¿Ndáa señal kúú ña̱ koo tiempo so̱ndíʼi?

Ña̱ káʼa̱n Biblia xa̱ʼa̱ ña̱yóʼo

Ña̱ Biblia káʼa̱nña xa̱ʼa̱ sava ña̱ʼa ña̱ kuu tiempo ña̱ ndóoyó vitin ta ña̱yóʼo chindeétáʼan xíʼinyó ña̱ kunda̱a̱-iniyó ña̱ xa̱a̱ ndóoyó tiempo so̱ndíʼi ta “xa̱a̱ ku̱yatin ndiʼi-xa̱ʼa̱ ñuyǐví yóʼo” (Mateo 24:3). Ña̱ Biblia káʼa̱nña ña̱ tiempo yóʼo naníña “ki̱vi̱ so̱ndíʼi” xíʼin “ki̱vi̱ nu̱ú ndíʼi” (Daniel 8:17, 19; 2 Timoteo 3:1).

Sava profecía ña̱ káʼa̱n Biblia ña̱ kuu tiempo so̱ndíʼi

Ña̱ Biblia ni̱ka̱ʼa̱nña xa̱ʼa̱ sava ña̱ʼa ña̱ inkáchi kuu ta ña̱yóʼo na̱ʼa̱ña nu̱úyó ña̱ kúúña “señal” ña̱ xa̱a̱ ndóoyó tiempo so̱ndíʼi (Lucas 21:7). Ná ka̱ʼa̱nyó xa̱ʼa̱ sava ejemplo:

Koo guerra iníísaá ñuyǐví. Ta̱ Jesús ni̱ka̱ʼa̱nra ña̱ “kanitáʼan iin ñuu xíʼin inka ñuu, ta iin país xíʼin inka país” (Mateo 24:7). Ta nu̱ú Apocalipsis 6:4 káʼa̱nña xa̱ʼa̱ iin ta̱ yósó kuáyi̱ ña̱ ndánaʼa̱ra guerra, ta ta̱yóʼo kúú ta̱ nda̱kiʼin “chiñu ña̱ sakákura ku̱a̱chi nu̱ú ñuʼú”.

So̱ko. Ta̱ Jesús ni̱ka̱ʼa̱nra ña̱ koo “so̱ko” (Mateo 24:7). Tutu ña̱ Apocalipsis káʼa̱nña xa̱ʼa̱ inka ta̱ yósó kuáyi̱, ta nu̱ú yáʼa ta̱yóʼo ku̱a̱ʼa̱nra íyoní so̱ko (Apocalipsis 6:5, 6).

Ndeéní ta̱an. Ta̱ Jesús ni̱ka̱ʼa̱nra ña̱ “ndeéní ta̱an” ta ña̱yóʼo kooña iníísaá nu̱ú ñuʼú (Mateo 24:7; Lucas 21:11). Ndeéní ta̱an ta xo̱ʼvi̱ní na̱ yiví, ta saátu ku̱a̱ʼánína kuvi.

Kue̱ʼe̱. Ta̱ Jesús ni̱ka̱ʼa̱nra ña̱ “kooní kue̱ʼe̱ ña̱ xíkun” (Lucas 21:11).

Na̱ kéʼé ña̱ va̱ása va̱ʼa. Ndiʼi tiempo íyo na̱ yiví na̱ íxandi̱va̱ʼa xíʼin inkana, soo ta̱ Jesús ni̱ka̱ʼa̱nra ña̱ tiempo so̱ndíʼi kininíka keʼé na̱ yiví (Mateo 24:12).

Na̱ íxayaku̱a̱ nu̱ú ñuʼú yóʼo. Nu̱ú Apocalipsis 11:18 káʼa̱nña ña̱ sándiʼi-xa̱ʼa̱ na̱ yiví ñuʼú yóʼo. Ña̱yóʼo káʼa̱nña xa̱ʼa̱ na̱ yiví na̱ kéʼé ña̱ kini ta sándiʼi-xa̱ʼa̱na ñuʼú yóʼo.

Kininíka kixáʼa keʼé na̱ yiví. Ña̱ Biblia káʼa̱nña ndáa ki̱ʼva koo na̱ yiví tiempo so̱ndíʼi, káchiña: “Saáchi na̱ yiví […] va̱ása taxina tíxa̱ʼvi, va̱ása nda̱kú koo inina […], va̱ása kindo̱o-inina xíʼin ni iin ña̱ʼa, ka̱ʼa̱nna tu̱ʼun síkí, va̱ása ka̱ʼnu̱-inina, ndi̱va̱ʼaní koo inina, va̱ása kuʼvi̱-inina kunina ña̱ va̱ʼa, xi̱kótáʼanna, so̱ʼoní koona, ni̱nuní kunina” (2 Timoteo 3:1-4). Xa̱ʼa̱ ña̱ kininí keʼé na̱ yiví, Biblia káʼa̱nña ña̱ tiempo yóʼo kininí kooña “ta kǒo kundeé-inina xíʼinña”.

Va̱ása ixato̱ʼókana na̱ veʼena. Nu̱ú 2 Timoteo 3:2, 3, ña̱ Biblia káʼa̱nña ña̱ ku̱a̱ʼání na̱ yiví “va̱ása kuʼvi̱-inina kunina na̱ veʼena” ta na̱ va̱lí “va̱ása kandíxana ña̱ káʼa̱n na̱ yivána”.

Va̱ása kuʼvi̱ka ini na̱ yiví kunina Ndióxi̱. Tá ni̱ka̱ʼa̱n ta̱ Jesús ña̱ “ku̱a̱ʼání na̱ yiví kǒo kuʼvi̱ka-inina kunitáʼanna” ña̱ xi̱kuni̱ kachira xi̱kuu ña̱ ku̱a̱ʼání na̱ yiví va̱ása kuʼvi̱ka-inina kunina Ndióxi̱ (Mateo 24:12). Ta nu̱ú 2 Timoteo 3:4 káʼa̱nña, tiempo so̱ndíʼi na̱ yiví “kutóoníkana keʼéna ña̱ kúni̱ miína nu̱úka ña̱ kuʼvi̱-inina kunina Ndióxi̱”.

Ka̱ʼa̱nna ña̱ xáʼa̱nna veʼe-ñu̱ʼu. Nu̱ú 2 Timoteo 3:5, káʼa̱nña ña̱ ka̱ʼa̱n na̱ yiví ña̱ ndásakáʼnuna Ndióxi̱, “soo xíʼin ña̱ kéʼéna na̱ʼa̱na ña̱ su̱ví ña̱ ndixa kúúña”.

Va̱ʼaníka kunda̱a̱-inina xíʼin ña̱ káʼa̱n Biblia. Libro ña̱ ka̱ʼyi ta̱ Daniel káʼa̱nña ña̱ “ki̱vi̱ so̱ndíʼi” ku̱a̱ʼánína va̱ʼaníka kunda̱a̱-inina xíʼin ña̱ káʼa̱n ña̱ Biblia. Tá kúú, va̱ʼaníka kunda̱a̱-inina xa̱ʼa̱ profecía ña̱ xa̱a̱ xínu tiempo vitin (Daniel 12:4).

Natúʼunna xa̱ʼa̱ ña̱ káʼa̱n Biblia iníísaá ñuyǐví. Ta̱ Jesús ni̱ka̱ʼa̱nra ña̱ “natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo” (Mateo 24:14).

Va̱ása kandíxana ña̱ xa̱a̱ ndóoyó ki̱vi̱ so̱ndíʼi. Ta̱ Jesús ni̱ka̱ʼa̱nra ña̱ va̱ása kandíxa na̱ yiví ña̱ xa̱a̱ ku̱nu̱míní ndiʼi-xa̱ʼa̱ na̱ kéʼé ña̱ va̱ása va̱ʼa (Mateo 24:37-39). Ta saátu 2 Pedro 3:3, 4 káʼa̱nña ña̱ kusi̱kindaana ta ka̱ʼa̱nna ña̱ nda̱a̱ táki̱ʼva íyo ñuyǐví yóʼo tá na̱kuva̱ʼaña i̱xaa Ndióxi̱ tá xa̱ʼa̱, saá íyoña vitinva.

Xi̱nu ndiʼi profecía. Ta̱ Jesús ni̱ka̱ʼa̱nra ña̱ inkáchi xi̱nu ndiʼi profecía ña̱ xa̱a̱ ni̱ka̱ʼa̱nyó xa̱ʼa̱ yóʼo (Mateo 24:33).

¿Á ndóoyó tiempo so̱ndíʼi?

Saá íyovaña. Ndiʼi ña̱ kúu nu̱ú ñu̱ʼu yóʼo xíʼin ña̱ káʼa̱n Biblia náʼa̱ña ña̱ ndóoyó tiempo so̱ndíʼi, ta ña̱yóʼo ki̱xáʼaña ku̱i̱ya̱ 1914 chi ku̱i̱ya̱ yóʼo kúú ña̱ ki̱xáʼa Primera Guerra Mundial. Nu̱ú video yóʼo kotoún ña̱ kúu iníísaá ñuyǐví ta ña̱yóʼo náʼa̱ña ña̱ xa̱a̱ ndóoyó tiempo so̱ndíʼi:

Tá ku̱i̱ya̱ 1914, ki̱xáʼa xáʼndachíñu Reino Ndióxi̱ chí ndiví. Ña̱ nu̱ú ña̱ ke̱ʼé ta̱ Jesús tá ki̱xáʼara xáʼndachíñura kúú ña̱ ta̱vára ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra. Nani tiempo saá chí nu̱ú ñuʼú yóʼo kúú nu̱ú ki̱xáʼa xáʼndachíñu ta̱ Ndi̱va̱ʼa (Apocalipsis 12:7-12). Kininí kéʼé na̱ yiví ta kǒo íxato̱ʼóna inkana, ndiʼi ña̱yóʼo náʼa̱ña ña̱ ta̱ Ndi̱va̱ʼa kúú ta̱ xáʼndachíñu nu̱ú ñuʼú yóʼo ta chíkaa̱ra inina ña̱ saá keʼéna. Xa̱ʼa̱ ña̱kán, ki̱vi̱ so̱ndíʼi yóʼo yo̱ʼvi̱níña ta kǒo kundeé-inina xíʼinña (2 Timoteo 3:1).

Ku̱a̱ʼání na̱ yiví ndíʼi̱ní-inina xa̱ʼa̱ tiempo ña̱ ndóoyó vitin. Ta ndíʼi̱níka-inina xa̱ʼa̱ ña̱ kininíka ki̱xáʼa kéʼé na̱ yiví. Savana yíʼvinína ta ndákanixi̱nína ña̱ sandíʼi-xa̱ʼa̱ táʼan miíyó na̱ yiví.

Soo sava na̱ yiví ni ndíʼi̱va-inina xa̱ʼa̱ ña̱ kúu nu̱ú ñuʼú yóʼo soo ni saá kúnda̱a̱-inina ña̱ va̱ʼaníva kundooyó chí nu̱úni̱nu. ¿Nda̱chun? Saáchi kándíxana ña̱ iinlá Reino Ndióxi̱ kúú ña̱ kivi sandíʼi-xa̱ʼa̱ ndiʼi tu̱ndóʼo ña̱ íyo nu̱ú ñuʼú yóʼo (Daniel 2:44; Apocalipsis 21:3, 4). Nani ndátuna ña̱ saxínu Ndióxi̱ ña̱ ni̱ka̱ʼa̱nra keʼéra, tu̱ʼun ña̱ ni̱ka̱ʼa̱n ta̱ Jesús chíkaa̱níña ndee̱ xíʼinna ta sándi̱koña-inina, chi ta̱ Jesús ni̱ka̱ʼa̱nra: “Soo na̱ ná kundeé-ini nda̱a̱ nu̱ú ndíʼi kúú na̱ ka̱ku” (Mateo 24:13; Miqueas 7:7).