Octubre

Ti̱xin reunión ndiʼiyó kivi katayó ta kivi chika̱a̱yó ndee̱ ña̱ viíní koo comentario ña̱ taxiyó. Soo savayó íxayo̱ʼvi̱níña xíʼinyó katayó á taxiyó comentario ti̱xin reunión. ¿Á ndóʼún táʼan ña̱yóʼo? Tá saá ndóʼún, ndakanixiní ndáaña chíndeétáʼan xíʼin inkana ña̱ va̱ása yi̱ʼvíkana keʼéna ña̱yóʼo. Ndakaʼán chi tá xítayó xí’in ndi’i nímayó ti̱xin reunión saá kúú ña̱ ndásakáʼnuyó Jehová. Ña̱kán tá káʼviún ña̱ va̱ʼa ku̱ʼún reunión, kata yaa ña̱ katana kán. Ta koto ndáa ki̱ʼva kítáʼan yaa yóʼo xíʼin ña̱ ka̱ʼa̱nna ti̱xin reunión. Ña̱yóʼo chíndeétáʼanña xíʼún ña̱ kundi̱ʼika-iniún xa̱ʼa̱ ña̱ káʼa̱n yaa yóʼo ta su̱ví xa̱ʼa̱ ki̱ʼva ña̱ xítaún. Ku̱a̱ʼání na̱ hermano íxayo̱ʼvi̱níña xíʼinna taxina comentario ti̱xin reunión. Soo, ¿ndáaña chíndeétá’an xí’inna? Ña̱ ndi’i semana taxina comentario ti̱xin reunión. Ná ndaka’anyó ña̱ va̱ʼava kúú ña̱ loʼo ná koo comentario taxiyó soo káxi ná kooña, ta va̱ása yo̱ʼvi̱ ná kooña. Jehová kúsi̱íní-inira tá chíka̱a̱níyó ndee̱ ña̱ taxiyó comentario. w22.04 7, 8 párr. 12-15

Tu̱ʼun “chindeétáʼan” káʼa̱nña xa̱ʼa̱ iin na̱ yiví na̱ xínu ku̱a̱ʼa̱n chindeétáʼan xíʼin iin na̱ kána ña̱ ná chindeétáʼanna xíʼinna. Ná ndakanixi̱níyó ña̱ mií Jehová xínura ku̱a̱ʼa̱nra ña̱ chindeétáʼanra xíʼin na̱ ku̱a̱yaʼa nu̱ú tu̱ndóʼo ña̱ yo̱ʼvi̱ní. Xíʼin ña̱yóʼo kúnda̱a̱-iniyó ña̱ ndinuʼu-ini Jehová kúni̱ra chindeétáʼanra xíʼinyó. Xa̱ʼa̱ ña̱ kúnda̱a̱-iniyó ña̱ chíndeétáʼan Jehová xíʼinyó, kivi kusi̱í-iniyó tá ku̱a̱yaʼayó nu̱ú tu̱ndóʼo. ¿Ndáa ki̱ʼva chíndeétáʼan Jehová xíʼinyó? Nu̱ú libro ña̱ Isaías ndani̱ʼíyó ña̱ káʼa̱n xa̱ʼa̱ ña̱yóʼo. Saáchi ku̱a̱ʼání profecía ña̱ ka̱ʼyí ta̱ Isaías íyo iin ña̱ kúni̱ kachiña nu̱úyó tiempo vitin, ña̱kán ndáyáʼviní ña̱yóʼo. Ta saátu ku̱a̱ʼání yichi̱, ta̱ Isaías ni̱ka̱ʼa̱nra xa̱ʼa̱ Jehová ta xi̱niñúʼura tu̱ʼun ña̱ va̱ása yo̱ʼvi̱ ña̱ va̱ʼa kunda̱a̱-iniyó xíʼinña. Tá kúú, nu̱ú capítulo 30, ta̱ Isaías xi̱niñúʼura ejemplo ña̱ liviní ña̱ va̱ʼa ka̱ʼa̱nra xa̱ʼa̱ Jehová ndáa ki̱ʼva chíndeétáʼanra xíʼin na̱ ñuura. Nu̱ú capítulo yóʼo káʼa̱nña xa̱ʼa̱ u̱ni̱ ña̱ kéʼé Jehová. Ña̱ nu̱ú: xíniso̱ʼora oración ña̱ káʼa̱nyó xíʼinra ta ndákuiinraña. Ña̱ u̱vi̱: níʼira yichi̱ nu̱úyó. Ña̱ u̱ni̱: ku̱a̱ʼání ña̱ va̱ʼa táxira ndaʼa̱yó tiempo vitin ta saátu chí nu̱únínu. w22.11 8 párr. 2, 3

Ta̱ Jesús ni̱ka̱ʼa̱nra xíʼin na̱ congregación ña̱ Esmirna ta saátu ña̱ Filadelfia ña̱ ná va̱ása yi̱ʼvína tá ná ixandi̱va̱ʼana xíʼinna, saáchi ku̱a̱ʼání ña̱ va̱ʼa taxi Jehová ndaʼa̱na tá nda̱kú ná koo inina xíʼinra (Apoc. 3:10). ¿Ndáaña sákua’ayó xí’in ñayó’o? Kixaa̱va iin ki̱vi̱ ña̱ saxóʼvi̱na miíyó ta xíniñúʼu koo tu̱ʼvayó ña̱ kundeé-iniyó (Mat. 24:​9, 13; 2 Cor. 12:10). Libro ña̱ Apocalipsis káʼa̱nña xíʼinyó “ña̱ ki̱vi̱ ná kixaa̱ ta̱ tátayó” ixandi̱va̱ʼanína xíʼin na̱ ndásakáʼnu Ndióxi̱ (Apoc. 1:10). Capítulo 12 káʼa̱nña xíʼinyó ña̱ ka̱nitáʼanna chí ndiví tá sa̱kán xi̱ku̱ndúʼu xa̱ʼa̱ Reino Ndióxi̱. Ta̱ Miguel (ta̱ kúú ta̱ Jesucristo tá xa̱a̱ nda̱ndikóra chí ndiví) xíʼin na̱ ángel, ka̱nitáʼanna xíʼin ta̱ Ndi̱va̱ʼa ta saátu xíʼin na̱ ta̱chí ndi̱va̱ʼa (Apoc. 12:​7, 8). Soo ta̱ Ndi̱va̱ʼa xíʼin na̱ kítáʼan xíʼinra va̱ása níkuchiñuna, ta xa̱ʼa̱ ña̱yóʼo ni̱ta̱xi̱na va̱xina nu̱ú ñuʼú yóʼo ta sáxo̱ʼvi̱nína na̱ yiví (Apoc. 12:​9, 12). w22.05 5 párr. 12, 13

Va̱ʼaní íyo ndiʼi ña̱ keʼé Jehová. Saáchi nda̱kúní ndátiinra ku̱a̱chi xíʼin ndiʼina ta va̱ása ndáka̱xinrana. Ta va̱ása íxakáʼnu-inira xa̱ʼa̱ na̱ yiví xa̱ʼa̱ ki̱ʼva ña̱ náʼa̱na, xa̱ʼa̱ xu̱ʼún ña̱ kúúmiína, xa̱ʼa̱ chiñu ña̱ kúúmiína á xa̱ʼa̱ ki̱ʼva ña̱ xíni̱na (1 Sam. 16:7; Sant. 2:​1-4). Kǒo na̱ kivi ixandúxa xíʼin Jehová ña̱ ixakáʼnu-inira xa̱ʼa̱na á ña̱ chaʼvinara ña̱ va̱ʼa keʼéra ña̱yóʼo. Tá íxakáʼnu-inira xa̱ʼa̱ iin na̱ yiví va̱ása kéʼéraña xa̱ʼa̱ ña̱ ndíʼi̱ní-inira á xa̱ʼa̱ ña̱ kúni̱ra kindo̱o va̱ʼara xíʼinna (Éx. 34:7). Ña̱kán va̱ʼaní ndátiin Jehová ku̱a̱chi chi kúnda̱a̱-inira xíʼinyó ta saátu kúnda̱a̱-inira xíʼin ña̱ ndóʼoyó (Deut. 32:4). Na̱ ka̱ʼyí ña̱ Escrituras Hebreas xi̱kunda̱a̱-inina ña̱ va̱ása kítáʼan ki̱ʼva ña̱ íxakáʼnu-ini Ndióxi̱ xa̱ʼa̱yó xíʼin ki̱ʼva ña̱ íxakáʼnu-ini iin na̱ yiví xa̱ʼa̱ inkana. Iin libro káchiña ña̱ íyo iin tu̱ʼun hebreo “ña̱ káʼa̱n xa̱ʼa̱ iinlá kuití ña̱ íxakáʼnu-ini Ndióxi̱ xa̱ʼa̱ iin na̱ ni̱ki̱ʼvi ku̱a̱chi”. Ta káchikaña: “Nda̱a̱ ni iin yichi̱ va̱ása xíniñúʼuna ña̱ tu̱ʼun yóʼo ña̱ va̱ʼa ka̱ʼa̱nna xa̱ʼa̱ ña̱ íxakáʼnu-ini iin na̱ yiví xa̱ʼa̱ inkana”. Iinlá Jehová kúú ta̱ kivi ixakáʼnu-ini xa̱ʼa̱ iin na̱ yiví na̱ ni̱ki̱ʼvi ku̱a̱chi tá ndixa ndándikó-inina. w22.06 4 párr. 10, 11

Tá sákuaʼnu iinlá miíún se̱ʼún á va̱ása ndásakáʼnu yiíún Jehová, ña̱ kéʼún va̱ʼaní chindeétáʼanña xíʼin inkana ña̱ kandíxakana Ndióxi̱. ¿Ndáaña keʼún tá va̱ása chíka̱a̱ na̱ va̱lí se̱ʼún ndee̱ ña̱ ndasakáʼnuna Ndióxi̱ ni xa̱a̱ chíndeétáʼannívaún xíʼinna? Ndakaʼán chi ku̱a̱ʼáníva tiempo xíniñúʼuyó ña̱ sanáʼa̱yó se̱ʼeyó. Tá chíʼiyó iin si̱ʼva̱ va̱ása kúnda̱a̱ví-iniyó á taxiña ku̱i̱ʼi, soo ndákundeéyó kóso̱yóña ña̱ va̱ʼa ná kuaʼnuña (Mar. 4:​26-29). Sana saá ndóʼún chi va̱ása kúnda̱a̱-iniún á xa̱a̱ se̱ʼún ndasakáʼnuna Ndióxi̱. Ña̱ nda̱a̱ kúúña va̱ása kiviví ndaka̱xiún ndáaña keʼé se̱ʼún, soo tá ná ndakundeún vií sakúaʼnúnna, ña̱yóʼo chindeétáʼanña xíʼinna ña̱ xa̱a̱na vií kutáʼanna xíʼin Ndióxi̱. w22.04 20 párr. 16, 17

Tá viíní xi̱ndasakáʼnu ta̱ Salomón Jehová, viíní xi̱ndakanixi̱níra xa̱ʼa̱ miíra. Tá sa̱kán ki̱xáʼara kúúra rey iin ta̱ loʼova xi̱kuura, soo nda̱kunira ña̱ íyo sava ña̱ va̱ása kívi keʼéra, ña̱kán ni̱ka̱ʼa̱nra xíʼin Jehová ña̱ ná kuniʼira yichi̱ nu̱úra (1 Rey. 3:​7-9). Ta saátu xi̱kunda̱a̱-inira ña̱ va̱ása va̱ʼa ni̱nuní kunira. Soo tá ni̱ya̱ʼa tiempo na̱ndósó-inira xa̱ʼa̱ ña̱ ni̱ka̱ʼa̱nra. Chi tá xa̱a̱ ku̱a̱ʼá ku̱i̱ya̱ xáʼndachíñura ki̱xáʼara ni̱nuní kúnira ta ki̱xáʼara yáʼandosóra ña̱ káʼa̱n Ndióxi̱. Tá kúú, ña̱yóʼo kúú ña̱ xi̱ka̱ʼa̱n Ley xíʼin na̱ xi̱kuu rey: “Va̱ása xíniñúʼu koo ku̱a̱ʼání ñá síʼina, ña̱ va̱ʼa ná va̱ása kuxíkána nu̱úi̱” (Deut. 17:17). Ta̱ Salomón va̱ása níxi̱ndiku̱nra ley yóʼo, saáchi 700 xi̱kuu ná síʼira ta ni̱xi̱yo inkaka 300 ná ni̱xi̱yo kuití xíʼinra (1 Rey. 11:​1-3). Sana nda̱kanixi̱níra ña̱ kǒo ña̱ kundoʼovíra. Soo tá ni̱ya̱ʼa tiempo ku̱a̱ʼání tu̱ndóʼo ki̱xi nu̱úra xa̱ʼa̱ ña̱ ku̱xíkára nu̱ú Jehová (1 Rey. 11:​9-13). w22.05 23 párr. 12

Tiempo vitin, ndiʼi na̱ yiví xíniñúʼu ndaka̱xinna keʼéna iin ña̱ʼa: ¿á kundiku̱nna Jehová ta̱ kúúmií derecho ña̱ kaʼndachíñura? ¿Á ndakutáʼanna xíʼin ta̱ Ndi̱va̱ʼa ta̱ sáa̱-ini xíni Jehová? Iin kuitívana xíniñúʼu ndaka̱xinna kundiku̱nna. Ta ña̱ ndaka̱xinna kúú ña̱ chindeétáʼan xíʼinna á kutakuna á kuvina (Mat. 25:​31-33, 46). Ti̱xin ña̱ gran tribulación, ndiʼi na̱ nda̱kú ná koo ini xíʼin Jehová, ndakiʼinna tuni̱ ña̱ va̱ʼa ka̱kuna (Apoc. 7:14; Ezeq. 9:​4, 6). Ta na̱ yiví na̱ ndakiʼin tuni̱ tí kití yukú, na̱ ndiʼi-xa̱ʼa̱ koona (Apoc. 14:​9-11). Iin ña̱ va̱ʼaní kúú ña̱ kéʼún tá xa̱a̱ chíndeétáʼún xíʼin Reino Ndióxi̱, ta sana kúni̱ún chindeétáʼún xíʼin inka na̱ yiví ña̱ ná kundiku̱nna Reinora. Ku̱a̱ʼání ña̱ va̱ʼa ndakiʼin na̱ chíndeétáʼan xíʼin Reino Jehová. Ndáyáʼviní kaʼviyó ña̱ va̱xi nu̱ú libro yóʼo, saáchi ña̱yóʼo chindeétáʼanña xíʼinyó ña̱ ndakundeéyó kachíñuyó nu̱ú Jehová. Ta kivitu kuniñúʼuyó ña̱ sákuaʼayó nu̱ú libro yóʼo ña̱ va̱ʼa chindeétáʼanyó xíʼin inkana ña̱ kixáʼana ndasakáʼnuna Jehová, ta ndakundeéna keʼéna ña̱yóʼo. w22.05 15 párr. 1, 2

Xíniñúʼu kuniso̱ʼoyó ña̱ káʼa̱n Jehová ta su̱ví ña̱ káʼa̱n na̱ sáa̱-ini xíni miíyó. Ta̱ Job viíní xi̱niso̱ʼora tá ni̱ka̱ʼa̱n Jehová xíʼinra. Ña̱ va̱ʼa chindeétáʼan Jehová xíʼinra ña̱ kunda̱a̱-inira ña̱ ndáyáʼviníra nu̱úra, nda̱a̱ táki̱ʼva íyo ta̱ ni̱ka̱ʼa̱n ña̱yóʼo xíʼinra saá ni̱xi̱yora: “Yi̱ʼi̱ kíʼinvai̱ kuenta xíʼin ndiʼi ña̱ ndóʼún. ¿Á va̱ása kuchiñui̱ kundai̱ yóʼó túviún?”. Vitání ni̱xi̱yo ini ta̱ Job ta ta̱xiníra tíxa̱ʼvi ndaʼa̱ Jehová xa̱ʼa̱ ña̱ va̱ʼaní-inira xíʼinra, ña̱kán ni̱ka̱ʼa̱nra ña̱yóʼo: “Xi̱xiniso̱ʼo kuitívai̱ xa̱ʼún, soo vitin kúú ña̱ xíto káxii̱ yóʼó xíʼin nduchúnu̱úi̱” (Job 42:5). ¿Á ndákaʼún ndáa mií íyo ta̱ Job tá ni̱ka̱ʼa̱nra ña̱yóʼo? Íyokavara nu̱ú ya̱a̱, iníí ku̱ñura ka̱na ndi̱ʼi. Tá ndo̱ʼora ndiʼi ña̱yóʼo, saá ni̱ka̱ʼa̱n Jehová xíʼinra ña̱ kúʼvi̱ní-inira xínirara (Job 42:​7, 8). Tiempo vitin, na̱ yiví sana káʼa̱n-ndi̱va̱ʼana xíʼinyó á íxandi̱va̱ʼana xíʼinyó. Sana káʼa̱nna ku̱a̱ʼání ña̱ vatá xa̱ʼa̱yó á xa̱ʼa̱ na̱ ñuu Ndióxi̱. Ña̱ ndo̱ʼo ta̱ Job sánáʼa̱ña miíyó ña̱ kiviva nda̱kú koo iniyó xíʼin Jehová tá ná ya̱ʼayó nu̱ú tu̱ndóʼo. w22.06 24 párr. 15, 16

Kusi̱íva-inina chí ndiví tá ná kunina ndiʼi-xa̱ʼa̱ Babilonia ña̱ káʼnu, soo koo inka ña̱ sákusi̱íní-inina (Apoc. 19:​1-3). Ña̱yóʼo kúú: “vikó ña̱ tindaʼa̱ tí ndikachi”, saáchi ña̱yóʼo kúú ña̱ ndáyáʼvi va̱ʼaka káʼa̱n libro ña̱ Apocalipsis xa̱ʼa̱. Tá kúma̱níka kixáʼa ña̱ Armagedón xa̱a̱ kundoova ndiʼi na̱ 144,000 chí ndiví, soo su̱ví iin tiempo ña̱ tindaʼa̱ tí ndikachi koo ña̱yóʼo (Apoc. 21:​1, 2). Tá ná ndiʼi Armagedón saáví koo vikó yóʼo, chi saá kúú ña̱ xa̱a̱ ndiʼi-xa̱ʼa̱ ndiʼi na̱ sáa̱-ini xíni Ndióxi̱ (Sal. 45:​3, 4, 13-17). ¿Ndáaña kúni̱ kachi ña̱ tindaʼa̱ tí ndikachi nu̱ú na̱ ku̱ʼu̱n chí ndiví? Tá xáa̱ iin ta̱a tíndaʼa̱ra xíʼin iin ñaʼá, saá kúú ña̱ inkáchi xáa̱na ndákutáʼanna. Ta ki̱ʼva saá koo ña̱ ndakutáʼan ta̱ Jesucristo ta̱ kúú Rey xíʼin na̱ 144,000, chi nda̱a̱ táki̱ʼva koo na̱ tindaʼa̱ saá koo na̱yóʼo. Tá ná kuu ña̱yóʼo saá kúú ña̱ kixáʼana kaʼndachíñuna sa̱tá ñuʼú yóʼo ti̱xin 1,000 ku̱i̱ya̱ (Apoc. 20:6). w22.05 17 párr. 11-13

Ta̱ Jesús ni̱ka̱ʼa̱nra ña̱ tiempo nu̱ú ndíʼi vitin, taxira chiñu ndaʼa̱ ta̱ “esclavo ta̱ nda̱kúní-ini ta̱ ndíchiní” ña̱ taxira ña̱ xíniñúʼuyó ña̱ sakúaʼayó xa̱ʼa̱ Ndióxi̱ (Mat. 24:45). Ta̱ Jesús xíniñúʼura iin tiʼvi loʼo na̱ hermano na̱ ku̱ʼu̱n chí ndiví ña̱ taxina ña̱ xíniñúʼuyó mií tiempo ña̱ xíniñúʼuyóña, ta saátu taxina ña̱ xíniñúʼu na̱ yiví na̱ kúni̱ sakúaʼa xa̱ʼa̱ Ndióxi̱. Ta na̱yóʼo chíndeétáʼanna xíʼinyó ña̱ kandíxakayó Ndióxi̱ (2 Cor. 1:24). Ta ndákunina ña̱ mií ta̱ Jesucristo kúú ta̱ níʼi yichi̱ nu̱ú na̱ ñuu Ndióxi̱ (Is. 55:4). Nda̱a̱ tá ku̱i̱ya̱ 1919, ta̱ esclavo ta̱ nda̱kúní-ini távára ku̱a̱ʼání tutu ña̱ kivi chindeétáʼan xíʼin na̱ yiví ña̱ sakúaʼana ña̱ nda̱a̱ xa̱ʼa̱ Ndióxi̱. Tá ku̱i̱ya̱ 1921, ka̱na libro ña̱ naní El Arpa de Dios tu̱ʼun inglés ña̱ va̱ʼa sakúaʼa na̱ yiví ña̱ nda̱a̱ xa̱ʼa̱ Ndióxi̱. Tá ni̱ya̱ʼa tiempo ki̱xáʼa kána inkaka libro. ¿Ndáa libro kúú ña̱ chi̱ndeétáʼan xíʼún ña̱ ni̱xa̱ún ku̱nda̱a̱-iniún xa̱ʼa̱ Ndióxi̱ ta kuʼvi̱-iniún kuniúnra? w22.07 10 párr. 9, 10

Jehová kúú ta̱ va̱ʼaníka-ini. Ni loʼo kúú ña̱ʼa ná taxiún ndaʼa̱ra ku̱a̱ʼáníkavaña taxira ndaʼún (Mar. 10:​29, 30). Ni kininí káa nu̱ú ñuyǐví yóʼo taxivara ña̱ si̱í koún. Chi tá ná ndakuchiún ña̱yóʼo kúú ña̱ chindeétáʼan xíʼún ña̱ va̱ʼa kuchiñún ndasakáʼnúnra ndiʼi tiempo. Tá ná xa̱ún kuʼvi̱ka-iniún kuniúnra, va̱ása sandákoora ña̱ kuʼvi̱-inira kunira yóʼó ta kivi xa̱ún kutakún ndiʼi tiempo nda̱a̱ táki̱ʼva tákura. Tá ná ndataxiún miíún ndaʼa̱ Jehová ta ndakuchiún, saá kúú ña̱ kivi taxiún u̱vi̱ ña̱ ndáyáʼviní ndaʼa̱ra. Ndakaʼán chi ndiʼi ña̱ va̱ʼa ña̱ kúúmiíún xíʼin ña̱ sákusi̱í-iniún, Jehová kúú ta̱ ta̱xiña ndaʼún. Ta miíún kivi taxiún u̱vi̱ ña̱ ndáyáʼvi ndaʼa̱ Jehová ta ña̱yóʼo sakúsi̱íníña-inira. Ña̱yóʼo kúú: ña̱ nda̱kú koo iniún xíʼinra ta kachíñún nu̱úra ndiʼi tiempo (Job 1:8; 41:11; Prov. 27:11). Ña̱ kúʼvi̱-iniún xíniún Jehová kúú ña̱ chindeétáʼan xíʼún ña̱ va̱ʼa ndakuchiún. Kǒoka inka ña̱ʼa ña̱ ndáyáʼviníka ña̱ kivi keʼún. w23.03 6 párr. 16, 17

Tá xa̱a̱ xa̱ʼnún saá kúú ña̱ kuni̱níkaún ku̱sún xíʼin iin na̱ yiví, ta sana inkana ixandúxana xíʼún ña̱ keʼún ña̱yóʼo. Ta̱ Ndi̱va̱ʼa kúni̱ra ña̱ ná ki̱ʼviún ku̱a̱chi yóʼo. Soo, ¿ndáaña chindeétáʼan xíʼún ña̱ va̱ása keʼúnña? (1 Tes. 4:​3, 4). Tá káʼún xíʼin Jehová ka̱ʼa̱n xíʼinra xa̱ʼa̱ ña̱ ndóʼún, ta ka̱ʼa̱n xíʼinra ná chindeétáʼanra xíʼún ña̱ ndakú koo iniún (Mat. 6:13). Jehová íyora ña̱ chindeétáʼanra xíʼún ta va̱ása ka̱ʼa̱nra xa̱ʼa̱ ña̱ va̱ása va̱ʼa kéʼún (Sal. 103:​13, 14). Na̱ yiváún kivi chindeétáʼanna xíʼún tá yáʼún nu̱ú tu̱ndóʼo, ña̱kán natúʼun xíʼinna xa̱ʼa̱ ña̱ ndóʼún. Ixayo̱ʼvi̱vaña xíʼún ña̱ ka̱ʼún xíʼinna xa̱ʼa̱ ña̱ ndóʼún, soo ndáyáʼviní keʼún ña̱yóʼo. Tá káʼviún tu̱ʼun Ndióxi̱ ta ndákanixi̱níún xa̱ʼa̱ña, saá kúú ña̱ va̱ása ixayo̱ʼvi̱ña xíʼún ña̱ vií koo ña̱ ndaka̱xiún keʼún tasaá sakúsi̱íún-ini Jehová. Tá ná keʼún ña̱yóʼo, saá kúú ña̱ na̱ʼún ña̱ xa̱a̱ xu̱xa-iniún xíʼin tu̱ʼun Ndióxi̱. w22.08 5 párr. 10-12

Ña̱ ndáyáʼvi nu̱ú ta̱ xa̱a̱ ti̱ndaʼa̱ kúú ña̱ kundaara na̱ veʼera ta taxira ña̱ xíniñúʼuna. Tá ta̱ xa̱a̱ ti̱ndaʼa̱ kúún, sana ndíʼi̱ní-iniún ta ndákanixi̱níún ña̱ va̱ása kuchiñún táxiún ña̱ kuxu na̱ veʼún á ña̱ ndani̱ʼún iin veʼe nu̱ú kundoona. Ta ndákanixi̱níún ña̱ tá ná kindaana chiñu ña̱ kúúmiíún, va̱ása kuchiñún ndani̱ʼún inkaña. Ta sana ndákanixi̱níún ña̱ va̱ása kuchiñu si̱í koún tá ná kuumiíún loʼo xu̱ʼún. Ta ña̱yóʼo kúú ña̱ xíniñúʼu ta̱ Ndi̱va̱ʼa ña̱ sayíʼvira na̱ ndásakáʼnu Ndióxi̱ ña̱ va̱ʼa sandákoona ña̱ ndasakáʼnunara. Ta̱ Ndi̱va̱ʼa kúni̱ra ña̱ ná ndakanixi̱níyó ña̱ va̱ása ndíʼi̱-ini Jehová xa̱ʼa̱ iin tá iinyó, ta tá xíniñúʼuyóra ña̱ chindeétáʼanra xíʼinyó ña̱ taxiyó ña̱ xíniñúʼu na̱ veʼeyó, va̱ása íyora ña̱ chindeétáʼanra xíʼinyó. Tá ná kandíxayó ña̱ vatá ña̱ káʼa̱n ta̱ Ndi̱va̱ʼa, nda̱a̱ kivi keʼéyó nda̱a̱ ndáaka ña̱ʼa ña̱ va̱ása kindaana chiñu ña̱ kúúmiíyó, á nda̱a̱ kivi keʼéyó iin chiñu ña̱ sakúxíká miíyó nu̱ú Jehová. w22.06 15 párr. 5, 6

Kúnda̱a̱-iniyó ña̱ kúúra iin Ndióxi̱ ta̱ íxakáʼnu-ini xa̱ʼa̱yó, ta kúndáʼvi-inira xínira miíyó, kúee íyo inira ta ndiʼi tiempo ndixaní kúʼvi̱-inira xínira miíyó (Éx. 34:6). Ta nda̱kúní íyo inira (Is. 61:8). Jehová kúsuchíní-inira xíʼinyó tá xóʼvi̱yó, ta xa̱a̱ kúni̱níra sandíʼi-xa̱ʼa̱ra ndiʼi ña̱ sáxo̱ʼvi̱ miíyó ta keʼévaraña mií tiempo ña̱ xa̱a̱ nda̱kaxinra keʼéraña (Jer. 29:11). Ta xa̱a̱ kúni̱níyó ná kixaa̱ ki̱vi̱ kán. Ta xa̱ʼa̱ ña̱yóʼo kúʼvi̱ní-iniyó xíniyó Jehová. Inka xa̱ʼa̱ ña̱ kúʼvi̱ní-iniyó xíniyó ña̱ nda̱a̱ kúú ña̱ va̱ʼaní chíndeétáʼanña xíʼinyó. Tá kúú, sa̱kuaʼayó nu̱ú tu̱ʼun Ndióxi̱ xa̱ʼa̱ ña̱ ndátuyó ndakiʼinyó chí nu̱únínu. Ta nda̱a̱ táki̱ʼva chíndeétáʼan ka̱a yóʼo xíʼin tú barco, saátu chíndeétáʼan ña̱ káʼa̱n Ndióxi̱ keʼéra chí nu̱únínu xíʼinyó tá yáʼayó nu̱ú tu̱ndóʼo. Tá ni̱ka̱ʼa̱n ta̱ Pablo xa̱’a̱ texto ña̱ ki̱vi̱ vitin, xa̱ʼa̱ na̱ cristiano na̱ ku̱ʼu̱n koo chí ndiví kúú ña̱ ni̱ka̱ʼa̱nra. Soo saátu chíndeétáʼanña xíʼin miíyó na̱ ndátu koo nu̱ú ñuyǐví xa̱á (Juan 3:16). Ta ña̱ ndátuyó kooyó ndiʼi tiempo kúú ña̱ sákusi̱íní-iniyó. w22.08 14, 15 párr. 3-5

Ña̱ kúʼvi̱-iniyó xíniyó na̱ hermanoyó chíndeétáʼanña xíʼinyó kandíxayóna. 1 Corintios capítulo 13 va̱xi ku̱a̱ʼá ña̱ kivi chindeétáʼan xíʼinyó (1 Cor. 13:​4-8). Versículo 4 káchiña “na̱ kúʼvi̱-ini xíni inkana va̱ása kamaní-inina ta va̱ʼaní-inina”. Jehová kúee íyo inira xíʼinyó ni ku̱a̱kiʼviyó ku̱a̱chi. Ña̱kán, xíniñúʼu kúee koo iniyó xíʼin na̱ hermanoyó tá kéʼéna á káʼa̱nna iin ña̱ʼa ña̱ sásáa̱ miíyó á ña̱ sákusuchí-iniyó. Versículo 5 káchiña ña̱ na̱ kúʼvi̱-ini xíni inkana “va̱ása kamaní sáa̱na” ta “va̱ása ndákaʼánna xa̱ʼa̱ ña̱ kéʼé inkana xíʼinna”. Miíyó va̱ása kúni̱yó ndakaʼányó xa̱ʼa̱ ndiʼi ña̱ va̱ása va̱ʼa kéʼéna xíʼinyó. Eclesiastés 7:9 káʼa̱nña xíʼinyó ña̱ va̱ása xíniñúʼu kamaní sa̱a̱yó. Ta ná kotoyó na̱ hermano nda̱a̱ táki̱ʼva xíto Jehová na̱yóʼo. Ta̱kán kúʼvi̱ní-inira xínirana ta va̱ása ndákaʼánra xa̱ʼa̱ ku̱a̱china. Ta saátu xíniñúʼu keʼé miíyó (Sal. 130:3). Nu̱úka ña̱ kotoyó ña̱ va̱ása va̱ʼa kéʼéna, va̱ʼaka ná chika̱a̱yó ndee̱ kotoyó ña̱ va̱ʼa ña̱ kéʼéna ta ná kandíxayó ña̱ kiviva xa̱a̱na keʼéna ku̱a̱ʼání ña̱ va̱ʼa (Mat. 7:​1-5). w22.09 3, 4 párr. 6, 7

Libro ta̱ Daniel yiku̱nní káʼa̱nña xíʼinyó xa̱ʼa̱ ña̱ koo tiempo nu̱ú ndíʼi. Tá kúú Daniel 12:1 káʼa̱nña xa̱ʼa̱ ta̱ Miguel á ta̱ Jesucristo, ña̱ chindeétáʼanra xíʼin na̱ ñuu Ndióxi̱. Profecía yóʼo ki̱xáʼaña xínuña ku̱i̱ya̱ 1914 tá ndu̱ura Rey ti̱xin Reino Ndióxi̱. Ta saátu ni̱ka̱ʼa̱nna xíʼin ta̱ Daniel ña̱ ndakundichi ta̱ Jesús “iin tiempo ña̱ ndi̱ʼi̱ní-inina, ña̱ ta̱ʼán koo nda̱a̱ tá ki̱xáʼa íyo iin ñuu”. Ta tiempo ña̱ ndi̱ʼi̱ní-inina yóʼo kooña tá ná kixaa̱ tu̱ndóʼo ña̱ káʼnu ña̱ káʼa̱n Mateo 24:21 xa̱ʼa̱. Tá ná ndiʼi tiempo ña̱ ndi̱ʼi̱ní-inina á tá ná kixaa̱ ña̱ Armagedón, ta̱ Jesús ndakundichira ta chindeétáʼanra xíʼin na̱ ñuu Ndióxi̱. Ta na̱yóʼo kúú ku̱a̱ʼání na̱ yiví na̱ ka̱ʼa̱n libro ña̱ Apocalipsis xa̱ʼa̱, na̱ ni̱ya̱ʼa nu̱ú tu̱ndóʼo ña̱ káʼnu (Apoc. 7:​9, 14). w22.09 21 párr. 4, 5

Na̱ ni̱ka̱ʼyi̱ ki̱vi̱ nu̱ú libro yóʼo kiviva ndoo ki̱vi̱na. Saáchi tiempo vitin, Jehová nda̱a̱ táki̱ʼva íyo ta̱ káʼyí ki̱vi̱yó xíʼin iin lápiz nu̱ú libro yóʼo saá íyora (Apoc. 3:5). Ta ña̱ va̱ása ndakatara ki̱vi̱yó, xíniñúʼu chika̱a̱níyó ndee̱ ña̱ keʼéyó nda̱a̱ táki̱ʼva kúni̱ra tasaá kaʼyí va̱ʼara ki̱vi̱yó ta va̱ása ndooña. Iin ta’vi á grupo kúú na̱ xa̱a̱ ni̱ka̱ʼyi̱ ki̱vi̱ nu̱ú libro yóʼo. Na̱ grupo yóʼo kúú na̱ nda̱kaxin Ndióxi̱ ku̱ʼu̱n chí ndiví ña̱ kaʼndachíñu xíʼin ta̱ Jesús. Xa̱a̱ ni̱ka̱ʼyi̱vaña chi saá ni̱ka̱ʼa̱n ta̱ apóstol Pablo xíʼin na̱ hermano na̱ ñuu Filipos, na̱ xi̱chindeétáʼan xíʼinra. Ni̱ka̱ʼa̱nra ña̱ na̱ ku̱ʼu̱n chí ndiví, na̱ kaʼndachíñu xíʼin ta̱ Jesucristo xa̱ʼa̱ ni̱ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku (Filip. 4:3). Ña̱ va̱ása ndoo ki̱vi̱na nu̱ú libro yóʼo xíniñúʼu ndakundeéna nda̱kú koo inina xíʼin Ndióxi̱. Tá ná ndakiʼinna sello ña̱ so̱ndíʼi, saá kúú ña̱ va̱ása ndoo ki̱vi̱na nu̱ú libro nu̱ú va̱xi ki̱vi̱ na̱ kutaku ndiʼi tiempo. Ña̱yóʼo ndakiʼinnaña tá kúma̱níka kuvina á tá kúma̱níka kixáʼa ña̱ gran tribulación (Apoc. 7:3). w22.09 14 párr. 3; 15 párr. 5, 6

Tá iinna íxava̱ʼana comida ña̱ kútóoníyó kuxuyó, ta xa̱ʼa̱ ña̱ ndíʼi̱ní-iniyó á ku̱a̱ʼání ña̱ʼa ndákanixi̱níyó xa̱ʼa̱, kamaní xíxiyóña. Soo tá ndi̱ʼi xi̱xiyóña ndákanixi̱níyó á va̱ʼa kúeekaví níxixii̱ña ña̱ va̱ʼa kunii̱ á ya̱sín ku̱va̱ʼaña. Ki̱ʼva saá kivi kundoʼoyó xíʼin Biblia, tá ndíʼi̱ní-iniyó iin kama kuití káʼviyóña. Ña̱kán xíniñúʼu taváyó tiempo ña̱ ndakanixi̱níyó xa̱ʼa̱ ña̱ káʼa̱nña. Tá kúú, ndáa ki̱ʼva ni̱xi̱yo na̱ yiví na̱ káʼa̱nña xa̱ʼa̱ á ndáa ki̱ʼva xi̱ka̱ʼa̱nna. Chi tá saá ná keʼéyó si̱íní kooyó. Ta̱ Jesús ta̱xira chiñu ndaʼa̱ ta “esclavo ta̱ nda̱kúní-ini ta̱ ndíchiní” ña̱ taxira ndiʼi ña̱ xíniñúʼuyó ña̱ sakúaʼayó xa̱ʼa̱ Ndióxi̱ mií tiempo ña̱ xíniñúʼuyóña (Mat. 24:45). Biblia kúú ña̱ xíniñúʼukara ña̱ va̱ʼa tavára publicación ña̱ xíniñúʼuyó (1 Tes. 2:13). w22.10 8 párr. 6-8

Biblia káʼa̱nña ña̱ ki̱vi̱ nu̱ú ndíʼi koo na̱ kusi̱kindaa (2 Ped. 3:​3, 4). Ta ku̱a̱ʼání na̱yóʼo kéʼéna ña̱ kini ña̱ kúni̱ miína (Jud. 7, 17, 18). ¿Ndáaña kivi keʼéyó ña̱ va̱ása keʼéyó nda̱a̱ táki̱ʼva kéʼé na̱ kúsi̱kindaa? Ña̱ xíniñúʼu keʼéyó kúú, ña̱ va̱ása kutáʼanyó xíʼin na̱ yiví na̱ káʼa̱n kúáchi ndiʼi tiempo (Sal. 1:1). Ta ña̱yóʼo kúni̱ kachiña, ña̱ ni loʼo kǒo xíniñúʼu kuniso̱ʼoyó á kaʼviyó ña̱ káʼa̱n na̱ apóstata. Tá ná kǒo kiʼinyó kuenta sana kixáʼayó keʼéyó nda̱a̱ táki̱ʼva kéʼé na̱ apóstata. Kixáʼayó ka̱ʼa̱n kúáchiyó ta kixáʼayó kaka-iniyó xa̱ʼa̱ Jehová ta ni kǒo kandíxakayó kuniso̱ʼoyó ña̱ káʼa̱n na̱ ñuura. Ta ña̱ va̱ʼa kǒo keʼéyó ña̱yóʼo ná ndakanixi̱níyó xa̱ʼa̱ ña̱yóʼo: “¿Á ndiʼi tiempo káʼa̱n kúáchii̱ tá sánáʼa̱ na̱ ñuu Ndióxi̱ yi̱ʼi̱ xa̱ʼa̱ iin ña̱ʼa xa̱á? ¿Á káʼa̱n kúáchii̱ xa̱ʼa̱ na̱ hermano na̱ níʼi yichi̱ nu̱úi̱?”. Tá ndi̱ku̱n kama ná sandákooyó kéʼéyó ña̱yóʼo, kusi̱íní-ini Jehová xíʼinyó (Prov. 3:​34, 35). w22.10 20 párr. 9, 10

Espíritu santo kúú ña̱ ta̱xi ndee̱ ndaʼa̱ ta̱ Ezequiel ña̱ va̱ʼa saxínura chiñu ña̱ natúʼunra xíʼin na̱ judío na̱ so̱ʼoní. Ña̱yóʼo ni̱ka̱ʼa̱n Jehová xíʼinra: “Nda̱sandakúi̱-iniún nda̱a̱ táki̱ʼva ndakúní-inina. Nda̱sandakúi̱-iniún ta ndeéníkaña nda̱a̱ táki̱ʼva íyo iin diamante, á nda̱a̱ táki̱ʼva íyo iin yu̱u̱. Va̱ása yi̱ʼvíún kuniúnna, saáchi iin ñuu na̱ so̱ʼoní kúúna” (Ezeq. 3:​8, 9). “Kǒo ndakava-iniún xa̱ʼa̱ ña̱ so̱ʼonína, saáchi yi̱ʼi̱ ndasandakúi̱-iniún”. Ña̱kán espíritu santo xi̱niʼiña yichi̱ nu̱ú ta̱ Ezequiel ña̱ va̱ʼa ku̱ʼu̱nra territorio ña̱ ni̱ka̱ʼa̱n Ndióxi̱ xíʼinra ña̱ natúʼunra xíʼin na̱ yiví. Ta̱ Ezequiel ki̱ʼinra kuenta ña̱ íyoní ndee̱ Jehová ña̱ chindeétáʼanra xíʼinra. Ta ki̱ʼva iin semana xi̱niñúʼura ña̱ sákuaʼara ta kunda̱a̱-inira ndáa ki̱ʼva natúʼunra ña̱ ni̱ka̱ʼa̱n Ndióxi̱ xíʼinra (Ezeq. 3:​14, 15). Tándi̱ʼi, Jehová ni̱ka̱ʼa̱nra xíʼinra ña̱ ná ku̱ʼu̱nra chí yoso̱ nu̱ú ndakiʼinra espíritu santo (Ezeq. 3:​23, 24). Ta vitin xa̱a̱ íyo tu̱ʼva ta̱ Ezequiel ña̱ ku̱ʼu̱nra natúʼunra xa̱ʼa̱ Ndióxi̱. w22.11 4, 5 párr. 8, 9

Ta̱ profeta Habacuc ku̱a̱ʼání tu̱ndóʼo ni̱ya̱ʼara nu̱ú. Ta nda̱a̱ sana ni̱xi̱ka-inira ña̱ va̱ása ndíʼi̱-ini Jehová xa̱ʼa̱ra. Soo ni̱ka̱ʼa̱nra xíʼin Jehová xa̱ʼa̱ ndiʼi ña̱ xi̱ndoʼora. Jehová nda̱kuiinvara oración ña̱ ke̱ʼé ta̱ Habacuc nu̱úra (Hab. 2:​2, 3). Tá nda̱kanixi̱níra xa̱ʼa̱ ki̱ʼva ña̱ sa̱kǎku Jehová na̱ ñuura, ta̱ Habacuc ki̱xáʼa tukura kúsi̱í-inira. Ta ka̱ndíxara ña̱ ndíʼi̱va-ini Jehová xa̱ʼa̱ra ta chindeétáʼanra xíʼinra ña̱ ya̱ʼara nu̱ú tu̱ndóʼo (Hab. 3:​17-19). ¿Ndáaña sákuaʼayó xíʼin ña̱yóʼo? Ta íyo tu̱ndóʼo nu̱úyó, ná kundaa-iniyó Jehová ta ná ka̱ʼa̱nyó xíʼinra xa̱ʼa̱ ndiʼi ña̱ ndóʼoyó. Ná kandíxayó ña̱ taxivara ndee̱ ndaʼa̱yó ña̱ ya̱ʼayó nu̱ú tu̱ndóʼo. Tá ná kotoyó ndáa ki̱ʼva chíndeétáʼanra xíʼinyó saá kúúña va̱ʼaníka xa̱a̱yó kandíxayóra. Tá ná ndakundeún keʼún chiñu nu̱ú Jehová, va̱ása kuchiñu tu̱ndóʼo sakúxíkaña yóʼó nu̱úra ta saátu va̱ása kaka-iniún xa̱ʼa̱ra (1 Tim. 6:​6-8). w22.11 15 párr. 6, 7

Tá ka̱tikaana ta̱ Jesús ndaʼa̱ yitu̱n, chí síi̱nra ka̱tikaana u̱vi̱ ta̱ kui̱ʼná (Luc. 23:​32, 33). Na̱ ta̱a yóʼo ku̱sikindaana ta̱ Jesús (Mat. 27:44; Mar. 15:32). Soo iin ta̱yóʼo na̱samara ña̱ ndákanixi̱níra ta ni̱ka̱ʼa̱nra ña̱yóʼo xíʼin ta̱ Jesús: “Ndakaʼún xa̱ʼíi̱ tá ná kaʼndachíñún”. Ta ña̱yóʼo ni̱ka̱ʼa̱n ta̱ Jesús xíʼinra: “Vitin káʼi̱n xíʼún: koún xíʼi̱n nu̱ú ñuʼú livi” (Luc. 23:​39-42). Ña̱ ni̱ka̱ʼa̱n ta̱ Jesús xíʼin iin ta̱ kui̱ʼná, xíniñúʼu chindeétáʼanña xíʼinyó ña̱ ndakanixi̱níyó ndáa ki̱ʼva kundooyó nu̱ú ñuʼú livi. Ña̱ chindeétáʼan xíʼinyó ña̱ kunda̱a̱-iniyó xa̱ʼa̱ ña̱yóʼo kúú ña̱ ndakaʼányó xa̱ʼa̱ tiempo ña̱ viíní xi̱ndoo ndiʼina tá xi̱xaʼndachíñu ta̱ Salomón. Biblia káʼa̱nña xa̱ʼa̱ ta̱ Jesús ña̱ ndáyáʼvikara nu̱ú ta̱ Salomón. Ña̱kán kivi kandíxayó ña̱ tá ná kaʼndachíñu ta̱ Jesús xíʼin na̱ 144,000 liviní ndasaana nu̱ú ñuʼú yóʼo (Mat. 12:42). Ta na̱ “inkaka ndikachi” xíniñúʼu sakúaʼana vií keʼéna ña̱ va̱ʼa koona ndiʼi tiempo nu̱ú ñuʼú livi (Juan 10:16). w22.12 8 párr. 1; 9 párr. 4

Ta̱ Isaías ni̱ka̱ʼa̱nra xa̱ʼa̱ Jehová ña̱ kuniso̱ʼora tá ná ka̱ʼa̱nyó xíʼinra ta kama ndakuiinra yuʼúyó. Ta̱ ni̱ka̱ʼa̱nra: “Tá ná kuniso̱ʼora ña̱ káʼún xíʼinra ndakuiinra yuʼún”. Va̱ʼaní sándi̱ko ña̱yóʼo iniyó saáchi xíʼin ndinuʼu-ini Ndióxi̱ kúnira chindeétáʼanra xíʼinyó. Ta ña̱yóʼo chíndeétáʼanña xíʼinyó kundeé-iniyó ta kusi̱í-iniyó tá yáʼayó nu̱ú tu̱ndóʼo. Versículo yóʼo náʼa̱ña ña̱ xíniso̱ʼo Jehová oración ña̱ kéʼé iin tá iinyó nu̱úra. ¿Nda̱chun káʼa̱nyó ña̱yóʼo? Nu̱ú kíxáʼa capítulo 30 ña̱ Isaías, Jehová xi̱niñúʼura ña̱ tu̱ʼun “ndóʼó”, saáchi xíʼin ndiʼi na̱ ñuura káʼa̱nra. Soo nu̱ú versículo 19 xi̱niñúʼura ña̱ tu̱ʼun “yóʼó”, saáchi xíʼin iinlá na̱ káchíñu nu̱úra káʼa̱nra. Ta̱ Isaías ka̱chira: “Va̱ása kuakukaún”, “ta̱yóʼo na̱ʼa̱ra ña̱ va̱ʼaní-inira xíʼún”, “ndakuiinra yuʼún”. Xa̱ʼa̱ ña̱ va̱ʼaní-ini yiváyó Jehová, ndíʼi-inira xa̱ʼa̱ iin tá iinyó ta ndákuiinra oración ña̱ kéʼé iin tá iinyó nu̱úra (Sal. 116:1; Is. 57:15). w22.11 9 párr. 5, 6

Tá siglo nu̱ú, tá ni̱ka̱ʼa̱n na̱ chíñu xíʼin na̱ apóstol ña̱ sandákoona ña̱ natúʼunna xa̱ʼa̱ Ndióxi̱, na̱yóʼo nda̱kú ni̱xi̱yo inina ta ka̱ndíxana Ndióxi̱. Ta saátu nda̱kundeéna na̱túʼunna xíʼin na̱ yiví ta xa̱ʼa̱ ña̱yóʼo ku̱si̱íní-inina (Hech. 5:​27-29, 41, 42). Tá va̱ása xíín na̱ chiñu taxina natúʼunyó xa̱ʼa̱ Ndióxi̱ nu̱ú ndóoyó, xíniñúʼu kiʼinníyó kuenta tá kéʼéyó chiñu yóʼo. Tá chíka̱a̱níyó ndee̱ ña̱ natúʼunyó xa̱ʼa̱ Ndióxi̱, ña̱yóʼo kivi sakǎkuña inka na̱ yiví, ta saátu kivi táxi̱n koo iniyó ta va̱ʼaní kuniyó saáchi ña̱yóʼo sakúsi̱íña-ini Jehová. Ni yo̱ʼvi̱ní ña̱ yáʼayó nu̱ú kiviva táxi̱n koo iniyó, chi iinlá mií Jehová kúú ta̱ kivi taxi ña̱ táxi̱n koo iniyó. Ná kandíxayó Jehová tá íyo iin kue̱ʼe̱ xíkun ñuu nu̱ú ndóoyó á tá iin kama ndóʼoyó tu̱ndóʼo á tá ixandi̱va̱ʼa na̱ chíñu xíʼinyó. Ná kundaa-iniyó na̱ ñuu Jehová ta ná ndakanixi̱níyó xa̱ʼa̱ ña̱ káʼa̱nra taxira ndaʼa̱yó chí nu̱únínu. Tásaá ná keʼéyó, Ndióxi̱ ta̱ sándi̱ko-ini na̱ yiví koora xíʼinyó (Filip. 4:9). w22.12 21 párr. 17, 18

Su̱ví ña̱ ndákanixi̱ní kuitíyó xíniñúʼu ndasaxa̱áyó chi saátu xíniñúʼu ndasaxa̱áyó ki̱ʼva ña̱ kéʼéyó (Efes. 4:​31, 32). Xíniñúʼu chikaa̱níyó ndee̱ ña̱ nasamayó ki̱ʼvi ña̱ íyoyó, ña̱ kue̱ʼe̱níyó, ña̱ kamaní sáa̱yó. ¿Nda̱chun kivi ixayo̱ʼvi̱ña xíʼinyó ña̱ keʼéyó ña̱yóʼo? Saáchi sava ña̱yóʼo xa̱a̱ ku̱a̱ʼání tiempo kéʼéyóña (Prov. 29:22). Ta ni xa̱a̱ nda̱kuchiyó kivi kixáʼa tukuyó keʼéyó ña̱yóʼo, ña̱kán xíniñúʼu kiʼinníyó kuenta xíʼin ki̱ʼva ña̱ íyoyó (Rom. 7:​21-23). Ná ka̱ʼa̱nyó xíʼin Jehová xa̱ʼa̱ ña̱ʼa ña̱ kúni̱yó sandákooyó ta ná kǒo kaka-iniyó ña̱ kuniso̱ʼovara ña̱ ka̱ʼa̱nyó xíʼinra ta chindeétáʼanvara xíʼinyó (1 Juan 5:​14, 15). Kǒo sakútaʼaví Jehová ña̱yóʼo, soo taxira ndee̱ ndaʼa̱yó ña̱ kuchiñuyó ya̱ʼayó nu̱úña (1 Ped. 5:10). ¿Ndáaña xíniñúʼu keʼéyó ña̱ va̱ʼa chindeétáʼan Jehová xíʼinyó? Ná kǒo keʼéyó á kotoyó iin ña̱ʼa ña̱ kivi chindaʼá miíyó ña̱ kixáʼa tukuyó keʼéyó ña̱ xi̱keʼéyó tá ya̱chi̱. Ta ná kǒo ndakanixi̱níyó xa̱ʼa̱ ña̱ʼa ña̱ kini (Filip. 4:8; Col. 3:2). w23.01 10 párr. 7, 9, 10

Ta iin ki̱ʼva ña̱ na̱ʼa̱yó ña̱yóʼo kúú ña̱ natúʼunyó xa̱ʼa̱ Ndióxi̱ xíʼin ndiʼi na̱ yiví. Ni nda̱a̱ ndáaka ñuu ke̱ena, ki̱ʼva ña̱ íyona, ni kúúna na̱ ku̱i̱ká á na̱ nda̱ʼví. Tasaá kúú ña̱ chíndeétáʼanyó xíʼin Jehová, “chi ña̱ kúni̱ra kúú ña̱ ná ka̱ku ndiʼi na̱ yiví, ta ná xa̱a̱na kunda̱a̱ káxi inina mií ña̱ nda̱a̱ xa̱ʼa̱ra” (1 Tim. 2:4). Inka ki̱ʼva ña̱ na̱ʼa̱yó ña̱ kúʼvi̱-iniyó xíniyó Jehová xíʼin ta̱ Jesús kúú ña̱ kuʼvi̱-iniyó kuniyó na̱ hermanoyó. Tá kúú, ndíʼi-iniyó xa̱ʼa̱na ta chíndeétáʼanyó xíʼinna tá ku̱a̱yaʼana nu̱ú tu̱ndóʼo ña̱ yo̱ʼvi̱ní. Sándi̱koyó inina tá xíʼi̱ iin na̱ veʼena, ta xáʼa̱nyó xítoyóna tá ndeéndóʼona, saátu chíka̱a̱níyó ndee̱ xíʼinna tá ndákava-inina (2 Cor. 1:​3-7; 1 Tes. 5:​11, 14). Saátu káʼa̱nyó xa̱ʼa̱na xíʼin Ndióxi̱ chi kúnda̱a̱-iniyó ña̱ “tá káʼa̱n iin na̱ yiví na̱ nda̱kúní-ini xíʼin Ndióxi̱, ña̱ káʼa̱n na̱yóʼo kúúmiíníña ndee̱ ta va̱ʼaní chíndeétáʼanña xíʼin inkana” (Sant. 5:16). w23.01 28, 29 párr. 7, 8

Iin na̱ íxava̱ʼa veʼe, tá yáʼa tiempo saá kúú ña̱ xáa̱na va̱ʼaníka íxava̱ʼanaña. Saátu miíyó, tá yáʼa tiempo va̱ʼaníka kuxini̱yó ndáa ki̱ʼva ndasandakúyó-ini na̱ hermanoyó. Ña̱kán ná ndasandakúyó-ini na̱ hermanoyó ña̱ kundeé-inina ya̱ʼana nu̱ú tu̱ndóʼo (Heb. 11:​32-35; 12:1). Ta ná natúʼunyó xíʼinna xa̱ʼa̱ inka na̱ hermano na̱ chíka̱a̱ní ndee̱ ña̱ kachíñuna nu̱ú Ndióxi̱. Ta saátu ná chika̱a̱yó ndee̱ ña̱ viíní kutáʼanyó xíʼinna (Efes. 4:3). Ta iin ki̱ʼva ña̱ keʼéyó ña̱yóʼo kúú ña̱ ka̱ʼa̱nyó xa̱ʼa̱ ña̱ va̱ʼa ña̱ kéʼéna. Ná chika̱a̱níyó ndee̱ ña̱ viíní kutáʼanyó xíʼin na̱ hermanoyó tá va̱ása inkáchi íyo ña̱ ndákanixi̱níyó. Saátu ná kuniñúʼuyó ña̱ nda̱a̱ ña̱ va̱xi nu̱ú tu̱ʼun Ndióxi̱ ña̱ ndasandakúyó-inina. Ná chindeétáʼanyó xíʼinna tá íyo ña̱ ndóʼona, ta saátu ná chindeétáʼanyó xíʼin na̱ va̱ása chíka̱a̱ka ndee̱ kachíñu nu̱ú Ndióxi̱. Kivi kusi̱íní-iniyó tá chíndeétáʼanyó xíʼin na̱ hermanoyó ña̱ ndasandakúyó-inina. Tá ná ya̱ʼa tiempo, iin veʼe kivi ndiʼi-xa̱ʼa̱ña soo ña̱ ndásandakúyó-ini na̱ hermanoyó ndiʼi tiempo va̱ʼaní chindeétáʼan ña̱yóʼo xíʼinna. w22.08 22 párr. 6; 25 párr. 17, 18

Ta̱ Jesús ni̱ka̱ʼa̱nra ña̱ ndáyáʼviní sakúaʼayó ndakanixi̱níyó chi saá kúú ña̱ kunda̱a̱-iniyó xíʼin ña̱ káʼa̱n Biblia (Mat. 24:15). ¿Ndáa ki̱ʼva keʼéyóña? Kivi ndakanixi̱níyó ndáa ki̱ʼva kítáʼan ña̱ va̱xi iin táʼví nu̱ú Biblia xíʼin ña̱ káʼa̱n inkaña ta nda̱chun kúú ña̱ xa̱a̱ síín káʼa̱nña, ta ná chika̱a̱yó ndee̱ ña̱ kunda̱a̱-iniyó xíʼinña. Ta nda̱a̱ táki̱ʼva ni̱ka̱ʼa̱n ta̱ Jesús ña̱ viíní ndakanixi̱níyó chindeétáʼanña xíʼinyó ña̱ kunda̱a̱-iniyó ndáa ki̱ʼva xínu profecía ña̱ va̱xi nu̱ú Biblia tiempo vitin. Saátu chindeétáʼanña xíʼinyó kunda̱a̱-iniyó xa̱ʼa̱ ndiʼi ña̱ káʼviyó nu̱ú Biblia. Jehová kúú ta̱ chíndeétáʼan xíʼinyó ña̱ vií ndakanixi̱níyó, ña̱kán ndáyáʼviní ka̱ʼa̱nyó xíʼinra ña̱ chindeétáʼanra xíʼinyó ña̱ vií ndakanixi̱níyó. Xíniñúʼu taváyó tiempo ña̱ kaʼviyó Biblia ta saátu kotoyó ndáa ki̱ʼva kítáʼan ña̱ káʼviyó xíʼin ña̱ xa̱a̱ xíni̱yó xa̱ʼa̱. Ta íyo ku̱a̱ʼání tutu ña̱ tává na̱ ñuu Ndióxi̱ ña̱ kivi chindeétáʼan xíʼinyó. Tá ná nandukúyó nu̱ú ña̱yóʼo xa̱ʼa̱ ña̱ káʼviyó, saá kúú ña̱ va̱ʼaníka kunda̱a̱-iniyó xa̱ʼa̱ ña̱ káʼa̱n Ndióxi̱ (Heb. 5:14). Tá ná ndakanixi̱níyó xa̱ʼa̱ ña̱ káʼviyó nu̱ú Biblia va̱ʼaníka kunda̱a̱-iniyó xíʼinña. w23.02 10 párr. 7, 8

Ndakanixi̱ní ña̱ iin na̱ migoún sa̱níʼi̱na iin veʼe yóʼó soo ña̱yóʼo xa̱a̱ ku̱a̱ʼa̱n ndíʼi̱-xa̱ʼa̱ colorña ta kíʼvi ti̱kui̱í iniña. Soo ni saáví ku̱a̱ʼá millón ña̱ dólar ya̱ʼviña. ¿Á su̱ví ña̱ ndixa kúú ña̱ chindayáʼviníúnña ta kundaúnña? Ta ki̱ʼva saá ke̱ʼé Jehová xíʼinyó chi íyo iin ña̱ ndáyáʼviní ta̱xira ndaʼa̱yó: ña̱yóʼo kúú ña̱ tákuyó. Nu̱ú Jehová kǒo nda̱a̱ ni iin ña̱ʼa ña̱ ndáyáʼviníka, chi iinlá ña̱ ndáyáʼviníka nu̱úra kúú ña̱ tákuyó (Juan 3:16). Jehová kúú ta̱ táxi ña̱ tákuyó (Sal. 36:9). Ña̱yóʼo kúútu ña̱ ni̱ka̱ʼa̱n ta̱ apóstol Pablo xa̱ʼa̱ tá ka̱chira: “Xa̱ʼa̱ ta̱kán kúú ña̱ tákuyó, kánda̱yó ta íyoyó” (Hech. 17:​25, 28). Xa̱ʼa̱ ña̱yóʼo kúú ña̱ káʼa̱nyó ña̱ Ndióxi̱ kúú ta̱ ta̱xi ña̱ tákuyó. Ta ta̱yóʼo táxira ndiʼi ña̱ xíniñúʼuyó ña̱ va̱ʼa kutakuyó (Hech. 14:​15-17). Jehová va̱ása kéʼéra milagro tiempo vitin ña̱ va̱ʼa kutakuyó. Chi ña̱ kúni̱ra kúú ña̱ ná chika̱a̱níyó ndee̱ ña̱ kundaayó miíyó ña̱ ná kǒo kiʼin kue̱ʼe̱ miíyó. Ta saátu ná chika̱a̱yó ndee̱ ña̱ kuyatinyó nu̱úra ta ña̱yóʼo chindeétáʼanña xíʼinyó ña̱ va̱ʼaka kachíñuyó nu̱úra (2 Cor. 7:1). w23.02 20 párr. 1, 2

Táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira Biblia ndaʼa̱yó. Chi nu̱ú ña̱yóʼo va̱ʼaní consejo ña̱ táxira ndaʼa̱yó ña̱ kivi chindeétáʼan xíʼinyó tá yáʼayó nu̱ú tu̱ndóʼo. Ta saátu káʼa̱nña xíʼinyó xa̱ʼa̱ ña̱ va̱ʼa ña̱ ndakiʼinyó chí nu̱únínu. Soo mií ña̱ ndáyáʼvika káʼa̱nña xa̱ʼa̱ kúúña ndáa ki̱ʼva íyo Jehová. Tá ná ndakanixi̱níyó xa̱ʼa̱ ña̱ va̱ʼa ña̱ kúúmií Jehová, ndakanda̱-iniyó, ta ña̱yóʼo chindeétáʼanña xíʼinyó ña̱ kooyó migora (Sal. 25:14). Jehová kúni̱ra ña̱ ndiʼi na̱ yiví ná kunda̱a̱-ini ndáa ki̱ʼva íyora. Xa̱ʼa̱ ña̱kán tá ya̱chi̱ xi̱niñúʼura visión, xa̱ni ta saátu na̱ ángel ña̱ va̱ʼa sanáʼa̱ra miíyó ndáa ki̱ʼva íyora (Núm. 12:6; Hech. 10:​3, 4). Tá kǒo níkaʼyína ndiʼi ña̱yóʼo nu̱ú Biblia sana kǒoví ña̱ sakúaʼayó tiempo vitin. Soo Jehová xi̱niñúʼura sava na̱ ta̱a ña̱ ná kaʼyína nu̱ú iin libro ndiʼi ña̱ kúni̱ra sanáʼa̱ra miíyó. Ndiʼi ña̱ va̱xi nu̱ú tu̱ʼun Ndióxi̱ va̱ʼaníña, chi miíra kúú ta ni̱ka̱ʼa̱n ndáaña ka̱ʼyi̱ nu̱úña ta va̱ʼaní chíndeétáʼanña xíʼinyó (Sal. 18:30). w23.02 2 párr. 1, 2

Keʼé ña̱ ndixa ndáyáʼvi. Chi ña̱yóʼo va̱ʼaníka chindeétáʼanña xíʼún ña̱ va̱ʼaníka kandíxaún Ndióxi̱ ta saátu ña̱ va̱ʼaníka kachíñún nu̱úra (Efes. 3:16). Tá kúú, kivi chika̱ún ndee̱ ña̱ viíka sakúaʼún xa̱ʼa̱ Ndióxi̱ ta saátu ña̱ kaʼvi ni̱ʼún tu̱ʼunra (Sal. 1:​2, 3). Inkatu ña̱ kivi keʼún kúú ña̱ ka̱ʼa̱n ni̱ʼún xíʼin Ndióxi̱, ta nda̱a̱ níma̱ún ná kana ña̱ ka̱ʼún xíʼinra. Sanatu kivi chika̱ún ndee̱ ña̱ viíníka koo ña̱ ndaka̱xiún kusíkíún á ña̱ kotonde̱ʼún, ta kivitu sakúaʼún ña̱ viíka kuniñúʼún tiempo ña̱ kúúmiíún (Efes. 5:​15, 16). Tá chíndeétáʼún xíʼin inkana, ña̱yóʼo va̱ʼaní chindeétáʼanña xíʼún ña̱ xa̱ún koún iin na̱ hermano na̱ xu̱xa-ini. Kivi chindeétáʼún xíʼin na̱ hermano na̱ ndeéndóʼo á kivitu chindeétáʼún xíʼin na̱ hermano na̱ xa̱a̱ chée ña̱ keʼún chiñu veʼena á ña̱ chindeétáʼún xíʼinna ña̱ kuniñúʼuna celular á tableta. Ta saátu kivi ku̱ʼún natúʼún xa̱ʼa̱ Ndióxi̱ xíʼin inka na̱ kǒo xíni̱ xa̱ʼa̱ra, tasaá na̱ʼún ña̱ kúʼvi̱-iniún xíniúnna (Mat. 9:​36, 37). Ta inkaka ña̱ kivi keʼún kúú ña̱ chika̱ún ndee̱ ña̱ ku̱a̱ʼáka tiempo kachíñún nu̱ú Jehová. w22.08 6 párr. 16, 17