Julio

Sava na̱ ndásakáʼnu Jehová kúni̱na kachíñu ku̱a̱ʼákana nu̱úra, soo kǒo kívi keʼéna ña̱yóʼo xa̱ʼa̱ ña̱ xa̱a̱ ku̱chéena, xa̱ʼa̱ ña̱ kúúmiína iin kue̱ʼe̱ á íyo inkaka ña̱ sási nu̱úna. Xa̱ʼa̱ ña̱kán túvina ña̱ kǒo ndáyáʼvikana nu̱ú Jehová ta nda̱a̱ ndákanixi̱nína: “¿Á kivika kuniñúʼu Jehová yi̱ʼi̱ ña̱ kachíñui̱ nu̱úra?”. Saátu ndo̱ʼo ta̱ ka̱ʼyí Salmo 71. Ta̱yóʼo ni̱ka̱ʼa̱nra xíʼin Jehová: “Tá kǒoka ndeíi̱ kǒo sandákoo ndaʼún yi̱ʼi̱” (Sal. 71:​9, 18). Soo, ta̱ ka̱ʼyí salmo yóʼo xi̱kandíxara ña̱ tá nda̱kú íyo inira xíʼin Ndióxi̱ kundavarara ta chindeétáʼanvara xíʼinra. Na̱kunda̱a̱-inira ña̱ kúsi̱íva-ini Jehová xíʼin na̱ chíkaa̱ ndee̱ ña̱ kachíñuna nu̱úra ni íyo ña̱ sási nu̱úna (Sal. 37:​23-25). Tá xa̱a̱ ku̱cheún ndakanixi̱ní ndáa ki̱ʼva xíto Jehová yóʼó, ni túviún ña̱ kǒo ku̱a̱ʼá ña̱ kivi keʼún nu̱ú Jehová, soo kivi kuniñúʼura yóʼó ña̱ chindeétáʼún xíʼin inkana (Salmo 92:​12-15). Nu̱úka ña̱ kundi̱ʼi̱ní-iniún xa̱ʼa̱ ña̱ kǒo kívi keʼún, ndakanixi̱ní xa̱ʼa̱ ña̱ kivi keʼún. w24.10 28 párr. 14-16

Na̱ cristiano na̱ kǒo kúnda̱a̱ va̱ʼa ini xíʼin tu̱ʼun Ndióxi̱, íxayo̱ʼvi̱ña xíʼinna ña̱ ndaka̱xinna ña̱ keʼéna tá va̱ása káʼa̱n káxi Biblia xa̱ʼa̱ iin ña̱ʼa ña̱ kúni̱na kunda̱a̱-inina xa̱ʼa̱. Ña̱kán savana ndákanixi̱nína ña̱ kivi keʼéna ña̱ kúni̱ miína. Inkana kúni̱na ña̱ ná ka̱ʼa̱n inkana xíʼinna ndáaña xíniñúʼu keʼéna. Tá kúú, sava na̱ cristiano na̱ ñuu Corinto ni̱ka̱ʼa̱nna xíʼin ta̱ apóstol Pablo ña̱ ka̱ʼa̱nra á kivi kuxuna ña̱ʼa ña̱ xi̱taxina ndaʼa̱ na̱ ndióxi̱ vatá, soo ta̱ Pablo ni̱ka̱ʼa̱nra xíʼinna ña̱ xíniñúʼu ndaka̱xin miína ndáaña va̱ʼa kúú ña̱ túvi miívana. Ña̱kán, ni̱ka̱ʼa̱nra xíʼinna xa̱ʼa̱ sava ña̱ va̱xi nu̱ú Biblia ña̱ kivi chindeétáʼan xíʼinna ña̱ vií koo ña̱ ndaka̱xinna keʼéna, tasaá kǒo sandákavana-ini na̱ hermano (1 Cor. 8:​7-9). Ta̱ Pablo sa̱náʼa̱ra na̱ Corinto ña̱ kuniñúʼuna ña̱ va̱xi nu̱ú tu̱ʼun Ndióxi̱ ña̱ va̱ʼa ndaka̱xinna ña̱ keʼéna, nu̱úka ña̱ kundatuna ña̱ ka̱ʼa̱n inkana xíʼinna ndáaña keʼéna. w24.04 5 párr. 14

Tiempo tá ni̱xi̱yo ta̱ Jonás, Jehová ta̱xira tiempo ndaʼa̱ na̱ ñuu Nínive ña̱ nda̱ndikó-inina xa̱ʼa̱ ña̱ va̱ása va̱ʼa xi̱keʼéna. Ta saátu ná ndakaʼányó, ta̱ Jesús ni̱ka̱ʼa̱nra ña̱ ndataku na̱ yiví na̱ ke̱ʼé ña̱ va̱ása va̱ʼa ta ndatiinna ku̱a̱chi xíʼinna (Juan 5:29). Ña̱kán sana sandátakuva Jehová sava na̱ yiví na̱ xi̱ndoo ñuu Sodoma xíʼin Gomorra, ta kivi chindeétáʼanyó xíʼinna ña̱ sakúaʼana xa̱ʼa̱ Jehová xíʼin ta̱ Jesús. Jehová kúnda̱a̱-inira ndáaña ndíkaa̱ níma̱ iin tá iin na̱ yiví. Ña̱kán nda̱a̱ táki̱ʼva íyo ña̱ kéʼéna saá koo ña̱ taxira ndaʼa̱na tá ná sandátakurana. Kǒo nasamaví Jehová ña̱ xa̱a̱ nda̱kaxinra keʼéra xíʼin na̱ yiví soo na̱ʼa̱ra ña̱ kúndáʼviní-inira xínirana. Ná kǒo ka̱ʼa̱nyó ndáana kúú na̱ ndataku ta ndáana kúú na̱ kǒo ndataku tá kǒo káʼa̱n káxi Biblia xa̱ʼa̱ na̱yóʼo. w24.05 5, 6 párr. 15, 16

Xa̱a̱ ku̱a̱ʼání ku̱i̱ya̱ tu̱ʼun Ndióxi̱ chíndeétáʼanña xíʼin na̱ káchíñu nu̱úra ña̱ keʼéna chiñu ña̱ táxira ndaʼa̱na. Ná ndakanixi̱níyó xa̱ʼa̱ ta̱ profeta Jeremías. Ni̱yi̱ʼvíníra tá ni̱ka̱ʼa̱n Jehová xíʼinra ña̱ ku̱ʼu̱nra natúʼunra xíʼin na̱ yiví, ta ni̱ka̱ʼa̱nra: “Kǒo xínii̱ ndáaña ka̱ʼi̱n iin ta̱ loʼova kúi̱” (Jer. 1:6). ¿Ndáaña ke̱ʼéra tasaá kǒo níyi̱ʼvíkara? Tu̱ʼun Ndióxi̱ ta̱xi ndee̱ ndaʼa̱ra ta ni̱ka̱ʼa̱nra: “Soo, chí níma̱i̱ tu̱ʼunra ni̱xa̱a̱ña ndu̱uña nda̱a̱ táki̱ʼva íyo iin ñuʼu̱ ña̱ xíxi̱ ña̱ ndíkaa̱ ini lekei̱, ta nda̱a̱ ku̱nai̱ ña̱ sásii̱ ña̱yóʼo, kǒo níkundeéka-inii̱ nu̱úña” (Jer. 20:​8, 9). I̱xayo̱ʼvi̱nívaña xíʼin ta̱ Jeremías ña̱ natúʼunra xa̱ʼa̱ Ndióxi̱ chi na̱ yiví kǒo níxiinna kuniso̱ʼonara, soo ña̱ chi̱ndeétáʼan xíʼinra keʼéra chiñu yóʼo kúú tu̱ʼun Ndióxi̱. Saátu miíyó na̱ ndásakáʼnu Jehová tiempo vitin va̱ʼaní chíndeétáʼan tu̱ʼunra xíʼinyó. Ta̱ apóstol Pablo ni̱ka̱ʼa̱nra xíʼin na̱ hermano ña̱ tu̱ʼun Ndióxi̱ kivi taxiña ndee̱ ndaʼa̱na ta chindeétáʼanña xíʼinna. Ña̱yóʼo ni̱ka̱ʼa̱nra xíʼinna “ña̱ va̱ʼa viíní keʼéndó nda̱a̱ táki̱ʼva kúni̱ mií Jehová, nani ndákundeéndó kéʼéndó ndiʼi ña̱ va̱ʼa” (Col 1:​9, 10). w24.04 14, 15 párr. 2-4

Ta̱ Abiatar va̱ása nda̱kú níxi̱yo inira xíʼin Jehová, soo ta̱ Sadoc nda̱kúva ni̱xi̱yo inira xíʼinra. Ta̱ David xi̱kunda̱a̱-inira ña̱ va̱ása sandákooví ta̱ Sadoc ña̱ ndasakáʼnura Jehová. Tá na̱túʼunna xíʼin ta̱ David xa̱ʼa̱ ña̱ xi̱kuni̱ ta̱ Adonías keʼéra, ta̱ David ni̱ka̱ʼa̱nra xíʼin ta̱ Sadoc ta̱ Natán xíʼin ta̱ Benaya ña̱ ndasaana ta̱ Salomón rey (1 Rey. 1:​32-34). Sana ña̱ chi̱ndeétáʼan xíʼin ta̱ Sadoc kúú ña̱ nda̱kanixi̱níra xa̱ʼa̱ na̱ xi̱ndasakáʼnu Jehová, tá kúú ta̱ Natán ta̱ va̱ʼaní chi̱ndeétáʼan xíʼin ta̱ rey David. Tá ndu̱u ta̱ Salomón rey chiñu ña̱ xi̱kuumií ta̱ Abiatar ta̱xiraña ndaʼa̱ ta̱ su̱tu̱ Sadoc (1 Rey. 2:35). ¿Ndáaña keʼún ña̱ va̱ʼa kundiku̱n yichi̱ ta̱ Sadoc? Tá iin na̱ migoún á iin na̱ veʼún sa̱ndákoona Jehová chikaa̱ ndee̱ ña̱ nda̱kú koo iniún xíʼin Jehová (Jos. 24:15). Ka̱ʼa̱n xíʼinra ña̱ taxira ndee̱ ndaʼún ta kǒo sandákoún ña̱ kitáʼún xíʼin na̱ hermano. Xítova Jehová ña̱ nda̱kú íyo iniún xíʼinra ta ku̱a̱ʼání ña̱ va̱ʼa taxira ndaʼún chí nu̱únínu (2 Sam. 22:26). w24.07 6, 7 párr. 16, 17

Nu̱ú Salmo 15:​2, káʼa̱nña xa̱ʼa̱ na̱ migo Jehová ña̱ ndiʼi tiempo xíniñúʼu keʼéna ña̱ va̱ʼa ta nda̱kú koo inina xíʼinra. Soo, ¿á kivi keʼéyóña? Kiviva. Ni kúúyó na̱ yiví ku̱a̱chi, soo tá xíniso̱ʼoyó ña̱ káʼa̱n Jehová kivi ka̱ʼa̱nra xa̱ʼa̱yó ña̱ kúúyó na̱ yiví va̱ʼa. Tá ndákuchiyó saá kúú ña̱ kivi chika̱a̱kayó ndee̱ ña̱ viíka ndasakáʼnuyó Jehová. Tiempo xi̱naʼá ku̱a̱ʼání na̱ israelita xi̱kaʼa̱n ña̱ xi̱ndasakáʼnuna Jehová, soo su̱ví xíʼin ndinuʼu-inina níxi̱keʼénaña (Is. 48:1). Soo na̱ ndixa xi̱kuni̱ ndasakáʼnu Jehová, xi̱niñúʼu kunda̱a̱-inina ndáaña xi̱kuni̱ra keʼéna. Ta saátu tiempo vitin su̱ví xa̱ʼa̱ ña̱ xáʼa̱nyó reunión á xa̱ʼa̱ ña̱ nda̱kuchiyó kúni̱ kachiña ña̱ kíndo̱o-ini Jehová xíʼin ña̱ kéʼéyó, chi ndiʼi tiempo xíniñúʼu keʼéyó ña̱ kútóora. w24.06 9 párr. 4; 10 párr. 6

Ná kotoyó ndáaña kéʼé Jehová tasaá náʼa̱ra ña̱ va̱ʼaní-inira. Ña̱ nda̱a̱ kǒo táxira ña̱ ku̱i̱ká ndaʼa̱yó, soo táxira ña̱ xíniñúʼuyó tá kúú, chíndeétáʼanra xíʼinyó ña̱ va̱ʼa ni̱ʼíyó ña̱ kuxuyó, ti̱ko̱to̱ kundixiyó xíʼin veʼe nu̱ú kooyó (Sal. 4:8; Mat. 6:​31-33; 1 Tim. 6:​6-8). Kǒo táxi kuití Jehová ña̱yóʼo ndaʼa̱yó xa̱ʼa̱ ña̱ ndákanixi̱níra ña̱ xíniñúʼu taxiraña ndaʼa̱yó. Ná ka̱ʼa̱nyó xa̱ʼa̱ tu̱ʼun ña̱ ni̱ka̱ʼa̱n ta̱ Jesús nu̱ú Mateo 6:​25, 26. Ta̱ Jesús ni̱ka̱ʼa̱nra xa̱ʼa̱ saa á sala ña̱ “kǒo chíʼirí ta ni kǒo sákeerí ni va̱ása táxiva̱ʼarí ña̱ kuxurí ti̱xin ya̱ka̱, soo yivándó ta̱ íyo chí ndiví sákuxurarí”. Tasaá ni̱nda̱ka̱tu̱ʼunrana: “¿Á kǒo ndáyáʼvika ndóʼó nu̱ú tíkán?”. Tá va̱ʼaní ndáa Jehová kití saátu va̱ʼaní kundaara miíyó. Yiváyó kúú Jehová ta kúni̱níra xínira miíyó ña̱kán táxira ndiʼi ña̱ xíniñúʼuyó (Sal. 145:16; Mat. 6:32). w24.09 26, 27 párr. 4-6

Iin ta̱ hermano ta̱ xa̱a̱ nda̱kuchi kúú ta̱ kivi xa̱a̱ koo siervo ministerial. Tá ndáka̱xinna iin ta̱ hermano ña̱ koora siervo ministerial, espíritu santo Jehová kúú ña̱ chíndeétáʼan xíʼinna. Ta na̱ siervo ministerial chíndeétáʼanna xíʼin na̱ anciano ña̱ keʼéna ku̱a̱ʼá chiñu ti̱xin congregación. Ku̱a̱ʼáníva chiñu kéʼé na̱ siervo ministerial. Soo ña̱ ndáyáʼvika kúú ña̱ kúʼvi̱ní-inina xínina Jehová ta kéʼéna ña̱ káʼa̱nra. Saátu kúʼvi̱ní-inina xínina ndiʼi na̱ hermano na̱ ñúʼu congregación (Mat. 22:​37-39). Soo, ¿ndáaña xíniñúʼu keʼé iin ta̱ hermano ta̱ xa̱a̱ nda̱kuchi ña̱ va̱ʼa koora siervo ministerial? Biblia káʼa̱nña ndáaña xíniñúʼu keʼé iin ta̱ kúni̱ xa̱a̱ koo siervo ministerial (1 Tim. 3:​8-10, 12). Ña̱kán, ¿ndáaña kivi keʼún tá kúni̱ún koún siervo ministerial? Xíniñúʼu kaʼviún ña̱ káʼa̱n xa̱ʼa̱ ndáaña xíniñúʼu keʼé iin na̱ hermano ña̱ va̱ʼa koona siervo ministerial ta chika̱ún ndee̱ ña̱ saxínúnña. Soo siʼna ná ka̱ʼa̱nyó xa̱ʼa̱ iin pregunta ña̱ ndáyáʼviní. w24.11 15 párr. 4, 5

Sava na̱ yiví káʼa̱nna ña̱ xa̱a̱ ku̱a̱ʼání yichi̱ káʼvina Biblia. Soo, ¿á kándíxana ña̱ káʼa̱nña? ¿Á kéʼéna ña̱ káʼa̱nña? Ku̱a̱ʼánína va̱ása kéʼévínaña. Soo, miíyó na̱ ndásakáʼnu Jehová síínva íyoyó. Ña̱kán chíkaa̱níyó ndee̱ ña̱ keʼéyó ña̱ káʼa̱nña. Sava yichi̱ íxayo̱ʼvi̱vaña xíʼinyó kaʼviyó Biblia ta keʼéyó ña̱ káʼa̱nña. Sana kǒo tiempo nu̱úyó kaʼviyóña. Á kamaní káʼviyóña ta kǒo kúnda̱a̱-iniyó xíʼinña á sanatu ndákava-iniyó tá kíʼinyó kuenta ña̱ ku̱a̱ʼání ña̱ xíniñúʼu viíka keʼéyó. Ni nda̱a̱ ndáaka ña̱ íxayo̱ʼvi̱ xíʼún, chindeétáʼanva Jehová xíʼún ña̱ viíka keʼúnña. Taxi ná chindeétáʼan Ndióxi̱ xíʼún, kǒo kuniso̱ʼo kuitíún ña̱ káʼa̱n tu̱ʼunra ta nandóso-iniún xa̱ʼa̱ña. Tá ná kaʼvi ni̱ʼún ña̱ Biblia ta keʼún ña̱ káʼa̱nña saá kúú ña̱ si̱íní koún (Sant. 1:25). w24.09 7 párr. 15, 16

Tá ndo̱ʼoyó iin tu̱ndóʼo ña̱ ndeéní ta kǒo kívi nandóso-iniyó xa̱ʼa̱ña, Jehová xíniñúʼura espíritu santora ña̱ va̱ʼa sandíkora-iniyó. Tá yáʼún nu̱ú iin tu̱ndóʼo ña̱ yo̱ʼvi̱ní ta xa̱ʼa̱ ña̱yóʼo xóʼvi̱níún, ka̱ʼa̱n xíʼin Jehová xa̱ʼa̱ ndiʼi ña̱ ndóʼún. Kivi ka̱ʼún xíʼinra nda̱saa yichi̱ kúni̱ miíún ta nda̱saa tiempo kúni̱ miíún (Sal. 86:3; 88:1). Kǒo sandákoún ña̱ ka̱ʼún xíʼinra ña̱ taxira espíritu santo ndaʼún chi xíniso̱ʼovara ndiʼi oración ña̱ káʼún xíʼinra. ¿Á ni̱ya̱ʼún nu̱ú iin tu̱ndóʼo ña̱ ndeéní ta túviún ña̱ kǒoka ndee̱ kúúmiíún? Espíritu santo kivi taxiña ndee̱ ndaʼún ña̱ va̱ʼa nda̱kundeún nda̱kú koo iniún kachíñún nu̱ú Jehová (Efes. 3:16). Tá xa̱a̱ ni̱ka̱ʼún xíʼin Jehová ña̱ taxira espíritu santo ndaʼún, ¿ndáa inkaña kivi keʼún? Keʼé ña̱ kivi chindeétáʼan xíʼún ña̱ ndakiʼún espíritu yóʼo, tá kúú ña̱ ku̱ʼún reunión xíʼin ña̱ keún natúʼún xíʼin na̱ yiví xa̱ʼa̱ Ndióxi̱. Ndiʼi ki̱vi̱ kaʼviún tu̱ʼun Ndióxi̱, chi saá kivi kunda̱a̱-iniún ndáaña ndákanixi̱ní Jehová (Filip. 4:​8, 9). Nani káʼviúnña ndakanixi̱ní xa̱ʼa̱ na̱ xi̱ndasakáʼnu Ndióxi̱ tá ya̱chi̱ na̱ ni̱ya̱ʼa nu̱ú tu̱ndóʼo ta koto ndáa ki̱ʼva chi̱ndeétáʼan Jehová xíʼinna ña̱ ku̱ndeé-inina. w24.10 9 párr. 12-14

Ta̱ Jesús xíʼin Jehová kúʼvi̱ní-inina xínina na̱ yiví ta saátu miívayó (Prov. 8:31). Ta kúndáʼviní-iniyó xíniyó na̱ yiví na̱ ta̱ʼán sakúaʼa xa̱ʼa̱ Ndióxi̱ (Efes. 2:12). Ku̱a̱ʼání tu̱ndóʼo kúúmií na̱ yiví, soo miíyó kivi chindeétáʼanyó xíʼinna ña̱ sakúaʼana xa̱ʼa̱ Ndióxi̱ xíʼin xa̱ʼa̱ ña̱ káʼa̱nra keʼéra chí nu̱únínu. Ta xa̱ʼa̱ ña̱ kúʼvi̱-iniyó xíniyóna sánáʼa̱yóna xa̱ʼa̱ Jehová ta ña̱yóʼo chindeétáʼanña xíʼinna ña̱ kusi̱í-inina vitin ta saátu chí nu̱únínu. Ta saátu chindeétáʼanña xíʼinna ña̱ ni̱ʼína ña̱ kutakuna ndiʼi saá tiempo nu̱ú ñuyǐví xa̱á (1 Tim. 6:19). Xa̱ʼa̱ ña̱ kúʼvi̱ní-iniyó xíniyó na̱ yiví káʼa̱nyó xíʼinna ña̱ ku̱yatinní kixaa̱ ña̱ ndiʼi-xa̱ʼa̱ ndiʼi ña̱ va̱ása va̱ʼa íyo nu̱ú ñuʼú yóʼo (Ezeq. 33:​7, 8). Kúni̱yó ña̱ kunda̱a̱-inina ndáaña kuu tiempo kán: siʼna sandíʼi-xa̱ʼa̱na ndiʼi veʼe-ñu̱ʼu vatá, tándi̱ʼi tá xa̱a̱ ná koo ña̱ Armagedón ndiʼi-xa̱ʼa̱ ndiʼi ña̱ va̱ása va̱ʼa íyo ñuyǐví yóʼo (Apoc. 16:​14, 16; 17:​16, 17; 19:​11, 19, 20). w24.05 16, 17 párr. 8, 9

Tá íxandi̱va̱ʼana xíʼinyó, ná keʼéyó ña̱ ni̱ka̱ʼa̱n ta̱ apóstol Pablo, ná taxiyó ña̱ mií Jehová ná ndatiin ku̱a̱chi xíʼinna mií tiempo ña̱ nda̱kaxin miíra. Ña̱yóʼo kúú ña̱ ke̱ʼé ta̱ John tá ke̱ʼé iin ta̱ hermano ña̱ va̱ása va̱ʼa xíʼinra. Ta̱ John káchira: “Xi̱niñúʼu ka̱ʼnu̱-inii̱ ña̱ va̱ʼa kǒo ndatii̱n ku̱a̱chi nda̱a̱ táki̱ʼva xi̱kuni̱ miíi̱. Romanos 12:19 kúú ña̱ chi̱ndeétáʼan xíʼi̱n ña̱ vitá koo inii̱ ta taxii̱ ña̱ mií Jehová ndatiin ku̱a̱chi”. Va̱ʼaníka ña̱ taxiyó ndatiin Jehová ku̱a̱chi xíʼin na̱ kéʼé ña̱ va̱ása va̱ʼa xíʼinyó, saáchi tá miíyó ná kuni̱ ndasavií ku̱a̱chi yóʼo sana sa̱a̱níyó ta ndi̱ʼi̱ní-iniyó. Ña̱kán kúni̱ Jehová chindeétáʼanra xíʼinyó, ta ki̱ʼva siaʼa íyo ña̱ káʼa̱nra xíʼinyó: “Taxi ná ndasaviíi̱ ku̱a̱chi yóʼo chi xíni̱vai̱ ndáa ki̱ʼva keʼíi̱ña”. Tá ná taxiyó ña̱ ndatiin Jehová ku̱a̱chi, saá kúú ña̱ va̱ása sa̱a̱níyó. w24.11 6 párr. 14, 15

Ná kǒo kundi̱ʼiní-iniyó xa̱ʼa̱ ña̱ kuumiíyó ku̱a̱ʼá ña̱ʼa. Ña̱yóʼo kúú ña̱ sa̱ndákaʼán ta̱ apóstol Pablo na̱ cristiano na̱ xi̱ndoo tá siglo nu̱ú. Ta nu̱ú carta ña̱ chi̱ndaʼára ku̱a̱ʼa̱n ndaʼa̱na ni̱ka̱ʼa̱nra xa̱ʼa̱ ña̱ ku̱u xíʼin na̱ ñuu Israel tá ni̱xi̱yona yatin nu̱ú xi̱ndikaa̱ xi̱kí Sinaí. Ta ni̱ka̱ʼa̱nra xíʼinna ña̱ ná kǒo keʼéna ña̱ va̱ása va̱ʼa nda̱a̱ táki̱ʼva ke̱ʼé na̱kán (1 Cor. 10:​6, 7, 11). Jehová ta̱xira ña̱ xi̱xi na̱ ñuu Israel, soo xa̱ʼa̱ ña̱ xi̱kuni̱na ku̱a̱ʼákaña ni̱ki̱ʼvina ku̱a̱chi nu̱úra (Núm. 11:​4-6, 31-34). Ta saátu ke̱ʼéna tá ki̱xáʼana xíxina, xíʼina nani xi̱ndasakáʼnuna si̱ndi̱ki̱ loʼo tí oro (Éx. 32:​4-6). Ta̱ Pablo ni̱ka̱ʼa̱nra xíʼin na̱ judío ña̱ xi̱niñúʼu kiʼinnína kuenta chi si̱lóʼoní xi̱kuma̱ní ta ndiʼi-xa̱ʼa̱ ñuu Jerusalén xíʼin temploña, ta ña̱yóʼo ndi̱ʼi-xa̱ʼa̱ña ku̱i̱ya̱ 70 tiempo vitin. Ta saátu vitin, xa̱a̱ ku̱nu̱mí sandíʼi-xa̱ʼa̱ Jehová na̱ yiví na̱ va̱ása xíín kuniso̱ʼo xa̱ʼa̱ra, xa̱ʼa̱ ña̱kán xíniñúʼu kuniso̱ʼoyó consejo ña̱ ta̱xi ta̱ Pablo. w24.12 6 párr. 13

Jehová kúúra iin “Ndióxi̱ ta̱ si̱í-ini” ta xa̱ʼa̱ ña̱kán saátu kúni̱ra ña̱ si̱í ná kooyó (1 Tim. 1:11). Ña̱kán ta̱xira ku̱a̱ʼání regalo ndaʼa̱yó ña̱ va̱ʼa kusi̱í-iniyó kutakuyó (Sant. 1:17). Ta iin regalo yóʼo kúú ña̱ tíndaʼa̱yó. Tá tíndaʼa̱ iin ta̱a xíʼin iin ñaʼá kíndo̱ona ña̱ kuʼvi̱-inina kunitáʼanna, ña̱ ixato̱ʼó-táʼanna ta saátu ña̱ kundaatáʼanna. Tá viíní kítáʼan na̱ xa̱a̱ ti̱ndaʼa̱ saá kúú ña̱ si̱íní íyona. Tiempo vitin ku̱a̱ʼání na̱ xa̱a̱ ti̱ndaʼa̱ kǒo sáxi̱nuna ña̱ ki̱ndoona keʼéna ki̱vi̱ tá ti̱ndaʼa̱na, ta xa̱ʼa̱ ña̱yóʼo va̱ása si̱í íyona. ¿Ndáa ki̱ʼva kúni̱ Jehová ña̱ ná keʼé ta̱a ta̱ xa̱a̱ ti̱ndaʼa̱ xíʼin ñá síʼira? Jehová káʼa̱nra xíʼin ta̱a ta̱ xa̱a̱ ti̱ndaʼa̱ ña̱ ná ixato̱ʼóra ñá síʼira. Iin ta̱a ta̱ xa̱a̱ ti̱ndaʼa̱ náʼa̱ra ña̱ íxato̱ʼóra ñá síʼira tá viíní kéʼéra xíʼinñá ta kúʼvi̱-inira xínirañá (1 Ped. 3:7). w25.01 8 párr. 1, 2; 9 párr. 4, 5

Carta ña̱ chi̱ndaʼá ta̱ apóstol Pablo ndaʼa̱ na̱ hebreo va̱ʼaní chi̱ndeétáʼanña xíʼinna tá ki̱xi tu̱ndóʼo nu̱úna. Ta̱ Pablo ni̱ka̱ʼa̱nra xíʼinna ña̱ ná sakúaʼakana xa̱ʼa̱ tu̱ʼun Ndióxi̱ ta ná kunda̱a̱ka-inina xíʼinña. Tasaá kúú ña̱ kivi kunda̱a̱-inina ndáaña kúú ña̱ vatá ña̱ sánáʼa̱ inkana ta kǒo kandíxanaña, chi ña̱yóʼo kivi sakúxíkáñana nu̱ú Ndióxi̱. Ta saátu ni̱ka̱ʼa̱nra xíʼinna ña̱ ná kandíxanína ta keʼéna chiñu ña̱ xa̱ʼnda ta̱ Jesús, ta saátu viíní ná kuniso̱ʼona na̱ níʼi yichi̱ nu̱ú na̱ congregación. Ta ni̱ka̱ʼa̱nra xíʼinna ña̱ kǒo ixayo̱ʼvi̱ña xíʼinna tá ná ya̱ʼana nu̱ú tu̱ndóʼo tá ná ndakanixi̱nína xa̱ʼa̱ ña̱ ndakiʼinna chí nu̱únínu ta saátu tá ná kunda̱a̱-inina ña̱ kivi kuniñúʼu Ndióxi̱ ña̱yóʼo ña̱ sanáʼa̱rana ña̱ kundeé-inina. Tá ná kundiku̱ntu miíyó consejo ña̱ ta̱xi ta̱ Pablo ndaʼa̱ na̱ hebreo, saá kúú ña̱ kundeé-iniyó nda̱a̱ ná kixaa̱ ki̱vi̱ ña̱ ndiʼi-xa̱ʼa̱ ñuyǐví yóʼo (Heb. 3:14). w24.09 13 párr. 17, 19

Tá káʼa̱n Biblia xa̱ʼa̱ tu̱ʼun chaʼvina, kúni̱ kachiña ña̱ chaʼvina xa̱ʼa̱ iin ña̱ʼa ña̱ va̱ʼa ndakiʼinnaña. Ta ña̱yóʼo kúú ña̱ ke̱ʼé Jehová ña̱ va̱ʼa kooyó nda̱a̱ táki̱ʼva xi̱kuni̱ra tá xa̱ʼa̱. Ná ndakaʼányó chi ta̱ Adán xíʼin ñá Eva kǒo níkivika koona ndiʼi tiempo nda̱a̱ táki̱ʼva xi̱kuni̱ Jehová. Xa̱ʼa̱ ña̱kán, ña̱ xi̱niñúʼu chaʼvi Jehová xa̱ʼa̱yó inkáchi xi̱niñúʼu kooña xíʼin ña̱ sa̱ndíʼi-xa̱ʼa̱na (1 Tim. 2:6). Iin ta̱a ta̱ sáxi̱nu ña̱yóʼo kúú ta̱ kivi chaʼvi xa̱ʼa̱yó: 1) ta̱ kǒo ku̱a̱chi kúúmií, 2) ta̱ kivi koo ndiʼi tiempo nu̱ú ñuʼú, 3) ta saátu kuni̱ra kuvira xa̱ʼa̱yó. Ná ka̱ʼa̱nyó xa̱ʼa̱ u̱ni̱ ña̱ʼa ña̱ ke̱ʼé ta̱ Jesús ña̱ va̱ʼa chaʼvira xa̱ʼa̱yó: 1) kǒo ku̱a̱chi níxikuumiíra ta “va̱ása níki̱ʼvira ku̱a̱chi”, (1 Ped. 2:22) 2) xa̱ʼa̱ ña̱kán kivi kutakura ndiʼi tiempo nu̱ú ñuʼú yóʼo, 3) saátu ni̱xi̱yo tu̱ʼvara ña̱ kuvira xa̱ʼa̱yó (Heb. 10:9). w25.02 4, 5 párr. 11, 12

Ni nda̱a̱ ndáaka ña̱ xíniñúʼu ya̱ʼún nu̱ú ña̱ va̱ʼa xa̱ún ndakuchiún, kǒo kaka-iniún chi Jehová kúʼvi̱ní-inira xínira yóʼó ta kúni̱ra ña̱ ná xa̱ún koún táʼan na̱ veʼera. Ta̱ Jesús ni̱ka̱ʼa̱nra ña̱yóʼo xíʼin sava na̱ discípulora: “Tá ña̱ kándíxandó ná kooña táki̱ʼva íyo ndikín ña̱ mostaza, kivi ka̱ʼa̱nndó xíʼin yuku̱ yóʼo ‘Kúáʼan chí káa’, ta ku̱ʼu̱nvaña; kǒo ña̱ʼa ixayo̱ʼvi̱ xíʼinndó” (Mat. 17:20). Na̱ discípulo yóʼo, loʼova ku̱i̱ya̱ kúú ña̱ ni̱xi̱yona xíʼin ta̱ Jesús xa̱ʼa̱ ña̱kán xi̱niñúʼu chikaa̱kana ndee̱ ña̱ va̱ʼa kandíxakana Ndióxi̱. Soo ni saá, ta̱ Jesús ni̱ka̱ʼa̱nra xíʼinna ña̱ tá ná chikaa̱níkana ndee̱ ña̱ kandíxana Jehová, miíra chindeétáʼan xíʼinna ña̱ ya̱ʼana nu̱ú nda̱a̱ ndáaka tu̱ndóʼo ña̱ íyo nda̱a̱ táki̱ʼva íyo yuku̱ náʼnu. Ta saátu chindeétáʼanra xíʼin miívaún. Tá xítoún ña̱ íyo sava ña̱ íxayo̱ʼvi̱ xíʼún ña̱ xa̱ún ndakuchiún, chikaa̱ ndee̱ ña̱ nasamaún ña̱yóʼo. Chikaa̱ ndee̱ ña̱ ndataxiún miíún ndaʼa̱ Jehová ta ndakuchiún. Ña̱yóʼo kúú ña̱ va̱ʼaníka kivi ndaka̱xiún keʼún. w25.03 7 párr. 18-20

Iin ña̱ chindeétáʼan xíʼinyó ña̱ kundeé-iniyó ya̱ʼayó nu̱ú tu̱ndóʼo kúú ña̱ ndakaʼányó xa̱ʼa̱ ña̱ ke̱ʼé ta̱ David. Xíniñúʼu ndakaʼányó ña̱ ndásakáʼnuyó Ndióxi̱ ta̱ táku. Ta kivi keʼéyó ña̱yóʼo tá ná ndakaʼányó xa̱ʼa̱ ki̱ʼva ña̱ xa̱a̱ chi̱ndeétáʼan Jehová xíʼinyó tá ya̱chi̱ (Is. 37:​17, 33-37). Ta saátu kaʼvi ña̱ kána nu̱ú jw.org ña̱ káʼa̱n ndáa ki̱ʼva chíndeétáʼan Jehová xíʼin na̱ ñuura, saátu ndakaʼán ndáa ki̱ʼva xa̱a̱ chíndeétáʼan Jehová xíʼún tá yáʼún nu̱ú tu̱ndóʼo. Sana miíyó kǒo níndoʼoyó nda̱a̱ táki̱ʼva ndo̱ʼo ta̱ David, soo sana xa̱a̱ ku̱a̱ʼáníva ki̱ʼva chíndeétáʼan Jehová xíʼinyó ta saátu kúúyó migora (Juan 6:44). Ka̱ʼa̱n xíʼinra ná chindeétáʼanra xíʼún ña̱ ndakaʼún xa̱ʼa̱ ki̱vi̱ ña̱ nda̱kuiinra oración ña̱ ke̱ʼún nu̱úra tá ni̱ya̱ʼún nu̱ú tu̱ndóʼo ña̱ yo̱ʼvi̱ní. Tá ná ndakanixi̱níún xa̱ʼa̱ ndiʼi ña̱ kéʼé Jehová xa̱ʼún, ña̱yóʼo chindeétáʼan xíʼún ña̱ kandíxaníkaúnra. w24.06 21 párr. 8

Ni iinyó kǒo kúni̱ kuxíká nu̱ú Jehová, ña̱kán chíkaa̱níyó ndee̱ ña̱ kǒo keʼéyó ña̱ʼa ña̱ kúndasíra xínira. Soo, xa̱ʼa̱ ña̱ kúúyó na̱ yiví ku̱a̱chi kuni̱yó keʼéyó ña̱ kini (Rom. 7:​21-23). Sana iin kama ya̱ʼayó nu̱ú iin tentación ta ixayo̱ʼvi̱ña xíʼinyó ña̱ nda̱kú koo iniyó xíʼin Jehová, soo tá kúni̱yó nda̱kú koo iniyó xíʼin Jehová ta saátu xíʼin ta̱ Jesús xíniñúʼu kuniso̱ʼoyó ndiʼi ña̱ va̱xi nu̱ú tu̱ʼunra. Ndiʼivayó yáʼa nu̱ú tentación, soo savayó kúchiñuyó yáʼayó nu̱ú savaña ta savayó kǒo kúchiñuyó saáchi xa̱a̱ síín síín íyo ña̱ yáʼa iin tá iinyó nu̱ú. Tá kúú, sana sava na̱ ti̱ndaʼa̱ kúni̱na ku̱su̱nna xíʼin na̱ kǒo níti̱ndaʼa̱ xíʼinna á na̱ kúa̱an kúni̱na ku̱su̱nna xíʼin na̱ ta̱ʼán tindaʼa̱ xíʼinna. Ta savana íxayo̱ʼvi̱níña xíʼinna chi kúni̱na kusíkindaʼa̱na xíʼin kaʼána á kotondeʼéna pornografía. Inkatuna íxayo̱ʼvi̱níña xíʼinna ña̱ nasamana ki̱ʼva ña̱ íyona saáchi kamaní sáa̱na, ni̱nuní kúnina, á yíʼvina xínina na̱ yiví. w24.07 14 párr. 3; 15 párr. 5

¿Ndáa ki̱ʼva kuni ta̱ ta̱a yóʼo tá na̱ anciano va̱ása níchindeétáʼanna xíʼinra ña̱ ndikóra ti̱xin congregación tá xa̱a̱ nda̱ndikó-inira xa̱ʼa̱ ku̱a̱chi ña̱ ni̱ki̱ʼvira? ¿Á ndáa ki̱ʼva kunira tá va̱ása náʼa̱ na̱ hermano ña̱ kúʼvi̱-inina xíninara? Ta̱ ta̱a kán sana kundi̱ʼiní-inira xa̱ʼa̱ ña̱ kúsuchíní-inira, sana ndakanixi̱níra ña̱ va̱ása kivika ndikóra kachíñura nu̱ú Jehová. Nda̱a̱ kivi ndakanixi̱níra ña̱ va̱ása ixakáʼnu-ini Jehová xa̱ʼa̱ra ña̱kán va̱ása chikaa̱ra ndee̱ ña̱ nasamara. Saátu tá ná va̱ása ixakáʼnu-ini na̱ congregación xa̱ʼa̱ ta̱a ta̱ ni̱ki̱ʼvi ku̱a̱chi, va̱ása viíka kutáʼanna xíʼin Jehová ta na̱ʼa̱na ña̱ ndíku̱nna yichi̱ ta̱ Ndi̱va̱ʼa ta̱ va̱ása kúndáʼvi-ini xíni inkana ta va̱ása na̱ʼa̱na ña̱ ndíku̱nna yichi̱ Jehová, chi Jehová íxakáʼnu-inira xa̱ʼa̱ na̱ kíʼvi ku̱a̱chi tá ndándikó-inina. Tá ná va̱ása ixakáʼnu-inina xa̱ʼa̱ ta̱ ta̱a yóʼo saá kúú ña̱ kuniñúʼu ta̱ Ndi̱va̱ʼa miína ña̱ sandákavana-inira tasaá va̱ása ndasakáʼnukara Jehová (2 Cor. 2:​10, 11; Efes. 4:27). w24.08 17 párr. 7, 10, 11

Íyo inka ña̱ va̱ʼa ta̱xi ta̱ Jesús ndaʼa̱ na̱ congregación. Tá siglo nu̱ú, ta̱ Jesús chi̱ndeétáʼanra xíʼin na̱ anciano na̱ ni̱xi̱yo ñuu Jerusalén ña̱ va̱ʼa ndaka̱xinna ta̱ Pablo, ta̱ Bernabé xíʼin inka na̱ hermano ña̱ va̱ʼa koona superintendente ta ku̱ʼu̱nna kotona na̱ congregación (Hech. 11:22). ¿Nda̱chun nda̱kaxinnana? Nda̱kaxinnana ña̱ va̱ʼa keʼéna chiñu táʼan ña̱ kéʼé na̱ siervo ministerial xíʼin na̱ anciano: ña̱ chikaa̱na ndee̱ xíʼin na̱ congregación (Hech. 15:​40, 41). Na̱ superintendente ña̱ circuito, xa̱a̱ síín síín congregación xáʼa̱nna xítona ta sava ña̱yóʼo xíkání kíndo̱oña. Ndiʼi semana xíniñúʼu taxina ku̱a̱ʼá discurso, kéʼéna visita ña̱ pastoreo, xíkuumiína reunión xíʼin na̱ precursor ta saátu xíʼin na̱ anciano ta távána grupo ña̱ predicación. Káʼvina ña̱ va̱ʼa taxina discurso ta saátu íxatu̱ʼvana ña̱ʼa ña̱ va̱ʼa koo asamblea ña̱ circuito xíʼin ña̱ regional. Ta saátu sánáʼa̱na ti̱xin escuela ña̱ precursor, íxatu̱ʼvatuna reunión ña̱ kuumiína xíʼin ndiʼi na̱ precursor na̱ ñúʼu circuito nu̱ú ñuʼúna, ta saátu kéʼéna inka chiñu ña̱ ndáyáʼviní ña̱ táxi na̱ hermano na̱ káchíñu Betel ndaʼa̱na. w24.10 21 párr. 12, 13

Mií Jehová xi̱niñúʼura ta̱ profeta Jeremías ña̱ ni̱ka̱ʼa̱nra tu̱ʼun ña̱ va̱xi nu̱ú texto ña̱ ki̱vi̱ vitin. Ta̱ apóstol Pablo ni̱ka̱ʼa̱nra xa̱ʼa̱ ña̱ va̱xi nu̱ú Jeremías tá ni̱ka̱ʼa̱nra: “Kǒo ndakaʼánkai̱ xa̱ʼa̱ ku̱a̱china” (Heb. 8:12). ¿Ndáaña kúni̱ kachi tu̱ʼun yóʼo? Tá káʼa̱n Biblia xa̱ʼa̱ tu̱ʼun ndakaʼán, kǒo kúni̱ kachiña ña̱ ndakaʼányó xa̱ʼa̱ iin ña̱ʼa ña̱ ku̱u tá ya̱chi̱ chi sava yichi̱ kúni̱ kachiña ña̱ keʼéyó iin ña̱ʼa. Tá kúú, ta̱ kui̱ʼná ta̱ xi̱tikaa chí síi̱n ta̱ Jesús ni̱ka̱ʼa̱nra xíʼinra: “Ndakaʼún xa̱ʼíi̱ tá ná kaʼndachíñún” (Luc. 23:​42, 43). Xíʼin tu̱ʼun yóʼo kǒo níkuni̱ kachira xíʼin ta̱ Jesús ña̱ ndakaʼánra xa̱ʼa̱ra mií ki̱vi̱ kán, soo ta̱ Jesús ni̱ka̱ʼa̱nra xíʼinra ña̱ ndakaʼánvara xa̱ʼa̱ra ta sandátakurara chí nu̱únínu. Ña̱kán tá káʼa̱n Jehová ña̱ kǒo ndákaʼánkara xa̱ʼa̱ ku̱a̱chiyó, kúni̱ kachira ña̱ kǒo ixandi̱va̱ʼara xíʼinyó xa̱ʼa̱ ña̱ kéʼéyó ta ni kǒo sandákaʼánra miíyó xa̱ʼa̱ ku̱a̱chi ña̱ ni̱ki̱ʼviyó chi xa̱a̱ i̱xakáʼnuva-inira xa̱ʼa̱yó. w25.02 10, 11 párr. 14, 15

Ña̱ va̱ʼa xa̱a̱yó kunda̱a̱-iniyó xa̱ʼa̱ Jehová, xíniñúʼu kunda̱a̱-iniyó xa̱ʼa̱ ña̱ va̱ʼa ña̱ kúúmiíra, xa̱ʼa̱ ña̱ káʼa̱nra keʼéra chí nu̱únínu, xa̱ʼa̱ ña̱ kútóora ta saátu xa̱ʼa̱ ña̱ kúndasíra xínira. Ndakanixi̱ní xa̱ʼa̱ ña̱yóʼo: “Tá ná kuniñúʼi̱ ndiʼi ña̱ xa̱a̱ kúnda̱a̱-inii̱ xa̱ʼa̱ Jehová ña̱ va̱ʼa ndaka̱xii̱n keʼíi̱ iin ña̱ʼa, ¿á kutóora ña̱ ndaka̱xii̱n keʼíi̱?” (Efes. 5:17). Ña̱ va̱ʼa sakúsi̱íyó-ini Jehová, sava yichi̱ xíniñúʼu ndaka̱xinyó keʼéyó ña̱ kǒo kíndo̱o-ini na̱ veʼeyó á na̱ migoyó xíʼin. Ná ka̱ʼa̱nyó xa̱ʼa̱ na̱ íyo iin ñá loʼo se̱ʼe. Xa̱ʼa̱ ña̱ ndíʼi̱-inina xa̱ʼa̱ñá kúni̱na ña̱ ná tindaʼa̱ñá xíʼin iin ta̱ hermano ta̱ íyoní xu̱ʼún ni va̱ása kítáʼan viíra xíʼin Jehová. Ña̱ ndixa kúúva ña̱ kǒo kúni̱na ña̱ ná kuma̱ní xu̱ʼún nu̱ú ñá loʼo se̱ʼena. Soo, ¿ndáana chindeétáʼan xíʼinñá ña̱ vií kutáʼanñá xíʼin Jehová? ¿Ndáaña ndákanixi̱ní Jehová xa̱ʼa̱ ña̱yóʼo? Mateo 6:33 káʼa̱nña xíʼin miíyó na̱ ndásakáʼnu Jehová ña̱ siʼna Reino Ndióxi̱ ná kundi̱ʼi-iniyó xa̱ʼa̱. Ni íxato̱ʼóvayó na̱ yiváyó ta íxato̱ʼóyó inka na̱ yiví, soo ña̱ ndáyáʼviníka nu̱úyó kúú ña̱ keʼéyó ña̱ sákusi̱í-ini Jehová. w25.01 17 párr. 9, 10

Tiempo vitin saátu íxandi̱va̱ʼana xíʼinyó xa̱ʼa̱ ña̱ nátúʼunyó xíʼin na̱ yiví xa̱ʼa̱ Jehová, xa̱ʼa̱ ña̱kán xíniñúʼuyó ña̱ ná chindeétáʼan Jehová xíʼinyó ña̱ va̱ʼa ndakundeéyó natúʼunyó xíʼin na̱ yiví xíʼin ña̱ si̱í-ini (Apoc. 12:17). ¿Nda̱chun va̱ʼa kándíxayó ña̱ chindeétáʼan Jehová xíʼin iin tá iinyó? Saáchi nu̱ú Juan capítulo 17 kíʼinyó kuenta ña̱ ni̱ka̱ʼa̱n ta̱ Jesús xíʼin yivára ña̱ ná kundaara na̱ apóstolra, ta Jehová xi̱niso̱ʼovara ña̱ ni̱ka̱ʼa̱nra. Ta libro ña̱ Hechos káʼa̱nña ndáa ki̱ʼva chi̱ndeétáʼan Jehová xíʼin na̱ apóstol ña̱ va̱ʼa kusi̱í-inina natúʼunna xíʼin na̱ yiví ni xi̱ ixandi̱va̱ʼana xíʼinna. Tá ke̱ʼé ta̱ Jesús oración yóʼo saátu ni̱ka̱ʼa̱nra xíʼin Jehová ña̱ ná kundaara ndiʼi na̱ xi̱xaa̱ xi̱kandíxa ña̱ xi̱natúʼun na̱ apóstol yóʼo, xíʼin ña̱yóʼo kíʼinyó kuenta ña̱ nda̱a̱ xa̱ʼa̱ miíyó ni̱ka̱ʼa̱nra. Xa̱ʼa̱ ña̱yóʼo kúnda̱a̱-iniyó ña̱ ndakundeéva Jehová keʼéra ña̱ ni̱ka̱ʼa̱n ta̱ Jesús xíʼinra ta chindeétáʼanvara xíʼinyó nda̱a̱ táki̱ʼva ke̱ʼéra xíʼin na̱ apóstol (Juan 17:​11, 15, 20). Tá kúyatinka ki̱xaa̱ ki̱vi̱ ña̱ ndiʼi-xa̱ʼa̱ ñuyǐví yóʼo, sana ixayo̱ʼvi̱níkaña xíʼinyó ña̱ kusi̱í-iniyó natúʼunyó xíʼin na̱ yiví xa̱ʼa̱ Ndióxi̱. Soo ta̱ Jesús ni̱ka̱ʼa̱nra ña̱ koova ña̱ chindeétáʼan xíʼinyó ña̱ va̱ʼa ndakundeéyó natúʼunyó xíʼin na̱ yiví (Luc. 21:​12-15). w25.03 18 párr. 13, 14

Miíyó na̱ ndásakáʼnu Ndióxi̱ kúsi̱íní-iniyó. ¿Nda̱chun kúsi̱íní-iniyó? Saáchi xáa̱yó kúnda̱a̱-iniyó xa̱ʼa̱ ña̱ nda̱a̱ ña̱ káʼa̱n Ndióxi̱ keʼéra chí nu̱únínu ta ña̱yóʼo va̱ʼaní chíkaa̱ña ndee̱ xíʼinyó. Ta xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó ndátuyó ndakiʼinyó ña̱ va̱ʼa chí nu̱únínu ta kúsi̱íní-iniyó (Sal. 34:8; 133:​1-3). U̱vi̱ ña̱ va̱ʼa ña̱ kéʼé na̱ ñuu Ndióxi̱ kúú ña̱ kúʼvi̱ní-inina xínitáʼanna ta va̱ʼaní kítáʼanna. Ta ña̱yóʼo chíndeétáʼanña xíʼinyó kunda̱a̱-iniyó ndáa ki̱ʼva kooyó nu̱ú ñuyǐví xa̱á. Kán va̱ʼaníka na̱ʼa̱yó ña̱ kúʼvi̱-iniyó xínitáʼanyó ta saátu va̱ʼaníka kutáʼanyó xíʼin inkana (Col 3:14). Ña̱kán tá kúni̱ún si̱í koún, ndasakáʼnu Jehová. Ni na̱ yiví kúsi̱kindaana miíyó á káʼa̱n ndi̱va̱ʼana xíʼinyó, soo nu̱ú Jehová xíʼin na̱ ñuura va̱ʼaníva íyo ña̱ kéʼéyó (Is. 65:15). w24.04 21 párr. 7, 8

¿Ndáaña kivi keʼé ndiʼiyó ña̱ va̱ʼa chindeétáʼanyó xíʼin na̱ kúa̱an na̱ kúni̱ tindaʼa̱? Siʼna xíniñúʼu kiʼinníyó kuenta xíʼin ña̱ káʼa̱nyó xíʼinna (Efes. 4:29). Ná ndakanixi̱níyó xa̱ʼa̱ pregunta yóʼo: “¿Á kéʼéníi̱ si̱ki xíʼinna? Tá xítoi̱ ña̱ nátúʼun iin ta̱ kúa̱an xíʼin iin ñá kúa̱an, ¿á ndákanixi̱níi̱ ña̱ kútóo táʼanna?” (1 Tim. 5:13). Ta saátu ná kǒo ka̱ʼa̱nyó á keʼéyó sava ña̱ʼa ña̱ kivi sandákava-ini na̱ hermano xa̱ʼa̱ ña̱ ta̱ʼán tindaʼa̱na. Va̱ʼaka ná ndukúyó tu̱ʼun va̱ʼa ña̱ ka̱ʼa̱nyó xíʼinna ña̱ chikaa̱ ndee̱ xíʼinna. ¿Á xa̱a̱ ndákanixi̱níyó ña̱ iin ta̱ hermano xíʼin iin ñá hermana va̱ʼaní náʼa̱na ña̱ kaka xíʼin táʼanna? Biblia káʼa̱nña ña̱ ná kiʼinyó kuenta xíʼin ña̱ ndóʼo inkana (Rom. 15:2). Ku̱a̱ʼání na̱ kúa̱an kǒo kúni̱na ña̱ ka̱ʼa̱nna xíʼinna ndáana kaka xíʼinna ta ná ixato̱ʼóyó ña̱ ndákanixi̱nína (2 Tes. 3:11). Ta savana kúni̱vana ña̱ chindeétáʼanyó xíʼinna, soo ná chindeétáʼanyó xíʼinna tá miína kúú na̱ káʼa̱n xíʼinyó (Prov. 3:27). w24.05 24, 25 párr. 14, 15

Nása̱maní tiempo ña̱ ndóoyó vitin ta iin kama kivi kundoʼoyó iin tu̱ndóʼo, soo kúsi̱íní-iniyó chi kúnda̱a̱-iniyó ña̱ íyo Jehová ña̱ chindeétáʼanra xíʼinyó. Tá chíndeétáʼanra xíʼinyó saá kúú ña̱ kándíxaníkayó ña̱ iin Ndióxi̱ ta̱ táku kúúra. Nda̱a̱ táki̱ʼva ni̱ka̱ʼa̱n ta̱ David nu̱ú Salmo 18:46. Ni̱ka̱ʼa̱nra xa̱ʼa̱ Jehová ña̱ nda̱a̱ táki̱ʼva íyo iin yu̱u̱ káʼnu saá íyora. ¿Nda̱chun ni̱ka̱ʼa̱n ta̱ David ña̱ nda̱a̱ táki̱ʼva íyo iin yu̱u̱ káʼnu saá íyo Jehová? Biblia chítáʼanña Jehová xíʼin iin yu̱u̱ káʼnu ta ña̱yóʼo chíndeétáʼanña xíʼinyó kunda̱a̱-iniyó xa̱ʼa̱ sava ña̱ va̱ʼa ña̱ kúúmiíra. Saátu káʼa̱nña xa̱ʼa̱ na̱ nda̱sakáʼnu Jehová tiempo xi̱naʼá ta ni̱ka̱ʼa̱nna xa̱ʼa̱ra ña̱ íyora nda̱a̱ táki̱ʼva íyo iin yu̱u̱ káʼnu. Ña̱ nu̱ú yichi̱ ña̱ káʼa̱n Biblia xa̱ʼa̱ Jehová ña̱ íyora nda̱a̱ táki̱ʼva íyo iin yu̱u̱ káʼnu va̱xiña nu̱ú Deuteronomio 32:4. Tá ke̱ʼé ñá Ana oración ni̱ka̱ʼa̱nñá xíʼin Jehová: “Ndióxi̱ miíndi̱ ndakúníún nda̱a̱ táki̱ʼva íyo iin yu̱u̱ káʼnu” (1 Sam. 2:2). Ta̱ Habacuc ni̱ka̱ʼa̱nra xa̱ʼa̱ Jehová ña̱ íyora nda̱a̱ táki̱ʼva íyo iin yu̱u̱ káʼnu ña̱ chíndeétáʼan xíʼinra (Hab. 1:12). Ta̱ ka̱ʼyí ña̱ Salmo 73 ni̱ka̱ʼa̱nra xa̱ʼa̱ Jehová ña̱ íyora nda̱a̱ táki̱ʼva íyo iin yu̱u̱ chi va̱ʼaní chi̱ndeétáʼanra xíʼinra (Sal. 73:26). Ta saátu mií Jehová ni̱ka̱ʼa̱nra ña̱ íyora nda̱a̱ táki̱ʼva íyo iin yu̱u̱ káʼnu (Is. 44:8). w24.06 26 párr. 1, 3

Jehová ni̱ka̱ʼa̱nra ña̱ sava na̱ rey na̱ ñuu Israel nda̱kú ni̱xi̱yo inina xíʼinra saáchi xíʼin ndiʼi níma̱na xi̱kuʼvi̱-inina xi̱xininara. Siaʼa káchi ña̱ Biblia xa̱ʼa̱ ta̱ Josías: “Kǒo nda̱a̱ ni iinka na̱ rey níxi̱yo nda̱a̱ táki̱ʼva ni̱xi̱yo ta̱yóʼo, chi ndi̱kóra nu̱ú Jehová xíʼin ndiʼi níma̱ra” (2 Rey. 23:25). Soo ta̱ Salomón tá xa̱a̱ ku̱chéera ke̱ʼéra ña̱ va̱ása va̱ʼa ta kǒo níndasakáʼnura Jehová xíʼin ndiʼi níma̱ra (1 Rey. 11:4). Ta saátu Biblia káʼa̱nña xa̱ʼa̱ ta̱ Abiyam ña̱ su̱ví xíʼin ndiʼi níma̱ra níkachíñura nu̱ú Jehová (1 Rey. 15:3). Tá káʼa̱n Biblia xa̱ʼa̱ níma̱ káʼa̱nña xa̱ʼa̱ ndáa ki̱ʼva íyo na̱ yiví, ña̱ ndákanixi̱nína, ña̱ kúni̱na keʼéna, ña̱ kútóona, ña̱ xíni̱na keʼéna, ki̱ʼva ña̱ íyona, ndáa xa̱ʼa̱ kéʼéna iin ña̱ʼa ta saátu meta ña̱ kúúmiína. ¿Ndáaña kúni̱ kachi ña̱ kachíñuyó nu̱ú Jehová xíʼin ndiʼi níma̱yó? Kúni̱ kachiña ña̱ iinlá miíra kañúʼuyó á kondaño̱ʼoyó ta xíʼin ndiʼi níma̱yó xíniñúʼu keʼéyóña, ta kǒo íxandúxana xíʼinyó ña̱ ndasakáʼnuyóra. Saátu ndiʼi tiempo xíniñúʼu kuʼvi̱-iniyó kuniyóra. w24.07 21 párr. 4, 5

Jehová xíniñúʼura inka ejemplo ña̱ va̱ʼa kunda̱a̱-iniyó ndáaña kéʼéra xíʼin ku̱a̱chiyó, texto yóʼo káchiña: “Ndakatai̱ ku̱a̱chiún ta ndakasii̱ nu̱ú ku̱a̱chiún xíʼin iin vi̱kó” (Is. 44:22). Tá íxakáʼnu-ini Jehová xa̱ʼa̱ ku̱a̱chiyó nda̱a̱ táki̱ʼva íyo ña̱ ndákasira xíʼin iin vi̱kó ña̱ káʼnuní saá íyoña ta kǒo kívika koto inkanaña. ¿Ndáaña sákuaʼayó xíʼin ndiʼi ejemplo yóʼo? Tá káʼa̱n Jehová ña̱ íxakáʼnu-inira xa̱ʼa̱ ku̱a̱chiyó, ná kandíxayóra ta ná kǒo ndakanixi̱níyó ña̱ ndákaʼánkara xa̱ʼa̱ ku̱a̱chiyó. Xa̱a̱ cha̱ʼviva ta̱ Jesús xa̱ʼa̱ ku̱a̱chiyó, ña̱kán kǒo xíniñúʼukaví chaʼvi miíyóña. Xa̱a̱ ndo̱ova ku̱a̱chiyó ta nda̱a̱ táki̱ʼva íyo na̱ kǒo níki̱ʼvi ku̱a̱chi saá íyoyó. Xa̱ʼa̱ ña̱ va̱ʼa-ini Jehová ndákatavara ku̱a̱chiyó tá ndixa ndíkó-iniyó ta íxakáʼnuva-inira xa̱ʼa̱yó. Ta saátu táxira ña̱ va̱ʼa vií xa̱a̱yó kitáʼanyó xíʼinra ta miíra chíndeétáʼan xíʼinyó ña̱ nandóso-iniyó xa̱ʼa̱ ku̱a̱chiyó. w25.02 10 párr. 11-14

Na̱ anciano na̱ ndáka̱xinna ña̱ keʼéna iin comité xíʼin na̱ kíʼvi ku̱a̱chi kúni̱na kundaana congregación ña̱ va̱ása koo na̱ kíʼvi ku̱a̱chi ti̱xinña chi ña̱yóʼo kúú chiñu ta̱xi Jehová ndaʼa̱na (1 Cor. 5:7). Soo saátu chíkaa̱nína ndee̱ ña̱ chindeétáʼanna xíʼin na̱ ni̱ki̱ʼvi ku̱a̱chi ña̱ ndikó-inina, ña̱kán tá chíndeétáʼanna xíʼin na̱yóʼo ndátuna ña̱ ná nasamana ña̱ kéʼéna. Tá kéʼéna ña̱yóʼo saá kúú ña̱ ndíku̱nna yichi̱ Jehová chi ta̱kán kúni̱níra xínira miíyó ta kúndáʼvi-inira xínira miíyó (Sant. 5:11). Ná kotoyó ndáaña kúú ña̱ ka̱ʼyi ta̱ apóstol Juan tá xa̱a̱ ku̱chéera: “Se̱ʼe miíi̱, káʼi̱n ña̱yóʼo xíʼinndó ña̱ va̱ʼa ná kǒo ki̱ʼvindó ku̱a̱chi. Soo tá íyo iin ndóʼó ni̱ki̱ʼvi ku̱a̱chi, íyo iin ta̱ chíndeétáʼan xíʼinyó ta íyora xíʼin yiváyó: ta̱yóʼo kúú ta̱ Jesucristo iin ta̱ nda̱kúní-ini” (1 Juan 2:1). Sava na̱ kíʼvi ku̱a̱chi ndeé va̱ása ndíkó-inina. Tá kúu ña̱yóʼo saá kúu ña̱ xíniñúʼu keena ti̱xin congregación. w24.08 25 párr. 19, 20

Sava yichi̱ kuni̱ún chitaʼún ña̱ kéʼún xíʼin ña̱ kéʼé inkana soo kǒo keʼún ña̱yóʼo, ¿nda̱chun? Saáchi Jehová kǒo chítáʼanra ña̱ kéʼún xíʼin ña̱ kéʼé inkana (Gál. 6:4). Tá kúú, ñá María sa̱táñá iin aceite tá xáʼa̱n támi tá yaʼviní ta chi̱kaa̱ñára xa̱ʼa̱ ta̱ Jesús (Juan 12:​3-5). Ta ñaʼá ñá ni̱xi̱ʼi̱ yi̱i̱ chi̱kaa̱ñá u̱vi̱ xu̱ʼún válí ña̱ loʼoní ndáyáʼvi ini caja ña̱ xi̱ndita ini templo (Luc. 21:​1-4). Nu̱ú ta̱ Jesús ña̱ ke̱ʼé u̱vi̱ saá ná ñaʼá yóʼo xi̱ndayáʼviníña saáchi xi̱kandíxaníná Ndióxi̱. Ni túviún ña̱ loʼoníva chiñu kéʼún nu̱ú Jehová, soo ndáyáʼviníña nu̱úra saáchi kúni̱ún xíniúnra ta kúni̱ún ndasakáʼnúnra. Ndiʼivayó xíka-ini sava yichi̱. Biblia chíndeétáʼanña xíʼinyó ña̱ kǒo kaka-iniyó ta xíʼin ndiʼi níma̱ún kandíxaún ña̱ káʼa̱n Jehová. Ndiʼi ña̱ kéʼún nu̱ú Jehová ndáyáʼvinívaña ta káʼa̱nra taxira ña̱ va̱ʼa ndaʼún xa̱ʼa̱ ña̱ káchíñún nu̱úra. Ta kǒo nandósó-iniún, Jehová kúni̱ra xíni̱ra iin tá iin na̱ ndásakáʼnu miíra ta ndáarana. w24.10 25 párr. 3; 29 párr. 17, 18