Febrero

Jehová ndíʼi̱ní-inira xa̱ʼa̱ miíyó na̱ káchíñu nu̱úra. Ta íyo yatinra xíʼin iin tá iinyó, ta kúnda̱a̱-inira ama kúú ña̱ ndákavaní-iniyó (Sal. 145:18, 19). Ná kotoyó ndáa ki̱ʼva xi̱ndaa Jehová ta̱ profeta Elías. Ta̱ profeta yóʼo ni̱xi̱yora tá tiempo ña̱ ni̱xo̱ʼvi̱ní na̱ ñuu Israel. Saáchi na̱ xi̱sa̱a̱-ini xi̱xini Ndióxi̱ xi̱ ixandi̱va̱ʼanína xíʼin na̱ ñuura, ta nda̱a̱ xi̱kuni̱na kaʼnína ta̱ Elías (1 Rey. 19:1, 2). Ta̱ Elías xi̱ndakanixi̱níra ña̱ iinlá miíra kúú profeta ta̱ xi̱ndasakáʼnu Ndióxi̱, ta ña̱yóʼo sa̱ndíʼi̱níña-inira (1 Rey. 19:10). Soo kama chi̱ndeétáʼan Jehová xíʼinra: chi̱ndaʼára iin ta̱ ángel nu̱ú ta̱ Elías ña̱ ka̱ʼa̱nra xíʼinra ña̱ va̱ása íyo mitúʼunra, chi ni̱xi̱yokava inka na̱ ñuu Israel na̱ xi̱ndasakáʼnu Ndióxi̱ (1 Rey. 19:5, 18). Ta̱ Jesús ni̱ka̱ʼa̱nra xíʼin na̱ discípulora ña̱ na̱ ñuu Ndióxi̱ koo na̱ veʼena (Mar. 10:29, 30). Ta yiváyó Jehová káʼa̱nra ña̱ chindeétáʼanra xíʼin ndiʼi na̱ káchíñu nu̱úra. w21.06 8, 9 párr. 3, 4

Ku̱a̱ʼání na̱ yiví va̱ása xíínna kuniso̱ʼona miíyó saáchi ña̱ sánáʼa̱yó xa̱ʼa̱ Biblia náʼa̱ña ña̱ ndiʼi ña̱ sánáʼa̱ na̱ veʼe-ñu̱ʼu, ña̱ vatá kúúña. Na̱ níʼi yichi̱ nu̱ú na̱ veʼe-ñu̱ʼu káʼa̱nna ña̱ íyo infierno ta kán kúú nu̱ú sáxo̱ʼvi̱ Ndióxi̱ na̱ kéʼé ña̱ va̱ása va̱ʼa, ta xíʼin ña̱ vatá yóʼo sáyi̱ʼvína na̱ yiví ña̱ va̱ʼa keʼéna ña̱ kúni̱ na̱yóʼo. Soo miíyó na̱ ndásakáʼnu Jehová káʼa̱nyó ña̱ vatá kúú ña̱yóʼo, chi Ndióxi̱ kúʼvi̱va-inira xínira miíyó. Inka religión káʼa̱nña ña̱ tákukava iin na̱ yiví tá xa̱a̱ ni̱xi̱ʼi̱na. Soo miíyó sánáʼa̱yó na̱ yiví ña̱ va̱ása káʼa̱n Biblia xa̱ʼa̱ ña̱yóʼo. Saáchi tá ña̱ ndixa kúú ña̱yóʼo, ¿nda̱chun káʼa̱n Biblia ña̱ sandátaku Ndióxi̱ na̱ yiví? Na̱ inka religión káʼa̱nna ña̱ mií Ndióxi̱ kúú ta̱ ndáka̱xin ndáaña kundoʼoyó. Soo miíyó na̱ testigo Jehová sánáʼa̱yó ña̱ ndiʼiyó kivi ndaka̱xinyó ndáaña keʼéyó á ndasakáʼnuyó Ndióxi̱ á va̱ása. Tá kúnda̱a̱-ini na̱ níʼi yichi̱ nu̱ú na̱ veʼe ñu̱ʼu xa̱ʼa̱ ña̱yóʼo sáa̱nína. Tá kúʼvi̱-iniún xíniún ña̱ nda̱a̱, xíniñúʼu kandíxaún ndiʼi ña̱ káʼa̱n Ndióxi̱ (Juan 8:45, 46). Va̱ása keʼún nda̱a̱ táki̱ʼva ke̱ʼé ta̱ Ndi̱va̱ʼa, va̱ʼaka nda̱kú koo iniún ta kandíxaún ña̱ nda̱a̱ ta saátu va̱ása sandákoúnña (Juan 8:44). Ndióxi̱ kúni̱ra ña̱ ná kundiku̱nyó yichi̱ ta̱ Jesús, ña̱kán káʼa̱nra ña̱yóʼo xíʼinyó: “Kundasíndó kunindó ña̱ va̱ása va̱ʼa; xíniñúʼu kuʼvi̱-inindó kunindó ña̱ va̱ʼa” (Rom. 12:9; Heb. 1:9). w21.05 10 párr. 10, 11

Tá ni̱xa̱a̱yó nda̱kavayó ndaʼa̱ ta̱ Ndi̱va̱ʼa ta ki̱xáʼayó ni̱nu kúniyó á kúni̱yó kuumiíyó ku̱a̱ʼáka ña̱ʼa, ¿á kuchiñuyó sa̱ñáyó nu̱ú ña̱yóʼo? Kuchiñuvayó, saáchi ta̱ apóstol Pablo ni̱ka̱ʼa̱nra ña̱ na̱ nda̱kava ndaʼa̱ ta̱ Ndi̱va̱ʼa kiviva sa̱ñána (2 Tim. 2:26). Ná va̱ása nandósó-iniyó ña̱ íyoníkava ndee̱ Jehová nu̱ú ta̱ Ndi̱va̱ʼa. Ña̱kán kuchiñuvayó sa̱ñáyó ndaʼa̱ ta̱ Ndi̱va̱ʼa tá ná taxiyó chindeétáʼan Jehová xíʼinyó. Nu̱úka ña̱ kundatuyó ko̱oyoyó ndaʼa̱ ta̱ Ndi̱va̱ʼa ta saáví ndukúyó ki̱ʼva ña̱ sa̱ñáyó, va̱ʼaníka tá xa̱a̱ ya̱chi̱ka ná chika̱a̱yó ndee̱ ña̱ va̱ása ko̱oyoyó ndaʼa̱ra. Ta iinlá Jehová kúú ta̱ kivi chindeétáʼan xíʼinyó. Ndiʼiyó kivi kixáʼayó ni̱nuní kuniyó ta kuni̱yó kuumiíyó ku̱a̱ʼáka ña̱ʼa, ña̱kán ná ka̱ʼa̱nyó xíʼin Jehová ndiʼi ki̱vi̱ ña̱ chindeétáʼanra xíʼinyó kotoyó ndáa ki̱ʼva íyo ña̱ ndákanixi̱níyó xíʼin ña̱ kéʼéyó (Sal. 139:23, 24). Ná kiʼinníyó kuenta ña̱ va̱ása xa̱a̱yó ko̱oyoyó ndaʼa̱ ta̱ Ndi̱va̱ʼa. Xa̱a̱ ku̱a̱ʼání ku̱i̱ya̱ kúú ña̱ sándaʼvi ta̱ Ndi̱va̱ʼa na̱ yiví nda̱a̱ táki̱ʼva kéʼé na̱ tíin kití. Soo ndáa si̱lóʼo tiempo kúma̱ní ta miívara kúú ta̱ kunuʼni ta ndiʼi-xa̱ʼa̱ra (Apoc. 20:1-3, 10). Xa̱a̱ kúni̱níyó ná kixaa̱ ki̱vi̱ yóʼo. Soo nani ndátuyóña, ná chika̱a̱yó ndee̱ ña̱ va̱ása ko̱oyoyó ndaʼa̱ ta̱ Ndi̱va̱ʼa. Ná chika̱a̱níyó ndee̱ ña̱ va̱ása ni̱nu kuniyó ta saátu ña̱ va̱ása kuni̱yó kuumiíyó ku̱a̱ʼání ña̱ʼa. Ta ná chika̱a̱-iniyó ña̱ kundiku̱nyó consejo yóʼo: “Kǒo keʼéndó ña̱ kúni̱ ta̱ Ndi̱va̱ʼa tasaá kuxíkara nu̱úndó”. w21.06 19 párr. 15-17

Jehová kúsi̱íní-inira tá kíxáʼa na̱ yiví sákuaʼana xa̱ʼa̱ ña̱ va̱xi nu̱ú Biblia ta nátúʼunna xíʼin inkana xa̱ʼa̱ ña̱yóʼo (Prov. 23:15, 16). Ta saátu kúsi̱íní-inira xíʼin chiñu ña̱ kéʼéyó tiempo vitin. Saáchi ni xi̱ndika̱a̱ kue̱ʼe̱ ña̱ coronavirus tá ku̱i̱ya̱ 2020, soo ka̱ʼviyó xíʼin 7,705,765 na̱ yiví ta chi̱ndeétáʼanyó xíʼin 241,994 na̱ yiví ña̱ ni̱xa̱a̱na nda̱taxina miína ndaʼa̱ Jehová ta nda̱kuchina. Ta na̱ nda̱kuchi yóʼo kivi kixáʼana kaʼvina xíʼin inka na̱ yiví ta xa̱a̱na koona discípulo ta̱ Jesús (Luc. 6:40). Sákusi̱íníyó-ini Jehová tá chíndeétáʼanyó xíʼin na̱ yiví ña̱ xa̱a̱na koona discípulo ta̱ Jesús. Xíniñúʼu chika̱a̱nívayó ndee̱ ña̱ va̱ʼa sanáʼa̱yó na̱ yiví ña̱ xa̱a̱na kuʼvi̱-inina kunina Jehová. Soo miívara chindeétáʼan xíʼinyó ña̱ va̱ʼa sanáʼa̱yó na̱ yiví ña̱ xa̱a̱na koona discípulo ta̱ Jesús. ¿Á kivi chika̱a̱-iniyó nandukúyó iin na̱ yiví na̱ kivi kixáʼayó kaʼviyó xíʼin xa̱ʼa̱ Ndióxi̱? Tá nátúʼunyó xíʼin na̱ yiví ná ka̱ʼa̱nyó xíʼinna á kúni̱na kixáʼayó kaʼviyó xíʼinna xa̱ʼa̱ Ndióxi̱. Tá ná keʼéyó ña̱yóʼo, sana kuni̱vana kaʼviyó xíʼinna. w21.07 6, 7 párr. 14-16

Va̱ʼaní yichi̱ sa̱ndákoo ta̱ rey David nu̱ú na̱ hermano na̱ xa̱a̱ ku̱chée saáchi va̱ʼaní ni̱xi̱yo inira. Ta̱yóʼo ta̱xira ku̱a̱ʼání ña̱ʼa ña̱ kuniñúʼuna ixava̱ʼana veʼe Jehová (1 Crón. 22:11-16). Tá xa̱a̱ ku̱a̱ʼa̱n kúchéún ta kǒoka ndeún ña̱ kachíñún nu̱ú íxava̱ʼana veʼe nu̱ú ndásakáʼnuyó Ndióxi̱, kiviva chindeétáʼún xíʼin na̱ ñuu Ndióxi̱ tá ná taxiún loʼo xu̱ʼún ña̱ kúúmiíún. Saátu kivi sanáʼún na̱ hermano na̱ válíka ña̱ keʼéna chiñu ña̱ xa̱a̱ xíni̱ún keʼún. Saátu ta̱ apóstol Pablo va̱ʼaní ni̱xi̱yo inira, saáchi ni̱ka̱ʼa̱nra xíʼin ta̱ Timoteo ña̱ ná ku̱ʼu̱nra xíʼinra natúʼunra xa̱ʼa̱ Ndióxi̱ ta kotona na̱ hermano, ta sa̱náʼa̱rara ndáa ki̱ʼva keʼéra chiñu yóʼo (Hech. 16:1-3). Ña̱ sa̱náʼa̱ra ta̱ Timoteo va̱ʼaní chi̱ndeétáʼanña xíʼin ta̱yóʼo ña̱ na̱túʼunra xíʼin na̱ yiví xa̱ʼa̱ Ndióxi̱ (1 Cor. 4:17). Ta viíní xi̱niñúʼu ta̱ Timoteo ña̱ sa̱kúaʼara ña̱ va̱ʼa sa̱náʼa̱ra inkana. w21.09 12 párr. 14, 15

¿Ndáaña kivi sákuaʼayó xíʼin ña̱ ke̱ʼé ta̱ Apolos ta saátu ta̱ apóstol Pablo? Na̱yóʼo va̱ʼaní xi̱xini̱na xa̱ʼa̱ tu̱ʼun Ndióxi̱, ta va̱ʼaní xi̱sanáʼa̱na ta ku̱a̱ʼání na̱ yiví xi̱xini̱-ñaʼá. U̱vi̱ saá na̱yóʼo va̱ʼaní chi̱ndeétáʼanna xíʼin ku̱a̱ʼání na̱ yiví ña̱ ni̱xa̱a̱na ku̱una discípulo ta̱ Jesús, soo ta̱ Apolos xíʼin ta̱ Pablo va̱ása níkeetáʼanna (Hech. 18:24). Saáchi tá ni̱ya̱ʼa loʼo tiempo ña̱ nda̱kiʼinra ku̱a̱ʼa̱nra inka ñuu, ta̱ Pablo ni̱ka̱ʼa̱nra xíʼinra ña̱ ná ndandikóra chí Corinto (1 Cor. 16:12). Ta̱ Apolos viíva xi̱niñúʼura ña̱ xi̱xini̱ra keʼéra, chi na̱túʼunra xíʼin na̱ yiví xa̱ʼa̱ Ndióxi̱ ta nda̱sandakúra-ini na̱ hermano. Ta saátu vitá ni̱xi̱yo inira, saáchi va̱ása nísa̱a̱ra tá nda̱kani ta̱ Áquila xíʼin ñá Priscila nu̱úra xa̱ʼa̱ ña̱ káʼa̱n tu̱ʼun Ndióxi̱ (Hech. 18:24-28). Ta̱ apóstol Pablo xi̱kunda̱a̱va-inira xa̱ʼa̱ chiñu ña̱ va̱ʼaní xi̱keʼé ta̱ Apolos. Ta va̱ása níndakanixi̱níra ña̱ kivi kixáʼa na̱ yiví ka̱ʼa̱nna ña̱ xíni̱níka ta̱ Apolos nu̱ú miíra. Xíʼin consejo ña̱ ta̱xi ta̱ apóstol Pablo ndaʼa̱ na̱ ñuu Corinto ni̱na̱ʼa̱ra ña̱ vitá ni̱xi̱yo inira, ta xi̱kunda̱a̱-inira ña̱ ni̱xi̱yo sava ña̱ʼa ña̱ va̱ása kivi keʼéra ta saátu va̱ʼaní xi̱ndakanixi̱níra (1 Cor. 3:4-6). w21.07 18 párr. 15-17

Ta̱ Adán xíʼin ñá Eva kǒo níxiniso̱ʼona ña̱ ni̱ka̱ʼa̱n Ndióxi̱ xíʼinna ta xa̱ʼa̱ ña̱yóʼo va̱ása níkivika koona se̱ʼera. Soo, ¿ndáaña kundoʼo na̱ se̱ʼena? Xa̱ʼa̱ ña̱ kúʼvi̱ní-ini Jehová xínira na̱ yiví, ta̱xira se̱ʼera ña̱ ni̱xi̱ʼi̱ra xa̱ʼa̱na tasaá kivi xa̱a̱ tukuna koona na̱ veʼera tá ná kandíxanara (Juan 3:16). Ta saátu xa̱ʼa̱ ña̱ ni̱xi̱ʼi̱ ta̱ Jesús, va̱ʼa nda̱kaxin Ndióxi̱ 144,000 na̱ yiví ña̱ koona se̱ʼera (Rom. 8:15-17; Apoc. 14:1). Ta saátu íyo ku̱a̱ʼání na̱ yiví na̱ kándíxa ña̱ káʼa̱n Ndióxi̱ ta kéʼéna ña̱ kúni̱ra. Ta na̱yóʼo xa̱a̱na koona se̱ʼe mií Ndióxi̱ tá ná kundeé-inina ya̱ʼana nu̱ú prueba ña̱ so̱ndíʼi, ña̱ kuu tá ná ndiʼi ña̱ 1,000 ku̱i̱ya̱ (Sal. 25:14; Rom. 8:20, 21). Tiempo vitin xa̱a̱ ki̱xáʼana káʼa̱nna “yivá” xíʼinra (Mat. 6:9). Ta saátu na̱ ndataku, kivi xa̱a̱na sakúaʼana ndáaña kúni̱ Jehová keʼéna. Saátu na̱yóʼo kivi xa̱a̱na koona se̱ʼera tá ná chika̱a̱-inina kandíxana ña̱ káʼa̱nra. w21.08 5 párr. 10, 11

Ta̱ Pablo nda̱kiʼinra chiñu ña̱ natúʼunra xa̱ʼa̱ tu̱ʼun Ndióxi̱ ta ña̱yóʼo xi̱kuu mií ña̱ ndáyáʼvika nu̱úra nda̱a̱ tá ni̱xi̱ʼi̱ra. Ña̱kán, ni nda̱a̱ ndáaka nu̱ú ni̱xi̱kara xi̱natúʼunra xíʼin na̱ yiví xa̱ʼa̱ Ndióxi̱ ta ni̱xa̱ʼa̱nra “veʼe tá veʼe” (Hech. 20:20). Tá kúú, iin yichi̱ tá ndátura na̱ migora chí ñuu Atenas, na̱túʼunra xa̱ʼa̱ tu̱ʼun Ndióxi̱ xíʼin sava na̱ yiví na̱ xi̱kuumií chiñu ña̱ ndáyáʼviní ta sava na̱yóʼo va̱ʼaníva xi̱niso̱ʼona ña̱ na̱túʼunra xíʼinna (Hech. 17:16, 17, 34). Ta ni xi̱ndika̱a̱ra veʼeka̱a, nda̱kundeéra na̱túʼunra xa̱ʼa̱ tu̱ʼun Ndióxi̱ xíʼin ndiʼi na̱ xi̱xa̱ʼa̱n xi̱xito miíra (Filip. 1:13, 14; Hech. 28:16-24). Ta̱ Pablo va̱ʼaní xi̱xiniñúʼura tiempora. Ta xi̱ka̱ʼa̱nra xíʼin inkana ña̱ ná ku̱ʼu̱nna xíʼinra ña̱ natúʼunna xa̱ʼa̱ tu̱ʼun Ndióxi̱. Tá kúú, tá yichi̱ nu̱ú ña̱ ni̱xa̱ʼa̱nra na̱túʼunra inka ñuu ni̱ka̱ʼa̱nra xíʼin ta̱ Juan Marcos ña̱ ná ku̱ʼu̱nra xíʼinra ta yichi̱ u̱vi̱ ni̱xa̱ʼa̱n ta̱ Timoteo xíʼinra (Hech. 12:25; 16:1-4). Chi̱ka̱a̱níra ndee̱ ña̱ sanáʼa̱rana ña̱ kiʼinna kuenta xíʼin congregación, ña̱ kundaana na̱ hermano ta saátu ña̱ viíní sanáʼa̱na na̱yóʼo (1 Cor. 4:17). w22.03 27 párr. 5, 6

Sava na̱ yiví va̱ása kándíxana ña̱ íyo iin ta̱ i̱xava̱ʼa ndiʼi ña̱ʼa chi kǒora xínina, soo kándíxavana ña̱ʼa ña̱ kǒo kívi kunina. Tá kúú, kándíxana ña̱ íyo ta̱chí, chi íyo ña̱ náʼa̱ ña̱ ndixa íyovaña. Ta ki̱ʼva saá íyotu ña̱ kándíxayó Ndióxi̱, saáchi ni kǒora xíninu̱úyó soo íyova ña̱ náʼa̱ nu̱úyó ña̱ íyora (Heb. 11:1). Soo ña̱ va̱ʼa kandíxayó ña̱ íyo iin ta̱ i̱xava̱ʼa ndiʼi ña̱ʼa, xíniñúʼu taváyó tiempo ta chika̱a̱yó ndee̱ ña̱ nandukúyó xa̱ʼa̱ra. Soo ku̱a̱ʼání na̱ yiví va̱ása kéʼéna ña̱yóʼo, ña̱kán xáa̱na ndákanixi̱nína ña̱ kǒo Ndióxi̱ íyo. Sava na̱ científico nándukú va̱ʼana xa̱ʼa̱ iin ña̱ʼa ta xáa̱na kúnda̱a̱-inina ña̱ mií Ndióxi̱ kúú ta̱ i̱xava̱ʼa ñuʼú yóʼo, ta saátu ña̱ íyo chí ndiví. Savana va̱ása kándíxana ña̱ íyo iin ta̱ i̱xava̱ʼa ndiʼi ña̱ʼa, chi va̱ása níka̱ʼa̱nna xa̱ʼa̱ ña̱yóʼo xíʼinna ti̱xin escuela. Soo vitin ku̱a̱ʼání na̱ científico xáa̱na sákuaʼana xa̱ʼa̱ Jehová ta kúʼvi̱ní-inina xíninara. Ná chika̱a̱yó ndee̱ ña̱ kandíxakayó Ndióxi̱, ni ni̱xa̱ʼa̱nyó escuela á va̱ása. w21.08 14 párr. 1; 15, 16 párr. 6, 7

Ta̱ Jesús na̱túʼunra xa̱ʼa̱ iin ta̱ loʼo ta̱ nda̱ñúʼu, ña̱ va̱ʼa sanáʼa̱ra ña̱ kútóoní Jehová na̱ʼa̱ra ña̱ kúndáʼviní-inira xínira miíyó. Ta̱ loʼo yóʼo ni̱xa̱ʼa̱nra inka ñuu ta kán “sa̱ndíʼi ndiʼira herencia ña̱ nda̱kiʼinra chi ku̱a̱ʼání ña̱ kini ke̱ʼéra” (Luc. 15:13). Tá ni̱ya̱ʼa tiempo, nda̱ndikó-inira xa̱ʼa̱ ndiʼi ña̱ kini ke̱ʼéra ta nda̱ndikóra veʼera. ¿Ndáaña ke̱ʼé yivára? Ta̱ Jesús ka̱chira: “Tá xíkáka va̱xira xi̱ni yivárara ta ndeéní ku̱ndáʼvi-inira xi̱nirara. Ta xínura ni̱xa̱ʼa̱nra nda̱a̱ nu̱ú va̱xi ta̱ loʼo kán ta nu̱mirara ta chi̱tóra nu̱úra”. Nu̱úka ña̱ sakúkaʼanra nu̱ú se̱ʼera, ku̱ndáʼvi-inira xi̱nirara, i̱xakáʼnu-inira xa̱ʼa̱ra ta nda̱kiʼin tukurara veʼera. Ku̱a̱ʼání ña̱ va̱ása va̱ʼa ke̱ʼé ta̱ loʼo yóʼo, soo i̱xakáʼnuva-ini yivára xa̱ʼa̱ra, saáchi nda̱ndikó-inira xa̱ʼa̱ ña̱ ke̱ʼéra. Nda̱a̱ táki̱ʼva ke̱ʼé yivá ta̱ loʼo yóʼo saá kéʼé Jehová. Xíʼin ña̱yóʼo sa̱náʼa̱ ta̱ Jesús miíyó ña̱ kúni̱ yivára ixakáʼnu-inira xa̱ʼa̱ na̱ ndixa ndándikó-ini xa̱ʼa̱ ña̱ va̱ása va̱ʼa ke̱ʼéna (Luc. 15:17-24). w21.10 8 párr. 4; 9 párr. 6

Ku̱a̱ʼání na̱ níʼi yichi̱ ti̱xin veʼe-ñu̱ʼu va̱ása nátúʼunna xíʼin na̱ yiví ña̱ íyo ki̱vi̱ Ndióxi̱. Ta ni va̱ása kúni̱na ña̱ ná kunda̱a̱-ini na̱ yiví xa̱ʼa̱ ña̱yóʼo. Sa̱kútaʼana ki̱vi̱ra nu̱ú Biblia, ta saátu va̱ása kúni̱na ná kuniñúʼu na̱ yiví ki̱vi̱ra ti̱xin veʼe-ñu̱ʼuna. Soo iinlá miíyó na̱ testigo Jehová kúú na̱ ndásakáʼnu ki̱vi̱ra ta íxato̱ʼóyóña. Ta saátu chíka̱a̱níyó ndee̱ ña̱ sanáʼa̱yó ndiʼi na̱ yiví xa̱ʼa̱ ki̱vi̱ Ndióxi̱, ta kǒo inka veʼe-ñu̱ʼu kéʼé ña̱yóʼo. Ta tá chíka̱a̱yó ndee̱ ña̱ natúʼunyó xa̱ʼa̱ ki̱vi̱ Jehová, saá sáxi̱nuyó ña̱ kúni̱ kachi ki̱vi̱yó (Is. 43:10-12). Saátu xa̱a̱ yáʼaka 240 millón copia ña̱ Traducción del Nuevo Mundo táváyó, ta nu̱ú ña̱yóʼo va̱xi ki̱vi̱ Ndióxi̱ nu̱ú xíniñúʼu kixiña. Ta saátu xa̱a̱ yáʼaka 1,000 nu̱ú tu̱ʼun táváyó tutu ña̱ nátúʼun xa̱ʼa̱ ki̱vi̱ Jehová. w21.10 20 párr. 9, 10

Ndásakáʼnuyó Jehová tá chíndeétáʼanyó xíʼin na̱ hermanoyó na̱ kúma̱ní ña̱ʼa nu̱ú. Jehová ni̱ka̱ʼa̱nra taxira bendición ndaʼa̱ na̱ ñuu Israel tá ná chindeétáʼanna xíʼin na̱ ndáʼvi (Deut. 15:10). Tá chíndeétáʼanyó xíʼin na̱ hermanoyó na̱ kúma̱ní ña̱ʼa nu̱ú, nda̱a̱ táki̱ʼva íyo na̱ táxi regalo ndaʼa̱ Jehová saá íyoyó (Prov. 19:17). Tá kúú, na̱ cristiano na̱ ni̱xi̱yo ñuu Filipos chi̱ndaʼána iin regalo ku̱a̱ʼa̱n ndaʼa̱ ta̱ Pablo tá xi̱ndika̱a̱ra veʼeka̱a. Ta̱yóʼo ni̱ka̱ʼa̱nra ña̱ regalo yóʼo nda̱a̱ táki̱ʼva íyo ña̱ ni̱so̱kóna nu̱ú Ndióxi̱ saá ni̱xi̱yoña ta ku̱si̱í-ini Ndióxi̱ xíʼinña (Filip. 4:18). Ná ndakanixi̱níyó xa̱ʼa̱ ña̱yóʼo: “¿Á íyo iin na̱ kivi chindeétáʼi̱n xíʼin?”. Kúsi̱íníva-ini Jehová tá xítora ña̱ xíniñúʼuyó tiempoyó, ndee̱yó, ña̱ xíni̱yó keʼéyó á inkaka ña̱ʼa ña̱ kúúmiíyó ña̱ chindeétáʼanyó xíʼin na̱ kúma̱ní ña̱ʼa nu̱ú. Tá kéʼéyó ña̱yóʼo, saá kúúña ndásakáʼnuyóra (Sant. 1:27). Ña̱ va̱ʼa ndasakáʼnuyó Jehová nda̱a̱ táki̱ʼva kúni̱ miíra, xíniñúʼu chika̱a̱yó ndee̱ ta taváyó tiempo ña̱ keʼéyó ña̱yóʼo, ta ña̱ keʼéyó ña̱yóʼo va̱ása yo̱ʼvi̱víña (1 Juan 5:3). ¿Nda̱chun va̱ása yo̱ʼvi̱ña? Saáchi tá kúʼvi̱-iniyó xíniyó Jehová ta saátu na̱ hermanoyó, kiviva keʼéyó ña̱yóʼo. w22.03 24 párr. 14, 15

Tá kúni̱yó na̱ʼa̱yó ña̱ ndíʼi̱-iniyó xa̱ʼa̱ na̱ hermanoyó ta kúndáʼvi-iniyó xíniyóna, xíniñúʼu ndakanixi̱níyó xa̱ʼa̱ tu̱ndóʼo ña̱ yáʼana nu̱ú. Tá kúú, kivi chindeétáʼanyó xíʼin iin ñá hermana ñá kúúmií iin kue̱ʼe̱ ndeé. Ni va̱ása káʼa̱nvíñá xíʼinyó ña̱ chindeétáʼanyó xíʼinñá soo va̱ʼaníva kuniñá tá ná keʼéyó ña̱yóʼo. Kivi ixava̱ʼayó ña̱ kuxu na̱ veʼeñá á ndatiʼvíyó veʼeñá. Ta sana xíni̱tuyó iin ta̱ hermano ta̱ kǒoka chiñu ndaʼa̱, kivi taxiyó loʼo xu̱ʼún ndaʼa̱ra ña̱ va̱ʼa chindeétáʼanyó xíʼinra nda̱a̱ ná ndani̱ʼíra iin chiñu, ni va̱ása xíniñúʼu kunda̱a̱ví-inira ña̱ miíyó kúú na̱ ta̱xiña ndaʼa̱ra. Ña̱kán tá kúni̱yó kundáʼvi-iniyó kuniyó na̱ hermanoyó, va̱ása xíniñúʼu kundatuyó nda̱a̱ ná ka̱ʼa̱n miína xíʼinyó ña̱ chindeétáʼanyó xíʼinna. Va̱ʼaka siʼna miíyó ná chindeétáʼan xíʼinna, nda̱a̱ táki̱ʼva kéʼé Jehová. Ndiʼi ki̱vi̱ távára ñu̱ʼu ta va̱ása xíniñúʼu ndukúvíyó ña̱yóʼo nu̱úra; ta su̱ví nda̱saa na̱ táxi tíxa̱ʼvi ndaʼa̱ra távára ñu̱ʼu nu̱ú, chi ndiʼivana táváraña nu̱ú. ¿Á su̱ví ña̱ nda̱a̱ kúú ña̱ kúʼvi̱ní-ini Jehová xínira miíyó saáchi táxira ña̱ xíniñúʼuyó? Xa̱ʼa̱ ña̱ va̱ʼaní-inira xíʼinyó kúʼvi̱ní-iniyó xíniyóra. w21.09 22, 23 párr. 12, 13

Jehová íxakáʼnu-inira xa̱ʼa̱yó xa̱ʼa̱ ña̱ ndixaní kúʼvi̱-inira xínira miíyó. Tá kíʼin Jehová kuenta ña̱ ndándikó-ini iin na̱ ni̱ki̱ʼvi ku̱a̱chi ta chíka̱a̱na ndee̱ ña̱ nasamana ña̱ va̱ása va̱ʼa kéʼéna, xa̱ʼa̱ ña̱ ndixaní kúʼvi̱-inira xínirana íxakáʼnu-inira xa̱ʼa̱na. Nu̱ú iin salmo, ta̱ David ni̱ka̱ʼa̱nra ña̱yóʼo xa̱ʼa̱ Jehová: “Su̱ví tá íyo míí ku̱a̱chiyó saá íxaara xíʼinyó, ni kǒo tu̱ndóʼo chíka̱a̱ra nu̱úyó xa̱ʼa̱ ku̱a̱chiyó” (Sal. 103:8-11). Ta̱ David xi̱kunda̱a̱-inira ndáaña ndóʼo iin na̱ yiví tá ndákaniníxi̱nína xa̱ʼa̱ ku̱a̱chi ña̱ ni̱ki̱ʼvina. Soo saátu xi̱kunda̱a̱-inira ña̱ íxakáʼnu-ini Jehová xa̱ʼa̱na. Ta ti̱xin iin oración ni̱ka̱ʼa̱nra nda̱chun kúú ña̱ íxakáʼnu-ini Jehová xa̱ʼa̱ na̱yóʼo. Jehová íxakáʼnu-inira xa̱ʼa̱ na̱ kíʼvi ku̱a̱chi, saáchi ndixaní kúʼvi̱-inira xínirana. Tá ni̱ki̱ʼviyó ku̱a̱chi, ña̱ va̱ʼava kúú ña̱ va̱ása va̱ʼa kuniyó xa̱ʼa̱ ña̱ va̱ása va̱ʼa ke̱ʼéyó, saáchi ña̱yóʼo kivi chindeétáʼanña xíʼinyó ña̱ ndandikó-iniyó, tasaá kixáʼayó keʼéyó ña̱ va̱ʼa. w21.11 5 párr. 11, 12

Nu̱ú Jehová ndáyáʼviní ki̱vi̱ra ta kúni̱ra ná ixato̱ʼónaña (Is. 42:8). Soo xa̱a̱ 6,000 ku̱i̱ya̱ kúú ña̱ íxayaku̱a̱na ki̱vi̱ra (Sal. 74:10, 18, 23). Ta ta̱ Ndi̱va̱ʼa kúú ta̱ siʼna ni̱ka̱ʼa̱n ña̱ vatá xa̱ʼa̱ ki̱vi̱ Ndióxi̱, tá ni̱ka̱ʼa̱nra ña̱ sási Jehová nu̱ú ta̱ Adán xíʼin ña̱ Eva ña̱ koo si̱ína (Gén. 3:1-5). Ta nda̱a̱ tiempo vitin káʼa̱n na̱ yiví ña̱ va̱ása xíín Jehová taxira ña̱ xíniñúʼuyó ña̱ va̱ʼa koo si̱íyó. Ta̱ Jesús xi̱ndi̱ʼi̱ní-inira xa̱ʼa̱ ña̱ xi̱ka̱ʼa̱nna ña̱ vatá xa̱ʼa̱ ki̱vi̱ yivára (Mat. 6:9). Iinlá Jehová kúú ta̱ xíniñúʼu kaʼndachíñu chí ndiví ta saátu nu̱ú ñuʼú yóʼo, ta iinlá ta̱yóʼo kúú ta̱ va̱ʼaní xáʼndachíñu (Apoc. 4:11). Soo ta Ndi̱va̱ʼa sándaʼvira na̱ yiví ta saátu na̱ ángel ña̱ ná ndakanixi̱nína ña̱ va̱ása xíniñúʼu kaʼndachíñu Jehová nu̱úna. Si̱lóʼoní kúma̱ní ta sándiʼi-xa̱ʼa̱ Jehová ndiʼi ña̱ va̱ása va̱ʼa íyo nu̱ú ñuʼú yóʼo. Tasaá na̱ʼa̱ra ña̱ iinlá miíra kúú ta̱ va̱ʼaníka kaʼndachíñu nu̱úyó, ta iinlá ti̱xin Reinora kúú ña̱ va̱ʼaníka kundooyó ta va̱ása yi̱ʼvíyó. w21.07 9 párr. 5, 6

Ndiʼiva na̱ ta̱a kúni̱na taxina ña̱ xíniñúʼu ñá síʼina xíʼin se̱ʼena, tá kúú ña̱ kuxuna, ti̱ko̱to̱na xíʼin veʼe nu̱ú koona. ¿Á kúma̱ní xu̱ʼún nu̱ún? Tá saá ndóʼún, sana xóʼvi̱nívaún. Ni yo̱ʼvi̱ní tu̱ndóʼo ña̱ ndíka̱ún nu̱ú kivi kuniñúʼún ña̱yóʼo ña̱ va̱ʼa kandíxakaún Ndióxi̱. Ka̱ʼa̱n xíʼinra, kaʼvi tu̱ʼun ña̱ ni̱ka̱ʼa̱n ta̱ Jesús nu̱ú Mateo 6:25-34, ta ndakanixi̱ní xa̱ʼa̱ña. Ta saátu ndakanixi̱ní ndáa ki̱ʼva ndáa Jehová na̱ hermano na̱ íyo tiempo vitin, na̱ ndíʼi̱-ini xa̱ʼa̱ chiñura (1 Cor. 15:58). Tá ná keʼún ña̱yóʼo saá kúú ña̱ kundaaníka-iniún Jehová. Ta nda̱a̱ táki̱ʼva xi̱ndaara na̱ ni̱ya̱ʼa nu̱ú táʼan tu̱ndóʼo ña̱ kúúmiíún, saátu kundaara yóʼóva. Ta̱yóʼo xíni̱níra ndáaña xíniñúʼún, ta saátu xíni̱ra ndáa ki̱ʼva taxiraña ndaʼún. Tá ná kotoún ndáa ki̱ʼva chíndeétáʼan Jehová xíʼún, saá kúú ña̱ kandíxaníkaúnra, ta ña̱yóʼo chindeétáʼan xíʼún kundeé-iniún nu̱ú tu̱ndóʼo ña̱ kixi nu̱ún. w21.11 20 párr. 3; 21 párr. 6

Ku̱a̱ʼání na̱ ndásakáʼnu Ndióxi̱ íxandi̱va̱ʼana xíʼinna á yáʼana nu̱ú inkaka tu̱ndóʼo. Soo ndákundeéna nátúʼunna xíʼin na̱ yiví xa̱ʼa̱ra ta kúndeé-inina nu̱ú ña̱yóʼo, saáchi kándíxana ña̱ ni̱xi̱ʼi̱ ta̱ Jesús xa̱ʼa̱na. Ná ka̱ʼa̱nyó xa̱ʼa̱ ña̱ ndo̱ʼo ta̱ apóstol Juan, yáʼaka 60 ku̱i̱ya̱ ni̱xi̱kara na̱túʼunra xa̱ʼa̱ ta̱ Cristo xíʼin xa̱ʼa̱ ña̱ nda̱chaʼvira xa̱ʼa̱yó. Tá xa̱a̱ kúyatin ndakiʼinra 100 ku̱i̱ya̱, na̱ chíñu ña̱ ñuu Roma nda̱kanixi̱nína ña̱ kúúra iin ta̱a ta̱ kéʼé ña̱ va̱ása va̱ʼa, ta xa̱ʼa̱ ña̱yóʼo chi̱ndaʼánara ku̱a̱ʼa̱nra chí isla ña̱ Patmos. Soo ta̱yóʼo su̱ví ña̱ va̱ása va̱ʼa níkeʼéra saáchi xa̱ʼa̱ Ndióxi̱ na̱túʼunra xíʼin xa̱ʼa̱ ta̱ Jesús (Apoc. 1:9). Va̱ʼaní yichi̱ sa̱ndákoora nu̱úyó saáchi xi̱kandíxaníra Ndióxi̱ ta ndakúní ni̱xi̱yo inira. Nu̱ú libro ña̱ ka̱ʼyí ta̱ Juan ni̱ka̱ʼa̱nra ña̱ kúʼvi̱ní-inira xínira ta̱ Jesús ta saátu táxiníra tíxa̱ʼvi xa̱ʼa̱ ña̱ nda̱chaʼvira xa̱ʼa̱yó. Ta nu̱ú libro ña̱ ka̱ʼyíra yáʼaka 100 yichi̱ káʼa̱nra xa̱ʼa̱ ña̱ va̱ʼa ña̱ ndákiʼinyó xa̱ʼa̱ ña̱ nda̱chaʼvi ta̱ Jesús xa̱ʼa̱yó. (1 Juan 2:2). Ña̱yóʼo náʼa̱ña nu̱úyó ña̱ xi̱taxiní ta̱ Juan tíxa̱ʼvi xa̱ʼa̱ ña̱ nda̱chaʼvi ta̱ Jesús xa̱ʼa̱yó. w21.04 17 párr. 9, 10

Viíní xi̱niñúʼu keʼé na̱ ñuu Israel xíʼin na̱ kúáa, na̱ sóʼó xíʼin na̱ va̱ása kívi kaka chi saá xi̱kuni̱ Jehová. Ta ni̱ka̱ʼa̱nra xíʼinna ña̱ ná va̱ása chika̱a̱na chiʼña iin na̱ sóʼó. Ña̱yóʼo kúni̱ kachiña ña̱ va̱ása xíniñúʼu ka̱ʼa̱n ndi̱va̱ʼana xíʼinna, ña̱ va̱ása keʼéna iin ña̱ va̱ása va̱ʼa xíʼinna á ña̱ va̱ása ka̱ʼa̱nna ña̱ va̱ása va̱ʼa xa̱ʼa̱na. Chi tá ná keʼé na̱ ñuu Israel ña̱yóʼo, saá na̱ʼa̱na ña̱ ndi̱va̱ʼaní-inina xíʼinna. Saáchi xa̱ʼa̱ ña̱ va̱ása kívi kuniso̱ʼona ña̱ káʼa̱nna xíʼinna, va̱ása kivi ndakiʼinna tu̱ʼunna. Ta saátu nu̱ú Levítico 19:14, Ndióxi̱ ni̱ka̱ʼa̱nra xíʼin na̱ ñuu Israel ña̱ ná va̱ása chindúʼuna iin ña̱ʼa ña̱ kivi sandákava iin na̱ kúáa. Iin libro káʼa̱nña ña̱yóʼo: “Na̱ yiví na̱ ni̱xi̱yo chí Oriente Medio, xi̱ ixandi̱va̱ʼana xíʼin na̱ yiví na̱ kúáa, na̱ sóʼó á na̱ va̱ása níxi̱kuchiñu kaka”. Sana iin na̱ ñuu Israel xi̱chindúʼuna iin ña̱ʼa nu̱ú na̱ kúáa ña̱ va̱ʼa sandákavanana á ña̱ va̱ʼa kusi̱kindaanana. Tá xi̱keʼéna ña̱yóʼo xíʼinna, xi̱na̱ʼa̱na ña̱ ndi̱va̱ʼaní-inina. Soo tá ta̱xi Jehová ley yóʼo nda̱ʼana, saá chi̱ndeétáʼanra xíʼin na̱ ñuura ña̱ kunda̱a̱-inina ña̱ xi̱niñúʼu kundáʼvi-inina kunina na̱ yiví yóʼo. w21.12 8, 9 párr. 3, 4

Ta̱ Jacob xi̱yiʼvíníra ta xi̱ndi̱ʼi̱ní-inira, saáchi xi̱ndakanixi̱níra ña̱ xi̱sa̱a̱kava ñanira xíʼinra, ña̱kán ni̱ka̱ʼa̱nra xíʼin Jehová, chi̱ndaʼára regalo ndaʼa̱ ñanira (Gén. 32:9-15). Ta tá xa̱a̱ nda̱kutáʼanra xíʼin ñanira ni̱na̱ʼa̱ra ña̱ íxato̱ʼórara. Ta xa̱ʼa̱ ña̱yóʼo nda̱a̱ u̱xa̱ yichi̱ xi̱kuxítíra nu̱úra. Ta̱ Jacob ndasaviíra ku̱a̱chi yóʼo chi vitá ni̱xi̱yo inira ta i̱xato̱ʼóra ñanira (Gén. 33:3, 4). Íyo iin ña̱ ndáyáʼviní kivi sakúaʼayó xíʼin ña̱ ke̱ʼé ta̱ Jacob tá kúma̱níka ndakutáʼanra xíʼin ñanira, saátu xíʼin ña̱ ke̱ʼéra tá nda̱kutáʼanra xíʼinra. Siʼna vitá ni̱xi̱yo inira ta ni̱ka̱ʼa̱nra xíʼin Jehová ña̱ ná chindeétáʼanra xíʼinra. Tándi̱ʼi, ni̱na̱ʼa̱ra ña̱ xi̱kuni̱ra keʼéra ña̱ ni̱ka̱ʼa̱nra xíʼin Jehová, saáchi ke̱ʼéra nda̱a̱ ndáaka ña̱ʼa ña̱ va̱ʼa sákusi̱íra-ini ñanira tá xa̱a̱ ná ndakutáʼanra xíʼinra. Ta tá nda̱kutáʼanra xíʼin ta̱ Esaú va̱ása nína̱ára xíʼinra, ta ni va̱ása níka̱ʼa̱nra xíʼinra ndáana kúúmií ku̱a̱chi. Chi ña̱ xi̱kuni̱ra kúú ña̱ ndasaviíra ku̱a̱chi ña̱ xi̱kuumiíra xíʼin ñanira. ¿Ndáa ki̱ʼva kundiku̱ún yichi̱ ta̱ Jacob? (Mat. 5:23, 24). w21.12 25 párr. 11, 12

Sava yichi̱ xa̱ʼa̱ ña̱ kúúyó na̱ yiví ku̱a̱chi níma̱yó kivi kixáʼaña sandáʼviña miíyó ta kixáʼayó ndakanixi̱níyó ña̱ va̱ása ndáyáʼviyó ta va̱ása xíniñúʼu kuʼvi̱-ini Ndióxi̱ kunira miíyó (1 Juan 3:19). Xa̱ʼa̱ ña̱kán kivi kixáʼayó ndakanixi̱níyó ña̱ va̱ása kivi chaʼvi ña̱ ni̱xi̱ʼi̱ ta̱ Jesús xa̱ʼa̱ ndiʼi ku̱a̱chi ña̱ ni̱ki̱ʼviyó. Tá ná kixáʼayó ndakanixi̱níyó saá, ná ndakaʼányó chi “káʼnukava Ndióxi̱ nu̱ú níma̱yó”. Ni túviyó ña̱ va̱ása kúʼvi̱-ini Ndióxi̱ xínira miíyó ta va̱ása íxakáʼnu-inira xa̱ʼa̱yó, soo mií ña̱ nda̱a̱ kúʼvi̱va-inira xínira miíyó ta íxakáʼnu-inira xa̱ʼa̱yó, ta xíniñúʼu kandíxayó ña̱yóʼo. Ña̱kán xíniñúʼu kaʼviyó tu̱ʼunra ndiʼi saá ki̱vi̱, ka̱ʼa̱n ni̱ʼiyó xíʼinra ta taváyó tiempo ña̱ kutáʼanyó xíʼin na̱ hermanoyó. ¿Nda̱chun ndáyáʼviní keʼéyó ña̱yóʼo? Chi tá ná keʼéyó ña̱yóʼo saá xa̱a̱yó kuxini̱kayó ndáa ki̱ʼva íyo Jehová, ta saátu xa̱a̱yó kunda̱a̱-iniyó ña̱ kúʼvi̱ní-inira xínira miíyó. Tá ndiʼi ki̱vi̱ ná ndakanixi̱níyó xa̱ʼa̱ ña̱ káʼa̱n tu̱ʼun Ndióxi̱, ña̱yóʼo chindeétáʼanña xíʼinyó ña̱ viíka koo ña̱ ndákanixi̱níyó ta nasamayó ña̱ ndíka̱a̱ níma̱yó (2 Tim. 3:16). w21.04 23, 24 párr. 12, 13

Tá kúni̱yó kandíxakayó Ndióxi̱ va̱ása xíniñúʼu kaʼvi kuitíyó tu̱ʼunra, saáchi íyo inkaka ña̱ xíniñúʼu keʼéyó. Xíniñúʼu ndakanixi̱níyó xa̱ʼa̱ ña̱ sákuaʼayó. Ná ka̱ʼa̱nyó xa̱ʼa̱ ña̱ ndo̱ʼo ta̱ ka̱ʼyí Salmo 77. Ta̱yóʼo xi̱ndi̱ʼi̱ní-inira saáchi xi̱ndakanixi̱níra ña̱ va̱ása kúsi̱íka-ini Jehová xíʼin ña̱ xi̱keʼéra ni xíʼin ña̱ xi̱keʼé inkaka na̱ ñuu Israel. Ta xa̱ʼa̱ ña̱ xi̱ndi̱ʼi̱ní-inira va̱ása níxikisi̱ra tá ñuú (versículo 2-8). ¿Ndáaña ke̱ʼéra? Ña̱yóʼo ni̱ka̱ʼa̱nra xíʼin Jehová: “Ndakanixi̱níi̱ xa̱ʼa̱ ndiʼi ña̱ kéʼún, ta saátu ndakanixi̱níi̱ xa̱ʼa̱ ki̱ʼva ña̱ kéʼúnña” (versículo 12). Ta̱yóʼo xi̱kunda̱a̱-inira xa̱ʼa̱ ndiʼi ña̱ ke̱ʼé Jehová xa̱ʼa̱ na̱ ñuura tá ya̱chi̱. Soo ni saá xi̱ndakanixi̱níra ña̱yóʼo: “¿Á na̱ndósó-ini Ndióxi̱ ña̱ na̱ʼa̱ra ña̱ va̱ʼa-inira xíʼinyó? ¿Á xa̱ʼa̱ ña̱ sáa̱nívara va̱ása xíínra kundáʼvi-inira kunira miíyó?” (versículo 9). Ta̱ ka̱ʼyí salmo yóʼo nda̱kanixi̱níra xa̱ʼa̱ ndiʼi ña̱ ke̱ʼé Jehová xa̱ʼa̱ na̱ ñuura tá ya̱chi̱, ta saátu ndáa ki̱ʼva ku̱ndáʼvi-inira xi̱nirana (versículo 11). Ta ña̱yóʼo chi̱ndeétáʼan xíʼinra ku̱nda̱a̱-inira ña̱ va̱ása sandákoondaʼa̱ Jehová na̱ ñuura (versículo 15). w22.01 30 párr. 17, 18

¿Ndáaña ndóʼo Jehová tá ndákanixi̱níra xa̱ʼa̱ na̱ xi̱ndasakáʼnu miíra? Kúni̱níra ndikóra kunirana (Job 14:15). Ndákaʼánnívara xa̱ʼa̱ migora ta̱ Abrahán (Sant. 2:23). Saátu ndákaʼánníra xa̱ʼa̱ ta̱ Moisés ta̱ xi̱natúʼun-táʼan xíʼinra (Éx. 33:11). Ta kúni̱níra ndikóra kuniso̱ʼora yaa ña̱ liviní xi̱xita ta̱ David xíʼin inkaka na̱ ka̱ʼyí ña̱ salmo (Sal. 104:33). Ni xa̱a̱ ni̱xi̱ʼi̱va na̱yóʼo soo ta̱ʼán nandósó-inira xa̱ʼa̱na (Is. 49:15). Ndákaʼánva Jehová ndáa ki̱ʼva ni̱xi̱yo iin tá iin na̱yóʼo. Kixaa̱ iin ki̱vi̱ ta sandátakurana ta kuniso̱ʼo tukura oración ña̱ keʼéna nu̱úra, ta kusi̱íní-inira tá ná ndasakáʼnu tukunara. Sándi̱koní ña̱yóʼo ini miíyó na̱ xa̱a̱ ni̱xi̱ʼi̱ iin na̱ veʼe. Tá i̱xaso̱ʼo ta̱ Adán xíʼin ñá Eva nu̱ú Jehová ti̱xin jardín ña̱ Edén, xi̱kunda̱a̱-inira ña̱ kooníka ña̱ va̱ása va̱ʼa. Jehová kúndasínu̱úra xínira na̱ yiví na̱ ndi̱va̱ʼa-ini ta saátu na̱ va̱ása nda̱kú ndátiin ku̱a̱chi xíʼin-táʼan, ta kúndasítura na̱ kánitáʼan. w21.07 10 párr. 11; 12 párr. 12

Tá kúʼvi̱-iniyó xíniyó na̱ hermanoyó. Saá náʼa̱yó ña̱ táxiyó tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, chi su̱ví xa̱ʼa̱ mií kuitíyó níxi̱ʼi̱ra chi saátu ni̱xi̱ʼi̱ra xa̱ʼa̱ na̱ hermanoyó. Ta̱ Jesús ka̱ndíxara kuvira xa̱ʼa̱na saáchi kúʼvi̱ní-inira xínirana (1 Juan 3:16-18). Ki̱ʼva ña̱ kéʼéyó xíʼin na̱ hermanoyó náʼa̱ña á kúʼvi̱-iniyó xíniyóna (Efes. 4:29, 31–5:2). Tá kúú, chíndeétáʼanyó xíʼinna tá ndeéndóʼona á tá yáʼana nu̱ú inkaka tu̱ndóʼo xa̱ʼa̱ ña̱ kúun sa̱vi̱ kini, xa̱ʼa̱ ña̱ táan á inkaka ña̱ʼa. Soo, ¿ndáaña xíniñúʼu keʼéyó tá iin na̱ hermano ni̱ka̱ʼa̱nna á ke̱ʼéna iin ña̱ va̱ása va̱ʼa xíʼinyó? Tá kéʼéna ña̱ va̱ása va̱ʼa xíʼinyó, ¿á sáa̱yó xíʼinna ta va̱ása nándósó-iniyó xa̱ʼa̱ ña̱ ke̱ʼéna? (Lev. 19:18). Tá saá íyo ña̱ kéʼéyó, ná kundiku̱nyó consejo yóʼo: “Kǒo sandákoondó kundeé-inindó xíʼin ña̱ kéʼé inkana xíʼinndó ta xíʼin ndiʼi níma̱ndó koo káʼnu-inindó xa̱ʼa̱na, ni íyo iin ña̱ va̱ása va̱ʼa ke̱ʼéna xíʼinndó. Jehová xíʼin ndiʼi níma̱ra i̱xakáʼnu-inira xa̱ʼa̱ndó, xa̱ʼa̱ ña̱kán saátu xíniñúʼu keʼé miíndó” (Col. 3:13). Tá íxakáʼnu-iniyó xa̱ʼa̱ na̱ hermanoyó saá náʼa̱yó ña̱ táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ xa̱ʼa̱yó. w21.04 17, 18 párr. 12, 13

Tá va̱ʼaní kána chiñu ña̱ kéʼéyó nu̱ú Jehová ta saátu tá xa̱a̱ chíndeétáʼanyó xíʼin na̱ yiví ña̱ xa̱a̱na ndakuchina, miíra kúú ta̱ chíndeétáʼan xíʼinyó. Ta saátu tá kúúmiíyó ku̱a̱ʼáka chiñu ti̱xin congregación, saá kúú ña̱ xíniñúʼu chika̱a̱níkayó ndee̱ ña̱ vií kutáʼanyó xíʼin ndiʼina ta va̱ása kanitáʼanyó xíʼinna. Táxiníyó tíxa̱ʼvi tá chíndeétáʼan na̱ anciano á na̱ siervo ministerial xíʼinyó ña̱ vií kutáʼanyó, saáchi tá táxina consejo ndaʼa̱yó nu̱ú tu̱ʼun Ndióxi̱ távánaña ta va̱ása kúni̱na kundayáʼvina nu̱ú inkana, saáchi ña̱ kéʼéna kúú ña̱ ndíku̱nna yichi̱ ta̱ Jesús (1 Cor. 4:6, 7). Tá iinyó va̱ʼaní xíni̱yó keʼéyó iin chiñu, saáchi mií Ndióxi̱ kúú ta̱ ta̱xiña ndaʼa̱yó ña̱ va̱ʼa kuniñúʼuyó ña̱yóʼo ña̱ kachíñuyó nu̱ú inkana. Sana túviyó ña̱ loʼoní chiñu kéʼéyó ti̱xin congregación ta va̱ása ndáyáʼviña, soo chíndeétáʼanvayó xíʼin na̱ congregación ña̱ vií kutáʼanna. Nda̱a̱ táki̱ʼva ndáyáʼvi iin tá iin ndo̱ʼo válí ña̱ ndáchitáʼanna tá íxava̱ʼana iin veʼe, ki̱ʼva saá ndáyáʼvi iin tá iinyó. Xa̱ʼa̱ ña̱kán ná chika̱a̱yó ndee̱ ña̱ va̱ása keetáʼanyó xíʼin inkana, ta saátu ná chika̱a̱yó ndee̱ ña̱ vií kutáʼanyó ti̱xin congregación ta va̱ása kanitáʼanyó xíʼinna (Efes. 4:3). w21.07 19 párr. 18, 19

Kivi kandíxaún ña̱ ndikó tukún kuniún na̱ veʼún na̱ ni̱xi̱ʼi̱. Tá xa̱ku ta̱ Jesús xíʼin na̱ migora, saá ni̱na̱ʼa̱ra ña̱ ndixaní kúni̱ra sandátakura na̱ ni̱xi̱ʼi̱ (Juan 11:35). Kivi chindeétáʼún xíʼin na̱ kúsuchí-ini. Va̱ása níxaku kuití ta̱ Jesús xíʼin ñá Marta ta saátu xíʼin ñá María, chi viíní xi̱niso̱ʼora ña̱ ni̱ka̱ʼa̱nná ta sa̱ndíkora-ininá xíʼin tu̱ʼun ña̱ ni̱ka̱ʼa̱nra (Juan 11:25-27). Saátu kivi keʼé miíyó xíʼin na̱ ni̱xi̱ʼi̱ iin na̱ veʼe. Iin ta̱ anciano ta̱ naní Dan, ta̱ íyo chí Australia káchira: “Xi̱xiniñúʼu chindeétáʼannína xíʼi̱n tá ni̱xi̱ʼi̱ ñá síʼíi̱. Sava na̱ matrimonio va̱ʼaní chi̱ndeétáʼanna xíʼi̱n, saáchi nda̱a̱ ndáaka hora xi̱ka̱ʼi̱n xíʼinna, va̱ʼaní xi̱xiniso̱ʼona ña̱ xi̱ka̱ʼi̱n. Va̱ʼa xi̱natúʼi̱n xíʼinna xa̱ʼa̱ nda̱a̱ ndáaka ña̱ʼa, ta tá xi̱xakui̱ nu̱úna va̱ása níxi̱kukaʼan nu̱úna xíʼi̱n. Tá va̱ása níxi̱kuchiñui̱ keʼíi̱ sava ña̱ʼa, xi̱chindeétáʼanna xíʼi̱n. Tá kúú, xi̱ndakatana carroi̱, xi̱satána ña̱ xi̱xiniñúʼi̱n á xi̱keʼéna ña̱ xi̱xixii̱. Ta saátu xi̱keʼé ni̱ʼina oración xíʼi̱n. Tá ndo̱ʼi̱ ña̱yóʼo, saá ni̱na̱ʼa̱na ña̱ ndixa xi̱kuuna migoi̱ ta xi̱kuʼvi̱ní-inina xi̱xinina yi̱ʼi̱” (Prov. 17:17). w22.01 16 párr. 8, 9

Xa̱ʼa̱ ña̱ kúʼvi̱-ini Jehová xínira miíyó kúú ña̱ táxira consejo ndaʼa̱yó, ta va̱ása kúni̱ra ná xo̱ʼvi̱yó (Prov. 4:20-22). Tá táxira consejo ndaʼa̱yó nu̱ú tu̱ʼunra, nu̱ú tutu ña̱ tává na̱ ñuura á tá xíniñúʼura iin na̱ hermano na̱ xu̱xa-ini ña̱ taxina iin consejo ndaʼa̱yó, saá náʼa̱ra ña̱ kúʼvi̱-inira xínira miíyó (Heb. 12:9, 10). Ná kundi̱ʼi̱ka-iniyó xa̱ʼa̱ consejo ña̱ táxina ndaʼa̱yó ta su̱ví ndáa ki̱ʼva táxinaña. Sava yichi̱ kivi ndakanixi̱níyó ña̱ va̱ása vií nítaxina consejo ndaʼa̱yó. Ña̱ nda̱a̱ kúúña, tá táxiyó consejo ndaʼa̱ iin na̱ hermano xíniñúʼu chika̱a̱yó ndee̱ ña̱ viíní taxiyóña, tasaá va̱ása ixayo̱ʼvi̱ña xíʼinna kundiku̱nnaña (Gál. 6:1). Soo, tá miíyó kúú na̱ ndákiʼin consejo ná kotoyó ndáaña kivi sakúaʼayó xíʼinña ni túviyó ña̱ va̱ása vií nítaxinaña ndaʼa̱yó. Kivi ndakanixi̱níyó xa̱ʼa̱ ña̱yóʼo: “Ni va̱ása níkutói̱ ndáa ki̱ʼva ta̱xina consejo ndaʼíi̱, soo ¿á íyo iin ña̱ kivi sakúaʼi̱ xíʼinña? ¿Á kivi nandósó-inii̱ xa̱ʼa̱ ña̱ va̱ása va̱ʼa kéʼé miína ta kundiku̱i̱n consejona?”. Ndáyáʼviní kundiku̱nyó nda̱a̱ ndáaka consejo táxina ndaʼa̱yó. w22.02 12 párr. 13, 14

Jehová kúnda̱a̱-inira ña̱ xíniñúʼuyó ku̱a̱ʼá tiempo ña̱ nasamayó ña̱ ndákanixi̱níyó ta sandákooyó keʼéyó ña̱ va̱ása va̱ʼa ta xíniñúʼu chika̱a̱níyó ndee̱ ña̱ va̱ʼa keʼéyó ña̱yóʼo (Sal. 103:13, 14). Soo xíniñúʼura tu̱ʼunra, espíritu santora xíʼin na̱ ñuura ña̱ va̱ʼa taxira ña̱ ndíchi ndaʼa̱yó ta taxira ndee̱ ndaʼa̱yó ña̱ va̱ʼa nasamayó ña̱ kéʼéyó. Kuniñúʼu tu̱ʼun Ndióxi̱ ña̱ va̱ʼa kunda̱a̱-iniún ndáa ki̱ʼva íyo ña̱ kéʼún. Tu̱ʼun Ndióxi̱ nda̱a̱ táki̱ʼva íyo iin espejo saá íyoña, ña̱kán kivi chindeétáʼanña xíʼún kunda̱a̱-iniún ndáa ki̱ʼva íyo ña̱ ndákanixi̱níún, ndáa ki̱ʼva íyo ña̱ káʼún ta saátu ndáa ki̱ʼva íyo ña̱ kéʼún (Sant. 1:22-25). Saátu íyo tu̱ʼva Jehová ña̱ chindeétáʼanra xíʼún, ta iinlá ta̱yóʼo kúú ta̱ va̱ʼaníka chindeétáʼan xíʼún, saáchi kúnda̱a̱-inira ndáaña ndíka̱a̱ níma̱ún (Prov. 14:10; 15:11). Ña̱kán, xíniñúʼu chika̱ún ndee̱ ña̱ ka̱ʼún xíʼinra ndiʼi ki̱vi̱ ta saátu kaʼviún tu̱ʼunra. Va̱ása kaka-iniún ña̱ nina ña̱ va̱ʼa kúú ña̱ káʼa̱n Ndióxi̱ xíʼún keʼún. Ndiʼi ña̱ káʼa̱n Jehová xíʼinyó keʼéyó, ña̱ va̱ʼa miíyó kúúña. Na̱ ndíku̱n ña̱ káʼa̱nra va̱ʼaníka kúnina xíʼin miína ta si̱íní tákuna (Sal. 19:8-11). w22.03 4 párr. 8-10

Ndásakáʼnuyó Jehová tá íxava̱ʼayó veʼe nu̱ú ndásakáʼnuyóra ta saátu tá ndáayó ña̱yóʼo. Biblia káchiña ña̱ tá ke̱ʼéna tabernáculo xíʼin ndiʼi ña̱ʼa ña̱ xi̱ñuʼu iniña, chiñu ña̱ xi̱keʼéna ña̱ yi̱i̱ xi̱kuu ña̱yóʼo (Éx. 36:1, 4). Saátu tiempo vitin tá íxava̱ʼayó veʼe nu̱ú ndásakáʼnuyó Jehová iin chiñu yi̱i̱ kúú ña̱yóʼo nu̱úra. Sava na̱ hermano ku̱a̱ʼání tiempo xíniñúʼuna ña̱ kéʼéna chiñu yóʼo. Táxinívayó tíxa̱ʼvi ndaʼa̱na xa̱ʼa̱ chiñu ña̱ kéʼéna. Na̱ hermano yóʼo távátuna tiempo ña̱ natúʼunna xa̱ʼa̱ Ndióxi̱. Savana nda̱a̱ kúni̱na koona precursor. Na̱ anciano náʼa̱na ña̱ chíndeétáʼanna xíʼin na̱ hermano yóʼo tá táxina ña̱ koo na̱yóʼo precursor ni xa̱a̱ chíka̱a̱nína ndee̱ ña̱ ixava̱ʼana veʼe nu̱ú ndásakáʼnuyó Ndióxi̱. Ni xíni̱yó á ni va̱ása xíni̱yó keʼéyó chiñu nu̱ú kúva̱ʼa veʼe ña̱ ndásakáʼnuyó Ndióxi̱ ndiʼivayó kivi chindeétáʼan ña̱ limpio ná koo ña̱yóʼo ta vií ná kooña. w22.03 22 párr. 11, 12