Marzo

Biblia káʼa̱nña xa̱ʼa̱ sava na̱ yiví na̱ va̱ʼaní xi̱ndasakáʼnu Jehová soo tá ni̱ya̱ʼa tiempo kǒo níndasakáʼnukanara. Ta iin ta̱yóʼo xi̱kuu ta̱ rey Salomón, ta̱yóʼo xi̱xini̱vara ndáa ki̱ʼva íyo Jehová ta xi̱kunda̱a̱-inira ndáa ki̱ʼva xi̱niñúʼu ndasakáʼnurara ta ku̱a̱ʼáníva ña̱ va̱ʼa ta̱xi Jehová ndaʼa̱ra. Soo tá ni̱ya̱ʼa tiempo ki̱xáʼara ndásakáʼnura ndióxi̱ vatá ta ña̱yóʼo sa̱sáa̱níña Jehová. Ña̱kán ku̱a̱ʼání ku̱i̱ya̱ ni̱xo̱ʼvi̱ na̱ ñuu xa̱ʼa̱ ña̱ ke̱ʼé ta̱ Salomón. Biblia káʼa̱nña ña̱ tá ni̱xi̱ʼi̱ra sa̱ndúxu̱nnara nu̱ú ni̱ndu̱xu̱n na̱ táʼanra na̱ xi̱ndoo xi̱naʼá, tá kúú ta̱ rey David (1 Rey. 11:​5-9, 43; 2 Rey. 23:13). Soo, ¿á xa̱ʼa̱ ki̱ʼva ña̱ sa̱ndúxunara kúú ña̱ ndatakura? Biblia va̱ása káʼa̱nña saá. Su̱ví xa̱ʼa̱ ña̱ ni̱xi̱ʼi̱na ta ndo̱o ku̱a̱china kúni̱ kachiña ña̱ sandátaku Jehová na̱yóʼo ta taxira ña̱ kundoona nu̱ú ñuyǐví xa̱á. Jehová xíni̱ra ndáa na̱ kúú na̱ sandátakura xa̱ʼa̱ ña̱ kúʼvi̱ní-inira xínirana ña̱ va̱ʼa ndasakáʼnunara ndiʼi tiempo (Job 14:​13, 14; Juan 6:44). Ña̱kán, ¿á ndataku ta̱ Salomón? Mií Jehová xíni̱ á sandátakurara, miíyó kǒo xíni̱víyó. Soo kúnda̱a̱-iniyó ña̱ va̱ʼaníva koo ña̱ keʼé Jehová. w24.05 4 párr. 9

Tá tiempo xi̱naʼá, ni̱xi̱yo veʼe válí ña̱ xi̱ ixava̱ʼana xíʼin tela, ta ini ña̱yóʼo kivi ndakindee̱na á koo sávína. Tá iin na̱ yiví xi̱kiʼvina ini veʼe yóʼo va̱ʼaní xi̱kuni̱na saáchi xi̱taxina ña̱ xi̱xixina. Ta tiempo vitin, kíʼviyó ini veʼe Jehová tá ndákuchiyó. Yóʼo kúú nu̱ú sákuaʼayó xa̱ʼa̱ Jehová, ta saátu va̱ʼaní kítáʼanyó xíʼin na̱ ñaniyó xíʼin ku̱ʼvayó na̱ ñúʼu ti̱xin ñuura. Soo, ¿ndáa mií íyo veʼe Jehová? Su̱ví iin veʼe ndixa kúú ña̱yóʼo ta kǒo iin lugar nu̱ú íyoña, soo ndiʼi na̱ xíniso̱ʼo ña̱ káʼa̱n Jehová ta ndásakáʼnunara nda̱a̱ táki̱ʼva íyo na̱ ñúʼu veʼera saá íyona (Apoc. 21:3). ¿Ndáaña ku̱u xíʼin na̱ xi̱ndasakáʼnu Jehová tiempo xi̱naʼá? ¿Á íyokana veʼe Jehová? Íyovana. ¿Nda̱chun káʼa̱nyó ña̱yóʼo? Saáchi ña̱ Biblia káʼa̱nña ña̱ ni xa̱a̱ ni̱xi̱ʼi̱na nda̱a̱ táki̱ʼva íyo na̱ táku saá íyona nu̱ú Jehová chi ndákaʼánkavara xa̱ʼa̱na. Ta̱ Jesús ni̱ka̱ʼa̱nra ña̱ ndatakuva na̱ ni̱xi̱ʼi̱: “Nda̱a̱ ta̱ Moisés ni̱ka̱ʼa̱n [...] xa̱ʼa̱ña tá ni̱ka̱ʼa̱nra xa̱ʼa̱ yitu̱n tú iñú, ta saátu tá ni̱ka̱ʼa̱nra xa̱ʼa̱ Jehová ña̱ kúúra, ‘Ndióxi̱ ta̱ Abrahán, Ndióxi̱ ta̱ Isaac, Ndióxi̱ ta̱ Jacob.’ Ta̱yóʼo su̱ví Ndióxi̱ na̱ ni̱xi̱ʼi̱ kúúra, chi Ndióxi̱ na̱ táku kúúra, saáchi nu̱ú ta̱yóʼo ndiʼi na̱kán na̱ táku kúúna nu̱úra” (Luc. 20:​37, 38). w24.06 3 párr. 6, 7

Ta̱ Sadoc ni̱xa̱ʼa̱nra Hebrón ta ni̱xi̱yo tu̱ʼvara ña̱ ku̱ʼu̱nra nu̱ú ku̱a̱chi (1 Crón. 12:38). Chi̱kaa̱-inira ña̱ ku̱ʼu̱nra xíʼin ta̱ David nu̱ú ku̱a̱chi, tasaá ndakiʼinna tu̱ʼun na̱ ñuu Israel. Ni va̱ása níxi̱xini̱ra kanitáʼanra soo kǒo níxi̱yiʼvíra ña̱ ku̱ʼu̱nra nu̱ú ku̱a̱chi chi ndakúní ni̱xi̱yo inira. ¿Ndáaña chi̱ndeétáʼan xíʼin ta̱ Sadoc ña̱ va̱ʼa ndakú ni̱xi̱yo inira? Sana ña̱ chi̱ndeétáʼan xíʼinra ña̱ ndakú koo inira kúú ña̱ xi̱xitora na̱ ta̱a na̱ ndakúní ni̱xi̱yo ini na̱ kǒo níxi̱yiʼví. Iin ta̱yóʼo xi̱kuu ta̱ rey David. Ndiʼina ka̱ndíxa ña̱ koo ta̱ David rey saáchi ndakúní ni̱xi̱yo inira tá xi̱xaʼa̱nra nu̱ú ku̱a̱chi ña̱ ndakiʼinra tu̱ʼun na̱ ñuu Israel (1 Crón. 11:​1, 2). Xi̱ndaaní-ini ta̱ David ña̱ chindeétáʼan Jehová xíʼinra, ta tá xi̱kuni̱na kaʼnínara xi̱kaʼa̱nra xíʼin Jehová ña̱ chindeétáʼanra xíʼinra (Sal. 138:3). Saátu xi̱ni ta̱ Sadoc ña̱ ke̱ʼé ta̱ Jehoiadá xíʼin se̱ʼera ta̱ Benaya xíʼin 22 ta̱a ta̱ xi̱niʼi yichi̱ nu̱ú na̱ xi̱xaʼa̱n nu̱ú ku̱a̱chi na̱ xi̱kitáʼan xíʼin ta̱ David (1 Crón. 11:​22-25; 12:​26-28). w24.07 3 párr. 5, 6

Ku̱a̱ʼání ña̱ va̱ása va̱ʼa ke̱ʼé ta̱ Pablo. I̱xandi̱va̱ʼara xíʼin na̱ xi̱ndiku̱n ta̱ Jesús, ña̱kán sava na̱kán xi̱ndakanixi̱nína ña̱ va̱ása kivi nasa̱mara. Soo xi̱kunda̱a̱va-ini ta̱ Jesús ña̱ kivi nasa̱ma ta̱ Pablo ta kivi ndandikó-inira. Ta̱ Jesús xíʼin Jehová ki̱ʼinna kuenta xíʼin ña̱ va̱ʼa ña̱ xi̱kuumií ta̱ Pablo. Ta̱ Jesús ka̱chira: “Nda̱kaxii̱n ta̱ ta̱a yóʼo ña̱ natúʼunra xa̱ʼíi̱ xíʼin na̱ ñuu” (Hech. 9:15). Ta nda̱a̱ ke̱ʼéra iin milagro ña̱ va̱ʼa chindeétáʼanra xíʼinra ña̱ ndandikó-inira (Hech. 7:58–8:3; 9:​1-9, 17-20). Tá ni̱ya̱ʼa tiempo, tá ni̱xa̱a̱ ta̱ Pablo nda̱kundiku̱nra ta̱ Jesús ta ndu̱ura apóstol, ta̱xiníra tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ va̱ʼaní ni̱xi̱yo inina xíʼinra chi ku̱ndáʼvi-inina xi̱ninara (1 Tim. 1:​12-15). Iin yichi̱, ku̱ndaa̱-ini ta̱ Pablo ña̱ xi̱ndikaa̱ iin ta̱a ta̱ xi̱keʼé ku̱a̱chi kini ti̱xin congregación ña̱ Corinto. ¿Ndáa ki̱ʼva nda̱saviíra ku̱a̱chi yóʼo? Tá ná kaʼviyó xa̱ʼa̱ ña̱ ke̱ʼéra, sakúaʼayó ña̱ kúʼvi̱ní-ini Jehová xínira miíyó ta viíní táxira consejo ndaʼa̱yó ta saátu íxakáʼnu-inira xa̱ʼa̱yó tá ndándikó-iniyó. w24.08 13 párr. 15, 16

¿Ndáaña kivi keʼé na̱ yiví ña̱ va̱ʼa kuyatinna nu̱ú Jehová ni kúúna na̱ yiví ku̱a̱chi? Loʼo tá loʼo ni̱ka̱ʼa̱n Jehová xa̱ʼa̱ ña̱yóʼo. Tá ni̱ki̱ʼvi ta̱ Adán xíʼin ñá Eva ku̱a̱chi, ta̱ siʼna ki̱xáʼa kándíxa Jehová xi̱kuu se̱ʼena ta̱ Abel. Ta̱yóʼo xi̱kuʼvi̱ní-inira xi̱xinira Jehová ta xi̱kuni̱ra sakúsi̱íra-inira ta kuyatinra nu̱úra. Ta xa̱ʼa̱ ña̱kán ni̱so̱kóra kití nu̱ú Jehová. Xa̱ʼa̱ ña̱ xi̱ndaara ndikachi, ki̱ʼinra sava tí nu̱ú va̱ʼa ka̱ku ta ni̱so̱kórarí nu̱ú Jehová. Ta, ¿ndáaña ke̱ʼé Jehová? “Ki̱ndoo-inira xíʼin ta̱ Abel ta saátu ña̱ ni̱so̱kóra nu̱úra” (Gén. 4:4). Tá ni̱ya̱ʼa tiempo, tá xi̱sokó na̱ yiví ña̱ʼa nu̱úra, xi̱kusi̱í-inira xíʼin ña̱yóʼo, saáchi xi̱keʼénaña xa̱ʼa̱ ña̱ kúʼvi̱-inina xíninara ta kándíxanara. Iin ta̱ ke̱ʼé ña̱yóʼo xi̱kuu ta̱ Noé (Gén. 8:​20, 21). Ta ña̱yóʼo ni̱na̱ʼa̱ña ña̱ kiviva sakúsi̱í na̱ yiví ini Jehová ta kuyatinna nu̱úra ní kúúna na̱ yiví ku̱a̱chi. w24.08 3 párr. 5, 6

Sana ndíʼi̱ní-iniyó ta ndákavaní-iniyó tá íxandi̱va̱ʼana xíʼinyó (Ecl. 7:7). Saá ndo̱ʼo ta̱ Job xíʼin ta̱ Habacuc (Job 6:​2, 3; Hab. 1:​1-3). Ña̱ nda̱a̱ xóʼvi̱níyó tá íxandi̱va̱ʼana xíʼinyó, soo ná kǒo sa̱a̱níyó saáchi tá ná keʼéyó ña̱yóʼo nda̱a̱ kivi keʼéyó iin ña̱ va̱ása va̱ʼa. Tá xítoyó ña̱ kǒo castigo ndákiʼin na̱ íxandi̱va̱ʼa xíʼinyó, sana ndákanixi̱níyó ña̱ kǒo xíniñúʼu chikaa̱kavíyó ndee̱ ña̱ keʼéyó ña̱ va̱ʼa. Ná ndakanixi̱níyó xa̱ʼa̱ ña̱ ndo̱ʼo ta̱ ka̱ʼyí ña̱ Salmo. Ta̱yóʼo xi̱xitora ña̱ ni̱xi̱yo na̱ yiví na̱ xi̱ ixandi̱va̱ʼa xíʼin inkana, soo kǒo castigo níxi̱ndakiʼinna chi va̱ʼaníva xi̱ndoona. Ta̱yóʼo ni̱ka̱ʼa̱nra: “Saá íyova na̱ yiví na̱ kéʼé ña̱ kini, kǒo tu̱ndóʼo va̱xi nu̱úna” (Sal. 73:12). Nda̱kavaní-inira xa̱ʼa̱ ndiʼi ña̱ xi̱xitora, ña̱kán si̱lóʼo sandákoora ña̱ ndasakáʼnura Jehová. Ta ni̱ka̱ʼa̱nkara: “Tá xi̱kuni̱i̱ kunda̱a̱-inii̱ xíʼin ña̱yóʼo xi̱ndi̱ʼi̱ní-inii̱” (Sal. 73:​14, 16). w24.11 3 párr. 5-7

Ndásakáʼnuyó Jehová saáchi íxato̱ʼóníyóra. Íyo ku̱a̱ʼání xa̱ʼa̱ ña̱ xíniñúʼu ixato̱ʼóyóra. Ku̱a̱ʼání ndee̱ kúúmií Jehová ta kǒo ndíʼi ndee̱ra (Sal. 96:​4-7). Tá xítoyó ndiʼi ña̱ʼa ña̱ i̱xava̱ʼara kíʼinyó kuenta ña̱ kúúmiíníra ña̱ ndíchi. Ta̱xira ña̱ tákuyó ta saátu táxira ndiʼi ña̱ xíniñúʼuyó ña̱ va̱ʼa kutakuyó (Apoc. 4:11). Iinlá Jehová kúú ta̱ nda̱kúní-ini (Apoc. 15:4). Viíní kána ndiʼi ña̱ kéʼéra ta ndiʼi tiempo sáxi̱nura ña̱ káʼa̱nra (Jos. 23:14). Xa̱ʼa̱ ña̱kán, ta̱ profeta Jeremías ni̱ka̱ʼa̱nra ña̱yóʼo xíʼinra: “Nu̱ú ndiʼika na̱ ndíchi xíʼin na̱ chíñu na̱ íyo inka ñuu, kǒo nda̱a̱ ni iin na̱ íyo nda̱a̱ táki̱ʼva íyo yóʼó” (Jer. 10:​6, 7). Xa̱ʼa̱ ña̱kán, íyo ku̱a̱ʼání xa̱ʼa̱ ña̱ xíniñúʼu ixato̱ʼóyó yiváyó ta̱ íyo chí ndiví. Ta saátu ndásakáʼnuyó Jehová saáchi kúʼvi̱ní-iniyó xíniyóra. w25.01 3 párr. 5, 6

Na̱ yiví na̱ sáa̱-ini xíni Ndióxi̱ káʼa̱nna ña̱ va̱ása va̱ʼa xa̱ʼa̱ na̱ ñuura. Tá kúú, Biblia káʼa̱nña xa̱ʼa̱ Jehová ña̱ kúni̱ra limpio ná kooyó, ña̱ kǒo keʼéyó ña̱ kini ta ná kǒo ndasakáʼnuyó ndióxi̱ vatá. Saátu káʼa̱nra ña̱ tá iin na̱ yiví kéʼéna ña̱ kini ta kǒo ndándikó-inina xa̱ʼa̱ ña̱ ke̱ʼéna xíniñúʼu keena ti̱xin congregación (1 Cor. 5:​11, 12; 6:​9, 10). Xa̱ʼa̱ ña̱ kándíxayó ña̱ káʼa̱n Ndióxi̱ na̱ sáa̱-ini xíni miíra káʼa̱nna ña̱ kǒo kúʼvi̱-iniyó xíniyó na̱ yiví, ña̱ íxandi̱va̱ʼayó xíʼinna ta saátu ña̱ kúndasíyó xíniyóna. Ná ndakaʼányó chi ta̱ Ndi̱va̱ʼa kúú ta̱ káʼa̱n ña̱ vatá xa̱ʼa̱ na̱ ñuu Ndióxi̱ (Juan 8:44; Gén. 3:​1-5). Ña̱kán kǒo ndákanda̱-iniyó ña̱ xíniñúʼura na̱ yiví ña̱ ka̱ʼa̱nna ña̱ vatá xa̱ʼa̱ na̱ ñuu Ndióxi̱. w24.04 10, 11 párr. 13, 14

Tá xa̱a̱ ndíkaa̱ ña̱ gran tribulación, sana sava na̱ yiví kotona ña̱ ndi̱ʼi-xa̱ʼa̱ “Babilonia ña̱ káʼnu” tasaá ndakaʼánna ña̱ xa̱a̱ ku̱a̱ʼání ku̱i̱ya̱ ni̱xi̱ka na̱ testigo Jehová ni̱ka̱ʼa̱nna ña̱ kuu ña̱yóʼo. Ña̱kán, tá ná kuni na̱ yiví kuu ña̱yóʼo, ¿á kixáʼana ndasakáʼnuna Jehová? (Apoc. 17:5). Ná ndakanixi̱níyó ña̱ ku̱u tiempo tá ni̱xi̱yo ta̱ Moisés. Ku̱a̱ʼání na̱ yiví ki̱xáʼana kándíxana Jehová tá xi̱nina ña̱ ni̱xi̱nu 10 saá plaga ña̱ ni̱ka̱ʼa̱n ta̱ Moisés. Xa̱ʼa̱ ña̱kán, tá ke̱e na̱ ñuu Israel ñuu Egipto, saátu ke̱e ku̱a̱ʼání na̱ yiví na̱ inka ñuu ku̱a̱ʼa̱nna xíʼinna (Éx. 12:38). Tá ná kuni na̱ yiví ña̱ ndi̱ʼi-xa̱ʼa̱ Babilonia ña̱ káʼnu, ¿á sa̱a̱yó tá ná kuni̱na ndasakáʼnuna Jehová tá si̱lóʼoní kúma̱ní ña̱ kixáʼa Armagedón? Kǒo xíniñúʼu sa̱a̱víyó chi kúni̱yó keʼéyó nda̱a̱ táki̱ʼva kéʼé Jehová, saáchi kúndáʼviní-inira xínira na̱ yiví, va̱ʼaní-inira, kúeení-inira, kúʼvi̱-inira xínira miíyó ta ndiʼi ña̱ káʼa̱nra ña̱ nda̱a̱ kúúña (Éx. 34:6). w24.05 11 párr. 12, 13

¿Ndáaña kundoʼoyó tá ná kǒo kandíxakayó ña̱ va̱xi nu̱ú Biblia? Ná ka̱ʼa̱nyó xa̱ʼa̱ ña̱ ku̱u tá siglo nu̱ú. Sava na̱ cristiano ki̱xáʼana káʼa̱nna ña̱ xa̱a̱ ki̱xaa̱ ki̱vi̱ káʼnu Jehová. Sana ni̱xi̱yo iin carta ña̱ xi̱ka̱ʼa̱n xa̱ʼa̱ ña̱yóʼo, ta xi̱ka̱ʼa̱nna ña̱ sana ta̱ apóstol Pablo kúú ta̱ ka̱ʼyíña. Soo, kǒo nínandukú va̱ʼana xa̱ʼa̱ña. Ña̱kán, sava na̱ cristiano na̱ congregación ña̱ Tesalónica ki̱xáʼana kándíxana ña̱yóʼo ta ki̱xáʼana nátúʼunna xa̱ʼa̱ña xíʼin inkana. Tá níndakaʼánna xa̱ʼa̱ ña̱ sa̱náʼa̱ ta̱ Pablo miína tiempo ña̱ ni̱xi̱yora xíʼinna, sana kǒo kandíxavína ña̱ vatá yóʼo (2 Tes. 2:​1-5). Ta̱ apóstol Pablo ni̱ka̱ʼa̱nra xíʼinna ña̱ ná kǒo kandíxana ndiʼi ña̱ káʼa̱nna xíʼinna. Ta ña̱ va̱ʼa kǒo sandáʼvi tukunana, tu̱ʼun ña̱ so̱ndíʼi ña̱ ka̱ʼyíra nu̱ú carta ña̱ u̱vi̱ káchiña: “Yi̱ʼi̱ ta̱ Pablo kúú ta̱ káʼyí ña̱yóʼo ku̱xa̱a̱ nu̱úndó ña̱ chíndeéi̱ ndóʼó. Saá káʼyíi̱ ndiʼi carta ña̱ va̱ʼa kunda̱a̱-inindó ña̱ yi̱ʼi̱ kúú ta̱ káʼyíña” (2 Tes. 3:17). w24.07 12 párr. 13, 14

Xi̱niñúʼu kundeé-ini na̱ cristiano na̱ xi̱ndoo chí Judea saáchi xa̱a̱ ku̱nu̱mí kixi ku̱a̱ʼá tu̱ndóʼo nu̱úna. Sava na̱ cristiano yóʼo i̱xandi̱va̱ʼana xíʼinna ta ku̱ndeé-inina, soo inkana sa̱kúaʼana xa̱ʼa̱ Ndióxi̱ tá kǒo ku̱a̱chi níxi̱yo. Ta̱ apóstol Pablo ni̱ka̱ʼa̱nra xíʼinna ña̱ ndeéka koo tu̱ndóʼo ña̱ kixi nu̱úna ta xi̱niñúʼu koo tu̱ʼvana ña̱ nda̱kú koo inina nda̱a̱ ná kuvina nda̱a̱ táki̱ʼva ke̱ʼé ta̱ Jesús (Heb. 12:4). Ku̱a̱ʼání na̱ judío xi̱saa̱nína chi ku̱a̱ʼání na̱ ñuuna xi̱nduuna cristiano. Ku̱i̱ya̱ chí sa̱tá yáʼaka 40 na̱ judío “ki̱ndoona ña̱ va̱ása kuxuna ta ni va̱ása koʼona nda̱a̱ ni iin ña̱ʼa nda̱a̱ ná kaʼnína ta̱ Pablo” (Hech. 22:22; 23:​12-14). Ni ni̱xi̱yo ku̱a̱ʼání na̱ xi̱saa̱-ini xi̱xini na̱ cristiano, kǒo nísandákoona ña̱ ndatakana ni ña̱ natúʼunna xa̱ʼa̱ Ndióxi̱ ta saátu kǒo ni sandákoona ña̱ kandíxanína Ndióxi̱. w24.09 12 párr. 15

Xi̱kuʼvi̱ní-ini ta̱ Jesús xi̱xinira ta̱ apóstol Juan (Mat. 10:2). Ta̱yóʼo ni̱xi̱kara xíʼin ta̱ Jesús ña̱ xi̱natúʼunra xíʼin na̱ yiví, xi̱nira milagro ña̱ ke̱ʼé ta̱ Jesús ta saátu ni̱xi̱yora xíʼinra tá ni̱ya̱ʼara nu̱ú tu̱ndóʼo. Ni̱xi̱yora xíʼin ta̱ Jesús tá xa̱ʼnínara ta saátu xi̱nira tá nda̱takura. Xi̱nira ndáa ki̱ʼva xa̱ʼnu congregación tá siglo nu̱ú ta saátu xi̱nira tá ku̱ndaa̱-ini ndiʼi na̱ yiví xa̱ʼa̱ tu̱ʼun Ndióxi̱ (Col. 1:23). Tá si̱lóʼo kúma̱ní kuvi ta̱ Juan, ka̱ʼyira sava tutu ña̱ va̱xi nu̱ú tu̱ʼun Ndióxi̱ ta saátu ka̱ʼyira ña̱ ni̱ka̱ʼa̱n ta̱ Jesucristo (Apoc. 1:1). Saátu ka̱ʼyira Evangelio ña̱ Juan xíʼin u̱ni̱ carta. Carta ña̱ u̱ni̱ ka̱ʼyiraña ku̱a̱ʼa̱n nu̱ú iin ta̱ xi̱ndasakáʼnu Ndióxi̱ ta̱ xi̱naní Gayo, ta xi̱kuni̱níra xi̱xinirara (3 Juan 1). Ña̱ ka̱ʼyi ta̱ Juan va̱ʼaní chíndeétáʼanña xíʼin ndiʼi miíyó na̱ ndásakáʼnu Ndióxi̱ nda̱a̱ tiempo vitin. w24.11 12 párr. 15, 16

Iin ta̱a ta̱ kúni̱ní xíni ñá síʼira chíndayáʼvinírañá ta nda̱a̱ táki̱ʼva íyo iin regalo ña̱ ndáyáʼviní ta̱xi Jehová ndaʼa̱ra saá íyoñá nu̱úra (Prov. 18:22; 31:10). Xa̱ʼa̱ ña̱kán chíndayáʼvirañá, ndáarañá, va̱ʼa íyo inira xíʼinñá ta íxato̱ʼórañá ni tá íyo mitúʼunna á tá kísi̱na xíʼin táʼanna. Ta va̱ása íxandúxara xíʼinñá ña̱ keʼéñá ña̱ʼa ña̱ kǒo kúni̱ñá keʼéñá á ña̱ sándi̱ʼi̱ ña̱ xínitúni̱ñá tá xa̱a̱ kísi̱na xíʼin táʼanna. Saátu miíra chíkaa̱ra ndee̱ ña̱ kǒo keʼéra ña̱ʼa ña̱ sándi̱ʼi̱ ña̱ xínitúni̱ra nu̱ú Jehová (Hech. 24:16). Ndóʼó ta̱ íyo ñá síʼi, kǒo kaka-inindó ña̱ chíndayáʼviní Jehová ndiʼi ña̱ kéʼéndó ña̱ íxato̱ʼóndó ñá síʼindó. Va̱ása keʼéndó ña̱ʼa ña̱ kivi saxóʼvi̱-ini ñá síʼindó ta va̱ʼaní koo inindó xíʼinñá, ixato̱ʼóndóñá ta kuʼvi̱ní-inindó kunindóñá. Tá saá kéʼéndó, na̱ʼa̱ndó ña̱ kúni̱níndó xínindóñá ta chíndayáʼvindóñá. Tá íxato̱ʼóndó ñá síʼindó, saá na̱ʼa̱ndó ña̱ ndáyáʼviní ña̱ kítáʼanndó xíʼin Jehová nu̱úndó (Sal. 25:14). w25.01 13 párr. 17, 18

Miíyó na̱ testigo Jehová xíʼin ña̱ kéʼéyó náʼa̱yó ña̱ kúni̱níyó natúʼunyó xíʼin na̱ yiví xa̱ʼa̱ Jehová. ¿Ndáaña kivi chindeétáʼan xíʼinyó ña̱ kusi̱íka-iniyó tá ku̱a̱ʼa̱nyó natúʼunyó xa̱ʼa̱ Ndióxi̱? Iin ña̱ kivi chindeétáʼan xíʼinyó ña̱ kusi̱íka-iniyó tá ku̱a̱ʼa̱nyó natúʼunyó xíʼin na̱ yiví xa̱ʼa̱ Ndióxi̱ kúú ña̱ sakúaʼayó xa̱ʼa̱ ña̱ ke̱ʼé ta̱ Jesús. Ndiʼi tiempo ña̱ ni̱xi̱yo ta̱ Jesús nu̱ú ñuʼú yóʼo, chi̱kaa̱níra ndee̱ ña̱ va̱ʼa kusi̱íka-inira natúʼunra xíʼin na̱ yiví xa̱ʼa̱ Ndióxi̱. Ta̱ Jesús chi̱táʼanra miíra xíʼin iin ta̱a ta̱ xi̱ndaa tú higo u̱ni̱ ku̱i̱ya̱, soo tú yitu̱n yóʼo kǒo nda̱a̱ ni iin ku̱i̱ʼi nítaxinú. Ki̱ʼva saá ndo̱ʼo ta̱ Jesús saáchi u̱ni̱ ku̱i̱ya̱ na̱túʼunra xíʼin na̱ judío xa̱ʼa̱ Ndióxi̱, soo loʼoníva kúú na̱ ni̱xa̱a̱ ku̱u discípulora. Nda̱a̱ táki̱ʼva ke̱ʼé ta̱ ta̱a ta̱ xi̱ndaa tú higo ña̱ kǒo nísandákoora ña̱ kundaaranú, ki̱ʼva saá ke̱ʼé ta̱ Jesús chi kǒo nísandákoora ña̱ natúʼunra xíʼin na̱ yiví (Luc. 13:​6-9). Ña̱ sakúaʼayó xa̱ʼa̱ ña̱ʼa ña̱ ke̱ʼé ta̱ Jesús chindeétáʼanña xíʼinyó ña̱ kusi̱í-iniyó natúʼunyó xíʼin na̱ yiví. w25.03 14, 15 párr. 1-4

Soo tá xa̱a̱ nda̱ni̱ʼún iin na̱ kúni̱ún tindaʼa̱ xíʼún. ¿Á ndi̱ku̱n kama ka̱ʼún xíʼinna ña̱ kútóoníúnna? Biblia káʼa̱nña ña̱ iin na̱ yiví ndíchi siʼna kúnda̱a̱-inina xa̱ʼa̱ iin ña̱ʼa tasaá kéʼénaña. Ña̱kán siʼna kotoún ndáa ki̱ʼva íyo na̱ yiví kán tasaá taxiún ya̱ʼa loʼo tiempo saáví ka̱ʼún xíʼinna ña̱ kúni̱únna. Sana kivi ndakanixi̱níún: “¿Ndáaña kivi ke’íi̱ tasaá kǒo kuni na̱ yiví na̱ kútói̱ ña̱ xítoi ña̱ ké’éna?”. Kivi kotoúnna tá xa̱a̱ xáʼún reunión á iin convivio. Kivi kiʼún kuenta ndáa ki̱ʼva íyona, ndáaña kéʼéna á ndíʼi̱-inina xa̱ʼa̱ ña̱ vií kutáʼanna xíʼin Ndióxi̱, ndáana kúú migona, ndáaña kúú ña̱ kútóokana natúʼunna xa̱ʼa̱ (Luc. 6:45). ¿Á kútóona keʼéna táʼan chiñu ña̱ kútóoún keʼún nu̱ú Ndióxi̱? Kivi nda̱ka̱tu̱ʼún na̱ anciano á inkaka na̱ hermano na̱ xíni̱ ndáa ki̱ʼva íyona (Prov. 20:18). Kivi nda̱ka̱tu̱ʼúnna ndáaña káʼa̱nna xa̱ʼa̱na á ndáa ki̱ʼva íyona (Rut 2:11). Tá xa̱a̱ xítoún ndáa ki̱ʼva íyona, kiʼún kuenta ña̱ kǒo sandíʼún-inina, kǒo kundikún sa̱tána ndiʼi tiempo á ña̱ ndiʼi tiempo kuni̱ún kunda̱a̱-iniún xa̱ʼa̱ ndiʼi ña̱ kéʼéna. w24.05 22 párr. 7, 8

Na̱ anciano ndíku̱nna yichi̱ ta̱ Jesús saáchi va̱ása ndi̱ku̱n ndákanixi̱nína ña̱ va̱ása kúni̱ na̱ ni̱ki̱ʼvi ku̱a̱chi ndikó-inina. Íyo sava na̱ ndándikó-ini yichi̱ nu̱ú ña̱ ndátaka na̱ anciano xíʼinna ta savana ku̱a̱ʼáka loʼo tiempo yáʼa tasaá ndándikó-inina. Xa̱ʼa̱ ña̱kán ku̱a̱ʼáka loʼo yichi̱ xíniñúʼu ndataka na̱ anciano xíʼinna. Sana tá ná ndataka na̱ anciano xíʼinna ña̱ yichi̱ nu̱ú kixáʼana ndakanixi̱nína xa̱ʼa̱ ña̱ ke̱ʼéna ta ka̱ʼa̱nna xíʼin Jehová ña̱ ná ixakáʼnu-inira xa̱ʼa̱na (Sal. 38:18). Ta sana tá ná ndataka tuku na̱ anciano xíʼinna sana xa̱a̱ na̱samavana ki̱ʼva ña̱ ndákanixi̱nína xa̱ʼa̱ ña̱ ke̱ʼéna. Ña̱ va̱ʼa chindeétáʼan na̱ anciano xíʼin na̱ ni̱ki̱ʼvi ku̱a̱chi ña̱ ndikó-inina, xíniñúʼu kunda̱a̱-inina xíʼin ña̱ ndóʼona ta va̱ʼa koo inina xíʼinna. Saátu xíniñúʼu ka̱ʼa̱nna xíʼin Jehová ña̱ ná chindeétáʼanra xíʼinna xa̱ʼa̱ ndiʼi ña̱ xa̱a̱ ke̱ʼéna xa̱ʼa̱ na̱ yiví na̱ ni̱ki̱ʼvi ku̱a̱chi ña̱ va̱ʼa vií ndakanixi̱nína ta ndandikó-inina (2 Tim. 2:​25, 26). w24.08 22, 23 párr. 12, 13

¿Ndáaña sa̱kúaʼayó nu̱ú u̱ʼu̱n artículo yóʼo? Ña̱ va̱ása kúni̱ Jehová ná ndiʼi-xa̱ʼa̱ nda̱a̱ ni iin na̱ yiví. Kúni̱ra kutáʼan tuku na̱ ni̱ki̱ʼvi ku̱a̱chi xíʼinra (2 Cor. 5:20). Xa̱ʼa̱ ña̱kán xa̱a̱ xi̱naʼáví káʼa̱n Jehová xíʼin na̱ ku̱xíká nu̱úra ña̱ ná ndikó-inina ta ná ndikóna nu̱úra. Ndáyáʼviní chiñu ña̱ kúúmií na̱ anciano saáchi káchíñuna xíʼin Jehová ña̱ va̱ʼa chindeétáʼanna xíʼin na̱ ni̱ki̱ʼvi ku̱a̱chi ndeé ña̱ ndikó-inina (Rom. 2:4; 1 Cor. 3:9). Ná ndakanixi̱níyó ndáa ki̱ʼva kúsi̱íní-inina chí ndiví tá ndíkó-ini iin na̱ ni̱ki̱ʼvi ku̱a̱chi. Yiváyó Jehová kúsi̱íní-inira tá ndíkó iin na̱ ku̱xíká ti̱xin congregación. Ña̱kán ná kǒo nandósoyó ña̱ kúndáʼvi-ini Jehová xínira miíyó, ña̱ íxakáʼnu-inira xa̱ʼa̱yó ta va̱ʼa-inira xíʼinyó. Tá ná ndakaʼányó xa̱ʼa̱ ña̱yóʼo xa̱a̱yó kuʼvi̱ka-iniyó kuniyóra (Luc. 1:78). w24.08 31 párr. 16, 17

Tá nítaxi ta̱ Jesús ña̱ ndasa na̱ yiví rey miíra, ki̱ʼvira xíʼin ña̱ política ta ndakiʼinra tu̱ʼun na̱ judío chi na̱ ñuu Roma xi̱xaʼndachíñu nu̱úna. Soo kǒo níkeʼéra ña̱yóʼo, chi Biblia káʼa̱nña ña̱ ndi̱ku̱n kama nda̱kiʼinra “ku̱a̱ʼa̱nra chí yuku̱”. Ni i̱xandúxanína xíʼinra va̱ása níki̱ʼvira xíʼin ña̱ política. Iin yichi̱ va̱ʼaní chi̱núura nu̱úyó xíʼin ña̱ ke̱ʼéra. Tiempo vitin kǒoví na̱ ka̱ʼa̱n xíʼinyó ña̱ ná keʼéyó milagro ña̱ sandáʼayó na̱ kúúmií kue̱ʼe̱ á ña̱ taxiyó ña̱ kuxuna ta saátu kǒo ka̱ʼa̱nvína xíʼinyó ña̱ kaʼndachíñuyó. Soo kiviva ixandúxana xíʼinyó ña̱ ixaa votayó xa̱ʼa̱ iin na̱ ndákanixi̱nína ña̱ kivi ndasaviína tu̱ndóʼo ña̱ íyo ñuyǐví yóʼo. Va̱ʼaní yichi̱ chi̱núu ta̱ Jesús nu̱úyó chi kǒo níxiinra ki̱ʼvira xíʼin ña̱ política ta nda̱a̱ ni̱ka̱ʼa̱nra ña̱yóʼo: “Su̱ví ñuyǐví yóʼo kúú nu̱ú xáʼndachíñui̱” (Juan 17:14; 18:36). Miíyó na̱ ndásakáʼnu Ndióxi̱ xíniñúʼu ndakanixi̱níyó nda̱a̱ táki̱ʼva xi̱ndakanixi̱ní ta̱ Jesús ta saátu keʼéyó táki̱ʼva xi̱keʼéra. Nda̱kú íyo iniyó xíʼin Reino Ndióxi̱, nátúʼunyó xa̱ʼa̱ ña̱yóʼo xíʼin na̱ yiví ta káʼa̱nyó xíʼin Ndióxi̱ ña̱ kúni̱yó ña̱ kixaa̱ ki̱vi̱ ña̱ kaʼndachíñura (Mat. 6:10). w24.12 4 párr. 5, 6

Tá káʼviún tu̱ʼun Ndióxi̱, ndukú ki̱ʼva ña̱ keʼún ña̱ káʼa̱nña. Tá kúú, tá sa̱kúaʼún ña̱ va̱ʼaní-ini Jehová chikaa̱ ndee̱ ña̱ saátu keʼún xíʼin inkana. Kivi kuʼvi̱-iniún kuniún Jehová ta saátu na̱ yiví nda̱a̱ táki̱ʼva ke̱ʼé ta̱ Jesús, saátu kandíxaún keʼún ña̱ kúni̱ Jehová ta chindeétáʼún xíʼin na̱ hermano ni ná ixayo̱ʼvi̱ña xíʼún. Saátu kivi natúʼún xíʼin inkana xa̱ʼa̱ ña̱ ndáyáʼviní ke̱ʼé Jehová ña̱ ta̱xira se̱ʼera ni̱xi̱ʼi̱ra xa̱ʼa̱yó. Tá ná ndakundeéyó sakúaʼayó xa̱ʼa̱ ña̱ ta̱xi Jehová se̱ʼera ni̱xi̱ʼi̱ra xa̱ʼa̱yó, saá kúú ña̱ xa̱a̱yó kuʼvi̱ka-iniyó kuniyó Jehová xíʼin se̱ʼera ta̱ Jesús. Ta saátu miína kuʼvi̱níka-inina kunina miíyó (Sant. 4:8). Xa̱ʼa̱ ña̱kán ná chikaa̱níkayó ndee̱ ña̱ kaʼviyó xa̱ʼa̱ ndiʼi ña̱ táxi Jehová ndaʼa̱yó ña̱ va̱ʼa sakúaʼakayó xa̱ʼa̱ ña̱ ni̱xi̱ʼi̱ se̱ʼera xa̱ʼa̱yó. w25.01 25 párr. 16, 17

Texto ña̱ ki̱vi̱ vitin káʼa̱nña ña̱ tá ndíkó-iniyó xa̱ʼa̱ ku̱a̱chiyó, Jehová ndákiʼinra ña̱yóʼo ta xátaraña ta kǒo ndákaʼánkara xa̱ʼa̱ña. Versículo yóʼo kivitu kachiña: “Nda̱a̱ táki̱ʼva íyo ta̱ kǒo níki̱ʼvi ku̱a̱chi nu̱ún saá íyoi̱”. Ta nu̱ú Miqueas 7:​18, 19 Jehová káʼa̱nkara xa̱ʼa̱ inka ña̱ʼa ña̱ chindeétáʼan xíʼinyó kunda̱a̱ka-iniyó xíʼin ña̱yóʼo. Yóʼo káʼa̱nña ña̱ mií Jehová sákanara ku̱a̱chiyó nda̱a̱ nu̱ú kúnu va̱ʼa ini mar. Tiempo xi̱naʼá tá xi̱ndakava iin ña̱ʼa ini mar kǒo níxi̱kivi ndani̱ʼíkanaña. Xíʼin ña̱yóʼo sákuaʼayó ña̱ tá íxakáʼnu-ini Jehová xa̱ʼa̱yó ndákiʼinra ku̱a̱chiyó tasaá sáku̱taʼara ña̱ ve̱ení ndísoyó. Ña̱kán ni̱ka̱ʼa̱n ta̱ David: “Si̱íní íyo ini na̱ xa̱a̱ i̱xakáʼnu-ini Ndióxi̱ xa̱ʼa̱, ni ke̱ʼéna ña̱ va̱ása va̱ʼa, saátu na̱ xa̱a̱ i̱xakáʼnu-inira xa̱ʼa̱ ku̱a̱chi” (Rom. 4:7). Kǒo nda̱a̱ ni iin na̱ yiví kéʼé nda̱a̱ táki̱ʼva kéʼé Jehová. w25.02 9 párr. 7, 8

Tiempo vitin ku̱a̱ʼání na̱ yiví kítáʼanna ña̱ ndásakáʼnuna Jehová ta ku̱a̱ʼání ña̱ va̱ʼa kéʼéna, ndiʼi na̱yóʼo kúú na̱ ñuu Jehová ta va̱ʼaní kítáʼanna ta chíkaa̱na ndee̱ ña̱ ixato̱ʼó táʼanna. Xa̱a̱ chi̱kaa̱-inina ña̱ iinlá Jehová ndasakáʼnuna ta saátu kúni̱na ña̱ ku̱a̱ʼání na̱ yiví ná xa̱a̱na vií kutáʼanna xíʼin Jehová ta ndasakáʼnunara. Ku̱a̱ʼání ña̱ kini kéʼé na̱ yiví na̱ ndóo tiempo vitin ta sáa̱ní-inina xíni-táʼanna. Soo Jehová kúúmiíra iin ñuu ta ndiʼiyó na̱ ñúʼu ti̱xin ña̱yóʼo íxato̱ʼó táʼanyó ta va̱ʼaní kítáʼanyó (1 Juan 5:19; Apoc. 12:12). Jehová xíni̱ra ña̱ kivi ixandi̱va̱ʼa na̱ yiví xíʼinyó ña̱kán ka̱nara miíyó ña̱ ñúʼuyó ti̱xin ñuura ta yóʼo va̱ʼaní ndásakáʼnuyóra nda̱a̱ táki̱ʼva kúni̱ra. Biblia káʼa̱nña ña̱ nda̱a̱ táki̱ʼva íyo iin jardín ña̱ liviní saá íyo ñuura (Is. 4:6; 58:11). Mií Jehová táxi bendición ndaʼa̱yó ña̱kán ndiʼi miíyó na̱ ñúʼu ti̱xin ñuura kúsi̱íní-iniyó ta va̱ʼaní kúniyó ni ndóoyó ki̱vi̱ so̱ndíʼi (Is. 54:14; 2 Tim. 3:1). w24.04 20 párr. 1, 2

Tá kúni̱ún tindaʼún, sana xa̱a̱ káʼa̱nvaún xíʼin Jehová xa̱ʼa̱ ña̱yóʼo. Kǒo káʼa̱nví Jehová ña̱ ndukúra iin na̱ tindaʼa̱ xíʼún. Soo ndíʼi̱va-inira xa̱ʼún ta kíʼinra kuenta xíʼin ña̱ xíniñúʼún, ña̱kán chindeétáʼanvara xíʼún ña̱ ndani̱ʼún iin na̱ tindaʼa̱ xíʼún. Ña̱kán ka̱ʼa̱n xíʼinra ndáaña ndóʼún ta saátu ndáaña kúni̱ún (Sal. 62:8). Ka̱ʼa̱n xíʼinra ná chindeétáʼanra xíʼún ña̱ kǒo ndi̱ʼi̱ní-iniún ta saátu ña̱ ná taxira ña̱ ndíchi ndaʼún (Sant. 1:5). Soo tá xa̱a̱ ni̱ya̱ʼa ku̱a̱ʼá tiempo ta ta̱ʼán ndani̱ʼún iin na̱ tindaʼa̱ xíʼún, Jehová káʼa̱nra ña̱ chindeétáʼanra xíʼún ta kǒo ña̱ʼa kuma̱ní nu̱ún (Sal. 55:22). Tá nándukún na̱ tindaʼa̱ xíʼún, kǒo taxiún ña̱ kasi ña̱yóʼo nu̱ún ña̱ keʼún inka ña̱ʼa (Filip. 1:10). Ña̱ sákusi̱í-ini iin na̱ ndásakáʼnu Jehová kúú ña̱ vií kutáʼanna xíʼinra ta su̱ví ña̱ tindaʼa̱na á ña̱ koo kúa̱anna (Mat. 5:3). Tá íyo kúa̱aún saá kúú ña̱ kivi kachíñún ku̱a̱ʼáka tiempo nu̱ú Jehová (1 Cor. 7:​32, 33). Ña̱kán naní íyo kúa̱aún kuniñúʼu tiempoún ña̱ kachíñún nu̱ú Jehová. w24.05 21 párr. 4; 22 párr. 6

¿Nda̱saa tiempo xíniñúʼu kaka xíʼin táʼanna? Tá kamaní ndáka̱xinna keʼéna iin ña̱ʼa, va̱ása va̱ʼa kanaña (Prov. 21:5). Koto nda̱saa tiempo kuniñúʼún ña̱ kuxini̱ va̱ʼún na̱ yiví na̱ xíkaún xíʼin. Soo, kǒo taxiún ya̱ʼa ku̱a̱ʼání tiempo. Biblia káʼa̱nña, ña̱ tá va̱ása xínu kama ña̱ kúni̱yó nda̱a̱ níma̱yó kíʼvi̱ (Prov. 13:12). ¿Ndáaña keʼéyó ña̱ va̱ʼa chindeétáʼanyó xíʼinna? Kivi kanayóna ña̱ kuxuna xíʼinyó, ña̱ kaʼvina xíʼinyó tá káʼviyó xíʼin na̱ veʼeyó á ña̱ ku̱ʼu̱n si̱ína xíʼinyó (Rom. 12:13). Kivi ka̱ʼa̱nyó xíʼinna ña̱ ku̱ʼu̱nyó xíʼinna nu̱ú kúni̱na ku̱ʼu̱nna, ta saátu kivi ka̱ʼa̱nyó xíʼinna ña̱ tá kúni̱na natúʼunna xa̱ʼa̱ iin ña̱ʼa kivi ku̱ʼu̱nna veʼeyó tasaá va̱ása koo mitúʼunna (Gál. 6:10). Soo, tá iin na̱ xíka xíʼin táʼan kúni̱na ña̱ ku̱ʼu̱nyó xíʼinna ná keʼévayóña, chi iin ki̱ʼva ña̱ chindeétáʼanyó xíʼinna kúú ña̱yóʼo. Soo, ni ku̱a̱ʼa̱nyó xíʼinna kivi kuxíká loʼoyó nu̱úna ña̱ va̱ʼa natúʼunna xa̱ʼa̱ ña̱ kúni̱na, soo ná kǒo sandákoo mitúʼunyóna. w24.05 30 párr. 13, 14

Na̱ anciano xíniñúʼu kunda̱a̱-inina ndáa xa̱ʼa̱ kúú ña̱ ni̱ki̱ʼvi iin na̱ yiví ku̱a̱chi. Tá kúú xíniñúʼu ndakanixi̱nína xa̱ʼa̱ ña̱yóʼo: ¿Ndáaña sa̱kúxíká miína nu̱ú Jehová? ¿Á loʼo tá loʼo sa̱ndákoona ña̱ kaʼvina tu̱ʼun Ndióxi̱ ta saátu ña̱ keena natúʼunna xa̱ʼa̱ra? ¿Á sa̱ndákoona ña̱ ka̱ʼa̱n ni̱ʼina xíʼin Ndióxi̱? ¿Á ki̱xáʼana táxina ña̱ ki̱ʼvi ña̱ va̱ása va̱ʼa níma̱na? ¿Ndáana kítáʼanna xíʼin? ¿Ndáa ña̱ʼa kúú ña̱ ndáka̱xinna kotona á kuniso̱ʼona? ¿Ndáa ki̱ʼva na̱sama ña̱yóʼo ki̱ʼva ña̱ ndákanixi̱nína xíʼin ña̱ kútóona keʼéna? ¿Á kúndaa̱-inina ndáa ki̱ʼva kúni Jehová xíʼin ña̱ ke̱ʼéna? Na̱ anciano viíní kuniñúʼuna pregunta ña̱ va̱ʼa chindeétáʼanna xíʼin na̱ ni̱ki̱ʼvi ku̱a̱chi soo kǒo xíniñúʼu nda̱ka̱tu̱ʼunna xa̱ʼa̱ ña̱ʼa ña̱ kǒo xíniñúʼu kunda̱a̱-inina xa̱ʼa̱. Tá vií ná keʼéna xíʼinna, va̱ása ixayo̱ʼvi̱ña xíʼin na̱ ni̱ki̱ʼvi ku̱a̱chi natúʼunna xíʼinna tasaá kunda̱a̱-inina ndáa xa̱ʼa̱ kúú ña̱ ni̱ki̱ʼvina ku̱a̱chi (Prov. 20:5). Na̱ anciano viíní kivi kuniñúʼuna ejemplo ña̱ kivi chindeétáʼan xíʼin na̱ yiví yóʼo ña̱ kunda̱a̱-inina ña̱ va̱ása va̱ʼa íyo ña̱ ke̱ʼéna. Sana tá yichi̱ nu̱ú ña̱ ndatakana xíʼin na̱ ni̱ki̱ʼvi ku̱a̱chi, na̱yóʼo kixáʼana va̱ása va̱ʼa kunina xa̱ʼa̱ ña̱ ke̱ʼéna ta nda̱a̱ kivi ndikó-inina. w24.08 22 párr. 9-11

Ta̱ Jesús xi̱natúʼunra xíʼin ña̱ si̱í-ini xa̱ʼa̱ Reino Ndióxi̱ saáchi xi̱kunda̱a̱-inira ña̱yóʼo kúú ña̱ kúni̱ Ndióxi̱ ná keʼéra. Ta ña̱ xi̱ndayáʼviníka nu̱ú ta̱ Jesús kúú ña̱ keʼéra ña̱yóʼo, ni tá kúma̱níka loʼo yo̱o̱ ña̱ kuvira “ni̱xa̱ʼa̱nra ñuu tá ñuu ña̱ sanáʼa̱ra na̱ yiví” (Luc. 13:22). Ta saátu sa̱náʼa̱ra ku̱a̱ʼáka na̱ discípulora ña̱ va̱ʼa ku̱ʼu̱nna natúʼunna xíʼin na̱ yiví nda̱a̱ táki̱ʼva ke̱ʼé miíra (Luc. 10:1). Tiempo vitin ña̱ ndáyáʼviníka kúú ña̱ ku̱ʼu̱nyó natúʼunyó xíʼin na̱ yiví, saáchi ña̱yóʼo kúú ña̱ kúni̱ Jehová xíʼin ta̱ Jesús ná keʼéyó (Mat. 24:14; 28:​19, 20). Iin ña̱ chindeétáʼan xíʼinyó ña̱ kusi̱íka-iniyó natúʼunyó xíʼin na̱ yiví kúú ña̱ kundáʼvi-iniyó kuniyóna nda̱a̱ táki̱ʼva kéʼé mií Jehová. Jehová kúni̱ra ña̱ ku̱a̱ʼáníka na̱ yiví ná xa̱a̱ kunda̱a̱-ini xa̱ʼa̱ra ta ndasakáʼnunara (1 Timoteo 2:​3, 4). Ña̱ nátúʼunyó xíʼin na̱ yiví kivi sakǎkuñana, xa̱ʼa̱ ña̱kán kúni̱ Jehová chindeétáʼanra xíʼinyó ña̱ viíka sakúaʼayó natúʼunyó xíʼinna. Ni kǒo xíín na̱ yiví kuniso̱ʼona ña̱ nátúʼunyó xíʼinna tiempo vitin, sana kiviva xa̱a̱na sakúaʼana xa̱ʼa̱ Jehová tá kúma̱níka ndiʼi ña̱ gran tribulación. w25.03 15, 16 párr. 5-7

Xa̱ʼa̱ ña̱ sákuaʼayó nu̱ú Biblia iin tá iinyó kivi ndaka̱xinyó á chindeéyó á va̱ása chindeéyó na̱ ke̱e ti̱xin congregación. Sana savayó chindeévayó na̱yóʼo á sanatu ka̱ʼa̱nyó xíʼinna ña̱ va̱ʼaní ku̱u ki̱xaa̱na. Ña̱ kǒo kívi keʼéyó kúú ña̱ ku̱a̱ʼání tiempo natúʼunyó xíʼinna á kixáʼayó kutáʼanyó xíʼinna. Sana kivi ndakanixi̱níyó: “¿Á va̱ása káʼa̱n Biblia ña̱ va̱ása xíniñúʼu chindeéyó na̱ kíʼvi ku̱a̱chi saáchi tá kéʼéyó ña̱yóʼo táki̱ʼva íyo na̱ kítáʼan xíʼinna ña̱ kéʼéna ña̱ va̱ása va̱ʼa saá íyoyó?” (2 Juan 9-11). Na̱ káʼa̱n versículo yóʼo xa̱ʼa̱ kúú na̱ íyo contra Ndióxi̱ á na̱ káʼa̱n xíʼin inkana ña̱ ná keʼéna ña̱ kini nu̱ú Ndióxi̱ (Apoc. 2:20). Ña̱kán tá iin na̱ yiví íyona contra Ndióxi̱ á káʼa̱nna xíʼin inkana ña̱ ná keʼéna ña̱ kini nu̱ú Ndióxi̱, va̱ása ku̱ʼu̱nví na̱ anciano kotonana. Sana kiviva nasama na̱yóʼo ña̱ kéʼéna, soo tá ta̱ʼán nasamana ña̱ kéʼéna, va̱ása chindeéyóna ta ni va̱ása ka̱ʼa̱nyó xíʼinna ña̱ ku̱ʼu̱nna reunión. w24.08 30, 31 párr. 14, 15

Tá xa̱a̱ ndi̱ʼi ta̱xi ta̱ Jesús ña̱ xi̱xi na̱ yiví, ni̱ka̱ʼa̱nra xíʼin na̱ apóstolra ña̱ ná ndikóna ñuu Capernaúm xíʼin tú barco ta miíra nda̱kiʼin ku̱a̱ʼa̱n chí yuku̱ ña̱ va̱ʼa kǒo ndasanara rey (Juan 6:​16-20). Soo tá ku̱a̱ʼa̱nna xíʼin tú barco ki̱xáʼa ndeéní kúun sa̱vi̱, ndeéní káni ta̱chí ta ndeéní ki̱xáʼa kánda̱ nu̱ú tá mar. Tasaá nda̱kiʼin ta̱ Jesús xíkara ku̱a̱ʼa̱nra nu̱ú ti̱kui̱í ña̱ va̱ʼa xa̱a̱ra nu̱ú ñúʼuna ta ni̱ka̱ʼa̱nra xíʼin ta̱ Pedro ña̱ ná kakara nu̱ú ti̱kui̱í (Mat. 14:​22-31). Tá nda̱a ta̱ Jesús ini tú barco sa̱yáa̱ ta̱chí, ña̱kán nda̱kanda̱ní-ini na̱ discípulo ta ki̱xáʼana káʼa̱nna: “Ña̱ nda̱a̱va kúúña, yóʼó kúú se̱ʼe Ndióxi̱” (Mat. 14:33). Na̱ discípulo ni̱ka̱ʼa̱nna ña̱ kúú ta̱ Jesús se̱ʼe Ndióxi̱ tá xi̱nina ña̱ xíkara nu̱ú ti̱kui̱í soo kǒo níkiʼinna kuenta xíʼin ña̱yóʼo tá ku̱a̱ʼání nda̱sara si̱ta̱váʼa. Ta̱ Marcos káʼa̱nra ña̱ nda̱kanda̱ní-ini na̱ apóstol, “saáchi kǒo níkunda̱a̱ va̱ʼa inina xíʼin milagro ña̱ ke̱ʼé ta̱ Jesús xíʼin si̱ta̱váʼa” (Mar. 6:​50-52). Soo ni saá, kǒo níxi̱kunda̱a̱ káxi inina ña̱ ku̱a̱ʼáníva ndee̱ ta̱xi Jehová ndaʼa̱ ta̱ Jesús ña̱ va̱ʼa keʼéra milagro. w24.12 5 párr. 7

Tá xíyo Conmemoración ná chikaa̱yó ndee̱ ña̱ kanayó ku̱a̱ʼáka na̱ yiví, tasaá na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó, ta saátu ná chikaa̱yó ndee̱ ña̱ ku̱ʼu̱nyó ki̱vi̱ kán. Tá ná kanayó na̱ yiví ña̱ ku̱ʼu̱nna xíʼinyó, ná ka̱ʼa̱nyó xíʼinna ndáa ki̱ʼva xíyo reunión ña̱ ndáyáʼviní yóʼo. Ta kivi na̱ʼa̱yó video ña̱ va̱xi nu̱ú jw.org nu̱úna, ña̱ naní ¿Nda̱chun ni̱xi̱ʼi̱ ta̱ Jesús? ta saátu ña̱ naní Ná ndakaʼányó xa̱ʼa̱ ña̱ ni̱xi̱ʼi̱ ta̱ Jesús. Ta na̱ anciano kúú na̱ kana na̱ ku̱xíká nu̱ú Jehová. Tá ná ndikó iin na̱ ku̱xíká nu̱ú Jehová ti̱xin ñuura, kusi̱íníva-ini na̱ ndóo chí ndiví ta saátu miíyó na̱ ndóo nu̱ú ñuʼú yóʼo (Luc. 15:​4-7). Tá xa̱a̱ ná koo ña̱ Conmemoración ná chikaa̱yó ndee̱ ña̱ va̱ása chindeé kuitíyó na̱ xa̱a̱ xíni̱yó chi saátu ná chindeéyó na̱ xa̱á xíʼin na̱ xa̱a̱ ku̱a̱ʼání tiempo ta̱ʼán ku̱ʼu̱n. Ná chikaa̱yó ndee̱ ña̱ viíní ndakiʼinyó na̱yóʼo (Rom. 12:13). w25.01 29 párr. 15

Xa̱ʼa̱ ña̱ ta̱xi Jehová se̱ʼera ña̱ ni̱xi̱ʼi̱ra xa̱ʼa̱yó ni̱na̱ʼa̱ra ña̱ nda̱kúní ndátiinra ku̱a̱chi, soo ña̱ ndáyáʼviníka ni̱na̱ʼa̱ra kúú ña̱ kúʼvi̱ní-inira xínira miíyó (Juan 3:16; 1 Juan 4:9, 10). Jehová chi̱ndaʼára se̱ʼera ni̱xi̱ʼi̱ra xa̱ʼa̱yó chi kúni̱ra ña̱ ná kutakuyó ndiʼi tiempo ta saátu kooyó na̱ veʼera. Ndakanixi̱níndó xa̱ʼa̱ ña̱yóʼo, tá ni̱ki̱ʼvi ta̱ Adán ku̱a̱chi va̱ása níxikuukara táʼan na̱ veʼe Jehová ta xa̱ʼa̱ ña̱yóʼo su̱víka na̱ veʼe Jehová níxikuuyó. Soo xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, na̱ yiví na̱ kándíxa Jehová ta kéʼéna ña̱ káʼa̱nra kivi xa̱a̱na koona táʼan na̱ veʼe miíra. Ta xa̱ʼa̱ ña̱yóʼo kúú ña̱ va̱ʼa íxakáʼnu-ini Jehová xa̱ʼa̱ ku̱a̱chiyó, ta kivi kutáʼan viíyó xíʼinra ta saátu xíʼin na̱ hermanoyó. Ña̱yóʼo náʼa̱ña nu̱úyó ña̱ kúʼvi̱ní-ini Jehová xínira miíyó (Rom. 5:​10, 11). w25.01 21 párr. 6

Jehová ta̱xira iin regalo ña̱ ndáyáʼviní ndaʼa̱yó tá chi̱ndaʼára se̱ʼera ki̱xira ni̱xi̱ʼi̱ra xa̱ʼa̱yó (2 Cor. 9:15). Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi kutáʼan viíyó xíʼin Jehová ta saátu kivi kutakuyó ndiʼi tiempo. Ña̱kán táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó, saáchi ke̱ʼéra ña̱yóʼo xa̱ʼa̱ ña̱ kúʼvi̱ní-inira xínira miíyó (Rom. 5:8). Ña̱ va̱ʼa ndakundeéyó taxiyó tíxa̱ʼvi ndaʼa̱ Jehová xíʼin ta̱ Jesús xa̱ʼa̱ ña̱ ni̱xi̱ʼi̱ra xa̱ʼa̱yó ta saátu ña̱ va̱ʼa kǒo nandóso-iniyó xa̱ʼa̱ ña̱yóʼo, mií ta̱ Jesús xa̱ʼnda chiñu ña̱ ná ndakaʼányó xa̱ʼa̱ ña̱ ni̱xi̱ʼi̱ra ndiʼi ku̱i̱ya̱ (Luc. 22:​19, 20). Ku̱i̱ya̱ vitin ndakaʼányó xa̱ʼa̱ ña̱ ni̱xi̱ʼi̱ ta̱ Jesús ki̱vi̱ jueves 2 tí abril 2026, ta ndiʼivayó kúsi̱íní-ini ku̱ʼu̱n ki̱vi̱ yóʼo. Tá ná taváyó tiempo ña̱ ndakanixi̱níyó xa̱ʼa̱ ña̱ ke̱ʼé Jehová xa̱ʼa̱yó ta saátu ña̱ ke̱ʼé ta̱ Jesús ña̱ ni̱xi̱ʼi̱ra xa̱ʼa̱yó, va̱ʼaní chindeétáʼanña xíʼinyó. w25.01 20 párr. 1, 2

Tá ná ndakanixi̱níún xa̱ʼa̱ ña̱ sákuaʼún, ña̱yóʼo chindeétáʼan xíʼún ña̱ kunda̱a̱-iniún ña̱ kúʼvi̱ní-ini Jehová ta saátu ta̱ Jesús xínina miíyó. Kivi kaʼviún iin á ku̱a̱ʼáka Evangelio tá kúma̱níka koo ña̱ Conmemoración ta saátu tá xa̱a̱ ndi̱ʼiña. Va̱ása ku̱a̱ʼání capítulo kaʼviún iin kuití yichi̱, chi kivi kaʼviún loʼo tá loʼo ña̱ va̱ʼa kunda̱a̱ka-iniún ña̱ kúʼvi̱ní-ini Jehová xíʼin ta̱ Jesús xínina miíyó. Tá xa̱a̱ ku̱a̱ʼání ku̱i̱ya̱ nda̱kuchiún, kivi kixáʼún ndakanixi̱níún á íyo inkaka ña̱ xa̱á kivi sakúaʼún xa̱ʼa̱ ña̱ nda̱kúní íyo ini Ndióxi̱, ña̱ kúʼvi̱ní-inira xínira miíyó ta saátu xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó. Soo mií ña̱ nda̱a̱, íyo ku̱a̱ʼáníkava ña̱ kivi sakúaʼayó xa̱ʼa̱ ña̱yóʼo. Chika̱a̱ ndee̱ ña̱ kaʼviún ndiʼi tutu ña̱ tává na̱ ñuu Ndióxi̱. w25.01 24, 25 párr. 13-15