Mayo

Tá ta̱vá Jehová na̱ ñuu Israel ti̱xin ñuu Egipto nda̱kaxinra sava na̱ koo su̱tu̱ ña̱ kachíñuna ti̱xin tabernáculo. Saátu ni̱ka̱ʼa̱nra xíʼin na̱ levita ña̱ kachíñuna ti̱xin tabernáculo. ¿Á nda̱saa na̱ xi̱kachíñu ti̱xin tabernáculo á na̱ ni̱xi̱yo yatin nu̱ú xi̱ndikaa̱ña kúú na̱ va̱ʼaní xi̱ndaa Jehová? Va̱ásaví, saáchi va̱ʼaní xi̱ndaara ndiʼina. Ndiʼi na̱ israelita inkáchi ni̱xi̱yona nu̱ú Jehová ta kivi xa̱a̱na kutáʼanna xíʼinra ta koona migora. Tá kúú, tá káʼñu xi̱taxi Jehová ña̱ koto ndiʼi na̱ israelita vi̱kó sa̱tá tabernáculo, ta tá ñuú xi̱xinina iin ñuʼu̱ sa̱táña (Éx. 40:38). Ña̱kán, nda̱a̱ na̱ xi̱ndoo xíká xi̱xini tá xi̱kanda̱ vi̱kó, tasaá ndi̱ku̱n kama xi̱ndakayana ña̱ʼana, xi̱xanina veʼena ña̱ tela ta xi̱ndakiʼinna ku̱a̱ʼa̱nna ña̱ va̱ʼa kundiku̱nna vi̱kó yóʼo (Núm. 9:​15-23). Ta saátu kúu tiempo vitin, ni nda̱a̱ ndáaka ñuu íyoyó kúʼvi̱ní-ini Jehová xínira miíyó, ndáara miíyó ta kíʼinra kuenta xíʼinyó. w24.06 4 párr. 10-12

Ta̱ Absalón xi̱kuni̱ra kaʼníra ta̱ David chi xi̱kuni̱ra nduura rey (2 Sam. 15:​12, 13). Ña̱kán, ta̱ David xi̱niñúʼu kamaní kitara ñuu Jerusalén. Tá xa̱a̱ ke̱ena ku̱a̱ʼa̱nna ta̱ David ki̱ʼinra kuenta ña̱ xi̱niñúʼu kindo̱o iin na̱ kítáʼan va̱ʼa xíʼinra ñuu Jerusalén ña̱ va̱ʼa kotona ndáaña kéʼé ta̱ Absalón tasaá natúʼunna xíʼinra xa̱ʼa̱ ña̱yóʼo. Ña̱kán ni̱ka̱ʼa̱nra xíʼin ta̱ Sadoc xíʼin inkaka na̱ su̱tu̱ ña̱ ná ndikóna ñuu Jerusalén ña̱ va̱ʼa kotona̱nína á kotoniʼnivíxína ña̱ kéʼé ta̱ Absalón (2 Sam. 15:​27-29). Xi̱niñúʼu kiʼinnína kuenta, ta̱ David ni̱ka̱ʼa̱nra xíʼin ta̱ Sadoc ta saátu xíʼin ta̱ Husái ña̱ keʼéna iin ña̱ʼa (2 Sam. 15:​32-37). Ta̱ Husái ke̱ʼéra ña̱ ni̱ka̱ʼa̱n ta̱ David ta ki̱xáʼara va̱ʼaní kítáʼanra xíʼin ta̱ Absalón. Ta̱ Husái ni̱ka̱ʼa̱nra xíʼin ta̱ Absalón ndáaña keʼéra ña̱ va̱ʼa kanitáʼanra xíʼin ta̱ David. Ña̱yóʼo chi̱ndeétáʼan xíʼin ta̱ David ña̱ va̱ʼa kuumiíra ku̱a̱ʼá loʼoka tiempo tasaá kunda̱a̱-inira ndáa ki̱ʼva kanitáʼanra xíʼin ta̱ Absalón. Tándi̱ʼi, ta̱ Husái na̱túʼunra ña̱yóʼo xíʼin ta̱ Sadoc ta saátu xíʼin ta̱ Abiatar (2 Sam. 17:​8-16). Tasaá ta̱ Sadoc xíʼin ta̱ Abiatar na̱túʼunna xíʼin ta̱ David. Ña̱yóʼo chi̱ndeétáʼanña xíʼin ta̱ David tasaá kǒo níxaʼnínara (2 Sam. 17:​21, 22). w24.07 4, 5 párr. 9, 10

Sava na̱ ndásakáʼnu Jehová va̱ása va̱ʼa kúnina tá ndákaʼánna xa̱ʼa̱ ku̱a̱chi ña̱ ni̱ki̱ʼvina tá ya̱chi̱, ta sana ke̱ʼénaña tá kúma̱níka ndakuchina á tá xa̱a̱ nda̱kuchina. Soo ná ndakaʼányó chi xa̱ʼa̱ ña̱ kúni̱ní Jehová xínira miíyó ta̱xira se̱ʼera ña̱ ni̱xi̱ʼi̱ra xa̱ʼa̱yó. Ña̱kán kúni̱ra ná kandíxayó ña̱ íxakáʼnuva-inira xa̱ʼa̱yó. Jehová káʼa̱nra xíʼinyó: “Naʼandó ná natúʼunyó ta chindeétáʼi̱n xíʼinndó ña̱ ndakutáʼan viíndó xíʼi̱n”. Jehová káʼa̱nra xíʼinyó ña̱ tá ná keʼéyó ña̱yóʼo ixakáʼnu-inira xa̱ʼa̱yó ta kǒo ndakaʼánkara xa̱ʼa̱ ña̱ ke̱ʼéyó. Táxiníyó tíxa̱ʼvi ndaʼa̱ yiváyó Jehová xa̱ʼa̱ ña̱ nándósó-inira xa̱ʼa̱ ndiʼi ku̱a̱chi ña̱ ni̱ki̱ʼviyó tá ya̱chi̱, ta nina ña̱ va̱ʼa ke̱ʼéyó kúú ña̱ ndákaʼánra xa̱ʼa̱ (Sal. 103:​9, 12; Heb. 6:10). ¿Ndáaña kivi chindeétáʼan xíʼún tá kǒo kívi nandóso-iniún xa̱ʼa̱ ku̱a̱chi ña̱ ni̱ki̱ʼviún tá ya̱chi̱? Ndakanixi̱ní xa̱ʼa̱ ña̱ kivi keʼún vitin ta saátu chí nu̱únínu. Kǒo kívi nasamaún ña̱ ke̱ʼún á ña̱ ndo̱ʼún tá ya̱chi̱. Soo vitin kivi chika̱ún ndee̱ ña̱ ndasakáʼnún Jehová ta saátu kivi ndakanixi̱níún xa̱ʼa̱ ña̱ va̱ʼa ña̱ káʼa̱nra taxira ndaʼún chí nu̱únínu. w24.10 8 párr. 8, 9

Tá káʼviún Biblia ta kíʼún kuenta ña̱ íyo ku̱a̱ʼání ña̱ xíniñúʼu keʼún, kivi ndakava-iniún. Ná ndakanixi̱níyó xa̱ʼa̱ ña̱yóʼo. Iin ki̱vi̱ ka̱ʼviyó iin versículo ña̱ káʼa̱n xa̱ʼa̱ ña̱ va̱ása va̱ʼa ndaka̱xinyó na̱ kitáʼan xíʼinyó (Sant. 2:​1-8). Xa̱ʼa̱ ña̱ ki̱ʼún kuenta ña̱ va̱ása xíniñúʼu ndaka̱xiún na̱ kitáʼan xíʼún ki̱xáʼún chíkaa̱ún ndee̱ ña̱ nasamaún ña̱ kéʼún. Ta va̱ʼaníva íyo ña̱ kúni̱ún keʼún, tasaá tá inka ki̱vi̱ káʼviún iin texto ña̱ káʼa̱n xa̱ʼa̱ ña̱ xíniñúʼu kiʼún kuenta xíʼin tu̱ʼun ña̱ káʼún (Sant. 3:​1-12). Tasaá ki̱ʼún kuenta ña̱ va̱ása va̱ʼa íyo ña̱ káʼún sava yichi̱, ña̱kán chíkaa̱ún ndee̱ ña̱ viíka koo ña̱ ka̱ʼún. Tá inka ki̱vi̱ káʼviún ña̱ káʼa̱n xa̱ʼa̱ ña̱ kǒo kutáʼún xíʼin na̱ ñuyǐví (Sant. 4:​4-12). Tasaá chíkaa̱ún ndee̱ ña̱ kiʼún kuenta xíʼin película ña̱ xítoún ta saátu yaa ña̱ xíniso̱ʼún, ña̱kán ndákavaní-iniún tá ndákanixi̱níún xa̱ʼa̱ ndiʼi ña̱ xíniñúʼu keʼún. Va̱ása ndakava-iniún ndakaʼán chi ndiʼi tiempova xíniñúʼu nasamayó ki̱ʼva ña̱ kéʼéyó. w24.09 5, 6 párr. 11, 12

Ta ke̱ʼéra ña̱yóʼo saáchi xi̱kunda̱a̱-inira ña̱ iinlá Jehová kúú ta̱ va̱ʼaní ndátiin ku̱a̱chi. Xi̱xini̱va ta̱ Jesús ña̱ xi̱xito Jehová ndiʼi ña̱ va̱ása va̱ʼa ña̱ xi̱keʼéna xíʼinra ta xi̱kunda̱a̱va-inira ña̱ ndatiin Jehová ku̱a̱chi xíʼinna. Kivi keʼéyó táki̱ʼva ke̱ʼé ta̱ Jesús. Ná kiʼinyó kuenta xíʼin ña̱ káʼa̱nyó tá xa̱a̱ íxandi̱va̱ʼana xíʼinyó. Tá su̱ví ña̱ ndeéví kúú ña̱ níkeʼéna xíʼinyó, kivi nandósova-iniyó xa̱ʼa̱ña. Inka ña̱ kivi keʼéyó kúú ña̱ kǒo ndakuiinyó yuʼúna tá xa̱a̱ káʼa̱nna xíʼinyó tasaá va̱ása kuaʼnuka ku̱a̱chi (Ecl. 3:7; Sant. 1:​19, 20). Soo sava yichi̱ xíniñúʼu ndakuiinyó yuʼú iin na̱ yiví tá xíniso̱ʼoyó ña̱ su̱ví ña̱ nda̱a̱ kúú ña̱ káʼa̱nna xa̱ʼa̱ ña̱ kándíxayó Ndióxi̱. Ta saátu tá xítoyó ña̱ íxandi̱va̱ʼana xíʼin iin na̱ yiví kiviva chindeétáʼanyó xíʼinna á ndakiʼinyó tu̱ʼunna (Hech. 6:​1, 2). Ta̱ Jesús xi̱kunda̱a̱va-ini ña̱ ndatiinva Jehová ku̱a̱chi xíʼin na̱ i̱xandi̱va̱ʼa xíʼinra, ta saátu ná keʼé miíyó tá xa̱a̱ káʼa̱nyó xíʼin iin na̱ yiví, to̱ʼó ná ka̱ʼa̱nyó xíʼinna. (1 Ped. 2:23). w24.11 5, 6 párr. 10-12

Tá ndándikó-ini iin na̱ ni̱ki̱ʼvi ku̱a̱chi, ndiʼivayó kúsi̱í-ini xíʼinna (Luc. 15:7). Ni chíndeétáʼanníva na̱ anciano xíʼin iin na̱ ni̱ki̱ʼvi ku̱a̱chi ña̱ ndikó-inina, ¿soo ndáana kúú mií na̱ ndixa chíndeétáʼan xíʼinna ña̱ nasamana ta ndikó-inina? Ta̱ apóstol Pablo ni̱ka̱ʼa̱nra ña̱ mií Ndióxi̱ chíndeétáʼan xíʼin na̱ yiví kán ña̱ ndikó-inina xa̱ʼa̱ ku̱a̱chi ña̱ ni̱ki̱ʼvina (2 Tim. 2:25). Ña̱kán tá násama iin na̱ ni̱ki̱ʼvi ku̱a̱chi ña̱ kéʼéna xíʼin ña̱ ndákanixi̱nína, mií Jehová kúú ta̱ chíndeétáʼan xíʼin na̱yóʼo ña̱ ndikó-inina xa̱ʼa̱ ña̱ ke̱ʼéna. Ta̱ Pablo ni̱ka̱ʼa̱nra ndáa ña̱ va̱ʼa ndákiʼin iin na̱ yiví na̱ ni̱ki̱ʼvi ku̱a̱chi tá ndándikó-inina: xa̱a̱na kuxini̱ va̱ʼana ña̱ nda̱a̱, kixáʼana vií ndakanixi̱nína tasaá va̱ása ndakavakana ndaʼa̱ ta̱ Ndi̱va̱ʼa (2 Tim. 2:26). Tá ndándikó-ini iin na̱ ni̱ki̱ʼvi ku̱a̱chi, na̱ anciano ku̱ʼu̱nkavana kotonana ña̱ va̱ʼa chindeétáʼanna xíʼinna ña̱ ndakutáʼan viíkana xíʼin Ndióxi̱, ña̱ va̱ása keʼéna ña̱ kúni̱ ta̱ Ndi̱va̱ʼa ta saátu chindeétáʼanna xíʼinna ña̱ keʼéna ña̱ va̱ʼa (Heb. 12:​12, 13). w24.08 23 párr. 14, 15

Na̱ yiví na̱ ta̱xi ta̱ Jesús ña̱ xi̱xi ni̱na̱ʼa̱na, ña̱ xi̱ndayáʼvika nu̱úna xi̱kuu ña̱ taxira ña̱ kuxuna nu̱úka ña̱ sakúaʼana xa̱ʼa̱ Ndióxi̱. Tá inka ki̱vi̱, tá xi̱ni na̱ yiví ña̱ xa̱a̱ ku̱a̱ʼa̱n ta̱ Jesús xíʼin na̱ apóstolra, na̱yóʼo nda̱ana inkaka barco tú ke̱e chí ñuu Tiberíades ta nda̱kiʼinna ku̱a̱ʼa̱nna nandukúna ta̱ Jesús chí Capernaúm (Juan 6:​22-24). Soo, ¿á ke̱ʼéna ña̱yóʼo xa̱ʼa̱ ña̱ xi̱kuni̱kana kuniso̱ʼona xa̱ʼa̱ Reino Ndióxi̱? Su̱ví xa̱ʼa̱ ña̱kánví níkeʼénaña, saáchi ña̱ xi̱kuni̱na kúú ña̱ ná taxi ta̱ Jesús ña̱ kuxuna. ¿Nda̱chun va̱ʼa xíni̱yó ña̱yóʼo? Ná kotoyó ndáaña ku̱u tá nda̱kutáʼan na̱ yiví yóʼo xíʼin ta̱ Jesús yatin chí ñuu Capernaúm. Káxiní ni̱ka̱ʼa̱n ta̱ Jesús xíʼinna, ña̱ xi̱kuni̱ kuitína kúú ña̱ taxira ña̱ kuxuna. Ni̱ka̱ʼa̱nra xíʼinna ña̱ ni xi̱xivana si̱ta̱váʼa nda̱a̱ chu̱tú-inina soo ña̱ xi̱xina yóʼo ña̱ ndíʼi-xa̱ʼa̱va kúúña. Ña̱kán ni̱ka̱ʼa̱nra xíʼinna ña̱ ná kachíñuna xa̱ʼa̱ ña̱ kuxuna ña̱ taxi ña̱ kutakuna ndiʼi tiempo (Juan 6:​26, 27). Ta saátu ni̱ka̱ʼa̱nra xíʼinna ña̱ mií yivára kúú ta̱ taxiña ndaʼa̱na. w24.12 5 párr. 8, 9

Ña̱ va̱ʼa viíní sanáʼa̱ iin ta̱ anciano ta saátu ña̱ taxira consejo, xíniñúʼu viíní sakúaʼara kuniñúʼura Biblia. Ña̱kán xíniñúʼu kaʼvira Biblia ndiʼi ki̱vi̱ ta saátu xíniñúʼu kaʼvira tutu ña̱ tává na̱ ñuu Ndióxi̱ (Prov. 15:28). Xíniñúʼu kotora ndáa ki̱ʼva viíní kuniñúʼura versículo ña̱ va̱xi nu̱ú Biblia. Ta tá sánáʼa̱ra chíndeétáʼanra xíʼin na̱ xíniso̱ʼo miíra ña̱ kuʼvi̱-inina kunina Jehová ta saátu ña̱ keʼéna ña̱ sákuaʼana. Inka ña̱ chindeétáʼan xíʼinra ña̱ sanáʼa̱ra inkana kúú ña̱ ndukúra consejo nu̱ú na̱ anciano na̱ xa̱a̱ ku̱a̱ʼá ku̱i̱ya̱ ñúʼu ti̱xin ñuu Ndióxi̱, ta keʼéra ña̱ káʼa̱nna xíʼinra (1 Tim. 5:17). Na̱ anciano xíniñúʼu chikaa̱na ndee̱ xíʼin na̱ hermano, ta saátu xíniñúʼu taxina consejo ndaʼa̱na. Ta nda̱a̱ sava yichi̱ xíniñúʼu ka̱ʼa̱nna xíʼinna xa̱ʼa̱ ña̱ va̱ása va̱ʼa kéʼéna, soo xíniñúʼu vií ka̱ʼa̱nna xíʼinna. Tá vií káʼa̱nna xíʼin na̱ hermano ta íxato̱ʼónana ta xíniñúʼuna Biblia tá sánáʼa̱nana, saá xa̱a̱na keʼéna nda̱a̱ táki̱ʼva ke̱ʼé ta̱ Jesús (Mat. 11:​28-30; 2 Tim. 2:24). w24.11 24 párr. 16

Kivi ndasakáʼnuyó Jehová tá káʼa̱nyó xíʼin inkana xa̱ʼa̱ra. Miíyó na̱ ndásakáʼnu Jehová kivi katayó nu̱úra, káʼa̱n va̱ʼayó xa̱ʼa̱ ki̱vi̱ra, natúʼunyó xa̱ʼa̱ ña̱ sáka̱kura miíyó ta ka̱ʼa̱nyó xa̱ʼa̱ ndee̱ ña̱ kúúmiíra xíʼin inka na̱ yiví (Sal. 96:​1-3). Tá kéʼéyó ndiʼi ña̱yóʼo, saá kúú ña̱ ndásakáʼnuyó yiváyó ta̱ íyo chí ndiví (Hech. 4:29). Kivi ndasakáʼnuyó Jehová tá táxiyó ña̱ʼa ña̱ kúúmiíyó ndaʼa̱ra. Na̱ ndásakáʼnu Jehová, xa̱a̱ ku̱a̱ʼání tiempo kéʼéna ña̱yóʼo ña̱ va̱ʼa ndasakáʼnunara (Prov. 3:9). Tá kúú, na̱ israelita ta̱xina ña̱ʼa ña̱ kúúmiína ña̱ va̱ʼa ixava̱ʼana templo ta saátu ña̱ kiʼinna kuenta xíʼinña (2 Rey. 12:​4, 5; 1 Crón. 29:​3-9). Sava na̱ discípulo ta̱ Jesús xi̱xiniñúʼuna ña̱ʼa ña̱ kúúmiína ña̱ va̱ʼa chindeétáʼanna xíʼinra ta saátu xíʼin na̱ apóstolra (Luc. 8:​1-3). Ta saátu ke̱ʼé na̱ cristiano na̱ ni̱xi̱yo tá siglo nu̱ú, saáchi ta̱xina ña̱ʼa ña̱ kúúmiína ña̱ va̱ʼa chindeétáʼanna xíʼin na̱ hermano na̱ inka ñuu (Hech. 11:​27-29). Saátu miíyó na̱ ndóo tiempo vitin xíʼin ndiʼi níma̱yó táxiyó loʼo xu̱ʼún ña̱ kúúmiíyó á inkaka ña̱ʼa ña̱ kúúmiíyó ndaʼa̱ Jehová, chi saá kúú ña̱ ndásakáʼnuyóra. w25.01 4 párr. 8; 5 párr. 11

¿Ndáaña chi̱ndeétáʼan xíʼin ta̱ Cornelio ña̱ va̱ʼa ni̱xa̱a̱ra nda̱kuchira? Ña̱ Biblia káʼa̱nña ña̱ miíra xíʼin na̱ veʼera xi̱ ixato̱ʼónína Ndióxi̱, “ta ndiʼi tiempo xi̱ka̱ʼa̱n-ndáʼvira xíʼin Ndióxi̱” (Hech. 10:2). Tá na̱túʼun ta̱ Pedro xa̱ʼa̱ tu̱ʼun va̱ʼa xíʼin ta̱ Cornelio, miíra xíʼin na̱ veʼera ni̱xa̱a̱na ka̱ndíxana ta̱ Cristo ta ndi̱ku̱n nda̱kuchina (Hech. 10:​47, 48). Ta̱ Cornelio ka̱ndíxavara nasamara ña̱ xi̱keʼéra ña̱ va̱ʼa inkáchi ndasakáʼnura Jehová xíʼin na̱ veʼera (Jos. 24:15; Hech. 10:​24, 33). Ta̱ Cornelio xi̱kuumiíra iin chiñu ña̱ ndáyáʼvi, soo va̱ása nítaxira ña̱ kasi ña̱yóʼo nu̱úra ña̱ xa̱a̱ra ndasakáʼnura Ndióxi̱. Ta miíún, ¿á xíniñúʼu nasamaún sava ña̱ kéʼún ña̱ va̱ʼa xa̱ún ndakuchiún? Tá saá íyoña, kǒo kaka-iniún chi mií Jehová chindeétáʼan xíʼún ta miíra taxi ku̱a̱ʼání bendición ndaʼún xa̱ʼa̱ ña̱ chíkaa̱níún ndee̱ ña̱ keʼún ña̱ káʼa̱n tu̱ʼunra. w25.03 5 párr. 12, 13

Ña̱kán, tá xíniso̱ʼoyó ña̱ káʼa̱nna ña̱ va̱ása va̱ʼa xa̱ʼa̱ na̱ ñuu Ndióxi̱ á xa̱ʼa̱ na̱ níʼi yichi̱ nu̱úyó, ná ndakaʼányó xa̱ʼa̱ ña̱ ke̱ʼé na̱ yiví xíʼin ta̱ Jesús ta saátu xíʼin na̱ discípulora. Nda̱a̱ táki̱ʼva ni̱ka̱ʼa̱n Biblia, na̱ yiví íxandi̱va̱ʼana xíʼin na̱ testigo Jehová ta káʼa̱nna ña̱ vatá xa̱ʼa̱na (Mat. 5:​11, 12). Ta̱ Ndi̱va̱ʼa kúú ta̱ xíniñúʼu na̱ yiví ña̱ sandáʼvina miíyó, ña̱kán ná kǒo kuniso̱ʼoyó ña̱ káʼa̱nna. Soo, ¿ndáaña xíniñúʼu keʼéyó tasaá kǒo kandíxayó ña̱ káʼa̱n na̱yóʼo? Ná kǒo kuniso̱ʼoyó ña̱ vatá ña̱ káʼa̱n na̱ yiví. Ta̱ apóstol Pablo ni̱ka̱ʼa̱nra ndáaña xíniñúʼu keʼéyó tá káʼa̱nna ña̱ vatá xa̱ʼa̱ na̱ ñuu Ndióxi̱. Nu̱ú 1 Timoteo 1:​3, 4 ni̱ka̱ʼa̱nra ña̱ “kǒo kuniso̱ʼona cuento vatá”. Ta ña̱yóʼo ni̱ka̱ʼa̱nra xíʼin ta̱ Timoteo “xíniñúʼu kundasíún kuniún cuento vatá ña̱ nátúʼun na̱ yiví”. Ki̱ʼva saá kéʼé miíyó chi kǒo xíniso̱ʼoyó ña̱ vatá ña̱ sánáʼa̱ na̱ yiví chi iinlá ña̱ sánáʼa̱ na̱ ñuu Ndióxi̱ kúú ña̱ xíniso̱ʼoyó (2 Timoteo 1:13). w24.04 11 párr. 16; 13 párr. 17

Kǒo sandákoún ña̱ kitáʼún xíʼin na̱ hermano na̱ nda̱kú íyo ini xíʼin Jehová. Inkáchi kúni̱ Jehová ña̱ kutáʼan ndiʼiyó ndasakáʼnuyóra, ta va̱ʼa keʼéyó ña̱yóʼo tá ndiʼi tiempo xíniso̱ʼoyó ña̱ nda̱a̱ ña̱ va̱xi nu̱ú tu̱ʼunra. Soo, na̱ kǒo kándíxaka ña̱ nda̱a̱ ña̱ va̱xi nu̱ú Biblia kíxáʼana ndátaʼvína na̱ congregación. Ña̱kán, Jehová káʼa̱nra xíʼinyó ña̱ kǒo kitáʼanyó xíʼin na̱yóʼo, chi tá kǒo kíʼinyó kuenta kivi sákuxíkana miíyó nu̱úra (Rom. 16:17). Tá ndákuniyó ña̱ nda̱a̱ ña̱ va̱xi nu̱ú Biblia ta kéʼéyó ña̱ káʼa̱nña, ña̱yóʼo chindeétáʼan xíʼinyó ña̱ va̱ʼaníka kutáʼanyó xíʼin Jehová (Efes. 4:​15, 16). Tasaá kǒo kandíxayó ña̱ vatá ña̱ káʼa̱n na̱ yiví xíʼin ña̱ vatá ña̱ káʼa̱n ta̱ Ndi̱va̱ʼa. Tá iinlá Jehová ná kuniso̱ʼoyó saá kundaara miíyó tá ná kundikaa̱ ña̱ gran tribulación. Kǒo sandákoún kandíxaún ña̱ nda̱a̱ ña̱ káʼa̱n Biblia ta Ndióxi̱ Jehová ta̱ sándi̱ko-ini na̱ yiví chindeétáʼanra xíʼún (Filip. 4:​8, 9). w24.07 13 párr. 16, 17

Ta̱ Jesús xi̱ndiʼi-inira xa̱ʼa̱ na̱ yiví na̱ xi̱ndakava-ini xa̱ʼa̱ ña̱ xi̱kiʼvina ku̱a̱chi ta xi̱kaʼa̱nra xíʼinna ná kundiku̱nnara. Xi̱kunda̱a̱-inira ña̱ xóʼvi̱ní na̱ yiví xa̱ʼa̱ ña̱ kúúna na̱ yiví ku̱a̱chi. Ña̱kán kúú ña̱ chi̱ndeétáʼanra xíʼin na̱ yiví na̱ xi̱xoʼvi̱ xa̱ʼa̱ ña̱ ni̱ki̱ʼvina iin ku̱a̱chi. Ta ni̱ka̱ʼa̱nra ña̱yóʼo: “Na̱ íyo va̱ʼa kǒo xíniñúʼuna iin doctor, chi na̱ ndeéndóʼova kúú na̱ xíniñúʼu iin doctor”. Ta ni̱ka̱ʼa̱nkara: “Va̱ása va̱xii̱ ña̱ kanai̱ na̱ yiví va̱ʼa chi na̱ íyo ku̱a̱chiva va̱xii̱ xa̱ʼa̱” (Mat. 9:​12, 13). Ta ni̱na̱ʼa̱ra ña̱yóʼo xíʼin ña̱ ke̱ʼéra. Tá kúú, i̱xakáʼnu-inira xa̱ʼa̱ ku̱a̱chi ña̱ ni̱ki̱ʼvi ñá ñaʼá ñá nda̱kata xa̱ʼa̱ra xíʼin ti̱kui̱í nu̱úñá (Luc. 7:​37-50). Ta saátu ku̱a̱ʼání ña̱ʼa ña̱ ndáyáʼvi sa̱náʼa̱ra iin ñá ñaʼá ñá ñuu Samaria ni xi̱kunda̱a̱-inira ña̱ xi̱kiʼviñá ku̱a̱chi kini (Juan 4:​7, 17-19, 25, 26). Na̱ yiví xíʼi̱na xa̱ʼa̱ ña̱ kúúna na̱ yiví ku̱a̱chi, soo ta̱xi Jehová ndee̱ ndaʼa̱ ta̱ Jesús ña̱ sandátakura na̱ ta̱a, ná ñaʼá ta saátu na̱ va̱lí (Mat. 11:5). w24.08 4 párr. 9, 10

¿Ndáa ki̱ʼva ndasakáʼnu Jehová ki̱vi̱ra chí nu̱únínu? Keʼéra ña̱yóʼo tá ná kixaa̱ ki̱vi̱ ña̱ nda̱kúní ndatiinra ku̱a̱chi. Si̱lóʼoní kúma̱ní ta sandíʼi-xa̱ʼa̱ra Babilonia ña̱ káʼnu xa̱ʼa̱ ña̱ íxayaku̱a̱ña ki̱vi̱ra ña̱ yi̱i̱ (Apoc. 17:​5, 16; 19:​1, 2). Tá ná kuni na̱ yiví ña̱ ndiʼi-xa̱ʼa̱ veʼe-ñu̱ʼu vatá, savana kuni̱na ndasakáʼnuna Jehová xíʼinyó. Tá ná kixaa̱ Armagedón, Jehová sandíʼi-xa̱ʼa̱ra ndiʼi na̱ kéʼé ña̱ kútóo ta̱ Ndi̱va̱ʼa. Sandíʼi-xa̱ʼa̱ra na̱ sáa̱-ini xíniñaʼá ta saátu na̱ íxayaku̱a̱ ki̱vi̱ra, soo sakǎkura ndiʼi na̱ kúʼvi̱-ini xíniñaʼá ta kándíxana ña̱ káʼa̱nra ta kúsi̱í-inina ndásakáʼnunara (Mar. 8:38; 2 Tes. 1:​6-10). Tá ná ndiʼi kaʼndachíñu ta̱ Jesús ti̱xin ña̱ mil ku̱i̱ya̱ ta saátu tá ná ya̱ʼa prueba ña̱ so̱ndíʼi, Jehová ndasayi̱i̱ra ki̱vi̱ra tasaá na̱ʼa̱ra ña̱ iinlá miíra xíniñúʼu ndasakáʼnuyó (Apoc. 20:​7-10). Tiempo saá, “iníísaá nu̱ú ñuʼú kunda̱a̱-inina ña̱ káʼnuní Jehová ta kutúña nda̱a̱ táki̱ʼva chútú ti̱kui̱í ini mar” (Hab. 2:14). Liviní koo tá ná kixaa̱ ki̱vi̱ ña̱ ndiʼina ná ndasakáʼnuna ki̱vi̱ Jehová. w25.01 7 párr. 15, 16

¿Ndáaña chindeétáʼan xíʼin na̱ cristiano ña̱ kundeé-inina tá ná ixandi̱va̱ʼana xíʼinna? Ta̱ apóstol Pablo xi̱kuni̱ra chindeétáʼanra xíʼin na̱ cristiano ña̱ ndakanixi̱nína xa̱ʼa̱ ndiʼi ña̱ va̱ʼa ña̱ ndakiʼinna tá ná kundeé-inina. Ta ni̱ka̱ʼa̱nra ña̱ tá yáʼa iin na̱ cristiano nu̱ú tu̱ndóʼo, Ndióxi̱ kivi kuniñúʼura ña̱yóʼo ña̱ va̱ʼa sanáʼa̱rana ña̱ kundeé-inina. Ta tá ná taxina ña̱ chindeétáʼan ña̱yóʼo xíʼinna kivi xa̱a̱na kuumiíkana ku̱a̱ʼá ña̱ va̱ʼa tasaá sakúsi̱ína-ini Jehová. Ña̱kán tá ná ndakanixi̱nína xa̱ʼa̱ ña̱ va̱ʼa ndakiʼinna tá ná kundeé-inina nu̱ú tu̱ndóʼo, kǒo ixayo̱ʼvi̱víña xíʼinna ya̱ʼana nu̱úña (Heb. 12:11). Ta̱ apóstol Pablo chi̱kaa̱ra ndee̱ xíʼin na̱ cristiano kán ña̱ ndakú koo inina ta kǒo ndakava-inina tá ná ya̱ʼana nu̱ú tu̱ndóʼo. Ta va̱ʼaníva consejo ta̱xi ta̱ apóstol Pablo ndaʼa̱na xa̱ʼa̱ ña̱ kundeé-inina tá ná ixandi̱va̱ʼana xíʼinna. ¿Nda̱chun? Saáchi tá ya̱chi̱ miíra xi̱ ixandi̱va̱ʼa xíʼin na̱ cristiano. Ña̱kán xi̱kundaa va̱ʼa inira xa̱ʼa̱ tu̱ndóʼo ña̱ xi̱yaʼana nu̱ú. Ta saátu miíra ku̱ndeé-inira tá i̱xandi̱va̱ʼana xíʼinra, chi tá ndu̱ura cristiano ke̱ʼéna ku̱a̱ʼání ña̱ va̱ása va̱ʼa xíʼinra (2 Cor. 11:​23-25). w24.09 12, 13 párr. 16, 17

Ndáyáʼviníka ña̱ natúʼunyó xíʼin na̱ yiví xa̱ʼa̱ Ndióxi̱ tiempo vitin. ¿Nda̱chun? Saáchi si̱lóʼoní kúma̱ní ta kixaa̱ ki̱vi̱ káʼnu Jehová. Ná ndakanixi̱níyó xa̱ʼa̱ ña̱ ni̱ka̱ʼa̱n ta̱ Jesús ndáa ki̱ʼva koo ña̱ natúʼunyó xíʼin na̱ yiví ki̱vi̱ so̱ndíʼi ña̱ ndóoyó vitin nda̱a̱ táki̱ʼva káʼa̱n Marcos 13:10. Nu̱ú libro ña̱ Mateo ta̱ Jesús ni̱ka̱ʼa̱nra ña̱ “natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo ña̱ va̱ʼa kunda̱a̱-ini ndiʼi na̱ yiví tasaá ndiʼi-xa̱ʼa̱ ñuyǐví” (Mat. 24:14). Ña̱yóʼo kúni̱ kachiña ña̱ ndiʼi-xa̱ʼa̱ ta̱ Ndi̱va̱ʼa xíʼin ndiʼi na̱ kítáʼan xíʼinra. Xa̱a̱ nda̱kaxinva Jehová ki̱vi̱ xíʼin hora ña̱ saxínura ña̱ ni̱ka̱ʼa̱nra keʼéra (Mat. 24:36; Hech. 1:7). Ta si̱lóʼoní kúma̱ní ña̱ keʼé Jehová ña̱yóʼo (Rom. 13:11). Nani ndátuyó kixaa̱ ki̱vi̱ yóʼo, ná chikaa̱níyó ndee̱ ña̱ natúʼunyó xíʼin na̱ yiví xa̱ʼa̱ Jehová. Ná ndakanixi̱níyó xa̱ʼa̱ pregunta yóʼo: ¿Nda̱chun nátúʼunyó xíʼin na̱ yiví xa̱ʼa̱ Ndióxi̱? Saáchi kúʼvi̱-iniyó xíniyóna. Nátúʼunyó xíʼin na̱ yiví chi kúni̱yó kundaa̱-inina xa̱ʼa̱ tu̱ʼun va̱ʼa ña̱ káʼa̱n xa̱ʼa̱ reino Ndióxi̱, ta kúʼvi̱-iniyó xíniyóna, soo ña̱ ndáyáʼviníka kúú ña̱ kúʼvi̱-iniyó xíniyó Jehová xíʼin ki̱vi̱ra. w24.05 14,15 párr. 2, 3

Ndó’ó na̱ íyo se̱ʼe ka̱ʼa̱nndó xíʼin se̱ʼendó ña̱ ná kotona ña̱ liviní ña̱ i̱xava̱ʼa Jehová. Tá xíkandó chí yuku̱ á tá chíʼindó xíʼin na̱ va̱lí se̱ʼéndó, ka̱ʼa̱nndó xíʼinna ña̱ liviní ku̱vaʼa ndiʼi ña̱ʼa nu̱ú ñuʼú yóʼo ta inkáchi kúni̱ kitáʼan ndiʼi ki̱ʼva ña̱ ku̱vaʼaña ta ña̱yóʼo náʼa̱ña nu̱úyó ña̱ íyo iin ta̱ ndíchiní i̱xava̱ʼaña. Ku̱a̱ʼání ña̱ʼa ña̱ íyo nu̱ú ñuʼú yóʼo inkáchi kúni̱ kitáʼan ki̱ʼva ña̱ ku̱vaʼaña chi tá ki̱ʼva íyo ña̱ káva̱ saá íyoña, tá kúú ña̱ galaxia, te̱ʼe̱ sa̱tá kití loʼo tí naní nautilo, yuku̱ ndaʼa̱ sava yitu̱n xíʼin yita ña̱ girasol. Ta iin ta̱ científico ta̱ naní Nicola Fameli káʼa̱nra ña̱ tá ná ndakaʼvina número ña̱ kúúmií ña̱yóʼo inkáchi número kúúmiíña ta va̱ʼaní kítáʼanña, ta ña̱yóʼo naníña tu̱ʼun sáʼán la sucesión de Fibonacci. Ña̱kán xa̱a̱ ku̱a̱ʼání ku̱i̱ya̱ ndákaʼvi na̱ científico xíʼin ña̱yóʼo saáchi ndíchiní ku̱vaʼaña. w24.12 16 párr. 7

Síínní ni̱xi̱yo na̱ yiví tiempo ña̱ ni̱xi̱yo ta̱ Moisés, ta̱ David xíʼin ta̱ Juan, nu̱ú tiempo ña̱ ndóo miíyó vitin. Soo inkáchi íyo ña̱ kéʼéyó xíʼin ña̱ ke̱ʼé ta̱ Moisés, ta̱ David xíʼin ta̱ Juan, chi ndásakáʼnuyó Jehová nda̱a̱ táki̱ʼva xi̱keʼé na̱kán. Xi̱kaʼa̱nna xíʼin Jehová, xi̱ndaa-ininara ta xi̱kaʼa̱nna xíʼinra ña̱ chindeétáʼanra xíʼinna ta saátu íyo ña̱ kéʼé miíyó tiempo vitin. Saáchi ta̱ Moisés, ta̱ David xíʼin ta̱ Juan xi̱kandíxanína ña̱ táxi Jehová bendición ndaʼa̱ na̱ xíniso̱ʼo ña̱ káʼa̱nra ta saátu íyo ña̱ kándíxa miíyó. Ná kuniso̱ʼoyó consejo ña̱ ta̱xi u̱ni̱ saá na̱ ta̱a yóʼo, ta ná kandíxayó ta keʼéyó ña̱ káʼa̱n Jehová xíʼinyó. Saá kúú ña̱ viíní kana ña̱ kúni̱yó keʼéyó ta kivi kutakuyó ndiʼi saá tiempo. Ta va̱ʼaní kúniyó chi sákusi̱íyó-ini yiváyó Jehová, chi ndiʼi ña̱ káʼa̱nra sáxi̱nuraña. Ku̱a̱ʼání bendición taxi Jehová ndaʼa̱yó chí nu̱únínu (Efes. 3:20). w24.11 13 párr. 20, 21

Tá siglo nu̱ú, xi̱ndaka̱xinna sava na̱ hermano ña̱ va̱ʼa koona siervo ministerial (1 Tim. 3:8). Sana na̱yóʼo kúú na̱ ni̱ka̱ʼa̱n ta̱ apóstol Pablo xa̱ʼa̱ ña̱ nda̱kaxinnana ña̱ chindeétáʼanna xíʼin inkana. Na̱yóʼo kúú na̱ xi̱keʼé sava chiñu ta xa̱ʼa̱ ña̱yóʼo ni̱xi̱yo tiempo nu̱ú na̱ anciano ña̱ va̱ʼa sanáʼa̱na ta kotona ndáaña xíniñúʼu na̱ hermano. Na̱ siervo ministerial xi̱keʼéna copia tu̱ʼun Ndióxi̱ á xi̱satána ña̱ʼa ña̱ xi̱xiniñúʼuna ña̱ va̱ʼa kaʼyína ña̱yóʼo. ¿Ndáa chiñu kúú ña̱ kéʼé na̱ siervo ministerial tiempo vitin? (1 Ped. 4:10). Kíʼinna kuenta xíʼin donación ña̱ táxi na̱ congregación ta xítona ndáa territorio ku̱ʼu̱nna natúʼunna xíʼin na̱ yiví. Ndúkúna revista xíʼin libro ña̱ xíniñúʼu na̱ publicador ta táxinaña ndaʼa̱na, káchíñuna xíʼin audio xíʼin video, kúúna acomodador ta saátu chíndeétáʼanna tá ndúvií veʼe nu̱ú ndátakayó. Ndiʼi chiñu yóʼo xíniñúʼu keʼéna ña̱ va̱ʼa kǒo ña̱ʼa kuma̱ní ti̱xin congregación (1 Cor. 14:40). w24.10 19 párr. 4, 5

Kivi ya̱ʼayó nu̱ú nda̱a̱ ndáaka tu̱ndóʼo chi ndásakáʼnuyó Ndióxi̱ ta̱ táku. Jehová kúú ta̱ kúúmií ndiʼi ndee̱, kándíxayó ña̱ chindeétáʼanra xíʼinyó ya̱ʼayó nu̱ú tu̱ndóʼo. Tá xítoyó ña̱ chíndeétáʼan Jehová xíʼinyó tá yáʼayó nu̱ú tu̱ndóʼo, ña̱yóʼo chindeétáʼan xíʼinyó ña̱ kǒo kaka-iniyó ña̱ chindeétáʼanvara xíʼinyó tá ná kixi tu̱ndóʼo ña̱ ndeéka nu̱úyó. Ná ka̱ʼa̱nyó xa̱ʼa̱ u̱vi̱ ña̱ʼa ña̱ ndo̱ʼo ta̱ rey David ta ña̱yóʼo chi̱ndeétáʼan xíʼinra ña̱ ka̱ndíxakara Jehová. Tá ni̱xi̱yo loʼo ta̱ David xi̱ndaara ndikachi sa̱na̱ yivára, soo iin yichi̱ ni̱xa̱a̱ iin tí león ta ki̱ʼinrí tíyóʼo ku̱a̱ʼa̱n xíʼinrí, inka yichi̱ ni̱xa̱a̱ iin tí oso ta ki̱ʼinrí iin ndikachi ku̱a̱ʼa̱n xíʼinrí. Ndakúní ni̱xi̱yo ini ta̱ David ta xa̱ʼníra tí león ta saátu tí oso tasaá sa̱kǎkura ndikachi válí sa̱na̱ra. Xi̱kunda̱a̱-inira ña̱ mií Jehová chi̱ndeétáʼan xíʼinra ña̱ xa̱ʼníra tíyóʼo, ña̱kán nda̱sakáʼnura Jehová (1 Sam. 17:​34-37). Tá xi̱ndakanixi̱ní ta David xa̱ʼa̱ ña̱ ndo̱ʼora xi̱kandíxara ña̱ chindeétáʼanva Jehová xíʼinra tá ná ya̱ʼara nu̱ú inkaka tu̱ndóʼo. w24.06 21 párr. 5, 6

Tá kúni̱yó kunda̱a̱-iniyó xa̱ʼa̱ iin ña̱ʼa, xíniñúʼu nda̱ka̱tu̱ʼunyó. Tá kúú, ndakanixi̱ní ña̱ ka̱nana yóʼó ña̱ ku̱ʼún iin vikó. ¿Á xíniñúʼu ku̱ʼún vikó yóʼo? Tá va̱ása xíni̱ún na̱ kéʼé vikó yóʼo, á va̱ása xíni̱ún ndáaña keʼéna xíniñúʼu nda̱ka̱tu̱ʼúnna ña̱yóʼo: “¿Ndáa míí koo vikó yóʼo ta ama kooña? ¿Nda̱saa na̱ yiví ku̱ʼu̱n? ¿Ndáana kiʼin kuenta xíʼin vikó yóʼo? ¿Ndáana kúú na̱ ku̱ʼu̱n? ¿Ndáaña keʼéna? ¿Á koo ndixi koʼona?”. Ña̱ kunda̱a̱-iniún xa̱ʼa̱ ña̱yóʼo kúú ña̱ chindeétáʼan xíʼún ña̱ vií koo ña̱ ndaka̱xiún keʼún. Tá xa̱a̱ ku̱ndaa̱-iniún xa̱ʼa̱ ndiʼi ña̱ʼa, ndakanixi̱ní xa̱ʼa̱ña. Tá kúú, ¿ndáaña keʼún tá ku̱ndaa̱-iniún ña̱ ti̱xin vikó kán ku̱ʼu̱n na̱ yiví na̱ kǒo ndíku̱n ña̱ káʼa̱n tu̱ʼun Ndióxi̱? ¿Á ndáaña keʼún tá ku̱ndaa̱-iniún ña̱ koo ndixi koʼona ta kǒo na̱ kiʼin kuenta xíʼinrá? ¿Á kivi xa̱a̱ vikó kán nduuña iin vikó nu̱ú kininí kéʼéna? (1 Ped. 4:3). Tá ná ndakanixi̱níún xa̱ʼa̱ ndiʼi ña̱yóʼo saá kúú ña̱ viíní koo ña̱ ndaka̱xiún keʼún. w25.01 15 párr. 4, 5

Nu̱ú Biblia sákuaʼayó ña̱ ni̱xi̱ʼi̱ ta̱ Jesús xa̱ʼa̱ ku̱a̱chiyó, ta xa̱ʼa̱ ña̱yóʼo kivi ixakáʼnu-ini Jehová xa̱ʼa̱ na̱ ndándikó-ini xa̱ʼa̱ ku̱a̱china ta kǒo ndákaʼánkara xa̱ʼa̱ña. Tá káʼyi̱ ti̱ko̱to̱yó xíʼin color kúáʼa, íxayo̱ʼvi̱níña xíʼinyó sakútaʼayóña. Xíʼin ña̱ ni̱ka̱ʼa̱n Jehová kúnda̱a̱-iniyó ña̱ tá íxakáʼnu-inira xa̱ʼa̱yó nándóso-inira xa̱ʼa̱ ku̱a̱chiyó ta kǒo ndákaʼánkara xa̱ʼa̱ña. Ku̱a̱chi ña̱ kíʼviyó nda̱a̱ táki̱ʼva íyo ña̱ níkáyó xu̱ʼún saá íyoña (Mat. 6:12; Luc. 11:4). Ña̱kán tá ku̱a̱ʼáka yichi̱ kíʼviyó ku̱a̱chi nu̱ú Jehová, nda̱a̱ táki̱ʼva íyo ña̱ níkáyó ku̱a̱ʼání xu̱ʼún saá íyoña. Soo tá íxakáʼnu-ini Jehová xa̱ʼa̱yó, nda̱a̱ táki̱ʼva íyo ña̱ kǒo níkákayó xu̱ʼún saá íyoña. Jehová káʼa̱nra xíʼinyó ña̱ tá ni̱ki̱ʼviyó ku̱a̱chi ta xa̱a̱ i̱xakáʼnu-inira xa̱ʼa̱yó, kǒo kúni̱kara ña̱ ná ndakaʼányó xa̱ʼa̱ña. Va̱ʼaní kúniyó tá kúnda̱a̱-iniyó ña̱ íxakáʼnu-ini Jehová xa̱ʼa̱yó. w25.02 9, 10 párr. 9, 10

Tá xa̱a̱ kúchée na̱ íyo se̱ʼe sana xíniñúʼuna ña̱ ná chindeétáʼan se̱ʼena xíʼinna á ña̱ taxina sava ña̱ xíniñúʼuna. Ta ku̱a̱ʼánína chíndeétáʼanvana xíʼin na̱ yivána xíʼin ña̱ si̱í-ini (1 Tim. 5:4). Soo ku̱a̱ʼání na̱ ndásakáʼnu Jehová na̱ íyo se̱ʼe, ña̱ sákusi̱íka-inina kúú ña̱ xítona ña̱ chíkaa̱ se̱ʼena ndee̱ ña̱ káchíñuna nu̱ú Jehová ta su̱ví ña̱ kachíñuna ña̱ va̱ʼa kuumiína ku̱a̱ʼání xu̱ʼún ta kundaana na̱yóʼo (3 Juan 4). Ndóʼó na̱ íyo se̱ʼe, sanáʼa̱ndó na̱ va̱lí se̱ʼendó ña̱ ná sakúaʼana kachíñuna tasaá kivi kuumiína ña̱ kuniñúʼuna chí nu̱únínu, chikaa̱níndó ndee̱ ña̱ chinúundó iin yichi̱ va̱ʼa nu̱úna ta saátu sanáʼa̱ndóna ña̱ ná kundaa-inina Jehová. Nda̱a̱ tá válína sanáʼa̱ndóna ña̱ ndáyáʼviní sakúaʼana kachíñuna (Prov. 29:21; Efes. 4:28). Nani xáʼnu na̱ va̱lí se̱ʼendó, chindeétáʼanndó xíʼinna ña̱ va̱ʼa ná chikaa̱na ndee̱ sakúaʼana tá ku̱a̱ʼa̱nna escuela. Nandukúndó nu̱ú tutu ña̱ tává na̱ ñuu Ndióxi̱ ña̱ kivi chindeétáʼan xíʼinndó ña̱ chindeéndó na̱ va̱lí se̱ʼendó ña̱ vií ndaka̱xinna ndáaña keʼéna, tá kúú á xíniñúʼu kaʼvi va̱ʼana á va̱ása. Saátu chindeétáʼanndó xíʼin se̱ʼendó ña̱ va̱ʼa ndani̱ʼína iin chiñu nu̱ú kachíñuna ña̱ va̱ʼa satána ña̱ xíniñúʼuna, ta saátu ña̱ va̱ʼa koo tiempo nu̱úna ña̱ keena natúʼunna xíʼin na̱ yiví xa̱ʼa̱ Ndióxi̱ á nda̱a̱ xa̱a̱na koona precursor. w25.03 30, 31 párr. 15, 16

Nu̱ú Isaías capítulo 65 Jehová ni̱ka̱ʼa̱nra ndáa ki̱ʼva koo na̱ ñuura. Iin táʼví profecía ña̱ ni̱ka̱ʼa̱n ta̱ Isaías ni̱xi̱nuña ku̱i̱ya̱ 537 tiempo xi̱naʼá. Ku̱i̱ya̱ saá na̱ judío na̱ ndi̱kó-ini ke̱ena ñuu Babilonia ta ndi̱kóna ñuu Jerusalén. Mií Jehová chi̱ndeétáʼan xíʼinna ta nda̱saviína ñuu Jerusalén saáchi ndi̱ʼi̱-xa̱ʼa̱ ndiʼiña tasaá ndu̱livi tukuña. Saátu nda̱saviína templo ña̱ va̱ʼa kixáʼa tukuna ndasakáʼnuna Jehová (Is. 51:11; Zac. 8:3). Iinka táʼví profecía ña̱ ni̱ka̱ʼa̱n ta̱ Isaías xínuña tiempo vitin. Ña̱yóʼo ki̱xáʼaña ku̱i̱ya̱ 1919 chi ku̱i̱ya̱ saá kúúña ke̱e na̱ ñuu Ndióxi̱ ti̱xin Babilonia ña̱ káʼnu á veʼe-ñu̱ʼu vatá. Nani ku̱i̱ya̱ saá xa̱a̱ ku̱a̱ʼání na̱ yiví kíʼvina ti̱xin ñuu Jehová. Xa̱ʼa̱ ña̱ xi̱kusi̱íní-ini na̱ xi̱ndasakáʼnu Jehová, ku̱a̱ʼání congregación ki̱xáʼa íyo. Ku̱a̱ʼání na̱ ta̱a xíʼin ná ñaʼá na̱ kue̱ʼe̱ní ni̱xi̱yo á na̱ xi̱keʼé ña̱ kini, na̱samana ki̱ʼva ña̱ íyona ta ki̱xáʼana kéʼéna ña̱ kútóo Ndióxi̱. w24.04 20, 21 párr. 3, 4

Sava ñuu yivána á na̱ chée kúú na̱ ndáka̱xin ndáana tindaʼa̱ xíʼin se̱ʼena. Ta inka ñuu na̱ yivána á na̱ migona kúú na̱ nándukú na̱ tindaʼa̱ xíʼinna, tasaá ndúkúna ki̱ʼva ña̱ ndakutáʼan u̱vi̱ saá na̱yóʼo ña̱ va̱ʼa kuni táʼanna tasaá kotona á kúni̱na kaka xíʼin táʼanna. Tá ná ka̱ʼa̱nna xíʼinyó ña̱ chindeétáʼanyó xíʼinna ná kiʼinyó kuenta xíʼin ña̱ kútóona ta saátu xíʼin ña̱ xíniñúʼuna. Tá túviyó ña̱ xa̱a̱ nda̱ni̱ʼíyó iin na̱ kivi tindaʼa̱ xíʼin na̱ migoyó á xíʼin na̱ veʼeyó, ná kiʼin va̱ʼayó kuenta ndáaña kútóona, ndáa ki̱ʼva íyona xíʼin ndáa ki̱ʼva kítáʼanna xíʼin Ndióxi̱. Chi ña̱ ndáyáʼvi va̱ʼaka kúú ña̱ kítáʼanna xíʼin Jehová nu̱úka ña̱ kuumiína ku̱a̱ʼá xu̱ʼún á ña̱ kuumiína iin chiñu ña̱ ndáyáʼviní. Soo mií na̱ kúa̱an kúú na̱ ndaka̱xin á tindaʼa̱na á va̱ása tindaʼa̱na. w24.05 23 párr. 11

Ña̱ kivi keʼéyó ña̱ va̱ʼa chindeétáʼanyó xíʼin na̱ xíka xíʼin táʼan kúú ña̱ kiʼinníyó kuenta xíʼin ña̱ káʼa̱nyó. Sava yichi̱ xíniñúʼu ka̱ʼnu-iniyó ta kǒo ka̱ʼa̱nyó ni iin ña̱ʼa (Prov. 12:18). Sana xa̱ʼa̱ ña̱ kúsi̱íní-iniyó kivi ka̱ʼa̱nyó xíʼin inkana ña̱ ki̱xáʼa iin ta̱ hermano xíʼin iin ñá hermana xíka xíʼin táʼanna, soo sana mií na̱ xíka xíʼin táʼan kúú na̱ kúni̱ ka̱ʼa̱n xa̱ʼa̱ ña̱yóʼo xíʼin inkana. Ña̱kán, kǒo xíniñúʼu kakayó ka̱ʼa̱nyó xa̱ʼa̱na, ni ña̱ ka̱ʼa̱nyó ña̱ va̱ása va̱ʼa xa̱ʼa̱na (Prov. 20:19; Rom. 14:10; 1 Tes. 4:11). Saátu, kǒo xíniñúʼu ndaka̱tu̱ʼúnyóna ama kúú ña̱ tindaʼa̱na. Tá iin ta̱ hermano xíʼin iin ñá hermana kǒo xíka xíʼin táʼankana ná kǒo kakayó ndaka̱tu̱ʼúnyó ndáa xa̱ʼa̱ kúú ña̱ sa̱ndákoo-táʼanna, ta ná kǒo ka̱ʼa̱nyó ndáana kúú na̱ ndíso ku̱a̱chi (1 Ped. 4:15). Tá sa̱ndákoo-táʼan na̱ xíka xíʼin táʼan, su̱ví ña̱yóʼo kúni̱ kachiña ña̱ va̱ása vií íyo ña̱ ke̱ʼéna chi tiempo ña̱ ni̱xi̱ka xíʼin táʼanna chi̱ndeétáʼanña xíʼinna ña̱ ndaka̱xin viína ña̱ keʼéna. Soo, sana xa̱ʼa̱ ña̱yóʼo kúsuchí-inina. Ña̱kán, tá xíni̱yó ña̱ iin ta̱ hermano á iin ñá hermana sa̱ndákoo-táʼanna ná chindeétáʼanyó xíʼinna. w24.05 31 párr. 15, 16

Kúsuchíní-iniyó tá sándakoo iin na̱ migoyó á iin na̱ veʼeyó Jehová (Sal. 78:40). Soo tá viíní xi̱kitáʼanyó xíʼin na̱yóʼo kúsuchíníka-iniyó tá xa̱a̱ kéena ñuu Jehová. Tá xa̱a̱ yáʼún nu̱ú ña̱yóʼo, ña̱ ndo̱ʼo ta̱ Sadoc va̱ʼaní chindeétáʼan xíʼún chi ta̱yóʼo nda̱kúní ni̱xi̱yo inira xíʼin Jehová. Tá xa̱a̱ ku̱chée ta̱ David ta xa̱a̱ ku̱nu̱mí kuvira se̱ʼera ta̱ Adonías xi̱kuni̱ra nduura rey. Soo ta̱ xi̱kuni̱ Jehová xa̱a̱ koo rey xi̱kuu ta̱ Salomón (1 Crón. 22:​9, 10). Nda̱kúníva ni̱xi̱yo ini ta̱ Sadoc xíʼin Jehová, soo ta̱ migora Abiatar chi̱ndeétáʼanra xíʼin ta̱ Adonías (1 Rey. 1:​5-8). Xíʼin ña̱ ke̱ʼé ta̱ Abiatar ni̱na̱ʼa̱ra ña̱ kǒo nda̱kúka níxi̱yora xíʼin ta̱ David ta saátu xíʼin Jehová. Saáchi ta̱ Sadoc xíʼin Abiatar yáʼaka 40 ku̱i̱ya̱ inkáchi ka̱chíñuna (2 Sam. 8:17; 15:29; 19:​11-14). w24.07 6 párr. 14, 15

¿Á ndákiʼinyó ña̱ va̱ʼa tá chíkaa̱yó ndee̱ ña̱ kǒo keʼéyó ña̱ kini? Ndákiʼinvayóña. Na̱ kéʼé ña̱ kini loʼova tiempo kúsi̱í-inina, soo na̱ xíniso̱ʼo ña̱ káʼa̱n Jehová ndiʼi tiempo kúsi̱í-inina (Heb. 11:25; Sal. 19:8). Saáchi Jehová i̱xava̱ʼara miíyó ña̱ keʼéyó ña̱ kúni̱ra (Gén. 1:27). Kǒo ña̱ʼa sándi̱ʼi̱-iniyó tá xíniso̱ʼoyó ña̱ káʼa̱n Jehová ta saátu kivi kooyó ndiʼi tiempo (1 Tim. 6:12; 2 Tim. 1:3; Jud. 20, 21). Na̱ yiví ku̱a̱chi kúúyó ta vitáníyó (Mat. 26:41). Soo, Jehová káʼa̱nra ña̱ chindeétáʼanvara xíʼinyó (2 Cor. 4:7). Taxiva Jehová ndee̱ ndaʼa̱yó ña̱ va̱ʼa kuchiñuyó ya̱ʼayó nu̱ú tentación, soo saátu miíyó ndiʼi ki̱vi̱ ná chika̱a̱yó ndee̱ keʼéyó ña̱ kútóora. Ndakuiinva Jehová oración ña̱ kéʼéyó ta chindeétáʼanvara xíʼinyó (1 Cor. 10:13). Jehová kúú ta̱ chindeétáʼan xíʼinyó ña̱ va̱ʼa kundito va̱ʼa nu̱úyó tasaá kǒo keʼéyó ña̱ kini. w24.07 19 párr. 19-21

Xa̱ʼa̱ ña̱ xi̱kuu ta̱ Timoteo anciano, ta̱ apóstol Pablo ni̱ka̱ʼa̱nra ña̱yóʼo xíʼinra: “Nu̱ú ndiʼina ka̱ʼún xíʼin na̱ ni̱ki̱ʼvi ku̱a̱chi ña̱ va̱ása va̱ʼa ña̱ ke̱ʼéna”. ¿Á ña̱ xi̱kuni̱ kachi ta̱ Pablo kúú ña̱ ná ka̱ʼa̱nna nu̱ú ndiʼi na̱ congregación xa̱ʼa̱ na̱ ni̱ki̱ʼvi ku̱a̱chi? Ña̱ xi̱kuni̱ kachi ta̱ Pablo xíʼin ta̱ Timoteo kúú ña̱ ná ka̱ʼa̱nra xíʼin sava na̱ hermano na̱ ku̱ndaa̱-ini xa̱ʼa̱ ña̱ ke̱ʼé na̱ ni̱ki̱ʼvi ku̱a̱chi, sana xi̱ninu̱úna ña̱ ke̱ʼéna á mií na̱ ni̱ki̱ʼvi ku̱a̱chi yóʼo na̱túʼun xíʼinna xa̱ʼa̱ ña̱ ke̱ʼéna. Ña̱kán xíʼin na̱yóʼo kuitíva natúʼun na̱ anciano ña̱ xa̱a̱ ndu̱vií ku̱a̱chi yóʼo. Sava yichi̱ iníísaá congregación kúnda̱a̱-ini xa̱ʼa̱ ku̱a̱chi ña̱ ni̱ki̱ʼvi iin na̱ hermano á sana xa̱a̱na kunda̱a̱-inina xa̱ʼa̱ña. Saá kúú ña̱ kivi natúʼunna xíʼin ndiʼi na̱ congregación. Ña̱kán iin na̱ anciano taxina anuncio ti̱xin congregación xa̱ʼa̱ na̱ ni̱ki̱ʼvi ku̱a̱chi ta ka̱ʼa̱nna ña̱ íyo censurado na̱yóʼo. ¿Nda̱chun kéʼéna ña̱yóʼo? Ta̱ Pablo ka̱chira: “Ña̱ va̱ʼa ná kuni inkana” tasaá va̱ása ki̱ʼvina ku̱a̱chi ndeé. w24.08 23, 24 párr. 16, 17

Xíniñúʼu chikaa̱níyó ndee̱ ña̱ kachíñuyó nu̱ú Jehová nda̱a̱ so̱ndíʼi. Na̱ ungido xíniñúʼu koo tu̱ʼvana ña̱ va̱ʼa ku̱ʼu̱nna chí ndiví (Mat. 24:40). Na̱ ungido xa̱a̱ kúni̱nína ná kixaa̱ ki̱vi̱ ña̱ ndakutáʼanna xíʼin ta̱ Jesús chí ndiví. Tá ná ndiʼi guerra ña̱ Armagedón, na̱ ungido kúú na̱ ndánaʼa̱ ñá tindaʼa̱ xíʼin ta̱ Jesús (2 Tes. 2:1). Si̱lóʼo kúma̱ní ta ndatiin ta̱ Jesús ku̱a̱chi xíʼin na̱ yiví, soo va̱ása xíniñúʼu yi̱ʼvíyó. Tá nda̱kú ná koo iniyó mií Jehová taxi espíritu santo ndaʼa̱yó ña̱ va̱ʼa ndakú koo iniyó kunditayó nu̱ú ta̱ Jesús (2 Cor. 4:7; Luc. 21:36). Ña̱kán ni ndátuyó kooyó nu̱ú ñuʼú yóʼo á chí ndiví, ná kuniso̱ʼoyó consejo ña̱ ta̱xi ta̱ Jesús. Tá saá ná keʼéyó, kusi̱íní-ini Jehová xíʼinyó ta kaʼyira ki̱vi̱yó nu̱ú libro nu̱ú va̱xi ki̱vi̱ na̱ kutaku (Dan. 12:1; Apoc. 3:5). w24.09 24, 25 párr. 19, 20

Nda̱a̱ táki̱ʼva ke̱ʼé ta̱ ka̱ʼyí ña̱ Salmo, saátu miíún íyo ña̱ kivi keʼún ña̱ va̱ʼa kǒo kundi̱ʼi̱ní-iniún. ¿Ndáaña kivi keʼún? Tá kúú, kivi ndakanixi̱níún xa̱ʼa̱ ndiʼi ña̱ va̱ʼa ña̱ xa̱a̱ kúúmiíún ta saátu ndiʼi bendición ña̱ xa̱a̱ táxi Jehová ndaʼún. Soo, ¿ndáaña kúúmií na̱ kǒo ndásakáʼnu Jehová? Ña̱ kúúmií kuitína kúú ña̱ íyo nu̱ú ñuʼú yóʼova, saáchi chíkaa̱nína ndee̱ ña̱ kachíñuna xa̱ʼa̱ ku̱a̱ʼá ña̱ʼa, soo kǒo ña̱ va̱ʼa ndátuna ndakiʼinna chí nu̱únínu. Soo, Jehová káʼa̱nra xíʼin miíyó ña̱ ku̱a̱ʼáníva ña̱ʼa taxira ndaʼa̱yó (Sal. 145:16). Kǒo kúnda̱a̱ví-iniyó ndáa ki̱ʼva kooyó vitin tá níndaka̱xinyó keʼéyó inka ña̱ʼa, soo xíni̱yó ña̱ ndiʼi na̱ nda̱kaxin ndasakáʼnu Jehová kǒo ña̱ʼa kúma̱ní nu̱úna. w24.10 27 párr. 12, 13