Tá xa̱a̱ nda̱kuchiyó, ndáaña keʼéyó tá ná ya̱ʼayó nu̱ú tu̱ndóʼo

1, 2. ¿Ndáa ki̱ʼva koo tu̱ʼvayó tá ná ya̱ʼayó nu̱ú tu̱ndóʼo xa̱ʼa̱ ña̱ ndásakáʼnuyó Ndióxi̱? Ka̱ʼa̱n xa̱ʼa̱ iin ejemplo.

KÚNDA̱A̱-INIYÓ ti̱xin ñuyǐví ña̱ xáʼnda chíñu ta̱ Ndi̱va̱ʼa ndiʼiyó ya̱ʼa nu̱ú tu̱ndóʼo. Ta̱ Jesús ni̱ka̱ʼa̱nra ña̱yóʼo xíʼin na̱ xi̱ndiku̱n miíra: “Koo sava na̱ yiví na̱ sandákava inkana ndaʼa̱ ku̱a̱chi” (Mat. 18:7). Xa̱ʼa̱ ña̱ ki̱xáʼayó ndásakáʼnuyó Ndióxi̱ ya̱ʼavayó nu̱ú tu̱ndóʼo, ta kivi kuumiíyó tu̱ndóʼo xíʼin na̱ hermano, ña̱kán xíniñúʼu koo tu̱ʼvayó tá ná ndoʼoyó ña̱yóʼo.

² Ná ka̱ʼa̱nyó xa̱ʼa̱ iin ejemplo. Na̱ ñuu Jehová ku̱a̱ʼá yichi̱ káʼa̱nna xíʼinyó ña̱ ná koo tu̱ʼvayó tá ná koo iin tu̱ndóʼo. ¿Ndáa ki̱ʼva kéʼéyó ña̱yóʼo? Ña̱ nu̱ú, kíʼinyó kuenta ndáa tu̱ndóʼo kúú ña̱ kivi kuu ñuu nu̱ú ndóoyó. Ta kéʼéyó ña̱yóʼo tá sa̱kán ki̱xaa̱yó ñuu kán. Ña̱ u̱vi̱, ndákanixi̱níyó ndáaña kivi keʼéyó tá ná ya̱ʼayó nu̱ú iin tá iin tu̱ndóʼo ña̱ kivi kundoʼoyó (Prov. 21:5). Ki̱ʼva saá kivi ndakanixi̱níyó ndáaña kivi keʼéyó tá ná ya̱ʼayó nu̱ú tu̱ndóʼo xa̱ʼa̱ ña̱ ki̱xáʼayó ndásakáʼnuyó Ndióxi̱, ta koo tu̱ʼvayó tá ná kundoʼoyó ña̱yóʼo. Tá ná keʼéyó saá, ña̱yóʼo chindeétáʼanña xíʼinyó ña̱ va̱ása kuxíkáyó nu̱ú Jehová (Sal. 17:5). Ná ka̱ʼa̱nyó xa̱ʼa̱ u̱ni̱ tu̱ndóʼo ña̱ kivi kundoʼoyó ta ndáa ki̱ʼva koo tu̱ʼvayó tá ná ya̱ʼayó nu̱ú iin tá iin ña̱yóʼo.a

TÁ IIN NA̱ HERMANO KÉʼÉNA IIN ÑA̱ VA̱ÁSA VA̱ʼA XÍʼÚN

3. ¿Ndáa tu̱ndóʼo kivi ya̱ʼayó nu̱ú ti̱xin congregación?

³ ¿Á ndákaʼún tá ni̱xa̱ʼún yichi̱ nu̱ú reunión ña̱ xíkuumií na̱ testigo Jehová? Sana ki̱ʼún kuenta ña̱ kúʼvi̱ní-ini na̱ hermano xínitáʼanna ta ña̱yóʼo chi̱ndeétáʼanña xíʼún ña̱ ku̱ndaa̱-iniún ña̱yóʼo kúú ña̱ nda̱a̱ (Juan 13:35; Col. 3:12). Ña̱yóʼo kúú ña̱ ndo̱ʼo ñá Blanca.b Ñáyóʼo káʼa̱nñá ña̱ tá sa̱kán nda̱kuchiñá ndo̱ʼoñá iin tu̱ndóʼo ña̱ kǒo níndakanixi̱níñá kuu, ñáyóʼo káchiñá: “Va̱ása va̱ʼa níkeʼé iin ñá hermana xíʼi̱n ta saátu xi̱kaʼa̱n kúáchiñá xa̱ʼa̱ inkana. Kǒo níndakanixi̱níi̱ kuu ña̱yóʼo, chi sa̱náʼa̱na miíi̱ na̱ testigo Jehová chíkaa̱na ndee̱ ña̱ vií kutáʼanna xíʼin ndiʼina ta kúʼvi̱-inina xíni táʼanna”. Ndiʼiva na̱ hermano chíkaa̱na ndee̱ ña̱ keʼéna ña̱ va̱ʼa, soo na̱ yiví ku̱a̱chiva kúúna (Efes. 4:23, 24; 1 Juan 1:8). Ña̱kán iin na̱ hermano kivi keʼéna á ka̱ʼa̱nna iin ña̱ va̱ása va̱ʼa xíʼinyó ta ña̱yóʼo kivi saxóʼvi̱ña miíyó (Sant. 3:8). Tá ndóʼo iinna ña̱yóʼo, sáa̱nína ta kúxíkána nu̱ú Jehová.

4. ¿Ndáa ki̱ʼva koo tu̱ʼvaún tá iin na̱ hermano kéʼéna iin ña̱ va̱ása va̱ʼa xíʼún? (Efesios 4:32).

⁴ ¿Ndáa ki̱ʼva koo tu̱ʼvaún tá iin na̱ hermano kéʼéna á káʼa̱nna iin ña̱ va̱ása va̱ʼa xíʼún? Kundiku̱n consejo ña̱ va̱xi nu̱ú Efesios 4:32 (kaʼviña). Tá chíka̱ún ndee̱ ña̱ va̱ʼa koo iniún ta kunda̱a̱-iniún xíʼin ña̱ ndóʼo inkana, ña̱yóʼo chindeétáʼan xíʼún ña̱ va̱ása ki̱ʼviún ku̱a̱chi xíʼin inkana. Chikaa̱ ndee̱ ña̱ koo káʼnu-iniún xa̱ʼa̱ na̱ ke̱ʼé ña̱ va̱ása va̱ʼa xíʼún. ¿Ndáaña chindeétáʼan xíʼún ña̱ keʼún ña̱yóʼo? Ndakaʼán ña̱ nda̱saa yichi̱ káʼún xíʼin Jehová ña̱ ná koo káʼnu-inira xa̱ʼún ta miíra ndiʼi tiempo íxakáʼnu-inira xa̱ʼún (Mat. 6:12). Tá ndákanixi̱níún xa̱ʼa̱ ña̱yóʼo chindeétáʼanña xíʼún ña̱ ixakáʼnu-iniún xa̱ʼa̱ inkana.

5. ¿Ndáa texto kivi chindeétáʼan xíʼinyó tá iinna kéʼéna iin ña̱ va̱ása va̱ʼa xíʼinyó? (Proverbios 19:11; koto na̱ʼná).

⁵ (Kaʼvi Proverbios 19:11).c Biblia káʼa̱nña tá iinna ke̱ʼéna iin ña̱ va̱ása va̱ʼa xíʼinyó, ña̱ vií ndakanixi̱níyód chindeétáʼanña xíʼinyó ña̱ va̱ása sa̱a̱yó. Iin ñá hermana ñá naní Rima, ñá sa̱kán loʼo tiempo nda̱kuchi, káʼa̱nñá ndáa ki̱ʼva xa̱a̱ chíndeétáʼan texto yóʼo xíʼinñá: “Tá iin na̱ hermano kéʼéna iin ña̱ va̱ása va̱ʼa xíʼi̱n, ndi̱ku̱n ndákaʼíi̱n xa̱ʼa̱ káʼa̱n Proverbios 19:11. Kíxáʼíi̱ ndákanixi̱níi̱ xa̱ʼa̱ ña̱ ndóʼona xíʼin ña̱ xa̱a̱ yáʼana nu̱ú ta saátu ndáa xa̱ʼa̱ kúú ña̱ ke̱ʼéna á ni̱ka̱ʼa̱nna iin ña̱ va̱ása va̱ʼa xíʼi̱n. Ta chíka̱i̱ ndee̱ ña̱ inkáchi kitai̱ xíʼinna ña̱ natúʼunndi̱ xa̱ʼa̱ Ndióxi̱ ña̱ va̱ʼa kuxini̱ va̱ʼi̱ miína”. Iin ña̱ va̱ʼa kúú ña̱ ná kuxini̱ va̱ʼayó na̱ hermano ta saátu ña̱ kunda̱a̱-iniyó xíʼin ña̱ ndóʼona. Ña̱yóʼo chindeétáʼanña xíʼinyó ña̱ koo káʼnu-iniyó xa̱ʼa̱na tá ná keʼéna ña̱ va̱ása va̱ʼa xíʼinyó.

6. ¿Ndáaña chindeétáʼan xíʼinyó ña̱ viíní kutáʼanyó xíʼin na̱ hermano na̱ ñúʼu ti̱xin congregación?

⁶ ¿Ndáaña kivi keʼún ña̱ va̱ʼa vií kutáʼún xíʼin na̱ congregación? Tá kíxáʼún kítáʼún xíʼin na̱ hermano, chikaa̱ ndee̱ ña̱ kotoún ña̱ va̱ʼa ña̱ kúúmiína (chitáʼan Proverbios 10:12; Rom. 12:10; Filip. 2:2, 3). Ná kotoyó ña̱ ndo̱ʼo iin ta̱ hermano ta̱ sa̱kán nda̱kuchi ta̱ naní Mark. Tá ku̱a̱ʼáka tiempo xi̱kitáʼanra xíʼin na̱ hermano xi̱kiʼinkara kuenta xíʼin ña̱ va̱ása va̱ʼa xi̱keʼéna. ¿Ndáaña ke̱ʼéra ña̱ va̱ʼa kǒo kuxíkára nu̱ú na̱ hermano ni nu̱ú Jehová? Ta̱yóʼo káchira: “Xi̱kiʼinkai̱ kuenta xíʼin ña̱ va̱ása va̱ʼa ña̱ xi̱keʼé na̱ hermano, soo ña̱yóʼo va̱ása kítáʼanña xíʼin ña̱ kininí ña̱ kéʼé na̱ ñuyǐví. Kiʼi̱n kuenta ña̱ xi̱niñúʼu nasamai̱ ña̱ ndákanixi̱níi̱ ta kiʼinkai̱ kuenta xíʼin ña̱ va̱ʼa ña̱ kéʼé na̱ hermano”. Tá saá ná keʼún viíníva kutáʼún xíʼin na̱ hermano na̱ ñúʼu ti̱xin congregación.

TÁ NDÁKAʼÚN XA̱ʼA̱ ÑA̱ XI̱KEʼÚN TÁ YA̱CHI̱

7. ¿Nda̱chun kivi kixáʼayó ndakaʼányó xa̱ʼa̱ ña̱ xi̱keʼéyó tá ya̱chi̱?

⁷ Tá ku̱ndaa̱-iniún xa̱ʼa̱ ña̱ nda̱a̱ sana va̱ʼaní ku̱niún xa̱ʼa̱ ña̱ ki̱taún ti̱xin ñuyǐví ta̱ Ndi̱va̱ʼa. Sana ndakanixi̱níún ña̱ va̱ása ndikóví iinna keʼéna ña̱ xi̱keʼéna tá ya̱chi̱ ti̱xin ñuyǐví ta̱ Ndi̱va̱ʼa. Xa̱ʼa̱ ña̱ íyo tu̱ndóʼo nu̱úyó, sana iinna kivi kixáʼana ndakaʼánna xa̱ʼa̱ ña̱ xa̱a̱ sa̱ndákoona tá ki̱xáʼana ndásakáʼnuna Jehová (chitáʼanña xíʼin Números 11:4-6). Tá kúú, sava na̱ hermano sa̱ndákoona chiñu ña̱ ndáyáʼviní ta nda̱a̱ xi̱kaʼa̱n va̱ʼana xa̱ʼa̱na soo chiñu ña̱ xi̱kuumiína xi̱kindaaña tiempona. Ta inkana tá ki̱xáʼana sákuaʼana xa̱ʼa̱ Biblia, na̱ migona ku̱xíkána nu̱úna. Ta savana sa̱ndákoona ña̱ xi̱kutóona keʼéna ña̱ xi̱kundasí Jehová. Tá iin na̱ cristiano ná ndikóna keʼéna ña̱ xi̱keʼéna tá ya̱chi̱ sakúsuchínívana-ini Jehová. ¿Ndáaña kivi keʼún ña̱ va̱ʼa kǒo ndikóún keʼún ña̱ xi̱keʼún tá ya̱chi̱?

8. ¿Ndáaña sákuaʼayó xa̱ʼa̱ ta̱ Abrahán xíʼin ñá Sara?

⁸ Biblia káʼa̱nña xa̱ʼa̱ na̱ nda̱kúní ni̱xi̱yo ini xi̱kachíñu nu̱ú Jehová, sana na̱yóʼo xi̱ndakaʼánna xa̱ʼa̱ ña̱ xi̱keʼéna tá ya̱chi̱. Tá kúú, ta̱ Abrahán xíʼin ñá Sara, xa̱ʼa̱ ña̱ xi̱niso̱ʼona Jehová sa̱ndákoona ñuu Ur iin ñuu ña̱ ndáyáʼviní, ta ni̱xi̱yona veʼe válí (Heb. 11:8, 9). Sana xi̱ndakaʼánna ña̱ va̱ʼaní ni̱xi̱yona chí ñuu Ur. Soo tá níndakanikaxi̱nína xa̱ʼa̱ ña̱kán sana kuni̱na ndikóna ñuu kán. Nu̱úka ña̱ ndakanixi̱nína xa̱ʼa̱ ki̱ʼva ña̱ ni̱xi̱yona tá ya̱chi̱, va̱ʼaka nda̱kanixi̱nína xa̱ʼa̱ ki̱ʼva ña̱ koona chí nu̱únínu (Heb. 11:15, 16).

9. ¿Ndáa ki̱ʼva xi̱xito ta̱ apóstol Pablo ña̱ʼa ña̱ sa̱ndákoora? (Filipenses 3:7, 8, 13).

⁹ Ta̱ apóstol Pablo sa̱ndákoora ku̱a̱ʼání ña̱ʼa ña̱ va̱ʼa ki̱xáʼara káchíñura nu̱ú Jehová. Tá kúma̱níka nduura cristiano, iin ta̱ maestro ta̱ xi̱sanáʼa̱ xa̱ʼa̱ ley na̱ judío ta̱ xi̱naní Gamaliel kúú ta̱ sa̱náʼa̱ miíra (Hech. 22:3). Ta̱ Pablo kiviva xa̱a̱ra koora iin ta̱ ndáyáʼviní ta kuniʼira yi̱chi̱ nu̱ú na̱ judío (Gál. 1:13, 14). Soo tá ku̱ndaa̱-inira xa̱ʼa̱ ña̱ nda̱a̱, sa̱ndákoora ndiʼi ña̱ xi̱keʼéra tá ya̱chi̱. ¿Á kúni̱ kachiña ña̱ va̱ása níyáʼara nu̱ú tu̱ndóʼo? Va̱ásaví. Saáchi nda̱a̱ mií na̱ judío ni̱sa̱a̱-inina xi̱ninara, ka̱ninara ta chi̱kaa̱nara veʼeka̱a (2 Cor. 11:23-26). Tá níndakanixi̱níra xa̱ʼa̱ tu̱ndóʼo yóʼo, sana ndakanixi̱níra ña̱ va̱ʼaníkava ni̱xi̱yora tá xi̱kitáʼanra xíʼin na̱ judío. Soo kǒo níkeʼéra saá. Saáchi xi̱ndakanixi̱níra ña̱ xi̱kuumiíra iin chiñu ña̱ ndáyáʼviní ña̱ xi̱ndiku̱nra ta̱ Jesús xíʼin ña̱ va̱ʼa ndakiʼinra chí nu̱únínu. Ta̱ Pablo ku̱ndaa̱-inira ña̱ ndáyáʼvika bendición ña̱ nda̱kiʼinra nu̱úka ña̱ xi̱keʼéra tá ya̱chi̱ (kaʼvi Filipenses 3:7, 8, 13).

10. ¿Ndáaña xíniñúʼu ndakaniníkaxi̱níyó xa̱ʼa̱? (Marcos 10:29, 30; koto na̱ʼná).

¹⁰ ¿Ndáaña sákuaʼayó? Tá ndákanixi̱níún xa̱ʼa̱ ña̱ʼa ña̱ sa̱ndákoún tá ya̱chi̱, saátu ndakaʼán nda̱chun sa̱ndákoúnña (Ecl. 7:10). Ndakanixi̱ní xa̱ʼa̱ ndiʼi bendición ña̱ xa̱a̱ ndákiʼún xa̱ʼa̱ ña̱ ndíka̱ún ti̱xin ñuu Ndióxi̱. Tá kúú, va̱ʼaní kítáʼún xíʼin ta̱ i̱xava̱ʼa ñuyǐví (Prov. 3:32). Saátu kítáʼún xíʼin na̱ ñuura na̱ kúni̱ní xíni yóʼó (kaʼvi Marcos 10:29, 30). Ta chí nu̱únínu ndátún ndakiʼún ku̱a̱ʼání ña̱ va̱ʼa (Is. 65:21-23). Tá ndákanixi̱níún xa̱ʼa̱ ndiʼi ña̱ va̱ʼa ña̱ ndákiʼún xa̱ʼa̱ ña̱ ndásakáʼnu Jehová, ña̱yóʼo chindeétáʼanña xíʼún ña̱ kǒo ndakaʼún xa̱ʼa̱ ña̱ sa̱ndákoún tá ya̱chi̱.

11. ¿Ndáaña kivi sakúaʼún xíʼin ña̱ ndo̱ʼo ñá Rosemary?

¹¹ Ná kotoyó ña̱ ndo̱ʼo ñá Rosemary, ñáyóʼo nda̱kuchiñá tá kúúmiíñá yáʼaka 50 ku̱i̱ya̱. Ñáyóʼo káchiñá: “Tá ya̱chi̱ xi̱kuni̱níi̱ keʼíi̱ vikó ña̱ Navidad. Saáchi saá kúú ña̱ xi̱ndakutáʼi̱n xíʼin na̱ veʼi̱ ta xi̱taxindi̱ regalo ndaʼa̱ táʼanndi̱. Xi̱kusi̱íní-inii̱ tá xi̱xitoi̱ na̱ va̱lí ña̱ xi̱xunána regalona”. ¿Ndáaña chi̱ndeétáʼan xíʼinñá ña̱ kǒo ndakaʼánkañá xa̱ʼa̱ ña̱yóʼo? Ñá Rosemary káchiñá: “Nda̱kanixi̱níi̱ ndáa ki̱ʼva taxii̱ regalo ndaʼa̱na ta va̱ása keʼíi̱ vikó ña̱ Navidad. Ndiʼi ku̱i̱ya̱ xa̱a̱ síín síín ki̱vi̱ ndákutáʼi̱n xíʼin na̱ veʼi̱ ta táxii̱ regalo ndaʼa̱na ta saátu káʼi̱n xíʼinna ña̱ kúni̱níi̱ xínina”. Soo íyo inkaka ña̱ i̱xayo̱ʼvi̱ xíʼinñá. Ñáyóʼo káchiñá: “Tá sa̱kúaʼi̱ xa̱ʼa̱ ña̱ nda̱a̱, na̱ xi̱kuu migoi̱ va̱ása níxiinkana kitáʼanna xíʼi̱n. Sava yichi̱ xi̱ndakaʼíi̱n xa̱ʼa̱na ta̱ xi̱kuni mitúʼi̱n”.e ¿Ndáaña ke̱ʼéñá? Ki̱xáʼañá kítáʼanñá xíʼin ku̱a̱ʼá ná hermana ña̱ va̱ʼa natúʼunná xa̱ʼa̱ Ndióxi̱. Káchikañá: “Kíxáʼa íyo ku̱a̱ʼá na̱ migoi̱ na̱ kúʼvi̱ní-inii̱ xínii̱ ta ndáyáʼvinína nu̱úi̱”. ¿Ndáa ki̱ʼva chindeétáʼan ña̱ ndo̱ʼo ñá Rosemary xíʼún? Tá ndákaʼún xa̱ʼa̱ ña̱ xi̱keʼún tá ya̱chi̱ tá kúma̱níka sakúaʼún xa̱ʼa̱ ña̱ nda̱a̱, ¿á kivi keʼún inka ña̱ʼa ña̱ sákusi̱í-iniún ña̱ kútóo Jehová? (Filip. 4:8, 9). Ndakaʼán chi ku̱a̱ʼáka ña̱ va̱ʼa ndakiʼún xa̱ʼa̱ ña̱ kándíxaún Jehová, nu̱úka ña̱ sa̱ndákoún.

TÁ INKANA KÚXIKANA NU̱Ú JEHOVÁ

12. ¿Ndáaña kivi ixayo̱ʼvi̱ xíʼinyó?

¹² Tá ni̱xa̱ún ndu̱ún testigo Jehová sana ni̱kusi̱íní-iniún chi kǒo kéʼékaún ña̱ kini ña̱ kéʼé na̱ ñuyǐví yóʼo ta ki̱xáʼún kítáʼún xíʼin na̱ ñuu Ndióxi̱ (Is. 65:14). Soo sana sava yichi̱, kunda̱a̱-iniún ña̱ sava na̱ hermano ni̱ki̱ʼvina ku̱a̱chi ndeé ta ta̱vánana ti̱xin congregación (1 Cor. 5:13). Ná kotoyó ña̱ ni̱ka̱ʼa̱n iin ñá hermana ñá naní Samar: “Sa̱kán loʼo tiempo kúú ña̱ nda̱kuchii̱ tá ku̱ndaa̱-inii̱ ña̱ iin ta̱ hermano ni̱ki̱ʼvira iin ku̱a̱chi ndeé ta ta̱vánara ti̱xin congregación. Iin prueba ni̱xi̱yo ña̱yóʼo nu̱úi̱ saáchi kǒo níndakanixi̱níi̱ ña̱ iin ta̱ anciano ki̱ʼvira ku̱a̱chi ndeé nu̱ú Jehová”. Ndiʼi tiempo xíniñúʼu kandíxayó ña̱ kúni̱níva na̱ hermano xínina Jehová ta kúni̱na nda̱kú koo inina xíʼinra (1 Cor. 13:4, 7). Soo saátu xíniñúʼu ndakaʼányó ña̱ ndiʼi ku̱i̱ya̱, ku̱a̱ʼánína kéena ti̱xin ñuu Ndióxi̱. Íxayo̱ʼvi̱ní ña̱yóʼo xíʼinyó tá na̱ ki̱ta ti̱xin congregación kúúna iin na̱ veʼeyó, iin na̱ migoyó á iin na̱ hermano na̱ íxato̱ʼóníyó.

13. Tá iin na̱ kúni̱níyó xíniyó sa̱ndákoona Jehová, ¿ndáaña kivi keʼéyó ña̱ va̱ʼa kǒo kuxíkáyó nu̱úra?

¹³ Tá iin na̱ kúni̱níún xíniún sa̱ndákoona Jehová, ¿ndáaña kivi keʼún ña̱ va̱ʼa kǒo kuxíkáún nu̱úra? Chikaa̱ ndee̱ ña̱ viíníka kutáʼún xíʼin Jehová (Sant. 4:8). Va̱ása kundaa-iniún ña̱ kéʼé inkana ña̱ va̱ʼa nda̱kú koo iniún xíʼin Jehová. Ndiʼivayó inkáchi káʼviyó Biblia, kéʼéyó oración xíʼin na̱ veʼeyó ta saátu xíʼin na̱ congregación soo iin tá iinyó xíniñúʼu keʼéyó oración ta saátu kaʼviyó Biblia (Sal. 1:2; 62:8).

14. ¿Ndáaña sákuaʼayó xíʼin ña̱ ke̱ʼé ta̱ apóstol Pedro? (Juan 6:66-68).

¹⁴ Saátu ejemplo ta̱ apóstol Pedro va̱ʼaní chindeétáʼanña xíʼinyó. Iin yichi̱ na̱ xi̱ndiku̱n ta̱ Jesús, sa̱ndákoonara saáchi kǒo níkunda̱a̱-inina xíʼin ña̱ ni̱ka̱ʼa̱nra. Sana saátu ta̱ Pedro kǒo níkunda̱a̱-inira xíʼin ña̱ ni̱ka̱ʼa̱n ta̱ Jesús, soo ná kotoyó ndáaña nda̱kuiinra (kaʼvi Juan 6:66-68). Ni savana sa̱ndákoona ta̱ Jesús soo ta̱ Pedro kǒo níkeʼéra ña̱yóʼo saáchi xi̱kunda̱a̱-inira ña̱ nda̱a̱ kúú ña̱ xi̱sanáʼa̱ ta̱ Jesús. Saátu miíyó ni inkana sándakoona Jehová soo miíyó kǒo keʼéyó ña̱yóʼo saáchi kúnda̱a̱-iniyó ña̱ nda̱a̱ kúú ña̱ sákuaʼayó. Ndáyáʼviní ña̱ nda̱a̱ nu̱úyó ta xa̱ʼa̱ ña̱kán nda̱kú íyo iniyó xíʼin Jehová. Ñá Samar ñá ni̱ka̱ʼa̱nyó xa̱ʼa̱ nu̱ú párrafo 12 káchiñá: “Tá iinna kéʼéna ña̱ va̱ása va̱ʼa, kǒo kúni̱ kachiña ña̱ ndiʼi na̱ congregación kéʼé ña̱ va̱ása va̱ʼa á ña̱ va̱ása va̱ʼa íyo ña̱ sánáʼa̱ na̱ ñuu Ndióxi̱. Ta saátu kǒo kúni̱ kachiña ña̱ va̱ása va̱ʼa íyo ña̱ kéʼé Jehová”.

15. ¿Ndáaña sákuaʼún xíʼin ña̱ ndo̱ʼo ñá Emily?

¹⁵ Ná kotoyó ña̱ ndo̱ʼo ñá Emily. Tá ni̱ya̱ʼa iin semana ña̱ nda̱kuchiñá, siʼíñá sa̱ndákooñá miína ta ki̱tañá ti̱xin ñuu Jehová. Ñáyóʼo káchiñá: “Ni loʼo kǒo níndakanixi̱níi̱ ña̱ keʼé siʼíi̱ ña̱yóʼo. Xa̱ʼa̱ ña̱ ndo̱ʼi̱ ña̱yóʼo, ni̱xo̱ʼvi̱níi̱. Ndákaʼánníi̱ xa̱ʼa̱ñá”. ¿Ndáaña chi̱ndeétáʼan xíʼin ñá Emily? Ñáyóʼo káchiñá: “Va̱ása íyo mitúʼi̱n. Va̱ʼaní chíndeétáʼan yivái̱ xíʼi̱n ta saátu na̱ hermano na̱ ñúʼu ti̱xin congregación, na̱yóʼo nda̱a̱ táki̱ʼva íyo na̱ veʼi̱ saá íyona. Ndiʼivayó íyo ña̱ sáxo̱ʼvi̱ miíyó, ña̱kán ndáyáʼviní vií kutáʼanyó ta saátu ña̱ chikaa̱yó ndee̱ xíʼin táʼanyó” (1 Ped. 5:9). Kǒo kundatún nda̱a̱ ná ya̱ʼavíún nu̱ú tu̱ndóʼo saáví kúú ña̱ vií kutáʼún xíʼin na̱ congregación. Chikaa̱ ndee̱ ña̱ kuxini̱va̱ʼún na̱ hermano. Tasaá ni nda̱a̱ ndáaka ña̱ ná kuu, va̱ása kuni mitúʼún.

16. ¿Ndáaña xíniñúʼu ndakaʼányó xa̱ʼa̱? (Koto na̱ʼná).

¹⁶ Ndakaʼán chi Jehová táxira consejo ndaʼa̱ na̱ kúʼvi̱-ini xíni miíra (Heb. 12:6). Kúni̱ra ña̱ ndiʼi na̱ ki̱ta ti̱xin ñuura ná ndikóna nu̱úra (2 Ped. 3:9). Ña̱kán tá iin na̱ veʼún á iin na̱ migoún ki̱tana ti̱xin congregación, kivi kandíxaún ña̱ chindeétáʼanva na̱ anciano xíʼinna ña̱ ndikó tukuna nu̱ú Jehová (2 Tim. 2:24, 25).

17. ¿Ndáaña kivi kandíxayó?

¹⁷ Ni̱ka̱ʼa̱nyó xa̱ʼa̱ sava tu̱ndóʼo ña̱ kivi ya̱ʼún nu̱ú tá sa̱kán nda̱kuchiún. Savaña yo̱ʼvi̱va kooña soo kǒo kundi̱ʼi-iniún íyo ku̱a̱ʼáníva ña̱ kivi keʼún ña̱ va̱ʼa koo tu̱ʼvaún tá ná ya̱ʼún nu̱ú ña̱yóʼo. Ndakaʼán chi íyova Jehová xíʼún ta chindeétáʼanvara xíʼún. Ta̱yóʼo xa̱a̱ chi̱ndeétáʼanvara xíʼún tá ya̱chi̱ ta keʼékavara ña̱yóʼo xíʼún chí nu̱únínu (1 Ped. 5:10). Ndiʼi tiempo taxira ndee̱ ndaʼún ña̱ va̱ʼa kundeé-iniún ya̱ʼún nu̱ú tu̱ndóʼo. Taxi ná chindeétáʼan Jehová xíʼún tasaá kǒo ni iin ña̱ʼa sakúxíka yóʼó nu̱úra (Sal. 119:165; Rom. 8:38, 39).