Vií kutáʼún xíʼin Ndióxi̱ nani káʼviún

1, 2. a) Tá kúni̱ún kaʼvi va̱ʼún, ¿ndáaña xíniñúʼu kiʼún kuenta xíʼin? b) ¿Ndáaña kúni̱ kachi tu̱ʼun “ná ndakundeéyó viíní kakayó ti̱xin yichi̱ yóʼo”? (Filipenses 3:16).

SAVA na̱ ndásakáʼnu Jehová ndáka̱xinna kaʼvi va̱ʼana. Sana ndákanixi̱nína ña̱ tá ná kaʼvi va̱ʼana kivi kuumiína iin chiñu va̱ʼa ta satána ña̱ xíniñúʼuna ta saátu kivi kachíñuna nu̱ú Jehová. Tá xa̱a̱ nda̱kaxiún ña̱ kaʼvi va̱ʼún, ¿ndáaña chindeétáʼan xíʼún ña̱ viíka kutáʼún xíʼin Jehová? (Sant. 4:8a). Sana tá xi̱ndika̱ún escuela ni̱ya̱ʼún nu̱ú prueba xa̱ʼa̱ ña̱ kándíxaún Ndióxi̱, ña̱kán saátu vitin xíniñúʼu chika̱ún ndee̱ ña̱ kǒo sandákoún ña̱ nda̱kú koo iniún xíʼin Jehová (kaʼvi Filipenses 3:16).

² Tu̱ʼun griego “ná ndakundeéyó viíní kakayó ti̱xin yichi̱ yóʼo”, xi̱xiniñúʼunaña ña̱ ka̱ʼa̱nna xa̱ʼa̱ ña̱ kéʼé na̱ soldado ña̱ inkáchi xi̱kitáʼanna tá xi̱xaʼa̱nna nu̱ú ku̱a̱chi. Ña̱kán tá kúni̱ún kaʼvi va̱ʼún, va̱ása sandákoún ña̱ keʼún chiñu nu̱ú Ndióxi̱ ta inkáchi kutáʼún xíʼin na̱ ñuura. Nu̱ú artículo yóʼo ka̱ʼa̱nyó xa̱ʼa̱ ku̱mí texto ña̱ níʼi yichi̱ nu̱úyó ña̱ kivi chindeétáʼan xíʼún ta sana xa̱a̱ xíni̱vaún ña̱yóʼo. Nda̱a̱ táki̱ʼva xa̱a̱ xi̱ndiku̱n ña̱yóʼo tá ya̱chi̱ saátu keʼún nani káʼviún ta saátu tá xa̱a̱ ná ndiʼi kaʼviún.

KEʼÉ ÑA̱ CHINDEÉTÁʼAN XÍʼÚN ÑA̱ KUYATIÚN NU̱Ú JEHOVÁ

3. Nani káʼviún, ¿ndáaña xíniñúʼu nasamaún?

³ ¿Ndáaña xíniñúʼu kiʼún kuenta xíʼin? Tá ná kixáʼún kaʼvi va̱ʼún va̱ása kuumiíkaún tiempo ña̱ keʼún inkaka ña̱ʼa, ña̱kán sana xíniñúʼu nasamaún sava ña̱ kéʼún. Ta ña̱yóʼo kixáʼa kundi̱ʼiníka-iniún xa̱ʼa̱ ta va̱ása kundi̱ʼika-iniún xa̱ʼa̱ chiñu Jehová. Sana kǒo ku̱ʼu̱nkaún reunión ni ña̱ kitaún natúʼún xíʼin na̱ yiví xa̱ʼa̱ Ndióxi̱ ni kǒo kaʼvikaún Biblia ta ni kǒo keʼékaún oración (Apoc. 2:4).

4. ¿Ndáa ki̱ʼva kundiku̱nyó consejo ña̱ va̱xi nu̱ú 1 Corintios 15:58?

⁴ (Kaʼvi 1 Corintios 15:58). Ña̱ va̱ʼa kǒo nduva iin bicicleta xíniñúʼu kavananú. Ki̱ʼva saá íyo ña̱ kutáʼanyó xíʼin Ndióxi̱ chi xíniñúʼu ndakundeéyó kachíñuyó nu̱úra, xa̱ʼa̱ ña̱kán Biblia káʼa̱nña “ndiʼi tiempo keʼéndó chiñu tátayó”. ¿Ndáa ki̱ʼva kundiku̱ún consejo yóʼo? Ndáyáʼviní ña̱ taváún tiempo ña̱ keʼún chiñu nu̱ú Jehová. Ndakaʼán chi ña̱yóʼo kúú ña̱ ndáyáʼvika nu̱úka ña̱ kaʼvi va̱ʼún (Mat. 22:37). Iin ñá hermana ñá naní Samantha káchiñá: “Tá ki̱xáʼa kúxíkái̱ nu̱ú Jehová xa̱ʼa̱ ña̱ káʼvii̱, va̱ʼaka sandákoi̱ ña̱ káʼvii̱”.

5. ¿Ndáaña kivi keʼún ña̱ va̱ʼa kǒo nandóso-iniún xa̱ʼa̱ chiñu Jehová?

⁵ ¿Ndáaña kivi keʼún tá kúni̱ún kaʼvi va̱ʼún? Kǒo nandóso-iniún xa̱ʼa̱ ña̱ ndáyáʼvika. Ndakanixi̱ní xa̱ʼa̱ ña̱yóʼo: “¿Ndáaña keʼíi̱ ña̱ va̱ʼa kǒo kuma̱níi̱ reunión, predicación ta saátu ña̱ kaʼvii̱ Biblia?” (Jos. 1:8; Mat. 28:19, 20; Heb. 10:25). Saátu kivi sakúaʼún xíʼin ña̱ ke̱ʼún tá ya̱chi̱. Ndakanixi̱ní xa̱ʼa̱ ña̱yóʼo: “¿Ndáa ki̱ʼva ni̱na̱ʼi̱ ña̱ xi̱ndi̱ʼi̱ka-inii̱ xa̱ʼa̱ chiñu Ndióxi̱ nani tá xi̱kaʼvikai̱ escuela? ¿Á íyo ña̱ xi̱niñúʼu viíka keʼíi̱ tiempo saá? ¿Á íyo ña̱ kivi viíka keʼíi̱ tiempo vitin?”. Chikaa̱ ndee̱ ña̱ kundi̱ʼi̱ka-iniún xa̱ʼa̱ chiñu Ndióxi̱ nani káʼviún. Ta saátu chikaa̱ ndee̱ ña̱ viíka kaʼviún soo kǒo kuxíkáún nu̱ú Jehová (Mat. 6:24).a

6. ¿Ndáaña xíniñúʼu nda̱ka̱tu̱ʼún miíún? (Koto na̱ʼná).

⁶ Tá xa̱a̱ ki̱xáʼún káʼviún, viíní ndakanixi̱níún xa̱ʼa̱ ña̱yóʼo. Tá kúú, tá xa̱a̱ ni̱ya̱ʼa iin yo̱o̱ nda̱ka̱tu̱ʼun ña̱yóʼo miíún: “¿Á ndíʼi̱ka-inii̱ xa̱ʼa̱ chiñu Ndióxi̱?”. Saátu kivi nda̱ka̱tu̱ʼún ña̱yóʼo miíún: “¿Á xáʼi̱n ndiʼi reunión? ¿Á sava yichi̱ xa̱a̱ yáʼa hora saáví xái̱? ¿Á nina xa̱ʼa̱ tarea ndákanixi̱níi̱ xa̱ʼa̱ tá íyoi̱ reunión? ¿Á nina chí zoom kútói̱ kotoi̱ reunión?”. Kivitu ndakanixi̱níún xa̱ʼa̱ ña̱yóʼo: “¿Á loʼoka tiempo káʼi̱n xíʼin Jehová vitin? ¿Á káʼvii̱ Biblia ndiʼi ki̱vi̱? Tá kítai̱ predicación, ¿á ndi̱ku̱n kúni̱i̱ ná ndiʼiña?”. Tá ndóʼún sava ña̱yóʼo, koto ndáa ña̱ʼa kúú ña̱ xíniñúʼu nasamaún. Kǒo taxiún ña̱ kaʼvi va̱ʼún sakúxíkaña miíún nu̱ú Jehová.

KIʼIN KUENTA XÍʼIN ÑA̱ NDÁKANIXI̱NÍÚN

7. Tá xa̱a̱ káʼvi va̱ʼún, ¿ndáaña xíniñúʼu kiʼún kuenta xíʼin?

⁷ ¿Ndáaña xíniñúʼu kiʼún kuenta xíʼin? Kivi sanáʼa̱na yóʼó xa̱ʼa̱ ña̱ʼa ña̱ kǒo káʼa̱n Biblia xa̱ʼa̱, tá kúú ña̱ kǒo Ndióxi̱ íyo ta na̱ yiví kuva̱ʼa miína (Col. 2:8). Á kivi ka̱ʼa̱nna xíʼún ña̱ iinlá miíún xíni̱ xa̱ʼa̱ ndiʼi ña̱ʼa ta̱ kǒo xíniñúʼu nda̱ka̱tu̱ʼún inkana. Iin ta̱ hermano káchira: “Xi̱sanáʼa̱vana ndi̱ʼi̱ ndáa ki̱ʼva keʼéndi̱ inka chiñu soo saátu xi̱kaʼa̱nna xíʼinndi̱ ña̱ ná ndakanixi̱níndi̱ xa̱ʼa̱ sava ña̱ʼa ña̱ kǒo kítáʼan xíʼin ña̱ kúni̱ Jehová. Xi̱kaʼa̱nna ña̱ va̱ʼa si̱í koo iin na̱ yiví xíniñúʼu kundaa-inina miína. Ta xa̱ʼa̱ ña̱yóʼo, nda̱kanixi̱níi̱ ña̱ kǒo xíniñúʼuví kundaa-inii̱ Jehová ña̱ va̱ʼa si̱í koi̱”.

8. ¿Nda̱chun xíniñúʼu kiʼún kuenta xíʼin ña̱ ndákanixi̱níún? (Proverbios 5:1, 2).

⁸ (Kaʼvi Proverbios 5:1, 2).b Biblia táxiña consejo yóʼo ndaʼa̱yó: “Kiʼún kuenta xíʼin ña̱ ndákanixi̱níún”. Tá xa̱a̱ kúni̱na ixakuíʼnána iin ña̱ʼa ndaʼa̱yó saá kúúña ndáaníkayóña. Ta ña̱yóʼo kúú ña̱ kúni̱ ta̱ Ndi̱va̱ʼa xíʼin na̱ ñuyǐví yóʼo keʼéna xíʼin ña̱ ndákanixi̱níyó (1 Ped. 5:8). Síínní íyo ña̱ ndákanixi̱ní na̱ yiví xa̱ʼa̱ ndáaña kúú ña̱ va̱ʼa ta ndáaña kúú ña̱ va̱ása va̱ʼa, saátu xa̱ʼa̱ ki̱ʼva ña̱ ku̱vaʼayó. Savatuna ndákanixi̱nína ña̱ kǒo Ndióxi̱ íyo, ña̱kán ndiʼi ña̱yóʼo kivi nasamaña ña̱ ndákanixi̱níún ta sakúxíkaña yóʼó nu̱ú Jehová. Na̱ yiví ndákanixi̱nína ña̱ xíni̱níka miína soo nu̱ú Jehová va̱ása ndáyáʼviví ña̱ ndákanixi̱nína (1 Cor. 3:18-20).

9. ¿Ndáaña kivi keʼún ña̱ va̱ʼa kiʼún kuenta xíʼin ña̱ ndákanixi̱níún?

⁹ ¿Ndáaña kivi keʼún tá kúni̱ún kaʼvi va̱ʼún? Ña̱ va̱ʼa kiʼún kuenta xíʼin ña̱ ndákanixi̱níún xíniñúʼu kandíxaún ña̱ nda̱a̱ kúú ña̱ sánáʼa̱ Biblia. Ña̱kán tá kúma̱níka kaʼviún, nda̱ka̱tu̱ʼun ña̱yóʼo miíún: “¿Nda̱chun kándíxai̱ Ndióxi̱? ¿Nda̱chun kándíxai̱ ña̱ va̱xi nu̱ú Biblia tu̱ʼun Ndióxi̱ kúúña? ¿Nda̱chun kándíxai̱ ña̱ sánáʼa̱ Biblia miíyó ndáyáʼvikaña nu̱ú ña̱ sánáʼa̱ na̱ ñuyǐví yóʼo?”. Saátu kivi ndakanixi̱níún xa̱ʼa̱ ña̱ ndo̱ʼún tá xi̱xaʼún escuela, nda̱ka̱tu̱ʼun ña̱yóʼo miíún: “Tá xi̱kaʼa̱nna xa̱ʼa̱ ña̱ evolución, ¿á ki̱xáʼíi̱ ndákanixi̱níi̱ ña̱ kǒo Ndióxi̱ íyo? ¿Á xi̱kuni̱i̱ keʼíi̱ táʼan ña̱ va̱ása va̱ʼa ña̱ xi̱keʼé na̱ va̱lí na̱ xi̱kaʼvi xíʼi̱n? ¿Á íyo ña̱ xi̱niñúʼu viíka keʼíi̱ tiempo saá? ¿Ndáaña kivi keʼíi̱ vitin ña̱ va̱ʼa kandíxakai̱ ña̱ nda̱a̱ kúú ña̱ sánáʼa̱ Biblia?”. Kiʼin kuenta xíʼin ña̱ ndákanixi̱níún nani káʼviún (2 Tim. 2:16-18).c

10. ¿Ndáakaña xíniñúʼu keʼún ña̱ va̱ʼa kiʼún kuenta xíʼin ña̱ ndákanixi̱níún?

¹⁰ Tá xa̱a̱ ki̱xáʼún káʼviún, tavá tiempo ña̱ ndakanixi̱níún xa̱ʼa̱ pregunta yóʼo: “¿Á ki̱xáʼíi̱ ndákanixi̱níi̱ ña̱ su̱ví ña̱ ndeéví kúú ña̱ va̱ása va̱ʼa kéʼé na̱ yiví? ¿Á ndi̱ku̱n kíʼii̱n kuenta ña̱ sánáʼa̱na su̱ví ña̱ nda̱a̱ kúúña chi ña̱ ndákanixi̱ní na̱ yivíva kúúña? ¿Á kándíxai̱ ña̱ iinlá Reino Ndióxi̱ kúú ña̱ kivi sandíʼi-xa̱ʼa̱ tu̱ndóʼo ña̱ kúúmiíyó?”. Ña̱ va̱ʼa kǒo ndakanixi̱níún nda̱a̱ táki̱ʼva ndákanixi̱ní na̱ va̱lí na̱ káʼvi xíʼún á na̱ maestro, xíniñúʼu ndakundeún kaʼviún Biblia ta ndakanixi̱níún xa̱ʼa̱ña. Tá saá ná keʼún ña̱yóʼo chindeétáʼanña xíʼún ña̱ kǒo kaka-iniún xa̱ʼa̱ ña̱ sánáʼa̱ Biblia miíyó (1 Tim. 4:15).

VIÍ VA̱ʼA KUNIÑÚʼÚN TIEMPOÚN

11. Tá xa̱a̱ káʼvi va̱ʼún, ¿nda̱chun xíniñúʼu kiʼún kuenta xíʼin tiempoún?

¹¹ ¿Ndáaña xíniñúʼu kiʼún kuenta xíʼin? Sana ku̱a̱ʼá tiempo xíniñúʼu kaʼvi va̱ʼún. Tá kúú tá xíniñúʼu keʼún examen á xíniñúʼu ndataxiún iin chiñu ña̱ ndu̱kúna nu̱ún. Tá va̱ása vií xíniñúʼún tiempoún, kivi xa̱ún kundi̱ʼiní-iniún ta kunaáníún. Ndáyáʼviní kundaún miíún ña̱ va̱ʼa kǒo kiʼin kue̱ʼe̱ yóʼó.

12. ¿Ndáa inkaka ña̱ʼa xíniñúʼu taváún tiempo keʼún? (Efesios 5:15, 16).

¹² (Kaʼvi Efesios 5:15, 16). Ña̱ va̱ʼa vií kuniñúʼún tiempo ña̱ kúúmiíún, xíniñúʼu viíní keʼún iin tá iin ña̱ʼa. Soo kivi ixayo̱ʼvi̱ña xíʼún saáchi ku̱a̱ʼání ña̱ʼa xíniñúʼu keʼún. Tá kúú, ku̱a̱ʼání tiempo xíniñúʼu kaʼviún soo saátu xíniñúʼu taváún tiempo ña̱ koún xíʼin na̱ veʼún ta saátu xíʼin na̱ hermano na̱ íyo ti̱xin congregación (Sal. 133:1; Prov. 18:1). Soo ña̱ ndáyáʼvika xíniñúʼu keʼún kúú chiñu Ndióxi̱ ña̱ va̱ʼa vií kutáʼún xíʼinra (Mat. 6:33). Saátu xíniñúʼu chindeétáʼún xíʼin na̱ veʼún á nda̱a̱ ku̱ʼún kachíñún. Ta kǒo nandóso-iniún ña̱ keʼún ejercicio ta saátu ña̱ ku̱su̱n va̱ʼún chi ña̱yóʼo va̱ʼaní chindeétáʼanña xíʼún (Ecl. 4:6; 1 Tim. 4:8). Ña̱ va̱ʼa keʼún ndiʼi ña̱yóʼo xíniñúʼu viíní kuniñúʼún tiempo ña̱ kúúmiíún.

13. ¿Ndáaña kivi keʼún ña̱ va̱ʼa viíní kuniñúʼún tiempo ña̱ kúúmiíún?

¹³ ¿Ndáaña kivi keʼún tá kúni̱ún kaʼvi va̱ʼún? Biblia káʼa̱nña na̱ viíní ndákanixi̱ní tá kúma̱níka keʼéna iin ña̱ʼa, va̱ʼaní kána ña̱ kúni̱na keʼéna (Prov. 21:5). Ña̱kán tá kúma̱níka kixáʼún kaʼvi va̱ʼún, vií va̱ʼa taváún tiempo ña̱ keʼún iin tá iin ña̱ʼa. Kivi nda̱ka̱tu̱ʼún ña̱yóʼo miíún: “¿Á vií xi̱xiniñúʼi̱ tiempo ña̱ xi̱kuumiíi̱ tá xi̱kaʼvii̱ escuela? ¿Á íyo ña̱ xi̱niñúʼu viíka keʼíi̱ tiempo saá? ¿Ndáaña kivi keʼíi̱ vitin ña̱ va̱ʼa viíka kuniñúʼi̱ tiempo ña̱ kúúmiíi̱?”. Viíní kuniñúʼún tiempo ña̱ kúúmiíún ña̱ va̱ʼa kǒo kundi̱ʼiní-iniún.d

14. ¿Ndáaña kivi nda̱ka̱tu̱ʼún miíún?

¹⁴ Tá xa̱a̱ káʼviún, ndakanixi̱ní xa̱ʼa̱ ña̱yóʼo: “¿Á íyo tiempo nu̱úi̱ ña̱ keʼíi̱ ejercicio ta saátu ña̱ ku̱su̱n va̱ʼi̱? ¿Á íyo tiempo nu̱úi̱ ña̱ kutáʼi̱n xíʼin na̱ hermano? ¿Á ndi̱ku̱n kama ndátaxii̱ tarea? Tá va̱ása kama ndátaxii̱ña, ¿á xa̱ʼa̱ ña̱ íyoní chiñu nu̱úi̱ kúúña? ¿Á tá xa̱a̱ ku̱nu̱mí ndataxii̱ tarea kéʼíi̱ña? ¿Á ndákanixi̱ní na̱ migoi̱ xíʼin na̱ veʼi̱ ña̱ xíniñúʼu nasamai̱ sava ña̱ kéʼíi̱?”. Tá túviún ña̱ xíniñúʼu nasamaún sava ña̱ kéʼún, ndi̱ku̱n keʼún ña̱yóʼo. Íyo sava na̱ hermano na̱ viíní xíniñúʼu tiempona ta kivi ndukún consejo nu̱ú na̱yóʼo (Prov. 11:14).

KǑO KUTÁʼÚN XÍʼIN NA̱ KǑO NDÁSAKÁʼNU JEHOVÁ

15. Tá káʼvi va̱ʼún, ¿ndáaña xíniñúʼu kiʼún kuenta xíʼin?

¹⁵ ¿Ndáaña xíniñúʼu kiʼún kuenta xíʼin? Sana na̱ káʼvi xíʼún ka̱ʼa̱nna xíʼún ña̱ ku̱ʼu̱n si̱índó ta sana kuni̱vaún ku̱ʼún. Xa̱ʼa̱ ña̱ ku̱a̱ʼání tiempo inkáchi kítáʼanndó káʼvindó, viíníva kítáʼún xíʼinna. Sana ndákanixi̱níún ña̱ va̱ʼaníka kítáʼún xíʼin na̱yóʼo nu̱úka na̱ hermano na̱ íyo ti̱xin congregación. Soo xíniñúʼu kiʼún kuenta chi ni inkáchi káʼvindó soo su̱ví inkáchi íyo ña̱ kándíxandó. Tá ku̱a̱ʼáka tiempo kítáʼún xíʼinna, kivi xa̱ún ndakanixi̱níún nda̱a̱ táki̱ʼva ndákanixi̱ní na̱kán (1 Cor. 15:33). Ña̱yóʼo kúú ña̱ ndo̱ʼo ta̱ Michael, ku̱mí ku̱i̱ya̱ sa̱kuaʼara ña̱ va̱ʼa koora electricista. Ta̱yóʼo káchira: “Xa̱ʼa̱ ña̱ ku̱a̱ʼání hora xi̱kitáʼi̱n xíʼin na̱ xi̱kaʼvii̱ xíʼin ki̱xáʼíi̱ ndákanixi̱níi̱ ña̱ va̱ʼava íyo ña̱ xi̱keʼéna tá kúú, xi̱xiniso̱ʼona yaa ña̱ va̱ása va̱ʼa, xi̱kaʼa̱nna tu̱ʼun kini ta saátu kǒo ní xi̱ ixato̱ʼóna ná ñaʼá”.

16. ¿Ndáaña sákuaʼayó xíʼin ña̱ káʼa̱n Proverbios 13:20?

¹⁶ (Kaʼvi Proverbios 13:20).e Biblia káʼa̱nña xíʼinyó xa̱ʼa̱ ña̱ kivi kundoʼoyó tá kítáʼanyó xíʼin na̱ yiví na̱ kǒo ndásakáʼnu Jehová. Saátu káʼa̱nña “na̱ xíka xíʼin na̱ ndíchi, ndundíchina”. ¿Ndáaña sákuaʼayó xíʼin ña̱yóʼo? Na̱ kítáʼan xíʼinyó kivi sanáʼa̱na miíyó ña̱ keʼéyó ña̱ va̱ʼa á ña̱ va̱ása va̱ʼa. Ña̱kán chikaa̱ ndee̱ ña̱ kutáʼún xíʼin na̱ yiví na̱ kúni̱ ña̱ si̱í ná koún, na̱ kúʼvi̱-ini xíni Jehová xíʼin ndiʼi níma̱na táki̱ʼva kéʼé miíún (Sal. 101:6, 7; 119:63).

17. ¿Ndáaña kivi keʼún ña̱ va̱ʼa kǒo kutáʼún xíʼin na̱ kǒo ndásakáʼnu Jehová?

¹⁷ ¿Ndáaña kivi keʼún tá kúni̱ún kaʼvi va̱ʼún? Kiʼin kuenta nda̱saa tiempo kítáʼún xíʼin na̱ káʼvi xíʼún. Iin ta̱ hermano ta̱ naní Trenton káchira: “Viíva káʼi̱n xíʼin na̱ káʼvi xíʼi̱n soo va̱ása ku̱a̱ʼá tiempo kítáʼi̱n xíʼinna tá xa̱a̱ ndíʼi káʼvindi̱. Na̱ káʼvi kuití xíʼi̱n kúúna soo va̱ása kúúna migoi̱”. Ta miíún, ¿ndáaña xa̱a̱ ndákanixi̱níún keʼún? Nda̱ka̱tu̱ʼun ña̱yóʼo miíún: “¿Ndáaña va̱ása níxi̱keʼíi̱ tá xi̱kaʼvii̱ escuela? ¿Á íyo ña̱ xi̱niñúʼu viíka keʼíi̱ tiempo saá? ¿Á íyo ña̱ kivi viíka keʼíi̱ tiempo vitin?”. Chikaa̱ ndee̱ ña̱ kutáʼún xíʼin na̱ ndíchi ta kǒo kutáʼún xíʼin na̱ kǒo kúni̱ xíni Jehová.f

18. ¿Ndáaña kivi nda̱ka̱tu̱ʼún miíún? (Koto na̱ʼná).

¹⁸ Viíní ndakanixi̱níún xa̱ʼa̱ ña̱ kéʼún. Nda̱ka̱tu̱ʼun ña̱yóʼo miíún: “¿Á viíka ki̱xáʼíi̱ kítáʼi̱n xíʼin na̱ káʼvi xíʼi̱n? ¿Á káʼi̱n ta keʼíi̱ nda̱a̱ táki̱ʼva kéʼé na̱kán? ¿Á ndákanixi̱níi̱ táki̱ʼva ndákanixi̱ní na̱kán? ¿Ndáaña ndákanixi̱ní Jehová xa̱ʼa̱ ña̱ kítáʼi̱n xíʼin na̱yóʼo?”. (Sal. 1:1). Tá kíʼún kuenta ña̱ ki̱xáʼún kéʼún táki̱ʼva kéʼé na̱kán, ndi̱ku̱n nasamaún ña̱ kéʼún. Chikaa̱ ndee̱ ña̱ kutáʼún xíʼin na̱ yiví ná kúʼvi̱-ini xíni Jehová nda̱a̱ táki̱ʼva kéʼé miíún. Ta kǒo nandóso-iniún ña̱ natúʼún xíʼin na̱ káʼvi xíʼún xa̱ʼa̱ Ndióxi̱ chi saá kúú ña̱ chindeétáʼún xíʼinna ña̱ sakúaʼana xa̱ʼa̱ ña̱ nda̱a̱.

IXATU̱ʼVA MIÍÚN

19. Tá kúma̱níka ndaka̱xiún ña̱ kaʼvi va̱ʼún, ¿ndáaña kivi keʼún ña̱ va̱ʼa koo tu̱ʼvaún? Ka̱ʼa̱n xa̱ʼa̱ iin ejemplo.

¹⁹ Iin na̱ xáʼa̱n xa̱ʼa̱ titu̱n, siʼna kíʼinna kuenta ndáa ña̱ʼa kúú ña̱ ku̱ʼu̱n xíʼinna, tá kúú ti̱kui̱í xíʼin yácha. Ta kúnda̱a̱-inina ndáa míí ku̱ʼu̱nna xa̱ʼa̱nú. Na̱yóʼo kǒo xíni̱na ndáaña kuu chí yichi̱ soo xa̱a̱ ku̱a̱ʼa̱n ña̱ʼa xíʼinna ña̱ kivi chindeétáʼan xíʼinna. Ki̱ʼva saá xíniñúʼu keʼún tá kúni̱ún kaʼvi va̱ʼún. Siʼna chikaa̱ ndee̱ ña̱ vií va̱ʼa kutáʼún xíʼin Ndióxi̱ ta kuniñúʼu ndiʼi ña̱ táxira ndaʼún. Ndakaʼán chi ña̱ ndáyáʼvika kúú ña̱ kuniñúʼún ña̱ xíni̱ún ña̱ va̱ʼa ndasakáʼnún Jehová ta su̱ví ña̱ xa̱ún koún iin na̱ yiví na̱ ndáyáʼviní á ña̱ kuumiíún ku̱a̱ʼá xu̱ʼún (Efes. 6:11-13; 1 Cor. 9:26, 27; 10:31).

20. ¿Ndáa ki̱ʼva kundiku̱ún consejo ña̱ va̱xi nu̱ú 2 Corintios 13:5?

²⁰ Biblia táxiña consejo yóʼo ndaʼa̱yó: “Kiʼin va̱ʼandó kuenta xíʼin ña̱ kéʼéndó ña̱ va̱ʼa kunda̱a̱-inindó á ndixa kándíxandó Ndióxi̱. Na̱ʼa̱kandó xíʼin ña̱ kéʼéndó ndáa na̱ yiví kúúndó” (2 Cor. 13:5). ¿Ndáa ki̱ʼva kundiku̱ún consejo yóʼo nani káʼviún? Ña̱ kivi keʼún kúú ña̱ ndakaʼún xa̱ʼa̱ ku̱mí texto ña̱ ni̱ka̱ʼa̱nyó xa̱ʼa̱ nu̱ú artículo yóʼo. ¿Á kéʼún ña̱ʼa ña̱ chíndeétáʼan xíʼún ña̱ kuyatinkaún nu̱ú Jehová? ¿Á kíʼún kuenta xíʼin ña̱ ndákanixi̱níún ña̱ va̱ʼa kǒo ndakanixi̱níún nda̱a̱ táki̱ʼva ndákanixi̱ní na̱ ñuyǐví yóʼo? ¿Á vií xíniñúʼún tiempo ña̱ kúúmiíún? ¿Á chíka̱ún ndee̱ ña̱ kutáʼún xíʼin na̱ hermano ta kǒo kítáʼún xíʼin na̱ kǒo ndásakáʼnu Jehová? Kivi ndakanixi̱níún xa̱ʼa̱ ña̱yóʼo tá ku̱a̱ʼún escuela, nu̱ú káchíñún á nda̱a̱ ndáaka nu̱ú xíkaún. Chikaa̱ ndee̱ ña̱ viíka kutáʼún xíʼin Ndióxi̱ ni nda̱a̱ ndáaka ña̱ yáʼún nu̱ú. Ta kǒo kaka-iniún ña̱ taxiva Jehová bendición ndaʼún xa̱ʼa̱ ña̱ chíkaa̱níún ndee̱ ña̱ nda̱kú koo iniún xíʼinra (Prov. 3:5, 6).