Abril

Ta̱ Jesús ni̱na̱ʼa̱ra ña̱ kúʼvi̱-inira xínira miíyó saáchi ni̱xi̱ʼi̱ra xa̱ʼa̱yó (Juan 15:13). Ña̱ nda̱a̱ kúúña va̱ása kuchiñuvíyó chaʼviyó Jehová xíʼin ta̱ Jesús xa̱ʼa̱ ndiʼi ña̱ xa̱a̱ kéʼéna xa̱ʼa̱yó, soo kiviva na̱ʼa̱yó ña̱ táxiyó tíxa̱ʼvi ndaʼa̱na tá ná chika̱a̱yó ndee̱ ña̱ vií koo ndiʼi ña̱ kéʼéyó (Col. 3:15). Na̱ ku̱ʼu̱n chí ndiví, chíndayáʼvinína ña̱ nda̱chaʼvi Jehová xa̱ʼa̱na saáchi xa̱ʼa̱ ña̱yóʼo kivi ku̱ʼu̱nna koona chí ndiví (Mat. 20:28). Ta saátu xa̱ʼa̱ ña̱ kándíxana ña̱ ni̱xi̱ʼi̱ ta̱ Cristo, ni̱xa̱a̱na ndu̱una na̱ yiví na̱ nda̱kú-ini nu̱ú Ndióxi̱ ta ndu̱una se̱ʼera (Rom. 5:1; 8:15-17, 23). Ta saátu na̱ ndátu koo nu̱ú ñuʼú yóʼo chíndayáʼvinína ña̱ nda̱chaʼvi Jehová xa̱ʼa̱na, saáchi tíxa̱ʼvi ña̱ ni̱xa̱a̱na ka̱ndíxana ña̱ ni̱xi̱ʼi̱ ta̱ Cristo xa̱ʼa̱na, kíndo̱o-ini Jehová xíʼin ña̱ kéʼéna, va̱ʼa káchíñuna nu̱úra ta saátu kivi ka̱kuna ti̱xin ña̱ gran tribulación (Apoc. 7:13-15). Tá xáʼa̱n na̱ ku̱ʼu̱n chí ndiví xíʼin na̱ ndátu koo nu̱ú ñuʼú yóʼo Conmemoración, saá náʼa̱na ña̱ táxina tíxa̱ʼvi xa̱ʼa̱ ña̱ nda̱chaʼvi Jehová xa̱ʼa̱na. w22.01 23 párr. 14, 15

Ta̱ Jesús va̱ása ní kusuchí-inira xa̱ʼa̱ ki̱ʼva ña̱ xa̱ʼnínara, chi ña̱ ku̱suchíka-inira xa̱ʼa̱ kúú ña̱ vatá ña̱ ni̱ka̱ʼa̱nna xa̱ʼa̱ra. Chi chi̱ka̱a̱na ku̱a̱chira ña̱ va̱ása ní ixato̱ʼóra ki̱vi̱ Ndióxi̱ (Mat. 26:64-66). Ta̱ Jesús ni̱ndi̱ʼi̱ní-inira xa̱ʼa̱ ña̱ chi̱ka̱a̱na ku̱a̱chira ña̱ va̱ása ní ixato̱ʼóra ki̱vi̱ Ndióxi̱, ña̱kán xi̱kuni̱ra ña̱ ná ndatavá yivárara nu̱ú ña̱ tu̱ndóʼo yóʼo (Mat. 26:38, 39, 42). Ta̱ Jesús xi̱niñúʼu kuvira ndaʼa̱ iin yitu̱n ña̱ va̱ʼa ndatavára na̱ judío ndaʼa̱ iin chiʼña ña̱ nda̱kiʼinna (Gál. 3:10). Nda̱kiʼinna chiʼña yóʼo saáchi ki̱ndoona ña̱ kuniso̱ʼona ley Ndióxi̱, soo va̱ása níxindiku̱nna ña̱yóʼo. Ta xi̱kuuna na̱ yiví ku̱a̱chi xa̱ʼa̱ ña̱ ke̱ʼé ta̱ Adán (Rom. 5:12). Ley ña̱ ta̱xi Ndióxi̱ xi̱ka̱ʼa̱nña, ña̱ tá iin na̱ yiví ni̱ki̱ʼvina iin ku̱a̱chi ndeé xi̱niñúʼu kuvina xa̱ʼa̱ ña̱yóʼo, ta savana xi̱katikaanana ndaʼa̱ iin yitu̱n (Deut. 21:22, 23; 27:26). Ña̱kán tá ka̱tikaana ta̱ Jesús ndaʼa̱ yitu̱n ta ni̱xi̱ʼi̱ra, ta̱yóʼo nda̱tavára na̱ judío ndaʼa̱ chiʼña ña̱ nda̱kiʼinna, tasaá ndakiʼinna ku̱a̱ʼá ña̱ va̱ʼa. w21.04 16 párr. 5, 6

Ná ndakanixi̱níyó xa̱ʼa̱ ña̱ ndo̱ʼo ta̱ Jesús tá kúma̱níka kuvira. Ta̱xira ña̱ ná tiin na̱ soldado ñuu Roma miíra, ta saátu ta̱xira ña̱ ka̱ninara (Mat. 26:52-54; Juan 18:3; 19:1). Ta nda̱a̱ ni̱nda̱tá sa̱tára xa̱ʼa̱ ña̱ ndeéní ka̱ninara xíʼin yoʼo̱, tasaá káa sa̱tára ta i̱xandúxana xíʼinra ña̱ kuisora iin yitu̱n. Ta̱ Jesús ki̱xáʼara ndísora túyóʼo ku̱a̱ʼa̱nra. Soo na̱ soldado ñuu Roma i̱xandúxana xíʼin iin ta̱ ta̱a ña̱ kuisora túyóʼo xíʼin ta̱ Jesús (Mat. 27:32). Tá xa̱a̱ ni̱xa̱a̱ ta̱ Jesús lugar nu̱ú kuvira, na̱ soldado ka̱anna ndaʼa̱ra xíʼin xa̱ʼa̱ra ta ka̱tikaanara ndaʼa̱ tú yitu̱n kán. Xa̱ʼa̱ ña̱ ve̱era, ndeéka nda̱ndika̱ nu̱ú ka̱anna ndaʼa̱ra xíʼin xa̱ʼa̱ra. Ta na̱ migora xíʼin siʼíra ku̱suchíkaví-inina ta xa̱kuna, soo na̱ xi̱niʼi yichi̱ nu̱ú na̱ judío ku̱sikindaanara (Luc. 23:32-38; Juan 19:25). Ku̱a̱ʼání hora ni̱xo̱ʼvi̱ ta̱ Jesús, ta xa̱ʼa̱ ña̱ ku̱naáníra i̱xayo̱ʼviníña xíʼinra ndakiʼinra ta̱chíra. Ta̱yóʼo xi̱kunda̱a̱va-inira ña̱ nda̱kú ni̱xi̱yó inira xíʼin Jehová, ña̱kán ndáa si̱ín yichi̱ ni̱ka̱ʼa̱nra xíʼinra. Tándi̱ʼi, nda̱kundee xi̱níra á na̱kundayi xi̱níra tasaá ni̱xi̱ʼi̱ra, ta̱yóʼo ni̱xo̱ʼvi̱níra (Mar. 15:37; Luc. 23:46; Juan 10:17, 18; 19:30). w21.04 16 párr. 4

Ta Jesús ni̱ka̱ʼa̱nra xíʼin na̱ u̱xu̱ iin apóstolra ña̱ ná kǒo sandákoona keʼéna ña̱yóʼo. Ta ni̱ka̱ʼa̱nra xa̱ʼa̱ u̱vi̱ trato xíʼinna: iinña kúú trato xa̱á, ta inkaña kúú trato xa̱ʼa̱ Reino Ndióxi̱ (Luc. 22:20, 28-30). Ta xa̱ʼa̱ ña̱ ke̱ʼéra trato yóʼo xíʼinna, miína xíʼin inkaka na̱ cristiano va̱ʼa ni̱xa̱a̱na ku̱una rey xíʼinra chí ndiví, ta ku̱utuna su̱tu̱ (Apoc. 5:10; 14:1). Ta saátu na̱ nda̱kaxin Ndióxi̱ na̱ ndóo tiempo vitin ke̱ʼéra trato yóʼo xíʼinna, ña̱kán va̱ʼa xíxina si̱táva̱ʼa ta xíʼina tá vino tá xáʼa̱nna Conmemoración. Liviní ña̱ taxi Jehová ndaʼa̱na: na̱yóʼo va̱ása kuvikana ta koona chí ndiví, ta saátu inkáchi kachíñuna xíʼin ta̱ Jesucristo ta saátu xíʼin inkaka na̱ 144,000. Ta mií ña̱ ndáyáʼvi va̱ʼaka kúú ña̱ koona yatin xíʼin Jehová (1 Cor. 15:51-53; 1 Juan 3:2). Soo ña̱ va̱ʼa ndakiʼinna ña̱yóʼo, xíniñúʼu nda̱kú koo inina xíʼinra nda̱a̱ ná kuvina (2 Tim. 4:7, 8). w22.01 20, 21 párr. 4, 5

Yatin sii̱n ta̱ Jesús ka̱tikaana u̱vi̱ na̱ kui̱ʼná (Luc. 23:40, 41). Ta iin ta̱yóʼo ni̱ka̱ʼa̱nra: “Jesús, ndakaʼún xa̱ʼíi̱ tá ná kaʼndachíñún” (Luc. 23:42). Ta̱ Jesús xi̱kunda̱a̱-inira ña̱ kúndáʼviní-ini yivára xínira na̱ yiví, ña̱kán ni̱ka̱ʼa̱nra ña̱ tu̱ʼun yóʼo xíʼin ta̱ kui̱ʼná kán tá kúma̱níka kuvira (Sal. 103:8; Heb. 1:3). Jehová kúni̱ra ixakáʼnu-inira xa̱ʼa̱yó tá ndándikó-iniyó xa̱ʼa̱ ña̱ʼa ña̱ va̱ása va̱ʼa ke̱ʼéyó tá ya̱chi̱ ta kándíxayó se̱ʼera ta̱ Jesucristo (1 Juan 1:7). Soo, ¿ndáaña xíniñúʼu keʼéyó tá íxayo̱ʼvi̱ña xíʼinyó kandíxayó ña̱ íxakáʼnu-ini Jehová xa̱ʼa̱ ku̱a̱chi ña̱ ni̱ki̱ʼviyó tá ya̱chi̱? Ná ndakanixi̱níyó xa̱ʼa̱ ña̱yóʼo: tá kúma̱ní kuvi ta̱ Jesús ni̱na̱ʼa̱ra ña̱ ku̱ndáʼvi-inira xi̱nira iin ta̱ kui̱ʼná ta̱ sa̱kán ki̱xáʼa kándíxañaʼá. Tá saá, ¿á va̱ása ixakáʼnu-ini Jehová xa̱ʼa̱ na̱ káchíñu nu̱úra na̱ chíka̱a̱ní ndee̱ ña̱ kandíxana ña̱ káʼa̱nra? (Sal. 51:1; 1 Juan 2:1, 2). w21.04 9 párr. 5, 6

Tá xa̱a̱ ku̱nu̱mí kuvi ta̱ Jesús, ku̱ndaa̱-inira ña̱ ke̱ʼéra ndiʼi ña̱ xi̱kuni̱ Jehová ná keʼéra. ¿Ndáaña ni̱na̱ʼa̱ra xa̱ʼa̱ ña̱ nda̱kú ni̱xi̱yo inira nda̱a̱ tá ni̱xi̱ʼi̱ra? Ña̱ nu̱ú, ni̱na̱ʼa̱ra ña̱ iin ta̱ vatá kúú ta̱ Ndi̱va̱ʼa, saáchi ta̱ Jesús ni̱na̱ʼa̱ra ña̱ iin na̱ yiví na̱ kǒo ku̱a̱chi kúúmií kiviva nda̱kú koo inina xíʼin Ndióxi̱ ni nda̱a̱ ndáaka ña̱ ná keʼé ta̱ Ndi̱va̱ʼa xíʼinna. Ña̱ u̱vi̱, tíxa̱ʼvi ña̱ ni̱xi̱ʼi̱ra xa̱ʼa̱ miíyó na̱ yiví ku̱a̱chi, kivi xa̱a̱yó ndakutáʼan viíyó xíʼin Ndióxi̱ ta saátu ni̱ʼíyó ña̱ kutakuyó ndiʼi tiempo. Ta ña̱ u̱ni̱, ta̱ Jesús ni̱na̱ʼa̱ra ña̱ iinlá Jehová kúú ta̱ xíniñúʼu kaʼndachíñu ta nda̱sayi̱i̱ra ki̱vi̱ yivára. Ndiʼi ki̱vi̱ ná na̱ʼa̱yó ña̱ nda̱kú íyo iniyó xíʼin Ndióxi̱. Tasaá ni tá ná kuviyó kivi ka̱ʼa̱nyó ña̱yóʼo xíʼin Jehová: “Chi̱ka̱a̱níi̱ ndee̱ ña̱ nda̱kú koo inii̱ xíʼún ta ni̱na̱ʼi̱ ña̱ iin ta̱ vatá kúú ta̱ Ndi̱va̱ʼa, ta saátu nda̱sakáʼnui̱ ki̱vi̱ún ta ni̱na̱ʼi̱ ña̱ iinlá miíún kúúmií derecho ña̱ kaʼndachíñún”. w21.04 12 párr. 13, 14

Na̱ sáa̱-ini xíni ta̱ Jesús ni̱ka̱ʼa̱nna ña̱ vatá xa̱ʼa̱ra, ta ni̱ka̱ʼa̱nna ña̱ kaʼnínara xa̱ʼa̱ iin ku̱a̱chi ña̱ va̱ása níkeʼéra, ta ku̱sikindaanara, i̱xandi̱va̱ʼana xíʼinra ta ka̱tikaanara ndaʼa̱ iin yitu̱n. Tá tíkaara ndaʼa̱ yitu̱n i̱xayo̱ʼvi̱níña xíʼinra ña̱ ndakiʼinra ta̱chíra ta saátu ña̱ ka̱ʼa̱nra, soo va̱ása nísasi ña̱yóʼo nu̱úra ña̱ ka̱ʼa̱nra iin ña̱ ndáyáʼviní. Íyo ña̱ ndáyáʼviní sákuaʼayó xíʼin tu̱ʼun ña̱ ni̱ka̱ʼa̱n ta̱ Jesús tá kúma̱ní kuvira. Sándakaʼánña miíyó ña̱ xíniñúʼu koo káʼnu-iniyó xa̱ʼa̱ inkana ta kandíxayó ña̱ koo káʼnu-ini Jehová xa̱ʼa̱ miíyó. Saátu iin ña̱ va̱ʼaní kúú ña̱ kúúyó táʼan na̱ ñuu Ndióxi̱ chi na̱yóʼo va̱ʼaní chíndeétáʼanna xíʼinyó. Soo tá xíniñúʼuyó ña̱ chindeétáʼanna xíʼinyó ná ka̱ʼa̱nyó xíʼinna. Kúnda̱a̱-iniyó ña̱ mií Jehová chindeétáʼan xíʼinyó ña̱ ya̱ʼayó nu̱ú nda̱a̱ ndáaka tu̱ndóʼo. Ta saátu kúnda̱a̱-iniyó ña̱ ndáyáʼviní na̱ʼa̱yó ndiʼi ki̱vi̱ ña̱ nda̱kú-íyo iniyó xíʼin Ndióxi̱, ta kándíxayó ña̱ sandátakuvara miíyó tá ná kuviyó. w21.04 8 párr. 1; 13 párr. 17

Tá ná kundiku̱nyó yichi̱ ta̱ Jesús ndakiʼinyó ña̱ kutakuyó ndiʼi tiempo. Tá ni̱nda̱ka̱tu̱ʼun iin ta̱ loʼo ku̱i̱ká ta̱ Jesús ndáaña xíniñúʼu keʼéra ña̱ va̱ʼa ndakiʼinra ña̱ kutakura ndiʼi tiempo, ta̱ Jesús ni̱ka̱ʼa̱nra xíʼinra: “Kixiún ta kundikún yi̱ʼi̱” (Mat. 19:16-21). Ta̱ Jesús ni̱ka̱ʼa̱nra xíʼin sava na̱ judío na̱ va̱ása níkandíxa ña̱ kúúra ta̱ Cristo: “Tí kúú ndikachi sa̱na̱i̱ [...] ndíku̱nrí yi̱ʼi̱. Yi̱ʼi̱ taxii̱ kutakurí ndiʼi tiempo” (Juan 10:24-29). Náʼa̱yó ña̱ kándíxayó ta̱ Jesús tá kéʼéyó ña̱ ni̱ka̱ʼa̱nra ta saátu ña̱ ke̱ʼéra. Ta tá ná keʼéyó ña̱yóʼo va̱ása sandákooyó yichi̱ ña̱ taxi kutakuyó ndiʼi tiempo (Mat. 7:14). Ña̱ va̱ʼa vií kundiku̱nyó yichi̱ ta̱ Jesús, siʼna xíniñúʼu kuxini̱yóra. Ña̱ va̱ʼa xa̱a̱yó kuxini̱yóra xíniñúʼu sakuaʼayó xa̱ʼa̱ra ndiʼi tiempo. Tá kúú ndáa ña̱ va̱ʼa kúúmiíra, ndáa ki̱ʼva ndákanixi̱níra ta ndáaña kúni̱ra ná keʼéyó. Ni loʼo á ku̱a̱ʼá tiempo kúú ña̱ ñúʼuyó ti̱xin ñuu Ndióxi̱, ndiʼiyó xíniñúʼu chika̱a̱yó ndee̱ ña̱ kuxini̱yó Jehová xíʼin se̱ʼera. w21.04 4 párr. 9, 10

Sana va̱ása va̱ʼa níxi̱kuni ta̱ apóstol Pablo tá xi̱ndakaʼánra xa̱ʼa̱ ña̱ va̱ása va̱ʼa ke̱ʼéra tá kúma̱ní xa̱a̱ra koora discípulo ta̱ Jesús. Ña̱kán ni̱ka̱ʼa̱nra ña̱ kúúmiíníkara ku̱a̱chi nu̱ú inkana (1 Tim. 1:15). Saáchi tá kúma̱ní sákuaʼara xa̱ʼa̱ ña̱ nda̱a̱ xi̱ ixandi̱va̱ʼaníra xíʼin na̱ cristiano nda̱a̱ ta̱ánra sava na̱yóʼo ti̱xin veʼeka̱a ta chi̱ndeétáʼanra xíʼin inkana ña̱ kaʼnína na̱yóʼo (Hech. 26:10, 11). Ná ndakanixi̱níyó ña̱ xi̱nitáʼanra xíʼin iin se̱ʼe na̱ ni̱xi̱ʼi̱ yóʼo, ¿ndáaña xi̱ndoʼo ta̱ Pablo tá xi̱kuu ña̱yóʼo? Xi̱ndandikóní-inira xa̱ʼa̱ ña̱ ke̱ʼéra tá ya̱chi̱, soo xi̱kunda̱a̱va-inira ña̱ va̱ása kivi nasamara ña̱ xa̱a̱ ke̱ʼéra. Soo xi̱kandíxara ña̱ ni̱xi̱ʼi̱ ta̱ Cristo xa̱ʼa̱ra ña̱kán ka̱ʼyíra ña̱yóʼo: “Xa̱ʼa̱ ña̱ va̱ʼa-ini Ndióxi̱ xíʼi̱n kúi̱ iin apóstol” (1 Cor. 15:3, 10). ¿Ndáaña sákuaʼayó xíʼin ña̱yóʼo? Xíniñúʼu kandíxayó ña̱ ni̱xi̱ʼi̱ ta̱ Cristo xa̱ʼa̱ iin tá iinyó, ta tíxa̱ʼvi ña̱yóʼo kivi kitáʼanyó xíʼin Jehová (Hech. 3:19). Ña̱ kíʼin Ndióxi̱ kuenta xíʼin kúú ña̱ kéʼéyó vitin ta saátu ña̱ keʼéyó chí nu̱únínu, ta va̱ása kíʼinra kuenta xíʼin ña̱ va̱ása va̱ʼa ke̱ʼéyó tá ya̱chi̱ ni xi̱kuuyó testigo Jehová á va̱ása (Is. 1:18). w21.04 23 párr. 11

Ku̱a̱ʼání na̱ judío xi̱ndakanixi̱nína ña̱ va̱ása kuvi ta̱ Mesías, soo ná kotoyó ndáaña xi̱ka̱ʼa̱n profecía xa̱ʼa̱ra: “Ta̱yóʼo kúú ta̱ ni̱xi̱ʼi̱ xa̱ʼa̱na, ta iin ta̱ ku̱a̱chi ni̱xi̱yora nu̱úna; sa̱ndíʼi-xa̱ʼa̱ra ku̱a̱chi ku̱a̱ʼánína ta ni̱ka̱ʼa̱nra xíʼin Ndióxi̱ xa̱ʼa̱ ndiʼi na̱ yiví ku̱a̱chi” (Is. 53:12). Ña̱kán, tá xa̱ʼnína ta̱ Jesús va̱ása níxiniñúʼu kaka-ini na̱ judío xa̱ʼa̱ra. Soo tá ná nandukúyó xa̱ʼa̱ ndiʼi ña̱ʼa va̱ása kaka iniyó. Tá na̱túʼun ta̱ Jesús xíʼin na̱ yiví chí yuku̱, ni̱ka̱ʼa̱nra ña̱ sava na̱ yiví ka̱ʼa̱nna ku̱a̱ʼání ña̱ vatá xa̱ʼa̱ na̱ discípulora (Mat. 5:11). Ta̱ Ndi̱va̱ʼa kúú ta̱ káʼa̱n ndiʼi ña̱ vatá yóʼo. Saáchi chíka̱a̱ra-ini na̱ yiví na̱ sáa̱-ini xíni miíyó ña̱ ka̱ʼa̱nna ña̱ vatá xa̱ʼa̱yó (Apoc. 12:9, 10). Va̱ása kuniso̱ʼún ña̱ vatá yóʼo ta ni va̱ása taxiún ña̱ sayíʼvina yóʼó, va̱ʼaka ndakundeún kandíxaún Ndióxi̱. w21.05 11 párr. 14; 12 párr. 16

Ná chindeétáʼanyó xíʼin na̱ káʼviyó xíʼin ña̱ kandíxana Jehová. Ta̱ Jesús ni̱ka̱ʼa̱nra xíʼin na̱ discípulora ña̱ mií Jehová chindeétáʼan xíʼinna xa̱ʼa̱ ña̱ kúʼvi̱ní-inira xínirana (Mat. 10:19, 20, 29, 30). Ná sandákaʼányó na̱ káʼviyó xíʼin ña̱ chindeétáʼantu Jehová xíʼin na̱yóʼova. Ná sánáʼa̱yóna ña̱ ka̱ʼa̱nna xíʼin Jehová xa̱ʼa̱ ña̱ kúni̱na keʼéna. Ta̱ Franciszek ta̱ íyo chí Polonia káchira: “Tá xi̱keʼé ta̱ xi̱kaʼvi xíʼi̱n oración, ndiʼi tiempo xi̱ka̱ʼa̱nra xa̱ʼa̱ ña̱ xi̱kuni̱i̱ keʼíi̱, ta tá xi̱kiʼi̱n kuenta ña̱ xi̱ndakuiin Jehová oración ña̱ xi̱keʼéra, saátu yi̱ʼi̱ ndi̱ku̱n ki̱xáʼíi̱ kéʼíi̱ oración. Ta saátu xi̱kiʼi̱n kuenta ndáa ki̱ʼva xi̱chindeétáʼan Jehová xíʼi̱n, tá xi̱ndukúi̱ permiso nu̱ú xi̱kachíñui̱ ña̱ va̱ʼa ku̱ʼi̱n asamblea á reunión”. Ndíʼi̱níva-ini Jehová xa̱ʼa̱ na̱ sa̱kán sákuaʼa xa̱ʼa̱ Biblia. Saátu chíndayáʼviníra chiñu ña̱ kéʼéyó ña̱ chíndeétáʼanyó xíʼinna ña̱ va̱ʼa kuyatinna nu̱úra. Ta kúʼvi̱ní-inira xínira miíyó xa̱ʼa̱ ña̱ kéʼéyó ña̱yóʼo (Is. 52:7). Soo tá kǒo nda̱a̱ ni iin na̱ yiví káʼviyó xíʼin xa̱ʼa̱ Ndióxi̱. ¿Á kivi chindeétáʼanyó xíʼin na̱ yiví ña̱ xa̱a̱na ndakuchina? Kiviva keʼéyóña tá ku̱a̱ʼa̱nyó xíʼin na̱ hermano ña̱ kaʼvina xíʼin na̱ yiví. w21.06 7 párr. 17, 18

Tá ná kaʼviyó tu̱ʼun Ndióxi̱ ndiʼi ki̱vi̱, saá na̱ʼa̱yó ña̱ ndáyáʼviña nu̱úyó. Su̱ví iin sana kuití xíniñúʼu kaʼviyó Biblia, á tá íyo kuití tiempo nu̱úyó, saáchi xíniñúʼu chika̱a̱níyó ndee̱ ña̱ taváyó tiempo kaʼviyóña ta ndakanixi̱níyó xa̱ʼa̱ña. Ta ña̱yóʼo chindeétáʼanña xíʼinyó kandíxakayó Ndióxi̱. Síínva íyo miíyó nu̱ú na̱ ndíchi á na̱ ka̱ʼvi va̱ʼa, saáchi miíyó kándíxayó Ndióxi̱ chi káʼviyó tu̱ʼunra (Mat. 11:25, 26). Ta xa̱ʼa̱ ña̱ káʼviyó ña̱yóʼo kúnda̱a̱-iniyó nda̱chun kininíka ku̱a̱ʼa̱n ndúu nu̱ú ñuʼú yóʼo, ta ndáaña keʼé Ndióxi̱ xíʼin ndiʼi ña̱ va̱ása va̱ʼa. Ña̱kán ná chika̱a̱-iniyó kandíxakayó Ndióxi̱. Ta ná chindeétáʼanyó xíʼin ku̱a̱ʼáka na̱ yiví ña̱ xa̱a̱na kandíxana ta̱ i̱xava̱ʼa ndiʼi ña̱ʼa (1 Tim. 2:3, 4). Ná kundatuyó kixaa̱ ki̱vi̱ ña̱ ndasakáʼnu ndiʼi na̱ kundoo nu̱ú ñuʼú yóʼo Jehová, ta ka̱ʼa̱nna tu̱ʼun ña̱ va̱xi nu̱ú Apocalipsis 4:11: “Jehová Ndióxi̱ miíndi̱, yóʼó kúú ta̱ xíniñúʼu ndukáʼnu, saáchi miíún kúú ta̱ i̱xava̱ʼa ndiʼi ña̱ʼa”. w21.08 19 párr. 18-20

Na̱ anciano kúú na̱ xíniñúʼu taxi consejo ndaʼa̱ na̱ hermano chi na̱yóʼo kúú na̱ níʼi yichi̱ nu̱úna. Ta xíniñúʼu chika̱a̱na ndee̱ ña̱ viíní koo consejo ña̱ taxina ndaʼa̱ na̱ hermana ña̱ va̱ʼa chika̱a̱ña ndee̱ xíʼinna ta sakúsi̱íña-inina (Prov. 27:9). Na̱ anciano kúʼvi̱ní-inina xínina na̱ hermano. Ta xa̱ʼa̱ ña̱yóʼo táxina consejo ndaʼa̱na tá xítona ña̱ ki̱xáʼana kéʼéna ña̱ va̱ása va̱ʼa (Gál. 6:1). Soo tá kúni̱ iin na̱ anciano taxina consejo ndaʼa̱ iin na̱ hermano, xíniñúʼu ndakanixi̱nína xa̱ʼa̱ ña̱ ni̱ka̱ʼa̱n ta̱ apóstol Pablo, tá ka̱chira: “Iin na̱ kúʼvi̱-ini xíni inkana va̱ása kamaní-inina ta va̱ʼaní-inina. […] Ndiʼiña kúndeé-inina xíʼin, ndiʼiña kándíxana, ndiʼiña ndátuna, ndiʼiña íxandakú-inina xíʼin” (1 Cor. 13:4, 7). Tá ná ndakanixi̱ní na̱ anciano xa̱ʼa̱ versículo yóʼo, va̱ʼaní chindeétáʼanña xíʼinna ña̱ kunda̱a̱-inina á xa̱ʼa̱ ña̱ kúʼvi̱-inina xínina na̱ hermano kúú ña̱ táxina consejo ndaʼa̱na, tasaá viíní taxinaña ndaʼa̱na. Tá ná kiʼin na̱ hermano kuenta ña̱ ndíʼi̱-ini na̱ anciano xa̱ʼa̱na, sana va̱ása ixayo̱ʼvi̱víña xíʼinna kundiku̱nna consejo ña̱ táxina ndaʼa̱na. w22.02 14 párr. 3; 15 párr. 5

Va̱ʼaní i̱xava̱ʼa Jehová na̱ ángel ta saátu na̱ yiví. Soo iin ta̱ ángel ta̱ naní Satanás (ña̱ kúni̱ kachi ta̱ kúú contra Ndióxi̱) sa̱ndáʼvira ta̱ Adán xíʼin ñá Eva ña̱ ná koona contra xíʼin Jehová, ta na̱yóʼo su̱ví na̱ yiví ku̱a̱chi níxi̱kuuna. Ta saátu ni̱xi̱yo inka na̱ ángel xíʼin inkaka na̱ yiví na̱ ni̱xa̱a̱ ndu̱u contra xíʼin Jehová (Jud. 6). Ña̱kán ku̱suchíní-ini Jehová xa̱ʼa̱ ña̱yóʼo. Soo kúndeé-inira ta ndátura nda̱a̱ ná kixaa̱ ki̱vi̱ ña̱ sandíʼi-xa̱ʼa̱ra na̱ íyo contra xíʼinra. Ta tá ná kixaa̱ ki̱vi̱ yóʼo, va̱ʼaní kuni na̱ káchíñu nu̱úra chi saátu na̱yóʼo kúndeé-inina nu̱ú ña̱ va̱ása va̱ʼa íyo ñuyǐví yóʼo. Tá ni̱ka̱ʼa̱n ta̱ Ndi̱va̱ʼa ña̱ vatá xa̱ʼa̱ ta̱ Job, xi̱kuni̱ kachira ña̱ ndiʼi na̱ ndásakáʼnu Ndióxi̱, ndásakáʼnunara xa̱ʼa̱ ña̱ʼa ña̱ táxi kuitíra ndaʼa̱na (Job 1:8-11; 2:3-5). Ta nda̱a̱ tiempo vitin ndákundeé ta̱ Ndi̱va̱ʼa káʼa̱nra ña̱ vatá yóʼo (Apoc. 12:10). Ta kiviva na̱ʼa̱yó ña̱ iin ta̱ vatá kúú ta̱ Ndi̱va̱ʼa tá ná kundeé-iniyó xíʼin tu̱ndóʼo, ta nda̱kú koo-iniyó xíʼin Jehová xa̱ʼa̱ ña̱ kúʼvi̱-iniyó xíniyóra. w21.07 9 párr. 7, 8

Ta̱ apóstol Pablo ni̱ka̱ʼa̱nra xa̱ʼa̱ iin ejemplo ña̱ va̱ʼa chindeétáʼanra xíʼinyó kunda̱a̱-iniyó nda̱chun ndáyáʼviní nasamayó ki̱ʼva ña̱ íyoyó. Ni̱ka̱ʼa̱nra ña̱ xíniñúʼu katikaayó ki̱ʼva ña̱ ni̱xi̱yoyó tá ya̱chi̱ ndaʼa̱ yitu̱n (Rom. 6:6, nota). Ta̱ Jesús chi̱kaa̱-inira ña̱ katikaanara ndaʼa̱ yitu̱n, saáchi xi̱kuni̱ra sakúsi̱íra-ini Jehová. Ta ki̱ʼva saá xíniñúʼu keʼéyó tá kúni̱yó sakúsi̱íyó-ini Jehová, xíniñúʼu chika̱a̱-iniyó sandákooyó keʼéyó ña̱ va̱ása va̱ʼa ña̱ kúndasíra xínira. Tásaá ná keʼéyó, kǒoka ña̱ sandíʼi̱-iniyó ta ni̱ʼíyó ña̱ kutakuyó ndiʼi tiempo (Juan 17:3; 1 Ped. 3:21). Ná ndakaʼányó chi va̱ása nasamaví Jehová ña̱ va̱xi nu̱ú tu̱ʼunra ña̱ va̱ʼa sakúsi̱í kuitíra iniyó. Chi miívayó kúú na̱ xíniñúʼu nasama ña̱ kéʼéyó ña̱ va̱ʼa kundiku̱nyó ña̱ káʼa̱nra (Is. 1:17-18; 55:9). Ni ná xa̱ún ndakuchiún, xíniñúʼu chika̱ún ndee̱ ña̱ kǒo keʼún ña̱ va̱ása va̱ʼa. Va̱ása kundaa-iniún miíún, ka̱ʼa̱n xíʼin Jehová ná chindeétáʼanra xíʼún ta taxi ná chindeétáʼan espíritu santora xíʼún (Gál. 5:22; Filip. 4:6). Xíniñúʼu chika̱a̱níyó ndee̱ ña̱ va̱ása ndikó tukuyó keʼéyó ña̱ va̱ása va̱ʼa xi̱keʼéyó tá ya̱chi̱. w22.03 5, 6 párr. 15-17

Jehová káʼa̱nra taxira ña̱ kuxuyó, ti̱ko̱to̱yó xíʼin iin veʼe nu̱ú kooyó, tá siʼna chiñura ná kundi̱ʼi̱-iniyó xa̱ʼa̱ ta ixato̱ʼóyó ña̱ káʼa̱nra (Mat. 6:33). Ña̱kán ná va̱ása ndakanixi̱níyó ña̱ kivi kundaa ña̱ ku̱i̱ká miíyó á sakúsi̱íña-iniyó. Chi ña̱ sakúsi̱í-iniyó kúú ña̱ keʼéyó ña̱ kúni̱ Jehová (Filip. 4:6, 7). Ta ni kúúmiívayó xu̱ʼún ña̱ satáyó ku̱a̱ʼání ña̱ʼa, soo xíniñúʼu ndakanixi̱níyó á íyo tiempo nu̱úyó xíʼin ndee̱yó ña̱ kuniñúʼuyó ña̱yóʼo ta kundaayóña. Ná ndakanixi̱níyó xa̱ʼa̱ ña̱yóʼo: “¿Á kúʼvi̱ní-inii̱ xínii̱ ña̱ʼa ña̱ kúúmiíi̱?”. Jehová ta̱xira chiñu ndaʼa̱yó ti̱xin ñuura. Ña̱kán ná va̱ása taxiyó kasi nda̱a̱ ni iin ña̱ʼa nu̱úyó ña̱ kundi̱ʼi̱-iniyó xa̱ʼa̱ chiñu yóʼo. Va̱ása kúni̱yó keʼéyó táʼan ña̱ ke̱ʼé ta̱ loʼo ku̱i̱ká ta̱ ni̱xi̱yo tá tiempo ta̱ Jesús, saáchi va̱ása níxiinra kachíñura nu̱ú Jehová ta xa̱a̱ra koora se̱ʼera chí nu̱únínu. ¿Nda̱chun? Saáchi xi̱kuʼvi̱níka-inira xi̱xinira ña̱ ku̱i̱ká ña̱ xi̱kuumiíra (Mar. 10:17-22). w21.08 6 párr. 17

Tá ná kaʼviyó Biblia saá kúú ña̱ kunda̱a̱-iniyó ña̱ ku̱a̱ʼání ña̱ va̱ʼa kúúmií Jehová, ta ña̱yóʼo kúú ña̱ náʼa̱ra xíʼin ndiʼi ña̱ʼa ña̱ i̱xava̱ʼara. Ña̱yóʼo chindeétáʼanña xíʼinyó kunda̱a̱-iniyó ña̱ iin Ndióxi̱ ta̱ táku kúúra (Éx. 34:6, 7; Sal. 145:8, 9). Tá ná sakuaʼakayó xa̱ʼa̱ Jehová, saá xa̱a̱yó kandíxakayóra, kuʼvi̱-iniyó kuniyóra ta viíní kutáʼanyó xíʼinra. Tá ná natúʼunyó xíʼin na̱ yiví xa̱ʼa̱ Ndióxi̱. Ña̱yóʼo chindeétáʼanña xíʼinyó ña̱ xa̱a̱yó kandíxakayóra. Tá iin na̱ yiví ni̱nda̱ka̱tu̱ʼunna miíyó á ndixa íyo Ndióxi̱ ta va̱ása xíni̱yó ndáaña ndakuiinyó, ¿ndáaña keʼéyó? Ná nandukúyó xa̱ʼa̱ ña̱yóʼo nu̱ú tutu ña̱ tává na̱ ñuu Ndióxi̱, ta ná na̱ʼa̱yóña nu̱ú na̱ yiví kán. Ta saátu kivi ka̱ʼa̱nyó xíʼin iin na̱ hermano na̱ xa̱a̱ xíni̱ka ña̱ ná chindeétáʼanna xíʼinyó. w21.08 18 párr. 14, 15

Ña̱ va̱ʼa sakúsi̱íyó-ini Jehová, va̱ása xíniñúʼu sandákoovíyó ndiʼi ña̱ʼa ña̱ kúúmiíyó (Ecl. 5:19, 20). Soo tá va̱ása kúni̱yó keʼéyó ku̱a̱ʼáka chiñu nu̱ú Jehová xa̱ʼa̱ ña̱ va̱ása kúni̱yó sandákooyó sava ña̱ʼa ña̱ kútóoyó, kéʼéyó nda̱a̱ táki̱ʼva ke̱ʼé ta̱ ta̱a ta̱ ni̱ka̱ʼa̱n ta̱ Jesús xa̱ʼa̱. Chi ta̱yóʼo xi̱kuumiíra ku̱a̱ʼání ña̱ʼa soo na̱ndósó-inira xa̱ʼa̱ Ndióxi̱ (Luc. 12:16-21) Tá yáʼayó nu̱ú tu̱ndóʼo, káʼa̱nyó xíʼin Jehová ta viíní ndákanixi̱níyó ndáa ki̱ʼva ya̱ʼayó nu̱ú ña̱yóʼo (Prov. 3:21). Ku̱a̱ʼání ki̱ʼva táxi Jehová bendición ndaʼa̱yó. Ta kivi taxiyó tíxa̱ʼvi ndaʼa̱ra tá ná chika̱a̱yó ndee̱ ña̱ ndasakáʼnuyóra (Heb. 13:15). Tá kúú, kivi ndukúyó ki̱ʼva ña̱ keʼéyó ku̱a̱ʼáka chiñu nu̱úra. Tá ná keʼéyó ña̱yóʼo, ku̱a̱ʼáka bendición taxi Jehová ndaʼa̱yó. Ña̱kán, ndiʼi ki̱vi̱ ná ndukúyó ki̱ʼva ña̱ taxira bendición ndaʼa̱yó ta kuniyó ña̱ va̱ʼaní-inira. Tasaá kundiku̱nyó yichi̱ ta̱ Jesús, ta̱ ni̱ka̱ʼa̱n ña̱yóʼo: “Ña̱ xíxii̱ kúú ña̱ keʼíi̱ ña̱ kúni̱ mií ta̱ chi̱ndaʼá yi̱ʼi̱ ta saxínui̱ chiñura” (Juan 4:34). w21.08 30, 31 párr. 16-19

Ta̱ Ndi̱va̱ʼa kúni̱ra ña̱ ni̱nu ná kuniyó saáchi kúnda̱a̱-inira ña̱ xa̱a̱yó kooyó táki̱ʼva íyo miíra, tasaá va̱ása ni̱ʼíyó ña̱ kutakuyó ndiʼi tiempo. Ña̱kán ta̱ Pablo ni̱ka̱ʼa̱nra ña̱ “iin na̱ yiví na̱ ni̱nu kúni ndakiʼinna táʼan ña̱ ndakiʼin ta̱ Ndi̱va̱ʼa” (1 Tim. 3:6, 7). Ni loʼo á ku̱a̱ʼá tiempo káchíñuyó nu̱ú Jehová ndiʼivayó kivi kundoʼo ña̱yóʼo. Na̱ yiví na̱ ni̱nu kúni iinlá xa̱ʼa̱ miína ndíʼi̱-inina. Ta ta̱ Ndi̱va̱ʼa kúni̱ra ña̱ ná ndakanixi̱níyó xa̱ʼa̱ iinlá miíyó, ta va̱ása ndakanixi̱níyó xa̱ʼa̱ Jehová tá ya̱ʼayó nu̱ú tu̱ndóʼo. Tá kúú, ¿á xa̱a̱ chíka̱a̱na ku̱a̱chi miíyó xa̱ʼa̱ iin ña̱ʼa ña̱ va̱ása níkeʼéyó? ¿Á xa̱a̱ kéʼéna ña̱ va̱ása va̱ʼa xíʼinyó? Ta̱ Ndi̱va̱ʼa kusi̱íní-inira tá ná chika̱a̱yó ku̱a̱chi Jehová á ku̱a̱chi na̱ hermano xa̱ʼa̱ ña̱ ndóʼoyó. Ta saátu, kúni̱ra ña̱ ná ndakanixi̱níyó ña̱ va̱ʼaníka ndasaviíyó ña̱ ndóʼoyó tá ná keʼéyóña nda̱a̱ táki̱ʼva kúni̱ miíyó, nu̱úka ña̱ keʼéyóña nda̱a̱ táki̱ʼva káʼa̱n Jehová xíʼinyó nu̱ú tu̱ʼunra (Ecl. 7:16, 20). w21.06 15 párr. 4, 5

Jehová ta̱xira iin chiñu ña̱ ndáyáʼviní ndaʼa̱ ta̱ profeta Ageo. Sana chí Babilonia ni̱xi̱yo ta̱ profeta Ageo, ta nda̱ndikóra xíʼin inkaka na̱ judío chí Jerusalén tá ku̱i̱ya̱ 537. Tá ni̱ya̱ʼa loʼo tiempo ña̱ ni̱xa̱a̱na Jerusalén, ki̱xáʼana ndásava̱ʼana veʼe Jehová (Esd. 3:8, 10). Soo ki̱xáʼa na̱ yiví sásina nu̱úna, xa̱ʼa̱ ña̱yóʼo nda̱kava-inina ta va̱ása níkachíñukana (Esd. 4:4; Ageo 1:1, 2). Ña̱kán tá ku̱i̱ya̱ 520, Jehová ni̱ka̱ʼa̱nra xíʼin ta̱ Ageo ña̱ ná chika̱a̱ra ndee̱ xíʼinna ña̱ kusi̱í tuku inina ta sandíʼina ndasava̱ʼana templo (Esd. 6:14, 15). Ña̱ na̱túʼun ta̱ Ageo xíʼin na̱ judío, chi̱kaa̱ña ndee̱ xíʼinna ña̱ kandíxakana Jehová. Tá ni̱ka̱ʼa̱n ta̱ Ageo “Jehová ta̱ xáʼndachíñu nu̱ú na̱ ángel”, ña̱yóʼo chi̱ka̱a̱níña ndee̱ xíʼin na̱ judío kán. Saáchi tá xi̱kuni̱na vií kana chiñu ña̱ keʼéna, xi̱niñúʼu kundaa-inina Jehová chi xíʼin ta̱yóʼo íyo ku̱a̱ʼání na̱ ángel. w21.09 14, 15 párr. 4, 5

Tiempo vitin miíyó na̱ testigo Jehová na̱ íyo iníísaá nu̱ú ñuʼú, kúʼvi̱-iniyó xínitáʼanyó ta viíní kítáʼanyó. Ta síín íyoyó nu̱ú inkaka religión, saáchi ni kúúyó na̱ ku̱i̱ká á na̱ nda̱ʼví, ni nda̱a̱ ndáaka raza kúúyó á ni nda̱a̱ ndáaka ñuu ke̱eyó, va̱ʼaní kítáʼanyó. Ta nda̱a̱ táki̱ʼva íyo na̱ veʼeyó saá íyo ndiʼi na̱ hermanoyó nu̱úyó. Ta ti̱xin reunión xíʼin asamblea kúú nu̱ú náʼa̱yó ña̱ kúʼvi̱-iniyó xínitáʼanyó. Ta tá xítoyó ña̱yóʼo saá kúú ña̱ va̱ása xíka-iniyó ña̱ iinlá miíyó kúú na̱ ndásakáʼnu Jehová nda̱a̱ táki̱ʼva kúni̱ra (John 13:34) Ña̱ Biblia káchiña: “Kuʼvi̱ní-inindó kunitáʼanndó” (1 Ped. 4:8). Ta iin ki̱ʼva ña̱ na̱ʼa̱yó ña̱ kúʼvi̱-iniyó xínitáʼanyó kúú ña̱ ixakáʼnu-iniyó xa̱ʼa̱ táʼanyó, ta kundeé-iniyó xíʼin ña̱ kéʼé inkana xíʼinyó. Ta saátu ndúkúyó ki̱ʼva ña̱ va̱ʼa koo iniyó xíʼin ndiʼi na̱ hermanoyó, nda̱a̱ na̱ ke̱ʼé iin ña̱ va̱ása va̱ʼa xíʼinyó (Col. 3:12-14). Xa̱ʼa̱ ña̱ kúʼvi̱-iniyó xínitáʼanyó, náʼa̱yó ña̱ ndixa ndíku̱nyó ta̱ Cristo. w21.10 22 párr. 13, 14

Tá távána iinna ti̱xin congregación, ¿á kivi chindeétáʼan ña̱yóʼo xíʼinna ña̱ ndandikó-inina, ta nasamana ña̱ kéʼéna? Chindeétáʼanvaña xíʼinna. Ku̱a̱ʼání na̱ ke̱e ti̱xin congregación, ki̱ʼinna kuenta ña̱ chi̱ndeétáʼanva ña̱yóʼo xíʼinna ña̱ ki̱xáʼana vií ndákanixi̱nína, saátu na̱samana ña̱ kéʼéna ta nda̱ndikóna nu̱ú Jehová (Hebreos 12:5, 6). Ná ndakanixi̱níyó xa̱ʼa̱ ejemplo yóʼo. Iin ta̱ pastor ki̱ʼinra kuenta ña̱ iin ndikachi sa̱na̱ra ki̱ʼinrí kue̱ʼe̱. Ta ña̱ va̱ʼa ixatátanrarí xíniñúʼu tavá síínrarí nu̱ú táʼanrí. Soo tá távárarí kíxáʼarí ndeéní xákurí, saáchi kútóorí kutáʼanrí xíʼin tí inka. Tá sákuxíkara tíyóʼo nu̱ú táʼanrí ña̱ va̱ʼa ixatátanrarí, ¿á kúni̱ kachi ña̱yóʼo ña̱ íxandi̱va̱ʼara xíʼinrí? Va̱ása. Saáchi kúnda̱a̱-inira ña̱ tá ná taxira kutáʼanrí xíʼin tí kǒo kue̱ʼe̱ kúúmií, kivi sakíʼinrí kue̱ʼe̱ tíyóʼo. Ña̱kán, tá távárarí saá kúú ña̱ ndáara tí inkaka. w21.10 10 párr. 9, 10

Táxiníyó tíxa̱ʼvi xa̱ʼa̱ ña̱ kúúyó táʼan na̱ ñuu Jehová na̱ kúʼvi̱ní-ini xínitáʼan. Ta kúni̱yó ña̱ ku̱a̱ʼáníka na̱ yiví ná kixáʼana ndasakáʼnuna Jehová xíʼinyó. Ña̱kán ná chika̱a̱yó ndee̱ ña̱ viíní ná koo ña̱ keʼéyó, tasaá va̱ása ka̱ʼa̱nna ña̱ va̱ása va̱ʼa xa̱ʼa̱ Jehová á xa̱ʼa̱ na̱ ñuura. Ndiʼi tiempo viíní ná koo ña̱ keʼéyó ña̱ va̱ʼa ná kutóo na̱ yiví sakúaʼna xa̱ʼa̱ Jehová. Sava yichi̱ na̱ yiví kundasína kunina miíyó á nda̱a̱ ixandi̱va̱ʼana xíʼinyó xa̱ʼa̱ ña̱ kándíxayó Jehová. ¿Ndáaña kivi keʼéyó tá yíʼviyó natúʼunyó xíʼin inkana xa̱ʼa̱ ña̱ kándíxayó? Ná ndakaʼányó chi chindeétáʼanva Jehová xíʼinyó ta saátu se̱ʼera. Ta̱ Jesús ni̱ka̱ʼa̱nra xíʼin na̱ discípulora ña̱ ná va̱ása kundi̱ʼi̱ní-inina ndáaña ka̱ʼa̱nna á ndáa ki̱ʼva ka̱ʼa̱nnaña. Ta̱yóʼo ka̱chira: “Tá ná kixaa̱ tiempo kunda̱a̱va-inindó ndáaña ka̱ʼa̱nndó. Saáchi su̱ví ndóʼó kuití kúú na̱ ka̱ʼa̱n: chi espíritu yivándó kúú ña̱ ka̱ʼa̱n xa̱ʼa̱ndó” (Mat. 10:19, 20). w21.09 24 párr. 17, 18

Ta̱ Moisés ni̱ka̱ʼa̱nra ña̱ chíndeétáʼan Jehová xíʼinyó (Sal. 90:1, nota). Tá kúma̱ní kuvira ni̱ka̱ʼa̱nra ña̱yóʼo: “Nda̱a̱ tá tiempo xi̱naʼá ndáa Ndióxi̱ ndóʼó, ta ndiʼi tiempo chindeétáʼanra xíʼinndó” (Deut. 33:27). ¿Ndáaña sákuaʼayó xíʼin tu̱ʼun ña̱ káʼa̱n ña̱ ndiʼi tiempo chíndeétáʼan Jehová xíʼinyó? Tá ndáa iniyó Jehová va̱ása yíʼviyó, soo ni saá sava yichi̱ kivi ndakava-iniyó. Tá ndóʼoyó ña̱yóʼo, ¿ndáaña kivi keʼé Jehová xa̱ʼa̱yó? (Sal. 136:23). Viíkaví tiinra ndaʼa̱yó ta chindeétáʼanra xíʼinyó ña̱ ndaku̱nditayó (Sal. 28:9; 94:18). Tá kúnda̱a̱-iniyó ña̱ ndiʼi tiempo chíndeétáʼan Ndióxi̱ xíʼinyó, ña̱yóʼo sándakaʼánña miíyó xa̱ʼa̱ u̱vi̱ ña̱ va̱ʼa ña̱ ndákiʼinyó. Ña̱ nu̱ú, ni nda̱a̱ ndáaka ñuu ndóoyó íyova Jehová ña̱ chindeétáʼanra xíʼinyó. Ta ña̱ u̱vi̱, ña̱ ndíʼi̱ní-ini Ndióxi̱ xa̱ʼa̱yó. w21.11 6 párr. 15, 16

Ta̱ Jesús xi̱kunda̱a̱-inira ña̱ tá ná ixandi̱va̱ʼana xíʼin na̱ discípulora, ixayo̱ʼvi̱ña xíʼinna kandíxana Ndióxi̱. Ta ña̱ va̱ʼa chindeétáʼanra xíʼinna na̱túʼunra iin historia xíʼinna, ta ña̱yóʼo va̱xiña nu̱ú libro ña̱ ka̱ʼyí ta̱ Lucas. Ta̱ Jesús na̱túʼunra xa̱ʼa̱ iin ñaʼá ñá ni̱xi̱ʼi̱ yií, ña̱ ni̱xa̱ʼa̱nñá ni̱ka̱ʼa̱nñá xíʼin iin juez ta̱ va̱ása nda̱kú-ini ña̱ va̱ʼa ná ndatiinra ku̱a̱chi xa̱ʼa̱ñá. Ñáyóʼo tuku ta tuku xi̱xa̱ʼa̱nñá nu̱úra, chi xi̱kunda̱a̱-iniñá ña̱ chindeétáʼanra xíʼinñá xa̱ʼa̱ ña̱ ku̱a̱ʼání yichi̱ xi̱xa̱ʼa̱nñá nu̱úra. Tasaá ke̱ʼévara. ¿Ndáaña sákuaʼayó xíʼin ña̱yóʼo? Jehová nda̱kúní-inira, ña̱kán ni̱ka̱ʼa̱n ta̱ Jesús ña̱yóʼo: “Tá saá, ¿á va̱ása chindeé Ndióxi̱ na̱ nda̱kaxinra xa̱ʼa̱ ña̱ káʼa̱nnína xíʼinra ñuú xíʼin káʼñu [...]?” (Luc. 18:1-8). Tándi̱ʼi, ta̱ Jesús ni̱ka̱ʼa̱nkara: “Tá ná kixaa̱ ta̱ kúú se̱ʼe ta̱a, ¿á ndani̱ʼíra na̱ kándíxaní Ndióxi̱ nu̱ú ñuʼú yóʼo?”. Tá íxandi̱va̱ʼana xíʼinyó, xíniñúʼu kúee koo iniyó. Ta ka̱ʼa̱nníyó xíʼin Ndióxi̱ ña̱ ná chindeétáʼanra xíʼinyó, tasaá na̱ʼa̱yó ña̱ kándíxaníyóra nda̱a̱ táki̱ʼva ke̱ʼé ñá ñaʼá ñá ni̱xi̱ʼi̱ yií. Ta ná kandíxayó ña̱ kuee á ya̱chi̱, chindeétáʼanva Jehová xíʼinyó. Ta ná va̱ása kaka-iniyó ña̱ kuniso̱ʼovara ndiʼi ña̱ káʼa̱nyó xíʼinra. w21.11 23 párr. 12; 24 párr. 14

Na̱ va̱lí, ¿á túvindó ña̱ yo̱ʼvi̱ní ña̱ káʼa̱n Jehová xíʼinndó, ta sásiníña nu̱úndó? Ña̱yóʼo kúú ña̱ kúni̱ ta̱ Ndi̱va̱ʼa ná ndakanixi̱níndó. Kúni̱ra ná kotondó ndáaña kéʼé na̱ ku̱a̱ʼa̱n yichi̱ ña̱ ndíka̱, ta kúni̱ra ná kotondó ña̱ si̱íníva íyo na̱kán. Ta saátu kúni̱ra ná ndakanixi̱níndó ña̱ va̱ása si̱í íyondó nda̱a̱ táki̱ʼva si̱í íyo na̱ káʼvi xíʼinndó escuela á na̱ yiví na̱ xítondó nu̱ú Internet; ta kúni̱ra ná ndakanixi̱níndó ña̱ yo̱ʼvi̱ní ña̱ káʼa̱n Jehová, ta sásiníña nu̱úndó ña̱ si̱í koondó. Soo ndakaʼánndó, ta̱ Ndi̱va̱ʼa va̱ása ndíʼi̱-inira xa̱ʼa̱ na̱ ku̱a̱ʼa̱n yichi̱ra chi va̱ása kúni̱ra kunda̱a̱-inina ndáaña kundoʼona (Matt. 7:13, 14) Soo, Jehová kúni̱ra ná kunda̱a̱-inindó ndáaña va̱ʼa ndakiʼinndó tá ná ku̱ʼu̱nndó yichi̱ ña̱ taxi ña̱ kutakundó (Sal. 37:29; Is. 35:5, 6; 65:21-23). w21.12 23 párr. 6, 7

Kúnda̱a̱-iniyó ña̱ xíniñúʼu ixakáʼnu-iniyó xa̱ʼa̱ inkana, soo ni saá íxayo̱ʼvi̱vaña xíʼinyó. Ta sana ña̱yóʼo kúú ña̱ ndo̱ʼo ta̱ apóstol Pedro (Mat. 18:21, 22). ¿Ndáaña chindeétáʼan xíʼinyó ixakáʼnu-iniyó xa̱ʼa̱ inkana? Ña̱ nu̱ú, ná ndakanixi̱níyó xa̱ʼa̱ ndiʼi yichi̱ ña̱ íxakáʼnu-ini Jehová xa̱ʼa̱yó (Mat. 18:32, 33). Va̱ása xíniñúʼu ixakáʼnuví-ini Jehová xa̱ʼa̱yó, soo kéʼéraña xa̱ʼa̱ ña̱ va̱ʼa-inira (Sal. 103:8-10). Ta saátu xíniñúʼu kuʼvi̱-iniyó kunitáʼanyó. Va̱ása xíniñúʼu ndakanixi̱níyó á ixakáʼnu-iniyó xa̱ʼa̱ na̱ hermanoyó á va̱ása, chi iin ña̱ xíniñúʼu keʼévayó kúú ña̱yóʼo (1 Juan 4:11). Ña̱ u̱vi̱, ná ndakanixi̱níyó ndáaña kuu tá íxakáʼnu-iniyó xa̱ʼa̱ inkana. Saáchi chíndeétáʼanyó xíʼin na̱ ke̱ʼé ña̱ va̱ása va̱ʼa xíʼinyó, ta chíndeétáʼanyó xíʼin na̱ congregación ña̱ vií kutáʼanna. Ta saátu ndáayó ña̱ vií kítáʼanyó xíʼin Jehová, ta kǒo nda̱a̱ ni iin ña̱ʼa kasi nu̱úyó ña̱ ndasakáʼnuyóra (2 Cor. 2:7; Col. 3:14). Ña̱ u̱ni̱, ná keʼéyó oración nu̱ú Jehová chi ta̱yóʼo kúú ta̱ káʼa̱n xíʼinyó ña̱ ixakáʼnu-iniyó xa̱ʼa̱ inkana. Ta ná va̱ása taxiyó sandíʼi-xa̱ʼa̱ ta̱ Ndi̱va̱ʼa ña̱ vií kítáʼanyó xíʼin na̱ hermanoyó (Efes. 4:26, 27). Ña̱kán xíniñúʼu chindeétáʼan Jehová xíʼinyó ña̱ va̱ása ko̱oyoyó nda̱ʼa ta̱ Ndi̱va̱ʼa. w21.06 23 párr. 14

Ta̱ David xi̱nura nu̱ú ta̱ Saúl, ta̱ xi̱kuu rey nu̱ú na̱ ñuu Israel saáchi xi̱kuni̱ra kaʼnírara. Ta xa̱ʼa̱ ña̱ kǒo ña̱ kuxura ni̱xa̱a̱ra ñuu Nob ta kán ndu̱kúra u̱ʼu̱n si̱táva̱ʼa ña̱ kuxura (1 Sam. 21:1, 3). Tándi̱ʼi, miíra xíʼin na̱ ta̱a na̱ xi̱kitáʼan xíʼinra chi̱se̱ʼéna miína ini iin kavá (1 Sam. 22:1). ¿Nda̱chun xi̱kuni̱ ta̱ Saúl kaʼnírara? Tá xi̱ni ta̱ Saúl ña̱ ki̱xáʼa na̱ yiví káʼa̱n va̱ʼanína xa̱ʼa̱ ta̱ David chi va̱ʼaní xi̱kanitáʼanra, ta̱ Saúl ndeéní ki̱xáʼara sáa̱-inira xínirara. Ta saátu xi̱kunda̱a̱-inira ña̱ va̱ása níxiinka Jehová koora rey, saáchi i̱xaso̱ʼora nu̱úra ta nda̱kaxinra ta̱ David ña̱ koora rey nu̱ú na̱ ñuu Israel (1 Samuel 23:16, 17). Soo xa̱ʼa̱ ña̱ xi̱kuukara rey, ni̱xi̱yo ku̱a̱ʼání na̱ soldado xíʼin na̱ yiví na̱ xi̱chindeétáʼan xíʼinra. Ña̱kán xi̱niñúʼu kunu ta̱ David nu̱úra ña̱ va̱ása kaʼnírara. ¿Á xi̱ndakanixi̱ní ta̱ Saúl ña̱ kuchiñura kasira nu̱ú Jehová, ta va̱ása xa̱a̱ ta̱ David koora rey? (Is. 55:11). Va̱ása káʼa̱n tu̱ʼun Ndióxi̱ xa̱ʼa̱ ña̱yóʼo, soo kúnda̱a̱-iniyó ña̱ ku̱a̱ʼání tu̱ndóʼo ki̱xi nu̱ú ta̱ Saúl xa̱ʼa̱ ña̱ xi̱kuni̱ra kasira nu̱ú Jehová. Saáchi ndiʼi na̱ ku̱a̱ʼa̱n contra Jehová va̱ása kuchiñuna xíʼinra. w22.01 2 párr. 1, 2

Xi̱chika̱a̱ní ta̱ Jesús ndee̱ ña̱ xi̱natúʼunra xíʼin na̱ yiví. Nda̱a̱ ndáaka nu̱ú xi̱xikara, xi̱natúʼunra xíʼinna xa̱ʼa̱ Ndióxi̱ saáchi xi̱kuʼvi̱ní-inira xi̱xinirana (Luc. 19:47, 48). Ta saátu xi̱natúʼunra xíʼinna xa̱ʼa̱ ña̱ xi̱kundáʼvi-inira xi̱xinirana. Ta nda̱a̱ sava yichi̱ va̱ása níxi̱xixira xíʼin na̱ discípulora, saáchi ni̱xi̱yo ku̱a̱ʼání na̱ yiví na̱ xi̱kuni̱ kuniso̱ʼo ña̱ xi̱sanáʼa̱na (Mar. 3:20). Ta tá ni̱xa̱ʼa̱n iin ta̱a na̱ndukúrara tá ñuú ña̱ va̱ʼa natúʼunra xíʼinra xa̱ʼa̱ Ndióxi̱, na̱túʼunvara xíʼinra. Su̱ví ndiʼiví na̱ na̱túʼun ta̱ Jesús xíʼin níxa̱a̱ koo discípulora, soo ni saá ndiʼivana ni̱xa̱a̱ ku̱ndaa̱-ini xa̱ʼa̱ Ndióxi̱. Ta saátu miíyó kúni̱yó natúʼunyó xíʼin ndiʼi na̱ yiví xa̱ʼa̱ Ndióxi̱ (Hech. 10:42). Su̱ví hora ña̱ kúni̱ miíyó ku̱ʼu̱nyó natúʼunyó xíʼin na̱ yiví, chi xíniñúʼu natúʼunyó xíʼinna hora ña̱ kivi ndani̱ʼíyóna. Tá saá ná keʼéyó, kusi̱íníva-ini Jehová xíʼin ña̱ kéʼéyó. w22.01 17 párr. 13, 14

Ku̱a̱ʼání na̱ yiví íxayo̱ʼvi̱ña xíʼinna kandíxana na̱ chíñu tiempo vitin. ¿Nda̱chun? Saáchi xítona ña̱ va̱ʼaníka chíndeétáʼanna xíʼin na̱ kúiká ta saátu xíʼin na̱ yiví na̱ ndáyáʼvi, ta va̱ása chíndeétáʼanna xíʼin na̱ nda̱ʼví. Ta saátu na̱ níʼi yichi̱ ti̱xin veʼe ñu̱ʼu ku̱a̱ʼání ña̱ va̱ása va̱ʼa kéʼéna. Xa̱ʼa̱ ña̱yóʼo, ku̱a̱ʼánína va̱ása kándíxakana Ndióxi̱. Ña̱kán xíniñúʼu chindeétáʼanyó xíʼin na̱ káʼviyó xíʼin ña̱ kandíxakana Ndióxi̱, ta saátu kandíxakana na̱ níʼi yichi̱ nu̱úyó. Su̱ví nda̱saa na̱ káʼviyó xíʼin kúú na̱ xíniñúʼu sakúaʼa ña̱ kandíxakana Jehová xíʼin na̱ ñuura. Chi saátu miíyó na̱ xa̱a̱ ku̱a̱ʼání ku̱i̱ya̱ ndásakáʼnu Jehová, xíniñúʼu ndakundeéyó kandíxayó ña̱ viíní kéʼéra ndiʼi ña̱ʼa, saáchi kivi koo sava ña̱ʼa ña̱ kasi nu̱úyó ña̱ kandíxakayóra. Su̱ví nda̱saa na̱ káʼviyó xíʼin kúú na̱ xíniñúʼu sakúaʼa ña̱ kandíxakana Jehová xíʼin na̱ ñuura. Chi saátu miíyó na̱ xa̱a̱ ku̱a̱ʼání ku̱i̱ya̱ ndásakáʼnu Jehová, xíniñúʼu ndakundeéyó kandíxayó ña̱ viíní kéʼéra ndiʼi ña̱ʼa, saáchi kivi koo sava ña̱ʼa ña̱ kasi nu̱úyó ña̱ kandíxakayóra. Ta nu̱ú artículo yóʼo ka̱ʼa̱nyó xa̱ʼa̱ u̱ni̱ña. w22.02 2 párr. 1, 2