Chikaa̱ndó ndee̱ ña̱ va̱ʼa xa̱a̱ndó ndakuchindó

1. a) ¿Ndáaña kúú sava bendición ndákiʼinyó tá xa̱a̱ ndákuchiyó? b) ¿Ndáaña ka̱ʼa̱nyó xa̱ʼa̱ nu̱ú artículo yóʼo?

¿Á XA̱A̱ nda̱taxiún miíún ndaʼa̱ Jehová ta xa̱a̱ nda̱kuchiún? Va̱ʼaníva ña̱ ke̱ʼún. Tá ke̱ʼún ña̱yóʼo ni̱ka̱ʼún xíʼin Ndióxi̱ ña̱ ná táxira ña̱ vií koo ña̱ xínitúni̱ún (1 Ped. 3:21). Ta saátu chínúu yi̱chi̱ va̱ʼa nu̱ú na̱ kúma̱ní ndakuchi, soo ni tá kúma̱níka ndakuchiún kúni̱nívaún xíniún Jehová ta kúni̱ún keʼún ña̱ kúni̱ra. Kúnda̱a̱-iniún ña̱ va̱ʼa koo káʼnu-ini Ndióxi̱ xa̱ʼa̱ ku̱a̱chiún ta kusi̱í-inira xíʼin ña̱ kéʼún xíniñúʼu ndakuchiún (Hech. 2:38-40). Sana íyo iin ña̱ sási nu̱ú keʼún ña̱yóʼo. Artículo yóʼo va̱ʼaní chindeétáʼanña xíʼún. Yóʼo kotoyó 1) nda̱chun kúú ña̱ va̱ása xi̱ín savana ndakuchina, 2) nda̱chun ndáyáʼviní ndakaʼányó ña̱ xa̱a̱ ku̱nu̱mí ndiʼi-xa̱ʼa̱ ñuyǐví yóʼo ta 3) ndáaña va̱ʼa ndakiʼinyó tá kama ndákuchiyó.

NDA̱CHUN VA̱ÁSA XI̱ÍN SAVANA NDAKUCHINA

2. ¿Nda̱chun va̱ása xíín savana ndakuchina?

² Savana kúni̱na keʼéna chiñu nu̱ú Jehová soo va̱ása ndákuchina chi yíʼvina. Tá kúú, túvina ña̱ va̱ása kuchiñuna sákusi̱ína-ini Ndióxi̱. Tá saá ndóʼún, kivi kaʼviún sava texto ña̱ va̱xi nu̱ú Biblia ña̱ chindeétáʼan xíʼún ña̱ kunda̱a̱-iniún ña̱ va̱ása ndátu̱vi Ndióxi̱ ña̱ viíní keʼún ndiʼi chiñu, ta ta̱kán kusi̱íva-inira tá xíʼin ndinuʼu-iniún kéʼún chiñu nu̱úra (Sal. 103:13, 14; Col. 3:23). Soo tá yíʼviún ña̱ ixandi̱va̱ʼa inkana xíʼún, ka̱ʼa̱n xíʼin Jehová ña̱ ná chindeétáʼanra xíʼún ña̱ kundaa-iniúnra nda̱a̱ táki̱ʼva ke̱ʼé ta̱ salmista tá ka̱chira: “Jehová kúú ta̱ chindeétáʼan xíʼi̱n. Va̱ása yi̱ʼvíi̱. ¿Ndáaña kivi keʼé na̱ yiví xíʼi̱n?” (Sal. 118:6).

3. ¿Nda̱chun savana táxina ña̱ yáʼa ku̱a̱ʼá tiempo ña̱ va̱ʼa ndakuchina? (Koto na̱ʼná ña̱ va̱xi chí nu̱ú kíxáʼa tutu yóʼo).

³ Savana táxina yáʼa ku̱a̱ʼání tiempo ña̱ va̱ʼa ndakuchina, saáchi ndákanixi̱nína ña̱ loʼoníva xíni̱na xa̱ʼa̱ ña̱ sánáʼa̱ Biblia. Soo, ¿á xíniñúʼu kuxini̱yó xa̱ʼa̱ ku̱a̱ʼání ña̱ʼa? Ná ndakanixi̱níyó xa̱ʼa̱ relato yóʼo. Tá xi̱ndikaa̱ ta̱ Pablo xíʼin ta̱ Silas veʼeka̱a, ndeéní ni̱ta̱an ña̱ va̱ʼa kitana. Na̱yóʼo na̱túʼunna xa̱ʼa̱ Ndióxi̱ xíʼin ta̱ xi̱ndaa veʼeka̱a ta saátu xíʼin na̱ veʼera. Ta̱ ta̱a kán xíʼin na̱ veʼera sana ki̱ʼinna kuenta ña̱ mií Ndióxi̱ kúú ta̱ ke̱ʼé milagro ña̱ va̱ʼa kitana. Ñuú saá ku̱a̱ʼání ña̱ ndáyáʼvi ku̱ndaa̱-inina xa̱ʼa̱ Jehová xíʼin xa̱ʼa̱ ta̱ Jesús. ¿Ndáaña ke̱ʼéna? Ndi̱ku̱n nda̱kuchina (Hech. 16:25-33). Tá miíún xíni̱ún xa̱ʼa̱ Jehová, kúʼvi̱-iniún xíniúnra, kúnda̱a̱-iniún xa̱ʼa̱ ña̱ sánáʼa̱ Biblia, xa̱a̱ ndi̱kó-iniún xa̱ʼa̱ ku̱a̱chiún ta chi̱kaa̱-iniún ña̱ kandíxaún ña̱ káʼa̱nra, xa̱a̱ íyo tu̱ʼvavaún ña̱ ndakuchiún (Mar. 12:30).

4. ¿Ndáa inka ña̱ sási nu̱ú savana ña̱ va̱ʼa xa̱a̱na ndakuchina? (Koto na̱ʼná).

⁴ Savana kúni̱na keʼéna ña̱ kúni̱ Ndióxi̱, soo va̱ása xíínna ndakuchina saáchi ndákanixi̱nína ña̱ ku̱a̱ʼání ña̱ʼa xíniñúʼu nasamana ña̱ va̱ʼa keʼéna ña̱yóʼo. Iin ña̱ va̱ʼava kúú ña̱ ndakanixi̱níyó xa̱ʼa̱ ña̱ kúni̱yó keʼéyó (Luc. 14:27-30). Soo savana ndeéní ndíʼi̱-inina xa̱ʼa̱ ña̱ nasamana ña̱ kéʼéna ña̱ va̱ʼa ndasakáʼnuna Jehová. Ña̱yóʼo kúú ña̱ ndo̱ʼo ñá Candace tá ni̱xi̱yo loʼoñá na̱ yiváñá xa̱a̱ testigo Jehová kúúna. Soo ñáyóʼo va̱ása níxi̱kuni̱ñá sákuaʼañá xa̱ʼa̱ ña̱ nda̱a̱, ta tá xa̱a̱ ku̱chéeñá saáví ki̱xáʼañá káʼviñá xa̱ʼa̱ Biblia. Ñáyóʼo káchiñá: “Xi̱kunda̱a̱-inii̱ ndáaña xíniñúʼu keʼíi̱ ña̱ va̱ʼa sakúsi̱íi̱-ini Jehová soo saátu xi̱kutói̱ ndiʼi ña̱ xi̱keʼíi̱. Xi̱kunda̱a̱-inii̱ ña̱ ixayo̱ʼvi̱níña xíʼi̱n ña̱ sandákoi̱ ña̱ kéʼíi̱”. Savana ndákanixi̱nína ña̱ kǒo kuchiñuna keʼéna ña̱ kúni̱ Jehová, yíʼvina ña̱ tá ná ndakuchina ki̱ʼvina ku̱a̱chi ndeé ta tavánana ti̱xin ña̱ congregación. Tá saá ndóʼún, ¿ndáaña kivi keʼún?

5. Tá xa̱a̱ kúni̱yó ndakuchiyó, ¿ndáaña xíniñúʼu kiʼinyó kuenta xíʼin? (Mateo 13:44-46).

⁵ Tá sátáyó iin ña̱ʼa, va̱ása kíʼin kuitíyó kuenta xíʼin ya̱ʼviña, chi saátu kíʼinyó kuenta á ndáyáʼviña nu̱úyó. Tá ndáyáʼviña nu̱úyó ndi̱ku̱n sátávayóña. Ki̱ʼva saá íyo ña̱ ndákuchiyó va̱ása xíniñúʼu ndakani kuití xi̱níyó xa̱ʼa̱ ña̱ sandákooyó, chi xíniñúʼu ndakanixi̱níyó xa̱ʼa̱ ña̱ ndáyáʼviní ndakiʼinyó, ña̱ vií xa̱a̱yó kutáʼanyó xíʼin Jehová. Ta̱ Jesús xi̱niñúʼura u̱vi̱ ejemplo ña̱ va̱ʼa ka̱ʼa̱nra xa̱ʼa̱ ña̱yóʼo (kaʼvi Mateo 13:44-46). Nu̱ú u̱vi̱ saá ña̱yóʼo ni̱ka̱ʼa̱nra xa̱ʼa̱ iin ta̱a ta̱ nda̱ni̱ʼí iin ña̱ʼa ña̱ ndáyáʼviní, ni̱xi̱kóra ndiʼi ña̱ xi̱kuumiíra ña̱ va̱ʼa satára ña̱yóʼo. Saátu miíún nda̱ni̱ʼún iin ña̱ ndáyáʼviní, ña̱ nda̱a̱ ña̱ káʼa̱n xa̱ʼa̱ Reino Ndióxi̱. Tá ndákanixi̱níún á ndáyáʼviní nasamaún ña̱ kéʼún ña̱ va̱ʼa xa̱ún ndakuchiún, ndakanixi̱ní xa̱ʼa̱ u̱vi̱ saá ejemplo ña̱ ni̱ka̱ʼa̱n ta̱ Jesús xa̱ʼa̱ ta nda̱ka̱tu̱ʼún ña̱yóʼo miíún: “¿Á kándíxai̱ ña̱ nda̱ni̱ʼíi̱ iin ña̱ ndáyáʼviní? ¿Á ndáyáʼviní ña̱ vií kítáʼi̱n xíʼin Jehová nu̱úi̱, ña̱ ndátui̱ koi̱ ndiʼi tiempo chí nu̱únínu ta saátu ña̱ kítáʼi̱n xíʼin na̱ ñuura?”. Ña̱ ndakuiún ña̱yóʼo chindeétáʼanña xíʼún ña̱ kunda̱a̱-iniún ndáaña xíniñúʼu keʼún ña̱ va̱ʼa ndakuchiún.

6. ¿Ndáaña chindeétáʼan xíʼinyó keʼéyó ña̱ sákuaʼayó?

⁶ Nu̱ú parábola ña̱ ni̱ka̱ʼa̱n ta̱ Jesús xa̱ʼa̱ ta̱a ta̱ chíʼi, ni̱ka̱ʼa̱nra xa̱ʼa̱ ña̱ xa̱a̱ síín síín ki̱ʼva keʼé na̱ yiví tá ná kunda̱a̱-inina xa̱ʼa̱ Reino Ndióxi̱. Sava na̱ yiví xa̱a̱ síín síín íyo níma̱na xa̱ʼa̱ ña̱kán va̱ása táxiña ña̱ kuaʼnuna xíʼin tu̱ʼun Ndióxi̱, ta savana xíʼin ndinuʼu-inina kándíxana ña̱ káʼa̱n xa̱ʼa̱ Reino Ndióxi̱ ta xa̱a̱ ndi̱ku̱n kéʼéna ña̱ sákuaʼana (Luc. 8:5-15). Soo tá xíka-iniún xa̱ʼa̱ ña̱ sákuaʼún, va̱ása ndakava-iniún Ndióxi̱ chindeétáʼanvara xíʼún ña̱ nasamaún ña̱ ndíkaa̱ níma̱ún ta keʼún ña̱ kúni̱ra. Ka̱ʼa̱n xíʼinra ña̱ ná chindeétáʼanra xíʼún ña̱ vitá koo níma̱ún ta saá xa̱ún kunda̱a̱ va̱ʼa-iniún xíʼin ña̱ sákuaʼún (Ezeq. 18:31; 36:26).

7, 8. ¿Nda̱chun va̱ása xíín sava na̱ va̱lí kúa̱an ndakuchina? (Koto na̱ʼná).

⁷ Sava na̱ va̱lí kúa̱an kǒo xíínna ndakuchina xa̱ʼa̱ ña̱ káʼa̱n inkana xíʼinna. Sava na̱ sánáʼa̱ miína ti̱xin escuela káʼa̱nna xíʼinna ña̱ ná keʼéna ña̱ kúni̱ miívana, ni kǒo kítáʼan ña̱yóʼo xíʼin ña̱ káʼa̱n Ndióxi̱. Tá ná kundiku̱nna consejo yóʼo kivi kixi tu̱ndóʼo nu̱úna (Sal. 1:1, 2; Prov. 7:1-5). Ndóʼo na̱ va̱lí kúa̱an, ¿ndáaña kivi keʼéndó ña̱ va̱ʼa kǒo kundoʼondó ña̱yóʼo? Kundiku̱nndó yi̱chi̱ ta̱ salmista ta̱ ni̱ka̱ʼa̱n ña̱yóʼo xíʼin Jehová: “Kúnda̱a̱ka-inii̱ nu̱úka ndiʼi na̱ sánáʼa̱ yi̱ʼi̱ saáchi ndákanixi̱níi̱ xa̱ʼa̱ ley ña̱ táxiún” (Sal. 119:99).

⁸ Sava na̱ Testigo sásina nu̱ú se̱ʼena ña̱ va̱ʼa xa̱a̱na ndakuchina. Saáchi kúni̱na ña̱ ná káʼvi va̱ʼa se̱ʼena ta kuumiína iin chiñu ña̱ ndáyáʼviní chí nu̱únínu, á va̱ása chíkaa̱na ndee̱ xíʼinna ña̱ ku̱a̱ʼáka chiñu keʼéna nu̱ú Ndióxi̱. Na̱ va̱lí, ¿á túvindó ña̱ xíniñúʼundó ña̱ chindeétáʼan na̱ yivándó xíʼinndó ña̱ kuaʼnukandó xíʼin tu̱ʼun Ndióxi̱? Ka̱ʼa̱nndó xíʼinna xa̱ʼa̱ ña̱yóʼo. Ndákaʼánndó chi ni válíndó á chéendó kiviva xa̱a̱ndó koondó migo Jehová (Prov. 20:11).

9. ¿Nda̱chun va̱ása kama ndákuchi savana?

⁹ Savana xa̱a̱ saxínuvana ña̱ kúni̱ Ndióxi̱ ña̱ va̱ʼa ndakuchina soo kǒo kéʼéna ña̱yóʼo xa̱ʼa̱ ña̱ kéʼé inkana xíʼinna. Tá kúú, sana iin na̱ migona á iin na̱ veʼena káʼa̱nna xíʼinna ña̱ ná kundatuna miína ña̱ va̱ʼa inkáchi ndakuchina. Iin ña̱ va̱ʼava kúú ña̱ inkáchi ndakuchiyó xíʼin na̱ veʼeyó á xíʼin iin na̱ migoyó. Soo ¿á ña̱yóʼo kúú ña̱ xíniñúʼu keʼéyó ña̱ va̱ʼa kǒo ndakuchi kamayó? Ná ndakaʼányó chi ña̱ ndataxiyó miíyó ndaʼa̱ Jehová iin tá iinvayó keʼé ña̱yóʼo. Ña̱ va̱ʼa ndakuchiyó va̱ása xíniñúʼu kundatuyó inkana (Rom. 14:12).

NDÁYÁʼVINÍ NDAKAʼÁNYÓ ÑA̱ XA̱A̱ KU̱NU̱MÍ NDIʼI-XA̱ʼA̱ ÑUYǏVÍ YÓʼO

10. ¿Nda̱chun savana va̱ása násamana ña̱ kéʼéna ña̱ va̱ʼa xa̱a̱na ndakuchina?

¹⁰ Xa̱a̱ ni̱ka̱ʼa̱nyó nda̱chun kúú ña̱ kǒo xíín savana ndakuchina, soo inkana va̱ása xíínna ndakuchina saáchi ndákanixi̱nína ña̱ kúma̱ní ku̱a̱ʼá tiempo ndiʼi-xa̱ʼa̱ ñuyǐví yóʼo, ta túvina ña̱ íyokava tiempo nu̱úna ña̱ nasamana ña̱ kéʼéna. ¿Á ña̱ va̱ʼa kúú ña̱ ndakanixi̱níyó saá? Ta̱ Jesús ni̱ka̱ʼa̱nra ña̱yóʼo xíʼin na̱ discípulora: “Ndiʼi tiempo koo tu̱ʼvandó, saáchi ta̱ kúú se̱ʼe ta̱a kixira iin hora ña̱ va̱ása ndátundó” (Luc. 12:40).

11. Nda̱a̱ táki̱ʼva káʼa̱n Salmo 119:60, ¿ndáa ki̱ʼva kúniyó xíʼin ña̱ káʼa̱n Jehová xíʼinyó tá kúnda̱a̱ va̱ʼa-iniyó xa̱ʼa̱ña?

¹¹ Ña̱ kúʼvi̱-iniyó xíniyó Jehová xíʼin xa̱ʼa̱ ña̱ káʼa̱nra xíʼinyó chíndeétáʼanra xíʼinyó ña̱ ndataxiyó miíyó ndaʼa̱ra ta ndakuchiyó. Tá xáa̱yó kúnda̱a̱ va̱ʼa-iniyó xa̱ʼa̱ Jehová, kíʼinyó kuenta ña̱ kúni̱níra xínira miíyó ta ña̱ káʼa̱nra xíʼinyó ña̱ va̱ʼa miíyó kúúña. Ña̱kán ndi̱ku̱n kúni̱yó kuniso̱ʼoyó ña̱ káʼa̱nra xíʼinyó (kaʼvi Salmo 119:60).a Ta̱ discípulo Santiago ni̱ka̱ʼa̱nra nda̱chun ndáyáʼviní kundiku̱nyó ña̱ káʼa̱n Jehová, saáchi va̱ása xíni̱yó á kutakuyó inka ki̱vi̱ ña̱ keʼéyó ña̱ va̱ʼa. Ña̱kán ndi̱ku̱n vitin xíniñúʼu keʼéyó ña̱ kúni̱ Jehová (Sant. 4:13-17).

12. ¿Ndáaña sákuaʼayó xíʼin parábola ña̱ ni̱ka̱ʼa̱n ta̱ Jesús?

¹² Savana kivi ndakanixi̱nína ña̱yóʼo: “Nu̱ú parábola ña̱ ni̱ka̱ʼa̱n ta̱ Jesús, savana iin horava ka̱chíñuna ta inkáchi cha̱ʼvinana xíʼin na̱ ka̱chíñu iníí ki̱vi̱, ¿á su̱ví saá?”. Saá íyovaña, soo ¿nda̱chun va̱ása inkáchi níkixáʼana kachíñuna? Na̱kán ni̱ka̱ʼa̱nna: “Saáchi nda̱a̱ ni iinna ta̱ʼán taxi chiñu ndaʼa̱ndi̱”. Va̱ása kúni̱ kachiña ña̱ xúxán ni̱xi̱yona. Kiviva kachíñuna iníí ki̱vi̱ soo kǒo nda̱a̱ ni iinna ní táxi chiñu ndaʼa̱na. Tá ni̱ka̱ʼa̱nna xíʼinna ña̱ ku̱ʼu̱nna kachíñuna, ndi̱ku̱n ni̱xa̱ʼa̱nvana (Mat. 20:1-16). Tiempo vitin ta̱ Jesús ka̱nara miíyó ña̱ ná kundiku̱nyó miíra saátu ña̱ natúʼunyó xíʼin na̱ yiví xa̱ʼa̱ Ndióxi̱. Tá kúnda̱a̱-iniyó xa̱ʼa̱ ña̱yóʼo ndi̱ku̱n xíniñúʼu keʼéyóña.

13. ¿Ndáaña sákuaʼayó xíʼin ña̱ ke̱ʼé ñá síʼi ta̱ Lot?

¹³ Savana ndákanixi̱nína ña̱ va̱ʼa kachíñuna nu̱ú Ndióxi̱ kivi keʼénaña tá xa̱a̱ ku̱yatin ndiʼi-xa̱ʼa̱ ñuyǐví, soo tá ku̱a̱ʼáka tiempo ndátuna ixayo̱ʼvi̱kaña xíʼinna sandákoona ña̱ kéʼéna ña̱ va̱ʼa kachíñuna nu̱ú Ndióxi̱. Ta̱ Jesús xi̱kunda̱a̱-inira xa̱ʼa̱ ña̱yóʼo ña̱kán ni̱ka̱ʼa̱nra xíʼin na̱ discípulora: “Ndakaʼánndó xa̱ʼa̱ ñá síʼi ta̱ Lot” (Luc. 17:31-35). Ñáyóʼo xi̱kunda̱a̱-iniñá ña̱ xa̱a̱ ku̱nu̱mí ndiʼi-xa̱ʼa̱ Sodoma xíʼin Gomorra, soo ña̱ xi̱ndi̱ʼi̱ka-ini ñáyóʼo xa̱ʼa̱ kúú ña̱ʼa ña̱ sa̱ndákooñá (Gén. 19:23-26). Relato yóʼo sándakaʼánña miíyó ña̱ si̱lóʼo kuití tiempo táxi Jehová ndaʼa̱ na̱ yiví ña̱ nasamana ña̱ kéʼéna. Tá ná kixaa̱ ki̱vi̱ ña̱ sandíʼi-xa̱ʼa̱ Jehová na̱ yiví na̱ kéʼé ña̱ kini nu̱ú ñuʼú yóʼo va̱ása taxikara ña̱ nasamana ña̱ kéʼéna (Luc. 13:24, 25).

14. Xa̱ʼa̱ ña̱ xa̱a̱ xítoún ña̱ xa̱a̱ xínu profecía ña̱ káʼa̱n xa̱ʼa̱ ña̱ ndiʼi-xa̱ʼa̱ ñuyǐví kini yóʼo, ¿ndáa ki̱ʼva chíndeétáʼanña xíʼún?

¹⁴ Ndiʼi ña̱ kúú ñuyǐví yóʼo náʼa̱ña ña̱ xa̱a̱ xínu profecía ña̱ káʼa̱n xa̱ʼa̱ ña̱ ndiʼi-xa̱ʼa̱ ñuyǐví kini yóʼo. Ña̱ ni̱ka̱ʼa̱n Biblia xa̱ʼa̱ kuu sana va̱ása kúúña ñuu nu̱ú íyoún. Xa̱ʼa̱ ña̱ xítoún ña̱ kúú ña̱yóʼo inka ñuu kivi chika̱ún ndee̱ ña̱ nasamaún ña̱ kéʼún ña̱ va̱ʼa kama xa̱ún ndakuchiún. Ná ndakanixi̱níyó xa̱ʼa̱ ña̱ ni̱ka̱ʼa̱n ta̱ apóstol Pedro xíʼin sava na̱ cristiano na̱ ni̱xi̱yo tá siglo nu̱ú, ña̱ ná koo tu̱ʼvana. ¿Nda̱chun ta̱xira consejo yóʼo ndaʼa̱na? Suvi miíra ni̱ka̱ʼa̱n ña̱yóʼo: “Xa̱a̱ ku̱yatin ndiʼi-xa̱ʼa̱ ndiʼi ña̱ʼa” (1 Ped. 4:7). Ña̱ ni̱ka̱ʼa̱nra xa̱ʼa̱ kúú ña̱ ndiʼi-xa̱ʼa̱ ñuu na̱ judío. Soo na̱ cristiano xíkáva ni̱xi̱yona nu̱ú xi̱ndika̱a̱ ñuu Jerusalén. Ña̱kán kǒoví ña̱ kundoʼona tá ná ndiʼi-xa̱ʼa̱ ñuu kán (1 Ped. 1:1). Tá xi̱xitona ña̱ xi̱xinu profecía xi̱chindeétáʼanña xíʼinna ña̱ kandíxana ña̱ saxínuva Jehová ndiʼi ña̱ ni̱ka̱ʼa̱nra keʼéra. Saátu miíún xítoún ndáa ki̱ʼva xa̱a̱ xínu profecía ña̱ káʼa̱n xa̱ʼa̱ ña̱ xa̱a̱ ku̱nu̱mí ndiʼi-xa̱ʼa̱ ñuyǐví kini yóʼo. Ña̱yóʼo chíndeétáʼanña xíʼún ña̱ koo tu̱ʼvaún ta chika̱ún ndee̱ ña̱ va̱ʼa xa̱ún ndakuchiún.

15. ¿Ndáa ki̱ʼva xíniñúʼu keʼéyó ña̱ va̱ʼa kundatuyó kixaa̱ ki̱vi̱ Jehová? (2 Pedro 3:10-13).

¹⁵ Nu̱ú carta ña̱ u̱vi̱ ña̱ ka̱ʼyí ta̱ Pedro, ni̱ka̱ʼa̱nra ndáa ki̱ʼva xíniñúʼu keʼéyó ña̱ va̱ʼa kundatuyó tá ná kixaa̱ “ki̱vi̱ Jehová”, á ña̱ ndiʼi-xa̱ʼa̱ ñuyǐví kini yóʼo. Tá siglo nu̱ú ku̱a̱ʼáníva tiempo xi ixamaní ña̱ va̱ʼa kixaa̱ ki̱vi̱ yóʼo. Soo nisaá ta̱ Pedro ni̱ka̱ʼa̱nra xíʼin na̱ cristiano kán ña̱ ná koo tu̱ʼvana tá ná kixaa̱ ki̱vi̱ yóʼo (kaʼvi 2 Pedro 3:10-13; nota). Saátu miíyó kúnda̱a̱-iniyó ña̱ xa̱a̱ ku̱nu̱mí kixaa̱ ki̱vi̱ yóʼo ta xa̱a̱ kúni̱níyó ña̱ ná kixaa̱ ki̱vi̱ yóʼo. Xa̱ʼa̱ ña̱kán chíkaa̱yó ndee̱ ña̱ koo tu̱ʼvayó ta vií koo ña̱ kéʼéyó ta na̱ʼa̱yó ña̱ nda̱kú íyo iniyó xíʼin Ndióxi̱. Tá xíto Jehová ña̱ kéʼéyó ña̱yóʼo kúsi̱íní-inira, ndakanixi̱ní ndáa ki̱ʼva kunira tá ná ndataxiún miíún ndaʼa̱ra ta ndákuchiún.

NDÁAÑA VA̱ʼA NDÁKIʼINYÓ TÁ KAMA NDÁKUCHIYÓ

16. ¿Ama kúú ña̱ kivi ndakuchiún? (2 Corintios 6:1, 2; koto na̱ʼná).

¹⁶ Vitin kúú tiempo ña̱ va̱ʼaní ndakuchiún (kaʼvi 2 Corintios 6:1, 2). Ná ndakanixi̱níyó xa̱ʼa̱ ta̱ chíñu ñuu Etiopía ta̱ na̱túʼun ta̱ Felipe xíʼin xa̱ʼa̱ Ndióxi̱. Tá ku̱ndaa̱-inira xa̱ʼa̱ ña̱ nda̱a̱ xa̱ʼa̱ tu̱ʼun va̱ʼa ndi̱ku̱n nda̱kuchira, kǒo nítaxira ya̱ʼa ku̱a̱ʼá tiempo. Va̱ása níndakanixi̱níra ña̱yóʼo: “Siʼna kúnii̱ kunda̱a̱ va̱ʼa-inii̱ xa̱ʼa̱ tu̱ʼun va̱ʼa. Sana tá ná ya̱ʼa tiempo saá ndani̱ʼíi̱ iin lugar nu̱ú ndakuchii̱”. Ña̱ ke̱ʼéra kúú ña̱ ni̱nda̱ka̱tu̱ʼunra ta̱ Felipe: “¿Ndáaña sási nu̱úi̱ ndakuchii̱?” (Hech. 8:26, 27, 35-39). Tándi̱ʼi nda̱kuchira, “ta̱ chíñu yóʼo ndeéní kúsi̱í-inira ku̱a̱ʼa̱nra”.

17. ¿Ndáa ki̱ʼva chindeétáʼan Jehová xíʼún?

¹⁷ Tá íyo ña̱ sási nu̱ún ña̱ va̱ʼa xa̱ún ndakuchiún, kivi kandíxaún ña̱ kúni̱va Jehová chindeétáʼanra xíʼún ña̱ va̱ʼa vií xa̱ún kutáʼún xíʼinra (Rom. 2:4). Miíra chindeétáʼan xíʼún ña̱ va̱ása yi̱ʼvíún, va̱ása kaka-iniún ta chindeétáʼanra xíʼún ña̱ kǒo kasi nda̱a̱ ni iin ña̱ʼa nu̱ún. Tá ná ndakuchiún kusi̱íní-iniún ta vií koo ña̱ xínitúni̱ún ta sakúsi̱íún-ini Ndióxi̱, ta ndiʼi ña̱ sa̱ndákoún va̱ása kundayáʼvikaña nu̱ún (Filip. 3:8, 13). Kusi̱íní-iniún ña̱ kundatún xi̱nu ña̱ ni̱ka̱ʼa̱n Jehová keʼéra xa̱ʼa̱ na̱ ndátaxi miína ndaʼa̱ra ta ndákuchina (Hech. 3:19).