Abril

Kivi ndakanixi̱níún xa̱ʼa̱ ña̱yóʼo: ¿Ndáaña kéʼíi̱ tá táxina iin consejo ndaʼíi̱? ¿Á ndákunii̱ ku̱a̱chii̱, á káʼi̱n ña̱ íyo iin xa̱ʼa̱va kúú ña̱ ni̱ki̱ʼvii̱ ku̱a̱chi? ¿Á chíka̱i̱ ku̱a̱chi inkana xa̱ʼa̱ ña̱ ke̱ʼíi̱? Tá káʼviún xa̱ʼa̱ na̱ ta̱a xíʼin ná ñaʼá na̱ nda̱kúní ni̱xi̱yo ini, ndakanixi̱ní ndáaña ke̱ʼéna tá ndo̱ʼona ña̱yóʼo. Ña̱kán tá káʼviún xa̱ʼa̱ iin tá iin na̱ va̱xi nu̱ú tu̱ʼun Ndióxi̱, ndakanixi̱ní xa̱ʼa̱ ña̱yóʼo: “¿Ndáaña keʼíi̱ ña̱ va̱ʼa nda̱kú koo inii̱ táki̱ʼva ni̱xi̱yo na̱ xi̱ndasakáʼnu Jehová tiempo xi̱naʼá?”. Saátu íyo ku̱a̱ʼání ña̱ kivi sakúaʼayó xíʼin ña̱ kéʼé na̱ hermanoyó, kúúna na̱ va̱lí á na̱ xa̱a̱ chée. ¿Á kivi ndakanixi̱níún xa̱ʼa̱ iin na̱ ku̱a̱ʼa̱n congregación nu̱ú ndíka̱ún na̱ yáʼa nu̱ú iin tu̱ndóʼo? Tá kúú na̱ va̱lí na̱ íxandúxana xíʼin keʼé ña̱ va̱ása va̱ʼa, á tá kúú na̱ hermano na̱ va̱ása táxi na̱ veʼena sakúaʼana xa̱ʼa̱ Jehová, á na̱ ndeéndóʼo. Tá ná kundiku̱nyó yichi̱na, sakúaʼayó ku̱a̱ʼání ña̱ʼa ña̱ kivi chindeétáʼan xíʼinyó ya̱ʼayó nu̱ú tu̱ndóʼo. (Heb. 13:7). w22.04 13 párr. 13, 14

Tá yáʼayó nu̱ú iin tu̱ndóʼo, kúsi̱íní-iniyó xa̱ʼa̱ ña̱ tává na̱ anciano tiempo ña̱ va̱ʼa kuniso̱ʼona ña̱ nátúʼunyó xíʼinna ta sándi̱kona-iniyó. Kúsi̱ínítu-iniyó tá iin na̱ precursor na̱ xíni̱níka chíndeétáʼanna xíʼinyó ña̱ va̱ʼa kaʼviyó xíʼin iin na̱ yiví, ta káʼa̱nna xíʼinyó ndáaña kúú ña̱ xíniñúʼu keʼéyó ña̱ va̱ʼa viíka sanáʼa̱yó. Ndiʼi na̱ hermano yóʼo kúsi̱íní-inina tá chíndeétáʼanna xíʼinyó. Saátu miíyó kusi̱íní-iniyó tá ná chindeétáʼanyó xíʼin inkana. Ná kachiyó ña̱ kíxáʼayó ndákanixi̱níyó ña̱yóʼo: “Kúnii̱ keʼíi̱ ku̱a̱ʼáka chiñu ti̱xin congregación”. Soo ixayo̱ʼvi̱vaña xíʼinyó saxínuyóña chi va̱ása kunda̱a̱ káxi iniyó ndáaña kúú ña̱ kivi keʼéyó, ña̱kán va̱ʼaka iin kuitíña ná ndaka̱xinyó keʼéyó tasaá kunda̱a̱ káxi iniyó ndáaña kúúña. Ta nu̱ú iin tutu kivi kaʼyíyó ña̱ kúni̱yó keʼéyó ta saátu kaʼyíyó ndáa ki̱ʼva saxínuyóña. w22.04 25 párr. 12, 13

Tiempo ña̱ ndóoyó vitin Jehová sándatakara ku̱a̱ʼání na̱ yiví ta sánáʼa̱rana ndáa ki̱ʼva koona nu̱ú ñuyǐví xa̱á (Apoc. 7:​9, 10). Ni nda̱taʼvíní ñuyǐví ña̱ ndóoyó soo na̱ yiví na̱ sándataka Ndióxi̱ chíka̱a̱nína ndee̱ ña̱ va̱ása sa̱a̱-inina kunitáʼanna. Na̱yóʼo xa̱a̱ sa̱ndákoona ndiʼi ña̱ va̱ása va̱ʼa xi̱keʼéna tá ya̱chi̱ (Miq. 4:3). Nu̱úka ña̱ ku̱ʼu̱nna nu̱ú guerra, na̱yóʼo chíndeétáʼanna xíʼin na̱ yiví na̱ ndixa kúni̱ kutaku ndiʼi tiempo ta sánáʼa̱nana ña̱ nda̱a̱ xa̱ʼa̱ Ndióxi̱ xíʼin xa̱ʼa̱ ña̱ kúni̱ra keʼéra (1 Tim. 6:19). Ta xa̱ʼa̱ ña̱ chíndeétáʼanna xíʼin reino Ndióxi̱, sana nda̱a̱ kivi ixandi̱va̱ʼa na̱ veʼena xíʼinna á kuma̱ní xu̱ʼún nu̱úna, soo Jehová kǒo sándakoorana chi táxira ña̱ xíniñúʼuna (Mat. 6:​25, 30-33; Luc. 18:​29, 30). Ndiʼi ña̱yóʼo náʼa̱ña nu̱úyó ña̱ tá ná kaʼndachíñu ta̱ Jesús viíní koo ta sáxi̱nura ndiʼi ña̱ xi̱kuni̱ Jehová. w22.12 5 párr. 13

Tá ná ndiʼi ña̱ 1,000 ku̱i̱ya̱, ndiʼi na̱ yiví na̱ kundoo nu̱ú ñuʼú yóʼo va̱ása kuumiíkana ku̱a̱chi ña̱ sa̱ndákoo ta̱ Adán ndaʼa̱na, ta va̱ása xo̱ʼvi̱kana (Rom. 5:12). Ta nda̱a̱ ni loʼoka chiʼña ña̱ sa̱ndákoo ta̱ Adán ndaʼa̱ na̱ yiví va̱ása kookaña. Ña̱kán tá ná ndiʼi ña̱ 1,000 ku̱i̱ya̱, ndiʼi na̱ yiví na̱ kundoo nu̱ú ñuʼú yóʼo kutakuna ndiʼi tiempo ta va̱ása kookana na̱ yiví ku̱a̱chi (Apoc. 20:5). Kúnda̱a̱-iniyó ña̱ su̱ví iin na̱ yiví ku̱a̱chi níxi̱kuu ta̱ Jesús ta nda̱kúní ni̱xi̱yo inira xíʼin Ndióxi̱ tá xi̱tondosó ta̱ Ndi̱va̱ʼa ta̱yóʼo. Soo, ¿á saá nda̱kú koo ini na̱ yiví na̱ kǒoka ku̱a̱chi kúúmií tá ná kotondosó ta̱ Ndi̱va̱ʼa miína nu̱ú ñuyǐví xa̱á? Iin tá iin na̱yóʼo na̱ʼa̱na á nda̱kú koo inina xíʼin Ndióxi̱ tá xa̱a̱ ná ndiʼi ña̱ 1,000 ku̱i̱ya̱, chi saá kita ta̱ Ndi̱va̱ʼa ya̱vi̱ naá nu̱ú kundika̱a̱ra (Apoc. 20:7). Ta na̱ nda̱kúní ná koo ini ndakiʼinna ña̱ kutakuna ndiʼi tiempo, ta sa̱ñána ndaʼa̱ tu̱ndóʼo (Rom. 8:21). Soo na̱ yiví na̱ va̱ása kandíxa Ndióxi̱ na̱ ndiʼi-xa̱ʼa̱ koona (Apoc. 20:​8-10). w22.05 19 párr. 18, 19

Profecía yóʼo ni̱xi̱nuña tá chi̱kaa̱ ta̱ Ndi̱va̱ʼa ini na̱ judío xíʼin na̱ ñuu Roma ña̱ kaʼnína se̱ʼe Ndióxi̱ (Luc. 23:​13, 20-24). Tá túkue̱ʼe̱ si̱ʼndi̱-xa̱ʼa̱ iin na̱ yiví kǒo kívi kakana, saáchi nda̱a̱ yáʼa ki̱vi̱ saáví kíxáʼana xíkana. Ta ki̱ʼva saá ndo̱ʼo ta̱ Jesús tá ni̱xi̱ʼi̱ra, saáchi u̱ni̱ ki̱vi̱ xi̱ndika̱a̱ra ti̱xin ya̱vi̱, ña̱kán kǒo níkivika keʼéra nda̱a̱ ni iin chiñu (Mat. 16:21). Ta ña̱ va̱ʼa xi̱nu profecía ña̱ va̱xi nu̱ú Génesis 3:​15, ta̱ Jesús xi̱niñúʼu ndatakura. Saáchi profecía káʼa̱nña xa̱ʼa̱ ta̱ se̱ʼe ñá ñaʼá, ña̱ ta̱yóʼo kúú ta̱ ku̱a̱ñi̱ndosó xi̱ní tí ko̱o̱ á ku̱niʼnira xi̱nírí. Ta ña̱ va̱ʼa keʼé ta̱ Jesús ña̱yóʼo xi̱niñúʼu ndatakura. Xa̱ʼa̱ ña̱kán tá ni̱ya̱ʼa u̱ni̱ ki̱vi̱ ña̱ ni̱xi̱ʼi̱ra, Jehová sa̱ndátakurara ta ndu̱ura iin espíritu ta ndiʼi tiempo kutakura. Tá ná kixaa̱ ki̱vi̱ ña̱ xa̱a̱ nda̱kaxin Jehová, ta̱ Jesús sandíʼi-xa̱ʼa̱ra ta̱ Ndi̱va̱ʼa (Heb. 2:14). Na̱ 144,000 chindeétáʼanna xíʼin ta̱ Jesús ña̱ sandíʼi-xa̱ʼa̱na ndiʼi ña̱ va̱ása va̱ʼa íyo nu̱ú ñuʼú yóʼo, ta saátu sandíʼi-xa̱ʼa̱na ndiʼi na̱ sáa̱-ini xíni Ndióxi̱ na̱ kúú se̱ʼe tí ko̱o̱ (Apoc. 17:14; 20:​4, 10). w22.07 16 párr. 11, 12

Ndóʼó na̱ íyo se̱ʼe, chindeétáʼanndó xíʼin se̱ʼendó ña̱ vií ndaka̱xinna na̱ kutáʼan xíʼinna. Tu̱ʼun Ndióxi̱ káxiní káʼa̱nña xíʼinyó ña̱ na̱ kítáʼan xíʼinyó kivi chindaʼána miíyó keʼéyó ña̱ va̱ʼa á ña̱ va̱ása va̱ʼa. Ña̱kán, ¿á xíni̱ndó ndáana kúú na̱ kítáʼan xíʼin se̱ʼendó? ¿Ndáa ki̱ʼva chindeétáʼanndó xíʼinna ña̱ kutáʼanna xíʼin na̱ kúʼvi̱-ini xíni Jehová? (1 Cor. 15:33). Tá kéʼéndó iin ña̱ʼa ña̱ va̱ʼa koo si̱índó xíʼin se̱ʼendó, kivi kanandó na̱ hermano na̱ va̱ʼaní kítáʼan xíʼin Jehová ña̱ koona xíʼinndó ki̱vi̱ kán (Sal. 119:63). Iin ta̱ hermano ta̱ naní Tony káchira: “Xa̱a̱ ku̱a̱ʼání ku̱i̱ya̱ kánandi̱ na̱ hermano á ná hermana na̱ xa̱a̱ síín ku̱i̱ya̱ á na̱ xa̱a̱ síín ñuu, ña̱ va̱ʼa kixina kuxuna xíʼinndi̱ á ña̱ va̱ʼa kutáʼanna xíʼinndi̱ tá káʼvindi̱ xíʼin na̱ va̱lí se̱ʼendi̱. Saáchi ña̱yóʼo chíndeétáʼanña xíʼinndi̱ ña̱ kuxini̱ndi̱ na̱ hermano na̱ kúʼvi̱ní-ini xíni Jehová ta xíʼin ña̱ si̱í-ini káchíñuna nu̱úra. Na̱yóʼo nátúʼunna xíʼinndi̱ xa̱ʼa̱ ña̱ ndóʼona, ta kíʼinndi̱ kuenta ña̱ kúsi̱íní-inina nátúʼunna xa̱ʼa̱ Ndióxi̱. Ña̱yóʼo chíndeétáʼanña xíʼin se̱ʼendi̱ ña̱ kuyatinkana nu̱ú Jehová”. w22.05 29, 30 párr. 14, 15

Tá ndákutáʼan na̱ anciano xíʼin iin na̱ ni̱ki̱ʼvi ku̱a̱chi, ña̱ kúni̱na kúú ña̱ ndaka̱xinna keʼéna táʼan ña̱ xa̱a̱ nda̱kaxin Jehová chí ndiví. ¿Ndáa ki̱ʼva chíndeétáʼan ña̱yóʼo xíʼin na̱ congregación? Tá va̱ása ndándikó-ini na̱ ni̱ki̱ʼvi ku̱a̱chi, távánana ti̱xin congregación, tasaá va̱ása chika̱a̱na ini inka na̱ hermano ña̱ ke̱ʼéna ña̱ va̱ása va̱ʼa, tasaá kúú ña̱ ndáana na̱ hermano ti̱xin congregación (1 Cor. 5:​6, 7, 11-13; Tito 3:​10, 11). Ña̱yóʼo kivi chindeétáʼanña xíʼin na̱ ni̱ki̱ʼvi ku̱a̱chi ña̱ ndandikó-inina xa̱ʼa̱ ña̱ va̱ása va̱ʼa ke̱ʼéna, tasaá ixakáʼnu-ini Jehová xa̱ʼa̱na (Luc. 5:32). Na̱ anciano káʼa̱nna xíʼin Jehová xa̱ʼa̱ na̱ nda̱ndikó-ini ña̱ ná chindeétáʼanra xíʼinna ña̱ vií ndakutáʼan tukuna xíʼinra (Sant. 5:15). Ná kachiyó, ña̱ nda̱kutáʼan na̱ anciano xíʼin iin na̱ ni̱ki̱ʼvi ku̱a̱chi, ta na̱yóʼo va̱ása ndándikó-inina xa̱ʼa̱ ña̱ ke̱ʼéna. Xa̱ʼa̱ ña̱yóʼo xíniñúʼu tavánana ti̱xin congregación. Soo tá ni̱ya̱ʼa tiempo na̱ yiví yóʼo ki̱ʼinna kuenta ña̱ va̱ása va̱ʼa íyo ña̱ ke̱ʼéna, ta ndixaní ndándikó-inina Jehová íyo tu̱ʼvara ixakáʼnu-inira xa̱ʼa̱na (Luc. 15:​17-24). Ni ndeéní ku̱a̱chi ni̱ki̱ʼvina nu̱ú Jehová íxakáʼnuva-inira xa̱ʼa̱na (2 Crón. 33:​9, 12, 13; 1 Tim. 1:15). w22.06 9 párr. 5, 6

Iníísaá nu̱ú ñuʼú íyo na̱ ndásakáʼnu Jehová ta kúchiñuna yáʼana nu̱ú nda̱a̱ ndáaka tu̱ndóʼo ña̱ va̱xi nu̱úna, chi mií Jehová chíndeétáʼan xíʼinna (1 Ped. 5:9). Ta saátu yóʼó kuchiñún ya̱ʼún nu̱ú ña̱ sáxo̱ʼvi̱ yóʼó. Chi si̱lóʼoní kúma̱ní ta Jehová ka̱ʼa̱nra xíʼin ta̱ Jesús ta saátu xíʼin na̱ kaʼndachíñu xíʼinra ña̱ ná sandíʼi-xa̱ʼa̱na ndiʼi ña̱ va̱ása va̱ʼa kéʼé ta̱ Ndi̱va̱ʼa (1 Juan 3:8). Tá ná ndiʼi kuu ña̱yóʼo, ndiʼi na̱ ndásakáʼnu Ndióxi̱ na̱ kundoo nu̱ú ñuʼú yóʼo, kǒo nda̱a̱ ni iin ña̱ʼa sayíʼvi miína (Is. 54:14; Miq. 4:4). Ta nani ndátuyó kixaa̱ ki̱vi̱ yóʼo, ná chika̱a̱yó ndee̱ ña̱ ndakú koo iniyó ta va̱ása yi̱ʼvíyó. ¿Ndáaña chindeétáʼan xíʼinyó? Iin ña̱ chindeétáʼan xíʼinyó kúú ña̱ ndakanixi̱níyó ndáa ki̱ʼva xa̱a̱ ndáa Jehová na̱ káchíñu nu̱úra, ta saátu natúʼunyó xa̱ʼa̱ ña̱yóʼo xíʼin inkana. Ta ná kotoyó ndáa ki̱ʼva xa̱a̱ chíndeétáʼanra xíʼinyó ña̱ yáʼayó nu̱ú tu̱ndóʼo ña̱ sándi̱ʼi̱ní-iniyó. Ná ndakaʼányó chi mií Jehová chindeétáʼan xíʼinyó ña̱ kuchiñuyó ya̱ʼayó nu̱ú ña̱ sáyi̱ʼví miíyó (Sal. 34:4). w22.06 19 párr. 19, 20

Na̱ chíñu náʼnu na̱ káʼa̱n Biblia xa̱ʼa̱ ndána̱ʼa̱na iin imagen ta xa̱ʼa̱ña kúú hierro ña̱ nda̱saka̱ xíʼin nda̱ʼyi̱. Ta ki̱xáʼana íyona tá ni̱xi̱yo Primera Guerra Mundial, tá nda̱kutáʼan na̱ Reino Unido xíʼin na̱ Estados Unidos. Imagen ña̱ xi̱ni ta̱ Nabucodonosor náʼa̱ña u̱vi̱ ña̱ʼa ña̱ ndáyáʼviní ña̱ keʼé na̱ chíñu yóʼo, ta na̱yóʼo síín íyona nu̱ú na̱ chíñu na̱ ni̱xi̱yo tá ya̱chi̱. Saáchi xa̱ʼa̱ imagen ña̱ ndána̱ʼa̱na su̱ví xíʼin oro á plata níkuva̱ʼaña, chi xíʼin hierro ña̱ nda̱saka̱ xíʼin nda̱ʼyi̱ ku̱va̱ʼaña. Ta nda̱ʼyi̱ ña̱ káʼa̱nyó xa̱ʼa̱ yóʼo ndána̱ʼa̱ña na̱ yiví (Dan. 2:​43, nota). Ndiʼivana kíʼin kuenta ña̱ íxayo̱ʼvi̱ña xíʼin na̱ chíñu yóʼo ña̱ saxínuna ña̱ kúni̱na, saáchi na̱ yiví kúú na̱ ndáka̱xin na̱ kaʼndachíñu nu̱úna, káʼa̱nna xa̱ʼa̱ derecho ña̱ kúúmiína, kéʼéna marcha, ta na̱ káchíñu káʼa̱nna xa̱ʼa̱ derecho ña̱ kúúmiína. w22.07 4, 5 párr. 9, 10

Iin ña̱ kivi chindeétáʼan xíʼún ña̱ xa̱ún ndakuchiún kúú ña̱ ndakanixi̱níún xa̱ʼa̱ pregunta yóʼo: “¿Á xa̱a̱ íyo tu̱ʼvai̱ ña̱ ndakuchii̱?” (Hech. 8:36). Ta̱ Jesús ni̱ka̱ʼa̱nra ña̱ nda̱a̱ táki̱ʼva íyo ña̱ xíxira saá íyo ña̱ keʼéra chiñu nu̱ú yivára. ¿Nda̱chun ni̱ka̱ʼa̱nra ña̱yóʼo? Saáchi ña̱ xíxiyó kúú ña̱ táxi ndee̱ ndaʼa̱yó. Ta̱ Jesús xi̱kunda̱a̱-inira ña̱ ndiʼi ña̱ káʼa̱n Jehová xíʼinyó keʼéyó, ña̱ va̱ʼa miívayó kúúña. Jehová va̱ása káʼa̱nra xíʼinyó ña̱ keʼéyó ña̱ʼa ña̱ kivi sáxo̱ʼvi̱ miíyó. Saáchi ña̱ kúni̱ra kúú ña̱ ná xa̱a̱yó ndakuchiyó (Hech. 2:38). Ña̱kán, tá ná ndakuchiún saá kúú ña̱ kándíxaún chiñu ña̱ xáʼnda Ndióxi̱ ta ku̱a̱ʼání ña̱ va̱ʼa ndakiʼún. ¿Ndáaña sási nu̱ú savana ña̱ xa̱a̱na ndakuchina? Sana ndákanixi̱nína ña̱ ta̱ʼán koo tu̱ʼvana. Ña̱ ndataxiyó miíyó ndaʼa̱ Jehová ta ndakuchiyó, iin ña̱ ndáyáʼviní kúú ña̱yóʼo. Ña̱kán ya̱chi̱ka vií ndakanixi̱níún, ta xa̱a̱ ya̱chi̱ka chika̱ún ndee̱ ña̱ koo tu̱ʼvaún ña̱ keʼún ña̱yóʼo. w23.03 7 párr. 18-20

Tá kúúmií ta̱ Jesús 30 ku̱i̱ya̱, Ndióxi̱ nda̱kaxinra ta̱yóʼo xíʼin espíritu santo. Ña̱kán tá ni̱xi̱ʼi̱ ta̱ Jesús ta nda̱takura, Ndióxi̱ ta̱xira ña̱ ná ndasakáʼnunara ta ná ixato̱ʼónara. Ta saátu ta̱xira chiñu ndaʼa̱ra ña̱ kiʼinra kuenta xíʼin ña̱ʼa ña̱ íyo chí ndiví xíʼin ña̱ʼa ña̱ íyo nu̱ú ñuʼú yóʼo, ta ta̱xitura chiñu ndaʼa̱ra ña̱ “sandíʼi-xa̱ʼa̱ra ña̱ʼa ña̱ kéʼé ta̱ Ndi̱va̱ʼa” (Heb. 2:7; Mat. 28:18; 1 Juan 3:8). Profecía káʼa̱nña xa̱ʼa̱ ta̱ Jesús ña̱ kúúra se̱ʼe ñá ñaʼá, ta saátu íyo inkaka na̱ xáa̱ kúu se̱ʼe ñáyóʼo. Ta̱ apóstol Pablo ni̱ka̱ʼa̱nra xa̱ʼa̱ na̱yóʼo ta ka̱chira: “Kúúndó kuenta ta̱ Cristo kúútundó se̱ʼe ta̱ Abrahán, ta ndakiʼinndó ña̱ ni̱ka̱ʼa̱n Ndióxi̱ taxira” (Gál. 3:​28, 29). Tá ndáka̱xin Jehová iin na̱ ku̱ʼu̱n chí ndiví xíʼin espíritu santora, xáa̱tu na̱yóʼo ndúuna se̱ʼe ñá ñaʼá. Ña̱kán na̱ se̱ʼe ñá ñaʼá kúú ta̱ Jesucristo xíʼin na̱ 144,000 na̱ ku̱ʼu̱n kaʼndachíñu xíʼin ta̱ Jesús chí ndiví (Apoc. 14:1). Ta ndiʼi na̱yóʼo ndákanixi̱nína ta kéʼéna nda̱a̱ táki̱ʼva kéʼé yivána Jehová. w22.07 16 párr. 8, 9

Ndiʼivayó kúnda̱a̱-ini ña̱ ya̱ʼayó nu̱ú tu̱ndóʼo ki̱vi̱ nu̱ú ndíʼi ña̱ ndóoyó vitin (2 Tim. 3:1). Tá ku̱a̱ʼání tu̱ndóʼo va̱xi nu̱úyó ndíʼi̱ní-iniyó. Soo ná ndakaʼányó chi ndíʼi̱va-ini Jehová xa̱ʼa̱yó ta chindeétáʼanra xíʼinyó ña̱ ya̱ʼayó nu̱ú nda̱a̱ ndáaka tu̱ndóʼo ña̱ ná kixi nu̱úyó. Ná kotoyó ndáaña ndo̱ʼo ta̱ Job, chi ta̱yóʼo ku̱a̱ʼání tu̱ndóʼo ndeé ki̱xi nu̱úra. Iin ki̱vi̱ kuití ki̱xi ndiʼi ña̱yóʼo nu̱úra, i̱xakuíʼnána ndiʼi kití sa̱na̱ra, xa̱ʼnína na̱ xi̱kachíñu nu̱úra, ta íyo inka mií ña̱ ndeé va̱ʼaka ndo̱ʼora, ni̱xi̱ʼi̱ ndiʼi se̱ʼera (Job 1:​13-19). Tá táʼan kúsuchíníka-inira xa̱ʼa̱ ndiʼi tu̱ndóʼo ña̱ ni̱ya̱ʼara nu̱ú, ki̱ʼin kue̱ʼe̱ ña̱ ndeéní miíra ta kininí ke̱ʼéña xíʼinra ta xa̱ʼa̱ ña̱yóʼo va̱ása níkivi ndakuninara (Job 2:7). Jehová ki̱ʼinvara kuenta xíʼin ndiʼi ña̱ ni̱ya̱ʼa ta̱ Job nu̱ú. Ta xa̱ʼa̱ ña̱ xi̱kuʼvi̱ní-inira xi̱xinirara, chi̱ndeétáʼanra xíʼinra ña̱ nda̱kú koo inira ya̱ʼara nu̱ú ndiʼi ña̱yóʼo. w22.08 11 párr. 8-10

Tá táxina consejo ndaʼa̱yó kivi xo̱ʼvi̱-iniyó xíʼinña. Kivi xa̱a̱yó ndakanixi̱níyó ña̱ va̱ása vií ní tiinna ku̱a̱chi xíʼinyó á va̱ása níxiniñúʼuví taxina iin consejo ndaʼa̱yó. Soo, ná ndakaʼányó chi mií Jehová kúú ta̱ táxi consejo ndaʼa̱yó xa̱ʼa̱ ña̱ kúʼvi̱-inira xínira miíyó (Heb. 12:​5, 11). Kuniso̱ʼo consejo ña̱ táxina ndaʼún ta nasama ña̱ kéʼún. Ku̱a̱ʼá yichi̱ nu̱ú ndiʼi na̱ apóstol ni̱ka̱ʼa̱n ta̱ Jesús xíʼin ta̱ Pedro xa̱ʼa̱ ña̱ va̱ása va̱ʼa kéʼéra (Mar. 8:33; Luc. 22:​31-34). Ku̱kaʼanníva nu̱ú ta̱ Pedro, soo va̱ása nísandákoora ta̱ Jesús, xi̱niso̱ʼovara consejo ña̱ ta̱xira ndaʼa̱ra ta ke̱ʼéra ña̱ ni̱ka̱ʼa̱nra xíʼinra. Xa̱ʼa̱ ña̱kán ku̱a̱ʼáka chiñu ta̱xi Jehová ndaʼa̱ra ti̱xin congregación (Juan 21:​15-17; Hech. 10:​24-33; 1 Ped. 1:1). Ná kǒo ndakaniníxi̱níyó ña̱ sa̱kúkaʼannína nu̱úyó, va̱ʼaka ná kuniso̱ʼoyó consejo ña̱ táxina ndaʼa̱yó ta ná nasamayó ña̱ kéʼéyó. Chi tásaá ná keʼéyó, va̱ʼaníka kuniñúʼu Jehová miíyó ta saátu na̱ hermano. w22.11 21, 22 párr. 6, 7

Ta̱ Abrahán xi̱kunda̱a̱-inira ña̱ nda̱kúní íyo ini Jehová. Ta̱ apóstol Pablo ni̱ka̱ʼa̱nra xa̱ʼa̱ ta̱ Abrahán, ña̱ kǒo níxi̱ka-inira ña̱ kuchiñuva Ndióxi̱ sandátakura se̱ʼera ni ná kuvira (Heb. 11:​17-19). Ta kiviva kuu ña̱yóʼo tá saá níxi̱yoña, chi mií Jehová ni̱ka̱ʼa̱nra ña̱ ku̱a̱ʼání xa̱a̱ na̱ se̱ʼe ta̱ Isaac koona, ta tiempo saá ta̱ʼánví koo se̱ʼe ta̱ Isaac. Xa̱ʼa̱ ña̱ xi̱kuʼvi̱ní-ini ta̱ Abrahán xi̱xinira Jehová, xi̱kandíxaníra ña̱ va̱ása keʼéví Jehová iin ña̱ va̱ása va̱ʼa. Ni yo̱ʼvi̱ní ni̱xi̱yoña nu̱ú ta̱ Abrahán, soo xi̱kandíxavara ña̱ xi̱ka̱ʼa̱n Jehová xíʼinra (Gén. 22:​1-12). ¿Ndáaña keʼéyó ña̱ va̱ʼa kundiku̱nyó yichi̱ ta̱ Abrahán? Xíniñúʼu ndakundeéyó kuxini̱ va̱ʼakayó Jehová. Chi tá saá ná keʼéyó, kuyatinkayó nu̱úra ta kuʼvi̱ka-iniyó kuniyóra (Sal. 73:28). Saátu viíní sakúaʼayó ndakanixi̱níyó nda̱a̱ táki̱ʼva ndákanixi̱ní Jehová (Heb. 5:14). Tá káʼa̱nna xíʼinyó keʼéyó ña̱ va̱ása va̱ʼa, va̱ása keʼévíyóña. Ta ni loʼo va̱ása ndakanixi̱níyó keʼéyó iin ña̱ʼa ña̱ kivi sakúsuchí-ini yiváyó Jehová ta sakúxíkaña miíyó nu̱úra. w22.08 28, 29 párr. 11, 12

Tá ndi̱kó ta̱ apóstol Pablo xíʼin ta̱ Bernabé ñuu Listra, ñuu Iconio xíʼin ñuu Antioquía “iin iin congregación nda̱kaxinna na̱ koo anciano” (Hech. 14:​21-23). Ta na̱ anciano na̱ nda̱kaxinna yóʼo va̱ʼaní chi̱kaa̱na ndee̱ xíʼin na̱ hermano, nda̱a̱ táki̱ʼva kéʼé na̱ anciano tiempo vitin. Ndóʼó na̱ anciano koo tu̱ʼvandó ña̱ sandíkondó-ini na̱ hermano ta ka̱ʼa̱nndó tu̱ʼun va̱ʼa xíʼinna tá yáʼana nu̱ú tu̱ndóʼo. Ta̱ Pablo sa̱ndákaʼánra na̱ hermano ña̱ ku̱a̱ʼání na̱ cristiano na̱ xi̱ndoo tá ya̱chi̱ ku̱chiñuna ni̱ya̱ʼana nu̱ú ku̱a̱ʼání tu̱ndóʼo ña̱ ndeéní, saáchi mií Jehová chi̱ndeétáʼan xíʼinna (Heb. 12:1). Ta xi̱kunda̱a̱-inira ña̱ va̱ʼaní chindeétáʼan ña̱ ndo̱ʼo na̱ hermano na̱ xi̱ndoo tá ya̱chi̱ xíʼinna, ña̱ ndakú koo inina xíʼin Ndióxi̱, ta saátu va̱ʼaní chindeétáʼanña xíʼinna ña̱ kundi̱ʼi̱-inina xa̱ʼa̱ iinlá “ñuu ña̱ kúú kuenta mií Ndióxi̱ ta̱ táku” (Heb. 12:22). Kivitu chindeétáʼanña xíʼin miíyó tiempo vitin. Tá káʼviyó xa̱ʼa̱ ndáa ki̱ʼva chi̱ndeétáʼan Jehová xíʼin ta̱ Gedeón, ta̱ Barac, ta̱ David, xíʼin ta̱ Samuel ndásandakúní ña̱yóʼo iniyó (Heb. 11:​32-35). w22.08 21, 22 párr. 5, 6

¿Ndáa xa̱ʼa̱ kúú ña̱ ndatiinna ku̱a̱chi xíʼinna? ¿Á xa̱ʼa̱ ña̱ ke̱ʼéna tá kúma̱ní kuvina kúúña? Va̱ása. Ná ndakaʼányó chi xa̱a̱ ndo̱ova ku̱a̱china tá ni̱xi̱ʼi̱na. Ña̱kán, su̱ví xa̱ʼa̱ ña̱ ke̱ʼéna tá kúma̱ní kuvina kúú ña̱ ndatiinna ku̱a̱chi xíʼinna. Chi ña̱ kiʼin Jehová kuenta xíʼin kúú ña̱ keʼéna nu̱ú ñuyǐví xa̱á. Ta nda̱a̱ na̱ nda̱kúní ni̱xi̱yo ini xíʼin Ndióxi̱ tiempo xi̱naʼá xíniñúʼu keʼéna ña̱ sakúaʼana. Tá kúú, ta̱ Noé, ta̱ Samuel, ta̱ David xíʼin ta̱ Daniel, na̱yóʼo xa̱a̱na sakúaʼana xa̱ʼa̱ ta̱ Jesucristo ta xíniñúʼu na̱ʼa̱na ña̱ kándíxana ña̱ ni̱xi̱ʼi̱ra xa̱ʼa̱yó. Tá nda̱a̱ na̱yóʼo xíniñúʼu sakúaʼaníka, kachikaví na̱ ke̱ʼé ña̱ va̱ása va̱ʼa. ¿Ndáaña kundoʼo na̱ va̱ása kandíxa sakúaʼa xa̱ʼa̱ Ndióxi̱? Apocalipsis 20:15 káchiña: “Na̱ kǒo ki̱vi̱ va̱xi nu̱ú libro nu̱ú va̱xi ki̱vi̱ na̱ kutaku, sa̱kánana na̱yóʼo nu̱ú xíxi̱ ñuʼu̱”. Ña̱yóʼo kúni̱ kachiña ña̱ na̱ ndiʼi-xa̱ʼa̱va kúúna. Ña̱kán xíniñúʼu chika̱a̱níyó ndee̱ ña̱ va̱ʼa kixi ki̱vi̱yó nu̱ú va̱xi ki̱vi̱ na̱ kutaku. w22.09 18, 19 párr. 18-19

Biblia chíndeétáʼanña xíʼinyó ña̱ va̱ʼa ndaka̱xinyó ndáa ta̱tán kúú ña̱ kivi kuniñúʼuna xíʼinyó (1 Tim. 3:9). Ña̱kán nda̱a̱ ndáaka ña̱ ná ndaka̱xinyó keʼéyó á tá nátúʼunyó xa̱ʼa̱ ña̱yóʼo xíʼin inkana ná ndakaʼányó ña̱ káʼa̱n Filipenses 4:5: “Ndiʼina ná kunda̱a̱-ini ña̱ va̱ʼaní ndákanixi̱níndó”. Náʼa̱yó ña̱ viíní ndákanixi̱níyó tá su̱ví nina kue̱ʼe̱ ndákanixi̱níyó xa̱ʼa̱. Ni síínva ña̱ ná ndaka̱xin na̱ hermanoyó keʼéna, ná na̱ʼa̱yó ña̱ kúʼvi̱-iniyó xíniyóna ta íxato̱ʼóyóna (Rom. 14:​10-12). Nda̱a̱ táki̱ʼva sa̱kuaʼayó, Jehová kúú ta̱ ta̱xi ña̱ tákuyó. Ta náʼa̱yó ña̱ táxiyó tíxa̱ʼvi ndaʼa̱ra tá ndáayó ña̱ tákuyó, ta viíní xíniñúʼuyóña ña̱ ndasakáʼnuyóra (Apoc. 4:11). Soo tiempo vitin kíʼin kue̱ʼe̱ miíyó á yáʼayó nu̱ú tu̱ndóʼo, soo su̱ví saá níxi̱kuni̱ Jehová kutakuyó. Táxiníyó tíxa̱ʼvi ndaʼa̱ Jehová chi si̱lóʼo kúma̱ní ña̱ kooyó nu̱ú ñuyǐví xa̱á nu̱ú kǒoka kue̱ʼe̱ koo, nu̱ú va̱ásaka kuviyó (Apoc. 21:4). Nani ndátuyó ña̱ kixaa̱ ki̱vi̱ kán ná chindayáʼviyó ña̱ tákuyó ta ná kuniñúʼuyóña ña̱ ndasakáʼnuyó yiváyó Jehová. w23.02 25 párr. 17, 18

Xíʼin ña̱ ke̱ʼé Jehová ni̱na̱ʼa̱ra ña̱ iinlá miíra kúú Ndióxi̱ ta̱ káʼnu nu̱ú ndiʼika na̱ chíñu na̱ íyo nu̱ú ñuʼú yóʼo (Rom. 13:1). Ná ka̱ʼa̱nyó xa̱ʼa̱ u̱ni̱ ña̱ ke̱ʼéra. Ta̱ faraón ta̱ ñuu Egipto, i̱xandi̱va̱ʼara xíʼin na̱ ñuu Jehová ta xa̱ʼa̱ ña̱kán tuku ta tuku ni̱ka̱ʼa̱n Jehová xíʼinra ña̱ ná sañárana soo kǒo níxiinra. Soo Jehová chi̱ndeétáʼanvara xíʼinna ta sa̱ndíʼi-xa̱ʼa̱ra ta̱ faraón nu̱ú tá mar Rojo (Éx. 14:​26-28; Sal. 136:15). Ta̱ Belsasar ta̱ ñuu Babilonia, ke̱ʼéra iin vikó nu̱ú va̱ása níndasakáʼnura Jehová ta̱ íyo chí ndiví ta nda̱sakáʼnura ndióxi̱ ña̱ ku̱vaʼa xíʼin plata xíʼin oro (Dan. 5:​22, 23). Soo Jehová sa̱kúkaʼanra nu̱ú ta̱yóʼo xa̱ʼa̱ ña̱ va̱ása vitá níxi̱yo inira. Ta mií ñuu saá xa̱ʼnína ta̱ Belsasar, ta Ndióxi̱ ta̱xira ña̱ ná kaʼndachíñu na̱ medo xíʼin na̱ persa (Dan. 5:​30, 31). Ta̱ rey Herodes Agripa I ta̱ ñuu Palestina, xa̱ʼníra ta̱ apóstol Santiago ta chi̱kaa̱ra ta̱ apóstol Pedro veʼeka̱a ta xi̱kuni̱ra kaʼnírara. Soo Ndióxi̱ va̱ása nítaxira keʼéra ña̱yóʼo. Saáchi “ndi̱ku̱n iin kama ta̱xi ángel Jehová iin kue̱ʼe̱ ndaʼa̱” ta̱ Herodes ta ni̱xi̱ʼi̱vara (Hech. 12:​1-5, 21-23). w22.10 15 párr. 12

Tá ná sakúaʼayó ndáa ki̱ʼva xi̱ndaa Jehová na̱ ñuura tiempo xi̱naʼá, saá kúú ña̱ kandíxaníkayó ña̱ káʼa̱nra keʼéra chí nu̱únínu. “Saáchi ndiʼi ña̱ ni̱ka̱ʼyi̱ xi̱naʼá ni̱ka̱ʼyi̱ña ña̱ va̱ʼa sanáʼa̱ña miíyó, chi tu̱ʼun Ndióxi̱ chíndeétáʼanña xíʼinyó ña̱ va̱ʼa ndakú koo iniyó, ta sándi̱koña-iniyó ña̱ va̱ʼa kundatuyó ña̱ taxi Ndióxi̱ ndaʼa̱yó chí nu̱únínu” (Rom. 15:4). Ná ndakanixi̱níyó ndáa ki̱ʼva xa̱a̱ sáxi̱nu Jehová ña̱ káʼa̱nra keʼéra. Ná ka̱ʼa̱nyó xa̱ʼa̱ ña̱ ke̱ʼéra xa̱ʼa̱ ta̱ Abrahán xíʼin ñá Sara. Xa̱ʼa̱ ña̱ xa̱a̱ chéena va̱ása kivika koo se̱ʼena, soo Jehová ni̱ka̱ʼa̱nra xíʼinna ña̱ koo iin se̱ʼena (Gén. 18:10). ¿Ndáaña ke̱ʼé ta̱ Abrahán? Biblia káchiña: “Ka̱ndíxara ña̱ xa̱a̱ra koora yivá ndiʼi na̱ ñuu nda̱a̱ táki̱ʼva ni̱ka̱ʼa̱n Ndióxi̱ xíʼinra” (Rom. 4:18). Nu̱ú miíyó na̱ yiví va̱ása kivikaví koo se̱ʼe ta̱ Abrahán xíʼin ñá Sara, soo ta̱kán xi̱kandíxaníra ña̱ saxínu Jehová ña̱ ni̱ka̱ʼa̱nra xíʼinra. Tasaá ku̱uva chi Jehová sa̱xínura ña̱ ki̱ndoora xíʼinra (Rom. 4:​19-21). Relato yóʼo sánáʼa̱ña miíyó ña̱ kiviva kandíxayó ña̱ sáxi̱nu Jehová ña̱ káʼa̱nra. w22.10 27 párr. 13, 14

Tu̱ʼun yóʼo ni̱xi̱nuña tá ke̱e na̱ judío ñuu Babilonia. Xíʼin ña̱yóʼo ni̱na̱ʼa̱ Jehová ña̱ kúúra iin ta̱ va̱ʼaní sánáʼa̱. Xa̱ʼa̱ ña̱ xi̱niʼira yichi̱ nu̱ú na̱ judío, ki̱xáʼana ndásakáʼnuna iinlá miíra. Tiempo vitin Jehová sánáʼa̱ra miíyó ta ña̱yóʼo sákusi̱íníña-iniyó. Ta̱ Isaías ni̱ka̱ʼa̱nra xa̱ʼa̱yó ña̱ íyoyó nda̱a̱ táki̱ʼva íyo na̱ sákuaʼa, saáchi Jehová u̱vi̱ ki̱ʼva sánáʼa̱ra miíyó. Ña̱ nu̱ú, ta̱ Isaías ni̱ka̱ʼa̱nra: “Kuni nu̱ún ta̱ sánáʼa̱ yóʼó”. Xíʼin ilustración yóʼo kúnda̱a̱-iniyó ña̱ ta̱ sánáʼa̱, níndichira chí nu̱ú na̱ sánáʼa̱ra. ¿Ndáa ki̱ʼva sánáʼa̱ Jehová miíyó tiempo vitin? Xíniñúʼura na̱ ñuura ña̱ va̱ʼa sanáʼa̱ra miíyó. Ta sána̱ʼa̱ra miíyó ti̱xin reunión, nu̱ú tutu ña̱ tává na̱ ñuura xíʼin programa ña̱ JW Broadcasting^®. Ndiʼi ña̱yóʼo chíndeétáʼanña xíʼinyó ña̱ kundeé-iniyó ta kusi̱í-iniyó tá yáʼayó nu̱ú tu̱ndóʼo. w22.11 10 párr. 8, 9

Va̱ása níka̱ʼa̱n kuití ta̱ Jesús xíʼinna ama kúú ña̱ kixaa̱ ki̱vi̱ ña̱ ndiʼi-xa̱ʼa̱ ñuu Jerusalén, chi saátu ni̱ka̱ʼa̱nra xíʼinna ña̱ xa̱a̱ ku̱yatinní ndiʼi-xa̱ʼa̱ ndiʼi ña̱ va̱ása va̱ʼa íyo nu̱ú ñuʼú yóʼo. Ña̱yóʼo ni̱ka̱ʼa̱nra xíʼinna: “Ni iinna va̱ása xíni̱ hora xíʼin ki̱vi̱ kán, ni na̱ ángel na̱ íyo chí ndiví ni yi̱ʼi̱; mitúʼun yivái̱ xíni̱”. Xa̱ʼa̱ ña̱kán ta̱xira consejo yóʼo ndaʼa̱na: “Xíniñúʼu koo tu̱ʼvandó ta kundito va̱ʼa nu̱úndó” (Mar. 13:​32-37). Na̱ cristiano na̱ ni̱xi̱yo tá siglo nu̱ú xi̱niñúʼu koo tu̱ʼvanína. Saáchi ña̱yóʼo chindeétáʼan xíʼinna ña̱ va̱ʼa ka̱kuna. Ta̱ Jesús ni̱ka̱ʼa̱nra xíʼinna: “Tá ná kunindó ñuu Jerusalén ña̱ kasi na̱ soldado iníí sa̱táña, kunda̱a̱-inindó ña̱ xa̱a̱ ku̱yatin ndiʼi-xa̱ʼa̱ña”. Tá ná kunina kuu ña̱yóʼo xi̱niñúʼu kununa ku̱ʼu̱nna chí yuku̱ nda̱a̱ táki̱ʼva ni̱ka̱ʼa̱nra xíʼinna (Luc. 21:​20, 21). Na̱ xi̱niso̱ʼo ña̱ ni̱ka̱ʼa̱n ta̱ Jesús ta xi̱nuna ku̱a̱ʼa̱nna chí yuku̱, ni̱ka̱kuvana tá ni̱ki̱ʼvi na̱ ñuu Roma sa̱ndíʼi-xa̱ʼa̱na ñuu Jerusalén. Miíyó ndóoyó tiempo ña̱ xa̱a̱ ku̱yatin kixaa̱ ña̱ ndiʼi-xa̱ʼa̱ ñuyǐví ta̱ Ndi̱va̱ʼa. Xa̱ʼa̱ ña̱kán ná kundiku̱nyó yichi̱ na̱ cristiano na̱ ni̱xi̱yo tá siglo nu̱ú, ña̱ ndíchi kooyó ta kiʼinníyó kuenta. w23.02 14 párr. 1, 2

Jehová sánáʼa̱ra na̱ yiví na̱ kúʼvi̱-ini xíniñaʼána ña̱ ka̱ʼa̱nna ña̱ nda̱a̱ ta keʼéna ña̱ nda̱kú. Tá kéʼéna ña̱yóʼo saá kúú ña̱ xa̱a̱na koona na̱ yiví va̱ʼa nu̱úra ta taxira ña̱ táxi̱n koo inina (Prov. 13:​5, 6). Sana kíʼún kuenta ña̱ va̱ʼaní chíndeétáʼan Jehová xíʼún ña̱ sákuaʼún xa̱ʼa̱ra. Saáchi xa̱a̱ ki̱ʼún kuenta ña̱ va̱ʼaní consejo táxira ndaʼa̱ na̱ yiví (Sal. 77:13). Xa̱ʼa̱ ña̱kán kúni̱ún keʼún ndiʼi ña̱ káʼa̱nra xíʼún nu̱ú tu̱ʼunra (Mat. 6:33). Ta saátu kúni̱ún natúʼún xíʼin ndiʼi na̱ yiví ña̱ ndiʼi ña̱ káʼa̱n ta̱ Ndi̱va̱ʼa xa̱ʼa̱ Jehová ña̱ vatá kúúña. Ná kotoyó ndáa ki̱ʼva keʼún ña̱yóʼo. Tá kúni̱ún ña̱ iinlá mií Jehová ná kaʼndachíñu nu̱ún ta saátu kúni̱ún kuniso̱ʼún ndiʼi ña̱ káʼa̱nra xíʼún keʼé iin oración nu̱ú Jehová ta ka̱ʼa̱n xíʼinra ña̱ kúni̱ún kachíñún nu̱úra ndiʼi tiempo. Tándi̱ʼi, saá ndakuchiún ta xíʼin ña̱yóʼo na̱ʼún nu̱ú ndiʼina ña̱ kúni̱ún kachíñún nu̱ú iinlá mií Jehová. Ta iin ña̱ kivi chindeétáʼan xíʼún ña̱ xa̱ún ndakuchiún kúú ña̱ kuʼvi̱-iniún kuniún ña̱ nda̱a̱ ña̱ sákuaʼún xa̱ʼa̱ Jehová xíʼin ña̱ va̱ʼa ña̱ kéʼéra. w23.03 3 párr. 4, 5

Ndióxi̱ táxira ña̱ táxi̱n koo iniyó. Soo na̱ ñuyǐví yóʼo va̱ása kúnda̱a̱-inina xa̱ʼa̱ña, ta Ndióxi̱ táxira ña̱yóʼo ndaʼa̱ na̱ va̱ʼaní kítáʼan xíʼinra ta ña̱yóʼo kúú ña̱ chíndeétáʼan xíʼinyó ña̱ va̱ása ndi̱ʼiní-iniyó (Filip. 4:​6, 7). Va̱ʼaní kítáʼanyó xíʼin na̱ hermanoyó ta saátu va̱ʼaní kítáʼanyó xíʼin Jehová ta̱ sándi̱ko-iniyó (1 Tes. 5:23). Tá xáa̱yó kúnda̱a̱ka-iniyó xa̱ʼa̱ Jehová, xáa̱yó kándíxakayóra ta ndíku̱nyó ña̱ káʼa̱nra. Xa̱ʼa̱ ña̱yóʼo táxi̱n íyo iniyó ta va̱ása ndíʼi̱ní-iniyó tá íyo tu̱ndóʼo nu̱úyó. Soo, ¿á kivi táxi̱n koo iniyó tá íyo iin kue̱ʼe̱ xíkun nu̱ú ndóoyó, tá íyo ku̱a̱chi á íxandi̱va̱ʼana xíʼinyó? Xa̱a̱ ku̱a̱ʼání na̱ hermano xíʼin ná hermana ndíku̱nna consejo ña vaxi nuu texto ña káʼviyó kivi vitin. Jehová chíndeétáʼan xíʼinna ña̱ táxi̱n koo inina tá ku̱a̱yaʼana nu̱ú tu̱ndóʼo ña̱ yo̱ʼvi̱ní. w22.12 16 párr. 1, 2

Nda̱a̱ ni iinyó va̱ása kúnda̱a̱-iniyó ndáaña kúú ña̱ kixi nu̱úyó ki̱vi̱ tá ki̱vi̱. Ña̱kán xíniñúʼu ndakaʼányó ña̱ su̱ví xa̱ʼa̱ chiñu ña̱ kúúmiíyó kúú ña̱ ndáyáʼviyó nu̱ú Jehová. Ná va̱ása chitáʼanyó miíyó xíʼin na̱ kúúmií iin chiñu ña̱ va̱ása kúúmiíyó (Gál. 6:4). Ña̱kán, va̱ʼaka ná ndukúyó ki̱ʼva ña̱ kachíñuyó nu̱ú Jehová ta chindeétáʼanyó xíʼin inkana. Kiviva keʼéyó ku̱a̱ʼáka chiñu nu̱ú Jehová tá ná chika̱a̱yó ndee̱ ña̱ loʼo ña̱ʼa kuumiíyó ta va̱ása kuníkáyó. Ná chika̱a̱yó ndee̱ keʼéyó chiñu ña̱ kivi chindeétáʼan xíʼinyó kachíñu ku̱a̱ʼákayó nu̱ú Ndióxi̱ chí nu̱únínu. Ná kachiyó ña̱ kúni̱ún koún precursor regular, iin ña̱ kivi chindeétáʼan xíʼún kúú ña̱ siʼna koún precursor auxiliar. Á ná kachituyó ña̱ kúni̱ún koún siervo ministerial, iin ña̱ kivi chindeétáʼan xíʼin kúú ña̱ ku̱a̱ʼá tiempo natúʼun xa̱ʼa̱ Ndióxi̱. Ndiʼi ña̱ ná keʼún vitin, chindeétáʼanña xíʼún ña̱ ku̱a̱ʼáka chiñu keʼún nu̱ú Ndióxi̱ chí nu̱únínu. Soo ni nda̱a̱ ndáaka chiñu ná ndaka̱xiún keʼún, chika̱a̱ ndee̱ ña̱ keʼúnña xíʼin ndiʼi níma̱ún. w22.04 26 párr. 16, 17

Jehová kivi chindeétáʼanra xíʼinyó ña̱ kundeé-iniyó tá yáʼayó nu̱ú tu̱ndóʼo ta saátu ña̱ kusi̱í-iniyó kachíñuyó nu̱úra. Tá káʼa̱nyó xíʼin Jehová xa̱ʼa̱ ña̱ sándi̱ʼi̱-iniyó, sana ña̱ siʼna keʼéra kúú ña̱ taxira ndee̱ ndaʼa̱yó ña̱ kundeé-iniyó nu̱ú tu̱ndóʼo. Soo, tá va̱ása kama ndíʼi tu̱ndóʼo nda̱a̱ táki̱ʼva kúni̱ miíyó, sana ku̱a̱ʼáka yichi̱ xíniñúʼu ka̱ʼa̱nyó xíʼinra ña̱ ná taxira ndee̱ ndaʼa̱yó ña̱ kundeé-iniyó. Ta miíra káʼa̱nra xíʼinyó ña̱ ná keʼéyó ña̱yóʼo. Ta̱ Isaías ni̱ka̱ʼa̱nra: “Va̱ása taxindó ña̱ ndakindee̱ra” (Is. 62:7). ¿Ndáaña kúni̱ kachi ña̱yóʼo? Ña̱ kǒo xíniñúʼu sandákooyó ka̱ʼa̱nyó xíʼin Jehová, ta ná va̱ása taxiyó ndakindee̱ra. Ña̱yóʼo sándakaʼánña miíyó tu̱ʼun ña̱ ni̱ka̱ʼa̱n ta̱ Jesús nu̱ú Lucas 11:​8-10, 13. Ku̱a̱ʼá yichi̱ xi̱niñúʼura ilustración ña̱ ni̱ka̱ʼa̱nra xíʼinyó ña̱ ná kǒo sandákooyó ka̱ʼa̱nyó xíʼin Ndióxi̱ ta ná ndukúyó espíritu santo nu̱úra. Saátu kivi ka̱ʼa̱nyó xíʼinra ña̱ ná kuniʼira yichi̱ nu̱úyó ña̱ vií koo ña̱ ndaka̱xinyó keʼéyó. w22.11 8 párr. 1; 9 párr. 6, 7

Miíún xíʼin na̱ veʼún, xa̱a̱ kivi ya̱chi̱ka keʼéndó sava ña̱ kivi chindeétáʼan xíʼinndó koo tu̱ʼvandó tá kúma̱níka ixandi̱va̱ʼa na̱ chíñu xíʼinndó. Va̱ása ndakanixi̱níndó xa̱ʼa̱ ña̱ʼa ña̱ kivi kundoʼondó. Va̱ʼaka chika̱a̱ndó ndee̱ ña̱ viíka kutáʼanndó xíʼin Jehová ta chindeétáʼanndó xíʼin se̱ʼe válíndó ña̱ saátu ná keʼé na̱kánva. Tá sava yichi̱ ndíʼi̱ní-inindó, ka̱ʼa̱nndó xíʼin Jehová (Sal. 62:​7, 8). Ka̱ʼa̱nndó xíʼin na̱ veʼendó nda̱chun kúú ña̱ kivi kandíxayó Jehová. Iin ña̱ va̱ʼaní kúú ña̱ chindeétáʼanyó xíʼin se̱ʼe válíyó ña̱ koo tu̱ʼvana tá kúma̱níka kuu iin tu̱ndóʼo. Ná sanáʼa̱yóna ña̱ kandíxanína Jehová, chi saá kúú ña̱ ndakú koo inina ta va̱ása ndi̱ʼiní-inina (Filip. 4:​6, 7). Jehová chíndeétáʼanra xíʼinyó ña̱ táxi̱n koo iniyó tá íyo kue̱ʼe̱ xíkun, tá iin kama ndóʼoyó iin tu̱ndóʼo ta saátu tá íxandi̱va̱ʼana xíʼinyó. Xíniñúʼura na̱ anciano ña̱ va̱ʼa kundaara miíyó ta sánáʼa̱ra miíyó ña̱ chindeétáʼanyó xíʼin inkana. Ta xa̱ʼa̱ ña̱ táxi Jehová ña̱ táxi̱n koo iniyó, ña̱yóʼo va̱ʼaní chindeétáʼanña xíʼinyó ña̱ koo tu̱ʼvayó ya̱ʼayó nu̱ú tu̱ndóʼo ña̱ kixi nu̱úyó chí nu̱únínu, tá kúú ña̱ gran tribulación (Mat. 24:21). w22.12 27 párr. 17, 18

Ná chika̱a̱níyó ndee̱ ña̱ va̱ása kusuchíka-iniyó xa̱ʼa̱ ku̱a̱chi ña̱ ni̱ki̱ʼviyó tá ya̱chi̱. Ta saátu ná va̱ása ndakanixi̱níyó ña̱ xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi ki̱ʼviyó ku̱a̱chi ña̱ kúni̱ miíyó (Heb. 10:​26-31). Soo tá xa̱a̱ nda̱ndikó-iniyó xa̱ʼa̱ ku̱a̱chi ndeé ña̱ ni̱ki̱ʼviyó, na̱ndukúyó Jehová xíʼin na̱ anciano ña̱ chindeétáʼanna xíʼinyó ta sandákooyó ña̱ xi̱keʼéyó, kivi kandíxayó ña̱ xa̱a̱ i̱xakáʼnu-ini Jehová xa̱ʼa̱yó (Is. 55:7; Hech. 3:19). Ña̱kán, xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kiviva ixakáʼnu-ini Ndióxi̱ xa̱ʼa̱ ku̱a̱chiyó ta ndiʼi tiempo kusi̱í-iniyó kooyó nu̱ú ñuyǐví xa̱á. Koo ku̱a̱ʼání na̱ xi̱ndoo tiempo xi̱naʼá na̱ kuni̱yó natúʼunyó xíʼin ta saátu kusi̱íní-iniyó xíʼin chiñu ña̱ kuumiíyó. Soo mií ña̱ ndáyáʼvi va̱ʼaka kúú ña̱ xa̱a̱yó kuxini̱ va̱ʼayó yiváyó Jehová ta kusi̱í-iniyó xíʼin ndiʼi ña̱ va̱ʼa ña̱ taxira ndaʼa̱yó. Ndiʼi ki̱vi̱ koo ña̱ sakúaʼayó xa̱ʼa̱ra xíʼin xa̱ʼa̱ ña̱ i̱xava̱ʼara. w22.12 13 párr. 17-19

Su̱ví ñá Eva kúú ñá káʼa̱n ña̱yóʼo xa̱ʼa̱ chi profecía káʼa̱nña xa̱ʼa̱ na̱ se̱ʼe ñá ñaʼá: “Ta̱kán ku̱a̱ñi̱ndosóra á ku̱niʼnira xi̱ní” tí ko̱o̱. Tí ko̱o̱ yóʼo kúú ta̱ Ndi̱va̱ʼa. Ña̱kán su̱ví xa̱ʼa̱ ñá Eva káʼa̱n ña̱yóʼo saáchi na̱ se̱ʼeñá xíʼin miíñá na̱ yiví ku̱a̱chi kúúna, ta va̱ása kuchiñu na̱ se̱ʼe ñáyóʼo sandíʼi-xa̱ʼa̱na ta̱ Ndi̱va̱ʼa. Tá saá, ¿ndáa ñaʼá kúú ñá káʼa̱n ña̱ profecía xa̱ʼa̱? Libro ña̱ Apocalipsis chíndeétáʼanña xíʼinyó ña̱ kunda̱a̱-iniyó ndáa ñaʼá kúú ñá káʼa̱n Génesis 3:15 xa̱ʼa̱ (Apoc. 12:​1, 2, 5, 10). Ñáyóʼo su̱ví iin ñaʼá ndixa kúúñá, ta ti̱xin xa̱ʼa̱ñá ndíka̱a̱ yo̱o̱, ta xi̱níñá kánuu iin corona ña̱ kúúmií 12 ki̱mi. Ta saátu káʼa̱nña ña̱ ka̱ku iin ta̱ loʼo se̱ʼeñá ta̱ ndáyáʼviní, ta̱ loʼo yóʼo ndána̱ʼa̱ra Reino Ndióxi̱. Reino yóʼo chí ndiví íyoña, ña̱kán ñá ñaʼá ñá káʼa̱nyó xa̱ʼa̱ yóʼo ndána̱ʼa̱ñá ndiʼi na̱ se̱ʼe Jehová na̱ íyo chí ndiví (Gál. 4:26). Tu̱ʼun Ndióxi̱ chíndeétáʼanña xíʼinyó kunda̱a̱-iniyó, ndáana kúú se̱ʼe ñá ñaʼá. Ta káʼa̱ntuña se̱ʼe ñáyóʼo ki̱xira ti̱xin na̱ veʼe ta̱ Abrahán (Gén. 22:​15-18). w22.07 15, 16 párr. 6-8

Jehová ta̱xira Biblia ndaʼa̱yó ta nu̱ú ña̱yóʼo va̱xi ku̱a̱ʼání consejo ña̱ ndíchi. Consejora va̱ʼaní chíndeétáʼanña xíʼin na̱ yiví ta nda̱a̱ xáa̱na násamana ta sándakoona ña̱ va̱ása va̱ʼa kéʼéna. Tá ka̱ʼyí ta̱ Moisés u̱ʼu̱n libro ña̱ va̱xi nu̱ú kíxáʼa Biblia, ni̱ka̱ʼa̱nra ña̱yóʼo xíʼin na̱ ñuu Israel: “Saáchi su̱ví ta̱ káʼa̱n mií kuití kuiíi̱ xíʼinndó, saáchi tu̱ʼun yóʼo kivi taxiña ña̱ kutakundó” (Deut. 32:47). Tá níxiniso̱ʼona ndiʼi ña̱ ni̱ka̱ʼa̱n Jehová xíʼinna si̱íní koona ta va̱ʼaní kana ndiʼi ña̱ keʼéna (Sal. 1:​2, 3). Ni xa̱a̱ naʼání ni̱ka̱ʼyi̱ Biblia, soo chíndeétáʼanníña xíʼinyó nda̱a̱ tiempo vitin. Tá káʼviyó Biblia ta ndákanixi̱níyó xa̱ʼa̱ consejo ña̱ va̱xi nu̱úña, Ndióxi̱ xíniñúʼura espíritu santora ña̱ va̱ʼa chindeétáʼanra xíʼinyó ña̱ va̱ʼa keʼéyó ña̱ káʼa̱nra (Sal. 119:27; Mal. 3:16; Heb. 4:12). Ndakanixi̱ní xa̱ʼa̱ ña̱yóʼo: Jehová kúni̱níra chindeétáʼanra xíʼún. ¿Á su̱ví ña̱yóʼo chíka̱a̱níña ndee̱ xíʼún ña̱ kuni̱ún kaʼviún Biblia ndiʼi ki̱vi̱? w23.02 3 párr. 5, 6

Apocalipsis capítulo 13 káʼa̱nña xíʼinyó ndáaña kéʼé na̱ Reino Unido ta saátu na̱ Estados Unidos, na̱ ndána̱ʼa̱ xi̱ní u̱xa̱ ña̱ kúúmií tí kití yukú. Saátu ndána̱ʼa̱na inka kití tí yo u̱vi̱ ndiki̱ ta ña̱yóʼo íyoña nda̱a̱ táki̱ʼva íyo ndiki̱ tí ndikachi ta ki̱xáʼarí káʼa̱nrí nda̱a̱ táki̱ʼva káʼa̱n iin tí dragón. Ta tí kití yukú yóʼo “ku̱a̱ʼání ña̱ʼa kéʼérí; nda̱a̱ kée ñuʼu̱ chí ndiví ta kóyoña nu̱ú ñuʼú íxaarí ta xíni ndiʼi na̱ yiví ña̱yóʼo” (Apoc. 13:​11-15). Ta nu̱ú Apocalipsis capítulo 16 xíʼin 19 káʼa̱nña xa̱ʼa̱na ña̱ kúúna “ta̱ profeta vatá” (Apoc. 16:13; 19:20). Ta ki̱ʼva saátu íyo profecía ña̱ ni̱ka̱ʼa̱n ta̱ Daniel xa̱ʼa̱ na̱ Gran Bretaña xíʼin na̱ Estados Unidos, chi ni̱ka̱ʼa̱nra ña̱ ku̱a̱ʼání ña̱ʼa sandíʼi-xa̱ʼa̱na (Dan. 8:​19, 23, 24, nota). Tasaá ku̱uva tá ni̱xi̱yo Segunda Guerra Mundial. Saáchi na̱ científico na̱ Reino Unido xíʼin na̱ Estados Unidos kúú na̱ i̱xava̱ʼa u̱vi̱ bomba ña̱ sa̱káʼndi̱na ña̱ va̱ʼa ni̱ya̱a̱ ku̱a̱chi yóʼo. Saá kúú ña̱ sa̱xínu na̱ Reino Unido xíʼin na̱ Estados Unidos profecía yóʼo: “Nda̱a̱ kée ñuʼu̱ chí ndiví ta kóyoña nu̱ú ñuʼú íxaarí”. w22.05 10 párr. 9