Lebaka Leo ka Lona ba Bangwe ba Tswalwago Lefsa
“XE MOTHO e se wa xo tswalwa lefsa, a ka se kê a bôna mmušo wa Modimo.” (Johane 3:3) Mantšu ao a ile a tšhoša gotee le go gakantšha batho ba bantši ga e sa le go tloga ge Jesu Kriste a a boletše nywageng e fetago 1 900 e fetilego.
Gore re kwešiše gabotse dipolelo tša Jesu mabapi le go tswalwa lefsa, gona re swanetše go thoma ka go araba dipotšišo tše: Morero wa Modimo bakeng sa batho ke ofe? Go direga’ng ka moya (soul) lehung? Mmušo wa Modimo o reretšwe go dira’ng?
Morero wa Modimo Bakeng sa Batho
Monna wa pele, Adama o bopilwe e le motho yo a phethagetšego yo e lego morwa wa Modimo. (Luka 3:38) Jehofa Modimo ga se a ka a rera gore Adama o swanetše go hwa. Adama le Efa mosadi wa gagwe ba be ba e-na le tebelelo ya go tšweletša lapa la motho le le se nago sebe leo le bego le tla phela ka mo go sa felego gomme la tlala lefase la paradeise. (Genesi 1:28) Lehu e be e se karolo ya morero wa mathomong wa Modimo bakeng sa monna le mosadi. Le ile la tsena bathong feela ka baka la go fetogelwa ga molao wa Modimo.—Genesi 2:15-17; 3:17-19.
Borabele bjo bo ile bja tsoša dikgang tše kgolo tše bjalo ka tshwanelo ya bogoši bja Modimo le go kgona ga batho go dula ba botegela melao ya gagwe. Go be go tla nyakega nako gore dikgang tšeo di lokišwe. Eupja morero wa Jehofa Modimo bakeng sa batho ga se wa fetoga, gomme a ka se ke a palelwa ke go dira seo a ikemišeditšego go se dira. O ikemišeditše ka botlalo go tlatša lefase ka lapa la motho le le phethagetšego leo le tlago go thabela bophelo bjo bo sa felego Paradeiseng. (Psalme 37:29; 104:5; Jesaya 45:18; Luka 23:43) Re swanetše go nagana ka therešo ye ya motheo ge re hlahloba mantšu a Jesu a lego mabapi le go tswalwa lefsa.
Go Direga’ng ka Moya (Soul) Lehung?
Ba sa tsebe seo moya o mokgethwa wa Modimo o se utolletšego bangwadi ba Beibele, bo-ra-difilosofi ba ba-Gerika ba ile ba katanela go hwetša morero wa bophelo. Ba be ba sa dumele gore motho o bopetšwe go phela nywaga e sego kae feela, gantši a phela maemong a nyamišago, gomme ka morago a se sa ba gona. Ba be ba nepile tabeng ye. Eupja diphethong tša bona mabapi le ditebelelo tša motho ka morago ga lehu, ba be ba fošitše. Ba ile ba phetha ka gore bophelo bja motho bo tšwela pele ka sebopego se sengwe ka morago ga lehu le gore ka gare ga motho yo mongwe le yo mongwe go na le moya (soul) wo o sa hwego.
Ba-Juda le ba ba ipolelago gore ke Bakriste ba ile ba tutuetšwa ke dikgopolo tše bjalo. Puku ya Heaven—A History e re: “Kae le kae moo Ba-Juda ba ba bafaladi ba bego ba kopana le dihlalefi tša ba-Gerika, kgopolo ya go se hwe ga moya [soul] e be e tšwelela.” Puku ye e oketša ka gore: “Dithuto tša Segerika tše di lego mabapi le moya [soul] di ile tša mela menaganong ya ba-Juda gomme mafelelong tša tsena ditumelong tša Bokriste. . . . Ka go hlola tlemagano yeo e swanago e nnoši ya filosofi ya Plato le mokgwa wa Beibele, Philo [ra-difilosofi wa mo-Juda wa lekgolong la pele la nywaga wa Alexandria] o ile a kgora tsela bakeng sa banagani ba Bakriste bao ba bego ba tla tla ka morago.”
Philo o be a dumela eng? Puku yona ye e tšwela pele ka gore: “Go yena, lehu le bušetša moya [soul] mathomong a wona, e lego boemong bja pele ga pelego. Ka ge moya [soul] e le wa lefase la moya, bophelo mmeleng e fo ba tiragalo e kopana, yeo gantši e nago le madimabe.” Lega go le bjalo, ‘boemo bja Adama bja pele ga ge a belegwa’ e be e le go se be gona. Go ya ka pego ya Beibele Modimo ga se a ka a dira tokišetšo ya go iphetišetša lefelong le lengwe lehung, bjalo ka ge o ka re lefase ke feela lefelo la go itokišeletša go ya bophelong bja boemo bja godimo goba bja tlase.
Tumelo ya gore moya (soul) wa motho ga o hwe ga e rutwe Lentšung la Modimo le le buduletšwego ka moya, e lego Beibele. Le gatee ga e diriše lentšu “moya [soul] o sa hwego.” Le bolela gore Adama o hlodilwe e le moya (soul), e sego a e-na le moya (soul). Genesi 2:7 e re: “Morêna Modimo a na a bopa motho, [ka] lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo.” Batho ga se ba ka ba holofetšwa tebelelo ya bophelo bjo bo sa felego legodimong goba go hlokofatšwa ka mo go sa felego diheleng tša mollo. Beibele e bontšha gore moya (soul) goba motho yo a hwago ga a gona e bile ga a ikwe. (Psalme 146:3, 4; Mmoledi 9:5, 10; Hesekiele 18:4) Ka baka leo, bo-ra-difilosofi ba bile le dikgopolo tšeo e sego tša Mangwalo mabapi le moya (soul). Re swanetše go itiša malebana le dikgopolo tšeo di fapošago tšeo di ka pipetšago kwešišo ya rena ya mantšu a Jesu a a lego mabapi le go tswalwa lefsa.
Go Tswalwa Lefsa Bakeng sa go ba Dikgoši
Jesu o ile a botša Nikodemo gore bao ba ‘tswalago lefsa ba tsena mmušong wa Modimo.’ (Johane 3:3-5) Mmušo wo, ke eng? Ka leleme la seswantšhetšo mathomong a histori ya motho, Jehofa Modimo o ile a tsebiša morero wa gagwe wa go diriša “peu” e kgethegilego—e lego mmuši yo a tlago—bakeng sa go pšhatla hlogo ya Noga ya kgale, Sathane Diabolo. (Genesi 3:15; Kutollo 12:9) Bjalo ka ge go utolotšwe ka mo go tšwelago pele Mangwalong, “peu” ye e ile ya tsebja e le Jesu Kriste, yo a bušago gotee le babuši ba bangwe mmušong wo o emelago bogoši bja Modimo ka tsela e kgethegilego, wona Mmušo wa Mesia. (Psalme 2:8, 9; Jesaya 9:5, 6; Daniele 2:44; 7:13, 14) Wo ke wona Mmušo wa legodimo, pušo ya magodimong yeo e tlago go lwela bogoši bja Jehofa le go lopolla batho bokgobeng bja sebe le lehu.—Mateo 6:9, 10.
Ba 144 000 ba kopanela le Jesu e le babuši-gotee le yena bao ba rekilwego bathong. (Kutollo 5:9, 10; 14:1-4) Modimo o kgethile ba bangwe go tšwa lapeng la motho le sa phethegago la Adama gore e be “bakxêthwa ba Yo-xodimo-dimo” bao ba bušago le Kriste Mmušong wa Mesia. (Daniele 7:27; 1 Ba-Korinthe 6:2; Kutollo 3:21; 20:6) Banna ba le basadi ba dumela go Jesu Kriste yo a boletšego gore ba be ba tla ‘tswalwa lefsa.’ (Johane 3:5-7) Go tswalwa mo go direga bjang le gona ka baka la’ng?
Batho ba ba kolobeditšwe meetseng e le balatedi ba Kriste. Modimo o ba lebaletše dibe tša bona motheong wa sehlabelo sa topollo sa Jesu, o ba baletše go loka gomme a ba amogela e le barwa ba moya. (Ba-Roma 3:23-26; 5:12-21; Ba-Kolose 1:13, 14) Go batho ba bjalo moapostola Paulo o re: “Xobane xa L’a ka la fiwa môya wa bohlanka wa xore Le boêlê Le boifê; Le filwe môya wa xo ba bana, woo, xe re na le wôna, ra hlaboša mantšu ra re: Baba! Tata! Môya-mokxêthwa Yêna mong ké hlatse ya xo kwana le môya wa rena, hlatse ya xo re re bana ba Modimo. Byale, xe re le bana, xôna re baji ba bohwa, baji ba bohwa ba Modimo, ba xo ja bohwa le Kriste; xobane re tlo ba rè tlaišexile le Yêna, ra tlo kxôna xo fiwa letaxô le Yêna.”—Ba-Roma 8:15-17.
Ba ka ge e le balatedi ba Kriste, ba tswetšwe ka bofsa goba ba thomile bophelo ka bofsa. Se se feleleditše ka kgonthišetšo ya gore ba tla ja lefa la legodimong la Jesu gotee le yena. (Luka 12:32; 22:28-30; 1 Petro 1:23) Moapostola Petro o hlalositše go tswalwa gape ka tsela ye: “A xo rêtwê Modimo Tata xo Mong wa rena Jesu Kriste, wa xo re tswala xapê ka kxauxêlô e kxolo ya xaxwe, ra tla ra ba ba kholofêlô ye e phelaxo ka xe Jesu Kriste a tsoxile bahung, xore re jê bohwa byo bo sa bolexo, byo bo se naxo senyalô, byo bo sa ônalexo, byo Le bo-boloketšwexo lexodimong.” (1 Petro 1:3, 4) Bophelo bjo bjo bofsa legodimong bo hwetšwa ke batho ba bjalo e le batho ka o tee ka o tee ka gobane Modimo o ba tsoša bjalo ka ge a tsošitše Jesu.—1 Ba-Korinthe 15:42-49.
Go Thwe’ng ka Lefase?
Se ga se bolele gore batho ka moka ba ba kwago mafelelong ba tla tswalwa lefsa gore ba tloge lefaseng ba ye legodimong. Kgopolo ye e fošagetšego e be e swana le ya bo-ra-difilosofi ba swanago le Philo yoo a bego a nagana gore “bophelo mmeleng [e] fo ba tiragalo e kopana, yeo gantši e nago le madimabe.” Eupja go be go se na selo se se fošagetšego ka tlholo ya Jehofa Modimo ya mathomong lefaseng.—Genesi 1:31; Doiteronomio 32:4.
Bophelo bja motho bo be bo sa rerelwa go ba bjo bo kopana le bjo bo nago le mahloko. Jesu Kriste le bao ba tswalwago lefsa gore e be dikgoši le baperisita gotee le yena legodimong ba tla tloša mafelelo ka moka a kotsi a borabele bja Sathane. (Ba-Efeso 1:8-10) Ka bona e le ‘peu e holofeditšwego ya Aborahama,’ “ditšhaba ka moka tša lefase ruri di tla itšhegofatša.” (Ba-Galatia 3:29; Genesi 22:18, NW) Go batho ba kwago se se tla bolela bophelo lefaseng la paradeise, bjo bo fapanego kudu le bophelo bja lehono bjo bokopana, bjo bo tletšego ka mahloko.—Psalme 37:11, 29; Kutollo 21:1-4.
Ke Bomang Bao ba Tlago go Holega?
Gare ga bao ba holwago ke tokišetšo ya Modimo ya go šegofatša batho e tla ba bahu bao ba tsošitšwego bao ba bontšhago tumelo sehlabelong sa topollo sa Jesu. (Johane 5:28, 29; Ditiro 24:15) Ba bantši ba bona ga se ba ka ba ithuta ka Modimo le Kriste ka gona ba be ba ka se bontšhe tumelo go Jesu. Bao ba tsošwago ba bile ba tla akaretša batho ba botegago ba go swana le Johane Mokolobetši, yo a hwilego pele ga ge lehu la Jesu le bula tsela ya go ya bophelong bja legodimong. (Mateo 11:11) Ka ntle ga ba, ‘lešaba le legolo la batho ba ditšhaba ka moka le hlatswitše mašela a lona la a tagafatša mading a kwana,’ Jesu Kriste. Ba arabela gabotse modirong wa go kwatša Mmušo, wo gona bjale o etelelwago pele ke ‘banababo’ Jesu bao ba tswetšwego lefsa gomme ba tla phologa ntwa ya Modimo ya Haragedone ba phela lefaseng le le hlwekišitšwego. (Kutollo 7:9-14; 16:14-16; Mateo 24:14; 25:31-46) Ka gona, thulaganyong ya Modimo, ba dimilione ba tla phologa le ge ba se ba tswalwa lefsa bakeng sa go yo buša le Kriste magodimong.—1 Johane 2:1, 2.
Na o tla ba gare ga bao ba tlago go hwetša bohwa bja bophelo lefaseng la paradeise? O ka ba gare ba bona ge e ba o bontšha tumelo sehlabelong sa Jesu Kriste gomme o kopanela ka mafolofolo le phuthego ya Bakriste ba therešo. Ga se ya senywa ke difilosofi eupja e tšwetše pele e le “kôkwanê le mothêô wa therešô.” (1 Timotheo 3:15; bapiša le Johane 4:24; 8:31, 32.) Ka gona o ka lebelela pele bokamoso bjo bo kgahlišago nakong ya ge barwa ba tswetšwego lefsa ba Modimo ba buša legodimong gomme bana ka moka ba Modimo ba lefaseng ba bušetšwa phethegong lefaseng le le kgahlišago la paradeise. Ka gona amogela sebaka sa gago sa go hwetša bophelo lefaseng le lefsa leo le nago le ditšhegofatšo tša ka mo go sa felego.—Ba-Roma 8:19-21; 2 Petro 3:13.
[Seswantšho go letlakala 6]
Adama ga se a ka a newa boikgethelo bja go phela legodimong goba go hlokofatšwa ka mo go sa felego diheleng tša mollo