Baheberu

10 Gobane ka ge Molao wa Moshe o swantšhetša+ dilo tše dibotse tšeo di tlago go tla,+ eupša wona ka bowona e se dilo tšeo, gona Molao woo* le dihlabelo tšeo di dulago di neelwa ngwaga le ngwaga di ka se dire gore bao ba hlankelago Modimo ba se ke ba ba le sebe.+ 2 Ge nkabe dihlabelo di be di dira gore batho ba se sa ba le sebe, gona go be go ka se sa nyakega gore ba dire dihlabelo. Ka gobane ge bao ba hlankelago Modimo ba šetše ba hlwekišitšwe, ba ka se sa ikwa molato ka baka la dibe tša bona. 3 Go e na le moo, dihlabelo tše di gopotša batho ngwaga le ngwaga gore ba na le sebe,+ 4 ka gobane ga go kgonege gore madi a dipoo le a dipudi a tloše dibe.

5 Ka gona ge Kriste a be a etla lefaseng o ile a re go Modimo: “‘Ga se wa ka wa nyaka sehlabelo le sebego, eupša o ntokišeleditše mmele. 6 Ga se wa kgahlwa ke dibego tše di feletšego tša go fišwa le dibego tša sebe.’+ 7 Ke moka ka re: ‘Wena Modimo ke nna yo ke tlile gore ke tle ke dire seo o se nyakago (ka lengwalong la go phuthwa go ngwadilwe ka nna).’”+ 8 Ka ge re bone, o ile wa thoma ka gore: “Ga se wa ka wa nyaka dihlabelo, dibego, dibego tše di feletšego tša go fišwa le dibego tša sebe ebile ga se wa ka wa di amogela,” e lego dihlabelo tšeo di neelwago go ya ka Molao wa Moshe. 9 Ke moka o re: “Ke nna yo ke tlile gore ke tle ke dire seo o se nyakago.”+ O fediša mokgwa wa kgale e le gore a thome o moswa. 10 Go ya ka “seo Modimo a se nyakago”+ re dirilwe ba bakgethwa go dirišwa Jesu Kriste, yena yo a ilego a neela mmele wa gagwe gatee ya ba moka.+

11 Le gona moperisita yo mongwe le yo mongwe o ema letšatši le letšatši gore a dire mošomo wa gagwe wa go hlankela Modimo,+ le go dira dihlabelo tša go swana gantši le gantši,+ e lego tšeo di ka se tsogego di kgonne go tloša dibe ka mo go feletšego.+ 12 Eupša Kriste o ile a neela sehlabelo setee feela ka baka la dibe, gomme a dula ka letsogong le letona la Modimo,+ 13 go tloga nakong yeo go ya pele a letile go fihlela manaba a gagwe a bewa ka tlase ga dinao tša gagwe.+ 14 Ka gobane ka sehlabelo setee feela o dirile gore bao ba dirilwego gore e be ba bakgethwa,+ ba se sa ba le sebe go ya go ile. 15 Le gona, moya o mokgethwa le wona o re hlatsela ka gore: 16 “Kgwerano yeo ke tlago go e dira le batho ba setšhaba sa Isiraele ka morago ga nako yeo ke ye: ‘Ke tla bea melao ya ka dipelong tša bona gomme ka e ngwala menaganong ya bona.’”+ O realo Jehofa.* 17 Ke moka moya woo o re: “Nka se sa gopola dibe tša bona le dilo tše mpe tšeo ba di dirilego.”+ 18 Bjale ge Modimo a lebalela dibe gona ga go sa hlokega sebego sa sebe.

19 Ka gona banabešo, ka ge re na le sebete sa go diriša tsela ya go tsena lefelong le lekgethwa+ ka madi a Jesu, 20 e lego tsela e mpsha yeo a re buletšego yona yeo e išago bophelong, yeo a e butšego ka go fetela ka kua ga gareteine+ yeo e swantšhetšago nama ya gagwe, 21 le gona ka ge re na le moperisita yo mogolo yo a hlokometšego ntlo ya Modimo,+ 22 a re batameleng Modimo ka dipelo ka moka le ka tumelo yeo e tiilego, dipelo tša rena di hlwekišitšwe ebile re na le matswalo a mabotse+ gomme mebele ya rena e hlwekišitšwe ka meetse.+ 23 A re tšweleng pele re botša batho ba bangwe ka kholofelo ya rena re sa tšhabe selo.+ Ka gobane Modimo yo a re tshepišitšego dilo o a tshepega. 24 A re hlokomelaneng e le gore re hlohleletšane go ba le lerato le go dira dilo tše dibotse,+ 25 re se tlogele go bokana mmogo+ bjalo ka ge ba bangwe ba tlwaetše go dira bjalo, eupša re tšwele pele re kgothatšana,+ le go dira dilo tše le go feta ka ge re bona gore letšatši la Modimo le a batamela.+

26 Ge e ba re tlwaela go dira sebe ka boomo ka morago ga gore re hwetše nnete,+ gona ga go sa na sehlabelo se sengwe seo se ka neelwago gore dibe tša rena di phumolwe,+ 27 eupša re tla no letela go otlwa re tšhogile ebile ra letela bogale bja Modimo bjo bo tukago go swana le mollo bjoo bo tlago go fediša bao ba mo ganetšago.+ 28 Motho yo mongwe le yo mongwe yo a bego a sa kwe Molao wa Moshe, o be a bolawa ka ntle le go šokelwa ge eba go be go na le batho ba babedi goba ba bararo bao ba hlatselago taba yeo.+ 29 Na le nagana gore motho yo a nyatšago Morwa wa Modimo, le yo a bonago madi a kgwerano+ yeo e dirilego gore e be yo mokgethwa a se na mohola, le yo a nyaditšego moya wa Modimo yo a mmontšhitšego botho bjo bogolo, a ka se otlwe o šoro?+ 30 Modimo o itše: “Ke nna ke lefetšago ebile ke nna ke tlago go otla batho,” le gona o itše: “Jehofa o tla ahlola setšhaba sa gagwe.”+ 31 Ka nnete go a tšhoša go otlwa ke Modimo yo a phelago.

32 Ka gona, le se ke la lebala gore ka morago ga ge le bone seetša,+ le ile la kgotlelela dilo tše dintši le ge le be le na le mathata a mantši. 33 Ka dinako tše dingwe le be le swarwa gampe ebile le gobošwa pele ga batho, mola ka dinako tše dingwe le be le thuša batho bao ba wetšwego ke mathata a go swana le ao. 34 Le kwetše bohloko bao ba lego kgolegong ebile le ile la no tšwela pele le thabile le ge le ile la tšeelwa dilo tša lena,+ ka ge le tseba gore le na le bohwa bjo bokaone le bjo bo tlago go dula bo le gona.+

35 Ka gona dulang le na le sebete, ka ge se tlo le thuša gore le hwetše moputso o mogolo.+ 36 Le swanetše go kgotlelela+ e le gore le tle le hwetše seo Modimo a se tshepišitšego, eupša le swanetše go thoma ka go dira seo Modimo a se nyakago. 37 Ka gobane go šetše “nako e nyenyane”+ gomme “yo a tlago o tla fihla, ebile a ka se diege.”+ 38 “Eupša mohlanka wa ka yo a lokilego o tla phela ka baka la go ba le tumelo”+ gomme “ge e ba a gomela morago, a ka se nkgahle.”+ 39 Bjale rena ga re mohuta wa batho bao ba gomelago morago ka baka la go tšhoga,+ gomme ra fedišwa eupša re mohuta wa batho bao ba nago le tumelo e le gore re phološe maphelo a rena.