Abril

Xíniñúʼu kandíxayó ña̱ ni̱xi̱ʼi̱ ta̱ Jesús xa̱ʼa̱yó tasaá va̱ʼa ni̱ʼíyó ña̱ kutakuyó ndiʼi tiempo (Efes. 1:7). Na̱ yiví na̱ ni̱ka̱ʼa̱n ta̱ Jesús xa̱ʼa̱ ña̱ kúúna “inka ndikachi”, kǒo xíniñúʼu kuxuna si̱ta̱váʼa ta ni va̱ása kívi koʼona tá vino tá xíyo ña̱ Conmemoración (Juan 10:16). Soo ku̱a̱ʼáníva ña̱ va̱ʼa ndákiʼinna xa̱ʼa̱ ña̱ kándíxana ña̱ ni̱xi̱ʼi̱ ta̱ Jesús xa̱ʼa̱na (Juan 6:53). Soo na̱ xíxi si̱ta̱váʼa ta xíʼina tá vino, náʼa̱na ña̱ ni̱ki̱ʼvina ti̱xin trato xa̱á ña̱ ni̱ka̱ʼa̱n ta̱ Jesús xa̱ʼa̱ ta ku̱ʼu̱nna chí ndiví ña̱ kaʼndachíñuna ti̱xin Reino Ndióxi̱. Ña̱kán ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo, xíniñúʼu kandíxayó ña̱ ni̱xi̱ʼi̱ ta̱ Jesús xa̱ʼa̱yó ña̱ va̱ʼa ni̱ʼíyó ña̱ kutakuyó ndiʼi tiempo. w24.12 13 párr. 14, 16

Ñuú tá xi̱xi ta̱ Jesús xíʼin na̱ apóstolra, ta̱xira si̱ta̱váʼa ña̱ kǒo yuxa̱n iyá ndíkaa̱ xíʼin kuxuna ta ni̱ka̱ʼa̱nra xíʼinna ña̱ nda̱a̱ táki̱ʼva íyo ku̱ñura saá íyoña. Tándi̱ʼi, ta̱xira vino xi̱ʼina ta ni̱ka̱ʼa̱nra xíʼinna, ña̱ táyóʼo íyora nda̱a̱ táki̱ʼva íyo ni̱i̱ra ña̱ kíndo̱o Ndióxi̱ iin trato xíʼinna (Mar. 14:​22-25; Luc. 22:20; 1 Cor. 11:24). Su̱ví xíʼin ndiʼi na̱ yiví níkeʼé Jehová trato xa̱á yóʼo saáchi xíʼin sava kuitívana ke̱ʼéraña. Ta na̱yóʼo kúú ndiʼi na̱ ndáka̱xin mií Jehová ña̱ va̱ʼa kaʼndachíñuna xíʼin ta̱ Cristo ti̱xin Reinora (Heb. 8:​6, 10; 9:15). Ñuú tá xi̱xi ta̱ Jesús xíʼin na̱ apóstolra, ni̱ka̱ʼa̱nra xa̱ʼa̱ iin grupo loʼo na̱ yiví. Ta ti̱xin grupo yóʼo xi̱ñuʼu na̱ apóstolra na̱ xi̱xi xíʼinra ñuú kán. Ndiʼi na̱yóʼo ku̱ʼu̱nna chí ndiví ta kaʼndachíñuna xíʼin ta̱ Jesús. Soo ña̱ ni̱ka̱ʼa̱n ta̱ Jesús ñuú saá xíʼin na̱ apóstolra, síínníva ni̱xi̱yoña nu̱ú ña̱ ni̱ka̱ʼa̱nra xíʼin na̱ yiví na̱ ñuu Galilea. Ña̱kán tu̱ʼun ña̱ ni̱ka̱ʼa̱n ta̱ Jesús xíʼin na̱ ñuu Galilea xíʼin ku̱a̱ʼáníka na̱ yivíva ni̱ka̱ʼa̱nraña. w24.12 11 párr. 9, 10

Ni̱xi̱íkóna ta̱ Jesús, ti̱innara, ni̱ka̱ʼa̱n ndi̱va̱ʼana xíʼinra, ni̱ka̱ʼa̱nna ña̱ vatá xa̱ʼa̱ra, ni̱ka̱ʼa̱nna ña̱ kaʼnínara ta ndeéní ka̱ninara. Tándi̱ʼi, na̱ soldado ka̱tikaanara ndaʼa̱ yitu̱n ña̱ va̱ʼa kuvira. Ku̱ndeé-ini ta̱ Jesús xíʼin ndiʼi ña̱ ke̱ʼéna xíʼinra, soo ni̱xo̱ʼvi̱ní-ini Jehová tá xi̱nira ña̱ ke̱ʼéna xíʼin se̱ʼera. Ni xi̱kuʼvi̱ní-ini Jehová xi̱xinirara ta ni íyoní ndee̱ ndaʼa̱ra, va̱ása níndatavárara nu̱ú tu̱ndóʼo yóʼo. ¿Nda̱chun kǒo níkeʼéra ña̱yóʼo? Xa̱ʼa̱ ña̱ kúʼvi̱-inira xínira miíyó. Tá ta̱xi Jehová se̱ʼera ta̱ Jesús ña̱ ni̱xi̱ʼi̱ra xa̱ʼa̱yó, saá kúú ña̱ ni̱na̱ʼa̱ra ña̱ kúʼvi̱ní-inira xínira miíyó ni nda̱kiʼinyó ku̱a̱chi ña̱ sa̱ndákoo ta̱ Adán xíʼin ñá Eva ndaʼa̱yó. Ta saátu náʼa̱ra ña̱ kúʼvi̱ní-inira xínira yóʼó. ¿Á va̱ása ndákanda̱-iniún xíʼin ña̱ ke̱ʼé Jehová xa̱ʼún, ña̱ ta̱xira ni̱xo̱ʼvi̱ se̱ʼera ña̱ va̱ʼa sakǎkura yóʼó ta va̱ása kuumiíkaún ku̱a̱chi? (1 Juan 4:​9, 10). Jehová kúni̱ra chindeétáʼanra xíʼin ndiʼiyó ña̱ kundeé-iniyó ta kǒo ki̱ʼviyó ku̱a̱chi. w24.08 6 párr. 13, 14

Kivi kunda̱a̱-iniyó ña̱ kúʼvi̱ní-ini Jehová xínira miíyó tá ná ndakanixi̱níyó xa̱ʼa̱ ña̱ ni̱xo̱ʼvi̱níra tá ta̱xira se̱ʼera ña̱ ni̱xi̱ʼi̱ra xa̱ʼa̱yó. Ta̱ Ndi̱va̱ʼa káʼa̱nra ña̱ nda̱a̱ ni iin na̱ káchíñu nu̱ú Ndióxi̱ va̱ása nda̱kú koo inina xíʼinra tá ná ya̱ʼana nu̱ú tu̱ndóʼo. Ña̱kán ña̱ va̱ʼa na̱ʼa̱ Jehová ña̱ vatá kúú ña̱ káʼa̱n ta̱ Ndi̱va̱ʼa, ta̱xira ña̱ ná xo̱ʼvi̱ní se̱ʼera ta̱ Jesús tá kúma̱níka kuvira (Job 2:​1-5). Nda̱a̱ chí ndiví xi̱ni Jehová ña̱ ku̱sikindaa na̱ yiví ta̱ Jesús, saátu tá ka̱ni na̱ soldadora ta ka̱tikaanara ndaʼa̱ yitu̱n. Saátu xi̱nira ña̱ ni̱xo̱ʼvi̱ní se̱ʼera tá ni̱xi̱ʼi̱ra (Mat. 27:​28-31, 39). Kiviva kasi Jehová nu̱úna ña̱ va̱ʼa kǒo keʼéna ña̱yóʼo xíʼin ta̱ Jesús soo kǒo níkeʼéraña (Mat. 27:​42, 43). Soo tá níchindeétáʼanra xíʼin ta̱ Jesús, va̱ása ndachaʼvivíra xa̱ʼa̱ ku̱a̱chiyó ta ni kǒo ña̱ va̱ʼa kundatuyó ndakiʼinyó chí nu̱únínu. Xa̱ʼa̱ ña̱kán kúú ña̱ ta̱xi Jehová ña̱ ni̱xo̱ʼvi̱ní se̱ʼera ta ni̱xi̱ʼi̱ra. w25.01 22 párr. 7

Ki̱vi̱ 16 tí nisán ña̱ ku̱i̱ya̱ 33 xi̱kuuña, ta na̱ discípulo ta̱ Jesús xi̱yiʼvínína ta kǒo níxi̱kunda̱a̱-inina ndáaña keʼéna. U̱vi̱ na̱yóʼo ke̱ena ñuu Jerusalén ta ku̱a̱ʼa̱nna chí ñuu Emaús. Iin ta̱a ta̱ kǒo xíni̱na nda̱kutáʼanra ku̱a̱ʼa̱nra xíʼinna. Ta na̱ discípulo ki̱xáʼa nátúʼunna xíʼinra xa̱ʼa̱ ña̱ kúsuchíní-inina xa̱ʼa̱ ña̱ xa̱ʼnína ta̱ Jesús. Soo ña̱ ni̱ka̱ʼa̱n ta̱ ta̱a yóʼo xíʼinna chi̱ndeétáʼanníña xíʼinna. Ki̱xáʼara káʼa̱nra xíʼinna xa̱ʼa̱ “ña̱ ka̱ʼyí ta̱ Moisés xíʼin ña̱ ka̱ʼyí ndiʼika na̱ profeta”, ta ni̱ka̱ʼa̱nra xíʼinna xa̱ʼa̱ nda̱chun kúú ña̱ xi̱niñúʼu xo̱ʼvi̱ ta Mesías ta kuvira. Tá ni̱xa̱a̱ na̱ discípulo ñuu Emaús ki̱ʼinna kuenta ña̱ ta̱ Jesús kúú ta̱ nda̱kutáʼan xíʼinna chí yichi̱. (Luc. 24:​13-35). Ku̱a̱ʼáníva yichi̱ ki̱ta ta̱ Jesús nu̱ú na̱ discípulora ti̱xin 40 ki̱vi̱ ña̱ ni̱xi̱yokara nu̱ú ñuʼú yóʼo. Chi̱kaa̱ra ndee̱ xíʼinna ña̱kán kǒo níkusuchíka-inina ta ni kǒo níyi̱ʼvíkana, ta ki̱xáʼana nátúʼunna xa̱ʼa̱ Reino Ndióxi̱. w24.10 12 párr. 1-3

Su̱ví ndi̱ku̱n kamaví xáʼnu na̱ va̱lí, saáchi kúee kúeeva xáʼnuna. Soo miíyó tá kǒo chíkaa̱kayó ndee̱ ña̱ sakúaʼayó xa̱ʼa̱ Jehová, kǒo kivi kuxa-iniyó xíʼin tu̱ʼunra. Tá kúú, na̱ xi̱ndoo ñuu Corinto sa̱kúaʼana xa̱ʼa̱ Jehová ta nda̱kuchina, nda̱kiʼinna espíritu santo ta ku̱a̱ʼání ña̱ sa̱náʼa̱ ta̱ apóstol Pablo miína (Hech. 18:​8-11). Soo ni xa̱a̱ ku̱a̱ʼá ku̱i̱ya̱ nda̱kuchi sava na̱ cristiano na̱ xi̱ndoo ñuu Corinto, ni̱xi̱yona nda̱a̱ táki̱ʼva íyo na̱ va̱lí, chi kǒo níchika̱a̱na ndee̱ ña̱ sakúaʼakana xa̱ʼa̱ Jehová (1 Cor. 3:2). Tá kúni̱yó kuxa-iniyó xíʼin tu̱ʼun Ndióxi̱ á ña̱ sakúaʼakayó xa̱ʼa̱ra xíniñúʼu chika̱a̱níyó ndee̱. Soo na̱ hermano na̱ íyo nda̱a̱ táki̱ʼva íyo na̱ va̱lí, tá kǒo xíínna chikaa̱na ndee̱ ña̱ sakúaʼakana xa̱ʼa̱ Jehová kǒo kivi xa̱a̱na keʼéna ña̱ kúni̱ra (Prov. 1:22). Kǒo kúni̱yó keʼéyó táki̱ʼva kéʼé sava na̱ yiví chi ni xa̱a̱ xa̱ʼnuvana, soo kǒo xíínna ndaka̱xinna ndáaña keʼéna chi ndátuna nda̱a̱ ná ka̱ʼa̱n na̱ yivána xíʼinna saáví keʼéna iin ña̱ʼa. Soo, miíyó kúni̱yó chikaa̱yó ndee̱ ña̱ kachíñukayó nu̱ú Jehová ta kǒo xíniñúʼu ka̱ʼa̱nvína xíʼinyó tasaá keʼéyóña. Tá ndákanixi̱níún ña̱ íxama̱níka sakúaʼún xa̱ʼa̱ Ndióxi̱, ka̱ʼa̱n xíʼinra ña̱ ná taxira ndee̱ ndaʼún ta ná chindeétáʼanra xíʼún ña̱ kuni̱ún keʼún ña̱yóʼo (Filip. 2:13). w24.04 4 párr. 9, 10

Jehová káʼa̱nra xíʼinyó ndáaña ndóʼora tá xa̱a̱ ndátiinra ku̱a̱chi xíʼin na̱ yiví (Ezeq. 33:11). Va̱ása ndi̱ku̱n kama sándiʼi-xa̱ʼa̱ra na̱ yiví saáchi kúndáʼviní-inira xínirana ta ndiʼi tiempo náʼa̱ra ña̱yóʼo. ¿Ndáa na̱ yiví kúú na̱ kǒo ndataku? Sava kuitívana káʼa̱n Biblia xa̱ʼa̱. Ta̱ Jesús ni̱ka̱ʼa̱nra ña̱ kǒo ndataku ta̱ Judas Iscariote (Mar. 14:21; koto ña̱ káʼa̱n Juan 17:12 xíʼin nota ña̱ va̱xi nu̱ú Biblia de estudio). Ta̱ Judas xi̱kunda̱a̱-inira ña̱ ke̱ʼéra iin ña̱ʼa ña̱ kǒo kútóo Jehová xíʼin ta̱ Jesús, soo nisaá ke̱ʼévaraña (koto Marcos 3:29 xíʼin nota ña̱ va̱xi nu̱ú Biblia de estudio). Saátu ta̱ Jesús ni̱ka̱ʼa̱nra ña̱ sava na̱ xi̱niʼi yichi̱ nu̱ú na̱ veʼe-ñu̱ʼu na̱ kǒo níxiniso̱ʼo ña̱ ni̱ka̱ʼa̱nra, kǒo ndatakuvína (Mat. 23:33; koto ña̱ káʼa̱n Juan 19:11 xíʼin nota ña̱ va̱xi nu̱ú Biblia de estudio “del hombre”). Ta̱ apóstol Pablo ni̱ka̱ʼa̱nra ña̱ kǒo ndataku na̱ apóstata na̱ kǒo ndándikó-ini xa̱ʼa̱ ña̱ kéʼéna (Heb. 6:​4-8; 10:29). w24.05 4 párr. 10, 11

Veʼe válí ña̱ xi̱ ixava̱ʼana tiempo xi̱naʼá xi̱chindeétáʼanña xíʼin na̱ yiví ña̱ koo sávína. Ki̱ʼva saá íyo veʼe Jehová chi chindeétáʼanña xíʼinyó ña̱ kǒo keʼéyó ña̱ʼa ña̱ kúndasíra xínira ta saátu sándakaʼánña miíyó xa̱ʼa̱ ña̱ ndátuyó koo chí nu̱únínu. Tá va̱ʼaní kítáʼanyó xíʼin Jehová kǒo kuchiñu ta̱ Ndi̱va̱ʼa sandáʼvira miíyó ña̱ keʼéyó ña̱ kini (1 Juan 3:8). Ta nu̱ú ñuyǐví xa̱á kundaa Jehová na̱ ndásakáʼnu miíra ta chindeétáʼanra xíʼinna ña̱ viíní kutáʼanna xíʼinra ta kǒo taxikara ña̱ kuvina (Apoc. 21:4). Jehová táxira ña̱ kooyó veʼera ta yóʼo kúú nu̱ú va̱ʼaní kítáʼanyó xíʼinra (Ezeq. 37:27). Soo, ¿ndáaña xíniñúʼu keʼéyó ña̱ va̱ʼa kookayó veʼera? Tá iin na̱ yiví kánana miíyó ña̱ ku̱ʼu̱nyó veʼena, kúni̱yó kunda̱a̱-iniyó ndáaña kúni̱na keʼéyó. Ta saátu íyo veʼe Jehová, chi kúni̱yó ka̱ʼa̱nra xíʼinyó ndáaña xíniñúʼu keʼéyó ña̱ va̱ʼa kooyó veʼera. Xa̱ʼa̱ ña̱ kúni̱níyó xíniyó Jehová kúni̱yó keʼéyó ña̱ sakúsi̱í-inira (Col. 1:10). Xa̱ʼa̱ ña̱ kǒo kúni̱yó sakúsuchíyó-ini Jehová kǒo kúni̱yó keʼéyó ña̱ kini. Ta ña̱ va̱ʼa kutáʼanyó xíʼinra ndiʼi tiempo xíniñúʼu vitá koo iniyó (Miq. 6:8). w24.06 4 párr. 8, 9

Jehová ni̱ka̱ʼa̱nra xíʼin ta̱ Abrahán ña̱ so̱kóra se̱ʼera ta̱ Isaac nu̱úra. Ni̱xo̱ʼvi̱níva-ini ta̱ Abrahán xíʼin ña̱yóʼo, soo ni saá ka̱ndíxavara Jehová. Tá xa̱a̱ ku̱nu̱mí kaʼníra se̱ʼera, Jehová ni̱ka̱ʼa̱nra xíʼinra ña̱ ná kǒo keʼéraña. Soo íyo iin ña̱ ndáyáʼviní sákuaʼayó xíʼin ña̱ ke̱ʼé ta̱ Abrahán: ki̱ʼva saá keʼé Jehová chi taxira se̱ʼera ña̱ kuvira xa̱ʼa̱ na̱ yiví saáchi kúʼvi̱ní-inira xínira na̱yóʼo (Gén. 22:​1-18). Tá ni̱ya̱ʼa ku̱i̱ya̱, Jehová ta̱xira ley ndaʼa̱ na̱ israelita ta ni̱ka̱ʼa̱nra xíʼinna ña̱ ná so̱kóna kití nu̱úra ña̱ va̱ʼa ixakáʼnu-inira xa̱ʼa̱ ku̱a̱china (Lev. 4:​27-29; 17:11). Ña̱ xi̱sokó na̱yóʼo ni̱na̱ʼa̱ña ña̱ so̱kó Jehová se̱ʼera ta kundayáʼviníka ña̱yóʼo, saáchi sakǎkuña na̱ yiví ta va̱ása kuumiíkana ku̱a̱chi. Ndióxi̱ ni̱ka̱ʼa̱nra xíʼin na̱ profeta ña̱ ná kaʼyina xa̱ʼa̱ se̱ʼe ñá ñaʼá ña̱ xo̱ʼvi̱ra ta kuvira (se̱ʼe ñá ñaʼá yóʼo xi̱kuu se̱ʼe Ndióxi̱), ña̱ va̱ʼa sakǎkura na̱ yiví ta va̱ása kuumiíkana ku̱a̱chi. Ndáyáʼviní ña̱ ke̱ʼé Jehová xa̱ʼún (Isa. 53:​1-12). w24.08 4 párr. 7, 8

Tá káʼviún Biblia chikaa̱ ndee̱ ña̱ keʼún ña̱ káʼa̱nña. Tá káʼviúnña ndakanixi̱ní xa̱ʼa̱ ña̱yóʼo: “¿Ndáa ki̱ʼva keʼíi̱ ña̱ káʼa̱n ña̱yóʼo vitin á chí nu̱únínu?”. Tá kúú, tá ná kaʼviún 1 Tesalonicenses 5:​17, 18 ndakanixi̱ní xa̱ʼa̱ ña̱ káʼa̱nña, ta ndakanixi̱ní ndáa ki̱ʼva íyo oración ña̱ káʼún xíʼin Ndióxi̱. ¿Á xíʼin ndiʼi níma̱ún káʼún xíʼin Ndióxi̱? ¿Á káʼa̱n ni̱ʼún xíʼinra? ¿Ndáaña kúú ña̱ táxiún tíxa̱ʼvi xa̱ʼa̱ tá káʼún xíʼin Ndióxi̱? Sana ndákanixi̱níún xa̱ʼa̱ u̱ni̱ ña̱ʼa ña̱ kivi taxiún tíxa̱ʼvi xa̱ʼa̱ tá káʼún xíʼin Ndióxi̱. Tá ná kuniñúʼún loʼo minuto ña̱ ndakanixi̱níún xa̱ʼa̱ ña̱yóʼo, saá kúú ña̱ va̱ása kuniso̱ʼo kuitíún ña̱ káʼa̱n tu̱ʼun Ndióxi̱ chi saátu kixáʼún keʼún ña̱ káʼa̱nña. Tá ndiʼi ki̱vi̱ ná kaʼviún Biblia, tá ná ya̱ʼa tiempo va̱ʼaka kachíñún nu̱ú Jehová. w24.09 4, 5 párr. 9, 10

Va̱ʼaní i̱xava̱ʼa Jehová miíyó, chi si̱íka íyoyó tá táxiyó ña̱ʼa ndaʼa̱ inkana nu̱úka ña̱ táxinaña ndaʼa̱yó. Va̱ʼa kúniyó tá chíndeétáʼanyó xíʼin na̱ hermanoyó ta kúsi̱í-iniyó tá táxina tíxa̱ʼvi ndaʼa̱yó. Soo ni táxina tíxa̱ʼvi ndaʼa̱yó á ni kǒo táxinaña, ná kusi̱í-iniyó chi ña̱ va̱ʼava kúú ña̱ kéʼéyó. Ni nda̱a̱ ndáaka ña̱ ná taxiyó ndaʼa̱ inkana, ná ndakaʼányó ña̱ káʼa̱n 2 Crónicas 25:9: “Ku̱a̱ʼáníkava ña̱ kivi taxi Jehová ndaʼún”. Iinlá Jehová kúú ta̱ kivi taxi ku̱a̱ʼáníka ña̱ʼa ndaʼa̱yó. Ta kúsi̱í-iniyó tá táxira ku̱a̱ʼá ña̱ va̱ʼa ndaʼa̱yó, ña̱kán ndáyáʼvi ña̱ va̱ʼa koo iniyó nda̱a̱ táki̱ʼva íyo yiváyó Jehová. w24.09 31 párr. 20, 21

Jehová va̱ʼaní-inira ta kúndáʼviní-inira xínira miíyó (Sal. 103:13; Is. 49:15). Kúndáʼviní-inira xínira miíyó tá xítora ña̱ xóʼvi̱yó (Zac. 2:8). Chíndeétáʼanra xíʼinyó ña̱ kuyatinyó nu̱úra ta saátu ña̱ kooyó migora (Sal. 25:14; Hech. 17:27). Ta saátu vitání-inira ta “sánuura xi̱níra ña̱ va̱ʼa kotora ndiví xíʼin ñuʼú ña̱ va̱ʼa ndaniʼira na̱ vitá-ini tañu yáká” (Sal. 113:​6, 7). Xa̱ʼa̱ ndiʼi ña̱yóʼo kúni̱yó ndasakáʼnuyó Ndióxi̱yó. Ndásakáʼnuyó Jehová saáchi kúni̱yó ña̱ ná kunda̱a̱-ini na̱ yiví xa̱ʼa̱ra. Ku̱a̱ʼánína va̱ása va̱ʼa íyo ña̱ ndákanixi̱nína xa̱ʼa̱ Ndióxi̱. ¿Nda̱chun? Saáchi ta̱ Ndi̱va̱ʼa ku̱a̱ʼání ña̱ vatá káʼa̱nra xa̱ʼa̱ Jehová ta sákara xi̱ní na̱ yiví (2 Cor. 4:4). Chíkaa̱ra xi̱ní na̱ yiví ña̱ ndakanixi̱nína ña̱ ndi̱va̱ʼaní-ini Jehová ta va̱ása ndíʼi̱-inira xa̱ʼa̱na, ta saátu ña̱ kúúmiíra ku̱a̱chi xa̱ʼa̱ ndiʼi tu̱ndóʼo ña̱ kúú iníísaá ñuyǐví. Soo miíyó kúnda̱a̱-iniyó ña̱ su̱ví saá íyora ta kivi chindeétáʼanyó xíʼin na̱ yiví ña̱ kunda̱a̱-inina ndáa ki̱ʼva íyo Ndióxi̱yó, tasaá ndasakáʼnuyóra (Is. 43:10). w25.01 3 párr. 6, 7

Ni se̱ʼe Ndióxi̱ kúú ta̱ Jesús ta keʼéra ku̱a̱ʼání milagro tá ki̱xira nu̱ú ñuʼú yóʼo, ta̱ Ndi̱va̱ʼa xi̱niñúʼura na̱ yiví ña̱ ka̱ʼa̱nna ña̱ vatá xa̱ʼa̱ra. Tá kúú na̱ su̱tu̱ xi̱kaʼa̱nna xíʼin na̱ yiví ña̱ távára na̱ ta̱chí ndi̱va̱ʼa xíʼin ndee̱ “ta̱ xáʼndachíñu nu̱ú na̱ ta̱chí ndi̱va̱ʼa” (Mar. 3:22). Tá xa̱a̱ tíinna ku̱a̱chi xíʼinra, na̱ su̱tu̱ chi̱kaa̱ ku̱a̱chinara ña̱ káʼa̱nra ña̱ va̱ása va̱ʼa xa̱ʼa̱ Ndióxi̱. Ta saátu ni̱ka̱ʼa̱nna xíʼin na̱ yiví ña̱ ná ka̱ʼa̱nna xíʼin na̱ chíñu ña̱ ná kaʼnínara (Mat. 27:20). Tá ni̱ya̱ʼa tiempo, na̱ discípulo ta̱ Jesús ki̱xáʼana nátúʼunna xíʼin na̱ yiví xa̱ʼa̱ Ndióxi̱ ta na̱ sáa̱-ini xíni na̱yóʼo sa̱ndátakana ku̱a̱ʼání na̱ yiví ña̱ ka̱ʼa̱nna ña̱ va̱ása va̱ʼa xa̱ʼa̱na ta ixandi̱va̱ʼana xíʼinna (Hech. 14:​2, 19). Tutu La Atalaya 1 tí diciembre ña̱ ku̱i̱ya̱ 1998 ni̱ka̱ʼa̱nña xa̱ʼa̱ Hechos 14:2 ta ña̱yóʼo káchiña: “Na̱ judío na̱ xi̱saa̱-ini xi̱xini na̱ discípulo kǒo níxi̱kaʼa̱n kuitína ña̱ va̱ása va̱ʼa xa̱ʼa̱ chiñu ña̱ xi̱keʼéna chi saátu ki̱xáʼana káʼa̱nna xíʼin na̱ yiví na̱ xi̱ndoo inka ñuu ña̱ ná kǒo kuniso̱ʼona ña̱ xi̱natúʼun na̱ discípulo”. Ta̱ Ndi̱va̱ʼa sándaʼvira ndiʼi na̱ yiví na̱ ndóo nu̱ú ñuʼú yóʼo. w24.04 11 párr. 15, 16

Ni ná kuvi na̱ yiví tá kúma̱níka kixáʼa ña̱ gran tribulación Jehová kúú ta̱ xíni̱ á sandátakurana á kǒo sandátakurana. Va̱ʼaní ndátiin Jehová ku̱a̱chi ña̱kán va̱ʼaní koo ña̱ keʼéra (Sal. 33:​4, 5). Kúnda̱a̱-iniyó ña̱ mií Jehová ta̱ ndátiin ku̱a̱chi xíʼin ndiʼi na̱ ndóo iníísaá nu̱ú ñuʼú keʼéra ña̱ nda̱kú. Ni nda̱a̱ ndáaka ñuu ndóo na̱ yiví, soo mií Jehová kúú ta̱ ndaka̱xin á koona nu̱ú ñuyǐví xa̱á á va̱ása koona. Kǒo ka̱ʼa̱nví Jehová ña̱ nda̱a̱ táki̱ʼva íyo “ti̱xúʼu” saá íyo ku̱a̱ʼá na̱ yiví na̱ ndóo iin ñuu xa̱ʼa̱ ña̱ kǒo níkivi kuniso̱ʼona tu̱ʼun va̱ʼa xa̱ʼa̱ra (Mat. 25:46). Tá miíyó ndíʼi̱-iniyó xa̱ʼa̱ na̱ yiví na̱ ta̱ʼán sakúaʼa xa̱ʼa̱ Jehová, miíra ndíʼi̱níkava-inira xa̱ʼa̱na ta ndáyáʼvinína nu̱úra. Kǒo xíni̱yó ndáaña keʼé Jehová tá xa̱a̱ ná kundika̱a̱ ña̱ gran tribulación. Sana sava na̱ yiví yóʼo kiviva xa̱a̱na sakúaʼana xa̱ʼa̱ra, tasaá kixáʼana kandíxanara tá ná ndasakáʼnura miíra nu̱ú ndiʼi na̱ ñuu (Ezeq. 38:16). w24.05 12 párr. 14, 15

Miíyó na̱ ndásakáʼnu Jehová kútóoníyó chindeétáʼanyó xíʼin na̱ hermano (2 Cor. 8:4). Soo xíniñúʼu ndakú koo iniyó ña̱ va̱ʼa keʼéyó ña̱yóʼo. Tá kúú, tá kíxáʼa íyo guerra, na̱ anciano kúnda̱a̱-inina ña̱ xíniñúʼu chikaa̱na ndee̱ xíʼin na̱ hermano ta xíniñúʼu ku̱ʼu̱n ndakana ña̱ kuxuna ta saátu ña̱ sakúaʼana xa̱ʼa̱ Ndióxi̱. Xa̱ʼa̱ ña̱ kúʼvi̱ní-inina xínina na̱ hermano chíndeétáʼanvana xíʼinna ni sava yichi̱ nda̱a̱ i̱yo kuvina xa̱ʼa̱ ña̱yóʼo. Xíniñúʼu kuniso̱ʼoyó ndiʼi ña̱ káʼa̱nna xíʼinyó tasaá viíní kutáʼan ndiʼiyó. Ña̱kán ná keʼéyó ña̱ káʼa̱n na̱ káchíñu Betel xíʼinyó (Heb. 13:17). Na̱ anciano xíniñúʼu kaʼvina tutu ña̱ chíndaʼána ndaʼa̱na ña̱ va̱ʼa kunda̱a̱-inina ndáaña kivi keʼéna tá xa̱a̱ ná kuu iin tu̱ndóʼo (1 Cor. 14:​33, 40). Ndakú ná koo iniyó soo ná kiʼinyó kuenta (Prov. 22:3). Tá xítoyó ña̱ ndeéní ndíkaa̱ ku̱a̱chi, kǒo ku̱ʼu̱nyó chi nda̱a̱ kivi kuviyó. Ná kundaa-iniyó Jehová chi kivi chindeétáʼanra xíʼinyó ña̱ va̱ʼa kunda̱a̱-iniyó ndáa ki̱ʼva chindeétáʼanyó xíʼin na̱ hermano. w24.07 4 párr. 8; 5 párr. 11

Ta̱ rey David xi̱ndaaní-inira Jehová, ña̱kán ni̱ka̱ʼa̱nra xíʼinra ña̱ chindeétáʼanra xíʼinra tá xi̱kuni̱ ta̱ rey Saúl xíʼin inkaka na̱ yiví kaʼnínara. Tá xi̱nira ña̱ chi̱ndeétáʼan Jehová xíʼinra saá ni̱ka̱ʼa̱nra: “Ta̱ táku kúú Jehová” (Sal. 18:46). Iin tutu káʼa̱nña xa̱ʼa̱ ña̱ ni̱ka̱ʼa̱n ta̱ David, ña̱yóʼo káchiña: “Tá ni̱ka̱ʼa̱n ta̱ David tu̱ʼun yóʼo ni̱na̱ʼa̱ra ña̱ kándíxaníra ña̱ chíndeétáʼan Ndióxi̱ xíʼin na̱ ñuura chi iin Ndióxi̱ táku kúúra”. Ta̱ David xi̱tora ña̱ chi̱ndeétáʼan Jehová xíʼinra ta xi̱kandíxaníra ña̱ iin Ndióxi̱ táku kúú Jehová, ta ta̱xira ndee̱ ndaʼa̱ra ña̱ ndasakáʼnurara ta saátu ña̱ kachíñura nu̱úra (Sal. 18:​28, 29, 49). Ña̱ chindeétáʼan xíʼinyó ña̱ kusi̱í-iniyó ndasakáʼnuyó Jehová kúú ña̱ ndakaʼányó ña̱ kúúra Ndióxi̱ ta̱ táku. Miíra taxi ndee̱ ndaʼa̱yó ña̱ ya̱ʼayó nu̱ú nda̱a̱ ndáaka tu̱ndóʼo ta chindeétáʼanra xíʼinyó ña̱ kachíñuyó nu̱úra, ta saátu chindeétáʼanra xíʼinyó ña̱ kǒo kuxíkayó nu̱úra. w24.06 20, 21 párr. 3, 4

¿Ndáaña sákuaʼayó xíʼin ña̱ ka̱ʼyí ta̱ Pablo ku̱a̱ʼa̱n nu̱ú na̱ tesalonicenses? Tá káʼa̱nna xíʼinyó xa̱ʼa̱ iin ña̱ʼa ña̱ ndáka̱nda̱ní-iniyó xíʼin á tá káʼa̱nna xíʼinyó xa̱ʼa̱ iin ña̱ʼa ña̱ kǒo va̱xi nu̱ú Biblia, ná kǒo kuniso̱ʼoyóna. Na̱ sáa̱-ini xíni na̱ ñuu Ndióxi̱ na̱ ni̱xi̱yo Unión Soviética ka̱ʼyína iin carta ku̱a̱ʼa̱n nu̱ú na̱ hermano, ta nu̱ú ña̱ carta yóʼo ni̱ka̱ʼa̱nna ña̱ na̱ hermano na̱ káchíñu Betel ña̱ Estados Unidos chi̱ndaʼáña nu̱úna. Ta carta yóʼo xi̱ka̱ʼa̱nña ña̱ ná ndata̱ʼvína ta ná kǒo taxina ña̱ kaʼnda inkana chiñu nu̱úna saáchi miína xíniñúʼu ndaka̱xin ña̱ keʼéna. Soo, na̱ hermano na̱ nda̱kúní ni̱xi̱yo ini xíʼin Jehová, kǒo níkeʼéna ña̱ xi̱ka̱ʼa̱n carta kán chi ki̱ʼinna kuenta ña̱ su̱ví na̱ ñuu Ndióxi̱ níchindaʼáña. Ta saátu tiempo vitin, na̱ sáa̱-ini xíni na̱ ñuu Ndióxi̱, xíniñúʼuna internet ña̱ káʼa̱nna ku̱a̱ʼání ña̱ vatá, ta xíʼin ña̱ káʼa̱nna kivi sakána xi̱níyó. Soo, ña̱ chindeétáʼan xíʼinyó ña̱ kǒo sakána xi̱níyó ni ña̱ sandáʼvina miíyó kúú ña̱ kiʼinyó kuenta ña̱ ndiʼi ña̱ xíniso̱ʼoyó xíʼin ña̱ káʼviyó ná kitáʼanña xíʼin ña̱ xa̱a̱ xíni̱yó xa̱ʼa̱ tu̱ʼun Ndióxi̱ (2 Tes. 2:2; 1 Juan 4:1). w24.07 12 párr. 14, 15

Soo iin ña̱ ndáyáʼvika kéʼéyó kúú ña̱ ndátaxiyó miíyó ndaʼa̱ Jehová ta inkáchi ndásakáʼnuyóra xíʼin na̱ hermano. Ña̱yóʼo kúú ña̱ kúni̱ Jehová, ña̱ ndiʼina ná ndataxina miína ndaʼa̱ra. Kúni̱ra ná kutáʼanna xíʼinra ta ná kutakuna ndiʼi tiempo (Deut. 30:​19, 20; Gál. 6:​7, 8). Jehová va̱ása íxandúxara xíʼin nda̱a̱ ni iinna ña̱ ndasakáʼnunara chi ña̱ kúni̱ra kúú ña̱ miína ná ndaka̱xin ndáaña keʼéna, soo ¿ndáaña kúu tá iin na̱ xa̱a̱ nda̱kuchi ni̱ki̱ʼvina iin ku̱a̱chi ña̱ ndeéní? Tá va̱ása ndándikó-inina, xíniñúʼu tavánana ti̱xin congregación (1 Cor. 5:13). Soo ni ná tavána na̱yóʼo ti̱xin congregación, Jehová kúni̱níra ña̱ ná ndikó tukuna nu̱úra, xa̱ʼa̱ ña̱kán kúú ña̱ ta̱xira se̱ʼera ña̱ ni̱xi̱ʼi̱ra xa̱ʼa̱yó ña̱ va̱ʼa ixakáʼnu-inira xa̱ʼa̱ na̱ kíʼvi ku̱a̱chi tá ndándikó-inina. Va̱ʼaní-ini Jehová, xa̱ʼa̱ ña̱kán chíndeétáʼanra xíʼin na̱ kíʼvi ku̱a̱chi ña̱ ndandikó-inina (Zac. 1:3; Rom. 2:4; Sant. 4:8). w24.08 14 párr. 1, 2

Tá ka̱ʼyira ta̱ apóstol Juan carta ña̱ u̱ni̱, ku̱a̱ʼánína ki̱xáʼana sánáʼa̱na ña̱ vatá ta ki̱xáʼa táʼví táʼanna. Soo inkana va̱ʼaníva xi̱ndasakáʼnuna Jehová ta xi̱keʼéna ndiʼi ña̱ xi̱kaʼa̱nra xíʼinna (2 Juan 4, 6). Ña̱kán xi̱kusi̱íní-ini ta̱ Juan xíʼin ña̱ xi̱keʼéna ta saátu xi̱kusi̱íní-ini Jehová xíʼinna (Prov. 27:11). ¿Ndáaña sákuaʼayó? Tá nda̱kú íyo iniyó xíʼin Jehová saá kúú ña̱ si̱í íyoyó (1 Juan 5:3). Tá kúú, kúsi̱íní-iniyó saáchi xíni̱yó ña̱ sákusi̱íyó-ini Jehová. Kúsi̱íní-ini Jehová tá xítora ña̱ kǒo kéʼéyó ña̱ kini ña̱ kéʼé na̱ yiví ta iinlá miíra nda̱kú íyo iniyó xíʼin. Saátu kúsi̱íní-ini na̱ ángel xíʼin ña̱ kéʼéyó (Luc. 15:10). Ta kúsi̱íní-iniyó tá xítoyó ña̱ nda̱kú íyo ini na̱ hermano (2 Tes. 1:4). Ña̱kán tá ná ndiʼi-xa̱ʼa̱ ndiʼi na̱ yiví na̱ kéʼé ña̱ kini, saá kusi̱íní-iniyó saáchi nda̱kú ni̱xi̱yo iniyó xíʼin Jehová. w24.11 12 párr. 17, 18

¿Nda̱saa tiempo kotoún ña̱ kéʼé iin na̱ yiví tasaá ka̱ʼún xíʼinna ña̱ kútóoúnna? Tá kamaní ná ka̱ʼún xíʼinna ña̱ kútóoúnna, kamaní-iniún kachina xa̱ʼún (Prov. 29:20). Soo tá na̱ yiví kán ki̱ʼinna kuenta ña̱ kútóoúnna, ta táxiún ña̱ ya̱ʼa ku̱a̱ʼá tiempo ta kǒo káʼún xíʼinna, sana kivi ndakanixi̱nína ña̱ kǒo xíni̱ún ndáaña kúni̱ún (Ecl. 11:4). Ndakaʼán chi tá ná ka̱ʼún xíʼinna ña̱ kútóoúnna, su̱ví ña̱yóʼo kúni̱ kachiña ña̱ xíʼin na̱yóʼo tindaʼún. Soo xíniñúʼu kunda̱a̱-iniún ña̱ xa̱a̱ íyo tu̱ʼvaún ña̱ tindaʼún chi na̱kán sana kivi xa̱a̱na tindaʼa̱na xíʼún. Tá kíʼún kuenta ña̱ íyo iin na̱ kútóo yóʼó, ¿ndáaña kivi keʼún? Tá kǒo kútóoúnna, káxi va̱ʼa na̱ʼún nu̱úna xíʼin ña̱ kéʼún ña̱ kǒo kúni̱ún kakaún xíʼinna. Kǒo keʼún si̱ki xíʼinna chi kivi ndakanixi̱nína ña̱ kútóoúnna (Efes. 4: 25). w24.05 22, 23 párr. 9, 10

Nda̱saa na̱ ndixa kúú ungido ta nda̱kú íyo inina xíʼin Jehová, kúú na̱ ndakiʼin ta̱ Jesús ku̱ʼu̱n kaʼndachíñu. Tá iin na̱ ungido va̱ása chíkaa̱na ndee̱ ña̱ keʼéna ndiʼi ña̱ káʼa̱n Ndióxi̱, va̱ása kivi ku̱ʼu̱nna chí ndiví xíʼin inka na̱ ungido (Mat. 24:31). Soo saátu ndiʼi na̱ kúni̱ koo nu̱ú ñuʼú yóʼo xíniñúʼu kuniso̱ʼona ña̱ káʼa̱n ta̱ Jesús. Miíyó xíni̱ va̱ʼayó Jehová ña̱kán kǒo xíka-iniyó xíʼin ña̱ kéʼéra. Ña̱kán kǒo xíniñúʼu ndi̱ʼi-iniyó tá ndáka̱xinka Jehová na̱ ku̱ʼu̱n chí ndiví. Ná ndakaʼányó xa̱ʼa̱ ña̱ ni̱ka̱ʼa̱n ta̱ Jesús xa̱ʼa̱ ta̱ chíʼi tú uva (Mat. 20:​1-16). Na̱ ki̱xáʼa káchíñu tá so̱ndíʼi, inkáchi cha̱ʼvirana xíʼin na̱ ki̱xáʼa káchíñu tá xi̱ta̱a̱n. Ta ki̱ʼva saá íyoña xíʼin na̱ ku̱ʼu̱n chí ndiví, ndiʼi na̱ nda̱kú ni̱xi̱yo ini xíʼin Jehová ku̱ʼu̱nna chí ndiví, ni xa̱a̱ ku̱a̱ʼá tiempo nda̱kaxinnana á sa̱kán nda̱kaxinnana. w24.09 24 párr. 15-17

Va̱ʼaní yichi̱ sa̱ndákoo ta̱ Jesús nu̱úyó saáchi ku̱ndeé-inira ni i̱xandi̱va̱ʼanína xíʼinra. Tá kúú na̱ veʼera kǒo níkandíxana ña̱ kúúra ta̱ Mesías ta ni̱ka̱ʼa̱nna ña̱ ki̱xáʼa sánara. Na̱ xi̱niʼi yichi̱ nu̱ú na̱ veʼe-ñu̱ʼu ni̱ka̱ʼa̱nna ña̱ xi̱kitáʼanra xíʼin na̱ ta̱chí ndi̱va̱ʼa. Ta na̱ soldado ñuu Roma ku̱sikindaanara, i̱xandi̱va̱ʼana xíʼinra ta xa̱ʼnínara (Mar. 3:​21, 22; 14:55; 15:​16-20, 35-37). Soo ta̱ Jesús ku̱ndeé-inira xíʼin ndiʼi ña̱yóʼo ta va̱ása ní ixandi̱va̱ʼara xíʼin na̱ sa̱xóʼvi̱ miíra. ¿Ndáaña sákuaʼayó xíʼin ña̱ ke̱ʼéra? (1 Ped. 2:​21-23). Va̱ʼaní yichi̱ chi̱núu ta̱ Jesús nu̱úyó ña̱ va̱ʼa kunda̱a̱-iniyó ndáaña xíniñúʼu keʼéyó tá íxandi̱va̱ʼana xíʼinyó. Ta̱ Jesús xi̱xini̱ra ama kúú ña̱ ka̱ʼa̱nra ta ama kúú ña̱ kǒo ka̱ʼa̱nra (Mat. 26:​62-64). Sava yichi̱ tá xi̱kaʼa̱nna ña̱ vatá á ña̱ to̱ʼón xa̱ʼa̱ra kǒo níxi̱ndakuiinra (Mat. 11:19). Soo tá xi̱ndakuiinra yuʼú na̱ sáa̱-ini xíni miíra, va̱ása níxi̱kaʼa̱n-ndi̱va̱ʼara xíʼinna ta ni va̱ása ní ixandi̱va̱ʼara xíʼinna. w24.11 4, 5 párr. 9, 10

Ná ndakanixi̱níyó ña̱ sa̱níʼi̱yó iin ña̱ʼa ña̱ liviní iin na̱ yiví ta va̱ʼaní chindeétáʼanña xíʼinna. Sana kusuchíníva-iniyó tá na̱ yiví kán ná kiʼinna ña̱ ta̱xiyó ndaʼa̱na ta chikaa̱va̱ʼanaña ta nandóso-inina xa̱ʼa̱ña. Soo kusi̱íníva-iniyó tá ná taxina tíxa̱ʼvi ndaʼa̱yó xa̱ʼa̱ña ta kuniñúʼunaña. ¿Ndáaña sákuaʼayó xíʼin ejemplo yóʼo? Ki̱ʼva saá íyo ña̱ ke̱ʼé Jehová tá ta̱xira se̱ʼera ta̱ Jesús ña̱ ni̱xi̱ʼi̱ra xa̱ʼa̱yó, ña̱kán kúsi̱íníva-inira tá táxiyó tíxa̱ʼvi ndaʼa̱ra xa̱ʼa̱ ña̱ ke̱ʼéra xa̱ʼa̱yó ta saátu xa̱ʼa̱ ña̱ ni̱na̱ʼa̱ra ña̱ kúʼvi̱ní-inira xínira miíyó (Juan 3:16; Rom. 5:​7, 8). Tá yáʼa tiempo, kivi kixáʼayó nandóso-iniyó taxiyó tíxa̱ʼvi ndaʼa̱ Ndióxi̱ xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Tá saá ná keʼéyó, tá ki̱ʼva íyo ña̱ kiʼinyó regalo ña̱ ta̱xi Jehová ndaʼa̱yó ta chikaa̱va̱ʼayóña saá kooña ta nandóso-iniyó xa̱ʼa̱ña. Soo ña̱ va̱ʼa kǒo nandóso-iniyó taxiyó tíxa̱ʼvi ndaʼa̱ Jehová xa̱ʼa̱ ña̱ ke̱ʼéra xa̱ʼa̱yó, ndiʼi ki̱vi̱ xíniñúʼu ndakanixi̱níyó xa̱ʼa̱ ña̱ ke̱ʼéra ta saátu xa̱ʼa̱ ña̱ ke̱ʼé ta̱ Jesús xa̱ʼa̱yó. w25.01 26 párr. 1, 2

Iin ta̱ hermano ta̱ sa̱kán nda̱kuchi kǒo kívi koora anciano saáchi xíniñúʼu ya̱ʼa tiempo ña̱ va̱ʼa viíka kutáʼanra xíʼin Jehová, ta saátu xíniñúʼu sakúaʼara kuniñúʼura tu̱ʼun Ndióxi̱ tasaá ndaka̱xin viíra ña̱ keʼéra. Ña̱ siʼna xíniñúʼu keʼé iin ta̱ hermano ña̱ va̱ʼa xa̱a̱ra koora anciano kúú ña̱ keʼéra nda̱a̱ táki̱ʼva ke̱ʼé ta̱ Jesús. Xíniñúʼu vitá koo inira ta chikaa̱ra ndee̱ ña̱ keʼéra ña̱ kúni̱ Jehová, ta kǒo sa̱a̱ra tá kǒo táxi kamana iin chiñu ndaʼa̱ra ti̱xin congregación (Mat. 20:23; Filip. 2:​5-8). Ta saátu xíniñúʼu na̱ʼa̱ra ña̱ nda̱kú íyo inira xíʼin Jehová, ta iin ki̱ʼva ña̱ na̱ʼa̱ra ña̱yóʼo kúú ña̱ keʼéra ña̱ káʼa̱n na̱ ñuu Ndióxi̱. Biblia káʼa̱nña ña̱ iin ta̱ hermano ta̱ kúni̱ kuumií iin chiñu ti̱xin congregación xíniñúʼu koo tu̱ʼvara ña̱ sanáʼa̱ra. ¿Á kúni̱ kachi ña̱yóʼo ña̱ xíniñúʼu kuxini̱níra taxira discurso? Su̱ví saáví íyoña, ku̱a̱ʼání na̱ anciano íxayo̱ʼvi̱ña xíʼinna taxina discurso, soo tá ku̱a̱ʼa̱nna predicación va̱ʼaníva sánáʼa̱na na̱ yiví, ta saátu va̱ʼaní chíndeétáʼanna xíʼin na̱ hermano tá kéʼéna visita ña̱ pastoreo. w24.11 23, 24 párr. 14, 15

Tá ndáni̱ʼún iin texto ña̱ va̱xi nu̱ú Biblia ña̱ kǒo kúnda̱a̱-iniún xa̱ʼa̱, nandukú xa̱ʼa̱ña. Ta tá xa̱a̱ na̱ndukún xa̱ʼa̱ña, ndakanixi̱ní xa̱ʼa̱ ña̱ nda̱ni̱ʼún saátu ndakanixi̱ní xa̱ʼa̱ ña̱ sa̱kúaʼún xa̱ʼa̱ Jehová xíʼin se̱ʼera ta saátu xa̱ʼa̱ ña̱ kúʼvi̱ní-inina xínina miíyó (Sal. 119:97). Va̱ása ndakava-iniún tá kǒo iin ña̱ʼa xa̱á nísakúaʼún nu̱ú Biblia á iin ña̱ sándakanda̱ní-iniún, saáchi nda̱a̱ táki̱ʼva íyo ña̱ nandukúyó oro saá íyo ña̱ kaʼviyó tu̱ʼun Ndióxi̱. Na̱ yiví na̱ nándukú oro ku̱a̱ʼání hora xíniñúʼuna ña̱ nandukúnaña ta saátu ku̱a̱ʼání ki̱vi̱ nándukúnaña. Na̱yóʼo ndákundeéna nándukúnaña ta kúeení íyo inina, ta ni loʼoní kúú ña̱ ndáni̱ʼína kúnda̱a̱-inina ña̱ ndáyáʼviníña. Soo ña̱ʼa ña̱ ndáni̱ʼíyó nu̱ú Biblia ndáyáʼviníkaña nu̱ú oro (Prov. 8:10). Xa̱ʼa̱ ña̱kán kúee koo iniún ta kǒo sandákoún ña̱ viíní kaʼviún tu̱ʼun Ndióxi̱ (Sal. 1:2). w25.01 25 párr. 14, 15

Jehová kúni̱ra ná ixakáʼnu-iniyó xa̱ʼa̱ na̱ íxandi̱va̱ʼa xíʼinyó (Sal. 86:5; Luc. 17:4; Efes. 4:32). Sana iinna ka̱ʼa̱nna á keʼéna iin ña̱ʼa ña̱ sáxo̱ʼvi̱ní miíyó, ta xóʼvi̱níkayó tá iin na̱ veʼeyó á iin na̱ migoyó kéʼé ña̱yóʼo xíʼinyó (Sal. 55:​12-14). Sava yichi̱, xa̱ʼa̱ ña̱ kéʼéna á káʼa̱nna xíʼinyó ndeéní sáxo̱ʼvi̱na-iniyó, ta ña̱yóʼo íyoña nda̱a̱ táki̱ʼva íyo ña̱ sátukue̱ʼe̱na miíyó xíʼin yuchu̱ (Prov. 12:18). Sana sava yichi̱ kǒo kúni̱yó na̱ʼa̱yó nu̱ú inkana ña̱ ndeéní xóʼvi̱yó, soo tá ná keʼéyó ña̱yóʼo nda̱a̱ táki̱ʼva íyo na̱ va̱ása tává yuchu̱ ña̱ ka̱nina miíyó ta táxiyó ña̱ kindo̱oña kundikaa̱ña nu̱ú tu̱kue̱ʼe̱yó saá kooña. Ta ki̱ʼva saá ndóʼoyó tá kǒo ndákuniyó ña̱ va̱ása va̱ʼa kúniyó xa̱ʼa̱ ña̱ ke̱ʼéna xíʼinyó. ¿Ndáaña ndóʼoyó tá iin na̱ yiví sáxo̱ʼvi̱na miíyó xíʼin ña̱ kéʼéna á ña̱ káʼa̱nna? Ña̱ siʼna kéʼéyó kúú ña̱ sáa̱yó xíʼinna. Ña̱ Biblia káʼa̱nña ña̱ saá ndóʼovayó. Soo saátu Biblia táxiña iin consejo ña̱ va̱ʼaní ndaʼa̱yó ña̱ kǒo xíniñúʼu sa̱a̱yó ndiʼi tiempo (Sal. 4:4; Efes. 4:26). ¿Nda̱chun? Saáchi tá sáa̱yó kivi xa̱a̱yó keʼéyó inkaka ña̱ʼa (Sant. 1:20). Ndakaʼán, ndiʼivayó sáa̱ sava yichi̱, soo saátu kivi chikaa̱yó ndee̱ ña̱ ndi̱ko-iniyó ta kǒo sa̱a̱kayó. w25.02 15 párr. 4-6

Ta̱ Jesús ni̱ka̱ʼa̱nra ña̱ va̱ása ndáyáʼviníví ña̱ kuumiíyó ku̱a̱ʼání ña̱ ku̱i̱ká chi ña̱ ndáyáʼviníka kúú ña̱ kundi̱ʼi-iniyó xa̱ʼa̱ chiñu Ndióxi̱ (Luc. 12:​16-21). Saáchi va̱ása kúnda̱a̱-iniyó ndáaña kundoʼoyó ki̱vi̱ taa̱n, xa̱ʼa̱ ña̱kán ná kǒo kundi̱ʼiní-iniyó xa̱ʼa̱ ña̱ kuumiíyó ña̱ ku̱i̱ká (Prov. 23:​4, 5; Sant. 4:​13-15). Ta saátu ni̱ka̱ʼa̱n ta̱ Jesús ña̱ ndiʼi na̱ kúni̱ kundiku̱n sa̱tára xíniñúʼu chikaa̱-inina ña̱ sandákoona ndiʼi ña̱ ku̱i̱ká ña̱ kúúmiína (Luc. 14:33). Na̱ cristiano na̱ ni̱xi̱yo chí Judea tá siglo nu̱ú, ke̱ʼéna ña̱yóʼo xíʼin ña̱ si̱í-ini (Heb. 10:34). Tiempo vitin, ku̱a̱ʼání na̱ hermano távánana nu̱ú káchíñuna á kíndaana ña̱ʼa ña̱ kúúmiína xa̱ʼa̱ ña̱ kǒo kíʼvina xíʼin ña̱ política (Apoc. 13:​16, 17). Ta na̱yóʼo náʼa̱na ña̱ xíʼin ndinuʼu-inina kándíxana ña̱ káʼa̱n Jehová tá káchira: “Nda̱a̱ ni iin yichi̱ va̱ása sandákoi̱ yóʼó ta nda̱a̱ ni iin yichi̱ va̱ása sañándaʼíi̱ yóʼó” (Heb. 13:5). Miíyó chíkaa̱yó ndee̱ ña̱ kachíñuyó ña̱ va̱ʼa kuumiíyó loʼo xu̱ʼún ña̱ kuniñúʼuyó tá xa̱a̱ ná kuchéeyó, ta xíʼin ndinuʼu-iniyó kándíxayó ña̱ mií Jehová chindeétáʼan xíʼinyó tá ná kuu iin ña̱ʼa ña̱ kǒo níndakanixi̱níyó kuu. w25.03 29 párr. 13, 14

Kúni̱va Jehová chindeétáʼanra xíʼinyó ña̱ va̱ʼa kunda̱a̱ka-iniyó xíʼin tu̱ʼunra. Ti̱xin congregación íyo na̱ anciano na̱ kivi chindeétáʼan xíʼinyó ña̱ kundiku̱nyó yichi̱ ta̱ Cristo (Efes. 4:​11-13). Saátu táxira espíritu santo ndaʼa̱yó ta ña̱yóʼo chíndeétáʼanña xíʼinyó ña̱ ndakanixi̱níyó táki̱ʼva ndákanixi̱ní ta̱ Cristo (1 Cor. 2:​14-16). Ta saátu ta̱xira ña̱ ka̱ʼyi̱ ku̱mí saá ña̱ Evangelio ta ña̱yóʼo chíndeétáʼanña xíʼinyó ña̱ va̱ʼa kunda̱a̱-iniyó ndáa ki̱ʼva ni̱xi̱yo ta̱ Jesús tá ki̱xira nu̱ú ñuʼú yóʼo. Tá ndákanixi̱níyó táki̱ʼva ndákanixi̱ní ta̱ Jesús ta kéʼéyó táki̱ʼva kéʼéra saá kivi xa̱a̱yó kooyó na̱ cristiano na̱ xu̱xa-ini xíʼin tu̱ʼun Ndióxi̱. Ña̱ va̱ʼa kuxa-iniyó xíʼin tu̱ʼun Ndióxi̱, xíniñúʼu chikaa̱yó ndee̱ ña̱ sakúaʼakayó ku̱a̱ʼá ña̱ʼa xa̱ʼa̱ ta̱ Cristo. w24.04 4, 5 párr. 11, 12

Ndiʼi ki̱vi̱ xíniñúʼu ndaka̱xinyó ndáaña keʼéyó. Íyo sava ña̱ kǒo íxayo̱ʼvi̱ xíʼinyó ndaka̱xinyó keʼéyó, tá kúú ndáaña kuxuyó á ndáa hora ku̱ʼu̱nyó ku̱su̱nyó. Soo íyova sava ña̱ íxayo̱ʼvi̱ní xíʼinyó ndaka̱xinyó keʼéyó. Tá kúú, ndáaña xíniñúʼu keʼéyó ña̱ va̱ʼa kǒo kiʼinyó kue̱ʼe̱, á ña̱ va̱ʼa si̱í koo miíyó ta saátu xíʼin na̱ veʼeyó á ndáaña keʼéyó ña̱ va̱ʼa ndasakáʼnuyó Ndióxi̱. Ta ña̱ kúni̱yó kúú ña̱ ná chindeétáʼan ña̱ ndáka̱xinyó keʼéyó xíʼin miíyó ta saátu xíʼin na̱ veʼeyó, soo ña̱ ndáyáʼviníka nu̱úyó kúú ña̱ ná kusi̱í-ini Jehová xíʼin ña̱ ndáka̱xinyó keʼéyó (Rom. 12:​1, 2). Ña̱ va̱ʼa vií koo ña̱ ndaka̱xinyó keʼéyó, siʼna xíniñúʼu kunda̱a̱-iniyó xa̱ʼa̱ ndiʼi ña̱ʼa. ¿Nda̱chun ndáyáʼviní keʼéyó ña̱yóʼo? Ndakanixi̱ní xa̱ʼa̱ iin na̱ yiví ña̱ ku̱a̱ʼa̱nna nu̱ú doctor saáchi ndeéníndóʼona, ¿á xa̱a̱ ndi̱ku̱n taxi ta̱ doctor ta̱tán ndaʼa̱na? ¿Á siʼna kotovarana ta nda̱ka̱tu̱ʼunrana ndáaña ndóʼona? Ki̱ʼva saátu xíniñúʼu keʼé miíún, siʼna xíniñúʼu kunda̱a̱-iniún xa̱ʼa̱ ndiʼi ña̱ʼa tasaá ndaka̱xiún ña̱ keʼún ña̱ va̱ʼa vií kanaña. w25.01 14 párr. 1-3

Kúndáʼviní-ini Jehová xínira na̱ yiví ta kǒo kúni̱ra ña̱ kuvi ni iinna. ¿Ndáa ki̱ʼva ni̱na̱ʼa̱ra ña̱ ku̱ndáʼvi-inira xi̱nira sava na̱ yiví na̱ ke̱ʼé ku̱a̱chi ña̱ kininí? (2 Ped. 3:9). Ta̱ rey David ni̱ki̱si̱ra xíʼin ñá síʼi inka ta̱a, ta tándi̱ʼi xa̱ʼnírara. Iin ku̱a̱chi ndeéní kúú ña̱ ke̱ʼéra nu̱ú Jehová. Soo nda̱ndikó-inira ta Jehová ku̱ndáʼvi-inira xi̱nirara ta i̱xakáʼnu-inira xa̱ʼa̱ra (2 Sam. 12:​1-12). Ku̱a̱ʼání ña̱ kini ke̱ʼé ta̱ rey Manasés, soo nisaá ku̱ndáʼvi-ini Jehová xi̱nirara saáchi xíʼin ndiʼi níma̱ra nda̱ndikó-inira xa̱ʼa̱ ña̱ ke̱ʼéra (2 Crón. 33:​9-16). Ejemplo yóʼo náʼa̱ña nu̱úyó ña̱ kúndáʼviva-ini Jehová xínira na̱ yiví tá xítora ña̱ ndixa ndándikó-inina. Sandátakuva Jehová ta̱ David xíʼin ta̱ Manasés saáchi xi̱tora ña̱ ndixa nda̱ndikó-inina xa̱ʼa̱ ña̱ ke̱ʼéna. w24.05 4 párr. 12