱tá nda̱a̱ táki̱ʼva ke̱ʼé ta̱ Pablo? Sana sava miíyó xíniñúʼu sandákooyó ña̱ ndakanixi̱níyó xa̱ʼa̱ ña̱ va̱ása va̱ʼa ña̱ ke̱ʼéyó tá ya̱chi̱. Tá saá íyoña, ná táváyó tiempo ña̱ ndakanixi̱níyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Tá ná kaʼviyó, ndakanixi̱níyó ta ka̱ʼa̱nyó xíʼin Ndióxi̱ xa̱ʼa̱ ña̱yóʼo, miíra chindeétáʼanra xíʼinyó ña̱ va̱ása ndakaʼánkayó xa̱ʼa̱ ña̱ va̱ása va̱ʼa, chi kandíxayó ña̱ xa̱a̱ ku̱káʼnu-inira xa̱ʼa̱ ku̱a̱chiyó. Ná kotoyó inka ña̱ sákuaʼayó xíʼin ña̱ ke̱ʼé ta̱ Pablo. Sava na̱ ndásakáʼnu Jehová sándakoona chiñu nu̱ú kíʼinna ku̱a̱ʼá xu̱ʼún ña̱ va̱ʼa kachíñukana nu̱ú Jehová. Tá saá ke̱ʼéyó, va̱ása xíniñúʼu tuku ndíkóyó ndakanixi̱níyó xa̱ʼa̱ ña̱ xa̱a̱ sa̱ndákooyó (Núm. 11:4-6; Ecl. 7:10). Ndiʼi ña̱ʼa ña̱ xa̱a̱ sa̱ndákooyó chí sa̱tá, sana kivi kooña chiñu ña̱ ke̱ʼéyó nu̱ú Jehová á iin tu̱ndóʼo ña̱ ni̱ya̱ʼayó. Ña̱ nda̱a̱ kúúña, tá ná ndakaʼányó xa̱ʼa̱ ndáa ki̱ʼva chi̱ndeétáʼan Jehová xíʼinyó tá ya̱chi̱ kivi chindeétáʼanña xíʼinyó ña̱ kuyatinkayó nu̱úra. Soo va̱ása kúni̱yó ndakanixi̱níyó ña̱ xa̱a̱ ku̱a̱ʼání chiñu ke̱ʼéyó (1 Cor. 15:58). w19.08 3 párr. 5, 6

Kivi ka̱ʼa̱nyó xíʼin Ndióxi̱ ama kúni̱ miíyó ta nda̱a̱ ndáaka nu̱ú xíkayó. Ta ndiʼi tiempo íyo tu̱ʼvara ña̱ kuniso̱ʼora ña̱ káʼa̱nyó xíʼinra. Tá kúnda̱a̱-iniyó ña̱ xíniso̱ʼo Jehová ña̱ káʼa̱nyó xíʼinra, yatinka íyoyó xíʼinra. Ta̱ ka̱ʼyí ña̱ salmo ni̱ka̱ʼa̱nra: “Kúʼvi̱ní-inii̱ xínii̱ Jehová saáchi ta̱kán xíniso̱ʼora yi̱ʼi̱” (Sal. 116:1). Yiváyó su̱ví kuití xíniso̱ʼora ña̱ káʼa̱nyó xíʼinra, chi saátu ndákuiinra yuʼúyó. Ta̱ apóstol Juan káʼa̱nra ña̱yóʼo xíʼinyó: “Kivi ndukúyó nda̱a̱ ndáaka ña̱ʼa nu̱úra, tá ña̱ kúni̱ miíra kúúña xíniso̱ʼovara ña̱ káʼa̱nyó xíʼinra” (1 Juan 5:14, 15). Soo sava kivi xa̱a̱ síínva ndakuiin Jehová yuʼúyó. Xa̱ʼa̱ ña̱ xíni̱ra ndáaña kúú ña̱ va̱ʼa miíyó, sava yichi̱ ndákuiinvara yuʼúyó soo káʼa̱nra xíʼinyó ña̱ ná va̱ása keʼéyóña, ta savatu káʼa̱nra xíʼinyó ña̱ ná kundatuyó loʼo (2 Cor. 12:7-9). Jehová táxira ña̱ xíniñúʼuyó, kéʼéra nda̱a̱ táki̱ʼva kúni̱ra ná keʼé na̱ íyo se̱ʼe (1 Tim. 5:8). Chi táxira ña̱ xíniñúʼuyó ña̱ va̱ʼa kutakuyó. Va̱ása kúni̱ra ña̱ ná ndi̱ʼi̱ní-iniyó xa̱ʼa̱ ña̱ kuxuyó, xa̱ʼa̱ ti̱ko̱to̱yó á veʼe nu̱ú kooyó (Mat. 6:32, 33; 7:11). Ta xa̱ʼa̱ ña̱ kúʼvi̱ní-inira xínira miíyó, taxira ndiʼi ña̱ xíniñúʼuyó chí nu̱únínu. w20.02 5 párr. 10-12

Su̱ví ndiʼi na̱ ndátu ku̱ʼu̱n chí ndiví kúú táʼan “ta̱ esclavo ta̱ ndíchiní ta̱ nda̱kúní káchíñu” (Mat. 24:45-47). Nda̱a̱ táki̱ʼva ni̱xi̱yo tá siglo nu̱ú, tiempo vitin Jehová xíʼin ta̱ Jesús xíniñúʼuna loʼo na̱ yiví ña̱ taxina kuxu ku̱a̱ʼánína ta ña̱yóʼo kúú ña̱ sanáʼa̱nana. Tá siglo nu̱ú, xi̱niñúʼuna sava na̱ nda̱kaxin Ndióxi̱ ku̱ʼu̱n chí ndiví ña̱ ka̱ʼyína ña̱ Escrituras Griegas Cristianas. Tiempo vitin, loʼo kuití na̱ nda̱kaxin Ndióxi̱ kúúmií chiñu ña̱ taxina kuxu na̱ ñuu Ndióxi̱ mií tiempo ña̱ xíniñúʼunaña. Jehová káʼa̱nra taxira ndaʼa̱ na̱ káchíñu nu̱úra, ña̱ kutakuna ndiʼi tiempo nu̱ú ñuʼú yóʼo, ta saátu taxira ña̱ kutaku na̱ kaʼndachíñu xíʼin ta̱ Jesús, chí ndiví. Ndióxi̱ taxira ña̱ va̱ʼa ndaʼa̱ ndiʼi na̱ káchíñu nu̱úra, na̱ kúú ta̱ “judío” ta saátu na̱ “u̱xu̱ ta̱a”, ta káʼa̱nra xíʼin ndiʼina ña̱ ná kuniso̱ʼona leyra ta nda̱kú ná koo inina xíʼinra (Zac. 8:23). Ndiʼina xíniñúʼu vitá koo inina ta inkáchi kachíñuna nu̱úra. Ta ndiʼina xíniñúʼu chika̱a̱ ndee̱ ña̱ vií ná kutáʼan na̱ congregación. Xa̱a̱ kúyatinníka ña̱ ndiʼi-xa̱ʼa̱ ña̱ ñuyǐví yóʼo, ña̱kán ná chika̱a̱yó ndee̱ ña̱ kachíñuyó nu̱ú Jehová ta kundiku̱nyó ta̱ Cristo. w20.01 31 párr. 15, 16

Va̱ása kivi ixandúxayó xíʼin na̱ veʼeyó ña̱ sakuaʼana xa̱ʼa̱ Ndióxi̱. Soo kiviva chindeétáʼanyó xíʼinna ña̱ kuni̱na kuniso̱ʼona ña̱ káʼa̱n Biblia ta ná kunina ña̱ va̱ʼa íyo ña̱ kéʼéyó. Ku̱a̱ʼání yichi̱ na̱ veʼeyó kíʼinkana kuenta xíʼin ña̱ kéʼéyó nu̱úka ña̱ káʼa̱nyó (2 Tim. 3:14, 15). Ná va̱ása ndakava-iniyó. Jehová va̱ʼaní yichi̱ sánáʼa̱ra nu̱úyó. Táxira ku̱a̱ʼání tiempo ndaʼa̱ na̱ yiví ña̱ va̱ʼa ná sakuaʼana xa̱ʼa̱ra ta ndakiʼinna ña̱ kutakuna ndiʼi tiempo (Jer. 44:4). Ta̱ apóstol Pablo ni̱ka̱ʼa̱nra xíʼin ta̱ Timoteo ña̱ ná chika̱a̱ra ndee̱ natúʼunra xíʼin inkana chi saá saka̱kura miíra ta saátu saka̱kura na̱ xíniso̱ʼo ña̱ káʼa̱nra (1 Tim. 4:16). Xa̱ʼa̱ ña̱ kúʼvi̱ní-iniyó xíniyó na̱ veʼeyó, kúni̱yó ná kunda̱a̱-inina xa̱ʼa̱ ña̱ nda̱a̱ ña̱ sánáʼa̱ Biblia. w19.08 14 párr. 2; 16, 17 párr. 8, 9

Xíniñúʼu ndakaʼányó, chi tá iinna távána tiempo ña̱ taxina consejo ndaʼa̱yó, kúúña xa̱ʼa̱ ña̱ ni̱ki̱ʼviyó iin ku̱a̱chi ña̱ ndeé. Ta sana nda̱a̱ va̱ása kandíxayó taxiyó ña̱ chindeétáʼanna xíʼinyó, á nda̱a̱ kivi ka̱ʼa̱n kúáchiyó xa̱ʼa̱na á xa̱ʼa̱ ndáa ki̱ʼva ni̱ka̱ʼa̱nna xíʼinyó. Soo tá vitá íyo iniyó nasamavayó ña̱ kéʼéyó. Na̱ yiví na̱ vitá-ini táxina tíxa̱ʼvi xa̱ʼa̱ consejo ña̱ ndákiʼinna. Ná ka̱ʼa̱nyó xa̱ʼa̱ iin ejemplo. Ná ndakanixi̱níyó ña̱ íyoyó ti̱xin salón ta nátúʼunyó xíʼin inkaka na̱ hermano. Tasaá, iin na̱yóʼo kánana miíyó ta káʼa̱n se̱ʼéna xíʼinyó ña̱ ndíka̱a̱ iin ña̱ʼa xa̱ʼa̱ nu̱ʼuyó. Ña̱ nda̱a̱ kúkaʼanva nu̱úyó. Soo táxiyó tíxa̱ʼvi ndaʼa̱na xa̱ʼa̱ ña̱ ni̱ka̱ʼa̱nna xíʼinyó, á nda̱a̱ ndakanixi̱níyó ña̱ xi̱niñúʼu ya̱chi̱ka ka̱ʼa̱nna xíʼinyó xa̱ʼa̱ña. Ki̱ʼva saá xíniñúʼu taxiyó tíxa̱ʼvi ndaʼa̱ iin na̱ hermano na̱ ndakúní-ini tá táxina consejo ndaʼa̱yó. Ta ná va̱ása ndakanixi̱níyó ña̱ sáa̱-inina xínina miíyó, ná kotoyóna nda̱a̱ táki̱ʼva íyo iin migoyó na̱ kúʼvi̱ní-ini xíni miíyó (Prov. 27: 6; Gál. 4:16). w19.09 5 párr. 11, 12

Saátu ta̱xi Jehová chiñu ndaʼa̱ ná ñaʼá ña̱ kuniʼiná yichi̱ nu̱ú se̱ʼená. Chi ña̱ kéʼéná á káʼa̱nná kivi chindeétáʼanña xíʼin se̱ʼená ndiʼi tiempo (Prov. 22:6). Ná kotoyó ndáaña kivi sakuaʼa ná íyo se̱ʼe xíʼin ña̱ ke̱ʼé ñá María siʼí ta̱ Jesús. Ñá María xi̱kunda̱a̱ va̱ʼa iniñá xa̱ʼa̱ tu̱ʼun Ndióxi̱. Xi̱ ixato̱ʼóñá Jehová ta va̱ʼaní xi̱kitáʼanñá xíʼinra. Chi̱ka̱a̱-iniñá ña̱ kundiku̱nñá yichi̱ra ni na̱samaña ndiʼi ña̱ xi̱takuñá (Luc. 1:35-38, 46-55). Ndóʼó ná íyo se̱ʼe kivi kundiku̱nndó yichi̱ ñá María. ¿Ndáa ki̱ʼva keʼéndóña? Ña̱ nu̱ú, kaʼvindó Biblia ta ka̱ʼa̱nndó xíʼin Jehová ña̱ va̱ʼaka kutáʼanndó xíʼinra. Ña̱ u̱vi̱, chika̱a̱ndó ndee̱ ña̱ nasamandó ña̱ kéʼéndó ña̱ va̱ʼa sakusi̱índó-inira. w19.09 18 párr. 17-19

Ta̱ apóstol Juan xi̱nira iin visión. Xi̱nira, ña̱ ni̱ka̱ʼa̱nna xíʼin sava na̱ ángel ña̱ ná kasina tu̱ndóʼo ña̱ íyo nda̱a̱ táki̱ʼva íyo ta̱chí, ña̱ ndeéní ña̱ va̱xi xíʼin ña̱ gran tribulación, nda̱a̱ ná ndakiʼin ndiʼi na̱ nda̱ka̱xin Ndióxi̱ sello ña̱ so̱ndíʼi (Rev. 7:1-3). Na̱yóʼo kúú na̱ 144,000 na̱ ku̱ʼu̱n kaʼndachíñu xíʼin ta̱ Jesús chí ndiví (Luc. 12:32; Rev. 7:4). Ta saátu ni̱ka̱ʼa̱n ta̱ Juan xa̱ʼa̱ inka tiʼvi na̱ yiví, ta ka̱chira “kotondó”. Ña̱ tu̱ʼun ña̱ ni̱ka̱ʼa̱nra yóʼo náʼa̱ña ña̱ nda̱kanda̱ní-inira. ¿Ndáana káʼa̱nña xa̱ʼa̱? Káʼa̱nña xa̱ʼa̱ na̱ gran muchedumbre, ta ni iinna kǒo kúchiñu kaʼvi-ñaʼá chi ku̱a̱ʼání kúúna, ndiʼi ñuu ke̱ena, ñuu válí, ñuu náʼnu ta saátu na̱ káʼa̱n inka tu̱ʼun ndítana nu̱ú trono xíʼin nu̱ú ta̱ íyo táki̱ʼva íyo ndikachi (Rev. 7:9-14). Sana ni̱kusi̱íní-ini ta̱ Juan tá ku̱nda̱a̱-inira ña̱ chí nu̱únínu koo ku̱a̱ʼání na̱ ndasakáʼnu Jehová. Ña̱ visión yóʼo chi̱ndeétáʼanníña xíʼin ta̱ Juan ña̱ va̱ʼaníka ka̱ndíxara Ndióxi̱. Ta saátu xíniñúʼu chindeétáʼanña xíʼinyó ña̱ kándíxakayó Ndióxi̱, chi ña̱ visión yóʼo xínunu̱úña tiempo ña̱ ndóoyó vitin. Tiempo vitin, xítoyó ña̱ ku̱a̱ʼání na̱ yiví kíʼvina ti̱xin ñuu Ndióxi̱, ta ndátuna ka̱kuna ti̱xin ña̱ gran tribulación ta ndakiʼinna ña̱ kutakuna ndiʼi tiempo. w19.09 26, 27 párr. 2, 3

Ná ndakanixi̱níyó ña̱ sa̱kán ni̱ka̱ʼa̱n na̱ chíñu xa̱ʼa̱ ña̱ “va̱ʼaní kundooyó vitin ta va̱ása yi̱ʼvíkayó”. Ta sana nda̱a̱ kivi ni̱nuní kunina, xa̱ʼa̱ ña̱ ku̱chiñuna ta̱xina ña̱ va̱ʼa kundoo na̱ yiví iníísaá ñuyǐví. Ta kuni̱na sandáʼvina miíyó, ña̱ kandíxayó ña̱ ku̱chiñuna ta̱xina ña̱ kundoo va̱ʼayó. Soo mií ña̱ nda̱a̱, va̱ása kuchiñuna xíʼin ña̱ kixaa̱ tá ná ndiʼi. “Babilonia ña̱ káʼnu” ndiʼi-xa̱ʼa̱ña (Apoc. 17:5, 15-18). Saáchi mií Ndióxi̱ “chika̱a̱ra níma̱na ña̱ ná keʼéna ña̱ kúni̱ra”. ¿Ndáaña koo ña̱yóʼo? Ña̱ sandiʼi-xa̱ʼa̱na ndiʼi na̱ veʼe-ñu̱ʼu vatá, xíʼin na̱ káʼa̱n kúú cristiano. Ndióxi̱ chika̱a̱ra ña̱yóʼo níma̱ u̱xu̱ ndiki̱ tí kití yukú tí color kúaʼa. Ña̱ u̱xu̱ ndiki̱ yóʼo kúú na̱ chíñu na̱ chíndeétáʼan xíʼin tí kití yukú, á na̱ kúú na̱ Naciones Unidas (Apoc. 17:3, 11-13; 18:8). Tá ná kixáʼa na̱ chíñu yóʼo kanitáʼanna xíʼin na̱ veʼe-ñu̱ʼu vatá, saá kúú ña̱ kixáʼa ña̱ gran tribulación. Ta ña̱yóʼo iin kama kixaa̱ña sa̱tá na̱ ñuyǐví, ta i̱yoní kooña. w19.10 14 párr. 1, 3

Tá siglo nu̱ú, ta̱ Diótrefes xi̱kukúini̱-inira xi̱xinira na̱ xi̱niʼi yichi̱ nu̱ú na̱ congregación. Chi xi̱kuni̱ra kundayáʼvikara nu̱ú na̱ hermano, xa̱ʼa̱ ña̱yóʼo ni̱ka̱ʼa̱nra ña̱ va̱ása va̱ʼa xa̱ʼa̱ ta̱ apóstol Juan xíʼin inkaka na̱ hermano, ña̱ va̱ʼa ná va̱ása ixato̱ʼóka na̱ congregación miína (3 Juan 10). Miíyó, va̱ása xa̱a̱yó keʼéyó táki̱ʼva ke̱ʼé ta̱kán, soo kivi kixáʼayó kukúini̱-iniyó kuniyó inka na̱ hermano na̱ ndákiʼin iin chiñu ña̱ xi̱kuni̱yó ndakiʼinyó, ta ndákanixi̱níyó ña̱ kuchiñutu miívayó keʼéyóña. Ña̱ kúini̱-ini nda̱a̱ táki̱ʼva íyo iin planta tú va̱ása va̱ʼa saá íyoña, chi tá ná ki̱ʼviña níma̱yó, ixayo̱ʼvi̱ña xíʼinyó ña̱ sandiʼi-xa̱ʼa̱yóña. Ta ña̱yóʼo kivi kuaʼnukaña tá ná kukúiñu-iniyó, tá ni̱nuní ná kuniyó á tá ná ndi̱ʼi̱ní-iniyó xa̱ʼa̱ iinlá miíyó. Ta ña̱ kúini̱-ini va̱ása taxiña ña̱ kuumiíyó ña̱ va̱ʼa, tá kúú ña̱ kuʼvi̱-iniyó, ña̱ kundáʼvi-iniyó xíʼin ña̱ va̱ʼa koo iniyó. Tá ná kixáʼaña kuaʼnuña níma̱yó, ndi̱ku̱n ná sandíʼi-xa̱ʼa̱yóña. w20.02 15 párr. 6, 7

Ña̱ ku̱ni kachi ta̱ Pablo kúú ña̱ xo̱ʼvi̱níra xa̱ʼa̱ ña̱ xi̱kuumiíra sava ña̱ xi̱ ixayo̱ʼvi̱ xíʼinra. Ta ni̱ka̱ʼa̱nra ña̱ tá íyo iin ángel ta̱ Ndi̱va̱ʼa saá íyoña, ta nda̱a̱ tá íyo ña̱ káni xa̱ʼnda̱ nu̱úra sa̱a̱ íyoña (á ña̱ kánitáʼan xíʼinra nda̱a̱ táki̱ʼva káchi nota). Sana su̱ví ta̱ Ndi̱va̱ʼa xíʼin na̱ ta̱chí ndi̱va̱ʼa kúú na̱ níchika̱a̱ iñú kán ku̱ñura, á na̱ sándi̱ʼi̱-inira. Soo tá xi̱ni na̱ ta̱chí ndi̱va̱ʼa ña̱ ndíka̱a̱ “iñú” ku̱ñura, sana ki̱xáʼana sáxo̱ʼvi̱kanara. ¿Ndáaña ke̱ʼé ta̱ Pablo? Tá xa̱ʼa̱, ta̱ Pablo xi̱kuni̱ra sa̱ñára nu̱ú “iñú” ña̱ xi̱kuumiíra. Ka̱chira: “U̱ni̱ yichi̱ ni̱ka̱ʼi̱n xíʼin tátayó [Jehová] ña̱ ná kuxíka ña̱yóʼo nu̱úi̱”. Ni ni̱ka̱ʼa̱n ndáʼvira xíʼin Ndióxi̱, iñú ña̱ ndíka̱a̱ ku̱ñura va̱ása níkitaña. ¿Á kúni̱ kachi ña̱yóʼo ña̱ va̱ása níndakuiin Jehová ña̱ ni̱ka̱ʼa̱nra? Va̱ása, chi nda̱kuiinvara. Ni va̱ása níkindaara tu̱ndóʼo kán nu̱úra, soo ta̱xivara ndee̱ ndaʼa̱ra ña̱ kundeé-inira. Ta ni̱ka̱ʼa̱nra xíʼinra: “Saáchi tá ku̱a̱ʼa̱n ndákavaka-iniún yi̱ʼi̱ táxikai̱ ndee̱ ndaʼún” (2 Cor. 12:8, 9). Tíxa̱ʼvi ña̱ chi̱ndeé Ndióxi̱ ta̱ Pablo, ku̱chiñura ni̱xi̱yo si̱í-inira ta saátu táxi̱n ni̱xi̱yo inira (Filip. 4:4-7). w19.11 9 párr. 4, 5

Iinlá mií Jehová kúú ta̱ xíniñúʼu ndasakáʼnuyó, chi i̱xava̱ʼara miíyó ta ta̱xira ña̱ tákuyó (Apoc. 4:11). Soo ni kúʼvi̱-iniyó xíniyó Jehová ta íxato̱ʼóyóra, íyo sava ña̱ʼa ña̱ kivi kasi nu̱úyó ña̱ iinlá miíra ndasakáʼnuyó. Ña̱ Biblia chítáʼanña ña̱ kúʼvi̱ní-iniyó xíniyó Jehová xíʼin ña̱ iinlá miíra ndasakáʼnuyó. Ta va̱ása xíniñúʼu kúʼvi̱ka-iniyó kuniyó inkaka ña̱ʼa nu̱úka ña̱ kuʼvi̱-iniyó kuni̱yó Jehová (Éx. 34:14). Iinlá mií Jehová ndásakáʼnuyó, xa̱ʼa̱ ña̱ sa̱kuaʼayó ku̱a̱ʼání ña̱ʼa xa̱ʼa̱ra. Ni̱xa̱a̱yó ku̱nda̱a̱-iniyó xa̱ʼa̱ ña̱ va̱ʼa ña̱ kúúmiíra. Xíni̱yó ndáaña kútóora ta ndáaña va̱ása kútóora, ta kúni̱yó keʼéyó ña̱ káʼa̱nra. Kúnda̱a̱-iniyó ndáaña kúni̱ra taxira ndaʼa̱yó ta kúni̱yó chindeétáʼanyó xíʼinra, ta tákuyó nda̱a̱ táki̱ʼva kúni̱ra. Saátu kúsi̱íní-iniyó xa̱ʼa̱ ña̱ táxira ña̱ kooyó migora (Sal. 25:14). Ndiʼi ña̱ sákuaʼayó xa̱ʼa̱ra sákuyatinkaña miíyó nu̱úra (Sant. 4:8). w19.10 26 párr. 1-3

Tiempo vitin na̱ hermanoyó yáʼana nu̱ú ku̱a̱ʼání tu̱ndóʼo. Tá kúú, ku̱a̱ʼánína xóʼvi̱na xa̱ʼa̱ ña̱ kininí kóon sa̱vi̱, ña̱ táa̱n, ña̱ íyo guerra á inkaka tu̱ndóʼo. Tá kúu ña̱yóʼo, sana savayó kivi ndakiʼinyóna ña̱ kundoona veʼeyó. Inkatuna kivi taxina sava ña̱ xíniñúʼuna. Soo, ña̱ kivi keʼé ndiʼiyó kúú ña̱ ka̱ʼa̱nyó xíʼin Jehová ña̱ ná chindeétáʼanra xíʼinna. Tá kúnda̱a̱-iniyó ña̱ iin na̱ hermanoyó nda̱kava-inina, sana va̱ása xíni̱yó ndáaña ka̱ʼa̱nyó xíʼinna á ndáaña keʼéyó. Soo, ndiʼivayó kivi chindeétáʼan xíʼinna. Tá kúú, kivi ku̱ʼu̱nyó kotoyóna, kuniso̱ʼoyó tá nátúʼunna xíʼinyó, ta kivitu ka̱ʼa̱nyó xíʼinna xa̱ʼa̱ iin texto ña̱ sándi̱ko-ini miíyó (Is. 50:4). Ta ña̱ ndáyáʼvika kúú ña̱ koo yatinyó xíʼin na̱ migoyó tá yáʼana nu̱ú tu̱ndóʼo. Xíniñúʼu chika̱a̱-iniyó ña̱ ndukúyó na̱ koo migoyó, ta ndakú ná koo ña̱ kitáʼanyó xíʼina. Chi, na̱ kítáʼanyó xíʼin, su̱ví nda̱saa tiempo nu̱ú ndíʼi kutáʼanna xíʼinyó, chi ndiʼi tiempo kúú ña̱ kutáʼanna xíʼinyó. w19.11 7 párr. 18, 19

Xi̱taxina ña̱ ofrenda yóʼo xa̱ʼa̱ ña̱ kúʼvi̱-inina xínina Jehová ta su̱ví xíʼin ña̱ ndúxa níxi̱keʼénaña. Ta na̱ xi̱taxi ña̱ ofrenda, na̱ veʼena xíʼin na̱ su̱tu̱ kúú na̱ xi̱xixi ku̱ñu tí kití tí ta̱xina. Soo, sava táʼvi tí kití yóʼo kuenta mií Jehová xi̱kuuña. ¿Ndáaña kúúña? Nu̱ú Jehová xa̱ʼan tí kití kúú ña̱ va̱ʼaníka. Ta saátu ni̱ka̱ʼa̱nra ña̱ sava ña̱ ñúʼu inirí ndáyáʼviníña, tá kúú ña̱ nduchírí (Lev. 3:6, 12, 14-16). Xa̱ʼa̱ ña̱kán, xi̱kusi̱íní-ini Jehová tá xi̱taxi na̱ ñuu Israel xíʼin ndiʼi níma̱na ña̱ ñúʼu ini tí kití xíʼin xa̱ʼanrí ndaʼa̱ra. Tá xi̱taxi iin na̱ ñuu Israel iin ofrenda, xi̱na̱ʼa̱na ña̱ kúni̱na taxina mií ña̱ va̱ʼa ndaʼa̱ Jehová. Ki̱ʼva saá íyo ña̱ ke̱ʼé ta̱ Jesús, ña̱ ta̱xira ndiʼi ña̱ va̱ʼa ña̱ kúúmiíra ndaʼa̱ yivára, ña̱ ndasakáʼnurara xa̱ʼa̱ ña̱ kúʼvi̱ní-inira xínirara (Juan 14:31). Ta̱ Jesús xi̱kusi̱íní-inira xi̱keʼéra ña̱ kúni̱ Ndióxi̱ (Sal. 40:8). Ni̱kusi̱íní-ini Jehová tá xi̱nira ndáa ki̱ʼva ka̱chíñu se̱ʼera nu̱úra. w19.11 22 párr. 9, 10

Tu̱ʼun Ndióxi̱ káchiña ña̱ tá ni̱ya̱ʼa i̱ñu̱ ki̱vi̱, Jehová sa̱ndákoora ña̱ ixava̱ʼara ña̱ʼa ña̱ íyo nu̱ú ñuʼú yóʼo (Gén. 2:2). Soo Jehová kútóoníra kachíñura, ña̱kán ndákundeékara káchíñura (Juan 5:17). Ña̱ ley ña̱ ki̱vi̱ sábado táki̱ʼva íyo ña̱ va̱xi nu̱ú Génesis saá íyoña, chi xíniñúʼu kachíñuna i̱ñu̱ ki̱vi̱ ta ki̱vi̱ ña̱ u̱xa̱ xíniñúʼu ndakindee̱na. Ndióxi̱ ni̱ka̱ʼa̱nra ña̱ ki̱vi̱ sábado iin señal ña̱ ki̱ndo̱ora xíʼin na̱ ñuu Israel kúúña (Éx. 31:12-14). Nda̱a̱ ni iin na̱ yiví va̱ása kivi kachíñu ña̱ ki̱vi̱ kán, ni na̱ va̱lí ni na̱ esclavo. Ta nda̱a̱ kití sa̱na̱na va̱ása kivi kachíñu (Éx. 20:10). Ña̱yóʼo, xi̱chindeétáʼanña xíʼin na̱ ñuu Israel ña̱ kundi̱ʼi̱ka-inina xa̱ʼa̱ chiñu Ndióxi̱. Ku̱a̱ʼání na̱ su̱tu̱ na̱ ni̱xi̱yo tá tiempo ta̱ Jesús yo̱ʼvi̱ní nda̱sana ña̱ ki̱vi̱ sábado. Xi̱ka̱ʼa̱nna ña̱ va̱ása kivi ndakayana ña̱ kuxuna, ni ña̱ sandáʼana iin na̱ ndeé ndóʼo (Mar. 2:23-27; 3:2-5). Soo su̱ví saá níxindakanixi̱ní Jehová xa̱ʼa̱ ña̱yóʼo, ta saátu ni̱ka̱ʼa̱n ta̱ Jesús xíʼin na̱ yiví na̱ xi̱xiniso̱ʼo miíra. w19.12 3, 4 párr. 8, 9

Tá ná sakuaʼakayó xa̱ʼa̱ ña̱ va̱ʼa ña̱ kúúmií Jehová, saá kúú ña̱ va̱ʼaka kundiku̱nyó yichi̱ra. Ta̱ David va̱ʼaní ni̱xi̱yo inira xíʼin na̱ yiví, nda̱a̱ táki̱ʼva kéʼé mií Jehová, saáchi xi̱xini̱ va̱ʼarara. Xa̱ʼa̱ ña̱ va̱ʼaní xi̱táʼanra xíʼin Jehová, ni̱xa̱a̱ra ku̱ura iin rey ta̱ kúni̱nína xínina, ta saátu xi̱kuura iin ejemplo va̱ʼaní nu̱ú na̱ inka rey ña̱ ñuu Israel (1 Rey. 15:11; 2 Rey. 14:1-3). ¿Ndáaña sákuaʼayó? Xíniñúʼu kundiku̱nyó yichi̱ Ndióxi̱. Tá kéʼéyó nda̱a̱ táki̱ʼva kéʼé Ndióxi̱, saá náʼa̱yó ña̱ kúúyó se̱ʼera (Efes. 4:24). Nda̱a̱ ni iin yichi̱ va̱ása sandakooyó ña̱ sakuaʼayó xa̱ʼa̱ Jehová (Ecl. 3:11). Soo, su̱ví ña̱ ndáyáʼvi kúú nda̱saa ña̱ʼa xíni̱yó xa̱ʼa̱ Jehová, chi ndáaña kéʼéyó xíʼin ña̱ xíni̱yó kúú ña̱ ndáyáʼvi. Tá ná keʼéyó ndiʼi ña̱ sákuaʼayó ta chika̱a̱yó ndee̱ ña̱ kundiku̱nyó yichi̱ Ndióxi̱, ta̱kán kuyatinkara nu̱úyó (Sant. 4:8). Nu̱ú tu̱ʼunra, káʼa̱nra xíʼinyó ña̱ va̱ása sandákoora na̱ nándukúñaʼá. w19.12 20 párr. 20; 21 párr. 21, 23

Ta̱ Jacob xi̱kuʼvi̱-inira xi̱xinira ndiʼi na̱ se̱ʼera, soo xi̱kuʼvi̱níka-inira xi̱xinira ta̱ José, ta̱ xi̱kuumií 17 ku̱i̱ya̱. ¿Ndáaña ke̱ʼé na̱ inka se̱ʼera xa̱ʼa̱ ña̱yóʼo? Ni̱sa̱a̱-inina xi̱nina ta̱ José xa̱ʼa̱ ña̱ kúini̱-inina [uní-inina á ña̱ i̱ni̱-inina]. Xa̱ʼa̱ ña̱yóʼo ni̱xi̱kónara ña̱ koora esclavo, ta ni̱ka̱ʼa̱nna xíʼin yivána ña̱ iin kití yukú xa̱ʼní se̱ʼera ta̱ kúʼvi̱ní-inira xínira. Xa̱ʼa̱ ña̱ ni̱sa̱a̱-inina xi̱ninara sa̱ndiʼi-xa̱ʼa̱na ña̱ vií kítáʼan na̱ veʼena ta sa̱xóʼvi̱na yivána (Gén. 37:3, 4, 27-34). Na̱ kúkúini̱ xíni inkana kéʼéna ña̱ kúni̱ ku̱ñuna, ta na̱yóʼo va̱ása ki̱ʼvina ti̱xin Reino Ndióxi̱ (Gál. 5:19-21). Ta xa̱ʼa̱ ña̱yóʼo va̱ása viíka kítáʼanna xíʼin inkana, ta kamaní sáa̱na ta kíxáʼana kánitáʼanna. Ña̱ ke̱ʼé na̱ ñani ta̱ José, náʼa̱ña ña̱ kivi sandiʼi-xa̱ʼa̱ ña̱ kúini̱-ini ña̱ vií kítáʼanyó xíʼin inkana. Ña̱ nda̱a̱ kúú ña̱ va̱ása keʼéyó nda̱a̱ táki̱ʼva ke̱ʼé na̱ ñani ta̱ José, soo va̱ása xíniñúʼu nandósóyó ña̱ ndiʼiyó kúúyó na̱ yiví ku̱a̱chi, ta níma̱yó kivi sandáʼviña miíyó. Xa̱ʼa̱ ña̱kán, sava kúkúini̱-iniyó xíniyó inkana. w20.02 14 párr. 1-3

Iin yichi̱ Jehová ki̱ʼinra loʼo espíritu santo ña̱ kúúmií ta̱ Moisés, ta ta̱xiraña ndaʼa̱ iin grupo loʼo na̱ kúú anciano ña̱ ñuu Israel, na̱ ndóo yatin nu̱ú níndichi tienda ña̱ reunión. Tá ni̱ya̱ʼa loʼo, ta̱ Moisés ku̱ndaa̱-inira ña̱ u̱vi̱ na̱ anciano na̱ va̱ása níxa̱ʼa̱n tienda ña̱ reunión, nda̱kiʼinna espíritu santo, ta ki̱xáʼana kéʼéna nda̱a̱ táki̱ʼva kéʼé na̱ profeta. ¿Ndáaña ke̱ʼéra tá ni̱ka̱ʼa̱n ta̱ Josué xíʼinra, ña̱ ná va̱ása taxira keʼénaña? Va̱ása níkukúini̱-inira xa̱ʼa̱ ña̱ nda̱kaxin Jehová u̱vi̱ na̱ ta̱a yóʼo, chi ku̱si̱í-inira xa̱ʼa̱ ña̱ nda̱kiʼinna chiñu ña̱ koona profeta (Núm. 11:24-29). ¿Ndáaña sákuaʼayó xíʼin ña̱ ke̱ʼé ta̱ Moisés? Ná ndakanixi̱níyó xa̱ʼa̱ iin ta̱ anciano ta̱ kútóoní chiñu ña̱ kúúmiíra ti̱xin congregación, ta káʼa̱nna xíʼinra, ña̱ ná sanáʼa̱ra inka ta̱ hermano ña̱ va̱ʼa kixáʼara keʼéra táʼan ña̱yóʼo. Tá vitá íyo inira, nda̱a̱ táki̱ʼva ni̱xi̱yo ini ta̱ Moisés, va̱ása ndakanixi̱níra ña̱ kǒo kundayáʼvikara. Chi kusi̱íva-inira xa̱ʼa̱ ña̱ sanáʼa̱ra ta̱ hermano yóʼo. w20.02 15 párr. 9; 17 párr. 10, 11

Ña̱ ndeé ndóʼoyó kivi sandákavaña-iniyó. Ta sana kivi kukaʼan nu̱úyó tá xíto inka na̱ yiví ña̱ va̱ása kívika keʼéyó ku̱a̱ʼá ña̱ʼa á tá xíniñúʼuyó ña̱ chindeétáʼanna xíʼinyó. Ni tá va̱ása xíni̱ inkana á ndeé ndóʼoyó, sana kivi kukaʼan nu̱úyó xa̱ʼa̱ ña̱ va̱ása kívika keʼéyó táʼan ña̱ xi̱keʼéyó tá ya̱chi̱. Tá yáʼayó nu̱ú ña̱yóʼo, Jehová chíka̱a̱ra ndee̱ xíʼinyó. ¿Ndáa ki̱ʼva kéʼéraña? Nu̱ú Biblia va̱xi tu̱ʼun ña̱ ni̱ka̱ʼa̱n Jehová, ña̱ sándakaʼán miíyó ña̱ ndáyáʼviníyó nu̱úra ni kúúmiíyó iin kue̱ʼe̱ (Sal. 31:19; 41:3). Tá káʼviyó tu̱ʼun Ndióxi̱, miíra chindeétáʼanra xíʼinyó ña̱ va̱ása kundi̱ʼi̱ní-iniyó xa̱ʼa̱ kue̱ʼe̱ ña̱ kúúmiíyó, ta kivi kandíxayó ña̱ kúnda̱a̱va-ini Jehová xa̱ʼa̱ ña̱ ndóʼoyó. Ná ka̱ʼa̱n ndáʼviyó xíʼinra ña̱ chindeétáʼanra xíʼinyó ña̱ va̱ása ndakava-iniyó. Ná kaʼviyó Biblia ña̱ va̱ʼa ndani̱ʼíyó tu̱ʼun va̱ʼa ña̱ káʼa̱n Jehová xíʼinyó, ta ná ndakanixi̱níyó xa̱ʼa̱ ña̱ káʼa̱n ña̱ ndáyáʼviníyó nu̱úra. Tá ná keʼéyó ña̱yóʼo, kiʼinyó kuenta ña̱ va̱ʼaní-inira xíʼin ndiʼi na̱ nda̱kú íyo ini ndásakáʼnu-ñaʼá (Sal. 84:11). w20.01 15, 16 párr. 9, 10, 12

Ta̱ Isaac iin ta̱a ta̱ ku̱i̱ká ni̱xi̱yora, ta na̱ filisteo xi̱sa̱a̱-inina xi̱xininara xa̱ʼa̱ ña̱ʼa ña̱ xi̱kuumiíra (Gén. 26:12-14). Ta nda̱a̱ ni̱xa̱a̱na nda̱taánna ñuʼú ini pozo nu̱ú xi̱xiʼi kití sa̱na̱ ta̱ Isaac ti̱kui̱í (Gén. 26:15, 16, 27). Tiempo vitin, sava na̱ yiví íyona táki̱ʼva ni̱xi̱yo na̱ filisteo, chi kúkúini̱-inina xínina na̱ kúúmií ku̱a̱ʼáka ña̱ʼa nu̱úna. Su̱ví nda̱saa kuití kúni̱na kuumiína ña̱ kúúmií inkana, chi saátu kúni̱na ña̱ ná va̱ása kuumiíka na̱ yiví kán ña̱ xa̱a̱ kúúmiína. Na̱ xi̱niʼi yichi̱ nu̱ú na̱ veʼe-ñu̱ʼu na̱ judío xi̱kukúini̱-inina xi̱xinina ta̱ Jesús, xa̱ʼa̱ ña̱ vií xi̱keʼé na̱ yiví xíʼinra (Mat. 7:28, 29). Ndióxi̱ kúú ta̱ chi̱ndaʼá ta̱ Jesús nu̱ú ñuʼú yóʼo ta xi̱sanáʼa̱ra ña̱ nda̱a̱. Soo ni saá, na̱ xi̱niʼi yichi̱ nu̱ú na̱ veʼe-ñu̱ʼu ni̱ka̱ʼa̱nna ña̱ vatá xa̱ʼa̱ra, ña̱ va̱ʼa ná kixáʼa na̱ yiví ka̱ʼa̱nna ña̱ va̱ása va̱ʼa xa̱ʼa̱ra (Mar. 15:10; Juan 11:47, 48; 12:12, 13, 19). ¿Ndáaña sákuaʼayó xíʼin ña̱yóʼo? Ña̱ xíniñúʼu chika̱a̱yó ndee̱ ña̱ va̱ása kukúini̱-iniyó kuniyó inkana xa̱ʼa̱ ña̱ va̱ʼa ña̱ kúúmiína, ta saátu xa̱ʼa̱ ña̱ vií kéʼé na̱ congregación xíʼinna. Va̱ʼaka ná chika̱a̱yó ndee̱ ña̱ kooyó táki̱ʼva íyona (1 Cor. 11:1). w20.02 15 párr. 4, 5

Ná ndakanixi̱níyó ña̱ xa̱a̱ ku̱a̱ʼání ku̱i̱ya̱ kúú ña̱ íyoyó chí ñuu Persia. Ta kúni̱yó ka̱ʼa̱nyó iin ña̱ʼa xíʼin ta̱ rey. Soo kǒo kivi ki̱ʼviyó nu̱ú ta̱ rey tá va̱ása níndukúyó permiso, chi tá saá ná koo ku̱ʼu̱nyó nu̱úra nda̱a̱ kivi kuviyó. Táxiníyó tíxa̱ʼvi xa̱ʼa̱ ña̱ va̱ása íyo Jehová nda̱a̱ táki̱ʼva íyo na̱ rey ña̱ ñuu Persia, kivi ka̱ʼa̱nyó xíʼinra ama kúni̱ miíyó. Kúni̱ra ña̱ ná va̱ása yi̱ʼvíyó ka̱ʼa̱nyó xíʼinra. Ta ni kúúmiíra título ña̱ ndáyáʼviní tá kúú, ta̱ i̱xava̱ʼa ndiʼi ña̱ʼa, ta̱ kúúmií ndiʼi ndee̱, táta káʼnu, soo kúni̱ra ña̱ ná kuniñúʼuyó inka tu̱ʼun ña̱ ka̱ʼa̱nyó xíʼinra, tá kúú ña̱ tu̱ʼun “yivá” (Mat. 6:9). ¿Á va̱ása kúsi̱í-iniyó xa̱ʼa̱ ña̱ kúni̱ Jehová ña̱ ná kutáʼan viíyó xíʼinra? Kivi ka̱ʼa̱nyó “yivá” xíʼin Jehová, saáchi ta̱kán kúú ta̱ ta̱xi ña̱ tákuyó (Sal. 36:9). Xa̱ʼa̱ ña̱ kúúra yiváyó xíniñúʼu kuniso̱ʼoyó ña̱ káʼa̱nra. Tá kéʼéyó ña̱ káʼa̱nra xíʼinyó, ku̱a̱ʼání bendición ndakiʼinyó (Heb. 12:9). Iin ña̱yóʼo kúú ña̱ kutakuyó ndiʼi tiempo, kivi kooña chí ndiví á nu̱ú ñuʼú yóʼo. w20.02 2 párr. 1-3

Ña̱ kúni̱yó kúú ña̱ chindeétáʼanyó xíʼin na̱ káʼviyó xíʼin, ña̱ kuaʼnuna xíʼin tu̱ʼun Ndióxi̱ (Efes. 4:13). Savana kíxáʼana káʼvina xíʼinyó, chi kúni̱na kotona ndáa ki̱ʼva chindeétáʼan ña̱yóʼo xíʼinna. Tá ná kixáʼana kuʼvi̱ka-inina kunina Jehová, sana kixáʼana ndakanixi̱nína ndáa ki̱ʼva chindeétáʼanna xíʼin inkana, ta saátu xíʼin na̱ hermano ti̱xin congregación (Mat. 22:37-39). Ta ná ka̱ʼa̱nyó xíʼinna, ña̱ ndáyáʼviní taxiyó donación ña̱ va̱ʼa chindeétáʼanyó xíʼin na̱ ñuu Ndióxi̱. Ná sanáʼa̱yó na̱ káʼviyó xíʼin, ndáaña keʼéna tá yáʼana nu̱ú tu̱ndóʼo. Ná ka̱ʼa̱nyó xa̱ʼa̱ iin ejemplo. Tá iin na̱ káʼviyó xíʼin na̱ xa̱a̱ kúú publicador, káchina ña̱ iin na̱ hermano ti̱xin congregación ni̱ka̱ʼa̱nna iin ña̱ va̱ása va̱ʼa xíʼinna. ¿Ndáaña keʼéyó? Ná va̱ása ka̱ʼa̱nyó xíʼinna ndáana kúúmií ku̱a̱chi, va̱ʼaka ná ka̱ʼa̱nyó xíʼinna ndáaña káʼa̱n Biblia. Ná ka̱ʼa̱nyó xíʼinna ña̱ kivi keʼéna u̱vi̱ ña̱ʼa: ña̱ kukáʼnu-inina xa̱ʼa̱ na̱ hermano, soo tá va̱ása kivi nandósóna xa̱ʼa̱ ña̱ ku̱u, va̱ʼaka xíʼin ña̱ si̱í-ini ná ka̱ʼa̱nna xíʼin na̱ hermano yóʼo ña̱ kukáʼnu-inina xa̱ʼa̱na (chitáʼanña xíʼin Mateo 18:15). Ná chindeétáʼanyó xíʼin na̱ káʼviyó xíʼin ña̱ kotona ndáaña ka̱ʼa̱nna. w20.01 5 párr. 14, 15

Náʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ íxakáʼnu-inira xa̱ʼa̱yó, tá ndúkúyóña nu̱úra ti̱xin oración, tá ndákiʼinyó consejo ña̱ táxira ndaʼa̱yó, ta saátu tá chíka̱a̱yó ndee̱ ña̱ va̱ása ki̱ʼvi tukuyó ku̱a̱chi ña̱ xa̱a̱ ni̱ki̱ʼviyó. Tá kéʼéyó ña̱yóʼo va̱ʼaní kúniyó. Va̱ʼaní kúniyó tá kúnda̱a̱-iniyó, ña̱ yatin íyo Jehová xíʼin na̱ kúsuchí-ini, ta chíndeétáʼanra xíʼin na̱ ndákava-ini (Sal. 34:18). Tá kúyatinka ña̱ ndiʼi-xa̱ʼa̱ ñuyǐví yóʼo, sana koo ña̱ sandi̱ʼi̱ka-iniyó. Tá ná kixáʼa ndi̱ʼi̱ní-iniyó, kama ná ka̱ʼa̱nyó xíʼin Jehová ña̱ chindeétáʼanra xíʼinyó. Ná kaʼvi ni̱ʼiyó Biblia. Ná kundiku̱nyó ña̱ ke̱ʼé ñá Ana, ta̱ apóstol Pablo xíʼin ta̱ rey David. Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ kunda̱a̱-iniyó ndáaña sándi̱ʼi̱-iniyó (Sal. 139:23). Ná sandákooyó ña̱ sándi̱ʼi̱-iniyó ndaʼa̱ Jehová, tá kúú ña̱ kǒo kívi nasamayó. Tá ná keʼéyó ña̱yóʼo va̱ʼaní kuniyó, nda̱a̱ táki̱ʼva ndo̱ʼo ta̱ salmista ta̱ xi̱ta ña̱yóʼo nu̱ú Jehová: “Tá ki̱xáʼa ni̱ndi̱ʼi̱ní-inii̱, miíún sa̱ndíkoún-inii̱” (Sal. 94:19). w20.02 24 párr. 17; 25 párr. 20, 21

Ña̱ tu̱ʼun griego tá káʼa̱nña, “ña̱ ni̱ka̱ʼyi̱ xíʼin ta̱chí yi̱i̱ Ndióxi̱” kúni̱ kachiña ña̱ mií Ndióxi̱ kúú ta̱ “ni̱ka̱ʼa̱nña” á “ta̱xiña”. Jehová xi̱niñúʼura espíritu santora ña̱ chi̱ndeétáʼanra xíʼin na̱ ka̱ʼyí Biblia ña̱ ka̱ʼyína tu̱ʼunra. Ki̱vi̱ káʼviyó tu̱ʼun Ndióxi̱ ta ndákanixi̱níyó xa̱ʼa̱ña, kíʼviña xi̱níyó xíʼin níma̱yó. Ta ña̱yóʼo chíndeétáʼanña xíʼinyó ña̱ kutakuyó nda̱a̱ táki̱ʼva kúni̱ mií Jehová (Heb. 4:12). Soo ña̱ va̱ʼa ndakiʼinyó ndiʼi ña̱ va̱ʼa ña̱ kúúmií espíritu santo, xíniñúʼu taváyó tiempo ña̱ kaʼvi ni̱ʼiyó Biblia ta vií ndakanixi̱níyó xa̱ʼa̱ ña̱ káʼviyó. Saá kúú ña̱ kivi chindeétáʼan tu̱ʼun Ndióxi̱ xíʼinyó, xíʼin ña̱ ka̱ʼa̱nyó á keʼéyó. Ta saátu inkáchi ná ndasakáʼnuyó Ndióxi̱ xíʼin na̱ hermano (Sal. 22:22). Espíritu santo Jehová íyoña ti̱xin reunión (Apoc. 2:29). Ki̱vi̱ ndákutáʼanyó reunión, ndúkúyó espíritu santo ti̱xin ña̱ oración, ta xítayó yaa ña̱ ka̱na nu̱ú tu̱ʼun Ndióxi̱ ta saátu xíniso̱ʼoyó ña̱ káʼa̱n na̱ hermano na̱ nda̱ka̱xin espíritu. Ña̱kán, tá kúni̱yó ndakiʼinyó espíritu santo, xíniñúʼu kaʼvi kúeeyó tutuyó ña̱ va̱ʼa ndakuiinyó ti̱xin reunión. w19.11 11 párr. 13, 14