Puku ya Beibele ya bo-46 1 Ba-Korinthe

Mongwadi: Paulo

Lefelo Leo e Ngwadilwego go Lona: Efeso

Go Fetšwa ga go Ngwalwa ga Yona: mo e ka bago ka 55 C.E.

1. Korinthe e be e le motse wa mohuta ofe mehleng ya Paulo?

KORINTHE e be e le “motse wo o bego o tumile le wa maipshino, moo makgopo a ka Bohlabela le a ka Bodikela a bego a gahlana.”a E le molalanageng o mosese magareng ga Peloponnesus le kontinente ya Gerika, Korinthe e be e laola tsela ya nageng ya go ya nageng e kgolo. Mehleng ya moapostola Paulo, palo ya baagi ba yona ya mo e ka bago 400 000, e be e fetwa feela ke Roma, Alexandria le Siria ya Antiokia. Go ya ka bohlabela bja Korinthe go be go e-na le Lewatle la Aegean, gomme go ya ka bodikela e le Kgogometšana ya Korinthe le Lewatle la Ionia. Ka gona Korinthe, e lego mošate wa porofense ya Akaya, ka maema-kepe a yona a mabedi a Kenkrea le Lechaeum, e be e e-na le maemo a bohlokwa bjo bogolo ka tša kgwebo. Gape e be e bile e le lefelo la thuto la Gerika. Go thwe “lehumo la yona le be le tsebja kudu gohle mo e lego gore go be go bolelwa ka lona ka mehla; go be go le bjalo le ka kgobogo le go itlogelela ga badudi ba yona.”b Gare ga mekgwa ya yona ya bodumedi bja boheitene go be go e-na le borapedi bja Aphrodite (yo a swanago le Venus wa Roma). Mokgwa wa go kgotsofatša dikganyogo e be e le setšweletšwa sa borapedi bja Korinthe.

2. Phuthego ya Korinthe e hlomilwe bjang, ka baka leo e bile le tlemo efe le Paulo?

² E bile motseng-mošate wo wa lefase la Roma wo o tšwelago pele eupja e le wo o gobogilego boitshwarong moo moapostola Paulo a ilego a sepela ka 50 C.E. Nakong ya go dula ga gagwe moo ka dikgwedi tše 18, phuthego ya Bokriste e ile ya hlongwa. (Dit. 18:1-11) A lerato le le kaakang leo Paulo a ilego a ba le lona go badumedi ba bao a ba tlišeditšego ditaba tše di lokilego mabapi le Kriste la mathomo! Ka lengwalo o ile a ba gopotša ka tlemo ya moya yeo e bego e le gona, a re: “Xobane le xe Le ka ba le baruti ba dikete-kete ba tša Kriste, xa Le na bô-tata-weno ba bantši; xobane motswadi wa lena ka Ebangedi ké nna rè le ba Jesu Kriste.”—1 Ba-Kor. 4:15.

3. Ke’ng seo se tutueleditšego Paulo gore a ngwale lengwalo la gagwe la pele leo le yago go ba-Korinthe?

³ Go kgomega kudu ga Paulo ka katlego ya bona ya moya go ile gwa mo tutuetša gore a ngwale lengwalo la gagwe la pele leo le yago go Bakriste ba Korinthe ge a le gare leetong la gagwe la boraro la boromiwa. Go fetile nywaga e sego kae ga e sa le go tloga mola a ilego a dula Korinthe. Bjale e be e le mo e ka bago ka 55 C.E., gomme Paulo o be a le kua Efeso. Mohlomongwe o ile a amogela lengwalo leo le tšwago phuthegong yeo e bego e tloga e sa le e mpsha ya Korinthe, gomme e be e nyaka phetolo. Go feta moo, dipego tše tshwenyago di ile tša fihla ditsebeng tša Paulo. (7:1; 1:11; 5:1; 11:18) Dipego tše e be e le tše nyamišago kudu mo e lego gore moapostola ga se a ka a ba a bolela ka lengwalo la bona la dipotšišo go ba go fihla temaneng ya mathomo ya kgaolo 7 ya lengwalo la gagwe. E bile kudu-kudu ka baka la dipego tšeo a di amogetšego moo Paulo a ilego a ikwa a gapeletšega go ngwalela Bakriste-gotee le yena ba Korinthe.

4. Ke’ng seo se hlatselago gore Paulo o ngwadile Ba-Korinthe ba Pele a le Efeso?

⁴ Eupja re tseba bjang gore Paulo o ngwadile Ba-Korinthe ba Pele a le kua Efeso? Gare ga dilo tše dingwe, ge a phetha lengwalo ka ditumedišo, moapostola o akaretša le tša Akwila le Perisila. (16:19) Ditiro 18:18, 19 e bontšha gore ba be ba tlogile Korinthe go ya Efeso. Ka ge Akwila le Perisila ba be ba dula moo gomme Paulo a ba akareditše ditumedišong tša go phetha tša Ba-Korinthe ba Pele, gona o swanetše go ba a be a le Efeso ge a ngwala lengwalo. Lega go le bjalo, ntlha yeo e sa tlogelego pelaelo ke polelo ya Paulo go 1 Ba-Korinthe 16:8: “Motseng wa Efeso ke tlo dula xo fihla ka Pentekoste.” Ka gona Ba-Korinthe ba Pele e ngwadilwe ke Paulo kua Efeso, mohlomongwe go ya bofelong bja go dula ga gagwe moo.

5. Ke’ng seo se tiišago go nepagala ga mangwalo a yago go ba-Korinthe?

⁵ Go nepagala ga Ba-Korinthe ba Pele gape le Ba-Korinthe ba Bobedi, ga go belaelwe. Mangwalo a a ile a bolelwa e le a ngwadilwego ke Paulo gomme a amogelwa e le karolo ya dipuku tše kgethwa ke Bakriste ba pele, bao ba a akareditšego dikgoboketšong tša bona. Ge e le gabotse, go bolelwa gore Ba-Korinthe ba Pele go šupja go yona le go tsopolwa go yona bonyenyane ka makga a tshelelago lengwalong le tšwago Roma le e-ya Korinthe leo e bego e le la mo e ka bago 95 C.E. gomme le bitšwa Clement wa Pele. Mohlomongwe a šupa go Ba-Korinthe ba Pele, mongwadi o ile a kgothaletša baamogedi ba lengwalo le go “tšea epistola ya moapostola yo a šegofaditšwego Paulo.”c Ba-Korinthe ba Pele gape e tsopolwa ka go lebanya ke Justin Martyr, Athenagoras, Irenaeus le Tertullian. Go na le bohlatse bjo matla bja gore karolo e kgolo goba kgoboketšo ya mangwalo a Paulo, go akaretša Ba-Korinthe ba Pele le ba Bobedi, “e hlamilwe le go gatišwa ngwaga-someng wa mafelelo wa lekgolo la pele la nywaga.”d

6. Ke mathata afe ao a bego a le gona ka phuthegong ya Korinthe, gomme ke’ng seo Paulo a bego a kgomega ka sona ka mo go kgethegilego?

⁶ Lengwalo la pele la Paulo leo le yago go Ba-Korinthe le re nea sebaka sa gore re lebelele ka gare ga phuthego ya Korinthe ka boyona. Bakriste ba ba be ba e-na le mathata ao ba swanetšego go lebeletšana le ona le dipotšišo tšeo di swanetšego go arabja. Go be go e-na le dihlotswana ka gare ga phuthego, ka gobane ba bangwe ba be ba latela batho. Boemo bjo bo tšhošago bja boitshwaro bjo bo gobogilego bja botona le botshadi bo ile bja rotoga. Ba bangwe ba be ba dula malapeng ao a aroganego ka bodumedi. Na ba be ba swanetše go tšwela pele ba dula le balekane ba bona bao ba sa dumelego goba ba be ba swanetše go arogana? Le gona go thwe’ng ka go ja nama yeo e hlabetšwego medimo ya diswantšho? Na ba be ba swanetše go eja? Ba-Korinthe ba be ba nyaka thušo mabapi le go swara diboka tša bona, go akaretša le go bina monyanya wa Selalelo sa Morena. Boemo bja basadi e swanetše go ba bofe ka phuthegong? Le gona gape, gare ga bona go be go e-na le bao ba bego ba gana tsogo. Mathata e be e le a mantši. Lega go le bjalo, moapostola ka mo go kgethegilego o be a kgomega kudu ka go tsošološa ba-Korinthe moyeng.

7. Re swanetše go hlahloba Ba-Korinthe ba Pele ka boemo bofe bja monagano, gomme ka baka la’ng?

⁷ Ka gobane maemo ka gare ga phuthego le tikologo ka ntle ga Korinthe ya bogologolo, ka katlego ya yona le go itlogelela ga yona, a e-na le ao a swanago le ona lehono, keletšo ya Paulo e matla yeo e ngwadilwego ka tlase ga pudulelo ya moya wa Modimo e nyaka gore re e ele hloko. Seo Paulo a se boletšego ke seo se lego bohlokwa kudu mehleng ya rena mo e lego gore go hlahloba ka kelohloko lengwalo la gagwe leo le yago go banababo ba rategago le dikgaetšedi ba Korinthe go tla itlhatsela e le mo go holago e le ka kgonthe. Bjale gopola moya wa nako yeo le lefelo. Naganišiša kudu, go etša ge Bakriste ba Korinthe ba swanetše go ba ba ile ba dira, ge re hlahloba mantšu a buduletšwego a tsenelelago le ao a tutuetšago a Paulo ao a yago go badumedi-gotee le yena Korinthe ya bogologolo.

DIKAGARE TŠA BA-KORINTHE BA PELE

8. (a) Paulo o pepentšha bjang bošilo bja go ba le dihlotswana ka phuthegong? (b) Paulo o re ke’ng seo se nyakegago bakeng sa go kwešiša dilo tša Modimo?

⁸ Paulo o pepentšha go ikarola dihlotswana, o kgothaletša botee (1:1–4:21). Paulo o lakaletša ba-Korinthe tše botse. Eupja go thwe’ng ka dihlotswana, dikarogano magareng ga bona? “A Kriste a ka ripaxanywa?” (1:13) Moapostola o leboga gore o kolobeditše ba sego kae kudu ba bona, ka gona ba ka se ke ba bolela gore ba kolobeditšwe leineng la gagwe. Paulo o ruta ka Kriste yo a kokotetšwego. Se ke seo se kgopišago ba-Juda gomme ke bošilo go baditšhaba. Eupja Modimo o kgethile dilo tša bošilo le tše fokolago tša lefase e le gore a leše tše bohlale le tše matla dihlong. Ka gona Paulo ga a diriše polelo e feteletšego eupja o dira gore banababo ba bone moya le matla a Modimo ka mantšu a gagwe, e le gore tumelo ya bona e se ke ya ba go dumela bohlaleng bja batho eupja e be matleng a Modimo. Paulo o re re bolela dilo tšeo di utolotšwego ke moya wa Modimo, “xobane Môya o fênyêka tšohle, le ôna madiba a diphiri tša Modimo.” Tše di ka se ke tša kwešišwa ke motho wa nama eupja ke feela motho wa moya.—2:10.

9. Ke ka polelo efe moo Paulo a bontšhago gore ga go na yo a swanetšego go ikgantšha ka batho?

⁹ Ba latela batho—ba bangwe ba latela Apollo, ba bangwe ba latela Paulo. Eupja ba ke bomang? Ke feela badiredi bao ba-Korinthe e bilego badumedi ka bona. Bao ba bjalago le go nošetša ga se selo, ka gobane “Modimo ké Yêna a medišitšexo,” gomme bona ke “badirišani” ba gagwe. Teko ya mollo e tla bontšha yoo mediro ya gagwe e lego e tiilego. Paulo o ba botša gore, ‘Le tempele ya Modimo,’ yeo go yona Moya wa Gagwe o dulago. “Bohlale bya lefase leno, Modimo ó bôna è le bošilo.” Ka gona, a go se be le yo a ikgantšhago ka batho, gobane dilo ka moka ge e le gabotse ke tša Modimo.—3:6, 9, 16, 19.

10. Ke ka baka la’ng go ikgantšha ga ba-Korinthe go be go fošagetše, gomme ke megato efe yeo Paulo a e tšeago go lokiša boemo?

¹⁰ Paulo le Apollo e be e le batseta bao ba ikokobeditšego ba diphiri tše kgethwa tša Modimo, gomme batseta ba swanetše go hwetšwa e le ba botegago. Banababo rena kua Korinthe ke bomang ba kago go ikgantšha, gomme ke’ng seo ba nago le sona seo ba sa kago ba se amogela? Na ba humile, na ba thomile go buša e le dikgoši le go ba ba bohlale le ba matla, mola baapostola bao ba fetogilego sebogelo sa bobedi barongwa le batho e sa le mašilo le ba fokolago, bao ba nyatšegago go tšohle? Paulo o romela Timotheo go ba thuša go gopola ditsela tša gagwe mabapi le Kriste le go ba baekiši ba gagwe. Ge e ba Jehofa a rata, Paulo ka noši o tla tla kapejana gomme a tsebe e sego feela polelo ya bao ba ikgogomošago, eupja le matla a bona.

11. Ke boitshwaro bofe bjo bo gobogilego bjo bo tšweletšego magareng ga bona, ke’ng seo se swanetšego go dirwa ka bjona gomme ka baka la’ng?

¹¹ Mabapi le go boloka phuthego e hlwekile (5:1–6:20). Taba e tšhošago ya boitshwaro bjo bo gobogilego e ile ya begwa magareng ga ba-Korinthe! Monna o tšere mosadi wa tatagwe. O swanetše go gafelwa Sathane ka gobane komelwana e nyenyane e bediša hlama ka moka. Ba swanetše go kgaotša go kopana le motho lege e le mang yo a ipitšago ngwanabo bona yo e lego yo kgopo.

12. (a) Ke mabaka afe ao Paulo a a beago mabapi le go išana kgorong ya tsheko? (b) Ke ka baka la’ng Paulo a re, “Bootswa bo thšabeng-xê”?

¹² Ee, ba-Korinthe ba be ba bile ba išana kgorong ya tsheko! Na go be go ka se be kaone gore ba itlogele ba jeletšwa? Ka ge ba tlo ahlola lefase le barongwa, na ba be ba ka se hwetše motho magareng ga bona yo a kago go ahlolela banababo bona? Go feta moo, ba swanetše go hlweka ka gobane diotswa, barapedi ba medimo ya diswantšho le ba go swana le bao ba ka se ke ba ja bohwa bja Mmušo wa Modimo. Seo ke seo ba bangwe ba bego ba le sona, eupja ba hlatswitšwe gomme ba kgethagaditšwe. Paulo o re, “Bootswa bo thšabeng-xê.” “Le rekilwe ka thêkô e kxolo. Ké xôna xodišang Modimo ka mebele ya lena.”—6:18, 20.

13. (a) Ke ka baka la’ng Paulo a eletša ba bangwe gore ba nyale goba ba nyalwe? Eupja ge feela ba le lenyalong, ba swanetše go dira’ng? (b) Motho yo a sego lenyalong o ‘dira kaone’ bjang?

¹³ Keletšo mabapi le go se be lenyalong le mabapi le lenyalo (7:1-40). Paulo o araba potšišo mabapi le lenyalo. Ka baka la go ata ga bootswa, gona e ka ba ga bohlale gore monna goba mosadi a tsene lenyalong, gomme bao ba lego lenyalong ga se ba swanela go timana ditshwanelo tša lenyalo. Ke mo gobotse gore bao ba sego lenyalong le bahlologadi ba dule ba se lenyalong, go swana le Paulo; eupja ge e ba ba sa kgone go itshwara, a ba nyale goba ba nyalwe. Ge feela ba tsene lenyalong, ba swanetše go dula ba le gotee. Gaešita lege molekane wa motho e se modumedi, modumedi ga se a swanela go mo tlogela, ka gobane ka tsela yeo modumedi a ka phološa molekane yo a sa dumelego. Ge e le ka lebollo le bohlanka, anke o mongwe le o mongwe a kgotsofalele go ba boemong bjo a biditšwego a le go bjona. Ge e le mabapi le motho yo a lego lenyalong, o pelo-pedi ka gobane o nyaka go amogelwa ke molekane wa gagwe, mola motho yo a sego lenyalong a belaela feela ka dilo tša Morena. Bao ba nyalago ga ba dire sebe, eupja bao ba sa nyalego ba ‘dira kaone.’—7:38.

14. Paulo o re’ng ka “medimo” le “marêna,” eupja ke neng moo go lego bohlale go phema dijo tšeo di hlabetšwego medimo ya diswantšho?

¹⁴ Go dira dilo ka moka ka baka la ditaba tše di lokilego (8:1–9:27). Go thwe’ng ka dijo tšeo di hlabetšwego medimo ya diswantšho? Modimo wa seswantšho ga se selo! Go na le “medimo” e mentši le “marêna” lefaseng, eupja go Bakriste “Modimo ké o tee fêla, Yêna Tata wešo” le ‘Morena o tee, Jesu Kriste.’ (8:5, 6) Lega go le bjalo motho o mongwe a ka kgopišega ge a go bona o e-ja nama yeo e hlabetšwego modimo wa seswantšho. Paulo o eletša gore ka tlase ga maemo a, o lese go e ja e le gore o se ke wa kgopiša ngwaneno.

15. Paulo o itshwara bjang bodireding?

¹⁵ Paulo o itima dilo tše dintši ka baka la bodiredi. Ka ge e le moapostola, o na le tshwanelo ‘ya go phela ka Ebangedi,’ eupja o ile a gana go dira bjalo. Lega go le bjalo, o neilwe boikarabelo bja gore a bolele; ge e le gabotse o re, “Nka ba yo madi-mabe xe nka lesa xo bolêla Ebangedi.” Ka gona o itirile mohlanka wa bohle, ‘bohle ba mo hweditše e le wa gabo bona,’ e le gore ‘a fele a e-ba le bao a ba ruago,’ a dira dilo ka moka “ka ’baka la Ebangedi.” Gore a thope sefoka phadišanong le mphapahlogo wo o sa onalego, o otlaka mmele wa gagwe e le gore ka morago ga go bolela go ba bangwe, yena ka noši ‘a se ke a nyatšega.’—9:14, 16, 19, 22, 23, 27.

16. (a) Ke temošo efe yeo Bakriste ba swanetšego go e hwetša go “bô-tata-wešo”? (b) Ge e le ka borapedi bja medimo ya diswantšho, Bakriste ba ka dira bjang dilo ka moka gore Modimo a tumišwe?

¹⁶ Temošo malebana le dilo tše gobatšago (10:1-33). Go thwe’ng ka “bô-tata-wešo”? Ba ba be ba le ka tlase ga leru gomme ba ile ba kolobetšwa go Moše. Bontši bja bona ga se ba ka ba hwetša kamogelo ya Modimo eupja ba ile ba rapalatšwa lešokeng. Ka baka la’ng? Ba ile ba kganyoga dilo tše gobatšago. Bakriste ba swanetše go hwetša temošo go se gomme ba široge borapedi bja medimo ya diswantšho le bootswa, ba široge le go leka Jehofa gaešita le go ngongorega. Yo a naganago gore o eme o swanetše go hlokomela gore a se ke a wa. Teko e tla tšwelela, eupja Modimo a ka se ke a dumelela bahlanka ba gagwe ba lekwa go feta seo ba ka kgonago go se kgotlelela; o tla nea tsela ya go tšwa e le gore ba ka kgona go kgotlelela seo. Paulo o a ngwala, “Ka ’baka leo, . . . thšabang medirô ya medimo e šele.” (10:1, 14) Re ka se ke ra ba bao ba jelago tafoleng ya Jehofa le tafoleng ya batemona. Lega go le bjalo, ge e ba o e-ja ka gae, o se ke wa botšiša mabapi le moo nama e tšwago gona. Eupja ge e ba motho o mongwe a go tsebiša gore e hlabetšwe medimo ya diswantšho, lesa go ja ka baka la letswalo la motho yoo. Paulo o ngwala gore, “Tšohle tše Le di diraxo Le di dirê xore Modimo a rêtwê ka tšôna.”—10:31.

17. (a) Ke molao ofe wa motheo woo Paulo a o akaretšago mabapi le bohlogo? (b) O kgokaganya bjang potšišo ya karogano ka phuthegong le taba ya Selalelo sa Morena?

¹⁷ Bohlogo; Selalelo sa Morena (11:1-34). Paulo o re, “Bang baetši ba-ka byalo ka xe nna kè le mo-etša-Kriste,” gomme ka morago o tšwela pele ka go akaretša molao wa motheo wa bohlogo: Hlogo ya mosadi ke monna, hlogo ya monna ke Kriste, hlogo ya Kriste ke Modimo. Ka baka leo, mosadi o swanetše go ‘rwala seka sa go bušwa’ hlogong ya gagwe ge a rapela goba a porofeta ka phuthegong. Paulo a ka se ke a reta ba-Korinthe, ka gobane go na le dikarogano magareng ga bona ge ba kopana gotee. Boemong bjo, ba be ba ka ja bjang ka mo go swanetšego Selalelo sa Morena? O boeletša seo se diregilego ge Jesu a be a hloma Segopotšo sa lehu la gagwe. O mongwe le o mongwe o swanetše go itekodišiša pele a e-ja, e le gore a se ke a ikgokela kahlolo ka baka la go palelwa ke go lemoga “mmele.”—11:1, 10, 29.

18. (a) Gaešita lege go e-na le mehuta-huta ya dimpho le bodiredi, ke ka baka la’ng go se gwa swanela go ba le karogano mmeleng? (b) Ke ka baka la’ng lerato e le leo le di fetago tšohle?

¹⁸ Dimpho tša moya; lerato le go le phegelela (12:1–14:40). Go na le dimpho tša mehuta-huta tša moya, lega go le bjalo moya ke o tee; mehuta-huta ya bodiredi le mediro, eupja Morena ke o tee le Modimo ke o tee. Ka mo go swanago go na le ditho tše dintši mmeleng o tee o momaganego wa Kriste, setho se sengwe le se sengwe se nyaka se sengwe, go swana le mmeleng wa motho. Modimo o beile setho se sengwe le se sengwe mmeleng go ya kamoo A ratago ka gona, gomme se sengwe le se sengwe se na le modiro wo se swanetšego go o dira, ka gona “mo mmeleng xo se kê xwa ba le thšitanô.” (12:25) Bao ba dirišago dimpho tša moya ga se selo ge ba se na lerato. Lerato ga le fele pelo gomme le botho, ga le na mona, ga le ikgogomoše. Le thaba le therešo feela. “Lerato ga le palelwe le ka mohla.” (13:8, NW) Dimpho tša moya, tše bjalo ka go porofeta le maleme, di tla fela, eupja tumelo, kholofelo le lerato di šala di le gona. Go tše, se segolo ke lerato.

19. Ke keletšo efe yeo Paulo a e neago bakeng sa go aga phuthego le bakeng sa thulaganyo e botse ya dilo?

¹⁹ Paulo o a eletša, “Phêxêlêlang leratô.” Dimpho tša moya di swanetše go dirišwa ka lerato bakeng sa go aga phuthego. Ka baka le, go porofeta go swanetše go kgethwa go e na le go bolela ka maleme. A ka upja a bolela mantšu a mahlano ka kwešišo gore a rute ba bangwe go e na le a dikete tše lesome ka leleme leo le sa tsebjego. Maleme ke seka go bao ba sa dumelego, eupja go porofeta ke ga badumedi. Ba be ba sa swanela go ba “bana” go kwešišeng ditaba tše. Ge e le ka basadi, ba swanetše go ikokobetša ka phuthegong. “Tšohle di yê ka bothakxa le ka molao [“thulaganyo,” NW].”—14:1, 20, 40.

20. (a) Ke bohlatse bofe bjoo Paulo a bo neago ka tsogo ya Kriste? (b) Tatelano ya tsogo ke efe, gomme ke manaba afe ao a swanetšego go fedišwa?

²⁰ Go ba ga kgonthe ga kholofelo ya tsogo (15:1–16:24). Kriste yo a tsošitšwego o ile a tšwelela go Kefase, go ba 12, go banababo rena ba ka godimo ga 500 ka nako e nngwe, go Jakobo, go baapostola ka moka, gomme a tšwelela le go Paulo e le wa mafelelo go bohle. Paulo o ngwala gore, ‘Ge e ba Kriste a sa tsoga, gona se re se tsebatšago ke lefeela, gomme tumelo ya rena ke ya lefeela.’ (15:14) O mongwe le o mongwe o tsošwa ka nako ya gagwe, Kriste e le yena thaka-ngwaga, ka morago a latelwa ke bao e lego ba gagwe nakong ya go ba gona ga gagwe. Mafelelong o neela Mmušo go Tatagwe ka morago ga ge manaba ka moka a beilwe ka tlase ga dinao tša gagwe. Gaešita le lehu, lenaba la mafelelo, le tla fedišwa. Ke ka baka la’ng Paulo a be a ka lebeletšana le dikotsi tša lehu ka go tšwela pele ge e ba go se na tsogo?

21. (a) Bao ba tlago go ja bohwa bja Mmušo wa Modimo ba tla tsošwa bjang? (b) Ke sephiri sefe se sekgethwa seo Paulo a se utollago, gomme o re’ng ka phenyo ya go fenya lehu?

²¹ Eupja bahu ba tla tsošwa bjang? E le gore kutu ya semela e tšwelele, peu yeo e bjetšwego e swanetše go hwa. Ke mo go swanago le ka tsogo ya bahu. “O byalwa è le mmele wa nama; o tlo tsoxa è le mmele wa môya. . . . Nama le madi xa se tšôna di tl’o xo ja lefa mmušong wa Modimo.” (15:44, 50) Paulo o anega sephiri se sekgethwa: Ga se bohle bao ba tlago go robala lehung, eupja nakong ya phalafala ya mafelelo, ba tla fetolwa ka go ponya ga leihlo. Nakong ya ge se seo e lego se se hwago se apara go se hwe, lehu le tla meletšwa ruri. “Hee Lehu! Lebôla la xaxo le kae! Hee Bo-dula-bahu! Xo fenya xa xaxo xo kae!” Paulo o kgotsa go tšwa pelong ka gore: “A xo leboxwê Modimo e a re faxo xo fenya ka Mong wa rena Jesu Kriste.”—15:55, 57.

22. Ke keletšo efe le kgothatšo tša go phetha tšeo Paulo a di neago?

²² Ge a phetha Paulo o eletša mabapi le go ba le thulaganyo ge go kgoboketšwa meneelo bakeng sa go e romela Jerusalema go thuša banababo rena bao ba hlokago. O bolela ka ketelo ya gagwe e tlago a feta Matsedonia gomme o bontšha gore Timotheo le Apollo le bona mo gongwe ba ka etela. Paulo o eletša ka gore, “Phakxamang le êmê tumêlong, Le dirê senna, Le tiê matla. Tšohle tša lena di dirwê ka leratô.” (16:13, 14) Paulo o romela ditumedišo tše di tšwago go diphuthego tša kua Asia, gomme ka morago o ngwala ditumedišo tša mafelelo ka seatla sa gagwe, a fetiša lerato la gagwe.

LEBAKA LEO KA LONA E HOLAGO

23. (a) Paulo o swantšha bjang mafelelo a kotsi a kganyogo e mpe le go ipota? (b) Paulo o šupa mothopong ofe wa thekgo ge a eletša mabapi le Selalelo sa Morena le dijo tše swanetšego?

²³ Lengwalo le la moapostola Paulo ke leo le holago kudu go godišeng kwešišo ya rena ya Mangwalo a Sehebere, ao le tsopolago gantši go ona. Kgaolong ya lesome, Paulo o šupa gore ba-Isiraele ka tlase ga Moše ba ile ba nwa meetse lefsikeng la motheo la moya, e lego seo se bego se bolela Kriste. (1 Ba-Kor. 10:4; Num. 20:11) Ka gona o tšwela pele go bontšha mafelelo a kotsi a go kganyoga dilo tše gobatšago, bjalo ka ge go bontšhitšwe ke ba-Isiraele ka tlase ga Moše gomme o oketša ka gore: “Tšeo ka moka di direxetše bao xore e bê xo lemoša; di ngwadilwe xore e bê xo eletša rena ba re fihletšwexo ke bofêlô bya mabaka.” Anke le ka mohla re se ke ra ba bao ba ipotilego, re nagana gore re ka se ke ra wa! (1 Ba-Kor. 10:11, 12; Num. 14:2; 21:5; 25:9) Gape o dira seswantšho go tšwa Molaong. O šupa go dihlabelo tša dileboga Isiraeleng go bontšha gore bao ba jago Selalelong sa Morena ba swanetše go ja ka mo go swanetšego tafoleng ya Jehofa. Ka gona, e le go thekga polelo ya gagwe ya gore ke mo go swanetšego go ja selo se sengwe le se sengwe seo se rekišwago mmarakeng wa nama, o tsopola go Psalme 24:1, a re, “Lefase ké la Morêna, le tšohle tše di tletšexo mo xo lôna.”—1 Ba-Kor. 10:18, 21, 26; Ek. 32:6; Lef. 7:11-15.

24. Ke ditšhupetšo dife tše dingwe tšeo Paulo a di dirago Mangwalong a Sehebere bakeng sa go thekga dipolelo tša gagwe?

²⁴ Ge a bontšha go phagama ga “tše Modimo a di lokišeditšexo ba ba mo rataxo” le go ba ga lefeela ga “kxopolô tša bahlale” ba lefase le, Paulo gape o diriša Mangwalo a Sehebere. (1 Ba-Kor. 2:9; 3:20; Jes. 64:4; Ps. 94:11) E le mothopo wa go thekga ditaelo tša gagwe go kgaolo 5 mabapi le go kgaola mofoši, o tsopola molao wa Jehofa wa ‘go fediša bobe magareng ga bona.’ (Doit. 17:7) Ge a bolela ka tshwanelo ya gagwe ya go phela ka bodiredi, Paulo o šupa gape go Molao wa Moše, wo o boletšego gore diphoofolo tšeo di šomago ga se tša swanela go tswalelwa melomo go di thibela gore di se ke tša ja le gore ba-Lefi bao ba bego ba le tirelong ya tempele ba be ba swanetše go amogela kabelo ya bona ya dijo go tšwa aletareng.—1 Ba-Kor. 9:8-14; Doit. 25:4; 18:1.

25. Ke dintlha dife tše dingwe tše dikgolo tša thuto e holago tšeo di lego ka go Ba-Korinthe ba Pele?

²⁵ A mehola e mentši gakaakaang ya thuto e buduletšwego yeo re e amogetšego go tšwa lengwalong la pele la Paulo leo le yago go Bakriste ba Korinthe! Naganišiša ka keletšo yeo e neilwego malebana le dikarogano le go latela batho. (Dikgaolo 1-4) Gopola taba ya boitshwaro bjo bo gobogilego le kamoo Paulo a gateletšego ka gona go nyakega ga bokwala le bohlweki ka gare ga phuthego. (Dikgaolo 5, 6) Ela hloko keletšo e buduletšwego yeo e lego mabapi le go se be lenyalong, lenyalo le karogano. (Kgaolo 7) Nagana ka go ahla-ahla ga moapostola dijo tšeo di hlabetšwego medimo ya diswantšho gaešita le kamoo go nyakega ga go itiša malebana le go kgopiša ba bangwe le go wela borapeding bja medimo ya diswantšho go ilego gwa tšweletšwa ka gona ka matla kudu. (Dikgaolo 8-10) Keletšo mabapi le go ikokobetša mo go swanetšego, go hlahlobja ga dimpho tša moya, poledišano yela e holago mabapi le botse bja seka sa lerato seo se kgotlelelago le seo se sa palelwego—dilo tše le tšona di ile tša hlahlobja. Le gona moapostola o tiišitše gabotse gakaakang go nyakega ga go ba le thulaganyo dibokeng tša Bokriste! (Dikgaolo 11-14) Ke go lwelwa ga tsogo mo go makatšago gakaakang mo a go ngwadilego ka tlase ga pudulelo! (Kgaolo 15) Se sohle le go feta mo se tšweletše mahlong a monagano—gomme ke sa bohlokwa kudu go Bakriste mehleng ya rena!

26. (a) Ke modiro ofe wo o boletšwego e sa le pele woo Kriste yo a tsošitšwego a o phethago ge a buša e le Kgoši? (b) Motheong wa kholofelo ya tsogo, ke kgothatšo efe e matla yeo Paulo a e neago?

²⁶ Lengwalo le le tlaleletša ka mo go lemogegago kwešišong ya rena ya sehlogo se segolo sa Beibele sa Mmušo wa Modimo. Le nea temošo e matla ya gore batho ba sa lokago ba ka se ke ba tsena Mmušong, gomme e lokeletša makgopo a mantši ao a tlago go dira gore motho a se swanelege. (1 Ba-Kor. 6:9, 10) Eupja sa bohlokwa kudu, le hlalosa tswalano magareng ga tsogo le Mmušo wa Modimo. Le bontšha gore Kriste, “thakangwaxa” ya tsogo, o swanetše ‘go buša e le kgoši, go be go tle Modimo a bee manaba a gagwe ka tlase ga dinao tša gagwe.’ Ka gona, ge a fedišitše manaba ka moka, go akaretša le lehu, “ké mo le Yêna Morwa a tl’o xo bewa ka tlase xa E a mmeilexo mmuši wa tšohle, xore Modimo e bê Yêna Mo-ba-tšohle-xo-bohle.” Mafelelong, ka go phethagatša kholofetšo ya Mmušo yeo e dirilwego Edene, go pšhatlwa ka mo go feletšego ga hlogo ya Noga go phethwa ke Kriste gotee le banababo ba tsošitšwego ba moya. Tebelelo ya tsogo ya bao ba tlago go ba le go se bole gotee le Kriste Jesu Mmušong wa legodimo ke e kgolo e le ka kgonthe. Ke motheong wa kholofelo ya tsogo moo Paulo a kgothatšago ka gore: “Ké xôna, lena Bana bešo baratwa! Tiang matla, Le se kê la têkêma, Le tiêlêlê modirong wa Morêna mo xo fêla, Lè tseba xore xo itapiša xa lena xa se xa lefêla Moreneng.”—1 Ba-Kor. 15:20-28, 58; Gen. 3:15; Ba-Roma 16:20.

[Mengwalo ya ka tlase]