Junio

Ta̱ Job xi̱kuura migo Jehová, ku̱a̱ʼání ni̱xi̱yo na̱ veʼera ta va̱ʼaní xi̱kitáʼanna ta saátu kúikání ni̱xi̱yora (Job 1:​1-5). Soo iin kuití ki̱vi̱ ndi̱ʼi-xa̱ʼa̱ ndiʼi ña̱ xi̱kuumiíra. Ña̱ nu̱ú ndi̱ʼi-xa̱ʼa̱ kúú ña̱ ku̱i̱ká ña̱ xi̱kuumiíra (Job 1:​13-17). Tándi̱ʼi, ni̱xi̱ʼi̱ ndiʼi se̱ʼera na̱ xi̱kuʼvi̱ní-inira xi̱xinira. Ná ndakanixi̱níyó xa̱ʼa̱ ña̱ ndo̱ʼora. Tá xíʼi̱ se̱ʼe iin na̱ yiví xóʼvi̱ní-inina xa̱ʼa̱ ña̱yóʼo; ná ndakanixi̱níyó xa̱ʼa̱ ña̱ ndo̱ʼo ta̱ Job xíʼin ñá síʼira, na̱yóʼo ni̱xo̱ʼvi̱ní-inina, ni̱ndi̱ʼi̱ní-inina ta ku̱suchíní-inina tá ku̱nda̱a̱-inina ña̱ ni̱xi̱ʼi̱ u̱xu̱ saá se̱ʼena. Ta xa̱ʼa̱ ña̱ ku̱suchí-inira, nda̱tára ti̱ko̱to̱ra ta xi̱kuxítíra nu̱ú ñuʼú (Job 1:​18-20). Tasaá ta̱ Ndi̱va̱ʼa ta̱xira iin kue̱ʼe̱ ña̱ ndeéní ndaʼa̱ ta̱ Job ta ni̱xo̱ʼvi̱níra xa̱ʼa̱ ña̱yóʼo (Job 2:​6-8). Tá ya̱chi̱, xi̱ ixato̱ʼóníva na̱ yiví ta̱ Job ta nda̱a̱ xi̱ka̱ʼa̱nna xíʼinra ña̱ ná taxira consejo ndaʼa̱na (Job 31:18). Soo vitin ku̱xíkána nu̱úra. Nda̱a̱ na̱ ñanira, na̱ migora na̱ va̱ʼaní xi̱kitáʼan xíʼinra ta saátu na̱ xi̱kachíñu nu̱úra xi̱kundasína xi̱xininara (Job 19:​13, 14, 16). w22.06 21 párr. 5, 6

Tá ndákuchi iinna, xíniñúʼu chika̱a̱na ndee̱ ña̱ kundiku̱nna consejo ña̱ ta̱xi ta̱ apóstol Pablo ndaʼa̱ na̱ cristiano na̱ ñuu Éfeso. Ta̱yóʼo ni̱ka̱ʼa̱nra xíʼinna ña̱ ná chika̱a̱na ndee̱ ña̱ xa̱a̱na koona na̱ yiví na̱ xu̱xa-ini (Efes. 4:13). Xíʼin ña̱yóʼo xi̱kuni̱ra ka̱ʼa̱nra xíʼinna ña̱ ná ndakundeéna kuaʼnuna xíʼin tu̱ʼun Ndióxi̱. Xíʼin ña̱ kéʼún náʼún ña̱ kúʼvi̱ní-iniún xíniún Jehová. Soo kivikava chika̱ún ndee̱ ña̱ kuʼvi̱ka-iniún kuniúnra. ¿Ndáa ki̱ʼva keʼúnña? Ta̱ apóstol Pablo ni̱ka̱ʼa̱nra xa̱ʼa̱ ña̱yóʼo nu̱ú Filipenses 1:​9, ta̱yóʼo xi̱kuni̱ra ña̱ ná kuʼvi̱ka-ini na̱ ñuu Filipos kunina Jehová. Xíʼin ña̱yóʼo sákuaʼayó ña̱ kiviva xa̱a̱yó kuʼvi̱ka-iniyó kuniyó Jehová. Soo xíniñúʼu chika̱a̱yó ndee̱ ña̱ kunda̱a̱ va̱ʼa iniyó xa̱ʼa̱ra ta vií va̱ʼa koo ña̱ ndakanixi̱níyó. Tá xáa̱yó kúnda̱a̱ va̱ʼa iniyó xa̱ʼa̱ Jehová kúʼvi̱níka-iniyó xíniyóra, kútóoníkayó ki̱ʼva ña̱ íyora, xíʼin ki̱ʼva ña̱ kéʼéra ña̱ʼa. Kúni̱níkayó sakúsi̱íyó-inira ta kǒo kúni̱yó sakúsuchíyó-inira. Ña̱kán, chíka̱a̱níyó ndee̱ ña̱ kunda̱a̱-iniyó ndáa ña̱ʼa kúú ña̱ kúni̱ra ná keʼéyó ta chíka̱a̱yó ndee̱ ña̱ keʼéyóña. w22.08 2, 3 párr. 3, 4

Su̱ví xa̱ʼa̱ ndiʼi na̱ yiví níka̱ʼyi̱ libro ña̱ Apocalipsis, chi ni̱ka̱ʼyi̱ña xa̱ʼa̱ iinlá miíyó na̱ ndásakáʼnu Jehová. Ña̱kán va̱ása ndákanda̱-iniyó xa̱ʼa̱ ña̱ chíndeétáʼanyó xíʼin Ndióxi̱ ña̱ va̱ʼa xi̱nu profecía yóʼo. Ta̱ apóstol Juan ni̱ka̱ʼa̱nra xa̱ʼa̱ tiempo yóʼo tá ka̱chira: “Espíritu santo chi̱ndeétáʼan xíʼi̱n ña̱ xi̱nii̱ ña̱ kuu ki̱vi̱ ná kixaa̱ tátayó” (Apoc. 1:10). Ta̱ apóstol Juan ka̱ʼyíra ña̱yóʼo tá ku̱i̱ya̱ 96. Soo tá tiempo saá, ta̱ʼánví kixaa̱ ki̱vi̱ kán (Mat. 25:​14, 19; Luc. 19:12). Inkaka profecía ña̱ va̱xi nu̱ú tu̱ʼun Ndióxi̱ náʼa̱ña nu̱úyó ña̱ tá ku̱i̱ya̱ 1914 saáví kúú ña̱ ki̱xaa̱ ki̱vi̱ kán, chi saá kúú ña̱ ni̱xa̱a̱ ta̱ Jesús ndu̱ura Rey chí ndiví. Ta naní saá kúú ña̱ ki̱xáʼa xínu profecía ña̱ va̱xi nu̱ú libro ña̱ Apocalipsis, ta sava ña̱yóʼo káʼa̱nña xa̱ʼa̱ miíyó na̱ ndásakáʼnu Ndióxi̱ (Apoc. 1:3). w22.05 2 párr. 2, 3

Nani tákuka tí kití yukú xíʼin ta̱ profeta vatá, ta̱ yósó tí kuáyi̱ sa̱kánara na̱yóʼo nu̱ú ñúʼu ñuʼu̱ ña̱ xíxi̱ xíʼin azufre. Ña̱kán naní xáʼndachíñuka na̱ chíñu na̱ íyo nu̱ú ñuʼú yóʼo, Ndióxi̱ sandíʼi-xa̱ʼa̱rana. Ña̱ sákuaʼayó. Miíyó na̱ ndásakáʼnu Ndióxi̱ xíniñúʼu nda̱kú koo iniyó xíʼinra ta saátu xíʼin Reinora (Juan 18:36). Va̱ása xíniñúʼu ki̱ʼviyó xíʼin ña̱ política ña̱ íyo ñuyǐví yóʼo. Soo íxayo̱ʼvi̱va ña̱yóʼo xíʼinyó, saáchi na̱ chíñu íxandúxana xíʼinyó ña̱ ná chindeétáʼanyó xíʼinna xíʼin ña̱ káʼa̱nyó á xíʼin ña̱ kéʼéyó. Soo na̱ chíndeétáʼan xíʼin na̱ chíñu ndákiʼinna tuni̱ tí kití yukú (Apoc. 13:​16, 17). Ta va̱ása kandíxaka Jehová kutáʼanra xíʼin na̱ ndákiʼin tuni̱ yóʼo, ta saátu va̱ása taxira kutakuna ndiʼi tiempo nu̱ú ñuyǐví xa̱á (Apoc. 14:​9, 10; 20:4). Ña̱kán ndáyáʼviní nda̱kú koo iniyó xíʼin Ndióxi̱ ni ná ixandúxa na̱ chíñu xíʼinyó ña̱ chindeétáʼanyó xíʼinna. w22.05 10, 11 párr. 12, 13

Iin ña̱ kivi chika̱a̱-iniyó keʼéyó kúú ña̱ sakúaʼayó keʼéyó inka chiñu. Tá ná sakúaʼayó viíníka keʼéyó iin chiñu, saá kúú ña̱ koo tu̱ʼvayó keʼéyó ku̱a̱ʼáka chiñu ti̱xin congregación. Ná ndakanixi̱níyó xa̱ʼa̱ na̱ hermano na̱ káchíñu nu̱ú kúva̱ʼa sucursal, nu̱ú kúva̱ʼa salón ña̱ asamblea ta saátu nu̱ú kúva̱ʼa veʼe nu̱ú ndátakayó ña̱ sakúaʼayó xa̱ʼa̱ Ndióxi̱. Ku̱a̱ʼání na̱yóʼo sa̱kúaʼana keʼéna inka chiñu, saáchi ka̱chíñuna xíʼin na̱ hermano na̱ xíni̱ va̱ʼaka. Tiempo vitin, na̱ ta̱a xíʼin ná ñaʼá sákuaʼana ndáa ki̱ʼva ndasaviína veʼe nu̱ú xíyo asamblea xíʼin veʼe nu̱ú ndátakayó ña̱ sakúaʼayó xa̱ʼa̱ra. Jehová ta̱ “kúú Rey ta̱ íyo ndiʼi tiempo” xíʼin ta̱ Jesús ta̱ kúú Rey nu̱ú na̱ rey, xíniñúʼuna na̱ hermano yóʼo ña̱ va̱ʼa keʼéna chiñu ña̱ ndáyáʼviní (1 Tim. 1:17; 6:15). Ña̱kán kúni̱yó chika̱a̱níyó ndee̱ ña̱ kachíñuyó nu̱ú Jehová ta kuniñúʼuyó ña̱ xíni̱yó keʼéyó ña̱ va̱ʼa ndukáʼnura ta su̱ví ña̱ ndukáʼnu miíyó (Juan 8:54). w22.04 24 párr. 7; 25 párr. 11

Kúikání ni̱xi̱yo ta̱ Rey Salomón ta liviní veʼe nu̱ú ni̱xi̱yora (1 Rey. 10:​7, 14, 15). Soo ta̱ Jesús kǒo ku̱a̱ʼá ña̱ʼa níxi̱kuumiíra ta kǒo veʼera níxi̱yo (Mat. 8:20). Nisaá ta̱ Salomón xíʼin ta̱ Jesús, viíní xi̱ndakanixi̱nína xa̱ʼa̱ ña̱ʼa ña̱ xi̱kuumiína, saáchi mií Jehová xi̱taxi ña̱ ndíchi ndaʼa̱na. Xu̱ʼún ña̱ kúúmiíyó kivi chindeétáʼanña xíʼinyó satáyó ña̱ xíniñúʼuyó á satáyó ña̱ʼa ña̱ kútóoyó. Ni ku̱a̱ʼání xu̱ʼún xi̱kuumií ta̱ Salomón, soo xi̱kunda̱a̱-inira ña̱ su̱ví ña̱yóʼo kúú ña̱ ndáyáʼvi va̱ʼaka. Saáchi ña̱yóʼo kúú ña̱ ka̱ʼyíra: “Va̱ʼaníka ña̱ ná ka̱ʼa̱n va̱ʼana xa̱ʼa̱yó nu̱úka ña̱ kuumiíyó ña̱ ku̱i̱ká” (Prov. 22:1; nota). Ta saátu ni̱xa̱a̱ra ku̱ndaa̱-inira ña̱ na̱ yiví na̱ kúʼvi̱ní-ini xíni xu̱ʼún, va̱ása kúsi̱í-inina xíʼin ña̱ xa̱a̱ kúúmiína (Ecl. 5:​10, 12). Ta ni̱ka̱ʼa̱nra ña̱ va̱ása xíniñúʼu kundaaní-iniyó xu̱ʼún, saáchi iin kama kuití kivi ndiʼi ña̱yóʼo ndaʼa̱yó (Prov. 23:​4, 5). w22.05 21 párr. 4, 5

Tá ndákanixi̱níyó xa̱ʼa̱ ndiʼi ña̱ va̱ʼa ña̱ táxi Jehová ndaʼa̱yó tiempo vitin, ña̱yóʼo chindeétáʼanña xíʼinyó ña̱ vií kutáʼanyó xíʼin Jehová. Ta tá ndákanixi̱níyó xa̱ʼa̱ ña̱ taxi Jehová ndaʼa̱yó chí nu̱únínu, ña̱yóʼo chindeétáʼanña xíʼinyó ña̱ ndiʼi tiempo kuni̱yó kachíñuyó nu̱ú Jehová. Tá ná keʼéyó ndiʼi ña̱yóʼo saá kúú ña̱ kusi̱íní-iniyó kachíñuyó nu̱úra. Jehová sakǎkura miíyó tá ná kixaa̱ ki̱vi̱ ña̱ sandíʼi-xa̱ʼa̱ra ndiʼi ña̱ va̱ása va̱ʼa íyo ñuyǐví yóʼo. Xa̱ʼa̱ ña̱ kúúra iin Ndióxi̱ ta̱ nda̱kú-ini, kúnda̱a̱-iniyó ña̱ va̱ása taxika Ndióxi̱ koo ta̱ Ndi̱va̱ʼa nu̱ú ñuʼú yóʼo ta keʼéra ña̱ va̱ása va̱ʼa (Is. 25:9). Kúee íyo iniyó ta ndátuyó ña̱ ná kixaa̱ ki̱vi̱ ña̱ sakǎku Jehová miíyó. Ta nani ndátuyó ña̱ ná kixaa̱ ki̱vi̱ yóʼo, ná chindayáʼviyó ña̱ káʼa̱nyó xíʼin Jehová, ña̱ káʼviyó tu̱ʼunra ta ná kéʼéyó ña̱ sákuaʼayó ta saátu ná ndakanixi̱níyó xa̱ʼa̱ ndiʼi ña̱ va̱ʼa ña̱ táxira ndaʼa̱yó. Tá ndákundeéyó kéʼéyó ña̱yóʼo, Jehová chindeétáʼanra xíʼinyó ña̱ kundeé-iniyó ta kusi̱í-iniyó ndasakáʼnuyóra. w22.11 13 párr. 18, 19

Ni va̱ása káʼa̱nví tu̱ʼun Ndióxi̱ xa̱ʼa̱ ña̱ nda̱kuchi ta̱ Timoteo, soo kiviva ndakanixi̱níyó ña̱ ni̱kusi̱íníva-ini siʼíra ñá Eunice tá nda̱kuchira (Prov. 23:25). Ñá Eunice ku̱chiñuvañá sa̱náʼa̱ñá ta̱ Timoteo ña̱ kuʼvi̱-inira kunira Jehová xíʼin ta̱ Jesucristo. Yivá ta̱ Timoteo xíʼin siʼíra su̱ví inkáchi religión níxi̱kumiína. Ta̱ griego xi̱kuu yivára, ta siʼíra xíʼin xi̱tánra ná judía xi̱kuuná (Hech. 16:1). Ta sana va̱ása loʼoníví ta̱ Timoteo tá ni̱xa̱a̱ ñá Eunice xíʼin ñá Loida ndu̱uná cristiana. Soo yivára va̱ása nínasamavíra religión ña̱ xi̱kuumiíra. Ña̱kán, ¿ndáaña keʼé ta̱ Timoteo? Nda̱a̱ táki̱ʼva ke̱ʼé ñá Eunice saá kéʼé ku̱a̱ʼání ná hermana tiempo vitin chi kúʼvi̱ní-ininá xíniná na̱ veʼená, soo ña̱ ndáyáʼvi va̱ʼaka nu̱úná kúú ña̱ chindeétáʼanná xíʼin se̱ʼená ña̱ vií kutáʼanna xíʼin Jehová. Ta ndiʼi ña̱ kéʼé náyóʼo ndáyáʼviníña nu̱úra (Prov. 1:​8, 9). Ña̱kán, xa̱a̱ chíndeétáʼanra xíʼin ku̱a̱ʼání ná hermana ña̱ sanáʼa̱ná se̱ʼená ña̱ xa̱a̱na kuʼvi̱-inina kuninara ta kachíñuna nu̱úra. w22.04 16 párr. 1-3

Si̱lóʼoní kúma̱ní ta Jehová chika̱a̱ra-ini na̱ chíñu ña̱ “keʼéna ña̱ ndákanixi̱níra”. Tándi̱ʼi, ¿ndáaña kuu? Na̱ “10 rey” á na̱ chíñu sandíʼi-xa̱ʼa̱na ndiʼi veʼe-ñu̱ʼu vatá (Apoc. 17:​1, 2, 12, 16). ¿Nda̱chun va̱ʼa kúnda̱a̱-iniyó ña̱ si̱lóʼo kúma̱ní ta ndiʼi-xa̱ʼa̱ Babilonia ña̱ káʼnu? Iin ña̱ kivi chindeétáʼan xíʼinyó ña̱ ndakuiinyó ña̱ pregunta yóʼo kúú ña̱ ndakaʼányó xa̱ʼa̱ tá yu̱ta Éufrates, chi táyóʼo kúú tá xi̱ndaa ñuu Babilonia tá tiempo xi̱naʼá. Apocalipsis káʼa̱nña, ña̱ ndiʼi na̱ yiví na̱ chíndeétáʼan xíʼin Babilonia ña̱ káʼnu, íyona nda̱a̱ táki̱ʼva íyo ti̱kui̱í tá ndáa ña̱yóʼo (Apoc. 17:15). Ta káʼa̱ntuña ña̱ yi̱chi̱ tá ti̱kui̱í yóʼo, ña̱yóʼo kúni̱ kachiña, ña̱ ndiʼi na̱ yiví na̱ chíndeétáʼan xíʼin na̱ veʼe-ñu̱ʼu vatá, va̱ása chindeétáʼankana xíʼinna (Apoc. 16:12). Ña̱ profecía yóʼo xa̱a̱ xínuvaña: ku̱a̱ʼání na̱ yiví xa̱a̱ sándakoona veʼe-ñu̱ʼu vatá ña̱ xi̱ndiku̱nna, ta inkava nu̱ú ndúkúna ña̱ chindeétáʼan xíʼinna ña̱ ya̱ʼana nu̱ú tu̱ndóʼo ña̱ kúúmiína. w22.07 5, 6 párr. 14, 15

Náʼa̱yó ña̱ ndáyáʼvi ña̱ kúndáʼvi-ini Jehová xínira miíyó tá íxakáʼnu-iniyó xa̱ʼa̱ inkana. Nu̱ú iin parábola, ta̱ Jesús chi̱táʼanra Jehová xíʼin iin ta̱ rey ta̱ i̱xakáʼnu-ini xa̱ʼa̱ iin ta̱ xi̱níká ku̱a̱ʼání xu̱ʼún nu̱úra. Soo ta̱ ta̱a ta̱ i̱xakáʼnu-ini ta̱ rey xa̱ʼa̱ va̱ása níkundáʼvi-inira kunira iin ta̱ xi̱níká loʼo xu̱ʼún nu̱úra (Mat. 18:​23-35). ¿Ndáaña xi̱kuni̱ ta̱ Jesús sanáʼa̱ra xíʼin ña̱yóʼo? Ña̱ tá ndixa chíndayáʼviyó ña̱ kúndáʼvi-ini Jehová xínira miíyó, ña̱yóʼo chindeétáʼanña xíʼinyó ña̱ ixakáʼnu-iniyó xa̱ʼa̱ inkana (Sal. 103:9). Xa̱a̱ íyo ku̱a̱ʼá ku̱i̱ya̱ tutu ña̱ La Atalaya ni̱ka̱ʼa̱nña ña̱ ni ku̱a̱ʼá yichi̱ ná ixakáʼnu-iniyó xa̱ʼa̱ inkana, “va̱ása kítáʼanví ña̱yóʼo xíʼin ña̱ íxakáʼnu-ini Jehová xa̱ʼa̱yó xíʼin ña̱ kúndáʼvi-inira xínira miíyó, saáchi xa̱a̱ ni̱xi̱ʼi̱ ta̱ Jesús xa̱ʼa̱yó”. Tá íxakáʼnu-iniyó xa̱ʼa̱ inkana, Jehová íxakáʼnu-inira xa̱ʼa̱yó. Ta̱yóʼo kúndáʼvi-inira xínira na̱ kúndáʼvi-ini xíni inkana (Mat 5:7). Káxiní ni̱ka̱ʼa̱n ta̱ Jesús xa̱ʼa̱ ña̱yóʼo tá sa̱náʼa̱ra na̱ discípulora ndáa ki̱ʼva ka̱ʼa̱nna xíʼin Ndióxi̱ (Mat. 6:​14, 15). w22.06 10 párr. 8, 9

Tá ki̱xi ta̱ Jesús nu̱ú ñuʼú yóʼo, va̱ʼaní ni̱na̱ʼa̱ra ndáa ki̱ʼva íyo yivára (Juan 14:9). Va̱ʼaní yichi̱ sa̱ndákoo ta̱ Jesús nu̱úyó, saáchi sa̱náʼa̱ra miíyó ndáa ki̱ʼva íyo Jehová ta kuʼvi̱-iniyó kuniyóra. Ta xa̱a̱ ku̱a̱ʼání ña̱ va̱ʼa ndákiʼinyó xa̱ʼa̱ ña̱ sánáʼa̱ra miíyó, chi miíra kúú ta̱ níʼi yichi̱ nu̱ú ndiʼi congregación ña̱ íyo tiempo vitin. Ta saátu sánáʼa̱ra miíyó, ndáaña xíniñúʼu keʼéyó ña̱ va̱ʼa sakúsi̱íyó-ini Jehová. Ta ku̱a̱ʼání ña̱ va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Saáchi tá nda̱takura, ni̱i̱ra kúú ña̱ cha̱ʼvi xa̱ʼa̱ ku̱a̱chiyó (1 Juan 1:7). Kusi̱íní-ini miíyó na̱ ndásakáʼnu Jehová tá ná ndiʼi-xa̱ʼa̱ ta̱ Ndi̱va̱ʼa. Ta nani ndátuyó ña̱ kixaa̱ ki̱vi̱ kán ná chika̱a̱yó ndee̱ ña̱ va̱ása ndakava-iniyó (Gén. 3:15). Ña̱kán ná kandíxaníyó Jehová saáchi ku̱a̱ʼání ña̱ va̱ʼa taxira ndaʼa̱yó chí nu̱únínu tá ná kaʼndachíñu se̱ʼera ta̱ Jesús. w22.07 18 párr. 13; 19 párr. 19

Kiviva nasamayó ña̱ nda̱kaxinyó keʼéyó. ¿Nda̱chun? Saáchi nása̱maní ña̱ ndóʼoyó ta kivi ixayo̱ʼvi̱ña xíʼinyó saxínuyóña. Tá kúú, ta̱ apóstol Pablo chi̱ndeétáʼanra xíʼin sava na̱ ñuu Tesalónica ña̱ ni̱xa̱a̱na ndu̱una iin congregación. Soo xa̱ʼa̱ ña̱ ni̱xi̱yo na̱ sáa̱-ini xíniñaʼá ñuu kán, va̱ʼaka nda̱kiʼinra ku̱a̱ʼa̱nra inka ñuu (Hech. 17:​1-5, 10). Tá níkindo̱o ta̱ Pablo ñuu kán, sana kixi tu̱ndóʼo nu̱ú na̱ congregación kán. Soo va̱ása níndakava-inira, chi ña̱ ke̱ʼéra kúú ña̱ tá ni̱ya̱ʼa loʼo tiempo chi̱ndaʼára ta̱ Timoteo ña̱ ku̱ʼu̱nra chindeétáʼanra xíʼin na̱ hermano kán (1 Tes. 3:​1, 2). Ta na̱ ñuu Tesalónica ku̱si̱íní-inina chi ta̱ Timoteo ka̱ndíxara ku̱ʼu̱nra nda̱a̱ ndáaka nu̱ú xi̱xiniñúʼunara. Kivi sákuaʼayó xíʼin ña̱ ndo̱ʼo ta̱ Pablo tá ni̱xi̱yora chí Tesalónica. Sana chíka̱a̱-iniyó keʼéyó inkaka chiñu nu̱ú Jehová, soo iin kama nása̱ma ña̱ ndóʼoyó ta va̱ása kívika keʼéyóña (Ecl. 9:11). ¿Ndáaña keʼéyó? Kivi chika̱a̱-iniyó keʼéyó inka ña̱ kuchiñu kuitíyó keʼéyó. w22.04 25-26 párr. 14, 15

Ña̱ káʼa̱n Jehová keʼéra chí nu̱únínu ndáchi̱ka̱a̱níña ndee̱ xíʼinyó. Ná kotoyó sava ña̱ va̱xi nu̱ú tu̱ʼun Ndióxi̱ ña̱ kivi sándi̱kó-iniyó tá yáʼayó nu̱ú tu̱ndóʼo. Nu̱ú tu̱ʼunra káʼa̱nra xíʼinyó ña̱ ni nda̱a̱ ndáaka tu̱ndóʼo ná kixi nu̱úyó “kǒo kivi sakúxíkáña miíyó nu̱ú ña̱ kúʼvi̱-ini Ndióxi̱ xínira miíyó” (Rom. 8:​38, 39). Ta saátu káʼa̱nra xíʼinyó ña̱ yatin íyora xíʼin ndiʼi na̱ káʼa̱n xíʼinra, ña̱yóʼo kúni̱ kachiña ña̱ xíniso̱ʼovara oración ña̱ kéʼéna nu̱úra (Sal. 145:18). Jehová káʼa̱nra xíʼinyó ña̱ tá kándíxayóra, kiviva kundeé-iniyó ya̱ʼayó nu̱ú nda̱a̱ ndáaka tu̱ndóʼo ta nda̱a̱ kivi kusi̱í-iniyó tá xóʼvi̱yó (1 Cor. 10:13; Sant. 1:2). Tu̱ʼun Ndióxi̱ sándakaʼánña miíyó ña̱ loʼova tiempo kúú ña̱ xóʼvi̱yó chi ku̱a̱ʼání ña̱ va̱ʼa ndakiʼinyó ixaa Ndióxi̱ chí nu̱únínu, taxira ña̱ kutakuyó ndiʼi tiempo (2 Cor. 4:​16-18). Jehová káʼa̱nra ña̱ sandíʼi-xa̱ʼa̱ra ndiʼi ña̱ sáxo̱ʼvi̱ miíyó: ta kúú ta̱ Ndi̱va̱ʼa xíʼin na̱ kéʼé nda̱a̱ táki̱ʼva kéʼé ta̱yóʼo (Sal. 37:10). ¿Á xa̱a̱ sa̱kúaʼa xíʼin xi̱niún sava texto ña̱ kivi chindeétáʼan xíʼún tá ná kixi tu̱ndóʼo nu̱ún? w22.08 11 párr. 11

Jehová káʼa̱nra xa̱ʼa̱ ña̱ va̱ʼa ña̱ kéʼéyó ña̱ kivi xa̱a̱ña kooña nda̱a̱ táki̱ʼva kánda̱ nu̱ú tá mar (Is. 48:18). Ná ndakanixi̱níyó ña̱ íyoyó yuʼú tá mar ta xítoyó ndáa ki̱ʼva va̱xi nu̱úra, ta tuku ta tukuña va̱xi. ¿Á su̱ví ña̱ nda̱a̱ kúúña ña̱ va̱ása ndákanixi̱níyó ña̱ sandákoorá ña̱ kánda̱ nu̱úra? Saáchi kúnda̱a̱va-iniyó ña̱ ndakundeévará kanda̱ nu̱úrá. Tá saá, ¿ndáaña xíniñúʼu keʼéyó ña̱ va̱ʼa xa̱a̱ ña̱ va̱ʼa ña̱ kéʼéyó kooña nda̱a̱ táki̱ʼva íyo ña̱ kánda̱ nu̱ú tá mar? Tá ná ndaka̱xinyó keʼéyó iin ña̱ʼa, siʼnaka ná kotoyó ndáaña ndákanixi̱ní Jehová xa̱ʼa̱ ña̱yóʼo tasaá keʼéyóña. Ni yo̱ʼvi̱ní ná koo ña̱ ndaka̱xinyó keʼéyó, soo mií yiváyó Jehová chindeétáʼanra xíʼinyó ña̱ ndakundeéyó keʼéyó ña̱ va̱ʼa ndiʼi ki̱vi̱ (Is. 40:​29-31). w22.08 30 párr. 15-17

Tá ná ndiʼi ña̱ mil ku̱i̱ya̱, ta̱ Ndi̱va̱ʼa sa̱ñávara ta kixáʼa tukura sandáʼvira na̱ yiví na̱ kǒo ku̱a̱chi kúúmií. Tá ná kuu ña̱yóʼo, ndiʼi na̱ koo nu̱ú ñuʼú kán kivi na̱ʼa̱na á íxato̱ʼóna ki̱vi̱ Ndióxi̱ ta á kúni̱na kaʼndachíñura nu̱úna (Apoc. 20:​8-10). Xíʼin ña̱ ndaka̱xinna keʼéna na̱ʼa̱ña á ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku ndiʼi tiempo á va̱ása ka̱ʼyi̱ña. Savana keʼéna nda̱a̱ táki̱ʼva ke̱ʼé ta̱ Adán xíʼin ñá Eva. Va̱ása kandíxana kaʼndachíñu Jehová nu̱úna, soo va̱ása xíni̱yó nda̱saana keʼé saá. Ta, ¿ndáaña kundoʼo na̱yóʼo? Apocalipsis 20:15 káchiña: “Na̱ kǒo ki̱vi̱ va̱xi nu̱ú libro nu̱ú va̱xi ki̱vi̱ na̱ kutaku, sa̱kánana na̱yóʼo nu̱ú xíxi̱ ñuʼu̱”. Xíʼin ña̱yóʼo kúnda̱a̱-iniyó ña̱ na̱ ndiʼi-xa̱ʼa̱va koona. Soo ku̱a̱ʼání na̱ kǒoka ku̱a̱chi kúúmií kuchiñuvana ya̱ʼana nu̱ú prueba yóʼo. w22.09 23 párr. 15, 16

Ti̱xin congregación ña̱ ni̱xi̱yo tá siglo nu̱ú, ni̱xi̱yo sava na̱ xi̱ka̱ʼa̱n ña̱ xi̱niñúʼu ta̱ʼnda̱ nu̱ú yi̱i̱ na̱ ta̱a na̱ va̱ása kúú judío tá xi̱xaa̱na xi̱nduuna na̱ xi̱ndiku̱n sa̱tá ta̱ Jesús. Ta xi̱niñúʼu keʼénaña ña̱ va̱ʼa ná kǒo ka̱ʼa̱n kúáchi na̱ yiví xa̱ʼa̱ ña̱yóʼo (Gál. 6:12). Ta̱ apóstol Pablo kǒo níkutóovíra ña̱ ni̱ka̱ʼa̱n na̱yóʼo, soo va̱ása níka̱ʼa̱nra xíʼinna xa̱ʼa̱ ña̱ xi̱ndakanixi̱níra. Va̱ʼaka ni̱ka̱ʼa̱nra xíʼin na̱ apóstol xíʼin na̱ anciano na̱ ni̱xi̱yo ñuu Jerusalén xa̱ʼa̱ ña̱yóʼo (Hech. 15:2). Ki̱ʼva ña̱ xi̱ndasaviíra ku̱a̱chi ña̱yóʼo va̱ʼaví chi̱ndeétáʼanña xíʼin na̱ hermano ña̱ vií kutáʼanna ti̱xin congregación ta kusi̱í-inina (Hech. 15:​30, 31). Sava yichi̱ va̱ása inkáchiví koo ña̱ ndakanixi̱níyó xíʼin na̱ hermanoyó, xa̱ʼa̱ ña̱kán kivi kaku ku̱a̱chi xíʼinyó. Ña̱kán kivi ka̱ʼa̱nyó xíʼin na̱ anciano ña̱ chindeétáʼanna xíʼinyó, chi Jehová kúú ta̱ nda̱kaxin na̱yóʼo ña̱ kundaana congregación. Saátu kivi ndani̱ʼíyó consejo nu̱ú tutu ña̱ tává na̱ ñuu Ndióxi̱, xíʼin inkaka ña̱ káʼa̱nna xíʼinyó keʼéyó. Ta tá chíka̱a̱yó ndee̱ ña̱ kundiku̱nyó consejo yóʼo ta va̱ása keʼéyó ña̱ kúni̱ miíyó, saá kúú ña̱ viíní kutáʼanyó ti̱xin congregación. w22.08 22 párr. 8, 9

Sava yichi̱ nátúʼunyó xíʼin na̱ migoyó xa̱ʼa̱ ña̱ ndóoyó. Soo savayó íxayo̱ʼvi̱ña xíʼinyó ña̱ natúʼunyó xa̱ʼa̱ña xíʼin inkana, saáchi va̱ása kúúmiíyó costumbre ña̱ natúʼunyó xíʼin inkana xa̱ʼa̱ ña̱ ndóʼoyó. Tá na̱túʼunyó xíʼin iin na̱ migoyó xa̱ʼa̱ ña̱ ndóʼoyó ta so̱ndíʼi ku̱nda̱a̱-iniyó ña̱ na̱túʼunna xíʼin inkana, va̱ása va̱ʼa níkuniyó. Soo kúsi̱íníva-iniyó tá íyo iin na̱ migoyó na̱ kivi natúʼunyó xíʼin xa̱ʼa̱ ndiʼi ña̱ ndóʼoyó, ta va̱ása natúʼunna xíʼin inkana. Na̱yóʼo kúú na̱ ndixa kúú migoyó. Na̱ anciano na̱ va̱ása nátúʼun xa̱ʼa̱ iin ña̱ na̱túʼun iin na̱ hermano xíʼinna, íyona nda̱a̱ táki̱ʼva íyo iin veʼe nu̱ú kivi chise̱ʼé na̱ yiví miína tá káni ta̱chí (Is. 32:2). Kúnda̱a̱-iniyó ña̱ kivi natúʼunyó xíʼinna xa̱ʼa̱ ña̱ ndóʼoyó chi kándíxaníyó ña̱ va̱ása natúʼunna xíʼin inkana xa̱ʼa̱ ña̱ na̱túʼunyó xíʼinna. Ta saátu va̱ása íxandúxayó xíʼinna ña̱ natúʼunna xíʼinyó xa̱ʼa̱ iin ña̱ʼa ña̱ va̱ása xíniñúʼu kunda̱a̱-iniyó xa̱ʼa̱. Ta saátu chíndayáʼviníyó ñá síʼi na̱ anciano, saáchi va̱ása íxandúxaná xíʼin yiíná ña̱ natúʼunra xíʼinná xa̱ʼa̱ ña̱ va̱ása xíniñúʼu kunda̱a̱-ininá xa̱ʼa̱. Iin ña̱ va̱ʼaní kúú ña̱ va̱ása nátúʼun na̱ anciano xíʼin ñá síʼina xa̱ʼa̱ ña̱ nátúʼun na̱ hermano xíʼinna. w22.09 11 párr. 10, 11

Kivi kandíxayó ña̱ mií Jehová sakǎkura na̱ ñuura tá ná ki̱xáʼa “tu̱ndóʼo ña̱ káʼnu” (Mat. 24:21; Dan. 12:1). Tá ná ki̱xáʼa iin tiʼvi na̱ yiví na̱ káʼa̱nna Gog ña̱ Magog xíʼin kuni̱na ixandi̱va̱ʼana xíʼin na̱ ñuu Ndióxi̱, va̱ása kuchiñuna. Ni 193 kúú país na̱ kítáʼan xíʼin na̱ Naciones Unidas, va̱ása kuchiñuna kanitáʼanna xíʼin Jehová ta̱ káʼnuní ta ni xíʼin na̱ ángel na̱ kúúmiíra. Chi ña̱yóʼo kúú ña̱ káʼa̱n Jehová: “Ta ndixa ndasakáʼnui̱ miíi̱ ta ndasayi̱íi̱ ki̱víi̱ ta taxii̱ ná kuni na̱ yiví yi̱ʼi̱; tasaá xa̱a̱na kunda̱a̱-inina ña̱ yi̱ʼi̱ kúú Jehová” (Ezeq. 38:​14-16, 23). Tá ná kixáʼa Gog ña̱ Magog ixandi̱va̱ʼana xíʼin na̱ ñuu Ndióxi̱, saá kúú ña̱ kixaa̱ ña̱ Armagedón, tasaá kúú ña̱ sandíʼi-xa̱ʼa̱ Jehová na̱ chíñu na̱ íyo nu̱ú ñuʼú yóʼo (Apoc. 16:​14, 16; 19:​19-21). Soo na̱ yiví na̱ nda̱kú íyo ini xíʼinra, na̱yóʼo kúú na̱ kundoo nu̱ú ñuʼú yóʼo (Prov. 2:​21, nota). w22.10 16, 17 párr. 16, 17

Miíyó va̱ása kívi kotoyó ndáaña ndíka̱a̱ níma̱ na̱ yiví saáchi iinlá Jehová kúú ta̱ xíni̱ nda̱chun kúú ña̱ kéʼé na̱ yiví iin ña̱ʼa (Prov. 16:2). Kúʼvi̱-inira xínira ndiʼi na̱ yiví, nda̱a̱ ndáaka ñuuna. Ta káʼa̱nra xíʼinyó ña̱ ná kuʼvi̱-iniyó kunitáʼanyó (2 Cor. 6:13). Ña̱kán miíyó kúni̱yó kuʼvi̱-iniyó kuniyó ndiʼi na̱ hermanoyó ta va̱ása ndatiinyó ku̱a̱chi xíʼinna. Saátu va̱ása ndátiinyó ku̱a̱chi xíʼin na̱ yiví na̱ va̱ása káʼvi tu̱ʼun Ndióxi̱. Tá kúú, va̱ása ndátiinyó ku̱a̱chi xíʼin na̱ veʼeyó na̱ va̱ása sákuaʼa xa̱ʼa̱ Ndióxi̱, ta ni va̱ása ndákanixi̱níyó ña̱ va̱ása xa̱a̱vína sakúaʼana xa̱ʼa̱ra. Na̱ ni̱nu kúniva kúúyó tá saá ná ndakanixi̱níyó xa̱ʼa̱na ta xa̱a̱yó ndakanixi̱níyó ña̱ va̱ʼaníka kéʼéyó nu̱ú na̱kán. Jehová ndátura ña̱ ndiʼi na̱ yiví ná ndandikó-nina (Hech. 17:30). Na̱ yiví na̱ ndákanixi̱ní ña̱ va̱ʼaní íyo ña̱ kéʼéna, nu̱ú Jehová su̱ví ña̱ va̱ʼaví kúú ña̱ kéʼéna. Tá ná ndakundeéyó keʼéyó ña̱ va̱ʼa, si̱íní kooyó ta va̱ʼaní yichi̱ chinúuyó nu̱ú inkana. Tasaá xa̱a̱na kuʼvi̱-inina kunina Jehová ta saátu kuʼvi̱-inina kunina miíyó. w22.08 31 párr. 20-22

Va̱ása ndákanda̱-iniyó ña̱ sava na̱ yiví sásina nu̱úyó ña̱ natúʼunyó xa̱ʼa̱ Ndióxi̱ ta loʼoka chí nu̱ú ndeéka koo ña̱yóʼo (Dan. 11:44; 2 Tim. 3:12; Apoc. 16:21). Soo kándíxayó ña̱ mií Jehová kúú ta̱ chindeétáʼan xíʼinyó. ¿Nda̱chun va̱ʼa kúnda̱a̱-iniyó ña̱yóʼo? Saáchi Jehová ndiʼi tiempo chíndeétáʼanra xíʼin na̱ ndásakáʼnu-ñaʼá ña̱ saxínuna chiñu ña̱ táxira ndaʼa̱na ni yo̱ʼvi̱níña. Ta ña̱ va̱ʼa kunda̱a̱-iniyó xa̱ʼa̱ ña̱yóʼo, ná ka̱ʼa̱nyó xa̱ʼa̱ ña̱ ndo̱ʼo ta̱ profeta Ezequiel, ta̱ na̱túʼun xa̱ʼa̱ Ndióxi̱ xíʼin na̱ judío na̱ ni̱xi̱yo chí ñuu Babilonia. ¿Ndáa ki̱ʼva ni̱xi̱yo na̱ yiví na̱ na̱túʼun ta̱ Ezequiel xíʼin? Jehová ni̱ka̱ʼa̱nra xa̱ʼa̱ na̱ judío ña̱ so̱ʼonína. Ta ndi̱va̱ʼaní-inina nda̱a̱ táki̱ʼva íyo iñú ta saátu nda̱a̱ táki̱ʼva íyo ti̱siʼma̱ tí xa̱tu̱ní saá ni̱xi̱yona. Xa̱ʼa̱ ña̱kán, ku̱a̱ʼá yichi̱ ni̱ka̱ʼa̱n Jehová xíʼin ta̱ Ezequiel: “Va̱ása yi̱ʼvíún” (Ezeq. 2:​3-6). Íyo u̱ni̱ ña̱ chi̱ndeétáʼan xíʼin ta̱ Ezequiel ña̱ kǒo nísandákoora ña̱ natúʼunra xa̱ʼa̱ Ndióxi̱. Ña̱ nu̱ú: Mií Jehová kúú ta̱ chi̱ndaʼá-ñaʼá. Ña̱ u̱vi̱: Espíritu santo chi̱ndeétáʼan xíʼinra ña̱ ndakú koo inira. Ña̱ u̱ni̱: Kǒo níndakoora ña̱ kaʼvira tu̱ʼun Ndióxi̱. w22.11 2 párr. 1, 2

Iinlá na̱ yiví kúú na̱ i̱xava̱ʼa Jehová ña̱ va̱ása kuvina, chi ndiʼika ña̱ʼa ndíʼi-xa̱ʼa̱vaña. Jehová ta̱xira iin ña̱ va̱ʼaní ndaʼa̱na: ña̱ kutakuna ndiʼi tiempo. Jehová i̱xava̱ʼara miíyó ña̱ kuni̱níyó kutakuyó. Nda̱a̱ táki̱ʼva káchi Biblia, Ndióxi̱ “chi̱ka̱a̱ra-ini na̱ yiví ña̱ kutóona kutakuna ndiʼi tiempo” (Ecl. 3:11). Xa̱ʼa̱ ña̱kán kǒo kútóoyó kuviyó (1 Cor. 15:26). Ná ndakanixi̱níyó ña̱ ndeéní ki̱ʼin kue̱ʼe̱ miíyó. ¿Ndáaña keʼéyó? ¿Á kǒo nda̱a̱ ni iin ña̱ʼa keʼéyó? Va̱ásaví, chi ña̱ keʼéyó kúú ña̱ ku̱ʼu̱nyó nu̱ú na̱ doctor ta saátu koʼoyó ndiʼi ta̱tán ña̱ taxina ndaʼa̱yó ña̱ va̱ʼa kama ndaʼayó. Ta ku̱a̱ʼání ña̱ kéʼéyó chi kǒo kúni̱yó kuviyó. Ta tá xíʼi̱ iin na̱ kúʼvi̱ní-iniyó xíniyó, kúúna na̱ va̱lí á na̱ xa̱a̱ ku̱chée, xóʼvi̱ní-iniyó xa̱ʼa̱na ta ku̱a̱ʼání tiempo yáʼa tasaá ndúva̱ʼa-iniyó (Juan 11:​32, 33). Xa̱ʼa̱ ña̱ kúʼvi̱ní-ini Ndióxi̱ xínira miíyó, i̱xava̱ʼara miíyó ña̱ kooyó ndiʼi tiempo ta saátu ña̱ sakúaʼayó ku̱a̱ʼání ña̱ʼa ndiʼi tiempo. w22.12 3 párr. 5; 4 párr. 7

Tá kíxáʼa iin kue̱ʼe̱ xíkun, va̱ása kívika keʼéyó ña̱ xi̱keʼéyó tá ya̱chi̱. Soo ná kandíxaníyó Jehová ña̱ chindeétáʼanra xíʼinyó. Ta saátu ná va̱ása taxiyó kasi ña̱yóʼo nu̱úyó ña̱ kutáʼanyó xíʼin na̱ hermanoyó. Tá kúu ña̱yóʼo kivi xa̱a̱yó kundoʼoyó nda̱a̱ táki̱ʼva ndo̱ʼo ta̱ apóstol Juan, chi ta̱yóʼo xi̱kuni̱níra kuni nu̱úra migora ta̱ Gayo (3 Juan 13, 14). Soo ta̱yóʼo ni̱ka̱ʼa̱nra ña̱ va̱ása kívi kunira ta̱ Gayo. Ña̱kán ña̱ ke̱ʼéra kúú ña̱ chi̱ndaʼára iin carta ku̱a̱ʼa̱n ndaʼa̱ra. Tá va̱ása kívi kuni nu̱úyó na̱ hermanoyó, iin ña̱ kivi keʼéyó kúú ña̱ ka̱ʼa̱nyó xíʼinna xíʼin teléfono keʼéyó videollamada nu̱úna á kivitu chindaʼáyó mensaje ndaʼa̱na. Tá ná ndakundeéyó ka̱ʼa̱nyó xíʼin na̱ hermanoyó va̱ása kuni mitúʼunyó ta táxi̱n koo iniyó. Soo, ¿ndáaña kivi keʼéyó tá ndeéní ndíʼi̱-iniyó? Ná natúʼunyó xíʼin na̱ anciano xa̱ʼa̱ ña̱ ndóʼoyó ta ná taxiyó ña̱ chika̱a̱na ndee̱ xíʼinyó (Is. 32:​1, 2). w22.12 17, 18 párr. 6, 7

Biblia káʼa̱nña ña̱ ni̱xi̱yo iin tiempo ña̱ ka̱túnna xa̱ʼa̱ ta̱ José xíʼin yitu̱n ta chi̱ka̱a̱na cadena su̱kúnra (Sal. 105:​17, 18). Ña̱kán ndeéka ni̱xi̱yo tu̱ndóʼo nu̱úra; saáchi iin ta̱ va̱ʼaní xi̱ndaa-inina xi̱kuura soo vitin chi̱ka̱a̱nara veʼeka̱a. ¿Á xa̱a̱ yáʼayó nu̱ú iin ña̱ ndeéní sa̱ndíʼi-iniyó ta ni káʼa̱nníyó xíʼin Ndióxi̱ túvi̱yó ña̱ kǒo ndákuiinra yuʼúyó? Kivi koova tu̱ndóʼo nu̱úyó. Va̱ása sáku̱taʼaví Jehová tu̱ndóʼo nu̱úyó nu̱ú ñuyǐví ña̱ xáʼndachíñu ta̱ Ndi̱va̱ʼa yóʼo (1 Juan 5:19). Soo kiviva kandíxayó ña̱ kúnda̱a̱-ini yiváyó xa̱ʼa̱ ndiʼi ña̱ ndóʼoyó ta ndíʼi-inira xa̱ʼa̱yó (Mat. 10:​29-31; 1 Ped. 5:​6, 7). Saátu káʼa̱nra ña̱yóʼo xíʼinyó: “Nda̱a̱ ni iin yichi̱ va̱ása sandákoi̱ yóʼó ta nda̱a̱ ni iin yichi̱ va̱ása sañándaʼíi̱ yóʼó” (Heb. 13:5). Jehová kivi chindeétáʼanra xíʼinyó ña̱ kundeé-iniyó nu̱ú ña̱ sándi̱ʼi̱ní-iniyó, ña̱ túviyó ña̱ va̱ása kuchiñuyó xíʼin. w23.01 16 párr. 7, 8

Nu̱ú tu̱ʼun Ndióxi̱ káʼa̱nña xíʼinyó ña̱ va̱ása sandákoo ndaʼa̱ra miíyó tá ná ki̱ʼviyó iin ku̱a̱chi ndeé. Na̱ ñuu Israel ku̱a̱ʼání yichi̱ xi̱kiʼvina ku̱a̱chi nu̱ú Jehová, soo tá ndixaní xi̱ndandikó-inina Jehová xi̱ ixakáʼnu-inira xa̱ʼa̱ ku̱a̱china. Na̱ cristiano na̱ ni̱xi̱yo tá siglo nu̱ú saátu xi̱kunda̱a̱-ini na̱yóʼo ña̱ xi̱kuʼvi̱ní-ini Jehová xi̱xinirana. Tá kúú, ni̱ka̱ʼa̱nra xíʼin ta̱ apóstol Pablo ña̱ ná kaʼyíra carta ku̱ʼu̱n nu̱ú na̱ cristiano ña̱ ná ixakáʼnu-inina ta kundáʼvi-inina kunina ta̱ ta̱a ta̱ ni̱ki̱ʼvi iin ku̱a̱chi ndeé, ta̱ xa̱a̱ nda̱ndikó-ini xa̱ʼa̱ ku̱a̱chi ña̱ ni̱ki̱ʼvira (1 Cor. 5:​1-5; 2 Cor. 2:​6, 7). Ndákanda̱ní-iniyó tá xáa̱yó kúnda̱a̱-iniyó ña̱ va̱ása nísandákoo ndaʼa̱ Jehová na̱ ni̱ki̱ʼvi ku̱a̱chi nu̱úra tiempo xi̱naʼá. Saáchi xa̱ʼa̱ ña̱ xi̱kuʼvi̱ní-inira xi̱xinirana chi̱ndeétáʼanra xíʼinna, ta̱xira consejo ndaʼa̱na ta ta̱xi tukura ña̱ ná ndikó tukuna ndasakáʼnunara. Ña̱kán tá iin na̱ ni̱ki̱ʼvi ku̱a̱chi nu̱úra ndándikó-inina, íxakáʼnuva-inira xa̱ʼa̱ ku̱a̱china (Sant. 4:​8-10). Biblia sánáʼa̱ña miíyó ña̱ va̱ʼaní íyo ndiʼi ña̱ kéʼé Ndióxi̱, ña̱ ndíchiníra ta kúʼvi̱ní-inira xínira miíyó. Ta saátu chíndeétáʼanña xíʼinyó ña̱ va̱ʼa kunda̱a̱-iniyó ndáa ki̱ʼva íyo Jehová ta xa̱a̱yó kooyó migora. w23.02 7 párr. 16, 17

Ndiʼi ña̱ kúu iníísaá ñuyǐví tiempo vitin chíndeétáʼanña xíʼinyó kunda̱a̱-iniyó ña̱ ki̱xáʼa xínu ndiʼi profecía ña̱ va̱xi nu̱ú Biblia. Tá kúú, ta̱ Jesús ni̱ka̱ʼa̱nra xa̱ʼa̱ sava señal ña̱ chindeétáʼan xíʼinyó kunda̱a̱-iniyó ña̱ xa̱a̱ ku̱yatinní kixaa̱ ña̱ ndiʼi-xa̱ʼa̱ ñuyǐví ta̱ Ndi̱va̱ʼa (Mat. 24:​3-14). Ta̱ apóstol Pablo ni̱ka̱ʼa̱nra xíʼinyó ña̱ ná kiʼinníyó kuenta ndáa ki̱ʼva xínu ndiʼi profecía ña̱ va̱xi nu̱ú Biblia, saáchi ña̱yóʼo kúú ña̱ chindeétáʼan xíʼinyó ña̱ kandíxakayó Ndióxi̱ (2 Ped. 1:​20, 21). Ta̱ apóstol Pedro kúnira ña̱ ki̱ʼvaní koo ña̱ ndakanixi̱níyó tá káʼviyó xa̱ʼa̱ profecía ña̱ va̱xi nu̱ú Biblia. Káʼa̱nra xíʼinyó ña̱ xíniñúʼu koo tu̱ʼvaníyó tá ná kixaa̱ ki̱vi̱ káʼnu Jehová (2 Ped. 3:​11-13). ¿Nda̱chun? Su̱ví xa̱ʼa̱ ña̱ kúni̱yó kúnda̱a̱-iniyó ndáa ki̱vi̱ xíʼin hora kúúña, chi xa̱ʼa̱ ña̱ kúni̱yó viíní kuniñúʼuyó tiempoyó ña̱ kooyó na̱ yiví na̱ yi̱i̱ kúúña ta na̱ʼa̱yó xíʼin ña̱ kéʼéyó ña̱ nda̱kú íyo iniyó xíʼin Ndióxi̱ (Mat. 24:36; Luc. 12:40). Ña̱yóʼo kúni̱ kachiña ña̱ viíní koo ña̱ keʼéyó nu̱ú Jehová, ta xa̱ʼa̱ ña̱ kúʼvi̱-iniyó xíniyóra kúú ña̱ keʼéyóña. Xa̱ʼa̱ ña̱kán xíniñúʼu kiʼinníyó kuenta xíʼin ña̱ kéʼé miíyó. w23.02 16 párr. 4, 6

Íyo inkaka ña̱ xíniñúʼu keʼé na̱ “inkaka ndikachi” tiempo vitin ña̱ va̱ʼa koona nu̱ú ñuʼú livi. Soo miíyó xíniñúʼu na̱ʼa̱yó ña̱ táxiyó tíxa̱ʼvi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Tá kúú, náʼa̱yó ña̱ kúʼvi̱-iniyó xíniyó ta̱ Jesús xíʼin ki̱ʼva ña̱ kéʼéyó xíʼin na̱ nda̱kaxin Ndióxi̱ ku̱ʼu̱n chí ndiví. Ta̱ Jesús ni̱ka̱ʼa̱nra ña̱ ndatiin Ndióxi̱ ku̱a̱chi xíʼinyó xa̱ʼa̱ ki̱ʼva ña̱ kéʼéyó xíʼin na̱yóʼo (Mat. 25:​31-40). Ta iin ki̱ʼva ña̱ chindeétáʼanyó xíʼinna kúú ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱ ta chindeétáʼanyó xíʼinna ña̱ xa̱a̱na koona discípulo ta̱ Jesús (Mat. 28:​18-20). Su̱ví nda̱a̱ tá ná kundooyó ti̱xin ñuyǐví xa̱áví saáví kixáʼayó keʼéyó ña̱ kútóo Jehová. Chi nda̱a̱ tiempo vitin xíniñúʼu chika̱a̱yó ndee̱ ña̱ nina ña̱ nda̱a̱ ka̱ʼa̱nyó ta vií ná koo ña̱ keʼéyó ta va̱ása kutóoníyó kuumiíyó ku̱a̱ʼání ña̱ʼa. Ta saátu ná chika̱a̱yó ndee̱ ña̱ nda̱kú koo iniyó xíʼin Jehová, xíʼin yiíyó, xíʼin ñá síʼiyó ta saátu xíʼin na̱ hermanoyó. Tá nda̱a̱ tiempo vitin chíka̱a̱níyó ndee̱ ña̱ xíniso̱ʼoyó ndiʼi ña̱ káʼa̱n Ndióxi̱ xíʼinyó, va̱ása ixayo̱ʼvi̱ña xíʼinyó kuniso̱ʼoyóra ti̱xin ñuyǐví xa̱á. Ta saátu ná chika̱a̱níyó ndee̱ ña̱ vií keʼéyó chiñu ta ná kuʼvi̱-iniyó kunitáʼanyó, chi xíʼin ña̱yóʼo na̱ʼa̱yó ña̱ xa̱a̱ íyo tu̱ʼvayó kooyó nu̱ú ñuyǐví xa̱á. w22.12 11, 12 párr. 14-16

Kútóoníyó ña̱ kúú ta̱ Jesús Rey nu̱úyó chi va̱ʼaní xáʼndachíñura. Mií Jehová sa̱náʼa̱ miíra ndáa ki̱ʼva kaʼndachíñura ta saátu mií Jehová ta̱xi chiñu yóʼo ndaʼa̱ra (Is. 50:​4, 5). Ná ndakanixi̱níyó xa̱ʼa̱ ndiʼi ña̱ ke̱ʼé ta̱ Jesús xa̱ʼa̱yó xa̱ʼa̱ ña̱ ni̱kuʼvi̱ní-inira xi̱nira miíyó (Juan 13:1). Ta̱ Jesús kúú ta̱ xáʼndachíñu nu̱úyó ña̱kán kúʼvi̱ní-iniyó xíniyóra. Mií ta̱ Jesús ni̱ka̱ʼa̱n ña̱ ndiʼi na̱ kúʼvi̱-ini xíni miíra ta xíniso̱ʼona ndiʼi chiñu ña̱ xáʼndara, kúúna migora (Juan 14:15; 15:​14, 15). Iin ña̱ va̱ʼaní kúú ña̱ xa̱a̱yó kooyó migo se̱ʼe Jehová. Ni̱xa̱ún ku̱ndaa̱-iniún ña̱ vitání-ini ta̱ Jesús ta va̱ʼaní ndána̱ʼa̱ra ndiʼi ña̱ va̱ʼa ña̱ kúúmií yivára. Ta saátu sa̱kuaʼún xa̱ʼa̱ra ña̱ ta̱xira xi̱xi ku̱a̱ʼání na̱ yiví, sa̱ndíkora-ini na̱ nda̱kava-ini ta nda̱a̱ sa̱ndáʼara na̱ ndeéndóʼo (Mat. 14:​14-21). Saátu ni̱xa̱ún ki̱ʼún kuenta ña̱ mií ta̱ Jesús kúú ta̱ níʼi yichi̱ nu̱ú na̱ congregación (Mat. 23:10). Ta xa̱ʼa̱ ña̱ mií Jehová nda̱kaxinñaʼá ña̱ xa̱a̱ra koora Rey ku̱a̱ʼání ña̱ va̱ʼa keʼéra chí nu̱únínu. ¿Ndáa ki̱ʼva na̱ʼún ña̱ kúʼvi̱-iniún xíniúnra? Ña̱ kundiku̱ún yichi̱ra. Ña̱kán, iin ña̱ xíniñúʼu keʼún kúú ña̱ ndataxiún miíún ndaʼa̱ Jehová ta ndakuchiún. w23.03 4 párr. 8, 10

Su̱ví nda̱saa iinlá chí ndiví ní ixava̱ʼa Jehová ku̱a̱ʼání ña̱ʼa ña̱ livi chi saátu i̱xava̱ʼara ñuʼú yóʼo xíʼin tá mar, ta ku̱a̱ʼání ña̱ kivi sakúaʼayó xíʼin ña̱yóʼo (Sal. 104:​24, 25). Ná ndakanixi̱níyó ndáa ki̱ʼva viíní i̱xava̱ʼa Jehová miíyó ña̱ kusi̱í-iniyó kotonde̱ʼéyó ndiʼi ña̱ʼa ña̱ i̱xava̱ʼara. Tá kúú, i̱xava̱ʼara nduchúnu̱úyó, so̱ʼoyó, yuʼúyó, yáa̱yó á láa̱yó, si̱ti̱nyó xíʼin ndaʼa̱yó (Rom. 1:20). Tá kúú, ndiʼi ña̱ i̱xava̱ʼa Jehová náʼa̱ña ña̱ ndíchiníra ta ndiʼi ña̱ʼa ña̱ i̱xava̱ʼara kuxuyó náʼa̱ña ña̱ kúʼvi̱ní-inira xínira miíyó. Tá xítonde̱ʼéyó ndiʼi ña̱ʼa ña̱ i̱xava̱ʼa Jehová, chíndeétáʼanña xíʼinyó ña̱ kotoyó ndiʼi ña̱ va̱ʼa ña̱ kúúmiíra. Ña̱yóʼo chindeétáʼanña xíʼinyó ña̱ kuxini̱kayóra ta viíka kutáʼanyó xíʼinra. w23.03 16 párr. 4, 5

Si̱lóʼo kúma̱ní tasaá ya̱ʼayó nu̱ú ku̱a̱ʼání tu̱ndóʼo ña̱ ndeéní ta nda̱a̱ kivi kixáʼayó kaka-iniyó xa̱ʼa̱ ña̱ kándíxayó Ndióxi̱, sava na̱ yiví kivi ka̱ʼa̱nna ña̱ su̱ví ña̱ nda̱a̱ kúú ña̱ káʼa̱n Biblia, ta saátu ña̱ kǒo níndáka̱xin Jehová ta̱ esclavo ta̱ nda̱kúní-ini ta̱ ndíchiní ña̱ kuniʼira yichi̱ nu̱ú na̱ ñuura. Soo tá kǒo xíka-iniyó ña̱ ndixa kúú ña̱ káʼa̱n tu̱ʼun Ndióxi̱ saá kuchiñuyó ya̱ʼayó nu̱ú tu̱ndóʼo yóʼo, ta kǒo ixayo̱ʼvi̱ña xíʼinyó ña̱ kandíxayó ndiʼi ña̱ káʼa̱n Jehová xíʼinyó nda̱a̱ ná kixaa̱ ki̱vi̱ nu̱ú ndíʼi (Sal. 119:112). Kǒo kúkaʼan nu̱úyó ña̱ ka̱ʼa̱nyó xíʼin na̱ yiví xa̱ʼa̱ ña̱ va̱xi nu̱ú Biblia ta keʼéna ña̱ káʼa̱nña (Sal. 119:46). Ta saátu “kúee koo iniyó ta kusi̱í-iniyó” ni ná ixandi̱va̱ʼana xíʼinyó xa̱ʼa̱ ña̱ ndásakáʼnuyó Ndióxi̱ (Col. 1:11; Sal. 119:​143, 157). Ña̱ nda̱a̱ chíndeétáʼanña xíʼinyó ña̱ kǒo kaka-iniyó ta saátu ña̱ kunda̱a̱-iniyó ndáaña xíniñúʼu keʼéyó. w23.01 7 párr. 16, 17

Ñuú tá ku̱ma̱ní kuvi ta̱ Jesús, ku̱a̱ʼání tiempo ni̱ka̱ʼa̱nra xíʼin yivára xa̱ʼa̱ na̱ discípulora ña̱ ná kundaarana nu̱ú ta̱ Ndi̱va̱ʼa (Juan 17:15). Xíʼin ña̱yóʼo ni̱na̱ʼa̱ra ña̱ kúʼvi̱ní-inira xínirana. Ni xa̱a̱ ku̱nu̱mí ña̱ ndeéní xo̱ʼvi̱ra, soo ni saá ni̱ndi̱ʼi̱-inira xa̱ʼa̱na. Nda̱a̱ táki̱ʼva ke̱ʼé ta̱ Jesús, saátu kéʼé miíyó va̱ása ndíʼi̱-iniyó xa̱ʼa̱ ña̱ xíniñúʼu mií kuitíyó, chi saátu káʼa̱nyó xíʼin Jehová xa̱ʼa̱ na̱ hermanoyó. Saá kúú ña̱ náʼa̱yó ña̱ ndíku̱nyó ña̱ ni̱ka̱ʼa̱n ta̱ Jesús tá ka̱chira: “Kuʼvi̱-inindó kunitáʼanndó”, ta saátu náʼa̱yó nu̱ú Jehová ña̱ kúʼvi̱ní-iniyó xíniyó na̱ hermanoyó. Tá káʼa̱nyó xíʼin Jehová xa̱ʼa̱ na̱ hermanoyó saá kúúña náʼa̱yó ña̱ ndáyáʼvinína nu̱úyó. Saáchi Biblia káchiña “tá káʼa̱n iin na̱ yiví na̱ nda̱kúní-ini xíʼin Ndióxi̱, ña̱ káʼa̱n na̱yóʼo kúúmiíníña ndee̱” (Sant. 5:16). Xíniñúʼu ka̱ʼa̱nyó xíʼin Ndióxi̱ xa̱ʼa̱ na̱ hermanoyó chi yo̱ʼvi̱ní tu̱ndóʼo yáʼana nu̱ú. w22.07 23, 24 párr. 13-15