Julio

Xa̱ʼa̱ ña̱ kúʼvi̱ní-ini Jehová xínira miíyó ña̱kán ta̱xira ña̱ ka̱ʼa̱nyó xíʼinra. Savana va̱ása vií níkixáʼana kuniñúʼuna tu̱ʼunna. Tá kúú, ta̱ Ndi̱va̱ʼa sa̱ndáʼvira ñá Eva ta xa̱ʼa̱ ña̱ vatá ña̱ ni̱ka̱ʼa̱nra, ni̱xa̱a̱yó ndu̱uyó na̱ yiví ku̱a̱chi (Gén. 3:​1-4). Ta saátu ta̱ Adán va̱ása vií níxiniñúʼura tu̱ʼun ña̱ ta̱xi Jehová ndaʼa̱ra, saáchi chi̱ka̱a̱ra ku̱a̱chi ñá Eva ta saátu chi̱ka̱a̱ra ku̱a̱chi Jehová tá ke̱ʼéra ña̱ va̱ása va̱ʼa (Gén. 3:12). Ta̱ Caín ni̱ka̱ʼa̱nra ña̱ vatá xíʼin Jehová tá xa̱ʼníra ñanira ta̱ Abel (Gén. 4:9). Tiempo vitin, íxayo̱ʼvi̱níña xíʼinyó ndani̱ʼíyó iin película nu̱ú va̱ása káʼa̱nna tu̱ʼun kini. Saátu nda̱a̱ ti̱xin escuela á nu̱ú káchíñuyó nina tu̱ʼun kini káʼa̱nna. Xa̱ʼa̱ ña̱ ku̱a̱ʼání tu̱ʼun kini káʼa̱n na̱ yiví, tá ná va̱ása kiʼinyó kuenta nda̱a̱ miíyó kivi kixáʼayó ka̱ʼa̱nyó ña̱yóʼo. Soo xa̱ʼa̱ ña̱ ndásakáʼnuyó Jehová kúni̱yó sakúsi̱íyó-inira, ña̱kán chíka̱a̱níyó ndee̱ ña̱ va̱ása ka̱ʼa̱nyó tu̱ʼun kini, ta saátu chíka̱a̱yó ndee̱ ña̱ vií kuniñúʼuyó tu̱ʼunyó ña̱ va̱ʼa ndasakáʼnuyó Jehová. w22.04 4 párr. 1-3

Viíní xi̱ndakanixi̱ní ta̱ Jesús xa̱ʼa̱ ña̱ xi̱kuumiíra. Ta̱yóʼo xi̱kutóovara kuxura ta saátu ña̱ koʼora (Luc. 19:​2, 6, 7). Iin yichi̱ nda̱sara ti̱kui̱í vino tá va̱ʼaní, ta ña̱yóʼo kúú ña̱ nu̱ú milagro ke̱ʼéra (Juan 2:​10, 11). Ta saátu tá ni̱xi̱ʼi̱ra, iin ti̱ko̱to̱ ña̱ yaʼviní xi̱ndixira (Juan 19:​23, 24). Soo kǒo níndi̱ʼi̱-inira ña̱ kuumiíra ku̱a̱ʼá ña̱ʼa. Ta̱ Jesús ni̱ka̱ʼa̱nra ña̱ tá siʼnaka chiñu Ndióxi̱ ná kundi̱ʼi̱-iniyó xa̱ʼa̱, Jehová taxira ña̱ xíniñúʼuyó (Mat. 6:​31-33). Ku̱a̱ʼání ña̱ va̱ʼa xa̱a̱ ndákiʼin na̱ hermano xa̱ʼa̱ ña̱ ndíku̱nna consejo ña̱ táxi Jehová, ña̱ káʼa̱n xa̱ʼa̱ xu̱ʼún. Ná kotoyó ña̱ kéʼé iin ta̱ hermano ta̱ naní Daniel. Ta̱yóʼo káchira: “Tá ni̱xi̱yo loʼi̱ chi̱kaa̱-inii̱ ña̱ kachíñui̱ ndiʼi tiempo nu̱ú Jehová”. Xa̱ʼa̱ ña̱ chíka̱a̱níra ndee̱ ña̱ va̱ása kuumiíra ku̱a̱ʼání ña̱ʼa, va̱ʼaní xíniñúʼura tiempora ña̱ va̱ʼa chíndeétáʼanra xíʼin na̱ hermano nu̱ú kúu iin tu̱ndóʼo ta saátu káchíñura Betel. Ta̱yóʼo káʼa̱nkara: “Va̱ása kivi kitáʼan xu̱ʼún xíʼin ndiʼi ña̱ va̱ʼa ña̱ xa̱a̱ táxi Jehová ndaʼíi̱”. w22.05 21, 22 párr. 6, 7

Iin ki̱ʼva ña̱ na̱ʼa̱yó ña̱ kúʼvi̱ní-iniyó xíniyó ña̱ nda̱a̱ kúú ña̱ kaʼvi ni̱ʼiyó Biblia ta saátu inkaka tutu ña̱ tává na̱ ñuu Ndióxi̱. Saáchi ni loʼo á ku̱a̱ʼá tiempo ñúʼuyó ti̱xin ñuu Ndióxi̱, ndiʼi tiempova íyo ña̱ sákuaʼayó. Su̱ví ndiʼiviyó kútóo kaʼvi á sakúaʼa xa̱ʼa̱ iin ña̱ʼa, soo Jehová káʼa̱nra xíʼinyó ña̱ ná ndakundeéyó sakúaʼayó ña̱ va̱ʼa kunda̱a̱-iniyó xa̱ʼa̱ ña̱ nda̱a̱ (Prov. 2:​4-6). Tá ná chika̱a̱yó ndee̱ ña̱ keʼéyóña, ku̱a̱ʼání ña̱ va̱ʼa ndakiʼinyó. Iin ta̱ hermano ta̱ naní Corey káʼa̱nra ña̱ tá xa̱a̱ káʼvira Biblia, iin tá iin versículo kíʼinra kuenta xíʼin. Ta̱yóʼo káchira: “Káʼvii̱ nota ña̱ va̱xi xíʼinña, nándukúi̱ versículo ña̱ kítáʼan xíʼinña ta saátu nándukúkai̱ xa̱ʼa̱ ña̱ versículo yóʼo. [...] Chi saá kúú ña̱ kúnda̱a̱ka-inii̱ xíʼin ña̱ káʼvii̱”. Ni kéʼéyó á va̱ása kéʼéyó nda̱a̱ táki̱ʼva kéʼé ta̱ hermano yóʼo, soo tá chíka̱a̱yó ndee̱ ña̱ káʼviyó Biblia, saá náʼa̱yó ña̱ ndáyáʼviní ña̱ nda̱a̱ nu̱úyó (Sal. 1:​1-3). w22.08 18 párr. 15, 16

Tá ki̱xi ta̱ Jesús nu̱ú ñuʼú yóʼo, xi̱niñúʼura ña̱ʼa ña̱ i̱xava̱ʼa Jehová ña̱ va̱ʼa sanáʼa̱ra na̱ discípulora. Ná ka̱ʼa̱nyó xa̱ʼa̱ sava ña̱yóʼo. Jehová náʼa̱ra ña̱ kúʼvi̱-inira xínira miíyó. Tá íyo ta̱ Jesús chí xi̱ní yuku̱, ni̱ka̱ʼa̱nra xíʼin na̱ discípulora xa̱ʼa̱ u̱vi̱ ña̱ʼa ña̱ va̱ása chíndayáʼviní na̱ yiví. Ta ña̱yóʼo kúú: ñu̱ʼu xíʼin sa̱vi̱. Xa̱ʼa̱ ña̱ kúʼvi̱ní-ini Jehová xínira miíyó táxira u̱vi̱ ña̱yóʼo ndaʼa̱yó ña̱ va̱ʼa kutakuyó ni ndásakáʼnuyóra á va̱ása (Mat. 5:​43-45). Ta̱ Jesús xi̱niñúʼura ejemplo yóʼo ña̱ va̱ʼa sanáʼa̱ra na̱ discípulora ña̱ mií Jehová kúni̱ra ña̱ ná kuʼvi̱ní-iniyó kuniyó ndiʼi na̱ yiví. Ña̱kán tá xítoyó ña̱ liviní ku̱a̱kiʼvi ñu̱ʼu xíʼin tá káni sa̱vi̱, ná ndakanixi̱níyó nda̱saakaví kúʼvi̱-ini Jehová xínira miíyó ta inkáchi íyo ndiʼiyó nu̱úra. Náʼa̱yó ña̱ ndíku̱nyó yichi̱ra tá kúʼvi̱-iniyó xíniyó na̱ yiví ta sánáʼa̱yóna xa̱ʼa̱ra. w23.03 17 párr. 9, 10

¿Ndáaña sa̱ndákanda̱-ini ta̱ apóstol Juan? Xi̱nii̱ iin ñá ñaʼá ñá íyo sa̱tá tí kití yukú tí color kúáʼa ña̱ yéʼe̱ní. Tu̱ʼun Ndióxi̱ káʼa̱nña xa̱ʼa̱ñá ña̱ kísi̱ñá xíʼin ku̱a̱ʼání ta̱a ta naníñá “Babilonia ña̱ káʼnu”. Ta ñáyóʼo kísi̱ñá xíʼin ndiʼi na̱ rey na̱ íyo nu̱ú ñuʼú yóʼo (Apoc. 17:​1-5). ¿Ndáaña kúú “Babilonia ña̱ káʼnu”? Ñá ñaʼá yóʼo va̱ása ndána̱ʼa̱ñá na̱ chíñu na̱ íyo nu̱ú ñuʼú yóʼo, saáchi libro ña̱ Apocalipsis káʼa̱nña ña̱ kísi̱ñá xíʼin na̱ chíñu yóʼo (Apoc. 18:9). Ta saátu káʼa̱nña xa̱ʼa̱ñá ña̱ kánuuñá sa̱tá tí kití yukú, ña̱yóʼo kúni̱ kachiña ña̱ kúni̱ñá kaʼndachíñuñá nu̱úrí. Saátu va̱ása ndána̱ʼa̱ñá na̱ íxi̱kó ña̱ʼa nu̱ú ñuyǐví ta̱ Ndi̱va̱ʼa, saáchi chí nu̱úkaví káʼa̱n libro ña̱ Apocalipsis xa̱ʼa̱ na̱ íxi̱kó ña̱ʼa (Apoc. 18:​11, 15, 16). Tá tiempo xi̱naʼá ku̱a̱ʼání ndióxi̱ vatá xi̱ndasakáʼnu na̱ ñuu Babilonia. Ña̱kán, Babilonia ña̱ káʼnu ndána̱ʼa̱ña ndiʼi religión vatá ña̱ íyo nu̱ú ñuʼú yóʼo (Apoc. 17:​5, 18). w22.05 11 párr. 14-16

Iin ña̱ va̱ʼava kúú ña̱ kéʼé ná íyo se̱ʼe tá ndákanixi̱níná á xa̱a̱ se̱ʼená kachíñuna nu̱ú Jehová. Na̱ íyo se̱ʼe kúnda̱a̱va-inina ña̱ ku̱a̱ʼání tu̱ndóʼo yáʼa se̱ʼena nu̱ú ñuyǐví ta̱ Ndi̱va̱ʼa yóʼo. Saátu íyo inka ña̱ íxayo̱ʼvi̱ xíʼin ná íyo se̱ʼe, saáchi savaná sákuaʼnu mitúʼunná se̱ʼená á savatuná va̱ása ndásakáʼnu yiíná Jehová. Soo su̱ví nda̱saa na̱ íyo mitúʼun kúú na̱ íxayo̱ʼvi̱ña xíʼin sanáʼa̱na se̱ʼena xa̱ʼa̱ Jehová ña̱ va̱ʼa xa̱a̱na kachíñuna nu̱úra. Chi saátu íxayo̱ʼvi̱ña xíʼin inka na̱ hermano ni u̱vi̱ saána káchíñu nu̱ú Jehová. Soo ni nda̱a̱ ndáaka ña̱ ndóʼún, va̱ása kundi̱ʼi-iniún chi Jehová íyora ña̱ chindeétáʼanra xíʼún. Ta saátu kivi nda̱ka̱tu̱ʼún inka na̱ íyo se̱ʼe ndáa ki̱ʼva xíniñúʼuna tutu ña̱ tává na̱ ñuu Jehová tá káʼvina xíʼin se̱ʼena (Prov. 11:14). Ta kivitu ka̱ʼún xíʼin Jehová ña̱ ná chindeétáʼanra xíʼún ña̱ va̱ʼa kunda̱a̱-iniún ndáaña ndóʼo se̱ʼún á ndáaña ndákanixi̱nína (Prov. 20:5). w22.04 17 párr. 4, 7; 18 párr. 9

Inka ki̱ʼva ña̱ kuʼvi̱ka-iniyó kuniyó Jehová, kúú ña̱ sakúaʼa va̱ʼakayó xa̱ʼa̱ se̱ʼera, chi ta̱yóʼo va̱ʼaní kéʼéra nda̱a̱ táki̱ʼva kéʼé yivára (Heb. 1:3). Ta iin ki̱ʼva ña̱ sakúaʼayó xa̱ʼa̱ ta̱ Jesús kúú ña̱ kaʼviyó ku̱mí saá Evangelio ña̱ káʼa̱n xa̱ʼa̱ra. ¿Á chíka̱ún ndee̱ ña̱ kaʼviún Biblia ndiʼi ki̱vi̱? Tá ta̱ʼán kaʼviúnña, kivi chika̱ún ndee̱ ña̱ kixáʼún kaʼviúnña. Tá ná kaʼviún xa̱ʼa̱ ña̱ ke̱ʼé ta̱ Jesús xíʼin xa̱ʼa̱ ña̱ ni̱ka̱ʼa̱nra, saá kundaa-iniún ndáa ki̱ʼva íyora. Ta̱yóʼo va̱ʼaní na̱ yiví xi̱kuura ta ndiʼina xi̱kuni̱ kuyatin nu̱úra, ta nda̱a̱ xi̱numira na̱ va̱lí (Mar. 10:​13-16). Xa̱ʼa̱ ña̱kán va̱ʼaní xi̱kuni na̱ discípulora tá xi̱xiyona xíʼinra, ña̱kán va̱ása níxi̱yiʼvína ka̱ʼa̱nna xíʼinra xa̱ʼa̱ ña̱ xi̱ndakanixi̱nína (Mat. 16:22). Ta̱ Jesús xi̱keʼéra saá, chi saá íyo yivára. Ña̱kán kivi ka̱ʼa̱nyó xíʼinra xa̱ʼa̱ ndiʼi ña̱ ndóʼoyó, chi kúʼvi̱ní-inira xínira miíyó ta ndíʼi̱-inira xa̱ʼa̱yó (1 Ped. 5:7). w22.08 3 párr. 4, 5

Jehová kúú ta̱ i̱xava̱ʼa miíyó ña̱kán va̱ʼaní xíni̱ra miíyó. Ña̱kán, ¿á va̱ása ndákanda̱-iniyó xíʼin ña̱yóʼo? (Sal. 139:​15-17). Kúnda̱a̱va-inira ndáaña íxayo̱ʼvi̱ xíʼinyó chi na̱ yiví ku̱a̱chi kúúyó. Ta kúnda̱a̱tu-inira ndáa ki̱ʼva xa̱ʼnuyó, xa̱ʼa̱ ña̱kán íyoyó táki̱ʼva íyoyó. ¿Ndáaña kéʼé Jehová xa̱ʼa̱ ña̱ kúnda̱a̱-inira ndáa ki̱ʼva íyoyó? Íxakáʼnu-inira xa̱ʼa̱yó (Sal. 78:39; 103:​13, 14). Xa̱a̱ ni̱na̱ʼa̱ Jehová ña̱ kúni̱ra ixakáʼnu-inira xa̱ʼa̱yó. Ta kúnda̱a̱-inira ña̱ ndiʼiyó kúúyó na̱ yiví ku̱a̱chi, ta xíʼi̱yó xa̱ʼa̱ chiʼña ña̱ sa̱ndákoo ta̱ Adán (Rom. 5:12). Ta xi̱kunda̱a̱-inira ña̱ kǒo nda̱a̱ ni iin ña̱ kivi keʼéyó ña̱ va̱ʼa sa̱ñáyó ndaʼa̱ chiʼña ña̱ sa̱ndákoo ta̱ Adán ndaʼa̱yó (Sal. 49:​7-9). Soo xa̱ʼa̱ ña̱ ku̱ndáʼviní-ini Ndióxi̱ xi̱nira miíyó, ke̱ʼéra iin ña̱ʼa ña̱ va̱ʼa sa̱ñáyó ndaʼa̱ chiʼña yóʼo. Juan 3:16 káʼa̱nña xíʼinyó ña̱ ni̱kuʼvi̱ní-ini Jehová xi̱nira miíyó, ña̱kán chi̱ndaʼára se̱ʼera ña̱ ki̱xira ni̱xi̱ʼi̱ra xa̱ʼa̱yó (Mat. 20:28; Rom. 5:19). w22.06 3 párr. 5, 6

Xa̱a̱ ya̱chi̱ví ni̱ka̱ʼa̱n Jehová xíʼin na̱ xi̱ndasakáʼnu miíra ña̱ ná kundáʼvi-inina kunina inkana, chi saá íyo ña̱ ni̱ka̱ʼa̱nra xíʼin ta̱ Job. Saáchi tá ni̱ka̱ʼa̱n ta̱ Elifaz, ta̱ Bildad xíʼin ta̱ Zofar xíʼinra tu̱ʼun ña̱ sa̱xóʼvi̱ní-inira, xi̱niñúʼu kundeé-inira xíʼin ña̱yóʼo. Ta ña̱ va̱ʼa ixakáʼnu-ini Jehová xa̱ʼa̱ ña̱ ke̱ʼé na̱ ta̱a yóʼo, ni̱ka̱ʼa̱nra xíʼin ta̱ Job ña̱ ná keʼéra oración xa̱ʼa̱na. Ta tá ke̱ʼéra ña̱yóʼo, ku̱a̱ʼání ña̱ va̱ʼa ta̱xi Jehová ndaʼa̱ra (Job 42:​8-10). Miíyó kúú na̱ xóʼvi̱ tá va̱ása nándósóyó xa̱ʼa̱ ña̱ ke̱ʼéna xíʼinyó. Xa̱ʼa̱ ña̱kán káʼa̱n Jehová xíʼinyó ña̱ ná nandósóyó xa̱ʼa̱ ña̱ ke̱ʼéna xíʼinyó (Efes. 4:​31, 32). Ta ña̱yóʼo kúú consejo ña̱ táxira ndaʼa̱yó: “Ndakoo ña̱ sáún ta va̱ása keʼékaúnña” (Sal. 37:8). Ku̱a̱ʼání ña̱ va̱ʼa ndakiʼinyó tá ná kuniso̱ʼoyó consejo yóʼo, saáchi tá va̱ása nándósóyó xa̱ʼa̱ ña̱ ke̱ʼéna xíʼinyó nda̱a̱ kivi kiʼin kue̱ʼe̱ miíyó (Prov. 14:30). Xóʼvi̱níyó tá va̱ása nándósóyó xa̱ʼa̱ ña̱ ke̱ʼéna xíʼinyó, ta nda̱a̱ táki̱ʼva íyo na̱ xíʼi veneno saá íyoyó. Ña̱kán tá íxakáʼnu-iniyó xa̱ʼa̱ inkana ku̱a̱ʼání ña̱ va̱ʼa ndákiʼinyó, saáchi va̱ása ndíʼi̱ka-iniyó ta kivi ndakundeéyó kachíñukayó nu̱ú Jehová. w22.06 10 párr. 9, 10

Ña̱ ndátuyó ndakiʼinyó, táki̱ʼva íyo iin casco saá íyoña, saáchi chíndeétáʼanña xíʼinyó ña̱ vií ndakanixi̱níyó ta va̱ása ndakanixi̱níyó xa̱ʼa̱ ña̱ kúni̱ mií kuitíyó, chi ña̱yóʼo kivi sakúxíkáña miíyó nu̱ú Jehová (1 Cor. 15:​33, 34). Ña̱ ndátuyó ndakiʼinyó chíndeétáʼanña xíʼinyó ña̱ va̱ása ndakanixi̱níyó ña̱ kǒo kúchiñuyó sakúsi̱íyó ini Jehová. Ná ndakaʼányó chi táʼan ña̱yóʼo ni̱ka̱ʼa̱n ta̱ Elifaz xíʼin ta̱ Job tá ka̱chira xíʼinra: “Kǒo nda̱a̱ ni iin na̱ yiví kivi koo nda̱kú-ini xíʼin Ndióxi̱”. Tándi̱ʼi, saá ni̱ka̱ʼa̱nkara ña̱yóʼo: “Ni na̱ ángel va̱ása kándíxara ta ni ndiví va̱ása yi̱i̱ña nu̱úra” (Job 15:​14, 15). Ná ndakaʼányó chi ta̱ Ndi̱va̱ʼa kúú ta̱ kúni̱ ná ndakanixi̱níyó saá. Ta̱ Ndi̱va̱ʼa kúnda̱a̱-inira ña̱ tá ná ndakundeéyó ndakanixi̱níyó saá, loʼo tá loʼo va̱ása kandíxakayó ña̱ káʼa̱n Ndióxi̱ taxira ndaʼa̱yó chí nu̱únínu. Soo, ná ndakaʼányó ña̱ kúni̱níva Jehová ña̱ ná kutakuyó ndiʼi tiempo, ta chindeétáʼanvara xíʼinyó ña̱ ni̱ʼíyó ña̱yóʼo (1 Tim. 2:​3, 4). w22.10 25, 26 párr. 8-10

Ta̱ Ndi̱va̱ʼa xi̱kuni̱ra ña̱ ná ndakanixi̱ní ta̱ Job ña̱ xóʼvi̱ra xa̱ʼa̱ ña̱ va̱ása kúsi̱íka-ini Jehová xíʼin ña̱ kéʼéra. Xa̱ʼa̱ ña̱yóʼo, ta̱ Ndi̱va̱ʼa xi̱niñúʼura iin ta̱chí ña̱ ndeéní ña̱ va̱ʼa sandúvara veʼe sa̱tá u̱xu̱ saá na̱ se̱ʼe ta̱ Job tá ndóona xíxina (Job 1:​18, 19). Ta saátu sa̱kóyora ñuʼu̱ chí ndiví ta xa̱ʼníña kití sa̱na̱ ta̱ Job ta saátu na̱ xi̱ndaarí (Job 1:16). Kúnda̱a̱ káxi iniyó, ta̱chí ña̱ ndeéní ka̱ni yóʼo xíʼin ñuʼu̱ ña̱ ni̱ko̱yo chí ndiví su̱ví ña̱ níkuu mií kúúña. Xa̱ʼa̱ ña̱kán, ta̱ Job nda̱kanixi̱níra ña̱ mií Jehová kúú ta̱ chi̱ndaʼáña, ta xa̱ʼa̱ ña̱yóʼo nda̱kanixi̱níra ña̱ ke̱ʼéra iin ña̱ʼa ña̱ va̱ása nu̱ú Jehová. Soo ni ndo̱ʼora ña̱yóʼo, va̱ása níchika̱a̱ra chiʼña yivára ta̱ íyo chí ndiví. Nda̱kunira ña̱ xa̱a̱ ku̱a̱ʼání ku̱i̱ya̱ táxi Jehová ña̱ va̱ʼa ndaʼa̱ra ta xi̱kusi̱íva-inira xi̱ndakiʼinra ndiʼiña, ta nda̱a̱ táki̱ʼva xi̱ndakiʼinra ña̱ʼa ña̱ va̱ʼa, saátu xi̱niñúʼu ndakiʼinra ña̱ʼa ña̱ va̱ása va̱ʼa. Xa̱ʼa̱ ña̱kán ni̱ka̱ʼa̱nra: “Ná ndukáʼnuka ki̱vi̱ Jehová” (Job 1:​20, 21). w22.06 21 párr. 7

Ta̱ Jesús ni̱ka̱ʼa̱nra ña̱ sa̱a̱-inina kunina na̱ discípulora (Juan 17:14). Ta tiempo ña̱ so̱ndíʼi ña̱ ndóoyó vitin, xa̱a̱ kíʼinyó kuenta ña̱ xa̱a̱ ku̱a̱ʼa̱n xínu iin táʼví ña̱ profecía yóʼo. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo? Tá 1914 saá kúú ña̱ ni̱xa̱a̱ ta̱ Jesús ndu̱ura rey chí ndiví, ta tá ni̱ya̱ʼa loʼo, saá kúú ña̱ sa̱kánana ta̱ Ndi̱va̱ʼa nu̱ú ñuʼú yóʼo. Tasaá kúú ña̱ ki̱xáʼara xáʼndachíñura nu̱ú ñuʼú yóʼo ta ndáa si̱lóʼo kúma̱ní ta kixaa̱ ki̱vi̱ ña̱ ndiʼi-xa̱ʼa̱ra (Apoc. 12:​9, 12). Ña̱kán sáa̱níra ta íxandi̱va̱ʼaníra xíʼin na̱ ñuu Ndióxi̱ (Apoc. 12:​13, 17). Xa̱ʼa̱ ña̱kán na̱ yiví sáa̱nína xínina miíyó. Soo va̱ása xíniñúʼu yi̱ʼvíyó ta̱ Ndi̱va̱ʼa ni na̱ kítáʼan xíʼinra. Ta kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ apóstol Pablo tá ka̱ʼyíra: “Tá Ndióxi̱ íyora xíʼinyó, ¿ndáana kivi kanitáʼan xíʼinyó?” (Rom. 8:31). Ña̱kán ná kandíxaníyó Jehová. w22.07 18 párr. 14, 15

Ta̱ Jesús xi̱kunda̱a̱-inira ña̱ tiempo nu̱ú ndíʼi vitin, koo ku̱a̱ʼání na̱ natúʼun xa̱ʼa̱ Ndióxi̱. Xi̱kunda̱a̱-inira ña̱ xi̱nu ña̱ káʼa̱n profecía yóʼo: “Ki̱vi̱ tá ná kitaún ku̱ʼún kanitáʼún, na̱ ñuún kuni̱na chindeétáʼanna xíʼún” (Sal. 110:3). Tá nátúʼún tu̱ʼun va̱ʼa xa̱ʼa̱ Reino Ndióxi̱, chíndeétáʼún xíʼin ta̱ Jesús ta saátu xíʼin ta̱ “esclavo ta̱ nda̱kúní-ini ta̱ ndíchiní”, tasaá kúú ña̱ sáxi̱nún ña̱ káʼa̱n salmo yóʼo. Xa̱a̱ nátúʼunvayó xa̱ʼa̱ Ndióxi̱, soo íyo sava ña̱ íxayo̱ʼvi̱ xíʼinyó. Ña̱ íxayo̱ʼvi̱ xíʼinyó ndasakáʼnuyó Ndióxi̱ kúú ña̱ kéʼé na̱ apóstata, na̱ político xíʼin na̱ níʼi yichi̱ nu̱ú na̱ veʼe-ñu̱ʼu, saáchi káʼa̱nna ku̱a̱ʼání ña̱ vatá xa̱ʼa̱ na̱ ñuu Ndióxi̱ ta sásina nu̱úyó ña̱ ndasakáʼnuyó Ndióxi̱. Tá na̱ veʼeyó, na̱ migoyó ta saátu na̱ káchíñu xíʼinyó kándíxana ña̱ vatá yóʼo, kivi kixáʼana ka̱ʼa̱nna xíʼinyó ña̱ ná sandákooyó ña̱ ndasakáʼnuyó Jehová ta saátu ña̱ natúʼunyó xíʼin na̱ yiví xa̱ʼa̱ra. Sava país, na̱ sáa̱-ini xíni miíyó íxandi̱va̱ʼana xíʼin na̱ hermanoyó ta nda̱a̱ chíka̱a̱na na̱yóʼo veʼeka̱a. w22.07 9 párr. 5, 6

Ña̱ va̱ʼa vií kuniñúʼuyó ndiʼi ña̱ sánáʼa̱ Jehová miíyó nu̱ú tu̱ʼunra, kúni̱ra ña̱ ná kaʼvi ni̱ʼiyóña ta ná ndakanixi̱níyó xa̱ʼa̱ ña̱ káʼa̱nra. Tá kéʼéyó ña̱ sákuaʼayó nu̱úña, saá kúú ña̱ xa̱a̱yó kandíxaníkayó Ndióxi̱ ta viíní kutáʼanyó xíʼinra. Ta saátu tá kándíxayó ña̱ va̱xi nu̱ú tu̱ʼun Ndióxi̱, taxira espíritu santora ndaʼa̱yó, ña̱ va̱ʼa kundeé-iniyó ya̱ʼayó nu̱ú nda̱a̱ ndáaka tu̱ndóʼo ña̱ ná kixi nu̱úyó (2 Cor. 4:​7-10). Jehová chíndeétáʼanra xíʼin ta̱ “esclavo ta̱ nda̱kúní-ini ta̱ ndíchiní” ña̱ va̱ʼa tavára ku̱a̱ʼání tutu, video xíʼin yaa. Ta ña̱yóʼo chíndeétáʼanníña xíʼinyó ña̱ kandíxaníkayó Jehová ta va̱ása kuxíkáyó nu̱úra (Mat. 24:45). Jehová sánáʼa̱ra na̱ káchíñu nu̱úra ña̱ kuʼvi̱-inina kunitáʼanna ta sándi̱kona-ini táʼanna tá yáʼana nu̱ú tu̱ndóʼo (2 Cor. 1:​3, 4; 1 Tes. 4:9). Na̱ ñaniyó xíʼin na̱ ku̱ʼvayó kúni̱na chindeétáʼanna xíʼinyó ña̱ nda̱kú koo iniyó xíʼin Ndióxi̱ tá yáʼayó nu̱ú tu̱ndóʼo. w22.08 12 párr. 12-14

Tá káʼa̱nyó xa̱ʼa̱ ña̱ va̱ʼa ña̱ kéʼé inkana, saá chindeétáʼanyó xíʼin na̱ hermano ña̱ vií kutáʼanna, ta kuʼvi̱-inina kunitáʼanna. Sava yichi̱ nda̱a̱ na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ va̱ása inkáchi ndákanixi̱nína xíʼin inkana, ta xa̱ʼa̱ ña̱yóʼo nda̱a̱ kivi kaku ku̱a̱chi. Ña̱yóʼo kúú ña̱ ndo̱ʼo ta̱ apóstol Pablo xíʼin ta̱ Bernabé. Ta̱ Bernabé xi̱kuni̱ra ña̱ ná ku̱ʼu̱n ta̱ Marcos xíʼinna natúʼunna xa̱ʼa̱ Ndióxi̱, soo ta̱ Pablo kǒo níxiinra ku̱ʼu̱n ta̱yóʼo xíʼinna. ¿Ndáaña ku̱u tándi̱ʼi? Tu̱ʼun Ndióxi̱ káchiña: “Ndeéní ni̱nda̱ʼyi̱ nu̱ú táʼanna ta ni̱sa̱a̱na nu̱ú táʼanna ta ta̱ʼví-táʼanna” (Hech. 15:​37-39). Soo ta̱ Pablo, ta̱ Bernabé xíʼin ta̱ Marcos nda̱saviína ku̱a̱chi yóʼo. Tá ni̱ya̱ʼa tiempo ta̱ Pablo va̱ʼaní ni̱ka̱ʼa̱nra xa̱ʼa̱ ta̱ Bernabé ta saátu xa̱ʼa̱ ta̱ Marcos (1 Cor. 9:6; Col. 4:10). Saátu miíyó xíniñúʼu ndasaviíyó ku̱a̱chi ña̱ kúúmiíyó xíʼin na̱ hermanoyó, ta chika̱a̱yó ndee̱ ña̱ kotoyó ña̱ va̱ʼa ña̱ kéʼéna. Tá saá ná keʼéyó viíní kutáʼanyó ti̱xin congregación. w22.08 22, 23 párr. 10, 11

Ni xa̱a̱ chíka̱a̱níyó ndee̱ ña̱ keʼéyó ña̱ kúni̱ Jehová, soo ná kǒo ndakanixi̱níyó ña̱ va̱ʼaníka kéʼéyó nu̱ú inkana, ta ná kǒo ka̱ʼa̱nyó xa̱ʼa̱na. Va̱ʼaka ná ndakaʼányó chi Jehová kúú ta̱ kúúmií derecho ña̱ ndatiinra ku̱a̱chi xíʼin ndiʼi na̱ yiví (Gén. 18:25). Jehová va̱ása nítaxira chiñu ndaʼa̱yó ña̱ ndatiinyó ku̱a̱chi xíʼin inkana. Ná ndakaʼányó xa̱ʼa̱ ta̱ José, ta̱yóʼo iin ta̱a va̱ʼa xi̱kuura. Ni i̱xandi̱va̱ʼana xíʼinra soo va̱ása níndatiinra ku̱a̱chi xíʼinna. Tá ni̱ya̱ʼa ku̱i̱ya̱ saá nda̱kutáʼanra xíʼin na̱ ñanira, tá xa̱a̱ xáʼndachíñura, ta kiviva ndatiinra ku̱a̱chi xíʼinna ta saxóʼvi̱rana nda̱a̱ táki̱ʼva ke̱ʼéna xíʼinra ni nda̱ndikóva-inina xa̱ʼa̱ ña̱ ke̱ʼéna xíʼinra. Ta xi̱yi̱ʼvívana ña̱ keʼéra saá xíʼinna, soo ta̱ José ni̱ka̱ʼa̱nra xíʼinna ña̱ ná va̱ása yi̱ʼvína chi su̱ví ta̱kánví kúú ta̱ ndatiin ku̱a̱chi xíʼinna (Gén. 37:​18-20, 27, 28, 31-35; 50:​15-21). Ta̱ José vitá ni̱xi̱yo inira ta xi̱kunda̱a̱-inira ña̱ mií Jehová kúú ta̱ kúúmií derecho ndatiin ku̱a̱chi xíʼin na̱ ñanira. w22.08 30 párr. 18, 19

Tá ká’a̱n na̱ hermano xíʼin Jehová ña̱ ná chindeétáʼanra xíʼinna, ¿á xa̱a̱ kúnda̱a̱-iniún ña̱ kivi kuniñúʼu Jehová yóʼó ña̱ va̱ʼa chindeétáʼanra xíʼinna? Ni kúúyó na̱ anciano á siervo ministerial, precursor, publicador, na̱ va̱lí, na̱ chée, ta̱a á ñaʼá. Jehová kivi kuniñúʼura miíyó ña̱ va̱ʼa chindeétáʼanra xíʼin inkana. Tá iin na̱ káchíñu nu̱ú Jehová káʼa̱nna xíʼinra ña̱ ná chindeétáʼanra xíʼinna, ta̱yóʼo kivi kuniñúʼura na̱ anciano á inkaka na̱ káchíñu nu̱úra ña̱ va̱ʼa sandíkora-inina (Col. 4:11). Kúsi̱íní-iniyó ña̱ ndásakáʼnuyó Jehová ta saátu ña̱ chindeétáʼanyó xíʼin na̱ hermano. Ta kivi chindeétáʼanyó xíʼinna tá íyo iin kue̱ʼe̱ xíkun, tá iin kama kúu iin tu̱ndóʼo á tá íxandi̱va̱ʼa na̱ chíñu xíʼinna. Ta sana kúni̱tuyó chindeétáʼanyó xíʼin inka na̱ hermano, soo na̱ veʼeyó xóʼvi̱tu na̱yóʼova. Soo nisaá ndúkúvayó ki̱ʼva ña̱ chindeétáʼanyó xíʼin na̱ hermanoyó ta Jehová kúsi̱íní-inira tá kéʼéyó ña̱yóʼo (Prov. 19:17). w22.12 22 párr. 1, 2

Tá kúʼvi̱-iniyó xíniyó na̱ hermanoyó saá kúú ña̱ kivi kandíxana miíyó. Ta̱ Jesús ni̱ka̱ʼa̱nra xa̱ʼa̱ u̱vi̱ ña̱ xíniñúʼu keʼéyó: ña̱ kuʼvi̱ní-iniyó kuniyó Jehová ta saátu ña̱ kuʼvi̱ní-iniyó kuniyó na̱ yiví (Mat. 22:​37-39). Xa̱ʼa̱ ña̱ kúʼvi̱ní-iniyó xíniyó Jehová kúú ña̱ kúni̱yó kooyó nda̱a̱ táki̱ʼva íyo miíra, chi iinlá ta̱yóʼo kúú ta̱ kivi kandíxayó saáchi va̱ása nátúʼunra xa̱ʼa̱yó xíʼin inkana. Ta xa̱ʼa̱ ña̱ kúʼvi̱ní-iniyó xíniyó na̱ hermanoyó, va̱ása nátúʼunyó xa̱ʼa̱na xíʼin inkana. Ña̱ vitá koo iniyó chindeétáʼantuña xíʼinyó ña̱ kandíxa inkana miíyó. Na̱ hermano na̱ vitá-ini, va̱ása ndi̱ku̱n nátúʼunna xíʼin inkana xa̱ʼa̱ ña̱ xíni̱na ña̱ va̱ʼa ná ndakanda̱-inina na̱kán (Filip. 2:3). Ta va̱ása náʼa̱na ña̱ xíni̱na xa̱ʼa̱ ña̱ʼa ña̱ ndáyáʼviní ta va̱ása kivi natúʼunna xa̱ʼa̱ña. Tá vitá-iniyó va̱ása kakayó natúʼunyó xíʼin inkana xa̱ʼa̱ ña̱ ndákanixi̱ní miíyó, tá kúú ña̱ kǒo va̱xi nu̱ú Biblia á ña̱ kǒo va̱xi nu̱ú tutu ña̱ tává na̱ ñuu Ndióxi̱. w22.09 12 párr. 12, 13

Iin ángel ni̱ka̱ʼa̱n xíʼin ta̱ Daniel ña̱ va̱ʼaní xa̱a̱ na̱ ñuu Ndióxi̱ kunda̱a̱-inina xíʼin profecía ña̱ va̱xi nu̱ú libro ña̱ ka̱ʼyíra, soo nda̱a̱ ni iin na̱ yiví na̱ ndi̱va̱ʼa-ini kǒo kunda̱a̱-inina xíʼinña (Dan. 12:10). Vitin kúú tiempo ña̱ xíniñúʼu na̱ʼa̱yó ña̱ va̱ása kúúyó na̱ ndi̱va̱ʼa-ini (Mal. 3:​16-18). Jehová xa̱a̱ ndáchitáʼanra na̱ ndáyáʼviní nu̱úra ta miíyó kúni̱yó kuñuʼuyó xíʼin na̱yóʼo. Ndóoyó tiempo ña̱ kúu ña̱ʼa ña̱ ndákanda̱ní-iniyó xíʼin. Soo xa̱a̱ ku̱nu̱mí koo ku̱a̱ʼáníka ña̱ʼa ña̱ ndeéní ndakanda̱ní-iniyó xíʼin. Si̱lóʼoní kúma̱ní ta kixaa̱ ki̱vi̱ ña̱ kǒoka ña̱ kini koo nu̱ú ñuʼú yóʼo. Ta saá kúú ña̱ kuniyó xi̱nu tu̱ʼun ña̱ ni̱ka̱ʼa̱n Jehová xíʼin ta̱ Daniel tá ka̱chira: “Tándi̱ʼi ndakoún ña̱ va̱ʼa ndakiʼún ña̱ taxi Ndióxi̱ ndaʼún tá ná kixaa̱ ki̱vi̱” (Dan. 12:13). ¿Á xa̱a̱ kúni̱níún ná kixaa̱ ki̱vi̱ ña̱ ndataku ta̱ Daniel ta saátu na̱ táʼún na̱ ni̱xi̱ʼi̱? Chika̱a̱níún ndee̱ ña̱ nda̱kú koo iniún xíʼin Jehová, tasaá kúú ña̱ ka̱ʼyi̱ ki̱vi̱ún nu̱ú libro nu̱ú káʼyí Jehová ki̱vi̱ na̱ kutaku ndiʼi tiempo. w22.09 23 párr. 17; 24 párr. 19, 20

Ña̱yóʼo va̱ʼaní chi̱ka̱a̱ña ndee̱ xíʼin ta̱ Ezequiel. Ta sana nda̱kaʼánra ña̱ táʼan tu̱ʼun yóʼo kúú ña̱ xi̱niñúʼu Jehová tá nda̱kaxinra ta̱ Moisés xíʼin ta̱ Isaías ña̱ xa̱a̱na koona profeta (Éx. 3:10; Is. 6:8). Ta̱ Ezequiel xi̱kunda̱a̱-inira ña̱ mií Jehová chi̱ndeétáʼan xíʼin na̱ profeta yóʼo ña̱ va̱ʼa saxínuna chiñu ña̱ yo̱ʼvi̱ní ta̱xira ndaʼa̱na. Ña̱kán u̱vi̱ yichi̱ ni̱ka̱ʼa̱n Jehová xíʼin ta̱ Ezequiel: “Chíndaʼíi̱ yóʼó”, xíʼin ña̱yóʼo ki̱ʼin ta̱ Ezequiel kuenta ña̱ chindeétáʼanva Jehová xíʼinra. Ta nu̱ú libro ña̱ Ezequiel ku̱a̱ʼá yichi̱ va̱xi ña̱ tu̱ʼun yóʼo: “Ni̱ka̱ʼa̱n Jehová xíʼi̱n” (Ezeq. 3:16). Ta saátu, tuku ta tuku va̱xi tu̱ʼun yóʼo: “Tuku ni̱ka̱ʼa̱n Jehová xíʼi̱n” (Ezeq. 6:1). Ña̱kán, ta̱ profeta Ezequiel va̱ása níxi̱ka-inira ña̱ miíva Jehová kúú ta̱ chi̱ndaʼá-ñaʼá ña̱ keʼéra chiñu yóʼo. Ta xa̱ʼa̱ ña̱ xi̱kuu yivára su̱tu̱, sana sa̱náʼa̱rara ña̱ tá ndáka̱xin Jehová iin na̱ koo profeta káʼa̱nra xíʼinna ña̱ chindeétáʼanra xíʼinna. Ná ndakaʼányó chi Jehová ni̱ka̱ʼa̱nra xíʼin ta̱ Isaac, ta̱ Jacob xíʼin ta̱ Jeremías: “Yi̱ʼi̱ íyoi̱ xíʼún” (Gén. 26:24; 28:15; Jer. 1:8). w22.11 3 párr. 3

Ni ni̱ki̱ʼvi ta̱ Adán xíʼin ñá Eva ku̱a̱chi ta ndiʼiyó xíʼi̱yó, soo Jehová ta̱ʼán nandósóví-inira xa̱ʼa̱ ña̱ káʼa̱nra taxira ndaʼa̱yó (Is. 55:11). Jehová kúni̱ra ña̱ na̱ íyo nda̱kú-ini xíʼinra ná kutakuna ndiʼi tiempo. Ña̱kán ni̱ka̱ʼa̱nra ña̱ sandátakura na̱ ni̱xi̱ʼi̱ ta taxira kutakuna ndiʼi tiempo (Hech. 24:15; Tito 1:​1, 2). Ta̱ Job xi̱kunda̱a̱-inira ña̱ kúni̱ní Jehová sandátakura na̱ ni̱xi̱ʼi̱ (Job 14:​14, 15). Ta̱ profeta Daniel xi̱kunda̱a̱-inira ña̱ ndatakuva na̱ ni̱xi̱ʼi̱ ta xa̱a̱na koona ndiʼi tiempo (Sal. 37:29; Dan. 12:​2, 13). Na̱ judío na̱ ni̱xi̱yo tiempo ta̱ Jesús xi̱kunda̱a̱-inina ña̱ kivi sandátaku Jehová na̱ xi̱kachíñu nu̱úra ta xa̱a̱na koona ndiʼi tiempo (Luc. 10:25; 18:18). Ta̱ Jesús ku̱a̱ʼání yichi̱ ni̱ka̱ʼa̱nra ña̱ sandátaku Jehová na̱ ni̱xi̱ʼi̱, ta nda̱a̱ miíra nda̱taku i̱xaa yivára (Mat. 19:29; 22:​31, 32; Luc. 18:30; Juan 11:25). w22.12 4, 5 párr. 8, 9

Jehová káʼa̱nra xíʼinyó ña̱ ná koo yatinyó xíʼinra (Sant. 4:8). Kúni̱ra koora Ndióxi̱yó, yiváyó ta saátu kúni̱ra koora migoyó. Ndákuiinra oración ña̱ kéʼéyó nu̱úra ta saátu chíndeétáʼanra xíʼinyó tá íyo tu̱ndóʼo nu̱úyó. Saátu sánáʼa̱ra miíyó ta xíniñúʼura na̱ ñuura ña̱ kundaana miíyó. Kivi kuyatinyó nu̱ú Jehová tá káʼa̱nyó xíʼinra tá káʼviyó tu̱ʼunra ta ndákanixi̱níyó xa̱ʼa̱ña. Ña̱yóʼo chindeétáʼan xíʼinyó ña̱ kuʼvi̱ka-iniyó kuniyóra ta saátu taxiyó tíxa̱ʼvi ndaʼa̱ra. Ta ña̱yóʼo chika̱a̱ña-iniyó ña̱ kuniso̱ʼoyó ndiʼi ña̱ káʼa̱nra xíʼinyó ta ndasakáʼnuyóra nda̱a̱ táki̱ʼva kúni̱ miíra (Apoc. 4:11). Tá ná kuxini̱kayó Jehová, saá kúú ña̱ kandíxakayóra ta saátu na̱ ñuura na̱ ta̱xira kuniʼi yichi̱ nu̱úyó. Ta̱ Ndi̱va̱ʼa chíka̱a̱ra-iniyó ña̱ ná va̱ása kandíxakayó Jehová ta saátu na̱ ñuura. Soo íyova ña̱ kivi keʼéyó, chi tá ná kandíxaníyó Jehová xíʼin ndiʼi níma̱yó, va̱ása sandákooyóra ta saátu va̱ása sandákooyó na̱ ñuura (Sal. 31:​13, 14). w22.11 14 párr. 1-3

Ku̱a̱ʼání na̱ ndásakáʼnu Jehová, táannana veʼeka̱a ta nda̱a̱ xáʼnínana xa̱ʼa̱ ña̱ kúʼvi̱-inina xíninara chi kúni̱na nda̱kúní koo inina xíʼin Jehová. Kúni̱na nda̱kú koo inina nda̱a̱ táki̱ʼva ni̱xi̱yo u̱ni̱ na̱ hebreo na̱ ta̱anna nu̱ú xíxi ñuʼu̱ xa̱ʼa̱ ña̱ nda̱kú ni̱xi̱yo inina xíʼin Jehová ta̱ káʼnu. Ta̱ David xi̱kunda̱a̱-inira ña̱ ndáyáʼvi nda̱kú koo iniyó xíʼin Jehová. Ña̱yóʼo ka̱ʼyíra: “Jehová ndatiinra ku̱a̱chi xíʼin na̱ ñuu. Jehová, ndatiin ku̱a̱chi xíʼi̱n nda̱a̱ táki̱ʼva ke̱ʼíi̱, nda̱a̱ táki̱ʼva nda̱kú íyo inii̱ xíʼún” (Sal. 7:8). Tasaá ka̱chikara: “Ña̱ nda̱kú-inii̱ kundaaña yi̱ʼi̱” (Sal. 25:21). Ni nda̱a̱ ndáaka tu̱ndóʼo ná kixi nu̱úyó, ná chika̱a̱níyó ndee̱ ña̱ nda̱kú koo iniyó xíʼin Jehová, chi saá si̱íní kooyó. Tá ná keʼéyó saá, kundoʼoyó nda̱a̱ táki̱ʼva ndo̱ʼo iin ta̱ ka̱ʼyí salmo yóʼo: “Si̱íní íyo na̱ nda̱kú-ini, si̱íní íyo na̱ ndíku̱n ley Jehová” (Sal. 119:​1, nota). w22.10 17 párr. 18, 19

Ku̱a̱ʼání na̱ yiví na̱túʼun ta̱ Job xíʼin tá xi̱takura, ta sana na̱ndósóva-inira xa̱ʼa̱ ña̱ ni̱ka̱ʼa̱nra xíʼinna. Soo iin ña̱ va̱ása nínandósó-inira xa̱ʼa̱ kúú ña̱ na̱túʼunra xíʼin Jehová saáchi xi̱ndayáʼviní ña̱yóʼo nu̱úra. Ta̱ Job ni̱xa̱a̱ra ku̱ndaa̱-inira ña̱ mií Jehová táxira ndiʼi ña̱ʼa ña̱ xíniñúʼu tí kití ña̱ va̱ʼa kutakurí ta saátu chindeétáʼanra xíʼin ta̱ Job ña̱ kǒo kuma̱ní nda̱a̱ ni iin ña̱ʼa nu̱úra (Job 38:​39-41; 39:​1, 5, 13-16). Tá nda̱kanixi̱ní ta̱ Job xa̱ʼa̱ ndiʼi ña̱ʼa ña̱ i̱xava̱ʼa Jehová, chi̱ndeétáʼanña xíʼinra ña̱ kotora ndiʼi ña̱ va̱ʼa ña̱ kúúmií Jehová. Saátu miíyó kivi sakúaʼayó xa̱ʼa̱ Ndióxi̱ tá ná kotoyó ndiʼi ña̱ʼa ña̱ i̱xava̱ʼara. Soo sava yichi̱ íxayo̱ʼvi̱ña xíʼinyó ña̱ kotonde̱ʼéyó ndiʼi ña̱ʼa ña̱ i̱xava̱ʼa Jehová saáchi sana ndóoyó iin ñuu káʼnu nu̱ú kǒo ña̱yóʼo íyo. Ta savatu yichi̱ ni íyoyó iin lugar nu̱ú íyo ku̱a̱ʼání ña̱ʼa ña̱ i̱xava̱ʼa Jehová, sana ixayo̱ʼvi̱ña xíʼinyó kotoyó ña̱yóʼo chi sana kǒo tiempo kúúmiíyó. Xa̱ʼa̱ ña̱kán ndáyáʼviní taváyó tiempo ña̱ kotoyó ndiʼi ña̱ʼa ña̱ i̱xava̱ʼa Jehová. w23.03 15 párr. 1, 2

Ta̱ Jesús ni̱ka̱ʼa̱nra ña̱ tá kúma̱níka ndiʼi-xa̱ʼa̱ ñuyǐví yóʼo ndeéní ta̱an ta koo inkaka tu̱ndóʼo (Luc. 21:11). Ta saátu ni̱ka̱ʼa̱nra ña̱ kooní na̱ ndi̱va̱ʼa-ini ta xítoyó ña̱ xínu ña̱yóʼo, saáchi íyo ku̱a̱ʼání na̱ kéʼé ña̱ va̱ása va̱ʼa, kánitáʼanna ta xáʼnína na̱ yiví (Mat. 24:12). Ta ni̱ka̱ʼa̱ntura ña̱ nda̱a̱ na̱ ndásakáʼnu Ndióxi̱ xo̱ʼvi̱na. Tasaá kúuva tiempo vitin, chi xóʼvi̱nína íxaa tu̱ndóʼo (Is. 57:1; 2 Cor. 11:25). Sana va̱ása tavá túviví Jehová miíyó nu̱ú tu̱ndóʼo, soo taxivara ña̱ xíniñúʼuyó ña̱ va̱ʼa táxi̱n koo iniyó. Tá xa̱a̱ íyo tu̱ʼvayó tá ná koo iin tu̱ndóʼo, va̱ása ndi̱ʼiní-iniyó. Soo, ¿á ña̱yóʼo kúni̱ kachiña ña̱ va̱ása kándíxayó ña̱ kundaa Jehová miíyó? Va̱ása. Chi tá xa̱a̱ íyo tu̱ʼvayó tá kúma̱níka kuu iin tu̱ndóʼo saá náʼa̱yó ña̱ kándíxayó ña̱ kundaa Jehová miíyó. ¿Nda̱chun va̱ʼa káʼa̱nyó ña̱yóʼo? Saáchi Biblia káʼa̱nña xíʼinyó, ña̱ ná koo tu̱ʼvayó tá kúma̱níka kixi iin tu̱ndóʼo nu̱úyó. w22.12 18 párr. 9, 10

Tá ndíkaa̱ka ta̱ José veʼeka̱a, Jehová ta̱xira ña̱ ná xa̱ní ta̱ rey ña̱ ñuu Egipto u̱vi̱ xa̱ni ña̱ sa̱ndíʼiní-inira. Ta Jehová chi̱ndeétáʼanra xíʼin ta̱ José ña̱ ndakanira xa̱ʼa̱ xa̱ni kán, ta̱yóʼo va̱ása níndakani kuitíra xa̱ʼa̱ ña̱ kúni̱ kachi xa̱ni kán, chi saátu ni̱ka̱ʼa̱nra xíʼin ta̱ faraón xa̱ʼa̱ ña̱ xi̱niñúʼu keʼéra. Tasaá na̱kunda̱a̱-ini ta̱ faraón ña̱ mií Jehová xi̱chindeétáʼan xíʼin ta̱ José, ta xa̱ʼa̱ ña̱kán ta̱xira chiñu ndaʼa̱ ta̱ José ña̱ kiʼinra kuenta xíʼin ña̱ xi̱xixi na̱ ñuu Egipto (Gén. 41:​38, 41-44). Tá ni̱ya̱ʼa tiempo xi̱ndikaa̱ní so̱ko ñuu Egipto ta saátu ñuu Canaán nu̱ú xi̱ndoo na̱ veʼe ta̱ José. Ta xa̱ʼa̱ ña̱ xi̱kiʼin ta̱ José kuenta xíʼin ña̱ xi̱xixina, kiviva sakǎkura na̱ veʼera nu̱ú so̱ko, chi ti̱xin veʼe na̱yóʼo kúú nu̱ú kixi ta̱ koo Mesías. Jehová kúú ta̱ chi̱ndeétáʼan xíʼin ta̱ José ña̱ vií kana ndiʼi ña̱ xi̱keʼéra. Ta ni xi̱kuni na̱ ñani ta̱ José kaʼnínara, soo Jehová kǒo nítaxira ña̱ keʼéna ña̱yóʼo, chi Jehová xi̱niñúʼura ta̱ José ña̱ va̱ʼa saxínura ña̱ xi̱kuni̱ra. w23.01 16, 17 párr. 11, 12

Ná kiʼinníyó kuenta ndáa ña̱ʼa kúú ña̱ kivi sakúxíka miíyó nu̱ú Jehová ta ná kǒo keʼéyóña. Ta ña̱yóʼo chindeétáʼanña xíʼinyó ña̱ kǒo sandákoo Ndióxi̱ ña̱ kuʼvi̱-inira kunira miíyó (Prov. 22:3; Jud. 20, 21). Ta̱ apóstol Pablo ni̱ka̱ʼa̱nra xíʼin na̱ cristiano ña̱ xi̱niñúʼu kiʼinnína kuenta xíʼin miína. Ña̱yóʼo ni̱ka̱ʼa̱nra xíʼin na̱ ñuu Éfeso: “Kiʼinníndó kuenta ña̱ kǒo keʼéndó nda̱a̱ táki̱ʼva kéʼé na̱ kíʼvi, ta va̱ʼaka keʼéndó nda̱a̱ táki̱ʼva kéʼé na̱ yiví ndíchi” (Efes. 5:​15, 16). Ta̱ Ndi̱va̱ʼa ku̱a̱ʼání ña̱ʼa xíniñúʼura ña̱ sandákooyó ndasakáʼnuyó Ndióxi̱. Xa̱ʼa̱ ña̱kán, va̱ʼaní consejo táxira ndaʼa̱yó ña̱ chindeétáʼan xíʼinyó kundeé-iniyó ya̱ʼayó nu̱ú ndiʼi ña̱ chíndaʼá ta̱ Ndi̱va̱ʼa va̱xi nu̱úyó (Efes. 5:17). Ta ña̱ viíní koo ña̱ ndaka̱xinyó keʼéyó xíniñúʼu kaʼvi ni̱ʼiyó tu̱ʼun Ndióxi̱ ta ndakanixi̱níyó xa̱ʼa̱ña. Tá xáa̱yó kúnda̱a̱ káxi iniyó ndáaña kúú ña̱ kúni̱ Jehová ná keʼéyó ta ndakanixi̱níyó nda̱a̱ táki̱ʼva ndákanixi̱ní ta̱ Cristo, saá kúú ña̱ ndíchi kooyó (1 Cor. 2:​14-16). w23.02 16, 17 párr. 7-9

Tá kúma̱níka koún ti̱xin iin veʼe, viíní ndátiʼvíún ti̱xinña. Soo, ¿ndáaña kuu tá ná sandákoún ndatiʼvíún ti̱xinña? Xa̱ʼa̱ ña̱ ndeéní íyo ya̱a̱ á yáká, kamaní kuyaku̱a̱ ti̱xinña. Ña̱kán, ña̱ va̱ʼa limpio kooña, ndiʼi tiempo xíniñúʼu ndatiʼvíún iniña. Ki̱ʼva saá xíniñúʼu keʼéyó xíʼin ña̱ ndákanixi̱níyó xíʼin ki̱ʼva ña̱ íyoyó. Tá kúma̱níka ndakuchiyó, chi̱kaa̱níyó ndee̱ ña̱ sa̱ndákooyó keʼéyó sava ña̱ʼa, tá kúú, ña̱ xi̱ ixayaku̱a̱ ku̱ñuyó xíʼin ña̱ va̱ása va̱ʼa xi̱ndakanixi̱níyó (2 Cor. 7:1). Soo, vitin kúú ña̱ xíniñúʼu kundiku̱nyó consejo ña̱ ta̱xi ta̱ apóstol Pablo tá ka̱chira: “Kǒo sandákoondó ña̱ ndasaxa̱ándó ña̱ ndákanixi̱níndó” (Efes. 4:23). Tá ná va̱ása keʼéyó ña̱yóʼo, ña̱ yaku̱a̱ ña̱ íyo ñuyǐví yóʼo kamaní ki̱ʼviña xi̱níyó ta kixáʼayó ndakanixi̱níyó xa̱ʼa̱ña. Ña̱ va̱ʼa keʼéyó ña̱ kútóo Jehová xíniñúʼu ndiʼi tiempo kotoyó ndáa ki̱ʼva íyo ña̱ ndákanixi̱níyó, ndáa ki̱ʼva íyoyó ta saátu ndáaña kúni̱yó keʼéyó. w23.01 8 párr. 1, 2

¿Á xa̱a̱ ndákanixi̱níún ndáa ki̱ʼva kuniún tá níxiniso̱ʼún ña̱ xi̱sanáʼa̱ ta̱ Jesús? Ta̱ Jesús xi̱kuumiíra costumbre ña̱ ka̱ʼa̱nra xa̱ʼa̱ tu̱ʼun Ndióxi̱, ta ña̱ xi̱ka̱ʼa̱nra yóʼo nina xíʼin xi̱níra xi̱ka̱ʼa̱nraña. Tá nda̱kuchi ta̱ Jesús ta nda̱kiʼinra espíritu santo, nda̱kaʼánra ndáa ki̱ʼva ni̱xi̱yora chí ndiví tá kúma̱níka kixira nu̱ú ñuʼú yóʼo. Tá kúú, tá nda̱kuchira ni̱ka̱ʼa̱nra xa̱ʼa̱ ña̱ va̱xi nu̱ú Biblia ta saátu tá kúma̱ní kuvira ni̱ka̱ʼa̱nra xa̱ʼa̱ña (Deut. 8:3; Sal. 31:5; Luc. 4:4; 23:46). U̱ni̱ ku̱i̱ya̱ sava ña̱ ni̱xi̱kara na̱túʼunra xíʼin na̱ yiví, viíní xi̱kaʼvira tu̱ʼun Ndióxi̱ nu̱úna, xi̱ka̱ʼa̱nra xa̱ʼa̱ña ta viíní xi̱ndakanira xa̱ʼa̱ña (Mat. 5:​17, 18, 21, 22, 27, 28; Luc. 4:​16-20). Tá Jesús xi̱kuumiíra costumbre ña̱ kaʼvira tu̱ʼun Ndióxi̱ ta saátu xi̱xiniso̱ʼora tá xi̱kaʼvi inkanaña. Sana xi̱xiniso̱ʼora ñá María xíʼin ta̱ José ña̱ xi̱natúʼunna xa̱ʼa̱ tu̱ʼun Ndióxi̱ (Deut. 6:​6, 7). Xi̱xa̱ʼa̱nra ndiʼi sábado chí sinagoga xíʼin na̱ veʼera ta viíní xi̱xiniso̱ʼora tá xi̱kaʼvina tu̱ʼun Ndióxi̱ (Luc. 4:16). Tá ni̱ya̱ʼa tiempo ki̱xáʼa mií ta̱ Jesús káʼvira tu̱ʼun Ndióxi̱. w23.02 8 párr. 1, 2

Íyo ku̱a̱ʼání xa̱ʼa̱ kúú ña̱ xíniñúʼu kuʼvi̱-iniyó kuniyó Jehová. Chi miíra ta̱xi ña̱ tákuyó (Sal. 36:9; Sant. 1:17). Ta ndiʼi ña̱ va̱ʼa ña̱ kúúmiíyó miíra ta̱xiña ndaʼa̱yó chi va̱ʼaní-inira xíʼinyó ta kúʼvi̱ní-inira xínira miíyó. Jehová nda̱tavára miíyó ndaʼa̱ ku̱a̱chi ta ña̱yóʼo kúú iin regalo ña̱ ndáyáʼviní ta̱xira ndaʼa̱yó. Soo, ¿nda̱chun káʼa̱nyó ña̱ va̱ʼaní regalo yóʼo? Saáchi Jehová xíʼin ta̱ Jesús kúʼvi̱ní-inina xínitáʼanna. Mií ta̱ Jesús ni̱ka̱ʼa̱n ña̱yóʼo: “Kúʼvi̱-ini yivái̱ xínira yi̱ʼi̱” ta saátu yi̱ʼi̱ “kúʼvi̱-inii̱ xínii̱ yivái̱” (Juan 10:17; 14:31). Xa̱ʼa̱ ña̱ ku̱a̱ʼání tiempo ni̱xi̱yo ta̱ Jesús xíʼin Jehová chí ndiví ndixaní ni̱xa̱a̱na kúʼvi̱-inina xínitáʼanna (Prov. 8:​22, 23, 30). Ña̱kán, ku̱suchíní-ini Jehová tá xi̱nira ña̱ sa̱xóʼvi̱nína se̱ʼera ta xa̱ʼnínara. Soo xa̱ʼa̱ ña̱ kúʼvi̱ní-ini Jehová xínira yóʼó xíʼin ndiʼika na̱ yiví, ta̱xira ña̱ ni̱xi̱ʼi̱ se̱ʼera ña̱ va̱ʼa ndatavára yóʼó ndaʼa̱ ku̱a̱chi tasaá koún ndiʼi tiempo nu̱ú ñuʼú yóʼo (Juan 3:16; Gál. 2:20). Ña̱yóʼo kúú ña̱ chíndeétáʼanní xíʼinyó ña̱ kuʼvi̱níka-iniyó kuniyó Jehová. w23.03 5 párr. 11-13

Ná va̱ása kandíxayó ña̱ sánáʼa̱ na̱ apóstata. Ta̱ Jesús ni̱ka̱ʼa̱nra xíʼin na̱ cristiano na̱ Pérgamo ña̱ va̱ása va̱ʼa íyo ña̱ kéʼéna, saáchi ki̱xáʼana ndátaʼvína na̱ congregación ta ki̱xáʼana sánáʼa̱na ña̱ vatá (Apoc. 2:​14-16). Soo ni̱ka̱ʼa̱nra xíʼin na̱ cristiano na̱ Tiatira ña̱ va̱ʼaní íyo ña̱ kéʼéna, saáchi va̱ása níkandíxana “ña̱ vatá ña̱ sánáʼa̱ ta̱ Ndi̱va̱ʼa”, ta ni̱ka̱ʼa̱nra xíʼinna ña̱ ná ndakundeéna kundiku̱nna ña̱ nda̱a̱ (Apoc. 2:​24-26). Ná va̱ása kandíxayó ña̱ vatá ña̱ sánáʼa̱ na̱ apóstata. Chi na̱yóʼo “náʼa̱na ña̱ kúúna na̱ yiví na̱ ndásakáʼnu Ndióxi̱, soo xíʼin ña̱ kéʼéna na̱ʼa̱na ña̱ su̱ví ña̱ ndixa kúúña” (2 Tim. 3:5). Tá vií káʼviyó tu̱ʼun Ndióxi̱ va̱ása ixayo̱ʼvi̱ña xíʼinyó ndakuniyó ña̱ vatá ña̱ sánáʼa̱na ta va̱ása kandíxayóña (2 Tim. 3:​14-17; Jud. 3, 4). Ná kiʼinyó kuenta xíʼin ki̱ʼva ña̱ ndásakáʼnuyó Jehová, ña̱ va̱ʼa sakúsi̱íyó-inira. Ña̱kán, tá íyo iin ña̱ va̱ása va̱ʼa kéʼéyó ná chika̱a̱yó ndee̱ ña̱ va̱ása keʼékayóña (Apoc. 2:​5, 16; 3:​3, 16). w22.05 4 párr. 9; 5 párr. 11