Lengwalo la Jakobo
1 Nna Jakobo+ mohlanka wa Modimo le wa Morena Jesu Kriste, ke ngwalela meloko e 12 yeo e phatlaletšego gohle ke re:
Madume!
2 Banabešo, thabang ge le welwa ke diteko tše di fapafapanego,+ 3 ka gobane le a tseba gore tumelo ya lena yeo e lekilwego ka tsela ye, e tlo tia le go feta ebile e tla le thuša gore le kgotlelele.+ 4 Eupša tlogelang kgotlelelo e dire mošomo wa yona, e le gore le tlwaetšwe ka mo go feletšego, le gore le se ke la solega dilong ka moka, gomme le ka se hloke selo.+
5 Ka gona motho le ge e le ofe yo a nyakago bohlale, a a dule a bo kgopela go Modimo,+ gomme yena o tla mo nea bjona,+ ka gobane o bo nea bohle ka pelo ka moka ka ntle le go nyaka diphošo.*+ 6 Eupša motho yoo a tšwele pele a kgopela dilo ka moka a na le tumelo+ ebile a sa belaele selo,+ ka gobane motho yo a belaelago o swana le lephoto la lewatle leo le išwago kua le kua ke phefo. 7 Ge e le gabotse, motho yoo a se ke a nagana gore o tla hwetša selo le ge e le sefe go Jehofa,* 8 ke motho yo a sa kgonego go dira diphetho,+ ebile o no dula a fetofetoga.
9 Eupša anke ngwanabo rena wa modiitšana a thabe ka gobane Modimo a mo godišitše,+ 10 gomme yo a humilego a thabe ka ge a kokobeditšwe,+ ka gobane o tla timelela go swana le letšoba la nageng. 11 Go no swana le ge letšatši le hlaba le fiša tšhiritšhiri, le dira gore dimela di pone, matšoba a tšona a we gomme bobotse bja ona bo hwelele, motho yo a humilego le yena o tla hwa a dutše a kitimiša mahumo.+
12 Go thaba motho yo a tšwelago pele a kgotlelela ge a lekwa,+ ka gobane Jehofa o tla mo amogela le go mo putsa ka go mo nea bophelo+ bjo a bo tshepišitšego bao ba tšwelago pele ba mo rata.+ 13 Ge motho a welwa ke mathata a se ke a re: “Ke lekwa ke Modimo.” Ka gobane Modimo a ka se ke a lekwa ka dilo tše mpe, ebile le yena ga a leke motho. 14 Eupša yo mongwe le yo mongwe o lekwa le go goketšwa ke dikganyogo tša gagwe.+ 15 Ke moka ge kganyogo e šetše e le maatla, e dira gore motho a dire sebe, gomme sebe se baka lehu.+
16 Banabešo bao ke ba ratago, le se ke la timetšwa. 17 Mpho e nngwe le e nngwe e botse le yeo e di phalago ka moka* e tšwa godimo+ go Tate wa dietša tša legodimong,+ yo a sa fetogego go swana le meriti.+ 18 Ka morago ga gore re kwe lentšu la nnete,+ Modimo o ile a dira gore re be gona e le gore re be ba mathomo bao a ba kgethilego gare ga bohle bao a ba bopilego.+
19 Banabešo bao ke ba ratago, taba yeo le swanetšego go e tseba ke gore motho yo mongwe le yo mongwe a iphe nako ya go theetša, a se ke a kitimela go bolela*+ ebile a se ke a kwata ka pela.+ 20 Ka gobane ge motho a kwatile ga a dire dilo tšeo di lokilego pele ga Modimo.+ 21 Ka gona lahlang ditšhila ka moka le selo se sengwe le se sengwe se sebe,+ gomme le ikokobetše, le dumelele Modimo gore a tsenye lentšu la gagwe ka dipelong tša lena, ka ge lentšu leo le ka le phološa.
22 Eupša le dire seo lentšu la Modimo le se bolelago,+ le se ke la no le theetša feela, la iphora ka maaka ao le ipotšago ona. 23 Ka gobane ge e ba motho a no theetša lentšu la Modimo gomme a sa dire seo le se bolelago,+ gona o swana le motho yo a itebelelago sefahlego sa gagwe seiponeng, 24 gomme ka morago ga gore a itebelele, a tloga ke moka a lebala kapelapela gore o bogega bjang. 25 Eupša motho yo a hlahlobišišago molao wa Modimo wo o sa solegego+ le wo o fago batho tokologo, gomme a tšwela pele a latela molao woo, ga se motho yo a lebalago seo a se kwelego, eupša o a se dira. Ka gona o tlo thaba kudu ge a dira bjalo.+
26 Ge e ba motho a ipotša gore o rapela* Modimo eupša a sa kgone go laola leleme la gagwe,+ gona o a iphora gomme dilo tšeo a di direlago Modimo ke tša lefeela. 27 E le gore Modimo Tatago rena a amogele borapedi bja rena, re swanetše go mo rapela ka tsela e hlwekilego le yeo a e amogelago, re hlokomele ditšhiwana+ le bahlologadi+ ge ba na le mathata, gomme re se ke ra+ dumelela batho ba lefase ba re šilafatša ka mekgwa ya bona.+