Dipotšišo tše Tšwago go Babadi

◼ Na Bakriste ba bangwe ba tloditšwego ba tla phologa “ma-setla-pelo . . . a maxolo” bakeng sa go phela lefaseng le lefsa pele ba ka rotošetšwa legodimong?

Beibele ga e bolele se ka go lebanya.

Ke kgale Bakriste ba kgahlišwa ke ditokelo tšeo Modimo a bego a ka ba atološetša tšona. (Ditiro 1:6) Se e bile sa therešo kudu mehleng ya rena go tloga mola Mmušo wa hlongwago. (Mateo 24:​3, 24, 34) Ka ge bofelo bja tshepedišo ye ya dilo bo tla fihla mehleng ya bona, Bakriste ba ile ba ipotšiša ge e ba batlotšwa ba bangwe ba ka phela go phuleletša ‘ntwa ya mohla-mogolo wa Modimo’ gomme ba dira ka nakwana mo lefaseng pele ba ka amogela moputso wa bona wa legodimong. (Kutollo 16:​14) Beibele ga e bolele ge e ba seo se tla direga, lega go le bjalo, mehlala e mengwe le diporofeto di ile tša tšewa e le tše di ka laetšago gore seo se ka direga. Go e na le go kgomarela kgopolo ya rena, re ka letela go bona ka tsela yeo Modimo a tlago go dira dilo ka yona.

Ditiragalo tše dingwe tša Beibele di na le go swana le ditiragalo tšeo ka morago di lego gare ga batho ba Modimo. Ka mohlala, re a tseba gore Jona o ile a ba ka gare ga hlapi e kgolo matšatši a mararo le mašego a mararo. Batho ba bangwe ba ka lebelela seo e le feela mohlala wa phološo yeo e tšwago go Modimo, eupja Jesu o rile e be e le mohlala wa boporofeta wa kamoo a bego a tla ba ka lebitleng ka nako e swanago pele ga tsogo ya gagwe. (Jona 1:​17; Mateo 12:​40) Ee, phihlelo ya Jona e be e le boporofeta bjo bo nago le se bo se swantšhetšago. Ka mo go kwagalago, batho ba Modimo ba ile ba ela hloko diporofeto gotee le ditaba tše di kgethegilego tša Beibele go bona ge e ba mo gongwe di ka bontšha tsela yeo ka yona Jehofa a tlago tšwela pele a dirišana le bona.

Bjalo ka mohlala wo o akaretšago boporofeta bja Beibele, The Watch Tower ya December 15, 1928 e ahla-ahlile Mika 5:​2-15. Puku ya Mika e boletše ka go dirwa lešope ga Samaria ke ‘ba-Asiria’ gotee le go tšwa ga ba-Juda bothopjeng kua Babele. (Mika 1:​1, 5-7; 4:​10) Eupja e ile ya šupa gape dilong tšeo di bego di tlo tšwelela, tše bjalo ka go tswala ga Mesia kua Betlehema. (Mika 5:2) Mika o ile a porofeta gore ka morago ga go tšwa ga bona diatleng tša “ba-Asuri,” “mašalela a ba Jakobo” a tla ba ‘bjalo ka phoka ye e tšwago go Morena’ gomme ‘a ba bjalo ka tau ya ledumaedi mehlapeng ya dinku.’ (Mika 5:​6-8) The Watch Tower e hlalosa ka gore: “Se se ka tšewa e le sešupo sa gore mašaledi a mangwe a tla ba a le lefaseng gotee le ka morago ga go lwewa ga Haramagedone, ka gona ba tla ba le modiro o montši wo ba tlago go o dira leineng la Morena gotee le go mo reta le go mo tumiša.” Ela hloko polelo ya bothakga le e botse yeo e dirišitšwego go tšweletša kgonagalo ye: “Se se ka tšewa se le bjalo ka sešupo.”

Go thweng ka pego ya Beibele yeo e ka bago e swana le phologo e bjalo ya lefaseng? Mohlala o mongwe wo o ilego wa newa ke wo o lego mabapi le Noage gotee le lapa la gagwe. Noage o ile a lebelelwa e le yo a swantšhetšago Jesu mehleng ye ya bofelo. (Genesi 6:​8-10; Mateo 24:​37) Bjalo ka ge Noage a ile a hlahla mosadi wa gagwe gotee le barwa ba gagwe ba bararo le betši ba gagwe ba bararo go fihla bofelong bja tshepedišo yela ya bogologolo ya dilo, Kriste o tla nea tlhahlo bakeng sa mašaledi a sehlopha sa monyadiwa wa gagwe gotee le bao ba fetogilego bana ba “Tatê wa xo sa felexo” e lego Jesu. Mosadi wa Noage o ile a phologa Meetse-fula gomme a ba le karolo go mpshafatšweng ga borapedi bja therešo lefaseng leo le hlwekišitšwego. Seo se swanago e ka ba go phologela lefaseng le lefsa ga mašaledi a sehlopha sa monyadiwa.​—Jesaya 9:​5, 6; 2 Ba-Korinthe 11:2; Kutollo 21:​2, 9.a

Dipego tše dingwe tša Beibele le tšona di ile tša lebelelwa e le tšeo di ka bolelago gore ba bangwe ba batlotšwa mo gongwe ba ka phela lefaseng le lefsa. Ka mohlala, Jeremia o ile a phologa tshenyo ya Jerusalema; “monna” e a bego a swere sebjana sa pilwane o ile a šala e le gore a bone modiro wa go bolaya pele a ka boela morago bakeng sa go iša pego.​—Hesekiele 9:​4, 8, 11.

Ditlhaloso mabapi le kgonagalo ya gore ba bangwe ba batlotšwa ba ka phologela lefaseng le lefsa, di dirilwe ka dikakanyo tše botse gotee le seetšeng sa mehlala ya Beibele bakeng sa go leka go kwešiša diporofeto goba mehlala yeo ka morago e ka swanago. Ge e ba go ka direga gore go se be le o tee wa batlotšwa yo a šadišitšwego mo lefaseng, go ka se be le lebaka la go se kgotsofale. Re šetše re amogetše gore ditaba tša Beibele di kwešišwa gakaone ge nako e dutše e e-ya. Ka mohlala, Morokami wa January 1, 1982, o ile wa ahla-ahla Mika 5:​6-9 gape gomme wa hlalosa gore “mašaledi a ba-Isiraele ba moya ga se a ka a swanelwa ke go letela go fihlela ka morago ga . . . Haramagedone e le gore a swane le ‘phoka’ yeo e lapološago bathong.” Gape taba ye e neile kgonagalo ya gore mašaledi a ka phologa ntwa e kgolo ya Modimo gomme ka lebakanyana a “tšwela pele a swana le ‘phoka’ yeo e lapološago go ‘lešaba le legolo’ la ‘dinku tše dingwê.’ ” Lega go le bjalo, re ka bona gore go feta ga nako gotee le go gola ga seetša sa moya go ka atološa le go fetola kwešišo ya rena ya boporofeta goba ya ditiragalo tša Beibele​—Diema 4:18.

Re tloga re tseba gore Beibele e kgokaganya ‘go tla ga Morwa-motho’ gotee le go ‘bokanywa ga bakgethwa go tšwa thoko tšohle tša lefase.’ (Mateo 24:​29-31) Le gona, nakong ya “go ba gona ga Morena” matleng a Mmušo, batlotšwa bao ba robetšego lehung ba tsošetšwa bophelong bja legodimo. (1 Ba-Thesalonika 4:​15, 16, NW) Sa bakgethwa ba ke go fetoga karolo ya mosadi wa Kwana. Seo se direga neng?

Ka pukung ya Kutollo, kapejana ka morago ga gore Johane a bolele ka go fediša ga Modimo seotswa sa bodumedi, e lego Babele o Mogolo, o bolela ka “monyanya wa tšeô ya Kwana.” “Mosadi” wa ditšhila, wa boitshwaro bjo bo gobogilego o a tlošwa gomme re bona “monyalwa, mosadi wa Kwana” ‘a apere seaparo se bohlokwa, se se šweu se se se nago ditšhila, seo se swantšhetšago ditiro tša toko tša ba bakgethwa.’ (Kutollo 18:​10; 19:​2, 7, 8; 21:9) Phedišo ya Babele o Mogolo ke karolo ya masetla-pelo a magolo. (Mateo 24:​21; Kutollo 7:​14) Ka gona, go ka bolelwa gore ba bangwe ba sehlopha sa monyadiwa ba tla phologa masetla-pelong a magolo e le bohlatse bja go amogelwa le go šireletšwa ke Jehofa. (Tsefanya 2:3; bapiša le, Mateo 24:​22.) Ka gona, ge e ba ba tlogelwa mo lefaseng, ba be ba ka dula mo go fihlela ge Modimo a kgetha go ba rotošetša legodimong.

Lega go le bjalo, pego yeo e lego ka go Kutollo ga se ya neelwa ka tatelano e tsepamego. Le gona, ga go bonagale eka mašaledi a manyenyane a batlotšwa a tla nyakega bakeng sa go thoma go dira lefase le lefsa, ka gore ba šetše ba hlahlile dimilione tša Bakriste ba botegago bao ba tlago go phela ka mo go sa felego lefaseng. Ka gona, Modimo a ka rotošetša batlotšwa ba gagwe legodimong kapejana ka morago ga tshenyo ya Babele o Mogolo, e le go lokiša sebaka sa go direga ga “monyanya wa tšeô ya Kwana.” Ka gona, bakgethwa ka moka ba ka dira gotee le Kriste tabeng ya go ‘diša ditšhaba ka molamo wa tšhipi’ mašaleleng a masetla-pelo a magolo. (Kutollo 2:​26, 27; 19:​11-21) Ge e ba yeo e le tsela yeo Modimo a dirago dilo ka yona, gona ka moka ba 144 000 ba tla ba gotee le Jesu bakeng sa go ‘buša gotee le Kriste nywaga ka moka e sekete.’​—Kutollo 20:4.

Ruri, ke gabotse ge batho ba Modimo ba tloga ba fagahlela go fatišiša tsela yeo ka yona a kago hlahla bahlanka ba gagwe le go ba putsa. (Bapiša le, 1 Petro 1:​12.) Se se bontšha kholofelo ya bona ya gore thato ya gagwe e tla dirwa. Lege e ba re ka se ke e bile re sa swanela go kgomarela pono ya rena mabapi le dilo, re ka letela ka tlhologelo seo se tlago go direga.

[Mongwalo wa tlase]