Kutollo Yeo e Utolletšwego Johane
16 Ka kwa lentšu le le hlabošago leo le tšwago lefelong le lekgethwa+ le botša barongwa ba šupago le re: “Eyang le tšholle dibjana tše dinyenyane tšeo di nago le bogale bja Modimo le di tšhollele lefaseng.”+
2 Morongwa wa pele a ya a tšhollela dilo tšeo di lego ka sebjaneng sa gagwe lefaseng.+ Batho bao ba bego ba na le leswao la sebata+ le bao ba bego ba rapela seswantšho sa sona+ ba ile ba tšwa sešo+ se bohloko le se sešoro.
3 Wa bobedi a tšhollela dilo tšeo di lego ka sebjaneng sa gagwe lewatleng.+ La fetoga madi+ a go swana le a motho yo a bolailwego, gomme dibopiwa* ka moka tše di phelago tšeo di lego ka lewatleng tša hwa.+
4 Wa boraro a tšhollela dilo tšeo di lego ka sebjaneng sa gagwe dinokeng le didibeng tša meetse.+ Ke moka tša fetoga madi.+ 5 Ka kwa morongwa yo a nago le maatla a go laola meetse a re: “Wena Modimo yo a lego gona le yo a bego a le gona,+ wena yo a botegago,+ o lokile ka gobane o ntšhitše dikahlolo tše.+ 6 Batho bao ba bolailego bakgethwa ba gago le baporofeta+ o ba file madi gore ba a nwe.+ Ba swanelwa ke sona seo.”+ 7 Ka kwa lentšu leo le tšwago aletareng le re: Wena Jehofa* Modimo Ramatlaohle,+ dikahlolo tša gago di lokile ebile ke tša nnete.”+
8 Wa bone a tšhollela dilo tšeo di lego ka sebjaneng sa gagwe letšatšing+ gomme letšatši la dumelelwa gore le fiše batho ka mollo. 9 Ke moka batho ba fišwa ke phišo e kgolo, eupša ga se ba ka ba itshola go e na le moo ba ile ba roga leina la Modimo, ebile ga se ba ka ba tumiša Modimo yo a nago le maatla a go baka dikotlo tše.
10 Wa bohlano a tšhollela dilo tšeo di lego ka sebjaneng sa gagwe godimo ga setulo sa bogoši sa sebata. Mmušo wa sona wa swifala+ gomme batho ba thoma go itoma maleme ka baka la bohloko bjo ba bego ba bo kwa, 11 ebile ba roga Modimo wa legodimo ka baka la bohloko bjo ba bego ba bo kwa le ka baka la dišo tšeo di bego di ba tšwile le gona ga se ba ka ba itsholela dilo tše mpe tšeo ba di dirilego.
12 Wa botshelela a tšhollela dilo tšeo di lego ka sebjaneng sa gagwe nokeng e kgolo ya Eforate+ gomme meetse a yona a gopa+ e le gore dikgoši tšeo di tšwago bohlabatšatši* di lokišetšwe tsela.+
13 Ka bona dipolelo* tše tharo tšeo di sa hlwekago tšeo di bego di swana le digwagwa di etšwa molomong wa drakone,+ molomong wa sebata le molomong wa moporofeta wa maaka. 14 Ge e le gabotse, dipolelo tšeo di tšwa go matemona ebile di dira mehlolo.+ Le gona di ya go dikgoši tša lefase ka moka e le gore di di kgobokeletše ntweng+ ya letšatši le legolo la Modimo Ramatlaohle.+
15 Gwa kwagala lentšu le re: “Ke tla bjalo ka lehodu.+ Go thaba yo a dulago a phafogile+ ebile a apere diaparo tša gagwe tša ka ntle, e le gore a se ke a sepela a se a apara gomme batho ba mmonela.”+
16 Tša di kgobokeletša lefelong leo ka Seheberu le bitšwago Aramagedone.*+
17 Wa bošupa a tšhollela dilo tšeo di lego ka sebjaneng sa gagwe moyeng. Ke moka gwa kwagala lentšu le le hlabošago leo le tšwago setulong sa bogoši seo se lego lefelong le lekgethwa,+ le re: “Go phethegile!” 18 Ke moka gwa ba le magadima, ka ba ka kwa le mantšu le medumo ya magadima. Le gona gwa ba le tšhišinyego e kgolo kudu ya lefase yeo e sa kago ya ba gona ga e sa le batho ba eba gona lefaseng.+ 19 Motse o mogolo+ wa arogana ka dikarolo tše tharo gomme metse ya ditšhaba tše dingwe ya wa. Ke moka Modimo a gopola Babilona o Mogolo+ gomme a mo fa komiki ya beine ya bogale bja gagwe.+ 20 Le gona sehlakahlaka se sengwe le se sengwe se ile sa nwelela gomme dithaba tša nyamalala.+ 21 Sefako se segolo seo leswika le lengwe le le lengwe la sona le bego le imela dikhilokgerama tše e ka bago tše 20* se ile sa wela batho se etšwa legodimong,+ ke moka batho ba roga Modimo ka baka la kotlo yeo ya sefako+ ka gobane sefako seo e be e le se segolo ka tsela yeo e sa tlwaelegago.