¿Ndáaña kúni̱ kachi ña̱ ndakuchiyó ta nda̱chun ndáyáʼviníña?

1. ¿Nda̱chun va̱ʼa kúnda̱a̱-iniyó ña̱ ndákuchiyó kúú iin ña̱ ndáyáʼviní sánáʼa̱ Biblia?

TÁ XÍTOYÓ ña̱ ndákuchi iin na̱ yiví, kúsi̱íní-iniyó. Tá Pentecostés ña̱ ku̱i̱ya̱ 33, saá kúú yichi̱ nu̱ú ña̱ ke̱ʼéna ña̱yóʼo ta ku̱a̱ʼání na̱ yiví nda̱kuchi. Tiempo saá, ta̱ apóstol Pedro ta̱xira iin discurso nu̱ú ni̱ka̱ʼa̱nra ña̱ ndáyáʼviní ña̱ ndakuchiyó (Hech. 2:38, 40, 41). Tá ni̱ya̱ʼa tiempo ta̱ apóstol Pablo ni̱ka̱ʼa̱nra, ña̱ nu̱ú va̱ʼa ña̱ sákuaʼayó xa̱ʼa̱ ta̱ Cristo kúú ña̱ sánáʼa̱na xa̱ʼa̱ ña̱ ndákuchi na̱ yiví (Heb. 6:1, 2). Ña̱ siʼna sákuaʼayó xa̱ʼa̱ nu̱ú Biblia kúú ña̱ káʼa̱n xa̱ʼa̱ ña̱ ndakuchiyó, ña̱kán ndáyáʼviní kunda̱a̱ va̱ʼa iniyó xa̱ʼa̱ ña̱yóʼo.

2. ¿Nda̱chun ndáyáʼviní kunda̱a̱-iniyó ña̱ káʼa̱n Biblia xa̱ʼa̱ ña̱ ndakuchiyó?

² Ná ka̱ʼa̱nyó xa̱ʼa̱ iin ejemplo ña̱ náʼa̱ nu̱úyó nda̱chun ndáyáʼviní kunda̱a̱-iniyó xa̱ʼa̱ ña̱ ndakuchiyó, ni xa̱a̱ ku̱a̱ʼání ku̱i̱ya̱ kúú ña̱ nda̱kuchiyó á kúni̱yó ndakuchiyó. Tá iinna kúni̱na keʼéna iin veʼe, siʼna xíniñúʼu kiʼinna kuenta ña̱ vií ná kana xa̱ʼa̱ña ña̱ va̱ʼa kǒo nduvaña. Saátu miíyó tá kúni̱yó kandíxakayó Jehová, ndáyáʼviní kunda̱a̱-iniyó xa̱ʼa̱ ña̱ nda̱a̱ ña̱ sánáʼa̱ Biblia tá kúú ña̱ káʼa̱n xa̱ʼa̱ ña̱ ndakuchiyó. Ña̱kán, nu̱ú artículo yóʼo ka̱ʼa̱nyó xa̱ʼa̱ pregunta yóʼo: ¿Ndáaña ndána̱ʼa̱ ña̱ ndakuchiyó?, ¿ndáa ki̱ʼva kéʼénaña ta nda̱chun ndáyáʼviníña? Ta, ¿nda̱chun sándakuchina miíyó xíʼin ki̱vi̱ Ndióxi̱, ki̱vi̱ se̱ʼera ta saátu xíʼin ña̱ espíritu santo?

NDÁAÑA KÚNI̱ KACHIÑA TA NDA̱CHUN NDÁYÁʼVIÑA

3. ¿Ndáaña náʼa̱yó tá xa̱a̱ ndákuchiyó?

³ Tá ndákuchiyó, náʼa̱yó nu̱ú ndiʼi na̱ yiví ña̱ 1) kúnda̱a̱-iniyó xa̱ʼa̱ ña̱ nda̱a̱ ña̱ káʼa̱n xa̱ʼa̱ Jehová xíʼin ta̱ Jesús, 2) ndándikó-iniyó xa̱ʼa̱ ku̱a̱chiyó, 3) násamayó ña̱ kéʼéyó ña̱ va̱ʼa kachíñuyó nu̱ú Jehová, 4) kúnda̱a̱-iniyó Ndióxi̱ xi̱niñúʼura ta̱ Jesús ña̱ va̱ʼa sakǎkura miíyó 5) ta ti̱xin iin oración ni̱ka̱ʼa̱nyó xíʼin Jehová ña̱ keʼéyó ña̱ kúni̱ra ta inkáchi kachíñuyó xíʼin na̱ ñuura. Tá xa̱a̱ kéʼéyó ndiʼi ña̱yóʼo, ndátaxiyó miíyó ndaʼa̱ Ndióxi̱ ta ndákuchiyó, saá kúú ña̱ ki̱xáʼayó kéʼéyó chiñu nu̱ú Jehová ta kivi kutakuyó ndiʼi tiempo.

4. ¿Ndáaña ndána̱ʼa̱ ña̱ ki̱ʼvi nííyó ini ti̱kui̱í tá xa̱a̱ ndákuchiyó? (Koto na̱ʼná).

⁴ Tá ndákuchiyó, sáki̱ʼvi níína miíyó ini ti̱kui̱ía ta ña̱yóʼo nda̱a̱ táki̱ʼva íyo na̱ ndúxu̱n saá íyoyó, soo tándi̱ʼi tává tukuna miíyó ta nda̱a̱ táki̱ʼva íyo na̱ ndátaku tuku saá íyoyó (chitáʼanña xíʼin Colosenses 2:12). Ña̱ ndákuchiyó, náʼa̱ña ña̱ xa̱a̱ sa̱ndákooyó ndiʼi ña̱ va̱ása va̱ʼa xi̱keʼéyó. Tá sáki̱ʼvina miíyó ini ti̱kui̱í, náʼa̱yó ña̱ kǒo ndikó tukuyó keʼéyó ña̱ xi̱keʼéyó tá ya̱chi̱. Ta tá xa̱a̱ kítayó ini ti̱kui̱í, náʼa̱yó ña̱ kíxáʼayó kéʼéyó ña̱ kúni̱ Ndióxi̱.

5. Ña̱ va̱ʼa ndakuchiyó, ¿ndáa ki̱ʼva kítáʼanña xíʼin ña̱ ke̱ʼé ta̱ Noé tá i̱xava̱ʼara arca? (1 Pedro 3:18-21).

⁵ (Kaʼvi 1 Pedro 3:18-21). Ña̱ kéʼéyó ña̱ va̱ʼa xa̱a̱yó ndakuchiyó, íyoña nda̱a̱ táki̱ʼva íyo ña̱ ke̱ʼé ta̱ Noé tá i̱xava̱ʼara tú arca. Tá sa̱kán loʼo tiempo kúú ña̱ ki̱xáʼún sákuaʼún xa̱ʼa̱ Jehová, sana túviún ña̱ ku̱a̱ʼání ña̱ʼa xíniñúʼu nasamaún ña̱ va̱ʼa ndakuchiún nda̱a̱ táki̱ʼva íyo na̱ kíxáʼa kéʼé arca. Soo, ¿á xíniñúʼu nasamaún ku̱a̱ʼání ña̱ʼa ña̱ va̱ʼa xa̱ún ndakuchiún? Saá kúúvaña. Ná ndakanixi̱níyó xa̱ʼa̱ ña̱ ke̱ʼé ta̱ Noé, ña̱ va̱ʼa ka̱kura tá ku̱un sa̱vi̱ kini ke̱ʼéra nda̱a̱ táki̱ʼva ni̱ka̱ʼa̱n mií Ndióxi̱ xíʼinra ña̱ ixava̱ʼara tú arca. Ña̱ káʼa̱n xa̱ʼa̱ra náʼa̱ña ña̱ xi̱niso̱ʼovara ta “ke̱ʼéra ndiʼi ña̱ ni̱ka̱ʼa̱n Ndióxi̱ xíʼinra” (Gén. 6:22). ¿Nda̱chun ke̱ʼéra saá? Saáchi xi̱kandíxaníra Ndióxi̱ ta chi̱ndeétáʼanva Jehová xíʼinra. Nda̱a̱ táki̱ʼva ke̱ʼé ta̱ Noé, saátu miíún kivi keʼún ña̱ káʼa̱n Ndióxi̱ ña̱ va̱ʼa xa̱ún ndakuchiún.

6. ¿Ndáaña xi̱kuni̱ kachi ta̱ Pedro tá ni̱ka̱ʼa̱nra “Ña̱ ndákuchindó […] sakǎku ndóʼó”?

⁶ Nu̱ú versículo 21 ta̱ apóstol Pedro ni̱ka̱ʼa̱nra ña̱yóʼo: “Ña̱ ndákuchindó […] sakǎku ndóʼó”. Ña̱ ni̱ka̱ʼa̱nra yóʼo kǒo kúni̱ kachiña ña̱ ki̱ʼvi kuitíyó ini ti̱kui̱í ta xa̱a̱ ka̱kuyó ta ndóo ku̱a̱chiyó, saáchi iinlá ni̱i̱ ta̱ Jesús kúú ña̱ sáka̱ku miíyó ta sándooña ku̱a̱chiyó (1 Juan 1:7). Ña̱kán ndáyáʼviní ndakuchiyó saáchi mií Jehová ni̱ka̱ʼa̱n ña̱yóʼo. Ta saátu, tá ndákuchiyó kivi ka̱ʼa̱nyó xíʼin Ndióxi̱ ña̱ vií ná koo ña̱ xínitúni̱yó. Jehová ndákuiinvara ña̱ káʼa̱nyó xíʼinra ta xa̱ʼa̱ ña̱ ni̱xi̱ʼi̱ ta̱ Jesús íxakáʼnu-inira xa̱ʼa̱yó ta saátu kivi ka̱kuyó ta kutakuyó ndiʼi tiempo. Ña̱yóʼo kúú ña̱ xi̱kuni̱ kachi ta̱ Pedro tá ni̱ka̱ʼa̱nra: “Ña̱ ndákuchindó […] sakǎku ndóʼó”.

NDÁA KI̱ʼVA NDÁKUCHINA

7. ¿Ndáa ki̱ʼva xíniñúʼu ndakuchina?

⁷ ¿Ndáa ki̱ʼva xíniñúʼu ndakuchina? Biblia káʼa̱nña ña̱ xíniñúʼu ki̱ʼvi níína ini ti̱kui̱í soo kǒo káʼa̱n káxiña ndáakaña xíniñúʼu keʼéna. Soo íyo texto ña̱ chíndeétáʼan xíʼinyó ña̱ kunda̱a̱-iniyó ndáaña xíniñúʼu keʼéyó tá kúú, ndáa ki̱ʼva xíniñúʼu kundixi na̱ ndakuchi ta ndáa ki̱ʼva xíniñúʼu keʼé na̱ xáʼa̱n kán (1 Cor. 14:40; 1 Tim. 2:9). Na̱ sándakuchi iin na̱ yiví kúú iin ta̱ anciano soo va̱ása náʼa̱yó ta̱yóʼo kúú ta̱ ndáyáʼviníka (1 Cor. 1:14, 15). Ña̱ ndakuchiyó ndáyáʼviníña ni loʼo á ku̱a̱ʼá na̱ yiví íyo (Hech. 8:36).

8. ¿Ndáa pregunta kéʼéna xíʼin na̱ ndakuchi ta nda̱chun kéʼéna ña̱yóʼo? (Hechos 2:38-42; koto na̱ʼná).

⁸ Biblia káʼa̱nña na̱ cristiano xíniñúʼu ka̱ʼa̱nna nu̱ú ku̱a̱ʼána xa̱ʼa̱ ña̱ kándíxana (Rom. 10:9, 10 koto nota ña̱ estudio “declaras públicamente”). Nda̱a̱ táki̱ʼva xa̱a̱ sa̱kúaʼayó, na̱ ndákuchi káʼa̱nna ña̱yóʼo ña̱ va̱ʼa ka̱kuna. Ta ña̱ va̱ʼa ndakuiinna ña̱yóʼo, kéʼéna u̱vi̱ pregunta xíʼinna. Ña̱ nu̱ú, “¿Á xa̱a̱ ndi̱kó-iniún xa̱ʼa̱ ku̱a̱chiún, nda̱taxiún ña̱ tákún ndaʼa̱ Jehová ta kándíxaún ña̱ mií ta̱ Jesucristo kúú ta̱ nda̱kaxin Ndióxi̱ ña̱ sakǎkura miíyó?”. Pregunta yóʼo káʼa̱nña xa̱ʼa̱ ña̱ xa̱a̱ ke̱ʼéna ña̱ va̱ʼa xa̱a̱na ndakuchina ta ña̱yóʼo kitáʼanña xíʼin ña̱ ni̱ka̱ʼa̱n ta̱ Pedro xíʼin ku̱a̱ʼání na̱ yiví tá Pentecostés. Ña̱ u̱vi̱, “¿Á kúnda̱a̱-iniún ña̱ tá ná ndakuchiún na̱ʼún nu̱ú ndiʼina ña̱ nduún testigo Jehová ta kítáʼún xíʼin na̱ ñuura?”. Pregunta yóʼo sándakaʼánña miíyó ña̱ va̱ʼa saxínuyó ña̱ ni̱ka̱ʼa̱nyó xíʼin Jehová tá nda̱taxiyó miíyó ndaʼa̱ra, xíniñúʼu kandíxayó ña̱ káʼa̱n na̱ ñuura xíʼinyó ta inkáchi ndasakáʼnuyóra xíʼin na̱ hermano nda̱a̱ táki̱ʼva ke̱ʼé na̱ cristiano na̱ ni̱xi̱yo tá siglo nu̱ú (kaʼvi Hechos 2:38-42). Na̱ ndákuin u̱vi̱ saá pregunta yóʼo, náʼa̱na ña̱ xa̱a̱ va̱ʼava ndakuchina.

9. ¿Ndáaña xíniñúʼu keʼé ndiʼiyó ña̱ va̱ʼa sakúsi̱íyó ini Ndióxi̱?

⁹ Sana tá kúma̱níka kunda̱a̱-iniún xa̱ʼa̱ ña̱ nda̱a̱, xi̱keʼún ña̱ va̱ʼa ta kǒo ku̱a̱chi níki̱ʼviún. Á sana na̱ yiváún sa̱náʼa̱na yóʼó ña̱ ku̱ʼvi̱-iniún kuniún Jehová. ¿Á xíniñúʼuví ndandikó-iniún xa̱ʼa̱ ku̱a̱chiún ña̱ va̱ʼa sakúsi̱íún ini Jehová? Saá kúúvaña. Ndakaʼán chi ndiʼiyó tá xa̱a̱ ka̱kuvíyó xa̱a̱ kúúyó na̱ yiví ku̱a̱chi ta ña̱yóʼo sákuxíkaña miíyó nu̱ú Ndióxi̱ (Sal. 51:5). Soo tá ku̱ndaa̱-iniyó xa̱ʼa̱ Jehová, chi̱kaa̱-iniyó ña̱ keʼéyó ña̱ kúni̱ra ta su̱víka ña̱ kúni̱ miíyó. Tá xa̱a̱ ke̱ʼéyó ndiʼi ña̱yóʼo, kivi ndikó-iniyó xa̱ʼa̱ ki̱ʼva ña̱ ni̱xi̱yoyó tá ya̱chi̱ ta ki̱xáʼayó kéʼéyó ña̱ kútóo Ndióxi̱ tasaá kúú ña̱ xa̱a̱ va̱ʼa ndakuchiyó (Hech. 3:19).

10. ¿Ndáaña xíniñúʼu keʼún ni xa̱a̱ nda̱kuchiún ti̱xin veʼe-ñu̱ʼu nu̱ú xi̱ndika̱ún?

¹⁰ ¿Á nda̱kuchiún tá xi̱ndika̱ún ti̱xin inka veʼe-ñu̱ʼu? Ña̱ va̱ʼa koún testigo Jehová, xíniñúʼu ndakuchi tukún. ¿Nda̱chun? Saáchi tá nda̱kuchiún tá ya̱chi̱, kǒo níxi̱kunda̱a̱ va̱ʼa iniún ña̱ nda̱a̱ xa̱ʼa̱ Jehová xíʼin xa̱ʼa̱ ta̱ Jesús. Ni xa̱a̱ ni̱ka̱ʼa̱nvaún xíʼin Ndióxi̱ ña̱ nda̱taxiún miíún ndaʼa̱ra ta ke̱ʼún ña̱ kúni̱ra tiempo saá, kǒo níxi̱kunda̱a̱ káxi-iniún ndáaña xi̱kuni̱ra ná keʼún. Ná kotoyó ña̱ ku̱u tá siglo nu̱ú. Tá nda̱kutáʼan ta̱ apóstol Pablo xíʼin sava na̱ ta̱a na̱ xa̱a̱ nda̱kuchi chí ñuu Éfeso, chi̱ndeétáʼanra xíʼinna ña̱ kunda̱a̱-inina ña̱ xíniñúʼu ndakuchi tukuna (Hech. 19:1-5).b Saátu kúú tiempo vitin, ña̱ va̱ʼa kindo̱o-ini Jehová xíʼin na̱ ndakuchi, xíniñúʼu kunda̱a̱ va̱ʼa inina ndáaña kúni̱ra ná keʼéna.

“XÍʼIN KI̱VI̱ YIVÁI̱ XÍʼIN KI̱VI̱ SE̱ʼERA TA SAÁTU XÍʼIN KI̱VI̱ ESPÍRITU SANTO”

11. ¿Ndáaña kúni̱ kachi ña̱ ndakuchina xíʼin ki̱vi̱ Ndióxi̱, xíʼin ki̱vi̱ se̱ʼera ta saátu xíʼin ña̱ espíritu santo? (Mateo 28:18-20).

¹¹ Ta̱ Jesús ni̱ka̱ʼa̱nra na̱ xa̱a̱ koo discípulora, xíniñúʼu ndakuchina xíʼin ki̱vi̱ yivára xíʼin ki̱vi̱ miíra ta saátu xíʼin espíritu santo (kaʼvi Mateo 28:18-20). ¿Ndáaña xi̱kuni̱ kachira xíʼin ña̱yóʼo? Tá va̱xi tu̱ʼun “ki̱vi̱” nu̱ú Biblia, ku̱a̱ʼání yichi̱ káʼa̱nña xa̱ʼa̱ ki̱ʼva ña̱ íyo na̱ yiví ta saátu kivi ka̱ʼa̱nña xa̱ʼa̱ ndee̱ ña̱ kúúmií na̱ yiví kán. Ña̱kán ña̱ kéʼéyó iin ña̱ʼa xa̱ʼa̱ ki̱vi̱ iinna, náʼa̱ña ña̱ ndákuniyó ndee̱ ña̱ kúúmiína (chitáʼanña xíʼin Mateo 10:41; koto nota ña̱ estudio “porque es profeta”). Vitin ka̱ʼa̱nyó xa̱ʼa̱ ndáa ki̱ʼva na̱ʼa̱yó ña̱ ndákuniyó ndee̱ ña̱ kúúmií Jehová, ndee̱ ña̱ kúúmií se̱ʼera ta saátu ña̱ espíritu santo.

12. ¿Ndáaña kúni̱ kachi ña̱ ndakuchiyó xa̱ʼa̱ ki̱vi̱ yivára? (Apocalipsis 4:11; koto na̱ʼná).

¹² Ki̱vi̱ yivái̱. Ndákuniyó Jehová kúú yiváyó ta̱ íyo chí ndiví, ta̱xira ña̱ tákuyó, kúúra Ndióxi̱ ta̱ kúúmií ndiʼi ndee̱ ta saátu i̱xava̱ʼara ndiʼi ña̱ʼa (kaʼvi Apocalipsis 4:11). Saátu kúnda̱a̱-iniyó ña̱ xíniso̱ʼovara oración ña̱ kéʼéyó nu̱úra ta xíʼin ña̱ to̱ʼó káʼa̱nyó xíʼinra ta saátu tá káʼa̱nyó xa̱ʼa̱ra (Sal. 65:2). Soo xíniñúʼu ndakuniyó inka ña̱ʼa. Na̱ xi̱niso̱ʼo ta̱ Pedro tá Pentecostés xi̱xini̱vana xa̱ʼa̱ Jehová soo xi̱xiniñúʼu ndakunina ña̱ xi̱niñúʼura ta̱ Jesús ña̱ va̱ʼa sa̱kǎkurana (Rom. 5:8).

13. ¿Ndáaña kúni̱ kachi ña̱ ndakuchiyó xa̱ʼa̱ ki̱vi̱ se̱ʼera? (Koto na̱ʼná).

¹³ Ki̱vi̱ se̱ʼera. Kúnda̱a̱-iniyó se̱ʼe nu̱ú Ndióxi̱ kúú ta̱ Jesús ta ta̱yóʼo kúú ta̱ xi̱niñúʼura ña̱ va̱ʼa vií xa̱a̱yó kutáʼanyó xíʼin Jehová (Juan 14:6). Ta̱ Jesús kúú ta̱ ni̱xi̱ʼi̱ xa̱ʼa̱yó ña̱ va̱ʼa kutakuyó ndiʼi tiempo. Xa̱ʼa̱ ña̱ kúnda̱a̱-iniyó ña̱yóʼo, chíndeétáʼanña xíʼinyó ña̱ kundiku̱nyó yichi̱ra ndiʼi ki̱vi̱ ta su̱ví ki̱vi̱ ña̱ nda̱kuchi kuitíyó (1 Juan 2:6). Nda̱a̱ táki̱ʼva ke̱ʼe ta̱ Jesús, xíʼin ña̱ si̱í-ini na̱túʼunra xa̱ʼa̱ Ndióxi̱ saátu xíniñúʼu keʼé miíyó ta kǒo táxiyó ña̱ kasi nda̱a̱ ni iin ña̱ʼa nu̱úyó (Luc. 4:43). Ta íyo tu̱ʼvayó ña̱ kundeé-iniyó tá ná ixandi̱va̱ʼana xíʼinyó tasaá nda̱kú koo iniyó xíʼin Ndióxi̱ (2 Tim. 3:12). Saátu íxato̱ʼóyó ta̱ Jesús chi ta̱yóʼo kúú ta̱ níʼi yichi̱ ti̱xin congregación, xa̱ʼa̱ ña̱kán xíniso̱ʼoyó ña̱ káʼa̱n na̱ nda̱kaxinra ña̱ kuniʼina yichi̱ nu̱úyó tasaá ndáara na̱ congregación (Efes. 4:8, 11, 12; 5:23).

14. a) ¿Ndáaña kúni̱ kachi ña̱ ndakuchiyó xíʼin ña̱ espíritu santo? (Koto na̱ʼná). b) ¿Ndáa inka ki̱ʼva ndákuchi na̱ nda̱kaxin Ndióxi̱? (Koto recuadro ña̱ naní “Ki̱ʼva ña̱ ndákuchi na̱ nda̱kaxin Ndióxi̱”).

¹⁴ Xíʼin espíritu santo. Kúnda̱a̱-iniyó ña̱ nda̱a̱ xa̱ʼa̱ ña̱ espíritu santo: su̱ví iin na̱ yiví kúúña ta ni va̱ása kúúña ña̱ trinidad saáchi ndee̱ Ndióxi̱ kúúña. Kúnda̱a̱-iniyó, ña̱ espíritu santo kúú ña̱ xi̱niʼi yichi̱ nu̱ú na̱ profeta ta saátu nu̱ú na̱ ka̱ʼyi Biblia ta xa̱ʼa̱ ña̱kán káʼviyóña ndiʼi ki̱vi̱ ta kéʼéyó ña̱ káʼa̱nña (2 Ped. 1:20, 21). Chíkaa̱yó ndee̱ ña̱ kǒo ki̱ʼviyó ku̱a̱chi ndeé saáchi tá ná ki̱ʼviyó ku̱a̱chi, va̱ása kivi ndakiʼinyó espíritu santo ta ni va̱ása kivi chindeétáʼanña xíʼin na̱ congregación (Efes. 4:30).

15. ¿Ndáaña xíniñúʼu chikaa̱yó ndee̱ keʼéyó?

¹⁵ Tá xa̱a̱ nda̱kuchiún, chikaa̱ ndee̱ ña̱ kunda̱a̱ va̱ʼa iniún xa̱ʼa̱ ña̱ káʼa̱n xa̱ʼa̱ ña̱ ndákuchinac ta saxínu ña̱ ni̱ka̱ʼún xíʼin Jehová tá nda̱taxiún miíún ndaʼa̱ra ta nda̱kuchiún. Soo, ¿á kúma̱ní ndakuchiún? ¿Á íyo ña̱ sási nu̱ún ña̱ va̱ʼa xa̱ún ndakuchiún? Nu̱ú inka artículo ka̱ʼa̱nyó xa̱ʼa̱ ndáaña kivi keʼún ña̱ va̱ʼa xa̱ún ndakuchiún.