¿Á va̱ʼa keʼéyó xíʼin inkana nda̱a̱ táki̱ʼva ke̱ʼéna xíʼinyó?

Ña̱ káʼa̱n Biblia xa̱ʼa̱ ña̱yóʼo

Ni ndákanixi̱ní iin na̱ yiví ña̱ kivi ixandi̱va̱ʼana xíʼin inkana soo su̱ví ña̱yóʼo kúú ña̱ sánáʼa̱ Biblia, saáchi ña̱yóʼo káchiña: “Va̱ása ka̱ʼún: ‘Keʼíi̱ xíʼinna nda̱a̱ táki̱ʼva ke̱ʼéna xíʼi̱n; chaʼvina xa̱ʼa̱ ña̱ ke̱ʼéna xíʼi̱n’” (Proverbios 24:29). Nu̱ú Biblia va̱xi consejo ña̱ kivi chindeétáʼan xíʼinyó ña̱ va̱ása kuni̱yó ixandi̱va̱ʼayó xíʼin inkana.

Nu̱ú artículo yóʼo ka̱ʼa̱nyó xa̱ʼa̱ ña̱yóʼo:

¿Á va̱ʼa keʼíi̱ xíʼin inkana nda̱a̱ táki̱ʼva ke̱ʼéna xíʼi̱n?

Tá káʼa̱nna iin ña̱ va̱ása va̱ʼa xíʼinyó á tá sáxo̱ʼvi̱na miíyó, ndiʼivayó sáa̱ ta kúni̱yó ná chaʼvina xa̱ʼa̱ ña̱ ke̱ʼéna. Soo Biblia káʼa̱nña ña̱ va̱ása va̱ʼa keʼéyó xíʼin inkana nda̱a̱ táki̱ʼva ke̱ʼéna xíʼinyó. ¿Nda̱chun?

Ndióxi̱ va̱ása kútóora keʼéyó xíʼin inkana nda̱a̱ táki̱ʼva ke̱ʼéna xíʼinyó. Nu̱ú Biblia, Jehováa káʼa̱nra xíʼinyó: “Miíi̱ kúú ta̱ ndatiin ku̱a̱chi xíʼinna xa̱ʼa̱ ña̱ ke̱ʼéna xíʼinndó; yi̱ʼi̱ kúú ta̱ taxi castigo ndaʼa̱na” (Romanos 12:19). Tá ke̱ʼéna iin ña̱ va̱ása va̱ʼa xíʼinyó, nu̱ú Biblia kivi ndani̱ʼíyó consejo ña̱ chindeétáʼan xíʼinyó ndasaviíyó ku̱a̱chi ña̱ kúúmiíyó xíʼin inkana nu̱úka ña̱ ixandi̱va̱ʼayó xíʼinna (Romanos 12:18). Soo tá xa̱a̱ chi̱kaa̱yó ndee̱ ña̱ ndasaviíyó ku̱a̱chi ña̱ kúúmiíyó xíʼin inkana soo kǒo níkivi ndasaviíyó ña̱yóʼo, ¿ndáaña keʼéyó? Biblia káʼa̱nña xíʼinyó ña̱ ná kundaa-iniyó Jehová chi iinlá ta̱kán kúú ta̱ nda̱kúní ndátiin ku̱a̱chi (Salmo 42:10, 11).

¿Ndáaña kéʼé Jehová ña̱ va̱ʼa taxira castigo ndaʼa̱ na̱ kúúmií ku̱a̱chi?

Tiempo vitin táxi Jehová ña̱ ná ndatiin na̱ chíñu ku̱a̱chi xíʼin na̱ kéʼé ña̱ va̱ása va̱ʼa (Romanos 13:1-4). Chí nu̱únínu Jehová ndatiinra ku̱a̱chi xíʼin na̱ ke̱ʼé ña̱ va̱ása va̱ʼa ta chaʼvina xa̱ʼa̱ ña̱ ke̱ʼéna ta va̱ása taxira xo̱ʼvi̱ nda̱a̱ ni iinkana (Isaías 11:4).

¿Ndáaña kivi keʼéyó ña̱ va̱ása kuni̱yó ixandi̱va̱ʼayó xíʼin inkana?

Va̱ása kamaní keʼéyó iin ña̱ʼa (Proverbios 17:27). Tá kéʼé iin na̱ yiví iin ña̱ va̱ása va̱ʼa xa̱ʼa̱ ña̱ sáa̱na, so̱ndíʼi ndándikó-inina. Soo na̱ yiví na̱ siʼnaka ndákanixi̱ní xa̱ʼa̱ ña̱ keʼéna, va̱ʼaníka íyo ña̱ ndáka̱xinna (Proverbios 29:11).
Koto nda̱chun ke̱ʼéna saá xíʼún (Proverbios 18:13). Tá ke̱ʼéna iin ña̱ va̱ása va̱ʼa xíʼún, ndakanixi̱ní xa̱ʼa̱ ña̱yóʼo: “¿Á kúnda̱a̱-inii̱ nda̱chun kúú ña̱ ke̱ʼé na̱ yiví kán saá xíʼi̱n? ¿Á íyo iin ña̱ ndo̱ʼona tá ke̱ʼéna saá xíʼi̱n? ¿Á sana va̱ása níxi̱kuni̱na keʼéna ña̱yóʼo?”. Sava yichi̱ kivi ndakanixi̱níyó ña̱ xi̱kuni̱ miína kúú ña̱ ke̱ʼéna ña̱ va̱ása va̱ʼa xíʼinyó soo mií ña̱ nda̱a̱ ña̱ ku̱u sanava kúúña.

Ña̱ ndákanixi̱ní savana xa̱ʼa̱ ña̱yóʼo

Ña̱ ndákanixi̱ní savana: Biblia káʼa̱nña ña̱ kiviva keʼéyó xíʼin inkana nda̱a̱ táki̱ʼva ke̱ʼéna xíʼinyó, chi káchiña: “Tá sándakavana nu̱ʼu iinna saátu xíniñúʼu sandákavana nu̱ʼu mií na̱yóʼo” (Mateo 5:38).

Ña̱ nda̱a̱: Ña̱yóʼo xi̱kuu ley ña̱ ta̱xi Ndióxi̱ ndaʼa̱ na̱ ñuu Israel soo va̱ása níxi̱taxiña ña̱ keʼéna xíʼin inkana nda̱a̱ táki̱ʼva ke̱ʼéna xíʼinna. Ley yóʼo xi̱chindeétáʼanña xíʼin na̱ xi̱ndatiin ku̱a̱chi ña̱ va̱ʼa vií ndaka̱xinna castigo ña̱ taxina ndaʼa̱ na̱ ke̱ʼé ña̱ va̱ása va̱ʼa (Deuteronomio 19:15-21).b

Ña̱ ndákanixi̱ní savana: Xa̱ʼa̱ ña̱ va̱ása káʼa̱n Biblia ña̱ keʼéyó xíʼin inkana nda̱a̱ táki̱ʼva ke̱ʼéna xíʼinyó, ña̱yóʼo kúni̱ kachiña ña̱ va̱ása kivi ndakiʼinyó tu̱ʼunyó.

Ña̱ nda̱a̱: Kiviva ndakiʼinyó tu̱ʼunyó ta kivitu ku̱ʼu̱nyó nu̱ú na̱ chíñu tá ke̱ʼéna iin ña̱ va̱ása va̱ʼa xíʼinyó. Soo Biblia káʼa̱nña xíʼinyó: “Va̱ʼaka ná ku̱ʼu̱nyó tá kúma̱níka kixáʼa na̱átáʼanyó” (Proverbios 17:14).

a Biblia káʼa̱nña ña̱ ki̱vi̱ Ndióxi̱ kúú Jehová.

b Tá kúni̱ún kunda̱a̱ka-iniún xa̱ʼa̱ ña̱yóʼo kaʼvi artículo ña̱ naní “¿Ndáaña kúni̱ kachi ley ña̱ káʼa̱n ‘tá sátukue̱ʼe̱na nduchúnu̱ú inkana saátu xíniñúʼu keʼéna xíʼin na̱yóʼova’?”.