Mayo

Ta̱ Juan xi̱nira ku̱a̱ʼání na̱ yiví ta ku̱a̱ʼáníka kúúna nu̱ú na̱ 144,000, saáchi nda̱a̱ ni iinna va̱ása kúchiñu kaʼvi na̱yóʼo. ¿Ndáaña kúnda̱a̱-iniyó xa̱ʼa̱ na̱yóʼo? Ta̱ Juan, káchira: “Na̱yóʼo kúú na̱ ni̱ka̱ku nu̱ú tu̱ndóʼo káʼnu ta nda̱katana ti̱ko̱to̱ náni̱na ta da̱sayaanaña xíʼin ni̱i̱ tí ndikachi” (Apoc. 7:14). Na̱ yiví na̱ ka̱ku ti̱xin ña̱ gran tribulación kundoona nu̱ú ñuʼú yóʼo, ta ku̱a̱ʼání ña̱ va̱ʼa ndakiʼinna (Sal. 37:​9-11, 27-29; Prov. 2:​21, 22; Apoc. 7:​16, 17). Ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo, ¿á kándíxayó ña̱ xi̱nu ña̱ va̱xi nu̱ú Apocalipsis capítulo 7? Iin tiempo ña̱ ndáyáʼviní koo ña̱yóʼo nu̱ú ndiʼi miíyó na̱ ndásakáʼnu Ndióxi̱. Ta kusi̱íní-iniyó xa̱ʼa̱ ña̱ nda̱kaxinyó chindeétáʼanyó xíʼin Reino Ndióxi̱. w22.05 16 párr. 6, 7

¿Á xa̱a̱ ndáka̱xiún keʼún iin ña̱ ndáyáʼviní? Tá saá íyoña, sana ni̱ka̱ʼa̱nvaún xíʼin Jehová ña̱ ná taxira ña̱ ndíchi ndaʼún, saáchi xi̱kunda̱a̱-iniún ña̱ xi̱xiniñúʼuníún ña̱yóʼo (Sant. 1:5). Ta̱ Rey Salomón ka̱ʼyíra ña̱yóʼo: “Ña̱ ndíchi [...] kúú ña̱ ndáyáʼviníka” (Prov. 4:7). Ta̱yóʼo va̱ása níka̱ʼa̱nra xa̱ʼa̱ ña̱ ndíchi ña̱ sánáʼa̱ na̱ yiví, chi ña̱ ni̱ka̱ʼa̱nra xa̱ʼa̱ kúú ña̱ ndíchi ña̱ táxi Jehová. Soo, ¿á kivi chindeétáʼan ña̱ ndíchi yóʼo xíʼinyó ña̱ ya̱ʼayó nu̱ú tu̱ndóʼo ña̱ íyo tiempo vitin? Chindeétáʼanvaña xíʼinyó. Kivi xa̱a̱yó ndíchiní kooyó tá ná kaʼviyó xa̱ʼa̱ u̱vi̱ na̱ ta̱a na̱ ndíchiní ni̱xi̱yo ta kundiku̱nyó ña̱ sa̱náʼa̱na. Siʼna ná ka̱ʼa̱nyó xa̱ʼa̱ ta̱ Salomón. Tu̱ʼun Ndióxi̱ káʼa̱nña ña̱ ku̱a̱ʼání ña̱ ndíchi ta̱xi Jehová ndaʼa̱ ta̱ Salomón ta xi̱chindeétáʼanra xíʼinra kunda̱a̱-inira ndáaña kúú ña̱ va̱ʼa ta ndáaña kúú ña̱ va̱ása va̱ʼa (1 Rey. 4:29). Tándi̱ʼi, ka̱ʼa̱nyó xa̱ʼa̱ ta̱ Jesús, iin ta̱a ta̱ ndíchiní ni̱xi̱yo nu̱ú ñuʼú yóʼo (Mat. 12:42). Ña̱yóʼo ni̱ka̱ʼa̱n iin profecía xa̱ʼa̱ra: “Espíritu Jehová kooña xíʼinra, ña̱ va̱ʼa ndíchi koora ta ku̱a̱ʼá ña̱ʼa kunda̱a̱-inira xíʼin” (Is. 11:2). w22.05 20 párr. 1, 2

Ni xa̱a̱ ku̱chéeyó, kiviva chika̱a̱-iniyó keʼéyó inkaka chiñu nu̱ú Jehová ta saxínuyóña. Saá kéʼé iin ñá hermana ñá naní Beverley, ñá kúúmií 75 ku̱i̱ya̱. Xa̱ʼa̱ ña̱ kúúmiíñá iin kue̱ʼe̱, va̱ása kívi kakañá. Soo xi̱kuni̱níñá natúʼunñá xíʼin na̱ yiví tá ni̱xi̱yo iin campaña ña̱ conmemoración. ¿Ndáaña ke̱ʼéñá? Ki̱xáʼañá kéʼéñá chiñu ña̱ kivi keʼéñá, ta ku̱si̱íní-iniñá tá ku̱chiñuñá sa̱xínuñá ña̱yóʼo. Saátu chi̱ka̱a̱ñá ndee̱ xíʼin inkana ña̱ keʼéna ku̱a̱ʼáka chiñu nu̱ú Ndióxi̱. Xíʼin ña̱yóʼo kíʼinyó kuenta ña̱ chíndayáʼviní Jehová ndiʼi ña̱ kéʼé na̱ hermanoyó na̱ xa̱a̱ ku̱chée, ni kǒo kívi keʼéna ku̱a̱ʼáka chiñu nu̱úra (Sal. 71:17). Ná chika̱a̱-iniyó keʼéyó chiñu ña̱ kivi keʼéyó nu̱ú Ndióxi̱. Va̱ʼa ná koo iniyó nda̱a̱ táki̱ʼva kúni̱ mií Jehová. Ná ndukúyó ki̱ʼva ña̱ chindeétáʼanyó xíʼin na̱ hermanoyó. Tá ná keʼéyó ña̱yóʼo, Jehová taxira ku̱a̱ʼání ña̱ va̱ʼa ndaʼa̱yó. Ta nda̱a̱ táki̱ʼva ndo̱ʼo ta̱ Timoteo, ndiʼina kunina ña̱ ku̱a̱ʼa̱n xúxaka-iniyó xíʼin tu̱ʼun Ndióxi̱ (1 Tim. 4:15). w22.04 27 párr. 18, 19

Ni chíka̱a̱nívando ndee̱ ña̱ sanáʼa̱ndó se̱ʼendó xa̱ʼa̱ Jehová, ¿ndáaña kivi keʼéndó tá iin na̱yóʼo va̱ása kúni̱kana ndasakáʼnunara? Va̱ása ndakanixi̱níndó ña̱ va̱ása níkuchiñundó vií sakúaʼnundóna. Saáchi ndiʼivayó táxi Jehová ña̱ ná ndaka̱xinyó á ndasakáʼnuyóra á va̱ása. Va̱ása kaka-inindó ña̱ kixaa̱va iin ki̱vi̱ ña̱ ndandikóna nu̱úra. Ndakaʼánndó xa̱ʼa̱ ta̱ loʼo ta̱ na̱túʼun ta̱ Jesús xa̱ʼa̱ (Luc. 15:​11-19, 22-24). Nda̱kiʼinra ku̱a̱ʼa̱nra inka ñuu ta ke̱ʼéra ku̱a̱ʼání ña̱ va̱ása va̱ʼa, ta tándi̱ʼi nda̱ndikóvara. Jehová ta̱xira iin chiñu ña̱ ndáyáʼviní ndaʼa̱ndó ña̱ viíní sakúaʼnundó se̱ʼendó, chi na̱yóʼo kúú na̱ kivi kachíñu nu̱úra (Sal. 78:​4-6). Kúnda̱a̱-inindi̱ ña̱ yo̱ʼvi̱ní chiñu kúúmiíndó ña̱ sakúaʼnundó se̱ʼendó. Ña̱kán táxiníndi̱ tíxa̱ʼvi ndaʼa̱ndó xa̱ʼa̱ ña̱ chíka̱a̱níndo ndee̱ ña̱ vií sákuaʼnundóna. Ndakundeéndó chindeétáʼanndó xíʼin se̱ʼendó ña̱ kuʼvi̱-inina kunina Jehová, ta saátu sakúaʼnundóna ta sanáʼa̱ndóna táki̱ʼva kúni̱ miíra (Efes. 6:4). Tá saá ná keʼéndó kusi̱íní-ini yiváyó Jehová xíʼinndó. w22.05 30, 31 párr. 16-18

Tá ndiʼiyó chíka̱a̱yó ndee̱ ña̱ kachíñuyó nu̱ú Jehová xíʼin ndinuʼu-iniyó, va̱ʼaní kutáʼanyó ta kǒo ku̱a̱chi koo ti̱xin congregación. Ña̱yóʼo kúú ña̱ ke̱ʼé na̱ cristiano na̱ xi̱ndoo tá siglo nu̱ú. Na̱yóʼo xa̱a̱ síín síín ña̱ xi̱xini̱na keʼéna ta xa̱a̱ síín síín chiñu xi̱kuumiína (1 Cor. 12:​4, 7-11). Soo va̱ása níxikeetáʼanna ta ni va̱ása níxi̱taʼví táʼanna. Chi ta̱ apóstol Pablo ni̱ka̱ʼa̱nra xíʼin na̱ ñuu Éfeso ña̱ ná “chika̱a̱na ndee̱ xíʼin ña̱ congregación ña̱ íyo nda̱a̱ táki̱ʼva íyo ku̱ñu ta̱ Cristo”. Ta ka̱chikara: “Tá iin iin táʼví ku̱ñu yóʼo sáxi̱nuña chiñuña, ña̱yóʼo va̱ʼaníka xáʼnuña ta xa̱a̱yó kuʼvi̱ka-iniyó kunitáʼanyó” (Efes. 4:​1-3, 11, 12). Tá ke̱ʼéna ña̱yóʼo, va̱ʼaní chi̱ndeétáʼanna xíʼin na̱ congregación ña̱ vií kutáʼanna ta va̱ása taʼví táʼanna. Ta saátu kéʼé na̱ hermano ti̱xin congregación tiempo vitin. Chika̱a̱ ndee̱ ña̱ va̱ása chitáʼún miíún xíʼin inkana va̱ʼaka kundiku̱ún yichi̱ ta̱ Jesús, ta chika̱ún ndee̱ ña̱ keʼún nda̱a̱ táki̱ʼva ke̱ʼéra. Jehová nda̱kúní-inira ta va̱ása nándósó-inira xa̱ʼa̱ ndiʼi chiñu ña̱ kéʼún nu̱úra (Heb. 6:10). w22.04 14 párr. 15, 16

Va̱ʼaní kúniyó saáchi su̱ví miíyó kúú na̱ xíniñúʼu ndaka̱xin ndáana kúú na̱ xíniñúʼu ixakáʼnu-ini Jehová xa̱ʼa̱. Soo íyo iin ña̱ kivi keʼéyó. ¿Ndáaña kúúña? Sana iinna ke̱ʼéna iin ña̱ va̱ása va̱ʼa xíʼinyó ta káʼa̱nna xíʼinyó ña̱ ná koo káʼnu-iniyó xa̱ʼa̱na. Soo sana ixayo̱ʼvi̱vaña xíʼinyó keʼéyó ña̱yóʼo chi ni̱xo̱ʼvi̱níyó xíʼin ña̱ ke̱ʼéna xíʼinyó. Xa̱ʼa̱ ña̱kán xíniñúʼuyó ku̱a̱ʼá tiempo ña̱ va̱ʼa nandósó-iniyó xa̱ʼa̱ ña̱ ke̱ʼéna xíʼinyó. Tutu La Atalaya 15 tí septiembre ña̱ ku̱i̱ya̱ 1994 káchiña: “Ña̱ ixakáʼnu-iniyó xa̱ʼa̱ na̱ ke̱ʼé á na̱ ni̱ka̱ʼa̱n iin ña̱ va̱ása va̱ʼa xíʼinyó, su̱ví ña̱yóʼo kúni̱ kachiña ña̱ va̱ʼa íyo ña̱ ke̱ʼéna chi ña̱ kéʼéyó kúú ña̱ sándakooyó ku̱a̱chi ña̱ ke̱ʼéna xíʼinyó ndaʼa̱ Jehová. Chi iinlá mií Jehová kúú ta̱ nda̱kúní ndátiin ku̱a̱chi ta kixaa̱ iin tiempo ña̱ ndatiinraña xíʼinna”. w22.06 9 párr. 6, 7

Jehová ni̱ka̱ʼa̱nra ña̱ sandátakara na̱ yiví na̱ kixi ti̱xin ñuu náʼnu xíʼin ñuu válí, na̱ káʼa̱n ndiʼi nu̱ú tu̱ʼun ta ki̱xina ti̱xin ndiʼi tribu ña̱ ndasakáʼnunara. Ta tiempo vitin ku̱a̱ʼání kúú na̱yóʼo (Apoc. 7:​9, 10). Ta ndiʼi na̱yóʼo kúúna ta̱a, ñaʼá xíʼin na̱ va̱lí na̱ xa̱a̱ síín raza, xa̱a̱ síín tu̱ʼun káʼa̱nna ta xa̱a̱ síín ñuu ke̱ena, soo ndiʼina kúúna iin familia na̱ íyo nu̱ú iníísaá ñuyǐví ta va̱ʼaní kítáʼanna (Sal. 133:1; Juan 10:16). Ndiʼi tiempo íyo tu̱ʼvana ña̱ natúʼunna xíʼin na̱ yiví xa̱ʼa̱ ña̱ ndakiʼinyó chí nu̱únínu (Mat. 28:​19, 20; Apoc. 14:​6, 7; 22:17). Tá kúún táʼan na̱yóʼo, chíndayáʼvinívaún ña̱ va̱ʼa ña̱ ndátún ndakiʼún chí nu̱únínu. Ta̱ Ndi̱va̱ʼa va̱ása kúni̱ra ña̱ ná ndakiʼinyó ña̱ ni̱ka̱ʼa̱n Ndióxi̱ taxira ndaʼa̱yó chí nu̱únínu. Kúni̱ra ña̱ ná ndakanixi̱níyó ña̱ va̱ása ndáyáʼviyó nu̱ú Jehová, ta saátu ña̱ va̱ása saxínura ña̱ ni̱ka̱ʼa̱nra taxira ndaʼa̱yó. Tá ná taxiyó ña̱ sandáʼvi ta̱ Ndi̱va̱ʼa miíyó, va̱ása ndakúka koo iniyó ta nda̱a̱ kivi xa̱a̱yó sandákooyó ña̱ kachíñuyó nu̱ú Jehová. w22.06 20, 21 párr. 2, 3

Ña̱ kandíxaníyó ña̱ ndakundoo va̱ʼayó chí nu̱únínu chindeétáʼanña xíʼinyó ña̱ ya̱ʼayó nu̱ú tu̱ndóʼo. Ná ndakaʼányó chi ta̱ Jesús ni̱ka̱ʼa̱nra ña̱ ixandi̱va̱ʼana xíʼinyó (Juan 15:20). Ña̱kán, ña̱ ndakanixi̱níyó xa̱ʼa̱ ña̱ káʼa̱n Jehová taxira ndaʼa̱yó chí nu̱únínu, ña̱yóʼo chindeétáʼan xíʼinyó ña̱ chika̱a̱yó ndee̱ ña̱ ndasakáʼnuyóra. Xa̱ʼa̱ ña̱ xi̱ndatu ta̱ Jesús ña̱ ndakiʼinra ña̱ va̱ʼa, ña̱yóʼo chi̱ndeétáʼan xíʼinra ni xi̱kunda̱a̱-inira ña̱ xo̱ʼvi̱níra tá ná kuvira. Tá ku̱i̱ya̱ 33 ña̱ Pentecostés, ta̱ apóstol Pedro ni̱ka̱ʼa̱nra xa̱ʼa̱ iin profecía ña̱ va̱xi nu̱ú salmo ta ña̱yóʼo liviní káʼa̱nña xa̱ʼa̱ ta̱ Jesús, chi xa̱ʼa̱ ña̱ xi̱kandíxa ta̱ Jesús ña̱ ndakiʼinra chí nu̱únínu va̱ʼaní táxi̱n ni̱xi̱yo inira ni xi̱kunda̱a̱-inira ña̱ kuvira: “Tá tákui̱ kandíxakai̱ yóʼó, saáchi va̱ása sandákoún yi̱ʼi̱ ini Ya̱vi̱ nu̱ú ndúxu̱nna, saátu ni va̱ása taxiún ña̱ ta̱ʼyi̱ ku̱ñui̱ kán, chi nda̱kú íyo inii̱ xíʼún. Sakútún níma̱i̱ xíʼin ña̱ si̱í-ini” (Hech. 2:​25-28; Sal. 16:​8-11). Ta̱ Jesús xi̱kandíxara ña̱ sandátaku yivárara ta ndikóra koora xíʼinra chí ndiví (Heb. 12:​2, 3). w22.10 25 párr. 4, 5

Iin yichi̱, ta̱ Santiago xíʼin ta̱ Juan ni̱ka̱ʼa̱nna xíʼin siʼína ña̱ ná ka̱ʼa̱nñá xíʼin ta̱ Jesús ña̱ ná taxira chiñu ña̱ ndáyáʼvi ndaʼa̱na ti̱xin Reinora (Mat. 20:​20, 21). U̱vi̱ saá na̱ apóstol yóʼo ni̱na̱ʼa̱na ña̱ ni̱nuní xi̱kunina ta xi̱kutóona kuumiína ku̱a̱ʼání ña̱ʼa (Prov. 16:18). Su̱ví nda̱saa ta̱ Santiago xíʼin ta̱ Juan kúú na̱ níkeʼé ña̱yóʼo. Ná kotoyó ndáaña ke̱ʼé inka na̱ apóstol: “Tá na̱kunda̱a̱-ini na̱ inka 10 kán xa̱ʼa̱ ña̱yóʼo, ni̱sa̱a̱nína xíʼin u̱vi̱ saá na̱yóʼo” (Mat. 20:24). Sana ndeéníva ni̱sa̱a̱ xíʼin táʼanna. ¿Ndáaña ke̱ʼé ta̱ Jesús? Va̱ása nísa̱a̱ra xíʼinna. Ta ni kǒo níka̱ʼa̱ntura ña̱ ndukúra inka na̱ apóstol na̱ vitá-ini na̱ ndixa kúʼvi̱-ini xínitáʼanna. Chi nu̱úka ña̱ keʼéra saá, viíní ni̱ka̱ʼa̱nra xíʼinna chi xi̱kunda̱a̱-inira ndáaña xi̱ndikaa̱ níma̱na (Mat. 20:​25-28). Viíva xi̱keʼé ta̱ Jesús xíʼinna ta xi̱kuʼvi̱-inira xi̱xinirana. w23.03 28, 29 párr. 10-13

Sana xa̱a̱ ku̱a̱ʼání ku̱i̱ya̱ káʼviún Biblia, ta ña̱yóʼo chi̱ndeétáʼanña xíʼún ña̱ ku̱nda̱a̱-iniún ña̱ tu̱ʼun mií Ndióxi̱ kúúña. Soo mií ña̱ ndáyáʼvi va̱ʼaka kúú ña̱ ni̱xa̱ún ku̱nda̱a̱-iniún xa̱ʼa̱ Jehová. Ta xa̱ʼa̱ ña̱ kúʼvi̱ní-iniún xíniúnra, ndataxiún miíún ndaʼa̱ra ta ni̱xa̱ún nda̱kuchiún. Va̱ʼaní ke̱ʼún. Sana tá kúma̱ní ndakuchiún ni̱ya̱ʼún nu̱ú ku̱a̱ʼání tu̱ndóʼo. Soo tá ná ya̱ʼa tiempo kixikavaña nu̱ún. Ta̱ Ndi̱va̱ʼa kuni̱ra ña̱ sandákoún ña̱ kuʼvi̱-iniún kuniún Jehová ta kuxíkáún nu̱úra (Efes. 4:14). Soo va̱ása taxiún ña̱ keʼéra ña̱yóʼo. ¿Ndáaña chindeétáʼan xíʼún ña̱ nda̱kú koo iniún xíʼin Jehová ta saxínún ña̱ ki̱ndoún xíʼinra? Xíniñúʼu ndakundeún kuaʼnukaún xíʼin tu̱ʼun Ndióxi̱ ta kuxa-iniún xíʼin ña̱yóʼo (Heb. 6:1). w22.08 2 párr. 1, 2

Va̱ása xíniñúʼu natúʼunyó xíʼin inkana xa̱ʼa̱ sava ña̱ kúu ti̱xin veʼeyó. Ná ka̱ʼa̱nyó xa̱ʼa̱ iin ta̱ hermano: ñá síʼira kéʼéñá iin ña̱ʼa ña̱ sáku̱a̱ku̱ní miíra, soo va̱ása kakavíra natúʼunra xíʼin inkana xa̱ʼa̱ ña̱ kéʼé ñáyóʼo. Chi xa̱ʼa̱ ña̱ kúʼvi̱ní-inira xínirañá, va̱ása keʼévíra iin ña̱ʼa ña̱ kivi sákukaʼan nu̱úñá á ña̱ kivi sakúsuchí-iniñá (Efes. 5:33). Saátu na̱ íyo se̱ʼe xíniñúʼu ndakaʼánna ña̱ na̱ va̱lí se̱ʼena kútóonína ña̱ vií ná keʼéna xíʼinna. Xa̱ʼa̱ ña̱kán va̱ása sakúkaʼanvína nu̱úna ta natúʼunna xíʼin inka na̱ yiví xa̱ʼa̱ ña̱ kéʼé na̱ va̱lí yóʼo (Col. 3:21). Ta saátu na̱ va̱lí xíniñúʼu sakúaʼana ña̱ va̱ása xíniñúʼu natúʼunna xa̱ʼa̱ sava ña̱ ndóo na̱ veʼena, chi kivi sakúkaʼanna nu̱úna. Tá ndiʼina chíka̱a̱na ndee̱ ña̱ va̱ása nátúʼunna xa̱ʼa̱ ña̱ ndóʼo na̱ veʼena, va̱ʼaní kitáʼan ndiʼina. w22.09 10 párr. 9

Jehová ni̱ka̱ʼa̱nra xíʼin ta̱ Job ña̱ iin Ndióxi̱ ta̱ ndíchiní kúúra ta va̱ʼaní ndáara ndiʼi ña̱ʼa ña̱ i̱xava̱ʼara. Tá kúú, ni̱ka̱ʼa̱nra xa̱ʼa̱ ku̱a̱ʼá kití tí ixava̱ʼara (Job 38:​1, 2; 39:​9, 13, 19, 27; 40:15; 41:​1, 2). Ta saátu chi̱ndaʼára ta̱ Elihú ña̱ chika̱a̱ra ndee̱ xíʼin ta̱ Job ta sandíkora-inira. Ta ta̱yóʼo sa̱ndákaʼánra ta̱ Job ña̱ ndiʼi tiempo ku̱a̱ʼání ña̱ va̱ʼa táxi Jehová ndaʼa̱ na̱ nda̱kú íyo ini káchíñu nu̱úra. Soo saátu xi̱kuni̱ Jehová ña̱ ná taxi ta̱ Elihú sava consejo ndaʼa̱ ta̱ Job. Ta xa̱ʼa̱ ña̱ kúʼvi̱ní-ini ta̱ Elihú xínira ta̱ Job, va̱ʼaní chi̱ndeétáʼanra xíʼinra, saáchi sandákaʼánrara ña̱ va̱ása inkáchi íyo miíyó na̱ yiví xíʼin Ndióxi̱, chi ta̱yóʼo kúú ta̱ i̱xava̱ʼa ndiʼi ña̱ʼa. Ta saátu ni̱ka̱ʼa̱n Jehová xíʼin ta̱ Job ña̱ ná keʼéra oración xa̱ʼa̱ na̱ u̱ni̱ migora na̱ ni̱ka̱ʼa̱n ña̱ va̱ása va̱ʼa xíʼinra (Job 42:​8-10). Ta tiempo vitin, ¿ndáa ki̱ʼva chíndeétáʼan Jehová xíʼinyó tá yáʼayó nu̱ú tu̱ndóʼo ña̱ yo̱ʼvi̱ní? Va̱ása káʼa̱n túviví Jehová xíʼinyó nda̱a̱ táki̱ʼva ke̱ʼéra xíʼin ta̱ Job. Soo xíniñúʼuvara tu̱ʼunra ña̱ Biblia ña̱ ka̱ʼa̱nra xíʼinyó (Rom. 15:4). w22.08 11 párr. 10, 11

Ti̱xin congregación ñuu Roma, nu̱ú xi̱ñuʼu na̱ judío xíʼin inka na̱ ñuu. Xa̱ʼa̱ ña̱ va̱ása níxi̱ndiku̱nkana ley ta̱ Moisés, ki̱xáʼana xíxina sava ña̱ʼa ña̱ xi̱ka̱ʼa̱n ley ña̱ va̱ása níxi̱xiniñúʼu kuxuna (Mar. 7:19). Sava na̱ judío va̱ʼava xi̱kunina tá xi̱xixina ndiʼi saá nu̱ú ña̱ʼa. Soo nu̱ú inka na̱ judío iin ku̱a̱chi ndeéní xi̱kuu ña̱yóʼo. Ta xa̱ʼa̱ ña̱yóʼo nda̱taʼvína ti̱xin congregación. Ta̱ apóstol Pablo ni̱ka̱ʼa̱nra xíʼinna ña̱ ndáyáʼviní vií kutáʼanna ti̱xin congregación (Rom. 14:​19, 20). Nda̱a̱ mií ta̱ apóstol Pablo nda̱koora ña̱ keʼéra sava ña̱ʼa, chi kǒo níxi̱kuni̱ra sandákavara-ini inkana (1 Cor. 9:​19-22). Ta nda̱a̱ táki̱ʼva ke̱ʼé ta̱ Pablo, tá kúni̱yó ndasandakúyó-ini na̱ hermanoyó ná kǒo kanitáʼanyó xíʼinna xa̱ʼa̱ ña̱ xa̱a̱ síín síín íyo ña̱ ndáka̱xinyó keʼéyó. w22.08 22 párr. 7

¿Á su̱ví tá kúni̱yó keʼéyó iin chiñu nu̱ú Ndióxi̱, chíka̱a̱níyó ndee̱ ña̱ va̱ʼa xa̱a̱yó keʼéyóña? Saátu xíniñúʼu chika̱a̱níyó ndee̱ ña̱ keʼéyó ña̱ va̱ʼa. Ta mií Jehová chindeétáʼan xíʼinyó ña̱ ndakundeéyó keʼéyó ña̱yóʼo ndiʼi tiempo (Sal. 84:​5, 7). Viíní káʼa̱n Jehová xíʼinyó ña̱ keʼéyó chiñu ña̱ xáʼndara nu̱úyó chi va̱ása yo̱ʼvi̱nívíña (1 Juan 5:3). Chi ña̱yóʼo chíndeétáʼanníña xíʼinyó ta ndáaña miíyó ndiʼi ki̱vi̱. Ná ndakanixi̱níyó xa̱ʼa̱ ndiʼi ña̱ táxi Jehová ndaʼa̱yó, ña̱ ni̱ka̱ʼa̱n ta̱ apóstol Pablo xa̱ʼa̱ (Efes. 6:​14-18). ¿Ndáaña táxi Ndióxi̱ ndaʼa̱yó kúú ña̱ ndáa níma̱yó? Ka̱a ña̱ ndákasi kándíkayó, ta ña̱yóʼo kúú ña̱ va̱ʼa ña̱ káʼa̱n Jehová xíʼinyó keʼéyó. Ta nda̱a̱ táki̱ʼva ndáa ka̱a yóʼo níma̱ iin na̱ soldado, saátu ndiʼi ña̱ káʼa̱n Jehová xíʼinyó ndáaña ña̱ ndákani-iniyó. Ña̱kán ndáyáʼviní keʼéyó ña̱ káʼa̱n Jehová xíʼinyó chi ña̱yóʼo kúú ña̱ ndáa miíyó (Prov. 4:23). w22.08 29 párr. 13, 14

Ku̱a̱ʼání ku̱i̱ya̱ tu̱ʼun Ndióxi̱ va̱ʼaní níʼiña yichi̱ nu̱ú na̱ ñuura. Soo, ¿nda̱chun va̱ʼa kúúmiíyó Biblia nda̱a̱ tiempo vitin? Jehová ni̱ka̱ʼa̱nra xíʼin na̱ ka̱ʼyíña ña̱ ná kotondaana ña̱ va̱xi nu̱ú ña̱ original ña̱ va̱ʼa sándaya̱ʼanaña nu̱ú inka ña̱ʼa tasaá tavána ku̱a̱ʼá copiaña. Ni na̱ yiví ku̱a̱chi xi̱kuu na̱ sa̱ndáya̱ʼa ña̱yóʼo, soo viíní sa̱ndáya̱ʼanaña. Iin ta̱ káʼvi va̱ʼa xa̱ʼa̱ ña̱ Escrituras Hebreas ni̱ka̱ʼa̱nra ña̱yóʼo: “Ni nda̱a̱ iin tutu kǒo kítáʼan xíʼin ña̱ Biblia chi nda̱a̱ táki̱ʼva íyo ña̱ ka̱ʼyína tá ya̱chi̱, saá íyo ña̱ sa̱ndáya̱ʼana nu̱ú ña̱ kúúmiíyó vitin”. Soo ni saá ndiʼi ña̱ va̱xi nu̱úña tu̱ʼun mií Jehová kúúña. Ndiʼi ña̱ʼa ña̱ va̱ʼa, chí ndiví va̱xiña ta Ndióxi̱ kúú ta̱ táxiña (Sant. 1:17). Biblia kúú iin regalo ña̱ va̱ʼaní ta̱xi Ndióxi̱ ndaʼa̱yó. Tá iinna táxina regalo ndaʼa̱yó, náʼa̱na ña̱ ndixa xíni̱na miíyó ta saátu kúnda̱a̱-inina ndáa ña̱ʼa kúú ña̱ xíniñúʼuyó. Saá kúú ña̱ kúu xíʼin Biblia, tá káʼviyóña ku̱a̱ʼání ña̱ʼa sákuaʼayó xa̱ʼa̱ Jehová. Ta xíʼin ña̱yóʼo kúnda̱a̱-iniyó ña̱ va̱ʼaní xíni̱ra miíyó ta kúnda̱a̱-inira ndáa ña̱ʼa kúú ña̱ xíniñúʼuyó. w23.02 2, 3 párr. 3, 4

¿Á xa̱a̱ ndákanixi̱níyó ña̱ liviní koo tá ná ndataku na̱ yiví ti̱xin ña̱ mil ku̱i̱ya̱ tá ná kaʼndachíñu ta̱ Cristo? Ndiʼi miíyó na̱ ni̱xi̱ʼi̱ na̱ veʼe kúni̱kavíyó ndikóyó kuniyóna ta saátu Jehová kúni̱ra ndikóra kunirana (Job 14:15). Ná ndakanixi̱níyó ña̱ ku̱a̱ʼánína ndikó tukuna kunina na̱ veʼena ta kusi̱íní-inina. Na̱ ke̱ʼé ña̱ va̱ʼa va̱xi ki̱vi̱na nu̱ú libro nu̱ú va̱xi ki̱vi̱ na̱ kutaku, ta na̱yóʼo ndatakuna (Hech. 24:15; Juan 5:29). Sana na̱ veʼeyó na̱ kúni̱níyó xíniyó kúú na̱ siʼna ndataku, ta saátu na̱ ke̱ʼé ña̱ va̱ása va̱ʼa, na̱ va̱ása nísakuaʼa xa̱ʼa̱ Jehová á na̱ va̱ása níkachíñu nu̱úra tá kúma̱ní kuvina, ndatakuna ta ndatiinna ku̱a̱chi xíʼinna. Ndiʼi na̱ ndataku yóʼo ku̱a̱ʼání ña̱ xa̱a̱na sakúaʼana (Is. 26:9; 61:11). Ña̱kán tiempo saá ku̱a̱ʼáníka na̱ yiví natúʼunyó xíʼin xa̱ʼa̱ Ndióxi̱ (Is. 11:10). w22.09 20 párr. 1, 2

Jehová ni̱na̱ʼa̱ra ña̱ iinlá miíra kúú ta̱ káʼnuka nu̱ú ndiʼi na̱ chíñu na̱ íyo nu̱ú ñuʼú yóʼo. Tá kúú, chi̱ndeétáʼanra xíʼin na̱ ñuu Israel ña̱ nda̱kiʼinna ku̱a̱ʼá ñuʼú ña̱ ni̱ka̱ʼa̱nra taxira ndaʼa̱na (Jos. 11:​4-6, 20; 12:​1, 7, 24). Xa̱a̱ ku̱a̱ʼání yichi̱, Jehová náʼa̱ra ña̱ iinlá miíra kúú ta̱ káʼnuka. Tá kúú ña̱ ke̱ʼéra xíʼin ta̱ Nabucodonosor ta̱ xi̱kuu rey ña̱ ñuu Babilonia, ta rey yóʼo ni̱nuní xi̱kunira ta nda̱kanixi̱níra ña̱ kúúmiíníra ndee̱ ta xi̱kuni̱ra ña̱ iinlá miíra ndasakáʼnuna. Kǒo níndakunira ña̱ iinlá Jehová kúú ta̱ xíniñúʼu ndasakáʼnuna, ta xa̱ʼa̱ ña̱kán Jehová ta̱xira ña̱ ná sanara. Tá nda̱ʼa ta̱ Nabucodonosor, nda̱sakáʼnura Jehová ta nda̱kunira ña̱ iinlá mií Jehová kúú ta̱ kivi kaʼndachíñu ndiʼi tiempo. Ta ni̱ka̱ʼa̱nra ña̱ kǒo nda̱a̱ iin ña̱ʼa kivi kasi nu̱ú Jehová ña̱ keʼéra ña̱ kúni̱ra (Dan. 4:​30, 33-35). Ta̱ ka̱ʼyí iin salmo ka̱chira: “Si̱í íyo ini na̱ ñuu na̱ ndásakáʼnu Jehová, na̱ ñuu na̱ nda̱kaxinra ndasakáʼnu-ñaʼá” (Sal. 33:12). Ña̱yóʼo va̱ʼaní chíndeétáʼanña xíʼinyó ña̱ nda̱kú koo iniyó xíʼin Jehová. w22.10 15, 16 párr. 13-15

Xa̱ʼa̱ ña̱ kúnda̱a̱-iniyó ña̱ xa̱a̱ xínu ku̱a̱ʼání profecía ña̱ va̱xi nu̱ú Biblia ña̱yóʼo chíndeétáʼanña xíʼinyó ña̱ kandíxakayó ña̱ káʼa̱n Ndióxi̱ keʼéra chí nu̱únínu xi̱nuvaña. Ta ndóʼoyó nda̱a̱ táki̱ʼva ndo̱ʼo iin ta̱ ka̱ʼyí Salmo tá ni̱ka̱ʼa̱nra xíʼin Jehová: “Kúnii̱ ná sakǎkún yi̱ʼi̱ saáchi tu̱ʼún va̱ʼaní chíndeétáʼanña xíʼi̱n” (Sal. 119:81). Xa̱ʼa̱ ña̱ kúʼvi̱ní-ini Jehová xínira miíyó nu̱ú tu̱ʼunra káʼa̱nra xíʼinyó ña̱ taxira iin ña̱ va̱ʼaní ndaʼa̱yó chí nu̱únínu (Jer. 29:11). Jehová kúú ta̱ káʼa̱n taxi iin ña̱ va̱ʼaní ndaʼa̱yó chí nu̱únínu ta su̱ví na̱ ñuyǐví yóʼo, ña̱kán ná ndakundeéyó kaʼviyó xa̱ʼa̱ profecía ña̱ va̱xi nu̱ú Biblia ña̱ va̱ʼa kandíxakayó ña̱ káʼa̱n Jehová keʼéra chí nu̱únínu. Kándíxatuyó ña̱ va̱xi nu̱ú Biblia saáchi consejo ña̱ va̱xi nu̱úña va̱ʼaní chíndeétáʼanña xíʼin na̱ yiví (Sal. 119:​66, 138). Tá kúú, na̱ xa̱a̱ ti̱ndaʼa̱ na̱ xi̱kuni̱ sandákootáʼan, vitin va̱ʼaní si̱í ndóona ta viíní kítáʼanna, saáchi ndíku̱nna consejo ña̱ va̱xi nu̱ú Biblia ta na̱ va̱lí se̱ʼena si̱íní ndóona ta kúʼvi̱-inina xínitáʼanna (Efes. 5:​22-29). w23.01 5 párr. 12, 13

¿Á ndákanixi̱níyó ndáa ki̱ʼva xa̱a̱ chíndeétáʼan Jehová xíʼinyó nda̱a̱ táki̱ʼva káchi nu̱ú tu̱ʼunra? Tá kúú, ta̱ Jesús ni̱ka̱ʼa̱nra ña̱ taxiva Jehová ña̱ xíniñúʼuyó (Mat. 6:​32, 33). Saátu ni̱ka̱ʼa̱n ta̱ Jesús ña̱ taxiva Jehová espíritu santora ndaʼa̱yó tá ná ndukúyóña nu̱úra (Luc. 11:13). Ta xa̱a̱ sáxi̱nuva Jehová ña̱yóʼo. Ta sana ndákanixi̱níyó xa̱ʼa̱ inkaka ña̱ xa̱a̱ kéʼé Jehová xa̱ʼa̱yó. Tá kúú, ña̱ íxakáʼnu-inira xa̱ʼa̱yó, ña̱ sándi̱kora-iniyó xíʼin ña̱ táxira ña̱ xíniñúʼuyó ña̱ va̱ʼa sákuaʼakayó xa̱ʼa̱ra (Mat. 6:14; 24:45; 2 Cor. 1:3). Tá ndákanixi̱níyó xa̱ʼa̱ ña̱ xa̱a̱ kéʼé Jehová xa̱ʼa̱yó, saá kandíxaníkayó ña̱ sáxi̱nura ña̱ káʼa̱nra keʼéra chí nu̱únínu. Kúnda̱a̱-iniyó ña̱ saxínuva Jehová ña̱ káʼa̱nra keʼéra xa̱ʼa̱yó. Ta nda̱a̱ táki̱ʼva ni̱ka̱ʼa̱n iin ta̱ ka̱ʼyí salmo: “Si̱íní íyo [...] na̱ kándíxa ña̱ mií Jehová chindeétáʼan xíʼinna, [...] chi ta̱kán nda̱kúní-inira” (Sal. 146:​5, 6). w22.10 27 párr. 15; 28 párr. 17

¿Á xa̱a̱ xínu profecía ña̱ káʼa̱n ña̱ xa̱a̱ na̱ yiví ndasakáʼnuna Jehová tiempo vitin nda̱a̱ táki̱ʼva kúni̱ miíra? Xa̱a̱ xínuvaña. Saáchi tá ku̱i̱ya̱ 1919, ku̱a̱ʼání na̱ yiví ki̱xáʼana ke̱ena ti̱xin Babilonia ña̱ káʼnu, ña̱yóʼo kúú ndiʼi religión vatá ña̱ íyo nu̱ú ñuʼú yóʼo. Ta ndiʼi na̱ yiví yóʼo inkáchi kítáʼanna ndásakáʼnuna Ndióxi̱ (Is. 51:3; 66:8). Nda̱a̱ tá 1919, na̱ nda̱kaxin Ndióxi̱ ku̱ʼu̱n chí ndiví inkáchi xi̱kitáʼanna ña̱ xi̱ndasakáʼnunara. Ta tá ni̱ya̱ʼa tiempo, na̱ ndátu koo nu̱ú ñuʼú yóʼo inkáchi nda̱kutáʼanna ndásakáʼnuna Ndióxi̱ ta ku̱a̱ʼání bendición táxi Jehová nda’a̱na (Juan 10:16; Is. 25:6; 65:13). Ndiʼi na̱yóʼo xáa̱na ndúuna na̱ ñuura tá xíʼin ndiʼi níma̱na ndákundeéna ndásakáʼnunara. w22.11 11, 12 párr. 12-15

¿Á íxayo̱ʼvi̱ña xíʼún tá ndákanixi̱níún xa̱ʼa̱ Jehová ña̱ ndiʼi tiempo íyora? (Is. 40:28). Su̱ví iinlá yóʼó ndóʼo saá. Chi saátu ni̱ka̱ʼa̱n ta̱ Elihú xa̱ʼa̱ Ndióxi̱ ña̱ ku̱a̱ʼání ku̱i̱ya̱ íyora ta va̱ása kúnda̱a̱-iniyó xíʼin ña̱yóʼo (Job 36:26). Sava yichi̱ kǒo kúnda̱a̱ káxi iniyó xa̱ʼa̱ iin ña̱ʼa, soo su̱ví ña̱yóʼo kúni̱ kachiña ña̱ kǒoña íyo. Tá kúú ná ka̱ʼa̱nyó xa̱ʼa̱ luz, ni kǒo kúnda̱a̱ va̱ʼa-iniyó ndáa ki̱ʼva káchíñu ña̱yóʼo. Soo su̱ví ña̱yóʼo kúni̱ kachiña ña̱ kǒoña íyo. Ta ki̱ʼva saá kúú ña̱ ndóʼoyó tá ndákanixi̱níyó xa̱ʼa̱ Jehová, sana va̱ása kivi xa̱a̱yó kunda̱a̱-iniyó ama ki̱xáʼa íyora ta ni kǒo kúnda̱a̱-iniyó ña̱ íyora ndiʼi tiempo. Su̱ví ña̱yóʼo kúni̱ kachiña ña̱ loʼo kuití tiempo íyo Jehová. Ndiʼi ña̱ káʼa̱n Biblia xa̱ʼa̱ Jehová ña̱ nda̱a̱ kúúña ni kúnda̱a̱-iniyó xíʼinña á va̱ása (Rom. 11:​33-36). Ña̱kán, xa̱a̱ íyova Jehová tá kúma̱ní kuva̱ʼa ndiʼi ña̱ íyo chí ndiví, tá kúú ñu̱ʼu á ña̱ka̱ndii xíʼin ndiʼi tí ki̱mi. Biblia káʼa̱nña xa̱ʼa̱ Jehová ña̱ xi̱niñúʼura ndee̱ra ña̱ i̱xava̱ʼara ñuʼú yóʼo xíʼin ndiʼi ña̱ʼa ña̱ íyo chí ndiví (Jer. 51:15). w22.12 2, 3 párr. 3, 4

Sava yichi̱ káʼa̱nna xíʼinyó ña̱ ná keʼéyó oración nu̱ú íyo ku̱a̱ʼá na̱ yiví. Tá kúú iin ñá hermana ñá káʼvi Biblia xíʼin iin na̱ yiví, kivi ka̱ʼa̱nñá xíʼin ñá hermana ñá ku̱a̱ʼa̱n xíʼinñá ña̱ ná keʼéñá oración, ta sana ñáyóʼo va̱ása xíni̱ va̱ʼañá na̱ yiví na̱ káʼvi ñá hermana yóʼo xíʼin. Xa̱ʼa̱ ña̱kán sana kuni̱ñá keʼéñá oración nda̱a̱ tá ná ndiʼi kaʼviná xíʼin na̱ yiví yóʼo, chi saá kúú ña̱ kivi kunda̱a̱-iniñá ndáaña ka̱ʼa̱nñá xíʼin Ndióxi̱ xa̱ʼa̱ na̱ yiví yóʼo. Soo, tá ná ka̱ʼa̱nna xíʼin iin ta̱ hermano ña̱ ná keʼéra oración tá kéena predicación á tá íyo reunión ti̱xin congregación. Xíniñúʼu kiʼinra kuenta ña̱ tá káʼa̱nra xíʼin Ndióxi̱, su̱ví tiempo ña̱ ka̱ʼa̱nra xíʼin na̱ congregación ndáaña xíniñúʼu keʼéna kúúña. Saáchi tá xíyo reunión, u̱ʼu̱n minuto íyo ña̱ katana yaa ta keʼéna oración. Xa̱ʼa̱ ña̱kán, na̱ hermano na̱ kéʼé oración va̱ása xíniñúʼu ku̱a̱ʼání ka̱ʼa̱nna, tá kúú tá sa̱kán kíxáʼa reunión (Mat. 6:7). w22.07 24 párr. 17, 18

Ta̱ Jesús ni̱ka̱ʼa̱nra ña̱ ki̱vi̱ so̱ndíʼi kooní kue̱ʼe̱ xíkun “kooña ñuu yóʼo ta kooña ñuu káa” (Luc. 21:11). Ta xa̱ʼa̱ ña̱ xa̱a̱ xíni̱yó xa̱ʼa̱ ña̱yóʼo táxi̱n íyo iniyó. Xítoyó ndáa ki̱ʼva xínu ndiʼi ña̱ ni̱ka̱ʼa̱n ta̱ Jesús. Ña̱kán miíyó na̱ ndóo tiempo so̱ndíʼi vitin ndíku̱nyó consejo ña̱ sa̱ndákoo ta̱ Jesús ña̱ káchi: “Kuenta koondó, va̱ása yi̱ʼvíndó”. Tá kíxáʼa iin kue̱ʼe̱ xíkun, va̱ása kívika keʼéyó ña̱ xi̱keʼéyó tá ya̱chi̱. Soo ná va̱ása taxiyó ña̱ kasi ña̱yóʼo nu̱úyó ña̱ kaʼviyó tu̱ʼun Ndióxi̱ á ña̱ ku̱ʼu̱nyó reunión. Nu̱ú video xíʼin tutu ña̱ tává na̱ ñuu Ndióxi̱ kivi ndani̱ʼíyó ña̱ káʼa̱n xa̱ʼa̱ na̱ hermano na̱ kúúmií táʼan tu̱ndóʼo ña̱ kúúmiíyó ta ndákundeéna nda̱kú íyo inina xíʼin Jehová. w22.12 17 párr. 4, 6

Ku̱a̱ʼána xi̱kunda̱a̱-ini ña̱ xi̱kuʼvi̱ní-ini ta̱ Jacob xi̱xinira se̱ʼera ta̱ José (Gén. 37:​3, 4). Ña̱kán na̱ ñani ta̱ José ki̱xáʼana ku̱kúini̱-inina xi̱ninara, ta ni̱xi̱kónara nu̱ú na̱ íxi̱kó ña̱ʼa na̱ ke̱e chí Madián. Na̱kán nda̱kiʼinna ta̱ José ku̱a̱ʼa̱n xíʼinna chí ñuu Egipto, ta ña̱ ñuu yóʼo xíkaní xi̱kindo̱oña nu̱ú ni̱xi̱yo ta̱ José. Tá ni̱xa̱a̱na ñuu Egipto, na̱yóʼo ni̱xi̱kónara nu̱ú ta̱ Potifar, ta̱ xi̱ndisochíñu xíʼin na̱ xi̱ndaa ta̱ faraón. Iin kama na̱sama ña̱ ndo̱ʼo ta̱ José, yivára xi̱kuʼvi̱ní-inira xi̱xinirara, soo tá ni̱xa̱a̱ra Egipto iin esclavova ndu̱ura (Gén. 39:1). Sava yichi̱ kivi ya̱ʼayó nu̱ú tu̱ndóʼo (1 Cor. 10:13). Sana kivi kusi̱kindaana miíyó, kasina nu̱úyó á nda̱a̱ kivi ixandi̱va̱ʼana xíʼinyó xa̱ʼa̱ ña̱ ndíku̱nyó ta̱ Jesús (2 Tim. 3:12). Soo ni tá ná ya̱ʼayó nu̱ú ña̱yóʼo, Jehová chindeétáʼanvara xíʼinyó ña̱ kundeé-iniyó. w23.01 14, 15 párr. 3, 4

Sana kuni̱yó ka̱ʼa̱nyó xíʼin iin na̱ hermano na̱ ke̱ʼé iin ña̱ va̱ása va̱ʼa xíʼinyó. Soo tá kúma̱níka ka̱ʼa̱nyó xíʼinna ná ndakanixi̱níyó xa̱ʼa̱ ña̱yóʼo: “¿Á kúnda̱a̱-inii̱ xa̱ʼa̱ ndiʼi ña̱ ku̱u?” (Prov. 18:13). ¿Á xa̱ʼa̱ ña̱ kúni̱ miína kúú ña̱ ke̱ʼéna ña̱yóʼo xíʼi̱n? (Ecl. 7:20). ¿Á xa̱a̱ kéʼíi̱ táʼan ña̱yóʼo? (Ecl. 7:​21, 22). “Tá ná ka̱ʼi̱n xíʼin na̱ hermano yóʼo, ¿á kakuka ku̱a̱chi?” Tá ná taváyó tiempo ña̱ ndakanixi̱níyó xa̱ʼa̱ ndiʼi ña̱yóʼo, saá kúú ña̱ xa̱a̱yó kunda̱a̱-iniyó ña̱ va̱ʼaní ña̱ kuʼvi̱-iniyó kunitáʼanyó ta nandósóyó xa̱ʼa̱ ña̱ ke̱ʼéna xíʼinyó. Iin tá iinyó kivi na̱ʼa̱yó ña̱ ndixaní kúʼvi̱-iniyó xíniyó na̱ hermanoyó ni kúúna na̱ yiví ku̱a̱chi. Tásaá ná keʼéyó, inka na̱ yiví kiʼinna kuenta ña̱ ndíku̱nyó religión ña̱ nda̱a̱ ta kixáʼana kuni̱na ndasakáʼnuna Jehová xíʼinyó. Ña̱kán ná chika̱a̱-iniyó ña̱ kuʼvi̱ka-iniyó kuniyó na̱ hermanoyó chi saá kúú ña̱ na̱ʼa̱yó ña̱ kúúyó na̱ ndíku̱n ta̱ Cristo. w23.03 31 párr. 18, 19

Biblia káʼa̱nña ña̱ kúʼvi̱ní-ini Jehová xínira miíyó. Soo xa̱ʼa̱ ña̱ kúni̱níra xínira miíyó kǒo níka̱ʼa̱nra xa̱ʼa̱ ku̱a̱ʼání ña̱ʼa nu̱ú Biblia, saáchi kúnda̱a̱-inira ña̱ kǒo xíniñúʼuyó ña̱yóʼo (Juan 21:25). Kǒo iin lista va̱xi nu̱ú Biblia nu̱ú káʼa̱n Jehová xíʼinyó xa̱ʼa̱ iin tá iin ña̱ xíniñúʼu keʼéyó. Chi Jehová ta̱xira ña̱ ná ka̱ʼyi̱ ña̱ ke̱ʼé na̱ ni̱xi̱yo tiempo xi̱naʼá ña̱ va̱ʼa chindeétáʼanña xíʼinyó, saátu va̱xi profecía nu̱úña xíʼin consejo ña̱ ndáyáʼviní ña̱ va̱ʼaní chíndeétáʼan xíʼinyó ña̱ vií koo ña̱ ndaka̱xinyó keʼéyó. Ña̱yóʼo chíndeétáʼanña xíʼinyó ña̱ kuʼvi̱ní-iniyó kuniyó Jehová ta kuniso̱ʼoyó ndiʼi ña̱ káʼa̱nra. Biblia káʼa̱nña xíʼinyó ña̱ ndáyáʼviníyó nu̱ú Jehová. Kúnda̱a̱-iniyó xa̱ʼa̱ ña̱yóʼo saáchi nu̱ú Biblia va̱xi ku̱a̱ʼání ña̱ káʼa̱n ndáaña ndo̱ʼo na̱ yiví na̱ ni̱xi̱yo xi̱naʼá. Ta kivi xa̱a̱yó chitáʼanyó ña̱ ndóʼoyó xíʼin ña̱ ndo̱ʼo na̱yóʼo, saáchi nda̱a̱ táki̱ʼva íyo miíyó saá ni̱xi̱yona (Sant. 5:17). Tá xítoyó ndáa ki̱ʼva ke̱ʼé Jehová xíʼin na̱ yiví na̱ ni̱xi̱yo xi̱naʼá, saá kúnda̱a̱-iniyó ña̱ kúni̱ní Jehová xínira miíyó ta kúndáʼviní-inira xínira miíyó (Sant. 5:11). w23.02 6 párr. 13-15

Libro ña̱ Apocalipsis káʼa̱nña: “Ña̱yóʼo kúú ña̱ ni̱ka̱ʼa̱n ta̱ Jesucristo xa̱ʼa̱. Ndióxi̱ ni̱na̱ʼa̱ra nu̱ú ta̱ Jesús ña̱ xa̱a̱ ku̱nu̱mí kuu, ta ta̱yóʼo na̱ʼa̱raña nu̱ú na̱ káchíñu nu̱ú Ndióxi̱” (Apoc. 1:1). Kúni̱nívayó kunda̱a̱-iniyó xa̱ʼa̱ ndiʼi ña̱ kúu iníísaá ñuyǐví, saáchi ña̱yóʼo chindeétáʼanña xíʼinyó kunda̱a̱-iniyó ndáa ki̱ʼva xínu ndiʼi profecía ña̱ va̱xi nu̱ú Biblia. Soo, xíniñúʼu kiʼinníyó kuenta tá káʼa̱nyó ndáa ki̱ʼva xínu profecía ña̱ kúu tiempo vitin. ¿Nda̱chun? Saáchi va̱ása kúni̱yó ka̱ʼa̱nyó xa̱ʼa̱ ña̱ ndákanixi̱ní miíyó xíʼin na̱ hermanoyó, chi tá kéʼéyó ña̱yóʼo kivi ndataʼvíyó na̱ congregación. Tá kúú, sana kivi kuniso̱ʼoyó ña̱ ka̱ʼa̱n na̱ ku̱i̱ká, na̱ chíñu á na̱ níʼi yichi̱ ti̱xin veʼe-ñu̱ʼu ña̱ kivi sandíʼi-xa̱ʼa̱na ndiʼi tu̱ndóʼo ña̱ íyo nu̱ú ñuʼú yóʼo. Ña̱kán, tá xítoyó kúu ndiʼi ña̱yóʼo ná kǒo ndakanixi̱níyó ña̱ ki̱xáʼa xínu profecía ña̱ va̱xi nu̱ú 1 Tesalonicenses 5:​3, va̱ʼaka ná kiʼinyó kuenta xíʼin ndiʼi ña̱ xa̱á ña̱ tává na̱ ñuu Ndióxi̱. Tá ndiʼi ña̱ káʼa̱nyó ná taváyóña nu̱ú ña̱ sánáʼa̱ na̱ ñuu Ndióxi̱ miíyó, ña̱yóʼo chindeétáʼanña xíʼinyó ña̱ inkáchi koo ña̱ ndakanixi̱níyó xíʼin na̱ hermanoyó (1 Cor. 1:10; 4:6). w23.02 16 párr. 4, 5

¿Nda̱chun kúʼvi̱-iniún xíniún ta̱ Jesucristo? Ta̱ Jesús vitání-inira ta saátu kéʼéra ña̱ va̱ʼa, saáchi ndiʼi tiempo káʼa̱nra ña̱ nda̱a̱ xa̱ʼa̱ yivára Jehová ta ndákiʼinra tu̱ʼunra. Ña̱kán, tá kúʼvi̱-iniún xíniún ña̱ nda̱a̱ ña̱ sákuaʼún xa̱ʼa̱ Jehová, saátu xíniñúʼu kuʼvi̱-iniún kuniún ta̱ Jesús. Ta̱yóʼo ndiʼi tiempo káʼa̱nra ña̱ nda̱a̱ xa̱ʼa̱ yivára Jehová ta saátu kéʼéra ña̱ va̱ʼa (Juan 18:37). Soo, ¿ndáa ki̱ʼva náʼa̱ra ña̱ vitá íyo inira? Ta̱ Jesús náʼa̱ra ña̱ vitání-inira xíʼin ña̱ káʼa̱nra ta saátu xíʼin ña̱ kéʼéra. Tá kúú, ndiʼi tiempo ndásakáʼnura yivára ta va̱ása kúni̱ra ndasakáʼnuna miíra (Mar. 10:​17, 18; Juan 5:19). ¿Ndáaña ndákanixi̱níún xa̱ʼa̱ ña̱ vitání-ini ta̱ Jesús? ¿Á va̱ása chíndeétáʼan ña̱yóʼo xíʼún ña̱ kuʼvi̱-iniún kuniúnra ta kundiku̱ún yichi̱ra? ¿Ndáa xa̱ʼa̱ kúú ña̱ vitání-ini ta̱ Jesús? Saáchi Jehová vitání-inira, ta ta̱ Jesús ndíku̱nra yichi̱ yivára (Sal. 18:35; Heb. 1:3). ¿Á su̱ví sákuyatinka ña̱yóʼo miíún nu̱ú ta̱ Jesús? w23.03 3, 4 párr. 6, 7

Tu̱ʼun Ndióxi̱ káʼa̱nña xa̱ʼa̱ u̱vi̱ grupo na̱ yiví na̱ ndataku ta kivi ni̱ʼína ña̱ kutakuna ndiʼi saá tiempo nu̱ú ñuʼú yóʼo: “na̱ ke̱ʼé ña̱ va̱ʼa” xíʼin “na̱ ke̱ʼé ña̱ va̱ása va̱ʼa”. “Na̱ ke̱ʼé ña̱ va̱ʼa” kúú na̱ nda̱kúní ni̱xi̱yo ini xíʼin Jehová nda̱a̱ tá ni̱xi̱ʼi̱na. Ta “na̱ ke̱ʼé ña̱ va̱ása va̱ʼa” kúú na̱ va̱ása níxa̱a̱ ndasakáʼnu Jehová. Xa̱ʼa̱ ña̱ ndataku u̱vi̱ saá grupo yóʼo, ¿á kúni̱ kachi ña̱yóʼo ña̱ va̱xi ki̱vi̱na nu̱ú libro nu̱ú va̱xi ki̱vi̱ na̱ kutaku? Tá kúma̱níka kuvina, na̱ ke̱ʼé ña̱ va̱ʼa xa̱a̱ ni̱ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku. ¿Á ndo̱o ki̱vi̱na nu̱ú libro tá ni̱xi̱ʼi̱na? Va̱ása, saáchi nu̱ú Jehová tákukavana. “Ta̱yóʼo su̱ví Ndióxi̱ na̱ ni̱xi̱ʼi̱ kúúra, chi Ndióxi̱ na̱ táku kúúra, saáchi nu̱ú ta̱yóʼo ndiʼi na̱kán na̱ táku kúúna nu̱úra” (Luc. 20:38). Ña̱yóʼo kúni̱ kachiña ña̱ tá ná ndataku na̱ ke̱ʼé ña̱ va̱ʼa nu̱ú ñuʼú yóʼo, kixiva ki̱vi̱na nu̱ú libro nu̱ú va̱xi ki̱vi̱ na̱ kutaku. Soo ki̱vi̱ na̱yóʼo nda̱a̱ táki̱ʼva koo ña̱ ka̱ʼyi̱ xíʼin lápiz saá kooña (Luc. 14:14). w22.09 16 párr. 9, 10

Jehová xi̱kuni̱ra ña̱ si̱íní ná koo na̱ yiví, xa̱ʼa̱ ña̱kán chi̱ndúʼúra ta̱ Adán nu̱ú iin ñuʼú ña̱ liviní. Ta ni̱ka̱ʼa̱nra xíʼinra ña̱ ná kotora ndiʼi ña̱ʼa ña̱ íyo nu̱ú ñuʼú kán, ña̱ ná chiʼira ña̱ʼa nu̱úña ta ná ndasalivikaraña (Gén. 2:​8, 9). Ndakanixi̱ní ndáa ki̱ʼva ni̱kusi̱íní-ini ta̱ Adán tá xi̱nira ña̱ ku̱a̱ʼa̱n xáʼnu si̱ʼva̱ ña̱ chi̱ʼira ta saátu ña̱ livikaví xáa yita ndaʼa̱ yitu̱n. Ña̱kán xi̱kusi̱íní-ini ta̱ Adán ña̱ xi̱ndaara jardín ña̱ Edén. Ta saátu ni̱ka̱ʼa̱n Jehová xíʼinra ña̱ ná chinúura ki̱vi̱ ndiʼi kití (Gén. 2:​19, 20). Kiviva chinúu mií Jehová ki̱vi̱ tí kití kán, soo ta̱xira chiñu yóʼo ndaʼa̱ ta̱ Adán. Ta sana va̱ʼaní xi̱to ta̱ Adán ndáa ki̱ʼva íyo tí kití ta ndáa ki̱ʼva kéʼérí ña̱ va̱ʼa chinúura ki̱vi̱rí. Ni̱kusi̱íní-ini ta̱ Adán xíʼin chiñu ña̱ ta̱xi Jehová ndaʼa̱ra, saáchi chi̱ndeétáʼanña xíʼinra ña̱ kotora ña̱ ndíchiní íyo Jehová, ña̱ va̱ʼaní kéʼéra ndiʼi ña̱ʼa ta liviní kéʼéraña. w23.03 15 párr. 3

Na̱ chíñu náʼnu na̱ kúú Reino Unido xíʼin Estados Unidos, kúú na̱ so̱ndíʼi káʼa̱n Biblia xa̱ʼa̱ (Dan. 2:​31-33). Ña̱yóʼo kúni̱ kachiña, tá ná ndiʼi-xa̱ʼa̱ na̱yóʼo va̱ása kooka inka na̱ chíñu náʼnu nu̱ú ñuʼú yóʼo. Reino Ndióxi̱ sandíʼi-xa̱ʼa̱ña ndiʼi na̱ chíñu na̱ íyo nu̱ú ñuʼú yóʼo ti̱xin ña̱ Armagedón (Apoc. 16:​13, 14, 16; 19:​19, 20). ¿Ndáa ki̱ʼva chíndeétáʼan profecía yóʼo xíʼinyó? Profecía ña̱ ka̱ʼyí ta̱ Daniel náʼa̱ña nu̱úyó ña̱ ndixa ndóoyó tiempo nu̱ú ndíʼi. Xa̱a̱ íyo 2,500 ku̱i̱ya̱ ni̱ka̱ʼa̱nra ña̱ tá ná ndiʼi-xa̱ʼa̱ Babilonia, koo inka ku̱mí na̱ chíñu náʼnu na̱ ixandi̱va̱ʼa xíʼin na̱ ñuu Ndióxi̱. Ta saátu ni̱ka̱ʼa̱nra ña̱ na̱ chíñu náʼnu na̱ kúú Reino Unido xíʼin Estados Unidos kúú na̱ so̱ndíʼi koo. Ña̱yóʼo sándi̱koníña-iniyó saáchi kúnda̱a̱-iniyó ña̱ si̱lóʼo kúma̱ní ta sandíʼi-xa̱ʼa̱ Reino Ndióxi̱ ndiʼi na̱ chíñu na̱ íyo nu̱ú ñuʼú yóʼo, ta iinlá Reino Ndióxi̱ kúú ña̱ kaʼndachíñu nu̱ú ñuʼú yóʼo (Dan. 2:44). w22.07 4 párr. 9; 5 párr. 11, 12