Kutollo Yeo e Utolletšwego Johane

11 Ke ile ka fiwa lehlaka le le swanago le molamo+ gomme ka botšwa gore: “Eya o mete sekgethwa sa tempele ya Modimo le aletare o be o bale batho bao ba rapelago go yona. 2 Eupša o se ke wa meta lapa leo le lego ka ntle ga sekgethwa sa tempele ka gobane le filwe batho ba ditšhaba tše dingwe gomme ba tla hlasela motse o mokgethwa+ ka dikgwedi tše 42.+ 3 Ke tla roma dihlatse tša ka tše pedi gore di porofete ka matšatši a 1 260 di apere diaparo tšeo di dirilwego ka masaka go bontšha gore di nyamile.” 4 Dihlatse tšeo di swantšhetšwa ke mehlware e mebedi+ le dihlomelamabone tše pedi+ gomme di eme pele ga Morena wa lefase.+

5 Ge e ba motho le ge e le ofe a nyaka go gobatša dihlatse tšeo, di ntšha mollo melomong ya tšona gomme mollo woo wa tšhuma manaba ao a tšona. Ge e ba motho le ge e le ofe a ka nyaka go di gobatša, o tla bolawa ka tsela yeo. 6 Di na le maatla a go tswalela legodimo+ e le gore pula e se ke ya na+ matšatšing ka moka a ge di porofeta, ebile di na le maatla a go fetoša meetse gore e be madi.+ Le gona di na le maatla a go otla lefase ka kotlo e nngwe le e nngwe le go le otla gantši ka mokgwa woo di nyakago ka gona.

7 Ge dihlatse tšeo di feditše go porofeta, sebata seo se rotogago se etšwa sekoting se tla lwa le tšona sa di fenya sa ba sa di bolaya.+ 8 Ditopo tša tšona di tla rapalala seterateng se segolo sa motse o mogolo woo ka tsela ya seswantšhetšo o bitšwago Sodoma le Egepeta, moo Morena wa tšona le yena a ilego a kokotelwa koteng gona. 9  Batho ba merafo ya go fapafapana, meloko ya go fapafapana, ba go bolela maleme a go fapafapana le ba ditšhaba tše di fapafapanego, ba tla lebelela ditopo tša dihlatse tšeo ka matšatši a mararo le seripa+ ebile ba ka se dumelele gore ditopo tšeo di bolokwe. 10 Bao ba dulago lefaseng ba tla thabela gore dihlatse tšeo di hwile ba ba ba keteka. Le gona ba tla romelana dimpho ka gobane dihlatse tše tše pedi tšeo di bego di porofeta di be di ba tlaiša ka molaetša wa tšona.

11 Ka morago ga matšatši a mararo le seripa, Modimo o ile a di tsoša*+ tša boela tša phela gape ke moka tša emelela, gomme batho bao ba bonego seo ba ile ba tšhoga kudu. 12 Tša kwa lentšu le le hlabošago le le tšwago legodimong le re go tšona: “Rotogelang mono.” Ke moka tša rotogela legodimong ka leru gomme manaba a tšona a di bona. 13 Ka nako yeo go ile gwa ba le tšhišinyego e kgolo ya lefase. Karolo e tee ya motse woo o bego o arotšwe ka dikarolo tše lesome e ile ya wa gomme batho ba 7 000 ba bolawa ke tšhišinyego yeo. Ke moka bao ba šetšego ba ile ba tšhoga kudu gomme ba tumiša Modimo wa legodimong.

14 Masetlapelo a bobedi+ a fetile. Bjale tsebang gore masetlapelo a boraro a tla ka lebelo.

15 Morongwa wa bošupa o ile a letša phalafala ya gagwe+ ke moka legodimong gwa kwagala mantšu ao a hlabošago ao a bego a re: “Mmušo wa lefase o fetogile Mmušo wa Morena wa rena+ le wa Kriste wa gagwe+ ebile o* tla buša e le kgoši go ya go ile.”+

16 Bagolo ba 24+ bao ba bego ba dutše ditulong tša bona tša bogoši pele ga Modimo, ba ile ba khunamela Modimo difahlego tša bona di kgwathile fase gomme ba mo rapela, 17 ba re: “Re a go leboga wena Jehofa* Modimo, Ramatlaohle, wena yo a lego gona+ le yo a bego a le gona, ka gobane o dirišitše maatla a gago a magolo gomme wa thoma go buša o le kgoši.+ 18 Eupša batho ba ditšhaba ba ile ba galefa gomme wena wa bontšha gore o galefile. Le gona nako ya gore bahu ba ahlolwe e ile ya fihla le ya gore o putse+ baporofeta ba gago+ bao ba go hlankelago le bakgethwa le bao ba hlomphago leina la gago, ba bagolo le ba banyenyane, le go fediša bao ba senyago lefase.”+

19 Ke moka gwa bulwa sekgethwa sa tempele ya Modimo yeo e lego legodimong gomme ka bona areka ya kgwerano ya gagwe ka moo.+ Gwa ba le magadima, mantšu, medumo ya magadima, tšhišinyego ya lefase le sefako se segolo.