Septiembre

Tá viíní íyo tu̱ʼun ña̱ káʼa̱nyó, inka na̱ yiví kiʼinna kuenta ña̱ síín íyo miíyó na̱ ndásakáʼnu Ndióxi̱ nu̱ú na̱ va̱ása ndásakáʼnu-ñaʼá (Mal. 3:18). Ña̱yóʼo kúni̱ kachiña ña̱ kunda̱a̱-inina ña̱ ndásakáʼnuyó Jehová. Ná kotoyó ña̱ ndo̱ʼo iin ñá hermana ñá naní Kimberly. Tá ke̱ʼéñá tarea xíʼin iin ñá káʼvi xíʼinñá, ñá káʼvi xíʼinñá ki̱ʼinñá kuenta ña̱ síínva íyoñá. Saáchi va̱ása níxi̱ka̱ʼa̱nñá ña̱ va̱ása va̱ʼa xa̱ʼa̱ inkana, to̱ʼóní ni̱xi̱yo iniñá ta va̱ása níxi̱ka̱ʼa̱nñá tu̱ʼun kini. Ñá xi̱kaʼvi xíʼinñá xi̱kuni̱ñá kunda̱a̱-iniñá nda̱chun síín íyo ñá Kimberly, ta tá ni̱ya̱ʼa tiempo ki̱xáʼañá káʼviñá xíʼinñá xa̱ʼa̱ Ndióxi̱. Kúsi̱íní-ini Jehová tá kíxáʼa na̱ yiví sákuaʼana xa̱ʼa̱ra, chi kíʼinna kuenta ña̱ viíní íyo tu̱ʼun ña̱ káʼa̱nyó. Ndiʼiyó kúni̱yó ndasakáʼnuyó Jehová xíʼin tu̱ʼun ña̱ káʼa̱nyó. w22.04 5, 6 párr. 5-7

Ñá María Magdalena xi̱xoʼvi̱níña chi xi̱ñuʼu u̱xa̱ na̱ ta̱chí ndi̱va̱ʼa iniñá ta sa̱ndáʼa ta̱ Jesús miíñá. Sana ta̱xiníñá tíxa̱ʼvi ndaʼa̱ra. Xa̱ʼa̱ ña̱kán nda̱kundiku̱nñá sa̱tára ta chi̱ndeétáʼanñá xíʼinra (Luc. 8:​1-3). Ni chi̱ndayáʼviníva ñá María ña̱ ke̱ʼé ta̱ Jesús xa̱ʼa̱ñá, soo sana va̱ása níxi̱kunda̱a̱-iniñá ña̱ keʼé ta̱ Jesús. Chi kuvira xa̱ʼa̱ na̱ yiví ta “ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:16). Ta iin ki̱ʼva ña̱ ni̱na̱ʼa̱ ñá María ña̱ táxiñá tíxa̱ʼvi xa̱ʼa̱ ña̱ ke̱ʼé ta̱ Jesús xa̱ʼa̱ñá kúú ña̱ nda̱kú ni̱xi̱yo-iniñá xíʼinra. Tá xi̱tikaa ta̱ Jesús ndaʼa̱ yitu̱n, ñá María ki̱ndooñá yatin kán ña̱ va̱ʼa chindeétáʼanñá xíʼinra ta saátu xíʼin inkaka na̱ xi̱ndita kán (Juan 19:25). Ta saátu ñá María xíʼin inkaka ná ñaʼá ni̱xa̱ʼa̱nná xíʼin aceite tá xáʼa̱n támi ña̱ va̱ʼa chika̱a̱nárá kuñu̱ ta̱ Jesús tá xa̱a̱ ni̱xi̱ʼi̱ra (Mar. 16:​1, 2). Sana ku̱si̱íní-iniñá tá xi̱niñá ta̱ Jesús ña̱ nda̱takura. Va̱ʼaníva ke̱eñá chi loʼoníva na̱ discípulo ki̱ta ta̱ Jesús nu̱ú tá nda̱takura (Juan 20:​11-18). w23.01 27 párr. 4

Sana va̱ása kívika keʼéyó táʼan ña̱ xi̱keʼéyó tá ya̱chi̱, soo ndiʼi tiempo ná kachíñuyó nu̱ú Jehová (1 Cor. 15:58; Mat. 24:13; Mar. 13:33). Ná kusi̱í-iniyó ndasakáʼnuyó Jehová. Ña̱ ni̱ka̱ʼa̱n ta̱ Jesús xíʼin na̱ congregación ña̱ Laodicea ni̱na̱ʼa̱ña ña̱ xa̱a̱ síín íyo ña̱ xi̱keʼéna. Saáchi ni̱ka̱ʼa̱nra xíʼinna ña̱ nda̱a̱ táki̱ʼva íyo ti̱kui̱í tá ni̱ndi̱ko á tá vi̱si̱n saá íyona, ña̱yóʼo kúni̱ kachiña ña̱ va̱ása níxi̱kusi̱íka-inina ndasakáʼnuna Jehová. Ta nda̱a̱ ni̱ka̱ʼa̱n ta̱ Jesús xíʼinna ña̱ ndáʼvinína. Ña̱kán xi̱niñúʼu chika̱a̱na ndee̱ ña̱ ndikó tukuna kusi̱í-inina ndasakáʼnuna Jehová (Apoc. 3:​16, 17, 19). ¿Ndáaña sákuaʼayó xíʼin ña̱yóʼo? Tá va̱ása kúsi̱íka-iniyó ndásakáʼnuyó Jehová nda̱a̱ táki̱ʼva xi̱kusi̱í-iniyó tá ya̱chi̱, ná chika̱a̱yó ndee̱ ña̱ chindayáʼvikayó ña̱ táxi Jehová ndaʼa̱yó xíʼin ña̱ táxi na̱ ñuura (Apoc. 3:18). Su̱ví ña̱ kuumiíyó ku̱a̱ʼání ña̱ʼa kúú ña̱ xíniñúʼu kundayáʼvika nu̱úyó, saáchi ña̱ xíniñúʼu kundayáʼvika nu̱úyó kúú ña̱ ndakundeéyó ndasakáʼnuyó Jehová. w22.05 3, 4 párr. 7, 8

Xa̱a̱ íyo ku̱a̱ʼání tiempo Jehová káʼyíra ki̱vi̱ na̱ yiví nu̱ú iin libro ña̱ ndáyáʼviní. Ta ta̱ siʼna va̱xi ki̱vi̱ nu̱ú libro yóʼo kúú ta̱ Abel, ta̱ nda̱kúní ni̱xi̱yo ini xíʼin Ndióxi̱ (Luc. 11:​50, 51). Nu̱ú tu̱ʼun Ndióxi̱, ña̱ libro yóʼo naníña: “libro nu̱ú ndakaʼánra xa̱ʼa̱ na̱ íxato̱ʼó-ñaʼá”, “libro nu̱ú va̱xi ki̱vi̱ na̱ kutaku”. Nu̱ú artículo yóʼo kunaníña “libro nu̱ú va̱xi ki̱vi̱ na̱ kutaku” (Mal. 3:16; Apoc. 3:5; 17:8). Nu̱ú libro ña̱ ndáyáʼviní yóʼo va̱xi ki̱vi̱ ndiʼi na̱ ndásakáʼnu Jehová, na̱ íxato̱ʼó-ñaʼá xíʼin na̱ kúʼvi̱-ini xíni ki̱vi̱ra. Na̱yóʼo ndátuna ndakiʼinna ña̱ kutakuna ndiʼi tiempo, kúúna na̱ ku̱ʼu̱n chí ndiví á na̱ kundoo nu̱ú ñuʼú yóʼo. Kivi kixi ki̱vi̱yó nu̱ú libro yóʼo tá chíka̱a̱níyó ndee̱ ña̱ viíní kutáʼanyó xíʼin Jehová, ta kivi xa̱a̱yó kutáʼanyó xíʼinra xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó (Juan 3:​16, 36). ¿Á su̱ví ndiʼiyó kúni̱ ña̱ ná kixi ki̱vi̱yó nu̱ú libro yóʼo? w22.09 14 párr. 1, 2

Libro ña̱ Apocalipsis káʼa̱ntuña xa̱ʼa̱ “iin dragón tí káʼnuní tí color kúáʼa ñuʼu̱” (Apoc. 12:3). Tí dragón kánitáʼanrí xíʼin ta̱ Jesús ta saátu xíʼin na̱ ángel na̱ kítáʼan xíʼinra (Apoc. 12:​7-9). Ta saátu íxandi̱va̱ʼarí xíʼin na̱ ñuu Ndióxi̱ ta táxirí ndee̱ ndaʼa̱ kití yukú tí ndána̱ʼa̱ na̱ chíñu (Apoc. 12:17; 13:4). ¿Ndáana ndána̱ʼa̱ tí dragón yóʼo? Tíyóʼo kúú ko̱o̱ tí nu̱ú, tí naní Diablo xíʼin Satanás (Apoc. 12:​9, 20:2). Ta ta̱yóʼo kúú ta̱ chíka̱a̱-ini inka na̱ yiví ña̱ ku̱ʼu̱nna contra Jehová. ¿Ndáaña kundoʼo tí dragón? Apocalipsis 20:​1-3 káʼa̱nña xa̱ʼa̱ iin ángel ña̱ sakánara ta̱ Ndi̱va̱ʼa ini iin ya̱vi̱ naá ta nda̱a̱ táki̱ʼva koo veʼeka̱a saá koo ña̱yóʼo nu̱úra. Ta 1,000 ku̱i̱ya̱ ndasira kundika̱a̱ra yóʼo, tasaá va̱ása ndikókara sandáʼvira na̱ yiví nda̱a̱ ná ya̱ʼa ndiʼi ku̱i̱ya̱ yóʼo. Tándi̱ʼi, sakánana ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra “nu̱ú ñúʼu ñuʼu̱ ña̱ xíxi̱ xíʼin azufre”. Ña̱yóʼo kúni̱ kachiña ña̱ ndiʼi-xa̱ʼa̱ va̱ʼana. Ña̱kán, kusi̱íní-iniyó saáchi va̱ása kooka ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra. w22.05 14 párr. 19, 20

Va̱ʼaní xi̱kachíñu ta̱ Jesús. Tá ni̱xi̱yo loʼora carpintero xi̱kuura (Mar. 6:3). Ta xi̱kusi̱íníva-ini na̱ yivára xíʼinra xa̱ʼa̱ ña̱ va̱ʼaní xi̱chindeétáʼanra xíʼinna ña̱ kee xu̱ʼún kuniñúʼuna chi ku̱a̱ʼání xi̱kuuna. Ta saátu, xa̱ʼa̱ ña̱ kǒo ku̱a̱chi níxikuumiíra va̱ʼaní xi̱kana ndiʼi chiñu ña̱ xi̱keʼéra, ña̱kán ku̱a̱ʼáníva na̱ yiví xi̱xa̱ʼa̱n nu̱úra ña̱ ixava̱ʼara ña̱ kuniñúʼuna. Ta kivi ndakanixi̱níyó ña̱ xi̱kusi̱íníva-ini ta̱ Jesús xíʼin chiñu ña̱ xi̱keʼéra, soo va̱ása nítaxira ña̱ kindaa ña̱yóʼo ku̱a̱ʼání tiempo ndaʼa̱ra ña̱ va̱ʼa kachíñura nu̱ú Ndióxi̱ (Juan 7:15). Tá ki̱xáʼara nátúʼun ni̱ʼira xa̱ʼa̱ Ndióxi̱ ta̱xira consejo yóʼo: “Va̱ása kachíñundó xa̱ʼa̱ ña̱ kuxundó ta tándi̱ʼi ndiʼi-xa̱ʼa̱ña, va̱ʼaka kachíñundó xa̱ʼa̱ ña̱ kuxundó ña̱ taxi kutakundó ndiʼi tiempo” (Juan 6:27). Ta saátu ni̱ka̱ʼa̱nra ña̱yóʼo: “Kundiku̱nndó sa̱tá ña̱ ku̱i̱ká ña̱ íyo chí ndiví” (Mat. 6:20). Jehová chíndeétáʼanra xíʼinyó ña̱ su̱ví iinlá xa̱ʼa̱ chiñu miíyó kundi̱ʼi-iniyó xa̱ʼa̱. w22.05 22 párr. 9, 10

Ñá Eunice va̱ʼaní yichi̱ chi̱núuñá nu̱ú ta̱ Timoteo. Ta̱ Timoteo xi̱nira ña̱ ndiʼi ña̱ xi̱keʼé siʼíra xi̱keʼéñáña xa̱ʼa̱ ña̱ xi̱kuʼvi̱ní-iniñá xi̱xiniñá Jehová. Saátu xi̱nira ña̱ xi̱kusi̱íní-iniñá xi̱ndasakáʼnuñá Jehová. Ta saátu kéʼé ku̱a̱ʼání ná hermana tiempo vitin, chi xa̱a̱ chíndeétáʼanná xíʼin na̱ veʼená ña̱ xa̱a̱na ndasakáʼnuna Jehová xa̱ʼa̱ ña̱ va̱ʼaní yichi̱ chínúuná nu̱úna (1 Ped. 3:​1, 2). Ta saátu kuchiñu yóʼóva chindeétáʼún xíʼin na̱ veʼún. ¿Ndáa ki̱ʼva keʼúnña? Chindayáʼvi ña̱ kítáʼún xíʼin Jehová (Deut. 6:​5, 6). Nda̱a̱ táki̱ʼva kéʼé ku̱a̱ʼání ná hermana ná íyo se̱ʼe, saátu yóʼó sana sándakoún ña̱ kútóún keʼún ña̱ va̱ʼa kundaún na̱ va̱lí se̱ʼún. Sava yichi̱ kuniñúʼún tiempo, xu̱ʼún á ni va̱ása ndákindeún ña̱ va̱ʼa kundaúnna. Soo va̱ása taxiún ña̱ kasi ña̱yóʼo nu̱ún ña̱ viíní kutáʼún xíʼin Jehová. Tavá tiempo ña̱ ka̱ʼún xíʼinra, ña̱ kaʼviún tu̱ʼunra ta va̱ása ndakoún ña̱ ku̱ʼún reunión. Chi ña̱yóʼo chindeétáʼan xíʼún ña̱ viíní kutáʼún xíʼinra, ta va̱ʼaní yichi̱ chinúún nu̱ú na̱ veʼún ta saátu nu̱ú inka na̱ yiví. w22.04 16 párr. 1; 19 párr. 12, 13

Iinlá Jehová kúú ta̱ nda̱kúní ndátiin ku̱a̱chi, ña̱kán va̱ása xíniñúʼu kundi̱ʼi̱-iniyó ndáa ki̱ʼva ndatiinra ku̱a̱chi xíʼin inkana. Ta va̱ʼaní kúniyó tá kunda̱a̱-iniyó xa̱ʼa̱ ña̱yóʼo (Rom. 14:​10-12). Ña̱kán kivi kandíxayó ña̱ ndiʼi tiempo nda̱kúní ndatiin Jehová ku̱a̱chi xíʼin ndiʼina (Gén. 18:25). Chi Jehová kǒo kéʼéra ña̱ va̱ása va̱ʼa. Xa̱a̱ ndátuníyó ná kixaa̱ ki̱vi̱ ña̱ sandíʼi-xa̱ʼa̱ Jehová ndiʼi ña̱ sáxo̱ʼvi̱ miíyó xa̱ʼa̱ ña̱ kúúyó na̱ yiví ku̱a̱chi. Ta kúni̱níyó ná kixaa̱ ki̱vi̱ yóʼo chi saá kúú ña̱ va̱ása kusuchíka-iniyó (Sal. 72:​12-14; Apoc. 21:​3, 4). Ta va̱ása ndakaʼánkayó xa̱ʼa̱ ña̱yóʼo. Ña̱kán nani ndátuyó ná kixaa̱ ki̱vi̱ yóʼo ná kusi̱íní-iniyó xa̱ʼa̱ ña̱ va̱ʼaní chínúu Jehová yichi̱ nu̱úyó ña̱ ixakáʼnu-iniyó xa̱ʼa̱ inkana. w22.06 13 párr. 18, 19

Iin na̱ ndátiin ku̱a̱chi xíniñúʼu kuxini̱ va̱ʼana ndáaña káʼa̱n ley. ¿Ndáa inka ña̱ xíniñúʼu keʼé na̱ ndátiin ku̱a̱chi? Tá kúma̱níka ndatiinna ku̱a̱chi xíʼin iin na̱ yiví, siʼna xíniñúʼu nandukú va̱ʼana xa̱ʼa̱ ku̱a̱china. Ta va̱ʼaníva kéʼé Jehová ña̱yóʼo, ña̱kán kǒo nda̱a̱ ni iin na̱ ndátiin ku̱a̱chi nda̱a̱ táki̱ʼva ndátiin ta̱yóʼo ku̱a̱chi (Gén. 18:​20, 21; Sal. 90:8). Va̱ása ndátiinra ku̱a̱chi xa̱ʼa̱ ña̱ xítora á ña̱ xíniso̱ʼo kuitíra nda̱a̱ táki̱ʼva kéʼé na̱ yiví. Chi kúnda̱a̱-inira xíʼin ki̱ʼva ña̱ ku̱va̱ʼayó, ki̱ʼva ña̱ xa̱ʼnuyó, ta saátu xíʼin ndiʼi ña̱ ndóʼoyó. Saátu kúnda̱a̱-inira ndáaña ndíka̱a̱ níma̱yó, ña̱yóʼo kúni̱ kachiña ña̱ kúnda̱a̱-inira ndáaña kúni̱yó keʼéyó, ndáaña chíndaʼá miíyó ña̱ keʼéyóña ta ndáaña kúni̱yó ndakiʼinyó xíʼinña. Kǒo nda̱a̱ ni iin ña̱ʼa íyo se̱ʼé nu̱úra saáchi ndiʼiña xítora (Heb. 4:13). Ña̱kán tá íxakáʼnu-ini Jehová xa̱ʼa̱ iin na̱ ke̱ʼé ña̱ va̱ása va̱ʼa, kéʼéraña saáchi kúnda̱a̱-inira xa̱ʼa̱ ndiʼi ña̱ ku̱u. w22.06 4 párr. 8, 9

Xíniñúʼu kiʼinníyó kuenta ndáaña xi̱niñúʼu ta̱ Ndi̱va̱ʼa ña̱ sa̱xóʼvi̱ra ta̱ Job, saáchi ña̱kán kúú ña̱ xíniñúʼutura vitin ña̱ saxóʼvi̱ra miíyó. Ta̱ Ndi̱va̱ʼa káʼa̱nra ña̱ va̱ása ndixa kúʼvi̱-iniyó xíniyó Jehová chi tá ná kixi iin tu̱ndóʼo nu̱úyó sandákoovayóra. Saátu káʼa̱nra ña̱ va̱ása kúʼvi̱-ini Jehová xínira miíyó ta va̱ása chíndayáʼvira ndiʼi ña̱ kéʼéyó ña̱ sakúsi̱íyó-inira. Soo, va̱ása kuchiñu ta̱ Ndi̱va̱ʼa sandáʼvira miíyó saáchi xa̱a̱ xíni̱vayó ndáaña xíniñúʼura. Tá ná kixi iin tu̱ndóʼo nu̱úyó, xíniñúʼu kotoyó ndáaña kúú ña̱ íxayo̱ʼvi̱ka xíʼinyó. Tá ni̱ya̱ʼa ta̱ Job nu̱ú tu̱ndóʼo, ki̱ʼinra kuenta ña̱ íyo sava ña̱ xíniñúʼu nasamara. Tá kúú, xi̱niñúʼu vitáka koo inira (Job 42:3). Saátu miíyó, tá yáʼayó nu̱ú tu̱ndóʼo kivi kotoyó ndáaña íxayo̱ʼvi̱ka xíʼinyó. w22.06 23 párr. 13, 14

Jehová káʼa̱nra ña̱ chindeétáʼanra xíʼinyó. Tá kúú, tá kúma̱níka ka̱ʼa̱nra “ndóʼó kúúndó testigoi̱”, ña̱yóʼo ni̱ka̱ʼa̱nra: “Tá ná ya̱ʼún nu̱ú ti̱kui̱í, yi̱ʼi̱ koi̱ xíʼún; tá ná ya̱ʼún nu̱ú yu̱ta va̱ása sa̱ʼviún ti̱xinrá. Tá ná ya̱ʼún nu̱ú ñuʼu̱ va̱ása kokoún” (Is. 43:2). Sava yichi̱ tá nátúʼunyó xa̱ʼa̱ Ndióxi̱ íyo sava ña̱ sási nu̱úyó ña̱ íyo nda̱a̱ táki̱ʼva íyo yu̱ta ta saátu yáʼayó nu̱ú tu̱ndóʼo ña̱ íyo nda̱a̱ táki̱ʼva íyo ñuʼu̱. Soo mií Jehová chíndeétáʼan xíʼinyó ña̱ kǒo sandákooyó ña̱ natúʼunyó xa̱ʼa̱ra (Is. 41:13). Ku̱a̱ʼání na̱ yiví va̱ása kútóona kuniso̱ʼona ña̱ nátúʼunyó. Soo su̱ví ña̱yóʼo kúni̱ kachiña ña̱ va̱ása kúchiñuyó natúʼunyó xa̱ʼa̱ Ndióxi̱. Sándi̱koníña-iniyó ta chíka̱a̱níña ndee̱ xíʼinyó xa̱ʼa̱ ña̱ kúnda̱a̱-iniyó ña̱ kúsi̱íní-ini Jehová tá nátúʼunyó xa̱ʼa̱ra. Ta̱ apóstol Pablo ka̱chira: “Ndióxi̱ taxira ña̱ va̱ʼa ndaʼa̱ iin iinna xa̱ʼa̱ chiñu ña̱ ke̱ʼévana” (1 Cor. 3:8; 4:​1, 2). w22.11 4 párr. 5, 6

Kúnda̱a̱ káxi iniyó ña̱ xínu profecía yóʼo tiempo vitin, saáchi ndiʼi na̱ yiví na̱ káʼa̱n inka tu̱ʼun ki̱xáʼana sákuaʼana xa̱ʼa̱ ña̱ nda̱a̱ ña̱ va̱xi nu̱ú Biblia (Zac. 8:23; Sof. 3:9). Tiempo vitin, xa̱a̱ yáʼaka 8 millón na̱ yiví na̱ íyo nu̱ú 240 país xíʼin ñuu válí ndásakáʼnuna Jehová. Ta ndiʼi ku̱i̱ya̱ ku̱a̱ʼání na̱ yiví ndákuchina, ta iin ña̱ va̱ʼaní kúú ña̱yóʼo, soo iin ña̱ ndáyáʼviníka kúú ña̱ násamana ña̱ kéʼéna ta kíxáʼana kéʼéna ña̱ va̱ʼa (Col. 3:​8-10). Ku̱a̱ʼání na̱yóʼo va̱ása kéʼékana ku̱a̱chi kini, va̱ása kánitáʼankana, kǒo káʼa̱nna ña̱ va̱ása va̱ʼa xa̱ʼa̱ inkana ta va̱ása káʼa̱nna ña̱ ndáyáʼvika ñuuna nu̱ú inkana. Xa̱a̱ ku̱a̱ʼa̱n xínu profecía ña̱ káʼa̱n Isaías 2:​4, ña̱ kǒoka guerra koo. Ña̱kán xa̱ʼa̱ ña̱ chíka̱a̱níyó ndee̱ ña̱ nasamayó ki̱ʼva ña̱ kéʼéyó, chíndeétáʼanyó xíʼin na̱ yiví ña̱ kuni̱na kuyatinna nu̱ú na̱ ñuu Ndióxi̱ tasaá náʼa̱yó ña̱ ndíku̱nyó ta̱ Jesucristo ta̱ níʼi yichi̱ nu̱úyó (Juan 13:35). Ta va̱ʼa kéʼéyó ndiʼi ña̱yóʼo chi ta̱ Jesús kúú ta̱ chíndeétáʼan xíʼinyó w22.07 9 párr. 7, 8

Tá káʼa̱nyó xíʼin Jehová, xíʼin ña̱ to̱ʼó ná keʼéyóña. Ná ndakanixi̱níyó xa̱ʼa̱ visión ña̱ xi̱ni ta̱ Isaías, ta̱ Ezequiel, ta̱ Daniel xíʼin ta̱ Juan. Ndiʼiña káʼa̱nña xa̱ʼa̱ Jehová ña̱ kúúra iin Rey ta̱ káʼnuní. Ta̱ Isaías xi̱nira Jehová ña̱ íyora nu̱ú iin trono tú súkunní (Is. 6:​1-3). Ta̱ Ezequiel xi̱nira ña̱ íyo Jehová nu̱ú carrora tú íyo chí ndiví, ta nu̱ú íyora ndeéní yéʼe̱ña ta nda̱a̱ táki̱ʼva íyo iin arcoíris saá káaña (Ezeq. 1:​26-28). Ta̱ Daniel xi̱nira iin ta̱ xi̱ku̱a̱ʼa̱ ta̱ xa̱a̱ íyo ku̱a̱ʼání tiempo, ta ndíxira ti̱ko̱to̱ yaa ta íyora nu̱ú trono nu̱ú kée ñuʼu̱ (Dan. 7:​9, 10). Ta̱ Juan xi̱nira Jehová ña̱ íyora nu̱ú iin trono, “ta iníísaá nu̱ú níndúʼura xi̱ndika̱a̱ iin arcoíris, tí náʼa̱ nda̱a̱ táki̱ʼva náʼa̱ yu̱u̱ livi ña̱ naní esmeralda” (Apoc. 4:​2-4). Tá ndákanixi̱níyó xa̱ʼa̱ ña̱ káʼnuní Jehová, sándakaʼánña miíyó ña̱ iin ña̱ ndáyáʼviní kúú ña̱ káʼa̱nyó xíʼinra, ta xa̱ʼa̱ ña̱yóʼo xíniñúʼu to̱ʼóní ka̱ʼa̱nyó xíʼinra. w22.07 20 párr. 3

Ta̱ Ndi̱va̱ʼa kǒo táxira ña̱ ndasakáʼnu na̱ va̱lí Ndióxi̱. Ta iin ña̱ xíniñúʼuníra kúú ña̱ ná kaka-inina. Ña̱ kúni̱ra kúú ña̱ ná ndakoún ña̱ kandíxaún ña̱ va̱xi nu̱ú tu̱ʼun Ndióxi̱. Tá kúú, sana iin na̱ yiví ka̱ʼa̱nna xíʼún xa̱ʼa̱ ña̱ evolución, ña̱ su̱ví Ndióxi̱ kúú ta̱ ní ixava̱ʼa miíyó. Sana na̱ maestro kixáʼana sánáʼa̱na yóʼó xa̱ʼa̱ ña̱ evolución ti̱xin escuela. Ta sana kivi ndakanixi̱níún ña̱ ndixava kúú ña̱ sánáʼa̱na. Soo kiʼin va̱ʼún kuenta, chi sana na̱ maestro va̱ása kúnda̱a̱ví-inina á íyo iin ta̱ i̱xava̱ʼa miíyó chi va̱ása nándukúna xa̱ʼa̱ ña̱yóʼo. Ndakaʼán ña̱ káʼa̱n Proverbios 18:17: “Na̱ siʼna kíxaa̱ táxi ku̱a̱chi, náʼa̱ ña̱ káʼa̱nna ña̱ nda̱a̱. Soo tá kíxáʼa káʼa̱n inka na̱ táxi ku̱a̱chi yóʼo, kíxáʼana kéʼéna pregunta xíʼin na̱ siʼna ta̱xi ku̱a̱chi ña̱ va̱ʼa kita mií ña̱ nda̱a̱”. ¿Ndáaña kivi sákuaʼún xíʼin texto yóʼo? Va̱ása kandíxaún ndiʼi ña̱ sákuaʼún ti̱xin escuela. Ta iin ña̱ chindeétáʼan xíʼún kúú ña̱ kaʼviún tu̱ʼun Ndióxi̱, ta saátu kaʼviún tutu ña̱ tává na̱ ñuura. w22.08 2 párr. 2; 4 párr. 8

Xíniñúʼu kunda̱a̱ va̱ʼa iniyó xíʼin ña̱ káʼviyó nu̱ú Biblia, chi tá va̱ása kúnda̱a̱-iniyó xíʼinña va̱ása kivi chindeétáʼanña xíʼinyó. Ná ndakanixi̱níyó xa̱ʼa̱ ña̱ na̱túʼun ta̱ Jesús xíʼin “iin ta̱a ta̱ xíni va̱ʼa xa̱ʼa̱ ley” (Luc. 10:​25-29). Ta̱ ta̱a kán xi̱kuni̱ra kunda̱a̱-inira ndáaña kivi keʼéra ña̱ va̱ʼa ni̱ʼira ña̱ kutakura ndiʼi tiempo, soo ta̱ Jesús ni̱ka̱ʼa̱nra xíʼinra: “¿Ndáaña káchi ña̱ va̱xi nu̱ú Ley? Ta, ¿ndáaña kúnda̱a̱-iniún xíʼin ña̱ káʼviún?”. Ta̱yóʼo va̱ʼaní nda̱kuiinra yuʼú ta̱ Jesús, saáchi xi̱niñúʼura tu̱ʼun Ndióxi̱, ta ni̱ka̱ʼa̱nra ña̱ xíniñúʼu kuʼvi̱-iniyó kuniyó Ndióxi̱ ta saátu na̱ yiví (Lev. 19:18; Deut. 6:5). Soo tándi̱ʼi, ni̱nda̱ka̱tu̱ʼunra ta̱ Jesús: “¿Ndáana kúú na̱ xíniñúʼu kuʼvi̱-inii̱ kunii̱?”. Xíʼin ña̱yóʼo ni̱na̱ʼa̱ra ña̱ va̱ása kúnda̱a̱-inira xíʼin ña̱ káʼvira, xa̱ʼa̱ ña̱kán va̱ása níxi̱xini̱ra ndáa ki̱ʼva keʼéra ña̱ káʼa̱n tu̱ʼun Ndióxi̱. Tá va̱ása káʼa̱nyó xíʼin Jehová ña̱ chindeétáʼanra xíʼinyó va̱ása kunda̱a̱-iniyó xíʼinña, ña̱kán ndáyáʼviní ndukúyó espíritu santo nu̱úra tá xa̱a̱ káʼviyó tu̱ʼunra. w23.02 9 párr. 4, 5

“¿Ndáa ki̱ʼva ni̱xa̱ún sa̱kúaʼún ña̱ nda̱a̱ xa̱ʼa̱ Ndióxi̱?”. Sana ku̱a̱ʼáníva yichi̱ xa̱a̱ nátúʼunyó xíʼin inkana xa̱ʼa̱ ña̱yóʼo. Tá sa̱kán xínitáʼanyó xíʼin iin na̱ hermano saá kúú ña̱ ndáka̱tu̱ʼunna miíyó xa̱ʼa̱ ña̱yóʼo. Kútóoníyó kunda̱a̱-iniyó ndáa ki̱ʼva ni̱xa̱a̱ na̱ hermanoyó sa̱kúaʼana xa̱ʼa̱ Jehová. Saátu miíyó kútóoyó natúʼunyó xíʼinna ndáa ki̱ʼva ni̱xa̱a̱yó sa̱kúaʼayó ña̱ nda̱a̱ xa̱ʼa̱ra (Rom. 1:11). Ta tá nátúʼunyó xíʼinna xa̱ʼa̱ ña̱yóʼo, sándakaʼánña miíyó ña̱ xíniñúʼu chindayáʼviníyó ña̱ kúúyó testigo Jehová. Íyo ku̱a̱ʼáníva xa̱ʼa̱ kúú ña̱ kúʼvi̱-iniyó xíniyó ña̱ nda̱a̱ ña̱ sa̱kúaʼayó xa̱ʼa̱ Ndióxi̱. Ta ña̱ ndáyáʼvi va̱ʼa kúú ña̱ ni̱xa̱a̱yó kúʼvi̱-iniyó xíniyóra, chi ta̱yóʼo kúú ta̱ sánáʼa̱ ndiʼi ña̱ nda̱a̱. Nu̱ú tu̱ʼunra sa̱kúaʼayó ña̱ kúúra iin Ndióxi̱ ta̱ kúúmií ndiʼi ndee̱, ta i̱xava̱ʼara ndiví xíʼin ñuʼú yóʼo. Ta kúúra yiváyó ta̱ íyo chí ndiví ta kúʼvi̱ní-inira xínira miíyó ta ndíʼi̱-inira xa̱ʼa̱yó (1 Ped. 5:7). w22.08 14 párr. 1, 3

Ta̱ apóstol Pablo ni̱ka̱ʼa̱nra xíʼin na̱ hermano ña̱ ná chindeétáʼanna xíʼin inkana, tasaá na̱ʼa̱na ña̱ kúʼvi̱-inina xínina na̱yóʼo (Heb. 10:24). Ta̱ Pablo va̱ása níchika̱a̱ kuitíra ndee̱ xíʼin na̱ hermano, chi saátu chi̱ndeétáʼanra xíʼinna. Tá kúú, tándi̱ʼi ña̱ kuxu na̱ hermano ñuu Judea, ta̱ Pablo ni̱xa̱ʼa̱nra xíʼin ña̱ xi̱xina (Hech. 11:​27-30). Ni xi̱niñúʼu natúʼunra xíʼin na̱ yiví xa̱ʼa̱ Ndióxi̱, ta saátu sanáʼa̱rana, ndiʼi tiempo xi̱ndukúra ki̱ʼva ña̱ chindeétáʼanra xíʼin na̱ hermano na̱ ndá’vi. Xíʼin ña̱ ke̱ʼéra, xi̱chindeétáʼanra xíʼin na̱ hermano ña̱ kunda̱a̱-inina ña̱ ndiʼi tiempo kundaa Jehová miína. Saátu ná keʼéyó tiempo vitin, ná ndasandakúyó-ini na̱ hermanoyó, ná kuniñúʼuyó tiempoyó xíʼin ndee̱yó xíʼin ña̱ xíni̱yó keʼéyó ña̱ va̱ʼa chindeétáʼanyó xíʼinna nu̱ú kúu iin tu̱ndóʼo. Saátu chíndeétáʼanyó xíʼinna tá táxiyó donación, ña̱ kuniñúʼu na̱ ñuu Ndióxi̱ iníísaá ñuyǐví. Tá kéʼéyó ña̱yóʼo va̱ʼaní chindeétáʼanña xíʼin na̱ hermano ña̱ kandíxana ña̱ va̱ása ndakoo ndaʼa̱ Jehová miína. w22.08 24 párr. 14

Nu̱ú Biblia va̱xi ku̱a̱ʼání profecía ña̱ xa̱a̱ ni̱xi̱nu, ta savaña xa̱a̱ ku̱a̱ʼání tiempo ni̱ka̱ʼyi̱ña ta ndiʼi ña̱yóʼo ni̱xi̱nu nu̱úña, ta va̱ása ndákanda̱-iniyó xíʼin profecía yóʼo chi mií Jehová kúú ta̱ ni̱ka̱ʼa̱nña. Ná ndakanixi̱níyó ndáa ki̱ʼva ndi̱ʼi-xa̱ʼa̱ Babilonia tiempo xi̱naʼá. Tá siglo u̱na̱, Jehová ni̱ka̱ʼa̱nra xíʼin ta̱ profeta Isaías ná kaʼyíra ndáa ki̱ʼva ki̱ʼvina kanitáʼanna xíʼin na̱ ñuu Babilonia. Ta̱ profeta Isaías ka̱ʼyíra, ta̱ ki̱ʼvi kanitáʼan xíʼinna kunaníra Ciro ta saátu ka̱ʼyíra ndáa ki̱ʼva ki̱ʼvina ñuu yóʼo ña̱ kanitáʼanna xíʼinna (Is. 44:​27–45:2). Ta saátu ni̱ka̱ʼa̱nra ña̱ tá ná ya̱ʼa tiempo ndiʼi-xa̱ʼa̱ va̱ʼa ñuu yóʼo ta kǒoka na̱ yiví kundoo nu̱úña (Is. 13:​19, 20). Ni ñuu káʼnuní xi̱kuu ñuu Babilonia soo tá ku̱i̱ya̱ 539 tiempo xi̱naʼá ni̱ki̱ʼvi na̱ medo xíʼin na̱ persa ña̱ kanitáʼanna xíʼin na̱ ñuu yóʼo, tasaá ndi̱ʼi-xa̱ʼa̱ va̱ʼa ñuu yóʼo ta kǒokaña íyo tiempo vitin. w23.01 4 párr. 10

Va̱ʼaní ña̱ ta̱xi Jehová kuñuʼuyó ti̱xin ñuura. Ta xa̱ʼa̱ ña̱yóʼo ku̱a̱ʼání ña̱ va̱ʼa ndákiʼinyó (Mar. 10:​29, 30). Iníísaá ñuyǐví íyo na̱ hermano na̱ kúʼvi̱ní-ini xíni Jehová ta chíka̱a̱na ndee̱ ña̱ keʼéna ña̱ kúni̱ra. Sana va̱ása inkáchiví tu̱ʼun káʼa̱nyó, costumbre ña̱ kúúmiíyó xíʼin ki̱ʼva ña̱ ndíxiyó, soo tá xínitáʼanyó xíʼinna xáa̱yó kúʼvi̱ní-iniyó xíniyóna. Ta kúsi̱íní-iniyó ndásakáʼnuyó Jehová xíʼin na̱ hermanoyó, ta xíniñúʼu viíníka kutáʼanyó xíʼinna (Sal. 133:1). Sava yichi̱ na̱ hermanoyó chíndeétáʼanna xíʼinyó yáʼayó nu̱ú tu̱ndóʼo (Rom. 15:1; Gál. 6:2). Saátu chíndeétáʼanna xíʼinyó ña̱ ndakundeéyó kachíñuyó nu̱ú Jehová ta ndakú koo iniyó xíʼinra (Heb. 10:​23-25). Va̱ʼaní chíndeétáʼan na̱ hermanoyó xíʼinyó ña̱ vií kutáʼanyó xíʼin Ndióxi̱. w22.09 2, 3 párr. 3, 4

Iin ña̱ kivi ixayo̱ʼvi̱ xíʼinyó ña̱ ka̱ʼnu̱ iniyó kúú Internet. Saáchi tá va̱ása kíʼinyó kuenta ndáa ki̱ʼva xíniñúʼuyóña, kivi xaxáyó ña̱ va̱ása xíniñúʼu kunda̱a̱-inina xa̱ʼa̱. Saáchi tá xa̱a̱ xa̱xáyó ña̱yóʼo, va̱ása kivi kasiyó ndáa ki̱ʼva kuniñúʼu inkanaña ta saátu va̱ása kivi ndasaviíyó ña̱ ke̱ʼéyó. Ta saátu ña̱ ka̱ʼnu̱-iniyó chindeétáʼanña xíʼinyó ña̱ va̱ása natúʼunyó xa̱ʼa̱ na̱ hermanoyó xíʼin na̱ sáa̱-ini xíni miíyó. Ña̱yóʼo kivi kuuña tá ndáka̱tu̱ʼun na̱ policía miíyó xa̱ʼa̱ na̱ hermanoyó, ñuu nu̱ú va̱ása xíínna taxina ña̱ natúʼunyó xa̱ʼa̱ Ndióxi̱. Tá kúu ña̱yóʼo, consejo yóʼo kivi chindeétáʼanña xíʼinyó: “Ndakasii̱ yuʼíi̱ ña̱ va̱ása ka̱ʼi̱n ni iin ña̱ʼa” (Sal. 39:1). Ná na̱ʼa̱yó ña̱ kivi kandíxa inkana miíyó, tá kúú na̱ veʼeyó, na̱ migoyó, na̱ hermanoyó á nda̱a̱ ndáaka inka na̱ yiví. Xa̱ʼa̱ ña̱kán, ndáyáʼviní ka̱ʼnu̱-iniyó. w22.09 13 párr. 16

Ña̱ va̱ʼa si̱íní kooyó xíniñúʼu kaʼviyó tu̱ʼun Ndióxi̱ ta ndakanixi̱níyó xa̱ʼa̱ña. Na̱ yiví kúú na̱ xíniñúʼu kaʼvi tu̱ʼun Ndióxi̱ ta xíniñúʼuní keʼéyó ña̱yóʼo. Ta̱ Jesús ni̱ka̱ʼa̱nra ña̱yóʼo: “Su̱ví si̱táva̱ʼa kuití kúú ña̱ taxi kutaku na̱ yiví chi xíniñúʼu kuniso̱ʼona ndiʼi ña̱ káʼa̱n Jehová” (Mat. 4:4). Ña̱kán ná chika̱a̱níyó ndee̱ ña̱ kaʼviyó tu̱ʼun Ndióxi̱ ndiʼi ki̱vi̱. Xa̱ʼa̱ ña̱ kúʼvi̱ní-ini Jehová xínira miíyó xíniñúʼura tu̱ʼunra ña̱ Biblia ña̱ va̱ʼa ka̱ʼa̱nra xíʼinyó ndáaña xíniñúʼu keʼéyó ña̱ va̱ʼa si̱íní kooyó. Tá kúú káʼa̱nra xíʼinyó ndáa xa̱ʼa̱ kúú ña̱ i̱xava̱ʼara miíyó, ndáa ki̱ʼva kooyó migora á ndáaña xíniñúʼu keʼéyó ña̱ va̱ʼa ixakáʼnu-inira xa̱ʼa̱ ku̱a̱chiyó. Ta saátu káʼa̱nra xíʼinyó xa̱ʼa̱ ña̱ va̱ʼa ña̱ ndakiʼinyó chí nu̱únínu (Jer. 29:11). Tá íyoní tu̱ndóʼo nu̱úyó ta sándi̱ʼi̱níña-iniyó ná taváyó tiempo ña̱ kaʼviyó tu̱ʼun Ndióxi̱ ta ndakanixi̱níyó xa̱ʼa̱ña. w22.10 7 párr. 4-6

Ña̱ Biblia káʼa̱nña xíʼinyó ña̱ tá va̱ása xíni̱yó, ná chika̱a̱yó ndee̱ ña̱ ndukúyó ña̱ ndíchi ña̱ kúúmií Ndióxi̱. Tá ndíku̱nyó ña̱ káʼa̱n Biblia, saá kúú ña̱ xáa̱yó ndúuyó na̱ yiví ndíchi. Ta loʼo tá loʼo chíndeétáʼanña xíʼinyó ña̱ ndaka̱xin viíyó ña̱ keʼéyó. Iin ña̱ va̱ʼaní kúú ña̱ ná ndakanixi̱níyó ndáa ki̱ʼva xa̱a̱ ku̱a̱ʼa̱n xáʼnuyó xíʼin tu̱ʼun Ndióxi̱. Tá kúú, kivi ndakanixi̱níún xa̱ʼa̱ ña̱yóʼo, ¿á xa̱a̱ ku̱a̱ʼá tiempo sákuaʼi̱ xa̱ʼa̱ Ndióxi̱, ta xa̱a̱ ku̱a̱ʼá tiempo xáʼi̱n reunión?, ¿nda̱chun ta̱ʼán ndataxii̱ mií ndaʼa̱ Jehová ta ni ta̱ʼán ndakuchii̱? Tá xa̱a̱ nda̱kuchiún, kivi ndakanixi̱níún xa̱ʼa̱ ña̱yóʼo, ¿á chíka̱i̱ ndee̱ ña̱ viíka natúʼi̱n xíʼin na̱ yiví xa̱ʼa̱ Ndióxi̱ ta viíka sanáʼi̱na? ¿Á náʼa̱ ña̱ ndíku̱i̱n ña̱ káʼa̱n tu̱ʼun Ndióxi̱ xíʼin ña̱ ndáka̱xii̱n keʼíi̱? ¿Á vií kéʼíi̱ xíʼin na̱ yiví nda̱a̱ táki̱ʼva ke̱ʼé ta̱ Jesús? Tá xítoyó ña̱ kúma̱ní viíka keʼéyó sava ña̱ʼa, ná kuniso̱ʼoyó consejo ña̱ táxi Jehová chi “nda̱a̱ na̱ yiví na̱ kǒo xíni̱ va̱ʼa ndásandíchiñana” (Sal. 19:7). w22.10 20 párr. 8

Ta̱ Ezequiel xi̱nira ña̱ ku̱a̱ʼání ndee̱ kúúmií espíritu santo Ndióxi̱. Saáchi ti̱xin iin visión xi̱nira ndáa ki̱ʼva chíndeétáʼan espíritu santo xíʼin na̱ ángel ta saátu xi̱nira ndáa ki̱ʼva chíndeétáʼanña xíʼin carro mií Jehová tú íyo chí ndiví ña̱ va̱ʼa kánda̱ llantanú (Ezeq. 1:21). Ta miíra káʼa̱nra xíʼinyó ndáaña ndo̱ʼora: “Tá xi̱nii̱ña nda̱a̱ nu̱ú ñuʼú xi̱ku̱xítii̱”. Ta xa̱ʼa̱ ña̱ nda̱kanda̱ní-inira nda̱a̱ nu̱ú ñuʼú ndu̱vara (Ezeq. 1:28). Jehová ni̱ka̱ʼa̱nra xíʼin ta̱ Ezequiel: “Se̱ʼe ta̱a, ndakundichi ña̱ va̱ʼa ná ka̱ʼi̱n xíʼún”. Ña̱ ni̱ka̱ʼa̱n Jehová xíʼin ta̱ Ezequiel ta saátu ña̱ espíritu santo kúú ña̱ chi̱ndeétáʼan xíʼinra ña̱ va̱ʼa nda̱kundichira. Ta̱ Ezequiel ka̱chira: “Espíritu Ndióxi̱ ni̱ki̱ʼviña-inii̱ ta nda̱kundichii̱” (Ezeq. 2:​1, 2). Ta ndiʼi tiempo ña̱ ni̱xi̱kara na̱túʼunra xa̱ʼa̱ Ndióxi̱ espíritu santo kúú ña̱ xi̱niʼi yichi̱ nu̱úra (Ezeq. 3:22; 8:1; 33:22; 37:1; 40:1). w22.11 4 párr. 7, 8

Ta̱ profeta Isaías ni̱ka̱ʼa̱nra ña̱ nda̱a̱ táki̱ʼva íyo iin ta̱ sánáʼa̱ saá íyo Jehová ta ndíku̱nra ku̱a̱ʼa̱nra sa̱tá na̱ sánáʼa̱ra ta viíkaví xítora ndáa mií ku̱a̱ʼa̱nna, ta níʼira yichi̱ nu̱úna ña̱ va̱ʼa kunda̱a̱-inina ndáa mií xíniñúʼu ku̱ʼu̱nna. ¿Ndáa ki̱ʼva xíniso̱ʼoyó ña̱ káʼa̱n Jehová xíʼinyó tiempo vitin? Tá káʼviyó Biblia, ña̱kán tá káʼviyóña nda̱a̱ táki̱ʼva íyo na̱ xíniso̱ʼo ta̱chí mií Jehová ña̱ káʼa̱nra va̱xira sa̱táyó saá íyoña (Is. 51:4). ¿Ndáaña xíniñúʼu keʼéyó ña̱ viíní sakúaʼayó ndiʼi ña̱ sánáʼa̱ Jehová miíyó ti̱xin ñuura ta saátu nu̱ú tu̱ʼunra? Ta̱ Isaías ni̱ka̱ʼa̱nra xa̱ʼa̱ u̱vi̱ ña̱ʼa. Siʼna ni̱ka̱ʼa̱nra “Ña̱yóʼo kúú yichi̱”, tasaá ni̱ka̱ʼa̱nkara “Nu̱ú ña̱yóʼo ku̱ʼún”. Ña̱kán va̱ása xíniñúʼu kuxini̱ kuitíyó yichi̱ Ndióxi̱, chi xíniñúʼu kakayó nu̱úña. Ña̱ sákuaʼayó nu̱ú tu̱ʼun Ndióxi̱ xíʼin ña̱ sánáʼa̱ na̱ ñuura miíyó chíndeétáʼanña xíʼinyó kunda̱a̱-iniyó ndáaña kúni̱ Jehová ná keʼéyó ta ndáa ki̱ʼva keʼéyó ndiʼi ña̱ sánáʼa̱ra miíyó. w22.11 11 párr. 10, 11

Tá xa̱a̱ ni̱xi̱ʼi̱ ku̱a̱ʼání na̱ apóstol ta̱ Jesús, ki̱xáʼa ni̱ki̱ʼvi na̱ yiví na̱ sánáʼa̱ ña̱ vatá ti̱xin congregación (Mat. 13:​24-27, 37-39). Xi̱ka̱ʼa̱nna ña̱ va̱ása va̱ʼa, ta sa̱ndáʼvina na̱ discípulo ña̱ kundiku̱nna sa̱tána (Hech. 20:30). Iin ña̱ vatá ña̱ ki̱xáʼa sa̱náʼa̱na kúú; ña̱ su̱ví iinlá yichi̱ níxi̱ʼi̱ ta̱ Jesús xa̱ʼa̱yó, kǒo nísanáʼa̱na nda̱a̱ táki̱ʼva va̱xiña nu̱ú Biblia, saáchi xi̱ka̱ʼa̱nna ña̱ tuku ta tuku xíniñúʼu kuvi ta̱ Jesús xa̱ʼa̱yó (Heb. 9:​27, 28). Tiempo vitin ku̱a̱ʼání na̱ yiví na̱ ndixa kúni̱ sakúaʼa xa̱ʼa̱ Ndióxi̱ kándíxana ña̱ vatá ña̱ sánáʼa̱ na̱yóʼo, ta xa̱ʼa̱ ña̱yóʼo xáʼa̱nna ndiʼi semana á ndiʼi ki̱vi̱ veʼe-ñu̱ʼu ña̱ va̱ʼa keʼéna ña̱ káʼa̱nna xíʼin sacrificio de la misa ta saátu íyo religión nu̱ú loʼoní ndákaʼánna xa̱ʼa̱ ña̱ ni̱xi̱ʼi̱ ta̱ Jesús. w23.01 21 párr. 5

Ti̱xin ña̱ mil ku̱i̱ya̱, ta̱ Jesús sandátakura na̱ yiví na̱ ni̱xi̱ʼi̱ ta chindeétáʼanra xíʼin ndiʼi na̱ yiví na̱ va̱ʼaní xíniso̱ʼo ña̱ va̱ʼa ndoo ku̱a̱china. Na̱ yiví na̱ kéʼé ña̱ va̱ʼa nu̱ú Jehová na̱yóʼo kúú na̱ taxira koo nu̱ú ñuʼú “ta ndiʼi tiempo kundoona nu̱úña” (Sal. 37:​10, 11, 29). Tá ná ndiʼi, Jehová va̱ása taxikara kuviyó (1 Cor. 15:26). Xa̱ʼa̱ ña̱ kándíxayó ña̱ kooyó ndiʼi tiempo, ña̱yóʼo chíndeétáʼanña xíʼinyó ña̱ nda̱kú koo iniyó xíʼin Ndióxi̱ tiempo so̱ndíʼi ña̱ ndóoyó vitin. Soo tá kúni̱yó keʼéyó ña̱ kútóo Jehová xíniñúʼu nda̱kú koo iniyó xíʼinra ta saátu xíʼin ta̱ Jesús ta su̱ví xa̱ʼa̱ ña̱ kúni̱yó ka̱kuyó keʼéyó ña̱yóʼo chi xa̱ʼa̱ ña̱ kúʼvi̱-iniyó xíniyóna xíʼin ndiʼi níma̱yó kúúña (2 Cor. 5:​14, 15). Xa̱ʼa̱ ña̱ kúʼvi̱-iniyó xíniyóna ndíku̱nyó yichi̱na ta ña̱yóʼo kúútu ña̱ chíndeétáʼan xíʼinyó ña̱ kusi̱í-iniyó natúʼunyó xíʼin inkana xa̱ʼa̱ ña̱ ndátuyó ndakiʼinyó chí nu̱únínu (Rom. 10:​13-15). Ta saátu tá ná chika̱a̱kayó ndee̱ ña̱ va̱ʼa koo iniyó ta va̱ása sa̱a̱-iniyó kuniyó inkana, Jehová kuni̱ra koora migoyó ndiʼi tiempo. w22.12 6, 7 párr. 15, 16

Kivi kundi̱ʼi̱-iniyó ta ndakanixi̱níyó ndáaña kundoʼokayó, tá íxandi̱va̱ʼa na̱ chíñu xíʼinyó tá va̱ása táxikana ña̱ ndakutáʼanyó á ña̱ keeyó natúʼunyó xa̱ʼa̱ Ndióxi̱. Ta su̱ví ku̱a̱chiví kúú ña̱ ndakanixi̱níyó saá. Soo xíniñúʼu kiʼinníyó kuenta, chi tá íxandi̱va̱ʼana xíʼinyó kivi sandákooyó ña̱ kandíxayó Ndióxi̱ nda̱a̱ táki̱ʼva ni̱ka̱ʼa̱n ta̱ Jesús xíʼin na̱ discípulora (Juan 16:​1, 2). Ña̱ nda̱a̱ kúú ña̱ ni̱ka̱ʼa̱n ta̱ Jesús ña̱ ixandi̱va̱ʼana xíʼinyó, soo saátu ni̱ka̱ʼa̱nra ña̱ kiviva nda̱kú koo iniyó (Juan 15:20; 16:33). Tá va̱ása xíín na̱ chíñu taxina natúʼunyó xa̱ʼa̱ Ndióxi̱, sana na̱ sucursal á na̱ anciano kivi ka̱ʼa̱nna xíʼinyó ndáaña kivi keʼéyó ña̱ va̱ʼa kundaayó miíyó ña̱ ndakundeéyó sakúaʼayó xa̱ʼa̱ Jehová, ta saátu ña̱ ndakundeéyó natúʼunyó xa̱ʼa̱ra. Tá kúu ña̱yóʼo, ná kandíxayó ña̱ káʼa̱nna xíʼinyó (Sant. 3:17). Ta saátu ná va̱ása ka̱ʼa̱nyó xíʼin inkana xa̱ʼa̱ na̱ hermanoyó (Ecl. 3:7). w22.12 20, 21 párr. 14-16

Nda̱a̱ táki̱ʼva íyo ña̱ ni̱ka̱ʼa̱n ta̱ Jesús, nda̱a̱ tiempo vitin kíʼinra kuenta xíʼin na̱ discípulora ña̱ va̱ʼa natúʼunna xa̱ʼa̱ Reino Ndióxi̱ iníísaá ñuyǐví. Ti̱xin ñuu Jehová, ta̱ Jesús sánáʼa̱ra miíyó ndáa ki̱ʼva natúʼunyó xa̱ʼa̱ Reino Ndióxi̱. Ta táxira ndiʼi ña̱ xíniñúʼuyó ña̱ va̱ʼaní keʼéyó ndiʼi chiñu yóʼo (Mat. 28:​18-20). Ta chiñu ña̱ xíniñúʼu kundi̱ʼi̱ní-iniyó xa̱ʼa̱ tiempo vitin kúú ña̱ natúʼunyó xa̱ʼa̱ Ndióxi̱ ta sanáʼa̱yó na̱ yiví. Ta ná kiʼinníyó kuenta xíʼin ndiʼi ña̱ kéʼéyó nani ndátuyó ná kixaa̱ ki̱vi̱ káʼnu Jehová. Iin ña̱ chindeétáʼan xíʼinyó ña̱ ndakiʼinyó ña̱ káʼa̱n Jehová taxira ndaʼa̱yó chí nu̱únínu kúú ña̱ kuniso̱ʼoyó consejo ña̱ va̱xi nu̱ú Hebreos 6:​11, 12. Jehová xa̱a̱ nda̱kaxinra ama sandíʼi-xa̱ʼa̱ra ta̱ Ndi̱va̱ʼa. Tá ná kixaa̱ ki̱vi̱ kán saá kúú ña̱ saxínura profecía ña̱ va̱xi nu̱ú Biblia. Ni sava yichi̱ túviyó ña̱ kúáchi̱ní kixaa̱ ña̱yóʼo (Hab. 2:3). Soo ki̱vi̱ káʼnu Jehová va̱ása kuachi̱kaña, ña̱kán kúni̱yó keʼéyó ña̱ káʼa̱n Miqueas 7:7 ña̱ káchi: “Ndiʼi tiempo kundatui̱ Jehová. Kúee koo inii̱ ta kundatui̱ Ndióxi̱ ta̱ sakǎku yi̱ʼi̱”. w23.02 19 párr. 15, 16

Tá iin na̱ yiví íxava̱ʼana veʼe ña̱ kúni̱na kúú ña̱ sáxi̱nunaña, soo nani ndákundeéna kéʼénaña távána tiempo ña̱ kotona ndáaña xa̱a̱ ku̱a̱ʼa̱n kéʼéna. Ta ki̱ʼva saá xíniñúʼu keʼéyó, saáchi xíniñúʼu taváyó tiempo ña̱ kotoyó ndáa ki̱ʼva chíndeétáʼan Jehová xíʼinyó ña̱ kundeé-iniyó nu̱ú ña̱ íxayo̱ʼvi̱ xíʼinyó. Ta tándi̱ʼi, ná ndakanixi̱níyó xa̱ʼa̱ ña̱yóʼo: “¿Ndáa ña̱ va̱ʼa kúú ña̱ ta̱xi Jehová ndaʼíi̱ ki̱vi̱ vitin? Ni íyokava tu̱ndóʼo nu̱úi̱, ¿ndáaña kéʼéra ña̱ va̱ʼa chindeétáʼanra xíʼi̱n ña̱ kundeé-inii̱?”. Ndiʼi ki̱vi̱ ná kotoyó ndáaña va̱ʼa kúú ña̱ táxi Jehová ndaʼa̱yó. Iin ña̱ va̱ʼava kúú ña̱ ndukúyó nu̱ú Jehová ña̱ ná sakútaʼara iin tu̱ndóʼo ña̱ ku̱a̱yaʼayó nu̱ú (Filip. 4:6). Soo ná va̱ása nandósóyó xa̱ʼa̱ ña̱ va̱ʼa ña̱ táxira ndaʼa̱yó. Chi Jehová káʼa̱nvara taxira ndee̱ ndaʼa̱yó ta chindeétáʼanra xíʼinyó ña̱ kundeé-iniyó nu̱ú tu̱ndóʼo. Ña̱kán ná taxiyó tíxa̱ʼvi ndaʼa̱ra xa̱ʼa̱ ña̱ kéʼéra xa̱ʼa̱yó. Tásaá ná keʼéyó, kiʼinyó kuenta ña̱ chíndeétáʼan Jehová xíʼinyó ña̱ vií kana ña̱ kéʼéyó ni ku̱a̱yaʼayó nu̱ú tu̱ndóʼo (Gén. 41:​51, 52). w23.01 19 párr. 17, 18

Ná ndakanixi̱níyó xa̱ʼa̱ ña̱yóʼo: “¿Á náʼi̱ xíʼin ña̱ kéʼíi̱ ña̱ kándíxai̱ ña̱ xa̱a̱ ku̱yatinní kixaa̱ ki̱vi̱ káʼnu Jehová? Tá ndáka̱xii̱n ña̱ keʼíi̱ iin chiñu á ña̱ kaʼvi va̱ʼi̱, ¿á náʼa̱ ña̱yóʼo ña̱ ndáyáʼvika nu̱úi̱ kúú ña̱ kachíñui̱ nu̱ú Jehová? ¿Á kándíxai̱ ña̱ miíra kundaa yi̱ʼi̱ ta saátu na̱ veʼi̱ á ndiʼi tiempo ndíʼi̱-inii̱ xa̱ʼa̱ ña̱ kuumiíi̱ ku̱a̱ʼá ña̱ʼa?”. Kúsi̱íní-ini Jehová tá xítora ña̱ chíkaa̱níyó ndee̱ keʼéyó ña̱ kúni̱ra (Mat. 6: 25-27, 33; Filip. 4: 12, 13). Ndiʼi tiempo xíniñúʼu kotoyó ndáa ki̱ʼva íyo ña̱ ndákanixi̱níyó ta xíniñúʼu chikaa̱yó ndee̱ ña̱ nasamayó ña̱yóʼo. Ta̱ Pablo ta̱xira consejo ndaʼa̱ na̱ cristiano ña̱ ñuu Corinto: “Kiʼin va̱ʼandó kuenta xíʼin ña̱ kéʼéndó ña̱ va̱ʼa kunda̱a̱-inindó á ndixa kándíxandó Ndióxi̱. Na̱ʼa̱kandó xíʼin ña̱ kéʼéndó ndáa na̱ yiví kúúndó” (2 Cor. 13:5). Xa̱ʼa̱ ña̱kán xíniñúʼu ndakundeéyó nasamayó ña̱ ndákanixi̱níyó, ta iin ki̱ʼva ña̱ keʼéyó ña̱yóʼo kúú ña̱ kaʼviyó tu̱ʼun Ndióxi̱. Xíniñúʼu sakúaʼayó ndakanixi̱níyó nda̱a̱ táki̱ʼva ndákanixi̱níra, tasaá chikaa̱yó ndee̱ ña̱ nasamayó ndiʼi ña̱ kéʼéyó ña̱ va̱ʼa sakúsi̱íyó-inira (1 Cor. 2: 14-16). w23.01 9 párr. 5, 6