Munahaala Otitelela ‘Olipelela’?

“Mwilipeleleke wona wi hamusuwenle nihiku nari elukulu ene.”​—MAT. 25:13, BNM.

MWAHAALA WAAKHULA HAI?

Tuuvi ori muchaka wa niphwanaphwaniho na asimwali khumi?

Awoocihiwa anapharihela hai muchaka wa niphwanaphwaniho na Yesu na asimwali khumi?

Mmukhalelo taani “ipuchepuche sikina” inahaalaaya ophura orweela wa niphwanaphwaniho na asimwali khumi?

1, 2. (a) Tiheeni Yesu oonihenryeiye vooloca sa mahiku ookuchula? (b) Makoho taani nnahaalaahu othokororya?

YAARI yoohakalaliha okhala va Mwaakoni wa Asitona —woona empa ya Muluku o Yerusalemu​—vaavaa Yesu aalonceiye yooloherya awe yootikhiniha. Petro, Antreya, Yaakopo, ni Yohane yaawiriyana vaavaa aaloceiye yooloherya awe ya omwaahiyu. Yesu aahaaleela ichu itokotoko sa mahiku ookuchula a mukhalelo yoola wa ichu, vaavaa aahaaleiye olamulela mu Omwene wa Muluku. Yesu aahaaleela wi variyari va elukuluku yeeyo yookuchula, “kapuro óroromeleya” ni amiruku aahaala omweemelela veelaponi yavathi, aavahaka akapuro awe yoolya yoomunepani mu elukuluku yoophwanelela.​—Mat. 24:45-47.

² Voocharela, mu yooloherya emohamoha, Yesu aaloca niphwanaphwaniho na asimwali khumi. (Mwaalakhanye Mateyu 25:1-13.) Hankooni nthokororye makoho ala: (1) Tuuvi ori muchaka wookhweleya wa niphwanaphwaniho nla? (2) Awoocihiwa anapharihela hai ekano ya niphwanaphwaniho nenla, nave ni sookhumelela taani? (3) Nnii niphure hai orweela wa niphwanaphwaniho na Yesu olelo?

TUUVI ORI MUCHAKA WA NIPHWANAPHWANIHO NLA?

 3. Khalai, soolaleeryiwa sahu saathariha hai niphwanaphwaniho na asimwali khumi, nave ni yookhumelela taani?

³ Nohoona mmwaha ovinre wi mu iyaakha sahiihaanoru, kapuro oororomeleya hanathariha moonyesererya sootaphulela soosiphela sa Soorepa nyenya onateteiwa ni othariha ophariheleya waya muteko. Khalai, soolaleeryiwa saanaloca wi ichu ikhaani sa niphwanaphwaniho na Yesu na asimwali khumi saakhalano yootaphulela yoosiphela, ichu ntoko muthiko, makhurwa, ichupa ni ikina. Apwanne naamweemererya wi echu vyakala enihiihe othariha muchaka wa niphwanaphwaniho nenla mmukhalelo wookhweya ni woophara muteko? Nnahaala woona wi, naakhulo ti nookhweleyaxa.

 4. Mu niphwanaphwaniho nnii niwerye hai omusuwela (a) mulipa oothela? (b) ni asimwali?

⁴ Hankooni nthokororye muchaka wookhweleya wa niphwanaphwaniho na Yesu. Voopacerya, naathokororye aweera. Taani ori Mulipa oothela mu niphwanaphwaniho? Mwawooneya, Yesu aaloca wa yoowo mukhateiye. Ti nthowa nene, mu ilukuluku soohiyana aahiloca mukhateiye ntoko mulipa oothela! (Luka 5:34, 35) Hanka vooloca sa asimwali? Mu niphwanaphwaniho, Yesu ooloca wi asimwali yaaphwanela okhala ooreheryeya ni mithiko vaavaa mulipa oothela aahaaleiye ophiya. Moone ohoolela Yesu ovanheiye “mwamuloko a ipuchepuche” wa oomuchara awe awoocihiwa: “Khalani awimakela mu’yununi, nave onyari anyu okhale wovarela; nave nyuwo mekhinyu khalani óphwanaphwana ni atchu óweherya pwiya’ya, aniriye akóke orwela wuthelani.” (Luka 12:32, 35, 36) Mwawaacererya, murummwa Paulo ni Yohane yaaveereliwa waalikanyiha oomuchara awoocihiwa Akiristu ni asimwali. (2 Akor. 11:2; Yaw. 14:4) Chiryene, niphwanaphwaniho na Yesu nnaphwanyeya mu Mateyu 25:1-13 nri ntoko ekano ni olopola wa oomuchara awe awoocihiwa.

 5. Yesu oonihenrye hai elukuluku yeeyo niphwanaphwaniho nawe nnahaalaaya waakhwanela?

⁵ Voocharela, muthokororye elukuluku ene. Elukuluku taani ekano ya Yesu enaphariheleyaaya? Yesu onnanleela elukuluku ene omakuchuwelo wa niphwanaphwaniho nawe: “Mulipa-othela áphiya.” (Mat. 25:10) Vaavaa yooloherya ya Yesu enaphwanyeya mu Mateyu ikapitulu 24 ni 25 yaathokororyiwaaya mu Mulipeleli 15 a Yulyo a 2013, yaakhalano soothoonyerya thanu nachaaru sa ‘ophiya’ wawe; mu nikupa nri noothene, mukhalelo mmohamoha wa nsu na Ekriki noophariheliwa. Opwaha yeeyo, Yesu aaloca sa elukuluku ya yoohooxa etokotoko vaavaa onahaaleiye orwa othoriha ni otoloxa mukhalelo yoola wa ichu. Mwawiihiiha, niphwanaphwaniho nawe nnaphariheleya mmahiku ookuchula, nyenya makuchuwelo yaawo anahaala orwa mu yoohooxa etokotoko.

 6. Mwawiiwanana ni mwaha, tuuvi ori muchaka wookhweleya wa niphwanaphwaniho nla?

⁶ Tuuvi ori muchaka wookhweleya wa niphwanaphwaniho nla? Muupuwele mwaha woothene. Yesu aamala omuthokororya “kapuro ororomeleya” ni amiruku. Kapuro owo aahaala okhala nikhuuru nikhaani na alopwana awoocihiwa yaahaala waahoolela oomuchara a Kiristu mmahiku ookuchula. Yesu aahaalopola wi alopwana awo yaaphwanela otitelela okhala oororomeleya. Voocharela, aapaka niphwanaphwaniho nla wi aalopole oomuchara awe oothene awoocihiwa otitelela ‘olipelela’ mmahiku ookuchula wi ehimuyeleele phatamari asisapo. (Mat. 25:13, BNM) Hankooni vano nthokororye niphwanaphwaniho nave noone ti mwawiihai awoocihiwa anapharihelaaya ekano yeela.

AWOOCIHIWA ANAPHARIHELA HAI MUCHAKA WA NIPHWANAPHWANIHO?

7, 8. (a) Mikhalelo taani miili inooniherya wi asimwali oovyaka yaari ooreheryeya? (b) Kapuro oororomeleya onooniherya hai okhala ooreheryeya?

⁷ Niphwanaphwaniho na Yesu ninnooniherya wi asimwali oovyaka moohiyana ni oolosowa, yaari ooreheryeya wa ophiya wa mulipa oothela. Mwawiihai? Nthowa na mikhalelo miili: oreheryeya ni olipelela. Asimwali khumi yaawo yaathanliwe wi eweherye ophiya wa mulipa oothela ohiyu, yaaphwanela orehererya mithiko saya nave otitelela oweherya ilukuluku sincipale ophiyerya elukuluku yeeyo. Moohiyana ni oolosowa, asimwali athanu yaahiirehererya, ekuxa makhurwa aya mu ichupa ni mithiko saya. Apwanne kapuro oororomeleya onnooniherya okhala ooreheryeya?

⁸ Chiryene annooniherya! Mmahiku ookuchula, Akiristu awoocihiwa ari ntoko asimwali oovyaka, ari ooreheryeya wi ekhwaaniherye murici aya moororomeleya ophiyerya omakuchuwelo. Annoona esisapo ya okhala oororomeleya, esuwelaka wi ti woochuneya ohiya ichu sa elapo yeela ya Satana wi ewerye waakhwaniha orummwa waya. Annawetha omurumeela pahiru Yehova, ehuukhuwaka nnihiku na okhwa, nyenya anneerano yeeyo moosivela ni ororomeleya wa Yehova ni Mwanawe. Annatitelela okhala oororomeleya, ekhoocaka waakhela munepa wa elapo ni meerelo aya awiithukumanyerya, meecelo oonanara, ni moonelo woomwiilini. Mwawiihiiha awo annatitelela okhala ooreheryeya, awiithipela emwaleelaka ntoko onyaari nave ari oolakelela vaavaa anaweheryaaya orwa wa mulipa oothela.​—Afil. 2:15.

 9. (a) Yesu oloponle hai vooloca sa mathitimanelo a okona? (b) Awoocihiwa anaakhula hai ni okhuwela: “Onani, mulipa-othela”? (Moone masu a vathi.)

⁹ Mukhalelo wanaawiili waakhavihenrye asimwali yaale okhala oorehererya waari olipelela. Apwanne yaahaala oweryeya wi Mukiristu awoocihiwa akone mu elukuluku ya oweherya? Aai. Moone wi Yesu olonce wi asimwali yaawo “othene awo yáhoséla, [yaatuthela] erupa” nthowa na olekela wa mulipa oothela. Yesu aasuwela wi naamwi muchu awiilipixerya, aahaala owokeya nthowa na oceecheya wa mwiili. Awoocihiwa oororomeleya annachariha olopola nave annalapa mwakuru wi etitelele okhala oolipelela. Mu niphwanaphwaniho, asimwali oothene yaakhuwela ohiyu eriyari: “Onani, mulipa-othela!” Pahiru ale oolipelela yaavilela ophiyerya omakuchuwelo. (Mat. 25:5, 6; 26:41) Hanka vooloca sa awoocihiwa oororomeleya olelo? Mmahiku yaala ookuchula, annaakhula ni yawooniherya yoolipa, ni okhuwela, “Onani, mulipa-othela”​—onahaala orwa. Awo tho annavilela, etitelelaka okhala ooreheryeya va orwa wa Mulipa Oothela. a Mwawiihiiha, makuchuwelo a niphwanaphwaniho anathoonya elukuluku yeeparipari. Mwawiihai?

PHATAMARI WA OOVYAKA NAVE OLAKIWA WA OOLOSOWA

10. Nikoho taani nnakhumelela mu waakaaha variyari va asimwali oovyaka ni oolosowa?

¹⁰ Akhweya makupa ootikhiniha a niphwanaphwaniho anaphwanyeya waacamela omakuchuwelo, waakaaha variyari va asimwali oovyaka ni oolosowa. (Mwaalakhanye Mateyu 25:8, 9.) Waakaaha weiwo onnatannya nikoho: “Ti liini mmiyaha sa achu a Muluku awoocihiwa oororomeleya anahaalaaya okhooca waakhaviherya yaale anaveka nikhaviheryo?” Naakhulo nnakhala nawooneya vaavaa nnathokororyaahu wiiliwiili elukuluku ene. Muupuwele wiiwexexa wahu wookhweya wi Yesu, Mulipa Oothela onahaala orwa wi athorihe waacamela omakuchuwelo wa yoohooxa etokotoko. Apwanne tahi yoophwanelela wi nikupa nenla na niphwanaphwaniho nnaloca yeeyo enahaala weereya ohaakumve othoriha? Enakhala ntoko yeeyo, woona wi mweelukuluku yeeyo awoocihiwa enii eneera yaakhenle eneneeryo aya yookuchula.

11. (a) Tiheeni enahaala weereya ehaakumve opacerya yoohooxa etokotoko? (b) Enasiphela eheeni asimwali oovyaka waaleela oolosowa oya wa alipa ootumiha makhurwa?

¹¹ Mwawiihiiha, yoohooxa etokotoko ehaakumve opacerya, awoocihiwa oororomeleya oothene veelaponi yavathi anahaala waakhela eneneeryo aya yookuchula. (Yaw. 7:1-4) Ovinyerya vaavaa othanliwa waya onahaala waakhwanela. Nyenya muupuwele elukuluku yoohooxa ehaakumve opacerya. Tiheeni enahaala weereya ni awoocihiwa yaale enii ehiye olipelela, yaawo enii eyeleele nroromelo naya? Awo anahaala omuyeleela phatamari aya a wirimu. Mwevelevelo awo henii yaakhele eneneeryo yookuchula ehaakumve opacerya yoohooxa etokotoko. Nyenya elukuluku yeeyo, akina oororomeleya anahaala othanliwa. Vaavaa yoohooxa etokotoko enahaalaaya opacerya, oolosowa anahaala okhala awuukhuwa vaavaa eneeraaya yoone otoloxiwa wa Paapulu Mutokotoko. Eyo enahaala wooniherya wi awo hari ooreheryeya wa ophiya wa Mulipa Oothela. Mu elukuluku yeeyo, wakhala wi aaveka nikhaviheryo, tiheeni enahaala weereya? Mu niphwanaphwaniho Yesu oonivaha naakhulo noothananiha. Asimwali oovyaka yaakhooca ovaha makhurwa aya mu ichupa sa oolosowa, yaaleelaka wi yathume ni alipa ootumiha. Muupuwele wi waari “ohiyu eriyari.” Apwanne yanwerya waaphwanya alipa ootumiha makhurwa mu elukuluku yeele? Hooye. Woona wi waatepa wiila.

12. (a) Variyari va yoohooxa etokotoko, yaweereya taani yoothananiha enahaala omukhumelela yoowo aari awoocihiwa nave ayeleela ororomeleya wawe ehaakumve eneneeryo yookuchula? (b) Tiheeni enahaala weereya ni yaale anakhala ntoko asimwali oolosowa?

¹² Chiryene, variyari va yoohooxa etokotoko, awoocihiwa oororomeleya hewerya omukhaviherya yoowo ohiri oororomeleya. Honii okhalevo nikhaviheryo. Onahaala otepa wiila. Vanonto, tiheeni enahaala weereya ni yaawo? Yesu oothariha yeeyo eneereya vaavaa asimwali oolosowa yaachanraaya meecelo oonanara: “Mulipa-othela áphiya; nave óryeheryeya’wo yávolowano vamoha muthelani: nave áwala va milakoni.” Vaavaa Kiristu onahaaleiye arwe mu ncicimiho nawe, waacamela omakuchuwelo wa yoohooxa etokotoko owo onahaala waathukumanya awoocihiwa oororomeleya wirimu. (Mat. 24:31; 25:10; Yoh 14:1-3; 1 Ates. 4:17) Mukhora, onahaala owaliwa wa oohiroromela, yaawo onooniherya okhala ntoko asimwali oolosowa. Anahaala okhuwela: “Pwiya, Pwiya, munihulele hiyo!” Nyenya anahaala waakhuliwa ntoko yaale anaphwanaphwana ni ipuri mu elukuluku ya othoriha: “Tchiri kinalocha wa nyuwo, nkinosuwelani nyuwo.” Echu yoothananiha vancipale!​—Mat. 7:21-23; 25:11, 12.

13. (a) Ntakhara heeni hinnaphwanela oloca wi oomuchara awoocihiwa anahaala okhala oohiroromeleya? (b) Ntakhara heeni masu oolopola a Yesu anaphwanela wooniwa ntoko mukhalelo wa wooniherya waaroromela wawe? (Moone eruku yoopacerya.)

¹³ Mwawiiwanana ni yeeyo nthokoronryaahu, tiheeni nnaphwanelaahu oloca? Apwanne Yesu aaloca wi akapuro ancipale awoocihiwa yaahaala okhala oohiroromela nave okhale woochuneya oraceeliwa? Hooye. Muupuwele wi, aamala omulopola “kapuro óroromeleya” ni amiruku wi ahirwe akookela muculi okhala kapuro oonanara. Eyo henataphulela wi Yesu aaweherya yookhumelela yeeyo. Moolikana, niphwanaphwaniho nla nookhalano olopola wakuru. Ntoko asimwali athanu yaaraaya oolosowa ni athanu oovyaka, awoocihiwa oothene anaphwanela othanla okhala awiirehererya ni oolipelela naari okhala oolosowa ni ohiirehererya. Murummwa Paulo aaveereliwa oloca mukhalelo woolikana vaavaa aaloceiye ni oomuchara Akiristu awoocihiwa. (Mwaalakhanye Ahepri 6:4-9; mulikanyihe ni Malamulo 30:19.) Moone wi olopola wa Paulo waari woolipa, nyenya voocharela aaloca nroromelo nawe wa “itchu” saphaama saahaala waahoolela anna ni arokora awe Eekiristu. Moolikana, olopola mu niphwanaphwaniho na Yesu onavahiwa moosivela. Kiristu oosuwela wi mmoha ti mmoha a akapuro awe awoocihiwa onanwerya wiikhalelaru oororomeleya ni omwaakhela phatamari oohakalaliha!

“IPUCHEPUCHE SIKINA” SA KIRISTU SINII SIPHURE HAI?

14. Ntakhara heeni yaale a “ipuchepuche sikina” annaphura niphwanaphwaniho na asimwali khumi?

¹⁴ Woona wi Yesu aaloca niphwanaphwaniho nenla na asimwali khumi wa awoocihiwa, apwanne nnaphwanela oloca wi muchaka aya honaphariheleya wa “ipuchepuche sikina” sa Kiristu? (Yoh. 10:16) Hooye! Muupuwele, muchaka wa niphwanaphwaniho ti ola: Mutitelele ‘olipelela.’ Apwanne enaphariheleya pahiru wa awoocihiwa? Ekwaha emoha Yesu aaloca: “Nave yeyo kinalochaka wa nyuwo, kinalocha wa othene.” (Mar. 13:37) Yesu onachuna wi oomuchara awe oothene erehererye mirima saya wi ephare muteko waweela nave ekhale oolipelela. Mwawiihiiha Akiristu oothene annachariha meerelo a awoocihiwa mmwaha yoola, echaraka yootakiherya aya nave ehelaka muteko woolaleerya mu nikupa noopacerya mu okumi. Oothene hiyo nnaphwanela wuupuwelela wi asimwali oolosowa yaahaaveka ale oovyaka wi ehele makhurwa mu ichupa saya. Yooveka aya yoohikhala mphurelo ennanihusiha wi haavo muchu mukina onawerya okhala oororomeleya ntakhara hiyo, naari onahaala olipelela mu nipuro nahu. Mmoha ti mmoha a hiyo onahaala waakhula vamiithoni va Muthoriha yoowo Yehova omuthanlileiye. Nnaphwanela okhala ooreheryeya. Nave onamoorwa moohilekela!

15. Ntakhara heeni othela wa omwaahiyu wa Kiristu ti woohakalaliha wa Akiristu oothene eeparipari?

¹⁵ Akiristu oothene tho anahaala ophura nikupa noohakalalihaxa na niphwanaphwaniho na Yesu. Taani a hiyo ohiri oohakalala nthowa na othela yoowo wa omwaahiyu? Awoocihiwa anahaala okhala wirimu; emanle ekhoco ya Armaketo, awo anahaala okhala alipa ootheliwa a Kiristu. (Yaw. 19:7-9) Achu oothene veelaponi yavathi anahaala ophura orweela wa othela yoola wa wirimu, woona wi eyo enahaala okumiherya olamulelo woophaameya wa achu oothene. Moohipwacha ewehereryo ahu yoomwaahiyu, moohipwacha yaari ya wirimu naari ya veelaponi yavathi, hankooni nikhale oolakelela opharihela muchaka woochuneyaxa wa niphwanaphwaniho na asimwali khumi. Hankooni nooniherye okhala ooreheryeya moorweela wa oreherya mirima sahu ni otitelela okhala oororomeleya ni oolipelela wi niwerye opuha omwaahiyu woohakalaliha yoowo Yehova okhapelenleiye wa hiyo!

[Nsu na vathi]

[Yooleeliherya va epaaxina 17]

Yooveka ya ovahiwa makhurwa ennanihusiha wi haavo muchu mukina onawerya olipelela mu nipuro nahu naari okhala oororomeleya ntakhara hiyo