Marzo

Ta̱ apóstol Pedro ni̱ka̱ʼa̱nra xíʼin na̱ hermano ña̱ ná kuniñúʼuna ña̱ xíni̱na keʼéna ña̱ va̱ʼa chika̱a̱na ndee̱ xíʼin inka na̱ hermano. Ta ña̱yóʼo kúú ña̱ ka̱ʼyíra: “Xa̱ʼa̱ ña̱ kúúndó na̱ káchíñu nu̱ú Ndióxi̱, xa̱a̱ síín síín íyo ki̱ʼva ña̱ ni̱na̱ʼa̱ra ña̱ va̱ʼaní-inira xíʼinndó, ña̱kán viíní keʼéndó chiñu ña̱ ta̱xira ndaʼa̱ndó ña̱ va̱ʼa chindeétáʼanndó xíʼin inkana” (1 Ped. 4:10). Ná chika̱a̱yó ndee̱ ña̱ keʼéyó ndiʼi ña̱ xíni̱yó, ta ná va̱ása ndakanixi̱níyó ña̱ kivi sa̱a̱-ini inkana kunina miíyó á ndakava-inina. Soo ná kiʼinníyó kuenta ña̱ va̱ása ni̱nuní kuniyó xíʼin ña̱yóʼo (1 Cor. 4:6). Ná ndakaʼányó chi ndiʼi chiñu ña̱ xíni̱yó keʼéyó Jehová kúú ta̱ ta̱xiña ndaʼa̱yó. Ña̱kán, ná kuniñúʼuyóña ña̱ va̱ʼa chika̱a̱yó ndee̱ xíʼin na̱ hermanoyó, ta ná va̱ása keʼéyóña xa̱ʼa̱ ña̱ kúni̱yó ná ka̱ʼa̱n va̱ʼana xa̱ʼa̱yó (Filip. 2:3). Kúsi̱íva-iniyó tá xíniñúʼuyó ndee̱yó ta saátu ña̱ xíni̱yó keʼéyó ña̱ va̱ʼa kachíñuyó nu̱ú Jehová. ¿Nda̱chun kúsi̱í-iniyó? Saáchi xíniñúʼuyó ndiʼi ña̱ xíni̱yó keʼéyó ña̱ va̱ʼa ndasakáʼnuyóra, ta va̱ása kéʼéyóña ña̱ va̱ʼa ná kuni inkana ña̱ xíni̱níkayó nu̱úna á ña̱ ndáyáʼviníkayó nu̱úna. w22.04 11, 12 párr. 7-9

Ta̱ Jesús xi̱kuʼvi̱ní-inira xi̱xinira tu̱ʼun Ndióxi̱ ta Salmo 40:8 ni̱ka̱ʼa̱nña ña̱ chíndayáʼviníraña: “Kúsi̱íní-inii̱ ña̱ kéʼíi̱ ña̱ kúni̱ún Ndióxi̱ miíi̱, ta ley ña̱ táxiún ndaʼíi̱ íyoña nda̱a̱ inii̱ ma̱á”. Ta xa̱ʼa̱ ña̱ chi̱ndayáʼviníraña chi̱ndeétáʼanña xíʼinra ña̱ kusi̱í-inira ta ndakundeéra ndasakáʼnúnra Jehová. Saátu kundoʼo miíyó tá ná chikaa̱yó ndee̱ ña̱ kaʼviyó tu̱ʼun Ndióxi̱ ta kuʼvi̱-iniyó kuniyóña (Sal. 1:​1-3). Ña̱ ni̱ka̱ʼa̱n ta̱ Jesús xíʼin ña̱ ke̱ʼéra chíka̱a̱ña ndee̱ xíʼinyó ña̱ viíní kaʼviyó tu̱ʼun Ndióxi̱. Ña̱ va̱ʼa vií kunda̱a̱-iniyó xíʼin ña̱ káʼviyó, ná ka̱ʼa̱nyó xíʼin Jehová ña̱ chindeétáʼanra xíʼinyó, kúee ná kaʼviyó, ná keʼéyó pregunta xa̱ʼa̱ ña̱ káʼviyó ta ná keʼéyó nota. Ña̱ va̱ʼa ndakanixi̱níyó xa̱ʼa̱ ña̱ káʼviyó, kúee ná kaʼviyó relato ta ná nandukúyó xa̱ʼa̱ña nu̱ú tutu ña̱ tává na̱ ñuu Ndióxi̱. Ta ña̱ va̱ʼa keʼéyó ña̱ káʼa̱n tu̱ʼun Ndióxi̱ xíniñúʼu viíní kaʼviyóña. Tá kéʼéyó ndiʼi ña̱yóʼo va̱ʼaníka kunda̱a̱-iniyó xíʼin Biblia ta va̱ʼaníka kutáʼanyó xíʼin Jehová (Sal. 119:​17, 18; Sant. 4:8). w23.02 13 párr. 15, 16

Ná kunda̱a̱ káxi iniyó ndáaña kúú ña̱ kúni̱yó viíka keʼéyó. Ná chika̱a̱yó ndee̱ saxínuyó ña̱ kúni̱yó viíka keʼéyó. ¿Ndáa ki̱ʼva keʼéyóña? Ná kachiyó ña̱ kúni̱yó viíka sanáʼa̱yó. Tá saá, kivi kaʼviyó folleto ña̱ naní Sákuaʼaka ña̱ vií kaʼviún ta sanáʼún. Ta tá kúma̱níka ya̱ʼayó ti̱xin reunión ña̱ xíyo ma̱ʼñú semana, kivi ka̱ʼa̱nyó xíʼin inka na̱ hermano na̱ xíni̱ka ña̱ ná kuniso̱ʼona miíyó ta ná ka̱ʼa̱nna xíʼinyó ndáaña kúú ña̱ xíniñúʼu viíka keʼéyó. Tá xa̱a̱ ya̱chi̱ka káʼvi kúeeyó ña̱ va̱ʼa ya̱ʼayó ti̱xin reunión, saá kúú ña̱ va̱ʼaníka sanáʼa̱yó, ta inkana kiʼinna kuenta ña̱ va̱ʼaní káchíñuyó ta kundaa-inina miíyó (2 Cor. 8:22). ¿Ndáaña kivi keʼéyó tá kúni̱yó keʼéyó iin ña̱ʼa soo íxayo̱ʼvi̱ña xíʼinyó keʼéyóña? Ná va̱ása ndakava-iniyó. ¿Á sa̱kúaʼa ta̱ Timoteo ña̱ viíka taxira discurso ta viíka sanáʼa̱ra? Tu̱ʼun Ndióxi̱ va̱ása káʼa̱nña xa̱ʼa̱ ña̱yóʼo, soo kúnda̱a̱va-iniyó ña̱ va̱ʼaní xi̱ndiku̱nra consejo ña̱ ta̱xi ta̱ Pablo ndaʼa̱ra (2 Tim. 3:10). w22.04 24, 25 párr. 8-11

¿Ndáana ndána̱ʼa̱ tí kití yukú tí u̱xa̱ xi̱ní? Tu̱ʼun Ndióxi̱ káʼa̱nña xa̱ʼa̱ tí kití yóʼo ña̱ táki̱ʼva káa iin leopardo saá káarí, soo xa̱ʼa̱rí táki̱ʼva káa xa̱ʼa̱ oso saá káaña, ta yuʼúrí táki̱ʼva káa yuʼú león saá káaña, ta 10 kúú ndiki̱rí. Ta ku̱mí kití tí káʼa̱n libro ta̱ Daniel capítulo 7 xa̱ʼa̱ kúúmiíturí táʼan ña̱yóʼova, soo iinvaña kúúmií iin iinrí. Soo libro ña̱ Apocalipsis káʼa̱nña xa̱ʼa̱ iin kuití kití tí kúúmií ndiʼi ña̱yóʼo. Ta tí kití yukú yóʼo su̱ví nda̱saa iin kuití na̱ chíñu náʼnu ndána̱ʼa̱rí. Chi libro ña̱ Apocalipsis káʼa̱nña xa̱ʼa̱rí ña̱ “nda̱kiʼinrí nda̱yí ña̱ kaʼndachíñurí nu̱ú na̱ yiví ni nda̱a̱ ndáaka tribu kúúna, nda̱a̱ ndáaka tu̱ʼun káʼa̱nna ni kúúna na̱ ñuu válí á kúúna na̱ ñuu náʼnu”. Ña̱yóʼo náʼa̱ña nu̱úyó ña̱ kúúmiíníkarí ndee̱ nu̱ú iin kuití na̱ chíñu (Apoc. 13:7). Ña̱kán, tí kití yukú yóʼo ndána̱ʼa̱rí ndiʼi na̱ chíñu na̱ xa̱a̱ xáʼndachíñu nu̱ú ñuʼú yóʼo (Ecl. 8:9). Ta saátu, tá káʼa̱n tu̱ʼun Ndióxi̱ xa̱ʼa̱ número 10 ndána̱ʼa̱ña iin ña̱ʼa ña̱ íyo níí. w22.05 9 párr. 6

¿Ndáana ndakiʼin ña̱ va̱ʼa yóʼo? Siʼna na̱ gran muchedumbre na̱ ni̱ka̱ku ti̱xin ña̱ Armagedón, xíʼin na̱ va̱lí na̱ kaku nu̱ú ñuyǐví xa̱á. Soo su̱ví nda̱saa na̱yóʼo ndakiʼin ña̱ va̱ʼa yóʼo. Saáchi Apocalipsis capítulo 20 káʼa̱nña ña̱ ndataku na̱ ni̱xi̱ʼi̱ (Apoc. 20:​11-13). ¿Ndáana kúú na̱ ndataku? Ndataku na̱ ke̱ʼé ña̱ va̱ʼa: na̱yóʼo kúú na̱ nda̱kúní ni̱xi̱yo ini xíʼin Jehová tá kúma̱níka kuvina. Saátu ndataku na̱ ke̱ʼé ña̱ va̱ása va̱ʼa: na̱yóʼo kúú na̱ va̱ása níxa̱a̱ kunda̱a̱-ini xa̱ʼa̱ Jehová tá ni̱xi̱ʼi̱na (Hech. 24:15; Juan 5:​28, 29). ¿Á kúni̱ kachi ña̱yóʼo ña̱ ti̱xin ña̱ mil ku̱i̱ya̱ ndataku ndiʼi na̱ yiví na̱ ni̱xi̱ʼi̱? Va̱ása. Na̱ yiví na̱ va̱ása níxiin ndasakáʼnu Jehová tá kúma̱ní kuvina, va̱ása ndatakuna. Saáchi ni̱xi̱yova tiempo nu̱úna ña̱ sakúaʼana xa̱ʼa̱ Jehová, soo xíʼin ña̱ ke̱ʼéna ni̱na̱ʼa̱na ña̱ va̱ása kúni̱na kutakuna nu̱ú ñuyǐví xa̱á (Mat. 25:46; 2 Tes. 1:9; Apoc. 17:8; 20:15). w22.05 18 párr. 16, 17

Ta̱ Jesús xíniñúʼura ta̱ “esclavo ta̱ nda̱kúní-ini ta̱ ndíchiní”, ña̱ va̱ʼa chindeétáʼanra xíʼin na̱ ñuu Ndióxi̱ ña̱ keʼéna chiñura nu̱ú ñuʼú yóʼo tasaá ndukáʼnu iinlá mií Ndióxi̱ ta̱ nda̱a̱ (Mat. 24:45). ¿Ndáaña ndákanixi̱níún xa̱ʼa̱ na̱ ñuu Ndióxi̱? Sana ndóʼún nda̱a̱ táki̱ʼva ndo̱ʼo ta̱ Pedro tá ni̱ka̱ʼa̱nra xíʼin ta̱ Jesús ña̱ va̱xi nu̱ú texto ki̱vi̱ vitin. Tá kǒo níkunda̱a̱-iniyó xa̱ʼa̱ na̱ ñuu Jehová, ¿ndáaña kéʼévíyó vitin? Ta̱ Jesús xíniñúʼura ta̱ “esclavo ta̱ nda̱kúní-ini ta̱ ndíchiní” ña̱ taxira ndiʼi ña̱ xíniñúʼuyó ña̱ sakúaʼayó xa̱ʼa̱ Jehová ta saátu sánáʼa̱ra miíyó ña̱ va̱ʼaníka sanáʼa̱yó na̱ yiví. Saátu chíndeétáʼan na̱ ñuu Ndióxi̱ xíʼinyó ña̱ nasamayó ña̱ kéʼéyó tasaá va̱ʼa sakúsi̱íyó-ini Jehová (Efes. 4:24). Tá yáʼayó nu̱ú tu̱ndóʼo, viíní níʼi ta̱ Jesús yichi̱ nu̱úyó. Ta ki̱ʼinyó kuenta ña̱ saá íyo ña̱ ke̱ʼera tá ki̱xáʼa ña̱ coronavirus. Iníísaá ñuyǐví kǒo níkunda̱a̱-ini na̱ yiví ndáaña keʼéna, soo ta̱ Jesús va̱ʼaní xi̱niʼira yichi̱ nu̱úyó tasaá ku̱nda̱a̱-iniyó ndáaña keʼéyó ña̱ va̱ʼa kundaayó miíyó. w22.07 12 párr. 13, 14

Jehová ni̱ka̱ʼa̱nra xíʼin na̱ ñuu Israel ña̱ ná natúʼunna xa̱ʼa̱ra xíʼin se̱ʼena ndiʼi ki̱vi̱ (Deut. 6:​6, 7). Ta ku̱a̱ʼáva yichi̱ xi̱kuchiñu natúʼunna xíʼin se̱ʼena, ta sanáʼanana ña̱ kuʼvi̱-inina kunina Jehová. Tá kúú, na̱ ta̱a válí xi̱chindeétáʼanna xíʼin yivána tá xi̱chiʼina á tá xi̱ndakayana ña̱ xi̱chiʼina. Ta ná ñaʼá válí xi̱chindeétáʼanná xíʼin siʼíná ña̱ keʼéná chiñu ti̱xin veʼená, sana xi̱chindeétáʼanná xíʼin siʼíná ña̱ ku̱kuná. Tá inkáchi xi̱kitáʼanna xi̱keʼéna chiñu yóʼo, saá kúú ña̱ va̱ʼa xi̱natúʼunna xíʼin se̱ʼena xa̱ʼa̱ ña̱ʼa ña̱ ndáyáʼviní. Ta sana xi̱natúʼunna xíʼinna xa̱ʼa̱ ña̱ va̱ʼaní-ini Jehová xíʼinna ta va̱ʼaní xi̱ndaarana. Ti̱xin ku̱a̱ʼání ñuu, na̱ íyo se̱ʼe loʼoní tiempo kítáʼanna xíʼin se̱ʼena saáchi ku̱a̱ʼa̱nna kachíñuvana á ku̱a̱ʼa̱n na̱ va̱lí se̱ʼena escuela. Ña̱kán, na̱ ndásakáʼnu Jehová xíniñúʼu tavána tiempo ña̱ kutáʼanna xíʼin se̱ʼena ta natúʼunna xíʼinna (Efes. 5:​15, 16). w22.05 28 párr. 10, 11

Tá iin na̱ ndásakáʼnu Ndióxi̱ ni̱ki̱ʼvina ku̱a̱chi, xíniñúʼu ka̱ʼa̱nna xíʼin Jehová ña̱ ná ixakáʼnu-inira xa̱ʼa̱na, ta saátu xíniñúʼu natúʼunna xíʼin na̱ anciano xa̱ʼa̱ ña̱yóʼo (Sal. 32:5; Sant. 5:14). Iinlá Jehová kúú ta̱ kivi ixakáʼnu-ini xa̱ʼa̱yó, ta kéʼéraña xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Soo, ¿ndáa chiñu ta̱xi Jehová ndaʼa̱ na̱ anciano? Chiñu ña̱ ta̱xira ndaʼa̱na kúú ña̱ chindeétáʼanna xíʼin na̱ ni̱ki̱ʼvi ku̱a̱chi, ta na̱yóʼo xíniñúʼuna tu̱ʼun Ndióxi̱ ña̱ va̱ʼa ndaka̱xinna á kivi kundika̱a̱ka na̱ ni̱ki̱ʼvi ku̱a̱chi ti̱xin congregación á va̱ása (1 Cor. 5:12). Ta ña̱ va̱ʼa keʼéna ña̱yóʼo siʼna ndákanixi̱nína xa̱ʼa̱ pregunta yóʼo: ¿Á xa̱a̱ ya̱chi̱ka nda̱kanixi̱nína ndáa ki̱ʼva ki̱ʼvina ku̱a̱chi yóʼo? ¿Á xi̱kuni̱na chise̱ʼéna xa̱ʼa̱ ña̱ ke̱ʼéna? ¿Á ku̱a̱ʼá tiempo xi̱keʼénaña? Ta inka ña̱ ndáyáʼviní xíto na̱ anciano kúú ña̱yóʼo: ¿Á náʼa̱na ña̱ ndixa ndinuʼu-inina nda̱ndikó-inina? ¿Á íyo iin ña̱ náʼa̱ ña̱ xa̱a̱ i̱xakáʼnu-ini Jehová xa̱ʼa̱na? (Hech. 3:19). w22.06 9 párr. 4

Ta̱ Jesús ni̱ka̱ʼa̱nra ña̱ ndáyáʼviní nandukúyó ña̱ va̱ʼa (Mat. 5:6). Ña̱yóʼo kúni̱ kachiña ña̱ xíniñúʼu chika̱a̱níyó ndee̱ ña̱ keʼéyó ña̱ va̱ʼa nda̱a̱ táki̱ʼva kúni̱ mií Ndióxi̱. ¿Á kúʼvi̱-iniyó xíniyó ña̱ nda̱a̱ xíʼin ña̱ va̱ʼa? Kúʼvi̱va-iniyó xíniyóña, saáchi kúndasíníyó xíniyó ña̱ vatá xíʼin ña̱ kini (Sal. 119:​128, 163). Na̱ sándaʼvi kéʼéna nda̱a̱ táki̱ʼva kéʼé ta̱ Ndi̱va̱ʼa ta̱ xáʼndachíñu nu̱ú ñuʼú yóʼo (Juan 8:44; 12:31). Iin ña̱ kútóoní ta̱ Ndi̱va̱ʼa keʼéra kúú ña̱ ixaya̱ku̱a̱ra ki̱vi̱ Jehová. Nda̱a̱ tá tiempo xi̱naʼá ni̱ka̱ʼa̱nra ña̱ vatá xa̱ʼa̱ Jehová nu̱ú jardín ña̱ Edén. Ta nda̱a̱ táki̱ʼva íyo ta̱ ni̱ka̱ʼa̱n ña̱ va̱ása va̱ʼa xáʼndachíñu Jehová saá íyora, ta xi̱kuni̱ kachitura ña̱ iinlá xa̱ʼa̱ mií Jehová ndíʼi̱-inira ta káʼa̱nra ña̱ vatá xíʼin na̱ yiví chi chíse̱ʼéra ndiʼi ña̱ va̱ʼa nu̱úna (Gén. 3:​1, 4, 5). Xa̱ʼa̱ ña̱ ku̱a̱ʼání ña̱ vatá ni̱ka̱ʼa̱n ta̱ Ndi̱va̱ʼa xa̱ʼa̱ Jehová, ku̱a̱ʼání na̱ yiví ndákanixi̱nína ña̱ su̱ví iin Ndióxi̱ va̱ʼa kúú Jehová. Ta na̱ yiví na̱ va̱ása xíín ndasakáʼnu Jehová, ta̱ Ndi̱va̱ʼa xíniñúʼura na̱yóʼo ña̱ keʼéna ku̱a̱ʼání ña̱ kini (Rom. 1:​25-31). w23.03 2 párr. 3

Sana íxayo̱ʼvi̱ña xíʼún ña̱ sandákoún keʼún ña̱ va̱ása kútóo Jehová, chi sava yichi̱ kéʼékavaúnña. Á savatu ndákanixi̱níún ña̱ va̱ása kivi xa̱ún ndakuchiún ta ña̱yóʼo kivi sandíʼi̱ña-iniún. Soo, ¿ndáaña chindeétáʼan xíʼún ña̱ va̱ása ndakava-iniún? Ña̱ kuʼvi̱-iniún kuniún Jehová (Prov. 3:​3-6). Ta ña̱yóʼo kúú ña̱ chindeétáʼan xíʼún ña̱ ya̱ʼún nu̱ú tu̱ndóʼo. Biblia káʼa̱nña ña̱ ndixaní kúʼvi̱-ini Jehová xínira na̱ ndásakáʼnu miíra. Ña̱yóʼo kúni̱ kachiña ña̱ kǒo sándakoo ndaʼa̱ Jehová miíyó ta ndiʼi tiempo kuʼvi̱-inira kunira miíyó. Tá i̱xava̱ʼa Ndióxi̱ miíún, ta̱xira ña̱ ná kuumiíún ña̱ va̱ʼa ña̱ kúúmiíra (Gén. 1:26). Tá saá, ¿ndáa ki̱ʼva na̱ʼún ña̱ ndixaní kúʼvi̱-iniún xíniún Jehová? Ña̱ nu̱ú kivi keʼún kúú ña̱ taxiún tíxa̱ʼvi ndaʼa̱ Jehová (1 Tes. 5:18). Ta kivi ndakanixi̱níún xa̱ʼa̱ ña̱yóʼo ndiʼi ki̱vi̱: “¿Ndáa ki̱ʼva ni̱na̱ʼa̱ Jehová ña̱ kúʼvi̱-inira xínira yi̱ʼi̱ vitin?”. Tá ná ka̱ʼún xíʼinra, taxi tíxa̱ʼvi ndaʼa̱ra xa̱ʼa̱ ña̱ʼa ña̱ kéʼéra xa̱ʼún. Koto ndáa ki̱ʼva náʼa̱ Jehová ña̱ kúʼvi̱ní-inira xínira yóʼó. w23.03 12 párr. 17-19

Ta̱ Jesús viíní ke̱ʼéra xíʼin 12 saá na̱ apóstolra. ¿Ndáaña sákuaʼayó xíʼin ña̱yóʼo? Tá iinna va̱ása va̱ʼa kéʼéna, xíniñúʼu kiʼinníyó kuenta ndáa ki̱ʼva kéʼéyó. Chi ña̱ xíniñúʼu keʼéyó kúú ña̱ kúee koo iniyó xíʼinna ta kuʼvi̱-iniyó kuniyóna. Tá nda̱kava-iniyó xa̱ʼa̱ ña̱ ke̱ʼé iin na̱ hermano xíʼinyó, ná ndakanixi̱níyó xa̱ʼa̱ ña̱yóʼo: “¿Nda̱chun va̱ása va̱ʼa níkunii̱ xa̱ʼa̱ ña̱ ke̱ʼéna xíʼi̱n? ¿Á miíi̱ kúú na̱ xíniñúʼu viíka keʼé? ¿Á ke̱ʼé na̱ hermano ña̱yóʼo xíʼi̱n xa̱ʼa̱ ña̱ íyo iin tu̱ndóʼo yáʼana nu̱ú? Ni íyova xa̱ʼa̱ kúú ña̱ kivi sa̱i̱, ¿á kivi na̱ʼi̱ ña̱ kúʼvi̱-inii̱ xínii̱na ta ixakáʼnu-inii̱ xa̱ʼa̱na?”. Tá ndiʼi tiempo vií kéʼéyó xíʼin inkana ta kúʼvi̱-iniyó xíniyóna, saá kúú ña̱ na̱ʼa̱yó ña̱ kúúyó na̱ ndixa ndíku̱n sa̱tá ta̱ Cristo. Ña̱ ke̱ʼé ta̱ Jesús saátu sánáʼa̱ña miíyó ña̱ xíniñúʼu chika̱a̱yó ndee̱ ña̱ kunda̱a̱-iniyó xíʼin ña̱ ndóʼo na̱ hermanoyó (Prov. 20:5). Ña̱ nda̱a̱ kúúña, xi̱kunda̱a̱va-ini ta̱ Jesús ña̱ xi̱ñuʼu níma̱ na̱ yiví, soo miíyó va̱ása kúnda̱a̱ví iniyó ndáaña ñúʼu níma̱ na̱ yiví. Soo ña̱ kivi keʼéyó kúú ña̱ kúee koo iniyó xíʼin na̱ hermanoyó tá ke̱ʼéna iin ña̱ va̱ása va̱ʼa (Efes. 4:​1, 2; 1 Ped. 3:8). Ta iin ña̱ kivi keʼéyó kúú ña̱ kuxini̱ va̱ʼayóna. w23.03 30 párr. 14-16

Kivi kundoʼoyó iin tu̱ndóʼo ta ta̱ Ndi̱va̱ʼa kivi kuniñúʼura na̱ doctor á na̱ veʼeyó na̱ va̱ása kúú testigo Jehová ña̱ ixandúxana xíʼinyó ña̱ nde̱e ni̱i̱ miíyó, tasaá ya̱ʼandosóyó ley Ndióxi̱. Á sanatu ka̱ʼa̱n inkana xíʼinyó ña̱ ná kuniñúʼuyó ta̱tán ña̱ kǒo kútóo Ndióxi̱ ná kuniñúʼuyó. Nda̱a̱ ni iinyó va̱ása kúni̱yó kuviyó, soo kúnda̱a̱-iniyó ña̱ tá ná kixaa̱ iin ki̱vi̱ ña̱ kuviyó, Jehová va̱ása sandákoora ña̱ kuʼvi̱-inira kunira miíyó (Rom. 8:​37-39). Ndiʼi na̱ migo Jehová na̱ xa̱a̱ ni̱xi̱ʼi̱ ndákaʼánvara xa̱ʼa̱na, ta nda̱a̱ táki̱ʼva íyo na̱ táku saá íyona nu̱úra (Luc. 20:37). Kúni̱níra sandátakurana (Job 14:15). Xa̱ʼa̱ ña̱kán ta̱xira se̱ʼera ni̱xi̱ʼi̱ra xa̱ʼa̱yó ña̱ va̱ʼa ni̱ʼiyó ña̱ kutakuyó ndiʼi tiempo (Juan 3:16). Ndiʼiyó xíni̱ ña̱ kúʼvi̱-ini Jehová xínira miíyó ta ndáara miíyó. Xa̱ʼa̱ ña̱kán tá kíʼinyó kue̱ʼe̱ á tá kúni̱na kaʼnína miíyó, va̱ása sandákooyó ña̱ ndasakáʼnuyóra. Chi ña̱ kéʼéyó kúú ña̱ káʼa̱nyó xíʼinra ña̱ ná sandíkora-iniyó, ña̱ ná taxira ña̱ ndíchi ndaʼa̱yó, ta saátu ná taxira ndee̱ ndaʼa̱yó ña̱ ndakú koo iniyó. (Sal. 41:3). w22.06 18 párr. 16, 17

Biblia káchiña: “Tá íxato̱ʼóyó Jehová saá kúú ña̱ xa̱a̱yó kuumiíyó ña̱ ndíchi ña̱ kúúmiíra, tá ná xa̱a̱yó sakúaʼayó xa̱ʼa̱ra saá kúú ña̱ ndíchiní kooyó” (Prov. 9:10). Ña̱kán nda̱a̱ ndáaka ña̱ ná ndaka̱xinyó keʼéyó, ná kotoyó á íyoña nda̱a̱ táki̱ʼva íyo ña̱ ndákanixi̱ní mií Jehová. Ta ña̱ va̱ʼa kunda̱a̱-iniyó ndáa ki̱ʼva ndákanixi̱ní Jehová xíniñúʼu kaʼviyó Biblia ta saátu tutu ña̱ tává na̱ ñuura. Tá saá ná keʼéyó na̱ʼa̱yó ña̱ ndixa ndíchi íyoyó (Prov. 2:​5-7). Iinlá Jehová kúú ta̱ kivi sanáʼa̱ ña̱ ndíchi miíyó (Rom. 16:27). ¿Nda̱chun kúú ña̱ káʼa̱nyó ña̱yóʼo? Ña̱ nu̱ú, saáchi Jehová kúú ta̱ i̱xava̱ʼa miíyó ta xíni̱ra xa̱ʼa̱ ndiʼi ña̱ʼa ña̱ i̱xava̱ʼara (Sal. 104:24). Ña̱ u̱vi̱, saáchi xíʼin ña̱ kéʼéra náʼa̱ra ña̱ ndíchiníra (Rom. 11:33). Ta ña̱ u̱ni̱, saáchi ndiʼi consejo ña̱ táxira va̱ʼaní chíndeétáʼanña xíʼin na̱ kéʼéña (Prov. 2:​10-12). Tá ndixa kúni̱yó ndíchi kooyó, xíniñúʼu kandíxayó u̱ni̱ saá ña̱ ni̱ka̱ʼa̱nyó xa̱ʼa̱ yóʼo, ta ná taxiyó ña̱ kuniʼiña yichi̱ nu̱úyó xíʼin ña̱ ndáka̱xinyó keʼéyó. w22.10 19 párr. 3, 4

Nda̱a̱ táki̱ʼva káchi Apocalipsis capítulo 12, ta̱ Ndi̱va̱ʼa xíʼin na̱ ta̱chí ndi̱va̱ʼa va̱ása níkuchiñuna kanitáʼanna xíʼin ta̱ Rey, ta sa̱kánanana va̱xina nu̱ú ñuʼú yóʼo. Ta xa̱ʼa̱ ña̱ ni̱sa̱a̱ní ta̱ Ndi̱va̱ʼa, ki̱xáʼara íxandi̱va̱ʼara xíʼin na̱ yiví. Xa̱ʼa̱ ña̱kán Biblia káchiña: “Ndáʼviní ñuʼú xíʼin mar” (Apoc. 12:​9-12). ¿Ndáa ki̱ʼva chíndeétáʼan profecía yóʼo xíʼinyó? Tu̱ndóʼo ña̱ kúu iníísaá ñuyǐví xíʼin ña̱ na̱samaní ki̱ʼva ña̱ íyo na̱ yiví náʼa̱ña nu̱úyó ña̱ xa̱a̱ ki̱xáʼa ta̱ Jesús kúúra Rey. Xa̱ʼa̱ ña̱kán va̱ása ndíʼi̱-iniyó tá xítoyó ña̱ sáa̱ní-ini na̱ yiví xínitáʼanna, ta iinlá xa̱ʼa̱ miína ndíʼi̱-inina. Xíʼin ndiʼi ña̱ kéʼé na̱yóʼo xínu profecía ña̱ va̱xi nu̱ú Biblia. Kúnda̱a̱ káxi iniyó ña̱ xa̱a̱ ki̱xáʼa Reino Ndióxi̱ xáʼndachíñuña (Sal. 37:1). Saátu kúnda̱a̱-iniyó ña̱ kininíka keʼé na̱ yiví ta kooníka tu̱ndóʼo tá xa̱a̱ ku̱yatin kixaa̱ Armagedón (Mar. 13:8; 2 Tim. 3:13). Kúʼvi̱níva-ini Jehová xínira miíyó ta chíndeétáʼanra xíʼinyó ña̱ kunda̱a̱-iniyó nda̱chun kúú ña̱ íyoní tu̱ndóʼo tiempo ña̱ ndóoyó vitin. Ta táxiníyó tíxa̱ʼvi ndaʼa̱ra xa̱ʼa̱ ña̱ kéʼéra ña̱yóʼo. w22.07 3, 4 párr. 7, 8

Ná ka̱ʼa̱nyó xíʼin Jehová ña̱ chindeétáʼanra xíʼin na̱ hermanoyó tá kúúmiína kue̱ʼe̱, tá yáʼana nu̱ú iin tu̱ndóʼo, tá íyo ku̱a̱chi á tá íxandi̱va̱ʼana xíʼinna. Saátu xíniñúʼu ka̱ʼa̱nyó xíʼin Jehová ña̱ ná chindeétáʼanra xíʼin na̱ hermano na̱ chíndeétáʼan xíʼin na̱ ndóo nu̱ú ku̱u iin tu̱ndóʼo tá kúú tá kúun sa̱vi̱ á tá ndeéní táan á tá kúu inkaka ña̱ʼa. Sana xíni̱yó iin na̱ hermano na̱ ndóʼo táʼan ña̱yóʼo. Tá kéʼéyó oración nu̱ú Ndióxi̱, kivi ka̱ʼa̱nyó ki̱vi̱ na̱ hermanoyó xíʼinra, saá na̱ʼa̱yó ña̱ ndixaní kúʼvi̱-iniyó xíniyóna. Na̱ hermano na̱ níʼi yichi̱ nu̱ú na̱ congregación táxinína tíxa̱ʼvi tá káʼa̱nyó xíʼin Ndióxi̱ xa̱ʼa̱na, ta ña̱yóʼo chíndeétáʼanníña xíʼinna. Saá ndo̱ʼo ta̱ apóstol Pablo tá ka̱ʼyíra ña̱yóʼo: “Ka̱ʼa̱nndó xíʼin Ndióxi̱ xa̱ʼíi̱, ña̱ va̱ʼa ná chindeétáʼanra xíʼi̱n ña̱ va̱ása yi̱ʼvíi̱ natúʼi̱n xa̱ʼa̱ tu̱ʼun va̱ʼa, ta ña̱yóʼo kúú ña̱ yi̱i̱ ña̱ íyo se̱ʼé xa̱ʼa̱” (Efes. 6:19). Tiempo vitin íyotu na̱ hermano na̱ chíka̱a̱ní ndee̱ ña̱ va̱ʼa kuniʼina yichi̱ nu̱úyó. Tá ka̱ʼa̱nyó xíʼin Jehová ña̱ ná chindeétáʼanra xíʼinna ña̱ vií kana ndiʼi ña̱ kéʼéna, saá náʼa̱yó ña̱ kúʼvi̱-iniyó xíniyóna. w22.07 23, 24 párr. 14-16

Na̱ soldado xíniñúʼuna casco ña̱ va̱ʼa kundaana xi̱nína. Ta ki̱ʼva saátu xíniñúʼu kundaaníyó ña̱ ndákanixi̱níyó, chi ta̱ Ndi̱va̱ʼa kúni̱níra ña̱ ná ndakanixi̱níyó xa̱ʼa̱ ña̱ va̱ása va̱ʼa. Ku̱a̱ʼání ña̱ʼa xíniñúʼura ña̱ ixayaku̱a̱ra ña̱ ndákanixi̱níyó tasaá ndakavayó ta keʼéyó ña̱ va̱ása va̱ʼa. Soo nda̱a̱ táki̱ʼva ndáa iin casco xi̱ní iin ta̱ soldado, ña̱ ndátuyó ndakiʼinyó chí nu̱únínu chindeétáʼanña xíʼinyó ña̱ va̱ʼaní koo ña̱ ndákanixi̱níyó tasaá nda̱kúní koo iniyó xíʼin Jehová. Tá nina xa̱ʼa̱ ña̱ kúni̱ miíyó ná ndakanixi̱níyó, loʼo tá loʼo kivi xa̱a̱yó nandósóyó xa̱ʼa̱ ña̱ kutakuyó ndiʼi tiempo. Ná ndakanixi̱níyó xa̱ʼa̱ ña̱ ndo̱ʼo sava na̱ cristiano na̱ ni̱xi̱yo chí ñuu Corinto, sa̱ndákoona ña̱ kandíxana ña̱ káʼa̱n Ndióxi̱, ña̱ sandátakura na̱ ni̱xi̱ʼi̱ (1 Cor. 15:12). Ta̱ Pablo ni̱ka̱ʼa̱nra ña̱ na̱ yiví na̱ va̱ása níxi̱kandíxa ña̱ ndataku na̱ ni̱xi̱ʼi̱, xi̱keʼéna ña̱ xi̱kuni̱ miína (1 Cor. 15:32). Saátu tiempo vitin, ku̱a̱ʼání na̱ yiví va̱ása kándíxana ña̱ káʼa̱n Ndióxi̱ keʼéra chí nu̱únínu ta kéʼéna ña̱ kúni̱ miína ña̱ va̱ʼa koo si̱ína. Soo miíyó kándíxanívayó ña̱ káʼa̱n Ndióxi̱ taxira ndaʼa̱yó chí nu̱únínu. w22.10 25, 26 párr. 8, 9

Jehová káʼa̱nra xíʼinyó ña̱ ná ka̱ʼa̱nyó xíʼinra. Ta̱kán kíʼinra kuenta xíʼin ña̱ ndóʼoyó ta kúni̱ra ña̱ ná ka̱ʼa̱nyó xíʼinra nda̱a̱ ndáaka hora kúni̱ miíyó ta kuniso̱ʼovara ña̱ káʼa̱nyó. Kútóonívara kuniso̱ʼora ña̱ káʼa̱nyó xíʼinra (Prov. 15:8). ¿Ndáaña kivi ka̱ʼa̱nyó xíʼin Jehová tá kúni mitúʼunyó? Kivi ka̱ʼa̱nyó xíʼinra xa̱ʼa̱ nda̱a̱ ndáaka ña̱ ndóʼoyó (Sal. 62:8). Ná ka̱ʼa̱nyó xíʼinra xa̱ʼa̱ ndiʼi ña̱ sándi̱ʼi̱-iniyó ta saátu ndáa ki̱ʼva kúniyó. Ná ka̱ʼa̱nyó xíʼin Jehová ña̱ chindeétáʼanra xíʼinyó ndáaña xíniñúʼu keʼéyó tá kúni mitúʼunyó á tá kúsuchí-iniyó. Kivi ka̱ʼún xíʼinra ña̱ ná taxira ña̱ ndíchi ndaʼún ta saátu ña̱ ndakú koo iniún ña̱ ka̱ʼún xa̱ʼa̱ ña̱ kándíxaún (Luc. 21:​14, 15). Soo, ¿ndáaña kivi keʼún tá kúsuchí-iniún ta ndákava-iniún? Ka̱ʼa̱n xíʼin Jehová ná chindeéra yóʼó ña̱ ka̱ʼún xíʼin iin na̱ hermano na̱ va̱ʼaní ndásakáʼnu Jehová, ta saátu ña̱ chindeérana ña̱ kunda̱a̱-inina xíʼin ña̱ ndóʼún. Ná kiʼin va̱ʼayó kuenta ndáa ki̱ʼva ndákuiin Jehová oración ña̱ kéʼéyó nu̱úra ta ná taxiyó ña̱ chindeétáʼan inkana xíʼinyó. w22.08 10 párr. 6

Tá sa̱kán íyo loʼo tiempo ña̱ ki̱xáʼa íyo congregación ña̱ Tesalónica. Na̱ yiví ki̱xáʼana íxandi̱va̱ʼana xíʼin na̱ cristiano kán. Iin tiʼvi na̱ yiví “nda̱kiʼinna sava na̱ hermano ku̱a̱ʼa̱n xíʼinna nu̱ú na̱ chíñu ñuu kán” (Hech. 17:6). Ña̱kán, sana ni̱yi̱ʼvíní na̱ hermano yóʼo. Ta xa̱ʼa̱ ña̱ xi̱ndoʼona ña̱yóʼo, kivi sandákavaña-inina ta va̱ása kusi̱íka-inina kachíñuna nu̱ú Jehová. Soo ta̱ apóstol Pablo va̱ása nítaxira ña̱ kundoʼona ña̱yóʼo. Saáchi xa̱ʼndana chiñu ña̱ viíní ná kiʼinna kuenta xíʼin na̱ cristiano yóʼo. Ta tá ni̱ya̱ʼa tiempo ta̱ Pablo sa̱ndákaʼánra ña̱yóʼo na̱ ñuu Tesalónica: “Chi̱ndaʼándi̱ ñaniyó ta̱ Timoteo ku̱xa̱a̱ra nu̱úndó, [...] ña̱ va̱ʼa ndasandakúra-inindó ta saátu ña̱ sandíkora-inindó ña̱ va̱ʼa kandíxakandó Ndióxi̱, ta saá ni iinndó kǒo ndakava-ini ixaa tu̱ndóʼo yóʼo” (1 Tes. 3:​2, 3). Ña̱kán tá ni̱xi̱yo ta̱ Timoteo chí Listra, xi̱nira ndáa ki̱ʼva chi̱kaa̱ ta̱ apóstol Pablo ndee̱ xíʼin na̱ hermano. Ta saátu xi̱nira ndáa ki̱ʼva chi̱ndeétáʼan Jehová xíʼinna. Ta ni̱ka̱ʼa̱nra xíʼinna ña̱ kǒo ña̱ kundoʼona chi mií Jehová íyora xíʼinna (Hech. 14:​8, 19-22; Heb. 12:2). w22.08 21 párr. 4

Tá ku̱i̱ya 1870 iin ti̱ʼvi na̱ xi̱kaʼvi Biblia na̱ xi̱kitáʼan xíʼn ta̱ Charles Russel ki̱xáʼana nándukú va̱ʼakana xa̱ʼa̱ ña̱ káʼa̱n Biblia. Na̱yóʼo xi̱kuni̱na kunda̱a̱ káxi inina á ndáyáʼviní ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta keʼéyóña nda̱a̱ táki̱ʼva sa̱náʼa̱ra. Ña ke̱ʼé na̱ cristiano na̱ xi̱ndoo tá tiempo saá, ¿ndáa ki̱ʼva chíndeétáʼanña xíʼin miíyó tiempo vitin? Jehová chi̱ndeétáʼanra xíʼinna ña̱ ku̱nda̱a̱-inina xíʼin ña̱yóʼo ta tíxa̱ʼvi ña̱yóʼo nda̱a̱ miíyó kúnda̱a̱-iniyó vitin nda̱chun kúú ña̱ ni̱xi̱ʼi̱ ta̱ Jesús xa̱ʼa̱yó ta ndáa ña̱ va̱ʼa ndakiʼinyó chí nu̱únínu xa̱ʼa̱ ña̱yóʼo (1 Juan 2:​1, 2). Ta íyo u̱vi̱ ña̱ ndáyáʼviní ni̱xa̱a̱yó ku̱nda̱a̱-iniyó xa̱ʼa̱ nu̱ú Biblia: ña̱ íyo na̱ ku̱ʼu̱n koo chí ndiví ta íyotu na koo nu̱ú ñuʼú yóʼo ndiʼi tiempo. Tá xa̱a̱ ndákanika̱xi̱níyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta saátu ña̱ ke̱ʼé Jehová, xáa̱yó kúʼvi̱níka-iniyó xíniyó Jehová (1 Ped. 3:18). Ña̱kán nda̱a̱ táki̱ʼva ke̱ʼé na̱ hermano na̱ xi̱ndo̱o tiempo xi̱naʼá, saátu miíyó káʼa̱nyó xíʼin inkana ña̱ ná ndatakana xíʼinyó ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ta keʼéyóña nda̱a̱ táki̱ʼva ke̱ʼé miíraña. w23.01 21 párr. 6, 7

Ta̱ Jesús sa̱náʼa̱ra na̱ yiví ndáaña va̱ʼa keʼé Reino Ndióxi̱. Táxiníyó tíxa̱ʼvi xa̱ʼa̱ ña̱ ni̱xi̱ʼi̱ra xa̱ʼa̱yó chi ña̱yóʼo chíndeétáʼanña xíʼinyó ña̱ va̱ʼa kutáʼanyó xíʼin Jehová ta saátu xíʼin mií ta̱ Jesús. Saátu miíyó na̱ kándíxaní ta̱ Jesús kivi ni̱ʼíyó ña̱ kutakuyó ndiʼi tiempo ta kivitu ndikóyó kuniyó na̱ veʼeyó na̱ ni̱xi̱ʼi̱ (Juan 5:​28, 29; Rom. 6:23). Kǒo ña̱ níkeʼévíyó ña̱ va̱ʼa ndakiʼinyó ndiʼi ña̱ va̱ʼa yóʼo, ta ni va̱ása kiviví chaʼviyó ndiʼi ña̱ ke̱ʼé Jehová xíʼin ta̱ Jesús xa̱ʼa̱yó (Rom. 5:​8, 20, 21). Soo, ¿ndáa ki̱ʼva náʼa̱yó ña̱ táxiyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ke̱ʼéna xa̱ʼa̱yó? Ná kotoyó. Saátu miíyó kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ ke̱ʼé Jehová xíʼin ta̱ Jesús xa̱ʼa̱yó. ¿Ndáa ki̱ʼva keʼéyóña? Ná kuniñúʼuyó tiempoyó, ndee̱yó xíʼin xu̱ʼúnyó ña̱ va̱ʼa keʼékayó chiñu Ndióxi̱. Tá kúú, kivi ku̱ʼu̱nyó kachíñuyó nu̱ú kúva̱ʼa veʼe nu̱ú ndásakáʼnuyó Jehová á ña̱ chindeétáʼanyó xíʼinna ña̱ ndasaviíyóña. w23.01 26 párr. 3; 28 párr. 5

Na̱ kaʼndachíñu xíʼin ta̱ Jesús ku̱a̱ʼáníka millón na̱ yiví kaʼndachíñuna nu̱ú iníísaá ñuyǐví. Iin chiñu káʼnuní kúú ña̱ ta̱xi Jehová ndaʼa̱ na̱ 144,000 (Apoc. 5:10). Ley ña̱ ta̱xi Jehová ndaʼa̱ ta̱ Moisés, xi̱ka̱ʼa̱nña xa̱ʼa̱ na̱ su̱tu̱ ña̱ xi̱xiniñúʼu kiʼinna kuenta xíʼin na̱ ñuu Israel ña̱ kǒo kue̱ʼe̱ kiʼin miína ta vií kutáʼanna xíʼin Jehová. “Ña̱ Ley yóʼo ña̱ xi̱ndana̱ʼa̱ kuití ña̱ʼa ña̱ va̱ʼa ña̱ kixi chí nu̱únínu xi̱kuuña”, ña̱kán kúnda̱a̱-iniyó ña̱ na̱ kaʼndachíñu xíʼin ta̱ Jesús kuumiína iin chiñu ña̱ ndáyáʼviní: ña̱ kiʼinna kuenta xíʼin na̱ yiví ña̱ kǒo kue̱ʼe̱ kiʼin miína ta saátu ña̱ va̱ʼa kitáʼanna xíʼin Ndióxi̱ (Heb. 10:1). Ta̱ʼán kunda̱a̱-iniyó ndáa ki̱ʼva natúʼun táʼan na̱ kaʼndachíñu yóʼo xíʼin na̱ koo nu̱ú ñuʼú yóʼo tá ná koona rey xíʼin su̱tu̱. Ni nda̱a̱ ndáaka chiñu ná taxi Jehová ndaʼa̱ na̱ kaʼndachíñu kán, kúnda̱a̱-iniyó ña̱ viíní kuniʼina yichi̱ nu̱ú na̱ yiví na̱ kundoo nu̱ú ñuʼú yóʼo (Apoc. 21:​3, 4) w22.12 11 párr. 11-13

Iin xa̱ʼa̱ ña̱ káʼa̱nyó xíʼin na̱ yiví ña̱ ná ku̱ʼu̱nna xíʼinyó Conmemoración kúú, ña̱ kúni̱yó ña̱ ná kunda̱a̱-inina xa̱ʼa̱ ña̱ ke̱ʼé Jehová xíʼin ta̱ Jesús xa̱ʼa̱ ndiʼiyó (Juan 3:16). Kúni̱yó ña̱ ndiʼi ña̱ ná kuniso̱ʼona ñuú saá ná chindeétáʼanña xíʼinna ña̱ kuni̱kana sakúaʼana xa̱ʼa̱ Jehová ta xa̱a̱na ndasakáʼnunara. Ta saátu káʼa̱nyó xíʼin inkana ña̱ ná ku̱ʼu̱nna Conmemoración xíʼinyó, ta na̱yóʼo kúú, na̱ inactivo, kánayóna ña̱ ná ku̱ʼu̱nna Conmemoración xíʼinyó chi ña̱yóʼo chindeétáʼannña xíʼinna ña̱ ndákaʼánna ña̱ kúʼvi̱kava-ini Jehová xínirana. Ta kúsi̱íní-iniyó tá xítoyó ña̱ ku̱a̱ʼání na̱yóʼo xáʼa̱n Conmemoración. Ñuú saá va̱ʼaní chíndeétáʼanña xíʼinna chi ndákaʼánna ña̱ si̱íní ni̱xi̱yona tá xi̱ndasakáʼnuna Jehová (Sal. 103:​1-4). Sava na̱ yiví kandíxavana ku̱ʼu̱nna Conmemoración ta inkatuna va̱ása kandíxavína, soo nisaá chíka̱a̱níyó ndee̱ ña̱ kánayó ndiʼina, ta Jehová chíndayáʼviníra na̱ yiví na̱ ni̱xa̱ʼa̱n kán (Luc. 15:7; 1 Tim. 2:​3, 4). w23.01 20 párr. 1; 22, 23 párr. 9-11

Ñuú tá kúma̱ní kuvi ta̱ Jesús, ndu̱kúra iin ña̱ʼa ña̱ ndáyáʼviní nu̱ú yivára: ni̱ka̱ʼa̱nra xíʼinra ña̱ ná kundaara na̱ discípulora (Juan 17:​15, 20). Ndiʼi tiempova ndáa Jehová na̱ ndásakáʼnu miíra. Soo xi̱kunda̱a̱-ini ta̱ Jesús ña̱ ndeéka ixandi̱va̱ʼa ta̱ Ndi̱va̱ʼa xíʼin na̱ discípulora, ña̱kán xíniñúʼu chindeétáʼan Jehová xíʼinna. Xa̱ʼa̱ ña̱ xáʼndachíñu ta̱ Ndi̱va̱ʼa ñuyǐví yóʼo, ndeéní íyo tu̱ndóʼo nu̱ú na̱ ndásakáʼnu Jehová. Ta xa̱ʼa̱ ña̱yóʼo, kivi ixayo̱ʼvi̱ña xíʼinyó ña̱ nda̱kú koo iniyó xíʼin Jehová. Soo va̱ása xíniñúʼu yi̱ʼvíyó chi Jehová kíʼinra kuenta xíʼinyó ta kúnda̱a̱-inira xíʼin ndiʼi tu̱ndóʼo ña̱ yáʼayó nu̱ú ta íyo tu̱ʼvara ña̱ chindeétáʼanra xíʼinyó. Ña̱kán, xítova Jehová ña̱ kéʼé na̱ kúʼvi̱-ini xíniñaʼá ña̱ va̱ʼa sakǎkurana (Sal. 33:​18-20). w22.08 8 párr. 1, 2

Tá xíyo ña̱ Conmemoración saá náʼa̱yó ña̱ chíndayáʼviníyó ña̱ ke̱ʼé ta̱ Jesús xa̱ʼa̱yó, tá kúú, táváyó tiempo ña̱ ka̱ʼa̱nyó xíʼin Jehová ta saátu ña̱ ndakanixi̱níyó nda̱chun kúú ña̱ ni̱xi̱ʼi̱ ta̱ Jesús xa̱ʼa̱yó. Saátu kánayó ku̱a̱ʼání na̱ yiví ña̱ ku̱ʼu̱nna Conmemoración xíʼinyó, ta va̱ása táxiyó ña̱ kasi nda̱a̱ ni iin ña̱ʼa nu̱úyó ña̱ va̱ʼa ku̱ʼu̱nyó. Tá xíyo Conmemoración káʼa̱nna xíʼinyó, ¿nda̱chun xi̱niñúʼu kuvi ta̱ Jesús xa̱ʼa̱yó? Ta saátu ¿ndáa ki̱ʼva ndóo ku̱a̱chiyó xa̱ʼa̱ ña̱ ni̱xi̱ʼi̱ra xa̱ʼa̱yó? Ta saátu sándakaʼánna miíyó ndáana xíxi si̱táva̱ʼa ta saátu xíʼina tá vino, ta káʼa̱nna xíʼinyó ndáaña ndána̱ʼa ña̱yóʼo (Luc. 22:​19, 20). Tá xa̱a̱ táxina discurso káʼa̱nna ndáaña ndátuyó ndakiʼinyó nu̱ú ñuʼú yóʼo (Is. 35:​5, 6; 65:​17, 21-23). Ndáyáʼviní kunda̱a̱-iniyó xa̱ʼa̱ ndiʼi ña̱yóʼo. w23.01 20 párr. 2; 21 párr. 4

Xa̱ʼa̱ ña̱ ta̱xi Ndióxi̱ se̱ʼera ña̱ ni̱xi̱ʼi̱ra xa̱ʼa̱yó kivi ndoo ku̱a̱chiyó, tasaá kúú ña̱ ni̱ʼíyó ña̱ kutakuyó ndiʼi tiempo (Mat. 20:28). Ta̱ apóstol Pablo ni̱ka̱ʼa̱nra: “Xa̱ʼa̱ iin ta̱a kúú ña̱ ki̱xáʼa xíʼi̱yó, ta xa̱ʼa̱ iin ta̱a kúú ña̱ ndataku na̱ ni̱xi̱ʼi̱. Saáchi xa̱ʼa̱ ta̱ Adán kúú ña̱ ndiʼina xíʼi̱, ta saátu xa̱ʼa̱ ta̱ Cristo kúú ña̱ ndiʼina ndataku” (1 Cor. 15:​21, 22). Ta̱ Jesús sa̱náʼa̱ra na̱ discípulora ña̱ ná ka̱ʼa̱nna xíʼin Ndióxi̱ ña̱ ná kixaa̱ ki̱vi̱ ña̱ kaʼndachíñura ta ná koo ña̱ kúni̱ miíra nu̱ú ñuʼú yóʼo (Mat. 6:​9, 10). Ta iin ña̱ kúni̱ Ndióxi̱ koo nu̱ú ñuʼú yóʼo kúú ña̱ ná koo na̱ yiví ndiʼi tiempo. Xa̱ʼa̱ ña̱yóʼo kúú ña̱ nda̱kaxin Jehová se̱ʼera ta̱ Jesús ña̱ koora rey, ta xa̱a̱ sándatakara 144,000 na̱ yiví ña̱ kaʼndachíñuna xíʼin ta̱ Jesús ña̱ va̱ʼa saxínura ña̱ kúni̱ra (Apoc. 5:​9, 10). w22.12 5 párr. 11, 12

Tá xí’i̱ iin na̱ kúʼvi̱ní-iniyó xíniyó, ndeéní kúsuchí-iniyó. Sana tá ndákanixi̱níyó xa̱ʼa̱ ña̱ ndeéní ndo̱ʼona tá kúma̱ní kuvina ndeéní xóʼvi̱yó. Ta sana tá yáʼa tiempo ndákaʼányó xa̱ʼa̱ sava ña̱ ke̱ʼé na̱yóʼo ña̱ chíndeétáʼan xíʼinyó kusi̱í-iniyó. Tá kúú, iin ña̱ sa̱náʼa̱na miíyó á iin ña̱ ke̱ʼéna á ni̱ka̱ʼa̱nna ña̱ va̱ʼa chika̱a̱na ndee̱ xíʼinyó á saátu iin ña̱ sa̱kúaku̱ miíyó. Saá ndóʼoyó tá ndákanixi̱níyó xa̱ʼa̱ ña̱ ni̱xo̱ʼvi̱ní ta̱ Jesús tá ni̱xi̱ʼi̱ra. Ta tá xíyo Conmemoración saá kúú ña̱ káʼviníkayó xa̱ʼa̱ ña̱ ndáyáʼviní ke̱ʼéra xa̱ʼa̱yó, ta kúsuchíní-iniyó xa̱ʼa̱ ña̱ ndeéní ni̱xo̱ʼvi̱ra xa̱ʼa̱yó (1 Cor. 11:​24, 25). Soo kúsi̱íní-iniyó tá ndákanixi̱níyó xa̱ʼa̱ ña̱ ke̱ʼéra xíʼin ña̱ ni̱ka̱ʼa̱nra tá ni̱xi̱yora nu̱ú ñuʼú yóʼo. Ta saátu tá ndakanixi̱níyó xa̱ʼa̱ ña̱ kéʼéra vitin ta saátu xa̱ʼa̱ ña̱ keʼéra chí nu̱únínu, táxiníña ndee̱ ndaʼa̱yó. w23.01 26 párr. 1, 2

Ndeéní ku̱suchí-ini na̱ discípulo tá ni̱xi̱ʼi̱ ta̱ Jesús. Na̱yóʼo xi̱kuʼvi̱ní-inina xi̱xininara soo tá kǒokara níxi̱yo xíʼinna nda̱kanixi̱nína ña̱ kǒoka ña̱ kivi keʼéna (Luc. 24:​17-21). Soo tándi̱ʼi, ta̱ Jesús ki̱tara nu̱úna ta ni̱ka̱ʼa̱nra xíʼinna ña̱ xa̱a̱ sáxi̱nura profecía ña̱ va̱xi nu̱ú Biblia. Saátu ta̱xira iin chiñu ña̱ ndáyáʼviní ndaʼa̱na (Luc. 24:​26, 27, 45-48). Tá ndi̱kó ta̱ Jesús chí ndiví, na̱ discípulora va̱ása níkusuchíka-inina, chi ndeéní ku̱si̱í-inina. Xi̱kusi̱íní-inina chi ku̱ndaa̱-inina ña̱ tákuva ta̱ Jesús ta chindeétáʼanra xíʼinna ña̱ saxínuna chiñu ña̱ ta̱xira ndaʼa̱na. Ta xa̱ʼa̱ ña̱ xi̱kusi̱íní-inina, ña̱yóʼo chi̱ndeétáʼanña xíʼina ña̱ ndakundeéna nda̱sakáʼnuna Jehová (Luc. 24:​52, 53; Hech. 5:42). Ná kundiku̱nyó yichi̱ ña̱ sa̱ndákoo na̱ discípulo ta̱ Jesús nu̱úyó tá siʼna chiñu Ndióxi̱ xíniñúʼu kundi̱ʼi̱-iniyó xa̱ʼa̱. Ña̱ nda̱a̱ kúúña xíniñúʼuva chika̱a̱yó ndee̱ ña̱ kachíñuyó nu̱ú Jehová, soo ta̱kán káʼa̱nra taxira ku̱a̱ʼání ña̱ va̱ʼa ndaʼa̱yó tá siʼnaka chiñura ná kundi̱ʼi̱-iniyó xa̱ʼa̱ (Prov. 10:22). w23.01 30, 31 párr. 15, 16

Nda̱a̱ ni iinyó va̱ása kúni̱yó keʼéyó nda̱a̱ táki̱ʼva ke̱ʼé ta̱ Adán xíʼin ñá Eva. Ta ña̱ va̱ása keʼéyó nda̱a̱ táki̱ʼva ke̱ʼéna, xíniñúʼu kuxini̱ va̱ʼayó Jehová, chindayáʼviyó ña̱ va̱ʼa ña̱ kúúmiíra ta chika̱a̱yó ndee̱ ña̱ kunda̱a̱-iniyó xíʼin ki̱ʼva ña̱ ndákanixi̱níra. Tá saá ná keʼéyó, xa̱a̱yó kuʼvi̱níka-iniyó kuniyóra. Ná ndakaʼányó xa̱ʼa̱ ña̱ ke̱ʼé ta̱ Abrahán, ta̱kán xi̱kuʼvi̱ní-inira xi̱xinira Jehová. Ta ni sava yichi̱ xi̱ i̱xayo̱ʼvi̱ña xíʼinra kunda̱a̱-inira nda̱chun kúú ña̱ nda̱kaxin Jehová keʼéra sava ña̱ʼa, ta̱ Abrahán va̱ása ní ixaso̱ʼora nu̱ú Jehová. Chi ña̱ ke̱ʼéra kúú ña̱ chi̱kaa̱ra ndee̱ ña̱ kuxini̱ va̱ʼakarara. Tá kúú, tá na̱kunda̱a̱-inira ña̱ sandíʼi-xa̱ʼa̱ Jehová ñuu Sodoma xíʼin ñuu Gomorra. Ni̱yi̱ʼvíra ña̱ sandíʼi-xa̱ʼa̱ Jehová na̱ kéʼé ña̱ va̱ʼa xíʼin na̱ kéʼé ña̱ va̱ása va̱ʼa. Ta nda̱kanixi̱níra ña̱ va̱ása keʼéví Ndióxi̱ ña̱yóʼo, ña̱kán ni̱nda̱ka̱tu̱ʼunrara. Ta saátu Jehová vitá ni̱xi̱yo-inira xíʼin ta̱ Abrahán ta nda̱kuiinvara yuʼúra. Tándi̱ʼi na̱túʼun táʼanra xíʼin Jehová, ni̱xa̱a̱ra kunda̱a̱-inira ña̱ kúnda̱a̱va-ini Jehová xíʼin ña̱ ndíka̱a̱ níma̱ iin na̱ yiví ta va̱ása sándiʼi-xa̱ʼa̱ Jehová na̱ nda̱kú-ini xíʼinra, chi iinlá na̱ yiví na̱ kéʼé ña̱ va̱ása va̱ʼa kúú na̱ sándiʼi-xa̱ʼa̱ra (Gén. 18:​20-32). w22.08 28 párr. 9, 10

Tá ku̱i̱ya̱ 455 tiempo xi̱naʼá, tá ndi̱ʼi nda̱saviína nama̱ ña̱ ñuu Jerusalén, ta̱ Nehemías ta̱xira chiñu ndaʼa̱ sava na̱ ta̱a ñuu kán saáchi xi̱kandíxanírana. Ta iin ta̱ ta̱xira chiñu ndaʼa̱ xi̱kuu ta̱ Hananías, ta̱ xi̱kiʼin kuenta xíʼin veʼe nu̱ú xi̱ndoo na̱ soldado. Biblia káʼa̱nña xa̱ʼa̱ ta̱ Hananías ña̱ va̱ʼaní xi̱ndaa-ini inkanara, ta va̱ʼaní xi̱ ixato̱ʼóra Ndióxi̱ (Neh. 7:2). Xi̱kuʼvi̱ní-inira xi̱xinira Jehová ta saátu xi̱ ixato̱ʼónírara, ña̱yóʼo chi̱ndeétáʼan xíʼinra ña̱ viíní keʼéra chiñu ña̱ xi̱ndakiʼinra. Ña̱yóʼo chindeétáʼantu xíʼin miíyó ña̱ va̱ʼa ndasakáʼnukayó Jehová ta saátu ña̱ va̱ʼa kandíxa inkana miíyó. Ná kotoyó ndáaña ke̱ʼé ta̱ Tíquico, ta̱yóʼo va̱ʼaní xi̱kitáʼanra xíʼin ta̱ Pablo ña̱kán va̱ʼaní xi̱kandíxa ta̱ Pablo ta̱yóʼo. Ni̱ka̱ʼa̱n ta̱ Pablo xa̱ʼa̱ra “ta̱ nda̱kúní íyo ini xíʼin tátayó Jesús” (Efes. 6:​21, 22). Va̱ása níxindaa kuití inira ta̱ Tíquico ña̱ ndataxira carta ndaʼa̱ na̱ hermano na̱ ñuu Éfeso xíʼin na̱ ñuu Colosas, chi saátu xi̱kandíxa ta̱ Pablo ta̱yóʼo ña̱ chika̱a̱ra ndee̱ xíʼin na̱ hermano ta sandíkora-inina. Tá ke̱ʼé ta̱ Tíquico saátu kéʼé na̱ hermanoyó tiempo vitin, chi nda̱kúní-inina ta kándíxaníyóna ta na̱yóʼo chíndeétáʼannína xíʼinyó ña̱ sakúaʼakayó xa̱ʼa̱ Ndióxi̱ (Col. 4:​7-9). w22.09 9, 10 párr. 5, 6

Ki̱ʼva 13 ku̱i̱ya̱ ku̱a̱ʼání tu̱ndóʼo ni̱ya̱ʼa ta̱ José nu̱ú. Nda̱a̱ kivi xa̱a̱ra ndakanixi̱níra ña̱ va̱ása kúʼvi̱ka-ini Jehová xínirara á ña̱ sa̱ndákoo ndaʼa̱rara. Soo ta̱ José va̱ása níndakava-inira. Ña̱ ke̱ʼéra kúú ña̱ viíní nda̱kanixi̱níra ta va̱ása níndi̱ʼi̱ní-inira. Tá ni̱xa̱a̱ na̱ ñanira nu̱úra, ta̱yóʼo ni̱na̱ʼa̱ra ña̱ kúʼvi̱ní-inira xínirana ta i̱xakáʼnu-inira xa̱ʼa̱na, kǒo níkeʼéra xíʼinna nda̱a̱ táki̱ʼva ke̱ʼé miína xíʼinra (Gén. 45:​4, 5). ¿Nda̱chun va̱ása níkeʼéra nda̱a̱ táki̱ʼva keʼéna xíʼinra? Saáchi viíní nda̱kanixi̱níra. Nu̱úka ña̱ ndakanixi̱níra xa̱ʼa̱ ndiʼi tu̱ndóʼo ña̱ ni̱ya̱ʼara nu̱ú, nda̱kanixi̱níra xa̱ʼa̱ ña̱ xi̱kuni̱ Jehová (Gén. 50:​19-21). ¿Ndáaña sákuaʼayó xíʼin ña̱yóʼo? Tá iinna kéʼéna ña̱ va̱ása va̱ʼa xíʼinyó ná kǒo ndakava-iniyó ta ndakanixi̱níyó ña̱ xa̱a̱ sa̱ndákoo ndaʼa̱ Jehová miíyó. Va̱ʼaka ná ndakanixi̱níyó ndáa ki̱ʼva chíndeétáʼanra xíʼinyó ña̱ va̱ʼa yáʼayó nu̱ú tu̱ndóʼo yóʼo. Ta saátu ná koo káʼnu-iniyó xa̱ʼa̱ inkana, ta ná ndakaʼányó chi na̱ kúʼvi̱-ini xíni inkana ndiʼi tiempo íyo tu̱ʼvana ña̱ koo káʼnu-inina xa̱ʼa̱ táʼanna. w22.11 21 párr. 4

Ta̱ profeta Daniel xi̱nira iin visión nu̱ú ni̱na̱ʼa̱ káxiña ña̱ iinlá Jehová kúú ta̱ chíñu káʼnu. Siʼna xi̱nira ku̱mí kití yukú tí ndána̱ʼa̱ na̱ chíñu na̱ ni̱xi̱yo tá ya̱chi̱ ta saátu na̱ íyo tiempo vitin. Tá kúú, Babilonia, Medopersia, Grecia xíʼin Roma, Reino Unido ta saátu Estados Unidos ña̱ xáʼndachíñu tiempo vitin (Dan. 7:​1-3, 17). Tándi̱ʼi, ta̱ Daniel xi̱nira ña̱ íyo Jehová nu̱ú iin trono chí ndiví (Dan. 7:​9, 10). Visión ña̱ xi̱ni ta̱ Daniel, xi̱nira ña̱ ki̱ndaa Jehová chiñu ndaʼa̱ na̱ chíñu na̱ íyo nu̱ú ñuʼú yóʼo ta sandáya̱ʼaraña ndaʼa̱ na̱ ndakúka na̱ xíniñúʼu keʼé chiñu yóʼo. ¿Ndáana kúú na̱yóʼo? Ta̱yóʼo kúú ta̱ káʼa̱nna xíʼin se̱ʼe ta̱a ta̱ kúú Jesucristo xíʼin na̱ yi̱i̱ na̱ nda̱kaxin mií Ndióxi̱ ta̱ káʼnu, na̱yóʼo kúú na̱ 144,000 na̱ kaʼndachíñu xíʼin ta̱ Jesús ndiʼi tiempo (Dan. 7:​13, 14, 18). Xíʼin ña̱yóʼo kúnda̱a̱-iniyó ña̱ iinlá Jehová kúú ta̱ káʼnu. Ña̱ xi̱ni ta̱ Daniel nu̱ú visión yóʼo kúú ña̱ xa̱a̱ ni̱ka̱ʼa̱nra xa̱ʼa̱ tá ya̱chi̱. Ta̱ profeta yóʼo ni̱ka̱ʼa̱nra xa̱ʼa̱ Ndióxi̱ ta̱ íyo chí ndiví ña̱ kíndaara chiñu ndaʼa̱ na̱ rey ta táxiraña ndaʼa̱ inkana (Dan. 2:​19-21). w22.10 14, 15 párr. 9-11