Junio

Xa̱a̱ ku̱a̱ʼáníva ña̱ va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Tá kúú, va̱ʼa íxakáʼnu-ini Jehová xa̱ʼa̱ ku̱a̱chiyó ta kǒo na̱ íxandúxa xíʼinra ña̱ keʼéra ña̱yóʼo, saáchi xíʼin ndinuʼu-inira íxakáʼnu-inira xa̱ʼa̱yó (Sal. 103:​3, 10-13). Íyo sava na̱ ndákanixi̱ní ña̱ va̱ása xíniñúʼu ixakáʼnu-ini Jehová xa̱ʼa̱na, ta mií ña̱ nda̱a̱ va̱ása xíniñúʼu ixakáʼnuví-inira xa̱ʼa̱yó. Ta̱ apóstol Pablo ni̱ka̱ʼa̱nra ña̱yóʼo: “Va̱ása xíniñúʼu ka̱ʼa̱nna apóstol xíʼi̱n”. Soo tándi̱ʼi ni̱ka̱ʼa̱ntura ña̱yóʼo: “Xa̱ʼa̱ ña̱ va̱ʼa-ini Ndióxi̱ xíʼi̱n kúi̱ iin apóstol” (1 Cor. 15:​9, 10). Ña̱kán tá ndándikó-iniyó xa̱ʼa̱ ku̱a̱chiyó, íxakáʼnuva-ini Jehová xa̱ʼa̱yó. ¿Nda̱chun? Ni va̱ása xíniñúʼuví ixakáʼnu-ini Jehová xa̱ʼa̱yó, soo kéʼévaraña xa̱ʼa̱ ña̱ kúʼvi̱-inira xínira miíyó. Xa̱ʼa̱ ña̱kán tá sava yichi̱ ndákanixi̱níyó ña̱ va̱ása xíniñúʼuví ixakáʼnu-ini Jehová xa̱ʼa̱yó, ná ndakaʼányó chi Jehová va̱ása nítaxira se̱ʼera ña̱ kuvira xa̱ʼa̱ na̱ yiví na̱ kǒo ku̱a̱chi chi ni̱xi̱ʼi̱ra xa̱ʼa̱ na̱ yiví na̱ kúúmií ku̱a̱chi ta ndándikó-inina xa̱ʼa̱ña (Luc. 5:32; 1 Timoteo 1:15). w25.01 26, 27 párr. 3, 4

Kǒo kivi ka̱ʼa̱nyó xíʼin na̱ yiví ndáaña keʼéna á ndáaña ka̱ʼa̱nna, soo kivi kiʼinyó kuenta xíʼin ña̱ kéʼé miíyó. ¿Ta ndáaña kivi keʼéyó? Kivi ixakáʼnu-iniyó xa̱ʼa̱na. ¿Nda̱chun? Saáchi kúʼvi̱-iniyó xíniyó Jehová ta kúni̱ra ná keʼéyó ña̱yóʼo. Chi tá ndeéní sáa̱yó ta kǒo íxakáʼnu-iniyó xa̱ʼa̱na sana kiʼinyó kue̱ʼe̱ (Prov. 14:​17, 29, 30). Tá nándóso-iniyó xa̱ʼa̱ ña̱ ke̱ʼéna xíʼinyó kǒo sáa̱ka-iniyó xíniyóna, ta ña̱ ndáyáʼvika kúú ña̱ va̱ʼa kúni miívayó. Ta saátu kíxáʼa kúsi̱í tuku iniyó nda̱a̱ táki̱ʼva ni̱xi̱yoyó tá ya̱chi̱. ¿Ndáaña chindeétáʼan xíʼún ña̱ va̱ʼa kǒo sa̱a̱kaún? Taxi ná ya̱ʼa tiempo. Ná ka̱ʼa̱nyó xa̱ʼa̱ iin na̱ ndeéní tu̱kue̱ʼe̱, ni xa̱a̱ ni̱xa̱ʼa̱nvana nu̱ú doctor soo xíniñúʼuna tiempo ña̱ ndaʼana. Ta saátu miíyó xíniñúʼuyó tiempo ña̱ va̱ʼa ndi̱ko-iniyó ta nandóso-iniyó xa̱ʼa̱ ña̱ ke̱ʼéna xíʼinyó, tasaá koo tu̱ʼvayó ña̱ ixakáʼnu-iniyó xa̱ʼa̱na (Ecl. 3:3; 1 Ped. 1:22). Ka̱ʼa̱n xíʼin Jehová ná chindeétáʼanra xíʼún ña̱ ixakáʼnu-iniún xa̱ʼa̱ na̱ ke̱ʼé ña̱ va̱ása va̱ʼa xíʼún. w25.02 16, 17 párr. 8-11

Sava ña̱ ndáyáʼviní ña̱ xíniñúʼu keʼéyó kúú, ña̱ ndandikó-iniyó xa̱ʼa̱ ku̱a̱chiyó, ña̱ kandíxayó Ndióxi̱, ña̱ ndakuchiyó xíʼin ña̱ kandíxayó ña̱ ndataku na̱ ni̱xi̱ʼi̱ (Heb. 6:​1, 2). Ndiʼi na̱ ndásakáʼnu Ndióxi̱ xíniñúʼu kunda̱a̱-inina xa̱ʼa̱ ña̱yóʼo. Xa̱ʼa̱ ña̱kán, ta̱ Pedro ni̱ka̱ʼa̱nra xa̱ʼa̱ ña̱yóʼo tá na̱túʼunra xíʼin ku̱a̱ʼání na̱ yiví xa̱ʼa̱ Ndióxi̱ tá ni̱xi̱yo ña̱ Pentecostés (Hech. 2:​32-35, 38). Ña̱ va̱ʼa xa̱a̱yó kooyó discípulo ta̱ Cristo xíniñúʼu kandíxayó ndiʼi ña̱yóʼo ta kunda̱a̱-iniyó xíʼinña. Ta̱ apóstol Pablo ni̱ka̱ʼa̱nra ña̱ tá kǒo kándíxayó ña̱ ndataku na̱ ni̱xi̱ʼi̱, nda̱a̱ táki̱ʼva íyo ña̱ kǒo kándíxayó ni iin ña̱ káʼa̱n Ndióxi̱ saá íyoña (1 Cor. 15:​12-14). Soo kǒo xíniñúʼu ndakanixi̱níyó ña̱ iinlá ña̱yóʼo xíniñúʼu kunda̱a̱-iniyó xa̱ʼa̱. Íyova ña̱ va̱ása yo̱ʼvi̱ ña̱ va̱xi nu̱ú tu̱ʼun Ndióxi̱, soo saátu íyo sava ña̱ yo̱ʼvi̱ní. Ta xíniñúʼu kunda̱a̱-iniyó xa̱ʼa̱ ña̱yóʼo chi sava ña̱yóʼo kúú ley Jehová, ta íyotu ña̱ naní principio ta ña̱yóʼo kúú ña̱ chíndeétáʼan xíʼinyó ña̱ kunda̱a̱-iniyó ndáa ki̱ʼva ndákanixi̱ní Jehová. Ña̱ va̱ʼa kunda̱a̱-iniyó xíʼinña, xíniñúʼu kaʼviyó Biblia, ndakanixi̱níyó xa̱ʼa̱ ña̱ káʼviyó tasaá keʼéyó ña̱ sákuaʼayó. Ña̱yóʼo chindeétáʼanña xíʼinyó ña̱ keʼéyó ña̱ kútóo Jehová. w24.04 5 párr. 12, 13

Ndióxi̱ sa̱ndákaʼánra ta̱ Jonás ña̱ na̱ ñuu Nínive kǒo níxi̱kunda̱a̱-inina ndáaña kúú ña̱ va̱ʼa ta ndáaña kúú ña̱ va̱ása va̱ʼa (Jon. 1:​1, 2; 3:10; 4:​9-11). Tá ni̱ya̱ʼa tiempo, ta̱ Jesús xi̱niñúʼura ejemplo na̱ ñuu Nínive ña̱ va̱ʼa ka̱ʼa̱nra xa̱ʼa̱ ña̱ nda̱kúní ndátiin Ndióxi̱ ku̱a̱chi ta kúndáʼviní-inira xínira na̱ yiví. ¿Ndáaña keʼé Jehová xíʼin na̱ ñuu Nínive tá ná ndatakuna? Ta̱ Jesús ni̱ka̱ʼa̱nra ña̱ ndataku na̱ yiví ta ndatiinna ku̱a̱chi xíʼinna, soo ña̱yóʼo chí nu̱únínu kooña (Juan 5:29). Ta ña̱yóʼo kooña tá ná kaʼndachíñu ta̱ Jesús ti̱xin ña̱ mil ku̱i̱ya̱ chi saá kúú ña̱ ndataku na̱ ke̱ʼé ña̱ va̱ʼa xíʼin na̱ kǒo níxi̱xini̱ xa̱ʼa̱ Jehová (Hech. 24:15). Na̱ yiví na̱ kǒo níndasakáʼnu Jehová xa̱ʼa̱ ña̱ kǒo nísakúaʼana xa̱ʼa̱ra ndatakuna ta ndatiinna ku̱a̱chi xíʼinna, saáchi Jehová xíʼin ta̱ Jesús kotona á kuniso̱ʼona ña̱ ka̱ʼa̱nna ta á keʼéna ña̱ sakúaʼana. Tá iin na̱ ñuu Nínive ná ndatakuna soo kǒo xíínna ndasakáʼnuna Jehová, kuvivana (Is. 65:20). Soo tá ná kandíxana ndasakáʼnuna Jehová kiviva kutakuna ndiʼi saá tiempo (Dan. 12:2). w24.05 5 párr. 13, 14

Ta̱ Jesús ni̱na̱ʼa̱ra ña̱ kúndáʼviní-ini yivára xínira na̱ yiví (Juan 14:9). Xíʼin ña̱ ni̱ka̱ʼa̱nra ta saátu xíʼin ña̱ ke̱ʼéra, ni̱na̱ʼa̱ra ña̱ kúʼvi̱ní-ini Jehová xínira miíyó ta kúndáʼvi-inira xínira miíyó. Ta kúni̱ra chindeétáʼanra xíʼinyó ña̱ va̱ása ki̱ʼvikayó ku̱a̱chi. Ta̱ Jesús chi̱ndeétáʼanra xíʼin na̱ yiví ña̱ kuni̱na sandákoona ña̱ va̱ása va̱ʼa kéʼéna ta ndakundiku̱nnara (Luc. 5:​27, 28). Xi̱kunda̱a̱va-ini ta̱ Jesús ndáaña kundoʼora. Ku̱a̱ʼá yichi̱ ni̱ka̱ʼa̱nra xíʼin na̱ xi̱ndiku̱n miíra ña̱ xi̱íkónara ta kaʼnínara (Mat. 17:22; 20:​18, 19). Saátu xi̱kunda̱a̱-inira ña̱ tá ná kuvira saá ndoo ku̱a̱chi na̱ yiví. Ta saátu ni̱ka̱ʼa̱nra ña̱ tá ná kuvira, ku̱a̱ʼání na̱ yiví ndakundiku̱nnara (Juan 12:32). Ta na̱ yiví na̱ xa̱a̱ kandíxa ta̱ Jesús ta kundiku̱nna yichi̱ra, kivi sakúsi̱ína-ini Jehová tasaá sa̱ñána ndaʼa̱ ku̱a̱chi (Rom. 6:​14, 18, 22; Juan 8:32). Ndakúní ni̱xi̱yo ini ta̱ Jesús ta chi̱kaa̱-inira kuvira ña̱ va̱ʼa sakǎkura miíyó (Juan 10:​17, 18). w24.08 5 párr. 11, 12

Ndakanixi̱ní ndáaña ndo̱ʼún tá ki̱xáʼún sákuaʼún xa̱ʼa̱ Ndióxi̱. Sa̱kúaʼún ña̱ kúʼvi̱ní-ini Jehová xínira yóʼó ta kúni̱ra ña̱ kundika̱ún ti̱xin ñuura, saátu sa̱kúaʼún ña̱ sandíʼi-xa̱ʼa̱ra ndiʼi ña̱ sáxo̱ʼvi̱ miíyó ta sandátakura na̱ veʼeyó nu̱ú ñuyǐví xa̱á (Mar. 10:​29, 30; Juan 5:​28, 29; Rom. 8:​38, 39; Apoc. 21:​3, 4). Ku̱si̱íní-iniún tá na̱kunda̱a̱-iniún xa̱ʼa̱ ña̱yóʼo (Luc. 24:32). Ta xa̱ʼa̱ ña̱ xi̱kusi̱íní-iniún xi̱kuni̱ún natúʼún xa̱ʼa̱ ña̱yóʼo xíʼin ndiʼi na̱ yiví (kivitu nandukún ña̱ káʼa̱n Jeremías 20:9). Xa̱ʼa̱ ña̱ kúsi̱íní-iniyó xíʼin ña̱ sákuaʼayó nu̱ú Biblia, ña̱yóʼo chíndeétáʼanña xíʼinyó ña̱ natúʼunyó xíʼin na̱ yiví xa̱ʼa̱ ña̱ sákuaʼayó (Luc. 6:45). Kivi ka̱ʼa̱nyó nda̱a̱ táki̱ʼva ni̱ka̱ʼa̱n na̱ discípulo na̱ ni̱xi̱yo tá siglo nu̱ú: “Kǒo kívi sandákoondi̱ ka̱ʼa̱nndi̱ xa̱ʼa̱ ña̱ʼa ña̱ xi̱nindi̱ xíʼin ña̱ xi̱niso̱ʼondi̱” (Hech. 4:20). Kúsi̱íní-iniyó xíʼin ña̱ sákuaʼayó nu̱ú Biblia, xa̱ʼa̱ ña̱kán kúni̱yó natúʼunyó xíʼin ndiʼi na̱ yiví xa̱ʼa̱ ña̱yóʼo. w24.05 15 párr. 5; 16 párr. 7

Miíyó na̱ ndásakáʼnu Jehová nátúʼunyó xíʼin na̱ yiví saáchi kúʼvi̱-iniyó xíniyóra ta saátu kúni̱yó ña̱ kunda̱a̱-inina xa̱ʼa̱ra. Soo savana kǒo kúsi̱í-inina tá kéena. ¿Nda̱chun ndóʼona ña̱yóʼo? Saáchi savana kúkaʼanní nu̱úna ta ndákanixi̱nína ña̱ kǒo kívi ka̱ʼa̱nna xíʼin inka na̱ yiví. Savana kǒo kúni̱na ku̱ʼu̱nna veʼe na̱ yiví chi kǒo níkananana ña̱ ku̱ʼu̱nna veʼena, ta íyotu na̱ yíʼvi ña̱ kǒo kuniso̱ʼona ña̱ nátúʼunna. Ta savana kǒo kútóona kanitáʼanna á na̱ána xíʼin na̱ yiví. Soo íxayo̱ʼvi̱níña xíʼinna natúʼunna xíʼin na̱ yiví na̱ kǒo xíni̱na. Ta miíún, ¿á kǒo kúsi̱í-iniún tá xa̱a̱ kítaún predicación? Tá saá ndóʼún kǒo ndakava-iniún chi ña̱ kǒo kúni̱ún kúú ña̱ na̱a̱ún xíʼin na̱ yiví ta ña̱yóʼo náʼa̱ña ña̱ vitá íyo iniún. Ni iinyó kǒo kútóo ña̱ kundasína miíyó saáchi ña̱ kúni̱yó kúú ña̱ chindeétáʼanyó xíʼinna. Soo, yiváyó Jehová kúnda̱a̱va-inira xíʼin ña̱ ndóʼoyó ña̱kán kúni̱ra chindeétáʼanra xíʼinyó (Is. 41:13). w24.04 14 párr. 1, 2

Tá káʼviún Biblia ndakuniún ña̱ íyo sava ña̱ va̱ása kuchiñún keʼún ta loʼo tá loʼo xíniñúʼu keʼún ña̱ káʼviún. Kivi keʼún ña̱yóʼo: nu̱ú iin tutu kaʼyíún ndiʼi ña̱ xíniñúʼu viíka keʼún, ndaka̱xin iin á u̱vi̱ ña̱ kivi kixáʼún keʼún ta chí nu̱únínu kivika keʼún inkakaña. ¿Ndáaña kivi kixáʼún keʼún? Kivi kixáʼún keʼún ña̱ va̱ása íxayo̱ʼvi̱ní xíʼún á iin ña̱ xíniñúʼuníka nasamaún. Tá xa̱a̱ na̱kunda̱a̱-iniún ndáaña kúni̱ún kixáʼún keʼún. Nandukú xa̱ʼa̱ña nu̱ú tutu ña̱ tává na̱ ñuu Ndióxi̱. Ka̱ʼa̱n xíʼin Jehová ná taxira ndee̱ ndaʼún ña̱ kuni̱ún keʼúnña (Filip. 2:13). Tándi̱ʼi, keʼé ña̱ sa̱kúaʼún. Tá ná kuniún ña̱ viíní ki̱xáʼún kéʼún iin ña̱ʼa, ña̱yóʼo chindeétáʼanña xíʼún ña̱ kuni̱ún keʼún inkaka ña̱ʼa. Tasaá kǒo ixayo̱ʼvi̱ña xíʼún keʼún inkaka ña̱ ka̱ʼyiún nu̱ú tutu. w24.09 6 párr. 13, 14

Sana ña̱ ke̱ʼún tá ya̱chi̱ sa̱xóʼvi̱ña inka na̱ yiví, ña̱kán vitin va̱ása va̱ʼa kúniún. Ña̱kán, ¿ndáaña kivi keʼún? Xíʼin ndinuʼu níma̱ún ndukún ña̱ káʼnu-ini nu̱úna, ta chikaa̱ ndee̱ ña̱ ndasaviíún ku̱a̱chi ña̱ ke̱ʼún. Ka̱ʼa̱n xíʼin Jehová ná chindeétáʼanra xíʼin na̱ ni̱xo̱ʼvi̱ xa̱ʼa̱ ña̱ ke̱ʼún. Jehová kivi chindeétáʼanra xíʼin miíún ta saátu xíʼin na̱ sa̱xóʼvi̱ún ña̱ va̱ʼa nandóso-inindó xa̱ʼa̱ ña̱ ku̱u tasaá vií ndakutáʼanndó. Íyova ña̱ kivi sakúaʼún xíʼin ña̱ va̱ása va̱ʼa ke̱ʼún soo saátu taxi ña̱ kuniñúʼu Jehová yóʼó ña̱ kachíñún nu̱úra. Ndakaʼán ña̱ ndo̱ʼo ta̱ profeta Jonás, nu̱úka ña̱ ku̱ʼu̱nra ñuu Nínive nu̱ú ni̱ka̱ʼa̱n Jehová xíʼinra, nda̱kiʼinra ku̱a̱ʼa̱nra inka ñuu. Jehová ni̱ka̱ʼa̱nra xíʼin ta̱ Jonás xa̱ʼa̱ ña̱ va̱ása va̱ʼa ke̱ʼéra ta ta̱yóʼo nda̱kunira ku̱a̱chi ña̱ ni̱ki̱ʼvira (Jon. 1:​1-4, 15-17; 2:​7-10). Kǒo níkindaaví Jehová chiñu ndaʼa̱ ta̱ Jonás ña̱ koora profeta ña̱kán ni̱ka̱ʼa̱n tukura xíʼinra ku̱ʼu̱nra ñuu Nínive, ta ta̱ Jonás ka̱ndíxavara ña̱ ni̱ka̱ʼa̱n Jehová xíʼinra. Ni xi̱ndakava-ini ta̱ Jonás xa̱ʼa̱ ña̱ ke̱ʼéra soo kǒo nítaxira ña̱ kasi ña̱yóʼo nu̱úra ña̱ keʼéra ña̱ ni̱ka̱ʼa̱n Jehová xíʼinra (Jon. 3:​1-3). w24.10 8, 9 párr. 10, 11

Kǒo ndákaʼánka Jehová xa̱ʼa̱ ku̱a̱chiyó chi ndákatavaraña. Ña̱ va̱ʼa kunda̱a̱-iniyó xíʼin ña̱yóʼo ná ka̱ʼa̱nyó xa̱ʼa̱ ndáa ki̱ʼva xi̱ ixava̱ʼana tinta tiempo xi̱naʼá. Ña̱ va̱ʼa keʼénará xi̱xiniñúʼuna ti̱ka̱yi̱, goma á xu̱xa ta saátu ti̱kui̱í. Xa̱ʼa̱ ña̱kán tá xi̱kaʼyinará nu̱ú tutu kiviva ndoorá xíʼin iin ti̱ko̱to̱ loʼo ña̱ visá. Tá xi̱ndakatana táyóʼo kǒo níxi̱tuvika ña̱ ka̱ʼyina nu̱ú tutu, ta nda̱a̱ táki̱ʼva íyo ña̱ kǒo níka̱ʼyi̱ saá ni̱xi̱yoña. Kúsi̱íní-iniyó saáchi tá íxakáʼnu-ini Jehová xa̱ʼa̱ ku̱a̱chiyó, ndákataraña ta kǒo ndákaʼánkara xa̱ʼa̱ña (Sal. 51:9). w25.02 10 párr. 11

Tá iin na̱ yiví káʼa̱nna ña̱ va̱ása va̱ʼa xa̱ʼa̱yó á íxandi̱va̱ʼana xíʼinyó, ná ndakaʼányó ña̱ kúnda̱a̱va-ini Jehová ndáaña kúu. Ta ña̱yóʼo sándi̱koña-iniyó saáchi kúnda̱a̱-iniyó ña̱ kixaa̱ tiempo ta ndatiinva Jehová ku̱a̱chi xíʼinna. Ña̱kán tá sándakooyó ña̱yóʼo ndaʼa̱ Jehová, saá kúú ña̱ kǒo sa̱a̱níyó chi tá ná sa̱a̱níyó kivi keʼéyó ña̱ va̱ása va̱ʼa. Tasaá kǒo kusi̱íka-iniyó ta nda̱a̱ kivi kuxíkáyó nu̱ú Jehová. Ni kúni̱yó kundiku̱nyó yichi̱ ta̱ Jesús, soo sava yichi̱ kivi ixayo̱ʼvi̱ña xíʼinyó saáchi na̱ yiví ku̱a̱chi kúúyó. Chi sana ka̱ʼa̱nyó á keʼéyó iin ña̱ʼa ña̱ kivi sandákava-ini inkana (Sant. 3:2). Sana savayó nda̱a̱ ná ya̱ʼayó nu̱ú ñuyǐví xa̱á saáví kuchiñuyó nandóso-iniyó xa̱ʼa̱ ndiʼi ña̱ va̱ása va̱ʼa ña̱ ke̱ʼéna xíʼinyó. Tá i̱xandi̱va̱ʼana xíʼún, ndakaʼán ña̱ kúnda̱a̱va-ini Jehová xíʼin ña̱ ndóʼún. Saátu ta̱ Jesús kúnda̱a̱va-inira xíʼin ña̱ ndóʼún chi ku̱a̱ʼání ña̱ va̱ása va̱ʼa ke̱ʼéna xíʼinra (Heb. 4:​15, 16). Ta saátu nu̱ú tu̱ʼunra ña̱ Biblia táxira consejo ndaʼa̱yó ña̱ kivi chindeétáʼan xíʼinyó ña̱ va̱ʼa kǒo sa̱a̱níyó tá íxandi̱va̱ʼana xíʼinyó. w24.11 6 párr. 12, 13

Ña̱ va̱ʼa ni̱ʼína ña̱ kutakuna ndiʼi tiempo, xi̱niñúʼu na̱ʼa̱na ña̱ kándíxana ta̱ Jesús. (Juan 3:​16-18, 36; 17:3). Ku̱a̱ʼání na̱ judío kán kǒo níxiinna kandíxana ña̱ ni̱ka̱ʼa̱n ta̱ Jesús xa̱ʼa̱ ña̱ xi̱kuni̱ Ndióxi̱ keʼéna. Ta ni̱ka̱ʼa̱nna xíʼinra: “¿Ndáa milagro keʼún ña̱ kunindi̱ ta kandíxandi̱ yóʼó?” (Juan 6:30). Na̱yóʼo ni̱ka̱ʼa̱nna xíʼinra xa̱ʼa̱ na̱ táʼanna na̱ xi̱ndoo tá tiempo ta̱ Moisés ña̱ xi̱xina maná ta ña̱yóʼo ni̱xi̱yoña nda̱a̱ táki̱ʼva ni̱xi̱yo si̱ta̱váʼa (Neh. 9:15; Sal. 78:​24, 25). Xíʼin ña̱yóʼo kíʼinyó kuenta ña̱ iinlá ña̱ xi̱ndiʼi̱-inina xa̱ʼa̱ kúú ña̱ taxira ña̱ kuxuna. Ña̱kán tá ni̱ka̱ʼa̱n ta̱ Jesús xa̱ʼa̱ “si̱ta̱váʼa mií ña̱ ndixa” ña̱ ke̱e chí ndiví kǒo nínda̱ka̱tu̱ʼunnara ndáaña xi̱kuni̱ kachiña (Juan 6:32). Xi̱ndiʼi̱níka-inina xa̱ʼa̱ ña̱ kuxuna ta kǒo níkiʼinna kuenta ndáaña xi̱kuni̱ ta̱ Jesús sanáʼa̱rana. w24.12 5, 6 párr. 10, 11

Ti̱xin escuela kivi sanáʼa̱na na̱ va̱lí se̱ʼendó xa̱ʼa̱ iin ki̱ʼva ña̱ ku̱vaʼa sava ña̱ʼa. Tá kúú, ku̱a̱ʼání yitu̱n kána ndaʼa̱nú ta nu̱ú ndaʼa̱nú kán kána inka ndaʼa̱nú ta nu̱ú ña̱kán kána inka ña̱ válíka ta ki̱ʼva ña̱ xáʼnu túyóʼo tu̱ʼun sáʼán naníña fractales. Soo su̱ví iinlá yitu̱n kúú tú xáʼnu saá, saáchi íyo inkaka ña̱ʼa ña̱ xáʼnu saá. Ña̱kán tá kíxáʼa na̱ va̱lí se̱ʼéndó ndáka̱tu̱ʼunna: “¿Ndáana i̱xava̱ʼa ndiʼi ña̱yóʼo chi liviní ku̱vaʼaña?”. Saá kunda̱a̱-inina ña̱ mií Ndióxi̱ kúú ta̱ i̱xava̱ʼa ndiʼi ña̱ʼa yóʼo. Ta tá xa̱a̱ xa̱ʼnu loʼona, saá kivi ka̱ʼa̱nndó xíʼinna ña̱ mií Ndióxi̱ kúú ta̱ i̱xava̱ʼa miíyó xa̱ʼa̱ ña̱kán káʼa̱nra xíʼinyó ndáaña keʼéyó ña̱ va̱ʼa si̱í kooyó. Ta saátu kivi ka̱ʼa̱nndó xíʼinna ña̱ ndiʼi ña̱ káʼa̱n Ndióxi̱ xíʼinyó va̱xiña nu̱ú Biblia. w24.12 16 párr. 8

Ta̱ apóstol Pablo ka̱ʼyira iin carta ku̱a̱ʼa̱n nu̱ú na̱ congregación ta ni̱ka̱ʼa̱nra xíʼinna ña̱ xíniñúʼu tavána ta̱a ta̱ ni̱ki̱ʼvi ku̱a̱chi chi kǒo níndandikó-inira (1 Cor. 5:13). ¿Ndáaña xi̱niñúʼu keʼé na̱ hermano xíʼin ta̱ ta̱a yóʼo? Ta̱ Pablo ni̱ka̱ʼa̱nra xíʼinna ña̱ ná va̱ása kutáʼanna xíʼin ta̱ ta̱a yóʼo ta ni ná va̱ása kuxuna xíʼinra (1 Cor. 5:11). Saáchi tá xíxiyó xíʼin iin na̱ yiví kíxáʼayó nátúʼunyó xíʼinna, ta loʼo tá loʼo kíxáʼayó ku̱a̱ʼáka tiempo kítáʼanyó xíʼinna. Ña̱kán ña̱ xi̱kuni̱ kachi ta̱ Pablo xíʼin na̱ hermano kán kúú ña̱ ná va̱ása kutáʼankana xíʼin ta̱ ta̱a yóʼo chi saá kúú ña̱ va̱ása kixáʼa na̱ congregación keʼéna ña̱ va̱ása va̱ʼa (1 Cor. 5:​5-7). Saátu ña̱yóʼo chindeétáʼanña xíʼin ta̱ ta̱a yóʼo ña̱ kiʼinra kuenta ña̱ kininí íyo ña̱ ke̱ʼéra nu̱ú Jehová, ña̱ kukaʼan nu̱úra xa̱ʼa̱ ña̱ ke̱ʼéra ta sana ña̱yóʼo chindeétáʼanña xíʼinra ña̱ ndikó-inira. w24.08 15 párr. 4, 5

Na̱ israelita iin yichi̱ nu̱ú ku̱i̱ya̱ xi̱keʼéna ña̱ xi̱naní Ki̱vi̱ ña̱ ndóo ku̱a̱china, ta ki̱vi̱ yóʼo kúú ña̱ xi̱sokó ta̱ su̱tu̱ káʼnu kití xa̱ʼa̱ ku̱a̱chi na̱ ñuu. Ta ni xi̱sokóvana kití yóʼo, va̱ása níxi̱kivi ndoo ndiʼi ku̱a̱chi na̱ israelita, saáchi ndáyáʼviníkava na̱ yiví nu̱ú kití. Soo tá xíʼin ndiʼi níma̱na xi̱ndikó-inina ta xi̱sokóna ña̱ʼa ña̱ xi̱ndukú Jehová nu̱úna, xi̱ ixakáʼnuva-inira xa̱ʼa̱na (Heb. 10:​1-4). Ña̱ xi̱keʼéna yóʼo xi̱sandákaʼánñana ña̱ kúúna na̱ yiví ku̱a̱chi. Soo ¿Ndáaña ke̱ʼé Jehová ña̱ va̱ʼa ixakáʼnu-inira xa̱ʼa̱ ndiʼi ku̱a̱chiyó? Ta̱xira se̱ʼera ta̱ kúni̱níra xínira ña̱ va̱ʼa chaʼvira xa̱ʼa̱ ku̱a̱chi ku̱a̱ʼání na̱ yiví (Heb. 9:28). Ta̱ Jesús ni̱xi̱ʼi̱ra ña̱ va̱ʼa chaʼvira xa̱ʼa̱ na̱ yiví (Mat. 20:28). w25.02 4 párr. 9, 10

“Na̱ yiví kúni̱vana keʼéna ña̱ va̱ʼa, soo vitánína” (Mat. 26:41b). Kúnda̱a̱va-ini ta̱ Jesús ña̱ kúúyó na̱ yiví ku̱a̱chi ta sava yichi̱ kéʼéyó ña̱ va̱ása va̱ʼa. Soo, saátu ni̱ka̱ʼa̱nra xíʼinyó ña̱ ná kiʼinníyó kuenta saáchi kivi xa̱a̱yó ndakanixi̱níyó ña̱ kǒo ndakavavíyó ndaʼa̱ ku̱a̱chi. Tá kúma̱níka ka̱ʼa̱n ta̱ Jesús tu̱ʼun yóʼo, na̱ discípulo ni̱ka̱ʼa̱nna ña̱ kǒo sandákoonara (Mat. 26:35). Ña̱ va̱ʼaníva kúú ña̱ xi̱kuni̱na keʼéna ña̱ kǒo sandákoona ta̱ Jesús, soo kǒo níndakanixi̱nína ndáaña kúú ña̱ ndaka̱xinna keʼéna tá ná ya̱ʼana nu̱ú tu̱ndóʼo. Ña̱kán, ta̱ Jesús ni̱ka̱ʼa̱nra xíʼin na̱ discípulo ña̱ va̱xi nu̱ú texto ki̱vi̱ vitin, ta ¿ndáaña ke̱ʼé na̱ discípulo tá ti̱inna ta̱ Jesús? Xa̱ʼa̱ ña̱ kǒo níxi̱ndito va̱ʼa nu̱úna ni̱ki̱ʼvina nu̱ú ku̱a̱chi. Kǒo níndakanixi̱nína kuu ña̱yóʼo, ña̱kán ni̱yi̱ʼvína ta sa̱ndákoo miína ta̱ Jesús ta nda̱kiʼinna ku̱a̱ʼa̱nna (Mat. 26:56). w24.07 14 párr. 1, 2

Su̱ví nda̱saa ña̱ kutaku ta̱ Adán xíʼin ñá Eva ndiʼi tiempo kúú ña̱ ndi̱ʼi-xa̱ʼa̱, chi saátu va̱ása níkivika kutáʼan viína xíʼin yivána Jehová. Tá kúma̱níka ki̱ʼvina ku̱a̱chi, xi̱kuuna na̱ veʼe Ndióxi̱ (Luc. 3:38). Soo xa̱ʼa̱ ña̱ kǒo níxiniso̱ʼokana ña̱ ni̱ka̱ʼa̱n Jehová, kǒo níkivika koona na̱ veʼera. Ña̱yóʼo ku̱uña tá kúma̱níka koo se̱ʼena (Gén. 3:​23, 24; 4:1). Xa̱ʼa̱ ña̱kán, miíyó na̱ kúú se̱ʼena xíniñúʼu ndakutáʼan viíyó xíʼin Jehová (Rom. 5:​10, 11). Ta ndáyáʼviní ña̱ ná ndakutáʼan viíyó xíʼinra. Iin tutu ña̱ káʼa̱n xa̱ʼa̱ Biblia káʼa̱nña ña̱ tá káʼa̱n texto yóʼo xa̱ʼa̱ ña̱ ndakutáʼan viíyó xíʼin Ndióxi̱, xíniñúʼuña iin tu̱ʼun griego ña̱ kúni̱ kachi, “na̱ sáa̱-ini xíni miíyó nduuna migoyó”. Xa̱ʼa̱ ña̱ kúni̱ní Jehová xínira miíyó, ndu̱kúra ki̱ʼva ña̱ va̱ʼa ndakutáʼan viíyó xíʼinra. Íyo iin ña̱ ndáyáʼviní ke̱ʼé Jehová ña̱ va̱ʼa chaʼvira xa̱ʼa̱ ña̱ ke̱ʼé ta̱ Adán tasaá ndoo ku̱a̱chiyó. Ña̱ ndoo ku̱a̱chiyó kivi chindeétáʼanña xíʼinyó ña̱ va̱ʼa ndikó tukuyó kutáʼan viíyó xíʼin Ndióxi̱. w25.02 3, 4 párr. 7, 8

Ta̱ Pablo ka̱chira: “Xíʼin ña̱ ke̱ʼéndó xíʼin ta̱ ta̱a yóʼo, xa̱a̱ cha̱ʼvivara xa̱ʼa̱ ku̱a̱chi ña̱ ni̱ki̱ʼvira” (2 Cor. 2:​5-8). Ña̱kán tá ta̱vána ta̱yóʼo ti̱xin congregación chi̱ndeétáʼanvaña xíʼinra chi ta̱ yóʼo xi̱kisi̱ra xíʼin siʼí ndáʼvira (1 Cor. 5:1) Saáchi ku̱ndaa̱-inira ña̱ xi̱niñúʼu ndandikó-inira xa̱ʼa̱ ku̱a̱chira (Heb. 12:11). Ta̱ Pablo ni̱ka̱ʼa̱nra xíʼin na̱ hermano ndáaña xi̱niñúʼu keʼéna xíʼin ta̱ ta̱a ta̱ nda̱ndikó-ini, ka̱chira xíʼinna: “Xíniñúʼu koo káʼnu-inindó xa̱ʼa̱ra ta sandíkondó-inira” ta ni̱ka̱ʼa̱nra xíʼinna ña̱ ná na̱ʼa̱na ña̱ kúʼvi̱-inina xíninara. Va̱ása níka̱ʼa̱n kuití ta̱ Pablo xíʼinna ña̱ ná taxina ndikóra congregación chi ni̱ka̱ʼa̱nra xíʼinna ña̱ ná na̱ʼa̱na xíʼin ña̱ kéʼéna ta saátu xíʼin tu̱ʼun ña̱ káʼa̱nna ña̱ i̱xakáʼnu-inina xa̱ʼa̱ra ta kúni̱na xíninara. Tá saá ná keʼéna, ta̱ ta̱a yóʼo kiʼinra kuenta ña̱ kúsi̱í-ini na̱ hermano ña̱ ndi̱kóra. w24.08 15 párr. 4; 16, 17 párr. 6-8

Ta̱ apóstol Pablo xi̱kunda̱a̱-inira ndáaña xi̱niñúʼu keʼéna ña̱ va̱ʼa kundeé-inina. Ña̱kán ni̱ka̱ʼa̱nra xíʼinna ña̱ ná kundaa-inina Jehová nu̱úka ña̱ kundaa-inina miína, ta ni̱ka̱ʼa̱nra ña̱yóʼo: “Jehová kúú ta̱ chindeétáʼan xíʼi̱n. Va̱ása yi̱ʼvíi̱” (Heb. 13:6). Tiempo vitin sava na̱ hermanoyó kúndeé-inina tá íxandi̱va̱ʼana xíʼinna. Ta iin ña̱ kivi keʼéyó ña̱ na̱ʼa̱yó ña̱ kúʼvi̱-iniyó xíniyóna kúú ña̱ ka̱ʼa̱nyó xa̱ʼa̱na xíʼin Ndióxi̱ ta saátu kivi taxiyó ña̱ xíniñúʼuna. Biblia káchiña: “Ndiʼi na̱ kúni̱ ndasakáʼnu Ndióxi̱ ta kúni̱na kutáʼanna xíʼin ta̱ Cristo Jesús, ixandi̱va̱ʼatuna xíʼin na̱yóʼova” (2 Tim. 3:12). Ña̱yóʼo kúni̱ kachiña ña̱ ndiʼiyó xíniñúʼu koo tu̱ʼvayó tá ná kixaa̱ tiempo ña̱ yo̱ʼvi̱ní. Xíniñúʼu kundaaní-iniyó Jehová ta kǒo kaka-iniyó ña̱ chindeétáʼanra xíʼinyó ña̱ kundeé-iniyó tá ná kixi nda̱a̱ ndáaka tu̱ndóʼo nu̱úyó. Miíra sandíko-ini na̱ ndasakáʼnu miíra míí tiempo ña̱ xíniñúʼunaña (2 Tes. 1:​7, 8). w24.09 13 párr. 17, 18

¿Ndáaña chi̱ndeétáʼan xíʼin na̱ ñuu Corinto ña̱ va̱ʼa ni̱xa̱a̱na nda̱kuchina? (2 Cor. 10:​4, 5). Ndióxi̱ xi̱niñúʼura tu̱ʼunra ta saátu espíritu santora ña̱ chi̱ndeétáʼanra xíʼinna ña̱ na̱samana ña̱ xi̱keʼéna (Heb. 4:12). Na̱ ñuu Corinto na̱ ni̱xa̱a̱ ka̱ndíxa tu̱ʼun Ndióxi̱, sa̱ndákoona ña̱ va̱ása va̱ʼa xi̱keʼéna. Tá kúú, savana xi̱xiʼina nda̱a̱ xi̱xiniina ta savana xi̱ ixakuíʼnána ta sava na̱ ta̱a xi̱kisi̱na xíʼin inka na̱ ta̱a ta saátu sava ná ñaʼá xi̱kisi̱ná xíʼin inka ná ñaʼá (1 Cor. 6:​9-11). Ña̱ nda̱a̱ kúúña, sava na̱ ñuu Corinto xi̱niñúʼu chikaa̱nína ndee̱ ña̱ va̱ʼa nasamana ña̱ xi̱keʼéna ña̱ va̱ʼa xa̱a̱na ndakuchina, soo kǒo níndakanixi̱nína ña̱ va̱ása kuchiñuna keʼéna ña̱yóʼo. Saáchi chi̱kaa̱nívana ndee̱ ña̱ keʼéna ña̱ kúni̱ Ndióxi̱ ña̱ va̱ʼa ni̱ʼína ña̱ kutakuna ndiʼi tiempo (Mat. 7:​13, 14). Ta miíún, ¿á chíka̱ún ndee̱ ña̱ sandákoún iin ña̱ va̱ása va̱ʼa kéʼún? Tá saá íyoña, kuchiñuvaún sandákoúnña. Ka̱ʼa̱n xíʼin Jehová ná taxira espíritu santora ndaʼún ña̱ va̱ʼa chindeétáʼanña xíʼún ña̱ kǒo keʼún iin ña̱ va̱ása va̱ʼa ña̱ kúni̱ún keʼún. w25.03 6 párr. 15-17

Jehová káʼa̱nra taxira ña̱ ndíchi “ndaʼa̱ ndiʼi na̱ ndúkúña nu̱úra ta va̱ása ndáʼyi̱ra nu̱úna”. Ña̱ ndíchi ña̱ táxira ndaʼa̱yó kúú ña̱ chindeétáʼan xíʼinyó ña̱ kunda̱a̱-iniyó á kusi̱í-inira xíʼin ña̱ ndaka̱xinyó keʼéyó á va̱ása kusi̱í-inira xíʼinña. Tá xa̱a̱ ni̱ka̱ʼún xíʼin Jehová ña̱ ná chindeétáʼanra xíʼún ña̱ vií ndaka̱xiún ña̱ keʼún, koto ndáa ki̱ʼva ndákuiinra ña̱ ni̱ka̱ʼún xíʼinra. Ná ka̱ʼa̱nyó xa̱ʼa̱ iin ejemplo, ná kachiyó ña̱ ki̱taún ku̱a̱ʼún inka ñuu ta nda̱ñúʼún, sana ka̱ʼún xíʼin iin na̱ yiví na̱ íyo ñuu kán ña̱ ná chindeétáʼanna xíʼún. ¿Á su̱ví ña̱ nda̱a̱ kúú ña̱ kǒo ku̱ʼu̱nvíún tá kúma̱níka ka̱ʼa̱nna xíʼún? Saáchi ña̱ keʼún kúú ña̱ viíní kuniso̱ʼún tá ná ka̱ʼa̱nna xíʼún ndáaña kivi keʼún. Ki̱ʼva saá íyo ña̱ xíniñúʼu keʼún tá xa̱a̱ ndúkún ña̱ ndíchi nu̱ú Jehová, kivi kotoún ndáaña káʼa̱nra xíʼún nu̱ú tu̱ʼunra xa̱ʼa̱ ña̱ kúni̱ún ndaka̱xiún keʼún. Tá kúma̱níka ndaka̱xiún á ku̱ʼún vikó kán, ndakanixi̱ní xa̱ʼa̱ ña̱ káʼa̱n Biblia xa̱ʼa̱ vikó nu̱ú kininí kéʼéna, ndakanixi̱ní xa̱ʼa̱ ña̱ káʼa̱nña ña̱ va̱ása kutáʼanyó xíʼin na̱ yiví na̱ kéʼé ña̱ va̱ása va̱ʼa, ta saátu ndakaʼún ña̱ káʼa̱nña ña̱ ná kundi̱ʼika-iniyó xa̱ʼa̱ Reino Ndióxi̱ nu̱úka ña̱ kundi̱ʼi-iniyó xa̱ʼa̱ ña̱ kúni̱ miíyó (Mat. 6:33; Rom. 13:13; 1 Cor. 15:33). w25.01 16 párr. 6, 7

Ta̱ profeta Isaías ni̱ka̱ʼa̱nra ña̱ síínní íyo na̱ yiví na̱ kǒo ndásakáʼnu Ndióxi̱ ta síínní íyo miíyó na̱ ndásakáʼnura. Miíyó na̱ ndásakáʼnu Jehová, kǒo ña̱ kúma̱ní nu̱úyó ña̱ va̱ʼa sakúaʼayó xa̱ʼa̱ra. Chi táxira espíritu santora ndaʼa̱yó, tu̱ʼunra ña̱ Biblia xíʼin inkaka ña̱ xíniñúʼuyó ña̱ va̱ʼa sakúaʼayó xa̱ʼa̱ra, ta ndiʼi ña̱yóʼo sákusi̱íníña-iniyó (chitáʼanña xíʼin Apocalipsis 22:17). Soo na̱ yiví na̱ kǒo ndásakáʼnu Jehová kǒo ña̱yóʼo kúúmiína ña̱ va̱ʼa sakúaʼana xa̱ʼa̱ra (Amós 8:11). Ta ña̱yóʼo ndánaʼa̱ña ña̱ táxi Jehová ndiʼi ña̱ xíniñúʼu na̱ ñuura, ña̱ kuxuna xíʼin ña̱ xíniñúʼuna ña̱ sakúaʼana xa̱ʼa̱ra (Joel 2:​21-24). ¿Ndáaña táxi Jehová ndaʼa̱yó ña̱ va̱ʼa sakúaʼayó xa̱ʼa̱ra tiempo vitin? Táxira Biblia, tutu ña̱ tává na̱ ñuura, sitio ña̱ kúúmiíyó nu̱ú internet, reunión xíʼin asamblea. Ña̱yóʼo chíndeétáʼanña xíʼinyó ña̱ va̱ʼa sakúaʼakayó xa̱ʼa̱ra tasaá va̱ʼaníka kitáʼanyó xíʼinra. w24.04 21 párr. 5, 6

Tá kúni̱ún kakaún xíʼin iin ñá hermana, kivi ka̱ʼún xíʼinñá nu̱ú íyo ku̱a̱ʼá na̱ yiví á xíʼin teléfono. Kaxi va̱ʼa ka̱ʼún xíʼinñá ña̱ kútóoúnñá ta kúni̱ún kakaún xíʼinñá (1 Cor. 14:9). Tá ná ka̱ʼa̱nñá xíʼún ña̱ taxiún tiempo ndaʼa̱ñá ña̱ ndakanixi̱níñá xa̱ʼa̱ ña̱ ni̱ka̱ʼún xíʼinñá, taxi tiempo ndaʼa̱ñá (Prov. 15:28). Soo tá ná ka̱ʼa̱nñá xíʼún ña̱ kǒo kúni̱ñá kakañá xíʼún, kǒo ixandúxa̱ún xíʼinñá. ¿Ndáaña kivi keʼún tá iin ta̱ hermano ni̱ka̱ʼa̱nra xíʼún ña̱ kútóora yóʼó? Kiʼin kuenta ña̱ xi̱niñúʼu ndakú koo inira ña̱ va̱ʼa ka̱ʼa̱nra xíʼún, ña̱kán vií ka̱ʼún xíʼinra ta to̱ʼó ka̱ʼún xíʼinra. Tá xíniñúʼún tiempo ña̱ va̱ʼa ndakanixi̱níún xa̱ʼa̱ ña̱ ni̱ka̱ʼa̱nra xíʼún, ka̱ʼa̱n xíʼinra. Soo kǒo taxiún ya̱ʼa ku̱a̱ʼá tiempo ña̱ ka̱ʼún xíʼinra xa̱ʼa̱ ña̱ ndaka̱xiún (Prov. 13:12). Tá kǒo kúni̱ún kakaún xíʼinra vií ka̱ʼún xíʼinra soo káxi ka̱ʼún xíʼinra. Soo, tá kúni̱ún kakaún xíʼinra ka̱ʼa̱n xíʼinra ndáaña ndóʼún ta ndáa ki̱ʼva kúni̱ndó ña̱ kaka xíʼin táʼanndó. w24.05 23, 24 párr. 12, 13

Sana tá ni̱xi̱yo loʼo ta̱ David ni̱xa̱ʼa̱nra nu̱ú xi̱ndoo na̱ soldado na̱ ñuu Israel ta xi̱nira ña̱ ndeéní yíʼvina saáchi ta̱ Goliat ndeéní xi̱ka̱ʼa̱nra: “Chindaʼándó iin ta̱a ta ná kixira kanitáʼanra xíʼi̱n” (1 Sam. 17:​10, 11). Na̱ soldado kán xi̱yiʼvína saáchi xi̱nina ña̱ súkunní ta̱ Goliat, ta saátu ku̱a̱ʼání ña̱ va̱ása va̱ʼa xi̱ka̱ʼa̱nra xíʼinna (1 Sam. 17:​24, 25). Soo ta̱ David kǒo níyi̱ʼvíra saáchi nda̱kanixi̱níra ña̱ xíʼin mií Jehová xi̱ka̱ʼa̱n ta̱ Goliat tu̱ʼun kán (1 Sam. 17:26). Ta̱ David xi̱ndakanixi̱níra xa̱ʼa̱ Jehová ta ka̱ndíxara ña̱ chindeétáʼanra xíʼinra nda̱a̱ táki̱ʼva ke̱ʼéra tá xa̱ʼníra tí oso ta saátu tí león. Xi̱ndaaní-inira Jehová ta ni̱xa̱ʼa̱nra ka̱nitáʼanra xíʼin ta̱ Goliat ta ku̱chiñuvara xa̱ʼnírara (1 Sam. 17:​45-51). w24.06 21 párr. 7

Kǒo nda̱a̱ ni iin ña̱yóʼo ndakiʼinyó tá kǒo ndásakáʼnuyó Jehová. Tá ná keʼéyó ña̱yóʼo saá kúú ña̱ ndiʼi tiempo nda̱kú koo iniyó xíʼin Jehová ta saátu kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ salmista: “Soo nu̱ú miíi̱ ña̱ va̱ʼa kúú ña̱ kuyatii̱n nu̱ú Ndióxi̱” (Sal. 73:28). Kiviva ya̱ʼayó nu̱ú nda̱a̱ ndáaka tu̱ndóʼo ña̱ kixi nu̱úyó saáchi ndásakáʼnuyó Ndióxi̱ ta̱ táku (1 Tes. 1:9). Ndiʼi tiempo ndíʼi̱-ini Jehová xa̱ʼa̱yó ta kúni̱ra chindeétáʼanra xíʼinyó. Nu̱ú si̱lóʼoní tiempo kixi ña̱ gran tribulación soo chindeétáʼanva Jehová xíʼinyó. Ña̱kán kǒo xíniñúʼu kaka-iniyó, ta ná ka̱ʼa̱nyó tu̱ʼun yóʼo: “Jehová kúú ta̱ chindeétáʼan xíʼi̱n. Va̱ása yi̱ʼvíi̱” (Heb. 13:​5, 6). w24.06 25 párr. 17, 18

Yáʼaka 40 na̱ rey xa̱ʼndachíñu ñuu Israel. Ta Biblia káʼa̱nña xa̱ʼa̱ ndiʼi ña̱ ke̱ʼéna. Ná ka̱ʼa̱nyó xa̱ʼa̱ ta̱ David, miíyó kúnda̱a̱-iniyó ña̱ xi̱kuura iin rey ta̱ va̱ʼa. Ña̱kán, ni̱ka̱ʼa̱n Jehová ña̱yóʼo xa̱ʼa̱ra: “Ta̱kán ka̱ndíxara ndiʼi chiñu ña̱ xáʼndai̱ ta xíʼin ndiʼi níma̱ra xi̱ndiku̱nra yi̱ʼi̱ ta ke̱ʼéra ña̱ kútói̱” (1 Rey. 14:8). Soo, ta̱ David ni̱ki̱si̱ra xíʼin iin ñaʼá ñá xa̱a̱ ni̱xi̱yo yii̱, ta chi̱ndaʼára yii̱ñá ña̱ ku̱ʼu̱nra nu̱ú ku̱a̱chi ta kán xa̱ʼnínara (2 Sam. 11:​4, 14, 15). Soo, saátu Biblia káʼa̱nña xa̱ʼa̱ na̱ rey na̱ kǒo níxi̱xiniso̱ʼo ña̱ xi̱kaʼa̱n Jehová, soo ni saá ke̱ʼévana ña̱ va̱ʼa. Ná ka̱ʼa̱nyó xa̱ʼa̱ ta̱ rey Rehoboam. Jehová ni̱ka̱ʼa̱nra xa̱ʼa̱ ta̱ Rehoboam ña̱ ke̱ʼéra “ña̱ va̱ása va̱ʼa” (2 Crón. 12:14). Soo, ka̱ndíxavara ña̱ ni̱ka̱ʼa̱n Jehová xíʼinra ta kǒo níxa̱ʼa̱nkara kanitáʼanra xíʼin na̱ 10 tribu ña̱ Israel, ta ni̱ka̱ʼa̱nra xíʼinra ña̱ ná taxira ña̱ ndaka̱xin mií na̱ ñuu na̱ rey na̱ kaʼndachíñu nu̱úna. Ta saátu chi̱ndeétáʼan ta̱ Rehoboam xíʼin na̱ ñuu ña̱ va̱ʼa kundaana miína nu̱ú na̱ sáa̱-ini xíni miína (1 Rey. 12:​21-24; 2 Crón. 11:​5-12). ¿Nda̱chun ni̱ka̱ʼa̱n Jehová ña̱ savana nda̱kú ni̱xi̱yo inina xíʼinra ta inkana kǒo níxi̱yo nda̱kú-inina xíʼinra? Saáchi ki̱ʼinra kuenta xíʼin ña̱ ndíkaa̱ níma̱na, ña̱ ndi̱kó-inina xíʼin ña̱ nda̱kú ni̱xi̱yo inina xíʼinra. w24.07 20 párr. 1-3

Soo tá iin na̱ va̱lí na̱ xa̱a̱ kúú testigo Jehová ni̱ki̱ʼvina ku̱a̱chi ndeé ta ta̱ʼán xi̱nuna 18 ku̱i̱ya̱, ¿ndáaña keʼé na̱ anciano? Ndaka̱xinna u̱vi̱ na̱ anciano ña̱ ndatakana xíʼin na̱yóʼo ta saátu xíʼin na̱ yivána na̱ kúú Testigo. Na̱ anciano yóʼo ndukúna ki̱ʼva ña̱ kunda̱a̱-inina ndáaña xa̱a̱ kéʼé yivá na̱ va̱lí yóʼo ña̱ va̱ʼa chindeétáʼanna xíʼinna ña̱ nasamana ña̱ kéʼéna ta ndikó-inina. Tá na̱ va̱lí yóʼo va̱ʼaní xíniso̱ʼona consejo ña̱ táxi na̱ yivána ndaʼa̱na ta násamana ña̱ kéʼéna xíʼin ña̱ ndákanixi̱nína, u̱vi̱ na̱ anciano yóʼo kivi ndaka̱xinna ña̱ va̱ása xíniñúʼuví ndataka na̱yóʼo xíʼin iin comité na̱ anciano. Saáchi Ndióxi̱ táxira chiñu yóʼo ndaʼa̱ yivá na̱ va̱lí yóʼo ña̱ taxina consejo ndaʼa̱na (Deut. 6:​6, 7; Prov. 6:20; 22:6; Efes. 6:​2-4). Tándi̱ʼi, na̱ anciano kivi nda̱ka̱tu̱ʼunna yivá na̱ va̱lí yóʼo ña̱ va̱ʼa kunda̱a̱-inina á táxikana consejo ndaʼa̱ na̱ va̱lí se̱ʼena. Soo, ¿ndáaña kivi keʼé na̱ anciano tá va̱ása xíín na̱ va̱lí yóʼo nasamana ta kéʼékana ña̱ va̱ása va̱ʼa? Saá kúú ña̱ ndataka iin comité na̱ anciano xíʼin na̱ va̱lí yóʼo ta saátu xíʼin na̱ yivána na̱ kúú Testigo. w24.08 24 párr. 18

Tá xa̱a̱ táxina iin regalo ndaʼa̱yó kúsi̱íva-iniyó, soo kúsi̱íníka-iniyó tá miíyó kúú na̱ táxiña ndaʼa̱ inkana. Chi miíyó kúú na̱ kivi ndaka̱xin ndáaña keʼéyó, ña̱kán tá ná ndaka̱xinyó ña̱ chindeétáʼanyó xíʼin inkana kusi̱íní-iniyó. Va̱ʼaní i̱xava̱ʼa Jehová miíyó, ¿á su̱ví saá? (Sal. 139:14). Biblia káʼa̱nña ña̱ na̱ táxi ña̱ʼa ndaʼa̱ inkana kúsi̱íní-inina. Ña̱kán Ndióxi̱ kúúra iin ta̱ si̱í-ini saáchi ku̱a̱ʼání ña̱ʼa táxira ndaʼa̱yó (1 Tim. 1:11). Jehová kúú ta̱ siʼna ta̱xi ku̱a̱ʼání ña̱ʼa ndaʼa̱yó ta iinlá miíra kúú ta̱ va̱ʼaní-ini. Ta̱ apóstol Pablo ni̱ka̱ʼa̱nra: “Saáchi xa̱ʼa̱ ta̱kán kúú ña̱ tákuyó, kánda̱yó ta íyoyó” (Hech. 17:28). Ta ndiʼi ña̱ va̱ʼa, Ndióxi̱ kúú ta̱ táxiña (Sant. 1:17). Ña̱kán kivi keʼéyó ña̱ kéʼé Jehová chi va̱ʼaní-inira (Efes. 5:1). w24.09 26 párr. 1-4

Vitin ña̱ xa̱a̱ xi̱toyó ndáa requisito kúú ña̱ xíniñúʼu keʼé iin ta̱ hermano ña̱ va̱ʼa xa̱a̱ra koora anciano, sana sava na̱ siervo ministerial kivi ndakanixi̱nína ña̱ kǒo kiviví xa̱a̱na koona anciano. Soo ndakaʼánndó chi ni Jehová ni na̱ ñuura kǒo ndátuna ña̱ viíní keʼéndó ña̱yóʼo (1 Ped. 2:21). Jehová taxira espíritu santora ndaʼa̱ndó ña̱ va̱ʼa xa̱a̱ndó keʼéndó chiñu yóʼo (Filip. 2:13). ¿Á íyo iin ña̱ ni̱ka̱ʼa̱nyó xa̱ʼa̱ nu̱ú artículo yóʼo ña̱ xíniñúʼu viíka keʼún? Tá saá ka̱ʼa̱n xíʼin Jehová, nandukú xa̱ʼa̱ ña̱ kúni̱ún viíka keʼún, ta ka̱ʼa̱n xíʼin na̱ anciano ná ka̱ʼa̱nna xíʼún ndáaña xíniñúʼu viíka keʼún ta chikaa̱ ndee̱ ña̱ va̱ʼa xa̱ún koún anciano. Ka̱ʼa̱n xíʼin Jehová ná sanáʼa̱ra yóʼó ta ná chindeétáʼanra xíʼún ña̱ va̱ʼa viíka kachíñún nu̱úra ta saátu ña̱ chindeétáʼún xíʼin na̱ hermano (Is. 64:8). Mií Jehová chindeétáʼan xíʼún ña̱ va̱ʼa xa̱ún koún anciano. w24.11 25 párr. 17, 18

Nda̱a̱ ni iin yichi̱ va̱ása xíniñúʼu ndakanixi̱níyó ña̱ xíniñúʼu ixakáʼnu-ini Jehová xa̱ʼa̱yó saáchi xa̱a̱ ku̱a̱ʼání ku̱i̱ya̱ káchíñuyó nu̱úra. Mií ña̱ nda̱a̱ chíndayáʼvinívara ña̱ kéʼéyó xa̱ʼa̱ra. Va̱ása nítaxi Jehová se̱ʼera ña̱ kuvira xa̱ʼa̱yó ña̱ va̱ʼa ndacháʼvira miíyó xa̱ʼa̱ chiñu ña̱ kéʼéyó nu̱úra, chi iin regalo ña̱ ta̱xira ndaʼa̱vayó kúú ña̱yóʼo. Ña̱kán va̱ása xíniñúʼu ndakanixi̱níyó ña̱ xíniñúʼu ixakáʼnu-ini Jehová xa̱ʼa̱yó, saáchi xa̱a̱ ku̱a̱ʼání ña̱ʼa kéʼéyó xa̱ʼa̱ra. Chi tá saá ná ndakanixi̱níyó, kúni̱ kachiña ña̱ va̱ása níxiniñúʼuví kuvi ta̱ Jesús xa̱ʼa̱yó (kivitu kaʼviún ña̱ káʼa̱n Gálatas 2:21). Ta̱ apóstol Pablo xi̱kunda̱a̱-inira ña̱ ni ku̱a̱ʼáníva ña̱ ná keʼéra nu̱ú Jehová, va̱ása xíniñúʼuví ixakáʼnu-inira xa̱ʼa̱ra. Tá saá, ¿nda̱chun chi̱kaa̱níra ndee̱ ña̱ ka̱chíñura nu̱ú Jehová? Saáchi xi̱kuni̱ra na̱ʼa̱ra ña̱ táxiníra tíxa̱ʼvi ndaʼa̱ Jehová xa̱ʼa̱ ña̱ va̱ʼaní-inira xíʼinra (Efes. 3:7). Ta saátu miíyó kúsi̱íní-iniyó káchíñuyó nu̱ú Jehová ta su̱ví xa̱ʼa̱ ña̱ kúni̱ kuitíyó ná ixakáʼnu-inira xa̱ʼa̱ ku̱a̱chiyó kúúña, saáchi kéʼéyóña xa̱ʼa̱ ña̱ kúni̱yó na̱ʼa̱yó ña̱ táxiyó tíxa̱ʼvi ndaʼa̱ra xa̱ʼa̱ ña̱ kéʼéra xa̱ʼa̱yó. w25.01 27 párr. 5, 6