Kama ná ndasaviíyó ku̱a̱chi

Ná ka̱ʼa̱nyó xa̱ʼa̱ iin ejemplo, tá ná ta̱ʼnu̱ iin lekeyó ta kǒo nda̱a̱ ni iin ña̱ʼa kéʼéyó ña̱ va̱ʼa ndaʼaña xo̱ʼvi̱níkayó saá. Ta sana va̱ása ndaʼa vií lekeyó nda̱a̱ táki̱ʼva ni̱xi̱yoña. Tá kúni̱yó ña̱ ndaʼa lekeyó ta kǒo xo̱ʼvi̱yó, ndi̱ku̱n kama ndukúyó ki̱ʼva ña̱ sandáʼayóña.

Ki̱ʼva saá kivi kundoʼoyó tá va̱ása kama ndásaviíyó ku̱a̱chi ña̱ kúúmiíyó xíʼin iin na̱ hermano. Sana kixáʼayó sa̱a̱ka-iniyó kunitáʼanyó ta va̱ása viíka kutáʼanyó xíʼinna. Xa̱ʼa̱ ña̱kán ni̱ka̱ʼa̱n ta̱ Jesús ña̱yóʼo: ‘Kama ndasaviún ku̱a̱chi’ (Mat. 5:25). Ña̱kán viíní ná koo ña̱ ka̱ʼa̱nyó xíʼin na̱ migoyó ta káxi ná koo ña̱ ka̱ʼa̱nyó. Sana ixayo̱ʼvi̱vaña xíʼinyó keʼéyó ña̱yóʼo. Ná kotoyó u̱vi̱ ña̱ kivi kundoʼoyó.

Ña̱ nu̱ú, sana kúkaʼan nu̱úyó ka̱ʼa̱nyó xa̱ʼa̱ ña̱yóʼo á sana ndákanixi̱níyó ña̱ va̱ʼaka ná kǒo ka̱ʼa̱nyó xa̱ʼa̱ña̱.b Ná ndakanixi̱níyó xa̱ʼa̱ ña̱ ndo̱ʼo ñá Evodia xíʼin ñá Síntique, u̱vi̱ saá náyóʼo xi̱ndasakáʼnuná Ndióxi̱ ta va̱ása níxikuni̱ná ndasaviíná ku̱a̱chi ña̱ xi̱kuumiíná. Ku̱a̱chi yóʼo ndu̱u ndeékaña ta nda̱a̱ ta̱ apóstol Pablo ku̱ndaa̱-ini xa̱ʼa̱ña ni nda̱a̱ chí ñuu Roma ni̱xi̱yora. Ta̱yóʼo ta̱xira consejo ndaʼa̱ná ña̱ ndasaviíná ku̱a̱chi (Filip. 4:2). Tá vitá níxi̱yo ininá, kamava ndasaviíná ku̱a̱chi yóʼo ta ixakáʼnu-ininá xa̱ʼa̱ táʼanná ta viíní kutáʼanná.

Ña̱ u̱vi̱ sana kúni̱yó ña̱ siʼna na̱ yiví kán ná ndukú ña̱ káʼnu-ini nu̱úyó. Soo ná ndakaʼányó, chi ña̱ kúniyó kúú ña̱ vií kutáʼanyó xíʼin na̱ migoyó ta su̱ví ña̱ ka̱ʼa̱nyó ndáana kúúmií ku̱a̱chi. Iin ta̱ doctor ña̱ siʼna kéʼéra kúú ña̱ sándaʼara leke ta su̱víka ña̱ nda̱ka̱tu̱ʼunra miíyó ndáa xa̱ʼa̱ kúú ña̱ ndo̱ʼoyó saá. Ki̱ʼva saá xíniñúʼu keʼéyó xíʼin na̱ migoyó, ná va̱ása ndukúyó ndáana kúúmií ku̱a̱chi. Va̱ʼaka ná chikaa̱yó ndee̱ ña̱ vií kutáʼanyó xíʼinna.

Efesios 4:26 káchiña: “Va̱ása sa̱a̱ndó iníísaá ki̱vi̱”. Ña̱kán tá kúúmiíyó ku̱a̱chi xíʼin iin na̱ hermano, ¿á kivi chikaa̱yó ndee̱ ña̱ ka̱ʼa̱nyó xíʼinna ki̱vi̱ kán? Tá ná keʼéyó saá, chikaa̱yó ndee̱ ña̱ vií kutáʼanyó xíʼinna ta kǒo ku̱a̱chi koo (Efes. 4:1-3).