Yesaya
46 Beli wawerama+ ndipo Nebo wagwada.
Mafano awo anyamulidwa ndi nyama, nyama zonyamula katundu.+
Mafanowo ali ngati katundu wolemera kwa nyama zotopa.
2 Milungu imeneyi imawerama komanso kugwada pa nthawi imodzi.
Singapulumutse katunduyo,*
Ndipo nayonso imatengedwa kupita ku ukapolo.
3 “Inu anyumba ya Yakobo ndimvetsereni, komanso inu nonse otsala a mʼnyumba ya Isiraeli,+
Inu amene ndakuthandizani kuyambira pamene munabadwa ndiponso kukunyamulani kuyambira pamene munatuluka mʼmimba.+
4 Ngakhale mudzakalambe, ine ndidzakhala chimodzimodzi.+
Ngakhale tsitsi lanu lidzachite imvi, ine ndidzapitiriza kukunyamulani.
Ndidzakunyamulani, kukuthandizani komanso kukupulumutsani ngati mmene ndakhala ndikuchitira.+
5 Kodi mungandifananitse kapena kundiyerekezera ndi ndani?+
Kodi munganene kuti ndine wofanana ndi ndani?+
6 Pali anthu amene amakhuthula golide mʼzikwama zawo.
Amayeza siliva pasikelo.
Iwo amalemba ganyu mmisiri wa zitsulo ndipo amapanga mulungu ndi zinthu zimenezi.+
Kenako anthuwo amayamba kumuweramira ndi kumulambira.*+
7 Iwo amamunyamula pamapewa awo.+
Amamutenga nʼkukamuika pamalo ake ndipo mulunguyo amangoima pomwepo.
Sasuntha pamene amuikapo.+
Anthuwo amamuitana mofuula, koma sayankha.
Sangapulumutse munthu amene ali pamavuto.+
8 Kumbukirani zimenezi ndipo mulimbe mtima.
Muziganizire mumtima mwanu, anthu ochimwa inu.
9 Kumbukirani zinthu zoyambirira zimene zinachitika kalekale,
Kuti ine ndine Mulungu ndipo palibenso wina.
Ine ndine Mulungu ndipo palibe aliyense wofanana ndi ine.+
10 Kutatsala nthawi yaitali, ndimaneneratu zimene zidzachitike,
Ndipo kale kwambiri ndinaneneratu zinthu zimene zidzachitike mʼtsogolo.+
Ine ndimanena kuti, ‘Zolinga zanga zidzachitikadi,+
Ndipo ndidzachita chilichonse chimene ndikufuna.’+
11 Ine ndikuitana mbalame yodya nyama kuchokera kotulukira dzuwa,*+
Ndikuitana munthu kuchokera kudziko lakutali kuti adzachite zolinga zanga.+
Ineyo ndalankhula ndipo ndidzazichita.
Ndakonza kuti zimenezi zichitike komanso ndidzazichita.+
13 Ine ndabweretsa pafupi chilungamo changa.
Chilungamocho sichili kutali,
Ndipo chipulumutso changa sichidzachedwa.+
Ndidzapereka chipulumutso mu Ziyoni, ndipo Isiraeli ndidzamʼpatsa ulemerero wanga.”+