Kutollo Yeo e Utolletšwego Johane

14 Ka bona Kwana+ e eme Thabeng ya Tsione+ e na le ba 144 000+ bao diphatleng tša bona ba ngwadilwego leina la yona le la Tatago+ yona. 2 Ka kwa modumo o etšwa legodimong gomme o be o swana le modumo wa meetse a mantši ebile o swana le modumo wa magadima. Le gona modumo wo ke o kwelego o be o swana le wa diopedi tšeo di opelago di letša diharepa. 3 Di be di opela koša yeo e kego ke e mpsha,+ di opela di le pele ga setulo sa bogoši le pele ga dibopiwa tše di phelago tše nne+ le bagolo.+ Go be go se na bao ba kgonago go opela koša yeo ntle le ba 144 000+ bao ba rekilwego lefaseng. 4 Bona bao ga se ba ka ba itšhilafatša ka basadi, ge e le gabotse ba hlwekile.+ Ba dula ba latela Kwana kae le kae moo e yago gona.+ Ba rekilwe+ gare ga batho gore ba be bjalo ka dienywa tšeo di butšwago pele+ tšeo di neelwago Modimo le Kwana. 5 Ga se ba ka ba bolela maaka ebile ga ba na bosodi.+

6 Ka bona morongwa yo mongwe a fofa lefaufaung* a bolela ditaba tše dibotse tša ka mo go sa felego, a di botša batho bao ba dulago lefaseng, ditšhaba ka moka, meloko ka moka, batho ba maleme ka moka le merafo ka moka.+ 7 O be a bolela ka lentšu le le hlabošago a re: “Hlomphang Modimo le mo tagafatše ka gobane nako ya gore a ahlole batho e fihlile.+ Ka gona rapelang Modimo yo a dirilego legodimo, lefase, lewatle+ le didiba tša meetse.”

8 Morongwa wa bobedi a tla ka morago ga wa pele a re: “O wele! Babilona o Mogolo+ o wele,+ yena yo a dirilego gore batho ba ditšhaba ka moka ba nwe beine yeo e dirago gore ba nyake go itshwara gampe ka tša thobalano!”*+

9 Morongwa yo mongwe wa boraro a ba šala morago a bolela ka lentšu le le hlabošago a re: “Ge e ba motho le ge e le ofe a rapela sebata+ le seswantšho sa sona ebile a dumela go swaiwa phatleng ya gagwe goba letsogong la gagwe,+ 10 le yena o tla nwa beine ya Modimo, e lego bogale bja Modimo. Beine yeo ga se ya tswakwa le selo gomme Modimo o tla e tšhollela ka komiking yeo e nago le bogale bja gagwe.+ Motho yoo o tla otlwa ka mollo le sebabole*+ pele ga barongwa ba bakgethwa le pele ga Kwana. 11 Muši wo o tšwago mollong woo o tlago go ba tlaiša o tla rotoga go ya go ile.+ Bao ba rapelago sebata le seswantšho sa sona le batho ka moka bao ba amogelago leswao la leina la sona ba tla otlwa bošego le mosegare.+ 12 Ka baka leo bakgethwa bao ba latelago ditaelo tša Modimo le bao ba nago le tumelo go Jesu,+ ba swanetše go ba le kgotlelelo.”+

13 Ka kwa lentšu leo le tšwago legodimong le re: “Ngwala o re: Go tloga gona bjale go ya pele barutiwa ba Morena*+ bao ba hlokofalago ba tla thaba. Moya o mokgethwa o re a ba ye ba khutše mešomong yeo ba bego ba e dira ka gobane dilo tšeo ba di dirilego di ka se lebalwe.”*

14 Ke moka ka bona leru le lešweu, godimo ga lona go dutše motho yo o ka rego ke morwa wa motho+ a rwele mphapahlogo wa gauta hlogong gomme a swere sekela e bogale.

15 Morongwa yo mongwe a tšwelela a etšwa sekgethweng sa tempele, a goeletša yo a dutšego lerung a re: “Tšea sekela ya gago o bune ka gobane nako ya go buna e fihlile. Dibjalo tša lefase di butšwitše.”+ 16 Ke moka yo a dutšego lerung a buna dibjalo tša lefase ka sekela ya gagwe.

17 Morongwa yo mongwe gape a tšwelela sekgethweng sa tempele seo se lego legodimong gomme le yena o be a swere sekela e bogale.

18 Morongwa yo mongwe gape a tšwelela aletareng. O be a na le maatla a go laola mollo. O ile a goeletša yo a swerego sekela e bogale a re: “Otlolla letsogo leo o swerego sekela ka lona gomme o kgoboketše dintšhuhla tšeo di tšwago meterebeng ya lefase ka gobane diterebe tšeo di lego go tšona di butšwitše.”+ 19 Morongwa yoo a otlollela letsogo leo a bego a swere sekela ka lona lefaseng, a kgoboketša meterebe ya lefase ke moka a e lahlela lefelong le legolo la go gatela diterebe leo le swantšhetšago bogale bja Modimo.+ 20 Meterebe yeo e ile ya gatelwa ka ntle ga motse gomme go etšwa madi. Madi ao a ile a tlala go fihla ditomong tša dipere gomme a fihla bokgole bja dikhilomithara tše e ka bago tše 300.*