MWAHA 10

Soopatuxiwa Soomunepani—Sinanivolowela Hai?

Ankeelo annaakhaviherya achu?

Minepa yoonanara inaavolowela achu mwawiihai?

Hiyaano ninnaphwanela woova minepa yoonanara?

 1. Ntakhara heeni hiyaano ninnaphwanela ochuna ohuserya vooloca sa ankeelo?

OOMUSUWELA muchu onaphitaanyerya ohuserya echu vooloca sa emusi awe. Moophwanaphwana omusuwela Yehova onaphitaanyerya osuwela phaama emusi awe ya ankeelo. Piipiliya onnaloca wi ankeelo anamwane a Muluku. (Yobi 38:7) Vanonto, tuuvi ori muteko wa ankeelo mu yookhwela ya Muluku? Awo annaphara muteko mu mwaha wa achu? Ankeelo annavolowela okumi anyu? Wakhala wi ti hiihaa, mwawiihai?

 2. Taani aapatunxe ankeelo, nave awo ari akavi?

² Piipiliya onnaloca sa ankeelo ikwaha sincipale. Hankooni nthokororye soothoonyerya iha vakhaani wi nihuserye vooloca sa ankeelo. Taani aapatunxe ankeelo? Kolosi 1:16 onii: “Ti mwa yowo [Yesu Kiristu] Muluku opatunseiye sothene inakhala wirimu ni vathi va.” Mwawiihiiha, soopatuxiwa soomunepani soothene siniichaniwa ankeelo ipatuxiwe ti Yehova Muluku moorweela wa Mwanawe oopacerya opatuxiwa. Mano arivo ankeelo akavi? Piipiliya onooniherya wi aapatuxiwa ankeelo masana masaneene waakhulela masana masaneene, nave oothene awo takuru.—Salumu 103:20.a

 3. Tiheeni Yobi 38:4-7 onathariheiye vooloca sa ankeelo?

³ Masu a Muluku, Piipiliya, annanleela wi vaavaa elapo yavathi yaapakiwaaya, ‘Ankelo [anamwane a Muluku] yàkhuwela wa nthowa na wèliwa murima.’ (Yobi 38:4-7) Mwawiihiiha, ankeelo yaakhalawo khalai achu ehaakumve opatuxiwa, naari ehaakumve opatuxiwa elapo yavathi. Makupa yaala a Piipiliya annooniherya tho wi ankeelo aakhalano muupuwelo, nthowa nawi Piipiliya onnaloca wi awo “yàkhuwela” moohakalala. Nkoonani wi anamwane oothene a Muluku yaahakalala vamoha. Mu elukuluku yeele, ankeelo oothene yaari makupa a emusi yawiiwanana emurumeelaka Yehova Muluku.

OKHAVIHERYA WA ANKEELO

 4. Piipiliya onooniherya hai wi ankeelo oororomeleya annaathokororya achu?

⁴ Opacerya vaavaa yeerenlaaya onamoona opatuxiwa wa achu oopacerya, soopatuxiwa soomunepani soororomeleya sinnaakhaviherya achu aachu ni weeca wa yookhwela ya Muluku. (Masiposipo 8:30, 31; 1 Pedro 1:11, 12) Vanonto, voovira wa elukuluku, ankeelo yaahoona wi achu ancipale mu emusi ya nloko naachu yaahiya omurumeela Mpatuxa aya oosivela. Moohikhwa minikwa eyo yaahaathananiha ankeelo oororomeleya. Moohiyana, vaavaa muchu onacharuweiye nave akookela wa Yehova, ‘onnakhalawo ohakalala ni ankelo.’ (Luka 15:10) Woona wi ankeelo annuukhuwa vancipale ni okhala phaama wa achu oothene yaale anamurumeela Muluku, hiyo nnanwerya wiiwexexa ntakhara heeni Yehova wiiliwiili aanaapharihela muteko ankeelo wi aalipihe nave awaakihe arummwa awe oororomeleya veelaponi yavathi. (Mwaalakhanye Ahebri 1:7, 14.) Thokororyani sawooniherya vakhaani.

 5. Sawooniherya taani sa okhaviherya wa ankeelo nnaphwanyaahu Mpiipiliyani?

⁵ Ankeelo eeli yaamukhaviherya mulopwana eekhaikhai Looti ni anamwane awe aasithiyana wi evuluwe va otoloxiwa wa miceche yoonanara ya Sotoma ni Komora moorweela wa waakumiherya awo vaate va miceche iho. (Maphatxuwelo 19:15, 16) Sivinre Iyaakha sincipale, mulipa a miririmo Taniyeli aavonyeriwa munlicini na amwaco, nyenya owo aavuluwa, nave aahi: “Muluku aka òmuruma Munkelo awe, nave ola òmaka eyano ya amwatxo.” (Daniyeli 6:22) Mu nsana noopacerya E.K., munkeelo mmoha aamoopola murummwa Petro mukariposo. (Saweriwa T’arummwa 12:6-11) Nyenya tho ankeelo yaamukhaviherya Yesu omapacereryo wa orummwa wawe wa veelaponi yavathi. (Marko 1:13) Elukuluku vakhaani Yesu ahaakumve okhwa, munkeelo mmoha aarwa wa yoowo wi “amulipihe”. (Luka 22:43) Okhaviherya iwo wa ankeelo waamulipiha vancipale Yesu mu ilukuluku seiye soochuneyaxa sa okumi awe!

 6. (a) Olelo ankeelo anawaakiha achu a Muluku mwawiihai? (b) Makoho taani nnahaalaahu othokororya hiihaano?

⁶ Olelo, ankeelo hanarwa mmukhalelo wa wooneya wa achu a Muluku veelaponi yavathi. Naamwi achu ehiweryaka owoona ankeelo, awo annawaakiha achu a Muluku mwa echu eri yoothene enanariha mukhalelo woomunepani. Piipiliya onii: “Munkelo a Apwiya onnemela vakhiviru va yale anatxitximiha ni onnàvulusa.” (Salumu 34:7) Ntakhara heeni masu ala toohakalaliha? Nthowa nawi aakhalawo ankelo awoopiha, oonanara, yaawo anachuna onitoloxa! Mano awo taani? Arweenle woowi? Mano awo aneererya mwawiihai oniphoreiha? Wi niphwanye maakhulo a makoho ala, hankooni nthokororye echu yeeyo yeeren’ye omapacereryo wa mwaha wa achu.

SOOPATUXIWA SOOMUNEPANI SEIYO SIRI AMWIICANI AHU

 7. Satana aawenrye waahuweliha achu akavi wi ehimurumeele Muluku?

⁷ Ntoko nihusenryaahu Mmwaha 3 wa liivuru yoola, munkeelo mmoha aahunnuwiha yoochuna wi aalamulele akina nave mwawiihiiha aamwaryeya moovanyihana ni Muluku. Voovira elukuluku munkeelo ola aasuweliwa ntoko Satana Musaserya. (Wupulula 12:9) Mu iyaakha sawaakhwana 1.600 amanle onwoka Haava, Satana aawerya waahuweliha achu ancipale wi ehimurumeele Muluku, ohiya achu vakhaani oororomeleya, ntoko Haavele, Henoke, ni Noowa.—Ahebri 11:4, 5, 7.

 8. (a) Ankeelo akina yaathatunwe hai ekhala masololo? (b) Mano wi evuluwe mu Maahi Mancipale mmahiku a Noowa, tiheeni masololo yeenraaya?

⁸ Mu mahiku a Noowa, ankeelo akina yaamwaryeya moovanyihana ni Yehova. Awo yaahiya mapuro aya mu emusi ya Muluku ya wirimu, erwa veelaponi yavathi, nave ewara mwiili woomuchu. Ntakhara heeni? Mu Maphatxuwelo 6:2 ninnaalakhanya: “Àna a Muluku yàhona wi anamwane àsithiyana a atxhu yàri òrèra nave yàhathanla yale yàtxhunnaya” yaathela. Nyenya Yehova heemerenrye wi saweera sa ankeelo awo ni yookhumelela ya onanara wa achu ipwahiherye okhala. Owo aaruuha Maahi Mancipale veelaponi yoothene yavathi yaawo yaatolonxe achu oothene oonanara nave aakhapelela arummwa awe oororomeleya pahiru. (Maphatxuwelo 7:17, 23) Mwawiihiiha, ankeelo naari masololo oomwaryeya awo, yaahiya mwiili aya woomuchu nave ekookela wirimu ntoko soopatuxiwa soomunepani. Awo yaathanla mukhataaya okhala o makupa a Musaserya, yoowo ori “mutokwene a asatana [masololo].”—Mateu 9:34.

 9. (a) Tiheeni yeeren’ye ni masololo vaavaa awo yaakookenlaaya wirimu? (b) Hiyaano nnahaala othokororya eheeni vooloca sa masololo?

⁹ Vaavaa ankeelo oohiiwelela yaakookenlaaya wirimu awo yaakhoociwa, hiihaa ntoko mulipa oolamulela aya, Satana. (2 Pedro 2:4) Naamwi awo hiihaano ehiweryaka owara miili sa achu, awo nivano annaaceenyerya achu weera ichu soonanara. Mwevelevelo, akhaviheryiwaka ni masololo awe, Satana ‘onnanyenka elapo yothene.’ (Wupulula 12:9; 1 Yohani 5:19) Mano mwawiihai? Chiryene, masololo annapharihela muteko makhalelo mancipale wi yaahuwelihe achu. (Mwaalakhanye 2 Korinto 2:11.) Hankooni nthokororye makhalelo yaawo.

MASOLOLO ANAAHUWELIHA ACHU MWAWIIHAI

10. Olosiwa tiheeni?

¹⁰ Wi yaahuwelihe achu, masololo anapharihela muteko olosiwa. Olosiwa ori wiiwanana ni masololo, muchu waavya masololo naari moorweela wa namulosiwe. Piipiliya onnavaanya olosiwa nave onnanlopola wi nihiye ichu soothene siniiwanana ni olosiwa. (Galasya 5:19-21) Masololo anapharihela muteko olosiwa hiihaa ntoko mulipa oototha ihopa onaphariheleiye muteko yoomesano. Mulipa oototha ihopa onnapharihela muteko soomesano soohiyana hiyana wi aphare ihopa soohiyana hiyana. Moophwanaphwana, minepa yoonanara ennapharihela muteko makhalelo oohiyana hiyana a olosiwa wi yaahuwelihe achu a miloko yoothene.

11. Waavya ehako tiheeni, nave ntakhara heeni nnaphwanela osepa?

¹¹ Mukhalelo mmoha wa yoomesano enaphariheliwa muteko ni masololo ori waavya ehako. Waavya ehako tiheeni? Ti ochuna osuwela sa muhoolo naari echu ehinasuweliwa. Aakhalavo makhalelo mancipale a waavya ehako ntoko ala: waavyerya ehako itheneeri, ehako ya oloola, waavya ehako weererya osuwela sa muhoolo, okhwiri, ni olowa. Naamwi achu ancipale yuupuwelaka wi waavya ehako tahi echu yoonanara, Piipiliya onnooniherya wi alipa a ihako ni minepa yoonanara anaphara muteko vamoha. Ntoko yawooniherya, Saweriwa T’arummwa 16:16-18 onnaloca sa “munepa wawanyiherya” yoowo waamweeriha namwali owerya olosiwa. Nyenya owo aayeleela owerya iwo vaavaa nsololo nlo naakumihiwaaya mwa yoowo.

12. Ntakhara heeni weererya oloca ni achu ookhwa ti yawoopiha?

¹² Masololo annaahuweliha tho achu moorweela wa waaceenyerya waakoherya achu ookhwa. Achu anathanana nthowa na okhwa wa muchu yaamusivelaaya ikwaha sincipale annahuwelihiwa ni muupuwelo woonanara vooloca sa achu akhwile. Namulosiwe onanwerya ovaha sooleeliherya naari oloca ni nsu nnaphwanaphwana ni nsu na muchu yoole okhwile. Ntoko yookhumelela, achu ancipale annaroromela wi achu ookhwa akumi nave wi oloca ni yaawo onahaala waakhaviherya achu ovilela ni othanana waya. Nyenya “ohakararya” iwo ti watheru ni wawoopiha. Ntakhara heeni? Nthowa nawi masololo annawerya otakiherya nsu na muchu ookhwa nave annamvaha namulosiwe miselo vooloca sa muchu owo okhwile. (1 Samuwele 28:3-19) Nave tho, hiihaa ntoko nihusenryaahu Mmwaha 6, achu ookhwa haanono okumi. (Salumu 115:17) Mwawiihiiha muchu ori oothene “oni asyeke wakoha atxhu òkhwa” onahuwelihiwa ni minepa yoonanara nave onakhala moovanyihana ni yookhwela ya Muluku. (Mwaalakhanye Malamulo 18:10, 11; Isaiya 8:19) Vanonto, khalani oolipelela wi mukhooce yoomesano ela yawoopiha masololo anapharihelaaya muteko.

13. Tiheeni achu ancipale yaakhala yoovaka masololo awenryaaya weera?

¹³ Minepa yoonanara ennaahuweliha nave tho ennawoopopiha achu. Olelo, Satana ni masololo awe annasuwela wi awo ahanleno “elukuluku . . . vakhani” emalihiwe, mwawiihiiha awo aatepa oluwa opwaha khalai. (Wupulula 12:12, 17) Naamwi eri hiiha, achu masana masaneene yaawo yaakhala mahiku oothene yoovaka minepa yoonanara aawerya otaphuwa. Mano awo awenrye woopowa mwawiihai? Tiheeni muchu onaphwaneleiye weera wakhala wi oovoloweliwa ni olosiwa?

NNII NIVILELE HAI MINEPA YOONANARA

14. Moophwanaphwana ni Akiristu a nsana noopacerya o Efeso, nnii niwerye hai otaphuwa mwa minepa yoonanara?

¹⁴ Piipiliya onnanleela ti mwawiihai nneeraahu niwerye ovilela minepa yoonanara nave tho ti mwawiihai nneeraahu niwerye otaphuwa mwa seiyo. Thokororyani yootakiherya ya Akiristu a nsana noopacerya a muceche wa Efeso. Akina a yaawo yaaneerano onamulosiwe ehaakumve okhala Akiristu. Vaavaa yaathanlilaaya ohiya olosiwa, tiheeni awo yeenraaya? Piipiliya onii: “Antxipale mwa alipa a ihako yàthukumana ni yàhakusa malivuru aya, wi yeyeli we vamithoni va atxhu othene.” (Saweriwa T’arummwa 19:19) Moorweela wa oweeyela aliivuru aya awiisaciherya, Akiristu yaale akhalai aavaha yootakiherya wa oothene yaale anachuna ovilela minepa yoonanara olelo. Onakhweleya wi achu anachuna omurumeela Yehova ehiye ichu soothene siniiwanana ni onamulosiwe. Eyo enaphitaanyerya aliivuru, irevista, ixilema, ikaarata sa olosiwa, ni macipo ookaravaariwa yaawo anaceenyerya miteko sa olosiwa nave inakhala ntoko sooreera ni sootannya murima. Enaphitaanyerya, tho, ichu soovaha ekari naari ichu ikina sa wiikicha moovanyihana ni ichu soonanara.—1 Korinto 10:21.

15. Tiheeni nnaphwanelaahu weera wi nivilele minepa yoonanara?

¹⁵ Iyaakha vakhaani Akiristu o Efeso emanle oweeyela aliivuru aya a wiisaciherya, murummwa Paulo aahaarepela sa “Owana . . . ni minepa sonanara sosulu.” (Éfeso 6:12) Masololo hiyaachanwe. Awo yaanapwahiherya weererya waahuweliha. Vanonto, echu taani ekina Akiristu ale yaaphwanelaaya weera? Paulo aaloca: “Mwetxeke mahiku othene ni eyakiha ya wemererya, munaweryanyuno otxipiha inyakara sovarela sa musaserya.” (Éfeso 6:16) Wakhala wi eyaakiho ya wemererya naari nroromelo nahu ti noolipa, ovilela wahu minepa yoonanara onahaala okhala woolipa.—Mateu 17:20.

16. Hiyaano nnahaala olipiha nroromelo nahu mwawiihai?

¹⁶ Vanonto, nnahaala olipiha nroromelo nahu mwawiihai? Moorweela wa omuhuserya Piipiliya. Olipa wa exiri onarweela olipa wa mathipelo aya. Mmukhalelo mmohamoha, olipa wa nroromelo nahu nnarweela vancipale olipa wa mathipelo aya, nsuweliho neeparipari na Masu a Muluku, Piipiliya. Wakhala wi ninnaalakhanya nave ninnamuhuserya Piipiliya mahiku oothene, nroromelo nahu nnahaala okhala noolipa. Ntoko exiri yoolipa, nroromelo nnahaala onikhaviherya wi nihivoloweliwe ni minepa yoonanara.—1 Yohani 5:5.

17. Echu taani enakhweleya wi niwerye ovilela minepa yoonanara?

¹⁷ Echu taani ekina Akiristu o Efeso yaaphwanelaaya weera? Awo yaanachuna waakihiwa nthowa nawi yaakhala mmucecheni waasaren’ye ni masololo. Mwawiihiiha Paulo ahaaleela: “Ni mavekelo a miloko miloko nvekeleke mahiku othene mwa munepa.” (Éfeso 6:18) Woona wi hiyaano tho nnakhala mu elapo esaren’ye ni masololo, ovekela mweeparipari wa Yehova nivekaka waakiha wawe ti woochuneyaxa wi nivilele minepa yoonanara. Mwevelevelo, nnakhwela opharihela muteko nsina na Yehova mu mavekelo ahu. (Mwaalakhanye Masiposipo 18:10.) Chiryene, nnaphwanela opwahiherya ovekela wa Muluku wi anivuluxe “wa sonanara” Satana Musaserya. (Mateu 6:13) Yehova onahaala waakhula mavekelo eeparipari ntoko yaawo.—Salumu 145:19.

18, 19. (a) Ntakhara heeni nnaphwanela ororomela wi nnahaala ovotha ekhoco ahu moovanyihana ni soopatuxiwa soomunepani soonanara? (b) Nikoho taani nnahaala othokororyiwa mmwaha onacharela?

¹⁸ Minepa yoonanara ti yawoopiha, nyenya hinnaphwanela woova seiyo wakhala wi ninnamukhooca Musaserya nave ninnamwaacamela Muluku moorweela wa weera yookhwela Awe. (Mwaalakhanye Tiyako 4:7, 8.) Ikuru sa masololo ti sookotakota. Awo aalakiwa mmahiku a Noowa, nave awo anaweherya othorihiwa omakuchuwelo. (Yuda 6) Muhicuwale tho wi nookhalano waakiha wa ankeelo a Yehova. (2 Mamwene 6:15-17) Ankeelo awo annachuna onikhaviherya ovilela ni minepa yoonanara. Ankeelo eekhaikhai annanilipiha chiryene. Hankooni nipwahiherye omwaacamela Yehova ni emusi awe ya soopatuxiwa soomunepani soororomeleya. Hankooni tho nsepe makhalelo oothene a olosiwa nave nipharihele muteko ikano sa Masu a Muluku mu ilukuluku soothene. (1 Pedro 5:6, 7; 2 Pedro 2:9) Vanonto, nnaphwanela ororomela wi nnahaala ovootha ekhoco ahu moovanyihana ni soopatuxiwa soomunepani soonanara.

¹⁹ Nyenya ntakhara heeni Muluku oheemererya wi masololo etannyeke ichu soonanara wa achu? Nikoho nla nnahaala waakhuliwa mmwaha onacharela.

[Nsu na vathi]

PIIPILIYA ONAHUSIHA EHEENI

▪ Ankeelo oororomeleya annaakhaviherya achu oothene yaale anamurumeela Yehova.—Ahebri 1:7, 14.

▪ Satana ni masololo awe annaahuweliha achu wi ehimurumeele Muluku.—Wupulula 12:9.

▪ Wakhala wi munneera yookhwela ya Muluku nave munnamukhooca Musaserya, Satana onahaala woochawani.—Tiyako 4:7, 8.

[Ekaaxa va epaaxina 102]

MUNII MUVILELA HAI MINEPA YOONANARA

▪ Mweeyele ichu sa olosiwa

▪ Mmuhuserye Piipiliya

▪ Mvekele wa Muluku

[Eruku va epaaxina 99]

“Muluku aka òmuruma munkelo, nave ola òmaka eyano ya amwatxo.”—Daniyeli 6:23

[Eruku va epaaxina 101]

Masololo annapharihela miraakho mincipale wi yaahuwelihe achu