Ná kǒo ndakanixi̱níyó táki̱ʼva ndákanixi̱ní na̱ ñuyǐví yóʼo
¿Á XA̱A̱ kíʼinndó kuenta ña̱ tiempo vitin ku̱a̱ʼáníka na̱ yiví kúni̱na ña̱ viíníka ná keʼéna xíʼinna nu̱ú inkana ta kúni̱na ña̱ ná taxina chiñu ña̱ va̱ʼaka ndaʼa̱na? Ni xa̱a̱ va̱ʼaníva kéʼéna xíʼinna ta kúúmiína chiñu ña̱ ndáyáʼvi, soo ni saá ndákanixi̱nína ña̱ xíniñúʼu kuumiína chiñu ña̱ va̱ʼaka. Ña̱ Biblia ni̱ka̱ʼa̱nña ña̱ tiempo so̱ndíʼi ña̱ ndóoyó vitin koo na̱ yiví na̱ ndíʼi̱níka-ini xa̱ʼa̱ mií ta saátu na̱ va̱ása táxi tíxa̱ʼvi (2 Tim. 3:2).
Su̱ví sa̱kán vitinví ndóo na̱ yiví na̱ ndíʼi̱níka-ini xa̱ʼa̱ mií, chi xa̱a̱ tiempo xi̱naʼáví íyona. Tá kúú ta̱ Adán xíʼin ñá Eva, nda̱kanixi̱nína ña̱ kivi ndaka̱xin miína ndáaña kúú ña̱ va̱ʼa ta ndáaña kúú ña̱ va̱ása va̱ʼa keʼéna. Ta ndiʼiyó ki̱xáʼa xóʼvi̱yó xa̱ʼa̱ ña̱ nda̱kaxin na̱yóʼo ke̱ʼéna. Tá ni̱ya̱ʼa tiempo, ta̱ rey Uzías ta̱ ñuu Judá nda̱kanixi̱níra ña̱ kivi so̱kóra ña̱ʼa ña̱ xáʼa̱n támi ini templo, ni su̱ví ta̱yóʼo kúú ta̱ kúúmií chiñu ña̱ so̱kóra ña̱yóʼo (2 Crón. 26:18, 19). Ta na̱ fariseo xíʼin na̱ saduceo nda̱kanixi̱nína ña̱ xi̱niñúʼu viíníka keʼé Ndióxi̱ xíʼinna nu̱ú inkana, xa̱ʼa̱ ña̱ xi̱kuuna na̱ ki̱xi ti̱xin na̱ veʼe ta̱ Abrahán (Mat. 3:9).
Xa̱ʼa̱ ña̱ ndóoyó xíʼin na̱ yiví na̱ ndíʼi̱níka-ini xa̱ʼa̱ mií ta saátu na̱ ni̱nuní kúni kivi kixáʼayó keʼéyó táʼan ña̱yóʼo (Gál. 5:26). Kivi kixáʼayó ndakanixi̱níyó ña̱ xíniñúʼu taxina iin chiñu ña̱ va̱ʼaní ndaʼa̱yó á ña̱ va̱ʼaníka keʼéna xíʼinyó nu̱ú inkana. ¿Ndáaña kivi chindeétáʼan xíʼinyó ña̱ va̱ʼa kǒo keʼéyó táʼan ña̱yóʼo? Ña̱ siʼna xíniñúʼu keʼéyó kúú ña̱ kunda̱a̱-iniyó ndáa ki̱ʼva ndákanixi̱ní Jehová xa̱ʼa̱ ña̱yóʼo. Ná kotoyó ndáaña káʼa̱n Biblia xa̱ʼa̱ ña̱yóʼo.
Jehová kúú ta̱ xíni̱ ndáa chiñu kúú ña̱ xíniñúʼu ndakiʼinyó. Ná ka̱ʼa̱nyó xa̱ʼa̱ sava ejemplo.
Jehová kúni̱ra ña̱ ná ixato̱ʼó ñá ñaʼá yii̱ñá ta ná na̱ʼa̱ ta̱ ta̱a ña̱ kúʼvi̱-inira xínira ñá síʼira (Efes. 5:33). Na̱ xa̱a̱ tíndaʼa̱ kúni̱na ña̱ ná na̱ʼa̱ yii̱na á ñá síʼina nu̱úna ña̱ kúni̱nína xínina iinlá miína (1 Cor. 7:3). Na̱ íyo se̱ʼe kúni̱na ña̱ ná kandíxa na̱ va̱lí se̱ʼenana, ta na̱ va̱lí kúni̱na ña̱ ná kundaa na̱ yivánana ta na̱ʼa̱na ña̱ kúni̱na xíninana (2 Cor. 12:14; Efes. 6:2).
Saátu xíniñúʼu ixato̱ʼóyó na̱ anciano ti̱xin congregación xa̱ʼa̱ ndiʼi chiñu ña̱ kéʼéna xa̱ʼa̱yó (1 Tes. 5:12). Soo na̱ anciano va̱ása xíniñúʼu ndakanixi̱nína ña̱ kúúna na̱ xíniñúʼu kaʼnda chiñu nu̱ú na̱ hermano (1 Ped. 5:2, 3).
Ndióxi̱ ta̱xira chiñu ndaʼa̱ na̱ chíñu ña̱ chindeétáʼanna xíʼinyó, xa̱ʼa̱ ña̱kán xíniñúʼu chaʼviyó impuesto ndaʼa̱na ta saátu xíniñúʼu ixato̱ʼóyóna (Rom. 13:1, 6, 7).
Jehová va̱ʼaní-inira ta táxira ku̱a̱ʼáníka ña̱ va̱ʼa ndaʼa̱yó. Xa̱ʼa̱ ña̱ kúúyó na̱ yiví ku̱a̱chi, ña̱ xíniñúʼu ndákiʼinyó kúú ña̱ kuviyó xa̱ʼa̱ ku̱a̱chiyó (Rom. 6:23). Soo xa̱ʼa̱ ña̱ kúʼvi̱ní-ini Jehová xínira miíyó, táxira ku̱a̱ʼání ña̱ va̱ʼa ndaʼa̱yó (Sal. 103:10, 11). Xa̱ʼa̱ ña̱ va̱ʼaní-inira xíʼinyó, táxira ña̱ kuumiíyó iin chiñu ti̱xin ñuura ta saátu táxira ku̱a̱ʼáníka ña̱ va̱ʼa ndaʼa̱yó ni va̱ása xíniñúʼu ndakiʼinyó ña̱yóʼo (Rom. 12:6-8; Efes. 2:8).
¿NDÁAÑA KIVI CHINDEÉTÁʼAN XÍʼINYÓ ÑA̱ VA̱ÁSA KUNDI̱ʼINÍ-INIYÓ XA̱ʼA̱ MIÍYÓ NI ÑA̱ NI̱NUNÍ KUNIYÓ?
Xíniñúʼu kiʼinyó kuenta ña̱ va̱ʼa kǒo ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo. Tá va̱ása kíʼinyó kuenta, kivi kixáʼayó ndakanixi̱níyó ña̱ xíniñúʼu ndakiʼinyó ku̱a̱ʼáka ña̱ʼa nu̱ú inkakana. Iin yichi̱, ta̱ Jesús ni̱ka̱ʼa̱nra xa̱ʼa̱ iin ejemplo ña̱ náʼa̱ nu̱úyó ña̱ va̱ása yo̱ʼvi̱ví kixáʼayó ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo. Ni̱ka̱ʼa̱nra xa̱ʼa̱ iin ta̱a ta̱ xi̱kuumií iin ñuʼú nu̱ú chi̱ʼina tú uva ta ta̱yóʼo ndu̱kúra sava na̱ ta̱a ña̱ kachíñuna nu̱úra iníí ki̱vi̱ ta ni̱ka̱ʼa̱nra ña̱ chaʼvirana iin denario. Ta tándi̱ʼi saátu ndu̱kúra inkaka na̱ ta̱a na̱ kachíñu nu̱úra, ta sava na̱yóʼo iin kuití hora ka̱chíñuna. Ta tá xa̱a̱ ku̱ñuú cha̱ʼvira iin denario iin tá iin na̱yóʼo. Soo na̱ ya̱chi̱ka ki̱xáʼa káchíñu, nda̱kanixi̱nína ña̱ ku̱a̱ʼáka chaʼvirana xa̱ʼa̱ ndiʼi hora ña̱ ka̱chíñuna ni niʼníní xi̱ñuʼuna (Mat. 20:1-16). Ta̱ Jesús xi̱niñúʼura ejemplo yóʼo ña̱ va̱ʼa na̱ʼa̱ra nu̱ú na̱ xi̱ndiku̱n sa̱tára ña̱ xíniñúʼu kusi̱í-inina xíʼin ña̱ʼa ña̱ kúni̱ mií Ndióxi̱ taxira ndaʼa̱na.
Na̱ ta̱a na̱ ka̱chíñu iníí ki̱vi̱, nda̱kanixi̱nína ña̱ ku̱a̱ʼáka xu̱ʼún xíniñúʼu kiʼinna.
Xíniñúʼu taxiyó tíxa̱ʼvi ndaʼa̱ inkana ta va̱ása ndukúyó ku̱a̱ʼáka ña̱ʼa nu̱úna (1 Tes. 5:18). Ná kundiku̱nyó yichi̱ ta̱ Pablo, chi ta̱yóʼo va̱ása ni̱ka̱ʼa̱nra xíʼin na̱ hermano na̱ ñuu Corinto ña̱ taxina ña̱ʼa ndaʼa̱ra, ni xi̱kuumiívara derecho ña̱ ndukúraña nu̱úna (1 Cor. 9:11-14). Nu̱úka ña̱ ndukúyó ku̱a̱ʼání ña̱ʼa nu̱ú inkana, va̱ʼaka ná taxiyó tíxa̱ʼvi ndaʼa̱na xa̱ʼa̱ ña̱ xa̱a̱ táxina ndaʼa̱yó.
Ta̱ apóstol Pablo va̱ása ni̱ka̱ʼa̱nra xíʼin na̱ hermano ña̱ taxina ña̱ xíniñúʼura.
Vitá ná koo iniyó. Tá iin na̱ yiví kíxáʼana ndákanixi̱nína ña̱ ndáyáʼvinína, kíxáʼana ndákanixi̱nína ña̱ ku̱a̱ʼáka ña̱ʼa xíniñúʼu taxina ndaʼa̱na nu̱úka ña̱ xa̱a̱ kúúmiína. Soo tá vitá íyo iniyó, ña̱yóʼo kúú ña̱ chindeétáʼan xíʼinyó ña̱ kǒo ndakanixi̱níyó saá.
Xa̱ʼa̱ ña̱ vitání ni̱xi̱yo ini ta̱ profeta Daniel, xi̱ndayáʼviníra nu̱ú Jehová.
Ta̱ profeta Daniel va̱ʼaní yichi̱ sa̱ndákoora nu̱úyó chi vitání ni̱xi̱yo inira. Ki̱xira ti̱xin iin familia na̱ ndáyáʼviní, liviní xi̱naʼa̱ra, ndíchiní ni̱xi̱yora ta ku̱a̱ʼání ña̱ʼa xi̱xini̱ra keʼéra. Xa̱ʼa̱ ña̱kán kivi ndakanixi̱níra ña̱ xi̱xiniñúʼu ndakiʼinvara chiñu ña̱ xi̱kuumiíra ta saátu ña̱ viíní xi̱keʼéna xíʼinra (Dan. 1:3, 4, 19, 20). Soo nu̱úka ña̱ keʼéra ña̱yóʼo, vitání ni̱xi̱yo inira ta xa̱ʼa̱ ña̱yóʼo ni̱na̱ʼa̱ Jehová ña̱ ndáyáʼviníra nu̱úra (Dan. 2:30; 10:11, 12).
Va̱ása xíniñúʼu ni̱nuní kuniyó ta ni va̱ása kundi̱ʼiní-iniyó xa̱ʼa̱ miíyó táki̱ʼva kéʼé na̱ ñuyǐví yóʼo, va̱ʼaka ná kusi̱í-iniyó xa̱ʼa̱ ña̱ xa̱a̱ táxi Jehová ndaʼa̱yó saáchi va̱ʼaní-inira xíʼinyó.