Bontšha Tumelo e Theilwego Therešong

“Xo kxahla Modimo xa xo kxônexe xe xo se tumêlô. E a batamêlaxo Modimo ó swanetše xo dumêla xore Modimo ó xôna, le xore ba ba mo nyakaxo ó a ba putsa.”​—BA-HEBERE 11:6.

1, 2. Tumelo ya Adama e ile ya lekwa bjang, gomme mafelelo e bile afe?

TUMELO e nyaka se se fetago go dumela gore Modimo o gona. Motho wa pele Adama o be a se na kgonono ka go ba gona ga Jehofa Modimo. Modimo o be a ile a bolela le Adama, mo gongwe ka Morwa wa Gagwe e lego Lentšu. (Johane 1:​1-3; Ba-Kolose 1:​15-17) Lega go le bjalo, Adama o ile a lahlegelwa ke tebelelo ya bophelo bjo bo sa felego ka gobane o ile a palelwa ke go kwa Jehofa le go bontšha tumelo go yena.

² Lethabo la Adama la nakong e tlago le ile la bonagala le beilwe kotsing ge mosadi wa gagwe Efa a be a sa kwe Jehofa. Kgonagalo ya gore monna wa pele a lahlegelwe ke mosadi wa gagwe e ile ya leka tumelo ya gagwe! Na Modimo o be a ka rarolla bothata bjo ka tsela yeo e tlago go kgonthiša gore Adama o tšwela pele a thabile gomme a iketlile? Adama ka go tsenya letsogo phošong ya Efa o ile a bontšha gore o be a sa nagane bjalo. O ile a leka go lokiša bothata ka tsela ya gagwe, go e na le gore a tsomišiše tlhahlo ya Modimo. Adama ka baka la go palelwa ke go bontšha tumelo go Jehofa, o ile a bakela yena gotee le bana ba gagwe ka moka lehu.​—Ba-Roma 5:12.

Tumelo ke Eng?

3. Ke bjang tlhaloso ya Beibele ya tumelo e fapanego le yeo e newago ke puku-ntšu e nngwe?

³ Puku-ntšu e nngwe e hlalosa tumelo e le “go ba le kholofelo e tiilego selong se sengwe seo go se nago bohlatse bja sona.” Lega go le bjalo, Beibele go e na le gore e thekge kgopolo yeo e bolela se se fapanego kudu. Tumelo e theilwe dilong tša kgonthe, dilong tše di lego gona le therešong. Mangwalo a re: “Tumelo ke tebelelo e kgonthišitšwego ya dilo tšeo di holofetšwego, ke pontšho ye e bonagalago ya dilo tša kgonthe lege di se tša bonwa.” (Ba-Hebere 11:1, NW) Motho yo a nago le tumelo o kgodišegile gore selo se sengwe le se sengwe seo se holofeditšwego ke Modimo go swana le ge se phethegile. Bohlatse bjo bo lego gona bja dilo tša kgonthe tše di sa bonwego ke bjo bontši mo e lego gore go bolelwa gore tumelo e lekana le bohlatse bjoo.

4. Ke bjang puku e nngwe e thekgago tlhaloso ya Beibele ya tumelo?

⁴ Lediriši la lediri la Sehebere ʼa·manʹ ka go New World Translation ka dinako tše dingwe le fetolelwa e le “go dumela.” Go ya ka Theological Wordbook of the Old Testament, “modung wa tlhaloso ya mathomo go na le kgopolo ya go kgodišega . . . go fapana le dikgopolo tša mehleng yeno tša gore tumelo ke selo se sengwe seo se kgonegago, seo e ka bago e le therešo eupja se sa kgonthišwe.” Puku yona ye e re: “Leina-letšo ’āmēn e lego ‘ruri’ le fetetše ka go Testamente e Mpsha ka sebopego sa lentšu amēn e lego lentšu la Seisemane la ‘amen.’ Jesu o dirišitše lentšu le leboelela (Mat 5:​18, 26, bj. bj.) bakeng sa go gatelela therešo ya taba.” Lentšu leo le fetoletšwego e le “tumelo” ka Mangwalong a Bakriste a Segerika le lona le bolela go dumela selo se sengwe seo se theilwego ka go tia dilong tša kgonthe goba therešong.

5. Ke bjang lentšu la Segerika leo le fetoletšwego e le “tebelelo e kgonthišitšwego” go Ba-Hebere 11:1 (NW) le ilego la dirišwa mangwalong a bogologolo a kgwebo, le gona se se bolela’ng go Bakriste?

⁵ Lentšu la Segerika (hy·poʹsta·sis) leo le fetoletšwego e le “tebelelo e kgonthišitšwego” go Ba-Hebere 11:1 (NW) le be le dirišwa ka tlwaelo mangwalong a bogologolo a kgwebo a phaphirase bakeng sa go nea kgopolo ya selo se sengwe seo se kgonthišago gore se sengwe se tla hwetšwa nakong e tlago. Barutwana Moulton le Milligan ba šišinya phetolelo e rego: “Tumelo ke sešupo sa bohlatse sa dilo tšeo di holofetšwego.” (Vocabulary of the Greek Testament) Go molaleng gore ge motho a e-na le bohlatse bjo bo šupago gore o swanetše go amogela thoto, a ka ba le “tebelelo e kgonthišitšwego” ya gore ka letšatši le lengwe kholofelo ya gagwe ya go e hwetša e tla phethega.

6. Lentšu la Segerika leo le fetoletšwego e le “pontšho ye e bonagalago” go Ba-Hebere 11:1 (NW) le bolela’ng?

⁶ Go Ba-Hebere 11:1, lentšu la Segerika leo le fetoletšwego e le “pontšho ye e bonagalago” (eʹleg·khos) le nea kgopolo ya go tšweletša bohlatse bakeng sa go bontšha se sengwe, kudu-kudu selo se sengwe seo se fapanego le seo go bonagalago eka ke sona selo sa kgonthe. Bohlatse bjo bja kgonthe goba bjo bo tiilego bo tšweletša nyanyeng seo pele se bego se sa elwe hloko, ka gona bo bontšha go fošagala ga seo se bilego le ponagalo feela ya go ba selo sa kgonthe. Ka gona tumelo ka Mangwalong a Sehebere gotee le a Segerika le gatee ga se “go ba le kholofelo e tiilego selong se sengwe seo go se nago bohlatse bja sona.” Go fapana le seo, tumelo e theilwe therešong.

E Theilwe Ditherešong tša Motheo

7. Paulo le Dafida ba hlalosa bao ba latolago go ba gona ga Modimo bjang?

⁷ Moapostola Paulo o boletše therešo ya motheo ge a be a ngwala gore “tše di sa bonwexo tša xaxwe [Mmopi], e lexo matla a neng le neng, le bomodimo bya xaxwe, le tšôna xo tloxa thlolong ya lexohle, ba ka di hlatha ka xo bôna ditirô tša xaxwe, ’me [baganetši ba therešo] ba hlôka tše ba kaxo latola ka tšôna.” (Ba-Roma 1:​20) Ee, “maxodimo a re anêxêla boxolo bya Modimo,” gomme “lefase le tletše dibopiwa tša [gagwe].” (Psalme 19:1; 104:​24) Eupja go thwe’ng ge e ba motho a sa rate go hlahloba bohlatse? Mopsalme Dafida o itše: “Yo mobe, go ya ka go ikgodiša [“ka ge a ikgantšha,” The New English Bible] ga a nyakišiše; dikakanyo tšohle tša gagwe ke tša gore: ‘Ga go na Modimo.’” (Psalme 10:4, NW; 14:1) Go fihla bokgoleng bjo itšego, tumelo e theilwe therešong ya motheo ya gore Modimo o gona.

8. Bao ba bontšhago tumelo ba ka ba le kgodišego le temogo dife?

⁸ Jehofa ga se feela gore o gona; gape ke yo a botegago, le gona re ka bota dikholofetšo tša gagwe. O itše: “Xe xo sa direxe tše ke di xopotšexo, xe xo sa tšwêlêle tše ke di rerilexo, e tlo ba è se Nna!” (Jesaya 14:​24; 46:​9, 10) A ga se mantšu feela a sa rego selo. Go na le bohlatse bjo bo bonagalago bja gore diporofeto tše makgolo tšeo di ngwadilwego Lentšung la Modimo di phethegile. Ka baka la tshedimošo ye, bao ba bontšhago tumelo ba kgona le go lemoga go phethagala mo go tšwelago pele ga diporofeto tše dingwe tše dintši tša Beibele. (Ba-Efeso 1:​18) Ka mohlala, ba bona go phethagala ga ‘pontšho’ ya go ba gona ga Jesu, go akaretša le go bolelwa mo go dirwago ka lebelo ga Mmušo wo o hlomilwego gaešita le go oketšega mo go boletšwego e sa le pele ga borapedi bja therešo. (Mateo 24:​3-14; Jesaya 2:​2-4; 60:​8, 22) Ba a tseba gore kgaufsinyane ditšhaba di tla hlaba mokgoši wa gore “Xo khutšô! Xo iketlilwe!” le gore kapejana ka morago ga moo Modimo o tla “senya basenya-lefase.” (1 Ba-Thesalonika 5:3; Kutollo 11:​18) Ke tšhegofatšo e kgolo gakaakang go ba le tumelo yeo e theilwego ditherešong tša boporofeta!

Seenywa sa Moya o Mokgethwa

9. Tumelo le moya o mokgethwa di tswalana bjang?

⁹ Therešo yeo tumelo e theilwego go yona e hwetšwa ka Beibeleng, yeo e lego setšweletšwa sa moya wa Modimo o mokgethwa. (2 Samuele 23:2; Sakaria 7:​12; Mareka 12:​36) Ka mo go kwalago, tumelo e ka se ke ya ba gona ka ntle le go šoma ga moya o mokgethwa. Ke ka baka leo Paulo a bego a ka ngwala gore: “Seenywa sa moya [se akaretša] . . . tumelo.” (Ba-Galatia 5:​22, NW) Eupja batho ba bantši ba gana therešo ya Modimo, ba šilafatša maphelo a bona ka dikganyogo tša nama le dikgopolo tšeo di kgopišago moya wa Modimo. Ka gona “tumêlô xa se ya bohle,” ka gobane ga ba na motheo wo ba ka e godišago go wona.​—2 Ba-Thesalonika 3:2; Ba-Galatia 5:​16-21; Ba-Efeso 4:30.

10. Bahlanka ba bangwe ba pele ba Jehofa ba bontšhitše bjang gore ba na le tumelo?

¹⁰ Lega go le bjalo, gare ga bana ba Adama go bile le batho bao ba ilego ba bontšha tumelo. Ba-Hebere kgaolo 11 e bolela ka Abele, Henoge, Noage, Aborahama, Sara, Isaka, Jakobo, Josefa, Moše, Rahaba, Gideone, Baraka, Simisone, Jefeta, Dafida le Samuele gotee le bahlanka ba bantši ba sa kago ba bolelwa ba Jehofa, ‘bao ba hlatsetšwego ka tumelo ya bona.’ Ela hloko seo se dirilwego ka “tumêlô.” Ke ka tumelo Abele “a ipexilexo xo Modimo ka sedimo [“sehlabelo,” NW]” le ge Noage “a dirile polokêlô.” Ka tumelo Aborahama “à e-kwa xo bitšwa, a khuduxa a ya felô fao a tl’o xo xo fiwa xore e bê lexaê la xaxwe.” Gape ka tumelo Moše o ile “a khuduxa Egipita.”​—Ba-Hebere 11:​4, 7, 8, 27, 29, 39.

11. Ke eng seo Ditiro 5:​32 e se bontšhago ge e le mabapi le batho bao ba kwago Modimo?

¹¹ Go molaleng gore bahlanka bao ka moka ba Jehofa ba dirile mo go fetago go dumela go ba gona ga Modimo feela. Ka go bontšha tumelo, ba ile ba bea kholofelo go yena e le ‘moputsi wa bao ba mo tsomago.’ (Ba-Hebere 11:6) Ba dirile seo moya wa Modimo o ba laetšego go se dira, ba diriša tsebo e nepagetšego ya therešo yeo e bego e hwetšagala ka nako yeo, gaešita lege e be e le e nyenyane. Se se fapane kudu gakaakang le se se dirilwego ke Adama! Ga se a ka a dira ka tumelo yeo e theilwego therešong goba ka go dumelelana le tlhahlo ya moya o mokgethwa. Modimo o nea moya wa gagwe go bao ba mo kwago feela.​—Ditiro 5:32.

12. (a) Abele o bile le tumelo go eng, gomme o bontšhitše se bjang? (b) Ke eng seo dihlatse tša Jehofa tša pele ga mehla ya Bokriste go sa šetšwe tumelo yeo di bego di e-na le yona di sa kago tša se amogela?

¹² Go fapana le tatagwe Adama, Abele yo a boifago Modimo o be a e-na le tumelo. Mohlomongwe o ile a kwa go batswadi ba gagwe ka boporofeta bja pele-pele bjo bo ilego bja bolelwa: “Le xôna ke [Jehofa Modimo] bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Genesi 3:​15) Modimo ka go rialo o ile a holofetša go fediša bobe le go tsošološa go loka. Abele o be a sa tsebe gore kholofetšo ye e be e tla phethagatšwa bjang. Eupja tumelo ya gagwe ya gore Modimo ke Moputsi wa bao ba Mo tsomago e be e le e matla ka mo go lekanego go ka mo tutueletša gore a neele sehlabelo. Mo gongwe o be a ile a naganišiša kudu ka boporofeta bjo gomme a dumela gore go tšholla madi go be go tla nyakega bakeng sa go phethagatša kholofetšo le go phagamišetša batho phethegong. Ka gona, sehlabelo sa Abele sa phoofolo se be se nepagetše. Lega go le bjalo, go sa šetšwe tumelo yeo ba bego ba e-na le yona, Abele le dihlatse tša Jehofa tša pele ga mehla ya Bokriste “tše ba di holofeditšwexo xa ba ka ba di bôna ka mahlô.”​—Ba-Hebere 11:39.

Go Phethagatša Tumelo

13. (a) Ke eng seo Aborahama le Dafida ba ilego ba ithuta sona mabapi le go phethagala ga kholofetšo? (b) Ke ka baka la’ng go ka bolelwa gore ‘therešo e bile gona ka Jesu Kriste’?

¹³ Ka dinako tše dingwe go theoša le nywaga-kgolo, Modimo o ile a utolla therešo e oketšegilego mabapi le kamoo kholofetšo e lego mabapi le ‘peu ya mosadi’ e bego e tla phethagatšwa ka gona. Aborahama o ile a botšwa gore: “Dithšaba ka moka tša lefase di tlo šexofala ka peu ya xaxo.” (Genesi 22:​18) Ka morago, Kgoši Dafida o ile a botšwa gore Peu e holofeditšwego e be e tla tla ka leloko la gagwe la bogoši. Ka 29 C.E., Peu yeo e ile ya tšwelela e le Jesu Kriste. (Psalme 89:​3, 4; Mateo 1:​1; 3:​16, 17) Go fapana le Adama yo a bego a hloka tumelo, “Adama wa mafêlêlô” e lego Jesu Kriste e be e le mohlala o mobotse wa go bontšha tumelo. (1 Ba-Korinthe 15:​45) O phetše bophelo bja tirelo ya boineelo go Jehofa gomme a phethagatša diporofeto tše dintši tšeo di boletšego e sa le pele ka Mesia. Ka gona Jesu o ile a dira gore therešo ye e lego mabapi le Peu e holofeditšwego e kwagale gabotse gomme a dira gore dilo tše di bego di swantšhetšwa ke Molao wa Moše e be tša kgonthe. (Ba-Kolose 2:​16, 17) Ka gona go be go ka bolelwa gore ‘therešo e bile gona ka Jesu Kriste.’​—Johane 1:17.

14. Ke bjang Paulo a ilego a bontšha ba-Galatia gore tumelo e be e tšere sebopego se sefsa?

¹⁴ Ka ge bjale therešo e bile gona ka Jesu Kriste, go bile le motheo o mogolwanyane woo go wona go ka thewago tumelo ya go dumela ‘se se holofeditšwego.’ Tumelo e be e tiišitšwe ka mo go oketšegilego, goba re ka re e be e tšere sebopego se sefsa. Paulo tabeng ye o boditše Bakriste-gotee le yena ba ba tloditšwego gore: “Mangwalô a tlemile tšohle ka sebe, xore se se holofedišitšwexo se tlê se newê ba ba dumêlaxo, ba se bônê ka tumêlô ya xo dumêla Jesu Kriste. Mola tumêlô è sešo ya tla, re be re sa etetšwa ke Molaô, rè sa tlemilwe ke wôna, rè letetše tumêlô e bexo e tlo utollwa. Molaô ya ba moetetši wa xo re iša xo Kriste, xore re tlê re lokafatšwê ka tumêlô. Xomme byale xe tumêlô e tlile, xa re sa bušwa ke moetetši eo. Xobane ka moka Le bana ba Modimo ka tumêlô ya xo dumêla Jesu Kriste.”​—Ba-Galatia 3:​22-26.

15. Ke bjang feela tumelo e bego e ka dirwa e phethagetšego?

¹⁵ Ba-Isiraele ba be ba bontšhitše tumelo ditirišanong tša Modimo le bona ka kgwerano ya Molao. Eupja tumelo ye bjale e be e nyaka go oketšwa. Bjang? Ka go bontšha tumelo go Jesu yo a tloditšwego ka moya e lego yoo Molao o bego o beetšwe go ba iša go yena. Ke ka tsela yeo feela moo tumelo ya pele ga mehla ya Bokriste e bego e ka dirwa e phethagetšego. E be e le gabohlokwa gakaakang bakeng sa Bakriste bao ba pele go ‘tsepamiša mahlo go Jesu, Moemedi o Mogolo le Mophethagatši wa tumelo ya bona’! (Ba-Hebere 12:2, NW) Ka kgonthe, Bakriste ka moka ba swanetše go dira bjalo.

16. Ke bjang moya o mokgethwa o ilego wa tla ka bontši kudu, gona ka baka la’ng?

¹⁶ Ka ge go be go e-na le tsebo e oketšegilego ya therešo ya Modimo le tumelo e phethegilego e bego e tlišwa ke seo, na moya o mokgethwa le wona o be o tla tla ka bontši? Ee. Ka Pentekoste ya 33 C.E., moya wa Modimo e lego molwedi yo a holofeditšwego yo Jesu a bego a boletše ka yena, o ile wa tšhollelwa godimo ga barutiwa ba gagwe. (Johane 14:​26; Ditiro 2:​1-4) Moya o mokgethwa ka nako yeo o be o dira godimo ga bona e le barwarre ba Kriste ba ba tloditšwego ka tsela e mpsha ka mo go feletšego. Tumelo ya bona, e lego seenywa sa moya o mokgethwa e ile ya matlafatšwa. Se se ile sa ba hlama bakeng sa modiro o mogolo wa go dira barutiwa wo o bego o le ka pele.​—Mateo 28:​19, 20.

17. (a) Therešo e tlile bjang gomme tumelo e dirilwe e phethagetšego bjang ga e sa le go tloga ka 1914? (b) Re na le bohlatse bofe bja go dira ga moya o mokgethwa ga e sa le go tloga ka 1919?

¹⁷ Tumelo e tlile ge Jesu a be a itšweletša e le Kgoši e Kgethilwego nywageng e 1 900 e fetilego. Eupja ka ge bjale e le Kgoši e bušago ya legodimong, motheo wa tumelo ya rena​—therešo e utolotšwego—​ke o mogolo kudu, ka gona o dira gore tumelo ya rena e be e phethagetšego. Ka mo go swanago, go šoma ga moya o mokgethwa go oketšegile. Go bile le bohlatse bjo bo lego molaleng bja se ka 1919 ge moya o mokgethwa o be o tsošološa bahlanka ba Modimo ba ba ineetšego boemong bjo e nyakilego e le bja go hwa. (Hesekiele 37:​1-14; Kutollo 11:​7-12) Bjale go ile gwa thewa motheo wa paradeise ya moya, e lego yeo nywaga-some e latetšego e ilego ya bonagala le go gola ka mo go oketšegilego ngwaga le ngwaga. Na go be go ka ba le bohlatse bjo bo fetago bjoo bja go šoma ga moya o mokgethwa wa Modimo?

Ke ka Baka La’ng re Swanetše go Hlahloba Tumelo ya Rena?

18. Dihlodi tša ba-Isiraele di be di fapane bjang ge e le mabapi le tumelo?

¹⁸ Kapejana ka morago ga gore ba-Isiraele ba lokollwe bohlankeng Egipita, go ile gwa romelwa banna ba 12 gore ba ye go hlola naga ya Kanana. Lega go le bjalo, ba lesome ba bona ba ile ba hloka tumelo, ba belaela matla a Jehofa a go phethagatša kholofetšo ya gagwe ya go nea Isiraele naga. Ba be ba tutuetšwa ke pono, e lego dilo tše bonagalago. Go ba 12 ba, ke Jošua le Kalebe feela bao ba ilego ba bontšha gore ba sepela ka tumelo, e sego ka pono. (Bapiša 2 Ba-Korinthe 5:7.) Ka baka la go bontšha tumelo, ke bona feela gare ga banna bao ba ba ilego ba kgona go tsena Nageng ya Kholofetšo.​—Numeri 13:​1-33; 14:​35-38.

19. Ke bjang motheo wa tumelo e lego o tiilego kudu lehono go feta lege e ka ba neng pele, fela re swanetše go dira’ng?

¹⁹ Lehono, re eme mollwaneng wa lefase le lefsa la Modimo la go loka. Gore re tsene go lona, go nyakega tumelo. Se se thabišago ke gore motheo wa therešo wo tumelo yeo e ka thewago go wona ke o tiilego ka go fetišiša. Re na le Lentšu le le feletšego la Modimo, mohlala wa Jesu Kriste gotee le balatedi ba gagwe ba ba tloditšwego, thušo ya banababo rena le dikgaetšadi ba moya ba dimilione gotee le thekgo ya moya o mokgethwa wa Modimo ka tekanyo e kgolo ka go fetišiša. Lega go le bjalo, re dira gabotse ge re hlahloba tumelo ya rena le go gata megato ya go e matlafatša ge re sa kgona.

20. Ke dipotšišo dife tšeo re swanetšego go ipotšiša tšona?

²⁰ Mo gongwe o ka re, ‘Nna ke dumela gore se ke therešo.’ Eupja tumelo ya gago ke e matla gakaaka’ng? Ipotšiše: ‘Na Mmušo wa Jehofa wa legodimong ke wa kgonthe go nna go etša mmušo wa batho? Na ke amogela le go thekga ka botlalo phuthego e bonagalago ya Jehofa gotee le Sehlopha sa yona se Bušago? Na ka mahlo a tumelo ke kgona go bona gore ditšhaba mo nakong ye di rapelwa boemong bja mafelelo bakeng sa Haramagedone? Na tumelo ya-ka e swana gabotse le ya “leru . . . la dihlatse” leo le bolelwago go Ba-Hebere kgaolo 11?​—Ba-Hebere 12:1; Kutollo 16:​14-16.

21. Tumelo e tutuetša bao ba nago le yona bjang, gomme ba šegofatšwa bjang? (Akaretša ditlhaloso tše di lego ka lepokising go letlakala 13.)

²¹ Bao ba nago le tumelo yeo e theilwego therešong ba tutueletšega go gata mogato. Go etša sehlabelo se se amogelegago seo se neetšwego ke Abele, dihlabelo tša bona tša theto di kgahla Modimo. (Ba-Hebere 13:​15, 16) Go etša Noage segoeledi sa toko se se ilego sa kwa Modimo, ba phegelela tsela ya go loka e le bagoeledi ba Mmušo. (Ba-Hebere 11:7; 2 Petro 2:5) Go etša Aborahama, bao ba nago le tumelo ye e theilwego therešong ba kwa Jehofa go sa šetšwe ditšhitišo gaešita lege ba le ka tlase ga maemo a lekago kudu. (Ba-Hebere 11:​17-19) Go etša bahlanka ba botegago ba Jehofa ba mehleng ya bogologolo, bao ba nago le tumelo lehono ba šegofatšwa le go hlokomelwa kudu ke Tatago bona yo lerato wa legodimong.​—Mateo 6:​25-34; 1 Timotheo 6:​6-10.

22. Tumelo e ka matlafatšwa bjang?

²² Ge e ba o le mohlanka wa Jehofa eupja o hwetša gore tumelo ya gago ke e fokolago ka tsela e itšego, o ka dira’ng? Matlafatša tumelo ya gago ka go ithuta Lentšu la Modimo ka mafolofolo le go dira gore molomo wa gago o falatše meetse a therešo ao a tletšego pelong ya gago. (Diema 18:4) Ge e ba tumelo ya gago e sa matlafatšwe nako le nako, e ka fokola, ya tapa, goba ya hwa. (1 Timotheo 1:​19; Jakobo 2:​20, 26) Ikemišetše gore se se se ke sa diragalela tumelo ya gago. Kgopela moya wa Jehofa ka go rapela gore: “Ntlhakodišê xo se dumeleng!”​—Mareka 9:24.

Dikarabo tša Gago ke Dife?

◻ Tumelo ke eng?

◻ Ke ka baka la’ng tumelo e ka se be gona ka ntle le therešo le moya o mokgethwa?

◻ Ke bjang Jesu Kriste e bilego Mophe-​thagatši wa tumelo ya rena?

◻ Ke ka baka la’ng re swanetše go hlahloba kamoo tumelo ya rena e lego matla ka gona?

[Lepokisi go letlakala 13]

BAO BA NAGO LE TUMELO. . .

◻ Ba bolela ka Jehofa. ​—2 Ba-Korinthe 4:13.

◻ Ba dira mediro e swanago le yeo e dirilwego ke Jesu.​—Johane 14:12.

◻ Ba kgothatša ba bangwe. ​—Ba-Roma 1:8, 11, 12.

◻ Ba fenya lefase.​—1 Johane 5:5.

◻ Ga ba na lebaka la go boifa.​—Jesaya 28:16.

◻ Ba letetše bophelo bjo bo sa felego.​—Johane 3:16.