¿Ndáaña ndátuyó ndakiʼinyó chí nu̱únínu?

Ña̱ káʼa̱n Biblia xa̱ʼa̱ ña̱yóʼo

Biblia káchiña Ndióxi̱ kúni̱ra “ná ndakiʼinyó ña̱ va̱ʼa chí nu̱únínu”a (Jeremías 29:11). Xa̱ʼa̱ ña̱ ta̱xi Ndióxi̱ Biblia ndaʼa̱yó “sándi̱koña iniyó ña̱ va̱ʼa kundatuyó ña̱ taxi Ndióxi̱ ndaʼa̱yó chí nu̱únínu” (Romanos 15:4). Táki̱ʼva sa̱kúaʼayó, consejo ña̱ va̱xi nu̱ú Biblia chíndeétáʼanña xíʼinyó ña̱ kusi̱í-iniyó ndiʼi ki̱vi̱ xa̱ʼa̱ ña̱ ndátuyó ndakiʼinyó chí nu̱únínu.

Nu̱ú artículo yóʼo kotoyó:

• ¿Ndáa ki̱ʼva chíndeétáʼan Biblia xíʼinyó ña̱ si̱í kooyó?

• ¿Ndáaña káʼa̱n Biblia ndakiʼinyó chí nu̱únínu?

• Texto ña̱ káʼa̱n xa̱ʼa̱ ña̱ ndakiʼinyó chí nu̱únínu

¿Ndáa ki̱ʼva chíndeétáʼan Biblia xíʼinyó ña̱ si̱í kooyó?

Ña̱ Biblia chíndeétáʼanña xíʼinyó ña̱ si̱í kooyó, saáchi káʼa̱nña xíʼinyó ndáaña keʼéyó ña̱ va̱ʼa vií kooyó. Ná kotoyó sava ña̱yóʼo.

• Nandukú consejo ña̱ va̱xi nu̱ú Biblia. Salmo 119:105 káchiña: “Tu̱ʼún íyoña nda̱a̱ táki̱ʼva íyo iin ñuʼútúu̱n ña̱ sándáye̱ʼe̱ nu̱úi̱ tá xíkai̱, ña̱ sándáye̱ʼe̱ yichi̱ nu̱ú xíkai̱”. Iin ñuʼu̱ ña̱ yéʼe̱ kivi keʼéña u̱vi̱ ña̱ʼa: va̱ʼa sándáyeʼe̱ña ña̱ íyo yatin nu̱úyó ta saátu va̱ʼa sandáyeʼe̱ña ña̱ íyo xíká nu̱úyó, ki̱ʼva saá chíndeétáʼan consejo ña̱ va̱xi nu̱ú Biblia xíʼinyó ña̱ va̱ʼa ndásaviíyó tu̱ndóʼo ña̱ kúúmiíyó tiempo vitin. Ña̱yóʼo chíndeétáʼan xíʼinyó ña̱ kusi̱í-iniyó ndiʼi ki̱vi̱. Ña̱ sánáʼa̱ Biblia chíkaa̱níña ndee̱ xíʼinyó ta “sákusi̱íníña-iniyó” (Salmo 19:7, 8). Ta saátu Biblia sándáyeʼe̱ña yichi̱ nu̱úyó tá kúnda̱a̱-iniyó xa̱ʼa̱ ña̱ kúni̱ Ndióxi̱ keʼéra xa̱ʼa̱ na̱ yiví xíʼin xa̱ʼa̱ ñuʼú yóʼo chí nu̱únínu. Ta ña̱ ndátuyó ndakiʼinyó ndixa sákusi̱íña-iniyó.

• Taxi ná chindeétáʼan inkana xíʼún. Tá kúúmiíyó ku̱a̱ʼání tu̱ndóʼo sava yichi̱ va̱ása káʼa̱nyó xíʼin na̱ veʼeyó ni na̱ migoyó xa̱ʼa̱ ña̱ ndóʼoyó. Soo tá kéʼéyó saá va̱ása chíndeétáʼanvíña xíʼinyó chi ña̱ Biblia káʼa̱nña ña̱ sana kivi ndaka̱xinyó keʼéyó ña̱ va̱ása va̱ʼa á ña̱ keʼéyó ña̱ sáxo̱ʼvi̱ miíyó (Proverbios 18:1). Na̱ veʼeyó kivi chindeétáʼanna xíʼinyó ta taxina consejo ndaʼa̱yó á kivi ka̱ʼa̱nna xíʼinyó ndáa ki̱ʼva ndasaviíyó iin tu̱ndóʼo ña̱ ndeéní kúúmiíyó (Proverbios 11:14). Kivi sandíkona-iniyó ta ña̱yóʼo taxiña ndee̱ ndaʼa̱yó ña̱ va̱ʼa kundeé-iniyó ya̱ʼayó nu̱ú tu̱ndóʼo (Proverbios 12:25).

• Ka̱ʼa̱n xíʼin Ndióxi̱. Ña̱ Biblia káchiña: “Ndaʼa̱ Jehová sandákoún ndiʼi ña̱ sándi̱ʼi-iniún, ta va̱ása sandákoondaʼa̱ra yóʼó. Va̱ása taxivíra ndakava na̱ kéʼé ña̱ nda̱kú”b (Salmo 55:22). Xa̱ʼa̱ ña̱kán káʼa̱n Biblia ña̱ kúú Jehová “Ndióxi̱ ta̱ chíndeétáʼan xíʼinyó ña̱ kundatuyó ña̱ koo chí nu̱únínu” (Romanos 15:13). Tá káʼún xíʼinra kivi natúʼún xa̱ʼa̱ ndiʼi ña̱ sándi̱ʼi̱-iniún chi ta̱yóʼo ndíʼi̱ní-inira xa̱ʼún (1 Pedro 5:7). Ta ña̱ Biblia káʼa̱nkaña: “Miíra taxi ndee̱ ndaʼa̱ndó, miíra chindeétáʼan xíʼinndó ña̱ nda̱kú koo inindó ta chindeétáʼanra xíʼinndó ña̱ kútu̱ní kunditandó” (1 Pedro 5:10).

• Tu̱ndóʼo ña̱ yáʼún nu̱ú kivi ndasandakúña iniún ña̱ va̱ʼa kundatún ña̱ ndakiʼún chí nu̱únínu. Nu̱ú Biblia, Ndióxi̱ káʼa̱nra xíʼinyó: “Soo na̱ xíniso̱ʼo ña̱ káʼi̱n va̱ʼaní kundoona, va̱ása kundi̱ʼi-inina ta va̱ása yi̱ʼvína tá ná kixi tu̱ndóʼo nu̱úna” (Proverbios 1:33). Iin ñaʼá ñá naní Margaret ñá ñuu Australia ndi̱ʼi-xa̱ʼa̱ ndiʼi ña̱ʼañá tá ndeéní ku̱un sa̱vi̱. Soo nu̱úka ña̱ kundi̱ʼi̱ní-iniñá, sa̱kuaʼañá iin ña̱ ndáyáʼviní: ndiʼi ña̱ʼa ña̱ kúúmiíyó ndíʼi-xa̱ʼa̱vaña. Tá ndi̱ʼi ni̱ya̱ʼañá nu̱ú tu̱ndóʼo yóʼo kíxáʼañá ndíʼi̱-iniñá xa̱ʼa̱ ña̱ ndáyáʼvíka, tá kúú na̱ veʼeñá, na̱ migoñá, ña̱ viíka kitáʼanñá xíʼin Ndióxi̱ xíʼin ña̱ ndátuñá ndakiʼinñá chí nu̱únínu (Salmo 37:34; Santiago 4:8).

¿Ndáaña káʼa̱n Biblia ndakiʼinyó chí nu̱únínu?

Biblia káʼa̱nña ña̱ viíní kundooyó chí nu̱únínu ta saátu ña̱ nduvií nu̱ú ñuʼú yóʼo ta ndiʼi ña̱yóʼo xa̱a̱ ku̱nu̱mí xi̱nuña. Tu̱ndóʼo ña̱ ku̱a̱yaʼayó tiempo vitin náʼa̱ña ña̱ ndóoyó “ki̱vi̱ nu̱ú ndíʼi” (2 Timoteo 3:1-5). Si̱lóʼo kúma̱ní ta sandíʼi-xa̱ʼa̱ Ndióxi̱ ndiʼi tu̱ndóʼo xíʼin ndiʼi ña̱ sáxo̱ʼvi̱ miíyó ta ndiʼi ña̱yóʼo kúú ña̱ keʼé Reino Ndióxi̱ (Daniel 2:44; Apocalipsis 11:15). Xa̱ʼa̱ reino yóʼo kúú ña̱ nda̱kanixi̱ní ta̱ Jesús tá ke̱ʼéra oración ña̱ padrenuestro, ña̱yóʼo ni̱ka̱ʼa̱nra: “Ná kixaa̱ ki̱vi̱ ña̱ kaʼndachíñún. Ná koo ña̱ kúni̱ miíún [...] nu̱ú ñuʼú yóʼo” (Mateo 6:9, 10).

Biblia káʼa̱n káxiña ndáaña kúni̱ Ndióxi̱ keʼéra xa̱ʼa̱ na̱ yiví. Ná kotoyó ndáa tu̱ndóʼo sandíʼi-xa̱ʼa̱ Reino Ndióxi̱:

• Kǒoka so̱ko koo. “Kana ña̱ʼa nu̱ú ñuʼú” (Salmo 67:6).

• Kǒoka kue̱ʼe̱ koo. “Ta nda̱a̱ ni iin na̱ yiví va̱ása ka̱ʼa̱nna ña̱yóʼo: ‘Ndeé ndóʼi̱’” (Isaías 33:24).

• Kǒoka na̱ kuvi. Ndióxi̱ “ndaya̱kúnra ti̱kui̱í nu̱úna, ta va̱ása kuvikana, ni va̱ása kusuchíka-inina, ni va̱ása kuakukana, ni va̱ása xo̱ʼvi̱kana” (Apocalipsis 21:3, 4).