Marzo

Tí “ndikachi” tí káʼa̱n parábola ña̱ va̱xi nu̱ú Mateo 25:31-36, xa̱ʼa̱ na̱ yiví na̱ va̱ʼa-ini na̱ ndóo tiempo vitin káʼa̱nña, ta ndátuna kutakuna ndiʼi tiempo nu̱ú ñuʼú yóʼo, ta na̱yóʼo kúútu na̱ inkaka ndikachi. Ta nda̱kúní-inina xíʼin na̱ ku̱ʼu̱n chí ndiví, saáchi chíndeétáʼanna xíʼinna ña̱ natúʼunna xíʼin na̱ yiví iníísaá nu̱ú ñuʼú ta sánáʼa̱nana xa̱ʼa̱ Ndióxi̱ (Mat. 24:14; 28:19, 20). Ndiʼi ku̱i̱ya̱ tá kúma̱ní koo Conmemoración, na̱ ndátu koo nu̱ú yóʼo chíndeétáʼanna xíʼin na̱ ku̱ʼu̱n chí ndiví. ¿Ndáa ki̱ʼva kéʼéna ña̱yóʼo? Kéʼéna iin campaña ña̱ va̱ʼa kanana na̱ yiví ña̱ ku̱ʼu̱nna Conmemoración. Ndiʼi congregación ña̱ íyo iníísaá nu̱ú ñuʼú, kéʼéna Conmemoración ndiʼi ku̱i̱ya̱ ni kǒoví na̱ ku̱ʼu̱n chí ndiví íyo ti̱xin congregaciónna. Na̱ ndátu koo nu̱ú ñuʼú yóʼo kúsi̱íní-inina xa̱ʼa̱ ña̱ chíndeétáʼanna xíʼin na̱ ku̱ʼu̱n chí ndiví. Ta kúnda̱a̱-inina ña̱ tá chíndeétáʼanna xíʼin na̱yóʼo, táki̱ʼva íyo na̱ chíndeétáʼan xíʼin ta̱ Jesús saá íyona (Mat. 25:37-40). w22.01 22 párr. 11, 12

Ndíku̱nyó yichi̱ Jehová tá viíní kéʼéyó xíʼin inkana nda̱a̱ táki̱ʼva xi̱keʼé ta̱ Jesús, tá kúú viíní ke̱ʼéra xíʼin iin ta̱a ta̱ xi̱kuumií lepra, ta ni̱na̱ʼa̱ra ña̱ ku̱ndaa̱-inira xíʼin ña̱ ndo̱ʼo iin ñá ñaʼá ñá xi̱kuumií iin kue̱ʼe̱ ña̱ ndeéní, ta saátu ku̱ndáʼvi-inira xi̱nira na̱ ni̱xi̱ʼi̱ iin na̱ veʼe (Mar. 1:40, 41; 5:25-34; Juan 11:33-35). Tá chíka̱a̱yó ndee̱ ña̱ keʼéyó táʼan ña̱ kéʼé Jehová saá kúú ña̱ viíníka kutáʼanyó xíʼinra. Tá ná kundiku̱nyó yichi̱ ta̱ Jesús va̱ása keʼéyó ña̱ íyo nu̱ú ñuyǐví ta̱ Ndi̱va̱ʼa yóʼo. Ñuú tá kúma̱ní kuvi ta̱ Jesús ni̱ka̱ʼa̱nra: “Xa̱a̱ ku̱chiñuvai̱ xíʼin ñuyǐví yóʼo” (Juan 16:33). Ña̱ xi̱kuni̱ kachira kúú ña̱ va̱ása níkixáʼara ndakanixi̱níra nda̱a̱ táki̱ʼva ndákanixi̱ní na̱ ñuyǐví yóʼo, ta keʼéra nda̱a̱ táki̱ʼva kéʼéna. Va̱ása ní nandósó-inira nda̱chun kúú ña̱ ki̱xira nu̱ú ñuʼú yóʼo: saáchi ki̱xira ña̱ va̱ʼa ndasayi̱i̱ra ki̱vi̱ yivára. ¿Ndáaña keʼé miíyó? Íyo ku̱a̱ʼání ña̱ʼa ña̱ kivi kasi nu̱úyó ña̱ kundi̱ʼi̱-iniyó xa̱ʼa̱ iinlá chiñu Jehová. Soo tá ná chika̱a̱yó ndee̱ ña̱ keʼéyó ña̱ kúni̱ Jehová, nda̱a̱ táki̱ʼva ke̱ʼé ta̱ Jesús, saátu miíyó kuchiñuyó xíʼin ñuyǐví ta̱ Ndi̱va̱ʼa yóʼo (1 Juan 5:5). w21.04 3, 4 párr. 7, 8

Ta̱ apóstol Pablo xi̱xini va̱ʼara ña̱ ni̱ka̱ʼa̱n ta̱ Jesús ña̱ ndiʼi na̱ kándíxa miíra kivi ndakiʼinna ña̱ kutakuna ndiʼi tiempo (Juan 3:16; Rom. 6:23). Ta xi̱kandíxara ña̱ ni̱xi̱ʼi̱ ta̱ Jesús xa̱ʼa̱ra ta saátu xi̱kandíxara ña̱ íxakáʼnu-ini Jehová xa̱ʼa̱ na̱ kéʼé ña̱ va̱ása va̱ʼa tá ndándikó-inina (Sal. 86:5). Ta̱ Pablo xi̱kandíxanívara ña̱ xi̱kuʼvi̱ní-ini Jehová xi̱xinirara, saáchi chi̱ndaʼára se̱ʼera ña̱ ni̱xi̱ʼi̱ra xa̱ʼa̱ra. Ná kotoyó tu̱ʼun ña̱ ni̱ka̱ʼa̱nra nu̱ú Gálatas 2:20. Ka̱chira: “Kándíxai̱ se̱ʼe Ndióxi̱ ta̱ ni̱kuʼvi̱ní-ini xi̱ni yi̱ʼi̱ ta ni̱xi̱ʼi̱ra xa̱ʼíi̱”. Ta̱ Pablo va̱ása níndakanixi̱níra ña̱ va̱ása kivi kuʼvi̱-ini Ndióxi̱ kunirara, ta ni va̱ása níka̱ʼa̱nra ña̱yóʼo: “Kúnda̱a̱va-inii̱ ña̱ kúʼvi̱-ini Jehová xínira na̱ ñanii̱ soo va̱ása kívi kuʼvi̱-inira kunira yi̱ʼi̱”. Nu̱úka ña̱ ka̱ʼa̱nra saá, ni̱ka̱ʼa̱nra ña̱yóʼo xíʼin na̱ hermano ñuu Roma: “Tá kúúkayó na̱ yiví ku̱a̱chi ta̱ Cristo ni̱xi̱ʼi̱ra xa̱ʼa̱yó” (Rom. 5:8). Ña̱ kúʼvi̱-ini Ndióxi̱ xínira miíyó va̱ása ndiʼi-xa̱ʼa̱ña. Ta̱ Pablo xi̱kandíxaníra ña̱ xi̱kuʼvi̱ní-ini Jehová xi̱xinirara. Xi̱kunda̱a̱-inira ña̱ kúeení ni̱xi̱yo ini Jehová xíʼin na̱ ñuu Israel. w21.04 22 párr. 8-10

Ná chindeétáʼanyó xíʼin na̱ káʼviyó xíʼin ña̱ kuʼvi̱-inina kunina Jehová. Ná taváyó tiempo ña̱ ka̱ʼa̱nyó xíʼinna xa̱ʼa̱ ña̱ va̱ʼa ña̱ kúúmií Jehová. Ná chindeétáʼanyó xíʼin na̱ káʼviyó xíʼin ña̱ kunda̱a̱-inina xa̱ʼa̱ Jehová ña̱ kúúra iin Ndióxi̱ ta̱ si̱í-ini, ta ndiʼi tiempo íyora ña̱ chindeétáʼanra xíʼin na̱ kúʼvi̱-ini xíniñaʼá (1 Tim. 1:11; Heb. 11:6). Ná ka̱ʼa̱nyó xa̱ʼa̱ ña̱ va̱ʼa ña̱ ndakiʼinna tá ná keʼéna ña̱ sákuaʼana, chi saá náʼa̱ Jehová ña̱ kúʼvi̱-inira xínirana (Is. 48:17, 18). Tá ná kuʼvi̱ka-inina kunina Jehová saá kúú ña̱ kuni̱kana nasamana ña̱ kéʼéna. Ta ña̱ va̱ʼa xa̱a̱na ndakuchina, xíniñúʼu sandákoona sava ña̱ ku̱i̱ká ña̱ kúúmiína. Ta saátu nda̱a̱ kivi sandákoona ña̱ kutáʼanna xíʼin na̱ yiví na̱ va̱ása ndásakáʼnu Ndióxi̱, ta savana íxandi̱va̱ʼa na̱ veʼena xíʼinna saáchi na̱yóʼo kúndasína xínina na̱ testigo Jehová. Soo ta̱ Jesús ni̱ka̱ʼa̱nra ña̱ taxi Jehová na̱ ñuura ña̱ koona na̱ veʼena (Mar. 10:29, 30). w21.06 4, 5 párr. 8, 9

Ta̱ apóstol Pablo chi̱táʼanra chiñu ña̱ kúúmiíyó xíʼin chiñu ña̱ kúúmií na̱ chíʼi planta, tasaá ni̱na̱ʼa̱ra ña̱ va̱ása xíniñúʼu chiʼi kuitíyó ña̱ nda̱a̱ níma̱ na̱ yiví, saáchi íyo inka ña̱ xíniñúʼu keʼéyó. Ña̱yóʼo sa̱ndákaʼánra na̱ ñuu Corinto tá ka̱chira: “Yi̱ʼi̱ kúú ta̱ chi̱ʼi, ta̱ Apolos kúú ta̱ ni̱ko̱so̱ña [...]. Ndóʼó kúú ñuʼú nu̱ú chíʼi Ndióxi̱” (1 Cor. 3:6-9). Miíyó na̱ káchíñu xíʼin Ndióxi̱ va̱ása chíʼi kuitíyó ña̱ nda̱a̱ níma̱ na̱ yiví, chi saátu kóso̱yóña ta kíʼinyó kuenta xíʼinña á xa̱a̱ ku̱a̱ʼa̱n xáʼnuña níma̱na. Ta saátu kúnda̱a̱-iniyó ña̱ mií Jehová kúú ta̱ sákuaʼanu ña̱yóʼo níma̱na. Iin chiñu ña̱ ndáyáʼviní kúú ña̱ natúʼunyó xíʼin na̱ yiví xa̱ʼa̱ Ndióxi̱ ta sanáʼa̱yóna xa̱ʼa̱ ña̱ nda̱a̱, ta chiñu yóʼo sákusi̱íníña-iniyó. Ta̱ apóstol Pablo chi̱ndeétáʼanra xíʼin ku̱a̱ʼání na̱ yiví na̱ ni̱xi̱yo chí ñuu Tesalónica ña̱ ni̱xa̱a̱na ndu̱una discípulo ta̱ Jesús. Ta siaʼa ni̱ka̱ʼa̱nra xa̱ʼa̱ ña̱ xi̱ndoʼora: “¿Ndáaña ndátundi̱?, ¿ndáaña sakúsi̱í-inindi̱?, ¿á ndáaña koo corona ña̱ sakúsi̱í-inindi̱, ña̱ kunúu xi̱níndi̱ kuitandi̱ nu̱ú tátayó Jesús tá xa̱a̱ íyora yóʼo? ¿Á su̱ví ndóʼó kúúna? Saá íyoña, ndóʼó kúú na̱ sákusi̱í-inindi̱ ta va̱ʼaní kúnindi̱ xa̱ʼa̱ndó” (1 Tes. 2:19, 20; Hech. 17:1-4.) w21.07 3 párr. 5; 7 párr. 17

Jehová kúú ta̱ ka̱na iin tá iinyó ña̱ va̱ʼa kooyó táʼan na̱ ñuura (Juan 6:44). Ná ndakanixi̱níyó xa̱ʼa̱ ña̱ kúni̱ kachi ña̱yóʼo. Tá ki̱xáʼa Jehová nda̱kaxinra miíyó tañu na̱ yiví na̱ íyo nu̱ú ñuʼú yóʼo, xi̱nira ña̱ ndíka̱a̱ iin ña̱ ndáyáʼviní níma̱yó: ña̱ kivi xa̱a̱yó kuʼvi̱-iniyó kuniyóra (1 Crón. 28:9). Jehová xíni̱ra miíyó, kúnda̱a̱-inira xíʼin ña̱ ndóʼoyó ta kúʼvi̱-inira xínira miíyó ta ña̱yóʼo sándi̱koníña-iniyó. Jehová kúʼvi̱ní-inira xínira yóʼó, ta saátu kúʼvi̱ní-inira xínira iin tá iin na̱ hermano. Ta ña̱ va̱ʼa kunda̱a̱-iniyó xíʼin ña̱yóʼo ná ka̱ʼa̱nyó xa̱ʼa̱ iin ejemplo ña̱ xi̱niñúʼu ta̱ Jesús, ka̱chira: “Tá iin ta̱a kúúmiíra 100 ndikachi ta iin tíkán nda̱ñúʼu”. ¿Ndáaña keʼéra? “Sandákoora 99 tíyóʼo yuku̱ ta ku̱ʼu̱nra nandukúra tí nda̱ñúʼu”. Ta tá nda̱ni̱ʼíra tíyóʼo va̱ása sa̱a̱ra xíʼinrí, chi ta̱ kusi̱í-iniva kúúra. ¿Ndáaña sákuaʼayó xíʼin ña̱yóʼo? Nu̱ú Jehová ndáyáʼviní iin tá iinyó. Ta̱ Jesús ka̱chira: “Yivái̱ ta̱ íyo chí ndiví kǒo kúni̱ra ña̱ ná ndañúʼu ni iin na̱ va̱lí yóʼo” (Mat. 18:12-14). w21.06 20 párr. 1, 2

Ña̱ ku̱ʼu̱nyó Conmemoración chíndeétáʼanña xíʼinyó ndakanixi̱níyó xa̱ʼa̱ ña̱ káʼa̱n Jehová taxira ndaʼa̱yó chí nu̱únínu, ta saátu ña̱ ndakanixi̱níyó xa̱ʼa̱ ña̱ kúʼvi̱ní-inira xínira miíyó. Kándíxaníyó ña̱ saxínura ña̱ káʼa̱nra keʼéra ta saátu ña̱ ndiʼi tiempo kuʼvi̱-inira kunira miíyó. Tá ndákanixi̱níyó xa̱ʼa̱ ña̱yóʼo, saá kúú ña̱ kúʼvi̱níka-iniyó xíniyóra ta viíníka kítáʼanyó xíʼinra (Rom. 8:38, 39). Chíndeétáʼanña xíʼinyó ña̱ kundiku̱nyó yichi̱ ta̱ Jesús (1 Ped. 2:21). Tá kúma̱ní koo Conmemoración saá káʼviyó xa̱ʼa̱ ña̱ ke̱ʼé ta̱ Jesús tá xa̱a̱ ku̱yatin kuvira, ta saátu káʼviyó xa̱ʼa̱ ña̱ ku̱u tá ni̱xi̱ʼi̱ra, xíʼin ña̱ ku̱u tá xa̱a̱ nda̱takura. Ta discurso ña̱ xíyo ti̱xin Conmemoración sándakaʼánña miíyó ña̱ kúʼvi̱ní-ini ta̱ Jesús xínira miíyó (Efes. 5:2; 1 Juan 3:16). Tá káʼviyó xa̱ʼa̱ ña̱ ke̱ʼé ta̱ Jesús ta saátu tá ndákanixi̱níyó xa̱ʼa̱ña, ña̱yóʼo chíndeétáʼanña xíʼinyó ña̱ kuni̱yó keʼéyó táʼan ña̱ ke̱ʼéra (1 Juan 2:6). Chíndeétáʼanña xíʼinyó ña̱ chika̱a̱-iniyó viíka kutáʼanyó xíʼin Jehová (Jud. 20, 21). Tá chíka̱a̱yó ndee̱ ña̱ kandíxayó ña̱ káʼa̱nra, ña̱ ndasakáʼnuyó ki̱vi̱ra ta sakúsi̱íyó-inira, saá kúú ña̱ va̱ʼaníka kutáʼanyó xíʼinra (Prov. 27:11; Mat. 6:9; 1 Juan 5:3). Ña̱ ku̱ʼu̱nyó Conmemoración chíndeétáʼanña xíʼinyó ña̱ chika̱a̱-iniyó vií koo ña̱ keʼéyó ndiʼi ki̱vi̱, ta ka̱ʼa̱nyó tu̱ʼun yóʼo xíʼin Jehová: “Kúni̱ vií kutáʼi̱n xíʼún ndiʼi tiempo”. w22.01 23 párr. 17, 18; 25 párr. 19

Jehová ta̱xira ña̱ ná ndaka̱xinyó ndáaña keʼéyó. Xa̱ʼa̱ ña̱yóʼo kivi ndaka̱xinyó ndáaña keʼéyó ndiʼi tiempo ña̱ tákuyó. Tá ná ndaka̱xinyó ndasakáʼnuyó Ndióxi̱, kusi̱íní-inira xíʼin ña̱yóʼo (Sal. 84:11; Prov. 27:11). Ta su̱ví ña̱yóʼo kúú ndiʼi ña̱ kivi ndaka̱xinyó keʼéyó, chi saátu kivi vií ndaka̱xinyó keʼéyó inkaka ña̱ʼa. Xíʼin ña̱ nda̱kaxin ta̱ Jesús ke̱ʼéra ni̱na̱ʼa̱ra ña̱ xi̱ndi̱ʼi̱ka-inira xa̱ʼa̱ inkana. Iin yichi̱ ta̱ Jesús xíʼin na̱ apóstolra, ku̱naánína ña̱kán nda̱kiʼinna ku̱a̱ʼa̱nna iin lugar nu̱ú kivi ndakindee̱na. Soo va̱ása níkivi ndakindee̱na, chi ku̱a̱ʼání na̱ yiví ni̱xa̱a̱ nda̱a̱ nu̱ú ndóona ña̱ va̱ʼa kuniso̱ʼona ña̱ xi̱sanáʼa̱ ta̱ Jesús. Va̱ása nísa̱a̱ ta̱ Jesús xíʼin na̱ yiví kán, saáchi ku̱ndáʼvi-inira xi̱nirana ta ki̱xáʼara sánáʼa̱rana xa̱ʼa̱ ku̱a̱ʼání ña̱ʼa (Mar. 6:30-34). Ta kivi kundiku̱nyó yichi̱ ta̱ Jesús tá ná kuniñúʼuyó tiempoyó xíʼin ndee̱yó ña̱ chindeétáʼanyó xíʼin inkana, ta tá kéʼéyó ña̱yóʼo saá ndásakáʼnuyó Jehová (Mat. 5:14-16). w21.08 3 párr. 7, 8

Jehová kútóora ña̱ xa̱a̱ síín síín ná koo ndiʼi ña̱ʼa. Chi saá íyo ndiʼi ña̱ʼa ña̱ i̱xava̱ʼara tá kúú miíyó na̱ yiví. Kǒo na̱ yiví na̱ inkáchi íyo, ña̱kán Jehová va̱ása chítáʼanra miíyó xíʼin inkana. Chi ña̱ kíʼinra kuenta xíʼin kúú ña̱ ndíka̱a̱ níma̱yó, ta su̱ví ndáa ki̱ʼva náʼa̱yó chí sa̱tá (1 Sam. 16:7). Xítora ndáaña kivi keʼéyó, ta saátu ndáaña va̱ása kivi keʼéyó. Ta saátu xítora ndáa ki̱ʼva xa̱ʼnuyó. Ta va̱ása káʼa̱nra xíʼinyó keʼéyó ña̱ va̱ása kuchiñuyó keʼéyó. Ña̱kán ná kundiku̱nyó yichi̱ra ta ná kotoyó miíyó nda̱a̱ táki̱ʼva xítora miíyó. Tá ná keʼéyó ña̱yóʼo saá na̱ʼa̱yó ña̱ vií íyo ña̱ ndákanixi̱níyó, ta va̱ása ndakanixi̱níyó ña̱ ndáyáʼvikayó nu̱ú inkana á ña̱ va̱ása ndáyáʼviyó (Rom. 12:3). Iin ña̱ va̱ʼava kúú ña̱ kundiku̱nyó yichi̱ na̱ hermano na̱ viíní nátúʼun xa̱ʼa̱ Ndióxi̱ (Heb. 13:7). Saáchi ña̱yóʼo chindeétáʼanña xíʼinyó ña̱ viíníka natúʼunyó xíʼin na̱ yiví (Filip. 3:17). Soo xa̱a̱ síín kúú ña̱ kotoyó ña̱ va̱ʼa kéʼé na̱ hermano ña̱ va̱ʼa kundiku̱nyó yichi̱na, nu̱ú ña̱ chitáʼanyó miíyó xíʼinna. w21.07 20 párr. 1, 2

Tá ná kotoyó ndáa ki̱ʼva íyo kití, planta xíʼin ki̱mi, ña̱yóʼo chindeétáʼan xíʼinyó ña̱ kandíxakayó Ndióxi̱ (Sal. 19:1). Tá ná kaʼvikayó xa̱ʼa̱ ndiʼi ña̱yóʼo, saá kúú ña̱ xa̱a̱yó kandíxayó ña̱ mií Jehová kúú ta̱ i̱xava̱ʼa ndiʼi ña̱ʼa. Tá káʼviyó xa̱ʼa̱ ña̱ i̱xava̱ʼa Jehová, ná kotoyó ndáaña kivi sákuaʼayó xa̱ʼa̱ra xíʼin ña̱yóʼo (Rom. 1:20). Tá kúú, ñu̱ʼu á ña̱ ka̱ndii sándayeʼe̱ña nu̱ú ñuʼú yóʼo, ta saátu táxiña ña̱ niʼní koo. Soo su̱ví nda̱saa ña̱yóʼo kéʼéña, chi sava kaʼní ña̱ tává ñu̱ʼu yóʼo va̱ása va̱ʼaña. Soo iin gas ña̱ naní ozono sásiña sa̱tá ñuʼú yóʼo tasaá va̱ása ki̱ʼvi nda̱kú kaʼní yóʼo. Tá ndeéka káni kaʼní yóʼo, gas ña̱ naní ozono ku̱a̱ʼáka ndúuña. ¿Á va̱ása náʼa̱ ña̱yóʼo ña̱ íyo iin Ndióxi̱ ta̱ ndíchiní ta kúʼvi̱ní-inira xínira miíyó? w21.08 17 párr. 9, 10

Tá xáa̱ iin na̱ yiví ndákuchina, xíniñúʼu ndakundeéyó kuʼvi̱-iniyó kuniyóna ta ixato̱ʼóyóna (1 Juan 4:20). ¿Ndáa ki̱ʼva keʼéyó ña̱yóʼo? Tá kúú, tá ke̱ʼéna iin ña̱ʼa ná kǒo ndakanixi̱níyó ña̱ ke̱ʼénaña xa̱ʼa̱ ña̱ ndíʼi̱-inina xa̱ʼa̱ mií kuitína á ke̱ʼénaña xa̱ʼa̱ ña̱ kúni̱na sáxo̱ʼvi̱na miíyó. Nu̱úka ña̱ ndakanixi̱níyó ña̱yóʼo, ná ixato̱ʼóyóna ta ná ndakanixi̱níyó ña̱ ndáyáʼvikana nu̱úyó (Rom. 12:10; Filip. 2:3). Ná kundáʼvi-iniyó kuniyó na̱ yiví ta va̱ʼa ná koo iniyó xíʼinna. Tá kúni̱yó kooyó se̱ʼe Ndióxi̱ ndiʼi tiempo, ná keʼéyó ndiʼi ña̱ sánáʼa̱ra miíyó nu̱ú tu̱ʼunra. Tá kúú, ta̱ Jesús ni̱ka̱ʼa̱nra ña̱ kundáʼvi-iniyó kuniyó na̱ yiví ta va̱ʼa koo iniyó xíʼinna, ta kivi keʼéyó ña̱yóʼo xíʼin nda̱a̱ na̱ sáa̱-ini xíni miíyó (Luc. 6:32-36). Sava yichi̱ kivi ixayo̱ʼvi̱ña xíʼinyó keʼéyó ña̱yóʼo. Tásaá ná kundoʼoyó, xíniñúʼu sákuaʼayó ndakanixi̱níyó nda̱a̱ táki̱ʼva ndákanixi̱ní ta̱ Jesús, ta keʼéyó nda̱a̱ táki̱ʼva ke̱ʼéra. Tá ná chika̱a̱yó ndee̱ ña̱ kuniso̱ʼoyó ña̱ káʼa̱n Jehová ta kundiku̱nyó yichi̱ ta̱ Jesús, saá náʼa̱yó ña̱ kúni̱yó kooyó se̱ʼe Ndióxi̱ ndiʼi tiempo. w21.08 6 párr. 14, 15

Ná sakúaʼayó kundaa-iniyó Jehová. Tá kándíxayóra ta chíka̱a̱yó ndee̱ ña̱ kachíñukayó nu̱úra, káʼa̱nra taxira ku̱a̱ʼání ña̱ va̱ʼa ndaʼa̱yó. Tu̱ʼun Ndióxi̱ káʼa̱nña xa̱ʼa̱ na̱ chi̱ka̱a̱ní ndee̱ ka̱chíñu nu̱úra, soo siʼna miína xi̱niñúʼu chi̱ka̱a̱ní ndee̱ ña̱ va̱ʼa ta̱xi Jehová bendición ndaʼa̱na. Tá kúú, siʼna xi̱niñúʼu sandákoo ta̱ Abrahán veʼera ta saáví ta̱xi Ndióxi̱ bendición ndaʼa̱ra (Heb. 11:8). Ta saátu ta̱ Jacob, siʼna ka̱nitáʼanra xíʼin iin ángel ta saáví nda̱kiʼinra iin bendición (Gén. 32:24-30). Ta tá xa̱a̱ ku̱nu̱mí ki̱ʼvi na̱ ñuu Israel nu̱ú ñuʼú ña̱ ki̱ndoo Ndióxi̱ taxira ndaʼa̱na, ku̱chiñuna ni̱ya̱ʼana yu̱ta Jordán saáchi siʼna na̱ su̱tu̱ kúú na̱ ni̱ki̱ʼvi ini táyóʼo (Jos. 3:14-16). Kivitu sákuaʼún xíʼin ña̱ kéʼé na̱ hermano na̱ íyo tiempo vitin, na̱ ndáa-ini Jehová ta chíka̱a̱na ndee̱ ña̱ kachíñukana nu̱úra. w21.08 29, 30 párr. 12-14

Ndóʼó na̱ hermano na̱ xa̱a̱ ku̱chée. Ni xíni̱vandó ndáa ki̱ʼva xi̱keʼéna iin chiñu tá ya̱chi̱, soo kúnda̱a̱va-inindó ña̱ ndáyáʼviní nasamandó ki̱ʼva ña̱ keʼéndóña. Saátu ndóʼó na̱ sa̱kán nda̱kuchi íyo ku̱a̱ʼáníka ña̱ kivi keʼéndó. Ta na̱ hermano na̱ válíka kusi̱íní-inina kuniso̱ʼona tá ná natúʼunndó xíʼinna xa̱ʼa̱ ndiʼi ña̱ xa̱a̱ ndóʼondó xíʼin ña̱ xíni̱ndó. Tá ná chika̱a̱ndó ndee̱ ña̱ sanáʼa̱ndó inkana xa̱ʼa̱ ndiʼi ña̱ xa̱a̱ xíni̱ndó, Jehová taxira ku̱a̱ʼání bendición ndaʼa̱ndó (Luc. 6:38). Tá ná kuyatin na̱ hermano na̱ xa̱a̱ ku̱chée nu̱ú na̱ hermano na̱ válíka, kivi chindeétáʼanna xíʼin táʼanna (Rom. 1:12). Iin tá iin na̱yóʼo kúúmiína ña̱ va̱ása kúúmií inkana. Tá kúú, na̱ hermano na̱ xa̱a̱ ku̱chée ku̱a̱ʼání ña̱ ndíchi kúúmiína, ta xíni̱na keʼéna ku̱a̱ʼáka chiñu, saáchi xa̱a̱ ku̱a̱ʼání tiempo kéʼéna ña̱yóʼo. Ta na̱ hermano na̱ válíka íyo ndee̱na ta ndakúnína. Tá inkáchi káchíñu na̱ hermano na̱ válíka xíʼin na̱ hermano na̱ xa̱a̱ ku̱chée, saá kúú ña̱ ndásakáʼnuna Jehová ta chíndeétáʼanna xíʼin na̱ congregación. w21.09 8 párr. 3; 12, 13 párr. 17, 18

¿Nda̱chun va̱ása níkandíxa ku̱a̱ʼání na̱ judío ta̱ Jesús? Saáchi ni̱xi̱ʼi̱ra ndaʼa̱ iin yitu̱n nda̱a̱ táki̱ʼva kéʼéna xíʼin iin na̱ kui̱ʼná á na̱ kéʼé ña̱ va̱ása va̱ʼa, ta xa̱ʼa̱ ña̱yóʼo va̱ása níkandíxana ña̱ kúúra ta̱ Mesías (Deut. 21:22, 23). Ta̱ Jesús kǒo ku̱a̱chi níxi̱kuumiíra, ta ni̱ka̱ʼa̱nna ña̱ vatá xa̱ʼa̱ra ta saátu va̱ása nda̱kú níndatiinna ku̱a̱chi xa̱ʼa̱ra, soo sava na̱ judío va̱ása níxiinna ndakunina ña̱yóʼo. Na̱ chíñu kamaní nda̱tiinna ku̱a̱chi xa̱ʼa̱ra ta ni va̱ása ní ixato̱ʼóna ña̱ xi̱ka̱ʼa̱n ley (Luc. 22:54; Juan 18:24). Nu̱úka ña̱ vií kuniso̱ʼona ndáa ku̱a̱chi kúú ña̱ xi̱chika̱a̱ na̱ yiví ta̱ Jesús, va̱ʼaka ndu̱kúna na̱ ka̱ʼa̱n ña̱ síkí xa̱ʼa̱ra ña̱ va̱ʼa kaʼnínara. (Mat. 26:59; Mar. 14:55-64). Ta tá xa̱a̱ nda̱taku ta̱ Jesús, na̱ chíñu yóʼo cha̱ʼvina na̱ soldado na̱ xi̱kiʼin kuenta xíʼin ya̱vi̱ nu̱ú xi̱ndika̱a̱ra, ña̱ va̱ʼa ná ka̱ʼa̱nna ña̱ vatá nda̱chun kǒokara ndíka̱a̱ ini ya̱vi̱ kán (Mat. 28:11-15). w21.05 11 párr. 12, 13

Kiviva sándiʼi-xa̱ʼa̱ Jehová ña̱ va̱ása va̱ʼa íyo nu̱ú ñuʼú yóʼo. Soo xa̱ʼa̱ ña̱ ndátura ta kúee íyo inira, ku̱a̱ʼání ña̱ va̱ʼa ndákiʼinyó xa̱ʼa̱ ña̱yóʼo. Tá kákuyó xa̱a̱ na̱ yiví ku̱a̱chi kúúyó chi se̱ʼe ta̱ Adán xíʼin ñá Eva kúúyó. Soo ni saá, kúʼvi̱níva-ini Jehová xínira miíyó, ta káʼa̱nra xíʼinyó ña̱ sandíʼi-xa̱ʼa̱ra ndiʼi ña̱ va̱ása va̱ʼa íyo nu̱ú ñuʼú yóʼo (1 Juan 4:19). Xa̱a̱ nda̱kaxinvara iin ki̱vi̱ ña̱ sandíʼi-xa̱ʼa̱ra ña̱ sáxo̱ʼvi̱ miíyó xa̱ʼa̱ ña̱ kúʼvi̱-inira xínira miíyó. Ña̱yóʼo chíka̱a̱ña ndee̱ xíʼinyó ña̱ kundeé-iniyó nda̱a̱ táki̱ʼva kúndeé-inira. Jehová va̱ʼaní yichi̱ chínúura nu̱úyó ña̱ kundeé-iniyó. Tasaá ke̱ʼé ta̱ Jesús saáchi tá ni̱xi̱yora nu̱ú ñuʼú yóʼo, ku̱ndeé-inira tá ni̱ka̱ʼa̱n-ndi̱va̱ʼana xíʼinra ta saátu tá sa̱kúkaʼanna nu̱úra, ta ku̱ndeétu-inira tá xi̱tikaara ndaʼa̱ yitu̱n (Heb. 12:2, 3). Ku̱ndeé-inira xíʼin ndiʼi ña̱yóʼo chi Jehová kúú ta̱ va̱ʼaní yichi̱ chi̱núu nu̱úra. Saátu miíyó kivi ndasandakú ña̱yóʼo-iniyó. w21.07 12, 13 párr. 15-17

Ta ndiʼi ki̱vi̱ náʼa̱ Jehová ña̱ kúndáʼvi-inira xínira miíyó (Sal. 103:10-14). Ta ki̱ʼva saátu ke̱ʼé ta̱ Jesús xíʼin na̱ discípulora saáchi na̱ yiví ku̱a̱chi xi̱kuuna, ña̱kán ku̱ndáʼvi-inira xi̱nirana ta i̱xakáʼnu-inira xa̱ʼa̱na. Ta nda̱a̱ ka̱ndíxara kuvira xa̱ʼa̱yó ña̱ va̱ʼa ixakáʼnu-ini Jehová xa̱ʼa̱ ku̱a̱chiyó (1 Juan 2:1, 2). Tá íxakáʼnu-iniyó xa̱ʼa̱ na̱ hermanoyó, saá kúú ña̱ xáʼnuka ña̱ kúʼvi̱-iniyó xíniyóna (Efes. 4:32). Sava yichi̱ íxayo̱ʼvi̱ña xíʼinyó ixakáʼnu-iniyó xa̱ʼa̱na, soo xíniñúʼu chika̱a̱yó ndee̱ keʼéyó ña̱yóʼo. Ña̱ chi̱ndeétáʼan xíʼin iin ñá hermana kúú iin artículo ña̱ naní “Perdónense liberalmente unos a otros” ña̱ ka̱na nu̱ú ña̱ La Atalaya. Ñáyóʼo káchiñá: “Ña̱ artículo yóʼo ni̱ka̱ʼa̱nña ña̱ tá íxakáʼnu-iniyó xa̱ʼa̱ inkana va̱ása kúni̱ kachiña ña̱ kíndo̱o-iniyó xíʼin ña̱ va̱ása va̱ʼa kéʼéna, á ña̱ va̱ása ndáyáʼvi ña̱ ke̱ʼéna xíʼinyó. Saáchi tá íxakáʼnu-iniyó xa̱ʼa̱na kúni̱ kachiña ña̱ va̱ása sáa̱kayó xíʼinna, tasaá va̱ása ndíʼi̱ka-iniyó”. Tá íxakáʼnu-iniyó xa̱ʼa̱ na̱ hermanoyó náʼa̱yó ña̱ kúʼvi̱-iniyó xíniyóna ta ndíku̱nyó yichi̱ yiváyó Jehová. w21.09 23, 24 párr. 15, 16

Ta̱ Jesús xi̱kuʼvi̱-inira xi̱xinira ña̱ nda̱a̱ xa̱ʼa̱ Ndióxi̱ ta saátu ña̱ káʼa̱nra keʼéra chí nu̱únínu. Xíʼin ki̱ʼva ña̱ xi̱takura ni̱na̱ʼa̱ra ña̱ xi̱kandíxara ña̱ nda̱a̱, ta saátu sa̱náʼa̱ra inka na̱ yiví xa̱ʼa̱ña (Juan 18:37). Ta saátu na̱ xi̱ndiku̱n sa̱tá ta̱ Jesús xi̱kuʼvi̱ní-inina xi̱xinina ña̱ nda̱a̱ (Juan 4:23). Ta̱ apóstol Pedro ni̱ka̱ʼa̱nra xa̱ʼa̱ na̱ cristiano ña̱ xi̱ndiku̱nna ña̱ nda̱a̱ (2 Ped. 2:2). Na̱yóʼo xi̱kuʼvi̱ní-inina xi̱xinina ña̱ nda̱a̱, ña̱kán va̱ása níkandíxana ña̱ xi̱sanáʼa̱ na̱ inka veʼe-ñu̱ʼu. Ta saátu va̱ása níxi̱ndiku̱nna costumbre na̱ yiví, ta va̱ása níxi̱kandíxana ña̱ xi̱ka̱ʼa̱nna (Col. 2:8). Ki̱ʼva saá kéʼé miíyó na̱ ndíku̱n ta̱ Jesús tiempo vitin, saáchi ndíku̱nyó ña̱ nda̱a̱ (3 Juan 3, 4). Miíyó na̱ testigo Jehová va̱ása káʼa̱nyó ña̱ va̱ʼaní kúnda̱a̱-iniyó xíʼin ña̱ káʼa̱n Biblia. Saáchi sava yichi̱ va̱ása vií níxi̱ndakaniyó xa̱ʼa̱ña, á va̱ása viíní níxi̱keʼéyó sava chiñu ti̱xin congregación. Soo tá ni̱xa̱a̱yó ku̱ndaa̱-iniyó ndáa ki̱ʼva keʼéyó ña̱yóʼo, xi̱nasamavayó ki̱ʼva ña̱ xi̱keʼéyó. w21.10 21, 22 párr. 11, 12

Tá tiempo xi̱naʼá, nama̱ ña̱ xi̱xiyo sa̱tá ñuu, xi̱ndaaña na̱ yiví kán nu̱ú na̱ xi̱saa̱-ini xi̱xiniñaʼá. Ta ki̱ʼva saá íyo ña̱ kúʼvi̱ní-ini Jehová xínira miíyó, saáchi ndáaña miíyó nu̱ú ña̱ʼa ña̱ kivi sakúxíká miíyó nu̱úra. Ta saátu ña̱ ndixaní kúʼvi̱-inira xínira miíyó sákuyatinña miíyó nu̱úra (Jer. 31:3). Ta̱ rey David ni̱ka̱ʼa̱nra xa̱ʼa̱ inka ña̱ʼa, ña̱ va̱ʼa ka̱ʼa̱nra xa̱ʼa̱ ki̱ʼva ña̱ ndáa Jehová na̱ ñuura. Ña̱yóʼo ka̱ʼyíra: “[Ndióxi̱ miíi̱] ndáún yi̱ʼi̱ ta saátu ndixaní kúʼvi̱-iniún xíniún yi̱ʼi̱”. Ta saátu ni̱ka̱ʼa̱nra ña̱yóʼo: “Ta̱kán kúú ta̱ ndixaní kúʼvi̱-ini xíni yi̱ʼi̱, nda̱a̱ táki̱ʼva íyo iin veʼe ña̱ súkun nu̱ú kivi chise̱ʼíi̱ miíi̱ saá íyora, ta̱kán kúú ta̱ sáka̱ku yi̱ʼi̱, nda̱a̱ táki̱ʼva íyo iin escudo saá íyora xíʼi̱n, ta̱kán kúú ta̱ kíʼin kuenta xíʼi̱n” (Sal. 59:17; 144:2). ¿Nda̱chun chi̱táʼan ta̱ David ña̱ ndixaní kúʼvi̱-ini Jehová xínira miíyó, xíʼin iin veʼe ña̱ súkun nu̱ú kivi chise̱ʼéyó miíyó? Saáchi ni nda̱a̱ ndáaka ñuu ndóoyó, tá káchíñuyó nu̱ú Jehová ta̱yóʼo kundaara miíyó nu̱ú ña̱ʼa ña̱ kivi sakúxíká miíyó nu̱úra. w21.11 6 párr. 14, 15

Iin yichi̱ tá ku̱a̱ʼa̱n ta̱ Jesús xíʼin na̱ discípulora ini iin barco, ki̱xáʼa ndeéní kúun sa̱vi̱. Ta̱ Jesús xi̱niñúʼura ña̱ ku̱u yóʼo ña̱ va̱ʼa chindeétáʼanra xíʼin na̱ discípulora ña̱ kunda̱a̱-inina ña̱ xi̱niñúʼu kandíxakana Ndióxi̱ (Mat. 8:23-26). Xa̱ʼa̱ ña̱ ndeéní ki̱xáʼa kúun sa̱vi̱, ki̱xáʼa ni̱ki̱ʼvi ti̱kui̱í ini tú barco soo ta̱ kísi̱va kúú ta̱ Jesús. Ta xa̱ʼa̱ ña̱ ni̱yi̱ʼvíní na̱ discípulo, ni̱xa̱ʼa̱nna sa̱ndákaxina-inira, ta ni̱ka̱ʼa̱nna xíʼinra ña̱ ná sakǎkurana. Soo ta̱ Jesús ni̱ka̱ʼa̱nra xíʼinna: “Ndóʼó na̱ kǒo kándíxa Ndióxi̱, ¿nda̱chun ndeéní yíʼvindó?”. ¿Á ndíka̱ún ndaʼa̱ iin tu̱ndóʼo ña̱ yo̱ʼvi̱ní? Sana xóʼvi̱ún xa̱ʼa̱ ña̱ ndeéní ku̱un sa̱vi̱, xa̱ʼa̱ ña̱ ni̱ta̱an á xa̱ʼa̱ ña̱ ku̱u inkaka tu̱ndóʼo. Á sanatu xóʼvi̱ún xa̱ʼa̱ ña̱ kúúmiíún iin kue̱ʼe̱ ña̱ ndeéní. Ta xa̱ʼa̱ ña̱yóʼo kúsuchíní-iniún ta va̱ása xíni̱ún ndáaña keʼún. Sana ndíʼi̱ní-iniún sava yichi̱, soo va̱ása taxiún ña̱ kasi ña̱yóʼo nu̱ún ña̱ kandíxakaún Ndióxi̱. Natúʼun xíʼinra xa̱ʼa̱ ndiʼi ña̱ ndóʼún. Ta kivi kandíxaníkaún Ndióxi̱ tá ná ndakaʼún xa̱ʼa̱ ndiʼi yichi̱ ña̱ xa̱a̱ chi̱ndeétáʼanra xíʼún (Sal. 77:11). Kivi kandíxaún ña̱ va̱ása sandákoondaʼa̱ Jehová yóʼó ni tiempo vitin ta ni chí nu̱únínu. w21.11 22 párr. 7, 10

Iin na̱ ñuu Israel kivi xa̱a̱na ndakanixi̱nína ña̱ va̱ʼaní ndíku̱nna ley yóʼo, saáchi va̱ása ní xi̱ ixakuíʼnana ña̱ʼa inkana. Soo ni̱xi̱yova inka ki̱ʼva ña̱ xa̱a̱na ixakuíʼnana. Tá kúú, tá iin na̱ xi̱xi̱kó va̱ása vií níxi̱chuʼunna iin ña̱ʼa á va̱ása vií níxi̱katanaña, na̱ xi̱ ixakuíʼna kúúna. Levítico 19:13 káʼa̱nña ña̱ va̱ása sandáʼviyó na̱ táʼanyó. Xíʼin ña̱yóʼo kúnda̱a̱-iniyó ña̱ inkáchi íyo ña̱ ixakuíʼnana xíʼin ña̱ sandáʼvina ti̱xin negocio ña̱ xi̱kuumiína. Ña̱kán, na̱ xi̱ ixakuíʼna kúúna tá xi̱sandáʼvina nu̱ú xi̱xikóna á nu̱ú xi̱kachíñuna. Ley ña̱ u̱na̱ xi̱ka̱ʼa̱nña ña̱ va̱ása níxi̱xiniñúʼu ixakuíʼnana, soo ña̱ xi̱ka̱ʼa̱n Levítico xi̱chindeétáʼanña xíʼin na̱ ñuu Israel ña̱ kunda̱a̱-inina ndáa ki̱ʼva kundiku̱nna ña̱ káʼa̱n ley yóʼo. Ña̱kán, ndáyáʼviní kotoyó ndáaña ndákanixi̱ní Jehová xa̱ʼa̱ ña̱ ixakuíʼnayó á ña̱ sandáʼviyó inkana. Ná ndakanixi̱níyó xa̱ʼa̱ ña̱yóʼo: “Tá kaʼvii̱ Levítico 19:11-13, ¿á kíʼi̱n kuenta ña̱ xíniñúʼu nasamai̱ sava ña̱ kéʼíi̱ ti̱xin negocio ña̱ kúúmiíi̱ á nu̱ú káchíñui̱?”. w21.12 9, 10 párr. 6-8

Tá kúma̱ní keʼéyó oración nu̱ú Jehová ná ndakanixi̱níyó xa̱ʼa̱ ña̱ va̱ása va̱ʼa ke̱ʼéyó ki̱vi̱ saá, ta ná ka̱ʼa̱nyó xíʼinra ña̱ ixakáʼnu-inira xa̱ʼa̱yó. Ta saátu, tá ni̱ki̱ʼviyó iin ku̱a̱chi ndeé ná ka̱ʼa̱nyó xíʼin na̱ anciano ña̱ chindeétáʼanna xíʼinyó. Na̱yóʼo va̱ʼaní kuniso̱ʼona ña̱ ka̱ʼa̱nyó ta taxina consejo ña̱ va̱xi nu̱ú Biblia ndaʼa̱yó. Ta ka̱ʼa̱nna xíʼin Jehová ña̱ ná ixakáʼnu-inira xa̱ʼa̱yó, chi xa̱a̱ ni̱xi̱ʼi̱ ta̱ Jesús xa̱ʼa̱yó, tasaá kivi ndakutáʼan vií tukuyó xíʼin Ndióxi̱ (Sant. 5:14-16). Ná ndakanixi̱níyó xa̱ʼa̱ ña̱ nda̱chaʼvi ta̱ Jesús xa̱ʼa̱yó. Ta saátu ná ndakanixi̱níyó xa̱ʼa̱ ndiʼi ña̱ ni̱xo̱ʼvi̱ra tá ni̱xi̱ʼi̱ra, ña̱yóʼo chindeétáʼanña xíʼinyó ña̱ kuʼvi̱ka-iniyó kuniyóra ta saátu yivára. Ta inka nu̱ú kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús kúú ña̱ ku̱ʼu̱nyó Conmemoración, ta saátu kanayó inkana ña̱ ku̱ʼu̱nna xíʼinyó. Jehová ta̱xira iin chiñu ña̱ ndáyáʼviní ndaʼa̱yó ña̱ sanáʼa̱yó inkana xa̱ʼa̱ se̱ʼera. w21.04 18 párr. 13-16

Ná ndakanixi̱níyó ndáaña ke̱ʼé ta̱ Jesús tá ni̱xa̱a̱ ku̱a̱ʼání na̱ yiví nu̱úra chí xa̱ʼa̱ iin yuku̱. Sana ku̱naání ta̱ Jesús ki̱vi̱ kán saáchi iníí ñuú ni̱ka̱ʼa̱nra xíʼin Jehová. Soo tá xi̱nira na̱ nda̱ʼví ta saátu na̱ ndeéndóʼo, ku̱ndáʼviní-inira xi̱nirana. Ña̱kán va̱ása nísandáʼa kuitírana, chi saátu ta̱xira iin discurso ña̱ chi̱ka̱a̱ní ndee̱ xíʼinna, ta nda̱a̱ tiempo vitin chíka̱a̱ña ndee̱ xíʼinyó (Luc. 6:12-20). Ni xi̱kuni̱va ta̱ Jesús koo mitúʼunra, soo ta̱vára tiempo ña̱ chindeétáʼanra xíʼin inkana. Ná ndakanixi̱níyó xa̱ʼa̱ ña̱ ku̱u iin yichi̱: Ta̱ Jesús ku̱nda̱a̱-inira ña̱ xa̱ʼnína migora ta̱ Juan ta̱ xi̱sandákuchi na̱ yiví, ña̱kán ku̱suchíníva-inira. Tu̱ʼun Ndióxi̱ káchiña: “Tá na̱kunda̱a̱-ini ta̱ Jesús xa̱ʼa̱ ña̱yóʼo, nda̱ara barco ta nda̱kiʼinra ku̱a̱ʼa̱n xíkára ña̱ va̱ʼa koo mitúʼunra” (Mat. 14:10-13). Soo va̱ása níkiviví koo mitúʼun ta̱ Jesús, saáchi tá xa̱a̱ ni̱xa̱a̱ra kán xi̱nira ña̱ ku̱a̱ʼání na̱ yiví ndátunara (Mar. 6:31-34) Ki̱ʼinra kuenta ña̱ xi̱niñúʼu chindeétáʼan Ndióxi̱ xíʼin na̱ yiví kán ta sandíkora-inina, ña̱kán ndi̱ku̱n kama chi̱ndeétáʼanra xíʼinna (Luc. 9:10, 11). w22.02 21 párr. 4, 6

¿Ndáaña xíniñúʼu keʼéyó tá ki̱ʼinyó kuenta ña̱ va̱ása va̱ʼa níkuni iin na̱ hermano xíʼin ña̱ ke̱ʼéyó á ña̱ ni̱ka̱ʼa̱nyó? Ná ka̱ʼa̱nyó xíʼin Jehová ña̱ chindeétáʼanra xíʼinyó ndasaviíyó ku̱a̱chi ña̱ kúúmiíyó xíʼinna. Ta saátu xíniñúʼu taváyó tiempo kotoyó ndáa ki̱ʼva íyo ña̱ kéʼéyó. Tá kúú kivi ndakanixi̱níyó xa̱ʼa̱ ña̱yóʼo: “¿Á ndákunii̱ ña̱ va̱ása va̱ʼa íyo ña̱ kéʼíi̱ á ña̱ káʼi̱n? ¿Á ndúkúi̱ ña̱ káʼnu-ini nu̱ú inkana ña̱ va̱ʼa ndakutáʼan viíi̱ xíʼinna? ¿Ndáa ki̱ʼva kuni Jehová ta saátu ta̱ Jesús tá ná chika̱i̱ ndee̱ ña̱ ndasaviíi̱ ku̱a̱chi ña̱ kúúmiíi̱ xíʼin na̱ hermanoi̱?”. Ki̱ʼva ña̱ ndakuiinyó pregunta yóʼo kúú ña̱ chindeétáʼan xíʼinyó kuniso̱ʼoyó ña̱ káʼa̱n ta̱ Jesús, ta saátu vitá koo iniyó ndasaviíyó ku̱a̱chi ña̱ kúúmiíyó xíʼin na̱ hermanoyó. Sana va̱ása ndiʼiví ku̱a̱chi ña̱ xi̱kuumiína. Ña̱kán, tá ndásaviíyó ku̱a̱chi ña̱ kúúmiíyó xíʼin na̱ hermanoyó xíniñúʼu vitá koo iniyó nda̱a̱ táki̱ʼva ni̱xi̱yo ini ta̱ Jacob (Efes. 4:2, 3). Ná ndakaʼányó chi ña̱ ndáyáʼvika kúú ña̱ ndakutáʼan viíyó xíʼin na̱ hermanoyó, ta su̱víka ña̱ ka̱ʼa̱nyó ndáana kúúmií ku̱a̱chi (1 Cor. 6:7). w21.12 25, 26 párr. 13-16

Ta̱ Jesús ku̱súchíní-inira saáchi ni va̱ʼaní nda̱kiʼinnara, ku̱a̱ʼánína va̱ása kandíxana kuniso̱ʼona xa̱ʼa̱ Reino Ndióxi̱. Xa̱ʼa̱ ña̱kán na̱ sáa̱-ini xíni ñuu Jerusalén sandíʼi-xa̱ʼa̱naña ta ndakiʼinna na̱ yiví ku̱ʼu̱n xíʼinna (Luc. 21:20-24). Ta ni̱xi̱nuva ña̱ ni̱ka̱ʼa̱n ta̱ Jesús, saáchi ku̱a̱ʼání na̱ yiví va̱ása níxiinna kuniso̱ʼona ña̱ xi̱natúʼunra. ¿Á xíniso̱ʼo na̱ yiví tá nátúʼún xíʼinna xa̱ʼa̱ Reino Ndióxi̱? Sana chíka̱a̱nívaún ndee̱ ña̱ natúʼún xíʼinna xa̱ʼa̱ Ndióxi̱ ta ni saá va̱ása xíínna kuniso̱ʼona yóʼó. Tá saá, ¿ndáaña kivi sakúaʼún xíʼin ña̱ ke̱ʼé ta̱ Jesús? Kúʼvi̱ní-ini Jehová xínira na̱ yiví. Tá xa̱ku ta̱ Jesús sa̱ndákaʼánra miíyó ña̱ ndíʼi̱ní-ini Jehová xa̱ʼa̱ na̱ yiví. Va̱ása kúni̱ra ña̱ ndiʼi-xa̱ʼa̱ nda̱a̱ ni iin na̱ yiví, chi ña̱ kúni̱ra kúú ña̱ ná ndandikó-ini ndiʼina (2 Ped. 3:9). Náʼa̱yó ña̱ kúʼvi̱-iniyó xíniyó na̱ yiví tá chíka̱a̱yó ndee̱ ña̱ natúʼunyó xíʼinna xa̱ʼa̱ Ndióxi̱ (Mat. 22:39). w22.01 16 párr. 10-12

Kandíxaníkayó Ndióxi̱ tá ná ndakanixi̱níyó xa̱ʼa̱ ndiʼi ña̱ xa̱a̱ kéʼéra xa̱ʼa̱ na̱ ñuura xíʼin ña̱ xa̱a̱ kéʼéra xa̱ʼa̱ miíyó. Ña̱ ku̱mí, kuʼvi̱ka-iniyó kuniyó Jehová. Ña̱yóʼo kúú mií ña̱ ndáyáʼvi va̱ʼaka ndákiʼinyó tá táváyó tiempo ña̱ kutáʼanyó xíʼinra. ¿Nda̱chun? Saáchi tá kúʼvi̱-iniyó xíniyó Jehová, va̱ʼaní kuniso̱ʼoyó ndiʼi ña̱ káʼa̱nra, ta keʼéyó nda̱a̱ ndáaka ña̱ʼa ña̱ va̱ʼa sakúsi̱íyó-inira, ta saátu kundeé-iniyó nu̱ú nda̱a̱ ndáaka tu̱ndóʼo (Mat. 22:37-39; 1 Cor. 13:4, 7; 1 Juan 5:3). Ña̱ kutáʼanyó xíʼin Jehová kúú mií ña̱ ndáyáʼvi va̱ʼaka (Sal. 63:1-7). Ña̱kán ná ndakaʼán tukuyó: tá káʼa̱nyó xíʼin Jehová, tá káʼviyó tu̱ʼunra ta ndákanixi̱níyó xa̱ʼa̱ña iin ki̱ʼva ña̱ ndásakáʼnuyóra kúúña. Ña̱kán ná keʼéyó nda̱a̱ táki̱ʼva ke̱ʼé ta̱ Jesús ña̱ taváyó tiempo ña̱ ka̱ʼa̱nyó xíʼin Jehová ta kaʼviyó tu̱ʼunra, ta ndukúyó iin lugar ña̱ táxi̱n ña̱ va̱ʼa keʼéyó ña̱yóʼo. Ta ná va̱ása taxiyó kasi inka ña̱ʼa nu̱úyó tá kéʼéyóña. Ta tá káʼviyó á tá ku̱a̱ʼa̱nyó reunión ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ va̱ása kundi̱ʼi̱-iniyó xa̱ʼa̱ inka ña̱ʼa. Tá chíka̱a̱yó ndee̱ ña̱ vií kuniñúʼuyó tiempoyó, Jehová taxira kutakuyó ndiʼi tiempo nu̱ú ñuyǐví xa̱á (Mar. 4:24). w22.01 30, 31 párr. 18-20

Ña̱ ndakanixi̱níyó xa̱ʼa̱ iin ña̱ʼa kúú ña̱ chindaʼá miíyó xa̱a̱yó keʼéyóña. Ña̱kán ni̱ka̱ʼa̱n ta̱ Jesús ña̱ ná kǒo ndakanixi̱níyó xa̱ʼa̱ ña̱ʼa ña̱ kivi chindaʼá miíyó ki̱ʼviyó ku̱a̱chi nu̱ú Ndióxi̱ (Mat. 5:21, 22, 28, 29). Xa̱ʼa̱ ña̱yóʼo, tá kúni̱yó sakúsi̱íyó ini Jehová, ndi̱ku̱n kama xíniñúʼu taváyó ña̱ va̱ása va̱ʼa ndákanixi̱níyó. Ta̱ Jesús ka̱chira: “Ndiʼi ña̱ kée yuʼú iin na̱ yiví chí níma̱na va̱xiña” (Mat. 15:18). Ta ña̱ nda̱a̱ní kúú ña̱ ni̱ka̱ʼa̱nra, saáchi tu̱ʼun ña̱ káʼa̱nyó náʼa̱ña ndáa ki̱ʼva íyoyó. Tavá tiempo ña̱ ndakanixi̱níún xa̱ʼa̱ ña̱yóʼo: “¿Á ndiʼi tiempo káʼi̱n ña̱ nda̱a̱ ni kúnda̱a̱-inii̱ ña̱ kivi kixi tu̱ndóʼo nu̱úi̱? Tá xa̱a̱ ti̱ndaʼíi̱, ¿á chíka̱i̱ ndee̱ ña̱ va̱ása kutói̱ inkana? ¿Á chíka̱i̱ ndee̱ ña̱ va̱ása natúʼi̱n xa̱ʼa̱ ña̱ kini? ¿Á vií ndákuii̱n yuʼú na̱ sásáa̱ yi̱ʼi̱?”. Tu̱ʼun ña̱ káʼa̱nyó kivi chitáʼanyóña xíʼin ikí á botó tí tíin nu̱ú ti̱ko̱to̱ ña̱ ndíxiyó. Tá kúni̱yó nasamayó ti̱ko̱to̱yó, xíniñúʼu taváyó ikí nu̱úña ña̱ va̱ʼa kitaña. Ta ki̱ʼva saátu xíniñúʼu keʼéyó tá kúni̱yó nasamayó ki̱ʼva ña̱ íyoyó, xíniñúʼu chika̱a̱yó ndee̱ ña̱ va̱ása ka̱ʼa̱n-ndi̱va̱ʼayó xíʼin inkana, ña̱ va̱ása ka̱ʼa̱nyó ña̱ vatá ta va̱ása natúʼunyó xa̱ʼa̱ ña̱ kini. Tá ná keʼéyó ña̱yóʼo va̱ása ixayo̱ʼvi̱ña xíʼinyó sandákooyó ki̱ʼva ña̱ ni̱xi̱yoyó tá ya̱chi̱. w22.03 5 párr. 12-14

Na̱ ndúkú consejo nu̱úka ña̱ kundatuna ña̱ taxinaña ndaʼa̱na, kamaníka xáʼnuna xíʼin tu̱ʼun Ndióxi̱. Ña̱kán, siʼnaka miíyó ná ndukú consejo. ¿Ama kúú ña̱ kivi ndukúyó consejo nu̱ú iin na̱ hermano? Ná ka̱ʼa̱nyó xa̱ʼa̱ sava ejemplo. Ña̱ nu̱ú: iin ñá hermana káʼa̱nñá xíʼin inka ñá hermana ña̱ ná ku̱ʼu̱nñá xíʼinñá kaʼviñá xíʼin iin na̱ yiví, ta tándi̱ʼi ndáka̱tu̱ʼunñáñá ndáaña kivi keʼéñá ña̱ viíka sanáʼa̱ñá na̱ káʼviñá xíʼin. Ña̱ u̱vi̱: iin ñá hermana ñá kúa̱an kúni̱ñá satáñá xatu kundixiñá, ña̱kán ndáka̱tu̱ʼunñá iin ñá hermana ndáaña ndákanixi̱níñá xa̱ʼa̱ xatu ña̱ kúni̱ñá satáñá. Ña̱ u̱ni̱: sa̱kán ña̱ nu̱ú yichi̱ kúú ña̱ taxi iin ta̱ hermano discurso ti̱xin congregación. Ña̱kán, káʼa̱nra xíʼin iin ta̱ hermano ta̱ xa̱a̱ xíni̱ka ña̱ ná kuniso̱ʼora discursora tá ná taxiraña ti̱xin congregación, tasaá kivi taxira consejo ndaʼa̱ra ña̱ viíka taxira discurso. Ta saátu nda̱a̱ na̱ xa̱a̱ ku̱a̱ʼání ku̱i̱ya̱ táxi discurso kivi ndukúna consejo nu̱ú inka na̱ hermano, ta kivi kundiku̱nna consejo yóʼo (Prov. 19:20). w22.02 13 párr. 15-17

Jehová náʼa̱ra ña̱ kúʼvi̱ní-inira xínira miíyó nda̱a̱ táki̱ʼva ke̱ʼéra xíʼin ta̱ Jesús tá ni̱xi̱yora nu̱ú ñuʼú yóʼo (Juan 5:20). Chi̱ndeétáʼanra xíʼin ta̱ Jesús ña̱ kandíxakarara, chi̱kaa̱ra ndee̱ xíʼinra tá ni̱ndi̱ʼi̱-inira, ta saátu xi̱ndaarara ña̱ va̱ʼa va̱ása kuma̱ní nda̱a̱ ni iin ña̱ʼa nu̱úra. Ta ni̱ka̱ʼa̱ntu Jehová xíʼin ta̱ Jesús ña̱ kúʼvi̱ní-inira xínirara, ta xi̱kusi̱í-inira xíʼin ña̱ xi̱keʼéra (Mat. 3:16, 17). Nda̱a̱ ni iin yichi̱ va̱ása níxi̱kuni mitúʼun ta̱ Jesús, saáchi xi̱kunda̱a̱-inira ña̱ ndiʼi tiempo ni̱xi̱yo yivára xíʼinra. Nda̱a̱ táki̱ʼva ndo̱ʼo ta̱ Jesús, saátu miíyó xa̱a̱ kíʼinyó kuenta ndáa ki̱ʼva náʼa̱ Jehová ña̱ kúʼvi̱-inira xínira miíyó. Ná ndakanixi̱níyó xa̱ʼa̱ ña̱yóʼo: Jehová sa̱kúyatinra miíyó nu̱úra, ta ta̱xira ku̱a̱ʼání na̱ hermano ña̱ koona na̱ veʼeyó ta na̱yóʼo kúʼvi̱ní-inina xínina miíyó ta va̱ʼaní kítáʼanyó xíʼinna, ña̱kán kúsi̱íní-iniyó. Ta saátu chíndeétáʼanra xíʼinyó tá ndákava-iniyó (Juan 6:44). Saátu xíniñúʼura na̱ ñuura ña̱ távána ku̱a̱ʼání ña̱ʼa ña̱ chíndeétáʼan xíʼinyó ña̱ sakúaʼakayó xa̱ʼa̱ra. Táxitura ña̱ xíniñúʼuyó ki̱vi̱ tá ki̱vi̱ (Mat. 6:31, 32). Tá ndákanixi̱níyó xa̱ʼa̱ ña̱ kúʼvi̱ní-ini Jehová xínira miíyó, saá xáa̱yó kúʼvi̱níka-iniyó xíniyóra. w21.09 22 párr. 8, 9

¿Ndáa ki̱ʼva ni̱xi̱yo ña̱ xi̱keʼún tá kúma̱níka sakúaʼún xa̱ʼa̱ Ndióxi̱? Ku̱a̱ʼáníyó va̱ása kútóoyó natúʼunyó xa̱ʼa̱ ña̱yóʼo. Saáchi sana xi̱keʼéyó táʼan ña̱ va̱ása va̱ʼa ña̱ kéʼé na̱ ñuyǐví yóʼo. Ña̱kán, kǒo ña̱ níxi̱ndatuyó ndakiʼinyó chí nu̱únínu ta va̱ása níxi̱xini̱yó xa̱ʼa̱ Ndióxi̱ (Efes. 2:12). Tá ki̱xáʼún káʼviún tu̱ʼun Ndióxi̱, ni̱xa̱ún ku̱nda̱a̱-iniún ña̱ kúʼvi̱ní-inira xínira yóʼo. Ta ni̱xa̱ún ku̱nda̱a̱-iniún ña̱ xíniñúʼu nasamaún ña̱ ndákanixi̱níún xíʼin ña̱ kéʼún ña̱ va̱ʼa sakúsi̱íún-inira ta koún táʼan na̱ ñuura. Ta saátu sa̱kúaʼún ña̱ ndáyáʼviní kundiku̱ún ña̱ káʼa̱n tu̱ʼunra ta va̱ása keʼún ña̱ kini (Efes. 5:3-5). Xa̱ʼa̱ ña̱ i̱xava̱ʼa Jehová miíyó ta kúúra yiváyó, kivi ka̱ʼa̱nra xíʼinyó ndáaña xíniñúʼu keʼéyó. Ta ña̱yóʼo káʼa̱nra xíʼin na̱ kúni̱ ndakuchi: “Sandákoondó ki̱ʼva ña̱ ni̱xi̱yondó tá ya̱chi̱ ta saátu ndiʼi ña̱ xi̱keʼéndó”. w22.03 2 párr. 1-3

Na̱ ndátu koo nu̱ú ñuʼú yóʼo, kúsi̱í-inina ku̱a̱ʼa̱nna kotona ña̱ koo ti̱xin Conmemoración. Saátu na̱ ndátu koo nu̱ú ñuʼú yóʼo ndákanixi̱nína xa̱ʼa̱ ña̱ ndátuna ndakiʼinna chí nu̱únínu. Ta saátu kúsi̱íní-inina tá xíniso̱ʼona discurso ña̱ táxina ti̱xin Conmemoración, saáchi ña̱ discurso yóʼo káʼa̱nña xa̱ʼa̱ ña̱ keʼé ta̱ Cristo ta saátu na̱ 144,000 xa̱ʼa̱ na̱ yiví tá ná kaʼndachíñuna ti̱xin ña̱ mil ku̱i̱ya̱. Ta̱ Jesús kúú ta̱ kuniʼi yichi̱ nu̱ú na̱ 144,000 ña̱ va̱ʼa ndasalivina nu̱ú ñuʼú yóʼo, ta saátu ña̱ va̱ʼa chindeétáʼanna xíʼin na̱ yiví ña̱ va̱ása kuumiíkana ku̱a̱chi. Na̱ ndátu koo nu̱ú ñuʼú yóʼo kúsi̱íní-inina tá ndákanixi̱nína xa̱ʼa̱ ki̱vi̱ ña̱ xi̱nu profecía ña̱ va̱xi nu̱ú Isaías 35:5, 6; 65:21-23 xíʼin Apocalipsis 21:3, 4. Tá ndákanixi̱nína ña̱ xa̱a̱ ndóona nu̱ú ñuʼú livi xíʼin na̱ veʼena, saá kúú ña̱ kándíxaníkana ña̱ saxínu Jehová ña̱ káʼa̱nra keʼéra xa̱ʼa̱na, ta saátu chíka̱a̱-inina ña̱ ndakundeéna kachíñuna nu̱úra (Mat. 24:13; Gál. 6:9). w22.01 21 párr. 5-7

¿Ndáaña kúni̱ kachi ña̱ ndacháʼvina xa̱ʼa̱yó? Nu̱ú ña̱ Escrituras Griegas, káʼa̱nña ña̱ ni̱xi̱ʼi̱ ta̱ Jesús ña̱ va̱ʼa chaʼvira xa̱ʼa̱ ña̱ sa̱ndíʼi-xa̱ʼa̱ ta̱ Adán (1 Cor. 15:22). ¿Nda̱chun xi̱niñúʼu ndacháʼvira xa̱ʼa̱ ña̱yóʼo? Saáchi ley Jehová xi̱ka̱ʼa̱nña ña̱ táki̱ʼva íyo mií ña̱ ndi̱ʼi̱-xa̱ʼa̱ saá koo ña̱ chaʼvina (Éx. 21:23, 24). Ta̱ Adán su̱ví na̱ yiví ku̱a̱chi níxi̱kuura, soo sa̱ndíʼi-xa̱ʼa̱ra ña̱yóʼo tá i̱xaso̱ʼora. Ña̱kán ña̱ va̱ʼa xi̱nu ña̱ xi̱ka̱ʼa̱n ley, ta̱ Jesús xi̱niñúʼu chaʼvira xa̱ʼa̱ ña̱ sa̱ndíʼi-xa̱ʼa̱ ta̱ Adán (Rom. 5:17). Tasaá ni̱xa̱a̱ra ndu̱ura iin “yivá ta̱ íyo ndiʼi tiempo” nu̱ú ndiʼi na̱ kándíxa ña̱ ni̱xi̱ʼi̱ra (Is. 9:6; Rom. 3:23, 24). Ta̱ Jesús ka̱ndíxara kuvira xa̱ʼa̱yó, saáchi kúʼvi̱ní-inira xínira yivára ta saátu kúʼvi̱ní-inira xínira miíyó (Juan 14:31; 15:13). Ta ña̱yóʼo chi̱ndeétáʼan xíʼinra ña̱ ke̱ʼéra ña̱ kúni̱ yivára ta nda̱kú ni̱xi̱yo inira xíʼinra nda̱a̱ tá ni̱xi̱ʼi̱ra. Ta tíxa̱ʼvi ña̱ ke̱ʼéra kivi xi̱nu ña̱ xi̱kuni̱ Jehová koo nu̱ú ñuʼú yóʼo tá xa̱ʼa̱. w21.04 14 párr. 2, 3